ផ្លែ សាវម៉ាវ Archives - Kampuchea Thmey Daily

ឆ្នាំនេះសាវម៉ាវសំឡូត ទទួលបានទិន្នផលខ្ពស់ និងបានតម្លៃល្អនៅលើទីផ្សារ

Sokhom Khon — Tue, 02 Jun 2026 02:58:33 +0000

មួយរយៈចុងក្រោយនេះគេសង្កេតឃើញថា ផ្លែសាវម៉ាវប្រចាំស្រុកសំឡូត នៅតែបន្តនាំចេញមកកាន់តំបន់នានា ក្នុងប្រទេសកម្ពុជាជាហូរហែ ដោយសារតែនៅឆ្នាំនេះ សាវម៉ាវស្រុកសំឡូតទទួលបានទិន្នផលខ្ពស់ រីឯតម្លៃបើទោះបីជាមិនមែនដើមដៃក៏ដោយ ក៏តម្លៃនៅតែខ្ពស់នៅលើទីផ្សារដដែល នេះសបញ្ជាក់ឲ្យឃើញថា ផ្លែសាវម៉ាវខ្មែរ ទទួលបានទាំងរសជាតិ និងគុណភាព ដោយគ្មានប្រើសារធាតុគីមី និងល្អ ជាងផ្លែសាវម៉ាវដែលនាំចូលពីក្រៅប្រទេស។

កន្លងមកអ្នកស្រី វឌ្ឍនា ដែលរស់នៅក្នុងស្រុកសំឡូត និងជាប្រជាកសិករដាំទុរេន និងសាវម៉ាវ ធ្លាប់បានបញ្ជាក់ថា កាលពីដើមដៃផ្លែសាវម៉ាវ ដែលលក់ចេញពីក្នុងចំការអាចបានតម្លៃពី ៩.០០០ រៀល ទៅ ១០.០០០ រៀល ក្នុងមួយគីឡូក្រាម។ ប៉ុន្តែរហូតមកទល់ពេលនេះ តម្លៃផ្លែសាវម៉ាវសំឡូតក៏មិនទាន់ស្រុតចុះខ្លាំងនោះឡើយ ដោយបច្ចុប្បន្នក៏នៅបានតម្លៃត្រឹម ៧.៥០០ រៀល ទៅ ៨.០០០ រៀល ក្នុងមួយគីឡូក្រាមដែរ។ ហើយការដាំដុះដំណាំទាំងនេះ គឺអ្នកស្រីមិនបានប្រើសារធាតុគីមីអ្វីបន្តិចនោះទេ គឺដាំតាមបែបលក្ខណៈធម្មជាតិដូច្នេះហើយទើបគុណភាពនៅតែល្អ ហើយតម្លៃនៅតែលក់បានខ្ពស់នៅឡើយ។

អ្នកស្រីបានបន្ថែមថា សព្វថ្ងៃមិនខ្វះទេម៉ូយដែលចង់បាន និងធ្វើការកម្មង់ជារៀងរាល់ថ្ងៃ ណាស់តែអ្នកស្រី និងគ្រួសារបេះមិនទាន់ឲ្យគេ ថ្ងៃខ្លះម៉ូយត្រូវការចាប់ពី ៣០០ ទៅ ៥០០ គីឡូក្រាម ដែលតម្រូវឲ្យអ្នកស្រី និងគ្រួសារបេះឲ្យទាន់ឲ្យគេ ប៉ុន្តែដើម្បីជីវភាពបើទោះបីជាមានការនឿយហត់ខ្លាំងយ៉ាងណាក៏ដោយក៏ត្រូវតែប្រឹងប្រែងដែរ។ ហើយសព្វថ្ងៃផ្លែសាវម៉ាវនៅក្នុងចំការរបស់អ្នកស្រីទើបតែបេះអស់ប្រមាណ ៥០% ប៉ុណ្ណោះ ព្រោះឆ្នាំនេះទិន្នផលផ្លែសាវម៉ាវនៅស្រុកសំឡូត ស្ទើរគ្រប់ចំការគឺហុចផលខ្ពស់ជាងឆ្នាំកន្លងទៅ៕

អត្ថបទ៖ សោ និយមរ័ត្ន

The post ឆ្នាំនេះសាវម៉ាវសំឡូត ទទួលបានទិន្នផលខ្ពស់ និងបានតម្លៃល្អនៅលើទីផ្សារ appeared first on Kampuchea Thmey Daily.

ផ្លែសាវម៉ាវសំឡូត នារដូវដើមដៃលក់បានតម្លៃខ្ពស់នៅលើទីផ្សារ

Sokhom Khon — Tue, 19 May 2026 02:55:10 +0000

មួយរយៈចុងក្រោយនេះ ផ្លែសាវម៉ាវនៅស្រុកសំឡូត កំពុងប្រមូលផលជាបណ្ដើរៗហើយ ដែលការប្រមូលផលនេះគឺជាផ្លែដើមដៃ ហើយអាចលក់បានតម្លៃខ្ពស់គួរសមនៅលើទីផ្សារ ដែលពពួកសាវម៉ាវនេះ គឺមានរសជាតិផ្អែមឆ្ងាញ់ ព្រោះប្រជាកសិករដាំតាមលក្ខណៈធម្មជាតិដោយមិនប្រើគីមីនោះឡើយ។

បច្ចុប្បន្នគេសង្កេតឃើញនៅលើទីផ្សារ ចាប់ផ្ដើមមានផ្លែសាវម៉ៅទុំលក់ខ្លះៗហើយ ដែលនេះគឺជាការប្រមូលផលដើមដៃ របស់ប្រជាកសិករនៅស្រុកដំឡូត ព្រោះនៅតំបន់នោះគឺជាតំបន់ខ្ពង់រាប ដោយដីមានជីរជាតិល្អ ហើយអាចដាំដំណាំគ្រប់យ៉ាងបានយ៉ាងល្អប្រសើរ ពិសេសគឺដំណាំសាវម៉ាវ និងទុរេន បើប្រជាកសិករនៅទីនោះនិយមចូលចិត្តដាំដំណាំប្រភេទនេះស្ទើរគ្រប់គ្នា ពិសេសគឺអ្នកដែលមានដីចម្ការធំៗ ។

អ្នកស្រីវឌ្ឍនា ជាប្រជាកសិករមួយរូបរស់នៅក្នុងឃុំស៊ុង ស្រុកសំឡូត ខេត្តបាត់ដំបង បានរៀបរាប់ថា អ្នកស្រីក៏មានដីចម្ការមួយកន្លែងដែរ ដែលដីចម្ការនោះ អ្នកស្រី និងស្វាមីក៏បានដាំដំណាំទុរេន និងសាវម៉ាវនេះដូចគេឯងដែរ ហើយបច្ចុប្បន្នការប្រមូលផលដំណាំទាំងពីរនេះគឺបានធ្វើឡើងជាបណ្ដើរៗហើយ។

អ្នកស្រីបានបន្តថា សម្រាប់ផលដំណាំសាវម៉ាវក្នុងការប្រមូលផលដើមដៃនេះ អ្នកស្រីអាចលក់ចេញពីចម្ការបានតម្លៃ ១ មុឺនរៀល ក្នុងមួយគីឡូក្រាម ដោយឡែកតម្លៃសម្រាប់បោះដុំ គឺអាចលក់បានចាប់ពី ៧.៥០០ រៀល ដល់ ៩.០០០ រៀល ក្នុងមួយគីឡូក្រាម ទៅតាមលក្ខណៈនៃផ្លែសាវម៉ាវ។ ម្យ៉ាងវិញទៀតការដាំដំណាំប្រភេទនេះនៅលើទឹកដីស្រុកសំឡូត គឺប្រជាកសិករដែលជាអ្នកដាំមិនបានប្រើប្រាស់ថ្នាំឬសារធាតុគីមីដែលអាចប៉ះពាល់ដល់សុខភាពរបស់អ្នកទទួលទានឡើយ គឺដាំតាមលក្ខណៈធម្មជាតិ ដោយឆ្នាំនេះ ទិន្នផលនៃផ្លែសាម៉ាវគឺមានផ្លែច្រើនបង្គួរ ដែលមិនខុសអីពីឆ្នាំមុននោះឡើយ។

អ្នកស្រីក៏បានប្រាំផ្ញើដល់ប្រជាពលរដ្ឋខ្មែរទាំងអស់ មេត្តាកុំនាំយកផ្លែឈើពីក្រៅប្រទេសចូលមកលក់នៅក្នុងប្រទេសកម្ពុជាឲ្យសោះ ព្រោះផ្លែឈើរបស់ខ្មែរ ដាំដុះដោយធម្មជាតិគ្មានការប្រើប្រាស់សារធាតុគីមីនោះឡើយ ដូច្នេះយើងអាចប្រើផលិតផលខ្មែរវាអាចលើកស្ទួយជីវភាពរបស់ពលរដ្ឋផងដែរ ដោយយើងរួមគ្នាធ្វើពហិកាទៅលើផលិតផលសៀមឲ្យបានគ្រប់ៗគ្នា៕

អត្ថបទ៖ សោ និយមរ័ត្ន

The post ផ្លែសាវម៉ាវសំឡូត នារដូវដើមដៃលក់បានតម្លៃខ្ពស់នៅលើទីផ្សារ appeared first on Kampuchea Thmey Daily.

ឆ្នាំនេះសាវម៉ាវសំឡូតមានទីផ្សារល្អ កសិករក៏លក់បានតម្លៃសមរម្យ

Din Thary — Tue, 10 Jun 2025 11:05:00 +0000

រដូវកាលប្រមូលផលមកដល់សាវម៉ាវសំឡូតមានទីផ្សារល្អជាធម្មតាមិនខុសពីឆ្នាំមុនៗ ដែលកសិករអាចលក់បានក្នុងតម្លៃចន្លោះពី ៣ ពាន់រៀល ទៅ ៥ ពាន់រៀលក្នុងមួយគីឡូក្រាម។ នេះបើតាមការឱ្យដឹងពីលោក ឈឹម វជិរា ប្រធានមន្ទីរកសិកម្មខេត្តបាត់ដំបង។

ថ្លែងប្រាប់«កម្ពុជាថ្មី» លោក ឈឹម វជិរា បានមានប្រសាសន៍ថា សាវម៉ាវសំឡូតកសិករមិនសូវជាមានដាំច្រើននោះទេ គឺប្រមាណជាង ៥០ ហិតាប៉ុណ្ណោះ ក្នុងនោះ សាវម៉ាវអាចហុចផលប្រមាណជាង ៥០០ តោនក្នុងមួយឆ្នាំ។ យ៉ាងណាមិញ សម្រាប់ឆ្នាំនេះ ក៏មិនខុសពីឆ្នាំមុនៗ សាវម៉ាវមានទីផ្សារល្អជាធម្មតា មិនចាល់ ឬគ្មានអ្នកទិញនោះទេ ដោយកសិករអាចលក់បានមួយគីឡូតម្លៃចន្លោះពី ៣ ពាន់រៀល ទៅ ៥ ពាន់រៀល។

លោកថា «សាវម៉ាវសំឡូតគឺកសិករដាំតាមបែបធម្មជាតិ មិនមានដាក់ថ្នាំឱ្យឆាប់ទុំដែលនាំឱ្យប៉ះពាល់សុខភាពអ្នកបរិភោគទេ គឺភ្ញៀវក្នុងខេត្ត និងបណ្តាខេត្តនាំគ្នាទៅទិញបេះផ្ទាល់ពីចម្ការ និងខ្លះទៀតកសិករបេះលក់ផ្គត់ផ្គង់ទីផ្សារក្នុងស្រុក មិនមាននាំចេញទៅខាងក្រៅទេ»។

«កសិករមានដាំដុះសាវម៉ាវតិចតួច ហើយបើមានច្រើន គឺពួកគេដាំដុះទុរេនដែលមានផ្ទៃដីជាង ១ ពាន់ហិតាទៅហើយ ដោយឡែកសាវម៉ាវវិញ មានតែកសិករនៅស្រុកសំឡូតទេដែលមានដាំ នៅលើផ្ទៃដីប្រមាណជាង ៥០ហិតាប៉ុណ្ណោះ»។ លោកប្រធានមន្ទីរបន្ថែមបែបនេះ។

ជាមួយគ្នានេះ លោក សយ នី រស់នៅភូមិតាសាញត្បូង ឃុំតាសាញ ស្រុកសំឡូត ខេត្តបាត់ដំបង បានឱ្យដឹងដែរថា តម្លៃសាវម៉ាវនៅលើទីផ្សារល្អប្រសើរ មិនខុសពីឆ្នាំកន្លងទៅឡើយ ប៉ុន្តែឆ្នាំនេះ ទិន្នផលសាវម៉ាវរបស់លោកមានការធ្លាក់ចុះ ដោយសារតែគ្រោះធម្មជាតិ ដូចជាភ្លៀងធ្លាក់ជោកជាំពេក និងខ្យល់កន្ត្រាក់បោកបក់ម្ដងៗ ដែលធ្វើឲ្យផ្លែសាវម៉ាវរបេះធ្លាក់ចេញពីដើម។

លោក ក៏បានឱ្យដឹងដែរថា កាលពីបេះដំបូង លោកអាចលក់បានតម្លៃ ៨ ០០០ រៀល ក្នុងមួយគីឡូក្រាម ហើយជាទូទៅ សាវម៉ាវ នឹងធ្លាក់តម្លៃបន្តិចម្ដងៗ ដោយសារតែវាសម្បូរពេក ដូច្នេះតម្លៃនឹងធ្លាក់មកនៅ ៦ ០០០ រៀល ឬក៏ ៥ ០០០ រៀល ក៏អាចថាបានក្នុងមួយគីឡូក្រាម។

ដោយយោងតាមរបាយការណ៍តារាងស្ថិតិដំណាំឧស្សាហកម្ម និងសាវប្បកម្មប្រចាំឆ្នាំ២០២៤ របស់មន្ទីរកសិកម្មខេត្តបាត់ដំបង បានឱ្យដឹងថា ក្នុងឆ្នាំ២០២៤ ស្រុកសំឡូតមានផ្ទៃដីដាំដុះសាវម៉ាវសរុបប្រមាណ ៥១ ហិតា ក្នុងនោះផ្ទៃដីប្រមូលបានមាន ៤២ ហិតា ដោយអាចហុចផលបានប្រមាណជាង ១២ តោន ក្នុងមួយហិតា និងទទួលបានបរិមាណផលសរុបប្រមាណ ៥១៤ ហិតា៕

The post ឆ្នាំនេះសាវម៉ាវសំឡូតមានទីផ្សារល្អ កសិករក៏លក់បានតម្លៃសមរម្យ appeared first on Kampuchea Thmey Daily.

ឆ្នាំនេះ កសិករនៅខេត្តកំពង់ចាមម្នាក់ ប្រមូលផលសាវម៉ាវជាង១០តោន

Sous Sith — Fri, 06 Jun 2025 10:50:00 +0000

ស្របពេលដែលរដូវនៃដាំណាំផ្លែឈើចំរុះកំពុងតែប្រមូផល និងដាក់លក់លើទីផ្សារ កសិករដាំសាវម៉ាវនៅខេត្តកំពង់ចាមម្នាក់ អាចប្រមូលផលបានជាង១០តោន ខណៈតម្លៃលក់ចេញនៅលើទីផ្សារបានចន្លោះពី ៣៥០០រៀល ទៅ ៤០០០រៀល ក្នុងមួយគីឡូក្រាម។

កញ្ញា ប៉ូ លាងមុយ អាយុ២៥ឆ្នាំ ជាកូនម្ចាស់ចម្ការសាវម៉ាវស្រែវាល ស្ថិតនៅស្រុកស្ទឹងត្រង់ ខេត្តកំពង់ចាម ប្រាប់ កម្ពុជាថ្មី ថា រដូវកាលប្រមូលផលសាវម៉ាវនៅឆ្នាំនេះ ចម្ការរបស់កញ្ញា អាចប្រមូលផលបានជាង១០តោន នៃចំនួនសាវម៉ាវប្រមាណ២០០ដើម។

កញ្ញា បានឱ្យដឹងថា ចំពោះតម្លៃសាវម៉ាវវិញ លក់ចេញទៅឱ្យឈ្មួញបានក្នុងតម្លៃ ៣៥០០រៀល ទៅ ៤០០០រៀល ក្នុងមួយគីឡូក្រាម។

កូនម្ចាស់ចម្ការូបនេះ បញ្ជាក់ថា៖ «សម្រាប់ទីផ្សារវិញ សាវម៉ាវចម្ការកញ្ញា អាចលក់ចេញទៅកាន់បណ្ដាខេត្ត និងក្រុងមួយចំនួន ដូចជា៖ រាជធានីភ្នំពេញ និងខេត្តសៀមរាប ពិសេសគឺខេត្តដែលជាប់ផ្លូវជាតិលេខ៦ ភាគច្រើនតំបន់ទាំងអស់នេះ សម្បូរឈ្មួញកណ្ដាលមកទិញសាវម៉ាវពីចម្ការកញ្ញាទៅលក់បន្ត»។

ទោះជាយ៉ាងណា កញ្ញា ប៉ូ លាងមុយ បានឱ្យដឹងថា សម្រាប់ឆ្នាំនេះដដែល សាវម៉ាវពិបាកក្នុងការរកទីផ្សារបន្ដិច ខណៈសម្បូរទៅដោយផ្លែឈើចម្រុះគ្នាច្រើន ដូចជា៖ ផ្លែទុរេន និងផ្លែព្រីង និងក៏ឃើញមានការនាំចូលផ្លែឈើពីប្រទេសជិតខាងថែមទៀត ទើបនាំឱ្យកញ្ញាជួបការលំបាកក្នុងការលក់បន្ដិចបន្ដួច ផងដែរ។

ក្រៅពីដាំពីចម្ការសាវម៉ាវ កញ្ញា ប៉ូ លាងមុយ បានបានបង្ហើបឱ្យដឹងដែរថា ឪពុកម្ដាយរបស់កញ្ញា ក៏បានឆ្លៀតដាំទុរេន និងផ្លែត្របែក សរុបប្រមាណជិត២០០ដើម ក្នុងផ្ទៃដីសរុបជាង២ហិកតា ដើម្បីទុកគ្រាន់ជារបរមួយបន្ថែមទៀត សម្រាប់ចិញ្ចឹមជីវិត និងការចំណាយទាំងអស់ក្នុងគ្រួសាររបស ផងដែរ៕

អត្ថបទ ៖ សួស សិត

The post ឆ្នាំនេះ កសិករនៅខេត្តកំពង់ចាមម្នាក់ ប្រមូលផលសាវម៉ាវជាង១០តោន appeared first on Kampuchea Thmey Daily.

ឆ្នាំនេះ សាវម៉ាវសំឡូត បានទិន្នផលទាប តែតម្លៃទីផ្សារល្អ

អ៊ិន ពិសី — Thu, 22 May 2025 08:04:09 +0000

តម្លៃសាវម៉ាវនៅលើទីផ្សារល្អប្រសើរ មិនខុសពីឆ្នាំកន្លងទៅឡើយ បើទោះបីជាឆ្នាំនេះជួបគ្រោះធម្មជាតិខ្លះៗ បណ្ដាលឲ្យទិន្នផលសាវម៉ាវមានការធ្លាក់ចុះក៏ដោយ ប៉ុន្តែសម្រាប់ការលក់ចេញគឺមានប៉ុន្មានអស់ប៉ុណ្ណឹង។

នេះបើយោងតាមសម្ដីរបស់ លោក សយ នី រស់នៅភូមិតាសាញត្បូង ឃុំតាសាញ ស្រុកសំឡូត ខេត្តបាត់ដំបង ដែលសព្វថ្ងៃលោកមានដើមសាវម៉ាវនៅក្នុងចម្ការចំនួន ៨០០ ដើម និងទុរេនចំនួន ៧០ ដើម។ ហើយនៅស្រុកសំឡូតក៏មានពលរដ្ឋដាំដំណាំប្រភេទនេះច្រើនកន្លែងណាស់ ដូចជានៅឃុំស៊ុង និងឃុំសំឡូតជាដើម។

លោក សយ នី បានបញ្ជាក់ថា លោកមានដីមិនធំប៉ុន្មានទេ ប៉ុន្តែអាចដាំដំណាំពីរប្រភេទនេះបានច្រើនបង្គួរ ហើយនៅពេលនេះដែរ សាវម៉ាវ ទើបនឹងចាប់ផ្ដើមទុំជាបណ្ដើរៗ ដែលបច្ចុប្បន្នក៏មានម៉ូយមកយកដល់ចម្ការ ហើយក៏មានអ្នកទិញតាមទូរសព្ទច្រើនគួរសម (អនឡាញ)។

លោកបានបន្ថែមថា កាលពីបេះដំបូង លោកអាចលក់បានតម្លៃ ៨ ០០០ រៀល ក្នុងមួយគីឡូក្រាម ហើយជាទូទៅ សាវម៉ាវ នឹងធ្លាក់តម្លៃបន្តិចម្ដងៗ ដោយសារតែវាសម្បូរពេក ដូច្នេះតម្លៃនឹងធ្លាក់មកនៅ ៦ ០០០ រៀល ឬក៏ ៥ ០០០ រៀល ក៏អាចថាបានក្នុងមួយគីឡូក្រាម។

លោកសង្កត់ធ្ងន់ថា ឆ្នាំនេះ ទិន្នផលសាវម៉ាវរបស់លោកមានការធ្លាក់ចុះ ដោយសារតែគ្រោះធម្មជាតិ ដូចជាភ្លៀងធ្លាក់ជោកជាំពេក និងខ្យល់កន្ត្រាក់បោកបក់ម្ដងៗ ដែលធ្វើឲ្យផ្លែសាវម៉ាវរបេះធ្លាក់ចេញពីដើម ដូច្នេះទិន្នផលអាចទាបជាងឆ្នាំកន្លងទៅ ប៉ុន្តែសម្រាប់តម្លៃនៅលើទីផ្សារគឺមិនខុសគ្នាប៉ុន្មានទេ។

លោកថា ផ្លែសាវម៉ាវទុំឲ្យតែលោកបេះឲ្យម៉ូយទាន់គឺមានប៉ុន្មានអស់ប៉ុណ្ណឹង ដោយលោកមិនចាំបាច់ដឹកយកទៅលក់នៅលើទីផ្សារនោះឡើយ។ ដោយឡែកសម្រាប់ឆ្នាំកន្លងទៅមានតែខ្វះឲ្យម៉ូយ ដោយសារបញ្ហាបេះមិនទាន់ ដូច្នេះឆ្នាំនេះក៏ទំនងជាមិនខុសពីឆ្នាំមុនដែរ គ្រាន់តែថាបច្ចុប្បន្នសាវម៉ាវមិនទាន់ទុំស្រុះនៅឡើយ។ លោកបន្ថែមថា បើមានដីទំនេរនៅសល់ លោកនឹងដាំដំណាំប្រភេទនេះបន្ថែមទៀត ព្រោះសាវម៉ាវលក់ស្រួលជាងផ្លែឈើអ្វីៗ ទាំងអស់៕

អត្ថបទ ៖ សោ និយមរ័ត្ន

The post ឆ្នាំនេះ សាវម៉ាវសំឡូត បានទិន្នផលទាប តែតម្លៃទីផ្សារល្អ appeared first on Kampuchea Thmey Daily.

សាវម៉ាវភ្នំវល្លិ៍ឆ្នាំនេះ ផ្លែធំស្មើល្អ តែទិន្នផលអាចធ្លាក់ចុះជាងឆ្នាំមុន

Sokhom Khon — Fri, 09 May 2025 00:12:48 +0000

លោក ឡៅ មួយសេង ជាម្ចាស់ចម្ការសាវម៉ាវនៅតំបន់ភ្នំវល្លិ៍ ស្រុកដំណាក់ចង្អើរ ខេត្តកែប បានបញ្ជាក់ថា ដោយសារឆ្នាំមុនមានរលកកម្តៅខ្ពស់ ធ្វើឲ្យចម្ការសាវម៉ាវនៅតំបន់ភ្នំវល្លិ៍មិនសូវល្អ ទើបនៅឆ្នាំនេះសាវម៉ាវយូរចេញផ្កា ហើយផ្កាតិច ប៉ុន្តែផ្លែធំស្មើល្អ។ បើតាមការប៉ាន់ស្មាន ទិន្នផលសាវម៉ាវឆ្នាំនេះអាចតិចជាងឆ្នាំមុន ខណៈតម្លៃទីផ្សារកំពុងឡើងខ្ពស់។

លោក ឡៅ មួយសេង ជាម្ចាស់ចម្ការសាវម៉ាវនៅតំបន់ភ្នំវល្លិ៍ បានប្រាប់ឱ្យដឹងថា ជាទូទៅសាវម៉ាវត្រូវចាប់ផ្តើមទុំនៅខែមេសា ឬដើមខែឧសភា ប៉ុន្តែដោយសារកត្តាអាកាសធាតុឆ្នាំនេះ សាវម៉ាវភ្នំវល្លិ៍មានការយឺតយ៉ាវក្នុងការចេញផ្កា និងប្រមូលផល ត្រូវរង់ចាំយ៉ាងហោចដល់ចុងខែឧសភា ទើបអាចប្រមូលផលបានជាបណ្តើរៗ។ ម្ចាស់ចម្ការរូបនោះបានធ្វើការប៉ាន់ស្មានថា ទិន្នផលសាវម៉ាវឆ្នាំនេះ អាចតិចជាងឆ្នាំមុន ប៉ុន្តែផ្លែធំស្មើល្អ ខណៈតម្លៃទីផ្សារបច្ចុប្បន្នកំពុងឡើងខ្ពស់។

បើតាមការបញ្ជាក់របស់ម្ចាស់ចម្ការ ដីនៅតំបន់ភ្នំវល្លិ៍អនុគ្រោះ និងអំណោយផលបំផុតដល់ដំណាំហូបផ្លែគ្រប់ប្រភេទ គឺដំណាំដុះបានល្អ មានទិន្នផលខ្ពស់ ពិសេសមានគុណភាព និងរសជាតិល្អផ្តាច់គេ ទាំងម្រេច ទុរេន សាវម៉ាវ ត្របែក ម្ឃុត ចេក ស្វាយជាដើម៕

អត្ថបទ៖ សឹង រ៉ាត់

The post សាវម៉ាវភ្នំវល្លិ៍ឆ្នាំនេះ ផ្លែធំស្មើល្អ តែទិន្នផលអាចធ្លាក់ចុះជាងឆ្នាំមុន appeared first on Kampuchea Thmey Daily.

លើទឹកដីខេត្តបាត់ដំបងមានតែស្រុក ១ ប៉ុណ្ណោះមានដាំដំណាំសាវម៉ៅ

Dy Bunnara — Fri, 14 Jul 2023 03:10:33 +0000

ស្រុកសំឡូតគឺជាស្រុកមួយក្នុងចំណោមបណ្តាស្រុកនានានៃខេត្តបាត់ដំបងល្បីល្បាញលើដំណាំទុរេន គ្មានសារធាតុគីមីដូចផ្លែទុរេននាំចូលពីប្រទេសជិតខាង។ ក្រៅពីផ្លែទុរេនគឺផ្លែសាវម៉ៅ ដែលមានកសិករដាំជាច្រើនក្នុងស្រុកមួយនេះ ដែលមានរសជាតិផ្អែមឆ្ងាញ់មិនចាញ់ទុរេនប៉ុន្មាននោះទេ។

លោក សូនី បូផា ជាកសិករដាំដំណាំសាវម៉ៅ រស់នៅភូមិបឹងរុន ឃុំសំឡូត ស្រុកសំឡូត ក្នុងចំណោមកសិករដែលបានដាំណាំសាវម៉ៅជាច្រើននាក់ទៀតបានផ្តល់បទសម្ភាសជាមួយកម្ពុជាថ្មីថា គ្រួសាររបស់លោកមានជីវភាពល្អប្រសើរតាមរយះផលដំណាំ ២ ប្រភេទគឺទុរេននិងសាវម៉ៅដែលលោកនិងឪពុកក្មេកបានចាប់យកជាមុខរបរអស់រយះពេលយូរឆ្នាំមកហើយលើទំហំដី ៥ ហិកតា។ ក្នុងនោះដើមទុរេនពូជម៉ាន់ថងមានចំនួន ១០២០ ដើមនិងសាវម៉ៅពូជ “រុងរឿង” មានចំនួន ៧៨ ដើមនឹងបន្តថែមទៀតផងដែរ។

បើតាមលោក សូនី បូផា សាវម៉ាវឆ្នាំនេះមិនបានផលដូចឆ្នាំមុនទេ។ មូលហេតុដែលសាវម៉ៅមិនបានផលច្រេីនដោយសារពេលចេញផ្កាក្ដឹប មានខ្យល់និងភ្លៀងធ្លាក់ជាប់ៗគ្នាធ្វើឲ្យរួយជ្រុះនិងស្អុយរលួយផ្កាស្ទើរតែអស់។

ដំណាំសាវម៉ៅមានការប្រឈមខ្លាំងក្នុងការថែទាំជាងទុរេន តែសម្រាប់រស់ជាតិសាវម៉ៅលើទឹកដីស្រុកសំឡូតគឺផ្អែមមុត។ លោកថា ឆ្នាំនេះសាវម៉ៅបានហុចផល ២ ដងហើយលើកទី២នេះ ក៏ជិតបានប្រមូលម្តងទៀតផងដែរ។

លោកអះអាងថា ចម្ការរបស់លោកមានអតិថិជនមកពីខេត្តបន្ទាយមានជ័យ និងខេត្តសៀមរាបមកកម្សាន្តជាបន្តបន្ទាប់និងទិញផ្លែសាវម៉ៅច្រើនជាងតាមបណ្តាខេត្តផ្សេងស្របពេលដែល ១ ខែមុនលោកបានប្រមូលផលផ្លែសាវម៉ៅ។

សម្រាប់ទីផ្សារសាវម៉ៅលោកលក់ចេញបាន ៦ ០០០ រៀល ទៅ ៨ ០០០ រៀលក្នុង ១ គីឡូក្រាម។

ទាក់ទងការដាំដំណាំសាវម៉ាវ លោកសំណូមពរដល់មន្ត្រីជំនាញចុះជួយណែនាំ និងផ្តល់បច្ចេកទេសថ្មីៗដល់កសិករដែលបានធ្វើដំណាំសាវម៉ៅឲ្យកាន់តែទទួលបានផលល្អ។ ជាមួយគ្នានេះដែរ លោកក៏អំពាវនាវទៅដល់អតិថិជនដែលចូលចិត្តគាំទ្រញុំាទុរេននិងសាវម៉ៅសំឡូតសូមជួយបន្តគាំទ្របន្ថែមទៀត។

ប្រភពមួយទៀតដែលជាកសិករដាំដំណាំសាវម៉ៅដូចគ្នាបានបញ្ជាក់ថា ប្រភពដីក្នុងស្រុកសំឡូតបានផ្តល់អំណោយផលខ្លាំងជាងតាមបណ្តាស្រុកមួយចំនួនដែលធ្វើឲ្យដើមសាវម៉ៅ ក៏ដូចជាទុរេនឆាប់លូតលាស់ល្អមិនមានមេរោគ។

ប្រភពដដែលបន្តថា ដំណាំសាវម៉ៅបើក្រៅពីដីសំឡូតកសិករពិតជាប្រឈមការខូចខាត ដែលធ្វើឲ្យប៉ះពាល់សេដ្ឋកិច្ចគ្រួសារធ្ងន់ធ្ងរមិនខាន។

លោក ហេង សិទ្ធ ទទួលបន្ទុកផ្នែកស្ថិតិនៃមន្ទីរកសិកម្មបានឲ្យដឹងដែរថា ក្នុងខេត្តបាត់ដំបងទំហំដីដែលកសិករធ្វើដំណាំសាវម៉ាវសរុបមានតែ ៥១ ហិកតាប៉ុណ្ណោះ ហើយមានតែក្នុងស្រុកសំឡូតមួយប៉ុណ្ណោះ ដែលធ្វើដំណាំសាវម៉ៅនេះ។

លោកលើកមូលហេតុដែលតាមបណ្តាស្រុកផ្សេងមិនប្រកបរបរដាំដំណាំសាវម៉ៅនេះគឺមាន ២ កត្តា។ កត្តា ទី១ ប្រភពដីមិនអំណោយផលសម្រាប់ដំណាំសាវម៉ៅ និងកត្តាទី២ មកពីខ្សែសង្វាក់ផលិតកម្មទាបជាងទុរេន ទើបទុរេនមានផ្ទៃដីដាំច្រើនជាងសាវម៉ៅ ខណះទំហំផ្ទៃដីដាំទុរេនមានចំនួន ៦២៥ ហិកតា ក្នុងខេត្តបាត់ដំបង៕

អត្ថបទ៖ សៅ សារិទ្ធ

The post លើទឹកដីខេត្តបាត់ដំបងមានតែស្រុក ១ ប៉ុណ្ណោះមានដាំដំណាំសាវម៉ៅ appeared first on Kampuchea Thmey Daily.

សាវម៉ាវធម្មជាតិនៅតំបន់ភ្នំវល្លិ៍កំពុងមានទីផ្សារល្អ ដោយសាររសជាតិឆ្ងាញ់

deth leng — Wed, 31 May 2023 07:52:13 +0000

បើតាមម្ចាស់ចម្ការសាវម៉ាវនៅភូមិចម្ការបី តំបន់ភ្នំវល្លិ៍ ខេត្តកែបបានប្រាប់ឲ្យដឹងនៅថ្ងៃទី ៣១ ខែឧសភានេះថា សាវម៉ាវបានចាប់ផ្តើមប្រមូលផលតាំងពីចុងខែមេសាមក ហើយសាវម៉ាវតំបន់នេះ មានរសជាតិឆ្ងាញ់ខុសប្លែកពីសាវម៉ាវតំបន់ដទៃត្រង់ សាច់ស្រួយ ស្ងួត មានអ្នកនិយមទទួលទានកាន់តែច្រើន។ បច្ចុប្បន្នសាវម៉ាវភ្នំវល្លិ៍បានបោះទៅលក់ច្រើននៅរាជធានីភ្នំពេញ និងបណ្តាខេត្តមួយចំនួន។

ម្ចាស់ចម្ការសាវម៉ាវ លោក ឡៅ វេងសេង រស់នៅក្នុងភូមិចម្ការបី ឃុំពងទឹក ស្រុកដំណាក់ចង្អើ ខេត្តកែប បានប្រាប់ឲ្យដឹងថា ដំណាំសាវម៉ាវដែលស្ថិតនៅក្នុងតំបន់ភ្នំវល្ល៍ិនេះលោកបានឱ្យដឹងថា វាមានអាយុជាង៧ឆ្នាំ ហើយឆ្នាំនេះជាឆ្នាំទី៣ដែលបានប្រមូលផលទៅលក់នៅតាមទីផ្សារនានា។

លោកបានបញ្ជាក់ថា ដោយសារភូមិសាស្ត្រ និងអាកាសធាតុនៅតំបន់នេះ បានធ្វើឱ្យដំណាំឈើហូបផ្លែផ្សេងៗ មានរសជាតិឆ្ងាញ់ខុសគេ ហើយសាវម៉ាវតំបន់នេះក៏មានលក្ខណៈពិសេសខុសគេដែរត្រង់ថា សាច់វាស្ងួត ស្រួយ មានរសជាតិជូអែមឆ្ងាញ់។

ម្ចាស់ចំការសាវម៉ាវដដែលនោះបានបន្តថា សាវម៉ាវភ្នំវល្លិ៍មិនពិបាកលក់នោះទេ ឲ្យតែពេលមានផ្លែទុំ គឺមានឈ្មួញមកទិញ និងបេះដល់ចម្ការ និងមួយភាគធំ បោះទៅលក់នៅរាជធានីភ្នំពេញ និងតាមបណ្តាខេត្តធំៗមួយចំនួនទៀត។ បើតាមម្ចាស់ចម្ការសាវម៉ាវបានលើកឡើងថា ជាទូទៅសាវម៉ាវភ្នំវល្លិ៍ប្រមូលផលចាប់ពីចុងខែមេសា រហូតដល់ខែកញ្ញា។

ការដាំ និងការថែទាំតាមបែបធម្មជាតិ មិនប្រើប្រាស់ជីគីមីទេ ហើយក៏មិនប្រើថ្នាំបាញ់ឲ្យចេញផ្កា និងឲ្យកាន់ផ្លែច្រើននោះដែរ ខណៈដែលឈ្មួញដែលមកទិញ និងបេះសាវម៉ាវទៅលក់បន្តថា សាវម៉ាវភ្នំវល្លិ៍កំពុងតែមានទីផ្សារល្អ ជាងសាវម៉ាវបរទេស ហើយលោកស្រីលក់កាន់តែដាច់ និងមានតម្រូវការច្រើនពីមួយថ្ងៃទៅមួយថ្ងៃ៕