​

ទោះបីមានការអនុម័តបែបនេះក្ដី Nvidia មិនទាន់បាន​ដឹកជញ្ជូនណាមួយទៅឱ្យចិននៅឡើយទេ ខណៈភាគីចិន​នៅតែប្រុងប្រយ័ត្នចំពោះការពឹងផ្អែកលើបច្ចេកវិទ្យាអាមេរិក ដោយ​ងាកទៅពង្រឹងផលិតកម្មបន្ទះឈីបក្នុងស្រុក ជាពិសេសបន្ទះឈីបបញ្ញាសិប្បនិម្មិត (AI)។

សេចក្ដីរាយការណ៍ជុំវិញបញ្ហានេះ ធ្វើឡើងស្របពេលដែល​នាយកប្រតិបត្តិក្រុមហ៊ុន Nvidia លោក ​ Jensen Huang បានធ្វើដំណើរទៅចិន ជាមួយគណៈប្រតិភូរបស់ប្រធានាធិបតីអាមេរិ​ក លោក​ ដូណាល់ ត្រាំ ​ដើម្បីជួបដោយផ្ទាល់មុខជាមួយប្រធានាធិបតីចិន លោក ស៊ី ជីនពីង នៅសប្ដាហ៍នេះ​។ ​ជំនួបត្រាំ-ស៊ី​ ត្រូវបាន​​គេមើលឃើញថា អាចជួយបន្ធូរភាពតានតឹងផ្នែកបច្ចេកវិទ្យារវាង​គូប្រជែងទាំង២​ ដែលអាចបើកឱកាសជាថ្មីសម្រាប់ Nvidia លើទីផ្សារចិន។

ប្រភពព័ត៌មាន​មិនបញ្ចេញឈ្មោះ បាន​ប្រាប់រ៉យទ័រថា ​ក្រុមហ៊ុនចិន​នីមួយៗអាចទិញបន្ទះឈីប H200 បានរហូតដល់ ៧៥​ ០០០ ​បន្ទះ​ ក្រោមលក្ខខណ្ឌត្រួតពិនិត្យរបស់អាមេរិក។ ទោះយ៉ាងណា រដ្ឋាភិបាលចិនកំពុងពិនិត្យយ៉ាងតឹងរឹង ព្រោះបារម្ភថា ការនាំចូលឈីប Nvidia អាចធ្វើឱ្យចិនពឹងផ្អែកលើបច្ចេកវិទ្យាបរទេស និងប៉ះពាល់ដល់ការអភិវឌ្ឍឈីបក្នុងស្រុករបស់ខ្លួន ដូចជាឈីបរបស់ Huawei ជាដើម​។

លោក Jensen Huang ធ្លាប់ព្រមានថា ការរឹតបន្តឹងការនាំចេញរបស់អាមេរិក កំពុងធ្វើឱ្យ Nvidia បាត់បង់ទីផ្សារនៅចិន ដែលធ្លាប់មានចំណែករហូតដល់ ៩៥% នៃទីផ្សារឈីប AI ទំនើប​កម្រិតខ្ពស់។

ថ្លែង​ក្នុងសវនាការព្រឹទ្ធសភាកាលពីខែមុន រដ្ឋមន្ត្រីពាណិជ្ជកម្មអាមេរិក​ Howard Lutnick បាននិយាយថា៖ «រដ្ឋាភិបាលចិន មិនទាន់អនុញ្ញាតឱ្យក្រុមហ៊ុន​ខ្លួនទិញឈីបទាំងនេះនៅឡើយទេ ព្រោះពួកគេចង់ផ្តោតលើឧស្សាហកម្មក្នុងស្រុករបស់ខ្លួន»។ ​មែនទែនទៅ អាមេរិក​បើកភ្លើងខៀវតាំងតែពីចុងឆ្នាំ ២០២៥ ប៉ុន្តែការបញ្ជាទិញ និងដឹកជញ្ជូននៅតែជាប់គាំងមកទល់ពេលនេះ។

គួរគូសបញ្ជាក់ថា មុន​អាមេរិក​រឹតបន្តឹងការនាំចេញបន្ទះឈីបទៅចិនជាបន្តបន្ទាប់កាលពីប៉ុន្មានឆ្នាំមុន​​ ក្រុមហ៊ុន​ Nvidia បានគ្រប់គ្រងប្រហែល ៩៥% នៃទីផ្សារបន្ទះឈីប AI ទំនើបរបស់ប្រទេសចិន ខណៈ​ចិន​រួមចំណែក​ប្រហែល ១៣% នៃប្រាក់ចំណូលសកលរបស់ Nvidia។ លោក Jensen Huang ​ពីមុន ធ្លាប់​បានប៉ាន់ប្រមាណថា ទីផ្សារ AI របស់​ចិនតែមួយ អាចមានតម្លៃ ៥០ ​ប៊ីលានដុល្លារនៅឆ្នាំ ២០២៥​។

អាមេរិកបាន​បង្កើនការរឹតបន្តឹងកាន់តែខ្លាំងនៅដើមឆ្នាំ ២០២៥ ដោយ​សំអាងថា វិធានការរបស់ខ្លួនគឺដើម្បី​ពន្យឺតការរីកចម្រើនផ្នែកបច្ចេកវិទ្យា និងយោធារបស់​ចិន។ យ៉ាងណាមិញ ការរឹតបន្តឹងទាំងនេះ ​បានពន្លឿនការជំរុញរបស់​ចិន​ឱ្យ​ពឹងផ្អែក​លើ​ខ្លួនឯង​ក្នុងវិស័យ​បន្ទះឈីប​។ ក្រុមហ៊ុនចិនកំពុងវិនិយោគយ៉ាងច្រើនក្នុងការអភិវឌ្ឍបន្ទះឈីប AI ក្នុងស្រុក ដោយក្រុមហ៊ុនដូចជា​ Huawei លេចចេញជាជម្រើសក្នុងស្រុកដ៏សំខាន់ជំនួស Nvidia៕

The post អាមេរិកបើកភ្លើងខៀវឱ្យ Nvidia លក់បន្ទះឈីប H200 ទៅក្រុមហ៊ុនចិនចំនួន ១០ appeared first on Kampuchea Thmey Daily.

ការងាកទៅរកផលិតកម្មបន្ទះឈីបនេះ គឺជាផ្នែកមួយ​នៃយុទ្ធសាស្រ្តរបស់ ByteDance ដើម្បីធានាការផ្គត់ផ្គង់នៃបន្ទះឈីបទំនើប។

ប្រភព​បាន​អះអាងថា ByteDance កំណត់គោលដៅឱ្យមាន​គំរូបន្ទះឈីបនៅត្រឹមបំណាច់ខែមីនា ហើយក្រុមហ៊ុនគ្រោងនឹង​ផលិតបន្ទះឈីបដែលរចនាឡើងសម្រាប់មូឌែល AI ផ្សេងៗ យ៉ាងហោចណាស់ ១០០ ០០០ បន្ទះ នៅឆ្នាំ ២០២៦ នេះ។ ប្រភព​ម្នាក់ក្នុងចំណោមនោះ បាន​និយាយទៀតថា​ ByteDance កំពុងមើលពីលទ្ធភាពដើម្បីបង្កើនផលិតកម្មនោះរហូតដល់ ៣៥០ ០០០ បន្ទះ។ ​

ប្រភព​បន្តថា បច្ចុប្បន្ន ByteDance កំពុងពិភាក្សាជាមួយ Samsung អំពីការទទួលបានបន្ទះឈីប​អង្គចងចាំ ដែលបច្ចុប្បន្នពិបាករកណាស់ ពីព្រោះក្រុមហ៊ុនជាច្រើន​នាំគ្នាផ្ដោតលើ​ផលិតកម្មបន្ទះឈីប​ AI។ ​ការណ៍នេះហើយ ដែលធ្វើឱ្យលទ្ធភាព​នៃកិច្ចព្រមព្រៀងរវាង ByteDance និង Samsung មានតម្លៃជាពិសេស។ ​​

ទោះបីបែបនេះក្ដី អ្នកនាំពាក្យរបស់ ByteDance បាននិយាយថា របាយការណ៍ដែលថា ក្រុមហ៊ុនកំពុងអភិវឌ្ឍបន្ទះឈីបផ្ទាល់ខ្លួន​នោះ គឺមិនត្រឹមត្រូវទេ ប៉ុន្តែក៏មិនបានផ្តល់ព័ត៌មានលម្អិតបន្ថែមដែរ។ ដោយឡែក Samsung ឯណោះវិញ ​មិនទាន់ចេញប្រតិកម្មយ៉ាងណាទេ។

គេមើលឃើញថា ប្រសិន​បើគម្រោងដដែល​ដំណើរការទៅមុខ នោះវានឹង​ក្លាយជា​ជំហានដ៏សំខាន់​សម្រាប់ ByteDance​។ ក្រុមហ៊ុននេះ ចង់អភិវឌ្ឍបន្ទះឈីបផ្ទាល់ខ្លួនដើម្បីដោះស្រាយតម្រូវការកុំព្យូទ័រ AI របស់ខ្លួនអស់រយៈពេលជាច្រើនឆ្នាំមកហើយ រួមទាំងការ​ចាប់ផ្តើមជួលអ្នកជំនាញបន្ទះឈីប​នៅដើមឆ្នាំ ២០២២។

កាលពី​ខែមិថុនា ឆ្នាំ២០២៤ រ៉យទ័របានរាយការណ៍ថា ByteDance កំពុងធ្វើការជាមួយក្រុមហ៊ុនផលិតបន្ទះឈីបរបស់​អាមេរិក​ Broadcom ដើម្បីអភិវឌ្ឍបន្ទះឈីប AI ​ទំនើប​​ ដោយរំពឹងថា ក្រុមហ៊ុនតៃវ៉ាន់ TSMC ​គឺអ្នកផលិត​។

ក្រុមហ៊ុនបច្ចេកវិទ្យាធំៗដូចជា Google, Amazon និង Microsoft ក៏បានបង្កើតបន្ទះឈីប AI ផ្ទាល់ខ្លួនរបស់ពួកគេផងដែរ។ ​ក្រុមហ៊ុនយក្សៗ​ទាំងនេះ ធ្វើបែបនេះដើម្បី​កាត់បន្ថយការពឹងផ្អែកលើ​ក្រុមហ៊ុន Nvidia ដែលបច្ចុប្បន្នគ្របដណ្ដប់ទីផ្សារសម្រាប់បន្ទះឈីប AI ​ទំនើប​។

សម្រាប់ក្រុមហ៊ុនបច្ចេកវិទ្យាចិន ការរឹតបន្តឹងរបស់សហរដ្ឋអាមេរិកលើការលក់បន្ទះឈីប​ទំនើប​ទៅចិន ​បានធ្វើឱ្យវាកាន់តែសំខាន់ក្នុងការអភិវឌ្ឍបន្ទះឈីបផ្ទាល់ខ្លួនរបស់ពួកគេ។ ByteDance មិនទាន់បានចេញបន្ទះឈីបផ្ទាល់ខ្លួននៅឡើយទេ ខណៈដៃគូប្រកួតប្រជែង​ផ្សេងៗដូចជា Alibaba និង Baidu មាន​បន្ទះឈីបផ្ទាល់ខ្លួនរួចហើយ៕

​

The post ក្រុមហ៊ុនមេរបស់ TikTok អភិវឌ្ឍបន្ទះឈីប AI ហើយចរចាជាមួយ Samsung ដើម្បី​ផលិត​ appeared first on Kampuchea Thmey Daily.

តួលេខចំណាយរបស់ក្រុមហ៊ុន AI ដែលមាន​មូលដ្ឋាននៅទីក្រុង Hangzhou នេះ ត្រូវបាន​បើកបង្ហាញ​ក្នុងអត្ថបទមួយ ដែលចុះផ្សាយនៅលើ​ទិនានុប្បវត្តិ​ Nature ​​កាលពីថ្ងៃពុធ។

គួររំឭកថា កាលពីខែមករា ​DeepSeek ​បាន​ដាក់ចេញនូវប្រព័ន្ធ AI ថ្មី ដោយ​អះអាងថា ចំណាយលុយអភិវឌ្ឍន៍តិច ប៉ុន្តែមានប្រសិទ្ធភាព​មិនចាញ់គូប្រជែង។ កាលនោះ វិនិយោគិនបាន​នាំគ្នាលក់ភាគហ៊ុននៅតាមបណ្ដាក្រុមហ៊ុនបច្ចេកវិទ្យារបស់លោកខាងលិច ​​ដោយ​បង្កជាការធ្លាក់ចុះផ្សារភាគហ៊ុនទ្រង់ទ្រាយធំ ដោយ​ពួកគេព្រួយបារម្ភថា ម៉ូដែល AI ចិនថ្មី អាចគំរាមកំហែងដល់ភាពលេចធ្លោនៃ​ក្រុមហ៊ុនកំពូលៗខាង AI ដូចជា Nvidia ជាដើម។

បើតាមអត្ថបទចុះផ្សាយលើ Nature ម៉ូឌែល R1 ​​ដែល​ចំណាយប្រាក់ត្រឹមជិត ៣០០ ០០០ ដុល្លារនោះ ត្រូវបាន​ដាក់ដំណើការដោយ​ប្រើប្រាស់បន្ទះឈីប 512 Nvidia H800 ផលិតដោយ​ក្រុមហ៊ុន Nvidia។

គេមើលឃើញថា តម្លៃដែល DeepSeek ចំណាយខុសគ្នាឆ្ងាយធៀប​នឹង​ការចំណាយរបស់ក្រុមហ៊ុន AI លោកខាងលិច។

កាលពីឆ្នាំ ២០២៣ លោក Sam Altman ដែលជានាយកប្រតិបត្តិនៃក្រុមហ៊ុន AI ​យក្ស OpenAI បាននិយាយ​ថា ក្រុមហ៊ុនបាន​ចំណាយប្រាក់ប្រមាណ «ច្រើនជាង ១០០ លាន​ដុល្លារ» ដើម្បី​បណ្តុះបណ្តាលម៉ូដែល AI គោលរបស់ក្រុមហ៊ុន​។ យ៉ាងណាមិញ លោកមិនបាន​បង្ហាញព័ត៌មាន​លម្អិតណាមួយនោះទេ។

ការណ៍គួរឱ្យកត់សម្គាល់នោះគឺថា ការអះអាងរបស់ក្រុមហ៊ុន DeepSeek អំពីការចំណាយលើការអភិវឌ្ឍ​ AI ​និងបច្ចេកវិទ្យាដែលខ្លួន​បាន​ប្រើប្រាស់ បាន​រងការចោទសួរយ៉ាងច្រើន​ពីបណ្ដា​ក្រុមហ៊ុន និងមន្ត្រី​អាមេរិក​។

មែនទែនទៅ បន្ទះឈីប H800 ដែល​ DeepSeek បានលើកឡើង ត្រូវបានរចនាឡើងដោយ Nvidia សម្រាប់ទីផ្សារចិន ក្រោយ​សហរដ្ឋអាមេរិកបាន​បិទការ​នាំចេញបន្ទះឈីបសម្រាប់ AI រួមមាន​ H100 និង A100 AI ​ទៅចិនក្នុងខែតុលា ឆ្នាំ ២០២២៕

​

The post DeepSeek ចំណាយជិត ៣ សែនដុល្លារ ដើម្បីបង្វឹកម៉ូដែល AI របស់ខ្លួន​ appeared first on Kampuchea Thmey Daily.

ក្រសួងបាន​និយាយក្នុងសេចក្ដីថ្លែងការណ៍ថា ​គ្រប់បុគ្គល ឬក្រុមហ៊ុន ត្រូវជូនដំណឹងដល់អាជ្ញាធរ​ម៉ាឡេស៊ី​យ៉ាងហោចណាស់ ៣០​ ថ្ងៃជាមុន នៅពេលនាំចេញ ដឹកឆ្លងកាត់ ឬនាំយកទំនិញ «ដឹកកាត់» ណាមួយដែលមិន​ចុះបញ្ជីច្បាស់លាស់ ​ក្នុងបញ្ជីមុខទំនិញយុទ្ធសាស្ត្ររបស់​ម៉ាឡេស៊ី។

ការចាត់វិធានការបែបនេះ ធ្វើឡើងដើម្បី​បំពេញ​ចន្លោះប្រហោងនៃ​បទប្បញ្ញត្តិ ខណៈ​ម៉ាឡេស៊ីពិចារណា​លើការបន្ថែមបន្ទះឈីប AI ​ទំនើប​អាមេរិក ទៅក្នុងបញ្ជីនៃទំនិញ​យុទ្ធសាស្ត្ររបស់ខ្លួន។

ក្រសួងពាណិជ្ជកម្ម​បាន​និយាយយ៉ាងដូច្នេះថា៖ «ម៉ាឡេស៊ីមានជំហររឹងមាំប្រឆាំងនឹងការប៉ុនប៉ង​គេច​វេស​​ពីការត្រួតពិនិត្យការនាំចេញ ឬចូលរួមក្នុងសកម្មភាពពាណិជ្ជកម្មខុសច្បាប់ដោយបុគ្គល ឬក្រុមហ៊ុនណាមួយ ដែលនឹងប្រឈមមុខនឹងវិធានការផ្លូវច្បាប់យ៉ាងតឹងរឹង ប្រសិនបើ​រកឃើញថាបំពានច្បាប់»។

គួរគូសបញ្ជាក់ថា កាសែត Financial Times បានរាយការណ៍កាលពីខែមីនាថា ​​ម៉ាឡេស៊ី​បាន​ធ្វើការរឹតបន្តឹងបទប្បញ្ញត្តិស្តីពីបន្ទះឈីប ​ដោយសារតែរង​សម្ពាធពីសហរដ្ឋអាមេរិក ​លើការរឹតត្បឹតលំហូរបន្ទះ​ឈីប​ទំនើបរបស់​ខ្លួន​ទៅចិន​ ដោយ​ខ្លាចចិនយកទៅប្រើសម្រាប់ទំនើបកម្មយោធា៕

​

The post ម៉ាឡេស៊ីទាមទារអាជ្ញាបណ្ណពាណិជ្ជកម្ម សម្រាប់​ការដឹកជញ្ជូនបន្ទះឈីបមានប្រភពពីអាមេរិក appeared first on Kampuchea Thmey Daily.