មន្ត្រីជំនាញ​នៃ​ខណ្ឌរដ្ឋបាលជលផល ដឹកនាំដោយ​ លោក ទឹម បូរក្ស អនុរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ និងមានការសម្របសម្រួលពីលោក ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការបង្ក្រាបបទល្មើសជលផល ដោយរុះរើនិងបំផ្លាញចោលនូវឧបករណ៍ខុសច្បាប់នៅនឹងកន្លែងបានចំនួន៣ករណី និងលែងកូនត្រីចម្រុះទម្ងន់២២គីឡូក្រាម ចូលបឹងធម្មជាតិវិញ នៅចំណុចតាមដងទន្លេសាប ឃុំបាធាយ ស្រុកបាធាយ ខេត្តកំពង់ចាម។

លោក​ លី​ ស្រ៊ី​ នាយខណ្ឌជលផលខេត្តកំពង់ចាម បានឲ្យដឹងថា ការចុះបង្ក្រាបបទល្មើសជល ក្នុងភូមិសាស្ត្រខាងលើ ជំនាញបានរឹបអូសវត្ថុតាង និងបំផ្លាញចោលឧបករណ៍ល្មើស នៅនឹងកន្លែងរួមមាន៖ ឧបករណ៍លូស្បៃមុង របាំងស្បៃមុង និងលបប្រឹស១០០ ចំនួន ៧៥គ្រឿង និងបានប្រលែងកូនត្រីចម្រុះទម្ងន់ ២២គីឡូក្រាម ចូលទៅក្នុងបឹងធម្មជាតិវិញ។ 

ទន្ទឹមនឹងនេះដែរ​ ក្នុងនាមជាមន្ត្រីជំនាញ​នៃខណ្ឌជលផលកំពង់ចាម នឹងបន្តចុះត្រួតពិនិត្យ និងបង្ក្រាបបទល្មើស នៅក្នុងភូមិសាស្ត្រទន្លេ បឹង ព្រែក នៅតាមបណ្តាស្រុកក្នុងខេត្តកំពង់ចាម និងផ្សព្វផ្សាយ ដល់ប្រជានេសាទឈប់នេសាទដោយប្រើប្រាស់ឧបករណ៍ល្មើសច្បាប់ផងដែរ៕

អត្ថបទ​និង​រូបភាព​៖​ឡេក​ ចាន់ពេជ្រ​

The post សមត្ថកិច្ចជលផល​ បន្តចុះបង្ក្រាបបទល្មើសក្នុងភូមិសាស្ត្រស្រុកបាធាយ appeared first on Kampuchea Thmey Daily.

បើតាមមន្ត្រីខណ្ឌរដ្ឋបាលជលផលខេត្តបន្ទាយមានជ័យបាន​ឱ្យដឹងនៅរសៀលថ្ងៃទី២៧ ខែឧសភា ឆ្នាំ២០២៥ នេះថា រថយន្តដឹកត្រីខាងលើ ជារថយន្តម៉ាកាមរី កែច្នៃ ពណ៌ខ្មៅ ពាក់ស្លាកលេខភ្នំពេញ 2C-0865 ត្រូវបានឃាត់ អូសយកមករក្សាទុកនៅខណ្ឌរដ្ឋបាលជលផលកាលពីវរសៀលថ្ងៃទី ថ្ងៃទី២៧ ខែឧសភានេះតែម្ដង ដោយជំនាញមន្ត្រីជលផលថ្នាក់ជាតិ ចុះបង្ក្រាបដោយផ្ទាល់ លើកំណត់ផ្លូវជាតិលេខ៥៨ ទិសដៅពីស្រុកម៉ាឡៃឆ្ពោះមកកាន់ផ្លូវជាតិលេខ៥ សំដៅឆ្លងកាន់ខេត្តបន្ទាយមានជ័យ បន្តទៅខេត្តផ្សេងទៀត នៅជុំវិញបឹងទន្លេសាប។

មន្ត្រីជំនាញជលផលខេត្តបន្ទាយមានជ័យ បានបន្ត​ឱ្យដឹងទៀតថា ករណីនេះ គឺជា ករណីដែលថ្នាក់ជាតិចុះដោយផ្ទាល់ ដោយខណ្ឌជលផលគ្រាន់តែបានចូលរួម។

ចំពោះនីតិវិធីលើការផាកពិន័យ ឬធ្វើការចាត់ចែងយ៉ាងណានោះ លោកពុំទាន់ទទួលបាននៅឡើយ ដោយគ្រាន់តែដឹងថា ត្រីក្នុងរថយន្តជាត្រីទីឡាបព្យា នាំចូលពីក្រៅប្រទេស។

តាមមន្រ្តីជលផលថ្នាក់ជាតិបានឱ្យដឹងថា ត្រីខាងលើជាត្រីនុយ​ជំនាញ​នឹង​ធ្វើ​ការ​ផាកពិន័យតាមច្បាប់ជលផល។ តែបើតាមប្រភពដែលទទួលបាន ត្រីខាងលើ ត្រូវបាននាំចូលពីប្រទេសថៃ តាមច្រកតំបន់ម៉ាឡៃ ដោយឆ្លងកាត់មន្រ្តីជំនាញជាច្រើន ប្រចាំច្រកដូចជា  គយ និងគណៈកម្មាការច្រកទ្វារជាដើម ។ តែអ្វីដែលទទួលបានចុងក្រោយ មួយរយៈ​នេះ​ឈ្មួញបានសម្រុកនាំចូលត្រីក្លាសេ ពីប្រទេសថៃរួមមាន ត្រីប្រា ត្រីកន្ធរ ចូលកម្ពុជាខ្លះមានច្បាប់ និងខ្លះអត់ច្បាប់ ដើម្បីបន្តយកទៅលក់ចែកចាយ នៅតាមខេត្តជុំវិញបឹងទន្លេសាប។

ជាមួយគ្នានោះ មន្ត្រីជំនាញជលផលនៅខេត្តសៀមរាប និងបាត់ដំបងក៏​ បានបង្ក្រាបចាប់ផាកពិន័យ ជាបន្តបន្ទាប់ផងដែរ៕

ដោយ ៖ អ ពៅ

The post មន្ត្រី​ជលផល ចុះ​ចាប់​ត្រីទីឡាបព្យា នាំ​ចូល​ខុសច្បាប់​ពី​ប្រទេស​ថៃ បាន​មួយ​រថយន្ត appeared first on Kampuchea Thmey Daily.

នៅថ្ងៃទី២៤ ខែកញ្ញា ឆ្នាំ២០២៤នេះ ខណ្ឌរដ្ឋបាលជលផលកំពង់ចាម សហការជាមួយអាជ្ញាធរស្រុកជើងព្រៃនឹងស្រុកព្រៃឈរ ដោយមានការសម្របសម្រួលពីឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល បានមួយករណី ក្នុងនោះនៅក្នុងស្រុកកងមាសនិងស្រុកព្រៃឈរដោយកសាងសំណុំរឿងតាមនិតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាងនៃបទល្មើសជលផលនៅនឹងកន្លែង។

លោក លី ស្រ៊ី នាយខណ្ឌស្តីទីជលផលកំពង់ចាម បានឲ្យដឹងថា ជាលទ្ធផល ប្រតិបត្តិការចុះបង្រ្កាបបទល្មើសជលផលនេះដែរ ក្រុមការងារបានរុះរើកាប់បំផ្លាញចោលវត្ថុតាងនៅចំណុចទំនប់តំបន់បាទី ឃុំព្រៃចារ ស្រុកជើងព្រៃ ឧបករណ៍ដែលបំផ្លាញ់ចោលរួមមាន៖ឧបករណ៍លូស្បៃមុងសរុប២៥មាត់, របាំងស្បៃមុងប្រវែង ៧៦០ម៉ែត្រ, បង្គោលចម្រឹងចំនួន៣៩០ដើម, ចាក់លែងកូនត្រីចម្រុះទម្ងន់សរុប ១៧០គីឡូក្រាម ចូលក្នុងបឹងធម្មវិញ។

ទន្ទឹមនឹងនេះដែរ លោក លី ស្រ៉ី នាយខណ្ឌស្តីទីជលផលកំពង់ចាម ដែលដឹកនាំផ្ទាល់ បានបន្តចុះអប់រំផ្សព្វផ្សាយដល់ប្រជានេសាទឈប់នេសាទនៅតំបន់ កុំប្រើប្រាស់ឧបករណ៍ល្មើសច្បាប់ និងស្នើសុំឲ្យអាជ្ញាធរមូលដ្ឋានចូលរួមសហការរាយការណ៍និងបង្ក្រាប អ្វីដែលមន្ត្រីជំនាញស្នើសុំទៀតនោះ គឺសូមឲ្យបងប្អូនប្រជាពលរដ្ឋចូលរួមសហការទប់ស្កាត់ការនេសាទខុសច្បាប់ ដើម្បីរក្សាពូជត្រីបានច្រើន៕

​អត្ថបទ​និង​រូបភាព ​៖​ ឡេក​ ចាន់ពេជ្រ

The post មន្ត្រីជលផលកំពង់ចាម បន្តចុះបង្ក្រាបឧបករណ៍នេសាទខុសច្បាប់នៅភូមិសាស្ត្រស្រុកកងមាសនិងស្រុកព្រៃឈរ appeared first on Kampuchea Thmey Daily.

ប្រភពពី​ប្រជាពលរដ្ឋ​បន្តថា ការត្រួសត្រាយព្រៃលិចទឹកនេះបានកើតឡើង កាលពីថ្ងៃទី២៤ ខែឧសភា ឆ្នាំ២០២៤ ចាប់ពីចំណុច​ “ពាក់ខែល”​ រហូតទៅដល់ទៅដល់ចំណុច “តែអាន” ស្ថិតក្នុង ភូមិបាក់ព្រា ឃុំព្រៃចាស់ ស្រុកឯកភ្នំ ខេត្តបាត់ដំបង។

បុរសវ័យចំណាស់ម្នាក់សុំមិនបញ្ចេញឈ្មោះបានប្រាប់​ថា ការកាប់ត្រួសត្រាយព្រៃលិចទឹកដែលជាជម្រកត្រីបន្តពូជ ដើម្បីធ្វើជាគន្លងឬប្រជាពលរដ្ឋមួយចំនួនគេហៅថា “អានុក” សម្រាប់បទល្មើសនេសាទដែលគេហៅថា “បណរ៉ាវ” ដែលជាឧបករណ៍បទល្មើសនេសាទ ត្រូវបានច្បាប់ហាមឃាត់មិនអនុញ្ញាតិឲ្យប្រព្រឹត្តឡើយ។

ប្រភពដដែលដាក់ការសង្ស័យថា សកម្មភាពខាងលើអាចមានពាក់ព័ន្ធមន្ត្រីក្នុងតំបន់ណាម្នាក់នៅពីក្រោយ។ កាលណារដូវកាលទឹកឡើងដល់ចំណុចព្រៃដែលបានកាប់ខាងលើ ត្រីចម្រុះ​នឹងសម្រុកចូលគឺត្រូវជាប់ទាំងអស់ តាមរយះវិធីក្រសោបយកត្រីពេលចូលមកក្នុងជម្រកដែនរបស់វាដើម្បីបន្តពូជ។

ប្រភពបានទម្លាយថា ជនដែលបានជួលកម្មករកាត់ត្រួសត្រាយព្រៃលិចទឹកនៅចំណុចខាងលើនេះ ត្រូវបានគេ​ស្គាល់ ឈ្មោះ មាន ១.ឈ្មោះ ភា ម៉ៅ ,២.ឈ្មោះ រ៉ា ឌី៣.ឈ្មោះ ខេន។ ជនពាក់ព័ន្ធ​ទាំង ៣ បានជួលកម្មករឲ្យកាត់ព្រៃចាប់ពីចំណុច “ពាក់ខែល” រហូតទៅដល់ចំណុច “តែអាន” ដោយប្រើប្រាស់ម៉ាសុីនកាត់បានចម្ងាយប្រហែល ២ គីឡូម៉ែត្រ ហើយ​ពេលផ្អើល​ដល់​ពលរដ្ឋ​ចុះ​ទៅមើល ជនសង្ស័យ​ក៏​បានរត់គេចបាត់អស់តែម្តង។

ពលរដ្ឋ​សំណូមពរដល់មន្ត្រីពាក់ព័ន្ធមេត្តាជួយពិនិត្យនិង​ទប់ស្កាត់ ជាពិសេសសុំឲ្យលោកអភិបាលស្រុកយកចិត្តទុកដាក់កុំឲ្យសម្ងំធ្វើមិនដឹងមិនឮលើករណីខាងលើនេះ និង​កុំឲ្យប្រជាពលរដ្ឋអស់សង្ឃឹម។ ហើយក៏សុំឲ្យលោកអភិបាលខេត្ត យកចិត្តទុកដាក់លើករណីខាងលើនេះផងដែរ ដើម្បីផលប្រយោជន៍ទាំងអស់គ្នា។

ជុំវិញករណីខាងលើនេះ កម្ពុជាថ្មីមិនអាចសុំការបញ្ជាក់ពីលោកអភិបាលស្រុក លោក មុិល សុផល បានទេ ហើយខាងសហគមន៍ក៏​មិនមានប្រភពទំនាក់ទំនងបានដែរ។

ទោះយ៉ាងណា លោក ជួង សុភា នាយខ័ណ្ឌរដ្ឋបាលជលផលបានប្រាប់កម្ពុជាថ្មីតាមប្រព័ន្ធតេលេក្រាមថា លោកនឹងបញ្ជា​ទៅមន្ត្រីមូលដ្ឋានចុះពិនិត្យលើករណីនេះ តែលោកបានធ្លោយ​សម្លេងតាមតេលេក្រាម ដោយច្រឡំដាក់មកតេលេក្រាមកម្ពុជាថ្មីរួចលុបវិញភ្លាមៗ ដោយក្នុងសារសម្លេងដ៏ខ្លីនោះមានខ្លឹមសារថា “ជួយពិនិត្យមើលៗ កុំឲ្យអាមួយនោះ វាបង្ហោះនាំកើតរឿងរ៉ាវ”។

ឆ្លើយតបសម្លេងឆ្លើយឆ្លើយ​របស់នាយខ័ណ្ឌរដ្ឋបាលជលផល កម្ពុជាថ្មីបានដាក់សំណួរថា “បងនិយាយពាក្យនេះលុបវិញមានន័យថា ខាងបងពិតជាដឹងច្បាស់ជាងពលរដ្ឋ”។ លោកឆ្លើយថា “ខ្ញុំដាក់ច្រឡំ ហើយខ្ញុំនិយាយនេះមិនសំដៅ​លើ​បង​ទេ ព្រោះមានអ្នកកាសែតច្រើនគ្នា”។

ក្រៅពីនេះលោកក៏បានដាក់បន្ទុកទៅសហគមន៍បានដឹងច្បាស់ជាងគេ ហើយលោកអះអាងថា ករណីដូចគ្នានេះ​មាន​ច្រើនកន្លែងទៀតបើតាមលោកដឹង៕

អត្ថបទ៖ សៅ សារិទ្ធ

The post ទម្លាយ​បទល្មើសត្រួសត្រាយព្រៃលិចទឹក ត្រៀមក្រសោបហ្វូងត្រីចម្រុះមក​បន្តពូជ appeared first on Kampuchea Thmey Daily.

សមត្ថកិច្ចបានឲ្យដឹងថា ការកោះអញ្ជើញបុរសរូបនេះមកធ្វើកិច្ចសន្យាលើកទី២នេះ សមត្ថកិច្ចជំនាញក៏បានបង្គាប់ឲ្យជនសង្ស័យយករាល់ឧបករណ៍ពាក់ព័ន្ធ មកប្រគល់ឲ្យមន្ត្រីជំនាញផងដែរដែលក្នុងនោះមាន៖ អាំងវិចទ័រឆក់ត្រី ០១ គ្រឿងអាគុយ ០១ គ្រឿង និង​ដងឆក់០១គូរ។

ប្រភពពីប្រជាពលរដ្ឋបានឲ្យដឹងថា ដោយសារតែ សកម្មភាពរបស់បុរសរូបនេះ ធ្វើសកម្មភាពប្រើកាណូត ជាមធ្យោបាយ ដើរឆក់គ្រប់តំបន់រាប់សិបឆ្នាំ ហើយគ្មានចំណាត់ការណាមួយពីមន្ត្រីជំនាញពាក់ព័ន្ធ ទើបពួកគាត់រាយការណ៍ដើម្បីជូនព័ត៌មាននេះបន្តទៅមន្ត្រីជំនាញ ដើម្បីអនុវត្តតាមតម្រូវការរបស់ប្រជាពលរដ្ឋ និង​មានចំណាត់ការលើបុរសរូបនេះ។ បើពុំនោះទេ ពួកគាត់ថា មច្ឆាជាតិចម្រុះតូចធំនឹងហិនហោច ខណះឧបករណ៍ឆក់ត្រជាក់ និងក្តៅបង្កឲ្យកូនមច្ឆាជាតិចម្រុះងាយគ្រោះថ្នាក់ណាស់។

លោក ជួង សុភា នាយខ័ណ្ឌរដ្ឋបាលជលផលខេត្តបានឲ្យដឹងថា ក្រោយពីលោកទទួលព័ត៌មាន លោកបានដាក់បទបញ្ជាទៅមន្ត្រីនៅប្រចាំការតាមស្រុក ធ្វើកិច្ចការនេះភ្លាម ដោយហៅបុរសនោះមកធ្វើកិច្ចសន្យាលើកទីមួយនៅចំពោះមុខអាជ្ញាធរមូលដ្ឋានកាលពីថ្ងៃទី០៣ ខែធ្នូ ឆ្នាំ២០២៣កន្លងទៅ ក្នុងនោះក៏បានដកហូតឧបករណ៍ពាក់ព័ន្ធមួយចំនួនផង។

តែក្រោយមកបុរសរូបនេះបានបន្តបទល្មើស ទើបពលរដ្ឋបានរាយការណ៍ជាលើកទី២ ហើយលោកក៏បានឲ្យមន្ត្រីលោកចាត់វិធានការ នឹងធ្វើកិច្ចសន្យាជាលើកទី២នៅថ្ងៃនេះតែម្តង។

លោកបន្តថា បើសិនជាបុរស រូបនេះមិនព្រមបញ្ឈប់សកម្មភាពទេលោកនឹងបន្តនីតិវិធីទៅតុលាការ។

ដោយឡែក​ទាក់ទង​ឧបករណ៍ឆក់បើតាមមន្រ្តី​ជំនាញ​ជលផល​អះអាង​ថា មានពីរ​ប្រភេទ។ ​ប្រភេទ​ឆក់ត្រជាក់​បង្កឲ្យត្រី​អត់​ស្រកាគ្រោះថ្នាក់ខ្លាំងណាស់ បើកម្រិតអគ្គិសនីខ្លាំងអាចឆក់បានចម្ងាយជាង ៣០ ម៉ែត្រ ត្រូវការកាណូតឬទូកជាមធ្យោបាយ​ដើរឆក់។ តែបើឆក់ក្តៅគឺវាឆក់តែត្រីមានស្រកា អាច​ដើរឆក់បានដោយ​ចម្ងាយឆក់វាមានកម្រិតត្រឹមជាង ១ ម៉ែត្រពីឧបករណ៍ឆក់ប៉ុណ្ណោះ។

ប្រជាពលរដ្ឋបានសាទរ ចំពោះចំណាត់ការបានឆាប់រហ័ស របស់លោកនាយខ័ណ្ឌរដ្ឋបាលជលផល ក្នុងការទប់ស្កាត់រាល់បទល្មើសនេសាទ ដើម្បីអភិរក្សមច្ឆាជាតិក្នុងដែនបឹងទន្លេសាបនៃអាណាចក្រខេត្តបាត់ដំបងឲ្យបានគង់វង់ ក្នុងការលើកកម្ពស់សេដ្ឋកិច្ច សង្គម និង សេដ្ឋកិច្ចគ្រួសារ របស់ប្រជានេសាទជាលក្ខណះគ្រួសារ ដែលរស់នៅលើផ្ទៃទឹកបឹងទន្លេសាបឲ្យកាន់តែមានភាពប្រសើរឡើង តាមរយះការទប់ស្កាត់និងកាត់បន្ថយបទល្មើសនេសាទឲ្យឋិតក្នុងកម្រិតទាប ឬបំបាត់ទាំ ងស្រុងតែម្តង តាមដែលអាចធ្វើទៅបាន៕

អត្ថបទ៖ សៅ សារិទ្ធ

The post មន្រ្តីជំនាញ​ពន្យល់​បច្ចេកទេស​ឆក់ក្តៅឆក់ត្រជាក់អាចឲ្យត្រីផុតពូជ​ ក្រោយ​ឃាត់ខ្លួន​ជនសង្ស័យ​ម្នាក់ appeared first on Kampuchea Thmey Daily.

ប្រជាសហគមន៍ដែនបឹងទន្លេសាបបាននិយាយថា រាល់បទល្មើស​នេសាទ​គេសង្កេតឃើញក្នុងខែមករាមានសន្ទុះខ្លាំង ដោយសារតែចំនួនត្រីច្រើនចរាចរ​ពីតំបន់​មួយទៅតំបន់មួយ (ត្រីឡើង) ទើបជនខិលខូចបាននាំគ្នាសម្រុកប្រើឧបករណ៍​ខុសច្បាប់​ស្ទាក់យក​ទាំងត្រីតូចនិងធំដោយមិនគិតពីច្បាប់។

លោក ជួង សុភា នាយខ័ណ្ឌរដ្ឋបាលជលផលបានឲ្យដឹងនៅថ្ងៃទី២៦ ខែមករានេះថា បទល្មើស​ជលផល​នៅក្នុងខែមករា ឆ្នាំ ២០២៤ សរុបរួមចំនួន ៣៥ ករណី បំផ្លាញចោលវត្ថុតាង ចំនួន​៣២ ករណី និងបញ្ជូនទៅតុលាការ ០៣ ករណី ក្នុងនោះបានបញ្ជូនជនល្មើស​ទៅតុលាការ​ចំនួន ០៥​ នាក់ និងបានធ្វើកិច្ចសន្យាអប់រំណែនាំដល់ប្រជានេសាទបានចំនួន ២៦ នាក់​ផ្សេងទៀត។

លោក ជួង សុភា បន្តថា ក្នុងអំឡុងខែមករានេះគឺទំហំ​ទឹកចាប់ផ្តើមស្រកខ្លាំងពីតាមបណ្តាស្រុក​ជាប់បឹងទន្លេសាប ​ដែលក្នុងនោះមានដូចជា ស្រុកថ្មគោល ស្រុកសង្កែ ស្រុកមោងឫស្សី។ ចំណែក​ស្រុកឯកភ្នំក៏កំពុងចាប់ផ្តើមស្រកជាបណ្តើរៗ ដែលធ្វើឲ្យត្រីចម្រុះគ្រប់ច្រកល្ហកចុះទៅបឹង​ទន្លេ​សាប ទើបជនល្មើសតែងសម្រុកនាំគ្នាប្រើឧបករណ៍ខុសច្បាប់ស្ទាក់ចាប់មិនឲ្យត្រីគ្រប់ប្រភេទ​ចុះដល់​គោលដៅរបស់វា។

មន្ត្រីមូលដ្ឋានបានលើកឡើងដែរថា បើមន្ត្រីជំនាញពាក់ព័ន្ធមិនយកចិត្តទុកដាក់​បង្ក្រាបក្នុងខែមករា​នេះទេ ជនល្មើសកាន់តែនាំគ្នាប្រព្រឹត្តកាន់តែច្រើននោះចំនួន​ត្រីកាន់តែថយចុះ។

ក្នុងកិច្ចប្រជុំបូកសរុបការងារ​ក្នុង​ខេត្ត​បាត់ដំបង​កាលពីពេល​ថ្មីៗនេះ លោក សុខ លូ អភិបាលខេត្តបាត់ដំបង​ ក៏បានជម្រុញដល់មន្ត្រីជំនាញពាក់ព័ន្ធ ត្រូវតែយកចិត្តទុកដាក់បន្ថែមទៀតទៅលើ​បទល្មើស​នេសាទ ដែលជាធនធានធម្មជាតិដ៏សំខាន់បានបន្សល់ទុកឲ្យយើងទាំងអស់គ្នា ត្រូវតែ​ធ្វើការអភិរក្សឲ្យកាន់តែសម្បូរបែប។ ក្នុងនោះលោកក៏បានផ្តោតទៅលើសត្វស្លាបក្នុង​ដែនអភិរក្ស​បឹងទន្លេសាប​ផងដែរ ដែលជាគោលដៅទេសចរណ៍ដ៏សំខាន់មួយ សម្រាប់ទាញកំណើន​ភ្ញៀវ​ទេសចរ​ទាំង ក្នុងនិងក្រៅស្រុក ទៅទស្សនាកម្សាន្ត ដោយលោកបញ្ជាក់ថា បើសំបុក​ហ្វូងសត្វ​ស្លាប​មាន​ការ​ធ្លាក់ចុះនោះនឹងធ្វើឲ្យប៉ះពាល់ ដល់សេដ្ឋកិច្ចសង្គម និង​ប៉ះពាល់ដល់​ជីវភាពរស់​នៅប្រចាំថ្ងៃ របស់ប្រជាសហគមន៍យ៉ាងធ្ងន់ធ្ងរផងដែរ បើយើងមិនបន្តពង្រឹង បន្ថែមក្នុងការ អភិក្ស​ទាំង​មច្ឆា​ជាតិ​ទាំងហ្វូងសត្វស្លាប​ឲ្យកាន់តែរីកចម្រើននោះទេ៕

អត្ថបទ៖ សៅ សារិទ្ធ

The post បញ្ជូន​ជនល្មើស ០៥ នាក់ ពាក់ព័ន្ធបទល្មើសនេសាទទៅតុលាការ appeared first on Kampuchea Thmey Daily.

ប៉ុន្តែការបន្លាស់ទីរបស់ពពួកកូនត្រីទាំងនោះមិនត្រូវបានរួចខ្លួន ដោយសារតែឥទ្ធិពលស្បៃដែលជនឆ្លៀតឱកាសនាំគ្នាទៅត្រងយកទាំងអស់ដែលក្នុងមួយថ្ងៃៗមិនក្រោម១តោននោះឡើយ។ នេះបើតាមការអះអាងពីប្រជាពលរដ្ឋដែលបានឃើញសកម្មភាពនេះ ដែលបានកើតឡើងតាំងពីឆ្នាំមុនហើយគ្មានចំណាត់ការពីមន្ត្រីជំនាញ ទើបបែកធ្លាយនៅពេលដែលពួកគាត់បានប្រាប់កម្ពុជាថ្មីនៅល្ងាចថ្ងៃទី ១៨ ខែតុលានេះ។

ការបែកធ្លាយនេះដោយពួកគាត់បញ្ជាក់ថា បទល្មើសប្រើស្បៃអ៊ុយត្រងក្រសោបយកកូនត្រីនេះ កើតឡើងតាំងពីឆ្នាំមុន តែគ្មានមន្ត្រីណាបកបង្ក្រាបនោះទេ ហើយបន្តដល់ឆ្នាំនេះទៀត ដោយមួយថ្ងៃៗបានកូនត្រីមិនក្រោម ១ តោនឡើយ។ អ្វីដែល​ធ្វើឲ្យពួកគាត់រាយការណ៍មកអ្នកសារព័ត៌នាពេលនេះ ក៏ដោយសារជនល្មើសនោះ បានហាមឃាត់ពួកគាត់មិនឲ្យបង់សំណាញ់នៅទីក្បែរនោះដើម្បីដោះស្រាយម្ហូបក្នុងគ្រួសារបន្តិចបន្តួចតាមរយះឧបករណ៍ (សំណាញ់) ជាប្រពៃណី។

ពលរដ្ឋម្នាក់ក្នុងចំណោមអ្នកភូមិគឺលោក ហុំ គីសគ្លី បានឲ្យដឹងថា ការលើកឡើងរបស់ពួកគាត់ខាងលើពិតជាត្រឹមត្រូវ ហើយ ពេលនោះក៏លោកបានដឹងនិងឃើញដែរ រាល់សកម្មភាពរបស់ឈ្មួញដាក់ស្បៃអ៊ុយក្រសោបយកកូនត្រីនោះបានហាមមិនឲ្យបងប្អូនអ្នកភូមិបង់សំណាញ់នៅក្បែរនោះទេ ទើបពួកគាត់ក្តៅក្រហាយក៏បង្ហើបប្រាប់ដល់អ្នកសារព័ត៌មាននាពេលនេះតែម្តង ។

លោកបន្តថា សកម្មភាពដាក់ស្បៃត្រងក្រោបយកកូនត្រីនេះបានកើតឡើងតាំងពីឆ្នាំមុន ក្នុងមួយថ្ងៃៗគឺបានមិនក្រោម១ តោននោះទេ។ ពេលលោកបានឃើញម្តងៗគឺសោកស្តាយកូនត្រីណាស់ ដែលគ្មានមន្ត្រីណាមកហាមឃាត់បុគ្គលនោះ​សោះ ដោយលោកបន្តថា “ខ្ញុំស្គាល់ទាំងផ្ទះជននោះទៀតផង តែអត់ស្គាល់ឈ្មោះទេ តែផ្ទះគាត់នឹងនៅចម្ងាយពីទំនប់ប្រហែលជា ២០០ ម៉ែត្រប៉ុណ្ណោះ ខ្ញុំចង់ឲ្យមានមន្ត្រីមកបង្ក្រាប ហើយតម្រូវឲ្យធ្វើកិច្ចសន្យាផង ព្រោះតាមខ្ញុំសង្កេតមើលឃើញថា ការប្រើស្បៃនេះហាក់ដូចជាមានមន្ត្រីណាម្នាក់នៅពីក្រោយ ទើបបុគ្គលនេះហ៊ានហាមមិនឲ្យអ្នកភូមិបង់​សំណាញ់​នៅក្បែរនោះ ទើបធ្វើឲ្យអ្នកភូមិខឹងគ្រប់គ្នាបែបនេះ”។

លោក ជួង សុភា ប្រាប់កម្ពុជាថ្មីថា ការប្រើស្បៃដើម្បីត្រងក្រសោបយកកូនត្រីបែបនេះពិតជាខុសច្បាប់ ហើយលោកបានប្រាប់ថា ចាំឲ្យមន្ត្រីចុះទៅមើលតែចាំ ១ ទៅ ២ ថ្ងៃទៀត ព្រោះលោកថាមន្ត្រីកំពុងចុះបេសកកម្មនៅតាមតំបន់ផ្សេង។

ការឆ្លើយតបពីលោកនាយខ័ណ្ឌរដ្ឋបាលជលផលបែបនេះ ត្រូវបានប្រជាពលរដ្ឋ ឆ្លើយតបថា បើដឹងហើយនៅតែរងចាំ ដូចទុកឱកាសឲ្យឈ្មួញប្រមូលផលចឹងដែរ។ ពួកគាត់បន្តថា បើគិតតាមចម្ងាយនៅមិនឆ្ងាយពីទីតាំងមន្ត្រីឬអាជ្ញាធរនោះប៉ុ ន្មានទេ បើចង់ទប់ស្កាត់និងបង្ក្រាបមិនបាច់រកវិធីពន្យាពេលនោះទេ ខណះការប្រព្រឹត្តនេះ១ឆ្នាំកន្លងមកហើយ រឿងអីដែលលោកមន្ត្រីជលផលមិនដឹង។

ពួកគាត់បញ្ជាក់ថា ទង្វើបែបនេះហើយ ដែលរាល់បទល្មើសនៅបឹងទន្លេសាបមិនមានការថយចុះកាន់តែកើតឡើងជាបន្តបន្ទាប់បង្ក្រាបមិនចេះចប់ អស់តែក្រុមខ្នាតតូចតែអ្នកដាក់ខ្នាតធំនៅតែមាន ហើយពេលពួកគាត់រាយការណ៍ម្តងៗតែងពន្យាពេលថាថ្ងៃនេះឬថ្ងៃនោះរហូត។

ចំណែក លោក ហេង សិទ្ធ មន្ត្រីនៃមន្ទីរកសិកម្មបានប្រតិកម្មថា នេះជាទង្វើខុសច្បាប់ដែលមិនអាចអត់ឱនឲ្យបានក្នុងការ ប្រើប្រាស់ស្បៃក្រសោបយកកូនត្រីដែលធ្វើបន្លាស់ទីតាមលំហូរទឹកនៅទំនប់ស្ទាក់ទឹកបែបនេះ ធ្វើឲ្យប៉ះពាល់ធ្ងន់ធ្ងរដល់​កំណើនមច្ឆាជាតិ ក៏ដូចជាប៉ះពាល់ខ្លាំងដល់ជីវភាព ប្រជាកសិករដែលប្រកបរបរនេសាទជាលក្ខណះគ្រួសារ ដើម្បីជីវភាពប្រចាំថ្ងៃរបស់ពួកគាត់។

លោកថា ករណីនេះលោកនឹងរាយការណ៍ជូនប្រធានមន្ទីរដើម្បីមានវិធានការ។ ទំនប់ស្ទាក់ទឹក សាលាតាអន ដែលស្ថិត​ក្នុងស្រុកឯកភ្នំ បានសាងសង់រយះពេល ២ ឆ្នាំ រួចរាល់នៅឆ្នាំ២០២០ ដើម្បីបម្រើ​ជាផលប្រយោជន៍ដល់វិស័យកសិកម្មដែលក្នុងនោះមាន÷១-ការបង្កើនសមត្ថភាពស្រោចស្រពលើផ្ទៃដីរាប់ម៉ឺនហិកតានៅប៉ែកខាងក្រោម ២-​ដើម្បី​រក្សាស្ថេរភាពទឹកដើម្បីបម្រើដល់ការប្រើប្រាស់ទឹកស្អាតសម្រាប់ខេត្តបាត់ដំបង និងទី៣-សម្រាប់ លើកកម្ពស់សោភណភាព និងទាក់ទាញទេសចរណ៍បែបធម្មជាតិផងដែរ៕

អត្ថបទ៖ សៅ សារិទ្ធ

The post ពលរដ្ឋទម្លាយរឿងឈ្មួញប្រើស្បៃអ៊ុយទៅត្រងក្រសោប​យកកូនត្រីចម្រុះនៅទំនប់ស្ទាក់ទឹកសាលាតាអន appeared first on Kampuchea Thmey Daily.