ផ្លែ ត្របែក Archives - Kampuchea Thmey Daily

ឆ្នាំនេះ ផ្លែត្របែក នៅបាត់ដំបង មានហាងឆេងល្អលើទីផ្សារ

អ៊ិន ពិសី — Sun, 28 Sep 2025 03:18:00 +0000

ផ្លែត្របែកបណ្ដូលក្រហម និងផ្លែត្របែកក្រញូវ បច្ចុប្បន្នមានហាងឆេងល្អនៅលើទីផ្សារ ស្របពេលប្រជាពលរដ្ឋដែលជាម្ចាស់ចម្ការត្របែកត្រេកអរដោយសាររដូវនេះទឹកភ្លៀងបានអំណោយផលយ៉ាងល្អប្រសើរ ធ្វើឲ្យដំណាំត្របែកចេញផ្កាផ្លែស្រស់បំព្រង។

លោក ម៉ែន សុផល ជាម្ចាស់ចម្ការត្របែក នៅភូមិកំពង់អំពិល ឃុំវត្តតាមិម ស្រុកសង្កែ ខេត្តបាត់ដំបង រៀបរាប់ថា ត្របែករបស់លោក គឺ ទើបតែដាំបានប៉ុន្មានឆ្នាំនេះឯង ប៉ុន្តែមិនបានប៉ុន្មានផង ស្រាប់តែត្របែកដែលលោកប្រើមែកសាកយកមកតាម ចេញផ្កាផ្លែយ៉ាងល្អ។ ត្របែករបស់លោក គឺជាពូជត្របែកក្រញូវ ដែលមានគ្រាប់តិច ហើយផ្អែម និង ស្រួយឆ្ងាញ់ពិសា។

លោកបានបន្តថា ការដែលត្របែកចាប់ផ្ដើមចេញផ្លែ គឺលោកចាំបាច់ត្រូវតែដាក់រុំក្រដាស និងចងថង់ប្លាស្ទិក ដើម្បីបង្ការពីសត្វល្អិតទិច ព្រោះនាំឲ្យផ្លែត្របែកស្អុយ ឬអុជខ្មៅៗ ធ្វើឲ្យខូចសម្រស់ ហើយក៏អាចទាញឲ្យធ្លាក់តម្លៃផងដែរ។

បច្ចុប្បន្ននៅពេលប្រមូលផលគឺមិនខ្វះទេអ្នកដែលមកទិញដល់ចម្ការ ដោយលោកលក់ក្នុងតម្លៃសមរម្យ ដើម្បីឲ្យអាជីវករដែលយកទៅលក់បន្តនៅតាមផ្សារនានាអាចបានចំណេញខ្លះ ព្រោះលោកមិនបានចំណាយការធ្វើដំណើរទៅដល់ផ្សារនោះឡើយ ម្យ៉ាងទៀតត្របែកនៅក្នុងចំការដែលមានទំហំសមល្មមគឺអាចជួយសម្រាលនូវជីវភាពរបស់លោកបានមួយកម្រិត ហើយលោកក៏ព្យាយាមសាកមែកដើម្បីបំបែកដាំបន្តបន្ថែមទៀតទៅលើផ្ទៃដីដែលនៅសេសសល់។

អ្នកស្រី វង់ សាវ៉ន ជាអាជីវករលក់ផ្លែឈើនៅផ្សារបឹងឈូកកណ្ដាលក្រុងបាត់ដំបង បាននិយាយថា ត្របែកដែលអ្នកស្រីលើកពីគេយកមកលក់នៅក្នុងផ្សារនេះគឺជាប្រភេទត្របែកក្រញូវ បណ្ដូលស គ្រាប់តិច និងអាចលក់បានតម្លៃចាប់ពី ៥.០០០ ទៅ ៦.០០០ រៀល ក្នុង ១ គីឡូក្រាម ហើយសម្បូរអតិថិជនមកទិញណាស់ ព្រោះវាមានរសជាតិឆ្ងាញ់ ដោយមិនមានប្រើសារធាតុគីមីដូចផ្លែឈើនាំចូលពីប្រទេសជិតខាងឡើយ។

អ្នកស្រី បន្តថា ទោះជាវាមិនបានចំណេញច្រើនក្តី ក៏ប៉ុន្តែសម្រាប់អ្នកស្រីដែលលក់ផ្លែឈើច្រើនប្រភេទ ដូច្នេះបើសរុបរួមទៅមួយមុខចំណេញបន្តិចក៏អាចគ្រប់គ្រាន់សម្រាប់ជីវភាពប្រចាំថ្ងៃរបស់អ្នកស្រីដែរ ព្រោះវាជាទម្លាប់ដែលអ្នកស្រីរកស៊ីមុខរបរនេះជាយូរមកហើយ។ ម្យ៉ាងទៀត អ្នកស្រីបានបើកចិត្តយ៉ាងទូលាយថា បើទោះបីជាបច្ចុប្បន្នមានបញ្ហាអំពីចោរសៀមតែងចូលមកឈ្លានពានទឹកដីកម្ពុជាតាមបណ្ដោយព្រំដែនក៏ដោយ ក៏មិនបង្អាក់នូវការរកស៊ីប្រចាំថ្ងៃរបស់អ្នកស្រី និងអាជីវករផ្សេងទៀតដែរ ព្រោះវាជានាទីរបស់បងៗ កងទ័ព និងប្រមុខ នៃរាជរដ្ឋាភិបាលកម្ពុជា ប៉ុន្តែទឹកចិត្តអ្នកស្រី និងប្រជាពលរដ្ឋដទៃទៀត ក៏មានការឈឺចាប់ខ្លាំងណាស់ដែរ ដោយមានតែការរួមគ្នាបរិច្ចាគថវិកា ដើម្បីជួយដល់កងទ័ពដែលនៅសមរភូមិមុខតែប៉ុណ្ណោះ៕

អត្ថបទ ៖ សោ និយមរ័ត្ន

The post ឆ្នាំនេះ ផ្លែត្របែក នៅបាត់ដំបង មានហាងឆេងល្អលើទីផ្សារ appeared first on Kampuchea Thmey Daily.

កសិករនៅស្រុកកំរៀង ប្រមូលផលត្របែកម្ដង ១០០ គីឡូក្រាម ពីចម្ការត្របែកជាង ៥០០ ដើម

Dy Bunnara — Sat, 08 Feb 2025 02:18:29 +0000

ផ្លែត្របែកគីឡូដែលបច្ចុប្បន្នកំពុងពេញនិយមនៅលើទីផ្សារ ធ្វើឱ្យគ្រួសារកសិករមួយនៅស្រុកកំរៀង អាចរកប្រាក់ចំណូលប្រចាំថ្ងៃបានយ៉ាងល្អប្រសើរ ដោយសារតែមួយថ្ងៃអាចប្រមូលផលមិនក្រោមពី ១០០ គីឡូក្រាម លើដំណាំត្របែកប្រមាណជាង ៥០០ ដើម ដើម្បីលក់ចេញទៅលើទីផ្សារ។

លោក ហុិន ប៑ុនហ៑ាន និង អ្នកស្រី ហេង ថារី ជាកសិកររស់នៅភូមិលំផាត់ ឃុំ អូរដា ស្រុកកំរៀង ខេត្តបាត់ដំបង បានប្រកបមុខរបរដាំដំណាំត្របែកគីឡូជាង ៥០០ ដើម នៅក្នុងចម្ការក្បែរផ្ទះ។

កសិកររូបនេះបញ្ជាក់ថា ដំណាំត្របែកដើម្បីអាចប្រមូលផលបានទាំងប្រាំងទាំងវស្សា ចាំបាច់ត្រូវការថែទាំឲ្យបានហ្មត់ចត់ ព្រោះដំណាំនេះជាទូទៅមានផ្លែតែខែវស្សាប៉ុណ្ណោះ ដោយសារតែមានភ្លៀងធ្លាក់គ្រប់គ្រាន់ទើបធ្វើឲ្យដើមត្របែកចេញផ្លែចេញផ្កា បានយ៉ាងល្អ។

លោកហុិន ប៊ុនហ៊ាន បានបន្ថែមថា សម្រាប់ចម្ការត្របែករបស់លោក គឺលោកបានរត់បណ្ដាញទុយោទឹកនៅចន្លោះដើមត្របែកទាំងអស់។ សម្រាប់រដូវប្រាំងគឺលោកត្រូវប្រើប្រាស់ទឹកស្រោចទៅលើគល់ ឲ្យបានសើមជាប្រចាំដើម្បីឲ្យគ្រាប់អាចចេញផ្កានិងផ្លែនៅគ្រប់រដូវ។

ឯការថែទាំគឺលោកត្រូវប្រើក្រដាសខ្ចប់ផ្លែទាំងអស់ ដើម្បីជៀសវាងការបំផ្លាញពីកូនសត្វតូចៗ ហើយការវេចខ្ចប់នេះក៏អាចធ្វើឲ្យផ្លែត្របែកមានពណ៌សម្បុរសស្អាតថែមទៀតផង ដោយនៅពេលប្រមូលផលម្ដងៗ គឺមិនក្រោមពី ១០០ គីឡូក្រាមឡើយ ដោយក្នុងមួយគីឡូក្រាម អាចលក់បានតម្លៃ ២ ៥០០ រៀល គឺមានម៉ូយមកទទួលយកដល់ចំការតែម្ដង។

បច្ចុប្បន្ននេះលោកកំពុងត្រៀមពង្រីកចម្ការត្របែកនេះបន្ថែមទៀតទៅលើផ្ទៃដីដែលនៅសល់ ព្រោះវាអាចជួយសម្រាលបន្ទុកក្នុងជីវភាពគ្រួសាររបស់លោកបានយ៉ាងល្អប្រសើរ បើទោះបីជារដូវប្រាំងត្របែកពុំមានផ្លែ ក៏ត្របែកក្នុងចម្ការរបស់លោក នៅតែអាចប្រមូលផលបានជាបន្តបន្ទាប់៕

អត្ថបទ : សោ និយមរ័ត្ន

The post កសិករនៅស្រុកកំរៀង ប្រមូលផលត្របែកម្ដង ១០០ គីឡូក្រាម ពីចម្ការត្របែកជាង ៥០០ ដើម appeared first on Kampuchea Thmey Daily.

ការផឹកទឹកស្លឹកត្របែក មានគុណប្រយោជន៍ ឬប៉ះពាល់ដល់សុខភាព

សាង ស្រីល័ក្ខ — Thu, 11 Jul 2024 01:05:00 +0000

ត្របែកត្រូវបានគេស្គាល់ថាជាផ្លែឈើសម្បូរវីតាមីន C ដែលល្អសម្រាប់សុខភាព។ មិនត្រឹមតែផ្លែត្របែកប៉ុណ្ណោះទេ ស្លឹកត្របែកក៏មានរសជាតិឆ្ងាញ់ផងដែរ។ មនុស្សជាច្រើនតែងតែធ្វើតែស្លឹកត្របែកដើម្បីផឹក។ ដូច្នេះតើការផឹកទឹកស្លឹកត្របែកស្រស់មានផលប៉ះពាល់អ្វីខ្លះ?

ធ្វើឲ្យកម្រិតជាតិស្ករក្នុងឈាមមានស្ថេរភាព

ការប្រើប្រាស់ស្លឹកត្របែក មានប្រសិទ្ធភាពក្នុងការគ្រប់គ្រងកម្រិតជាតិស្ករក្នុងឈាម និងធន់នឹងអាំងស៊ុយលីន។ ដូច្នេះការប្រើស្លឹកត្របែក គឺល្អសម្រាប់អ្នកកើតជំងឺទឹកនោមផ្អែម។ ឥទ្ធិពលនៃស្លឹកត្របែក គឺដោយសារតែក្រុមនៃសារធាតុដូចជា Avicularin និង Quercetin ដែលមានសមត្ថភាពរារាំងការស្រូបយកជាតិស្ករ។ អ្នកជំងឺទឹកនោមផ្អែម អាចធ្វើទឹកស្លឹកត្របែកផឹកជារៀងរាល់ថ្ងៃ។ ប្រើប្រាស់ទឹកស្លឹកត្របែកជាប្រចាំរយៈពេលប្រហែល២ទៅ៣ខែ អ្នកជំងឺអាចឃើញស្ថានភាពប្រសើរឡើង។

ការសម្រកទម្ងន់

ឥទ្ធិពលមួយទៀតនៃស្លឹកត្របែកដែលស្ត្រីចូលចិត្តគឺជួយដល់ការសម្រកទម្ងន់។ ការសិក្សាបង្ហាញថា ស្លឹកត្របែកជួយកាត់បន្ថយការទទួលទានម្សៅ និងការរំលាយអាហារជាតិស្ករក្នុងរាងកាយ។ ដូច្នេះហើយ ស្ត្រីអាចប្រើតែស្លឹកត្របែក ឬទឹកស្លឹកត្របែកលាយជាមួយទឹកផ្លែឈើ ដើម្បីកែលម្អរាង។

តែស្លឹកត្របែកល្អសម្រាប់សុខភាពបេះដូង

ស្លឹកត្របែកមានផ្ទុកសារធាតុសំខាន់ដូចជា β-sitosterol, triterpenoids, ប្រេងងាយនឹងបង្កជាហេតុធម្មជាតិមួយចំនួន និងសារធាតុសកម្មដែលមានមូលដ្ឋានលើអាស៊ីត។ គ្រឿងផ្សំធម្មជាតិទាំងនេះអាចបង្កើនភាពបត់បែននៃសរសៃឈាម ជួយបន្ថយសម្ពាធឈាម កម្ចាត់កូលេស្តេរ៉ុលអាក្រក់ (LDL-cholesterol) និងបង្កើនកូឡេស្តេរ៉ុលល្អ (HDL-cholesterol)។

ការសិក្សាមួយក៏បានបង្ហាញថា ស្លឹកត្របែកអាចជួយកាត់បន្ថយសម្ពាធឈាម និងកូលេស្តេរ៉ុលអាក្រក់ ដែលជាមូលហេតុនៃភាពធាត់ និងបង្កើនហានិភ័យនៃជំងឺសរសៃឈាមបេះដូង និងជំងឺដាច់សរសៃឈាមខួរក្បាល។

វិធីធ្វើតែស្លឹកត្របែក ដើម្បីរក្សាបាននូវលក្ខណៈសម្បត្តិព្យាបាល

តែស្លឹកត្របែកគឺជាវិធីរហ័ស និងមានប្រសិទ្ធភាពក្នុងការទទួលបានអត្ថប្រយោជន៍ដ៏មានប្រយោជន៍។ អ្នកអាចប្រើស្លឹកត្របែកស្រស់ ឬស្ងួតក្នុងកម្រិតអាស្រ័យតាមប្រភេទ។

ស្លឹកត្របែកស្ងួត ប្រើស្លឹកស្ងួត ២.៥-៥ក្រាម ស្ងោរជាមួយទឹកឆ្អិនប្រហែល ២៥០មីលីលីត្រ ទុកចោលប្រហែល ១០នាទី។ សម្រាប់ស្លឹកត្របែកស្រស់ អ្នកត្រូវប្រើស្លឹកស្រស់ ៥-១០សន្លឹក។ លាងស្លឹកស្រស់មុនពេលកែច្នៃ ហើយដាំទឹកប្រហែល ៥០០មីលីលីត្រ ដាក់លើចង្ក្រាន រួចដាក់ស្លឹកត្របែក គ្របពីលើ ហើយដាំឱ្យពុះប្រហែល ១០ ទៅ ១២នាទី។

ទោះយ៉ាងណាក៏ដោយ សូមចំណាំថា តែស្លឹកត្របែកមានរសជាតិជូរ និងចត់បន្តិច។ ដូច្នេះហើយ អ្នកគួរតែផឹកតែ ១ ទៅ ២កែវក្នុងមួយថ្ងៃ ហើយផឹកក្រោយបាយ។ អ្នកមិនគួរផឹកតែស្លឹកត្របែកពេញមួយថ្ងៃទេ ព្រោះវាអាចនាំឲ្យមានបញ្ហាក្រពះពោះវៀន៕

អត្ថបទ៖ សាង ស្រីល័ក្ខ

ចុចអាន៖ស្លឹកតើយ ជាឱសថបញ្ចុះជាតិស្ករក្នុងឈាម ល្អសម្រាប់ស្រ្តី គួរទទួលទានកុំខាន

The post ការផឹកទឹកស្លឹកត្របែក មានគុណប្រយោជន៍ ឬប៉ះពាល់ដល់សុខភាព appeared first on Kampuchea Thmey Daily.

ផ្លែត្របែកផ្ទុកទៅដោយសារជាតិចិញ្ចឹមជាច្រើន រួមទាំងជំនួយដល់ស្បែកពីខាងក្នុង

សាង ស្រីល័ក្ខ — Mon, 21 Jun 2021 02:48:21 +0000

ការទទួលទានអាហារសព្វថ្ងៃនេះច្រើនប៉ះពាល់ដល់សុខភាព ហេតុដូច្នេះហើយបានជាយើង ចាំបាច់ត្រូវបរិភោគអាហារនិងភេសជ្ជៈដែលអាចធ្វើឲ្យស្ថានភាពប្រសើរឡើង។

ផ្លែឈើមួយប្រភេទដែលអ្នកអាចបន្ថែមចូលក្នុងបញ្ជីអាហារដែលមានសុខភាពល្អ គឺ ត្របែក។ ព្រោះផ្លែឈើនេះផ្ទុកទៅដោយសារធាតុចិញ្ចឹមជាច្រើន និងជួយដល់សុខភាពរាងកាយ ដែលយើងមិនធ្លាប់ដឹង៖

១ កាត់បន្ថយជាតិស្ករក្នុងឈាម

ការសិក្សាលើមនុស្សដែលហូបត្របែកជាទៀងទាត់ អាចជួយដល់កម្រិតជាតិស្ករក្នុងឈាម ហើយលទ្ធផលត្រូវបានគេចាត់ទុកថាគួរឲ្យកត់សម្គាល់។ ក្រុមមួយផឹកទឹកផ្លែត្របែកត្រូវបានគេមើលឃើញថា បានបញ្ចុះជាតិស្ករក្នុងឈាម។ ការសិក្សាខ្លះក៏អះអាងដែរថា នេះក៏មានប្រសិទ្ធភាពសម្រាប់ការគ្រប់គ្រងជាតិស្ករក្នុងឈាមរយៈពេលវែងផងដែរ។

២ រក្សាឬជួយសម្រកទម្ងន់

ផ្លែត្របែកមានតែកាឡូរី ៣៧ កាឡូរីប៉ុណ្ណោះ ប៉ុន្តែវាធ្វើឲ្យអ្នកឆ្អែតបានយូរ ដោយសារវាមានជាតិសរសៃគ្រប់គ្រាន់ដើម្បីបំពេញឲ្យរាងកាយ។

៣ បំបាត់ការឈឺចាប់ពេលមករដូវ

ស្ត្រីអាចមានអារម្មណ៍ខឹងមួរម៉ៅ ដោយសារតែការឈឺចាប់ដែលបណ្ដាលពីការមករដូវ។ ស្ត្រីភាគច្រើនជួបប្រទះការឈឺក្រពះ ចុកពោះ ចង្កេះ ឬរមួលក្រពើ។ ប៉ុន្តែការផឹកទឹកស្លឹកត្របែកត្រូវបានបង្ហាញថា អាចកាត់បន្ថយអារម្មណ៍ឈឺចាប់ពេលមានរដូវ។ អ្នកខ្លះថែមទាំងនិយាយថាវាមានឥទ្ធិពលជាងថ្នាំបំបាត់ការឈឺចាប់ដទៃទៀត។

៤ ស្បែកស្រស់ថ្លា

ផ្លែត្របែកត្រូវបានគេដឹងថាមានគុណប្រយោជន៍ជាច្រើនចំពោះសុខភាព ដូចជាមានវីតាមីននិងអង់ទីអុកស៊ីដង់ផ្សេងៗគ្នា ហើយសមាសធាតុទាំងពីរនេះគឺជាសមាសធាតុដែលជួយពង្រឹងស្បែកពីខាងក្នុង។ សារធាតុប្រឆាំងអុកស៊ីតកម្មនឹងដើរតួក្នុងការការពារស្បែកពីការខូចខាត។ ខណៈពេលដែលវីតាមីននៅក្នុងផ្លែឈើនេះ អាចព្យាបាលនិងការពារការលូតលាស់នៃមុនលើផ្ទៃមុខ។

៥ បង្កើតប្រព័ន្ធរំលាយអាហារល្អ

ជាតិសរសៃគឺមាននៅក្នុងផ្លែត្របែក។ ពពួកនេះជួយដល់ចលនាពោះវៀនធំនិងការពារការទល់លាមក។ លើសពីនេះទៀតស្លឹករបស់ផ្លែឈើនេះ ជួយក្នុងការបំបាត់រាគ។

៦ ជំរុញសុខភាពបេះដូង

គុណប្រយោជន៍ដ៏អស្ចារ្យមួយរបស់ផ្លែត្របែក គឺជួយជំរុញដល់សុខភាពបេះដូងតាមវិធីផ្សេងៗ។ សារធាតុប្រឆាំងអុកស៊ីតកម្មនិងវីតាមីនរបស់វា គឺជាអ្វីដែលការពារបេះដូងពីរ៉ាឌីកាល់សេរីដ៏គ្រោះថ្នាក់។ ខណៈពេលដែលស្លឹករបស់វាអាចជួយក្នុងការកាត់បន្ថយសម្ពាធឈាមបន្ថយកូលេស្តេរ៉ុលអាក្រក់រក្សាកូលេស្តេរ៉ុលល្អ។

៧ បង្កើតប្រព័ន្ធភាពស៊ាំ

រាងកាយដែលមិនទទួលបានវីតាមីន C គ្រប់គ្រាន់ គឺមានហានិភ័យក្នុងការទទួលបាននៅជំងឺឆ្លង និងជំងឺផ្សេងទៀត។ ផ្លែឈើនេះអាចផ្តល់ឲ្យរាងកាយនូវបរិមាណវីតាមីន C ដែលត្រូវការ៕

ប្រែសម្រួល៖ សាង ស្រីល័ក្ខ

ប្រភព៖practicalheal

ចុចអាន៖ស្វាយទុំមិនត្រឹមផ្អែមឆ្ងាញ់! តែមានប្រយោជន៍ច្រើនចំពោះសុខភាព សូម្បីអ្នកមានជំងឺទឹកនោមផ្អែមក៏ហូបបាន

ចុចអាន៖ផ្លែគូលេនតូចៗចឹងសោះ! តែមានអត្ថប្រយោជន៍ដល់សុខភាពរាប់មិនអស់

The post ផ្លែត្របែកផ្ទុកទៅដោយសារជាតិចិញ្ចឹមជាច្រើន រួមទាំងជំនួយដល់ស្បែកពីខាងក្នុង appeared first on Kampuchea Thmey Daily.

ផ្លែ ត្របែក Archives - Kampuchea Thmey Daily

ឆ្នាំនេះ ផ្លែត្របែក នៅបាត់ដំបង មានហាងឆេងល្អលើទីផ្សារ

កសិករនៅស្រុកកំរៀង ប្រមូលផលត្របែកម្ដង ១០០ គីឡូក្រាម ពី​ចម្ការ​ត្របែកជាង ៥០០ ដើម

​ការ​ផឹក​ទឹក​ស្លឹក​ត្របែក មានគុណប្រយោជន៍ ឬប៉ះពាល់​ដល់​សុខភាព

ផ្លែត្របែកផ្ទុក​ទៅដោយ​សារជាតិចិញ្ចឹមជាច្រើន ​ រួមទាំងជំនួយដល់ស្បែកពីខាងក្នុង

កសិករនៅស្រុកកំរៀង ប្រមូលផលត្របែកម្ដង ១០០ គីឡូក្រាម ពីចម្ការត្របែកជាង ៥០០ ដើម

ការផឹកទឹកស្លឹកត្របែក មានគុណប្រយោជន៍ ឬប៉ះពាល់ដល់សុខភាព

ផ្លែត្របែកផ្ទុកទៅដោយសារជាតិចិញ្ចឹមជាច្រើន រួមទាំងជំនួយដល់ស្បែកពីខាងក្នុង