ប្រមុខការទូត Archives - Kampuchea Thmey Daily

ប្រមុខការទូតកម្ពុជា នឹងធ្វើជាសហប្រធានដឹកនាំកិច្ចប្រជុំគណៈកម្មការចម្រុះកម្ពុជា-ហ្វីលីពីន លើកទី៣

Kang Tola — Mon, 29 Nov 2021 11:46:34 +0000

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងអញ្ជើញធ្វើជាសហប្រធានជាមួយលោក តែវដូរ៉ូ ឡក់ស៊ីន ជេអរ (Teodoro L. Locsin Jr) រដ្ឋមន្ត្រីការបរទេសនៃសាធារណរដ្ឋហ្វីលីពីន ដឹកនាំកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការទ្វេភាគីកម្ពុជា-ហ្វីលីពីន លើកទី៣ (3rd JCBC) នៅថ្ងៃទី០២ ខែធ្នូ ឆ្នាំ២០២១ តាមប្រព័ន្ធវីដេអូ។

កិច្ចប្រជុំ 3rd JCBC មានគោលបំណងបន្តពង្រឹងបន្ថែមទៀតនូវទំនាក់ទំនងទ្វេភាគីដ៏ល្អដែលមានស្រាប់ ព្រមទាំងរិះរកមធ្យោបាយ ដើម្បីពង្រីកបន្ថែមទៀតនូវវិសាលភាព និងពង្រឹងប្រសិទ្ធភាព នៃកិច្ចសហប្រតិបត្តិការទ្វេភាគីនៅក្នុងវិស័យនានា សម្រាប់ការអភិវឌ្ឍសង្គម-សេដ្ឋកិច្ច និងវិបុលភាពនៃប្រជាជនទាំងពីរ។ កិច្ចប្រជុំ ក៏នឹងពិនិត្យមើលឡើងវិញនូវវឌ្ឍនភាពដែលសម្រេចបាននៅក្នុងការអនុវត្តលើកំណត់ហេតុនៃកិច្ចប្រជុំ JCBC លើកទី២ ដែលបានចុះហត្ថលេខា នៅឆ្នាំ២០១៧ នៅទីក្រុងម៉ានីល ប្រទេសហ្វីលីពីន។ កិច្ចប្រជុំ ក៏នឹងផ្តល់ឱកាសដល់ភាគីទាំងពីរផ្លាស់ប្តូរយោបល់គ្នាលើកិច្ចសហប្រតិបត្តិការនៅក្នុងក្របខ័ណ្ឌតំបន់ និងអន្តរជាតិផងដែរ។

នៅចុងបញ្ចប់នៃកិច្ចប្រជុំ លោកឧបនាយករដ្ឋមន្ត្រី ប្រាក់ សុខុន និងលោក តែវដូរ៉ូ ឡក់ស៊ីន ជេអរ នឹងចុះហត្ថលេខាលើកំណត់ហេតុនៃកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការទ្វេភាគី កម្ពុជា-ហ្វីលីពីន លើកទី៣៕

ដោយ ៖ កោះកែវ

The post ប្រមុខការទូតកម្ពុជា នឹងធ្វើជាសហប្រធានដឹកនាំកិច្ចប្រជុំគណៈកម្មការចម្រុះកម្ពុជា-ហ្វីលីពីន លើកទី៣ appeared first on Kampuchea Thmey Daily.

ប្រមុខការទូតកម្ពុជាអំពាវនាវឱ្យរដ្ឋសមាជិកCICAទាំងអស់ពង្រឹងកិច្ចសហប្រតិបត្តិការដើម្បីលើកស្ទួយជំហរអន្តរជាតិរបស់CICA

Kang Tola — Fri, 15 Oct 2021 11:55:12 +0000

ប្រមុខការទូតកម្ពុជាបានអំពាវនាវឱ្យរដ្ឋសមាជិក CICAទាំងអស់ពង្រឹងកិច្ចសហប្រតិបត្តិការដើម្បីលើកស្ទួយជំហរអន្តរជាតិរបស់ CICAក្នុងការលើកកម្ពស់កិច្ចសន្ទនាដែលមាន ប្រកបដោយបរិយាប័ន្ននិងស្មារតីកសាងការសម្របសម្រួលពាណិជ្ជកម្មនិងការវិនិយោគនិងការអនុវត្តមធ្យោបាយប្រកបដោយនវានុវត្តន៍ក្នុងការលើកស្ទួយកិច្ចសហប្រតិបត្តិការគ្រប់ជ្រុងជ្រោយនៅទូទាំងតំបន់។

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិបានថ្លែងអំពាវនាវបែបនេះនៅកិច្ចប្រជុំរដ្ឋមន្ត្រីការបរទេសលើកទី៦របស់សន្និសីទអន្តរសកម្មភាពនិងវិធានការកសាងទំនុកចិត្តនៅអាស៊ី (CICA)ដែលបានប្រព្រឹត្តទៅដោយផ្ទាល់និងតាមប្រព័ន្ធវីដេអូថ្ងៃទី១២ ខែតុលា ឆ្នាំ២០២១ ទីក្រុង Nur-Sultan សាធារណរដ្ឋកាហ្សាក់ស្ថាន។

នៅក្នុងសេចក្តីប្រកាសព័ត៌មាន របស់ក្រសួងការបរទេសនិងសហប្រតិបត្តិការអន្តរជាតិស្តីពីលទ្ធផលកិច្ចប្រជុំរដ្ឋមន្ត្រីការបរទេសលើកទី៦របស់សន្និសីទអន្តរសកម្មភាពនិងវិធាន ការកសាងទំនុកចិត្តនៅអាស៊ី (CICA)នៅល្ងាចថ្ងៃទី១៤ ខែតុលា ឆ្នាំ ២០២១ បានឲ្យដឹងថា ក្នុងកិច្ចប្រជុំនោះលោកឧបនាយករដ្ឋមន្ត្រី ប្រាក់ សុខុន បានគូសបញ្ជាក់ពីសារៈសំខាន់នៃការថែរក្សាសន្តិភាពនិងវិបុលភាពសកលដែលប្រទេសទាំងអស់ខិតខំសម្រេចបានដោយលំបាករួមទាំងភាពចាំបាច់តម្រូវឱ្យរដ្ឋសមាជិក CICA ចូលរួមដោះស្រាយ បញ្ហាប្រឈមចំពោះមុខដែលបង្កឡើងដោយជំងឺកូវីដ-១៩ និងបញ្ហាប្រឈមដទៃទៀតដូចជាការប្រកួតប្រជែងរវាងមហាអំណាចការរាំងស្ទុះខ្សែច្រវ៉ាក់ផ្គត់ផ្គង់ និងគម្លាតនៃការអភិវឌ្ឍ។

ក្នុងន័យនេះលោកឧបនាយករដ្ឋមន្ត្រីបានអំពាវនាវឱ្យរដ្ឋសមាជិក CICA ទាំងអស់ពង្រឹងកិច្ចសហប្រតិបត្តិការដើម្បីលើកស្ទួយជំហរអន្តរជាតិរបស់ CICA ក្នុងការលើកកម្ពស់កិច្ច សន្ទនាដែលមានប្រកបដោយបរិយាប័ន្ននិងស្មារតីកសាងការសម្របសម្រួលពាណិជ្ជកម្មនិងការវិនិយោគនិងការអនុវត្តមធ្យោបាយប្រកបដោយនវានុវត្តន៍ក្នុងការលើកស្ទួយកិច្ចសហប្រតិបត្តិការគ្រប់ជ្រុងជ្រោយនៅទូទាំងតំបន់ដូចជាទំនាក់ទំនងតាមរយៈ Track 1.5 និង Track 2 ជាដើម។

កិច្ចប្រជុំរដ្ឋមន្ត្រីការបរទេសលើកទី៦ របស់សន្និសីទអន្តរសកម្មភាពនិងវិធានការកសាងទំនុកចិត្តនៅអាស៊ី(CICA)ក្រោមមូលបទ«សន្តិសុខនិងការអភិវឌ្ឍប្រកបដោយចីរភាព នៅអាស៊ីក្នុងតថភាពថ្មីនៃពិភពលោកក្រោយការរីករាលដាលនៃជំងឺរាតត្បាត» រដ្ឋមន្ត្រីការបរទេស CICA បានបញ្ជាក់សាជាថ្មីនូវការប្តេជ្ញាចិត្តរបស់ពួកគេក្នុងការពង្រឹងនិងការ កសាងទំនុកចិត្តទៅវិញទៅមកក្នុងគោលបំណងចម្បងគឺការលើកកម្ពស់សន្តិភាពសន្តិសុខ ស្ថិរភាពនិងវិបុល ភាពនៅទូទាំងតំបន់អាស៊ី។

អង្គប្រជុំបានផ្លាស់ប្តូរទស្សនៈនិងបានដាក់ចេញនូវទិសដៅរួមសម្រាប់បញ្ហាតំបន់និងសកលលោកសំខាន់ៗរួមមានសារៈសំខាន់នៃការប្រកាន់ខ្ជាប់នូវប្រព័ន្ធពាណិជ្ជកម្មពហុភាគីដែល មានច្បាប់ជាមូលដ្ឋានការការពារបរិស្ថាន តម្រូវការក្នុងការទាញយកប្រយោជន៍ពីបច្ចេកវិទ្យាចុងក្រោយដើម្បីសម្របសម្រួលការស្តារសង្គម-សេដ្ឋកិច្ចពីវិបត្តិជំងឺរាតត្បាត កូវីដ-១៩និងសារៈសំខាន់នៃការប្រកាន់ខ្ជាប់នូវសិទ្ធិមនុស្សក្នុងន័យទាំងស្រុងស្របតាមគោលការណ៍នៃធម្មនុញ្ញរបស់អង្គការសហប្រជាជាតិនិងច្បាប់អន្តរជាតិ ។

អង្គប្រជុំបានអនុម័តឯកសារដូចជា ១.បទបញ្ញត្តិសម្រាប់ក្រុមប្រឹក្សាឥស្សរជនឆ្នើម CICA (CICA Council of Eminent Persons) ,២.បច្ចុប្បន្នភាពនៃកាតាឡុក CICA ស្តីពីយន្តការកសាងទំនុកចិត្ត និងទី៣. វិសោធនកម្មនីតិវិធីនៃការសម្រេចចិត្តរបស់ CICA៕

ដោយ ៖ ណារី

The post ប្រមុខការទូតកម្ពុជាអំពាវនាវឱ្យរដ្ឋសមាជិកCICAទាំងអស់ពង្រឹងកិច្ចសហប្រតិបត្តិការដើម្បីលើកស្ទួយជំហរអន្តរជាតិរបស់CICA appeared first on Kampuchea Thmey Daily.

ប្រមុខការទូតកម្ពុជា ប្រាប់សន្និសីទអន្តរពីសារៈសំខាន់នៃការថែរក្សាសន្តិភាព ដែលប្រទេសទាំងអស់ខិតខំសម្រេចបានដោយលំបាក

Kang Tola — Fri, 15 Oct 2021 10:48:05 +0000

នេះជាការបញ្ជាក់នៅក្នុងលទ្ធផលកិច្ចប្រជុំរដ្ឋមន្ត្រីការបរទេសលើកទី៦ របស់សន្និសីទអន្តរសកម្មភាព និងវិធានការកសាងទំនុកចិត្តនៅអាស៊ី (CICA) ដែលបានប្រព្រឹត្តទៅដោយផ្ទាល់ និងតាមប្រព័ន្ធវីដេអូ ទីក្រុង Nur-Sultan សាធារណរដ្ឋកាហ្សាក់ស្ថាន ដែលកិច្ចប្រជុំនេះដឹកនាំដោយលោក មុខតារ ទីឡើបឺរឌី (Mukhtar Tileuberdi) ឧបនាយករដ្ឋមន្ត្រី រដ្ឋមន្ត្រីការបរទេស នៃសាធារណរដ្ឋកាហ្សាក់ស្ថាន។

កិច្ចប្រជុំនេះ ក្រោមមូលបទ “សន្តិសុខ និងការអភិវឌ្ឍប្រកបដោយចីរភាពនៅអាស៊ីក្នុងតថភាពថ្មី នៃពិភពលោកក្រោយការរីករាលដាលនៃជំងឺរាតត្បាត” ហើយរដ្ឋមន្ត្រីការបរទេស CICA បានបញ្ជាក់សារជាថ្មីនូវការប្តេជ្ញាចិត្តរបស់ពួកគេ ក្នុងការពង្រឹងនិងការកសាងទំនុកចិត្តទៅវិញទៅមកក្នុងគោលបំណងចំបង គឺការលើកកម្ពស់សន្តិភាព សន្តិសុខ ស្ថិរភាព និងវិបុលភាពនៅទូទាំងតំបន់អាស៊ី។

អង្គប្រជុំបានផ្លាស់ប្ដូរទស្សនៈ និងបានដាក់ចេញនូវទិសដៅរួមសម្រាប់បញ្ហាតំបន់ និងសកលសំខាន់ៗ រួមមានសារៈសំខាន់នៃការប្រកាន់ខ្ជាប់នូវប្រព័ន្ធពាណិជ្ជកម្មពហុភាគី ដែលមានច្បាប់ជាមូលដ្ឋាន ការការពារបរិស្ថាន តម្រូវការក្នុងការទាញយកប្រយោជន៍ពីបចេ្ចកវិទ្យាចុងក្រោយដើម្បីសម្របសម្រួលការស្ដារសង្គម-សេដ្ឋកិច្ចពីវិបត្តិជំងឺរាតត្បាតកូវីដ-១៩ និងសារៈសំខាន់នៃការប្រកាន់ខ្ជាប់នូវសិទ្ធិមនុស្សក្នុងន័យទាំងស្រុង ស្របតាមគោលការណ៍នៃធម្មនុញ្ញរបស់អង្គការសហប្រជាជាតិនិងច្បាប់អន្តរជាតិ។

ក្នុងកិច្ចប្រជុំ លោកឧបនាយករដ្ឋមន្ត្រី ប្រាក់ សុខុន បានគូសបញ្ជាក់ពីសារៈសំខាន់នៃការថែរក្សាសន្តិភាព និងវិបុលភាពសកល ដែលប្រទេសទាំងអស់ខិតខំសម្រេចបានដោយលំបាក រួមទាំងភាពចាំបាច់តម្រូវឱ្យរដ្ឋសមាជិក CICA ចូលរួមដោះស្រាយបញ្ហាប្រឈមចំពោះមុខដែលបង្កឡើងដោយជំងឺកូវីដ-១៩ និងបញ្ហាប្រឈមដទៃទៀត ដូចជា ការប្រកួតប្រជែងរវាងមហាអំណាច ការរាំងស្ទះខ្សែច្រវាក់ផ្គត់ផ្គង់ និងគម្លាតនៃការអភិវឌ្ឍន៍។ លោកឧបនាយករដ្ឋមន្ត្រី បានអំពាវនាវឱ្យរដ្ឋសមាជិក CICA ទាំងអស់ពង្រឹងកិច្ចសហប្រតិបត្តិការ ដើម្បីលើកស្ទួយជំហរអន្តរជាតិរបស់ CICA ក្នុងការលើកកម្ពស់កិច្ចសន្ទនា ដែលមានប្រកបដោយបរិយាប័ន្ននិងស្មារតីកសាង ការសម្របសម្រួលពាណិជ្ជកម្ម និងការវិនិយោគ និងការអនុវត្តមធ្យោបាយប្រកបដោយនវានុវត្តន៍ក្នុងការលើកស្ទួយកិច្ចសហប្រតិបត្តិការគ្រប់ជ្រុងជ្រោយនៅទូទាំងតំបន់ ដូចជាទំនាក់ទំនងតាមរយៈ Track 1.5 និងTrack 2 ជាដើម។

អង្គប្រជុំបានអនុម័តឯកសារដូចជា ១) បទបញ្ញត្តិសម្រាប់ក្រុមប្រឹក្សាឥស្សរជនឆ្នើម CICA (CICA Council of Eminent Persons) ២) បច្ចុប្បន្នភាពនៃកាតាឡុក CICA ស្ដីពីយន្តការកសាងទំនុកចិត្ត និង៣) វិសោធនកម្មនីតិវិធីនៃការសម្រេចចិត្តរបស់ CICA៕

ដោយ ៖ កោះកែវ

The post ប្រមុខការទូតកម្ពុជា ប្រាប់សន្និសីទអន្តរពីសារៈសំខាន់នៃការថែរក្សាសន្តិភាព ដែលប្រទេសទាំងអស់ខិតខំសម្រេចបានដោយលំបាក appeared first on Kampuchea Thmey Daily.

ប្រមុខការទូតកម្ពុជា-ចិន បានលើកឡើងពីបញ្ហា និងសម្រេចអ្វីខ្លះ ក្រោយជំនួបពិភាក្សា?

KC Virak — Tue, 14 Sep 2021 00:20:00 +0000

ប្រមុខកាទូតចិន លោក វ៉ាង យី (Wang Yi) ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន បានអញ្ជើញបំពេញទស្សនកិច្ចផ្លូវការរយៈពេល២ថ្ងៃ នៅកម្ពុជា ហើយកាលពីរសៀលថ្ងៃទី១២ ខែកញ្ញា លោកបានជួបពិភាក្សាការងារជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា។ នៅក្នុងជំនួបរវាងថ្នាក់ដឹកនាំទាំងពីរនេះបានលើកឡើងពីចំណុចសំខាន់ជាច្រើន ជាពិសេសផលប្រយោជន៍ ដែលទទួលបានពីកិច្ចសសហប្រតិបត្តិការរវាងប្រទេសទាំងពីរ។

មានប្រសាសន៍នៅក្នុងសន្និសីទសារព័ត៌មានរួមគ្នាក្រោយពីជំនួបពិភាក្សា លោកឧបនាយករដ្ឋមន្ត្រី ប្រាក់ សុខុន បានលើកឡើងថា ដំណើរទស្សនកិច្ចរបស់លោក វ៉ាង យី នៅកម្ពុជានាពេលនេះ គឺជាជំហានថ្មី និងសំខាន់មួយទៀតនៅក្នុងទំនាក់ទំនងទ្វេភាគីរវាងប្រទេសទាំងពីរ ដែលមានសំបូរបែបស្រាប់ទៅហើយ និងបន្តពង្រឹងមិត្តភាពដែកថែបរវាងប្រទេសទាំងពីរ ក៏ដូចជាកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន។ លោកបន្តថា នៅក្នុងកិច្ចពិភាក្សា រូបលោក និងលោក វ៉ាង យី បានពិភាក្សាគ្នាប្រកបដោយផ្លែផ្កាលើបញ្ហាទ្វេភាគី ពហុភាគី និងបញ្ហាតំបន់។

លោកឧបនាយករដ្ឋមន្ត្រី ប្រាក់ សុខុន បានអះអាងថា នៅក្នុងទំនាក់ទំនងរវាងប្រទេសទាំងពីរ លោកកត់សម្គាល់ថា ទំនាក់ទំនង និងមិត្តភាពជិតស្និទ្ធរវាងមេដឹកនាំកំពូល នៃប្រទេសទាំងពីរកម្ពុជា ចិន គឺបានរួមចំណែកដ៏សំខាន់នៅក្នុងការពង្រឹងកិច្ចសហប្រតិបត្តិការដៃគូគ្រប់ជ្រុងជ្រោយនៅក្នុងដំណាក់កាលថ្មី ក៏ដូចជាកិច្ចខិតខំប្រឹងប្រែងរួមក្នុងការកសាងសហគមន៍ជោគវាសនារួម ក៏ដូចជាដើម្បីផលប្រយោជន៍រួម នៃប្រជាជនយើងទាំងពីរផងដែរ។

លោកឧបនាយករដ្ឋមន្ត្រីប្រាក់ សុខុន បានបញ្ជាក់ថា លោករីករាយណាស់ដោយឃើញប្រទេសចិនបានគ្រប់គ្រង ដោយជោគជ័យនូវការរីករាលដាល នៃជំងឺកូវីដ-១៩ និងបានស្ដារសេដ្ឋកិច្ចរបស់ខ្លួនបានយ៉ាងល្អប្រសើរ ដែលធ្វើឱ្យត្រីមាសទី១ សេដ្ឋកិច្ចរបស់ចិនបានកើនឡើងរហូតដល់ ១៨.៣ ភាគរយ។ ជាមួយគ្នានេះ ចិនក៏បានជួយទៅដល់បណ្ដាប្រទេសក្នុងពិភពលោកដែលត្រូវការទាំងសម្ភារៈពេទ្យ និងវ៉ាក់សាំងសម្រាប់បង្ការជំងឺកូវី-១៩។

លោកបានថ្លែងអំណរគុណដល់រដ្ឋាភិបាលចិន ក៏ដូចជាប្រជាជនចិន ដែលបានផ្ដល់ជំនួយ និងកិច្ចសហប្រតិបត្តិការ រួមទាំងកិច្ចខិតខំប្រឹងប្រែងប្រយុទ្ធប្រឆាំងនឹងការរីករាលដាលនៃជំងឺកូវី-១៩ និងការតស៊ូ ដើម្បីងើបឡើងវិញខាងសេដ្ឋកិច្ច-សង្គម ដែលប៉ះពាល់ដោយជំងឺកូវី-១៩ ហើយជាសាមគ្គីភាព ដែលចិនបានបង្ហាញចំពោះកម្ពុជា ដោយទទួលបានវ៉ាក់សាំងជំនួន២៦លាន៨សែន ដែលក្នុងនោះ មានជំនួយឧបត្ថម្ភចំនួន ៤លាន៣សែន។ ជាមួយគ្នានោះ ចិនបានប្រកាសផ្ដល់ចំនួន៣ លានដុះបន្ថែមទៀត។ លោកមានប្រសាសន៍ថា គ្មានប្រទេសណា ដែលបានជួយកម្ពុជាដូចភាគីចិននេះ។

ក្នុងឱកាសនោះដែរ លោកឧបនាយករដ្ឋមន្ត្រី ប្រាក់ សុខុន ក៏បានថ្លែងអំណរគុណដល់ប្រទេសចិន ដែលបានផ្ដល់ជំនួយឧបត្ថម្ភជំនួយអភិវឌ្ឍន៍គ្រប់គ្រប់កាលៈទេសៈទាំងអស់។ លោកថា ការអភិវឌ្ឍន៍របស់កម្ពុជាលើគ្រប់វិស័យទាំងអស់ មិនអាចកាត់ផ្ដាច់ចេញពីជំនួយឧបត្ថម្ភ និងការគាំទ្ររបស់មិត្តចិនបាននោះទេ។

នៅក្នុងជំនួបពិភាក្សាភាគីទាំងពីរ ក៏បានជជែកពិភាក្សាគ្នាអំពីការបន្តកិច្ចសហប្រតិបត្តិការ ទាំងវិស័យនយោបាយ វិស័យការពារជាតិ និងសន្តិសុខ ការអភិវឌ្ឍន៍សេដ្ឋកិច្ច វិស័យពាណិជ្ជកម្ម វិនិយោគ វប្បធម៌ ទេសចរណ៍ សិក្សាធិការ សុខាភិបាលសាធារណៈ ជាដើម ក្នុងនោះលោក វ៉ាង យី ក៏បានសន្យាធ្វើយ៉ាងណា ឱ្យកសិផលកសិកម្មរបស់កម្ពុជាកាន់តែច្រើន បានចូលទៅក្នុងទីផ្សាររបស់ចិន។

បើតាមលោកឧបនាយករដ្ឋមន្ត្រី ប្រាក់ សុខុន នៅក្នុងជំនួបពិភាក្សាជាមួយលោក វ៉ាង យី លោកក៏បានបញ្ជាក់អំពីជំហររបស់កម្ពុជានៅក្នុងការបន្តគាំទ្រ ពហុភាគីនិយម ដោយគាំទ្រដល់សណ្ដាប់ធ្នាប់អន្តរជាតិមួយ ដោយផ្អែកទៅលើការគោរពច្បាប់អន្តរជាតិ និងរក្សាការពារឱ្យបាននូវសន្តិភាព និងកិច្ចសហប្រតិបត្តិការ សន្តិភាព ស្ថេរភាពនៅលើលោក។ ចិន ក៏បានគាំទ្រកម្ពុជាធ្វើជាម្ចាស់ផ្ទះនៅក្នុងកិច្ចប្រជុំកំពូលអាស៊ីអឺរ៉ុប លើកទី១៣ និងការធ្វើជាប្រធានអាស៊ាន នៅឆ្នាំក្រោយនេះផងដែរ។

ថ្លែងនៅក្នុងសន្និសីទសារព័ត៌មានរួមគ្នានោះដែរ លោក វ៉ាង យី (Wang Yi) បានលើកឡើងថា នៅក្នុងដំណើរទស្សនកិច្ចនាលើកនេះ លោកមើលឃើញការរីកចម្រើននៅប្រទេសកម្ពុជាយ៉ាងខ្លាំង។ ចិន និងកម្ពុជាបានពួតដៃគ្នាប្រយុទ្ធប្រឆាំងជំងឺកូវី-១៩ ដើម្បីជួយស្ដារឡើងវិញនូវសេដ្ឋកិច្ច។ លោកថា ប្រទេសកម្ពុជា គឺជាមិត្តដែកថែប និងជាអ្នកជិតខាងល្អរបស់ប្រទេសចិន ក្រោមការដឹកនាំរបស់ព្រះមហាក្សត្រ និងសម្ដេចតេជោនាយករដ្ឋមន្ត្រី កិច្ចសហប្រតិបត្តិការគ្រប់ជ្រុងជ្រោយរវាងប្រទេសចិន និងកម្ពុជា រក្សាបាននូវកម្រិតខ្ពស់ ហើយនៅក្នុងដំណាក់កាលការរីករាលដាលនៃជំងឺកូវី-១៩ សម្ដេចតេជោនាយករដ្ឋមន្ត្រី បានគាំទ្រចិន ដោយបំពេញទស្សនកិច្ចផ្លូវការទៅកាន់ប្រទេសចិន ហើយនៅពេលកម្ពុជាមានការផ្ទុះឡើងនូវជំងឺកូវី-១៩ ប្រទេសចិនក៏បានសងវិញ ដោយគាំទ្រកម្ពុជា។ ប្រទេសទាំងពីរបានគាំទ្រគ្នាទៅវិញទៅមក ទាំងកិច្ចការតំបន់ និងអន្តរជាតិ ហើយកម្ពុជាមិនខ្លាចការគំរាមកំហែងនោះឡើយ។

បើតាមលោក Wang Yi សម្ដេចតេជោ ហ៊ុន សែន ដឹកនាំប្រទេសកម្ពុជា និងគណបក្សប្រជាជនកម្ពុជារក្សាបាននូវស្ថិរភាព សន្តិភាព ហើយចិនប្រឆាំងដាច់ខាតចំពោះការយកបញ្ហាជំងឺកូវី-១៩ ធ្វើជាប្រធានបទនយោបាយ។ លោកថា ចិននឹងពង្រីកការនាំចូលផលិតផលកសិកម្មពីប្រទេសកម្ពុជា និងជំរុញការអភិវឌ្ឍន៍តំបន់សំខាន់ៗនៅកម្ពុជា ជាពិសេសតំបន់សេដ្ឋកិច្ចនៅខេត្តព្រះសីហនុ និងផ្លូវល្បឿនលឿនពីភ្នំពេញទៅខេត្តព្រះសីហនុ ជាដើម។ លោកថា នៅក្នុងកិច្ចសហប្រតិបត្តិការនេះ ចិន និងកម្ពុជា យកផលប្រយោជន៍ប្រជាជនជាស្នូល ដែលធ្វើឱ្យមិត្តភាពរវាងប្រទេសទាំងពីរ ផ្ដល់ផលប្រយោជន៍ទៅលើប្រជាជន។

ជាមួយគ្នានោះ ចិន និងគាំទ្រលើការអភិវឌ្ឍន៍ផ្សេងៗទៀត ដូចជាសាលារៀន មន្ទីរពេទ្យ ផ្លូវថ្នល់ ដើម្បីបង្កើនកិច្ចសហប្រតិបត្តិការផ្លាស់ប្ដូររវាងប្រជាជន និងប្រជាជន នៃប្រទេសទាំងពីរ។ លោកបញ្ជាក់ថា “យើងត្រូវតែនិយាយថាទេ ចំពោះនយោបាយ ដែលប្រើអំណាចគៀបសង្កត់ ប្រយុទ្ធប្រឆាំង ទៅនឹងអនុត្តរភាព”។ លោកថា កិច្ចសហប្រតិបត្តិការ រវាងប្រទេសកម្ពុជា និងចិន មិនត្រឹមតែផ្ដល់ប្រយោជន៍ឱ្យប្រជាជនទេ ក៏បានផ្ដល់ជាគំរូមួយថ្មី សម្រាប់ទំនាក់ទំនងអន្តរជាតិ ក្នុងការកសាងសហគមន៍វាសនារួម។ យើងមិនត្រូវចាត់ចំណាត់ថ្នាក់ ដោយផ្អែកទៅលើទំហំប្រទេសនោះទេ យើងគ្រប់គ្នាទៅវិញទៅមក។ យើងមិនភ្ជាប់លក្ខខណ្ឌនយោបាយ នៅក្នុងកិច្ចសហប្រតិបត្តិការនោះទេ៕

អត្ថបទ៖ កោះកែវ

The post ប្រមុខការទូតកម្ពុជា-ចិន បានលើកឡើងពីបញ្ហា និងសម្រេចអ្វីខ្លះ ក្រោយជំនួបពិភាក្សា? appeared first on Kampuchea Thmey Daily.

ប្រមុខការទូតនូវែលសេឡង់ អបអរសាទរកម្ពុជាចំពោះកិច្ចខិតខំប្រឹងប្រែងក្នុងការចាក់វ៉ាក់សាំងជូនប្រជាជន

Kang Tola — Sat, 07 Aug 2021 10:24:37 +0000

ការអបអរសាទររបស់ប្រមុខការទូតនូវែលសេឡង់ បានធ្វើឡើងនៅក្នុងកិច្ចប្រជុំរដ្ឋមន្ត្រីការបរទេសអាស៊ាន ជាមួយប្រទេសកាណាដា និងនូវែលសេឡង់ កាលពីថ្ងៃទី០៥ ខែសីហា ឆ្នាំ២០២១ ដែលកិច្ចប្រជុំនោះ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានអញ្ជើញធ្វើជាសហប្រធាន ក្នុងនាមជាប្រទេសសម្របសម្រួលទំនាក់ទំនងដៃគូសន្ទនាអាស៊ាន-នូវែលសេឡង់ ជាមួយលោកជំទាវ ណាណៃយ៉ា ម៉ាហ៊ូតា (Nanaia Mahuta) រដ្ឋមន្ត្រីការបរទេស និងពាណិជ្ជកម្មនៃប្រទេសនូវែលសេឡង់។

នៅក្នុងកិច្ចប្រជុំបានរំលឹកអំពីការរៀបចំប្រកបដោយភាពជោគជ័យនូវកិច្ចប្រជុំកំពូលរំលឹកខួបអនុស្សាវរីយ៍ អាស៊ាន-នូវែលសេឡង់ កាលពីខែវិច្ឆិកា ឆ្នាំ២០២០ តាមប្រព័ន្ធវីដេអូ ដើម្បីអបអរសាទរខួបលើកទី៤៥ នៃទំនាក់ទំនងសន្ទនាអាស៊ាន-នូវែលសេឡង់។ ដើម្បីរក្សាបាននូវសន្ទុះវិជ្ជមាននៅក្នុងទំនាក់ទំនងអាស៊ាន និងនូវែលសេឡង់ កិច្ចប្រជុំបានឯកភាពពន្លឿនការអនុវត្តការប្តេជ្ញាចិត្តរបស់ខ្លួន ចំពោះសេចក្តីប្រកាសចក្ខុវិស័យរួមរបស់ថ្នាក់ដឹកនាំអាស៊ាន-នូវែលសេឡង់ ស្តីពីខួបអនុស្សាវរីយ៍លើកទី៤៥ នៃទំនាក់ទំនងដៃគូសន្ទនាអាស៊ាន-នូវែលសេឡង់៖ កេរដំណែលនៃភាពជាដៃគូ អនាគតរួមគ្នា។ កិច្ចប្រជុំបានសម្តែងការពេញចិត្តចំពោះវឌ្ឍនភាព នៃការអនុវត្តផែនការសកម្មភាពសំរាប់ពង្រឹងភាពជាដៃគូយុទ្ធសាស្ត្រអាស៊ាន-នូវែលសេឡង់ (២០២១-២០២៥) ស្របតាមមូលបទគន្លឹះ ដែលបានឯកភាព “សន្តិភាព វិបុលភាព ប្រជាជន និងភពផែនដី” ជាមួយនឹងទស្សនៈក្នុងការរួមចំណែកដើម្បីសម្រេចឱ្យបាននូវចក្ខុវិស័យ សហគមន៍អាស៊ាន ឆ្នាំ២០២៥។

អាស៊ានបានសម្តែងនូវការកោតសរសើរចំពោះការប្តេជ្ញាចិត្តរបស់ប្រទេសនូវែលសេឡង់ ក្នុងការពង្រឹងការផ្លាស់ប្តូររវាងប្រជាជន និងប្រជាជន តាមរយៈការផ្ដល់អាហារូបករណ៍ ការអប់រំ និងបណ្តុះបណ្តាល បច្ចេកទេស និងវិជ្ជាជីវៈ (TVET) ព្រមទាំងកម្មវិធីបណ្តុះបណ្តាលជំនាញរយៈពេលខ្លី។ ក្នុងន័យនេះ អាស៊ាន បានថ្លែងអំណរគុណដល់ប្រទេសនូវែលសេឡង់ សម្រាប់ការបន្តផ្តល់កម្មវិធីបណ្តុះបណ្តាលរយៈពេលខ្លី ស្តីពីការគ្រប់គ្រងគ្រោះមហន្តរាយ តាមរយៈកម្មវិធី AHA Center Executive (ACE) ក៏ដូចជាជំនួយដល់ការអភិវឌ្ឍវិស័យកសិកម្មដែលឆ្លាតធន់នឹងអាកាសធាតុ នៅក្នុងប្រទេសជាសមាជិកអាស៊ាន ក្នុងរយៈពេល ៥ឆ្នាំខាងមុខ តាមរយៈសម្ព័ន្ធភាពស្រាវជ្រាវសកល ស្តីពីឧស្ម័នផ្ទះកញ្ចក់។

កិច្ចប្រជុំបានស្វាគមន៍ការចាប់ផ្តើមកិច្ចចរចា ដើម្បីលើកកម្ពស់តំបន់ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់ (AANZFTA) និងទន្ទឹងដល់កម្មវិធីគាំទ្រកិច្ចសហប្រតិបត្តិការសេដ្ឋកិច្ចតំបន់ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់ (AANZFTA) ដែលរហូតមកដល់ពេលនេះបានចូលរួមចំណែកយ៉ាងសំខាន់ក្នុងការលើកកម្ពស់សមត្ថភាពពាណិជ្ជកម្មនិងសេដ្ឋកិច្ចរបស់ប្រទេសជាសមាជិកអាស៊ាន។

កិច្ចប្រជុំបានរំពឹងដល់ការសំរេចឱ្យបានឆាប់នូវកិច្ចព្រមព្រៀងសេវាកម្មអាកាសចរណ៍ក្នុងតំបន់ ដែលមានគុណភាពខ្ពស់ រវាងរដ្ឋាភិបាលនៃប្រទេសជាសមាជិកអាស៊ាន និងប្រទេសនូវែលសេឡង់ ដើម្បីផ្តល់នូវបរិយាកាសមួយដែលកាន់តែបើកចំហសម្រាប់ការតភ្ជាប់ផ្លូវអាកាស និងដើម្បីជួយសម្រួលឱ្យកាន់តែប្រសើរឡើងដល់ចរាចរប្រជាជន និងទំនិញ។ អាស៊ានបានស្វាគមន៍ដល់ការគាំទ្របន្តរបស់នូវែលសេឡង់ សម្រាប់ការអនុវត្តផែនការមេ ស្ដីពីការតភ្ជាប់អាស៊ាន (MPAC) ឆ្នាំ២០២៥ ផែនការការងារនៃគំនិតផ្ដួចផ្ដើមសមាហរណកម្មអាស៊ាន (IAI) ដំណាក់កាលទី៤ និងបណ្តាញទីក្រុងឆ្លាតអាស៊ាន (ASCN) និងការប្តេជ្ញាចិត្តក្នុងការលើកកម្ពស់កិច្ចសហប្រតិបត្តិការក្នុងវិស័យសេដ្ឋកិច្ចឌីជីថល ពាណិជ្ជកម្មតាមប្រព័ន្ធអេឡិចត្រូនិក កសិកម្មដែលឆ្លាតធន់នឹងអាកាសធាតុ ការសម្រួលធុរកិច្ចនិងខ្សែច្រវ៉ាក់ផ្គត់ផ្គង់ និងសហគ្រាសមីក្រូ តូច និងមធ្យម (MSMEs)។

កិច្ចប្រជុំបានថ្លែងអំណរគុណកម្ពុជា ក្នុងនាមជាប្រទេសសម្របសម្រួល ដែលនឹងចប់អាណត្តិ ដែលបានកាច់ចង្កូតដឹកនាំភាពជាដៃគូអាស៊ាន-នូវែលសេឡង់ ឱ្យសម្រេចបានលទ្ធផលប្រកបដោយផ្លែផ្កា ក្នុងរយៈពេលបីឆ្នាំចុងក្រោយនេះ (២០១៨-២០២១) និងបានសម្តែងនូវទំនុកចិត្តថា ទំនាក់ទំនងសន្ទនាអាស៊ាន-នូវែលសេឡង់ នឹងកាន់តែលូតលាស់ក្រោមការដឹកនាំរបស់ប្រទេសព្រុយណេដារ៉ូស្សាឡាម ក្នុងនាមជាប្រទេសសម្របសម្រួលបន្ទាប់ សម្រាប់រយៈពេលបីឆ្នាំខាងមុខ។

ដោយឡែកនៅក្នុងជំនួបទ្វេភាគីជាមួយលោកស្រី Nanaia Mahuta រដ្ឋមន្ដ្រីការបរទេសទាំងពីរ បានផ្លាស់ប្តូរទស្សនៈគ្នា និងឈានដល់ការឯកភាពលើកិច្ចសហប្រតិបត្តិការក្នុងវិស័យនានា ដើម្បីពង្រឹងបន្ថែមទៀតនូវទំនាក់ទំនងដៃគូសន្ទនាអាស៊ាន-នូវែលសេឡង់ និងដោះស្រាយបញ្ហាតំបន់និងអន្តរជាតិ ដែលជាការបារម្ភ និងចំណាប់អារម្មណ៍រួម។ លោកស្រី ណាណៃយ៉ា ម៉ាហ៊ូតា បានសម្តែងការកោតសរសើរដល់កម្ពុជា ដែលបានធ្វើការងារសម្របសម្រួលយ៉ាងល្អប្រសើរ ក្នុងនាមជាប្រទេសសម្របសម្រួលទំនាក់ទំនងដៃគូសន្ទនាអាស៊ាន-នូវែលសេឡង់ ចាប់តាំងពីខែសីហា ឆ្នាំ២០១៨ មក។ លោកស្រី ក៏បានអបអរសាទរផងដែរ ដល់ប្រទេសកម្ពុជា ចំពោះសមិទ្ធផល និងកិច្ចខិតខំប្រឹងប្រែងរបស់ប្រទេសកម្ពុជា ក្នុងយុទ្ធនាការចាក់វ៉ាក់សាំង និងការគាំពារសង្គម ក្នុងអំឡុងពេលនៃការរាតត្បាតនៃជំងឺកូវីដ-១៩។

លោកឧបនាយករដ្ឋមន្ត្រី ប្រាក់ សុខុន បានថ្លែងអំណរគុណដល់ប្រទេសនូវែលសេឡង់ ដែលបានផ្តល់ជំនួយដល់ប្រទេសកម្ពុជា រួមមានកម្មវិធីបណ្តុះបណ្តាលភាសា ដើម្បីគាំទ្រដល់ការធ្វើជាប្រធានអាស៊ានរបស់កម្ពុជា នៅឆ្នាំ២០២២ សកម្មភាពបោសសំអាតមីន និងកម្មវិធីការអប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) ដល់ស្ដ្រី ដែលបានបាត់បង់ការងារដោយសារជំងឺរាតត្បាតកូវីដ-១៩៕

ដោយ ៖ កោះកែវ

The post ប្រមុខការទូតនូវែលសេឡង់ អបអរសាទរកម្ពុជាចំពោះកិច្ចខិតខំប្រឹងប្រែងក្នុងការចាក់វ៉ាក់សាំងជូនប្រជាជន appeared first on Kampuchea Thmey Daily.

ប្រមុខការទូតកម្ពុជា លើកទឹកចិត្តឲ្យអាមេរិកចូលរួមចំណែកបញ្ចប់ជំងឺកូវីដ-១៩ នៅអាស៊ាន

Kang Tola — Wed, 14 Jul 2021 15:22:57 +0000

ការលើកឡើងរបស់ប្រមុខការទូតកម្ពុជា បានធ្វើឡើងនៅក្នុងកិច្ចប្រជុំពិសេស រដ្ឋមន្ត្រីការបរទេសអាស៊ាន-សហរដ្ឋអាមេរិក កាលពីព្រឹកថ្ងៃទី១៤ ខែកក្កដា ឆ្នាំ២០២១នេះ តាមប្រព័ន្ធវីដេអូ។

តាមលទ្ធផលនៃកិច្ចប្រជុំ ដែលផ្សព្វផ្សាយដោយក្រសួងការបរទេសកម្ពុជា នារសៀលនេះបានឲ្យដឹងថា នៅថ្ងៃទី១៤ ខែកក្កដា ឆ្នាំ ២០២១ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំពិសេស រដ្ឋមន្ត្រីការបរទេសអាស៊ាន-សហរដ្ឋអាមេរិក តាមប្រព័ន្ធវីដេអូ ដែលកិច្ចប្រជុំនេះ ត្រូវបានធ្វើជាសហប្រធាន ដោយលោក សាឡឺមសាយ គុំម៉ាស៊ីថ (Saleumxay Kommasith) រដ្ឋមន្ត្រីការបរទេស នៃសាធារណរដ្ឋប្រជាធិបតេយ្យប្រជាមានិតឡាវ ដែលជាប្រទេសសម្របសម្រួល ទំនាក់ទំនងដៃគូសន្ទនាអាស៊ាន-សហរដ្ឋអាមេរិក និងលោក អេនតូនី ប្លីនខេន (Antony Blinken) រដ្ឋមន្ត្រីការបរទេសសហរដ្ឋអាមេរិក ហើយកិច្ចប្រជុំនោះ ត្រូវបានអញ្ជើញចូលរួមដោយរដ្ឋមន្ត្រីការបរទេសអាស៊ាន និងអគ្គលេខាធិការអាស៊ាន។

នៅក្នុងអំឡុងពេល នៃកិច្ចប្រជុំនោះ លោកឧបនាយករដ្ឋមន្ត្រី ប្រាក់ សុខុន បានលើកទឹកចិត្តចំពោះសហរដ្ឋអាមេរិកឱ្យរួមចំណែកក្នុងកិច្ចខិតខំប្រឹងប្រែងរបស់អាស៊ាន ដើម្បីបញ្ចប់ជំងឺរាតត្បាតកូវីដ-១៩ និងងើបចេញពីផលប៉ះពាល់នៃជំងឺនេះ។ ជាមួយគ្នានោះ លោកបានសង្កត់ធ្ងន់ទៅលើសារៈសំខាន់នៃវ៉ាក់សាំងពហុភាគីនិយម និងការទទួលបានដោយស្មើភាពនូវវ៉ាក់សាំង ដែលមានតម្លៃសមរម្យ និងមានប្រសិទ្ធភាព។

លោកបានបង្ហាញនូវការជឿជាក់ថា ភាពជាដៃគូយុទ្ធសាស្ត្រអាស៊ាន-សហរដ្ឋអាមេរិក ដែលត្រូវបានលើកកម្ពស់ នឹងផ្តល់នូវផលប្រយោជន៍យ៉ាងពិសេសដល់ការកសាងសហគមន៍អាស៊ាន។

សូមបញ្ជាក់ថា នៅក្នុងកិច្ចប្រជុំនោះ លោកឧបនាយករដ្ឋមន្ត្រី ប្រាក់ សុខុន ក៏បានចែករំលែកការព្រួយបារម្ភ ជាមួយរដ្ឋមន្ត្រីផ្សេងៗទៀត ជុំវិញការកើនឡើងនូវភាពស្មុគស្មាញនៃបញ្ហាប្រឈមនានា ដែលកំពុងកើតចេញ ពីការប្រកួតប្រជែងភូមិសាស្ត្រនយោបាយ សង្គ្រាមពាណិជ្ជកម្ម និងបច្ចេកវិទ្យា ការប្រែប្រួលអាកាសធាតុ និងការគំរាមកំហែងផ្សេងៗទៀត។ លោកបានសង្កត់ធ្ងន់លើសារៈសំខាន់នៃការបន្តកិច្ចខិតខំប្រឹងប្រែងដើម្បីលើកកម្ពស់ និងការពារសិទ្ធិមនុស្ស និងប្រជាធិបតេយ្យផងដែរ។

ចំពោះបញ្ហាសមុទ្រចិនខាងត្បូង លោកឧបនាយករដ្ឋមន្ត្រី ប្រាក់ សុខុន បានលើកទឹកចិត្តឱ្យគ្រប់ភាគីពាក់ព័ន្ធទាំងអស់ប្រកាន់ខ្ជាប់ភាពអត់ធ្មត់ជាអតិបរិមា ដើម្បីជៀសវាងការបន្តឹងស្ថានការណ៍បន្ថែមទៀត និងដើម្បីស្វែងរកដំណោះស្រាយជម្លោះដោយសន្តិវិធី ដោយអនុលោមតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិ ស្ដីពីច្បាប់សមុទ្រ (UNCLOS) ឆ្នាំ១៩៨២ ផងដែរ។ កិច្ចខិតខំប្រឹងប្រែងនានា គួរត្រូវបានផ្តោតការយកចិត្តទុកដាក់ លើការពន្លឿនការបញ្ចប់ក្រមប្រតិបត្តិសមុទ្រចិនខាងត្បូង ដែលប្រកបដោយខ្លឹមសារ និងមានប្រសិទ្ធភាព ព្រមទាំងការអនុវត្តយ៉ាងពេញលេញនូវវិធានការណ៍ ដែលបានឯកភាពគ្នារួច ដើម្បីថែរក្សាសន្តិភាព ស្ថិរភាព និងសន្តិសុខក្នុងតំបន់។

ជាមួយគ្នានោះ លោកឧបនាយករដ្ឋមន្ត្រី ក៏បានលើកឡើងពីវិបត្តិនៅប្រទេសមីយ៉ាន់ម៉ាផងដែរ ដោយលោកបានបញ្ជាក់អំពីគោលការណ៍មិនជ្រៀតជ្រែកកិច្ចការផ្ទៃក្នុង និងតួនាទីដែលមិនអាចខ្វះបានរបស់ប្រទេសមីយ៉ាន់ម៉ា ដើម្បីសន្តិភាព ស្ថិរភាព និងវិបុលភាព សម្រាប់ស្ថិរភាពក្នុងតំបន់ និងការកសាងសហគមន៍អាស៊ាន។ លោកបានគូសបញ្ជាក់អំពីការឯកភាពគ្នាជាឯកច្ឆន្ទលើប្រាំចំណុចរបស់ថ្នាក់ដឹកនាំអាស៊ាន ដែលបានសម្រេចកាលពីថ្ងៃទី ២៤ ខែមេសា ឆ្នាំ ២០២១ និងឆន្ទៈនយោបាយរបស់អាស៊ាន ក្នុងការគាំទ្រដំណោះ ស្រាយសន្តិភាពតាមរយៈការសន្ទនា៕

ដោយ ៖ កោះកែវ

The post ប្រមុខការទូតកម្ពុជា លើកទឹកចិត្តឲ្យអាមេរិកចូលរួមចំណែកបញ្ចប់ជំងឺកូវីដ-១៩ នៅអាស៊ាន appeared first on Kampuchea Thmey Daily.

ប្រមុខការទូតកម្ពុជា ៖ ទោះបីមានការចាក់វ៉ាក់សាំងជំងឺកូវីដ១៩ក៏ដោយ គេពុំទាន់មើលឃើញប្រក្រតីភាព នៃដំណើរការសេដ្ឋកិច្ចពិភពលោកនៅឡើយទេ

Kang Tola — Mon, 18 Jan 2021 15:15:20 +0000

ការបញ្ជាក់របស់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជាបែបនេះ បានធ្វើឡើងនៅក្នុងពិធីប្រកាសដាក់ឱ្យអនុវត្ត “យុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣” របស់ក្រសួងការបរទេស នាថ្ងៃទី១៨ ខែមករា ឆ្នាំ២០២១នេះ។

លោកឧបនាយករដ្ឋមន្ត្រី ប្រាក់ សុខុន លើកឡើងថា គំនិតស្តីពីការបញ្ចូលការងារសេដ្ឋកិច្ចឲ្យទៅជាសមាសភាគដ៏សំខាន់ និងខានមិនបាននៃការងារការទូតរបស់យើងមានតាំងពីឆ្នាំដំបូងនៃការចូលមកកាន់តំណែងជារដ្ឋមន្ត្រីការបរទេស និងសហប្រតិបត្តិការអន្តរជាតិរបស់លោកមកម្ល៉េះ។ បន្ទាប់ពីបានប្រមូលធាតុចូល និងធាតុផ្សំល្មមគ្រប់គ្រាន់ស្តីពីសមាសភាគថ្មីមួយនេះហើយនោះ ក្រសួងក៏បានប្រកាសជាផ្លូវការជាលើកដំបូង ចាត់ទុកការងារការទូតសេដ្ឋកិច្ចជាការងារធំមួយក្នុងចំណោមការងារធំទាំង៥ របស់ក្រសួងនៅពេលប្រារព្ធសន្និបាតប្រចាំឆ្នាំរបស់ក្រសួងនាដើមឆ្នាំ២០១៨។ គោលនយោបាយនេះ ត្រូវបានសម្តេចតេជោនាយករដ្ឋមន្ត្រីគាំទ្រយ៉ាងពេញលេញ។

លោកអះអាងថា ឯកសារយុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣ ត្រូវបានរៀបចំឡើងនៅក្នុងកាលៈទេសៈដែលស្ថានភាពពិភពលោក ក៏ដូចជាកម្ពុជា កំពុងប្រឈមទៅនឹងការគំរាមកំហែងធ្ងន់ធ្ងរបំផុតមិនធ្លាប់ជួប ក្នុងរយៈពេលជាង៣ទសវត្សចុងក្រោយនេះ។ ការគំរាមកំហែងនេះបណ្តាលមកពីកត្តាគួបផ្សំគ្នាជាច្រើន។ កត្តាធំជាងគេ២គឺ ទី១កត្តាធម្មជាតិ និងទី២កត្តាមនុស្ស។ ការផ្ទុះនិងការរីករាលដាលនៃជំងឺឆ្លងកូវីដ-១៩ បានធ្វើឱ្យពិភពលោកទាំងមូលរង្គោះរង្គើ។ កត្តាធម្មជាតិមួយនេះ មិនត្រឹមតែប៉ះពាល់ដល់វិស័យសុខាភិបាល ក្នុងកំរិតមិនធ្លាប់មានប៉ុណ្ណោះទេ វាក៏បណ្តាលឱ្យសេដ្ឋកិច្ចពិភពលោកទាំងមូលធ្លាក់ក្នុងវិបត្តិជ្រាលជ្រៅ។ កូវីដ-១៩ បានរុញឱ្យច្រវាក់ផ្គត់ផ្គង់តំបន់ និងពិភពលោករអាក់រអួល និងកាត់ផ្តាច់ក្នុងកំរិតធ្ងន់ធ្ងរ វិស័យទេសចរណ៍ធ្លាក់ចុះយ៉ាងគំហុកសឹងដល់បាត វិស័យដឹកជញ្ជូន ពិសេសផ្លូវអាកាសគាំងដំណើរការ ទំនុកចិត្តខាងធុរកិច្ច និងអតិថិជនចុះខ្សោយដោយសារវិធានការរឹតត្បិតនានា ដើម្បីឃុំគ្រងកុំឱ្យជំងឺរាលដាល។ ជំងឺឆ្លងនេះ ក៏បង្កហានិភ័យកាន់តែធំឡើង នៃការក្ស័យធនផ្នែកធុរកិច្ច ដែលនឹងបង្កការបាត់បង់ការងាររបស់មនុស្សរាប់រយលាននាក់។

ប្រមុខការទូតកម្ពុជាបញ្ជាក់ថា “ទោះបីជាមានដំណើរការចាក់វ៉ាក់សាំងបង្ការជំងឺនេះជាបណ្តើរៗហើយក៏ដោយ ក៏គេពុំទាន់អាចប្រមើលមើលឃើញអំពីការវិលត្រឡប់មកវិញ នូវប្រក្រតីភាពនៃដំណើរការសេដ្ឋកិច្ចពិភពលោកនោះដែរ។ ផលប៉ះពាល់របស់កូវីដ-១៩ មិនត្រឹមតែលាតសន្ធឹងលើវិស័យសេដ្ឋកិច្ច សង្គម និងហិរញ្ញវត្ថុប៉ុណ្ណោះទេ តែក៏ហក់ចូលក្នុងសង្វៀននយោបាយ ដោយការធ្វើ នយោបាយតូបនីយកម្ម ដើម្បីយកកំហុសនៃអសមត្ថភាពរបស់ខ្លួនក្នុងការទប់ស្កាត់ជំងឺនេះ ទៅទំលាក់ឱ្យអ្នកដទៃ”។

លោកឧបនាយករដ្ឋមន្ត្រី ប្រាក់ សុខុន បញ្ជាក់ដែរថា ការប្រកួតប្រជែងគ្នាខាងភូមិសាស្ត្រនយោបាយ និងយុទ្ធសាស្ត្រដ៏តានតឹងរវាងមហាអំណាចធំបំផុតទាំងពីរ កំពុងឈានទៅរកសង្គ្រាមត្រជាក់បែបថ្មី ដែលធ្វើឱ្យមានការផ្លាស់ប្តូរយ៉ាងជ្រាលជ្រៅ ឆាប់រហ័ស ពិបាកប៉ាន់ស្មាន និងប្រកបដោយគ្រោះថ្នាក់បំផុត។ លោកថា កត្តាមនុស្សនេះ កំពុងធ្វើឱ្យស្ថិរភាព និងវិបុលភាព រយៈពេល ជាង៧០ឆ្នាំដែលកើតចេញពីសណ្តាប់ធ្នាប់អន្តរជាតិផ្អែក លើពហុប៉ូលនិយម និងច្បាប់អន្តរជាតិនោះ ទទួលរងភាពរង្គោះរង្គើយ៉ាងខ្លាំង។ នេះក៏ដោយសារការរំលោភបំពាន និងលែងគោរពនូវគុណតម្លៃទាំងឡាយ ដែលជាមូលដ្ឋានគ្រឹះនៃសណ្តាប់ធ្នាប់ និងការងាកទៅរកឯកតោភាគីនិយម ការប្រើកម្លាំងបាយគាបសង្កត់ប្រទេសទន់ខ្សោយ៕

ដោយ ៖ កោះកែវ

The post ប្រមុខការទូតកម្ពុជា ៖ ទោះបីមានការចាក់វ៉ាក់សាំងជំងឺកូវីដ១៩ក៏ដោយ គេពុំទាន់មើលឃើញប្រក្រតីភាព នៃដំណើរការសេដ្ឋកិច្ចពិភពលោកនៅឡើយទេ appeared first on Kampuchea Thmey Daily.

ប្រមុខការទូត Archives - Kampuchea Thmey Daily

ប្រមុខការទូតកម្ពុជា-ចិន បានលើកឡើងពីបញ្ហា និងសម្រេចអ្វីខ្លះ ក្រោយជំនួបពិភាក្សា?

ប្រមុខ​ការ​ទូត​កម្ពុជា លើកទឹកចិត្ត​ឲ្យ​អាមេរិក​ចូលរួមចំណែក​បញ្ចប់​ជំងឺ​កូ​វីដ​-១៩ នៅ​អាស៊ាន​

ប្រមុខការទូតកម្ពុជា លើកទឹកចិត្តឲ្យអាមេរិកចូលរួមចំណែកបញ្ចប់ជំងឺកូវីដ-១៩ នៅអាស៊ាន