ព័ត៌មានអន្ដរជាតិ

ម៉ាឡេស៊ីទាមទារអាជ្ញាបណ្ណពាណិជ្ជកម្ម សម្រាប់ការដឹកជញ្ជូនបន្ទះឈីបមានប្រភពពីអាមេរិក

បានផុស

១២ ខែ មុន

នៅ

ថ្ងៃចន្ទ ១៤ កក្កដា ២០២៥

ដោយ

ក្រសួងពាណិជ្ជកម្មម៉ាឡេស៊ី បានឱ្យដឹងនៅថ្ងៃចន្ទនេះថា រាល់ការដឹកជញ្ជូន រួមមានការនាំចេញ ការឆ្លងកាត់ (Transshipment) និងដឹកកាត់ (Transit) នូវបន្ទះឈីបបញ្ញាសិប្បនិម្មិតទំនើបដែលមានប្រភពពីសហរដ្ឋអាមេរិក នឹងត្រូវទាមទារឱ្យមានអាជ្ញាបណ្ណអនុញ្ញាតពាណិជ្ជកម្ម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយក្នុងសេចក្ដីថ្លែងការណ៍ថា គ្រប់បុគ្គល ឬក្រុមហ៊ុន ត្រូវជូនដំណឹងដល់អាជ្ញាធរម៉ាឡេស៊ីយ៉ាងហោចណាស់ ៣០ ថ្ងៃជាមុន នៅពេលនាំចេញ ដឹកឆ្លងកាត់ ឬនាំយកទំនិញ «ដឹកកាត់» ណាមួយដែលមិនចុះបញ្ជីច្បាស់លាស់ ក្នុងបញ្ជីមុខទំនិញយុទ្ធសាស្ត្ររបស់ម៉ាឡេស៊ី។

ការចាត់វិធានការបែបនេះ ធ្វើឡើងដើម្បីបំពេញចន្លោះប្រហោងនៃបទប្បញ្ញត្តិ ខណៈម៉ាឡេស៊ីពិចារណាលើការបន្ថែមបន្ទះឈីប AI ទំនើបអាមេរិក ទៅក្នុងបញ្ជីនៃទំនិញយុទ្ធសាស្ត្ររបស់ខ្លួន។

ក្រសួងពាណិជ្ជកម្មបាននិយាយយ៉ាងដូច្នេះថា៖ «ម៉ាឡេស៊ីមានជំហររឹងមាំប្រឆាំងនឹងការប៉ុនប៉ងគេចវេសពីការត្រួតពិនិត្យការនាំចេញ ឬចូលរួមក្នុងសកម្មភាពពាណិជ្ជកម្មខុសច្បាប់ដោយបុគ្គល ឬក្រុមហ៊ុនណាមួយ ដែលនឹងប្រឈមមុខនឹងវិធានការផ្លូវច្បាប់យ៉ាងតឹងរឹង ប្រសិនបើរកឃើញថាបំពានច្បាប់»។

គួរគូសបញ្ជាក់ថា កាសែត Financial Times បានរាយការណ៍កាលពីខែមីនាថា ម៉ាឡេស៊ីបានធ្វើការរឹតបន្តឹងបទប្បញ្ញត្តិស្តីពីបន្ទះឈីប ដោយសារតែរងសម្ពាធពីសហរដ្ឋអាមេរិក លើការរឹតត្បឹតលំហូរបន្ទះឈីបទំនើបរបស់ខ្លួនទៅចិន ដោយខ្លាចចិនយកទៅប្រើសម្រាប់ទំនើបកម្មយោធា៕