អាមេរិកបើកភ្លើងខៀវឱ្យ Nvidia លក់បន្ទះឈីប H200 ទៅក្រុមហ៊ុនចិនចំនួន ១០

សហរដ្ឋអាមេរិក​បាន​បើកភ្លើងខៀវឱ្យក្រុមហ៊ុនផលិតបន្ទះឈីប​ Nvidia លក់បន្ទះឈីបទំនើបប្រភេទ H200 ​ទៅឱ្យ​ក្រុមហ៊ុនចិនប្រមាណ ១០ ​រួមមាន Alibaba, Tencent, ByteDance និង JD.com។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដោយ​ស្រង់សម្ដីប្រភព​មិនបញ្ចេញឈ្មោះ។

​

ទោះបីមានការអនុម័តបែបនេះក្ដី Nvidia មិនទាន់បាន​ដឹកជញ្ជូនណាមួយទៅឱ្យចិននៅឡើយទេ ខណៈភាគីចិន​នៅតែប្រុងប្រយ័ត្នចំពោះការពឹងផ្អែកលើបច្ចេកវិទ្យាអាមេរិក ដោយ​ងាកទៅពង្រឹងផលិតកម្មបន្ទះឈីបក្នុងស្រុក ជាពិសេសបន្ទះឈីបបញ្ញាសិប្បនិម្មិត (AI)។

សេចក្ដីរាយការណ៍ជុំវិញបញ្ហានេះ ធ្វើឡើងស្របពេលដែល​នាយកប្រតិបត្តិក្រុមហ៊ុន Nvidia លោក ​ Jensen Huang បានធ្វើដំណើរទៅចិន ជាមួយគណៈប្រតិភូរបស់ប្រធានាធិបតីអាមេរិ​ក លោក​ ដូណាល់ ត្រាំ ​ដើម្បីជួបដោយផ្ទាល់មុខជាមួយប្រធានាធិបតីចិន លោក ស៊ី ជីនពីង នៅសប្ដាហ៍នេះ​។ ​ជំនួបត្រាំ-ស៊ី​ ត្រូវបាន​​គេមើលឃើញថា អាចជួយបន្ធូរភាពតានតឹងផ្នែកបច្ចេកវិទ្យារវាង​គូប្រជែងទាំង២​ ដែលអាចបើកឱកាសជាថ្មីសម្រាប់ Nvidia លើទីផ្សារចិន។

ប្រភពព័ត៌មាន​មិនបញ្ចេញឈ្មោះ បាន​ប្រាប់រ៉យទ័រថា ​ក្រុមហ៊ុនចិន​នីមួយៗអាចទិញបន្ទះឈីប H200 បានរហូតដល់ ៧៥​ ០០០ ​បន្ទះ​ ក្រោមលក្ខខណ្ឌត្រួតពិនិត្យរបស់អាមេរិក។ ទោះយ៉ាងណា រដ្ឋាភិបាលចិនកំពុងពិនិត្យយ៉ាងតឹងរឹង ព្រោះបារម្ភថា ការនាំចូលឈីប Nvidia អាចធ្វើឱ្យចិនពឹងផ្អែកលើបច្ចេកវិទ្យាបរទេស និងប៉ះពាល់ដល់ការអភិវឌ្ឍឈីបក្នុងស្រុករបស់ខ្លួន ដូចជាឈីបរបស់ Huawei ជាដើម​។

លោក Jensen Huang ធ្លាប់ព្រមានថា ការរឹតបន្តឹងការនាំចេញរបស់អាមេរិក កំពុងធ្វើឱ្យ Nvidia បាត់បង់ទីផ្សារនៅចិន ដែលធ្លាប់មានចំណែករហូតដល់ ៩៥% នៃទីផ្សារឈីប AI ទំនើប​កម្រិតខ្ពស់។

ថ្លែង​ក្នុងសវនាការព្រឹទ្ធសភាកាលពីខែមុន រដ្ឋមន្ត្រីពាណិជ្ជកម្មអាមេរិក​ Howard Lutnick បាននិយាយថា៖ «រដ្ឋាភិបាលចិន មិនទាន់អនុញ្ញាតឱ្យក្រុមហ៊ុន​ខ្លួនទិញឈីបទាំងនេះនៅឡើយទេ ព្រោះពួកគេចង់ផ្តោតលើឧស្សាហកម្មក្នុងស្រុករបស់ខ្លួន»។ ​មែនទែនទៅ អាមេរិក​បើកភ្លើងខៀវតាំងតែពីចុងឆ្នាំ ២០២៥ ប៉ុន្តែការបញ្ជាទិញ និងដឹកជញ្ជូននៅតែជាប់គាំងមកទល់ពេលនេះ។

គួរគូសបញ្ជាក់ថា មុន​អាមេរិក​រឹតបន្តឹងការនាំចេញបន្ទះឈីបទៅចិនជាបន្តបន្ទាប់កាលពីប៉ុន្មានឆ្នាំមុន​​ ក្រុមហ៊ុន​ Nvidia បានគ្រប់គ្រងប្រហែល ៩៥% នៃទីផ្សារបន្ទះឈីប AI ទំនើបរបស់ប្រទេសចិន ខណៈ​ចិន​រួមចំណែក​ប្រហែល ១៣% នៃប្រាក់ចំណូលសកលរបស់ Nvidia។ លោក Jensen Huang ​ពីមុន ធ្លាប់​បានប៉ាន់ប្រមាណថា ទីផ្សារ AI របស់​ចិនតែមួយ អាចមានតម្លៃ ៥០ ​ប៊ីលានដុល្លារនៅឆ្នាំ ២០២៥​។

អាមេរិកបាន​បង្កើនការរឹតបន្តឹងកាន់តែខ្លាំងនៅដើមឆ្នាំ ២០២៥ ដោយ​សំអាងថា វិធានការរបស់ខ្លួនគឺដើម្បី​ពន្យឺតការរីកចម្រើនផ្នែកបច្ចេកវិទ្យា និងយោធារបស់​ចិន។ យ៉ាងណាមិញ ការរឹតបន្តឹងទាំងនេះ ​បានពន្លឿនការជំរុញរបស់​ចិន​ឱ្យ​ពឹងផ្អែក​លើ​ខ្លួនឯង​ក្នុងវិស័យ​បន្ទះឈីប​។ ក្រុមហ៊ុនចិនកំពុងវិនិយោគយ៉ាងច្រើនក្នុងការអភិវឌ្ឍបន្ទះឈីប AI ក្នុងស្រុក ដោយក្រុមហ៊ុនដូចជា​ Huawei លេចចេញជាជម្រើសក្នុងស្រុកដ៏សំខាន់ជំនួស Nvidia៕