ប្រជា​កសិករ​រស់​នៅ​តាម​តំបន់​មួយ​ចំនួន​នៃ​បណ្ដា​ស្រុក/ក្រុង នៅ​ទូទាំង​ខេត្ត​ក្រចេះ បាន​និង​កំពុង​ចាប់​ផ្ដើម​ការងារ​បង្ក​បង្កើន​ផល​ស្រូវ​រដូវវស្សា នៅដើម​រដូវវស្សា​ឆ្នាំ​នេះ បាន​ទាន់​ពេល​វេលា បន្ទាប់​ពី​អាកាស​ធាតុ​អំណោយ​ផល មាន​ភ្លៀង​ធ្លាក់​គ្រប់គ្រាន់​នៅ​រយៈ​ពេលប៉ុន្មានថ្ងៃចុងក្រោយនេះ។

ក្រៅពី​ការងារ​បង្កបង្កើន​ផល​ស្រូវ​វស្សា​ហើយ​នោះ ប្រជាកសិករ​នៅ​ក្នុង​ស្រុក​ចិត្របុរី ​បាន​ធ្វើចម្ការដាំ​ដំណាំ​ដំឡូងមី ស្វាយចន្ទី និង​ដំណាំ​រួម​ផ្សំ​ផ្សេង​ៗ​ទៀតដើម្បី​ទទួល​បាន​ប្រាក់​ចំណូល​បន្ថែម​សម្រាប់​ផ្គត់ផ្គង់​ក្នុងគ្រួសារ។

យោង​តាម​របាយការណ៍​របស់​មន្ទីរកសិកម្ម រុក្ខាប្រមាញ់ និង​នេសាទ​ខេត្ត​ក្រចេះ បាន​ឱ្យ​ដឹងនៅព្រឹកនេះថា គិត​ត្រឹម​ថ្ងៃទី២៤ ខែ​កក្កដា ឆ្នាំ២០២៥ ជា​លទ្ធផល ការងារបង្កបង្កើនផល​ដំណាំ​គ្រប់ប្រភេទ​ប្រចាំថ្ងៃ សម្រេច​ការ​ដាំដុះ​ស្រូវ​រដូវវស្សា សរុប​បាន​ចំនួន ៥៧ ៧៥៦ ហិកតា ស្មើ​នឹង ៩៨,៦១% នៃ​ផែន​ការ ៥៨ ៧៥០ ហិកតា កើន​ឡើង​ច្រើន​ជាង​ឆ្នាំ​មុន ១៩៣ ហិកតា។ សម្រេច​ការ​ដាំដុះដំណាំ​ឧស្សាហកម្ម​រយៈ​ពេលខ្លីរដូវវស្សា រួមមាន ដំឡូងមី ពោតក្រហម ពោតស ល្ង ដំឡូងគរ សរុប​បានចំនួន ៧៧ ៦២៥ ហិកតា ស្មើនឹង ៩៤,១៣% នៃ​ផែនការ ៨២ ៤៦៦ ហិកតា តិច​ជាង​ឆ្នាំមុន ៤៤០ ហិកតា។

ចំពោះ​ការងារ​ប្រមូល​ផល​ស្រូវ​រដូវវស្សា សម្រេច​បាន​សរុប​ចំនួន ៣ ៧៩០ ហិកតា ស្មើនឹង ៦,៥៦% នៃ​ផ្ទៃដី​ដាំដុះ ៥៧ ៧៥៦ ហិកតា កើន​ឡើង​ច្រើន​ជាង​ឆ្នាំមុន ៥៤៣ ហិកតា។ ប្រមូលផលដំណាំសាកវប្បកម្មរដូវវស្សា រួមមាន បន្លែគ្រប់ប្រភេទ និងប៉ិកគក់ ចំនួន ៣៨៩ ហិកតា ស្មើនឹង ៦៧,១៨% នៃផ្ទៃដីដាំដុះ ៥៧៩ ហិកតា ធៀបនឹងឆ្នាំមុនតិចជាង ៣២ ហិកតា។

ការប្រមូលផលដំណាំឧស្សាហកម្មរយៈ​ពេលខ្លីរដូវវស្សារួ រួមមាន ពោតស ល្ង សណ្តែកដី សណ្តែកបាយ សណ្តែកសៀង ដំឡូងជ្វា ដំឡូងគរ និងអអំពៅ បានចំនួន ៦ ៣៨១ ហិកតា ស្មើនឹង ៨,២៣% នៃផ្ទៃដីដាំដុះ ៧៧ ៦២៥ ហិកតា បើប្រៀបធៀបឆ្នាំមុនតិចជាង ៥៤៣ ហិកតា៕

អត្ថបទ ប្រុញ វិធិន

The post កសិករមួយចំនួននៅខេត្តក្រចេះ រក្សាទំនៀមទម្លាប់ដកស្ទូង ខណៈកសិករភាគច្រើនងាកមកពង្រោះស្រូវវស្សា appeared first on Kampuchea Thmey Daily.

មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារបានឱ្យដឹងនៅ រសៀលថ្ងៃទី៣០ ខែមិថុនា ឆ្នាំ២០២៥នេះថា មន្រ្តីកសិកម្មឃុំ ប្រចាំស្រុកសង្គមថ្មី និងស្រុកគូលែន មន្រ្តីមូលដ្ឋាន និងមន្ទីរពាណិជ្ជកម្មខេត្តព្រះវិហារ បានជួយសម្របសម្រួលទីផ្សារល្ពៅជូនកសិករនៅក្នុងឃុំរអាង និងឃុំភ្នំត្បែងមួយ ក្នុងស្រុកសង្គមថ្មី បានទិញផ្លែល្ពៅសរុបចំនួន ៣៣៨ តោនហើយត្រូវបានលក់ជូនផ្សារទំនើបៗរបស់ក្រុមហ៊ុនឯកជនជាច្រើន និងជូនស្ថាប័នរដ្ឋជាដើម។

បើគិតត្រឹមចុងខែមិថុនានេះ ល្ពៅប្រជាពលរដ្ឋប្រមាណជាង៤០០តោនហើយ ត្រូវបានក្រុមការងារជួយសម្របសម្រួលលក់ចេញ។ មន្ត្រីដដែលបញ្ជាក់ថា មានក្រុមហ៊ុន ផ្សារទំនើបៗ និងលោកឧកញ៉ាៗជាដើមនៅតែជួយទិញជាបន្តបន្ទាប់ ដើម្បីយកទៅលក់បន្ត ឬធ្វើសប្បុរសធម៌ជាដើម។ គោលបំណងយើង គឺដើម្បីជួយកសិករ។ យើងទិញពីកសិករក្នុងតម្លៃមួយសមរម្យ ដែលធ្វើម៉េចឱ្យពួកគាត់សប្បាយចិត្ត។ តម្លៃល្ពៅ ដែលទិញពីកសិករ គឺមានតម្លៃចន្លោះពី២០០ ទៅ៣០០រៀលក្នុង១គីឡូក្រាម។ មន្ត្រីដដែលបន្ថែមទៀតថា នាពេលបច្ចុប្បន្ននេះ យ៉ាងហោចណាស់ ក៏នៅសល់ល្ពៅជាង២ពាន់តោនទៀតផងដែរ កំពុងតែត្រូវការរកទីផ្សារលក់ចេញ។

មានប្រសាសន៍នៅក្នុងពិធី បិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា កាលពីសប្តាហ៍មុន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានអំពាវនាវដល់សាធារណជន ឱ្យជួយគាំទ្រផលិតផលក្នុងស្រុក ដែលរួមទាំងដំណាំកសិកម្ម ដូចជាល្ពៅជាដើម។ ប៉ុន្តែក៏កុំឆ្លៀតយកឱកាសនេះ ដំឡើងថ្លៃទំនិញក្នុងស្រុក ហើយត្រូវចូលរួមជំរុញការផលិតនូវផលិតផលក្នុងស្រុកបន្ថែមទៀត ដើម្បីផ្គត់ផ្គង់ទីផ្សារក្នុងស្រុករបស់កម្ពុជា៕

ដោយ៖ជុន កុសល

The post ប្រជាកសិករនៅខេត្តព្រះវិហារ សប្បាយចិត្តយ៉ាងខ្លាំងដោយសារផ្លែល្ពៅ ឆ្នាំនេះមានទីផ្សារល្អ  appeared first on Kampuchea Thmey Daily.

លោកស្រី សៀង ម្លប់ ប្រធានត្រួតពិនិត្យកសិកម្មសុវត្ថិភាព ស្រុកសូទ្រនិគម បានលើកឡើងថា ក្នុងសហគមន៍កសិកម្មសុវត្ថិភាពធម្មជាតិ របស់គាត់បានជ្រើសយកពូជស្រូវផ្ការំដួល យកមកដាំដុះ ដោយប្រភេទស្រូវផ្ការំដួល មានភាពងាយស្រួលក្នុងការថែទាំ ធន់នឹងអាកាសធាតុ និងទទួលបានទិន្នផលល្អខុសពីពូជស្រូវធម្មតាពី៥ ទៅ២០% ដោយឱ្យផលស្រូវជាមធ្យម ៣.៥តោន នឹងអាចខ្ពស់ទៅដល់ ៥.៥តោន ក្នុង១ហិកតា ជាពិសេសស្រូវផ្ការំដួល ជាប្រភេទស្រូវកណ្ដាល មានការទទួលស្គាល់ស្រាប់ក្នុងការនាំចេញទៅក្រៅប្រទេសទៀតផង។

ចំណែកលោក ពុធ លឿម អនុប្រធានការិយាល័យក្សេតសាស្រ្ត និងផលិតភាពកសិកម្ម នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានឱ្យដឹងថា ការជ្រើសរើសពូជស្រូវផ្ការំដួល គឺជាការជ្រើសរើសពូជស្រូវដ៍ត្រឹមត្រូវក្នុងការដាំដុះពីព្រោះពូជស្រូវប្រភេទនេះងាយស្រួលក្នុងការនាំចេញ ទទួលបាននូវទិន្នផលខ្ពស់ និងមានតម្លៃនៅលើទីផ្សារ ជាពិសេសធន់នឹងកត្ដាចង្រៃផ្សេងៗរួមមានសត្វល្អិត ជំងឺ និងការរាំងស្ងួតជាដើម។

លោកបានបន្ដថា សម្រាប់មន្រ្ដីកសិកម្មឃុំ តែងតែយកចិត្ដទុកដាក់ជួយជ្រោមជ្រែង និងណែនាំដល់ប្រជាពលរដ្ឋនៅក្នុងមូលដ្ឋានអំពីការប្រើប្រាស់នូវគ្រាប់ពូជស្រូវសុទ្ធ ដើម្បីទទួលបានទិន្នផលល្អ ចំណែកការប្រើប្រាស់ដី ការប្រើប្រាស់ជី ការប្រើប្រាស់ទឹក ក៏កត្តារួមចំណែកដ៏សំខាន់ផងដែរ ដើម្បីឱ្យការប្រមូលផលបានទិន្នផលខ្ពស់៕

ដោយ៖ គឿន វេត

The post ពូជស្រូវផ្ការំដួល ត្រូវបានប្រជាកសិករនៅស្រុកសូទ្រនិគម ជ្រើសរើសសម្រាប់ការដាំដុះនារដូវវស្សា ព្រោះងាយស្រួលថែទាំ appeared first on Kampuchea Thmey Daily.

អ្នកស្រី ភឿត គន្ធា អ្នកប្រមូលទិញស្រូវពីកសិករនៅក្នុងឃុំព្រៃតូច ស្រុងមោងឬស្សី ខេត្តបាត់ដំបង បានលើកឡើងថា អ្នកស្រីបានប្រមូលទិញស្រូវពីប្រជាកសិករ ហើយយកទៅលក់ឱ្យលោក ឆេង សុភ័ក្ត ប៉ុន្តែ​ មិនមែនទាក់ទងលក់ដោយផ្ទាល់ទេ។ ផ្ទុ​យទៅវិញ គឺអ្នកស្រីទិញពីប្រជាកសិករ ហើយលក់បន្តទៅលោក ឆេង សុភ័ក្ត តាមរយៈលោក ឃុន វ៉ាន់នឿន។

ចំណែក លោក តាំង ឡា និងភរិយា ដែលជាអ្នកប្រមូលទិញស្រូវពីកសិករនៅក្នុងឃុំត្រពាំងជង ស្រុកបាកាន ខេត្តពោធិ៍សាត់វិញ ក៏បានលើកឡើងថា លោក និងភរិយា ក៏បានប្រមូលទិញស្រូវពីកសិករលក់ទៅឱ្យលោក ឆេង សុភ័ក្ត តាមរយៈលោក ឃុន វ៉ាន់នឿន ដែរ។ ដូចគ្នាដែរ លោក ខាន់ ភារៈ អ្នកប្រមូលទិញស្រូវពីកសិករនៅស្រុកបាកាន ខេត្តពោធិ៍សាត់ ក៏បានអះអាងថា លោកបានទិញស្រូវ ហើយលក់បន្តទៅឱ្យលោក ឆេង សុភ័ក្ត តាមរយៈលោក ឃុន វ៉ាន់ នឿន។ ប៉ុន្តែ មកដល់ពេលនេះ មិនទាន់ទទួលបានប្រាក់នោះទេ។

អ្នកប្រមូលទិញស្រូវពីប្រជាកសិករទាំងនេះ បានសំណូមពរយ៉ាងទទូចដល់លោក ឆេង សុភ័ក្ត ឱ្យទូទាត់ប្រាក់ឱ្យលោក ឃុន វ៉ាន់នឿន ដើម្បីទូទាត់បន្តមកពួកគេ ហើយពួកគេយកប្រាក់ទាំងនេះ ទៅទូទាត់បន្តដល់ប្រជាកសិករ។ បើតាមក្រុមអ្នកប្រមូលទិញស្រូវទាំងនេះ គឺពួកគេមិនមានប្រាក់សម្រាប់ទូទាត់ដល់ប្រជាកសិករនៅឡើយទេ ហើយប្រជាកសិករកំពុងរង់ចាំប្រាក់ទាំងនេះ ដើម្បីយកទៅដោះស្រាយបញ្ហាជំពាក់ថ្លៃប្រេង និងថ្លៃជី និងដើម្បីយកទៅសងបំណុលគេ និងដោះស្រាយជីវភាពប្រចាំថ្ងៃ។

ពាក់ព័ន្ធនឹងបញ្ហានេះ លោក ឃុន វ៉ាននឿន ដែលជាអ្នកប្រមូលទិញស្រូវពីប្រជាកសិករ និងទិញបន្តពីក្រុមអ្នកប្រមូលទិញស្រូវ បានគូសបញ្ជាក់ថា ស្រូវដែលលោកទិញពីកសិករ និងទិញបន្តពីក្រុមអ្នកប្រមូលទិញស្រូវ គឺលោកបានប្រមូលយកទៅឱ្យលោក សេង សុភ័ក្ត ដើម្បីលក់បន្តទៅកាន់រោងម៉ាស៊ីនកិនស្រូវផ្សេងៗ។ លោក ឃុន វ៉ាននឿន បានអះអាងបន្ថែមថា ស្រូវលក់អស់ហើយ ប៉ុន្តែ លោក ឆេង សុភ័ក្ត មិនបានទូទាត់ប្រាក់ដល់រូបលោកទេ ដែលធ្វើឱ្យរូបលោកមិនមានប្រាក់សម្រាប់ទូទាត់ទៅប្រជាកសិករ​ និងក្រុមអ្នកប្រមូលទិញស្រូវពីប្រជាកសិករ។ ចំពោះមុខបញ្ហានេះ លោក ឃុន វ៉ាននឿន ក៏បានសំណូមរយ៉ាងទទូចដល់លោក ឆេង សុ័ក្ត ឱ្យដោះស្រាយបញ្ហាប្រាក់នេះជាមួយរូបលោក។

ចំពោះបញ្ហានេះ លោក ឆេង សុភ័ក្ត បានអះអាងថា រូបលោកមិនដែលស្គាល់ និងមានទំនាក់ទំនងជាមួយក្រុមអ្នកប្រមូលទិញស្រូវពីកសិករនៅ ស្រុកបានកាន ខេត្តពោធិ៍សាត់ និងស្រុកមោងឬស្សី ខេត្តបាត់ដំបង នោះទេ។ តាមរយៈសេចក្តីបំភ្លឺតាមបណ្តាញសង្គមហ្វេសប៊ុកនៅយប់ថ្ងៃទី២២ ខែវិច្ឆិកា ឆ្នាំ២០២៤ លោក ឆេង សុភ័ក្ត ថែមទាំងបដិសេធថា លោកមិនមែនជាឈ្មួញទិញស្រូវ ហើយចោទថា លោក ឃុន វ៉ាន់នឿន និងភរិយា ស៊ន ពន ជាកូនបំណុល និងជាអ្នកជំពាក់លុយរបស់លោកថែមទៀតផង។

លោក ឆេង សុភ័ក្ត បានអះអាងបែបនេះថា៖«ខ្ញុំបាទសូមបញ្ជាក់ថា ឈ្មោះ ស៊ន ពន និងប្តីឈ្មោះ ឃុន វ៉ាន់នឿន ដែលបានសុំខ្ចីលុយពីរូបខ្ញុំបាទទៅទិញស្រូវយកមកឱ្យខ្ញុំ ហើយមិនបានប្រគល់លុយគ្រប់ចំនួនមកឱ្យខ្ញុំវិញទេ ខ្ញុំក៏បាទបានដាក់ពាក្យបណ្តឹងទៅអយ្យកាសាលាដំបូង រាជធានីភ្នំពេញ ដើម្បីដោះស្រាយលុយដែល ស៊ន ពន និងឃុន វ៉ាន់នឿន នៅជំពាក់ តែបុគ្គលទាំងពីរនាក់ប្ដីប្រពន្ធនេះ គេចវេសរហូតមិនព្រមចូលខ្លួនដោះស្រាយ»។

យ៉ាងណាក៏ដោយ ចំពោះបញ្ហានេះ ក្រុមអ្នកប្រមូលទិញស្រូវនៅក្នុងស្រុកមោង ឫស្សី និងស្រុកបាកាន ខេត្តពោធិ៍សាត់ តាមរយៈមេធាវីរបស់ខ្លួន បានដាក់ពាក្យបណ្តឹងទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីឱ្យសមត្ថកិច្ចជួយយរកយុត្តិធម៌ និងជួយដោះស្រាយករណីរបស់ពួកគាត់ ជាពិសេស គឺដើម្បីទទួលបានថវិកាយកទៅទូទាត់ជូនដល់ប្រជាកសិករ៕

The post អ្នកប្រមូលទិញស្រូវ១ក្រុម ស្នើសុំទូទាត់ប្រាក់​ពី​ឈ្មូញកណ្តាលម្នាក់ តែឈ្មួញថា មិនដែលស្គាល់ មិនដែលទាក់ទងជាមួយទេ appeared first on Kampuchea Thmey Daily.

នៅក្នុងសារនោះ​ បានសរសេរថា កម្មវិធីគោលនយោបាយអាទិភាពទី ៦ របស់រាជរដ្ឋាភិបាល នីតិកាលទី ៧ ក្នុងការដាក់ពង្រាយមន្ត្រីបច្ចេកទេសកសិកម្ម នៅគ្រប់ឃុំ-សង្កាត់ ដែលជាអនុសាសន៍ដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងអង្គប្រជុំគណៈរដ្ឋមន្ត្រីដំបូង កាលពីថ្ងៃទី ២៤ ខែសីហា ឆ្នាំ ២០២៣ បាននិងកំពុងអនុវត្តយ៉ាងស្វាហាប់ និងយកចិត្តទុកដាក់ខ្ពស់ ពីសំណាក់ក្រសួងមុខងារសាធារណៈ និងក្រសួងកសិកម្ម រុក្ខាប្រមាញ់ និងនេសាទ។

ក្នុងនោះ ការប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ ២០២៣ ចំនួន ២៥០នាក់ ត្រូវបានបញ្ចប់ជាស្ថាពរ ប្រកបដោយភាពលម្អិត ហ្មត់ចត់ មានវិន័យ និងមានសណ្តាប់ធ្នាប់ កាលពីថ្ងៃអាទិត្យ ទី ១៧ ខែធ្នូ ឆ្នាំ ២០២៣។

មន្ត្រីបច្ចេកទេសកសិកម្មទាំង ២៥០នាក់នេះ នឹងត្រូវដាក់ពង្រាយក្នុងខេត្តចំនួន ១៧ ដែលមានសក្តានុពលផ្នែកដំណាំកសិកម្ម រួមមាន៖ ខេត្ត​តាកែវ កំពង់ស្ពឺ កំពង់ធំ សៀមរាប បន្ទាយមានជ័យ កំពង់ចាម កំពង់ឆ្នាំង បាត់ដំបង កំពត ពោធិ៍​សាត់ ព្រៃវែង ព្រះវិហារ ត្បូងឃ្មុំ ស្វាយរៀង ឧត្តរមានជ័យ កណ្តាល និង​ខេត្តមណ្ឌលគិរី ដោយផ្តល់អាទិភាពដល់បេក្ខជនមានទីលំ នៅក្នុងបណ្តាខេត្តគោលដៅ ដោយមានតួនាទីប្រមូលព័ត៌មាន អំពីស្ថានភាពផលិតកម្មកសិកម្មនៅមូលដ្ឋាន ព្រមទាំងផ្តល់ព័ត៌មាន និងសំណូមពរ របស់ប្រជាកសិករមកក្រសួងកសិកម្ម រុក្ខាប្រមាញ់ និងនេសាទ ដើម្បីពិនិត្យ និងស្វែងរកដំណោះស្រាយបានទាន់ពេលវេលា។

រាជរដ្ឋាភិបាល នីតិកាលទី ៧ មានគោលដៅច្បាស់លាស់ និងយកចិត្តទុកដាក់ខ្ពស់ ក្នុងការលើកស្ទួយវិស័យកសិកម្ម ដើម្បីធានាឲ្យបាននូវសន្តិសុខស្បៀងនាថ្ងៃអនាគត​ ដោយបានផ្តល់ជាគោលការណ៍ក្នុងការជ្រើសរើសមន្ត្រីបច្ចេកទេសកសិកម្ម ចំនួន ២៥០នាក់ ក្នុងឆ្នាំ ២០២៣ ចំនួន ៨០០នាក់ ក្នុងឆ្នាំ ២០២៤ និងចំនួន ៥៥០នាក់ ក្នុងឆ្នាំ ២០២៥ ដើម្បីឆ្លើយតបដល់ឃុំដែលមានសក្តានុពល និងសកម្មភាពកសិកម្មចំនួន ១,៥៥០ ដែលបម្រើដល់កសិករប្រមាណ ២លានគ្រួសារ។

មន្ត្រីបច្ចេកទេសកសិកម្មទាំងអស់ ក៏នឹងក្លាយជាសេនាធិការដ៏សំខាន់ ក្នុងការដោះស្រាយបញ្ហារបស់ប្រជាកសិករ ព្រមទាំងជួយអភិវឌ្ឍសហគមន៍កសិកម្មនាពេលបច្ចុប្បន្ន ឲ្យក្លាយជាសហគមន៍កសិកម្មទំនើប ដែលស្របតាមយុទ្ធសាស្ត្របញ្ចកោណ-ដំណាក់កាលទី ១ របស់រាជរដ្ឋាភិបាល នីតិកាលទី ៧ ដោយកិច្ចការអាទិភាពទី ៤ នៅក្នុងបញ្ចកោណទី ៤ គឺផ្តោតលើការលើកស្ទួយកសិកម្ម និងការអភិវឌ្ឍជនបទ ដែលមានគោលដៅយុទ្ធសាស្ត្រលើការបន្តពង្រឹងតួនាទី និងការអភិវឌ្ឍវិស័យកសិកម្មឲ្យ​ទំនើប សម្បូរបែប និងមានភាពធន់ ដែលគាំទ្រដល់ការអភិវឌ្ឍជនបទ សំដៅធានាសន្តិសុខ និងសុវត្ថិភាពស្បៀង, បង្កើនតម្លៃបន្ថែមខ្ពស់, ជំរុញភាពប្រកួតប្រជែង និងលើកកម្ពស់គុណភាពជីវភាពនៅជនបទ៕

The post មន្ត្រីបច្ចេកទេសកសិកម្ម នឹងក្លាយជាសេនាធិការដ៏សំខាន់ ក្នុងការដោះស្រាយបញ្ហារបស់ប្រជាកសិករ appeared first on Kampuchea Thmey Daily.

តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានបញ្ជាក់ថា ក្នុងរដូវវស្សាឆ្នាំ២០២៣នេះ បរិមាណទឹកភ្លៀងបានធ្លាក់នៅសព្វទីកន្លែងក្នុងភូមិសាស្ត្រខេត្ត។ ទោះបីមានតំបន់មួយចំនួនបានទទួលរងគ្រោះ ជំនន់ទឹកភ្លៀង ធ្វើឱ្យប៉ះពាល់ខូចខាតផលដំណាំស្រូវក៏ពិតមែន តែការអនុវត្តលើការធ្វើស្រែវស្សា ទាំងស្រូវស្រាល ស្រូវធ្ងន់បាន ១៤៨ ៩៥០ហិកតា ស្មើរនឹង ៧៦,៩៣% នៃផ្ទៃដីអនុវត្តន៍បាន ១៩៣ ៦១០ហិកតា។ ចំពោះការងារបង្កបង្កើនផលស្រូវរដូវប្រាំងឆ្នាំ២០២៣-២០២៤ អនុវត្តន៍បាន ៧ ២០០ហិកតា ស្មើរនឹង ២៨,៧៨% នៃផែនការ ២ ៥២០ហិកតា។ ចំពោះដំណាំសាកវប្បកម្ម និងឧស្សាហកម្មរដូវប្រាំងឆ្នាំ២០២៣ អនុវត្តន៍បាន ៣៧៤៥ហិកតា ស្មើរនឹង ២០,៨៣% នៃផែនការ ១៧ ៩៧៨ហិកតា។

បើតាមការបញ្ជាក់ របស់លោកប្រធានមន្ទីរកសិកម្មរុក្ខាប្រមាញ់ និងនេសាទ ខេត្តសៀមរាប ការប្រមូលភោគផលស្រូវវស្សា មកដល់ពេលនេះប្រមូលផលបាន ៧៦% ហើយតម្លៃស្រូវលក់បាន ១គីឡូក្រាម តម្លៃពី ១ ២០០រៀល ទៅ ១ ៣៥០រៀល តែបើស្រូវស្ងួតមានតម្លៃ ១ ៦០០រៀល ក្នុងមួយគីឡូក្រាម។ លោកបានបន្តថា ពេលនេះប្រជាកសិករបានសម្រុកក្នុងធ្វើស្រែបណ្តេញទឹក និងស្រែប្រាំង ដោយឆ្នាំនេះនៅតំបន់មួយចំនួន ប្រជាកសិករបានធ្វើការច្រូតកាត់ស្រូវនៅក្នុងទឹកទៀតផង។ ម៉្យាងទៀតមកដល់ខែធ្នូនេះ ទឹកនៅពេញវាលស្រែនៅឡើយ ដែលបង្កលក្ខណៈងាយស្រួលដល់ប្រជាកសិករធ្វើស្រែប្រាំង មិនមានការភ័យព្រួយឡើយ៕

អត្ថបទ៖ គឿន វេត

The post មន្ទីរកសិកម្ម៖ ទោះបីមានភ្លៀងធ្លាក់យ៉ាងណាក៏មិនការរំខានដល់ការប្រមូលផលរបស់កសិករនៅ ខេត្តសៀមរាប appeared first on Kampuchea Thmey Daily.

លោក​បណ្ឌិត​​បានអះអា​ថា ​ជា​មធ្យម​កសិករ​កម្ពុជា​ផលិត​ស្រូវ​បាន​សរុប​ប្រមាណ​ ១២ លាន​តោន​ក្នុង​មួយ​ឆ្នាំ គឺ​លើស​ពី​​ ៦ លាន​តោន​​ សម្រាប់​ការ​នាំ​ចេញដែល​ធ្វើ​ឱ្យ​កម្ពុជា​ក្លាយ​ជា​ប្រទេស​ដែល​នាំចេញ​​ស្រូវ​អង្ករ​ជាប់​លេខ​រៀង​ទី ​៨ នៅ​លើ​ពិភព​លោក​។

កសិករ​កម្ពុជា​កំពុង​ក្លាយ​​ទៅ​ជា​អ្នក​ដែល​ចូលរួម​ចំណែក​ដ៏​សំខាន់​មួយ​ក្នុង​ការ​ជួយ​លើក​ស្ទួយ​បញ្ហា​​សន្តិសុខ​ស្បៀង​ជាតិ និង​ពិភពលោក។ លោក​បណ្ឌិត​ យ៉ង សាំង​កុមារ ជឿជាក់ថា ប្រទេស​កម្ពុជា​នៅ​មាន​សក្ដានុពល​ខ្ពស់​ក្នុង​ការ​បង្កើន​ផលិតកម្ម​ស្រូវ​នៅ​លើ​ផ្ទៃដី​ដែល​មាន​ស្រាប់​ និង​ពង្រីក​ទីផ្សារ​អង្ករ​នៅ​​ក្រៅ​ប្រទេស​។

លោក​បណ្ឌិត យ៉ង​ សាំង​កុមារ បានអះអាង​ថា កសិករ​កម្ពុជាកំពុង​ក្លាយ​ទៅ​ជា​អ្នក​ដែល​បាន​រួម​ចំណែក​ដោះ​ស្រាយ​បញ្ហា​ស្បៀង​ជាតិ និង​ពិភព​លោក​យ៉ាង​សំខាន់​មួយ​។ ជា​ពិសេសនៅ​ពេល​ដែល​ពិភព​លោក​កំពុង​ប្រឈម​មុខ​នឹង​បញ្ហា​ស្បៀង​ បន្ទាប់​ពី​សង្គ្រាម​នៅ​អ៊ុយក្រែន និង​ឥណ្ឌា​ដែល​ជា​ប្រទេស​នាំ​អង្ករ​​ចេញ​ច្រើន​ជាង​គេ​លើ​ពិភពលោក​ ហាម​មិន​ឱ្យ​មាន​ការ​នាំ​ចេញ​អង្ករ​ធម្មតា​ដើម្បី​រក្សា​សន្តិ​សុខ​ស្បៀង​ក្នុង​ប្រទេសរបស់​​ខ្លួន។

រដ្ឋាភិបាលកម្ពុជា​បាន​ដាក់ចេញ​គោល​នយោបាយ​ពង្រាយ​មន្ត្រី​កសិកម្ម​តាម​ឃុំទូទាំងប្រទេស​ ជាមួយ​ការ​កសាង​សហគមន៍​កសិកម្ម​ ឬ​សមាគម​កសិករ​ផ្សារ​ភ្ជាប់​មក​ទីផ្សារ​តាម​រយៈ​​យន្តការ​កិច្ច​សន្យា​កសិកម្ម និង​គោល​នយោបាយ​ហិរញ្ញប្បទាន​របស់​រាជរដ្ឋាភិបាល​ជា​​មួយ​កញ្ចប់​ថវិកា​ជាង ១០០ លាន​​ដុល្លារ ដែលអាច​នឹង​​ដោះស្រាយ​បញ្ហា​ទីផ្សារ និង​រក្សា​លំនឹង​ថ្លៃ​ស្រូវ រួមទាំង​ការ​ការ​បន្ត​​ការ​អភិវឌ្ឍ​ប្រព័ន្ធ​ធារាសាស្ត្រ​ឱ្យ​បាន​ទូលំទូលាយ និង​គោល​នយោបាយ​ពាក់ព័ន្ធ​ផ្សេង​ទៀត៕

The post កម្ពុជា​ជាប់​លេខ ៨ លើ​ពិភពលោក ខណៈ​មួយ​ឆ្នាំ​អាច​ផលិត​ស្រូវ​បាន​ជាង ១២ លាន​តោន appeared first on Kampuchea Thmey Daily.

លោក ខាត់ បូរិន ប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្មរុក្ខាប្រមាញ់​ និងនេសាទខេត្តបាត់ដំបង បានមានប្រសាសន៍ឲ្យដឹងថា មន្ទីរកសិកម្ម​ខេត្ត បានធ្វើការបណ្តុះបណ្តាលការអនុវត្តកសិកម្មល្អកម្ពុជា ជូនប្រជាកសិករបានចំនួន ១,៣០០ គ្រួសារក្នុងស្រុកគោលដៅនៃខេត្តបាត់ដំបង។

ក្នុងនោះផ្ទៃដីដាំដំណាំបន្លែ ចំនួន ១,៤៤០ហ.ត ទិន្នផលសរុប២៦,៤៥៤តោន,ផ្ទៃដីដំណាំស្វាយកែវល្មៀត ១៧,១៨៤ ហ.ត ទិន្នផលសរុប ២៧៣,៨០៧តោន។ ផ្ទៃដីដំណាំមៀនប៉ៃលិនឬតាង៉ែន ៦,១៨៣ហ.ត ទិន្នផល ៨១,១៨១ តោន។ ផ្ទៃដីដំណាំទុរេន ៣៩០ហ.ត ទិន្នផល ៤,៧៩៣ តោន និងដំណាំឈើហូបផ្លែជាច្រើនទៀត។

 ការបណ្តុះបណ្តាលការអនុវត្តកសិកម្មល្អ (GAP) ដល់ប្រជាកសិករនៅតាមសហគមន៍កសិកម្មនានាក្នុងខេត្តបាត់ដំបង គឺដើម្បីបង្កើនការយល់ដឹង ពីសុវត្ថិភាពចំណីអាហារ និងកាត់បន្ថយភាពគ្រោះថ្នាក់សុវត្ថិភាពចំណីអាហារឲ្យនៅទាបបំផុត ក្នុងការបំពេញនូវតម្រូវការរបស់ទីផ្សារក្នុងស្រុក នឹងក្រៅប្រទេស ក៏ដូចជាធានាសុវត្ថិភាព ដល់អតិថិជនផងដែរ។

លោកប្រធាន បានឲ្យដឹងទៀតថា ការចុះបញ្ជីចម្កា រនិងការបិទរូបសញ្ញា នៃការអនុវត្តកសិកម្មល្អកម្ពុជា គឺពិតជាមានសារសំខាន់ណាស់ ដើម្បីរក្សាលំនឹងទីផ្សារកសិកម្មដោយ សារតែកសិករទាំងនោះបានចុះបញ្ជីការ និងរូបសញ្ញា នៃការអនុវត្តកសិកម្មល្អបានត្រឹមត្រូវ ដែលជាកម្មសិទ្ធិបញ្ញាដ៏សំខាន់របស់អ្នកផលិត ក្នុងការរក្សាបាននូវតម្លៃលើទីផ្សារ មិនមានការបញ្ចុះតម្លៃ តាមតែចិត្តរបស់ឈ្មួញ៕

អត្ថបទ៖ ណារី

The post កសិករជាង ១ពាន់គ្រួសារ នៅខេត្តបាត់ដំបង ទទួលបានការបណ្តុះបណ្តាល ការអនុវត្តកសិកម្មល្អកម្ពុជា appeared first on Kampuchea Thmey Daily.