បបូរមាត់ខ្មៅ Archives - Kampuchea Thmey Daily

ប្រែបបូរមាត់ពីខ្មៅស្រអាប់ ទៅជាទន់ល្មើយផ្កាឈូក ដោយរូបមន្ត ៨ យ៉ាងនេះ

សាង ស្រីល័ក្ខ — Mon, 28 Mar 2022 09:35:54 +0000

បបូរមាត់ទន់ល្មើយ ពណ៌ផ្កាឈូកជាអ្វីដែលស្រីៗតែងតែចង់បាន ព្រោះអាចជួយលើកសម្រស់ផ្ទៃមុខ និងធ្វើឲ្យមាត់មានភាពទាក់ទាញ។ ជាអកុសល កត្តាអាកាសធាតុ របបអាហារ និងទម្លាប់រស់នៅប្រចាំថ្ងៃអាចធ្វើឱ្យបបូរមាត់យើងស្ងួត ប្រេះ និងប្រែជាពណ៌ខ្មៅ។ អ៊ីចឹងយើងគួរធ្វើម៉េចដើម្បីបានបបូរមាត់ទន់ល្មើយ ពណ៌ផ្កាឈូកដូចបំណង និងមិនប៉ះពាល់សុខភាព?

យើងអាចសាកល្បងវិធីធម្មជាតិទាំង ៨ ដូចខាងក្រោមដើម្បីឱ្យបបូរមាត់យើងមានសុខភាពល្អ ទន់ល្មើយ និងមានពណ៌ផ្កាឈូក៖

១. ស្ករ និងទឹកឃ្មុំ

ស្ករសគឺជាស្ក្រាប់ធម្មជាតិដ៏ល្អ ហើយទឹកឃ្មុំអាចជួយឱ្យស្បែកបបូរមាត់យើងមានសំណើម។ យើងអាចលាយស្ករសជាមួយទឹកឃ្មុំ បន្ទាប់មកលាបឱ្យសព្វលើបបូរមាត់ ហើយម៉ាស្សាបបូរមាត់ជាចលនារង្វង់។ ទុកចោល ១០ នាទី រួចលាងទឹកចេញ។

២. ត្រសក់

ត្រសក់មានប្រសិទ្ធភាពក្នុងការកម្ចាត់ស្បែកខ្មៅ ផ្តល់សំណើមដល់ស្បែក និងធ្វើឱ្យបបូរមាត់យើងមានពណ៌ផ្កាឈូក។ យើងអាចត្រដុសចំណិតត្រសក់ថ្នមៗនៅលើបបូរមាត់ជាចលនារង្វង់ ទុកចោល ១៥ នាទី រួចលាងទឹកចេញ។

៣. ប្រទាលកន្ទុយក្រពើ

យើងក៏អាចម៉ាស្សាបបូរមាត់ជាមួយប្រទាលកន្ទុយក្រពើថ្នមៗជាចលនារង្វង់ បន្ទាប់មកទុកឱ្យស្ងួត រួចលាងទឹកចេញដើម្បីឱ្យបបូរមាត់យើងទន់ ព្រោះប្រទាលកន្ទុយក្រពើអាចជួយបន្ថែមសំណើមដល់បបូរមាត់យើង។

៤. ក្រូចឆ្មារ និងស្ករ

យើងអាចខាត់បបូរមាត់ម្តងក្នុងមួយសប្តាហ៍ដើម្បីកម្ចាត់កោសិកាស្បែកងាប់ចេញដោយប្រើស្ករស និងក្រូចឆ្មារដោយដាក់ស្ករសលើចំណិតក្រូចឆ្មារ ឬលាយស្ករសកន្លះស្លាបព្រាបាយជាមួយទឹកក្រូចឆ្មារមួយស្លាបព្រាបាយ បន្ទាប់មកត្រដុសលើបបូរមាត់ថ្នមៗជាចលនារង្វង់ប្រហែលមួយទៅពីរនាទីរហូតដល់ស្កររលាយអស់ រួចលាងទឹកចេញ។

លើសពីនេះទៅទៀត ក្រូចឆ្មារមានប្រសិទ្ធិភាពក្នុងការជួយឱ្យស្បែកភ្លឺថ្លាដែលអាចជួយកាត់បន្ថយអាការៈខ្មៅបបូរមាត់។

៥. ក្រមួនធម្មជាតិ

យើងអាចប្រើក្រមួនធម្មជាតិដូចជា ប្រេងដូង ឬក្រមួនឃ្មុំមកលាបមាត់ដើម្បីរក្សាសំណើម ធ្វើឱ្យបបូរមាត់យើងរលោង និងមានសុខភាពល្អ។

៦. ផ្លែឈើស្រស់

យើងអាចប្រើផ្លែឈើស្រស់ដូចជា ស្ត្របឺរី ឆឺរី ទទឹម ឬរាសបឺរីមកលាបបបូរមាត់ដើម្បីធ្វើឱ្យបបូរមាត់យើងមានពណ៌ផ្កាឈូកដោយយកសំឡីជ្រលក់ទឹកផ្លែឈើដែលយើងចូលចិត្ត រួចលាបលើបបូរមាត់ ទុកចោល ១៥ នាទី រួចលាងទឹកចេញ។ យើងគួរធ្វើបែបនេះមួយថ្ងៃរំលងមួយថ្ងៃ។

៧. ក្រូចឆ្មារ និងទឹកឃ្មុំ

យើងអាចលាយទឹកក្រូចឆ្មារ ១ ស្លាបព្រាកាហ្វេ និងទឹកឃ្មុំ ១ ស្លាបព្រាកាហ្វេ រួចលាបលើបបូរមាត់ ទុកចោល ៥ នាទី រួចលាងសម្អាតចេញដើម្បីឱ្យបបូរមាត់ទន់ មានសំណើម និងមានពណ៌ភ្លឺថ្លាជាងមុន។

៨. ច្រាស់ដុសធ្មេញ

យើងអាចយកច្រាសដុសធ្មេញស្អាតដែលមានសរសៃច្រាស់ទន់ ជ្រលក់ទឹកឱ្យសើមមកម៉ាស្សាបបូរមាត់ថ្នមៗជាចលនារង្វង់ដើម្បីជំរុញចលនាឈាមរត់ដែលជួយធ្វើបបូរមាត់យើងមានពណ៌ផ្កាឈូក និងទន់ព្រោះការម៉ាស្សាបែបនេះក៏ជួយជម្រុះកោសិកាស្បែកងាប់ៗចេញពីបបូរមាត់ដែរ។

លើសពីនេះទៅទៀត ដើម្បីបានបបូរមាត់ទន់ល្មើយ ពណ៌ផ្កាឈូកយើងគួរញុំាទឹក និងគេងឱ្យបានគ្រប់គ្រាន់ ញុំាបន្លែផ្លែឈើស្រស់ឱ្យបានច្រើន កាត់បន្ថយស្រេស្ត ចៀសវាងជក់បារី ឬប្រើក្រែមលាបបបូរមាត់ដែលមានសារធាតុគីមី៕

អត្ថបទផ្ដល់ដោយ៖Hello Krupet

ចុចអាន៖៧ វិធីងាយៗ ជួយព្យាបាលបបូរមាត់ខ្មៅឲ្យប្រែជាស៊ីជម្ពូ និង ទន់ល្មើយ

ចុចអាន៖ហេតុអ្វីបបូរមាត់កាន់តែឡើងខ្មៅ? ដោះស្រាយបែបណា?

The post ប្រែបបូរមាត់ពីខ្មៅស្រអាប់ ទៅជាទន់ល្មើយផ្កាឈូក ដោយរូបមន្ត ៨ យ៉ាងនេះ appeared first on Kampuchea Thmey Daily.

៧ វិធីងាយៗ ជួយព្យាបាលបបូរមាត់ខ្មៅឲ្យប្រែជាស៊ីជម្ពូ និង ទន់ល្មើយ

សាង ស្រីល័ក្ខ — Thu, 25 Nov 2021 10:06:24 +0000

បញ្ហាបបូរមាត់ខ្មៅ ខ្លះអាចមកពីតំណពូជ ឬ បណ្ដាលមកពីហេតុផលមួយចំនួនទៀត។ អាកប្បកិរិយាជាច្រើន ដែលយើងធ្វើនៅក្នុងជីវិតប្រចាំថ្ងៃ អាចធ្វើឲ្យបបូរមាត់ខ្មៅ រួមទាំងអាហារដែលញ៉ាំ ប្រសិនបើការថែទាំមិនល្អគ្រប់គ្រាន់ ឬបញ្ហាមិនត្រូវបានកែតម្រូវ បបូរមាត់នឹងប្រែជាខ្មៅជាងមុន។

កម្ពុជាថ្មីមានវិធីដ៏ល្អមួយ ដើម្បីជួយដោះស្រាយបញ្ហាបបូរមាត់ខ្មៅ ឲ្យប្រែមកជាពណ៌ផ្កាឈូក ទន់ល្មើយមកវិញ។

១ ផឹកទឹកឲ្យបានច្រើន

ផឹកទឹកតិចពេក នឹងធ្វើឲ្យបបូរមាត់របស់យើងមើលទៅខ្មៅ ស្ងួត ប្រេះ មិនស្អាត ដោយសារតែទឹកជួយរក្សាសំណើមនៅក្នុងស្បែក រួមទាំងបបូរមាត់ផងដែរ។ តំបន់បបូរមាត់អាចបាត់បង់សំណើមយ៉ាងងាយ ជាងតំបន់ដទៃ។ ការផឹកទឹកនឹងជួយស្តារ ហើយចូលទៅចិញ្ចឹមស្បែកឲ្យយមានសំណើម។

២ ចៀសវាងអាកប្បកិរិយាដែលធ្វើឲ្យបបូរមាត់ខ្មៅ

ភាគច្រើនមូលហេតុនៃបបូរមាត់ខ្មៅ គឺមកពីទម្លាប់ប្រចាំថ្ងៃរបស់យើង។ មិនថាលិទ្ធបបូរមាត់ញឹកញាប់ ការជក់បារី បើអាចចៀសបាន គួរចៀសវាង។ នៅពេលញ៉ាំផ្លែឈើ និងបន្លែ អាហារ ឬបង្អែម ចូរលាងមាត់ជានិច្ច។ ចំណុចសំខាន់គឺត្រូវព្យាយាមចៀសវាងការប្រើក្រែមលាបមាត់ បង្កឲ្យមានប្រតិកម្មអាឡ័កស៊ី ហើយមុនពេលចូលគេង កុំភ្លេចលាបក្រែមបំប៉នបបូរមាត់ ដើម្បីផ្តល់សំណើម។

៣ ប្រើច្រាសដុសធ្មេញដើម្បីជួយ

បន្ទាប់ពីដុសធ្មេញរួច អ្នកក៏អាចប្រើច្រាសដុសធ្មេញមកត្រដុសថ្នមៗ នៅជុំវិញបបូរមាត់ខាងលើ និងខាងក្រោម ដើម្បីជួយជម្រុះកោសិកាចាស់ៗចោល។ ធ្វើបែបនេះរាល់ថ្ងៃ ប្រហែលមួយខែ អ្នកនឹងឃើញភាពខុសគ្នា។

៤ កុំចេះតែប្រើផលិតផលផ្ដេសផ្ដាសឲ្យសោះ

មិនថាទិញថ្នាំមកលាបខ្លួនឯង ឬមានការផ្សាយពាណិជ្ជកម្មតាមកញ្ចក់ទូរទស្សន៍ក៏ដោយ។ ផលិតផលទាំងនោះ មិនអាចធានាបានទេ ផលប៉ះពាល់អវិជ្ជមាន អាចកើតឡើងយ៉ាងធ្ងន់ធ្ងរ ឬក្នុងរយៈពេលយូរ។ ប៉ុន្តែប្រសិនបើអ្នកកំពុងជួបប្រទះភាពមិនស្រួលផ្សេងទៀត អ្នកគួរតែទៅពិគ្រោះជាមួយគ្រូពេទ្យជំនាញ ដើម្បីកំណត់ពីមូលហេតុ។

៥ វីតាមីន Bអាចស្តាស្បែកឡើងវិញ

បន្ថែមពីវិធីខាងលើ ការញ៉ាំអាហារដែលមានវីតាមីន B ជាសារធាតុសំខាន់សម្រាប់ស្បែក និងភ្នាសរំអិល។ ពួកវាមាននៅក្នុងអង្ករសំរូប ថ្លើម បន្លែស្លឹកបៃតង គ្រាប់អាល់ម៉ុន សណ្តែកដី ឬគ្រាប់ស្វាយចន្ទី។

៦ រូបមន្តទឹកឃ្មុំសំណើម

យកទឹកឃ្មុំ ស្ករ និង Vaseline កន្លះស្លាបព្រាបាយ លាយចូលគ្នា រួចម៉ាស្សាលើបបូរមាត់របស់អ្នក។ ទុកវាចោលប្រហែល ១០ នាទី រួចប្រើសំឡីដែលសើម ដោយទឹកក្ដៅឧណ្ហៗមកជូតចេញ។ រូបមន្តនេះ នឹងជួយជម្រុះកោសិកាស្បែកខ្មៅចេញ។ ជាពិសេស ជួយធ្វើឲ្យបបូរមាត់ត្រឡប់ទៅពណ៌ផ្កាឈូក ទន់ល្មើយភ្លាមៗ។

៧ រូបមន្តពណ៌ផ្កាឈូក Lemonade

ទឹកក្រូចឆ្មា ទឹកដោះគោ និងស្ករ ½ ស្លាបព្រាកាហ្វេ លាយចូលគ្នា ហើយលាបជារង្វង់លើមាត់ ឬអ្នកអាចប្រើបន្ទះសំលីកប្បាសមកជ្រលក់រួចបិទលើមាត់ ហើយទុកចោលប្រហែល ៥ នាទី កុំយូរពេក (ព្រោះទឹកក្រូចឆ្មាមានជាតិអាស៊ីត) រូបមន្តទាំងពីរនេះ គួរធ្វើតែពីរដងក្នុងមួយសប្ដាហ៍បានហើយ៕

ប្រែសម្រួល៖ សាង ស្រីល័ក្ខ

ចុចអាន៖ស្រាយចម្ងល់ពីជំងឺរើម ពិតជាបណ្ដាលឲ្យស្លាប់ឬយ៉ាងណា?

The post ៧ វិធីងាយៗ ជួយព្យាបាលបបូរមាត់ខ្មៅឲ្យប្រែជាស៊ីជម្ពូ និង ទន់ល្មើយ appeared first on Kampuchea Thmey Daily.