ប្រទេសនូវែលសេឡង់ Archives - Kampuchea Thmey Daily

ចិនបាញ់សាកល្បងមីស៊ីលពីនាវាមុជទឹក នៅមហាសមុទ្រប៉ាស៊ីហ្វិក ទាញការរិះគន់ពីជប៉ុន អូស្រ្តាលី និងនូវែលសេឡង់

Minea Neu — Mon, 06 Jul 2026 12:41:00 +0000

ប្រព័ន្ធផ្សព្វផ្សាយចិនរាយការណ៍ថា យោធាចិនបានបាញ់សាកល្បងមីស៊ីលមួយគ្រាប់ពីនាវាមុជទឹកនុយក្លេអ៊ែរចូលទៅក្នុងមហាសមុទ្រប៉ាស៊ីហ្វិកនៅថ្ងៃចន្ទ នេះ ទាញការរិះគន់និងព្រួយបារម្ភពីប្រទេសជប៉ុន អូស្ត្រាលី និងនូវែលសេឡង់។ នេះបើតាមទីភ្នាក់ងាររ៉យទ័រ ផ្សាយនៅថ្ងៃទី៦ ខែកក្តដា ឆ្នាំ២០២៦ ។

ទីភ្នាក់ងារសារព័ត៌មាន Xinhua news លើកឡើងថា នាវាមុជទឹកនុយក្លេអ៊ែរមួយគ្រឿងរបស់កងទ័ពជើងទឹករំដោះប្រជាជនចិនបានបាញ់មីស៊ីលផ្ទុកក្បាលគ្រាប់សិប្បនិម្មិតឆ្ពោះទៅកាន់ដែនទឹកអន្តរជាតិនៅមហាសមុទ្រប៉ាស៊ីហ្វិកនៅម៉ោង ១២:០១ រសៀល។ មីស៊ីលនេះបានធ្លាក់ចូលទៅក្នុងដែនទឹកដែលបានកំណត់ ដោយមិនផ្តល់ព័ត៌មានលម្អិតបន្ថែមអំពីទីតាំងនោះទេ។

មីស៊ីលចិន។ រូបភាព៖ samaa tv

ភ្នាក់ងារសារព័ត៌មាន Xinhua ពណ៌នាអំពីការបាញ់បង្ហោះនេះ ថាជាការរៀបចំជាប្រចាំនៃការហ្វឹកហ្វឺនយោធាប្រចាំឆ្នាំរបស់ចិន ហើយមិនបានដឹកនាំប្រឆាំងនឹងប្រទេស ឬគោលដៅជាក់លាក់ណាមួយឡើយ។

ជុំវិញបញ្ហានេះ រដ្ឋមន្ត្រីការបរទេសអូស្ត្រាលី លោកស្រី Penny Wong និយាយថា ចិនបានជូនដំណឹងដល់រដ្ឋាភិបាលអូស្រ្តាលីពីការសាកល្បងដែលបានគ្រោងទុក ប៉ុន្តែការបាញ់បង្ហោះនេះកំពុងបង្កអស្ថិរភាពក្នុងតំបន់។

លោកស្រី Wong ប្រាប់អ្នកយកព័ត៌មានក្នុងសន្និសីទសារព័ត៌មានមួយនៅរដ្ឋធានី Suva ប្រទេសហ្វីជីថា៖ « អូស្ត្រាលីបានបញ្ជាក់យ៉ាងច្បាស់ថា ការសាកល្បងដែលបានស្នើឡើងនេះគឺស្ថិតក្នុងបរិបទនៃការកសាងសមត្ថភាពយោធាចិនយ៉ាងឆាប់រហ័ស ដែលខ្វះតម្លាភាព និងការធានាពីចេតនាដែលតំបន់នេះរំពឹងទុក»។

ដោយឡែក រដ្ឋាភិបាលជប៉ុនថា ខ្លួនបានទទួលការជូនដំណឹងអំពីការបាញ់បង្ហោះមីស៊ីល ប៉ុន្តែជំរុញឱ្យប្រទេសចិនពិចារណាលើបញ្ហានេះឡើងវិញ។

ទីក្រុងតូក្យូលើកឡើងថា៖ « យើងសម្តែងការព្រួយបារម្ភយ៉ាងខ្លាំង ចំពោះសកម្មភាពកើនឡើងរបស់យោធាចិន»។ ទីភ្នាក់ងារសារព័ត៌មាន Kyodo រាយការណ៍នៅថ្ងៃចន្ទ ដោយដកស្រង់ប្រភពរដ្ឋាភិបាលជប៉ុនថា មីស៊ីលបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ជប៉ុន។

ដោយឡែក រដ្ឋមន្ត្រីការបរទេសនូវែលសេឡង់ លោក Winston Peters ថា ប្រទេសខ្លួនមានការព្រួយបារម្ភយ៉ាងខ្លាំង ចំពោះការបាញ់សាកល្បងនេះ ហើយប្រទេសលោកត្រូវបានជូនដំណឹងពីប្រទេសចិន តែប៉ុន្មានម៉ោងនៃការបាញ់បង្ហោះប៉ុណ្ណោះ។

លោក Peters និយាយថា៖ « នូវែលសេឡង់ចាត់ទុករឿងនេះ ជាការអភិវឌ្ឍដែលមិនគួរឱ្យស្វាគមន៍ និងគួរឱ្យព្រួយបារម្ភ។ យើង ដូចជាប្រទេសជិតខាងក្នុងប្រទេសប៉ាស៊ីហ្វិកដទៃទៀត មិនមានចំណាប់អារម្មណ៍ ចំពោះប្រទេសចិនក្នុងការប្រើប្រាស់តំបន់ប៉ាស៊ីហ្វិកខាងត្បូងជាកន្លែងសាកល្បងសមត្ថភាពមីស៊ីលនោះទេ»។

លោក Peters រាប់រៀបក្នុងសេចក្តីថ្លែងការណ៍មួយថា៖ « ប្រទេសចិនបានសាកល្បងមីស៊ីលផ្លោងអន្តរទ្វីបចុងក្រោយនៅឆ្នាំ២០២៤ ជាការបាញ់បង្ហោះដ៏កម្រមួយ បង្ហាញពីសមត្ថភាពយោធាដែលកំពុងកើនឡើងរបស់ប្រទេសនេះ»៕

សម្រួល៖ ណឺ មិនា

The post ចិនបាញ់សាកល្បងមីស៊ីលពីនាវាមុជទឹក នៅមហាសមុទ្រប៉ាស៊ីហ្វិក ទាញការរិះគន់ពីជប៉ុន អូស្រ្តាលី និងនូវែលសេឡង់ appeared first on Kampuchea Thmey Daily.

កម្ពុជា-នូវែលហ្សេឡង់ ចុះកិច្ចព្រមព្រៀងលើវិស័យពាណិជ្ជកម្មស្រូវអង្ករ និងវិនិយោគ

deth leng — Fri, 20 Mar 2026 07:30:00 +0000

សហព័ន្ធស្រូវអង្ករកម្ពុជា (CRF) នៅថ្ងៃទី ២០ ខែមីនា ឆ្នាំ ២០២៦ បានចុះអនុស្សរណៈនៃការយោគយល់គ្នា (MOU) ជាប្រវត្តិសាស្ត្រ ជាមួយប្រទេសនូវែលហ្សេឡង់ ដើម្បីពង្រឹងកិច្ចសហប្រតិបត្តិការលើវិស័យពាណិជ្ជកម្មស្រូវអង្ករ និងការវិនិយោគ។

ពិធីចុះ MOU ក្រោមការសម្របសម្រួលពីលោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) ដែលមានឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា (CRF) និងលោក ឃួយ ម៉ៃខល ប្រធានការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់។

សកម្មភាពនេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការស្វែងរកទីផ្សារថ្មីៗ និងការធានាថា រាល់កិច្ចវិនិយោគ និងពាណិជ្ជកម្មអន្តរជាតិ នឹងក្លាយជាកម្លាំងចលករក្នុងការជួយដល់បងប្អូនកសិករនៅមូលដ្ឋានផ្ទាល់។

MOU មានគោលបំណងក្នុងការជំរុញការនាំចេញអង្ករកម្ពុជាទៅកាន់ទីផ្សារប្រទេសនូវែលហ្សេឡង់ ព្រមទាំងបង្កើតនូវក្របខ័ណ្ឌកិច្ចសហប្រតិបត្តិការក្នុងការផ្លាស់ប្តូរព័ត៌មានទីផ្សារ និងការតភ្ជាប់ទំនាក់ទំនងរវាងពាណិជ្ជករនៃប្រទេសទាំងពីរ។

លោកបណ្ឌិត កៅ ថាច បានជំរុញឱ្យភាគីទាំងពីរត្រូវខិតខំបំពេញការងារដោយស្មារតីទទួលខុសត្រូវខ្ពស់ ក្នុងការទាក់ទាញវិនិយោគិនឱ្យមកវិនិយោគលើវិស័យសក្តានុពលនៅកម្ពុជា។

លោកបណ្ឌិត កៅ ថាច ណែនាំឱ្យភាគីទាំងពីរត្រូវដើរតួនាទីយ៉ាងសកម្មជា «ស្ពានចម្លង» ដ៏រឹងមាំសម្រាប់អ្នកវិនិយោគ និងជាច្រកចេញដ៏សំខាន់សម្រាប់កសិផលខ្មែរទៅកាន់ទីផ្សារនូវែលហ្សេឡង់។

កិច្ចខិតខំប្រឹងប្រែងក្នុងការជំរុញការលក់ និងការគាំទ្រការបញ្ជាទិញកសិផលខ្មែរនេះ មិនត្រឹមតែជាការពង្រីកទីផ្សារអន្តរជាតិប៉ុណ្ណោះទេ ប៉ុន្តែគឺជាសកម្មភាពដ៏មានសារៈសំខាន់ក្នុងការជួយលើកកម្ពស់ជីវភាពរស់នៅរបស់កសិករខ្មែរឱ្យកាន់តែប្រសើរឡើង តាមរយៈការទទួលបានតម្លៃបន្ថែម និងទីផ្សារដែលមានស្ថិរភាព។

លោក កៅ ថាច ប្រាប់កម្ពុជាថ្មីថា ក្រុមហ៊ុន Ecly Ltd ធ្លាប់នាំអង្ករពីកម្ពុជាប្រមាណ ៥ ពាន់តោនក្នុង ១ឆ្នាំ រួចទៅហើយទៅកាន់ទីផ្សារណូវែលហ្សេឡង់។

ជាក់ស្តែង ក្រុមហ៊ុនក៏នឹងបន្តបង្កើននូវការនាំចូលបន្ថែមទៀតបន្ទាប់ពីការចុះ MoU ជាមួយសហព័ន្ធស្រូវអង្ករកម្ពុជាដែលធ្វើឱ្យការនាំចេញអង្កររបស់កម្ពុជា ទៅកាន់ណូវែលហ្សេឡង់ឈានទៅដល់ ១ ម៉ឺនតោនក្នុងមួយឆ្នាំ សម្រាប់រយៈពេល ៥ ឆ្នាំ។

លោក កៅ ថាច មានប្រសាសន៍ថា៖ «ក្រៅតែការនាំយកអង្ករកម្ពុជាទៅកាន់ទីផ្សារណូវែលហ្សេឡង់ហើយ បច្ចុប្បន្ន ក្រុមហ៊ុន Ecly Ltd ក៏មានបណ្តាញចែកចាយដ៏រឹងមាំ ហើយបាននឹងកំពុងនាំចូលចែកចាយផលិតផលសក្តានុពលពីកម្ពុជា រួមមាន អង្ករខ្មែរ និងស្រាបៀរហនុមាន (Hanuman Beer) បន្លែបង្កក ក៏ដូចជាប្រភេទត្រីបង្កកទឹកសាប ទៅក្នុងទីផ្សារណូវែលហ្សេឡង់បន្ថែមទៀតផងដែរ»៕

The post កម្ពុជា-នូវែលហ្សេឡង់ ចុះកិច្ចព្រមព្រៀងលើវិស័យពាណិជ្ជកម្មស្រូវអង្ករ និងវិនិយោគ appeared first on Kampuchea Thmey Daily.

រដ្ឋាភិបាលនូវែលសេឡង់តាក់តែងច្បាប់ហាមក្មេងអាយុក្រោម១៦ឆ្នាំ ប្រើប្រាស់បណ្តាញសង្គម

Bun sopheap — Tue, 06 May 2025 05:26:48 +0000

នាយករដ្ឋមន្ត្រីនូវែលសេឡង់ បានស្នើហាមឃាត់កុមារអាយុក្រោម១៦ឆ្នាំពីការប្រើប្រព័ន្ធផ្សព្វផ្សាយសង្គមដោយសង្កត់ធ្ងន់លើតម្រូវការដើម្បីការពារពួកគេពីគ្រោះថ្នាក់មកពីការតាមដានមើលថ្នាលកម្មវិធីបច្ចេកវិទ្យាធំៗ។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី០៦ខែឧសភានេះ។

នាយករដ្ឋមន្ត្រីនូវែលសេឡង់ លោក Christopher Luxon នៅថ្ងៃអង្គារ បានបង្ហាញសេចក្តីព្រាងច្បាប់ដែលនឹងបង្ខំក្រុមហ៊ុនប្រព័ន្ធផ្សព្វផ្សាយសង្គមឱ្យផ្ទៀងផ្ទាត់អ្នកប្រើប្រាស់ដែលមានអាយុយ៉ាងតិច១៦ឆ្នាំ ឬប្រឈមនឹងការផាកពិន័យរហូតដល់២ លានដុល្លារនូវែលសេឡង់។

លោក Luxon បាននិយាយថា៖«នេះគឺជាការការពារកូនរបស់យើង។ វាគឺអំពីការធ្វើឱ្យប្រាកដថាក្រុមហ៊ុនប្រព័ន្ធផ្សព្វផ្សាយសង្គមកំពុងដើរតួនាទីរបស់ពួកគេក្នុងការរក្សាកូនរបស់យើងឱ្យមានសុវត្ថិភាព» ។

ទោះយ៉ាងណា វាមិនច្បាស់ទេថា នៅពេលណាដែលច្បាប់នេះនឹងត្រូវបានបញ្ជូនទៅកាន់សភា ប៉ុន្តែ លោក Luxon បាននិយាយថា គាត់មានក្តីសង្ឃឹមក្នុងការទទួលបានការគាំទ្រនៅទូទាំងសភា។

គួរបញ្ជាក់ថាការហាមប្រាមដែលបានស្នើឡើងត្រូវបានយកគំរូតាមប្រទេសអូស្ត្រាលី ដែលឈរនៅជួរមុខនៃកិច្ចខិតខំប្រឹងប្រែងជាសកលក្នុងការគ្រប់គ្រងប្រព័ន្ធផ្សព្វផ្សាយសង្គម៕

(រូបភាព៖ Reuters)

(រូបភាព៖ AP)

អត្ថបទ៖ ប៊ុន សុភាព

The post រដ្ឋាភិបាលនូវែលសេឡង់តាក់តែងច្បាប់ហាមក្មេងអាយុក្រោម១៦ឆ្នាំ ប្រើប្រាស់បណ្តាញសង្គម appeared first on Kampuchea Thmey Daily.

ត្រី Blobfish ក្លាយជាសត្វមានរូបអាក្រក់បំផុតក្នុងពិភពលោក

Bun sopheap — Wed, 19 Mar 2025 10:13:13 +0000

ត្រី blobfish ត្រូវបានបោះឆ្នោតជ្រើសរើសជាសត្វមានរូបរាងអាក្រក់បំផុតក្នុងពិភពលោកជំនួសប្រភេទសត្វសមុទ្រ gelatinous នៅឆ្នាំ២០១៣ ដែលត្រូវបានប្រកាសថា ជាសត្វអាក្រក់បំផុតរបស់ពិភពលោក។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១៩ខែមីនានេះ។

(រូបភាព៖ NOAA)

ត្រី blobfish ត្រូវបានបោះឆ្នោតជ្រើសរើសជាសត្វអាក្រក់បំផុតរបស់ពិភពលោកក្នុងកម្មវិធីត្រីប្រចាំឆ្នាំរបស់ប្រទេសនូវែលសេឡង់ នៅក្នុងការប្រកួតប្រជែងមួយដែលមានគោលបំណងលើកកម្ពស់ការយល់ដឹងអំពីជីវិតសមុទ្ររបស់ប្រទេស និងប្រព័ន្ធអេកូឡូស៊ី។

រៀបចំឡើងដោយអង្គការមិនរកប្រាក់ចំណេញ Mountains to Sea Conservation Trust ព្រឹត្តិការណ៍ប្រចាំឆ្នាំនេះធ្វើឡើងដើម្បីឲ្យប្រជាជននូវែលសេឡង់ស្គាល់ជាមួយនឹងត្រីជាច្រើនប្រភេទដែលរស់នៅក្នុងបរិស្ថានទឹកសាប និងសមុទ្ររបស់ប្រទេស។

ការបោះឆ្នោតនេះត្រូវបានដាក់នៅលើគេហទំព័ររបស់ Mountains to Sea Conservation Trust ក្នុងរយៈពេលជាងពីរសប្តាហ៍ក្នុងខែនេះ នឹងបានបិទកាលពីថ្ងៃទី១៦ខែមីនានេះ។ ការបោះឆ្នោតសរុបចំនួន៥៥៨៣ ត្រូវបានបោះឆ្នោតឲ្យត្រី blobfish ដែលត្រូវបានចាត់ទុកថាត្រីងាយរងគ្រោះផងនោះ បានទទួលជ័យជម្នះលើគូប្រជែងផ្សេងៗ។

យោងតាមរដ្ឋបាលមហាសមុទ្រ និងបរិយាកាសជាតិរបស់សហរដ្ឋអាមេរិក (NOAA) ត្រី blobfish ដែលមានប្រវែងប្រហែល ៣០សង់ទីម៉ែត្រ រាងដូចចាហួយ សាច់ស្លេកស្លាំង ស្បែករលុង ច្រមុះធំ និងភ្នែកសម្លក់។ ពួកវាត្រូវបានរកឃើញភាគច្រើននៅឆ្នេរសមុទ្រភាគអាគ្នេយ៍នៃប្រទេសអូស្ត្រាលី និង តាសម៉ានី ហើយជាធម្មតារស់នៅក្នុងជម្រៅទឹកពី៦០០ ទៅ១២០០ម៉ែត្រ។

ត្រី Blobfish នឹងទទួលបានរូបរាងអាក្រក់របស់វានៅពេលដែលពួកវាត្រូវបានគេយកចេញពីទឹកព្រោះវាមិនមានឆ្អឹងរឹងមាំឬសាច់ដុំក្រាស់ដើម្បីរក្សារាងរបស់វាទេ រូបរាងរបស់វាស្ថិតតាមសម្ពាធទឹកដែលរក្សារូបរាងធម្មតារបស់ពួកវានៅក្នុងសមុទ្រ៕

អត្ថបទ៖ ប៊ុន សុភាព

The post ត្រី Blobfish ក្លាយជាសត្វមានរូបអាក្រក់បំផុតក្នុងពិភពលោក appeared first on Kampuchea Thmey Daily.

នូវែលសេឡង់ បណ្ដេញមន្ត្រីទូតប្រចាំនៅអង់គ្លេសរបស់ខ្លួន ក្រោយរិះគន់លោក ត្រាំ

Chheang — Thu, 06 Mar 2025 09:05:43 +0000

រដ្ឋមន្ត្រីការបរទេសនូវែលសេឡង់ លោក Winston Peters នៅថ្ងៃព្រហស្បតិ៍ទី៦ខែមីនានេះ បានប្រកាសពីការបណ្តេញលោក Phil Goff ដែលជាអគ្គរដ្ឋទូតជាន់ខ្ពស់របស់នូវែលសេឡង់ប្រចាំនៅចក្រភពអង់គ្លេស បន្ទាប់ពីមន្ត្រីរូបនេះបានសម្ដែងការមិនពេញចិត្តនិងរិះគន់ប្រធានាធិបតីអាមេរិក លោក ដូណាល់ ត្រាំ។

លោក Phil Goff (រូបថត៖ Reuters)

លោក Goff ដែលបានបម្រើការក្នុងតួនាទីការទូតតាំងពីខែមករាឆ្នាំ២០២៣ បានធ្វើអត្ថាធិប្បាយក្នុងអំឡុងពេលសុន្ទរកថានៅឯវេទិកាមួយក្នុងទីក្រុងឡុងដ៍កាលពីថ្ងៃអង្គារ ដោយបានប្រៀបធៀបកិច្ចប្រឹងប្រែងបញ្ចប់សង្គ្រាមរុស្ស៊ី-អ៊ុយក្រែនរបស់លោក ត្រាំ ទៅនឹងកិច្ចព្រមព្រៀងទីក្រុង Munich ឆ្នាំ១៩៣៨ ដែលអនុញ្ញាតឲ្យ Adolf Hitler កាត់យកដីពីឆេកូស្លូវ៉ាគី។

លោក Goff បានរំលឹកពីរបៀបដែលលោក Winston Churchill អតីតនាយករដ្ឋមន្ត្រីអង់គ្លេសអំឡុងសង្គ្រាមលោកលើកទីពីរ បានរិះគន់កិច្ចព្រមព្រៀងនោះ បន្ទាប់មកបាននិយាយអំពីមេដឹកនាំសហរដ្ឋអាមេរិកថា៖ «ប្រធានាធិបតី ត្រាំ បានដាក់តាំងឡើងវិញនូវរូបរបស់លោក Churchill ទៅការិយាល័យពងក្រពើ។ ប៉ុន្តែតើអ្នកគិតថាគាត់ពិតជាយល់ច្បាស់អំពីប្រវត្តិសាស្រ្តដែរឬក៏អត់?»។

លោក ដូណាល់ ត្រាំ ថតជាមួយរូបសំណាកលោក Winston Churchill (រូបថត៖ Getty)

ពាក់ព័ន្ធនឹងការអត្ថាធិប្បាយនេះ រដ្ឋមន្ត្រីការបរទេសនូវែលសេឡង់ បាននិយាយថា ការលើកឡើងរបស់លោក Goff គឺជារឿងខកចិត្តយ៉ាងខ្លាំង និងមិនអាចទទួលយកបាន ដោយសង្កត់ធ្ងន់ថា សម្ដីដូច្នេះមិនតំណាងឲ្យទស្សនៈរបស់រដ្ឋាភិបាលនូវែលសេឡង់នោះឡើយ។

អតីតនាយករដ្ឋមន្ត្រីនូវែលសេឡង់ លោកស្រី Helen Clark បានរិះគន់ការបណ្តេញលោក Goff នៅក្នុងសេចក្ដីថ្លែងការណ៍មួយនៅលើបណ្ដាញសង្គម X។ លោកស្រី បាននិយាយថា ការដកអតីតរដ្ឋមន្ត្រីការបរទេស«ដ៏គួរឲ្យគោរព» ចេញពីតួនាទីការទូតរបស់គាត់ មិនមានមូលហេតុគ្រប់គ្រាន់ និងសមហេតុផលនោះទេ៕

ដោយ៖ ឈាង

The post នូវែលសេឡង់ បណ្ដេញមន្ត្រីទូតប្រចាំនៅអង់គ្លេសរបស់ខ្លួន ក្រោយរិះគន់លោក ត្រាំ appeared first on Kampuchea Thmey Daily.

ប្រទេសនូវែលសេឡង់ ផ្តល់អាហារូបករណ៍ថ្នាក់ក្រោយឧត្តមសិក្សា ៣៥កន្លែង ដល់ពលរដ្ឋកម្ពុជា

អុន ស្រីមាន — Fri, 07 Feb 2025 09:31:44 +0000

ក្រសួងអប់រំ យុវជន និងកីឡា នាថ្ងៃទី៦ ខែកុម្ភៈ ឆ្នាំ២០២៥ បានឱ្យដឹងថា ក្នុងឆ្នាំ២០២៥នេះ ប្រទេសនូវែលសេឡង់ នឹងផ្តល់អាហារូបករណ៍ថ្នាក់ក្រោយឧត្តមសិក្សាចំនួន ៣៥កន្លែង សម្រាប់ឆ្នាំសិក្សា២០២៦ ដល់ពលរដ្ឋកម្ពុជា ទាំងក្នុងវិស័យសាធារណៈ និងឯកជន។

បើតាមក្រសួងអប់រំបានបញ្ជាក់ថា អាហារូបករណ៍នេះ ក្រោមកម្មវិធី Manaaki New Zealand Scholarship (MNZS) ថ្នាក់ក្រោយឧត្តមសិក្សាចំនួន ៣៥កន្លែង សម្រាប់មុខវិជ្ជាពាក់ព័ន្ធនឹងការប្រែប្រួលអាកាសធាតុ និងបរិស្ថាន ការគ្រប់គ្រងគ្រោះមហន្តរាយ សន្តិសុខស្បៀង និងកសិកម្ម ថាមពលកកើតឡើងវិញ អភិបាលកិច្ច និងការបង្រៀនភាសាអង់គ្លេស ឱ្យទៅបន្តការសិក្សាក្នុងសាកលវិទ្យាល័យនានានៅប្រទេសនូវែលសេឡង់ ឆ្នាំ២០២៦។

អាហារូបករណ៍នេះ មានការផ្តល់ជូនដូចជា ថ្លៃសិក្សា ថ្លៃទិដ្ឋាការ ប្រាក់ឧបត្ថម្ភពេលទៅដល់ ប្រាក់ឧបត្ថម្ភសម្រាប់ការចំណាយប្រចាំថ្ងៃ និងថ្លៃសំបុត្រយន្តហោះទៅមកផងដែរ។

សម្រាប់អ្នកដែលចាប់អារម្មណ៍ អាចដាក់ពាក្យតាមរយៈ www.nzscholarship.govt.nz/apply-online ឱ្យបានមុនថ្ងៃទី២៨ ខែកុម្ភៈ ឆ្នាំ២០២៥។ ចំពោះព័ត៌មានបន្ថែមបេក្ខជនអាចទាក់ទងទៅ IDP Education (Cambodia) ឬ តាមរយៈលេខទូរសព្ទ ០២៣ ២២២ ០៦៣៕

The post ប្រទេសនូវែលសេឡង់ ផ្តល់អាហារូបករណ៍ថ្នាក់ក្រោយឧត្តមសិក្សា ៣៥កន្លែង ដល់ពលរដ្ឋកម្ពុជា appeared first on Kampuchea Thmey Daily.

ត្រីបាឡែនជាង៣០ក្បាល ជាប់គាំងនៅលើឆ្នេរខ្សាច់នូវែលសេឡង់ ត្រូវបានជួយសង្គ្រោះ

Bun sopheap — Mon, 25 Nov 2024 08:50:09 +0000

ត្រីបាឡែនជាង៣០ក្បាលដែលជាប់គាំងនៅលើឆ្នេរមួយក្នុងប្រទេសនូវែលសេឡង់ ដោយក្នុងនោះមាន៤ក្បាលបានងាប់ ត្រូវបានត្រឡប់ទៅសមុទ្រវិញដោយសុវត្ថិភាព បន្ទាប់ពីក្រុមបុគ្គលិកអភិរក្ស និងអ្នកស្រុកបានជួយលើកវាឲ្យហែលចូលទឹកសមុទ្រវិញ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន APនៅថ្ងៃទី២៥ខែវិច្ឆិកានេះ។

(រូបភាព៖ AP)

នាយកដ្ឋានអភិរក្សបានប្រាប់ The Associated Press ថា ក្រុមឃ្លាំមើលឆ្នេរ Ruakaka នៅជិតទីក្រុង Whangārei ភាគខាងជើងនៃប្រទេសនូវែលសេឡង់នៅថ្ងៃចន្ទ ដើម្បីធានាថា មិនមានសញ្ញាណាមួយនៃត្រីបាឡែនដែលបានជួយសង្គ្រោះកាលពីថ្ងៃអាទិត្យ ជាប់គាំងម្តងទៀតនោះទេ។ ទីភ្នាក់ងារនេះ បានសរសើរថា ជា«មិនគួរឱ្យជឿ» មានកិច្ចខិតខំប្រឹងប្រែងចូលរួមដោយមនុស្សរាប់រយនាក់ដើម្បីជួយសង្រ្គោះត្រីបាឡែនទាំងនោះ។

យោងតាមអ្នកនាំពាក្យនាយកដ្ឋានអភិរក្សបាននិយាយនៅក្នុងសេចក្តីថ្លែងការណ៍មួយថា៖«វាពិតជាអស្ចារ្យណាស់ដែលមនុស្សជាច្រើនយកចិត្តទុកដាក់ និងការអាណិតអាសូរពិតប្រាកដបង្ហាញចំពោះត្រីបាឡែនទាំងនោះ នេះជាការបង្ហាញពីទំនាក់ទំនងដ៏ស៊ីជម្រៅដែលយើងទាំងអស់គ្នាចែករំលែកជាមួយបរិស្ថានសមុទ្ររបស់យើង»។

(រូបភាព៖ AP)

គួរបញ្ជាក់ថា នូវែលសេឡង់ បានកត់ត្រាការជាប់គាំត្រីបាឡែនច្រើនជាង៥០០០ចាប់តាំងពីឆ្នាំ១៨៤០។ ការជាប់គាំងរបស់ត្រីបាឡែនធំបំផុតគឺប្រហែល ១០០០ក្បាលនៅកោះ Chatham ក្នុងឆ្នាំ ១៩១៨។ នេះបើយោងតាមនាយកដ្ឋានអភិរក្ស។

ទោះបីវាមិនច្បាស់ថាហេតុអ្វីបានជាមានការជាប់គាំងកើតឡើងនោះទេ ប៉ុន្តែភូមិសាស្ត្ររបស់ប្រទេសកោះនេះត្រូវបានគេជឿថាជាកត្តាមួយ។ ទាំងកោះខាងជើង និងខាងត្បូងមានលក្ខណៈពិសេសលាតសន្ធឹងនៃឆ្នេរសមុទ្រដែលលាតសន្ធឹងជាមួយនឹងឆ្នេរសមុទ្ររាក់ និងចំណោតដែលអាចធ្វើឲ្យប្រភេទដូចជាត្រីបាឡែនជាប់គាំង៕

(រូបភាព៖ AP)

អត្ថបទ៖ ប៊ុន សុភាព

The post ត្រីបាឡែនជាង៣០ក្បាល ជាប់គាំងនៅលើឆ្នេរខ្សាច់នូវែលសេឡង់ ត្រូវបានជួយសង្គ្រោះ appeared first on Kampuchea Thmey Daily.

អ្នកវិទ្យាសាស្រ្តរកឃើញប្រភេទត្រីឆ្លាមថ្មី ក្នុងដែនទឹកនូវែលសេឡង់

Bun sopheap — Wed, 25 Sep 2024 03:47:55 +0000

អ្នកវិទ្យាសាស្ត្រនូវែលសេឡង់ បានរកឃើញត្រីឆ្លាមខ្មោច (ghost shark) ប្រភេទថ្មី ដែលជាប្រភេទត្រីដ៏កម្រនិងពិបាកមើលឃើញ ព្រោះវារស់នៅក្នុងជម្រៅដ៏ជ្រៅក្នុងមហាសមុទ្រប៉ាស៊ីហ្វិក។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៥ខែកញ្ញានេះ។

(រូបភាព៖ NIWA)

ត្រីឆ្លាមខ្មោចនេះត្រូវបានគេស្គាល់ផងដែរថា ជាប្រភេទ spookfish ឬ chimera មានទំនាក់ទំនងយ៉ាងជិតស្និទ្ធជាមួយត្រីឆ្លាមប្រភេទផ្សេងទៀតនិងត្រីបបែល។ ពួកវាមិនមានស្រកាទេ ហើយគ្រោងឆ្អឹងរបស់ពួកវាត្រូវបានបង្កើតឡើងពីឆ្អឹងខ្ចីទាំងស្រុង។

វេជ្ជបណ្ឌិត Brit Finucci ដែលជាអ្នកវិទ្យាសាស្ត្រម្នាក់ដែលបានរកឃើញ Spookfish ច្រមុះស្រួចរបស់អូស្ត្រាលី បាននិយាយថា ការរកឃើញនេះគឺ «គួរឲ្យភ្ញាក់ផ្អើល» ដោយសារជម្រករបស់ពួកវាធ្វើឱ្យអ្នកវិទ្យាសាស្រ្តពិបាកក្នុងការសិក្សា និងតាមដានដែលធ្វើឲ្យអ្នកវិទ្យាសាស្រ្តមិនដឹងច្រើនអំពីជីវវិទ្យា ឬស្ថានភាពគំរាមកំហែងរបស់ពួកវាទេ។

លោកស្រីបណ្ឌិត Finucci និងអ្នកស្រាវជ្រាវផ្សេងទៀតមកពីវិទ្យាស្ថានជាតិស្រាវជ្រាវទឹក និងបរិយាកាសរបស់ប្រទេសនូវែលសេឡង់ (Niwa) បានរកឃើញសត្វនេះនៅក្នុងតំបន់នៃបាតសមុទ្រដែលគេស្គាល់ថាជា Chatham Rise ដែលស្ថិតនៅភាគខាងកើតនៃប្រទេសនូវែលសេឡង់ ខណៈត្រីឆ្លាមខ្មោចជាធម្មតារស់នៅក្នុងជម្រៅរហូតដល់២៦០០ម៉ែត្រ។

ដោយសារតែត្រីឆ្លាមប្រភេទនេះមានច្រមុះលេចវែងខុសពីធម្មតា ដែលមានប្រវែងប្រហែលពាក់កណ្តាលនៃដងខ្លួនរបស់វាលោកស្រីបានផ្តល់ឈ្មោះវិទ្យាសាស្ត្រដល់ត្រីថ្មីនេះដោយមានលក្ខណៈប្លែកពីគេថា «Harriota avia»។

(រូបភាព៖ NOAA)

គួរបញ្ជាក់ថា Spookfish ដំបូងឡើយត្រូវបានគេគិតថាជាផ្នែកមួយនៃប្រភេទសត្វដែលត្រូវបានរកឃើញនៅជុំវិញពិភពលោក ប៉ុន្តែក្រោយមក ការស្រាវជ្រាវបានបង្ហាញថា វាមានហ្សែនខុសគ្នាទៅនឹងអម្បូរសែស្រឡាយរបស់វា ហើយរស់នៅតែក្នុងទឹកអូស្ត្រាលី និងនូវែលសេឡង់ ខណៈអ្នកវិទ្យាសាស្ត្រនិយាយថាការរកឃើញបែបនេះមានសារៈសំខាន់ណាស់ ពីព្រោះវាបានជួយដល់ការការស្វែងយល់បន្ថែមអំពីរបៀបដែលប្រភេទសត្វនេះរស់នៅ និងជួយអ្នកជំនាញរកវិធីល្អបំផុតដើម្បីការពារពួកវា៕

អត្ថបទ៖ ប៊ុន សុភាព

The post អ្នកវិទ្យាសាស្រ្តរកឃើញប្រភេទត្រីឆ្លាមថ្មី ក្នុងដែនទឹកនូវែលសេឡង់ appeared first on Kampuchea Thmey Daily.

ប្រទេសនូវែលសេឡង់ Archives - Kampuchea Thmey Daily

​កម្ពុជា-នូវែលហ្សេឡង់ ​ចុះ​កិច្ច​ព្រមព្រៀង​លើ​វិស័យ​ពាណិជ្ជ​កម្ម​ស្រូវ​អង្ករ ​និង​វិនិយោគ​

រដ្ឋាភិបាល​នូវែលសេឡង់តាក់តែង​ច្បាប់ហាមក្មេងអាយុ​ក្រោម១៦ឆ្នាំ ​ប្រើប្រាស់​បណ្តាញ​សង្គម

ត្រី Blobfish ក្លាយជាសត្វមានរូប​អាក្រក់បំផុតក្នុងពិភពលោក

​នូវែលសេឡង់ បណ្ដេញ​មន្ត្រី​ទូត​ប្រចាំ​នៅ​អង់គ្លេស​របស់​ខ្លួន ក្រោយ​រិះគន់​លោក ត្រាំ

ប្រទេសនូវែលសេឡង់ ផ្តល់អាហារូបករណ៍ថ្នាក់ក្រោយឧត្តមសិក្សា ៣៥កន្លែង ដល់ពលរដ្ឋកម្ពុជា

ត្រីបាឡែនជាង​៣០ក្បាល ជាប់គាំងនៅលើឆ្នេរខ្សាច់នូវែលសេឡង់ ត្រូវបាន​ជួយសង្គ្រោះ​

អ្នកវិទ្យាសាស្រ្តរកឃើញប្រភេទ​ត្រី​ឆ្លាម​ថ្មី ក្នុងដែន​ទឹកនូវែលសេឡង់

កម្ពុជា-នូវែលហ្សេឡង់ ចុះកិច្ចព្រមព្រៀងលើវិស័យពាណិជ្ជកម្មស្រូវអង្ករ និងវិនិយោគ

រដ្ឋាភិបាលនូវែលសេឡង់តាក់តែងច្បាប់ហាមក្មេងអាយុក្រោម១៦ឆ្នាំ ប្រើប្រាស់បណ្តាញសង្គម

ត្រី Blobfish ក្លាយជាសត្វមានរូបអាក្រក់បំផុតក្នុងពិភពលោក

នូវែលសេឡង់ បណ្ដេញមន្ត្រីទូតប្រចាំនៅអង់គ្លេសរបស់ខ្លួន ក្រោយរិះគន់លោក ត្រាំ

ត្រីបាឡែនជាង៣០ក្បាល ជាប់គាំងនៅលើឆ្នេរខ្សាច់នូវែលសេឡង់ ត្រូវបានជួយសង្គ្រោះ

អ្នកវិទ្យាសាស្រ្តរកឃើញប្រភេទត្រីឆ្លាមថ្មី ក្នុងដែនទឹកនូវែលសេឡង់