កម្មវិធីនេះមានរៀបចំពិធីសូត្រមន្ត ប្រគេនចង្ហាន់ព្រះសង្ឃទៅតាមប្រពៃណីទំនៀមទម្លាប់ខ្មែរ ដើម្បីឧទ្ទិសកុសលជូនដល់បុព្វការីជនដែលបានលាចាកលោកនេះ ទៅកាន់លោកខាងមុខ និងកម្មវិធីអាហារសាមគ្គីប្រកបដោយបរិយាកាសកក់ក្តៅ និងសប្បាយរីករាយបំផុត។ ឆ្លៀតក្នុងឱកាសនេះ នៅទីតាំងទាំង ៤ ក៏មានរៀបចំកម្មវិធីឧទ្ទិសកុសលជូនដល់ វីរកងទ័ពខ្មែរដែលបានពលីជីវិតក្នុងបុព្វហេតុការពារជាតិ បូរណភាពទឹកដីខ្មែរ ក្នុងអំឡុងការប៉ះទង្គិចរវាងកម្ពុជានិងថៃផងដែរ។

ក្រៅពីទីតាំងទាំង ៤ខាងលើ ក្រសួងការងារ និងបណ្តុះបណ្តាលវិជ្ជាជីវៈ ក្រុមការងារ ESEA ស្ថានទូតកម្ពុជាប្រចាំប្រទេសជប៉ុន និងបងប្អូនសហគមន៍ខ្មែររស់នៅប្រទេសជប៉ុន គ្រោងរៀបចំកម្មវិធីកាន់បិណ្ឌ និងបុណ្យភ្ជុំបិណ្ឌ ចំនួន ៣ទីតាំងបន្ថែមទៀត។

សូមបញ្ជាក់ថា រាជរដ្ឋាភិបាលតែងតែយកចិត្តទុកដាក់ដល់បងប្អូនប្រជាពលរដ្ឋ ដែលរស់នៅក្រៅប្រទេស ដោយតែងតែរៀបចំឱ្យមានកម្មវិធីជួបជុំ និងកម្មវិធីប្រពៃណីផ្សេងៗសម្រាប់បងប្អូន ដែលរស់នៅក្រៅប្រទេស អាចចូលរួមសប្បាយរីករាយដូចនៅក្នុងប្រទេសដែរ។ ការចូលរួមដ៏ច្រើនកុះកររបស់ប្រជាពលរដ្ឋខ្មែរ បានបញ្ជាក់ឱ្យឃើញយ៉ាងច្បាស់ថា ជនជាតិខ្មែរទៅដល់ទីណាក៏នៅតែជាខ្មែរ ទោះជាយ៉ាងណាក្ដី ក៏ខ្មែរមិនភ្លេចប្រពៃណី វប្បធម៌ដើមកំណើតរបស់ខ្លួនឡើយ៕

The post សហគមន៍ខ្មែរនៅប្រទេសជប៉ុនប្រមាណ ១ពាន់នាក់ រៀបចំពិធីកាន់បិណ្ឌឧទ្ទិសកុសលជូនវីរកងទ័ពខ្មែរ appeared first on Kampuchea Thmey Daily.

ពិធី​កាន់​បិណ្ឌ​របស់​សហគមន៍​ខ្មែរ​នៅ​សាធារណរដ្ឋ​កូរ៉េ រួមមាន កម្មវិធី​សាសនា ការ​សម្ដែង​សិល្បៈ ការ​លក់ដូរ​ម្ហូប​ខ្មែរ និង​ការ​សំណេះសំណាល​ជាមួយ​ក្រុមការងារ​យ៉ាង​ជិតស្និទ្ធ​បំផុត។

សហគមន៍​ខ្មែរ​នៅ​សាធារណរដ្ឋ​កូរ៉េ ដែល​ចូលរួម​ពិធី​កាន់បិណ្ឌ បាន​លើកទឹកចិត្ត​ដល់​ប្រជាពលរដ្ឋ​ខ្មែរ​ផ្សេងៗ ទៀត ចូលរួម​ឲ្យ​បាន​ច្រើន​កុះករ ក្នុង​ពិធី​កាន់បិណ្ឌ និង​ភ្ជុំបិណ្ឌ ដើម្បី​ចូលរួម​ចំណែក​ក្នុង​ការ​ថែរក្សា ផ្សព្វផ្សាយ និង​លើក​កម្ពស់​វប្បធម៌​ខ្មែរ​នៅ​លើ​ឆាក​អន្តរជាតិ ជាពិសេស ដើម្បី​ឧទ្ទិស​កុសល​ដល់​វិញ្ញាណក្ខន្ធ​របស់​វីរ​កងទ័ព ដែល​បាន​ពលី​ជីវិត​ក្នុង​ជម្លោះ​ព្រំដែន​កម្ពុជា​-​ថៃ នា​ពេល​កន្លង​មក៕

The post សហគមន៍ខ្មែរនៅសាធារណរដ្ឋកូរ៉េ ប្រមាណ ២ ៥០០ នាក់ រៀបចំពិធីកាន់បិណ្ឌ ដើម្បីឧទ្ទិសកុសលដល់វិញ្ញាណក្ខន្ធរបស់វីរកងទ័ព appeared first on Kampuchea Thmey Daily.

សម្តេច​កិត្តិ​សង្គហ​បណ្ឌិត ម៉ែន សំអន ឧទ្ទិស​បួងសួង​បែបនេះ​ក្នុង​ពេល​អញ្ជើញ​ចូលរួម​កាន់បិណ្ឌ​វេន​ទី ១ នៅ​វត្ត​មុនី​សុវណ្ណ ហៅ​វត្ត​ចំពុះក្អែក នា​ព្រឹក​ថ្ងៃ​ចន្ទ ១១​រោច ខែភទ្របទ ឆ្នាំម្សាញ់ សប្តស័ក ព​.​ស​.២៥៦៩ ត្រូវ​នឹង​ថ្ងៃទី​៨ ខែកញ្ញា ឆ្នាំ​២០២៥។

ពិធីបុណ្យ​នេះ សម្តេច​កិត្តិ​សង្គហ​បណ្ឌិត បាន​អញ្ជើញ​ចូលរួម​ក្នុង​វេន​កាន់បិណ្ឌ​ទី​១ ដែលជា​វេន​កាន់​បិណ្ឌ​របស់ ឧកញ៉ា តាំង គឹមថុង ព្រមទាំង​ក្រុម​គ្រួសារ រួម​ជាមួយ​ពុទ្ធបរិស័ទ បាន​អញ្ជើញ​បដិបត្តិ​ព្រះធម៌ សូត្រមន្ដ នមស្សការ ​ចម្រើន​ព្រះ​បរិត្ត រាប់បាត្រ ប្រគេន​ព្រះសង្ឃ បង្សុកូល ឧទ្ទិស​កុសល​ផល​បុណ្យ​ជូន​ដល់​វិញ្ញាណក្ខន្ធ​បុព្វការី​ជន មាន​មាតាបិតា ជីដូន​ជីតា ញាតិកា​ទាំង​៧​សន្ដាន និង​ជូន ចំពោះ​វិញ្ញាណក្ខន្ធ​បុព្វបុរស​អ្នកស្នេហាជាតិ ដែល​បាន​ពលី អាយុជីវិត ដើម្បី​ភាព​គង់វង្ស​នៃ​បូរណភាព​ទឹកដី ជាតិ​មាតុភូមិ​ ឱ្យទទួលបាន​សុខសន្ដិភាព ភាព​រីកចម្រើន​សម្បូរ​រុងរឿង។

ពិធីបុណ្យ​កាន់បិណ្ឌ គឺជា​ពិធីបុណ្យ​សាសនា​ដ៏​ធំ​មួយ​ក្នុងចំណោម​ពិធីបុណ្យ​ផ្សេងៗ​ទៀត ដែល​ប្រជាពលរដ្ឋ​ខ្មែរ តែង​គោរព ប្រណិប័តន៍​ ដើម្បី​រំលឹក និង​ឧទ្ទិស​កុសល​ដល់​សាច់ញាតិ មាតាបិតា បុព្វការី​ជន​ដែល​បាន​លាចាក​ទៅ​លោក​ខាងមុខ។ ប្រជាពលរដ្ឋ​ភាគច្រើន បាន​យក​ម្ហូបអាហារ និង​ផ្លែឈើ នំចំណី ទៅ​ប្រគេន​ដល់​ព្រះសង្ឃ​នៅ​តាម​វត្ត​អារាម​ចាប់ពី​ថ្ងៃ​១​រោច ដល់​ថ្ងៃ​១៥ ខែភទ្របទ ដែល​ជា​ថ្ងៃ​ឆ្លង​បញ្ចប់ ឬ​គេ​ហៅថា ថ្ងៃបុណ្យ​ភ្ជុំបិណ្ឌ៕

អត្ថបទ ៖ វិមាន

The post កាន់បិណ្ឌទី ១ សម្តេច ម៉ែន សំអន ឧទ្ទិសកុសលផលបុណ្យដល់វិញ្ញាណក្ខន្ធវីរកងទ័ព និងអ្នកស្នេហាជាតិដែលបានពលីអាយុជីវិត ដើម្បីបូរណភាពទឹកដី appeared first on Kampuchea Thmey Daily.

នៅព្រឹកថ្ងៃទី៨ ខែកញ្ញា ឆ្នាំ២០២៥ ត្រូវនឹងថ្ងៃ១រោច ខែភទ្របទ ឆ្នាំម្សាញ់ សប្ដស័ក ព ស ២៥៦៩ ដែលជាថ្ងៃទី១ នៃពិធីកាន់បិណ្ឌ ប្រជាពលរដ្ឋជាតិខ្មែរទូទាំងប្រទេសបានចូលរួមគោរពពិធីកាន់បិណ្ឌទី១ ដើម្បីប្រារព្ធប្រពៃណីបុណ្យសាសនាប្រចាំឆ្នាំ។

លោក សែម សុខា ប្រជាពលរដ្ឋដែលបានយកចង្ហាន់មកប្រគេនដល់ព្រះសង្ឃនៅវត្តទឹកថ្លា សង្កាត់ទឹកថ្លា ខណ្ឌសែនសុខបានប្រាប់ថា លោកបានចូលរួមពិធីនេះជារៀងរាល់ឆ្នាំ ព្រោះវាជាបុណ្យប្រពៃណីដ៏មានសារៈសំខាន់ ដែលបង្ហាញពីការដឹងគុណចំពោះមាតាបិតា សាច់ញាតិ និងបុព្វការីជនដែលបានលាចាកទៅលោកខាងមុខ ហើយនេះក៏ជាឱកាសឲ្យក្រុមគ្រួសាររួមគ្នា និងចែករំលែកសេចក្ដីសុខ ផល្លានិសង្ឃរៀងៗខ្លួន។

កញ្ញា លី សុភា ជានិស្សិតម្នាក់ក៏បានលើកឡើងដែរថា “ពិធីបុណ្យកាន់បិណ្ឌ ជាឱកាសឲ្យយុវវ័យរំលឹកធ្វើបុណ្យដល់ជីដូនជីតា សាច់ញាតិដែលបានចែកឋាន និងថែរក្សាវប្បធម៌ខ្មែរ ហើយពិធីកាន់បិណ្ឌទី១ ថ្ងៃនេះ ក៏សំខាន់នៃការចាប់ផ្ដើមដំណើរបុណ្យប្រពៃណី ភ្ជុំបិណ្ឌផងដែរ។ កញ្ញាបានបន្តថា ក្នុងរយៈពេល១៥ថ្ងៃ ប្រជាពលរដ្ឋនឹងបន្តដំណើរទៅវត្តអារាម ដើម្បីធ្វើបុណ្យកាន់បិណ្ឌរៀងរាល់ថ្ងៃ រហូតដល់ថ្ងៃបិណ្ឌទី១៥ ដែលជាថ្ងៃភ្ជុំបិណ្ឌធំ។

ពិធីបុណ្យភ្ជុំបិណ្ឌ ជា​ពិធីបុណ្យប្រពៃណី​ព្រះពុទ្ធសាសនា​ដ៏​សំខាន់​របស់​ពុទ្ធសាសនិក​ជន ខ្មែរ​គ្រប់ៗ​រូប​ ដែល​តែងតែ​ប្រារព្ធ​ធ្វើជា​រៀងរាល់ឆ្នាំ​។ ពិធីបុណ្យ​នេះ ប្រារព្ធ​ឡើង​ដើម្បី​កាន់បិណ្ឌ ជាពិធីដែលគេចាប់ធ្វើឡើងតាំងពីថ្ងៃ១រោច ដល់ថ្ងៃ១៥រោច ខែភទ្របទ ដើម្បីឧទ្ទិសកុសលដល់បុព្វការីជនដែលធ្វើមរណកាលទៅលោកខាងមុខ។ ក្រៅពីនេះ នៅក្នុងចន្លោះរយៈពេល១៥ថ្ងៃ នៃការដាក់បិណ្ឌ និងកាន់បិណ្ឌ រាល់ព្រឹកព្រលឹម ពុទ្ធបរិសុទ្ធតែងតែបាននាំយកនូវ ចង្ហាន់ ដែលមានទាំងម្ហូបអាហារ នំចំណី ភេសជ្ជៈ បង្អែម និងបច្ច័យយកទៅប្រគេនព្រះសង្ឃនៅតាមវត្តអារាម ដើម្បីឧទ្ទិស កុសលផលបុណ្យ ជូនដល់ញាតិកាលទាំង៧សន្តាន ដោយប្រជាជនខ្មែរតែងជឿថាមគ្គផលដែលបានធ្វើ នឹងឧទ្ទិសទៅដល់អ្នកដែលបានចែកឋាន ដើម្បីបានកើតនៅក្នុងទីឋានណាមួយដែលល្អ៕

អត្ថបទ៖ សំណាង

The post ថ្ងៃទី១នៃពិធីកាន់បិណ្ឌ ប្រជាពលរដ្ឋជាច្រើននាំគ្នាយកចង្ហាន់ប្រគេនព្រះសង្ឃតាមវត្តអារាមដោយស្នាមញញឹម appeared first on Kampuchea Thmey Daily.

ក្នុងឱកាសដ៏សោមនស្សរីករាយ នៃពិធីបុណ្យប្រពៃណីជាតិ ដែលប្រជាពុទ្ធបរិស័ទខ្មែរគ្រប់ស្រទាប់វណ្ណះ ទូទាំងព្រះរាជាណាចក្រកម្ពុជា មានសេចក្តីអំណរសាទរយ៉ាងក្លៀវក្លា និងរួមសាមគ្គីគ្នាធ្វើបុណ្យធ្វើទាន ដោយសេចក្តីជ្រះថ្លា នៅក្នុងរដូវកាលបុណ្យកាន់បិណ្ឌ-ភ្ជុំបិណ្ឌ នៅតាមទីអារាមនានាដែលជាទីសក្ការៈ។ ជាក់ស្តែងក្នុងឱកាសបិណ្ឌទី៤នេះ លោកជំទាវបណ្ឌិត និងក្រុមគ្រួសារ បានអញ្ជើញបូជា,ទៀន,ធូប, គន្ធពិដោ ថ្វាយចំពោះព្រះពុទ្ធបដិមា នៅលើឧបដ្ឋានសាលា និងបា្ររព្ធពិធីសូត្រមន្ត សមាទានសីល តាមសិក្ខាបទ ដើម្បីរំលឹកនឹកដល់គុណបុណ្យព្រះរតនត្រ័យ និងព្រះសម្មាសម្ពុទ្ធ ព្រះបរមគ្រូនៃយើង។

បន្ទាប់អំពីបទនមស្សការសមាទានសីលចប់សព្វគ្រប់ លោកជំទាវបណ្ឌិត និងក្រុមគ្រួសារ បានឧទ្ទិសកុសលផលបុណ្យ ជូនវិញ្ញាណក្ខ័នបុព្វការីជន លោកយាយ លោកតា ដែលបានចែកឋានទៅកាន់បរលោកខាងមុខ ក្នុងនោះមានវិញ្ញាណក្ខន្ឋសាច់ញ្ញាតិ លោកឪពុក អ្នកម្តាយទាំងសង្ខាង រួមទាំងញ្ញាតិកាទាំង៧សណ្តាន ដែលបានចែកឋានទៅកាន់វរៈលោកខាងមុខហើយនោះ សូមវិញ្ញាណក្ខ័នអ្នកមានគុណទាំងអស់ បានសោយសុខក្នុងឋានដ៍ខ្ពង់ខ្ពស់ និងសុគតិភពកុំបីឃ្លាងឃ្លាតឡើយ។

មួយផ្នែកនៃកុសលផលបុណ្យ ដែលកើតមានក្នុងថ្ងៃនេះលោកជំទាវបណ្ឌិត និងក្រុមគ្រួសារសូមឧទ្ទិសជូន វិញ្ញាណក្ខ័នវីរជនអ្នកស្នេហាជាតិ ដែលបានពលីជីវិតក្នុងបុព្វហេតុជាតិមាតុភូមិ ព្រមទាំងវិញ្ញាណក្ខ័នជនរួមជាតិខ្មែរស្លូតត្រង់ ជាង៣លាននាក់ ដែលបានបាត់បង់អាយុជីវិតយ៉ាងអយុត្តិធម៌ ក្នុងរបបប្រល័យពូជសាសន៍ប៉ុលពត សូមអោយវិញ្ញាណក្ខ័នអ្នកទាំងអស់នោះបានសោយសុខក្នុងឋានសុគតិភពគ្រប់ៗគ្នា។

សូមបញ្ជាក់ថាក្នុងឱកាសបុណ្យកាន់បិណ្ឌវេនទី៤ នៅក្នុងវត្តបទុមវតីនេះដែរ សម្តេចធិបតី ហ៊ុន ម៉ាណែត និងលោកជំទាវបណ្ឌិត រួមទាំងក្រុមគ្រួសារបាននាំយកទេយ្យទានប្រគេនព្រះសង្ឃរួមមាន៖ អង្ករចំនួន១តោន មីចំនួន១០០ កេស ទឹកបរិសុទ្ឋ១០០កេស ភេជ្ជសៈឆាមពាន ១០០កេស និងទឹកក្រូច១០០កេស និងថវិកាមួយចំនួន។

ម្យ៉ាងវិញទៀតតាមរយៈអំណាច នៃផល្លានិសង្ឃកើតចេញពីទឹកចិត្តជ្រះថ្លា ក្នុងថ្ងៃកាន់បិណ្ឌវេន៤នេះដែរ សម្តេចព្រះពុទ្ធជ័យមុន្នី ឃឹម សន ព្រះគ្រូសូត្រសស្តាំ និងថេរានុថេរគ្រប់ព្រះអង្គទាំង៤៣២អង្គ ដែលគង់ក្នុងវត្តបទុមវតីរាជវរារាម បានឧទ្ទិសថ្វាយដល់វត្ថុសក្តិសិទ្ធក្នុងលោក និងទេវតាថែរក្សាទឹកដី នៃព្រះរាជាណាចក្រកម្ពុជា សូមតាមជួយបីបាច់ថែរក្សាការពារ និងទ្រទ្រង់វិញ្ញាណក្ខ័ន្ឋលោកអ្នកមានគុណទាំងអស់ របស់សម្តេចតេជោ និងសម្តេចកិត្តិព្រឹទ្ធបណ្ឌិត និងឯកឧត្តមបណ្ឌិត ពេជ សោភ័ណ និងលោកជំទាវ ម៉ុក ប៉ូប៉ុនរិទ្ធ សូមបានចាប់យកកំណើតថ្មី ក្នុងទីឋានដ៍ខ្ពង់ខ្ពស់ជានិច្ចនិរន្តតរៀងទៅ៕

អត្ថបទ៖ សំ ងីម

The post លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងក្រុមគ្រួសារ អញ្ជើញកាន់បិណ្ឌវេន៤ នៅវត្តបទុមវតី appeared first on Kampuchea Thmey Daily.

នៅព្រឹកថ្ងៃទី១៩ ខែកញ្ញា ឆ្នាំ២០២៤នេះ ប្រជាពុទ្ធបរិស័ទជាច្រើនមកពីទីជិតទីឆ្ងាយ បាននាំគ្នាទៅធ្វើបុណ្យដាក់ទានយ៉ាងកុះករ នៅវត្ត និរោធរង្ស៊ី ជាវត្តមួយស្ថិតក្នុងចំណោមវត្តជាង២០ ក្នុងមូលដ្ឋានខណ្ឌច្បារអំពៅ រាជធានីភ្នំពេញ។

ប្រជាពុទ្ធបរិស័ទ សម្តែងក្តីជ្រះថ្លានឹងការធ្វើបុណ្យដាក់ទាន ក្នុងរដូវកាលកាន់បិណ្ឌទី២នេះ ដោយពួកគាត់បានមកធ្វើបុណ្យរួមគ្នាជាមួយសាច់ញាតិ និងលក្ខណៈក្រុមគ្រួសារ ដើម្បីជាការឧទ្ទិសកុសលផលបុណ្យដល់ញាតិការ៧សណ្តានដែលបានចែកឋាន ទៅបរលោកនៅជាតិខាងមុខ។

លោកវរសេនីយ៍ទោ ឡូ ភារម្យ អធិការរងនគរបាលខណ្ឌច្បារអំពៅ បានឱ្យដឹងថា ចំពោះកិច្ចការងារការពារសន្តិសុខសុវត្ថិភាព គឺជាកាតព្វកិច្ចរបស់កងកម្លាំងគណបញ្ជាការឯកភាព ដើម្បីការពារធានាមិនឱ្យអំពើអសន្តិសុខណាមួយអាចកើតមានឡើងនៅក្នុងមូលដ្ឋាន ពិសេសតាមទីវត្តអារាម ដែលមានពុទ្ធបរិស័ទជាច្រើនបាននាំគ្នាមកធ្វើបុណ្យ។

សូមបញ្ជាក់ថា ពិធីបុណ្យកាន់បិណ្ឌ ភ្ជុំបិណ្ឌ មានរយៈពេល១៥ថ្ងៃ ដោយគិតចាប់ពីថ្ងៃ ១រោច ដល់ថ្ងៃ១៤រោច ខែភទ្របទ និងបញ្ចប់នៅថ្ងៃ១៥រោច ជាថ្ងៃភ្ជុំធំ៕

អត្ថបទ៖ សុភា

The post បិណ្ឌ២ ពុទ្ធបរិស័ទបន្តនាំយកទេយ្យទាន និងចង្ហាន់ទៅប្រគេនព្រះសង្ឃតាមវត្តអារាមប្រកបដោយសទ្ធាជ្រះថ្លា appeared first on Kampuchea Thmey Daily.

អ្នកស្រី សុខ ឃឿន អ្នកលក់​បន្លែ​គ្រប់មុខ បាន​ប្រាប់​កម្ពុជា​ថ្មី​ថា សម្រាប់​ពេល​ឱកាស​បុណ្យ​កាន់​បិណ្ឌ និង​ភ្ជុំបិណ្ឌ​ប្រពៃណី​ខ្មែរ​នេះ ការ​លក់ដូរ​មាន​លក្ខណៈ​ល្អ​ប្រសើរ​បន្តិច នេះ​ក៏​ដោយសារតែ​សម្បូរ​មនុស្ស​ដើរ​ផ្សារ និង​មាន​អ្នកទិញ បន្លែ ត្រី សាច់ ដើម្បី​យក​ទៅ​ធ្វើ​ចង្ហាន់​ប្រគេន​ព្រះសង្ឃ​នៅ​តាម​បណ្ដា​វត្ត​អារាម​នានា ក្នុង​រាជធានី​ភ្នំពេញ និង​តាម​បណ្ដា​វត្ត​អារាម​ផ្សេងៗ តាម​ជាយ​ក្រុង​ជា​ដើម…។

អ្នកស្រី សុខ ឃឿន បន្ថែម​ថា កាលដើមឡើយ ថ្ងៃ​ធម្មតា អ្នកស្រី ត្រូវ​សល់​បន្លែ​ជាច្រើន​ដែល​លក់​មិន​អស់ នាំ​ឲ្យ អ្នកស្រី ខាតដើម មិន​សូវ​ចំណេញ​ច្រើន​ដូច​កាលពី​កន្លងមក។ ជាក់ស្ដែង​ប៉ុន្មាន​ថ្ងៃនេះ អ្នកស្រី សង្កេត​ឃើញ​ថា ការ​លក់ដូរ​របស់​អាជីវករ​ទាំងអស់​នៅ​ក្នុង​ផ្សារ​ទួល​សង្កែ​តូច មាន​លក្ខណៈ​ប្រសើរ ខណៈ​អ្នកស្រី​ផ្ទាល់ អាច​លក់​បន្លែ​គ្រប់មុខ​រួមមាន ៖ ត្រសក់ ស្ពៃក្ដោប ចេកទុំ និង​សណ្ដែក​គួរ ជាដើម បាន​ជាង ១០០ គីឡូក្រាម ហើយ​អាច​ចំណេញ​ប្រាក់​ជាង ១៥ ម៉ឺន​រៀល ក្នុង​មួយថ្ងៃ ទៀត​ផង។

អ្នកស្រី បន្ត​ទៀត​ថា ប្រសិន​បើ​ការ​លក់ដូរ​បាន​ដូច​ថ្ងៃ​បុណ្យទាន​បែបនេះ អ្នកស្រី សង្ឃឹមថា អាជីវករ​ទាំងអស់ នឹង​សប្បាយចិត្ត ព្រោះ​អាច​ប្រកប​របរ​លក់ដូរ​ចិញ្ចឹម​គ្រួសារ​បាន​ល្អ​ប្រសើរ មិន​ពិបាក​ដូច​ពេល​បោះឆ្នោត​ហើយ​នោះ។

ចំណែក លោក ម៉ៅ ម៉ាប់ អាជីវករ​លក់​សាច់​ជ្រូក​ខ្មែរ នៅ​ផ្សារ​ទួល​សង្កែ​តូច ក៏បាន​ប្រាប់​កម្ពុជា​ថ្មី​ដែរ​ថា នា​ឱកាស​ពេល​បុណ្យកាន់បិណ្ឌ និង​ភ្ជុំបិណ្ឌ​ប្រពៃណី​ខ្មែរ​នេះ ការ​លក់​សាច់​ជ្រូក​របស់​លោក គឺ​ដាច់​បាន​ច្រើន​គួរសម។ លោក​បង្ហាញ​ថា ១ ថ្ងៃ អាច​លក់​បាន​សាច់​ជ្រូក ១ ក្បាល ទៅ ២ ក្បាល ដោយ​ក្នុង ១ ក្បាល មាន​ទម្ងន់​ជាង ៥៦ គីឡូក្រាម។

លោក ម៉ៅ ម៉ាប់ បន្ថែម​ថា កាលពីមុន សាច់​ជ្រូក​របស់​លោក អាច​លក់​បាន​ត្រឹមតែ ១ ក្បាល ប៉ុណ្ណោះ។ ត្បិត សាច់​ជ្រូក ១ ក្បាល អាច​ចំណេញ​បាន​ត្រឹមតែ ១៥ ម៉ឺន​រៀល ទៅ ២០ ម៉ឺន​រៀល ប្រសិន​បើ​លក់​អស់​ជ្រូក ១ ក្បាល ទើប​អាច​ចំណេញ​បាន​ប្រាក់​ជាង ២០ ម៉ឺន​រៀល។

អាជីវករ​លក់​សាច់​ជ្រូក​ខ្មែរ រូប​នេះ បាន​ស្នើ​ដល់​រដ្ឋាភិបាល​អាណត្តិ​ថ្មី ដែល​មាន​ក្រសួងកសិកម្ម រុក្ខា​ប្រមាញ់ និង នេសាទ សូម​ជួយ​គិតគូរ​ដល់​កសិករ​ចិញ្ចឹម​ជ្រូក​ក្នុង​ស្រុក និង​អ្នក​លក់ដូរ​ទាំងអស់ ធ្វើ​យ៉ាង​ណា​ជួយ​សម្រួល​ឲ្យ​ពួកគាត់​បាន​ប្រកប​របរ​ទាំងអស់​នេះ​បាន​លក្ខណៈ​មួយ​ល្អ​ប្រសើរ​ជាង​ឆ្នាំ​មុនៗ ផង​ចុះ។

ជាមួយ​គ្នា​នេះ លោក សៅ តារា អ្នកលក់ និង​បោះ​ដុំ​ប្រហិត នៅ​ផ្សារ​ទួល​សង្កែ ក៏​យល់​ឃើញ​ដូច​អាជីវករ​ផ្សេងៗ​ទៀត​ដែរ​ថា ការ​លក់ដូរ​ក្នុង​ផ្សារ​នា​ពេល​ថ្ងៃបុណ្យ​កាន់បិណ្ឌ និង​ភ្ជុំបិណ្ឌ​ប្រពៃណី​ខ្មែរ​នេះ មាន​លក្ខណៈ​មួយ​ដែល​ជា​រឿង​ល្អ សម្រាប់​អាជីវករ​គ្រប់គ្នា។

លោក សៅ តារា បញ្ជាក់​ថា មុខរបរ​លក់ និង​បោះ​ដុំ​ប្រហិត​របស់​លោក​មាន​អតិថិជន​មក​ទទួល​ទិញ​ទៅ​លក់​បន្ត​ទៀត បាន​ជាង​ចន្លោះ​ពី ៥០ គីឡូក្រាម ទៅ ៨០ គីឡូក្រាម ក្នុង ១ ថ្ងៃ។ លោក​បន្ថែម​ថា ជា​រៀងរាល់​ឆ្នាំ ថ្ងៃ​បុណ្យទាន ឬ បុណ្យ​ប្រពៃណី​ផ្សេងៗ ការ​លក់ដូរ​របស់​អាជីវករ​ទាំងអស់ តែងតែ​លក់​បាន​ក្នុង​កម្រិត​មួយ​ដែល​ចាត់ទុកថា​ជា​លក្ខណៈ​ប្រសើរ​សម្រាប់​អាជីវករ​ទូទៅ៕

អត្ថបទ ៖ សួស សិត

The post អាជីវករផ្សារទួលសង្កែតូច អះអាងថា កំឡុងបុណ្យកាន់បិណ្ឌនេះ ការលក់ដូរដាច់ប្រសើរជាងមុនបន្តិច appeared first on Kampuchea Thmey Daily.