ផ្លូវជាតិលេខ ៤ Archives - Kampuchea Thmey Daily

រថយន្តកុងតឺន័របើកឆ្លងផ្លូវ ត្រូវរថយន្តដឹកខ្សាច់បើកបុកពាក់កណ្តាលបណ្តាលឱ្យគៀបតៃកុងជាប់

Ung Meng — Thu, 05 Mar 2026 01:40:00 +0000

បុរសម្នាក់បើករថយន្តហ៊ីយ៉ាន់ដាយដឹកខ្សាច់លឿនជាន់ហ្រ្វាំង មិនទាន់ជ្រុលបុកចំពាក់កណ្តាលរថយន្តកុងតឺន័របណ្តាលឱ្យគៀបតៃកុងជាប់ត្រូវបានកងសង្គ្រោះ៧១១ កងពលតូចលេខ៧០ជួបកាត់គាស់ជួយសង្គ្រោះយកចេញ ហេតុការណ៍នេះបានកើតឡើងនៅវេលាម៉ោង៦និង៣០នាទីព្រឹក ថ្ងៃទី ៥ខែមីនាឆ្នាំ ២០២៦ នៅតាមបណ្តោយផ្លូវជាតិលេខ៤ សង្កាត់កន្ទោក ខណ្ឌកំបូល រាជធានីភ្នំពេញ។

ជនរងគ្រោះឈ្មោះ សៀ ណាក់ ភេទប្រុស អាយុ៤៣ឆ្នាំ មានទីលំនៅ នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

តាមប្រភពព័ត៌មានបានឱ្យដឹងថា មុនពេលកើតហេតុគេបានឃើញរថយនមតកុងតឺន័រ ពាក់ផ្លាកលេខ ភ្នំពេញ4A-9861 ធ្វើដំណើរចេញពីផ្លូវបេតុងឆ្លងផ្លូវជាតិលេខ៤ បត់ឆ្វេងខណៈឆ្លងបានបន្តិចស្រាប់តែមានរថយន្តបែនដឹកខ្សាច់ផ្លាកលេខចង្កូចស្ដាំ PRV-0037 ធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីលិចទៅកើតលឿនចាប់ហ្វ្រាំងមិនជាប់ក៏ជ្រុលបុកពាក់កណ្តាលនៃរថយន្តកុងតឺន័របណ្តាលឱ្យគៀបជាប់តៃកុង។ បន្ទាប់មកក្រុមសង្គ្រោះ៧១១ កងពលតូចលេខ៧០ បានចេញទៅអន្តរាគមន៍ កាត់គាស់យកតៃកុងចេញបានមកវិញដោយមិនមានរងរបួសនោះទេ។

ក្រោយកើតហេតុសមត្ថកិច្ចជំនាញបានចុះវាស់វែងយករថយន្តទាំងពីរគ្រឿងទៅរក្សាទុកបណ្តោះអាសន្ននៅអធិការដ្ឋាននគរបាលខណ្ឌកំបូលរង់ចាំដោះស្រាយតាមនីតិវិធី៕ ដោយ៖សុខា

The post រថយន្តកុងតឺន័របើកឆ្លងផ្លូវ ត្រូវរថយន្តដឹកខ្សាច់បើកបុកពាក់កណ្តាលបណ្តាលឱ្យគៀបតៃកុងជាប់ appeared first on Kampuchea Thmey Daily.

លែងជន់លិចដូចរាល់ឆ្នាំ ស្ពានតាមផ្លូវជាតិលេខ៤ នៅស្រុកកំពង់សីលា ក្រោយលើកកម្ពស់សាងសង់ស្ពានថ្មីរួច

Dy Bunnara — Wed, 10 Sep 2025 07:30:17 +0000

ស្ពានលេខ ១២-១៣ តាមបណ្តោយផ្លូវជាតិលេខ ៤ ស្ថិតក្នុងឃុំអូរបាក់រទេះ ខេត្តព្រះសីហនុ ដែលស្ទើរតែរៀងរាល់ឆ្នាំ រងការជន់លិចកាត់ផ្តាច់ចរាចរណ៍ ពេលរដូវទឹកដំឡើងជាពិសេសនៅអំឡុងសីហានិងកញ្ញា។

បច្ចុប្បន្នស្ពានចាស់ កម្ពស់ទាប និងតែងលិចទឹក ត្រូវបានជំនួសដោយស្ពានថ្មីដែលមានកម្ពស់ខ្ពស់ ទំហំធំ និងលែងលិចលង់ទៀតហើយ។ នេះបើតាមមន្រ្តីអ្នកនាំពាក្យក្រសួងសាធាណការនិងដឹកជញ្ជូន។

លោក ផន រឹម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានឲ្យដឹងថា ស្ពានដែលតែងរងផលប៉ះពាល់ពីការជន់លិចនេះ ប្រជាពលរដ្ឋតែងហៅថា «ស្ពានស្ទឹងសំរោង» មានទទឹង ១១ ម៉ែត្រ បណ្តោយ ១៦០ ម៉ែត្រ ចែកចេញជា ៨ ប្រឡោះ ដោយប្រឡោះនីមួយៗប្រវែង ២០ ម៉ែត្រ ដែលបានធ្វើពីបេតុងក្រាលកៅស៊ូ AC ពីរស្រទាប់ ស្ថិតនៅចំណុច PK115+935 ភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។

ស្ពានស្ទឹងសំរោង បានចាប់ផ្តើមសាងសង់នៅថ្ងៃទី៨ ខែមិថុនា ឆ្នាំ២០២៣ ដោយបញ្ចប់ការសាងសង់នៅថ្ងៃទី១៨ ខែធ្នូ ឆ្នាំ២០២៤៕

The post លែងជន់លិចដូចរាល់ឆ្នាំ ស្ពានតាមផ្លូវជាតិលេខ៤ នៅស្រុកកំពង់សីលា ក្រោយលើកកម្ពស់សាងសង់ស្ពានថ្មីរួច appeared first on Kampuchea Thmey Daily.

ក្រោយស្ថាបនារួចរាល់ ផ្លូវជាតិលេខ ៤ នឹងបម្រើការដឹកជញ្ជូនទំនិញ ២៤ ម៉ោង មិនបារម្ភពីជំនន់ជន់លិចទៀតទេ

Din Thary — Thu, 26 Dec 2024 08:26:15 +0000

លោក ផែង សុវិជ្ជានោ រដ្ឋលេខាធិការ ក្រសួងសាធារណការ និងដឹកជញ្ជូន បានគូសបញ្ជាក់ឱ្យដឹងថា ផ្លូវជាតិលេខ៤ ក្រោយស្ថាបនារួចរាល់នាពេលដ៏ខ្លីខាងមុខនេះ នឹងបម្រើដល់ការធ្វើដំណើររបស់ប្រជាពលរដ្ឋក្នុងការធ្វើដំណើរ និងការដឹកជញ្ជូនទំនិញបាន ២៤ ម៉ោង មិនបារម្ភពីជំនន់ជន់លិចទៀតទេ។

លោក ផែង សុវិជ្ជានោ បានមានប្រសាសន៍ថា ផ្លូវជាតិលេខ៤ ជាផ្លូវមួយខ្សែដែលមានសារៈសំខាន់បំផុតសម្រាប់ប្រទេសកម្ពុជា ព្រោះផ្លូវមួយនេះបានផ្សារភ្ជាប់រាជធានីភ្នំពេញដែលជាតំបន់អភិវឌ្ឍ និងជាមជ្ឈមណ្ឌលសេដ្ឋកិច្ចហិរញ្ញវត្ថុ និងឧស្សាហកម្ម ជាមួយក្រុងព្រះសីហនុ ដែលជាទីក្រុងកំពង់ផែសមុទ្រទឹកជ្រៅតែមួយគត់របស់កម្ពុជា។

«ដូចយើងបានដឹងហើយថា កំពង់ផែកំពង់សោម បាននាំទំនិញប្រហែលជា ២/៣ នៃទំនិញដែលនាំចេញ និងនាំចូលទៅកាន់ពិភពលោកពីកម្ពុជា។ ឆ្នាំ២០២៣ កន្លងទៅនេះ កំពង់ផែខេត្តព្រះសីហនុ គ្រាន់តែចាត់ចែងទំនិញនៅក្នុងការចេញចូលមានប្រហែលជា ៨០ ម៉ឺនTEUs ហើយនៅឆ្នាំ២០២៤ នេះប្រហែលជាឡើងដល់ ១ លាន ២ សែន TEUs»។

លោក ផែង សុវិជ្ជានោ បានលើកពីប្រវត្តិផ្លូវជាតិលេខ ៤ មុនពេលក្រសួងយកមកដាក់ក្នុងគម្រោងនៅក្នុងឆ្នាំ២០២០ គឺមានសភាពខូចខាត ដែលធ្វើឱ្យការដឹកជញ្ជូនទៅមកមានការលំបាកជាខ្លាំង។ កន្លងមកផ្លូវមួយខ្សែនេះលិចទឹក ១ ឆ្នាំ ៥ ទៅ ៦ ដង នៅពេលដែលមានភ្លៀងធ្លាក់ខ្លាំង ធ្វើឱ្យមានការលំបាកដល់ប្រជាពលរដ្ឋនៅក្នុងការរស់នៅមិនអាចទៅសាលា ទៅផ្សារ ឬទៅមន្ទីរពេទ្យ ហើយឡានដឹកទំនិញត្រូវរងចាំរហូតដល់ទឹកស្រក ពេលខ្លះដឹកទំនិញទៅដល់កប៉ាល់មិនទាន់ជាដើម។

រហូតមកដល់បច្ចុប្បន្ន ក្រោយពេលបានស្ថាបនារួចរាល់មួយចំនួនឃើញថា ផ្លូវមួយខ្សែនេះមានស្ថានភាពល្អប្រសើរខ្លាំង។ ផ្លូវប្រវែង ២០៦ គីឡូម៉ែត្រ ក្រុមការងារបានយក ១៩៦ គីឡូម៉ែត្រមកដាក់នៅក្នុងគម្រោង ដោយបានសាងសង់ និងពង្រីកផ្លូវចំនួន ៤៥ គីឡូម៉ែត្រ ពី ២ គន្លង ទៅជា ៤ គន្លង ហើយផ្លូវប្រវែង ១៥១ គីឡូម៉ែត្រទៀត គឺបានធ្វើរួច ១០៨ គីឡូម៉ែត្រហើយ និងបានពង្រីកពីទទឹង ៧ ម៉ែត្រ ទៅទទឹង ១០ ម៉ែត្រ។

នៅក្នុងគម្រោងមានសាងសង់ស្ពាន និងលូ ចំនួន ៥៤ ទីតាំង មកដល់ពេញបច្ចុប្បន្ននេះ ក្រុមការងារសម្រេចបានប្រមាណ ៥០% ហើយ។ ជាក់ស្តែង នៅឆ្នាំនេះបើទោះបីជាទឹកធំ ផ្លូវនេះមិនមានកន្លែងណាលិចទឹកនោះទេ ការធ្វើដំណើររបស់ប្រជាពលរដ្ឋក៏មិនមានបញ្ហា អ្នកដឹកជញ្ជូនក៏គ្មានបញ្ហា។ ទំនិញប្រហែលតែ ២% ប៉ុណ្ណោះដែលដឹកជញ្ជូនឆ្លងកាត់ទៅលើផ្លូវល្បឿនលឿន ក្រៅពីនេះនៅរក្សានៅដដែលនៅបន្តដឹកនៅលើផ្លូវជាតិលេខ ៤។

លោកបានមានប្រសាសន៍បន្តថា ប្រទេសកម្ពុជាជាប្រទេសដែលស្ថិតនៅភាគខាងក្រោមនៃដងទន្លេមេគង្គ គឺជាប្រទេសដែលងាយនឹងរងគ្រោះដោយទឹកជំនន់ទន្លេមេគង្គផង និងទឹកជំនន់ទឹកភ្លៀង ហេតុនេះការស្ថាបនាផ្លូវថ្នល់ដែលទប់ទល់ទឹកជំនន់ ទប់ទល់បម្រែបម្រួលអាកាសធាតុ គឺពិតជាមានសារៈសំខាន់ណាស់សម្រាប់កម្ពុជា។

លោក ផែង សុវិជ្ជានោ បានសង្កត់ធ្ងន់ថា «កន្លងមកនៅពេលដែលមានភ្លៀងធ្វើឱ្យថ្នល់ខូច ស្ពានខូច ប៉ុន្តែងាកមកមើលពេលបច្ចុប្បន្នវិញនៅពេលដែលផ្លូវយើងបានស្ថាបនារួច ស្ពានក៏រួច ហើយអាចទប់និងទឹកជំនន់បានទៀត ចឹងហើយយើងអាចរក្សាការធ្វើដំណើរ ២៤ម៉ោង លើ ៧ថ្ងៃ ដែលនេះគឺពិតជាមានសារៈសំខាន់ណាស់»។

ថ្នល់ដែលអាចទប់និងអាកាសធាតុនេះ គឺពិតជាមានសារសំខាន់ណាស់សម្រាប់ប្រទេសកម្ពុជាយើង គឺធ្វើយ៉ាងណាឱ្យផ្លូវ ថ្នល់នៅកម្ពុជាមានភាពល្អប្រសើរ មិនមានការខូចខាត មិនមានការរាំងស្ទះ នៅពេលដែលមានទឹកជំនន់ និងជំនន់ទឹកភ្លៀង។

ប៉ុន្តែតម្លៃនៃការស្ថាបនាមានការកើនឡើង មានន័យតម្លៃនៃការស្ថាបនាផ្លូវ ថ្នល់ដែលអាចទប់និងបញ្ហាអាកាសធាតុនេះ គឺមានការកើនឡើងពី ១៥% ទៅ ២០% ដែលច្រើនជាងថ្នល់សាងសង់បែបធម្មតា។

ផ្លូវជាតិលេខ៤ ក្រុមការងារនឹងបញ្ចប់ការស្ថាបនាទាំងស្រុងនៅចុងឆ្នាំ២០២៦។ គម្រោងលើកកម្រិតផ្លូវនេះ ប្រើប្រាស់ថវិកាពីធនាគារពិភពលោកចំនួន ១១០ លានដុល្លារ ដើម្បីកែលម្អផ្លូវ-ជាតិមួយនេះឡើងវិញ ក៏ដូចជាការរៀបចំបំពាក់ប្រព័ន្ធផ្សេងៗ ដួចជាការបំពាក់កាមេរ៉ាចាប់រថយន្តដែលបើកបរលើសល្បឿនកំណត់ផងដែរ៕

The post ក្រោយស្ថាបនារួចរាល់ ផ្លូវជាតិលេខ ៤ នឹងបម្រើការដឹកជញ្ជូនទំនិញ ២៤ ម៉ោង មិនបារម្ភពីជំនន់ជន់លិចទៀតទេ appeared first on Kampuchea Thmey Daily.

រដ្ឋមន្ត្រីបរិស្ថាន នឹងដាក់យុទ្ធនាការ«គ្រប់ផ្លូវជាតិទាំងអស់ឆ្នាំ២០២៥ ត្រូវតែស្អាត មិនត្រូវមានសំរាមប្លាស្ទិកឡើយ»

Ngoeul Narath — Thu, 12 Dec 2024 02:03:13 +0000

លោក អ៊ាង សុផល្លែត រដ្ឋមន្ត្រីក្រសួងបរិស្ថាន ដាក់គោលការណ៍ថា ចាប់ពីឆ្នាំ២០២៥តទៅ តាមបណ្ដាផ្លូវជាតិនៅកម្ពុជា ត្រូវតែស្អាត លែងឱ្យមានសំរាម ថង់ប្លាស្ទិកតទៅទៀត។ លោក អ៊ាង សុផល្លែត លើកឡើងដូច្នេះ នៅក្នុងកិច្ចសម្ភាសន៍ជាមួយអ្នកសារព័ត៌មាន ក្រៅសិក្ខាសាលាបិទបញ្ចប់កម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី៣ (CCCA3) រៀបចំឡើងនារសៀលថ្ងៃទី១១ ខែធ្នូ ឆ្នាំ២០២៤ នៅទីស្ដីការក្រសួងបរិស្ថាន។

ក្នុងកិច្ចសម្ភាសន៍ លោករដ្ឋមន្ត្រីសង្កត់ធ្ងន់ដូច្នេះ៖«ផ្លូវជាតិ ២០២៥ ត្រូវតែស្អាតគ្រប់ផ្លូវជាតិទាំងអស់! នេះជាយុទ្ធនាការថ្មីដែលយើងកំពុងតែសាកល្បង។ ខ្ញុំនឹងប្រកាសបើកយុទ្ធនាការនេះ នៅថ្ងៃ១ ខែ១ ឆ្នាំ២០២៥។»។

លោកបានអះអាងថា មុនពេលប្រកាសដាក់ចេញយុទ្ធនាការនេះជាផ្លូវការនាដើមខែមករា ឆ្នាំ២០២៥ខាងមុខ នៅក្នុងពេលបច្ចុប្បន្ននេះលោកក៏បានសាកល្បងលើកិច្ចការងារតាមបណ្ដាផ្លូវជាតិសំខាន់ៗមួយចំនួនដូចជាផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៤១ ផ្លូវជាតិលេខ៥១។

តាមលោក អ៊ាង សុផល្លែត ក្នុងដំណាក់សាកល្បងយុទ្ធនាការ នៅផ្លូវជាតិទាំងនោះ គឺចាប់ផ្ដើមស្អាតបណ្ដើរៗហើយ ពោលគឺនៅមានសំរាម និងថង់ប្លាស្ទិកតិចតួចបំផុត ដែលក្នុងដំណាក់កាលសាកល្បងនេះ ទទួលបានការចូលរួមពីសំណាក់យុវជន សិស្សានុសិស្ស និងកម្មកររោងចក្រ ក៏ដូចជាភាគីពាក់ព័ន្ធ។

សម្រាប់រដ្ឋមន្ត្រីបរិស្ថានរូបនេះ ឧបសគ្គដែលរារាំងដល់ការអនុវត្តយុទ្ធនាការនេះ គឺការទាក់ទាញទឹកចិត្ត បេះដូង កិច្ចខិតខំប្រឹងប្រែង និងការប្ដេជ្ញារបស់ប្រជាពលរដ្ឋចូលរួមសម្អាតផ្លូវជាតិ ថែរក្សាផ្លូវជាតិកុំឱ្យមានសំរាម ថង់ប្លាស្ទិក។ លោក យល់ឃើញថា បើពលរដ្ឋ សិស្សានុសិស្ស និងគ្រប់ភាគីពាក់ព័ន្ធចូលរួម រួមចិត្ត រួមថ្លើម រួមបេះដូងអនុវត្តន៍យុទ្ធនាការនេះ នោះនឹងគ្មានឧបសគ្គអ្វីឡើយ ពោលគឺតាមផ្លូវជាតិនៅកម្ពុជា នឹងស្អាត គ្មានសំរាម និងថង់ប្លាស្ទិកឡើយ។

លោករដ្ឋមន្ត្រី បានចាត់ទុក ការចូលរួម ការលើកទឹកចិត្ត ពីសំណាក់ប្រជាពលរដ្ឋកម្ពុជាចំពោះការអនុវត្តយុទ្ធនាការដែលក្រសួងបរិស្ថានបានដាក់ចេញ គឺជាអាវុធដ៏សំខាន់កម្ចាត់ឧបសគ្គដែលកើតឡើងក្នុងការធ្វើឱ្យកម្ពុជា មានភាពស្អាត បៃតង និងចីរភាពតរៀងទៅ។

គួរឱ្យដឹងថា កាលពីពេលកន្លងទៅ ក្រសួងបរិស្ថាន ក៏បានដាក់ចេញយុទ្ធនាការជាច្រើន ក្នុងនោះមានយុទ្ធនាការ ថ្ងៃនេះ ខ្ញុំមិនប្រើថង់ប្លាស្ទិកទេ និងយុទ្ធនាការកម្ពុជាស្អាត ខ្មែរធ្វើបាន។ បើតាមលោករដ្ឋមន្ត្រី យុទ្ធនាការថ្ងៃនេះខ្ញុំមិនប្រើថង់ប្លាស្ទិកទេ មានអ្នកចូលរួមចំនួនជាង១០លាននាក់ ដែលចំនួននេះជាចំនួនច្រើនជាងពាក់កណ្ដាលនៃចំនួនប្រជាជនកម្ពុជា។ សម្រាប់យុទ្ធនាការកម្ពុជាស្អាត ខ្មែរធ្វើបាន ដែលយុទ្ធនាការដើររើសសំរាមតាមផ្លូវ តាមទីតាំងសំខាន់ៗ គឺមានអ្នកចូលរួមជាង៤លាននាក់រួចមកហើយ៕

The post រដ្ឋមន្ត្រីបរិស្ថាន នឹងដាក់យុទ្ធនាការ«គ្រប់ផ្លូវជាតិទាំងអស់ឆ្នាំ២០២៥ ត្រូវតែស្អាត មិនត្រូវមានសំរាមប្លាស្ទិកឡើយ» appeared first on Kampuchea Thmey Daily.

ខ្វះការប្រុងប្រយ័ត្ន ធ្លាក់ទូកុងតឺន័រពីលើរថយន្ត នៅផ្លូវជាតិលេខ ៤

អ៊ិន ពិសី — Thu, 21 Nov 2024 09:27:59 +0000

រថយន្ត ១ គ្រឿង ដឹកជញ្ជូនទូកុងតឺន័រខ្វះការប្រុងប្រយ័ត្ន មិនបានដាក់គន្លឹះ កំពុងបើកបរ ស្រាប់តែធ្លាក់ទូកុងតឺន័រមកលើផ្លូវជាតិ បង្កឱ្យកកស្ទះចរាចរណ៍ សំណាងណាស់មិនប៉ះលើអ្នកដំណើរ ដោយម្នាក់ៗ ព្រលឹងចុងសក់។

ហេតុការណ៍នេះកើតឡើងកាលពីវេលាម៉ោង ២ និង ១៥ នាទីរសៀល ថ្ងៃទី ២១ ខែវិច្ឆិកា ឆ្នាំ ២០២៤ ស្ថិតនៅលើផ្លូវជាតិលេខ ៤ ចំណុចភ្លើងស្តុប ស្ពានអាកាសជម្ពូវ័ន ភូមិជម្ពូវ័ន ១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពពលរដ្ឋឃើញហេតុការណ៍បានឱ្យដឹងថា មុនកើតហេតុមានរថយន្ត ១ គ្រឿង ដឹកទូកុងតឺន័រ បើកតាមមហាវិថីឈ្នះ ឈ្នះ ពីជើងទៅត្បូង ដល់ចំណុចកើតហេតុលើផ្លូវជាតិលេខ ៤ បត់ឆ្វេងឆ្ពោះទៅកើត។ គ្រាន់តែបត់ហើយ ស្រាប់តែធ្លាក់ទូកុងតឺន័រចុះពីលើរថយន្ត មកលើផ្លូវជាតិ តែសំណាងមិនប៉ះដល់អ្នកដំណើររួមផ្លូវ ដោយម្នាក់ៗ ព្រលឹងចុងសក់។ ក្នុងនោះ រថយន្តមិនបានឈប់ទេ ដោយបន្តដំណើរបើកចូលទៅក្នុងក្រុមហ៊ុនផែស្ងួតនៅក្បែរនោះបាត់ស្រមោល ធ្វើឱ្យកកស្ទះចរាចរណ៍នៅកន្លែងកើតហេតុ។

បើតាមការលើកឡើងរបស់មហាជន រថយន្តដឹកទូកុងតឺន័រ មិនបានដាក់គន្លឹះនេះ ជាការធ្វេសប្រហែសរបស់អ្នកបើកបរ។

ក្រោយកើតហេតុ កម្លាំងនគរបាលចរាចរណ៍ក្រុងភ្នំពេញ ប្រចាំគោលដៅភ្លើងស្តុប បានជួយសម្រួលចរាចរណ៍ កាត់បន្ថយការកកស្ទះ ហើយសមត្ថកិច្ចមូលដ្ឋានធ្វើការទំនាក់ទំនងទៅខាងក្រុមហ៊ុនដើម្បីស្ទូចលើកយកទូកុងតឺន័រចេញពីលើផ្លូវជាតិ៕

អត្ថបទ ៖ សុខា

The post ខ្វះការប្រុងប្រយ័ត្ន ធ្លាក់ទូកុងតឺន័រពីលើរថយន្ត នៅផ្លូវជាតិលេខ ៤ appeared first on Kampuchea Thmey Daily.

កំណាត់ផ្លូវជាតិលេខ ៤ ទល់មុខផ្សារជម្ពូវ័ន មានភាពប្រសើរហើយ ក្រោយអាជ្ញាធររៀបចំជាប់ជាប្រចាំ

អ៊ិន ពិសី — Tue, 03 Sep 2024 07:29:26 +0000

ការធ្វើចរាចរណ៍ បរិស្ថានអនាម័យ និងសណ្ដាប់ធ្នាប់របៀបរៀបរយនៅលើកំណាត់ផ្លូវជាតិលេខ ៤ ទល់មុខផ្សារជម្ពូវ័ន មានភាពល្អប្រសើរ បន្ទាប់ពីអាជ្ញាធរខណ្ឌពោធិ៍សែនជ័យ បានយកចិត្តទុកដាក់ក្នុងការរៀបចំជាប់ជាប្រចាំ។

លោក ប៉ាង លីដា អភិបាលរងខណ្ឌពោធិ៍សែនជ័យ បានប្រាប់ឱ្យដឹងថា ការរៀបចំសណ្ដាប់ធ្នាប់នៅទីនេះ គឺមានភាពលំបាកច្រើនណាស់ មិនងាយស្រួលនោះទេ ព្រោះវាប៉ះពាល់ដល់ផលចំណេញ នៃការរកស៊ីរបស់អាជីវករ ប៉ុន្តែផលចំណេញនោះ បែរជាត្រឡប់មកបំផ្លាញ និងប៉ះពាល់សណ្ដាប់ធ្នាប់សាធារណៈដល់មហាជនជាច្រើនធ្វើដំណើរតាមផ្លូវជាតិលេខ ៤ នេះ ដែលជាដងផ្លូវ នៃលំហូរចរាចរណ៍ខ្នាតអន្តរជាតិ ក្នុងរាជធានីភ្នំពេញ ទៅតាមបណ្ដាខេត្តផងដែរ។

ប្រជាពលរដ្ឋ បានសម្តែងក្តីរីករាយ និងសប្បាយចិត្ត ចំពោះប្រសិទ្ធភាព នៃការរៀបចំរបស់អាជ្ញាធរ ដែលធ្វើឱ្យកំណាត់ផ្លូវជាតិលេខ ៤ នៅចំណុចខាងលើនេះ មិនបន្តមានការលក់ដូរ ឬចតយានយន្ត បំពានដងផ្លូវជាតិបន្តទៀត ដែលជាកត្តាបង្កការកកស្ទះ ប៉ះពាល់បរិស្ថានអនាម័យជាដើម ជាពិសេសមិនមានការចតរថយន្តគ្មានសណ្ដាប់ធ្នាប់ដូចមុន និងផ្ដល់ភាពងាយស្រួលដល់ពលរដ្ឋទូទៅ និងសិស្សានុសិស្សផងដែរ។

គួរបញ្ជាក់ថា តាមបណ្ដោយផ្លូវជាតិលេខ ៤ គឺជាផ្លូវជាតិមួយតភ្ជាប់ពីបណ្តាខេត្តទេសចរណ៍ និងការដឹកជញ្ជូនតូច-ធំជាច្រើនចូលមកកាន់រាជធានីភ្នំពេញ ដែលធ្វើឱ្យដងផ្លូវជាតិមួយនេះ មានភាពមមាញឹកខ្លាំងបំផុតផ្នែកលំហូរចរាចរណ៍ទាំងយប់ថ្ងៃ។ ដូច្នោះហើយ ដងផ្លូវមួយនេះ ត្រូវតែមានរបៀបរៀបរយល្អ ទើបអាជ្ញាធរ បន្តយកចិត្តទុកដាក់រៀបចំ ដើម្បីសណ្ដាប់ធ្នាប់ និងបរិស្ថានល្អ ក្នុងមូលដ្ឋានរបស់ខ្លួន៕

អត្ថបទ ៖ សុភា

The post កំណាត់ផ្លូវជាតិលេខ ៤ ទល់មុខផ្សារជម្ពូវ័ន មានភាពប្រសើរហើយ ក្រោយអាជ្ញាធររៀបចំជាប់ជាប្រចាំ appeared first on Kampuchea Thmey Daily.

គម្រោងស្តារផ្លូវជាតិលេខ ៤ សម្រេចបានជាង ៦៦% គ្រោងបញ្ចប់នៅចុងឆ្នាំ ២០២៦

Dy Bunnara — Mon, 26 Aug 2024 03:19:19 +0000

គម្រោងស្តារ និងលើកកម្រិតគុណភាពផ្លូវជាតិលេខ ៤ (ភ្នំពេញ-ព្រះសីហនុ) សម្រេចបានលទ្ធផល (Physical Progress) ចំនួន ៦៦,០៦% គិតត្រឹមដើមខែសីហា ឆ្នាំ២០២៤ គ្រោងបញ្ចប់នៅថ្ងៃទី ៣១ ខែធ្នូ ឆ្នាំ២០២៦ ខាងមុខនេះ។

គម្រោងស្តារ និងលើកកម្រិតគុណភាពផ្លូវជាតិលេខ៤ អនុវត្តគម្រោង និងកម្មវិធីហិរញ្ញប្បទានដោយធនាគារពិភពលោក (WB) ចំនួន ១១០លានដុល្លារអាមេរិក ដោយគ្រោងនឹងអនុវត្តចំនួន ០៨ ឆ្នាំ (២០១៨-២០២៦) អនុវត្តន៍ដោយក្រសួងសាធារណការ និងដឹកជញ្ជូន។

ហិរញ្ញប្បទាននេះ មានគោលបំណងសម្រាប់ជួសជុល និងថែទាំផ្លូវជាតិលេខ ០៤ ប្រវែង ១៩៦,១០គីឡូម៉ែត្រ ដោយពង្រីកតួផ្លូវ ជីកប្រឡាយ និងជួសជុលស្ពានចាស់ សាងសង់ស្ពានថ្មី។

លោក ផែង សុវិជ្ជានោ រដ្ឋលេខាធិការ និងប្រធានគម្រោងស្តារ និងលើកកម្រិតគុណភាពផ្លូវជាតិលេខ ៤ បានឱ្យដឹងថា គម្រោងស្តារ និងថែទាំផ្លូវជាតិលេខ៤ សរុបប្រវែង១៩៦,១០គីឡូម៉ែត្ររួមមាន៖

១- កំណាត់ទី ១៖ គីឡូម៉ែត្រលេខ ១៩+៧០០ ដល់គីឡូម៉ែត្រលេខ ៦០+០០០ ក្នុងខេត្តកណ្តាល និងខេត្តកំពង់ស្ពឺ។ ផ្លូវ ៤ គន្លងមានប្រវែង ២៨,៨០ គីឡូម៉ែត្រ និងផ្លូវ ២ គន្លងមានប្រវែង ១១,៥០ គីឡូម៉ែត្រ ប្រវែងសរុប ៤០,៣០ គីឡូម៉ែត្រ ។
២-កំណាត់ទី ២៖ គីឡូម៉ែត្រលេខ ៦០+០០០ ដល់គីឡូម៉ែត្រលេខ ១០១+០០០ ក្នុងខេត្តកំពង់ស្ពឺ។ ផ្លូវ ៤ គន្លងមានប្រវែង ២,៦៨ គីឡូម៉ែត្រ និងផ្លូវ ២ គន្លងមានប្រវែង ៣៨,៣២ គីឡូម៉ែត្រ ប្រវែងសរុប ៤១,០០ គីឡូម៉ែត្រ ។
៣-កំណាត់ទី ៣៖ គីឡូម៉ែត្រលេខ ១០១+០០០ ដល់គីឡូម៉ែត្រលេខ ១៤៣+០០០ ក្នុងខេត្តកំពង់ស្ពឺ និងខេត្តកោះកុង។ ផ្លូវ ៤ គន្លងមានប្រវែង ០,៣០ គីឡូម៉ែត្រ និងផ្លូវ ២ គន្លងមានប្រវែង ៤១,៧០ គីឡូម៉ែត្រ ប្រវែងសរុប ៤២,០០ គីឡូម៉ែត្រ ។
៤-កំណាត់ទី ៤៖ គីឡូម៉ែត្រលេខ ១៤៣+០០០ ដល់គីឡូម៉ែត្រលេខ ១៨៦+០០០ ក្នុងខេត្តកោះកុង និងខេត្តព្រះសីហនុ។ ផ្លូវ ៤ គន្លងមានប្រវែង ០,៩៣ គីឡូម៉ែត្រ និងផ្លូវ ២ គន្លងមានប្រវែង ៤២,០៧ គីឡូម៉ែត្រ ប្រវែងសរុប ៤៣,០០ គីឡូម៉ែត្រ ។
៥-កំណាត់ទី ៥៖ គីឡូម៉ែត្រលេខ ១៨៦+០០០ ដល់គីឡូម៉ែត្រលេខ ២១៥+៨០០ ក្នុងខេត្តព្រះសីហនុ។ ផ្លូវ ៤ គន្លងមានប្រវែង ៧,៣០ គីឡូម៉ែត្រ និងផ្លូវ ២ គន្លងមានប្រវែង ២២,៥០ គីឡូម៉ែត្រ ប្រវែងសរុប ២៩,៨០ គីឡូម៉ែត្រ ។
៦- កញ្ចប់ទី ៦៖ គីឡូម៉ែត្រលេខ ៤៨+៦៩៥ ដល់គីឡូម៉ែត្រលេខ ២០២+៦៨៨ ជួសជុលស្ពានចាស់ចំនួន ២៤ លូប្រអប់ចំនួន ៨ លូមូលចំនួន ៩ និងផ្លាស់ប្តូរគ្រឿងបង្គុំស្ពានចាស់ចំនួន ៥ ក្នុងខេត្តកំពង់ស្ពឺ កោះកុង ខេត្តព្រះសីហនុ។
៧-កញ្ចប់ទី ៧៖ គីឡូម៉ែត្រលេខ ៣៨+០៧៦ ដល់គីឡូម៉ែត្រលេខ ២០៤+៩៧៣ សាងសង់ស្ពានថ្មីចំនួន ៨ ក្នុងខេត្ត កំពង់ស្ពឺ កោះកុង និងខេត្តព្រះសីហនុ៕

The post គម្រោងស្តារផ្លូវជាតិលេខ ៤ សម្រេចបានជាង ៦៦% គ្រោងបញ្ចប់នៅចុងឆ្នាំ ២០២៦ appeared first on Kampuchea Thmey Daily.

បណ្តាញផ្លូវជាតិធំៗ ១៣ ខ្សែ ចាយទុនរយលានដុល្លារ កំពុងសាងសង់គ្រោងបញ្ចប់ប៉ុន្មានឆ្នាំទៀតនេះ

Dy Bunnara — Tue, 31 Oct 2023 03:32:06 +0000

ការអភិវឌ្ឍហេដ្ឋារចនាសម្ព័ន្ធផ្លូវគមនាគមន៍ ជាកិច្ចការអាទិភាពមួយរបស់រដ្ឋាភិបាលកម្ពុជា។ បណ្តាញផ្លូវគមនាគមន៍ធំៗត្រូវបានស្តារពង្រីកជាបន្តបន្ទាប់យ៉ាងប្រទាក់ក្រឡា។ បច្ចុប្បន្នមានបណ្តាញផ្លូវជាតិសំខាន់ៗជាច្រើនខ្សែកំពុងតែដំណើរការសាងសង់ចាយទុនវិនិយោគរយលានដុល្លារ ហើយគ្រោងរួចរាល់នៅពេលដ៏ខ្លីខាងមុខនេះ។

ផ្លូវជាតិលេខ ១០

ផ្លូវជាតិលេខ ១០ បានបើកការដ្ឋានសាងសង់កាលពីថ្ងៃទី០៩ ខែមីនា ឆ្នាំ២០២០ ក្រោមអធិបតីភាពសម្ដេចតេជោ ហ៊ុន សែន អតីតនាយករដ្ឋមន្រ្តី។ ផ្លូវនេះបច្ចុប្បន្នសាងសង់សម្រេចបានជាង ៥០ ភាគរយ។

ផ្លូវជាតិលេខ ១០ គឺជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជាដែលតភ្ជាប់ពីសំឡូត- វាលវែង-អូរសោម ដល់កោះកុងមានប្រវែងជាង ១៩៧ គីឡូម៉ែត្រ។ តាមរយៈកំណាត់ផ្លូវនេះ អាចជួយសម្រួលដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស រួមចំណែកក្នុងការលើកកម្ពស់ការធ្វើពាណិជ្ជកម្ម វិនិយោគ និងទេសចរណ៍បានឆាប់រហ័សនិងចំណាយតិច ជាពិសេសជាមួយប្រទេសជិតខាង។

ការស្ថាបនាផ្លូវនេះមានការសាងសង់ស្ពានចំនួន ២៣ កន្លែង ប្រវែង ១ ៧២១,៤៦ ម៉ែត្រ ដែលក្នុងនោះមានស្ពានខ្ពស់ជាងគេមួយដែលមានកម្ពស់ជាង ៧៥ ម៉ែត្រ។

ផ្លូវជាតិលេខ ៧១ សេ

ផ្លូវជាតិលេខ ៧១ សេ ពីស្រុកចំការលើឆ្លងកាត់ស្ពានស្ទឹងត្រង់ក្រូចឆ្មារចាក់ទៅដល់តំបន់រដ្ឋបាលខេត្តត្បូងឃ្មុំ វឌ្ឍនភាពសាងសង់មកដល់ពេលនេះសម្រេចបានជាង ៧០ ភាគរយ។

ផ្លូវជាតិលេខ ៧១C ដែលមានប្រវែងសរុប ១១៤,៩៩២ គីឡូម៉ែត្រ បានចាប់ផ្តើមសាងសង់កាលពីថ្ងៃទី២១ ខែមេសា ឆ្នាំ២០២១ ចាប់ពីគីឡូម៉ែត្រលេខ ១៥៤+៧០០ ផ្លូវជាតិលេខ ៧ ស្ថិតក្នុងឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ និងបញ្ចប់នៅគីឡូម៉ែត្រលេខ ៣០+៤០០ ផ្លូវជាតិលេខ ៧១ ស្ថិតក្នុងឃុំស្វាយទាប ស្រុកចំការលើ ខេត្តកំពង់ចាម។

គម្រោងផ្លូវនេះមានការសាងសង់ផ្លូវមេប្រវែង ៩២,៤៤៦ គ.ម ទទឹងផ្លូវ ១១ ម៉ែត្រ ក្រាលកៅស៊ូបេតុង (AC) កម្រាស់ ៧ សង់ទីម៉ែត្រ មានកន្លែងសម្រាប់បត់ត្រឡប់ ២ កន្លែង (U-Turn) ផ្លូវតភ្ជាប់មានប្រវែង ១៥,៨២១ គ.ម ទទឹងផ្លូវ ១១ ម៉ែត្រ ក្រាលកៅស៊ូបេតុង (AC) កម្រាស់ ៧ សង់ទីម៉ែត្រ ផ្លូវខ្នែងចំនួន ៩ ខ្សែ ប្រវែង ៦,៣៥៣ គ.ម ទទឹងតួផ្លូវ ៩ ម៉ែត្រ ក្រាលកៅស៊ូពីរស្រទាប់ស្តើង (DBST) ស្ពានចំនួន ១១ កន្លែង ប្រវែង ៨៧៥ មែត្រ និងដាក់លូគ្រប់ប្រភេទចំនួន២០២ កន្លែង។

ផ្លូវនេះគ្រោងប្រើប្រាស់រយៈពេលសាងសង់ ៤២ ខែ ដោយចំណាយថវិកាប្រមាណ ១២៩,៩៨ លានដុល្លារអាមេរិក។

ផ្លូវជាតិលេខ ៤៨

គម្រោងស្តារ និងលើកកម្រិតគុណភាពផ្លូវជាតិលេខ ៤៨ ពីចំណុចចំការហ្លួងត្រង់បំបែកផ្លូវជាតិលេខ ៤ រហូតដល់ក្រុងខេមរភូមិន្ទ ខេត្តកោះកុង បច្ចុប្បន្នសម្រេចការសាងសង់បានប្រមាណ ៣២%។

បើតាមលោក ស៊ុន ចាន់ថុល អតីតរដ្ឋមន្រ្តីក្រសួងសាធារណការនិងដឹកជញ្ជូនក្នុងពេលចុះពិនិត្យការដ្ឋានសាងសង់ផ្លូវជាតិលេខ ៤៨ កាលពីថ្ងៃទី ២៣ កុម្ភៈ ២០២៣ បានគូសបញ្ជាក់ថា ការស្ថាបនាផ្លូវនេះមានភាពយឺតយ៉ាវជាងផែនការបន្តិច ពីព្រោះតែមានបញ្ហាប្រឈមមួយចំនួនដូចជា បញ្ហាអាកាសធាតុ បញ្ហាការរាលដាលនៃជម្ងឺកូវីដ-១៩ ការចល័តគ្រឿងចក្រមកសាងសង់យឺត និងបំរែបំរួលប្រភេទការងារក្នុងកិច្ចសន្យា (Variation Orders) ជាដើម។

ផ្លូវជាតិលេខ ៤៨ ដែលមានប្រវែងសរុប ១៤៨ គីឡូម៉ែត្រ បានបើកការដ្ឋានសាងសង់នៅថ្ងៃទី០៣ ខែមករា ឆ្នាំ២០២២ ហើយតាមផែនការគ្រោងចំណាយរយៈពេលសាងសង់ចំនួន ៣២ ខែ។ ផ្លូវនេះសាងសង់ជាប្រភេទផ្លូវបេតុងកៅស៊ូ (AC) កម្រាស់ ០៧ ស.ម និងប្រភេទបេតុងសរសៃដែកត្រង់ផ្លូវប្រសព្វដែលមានកម្រាស់ ២៥ស.ម ក្រោមទំហំទឹកប្រាក់ប្រមាណជាង ៧៨ លានដុល្លារអាមេរិក។

ផ្លូវជាតិលេខ ៧

ផ្លូវជាតិលេខ ៧ ចាប់ពីររង្វង់មូលស្គន់ ស្រុកជើងព្រៃ ទៅទីរួមខេត្តកំពង់ចាមបានបើកការដ្ឋានស្តារនិងពង្រីកកាលពីថ្ងៃ ០៩ មករា ២០២៣ ដែលចាយថវិកាសាងសង់ប្រមាណ ១១៧ លានដុល្លារ ក្រោមឥណទានសម្បទានពីរដ្ឋាភិបាលចិន។

កំណាត់ផ្លូវជាតិលេខ ៧ ដែលមានប្រវែងប្រមាណ ៤៥,៤៨ គីឡូម៉ែត្រ ការស្ថាបនាត្រូវពង្រីកទទឹងតួផ្លូវពី ២ គន្លង ទៅ ៤ គន្លង ដោយគន្លងនីមួយៗមានប្រវែង ៣,៧៥ ម៉ែត្រ និងសួនពុះទ្រូងផ្លូវ ១,៥ម៉ែត្រ។

គម្រោងផ្លូវនេះមានការសាងសង់ស្ពានថ្មី ១ កន្លែង ប្រវែង ៤០ម៉ែត្រ ទទឹង ២៤ ម៉ែត្រ និងស្ពានថ្មីចំនួន ៦ កន្លែងផ្សេងទៀត ប្រវែងសរុប ១០៦ ម៉ែត្រ ទទឹង ១២ម៉ែត្រ និងពង្រីកបន្ថែមលើស្ពានចាស់ដែលមានស្រាប់ចំនួន ១ កន្លែង ទទឹង ១០,៥ម៉ែត្រ។

ផ្លូវមួយខ្សែនេះស្ថាបនាជាប្រភេទផ្លូវក្រាលបេតុងកៅស៊ូ (AC) កម្រាស់ ៩សង់ទីម៉ែត្រ ដោយក្រុមហ៊ុនសាជីវកម្មស្ពាន និងថ្នល់ចិន (CRBC) គ្រោងនឹងបញ្ចប់នៅក្នុងឆ្នាំ២០២៦។

ផ្លូវជាតិលេខ៤១

ផ្លូវជាតិលេខ ៤១ តភ្ជាប់ពីផ្លូវជាតិលេខ ៤ ត្រង់ថ្នល់ទទឹង (ព្រំប្រទល់ស្រុកសំរោងទង ខេត្តកំពង់ស្ពឺ និងស្រុកអង្គស្នួល ខេត្តកណ្តាល) រហូតដល់ផ្លូវជាតិលេខ ៣ ក្នុងស្រុកជុំគិរី ខេត្តកំពត។ ផ្លូវជាតិមួយខ្សែនេះ បានសាងសង់រួចម្តងមកហើយកាលពីឆ្នាំ២០១១ ជាប្រភេទផ្លូវក្រាលកៅស៊ូពីរប្រទាប់ (DBST) មានទទឹងតួផ្លូវពី ៧ម៉ែត្រ ដល់ ១១ម៉ែត្រ។ ជាទូទៅប្រភេទផ្លូវនេះ មានអាយុកាលជាមធ្យមពី ០៥ឆ្នាំ ទៅ ០៨ឆ្នាំ ប្រសិនបើមានការថែទាំត្រឹមត្រូវតាមលក្ខណៈបច្ចេកទេស។

ការស្តារឡើងវិញផ្លូវជាតិលេខ ៤១ ដែលមានប្រវែងសរុបជាង ៩៥ គីឡូម៉ែត្រ ត្រូវលើកកម្រិតគុណភាពជាប្រភេទផ្លូវក្រាលបេតុងកៅស៊ូ AC កម្រាស់ ៥ សង់ទីម៉ែត្រ និងពង្រីកទទឹងតួផ្លូវរហូតដល់ ១២ ម៉ែត្រ តាមស្ដង់ដារចិនកម្រិត ២។

ការស្ថាបនាផ្លូវជាតិលេខ ៤១ គ្រោងបញ្ចប់នៅអំឡុងឆ្នាំ២០២៦ ដោយចំណាយថវិកាសរុបប្រមាណជាង ៦៧ លានដុល្លារអាមេរិក ដែលជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។

ផ្លូវជាតិលេខ ៤

តាមផែនការដែលបានគ្រោងទុក ផ្លូវប្រវែង ១៧០ គីឡូម៉ែត្រនៃគម្រោងលើកកម្រិតគុណភាពផ្លូវជាតិលេខ ៤ ប្រវែង ១៩៦ គីឡូម៉ែត្រ នឹងបញ្ចប់នៅដំណាច់ឆ្នាំ២០២៣ ចំណែកផ្លូវសល់ប្រវែង ២៦ គីឡូម៉ែត្រទៀតគ្រោងបញ្ចប់នៅឆ្នាំ២០២៤។

ពីដើមឡើយផ្លូវជាតិលេខ៤ មានទទឹងតួផ្លូវតែ ៧ ម៉ែត្រប៉ុណ្ណោះ ហើយការស្តារឡើងវិញនឹងលើកកម្រិតគុណភាពពង្រីកទទឹងតួផ្លូវរហូតដល់ ១០ ម៉ែត្រ ដោយក្នុងនោះប្រវែង ៤០គីឡូម៉េត្រ នឹងត្រូវពង្រីកពី ២គន្លង ទៅជា ៤គន្លង។ ក្នុងនោះក៏មានការសាងសង់ស្ពានចាស់ចំនួន ២៤ កន្លែង ដែលត្រូវពង្រីកទំហំទទឹងរហូតដល់ ១០ ម៉ែត្រ និងសាងសង់ស្ពានថ្មីចំនួន ០៨ កន្លែងទៀត ដោយក្នុងនោះមាន ០២ កន្លែង ជាទីតាំងដែលតែងតែរងគ្រោះដោយទឹកជំនន់ជារៀងរាល់ឆ្នាំ។ ស្ពានសរុបទាំង ៣២ កន្លែងគ្រោងនឹងសាងសង់ឱ្យបានរួចរាល់ក្នុងឆ្នាំ២០២៥។

នៅក្នុងគម្រោងក៏មានការជួសជុលស្ថានីយជញ្ជីងថ្លឹងយានយន្តចំនួន ០៤ ទីតាំង ដើម្បីធានាបាននូវប្រសិទ្ធភាព ក្នុងការរឹតបន្តឹងការអនុវត្តច្បាប់លើការដឹកជញ្ជូនលើសទម្ងន់កម្រិតកំណត់។

ការស្តារនិងលើកកម្រិតគុណភាពផ្លូវជាតិលេខ ៤ តភ្ជាប់ពីរាជធានីភ្នំពេញទៅកាន់ទីក្រុងកំពង់ផែភាគនិរតីដែលជាកំពង់ផែសមុទ្រអន្តរជាតិតែមួយគត់របស់កម្ពុជាប្រើប្រាស់កម្ចីសម្បទាន ១១០ លានដុល្លារពីធនាគារពិភពលោក។

ផ្លូវជាតិលេខ ៣១ និងផ្លូវជាតិលេខ ៣៣

ត្រឹមចុងខែឧសភាឆ្នាំ ២០២៣ ផ្លូវជាតិលេខ ៣១ សម្រេចបានជាង ២៣% ខណៈដែលផ្លូវជាតិលេខ៣៣ សម្រេចបានជាង ៣១% ហើយ លទ្ធផលបង្ហាញឱ្យឃើញថា គម្រោងទាំងពីរអាចនឹងបញ្ចប់មុនពេលកំណត់។

ផ្លូវជាតិលេខ៣១ មានប្រវែងសរុបប្រមាណ ៥៣,៥៣គីឡូម៉ែត្រ គិតចាប់ពីថ្នល់បែកគុស (ចំណុចប្រសព្វផ្លូវជាតិលេខ៣) រហូតទៅដល់ទីរួមស្រុកកំពង់ត្រាច (ចំណុចតភ្ជាប់ផ្លូវជាតិលេខ៣៣) រីឯផ្លូវជាតិលេខ៣៣ មានប្រវែងសរុបប្រមាណ ៥២,៥៧ គីឡូម៉ែត្រ ចាប់ពីក្រុងកំពត បន្តរហូតដល់ច្រកលក (ព្រំដែនកម្ពុជា-វៀតណាម) រួមទាំងផ្លូវតភ្ជាប់ក្នុងក្រុងកំពត (ផ្លូវក្រុងលេខ ៧០៩)។

ផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប បានចាប់ផ្តើមបើកការដ្ឋានសាងសង់កាលពីថ្ងៃទី៣០ ខែធ្នូ ឆ្នាំ២០២២។ ក្នុងនោះផ្លូវជាតិលេខ ៣១ គ្រោងចំណាយថវិកាប្រមាណជាង ៦០ លានដុល្លារអាមេរិក និងផ្លូវជាតិលេខ ៣៣ គ្រោងចំណាយប្រមាណជាង ៦១ លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។

ផ្លូវជាតិទាំងពីរខ្សែនេះ អនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ប្រើរយៈពេលសាងសង់ចំនួន ៤០ ខែ ដែលគ្រោងនឹងបញ្ចប់នៅក្នុងឆ្នាំ២០២៦។

ផ្លូវជាតិលេខ ២៣

កំណាត់ផ្លូវជាតិលេខ ២៣ ដែលមានប្រវែង ១៩,៨៣ គីឡូម៉ែត្រ តម្លៃប្រមាណ ២១,៦៨ លានដុល្លារអាមេរិកបានបើកការដ្ឋានសាងសង់នៅថ្ងៃទី ២០ ខែមិថុនា ឆ្នាំ ២០២៣។

កំណាត់ផ្លូវជាតិលេខ២៣ គឺជាខ្សែផ្លូវដ៏មានសក្តានុពល និងមានភាពប្រទាក់ក្រឡាតភ្ជាប់ជាមួយផ្លូវជាតិលេខ ២១B និងផ្លូវជាតិលេខ ២១ ឆ្ពោះទៅកាន់ទិសដៅរាជធានីភ្នំពេញ និងព្រំដែនកម្ពុជា-វៀតណាម (ជ្រៃធំ-ឡុងប៊ិញ) និងតភ្ជាប់ជាមួយផ្លូវជាតិលេខ១៤ ទិសដៅអ្នកលឿង ខេត្តព្រៃវែង និងព្រំដែនកម្ពុជា-វៀតណាម (ក្អមសំណ-វិញសឿង) និងតភ្ជាប់ជាមួយបណ្តាញខ្សែផ្លូវផ្សេងៗដទៃទៀតនៅក្នុងតំបន់នេះ។

ចំណុចចាប់ផ្តើមការស្ថាបនាផ្លូវនេះចាប់ពីឃុំជ្រោយតាកែវឆ្លងកាត់ឃុំលើកដែក ស្រុកកោះធំ (ចាប់ពីគល់ស្ពានកោះធំ) រហូតដល់ឃុំពាមរាំង ស្រុកលើកដែក (តភ្ជាប់ជាមួយផ្លូវខេត្តលេខ១៤) នៃភូមិសាស្រ្តខេត្តកណ្តាល។

គម្រោងត្រូវស្ថាបនាជា ២ គន្លងទៅ និង ២ គន្លងមក ដោយពង្រីកទទឹងតួផ្លូវប្រវែង ១១ ម៉ែត្រ និងក្រាលកៅស៊ូ AC កម្រាស់ ៨ សង់ទីម៉ែត្រ លើទទឹងតួផ្លូវប្រវែង ១០ម៉ែត្រ ដោយអនុវត្តការសាងសង់ដោយក្រុមហ៊ុន Heng Sambat Co., Ltd Import Export Transportation and Construction ប្រើប្រាស់រយៈពេលសាងសង់ចំនួន ២៤ ខែ និងប្រើប្រាស់ថវិកាដែលជាឥណទានសម្បទានរបស់ធនាគារអភិវឌ្ឍន៍អាស៊ីសរុបប្រមាណ ២១,៦៨លានដុល្លារអាមេរិក។

កំណាត់ផ្លូវជាតិលេខ៧៣ ផ្លូវខេត្តលេខ៣៧៧ និងផ្លូវខេត្តលេខ៣៧៧A ប្រវែងសរុប ៩៨ គីឡូម៉ែត្រក្នុងខេត្តក្រចេះ

គម្រោងលើកកម្រិតគុណភាព និងជួសជុលថែទាំកំណាត់កំណាត់ផ្លូវជាតិលេខ៧៣ ផ្លូវខេត្តលេខ៣៧៧ និងផ្លូវខេត្តលេខ៣៧៧A បានបើកការដ្ឋានកាលពីថ្ងៃទី ៤ ខែមេសាឆ្នាំ២០២៣។

កំណាត់ផ្លូវទាំង ៣ ខ្សែនេះ មានប្រវែងសរុប ៩៨,៤គីឡូម៉ែត្រ ដែលក្នុងនោះ៖ កំណាត់ផ្លូវជាតិលេខ៧៣ ប្រវែង ៤៩,៨១គីឡូម៉ែត្រ ចាប់ពីផ្លូវបំបែកប្រធាតុ ភូមិប្រធាតុ ឃុំស្រឡប់ ស្រុកត្បូងឃ្មុំ ទៅដល់ស្ពានកំពង់រាំង ឃុំសេដា ស្រុកតំបែរ (ព្រំប្រទល់ខេត្តក្រចេះ) ត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលកៅស៊ូ AC កម្រាស់ ៥ សង់ទីម៉ែត្រ និងក្រាលបេតុងសរសៃដែកកម្រាស់ ២០ សង់ទីម៉ែត្រ ទទឹង ១០-១៣ ម៉ែត្រ (សម្រាប់ផ្លូវ ២គន្លង) និងទទឹង១៥,៧-១៦ម៉ែត្រ (សម្រាប់ផ្លូវ ៤គន្លង ក្នុងទីប្រជុំជន)។

ចំណែកផ្លូវខេត្តលេខ ៣៧៧ និង ៣៧៧A មានប្រវែងសរុប ៤៨,៦គីឡូម៉ែត្រ ក្នុងនោះផ្លូវខេត្តលេខ ៣៧៧ មានប្រវែង ៣៥ គីឡូម៉ែត្រ ចាប់ពីរង្វង់មូលព្រាប ស (ក្រុងក្រចេះ) ដល់ស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦ គីឡូម៉ែត្រ ចាប់ពីផ្សារសណ្តាន់ ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។

ផ្លូវខេត្តលេខ៣៧៧ និង៣៧៧A គឺតភ្ជាប់ពីទីប្រជុំជនក្នុងខេត្តក្រចេះ (ពីរង្វង់មូលព្រាបស) ឆ្ពោះទៅកាន់តំបន់ទេសចរណ៍ធម្មជាតិព្រែកកាំពី និងទេសចរណ៍ប្រវត្តិសាស្រ្តវិហារសសរ១០០ និងតភ្ជាប់ទៅកាន់ផ្លូវជាតិលេខ ៧ ឆ្ពោះទៅខេត្តស្ទឹងត្រែង រតនគិរី និងមណ្ឌលគិរី។

កំណាត់ផ្លូវជាតិលេខ ៧៣ សាងសង់ដោយក្រុមហ៊ុន Nimmeng-Proco Joint Venture។ ដោយឡែកផ្លូវខេត្តលេខ ៣៧៧ និង ៣៧៧A សាងសង់ដោយក្រុមហ៊ុន Poly Changda Engineering Co., Ltd គ្រោងចំណាយរយៈពេលសាងសង់ចំនួន ១៨ ខែ និងចំណាយថវិកាសាងសង់សរុបប្រមាណ ៤០ លានដុល្លារអាមេរិក ក្រោមក្របខ័ណ្ឌឥណទានសម្បទានរបស់ធនាគារពិភពលោក។

ផ្លូវខេត្តលេខ ៣១២

ផ្លូវខេត្តលេខ៣១២ គឺជាខ្សែផ្លូវយុទ្ធសាស្ត្រដ៏សំខាន់មួយដែលឆ្លងកាត់ឃុំចំនួន ៤ ក្នុងភូមិសាស្ត្រនៃស្រុកព្រះស្តេច ខេត្តព្រៃវែងរួមមាន៖ ឃុំល្វា ឃុំជ័យកំពក ឃុំអង្គររាជ និងឃុំបន្ទាយចក្រី។ ខ្សែផ្លូវនេះមានភាពប្រទាក់ក្រឡាគ្នាជាមួយនឹងផ្លូវជាតិលេខ ១ ផ្លូវខេត្តលេខ ៣១២A និងផ្លូវក្រវាត់ព្រំដែន ដែលបានតភ្ជាប់តំបន់ទីប្រជុំជនទៅកាន់តំបន់ព្រំដែន (កម្ពុជា-វៀតណាម)។

ផ្លូវខេត្តលេខ៣១២ មានប្រវែង ២៨,៣៧២ គីឡូម៉ែត្រ មានចំណុចចាប់ផ្តើមពី ភូមិសំរោង ឃុំល្វា (ត្រង់បំបែកផ្លូវជាតិលេខ១ គីឡូម៉ែត្រលេខ៧៧+០៨២) រហូតដល់ភូមិករគោ ឃុំបន្ទាយចក្រី (ព្រំប្រទល់កម្ពុជា-វៀតណាម) នៃភូមិសាស្ត្រស្រុកព្រះស្តេច ខេត្តព្រៃវែង ដោយគ្រោងចំណាយថវិកាអស់ជាង ២៤ លានដុល្លារ។

ផ្លូវមួយខ្សែនេះសាងសង់ដោយក្រុមហ៊ុន ILSUNG-KR JOINT VENTURE ប្រើប្រាស់រយៈពេលសាងសង់ចំនួន ១៨ ខែ និងរយៈពេលថែទាំចំនួន ៦០ ខែ ដោយប្រើប្រាស់កម្ចីពីធនគារអភិវឌ្ឍន៍អាស៊ី រួមជាមួយនឹងថវិកាបដិភាគរបស់រាជរដ្ឋាភិបាលប្រមាណ ២៤,៨៩ លានដុល្លារ៕

The post បណ្តាញផ្លូវជាតិធំៗ ១៣ ខ្សែ ចាយទុនរយលានដុល្លារ កំពុងសាងសង់គ្រោងបញ្ចប់ប៉ុន្មានឆ្នាំទៀតនេះ appeared first on Kampuchea Thmey Daily.