ពិធីបុណ្យអុំទូក Archives - Kampuchea Thmey Daily

ខេត្តបាត់ដំបង ទទួលបានភ្ញៀវទេសចរជាង ១២ ម៉ឺននាក់ នាឱកាសពិធីបុណ្យអុំទូក

អ៊ិន ពិសី — Fri, 07 Nov 2025 07:55:45 +0000

នាឱកាស នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក ក្នុងខេត្តបាត់ដំបង រយៈពេល ៣ ថ្ងៃ ត្រូវនឹងថ្ងៃទី ៤ ដល់ទី ៦ ខែវិច្ឆិកា ឆ្នាំ ២០២៥ ខេត្តបាត់ដំបង ទទួលបានភ្ញៀវទេសចរជាតិ និងអន្តរជាតិ ចូលមកកម្សាន្តតាមតំបន់រមណីយដ្ឋាននានា មានរហូតដល់ជាង ១២ ម៉ឺននាក់។

យោងតាមរបាយការណ៍របស់មន្ទីរទេសចរណ៍ខេត្តបញ្ជាក់ដោយ លោក អ៊ុច អ៊ុភីនីហ្សារ៉ា ប្រធានមន្ទីរទេសចរណ៍ខេត្តបាត់ដំបង បានឲ្យដឹងថា នៅក្នុងរយៈពេល ៣ ថ្ងៃ នៃពិធីបុណ្យអុំទូកនេះ ខេត្តបាត់ដំបងដែលមានរមណីយដ្ឋានជាច្រើនបានទទួលភ្ញៀវសរុប ១២៣,៩៥៥ នាក់ កើនឡើង ១២.១៩% បើប្រៀបធៀបរយៈពេលដូចគ្នាឆ្នាំ ២០២៤ មានចំនួន ១១០,៤៨៩ នាក់។ នៅក្នុងចំនួននេះដែរ គឺ ភ្ញៀវជាតិ មានចំនួន ១២៣,០៨០ នាក់ កើនឡើង ១២.២២ % បើប្រៀបធៀបរយៈពេលដូចគ្នាឆ្នាំ ២០២៤ មានចំនួន ១០៩,៦៧៧ នាក់។ ដោយឡែកសម្រាប់ភ្ញៀវអន្តរជាតិ មានចំនួន ៨៧៥ នាក់ កើនឡើង ៧.៧៦ % បើប្រៀបធៀបរយៈពេលដូចគ្នាឆ្នាំ ២០២៤ មានចំនួន ៨១២ នាក់។

លោកប្រធានមន្ទីរ បានធ្វើស្ថិតិលម្អិតប្រចាំថ្ងៃ គឺ ៖ ក) ថ្ងៃទី ១ ត្រូវនឹងថ្ងៃទី ៤ ខែវិច្ឆិកា ឆ្នាំ ២០២៥ មានភ្ញៀវទេសចរសរុបចំនួន ៣៣,៨៨៧ នាក់ ក្នុងនោះ ភ្ញៀវជាតិ ៣៣,៦៣៥ នាក់ និងភ្ញៀវអន្តរជាតិ ២៥២ នាក់។ ខ) ថ្ងៃទី ២ ត្រូវនឹងថ្ងៃទី ៥ ខែវិច្ឆិកា ឆ្នាំ ២០២៥ មានភ្ញៀវទេសចរសរុបចំនួន ៤៩,៧៦៩ នាក់ ក្នុងនោះ ភ្ញៀវជាតិ ៤៩,៤៥៤ នាក់ និងភ្ញៀវអន្តរជាតិ ៣១៥ នាក់។ គ) ថ្ងៃទី ៣ ត្រូវនឹងថ្ងៃទី ៦ ខែវិច្ឆិកា ឆ្នាំ ២០២៥ មានភ្ញៀវទេសចរសរុបចំនួន ៤០,២៩៩ នាក់ ក្នុងនោះ ភ្ញៀវជាតិ ៣៩,៩៩១ នាក់ និងភ្ញៀវអន្តរជាតិ ៣០៨ នាក់។

លោកបានអះអាងថា កត្តាដែលធ្វើឲ្យភ្ញៀវទេសចរជាតិ និងអន្តរជាតិ ចូលមកកម្សាន្តក្នុងខេត្តបាត់ដំបងពីមួយថ្ងៃទៅមួយថ្ងៃកាន់តែច្រើនឡើងៗ នោះ ដោយសារតែខេត្តមួយនេះសំបូររមណីយដ្ឋានប្លែកៗ ធ្វើឲ្យទាក់ទាញក្រសែភ្នែកភ្ញៀវ។ បន្ថែមនោះ ដោយសារតែការយកចិត្តទុកដាក់ពីរដ្ឋបាលខេត្ត សហការជាមួយមន្ទីរទេសចរណ៍ខេត្ត បានធ្វើការពង្រីកវិសាលភាព នៃតំបន់ទេសចរណ៍កាន់តែវិវត្តន៍ទៅមុខថែមទៀត៕

អត្ថបទ ៖ សោ និយមរ័ត្ន

The post ខេត្តបាត់ដំបង ទទួលបានភ្ញៀវទេសចរជាង ១២ ម៉ឺននាក់ នាឱកាសពិធីបុណ្យអុំទូក appeared first on Kampuchea Thmey Daily.

រយៈពេល៣ថ្ងៃ នៃពិធីបុណ្យអុំទូក ខេត្តកែប ទទួលបានភ្ញៀវទេសចរជាង១៥ម៉ឺននាក់

Sokhom Khon — Thu, 06 Nov 2025 23:29:51 +0000

គិតចាប់ពីថ្ងៃទី៤ ដល់ទី៦ ខែវិច្ឆិកា ឆ្នាំ២០២៥ ក្នុងឱកាសនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ខេត្តកែប ទទួលស្វាគមន៍ភ្ញៀវទេសចរជាតិ និងអន្តរជាតិ មកសម្រាកលេងកម្សាន្ត ជាង១៥ម៉ឺននាក់ (១៥៥,៤៥៨នាក់) បេីប្រៀបធៀបឆ្នាំ២០២៤ កេីនឡេីង ៥៦.៥៨% ក្នុងនោះភ្ញៀវទេសចរបរទេសចំនួន ៤១២នាក់ ថយចុះ១៧.២៦%។ នេះបើតាមរបាយការណ៍របស់លោក វ៉ុក ទាំង ប្រធានមន្ទីរទេសចរណ៍ខេត្តកែប។

បេីតាមរបាយការណ៍រដ៏ដែលបញ្ជាក់ថា ស្ថានភាពទូទៅនៃសន្តិសុខសណ្តាប់ធ្នាប់ និងអនាម័យនៅតាមតំបន់ទេសចរណ៍ទូទាំងខេត្តកែប នៅតែមានភាពល្អប្រសើរ។

ក្នុងឱកាសថ្ងៃឈប់សម្រាកនាពិធីបុណ្យអុំទូករយៈពេល ៣ថ្ងៃនេះ រដ្ឋបាលខេត្តកែបបានបន្តយកចិត្តទុកដាក់ខ្ពស់ លើការគ្រប់គ្រង និងតាមដានស្ថានភាពទេសចរប្រចាំថ្ងៃ ដើម្បីធានាថា ខេត្តកែបនៅតែជាគោលដៅទេសចរណ៍ដ៏មានសុវត្ថិភាពសណ្តាប់ធ្នាប់ជូនដល់ភ្ញៀវទេសចរដ៏ល្អ និងគួរឲ្យទាក់ទាញសម្រាប់ភ្ញៀវទេសចរទាំងជាតិ និងអន្តរជាតិ៕

អត្ថបទ៖ សឹង រ៉ាត់

The post រយៈពេល៣ថ្ងៃ នៃពិធីបុណ្យអុំទូក ខេត្តកែប ទទួលបានភ្ញៀវទេសចរជាង១៥ម៉ឺននាក់ appeared first on Kampuchea Thmey Daily.

ក្រសួងការងារ អនុញ្ញាតឱ្យកម្មករ-និយោជិតឈប់សម្រាកចំនួន ៣ ថ្ងៃ នាព្រះរាជពិធីបុណ្យអុំទូក ខាងមុខ

អ៊ិន ពិសី — Wed, 22 Oct 2025 06:43:52 +0000

ក្រសួងការងារ និងបណ្តុះបណ្តាលវិជ្ជាជីវៈ បានអនុញ្ញាតឱ្យកម្មករ-និយោជិតឈប់សម្រាកចំនួន ៣ ថ្ងៃ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលឈានមកដល់នៅដើមខែវិច្ឆិកា ឆ្នាំ ២០២៥ ខាងមុខនេះ។

ក្រសួងការងារ បានណែនាំដល់ម្ចាស់ ឬនាយកសហគ្រាស ក្រុមហ៊ុន រោងចក្រ ត្រូវអនុញ្ញាតឱ្យកម្មករ-និយោជិតរបស់ខ្លួនឈប់សម្រាកដោយមានប្រាក់ឈ្នួលនាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខាងមុខនេះ រយៈពេល ៣ ថ្ងៃ គឺ ថ្ងៃទី ៤-៥-៦ ខែវិច្ឆិកា ឆ្នាំ ២០២៥ និងត្រូវសម្របសម្រួលរៀបចំបើកប្រាក់ឈ្នួល ខែតុលា ដែលកម្មករ-និយោជិតត្រូវទទួលបានឱ្យបានមុនថ្ងៃឈប់សម្រាកនេះ។

ក្នុងករណីមានការព្រមព្រៀងគ្នារវាងកម្មករ-និយោជិតសាមី និងនិយោជក ឬមានចែងក្នុងបទបញ្ជាផ្ទៃក្នុងរបស់សហគ្រាស ក្រុមហ៊ុន រោងចក្រដែលត្រូវបានចុះទិដ្ឋាការដោយអធិការការងារ ឬអនុសញ្ញារួមដែលត្រូវបានចុះបញ្ជីនៅក្រសួង ការឈប់សម្រាករបស់កម្មករ-និយោជិតអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យដូចមានកំណត់ខាងលើ។

ចំពោះសហគ្រាស ក្រុមហ៊ុន រោងចក្រទាំងឡាយណា ដែលកម្មវត្ថុអាជីវកម្មមានចរិតលក្ខណៈសកល ត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន ហើយការឈប់សម្រាកបុណ្យ នៃកម្មករ-និយោជិតទាំងអស់ ព្រមគ្នាក្នុងពេលតែមួយនាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដំណើរការរបស់សហគ្រាស ក្រុមហ៊ុន រោងចក្រ ម្ចាស់ ឬនាយកសហគ្រាស ក្រុមហ៊ុន រោងចក្រត្រូវរៀបចំបែងចែកឱ្យកម្មករ-និយោជិតបានឈប់សម្រាកទៅតាមថ្ងៃឈប់សម្រាកបុណ្យដោយផ្លាស់ប្ដូរវេនគ្នា។

ប្រសិនបើការផ្លាស់ប្តូរវេនគ្នានេះ មិនអាចគាំទ្រដល់ដំណើរការ អាជីវកម្មរបស់សហគ្រាស ក្រុមហ៊ុន រោងចក្រ ម្ចាស់ ឬនាយកសហគ្រាស ក្រុមហ៊ុន រោងចក្រ និងតំណាងកម្មករ-និយោជិតអាចពិភាក្សា និងព្រមព្រៀងគ្នាឱ្យកម្មករ-និយោជិតទាំងអស់នៅធ្វើការនៅថ្ងៃឈប់សម្រាកបុណ្យនេះ ដោយត្រូវរៀបចំឱ្យមានការឈប់សម្រាកជំនួសនៅពេលណាមួយផ្សេងទៀតបាន។ ម្ចាស់ ឬនាយកសហគ្រាស ក្រុមហ៊ុន រោងចក្រ ត្រូវរៀបចំបញ្ជីឈ្មោះកម្មករ-និយោជិត ដែលត្រូវផ្លាស់ប្ដូរគ្នាឈប់សម្រាកតាមកាលបរិច្ឆេទនីមួយៗ ខាងលើ និងរក្សាទុកជាប្រចាំសម្រាប់ការត្រួតពិនិត្យរបស់អធិការការងារ។

ក្នុងករណីដែលកម្មករ-និយោជិតមិនទទួលបានការឈប់សម្រាកដោយមានប្រាក់ឈ្នួលត្រឹមត្រូវ សូមផ្តល់ព័ត៌មានមកក្រសួងការងារ និងបណ្តុះបណ្តាលវិជ្ជាជីវៈ តាមរយៈប្រព័ន្ធ Hotline លេខ ១២៨៦” ឬតាមរយៈប្រអប់ បណ្តឹងអនាមិករបស់ក្រសួង(https://feedback.mlvt.gov.kh/feedback) ដើម្បីក្រសួងចាត់វិធានការតាមច្បាប់ជាធរមាន៕

អត្ថបទ ៖ សំអឿន

The post ក្រសួងការងារ អនុញ្ញាតឱ្យកម្មករ-និយោជិតឈប់សម្រាកចំនួន ៣ ថ្ងៃ នាព្រះរាជពិធីបុណ្យអុំទូក ខាងមុខ appeared first on Kampuchea Thmey Daily.

៤ ថ្ងៃ នៃពិធីបុណ្យអុំទូកមានពលរដ្ឋមានបញ្ហាសុខភាពស្រាលៗ ជាង ១ ម៉ឺន ៣ ពាន់នាក់

អ៊ិន ពិសី — Mon, 18 Nov 2024 04:52:06 +0000

នៅក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក រយៈពេល ៤ ថ្ងៃ ពោលគឺចាប់ពីថ្ងៃទី ១៣ ដល់ថ្ងៃទី ១៦ ខែវិច្ឆិកា ឆ្នាំ ២០២៤ មានប្រជាពលរដ្ឋ និងកីឡាករអុំទូក មានបញ្ហាសុខភាពស្រាលៗ ប្រមាណជាង ១ ម៉ឺន ៣ ពាន់នាក់ ក្នុងនោះ មានជិត ៣០ នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ។

លោកវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានមានប្រសាសន៍នៅព្រឹកថ្ងៃទី ១៨ វិច្ឆិកា នេះថា រយៈពេល ៤ ថ្ងៃ នៃពិធីបុណ្យអុំទូកមានប្រជាពលរដ្ឋ និងកីឡាករអុំទូក មានបញ្ហាសុខភាពស្រាលៗ ដូចជា ក្តៅខ្លួន ផ្តាសាយ និងឈឺក្បាល ចំនួន ១៣ ៥៨១ ករណី ក្នុងនោះមានស្ត្រីប្រមាណជិត ៤ ពាន់ករណី។ ក្នុងនោះ នៅថ្ងៃទី ១៣ វិច្ឆិកា ដែលជាថ្ងៃត្រៀមអុំទូកបានផ្តល់សេវា ចំនួន ៦៥៦ ករណី។ ថ្ងៃទី ១ ត្រូវថ្ងៃទី ១៤ វិច្ឆិកា បានផ្តល់សេវាចំនួន ៣ ៣៩០ ករណី។ ថ្ងៃទី ២ ត្រូវថ្ងៃទី ១៥ បានផ្តល់សេវាចំនួន ៥ ១២៩ ករណី និងថ្ងៃទី ៣ ត្រូវនឹងថ្ងៃទី ១៦ វិច្ឆិកា បានផ្តល់សេវាចំនួន ៤ ៤០៦ ករណី។

លោកវេជ្ជបណ្ឌិត បានបន្តទៀតថា ក្នុងចំណោមអ្នកមកទទួលសេវាសុខភាពជាង ១ ម៉ឺន ៣ ពាន់ករណី ក្នុងនោះមាន ២៧ ករណី ត្រូវបានបញ្ជូនបន្តទៅសង្គ្រោះនៅមន្ទីរពេទ្យ។

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ថ្លែងអំណរគុណ និងវាយតម្លៃខ្ពស់ដល់ថ្នាក់ដឹកនាំគ្រប់លំដាប់ថ្នាក់ ក្រុមគ្រូពេទ្យប្រចាំការ គ្រូពេទ្យចល័ត ក្រុមរថយន្តគិលានសង្គ្រោះ ទាំង ៦០៧ នាក់ ក្នុងមួយថ្ងៃ ដែលបានប្តូរផ្លាស់វេនទៅតាមថ្ងៃនីមួយៗ បានបំពេញការងារយ៉ាងសស្រាក់សស្រាំ ប្រកបដោយទឹកចិត្តករុណា សន្ដោស សប្បុរស ពិសេសបានចូលរួមលះបង់ពេលវេលា ទាំងកម្លាំងកាយចិត្ត ប្រាជ្ញាស្មារតី ក្នុងការផ្តល់សេវាសុខាភិបាលជូនដល់ប្រជាពលរដ្ឋ ភ្ញៀវជាតិ អន្តរជាតិ កីឡាករ កីឡាការិនី ចំណុះទូក នាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ ២០២៤។

លោករដ្ឋមន្ត្រី បានលើកឡើងថា ការខិតខំរបស់ក្រុមគ្រូពេទ្យនាពេលនេះ នឹងមានចងចាំទុកជាអនុស្សាវរីយ៍ចំពោះស្នាដៃក្នុងការចូលរួមក្នុងបេសកកម្មដ៏ឧត្តុង្គឧត្ដមរបស់ប្រទេសជាតិ ដែលពិតជាស័ក្ដិសមនឹងកិត្តិនាម «គ្រូពេទ្យជាកងទ័ពអាវស បំពេញភារកិច្ចរបស់ទេវតា»។

លោករដ្ឋមន្ត្រី បានបញ្ជាក់ថា «ការចូលរួមនាពេលនេះ គឺពិតជាការងារដ៏ប្រពៃណីថ្លៃថ្លា ដែលបង្ហាញការយកចិត្តទុកដាក់ពីក្រុមគ្រូពេទ្យ ក្នុងការពង្រឹង និងលើកកម្ពស់ការថែទាំសុខភាព និងសុវត្ថិភាពជូនប្រជាពលរដ្ឋយើងគ្រប់ពេលវេលា។ បើមិនមានសេចក្តីសុខ បើមិនមានសន្តិភាពពេញលេញ យើងប្រាកដណាស់ថាមិនមានឱកាសមកជួបជុំគ្នាឈរនៅទីនេះ ចូលរួមរីករាយ និងបម្រើបងប្អូនប្រជាពលរដ្ឋយើងនោះទេ»។

គួរបញ្ជាក់ថា នៅក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំនេះ នារាជធានីភ្នំពេញ មានភ្ញៀវទេសចរជាតិ និងអន្តរជាតិប្រមាណជាង ៦ លាននាក់ មកចូលរួមដើរលេងកម្សាន្តតាមតំបន់នានានៅរាជធានីភ្នំពេញផងដែរ៕

អត្ថបទ ៖ សំអឿន

The post ៤ ថ្ងៃ នៃពិធីបុណ្យអុំទូកមានពលរដ្ឋមានបញ្ហាសុខភាពស្រាលៗ ជាង ១ ម៉ឺន ៣ ពាន់នាក់ appeared first on Kampuchea Thmey Daily.

អាជ្ញាធរភ្នំពេញនឹងចាត់វិធានការក្ដៅ ចំពោះទីតាំងផ្ញើម៉ូតូដែលយកតម្លៃថ្លៃល្មើសបម្រាម

Sorn Phanith — Sat, 16 Nov 2024 09:45:53 +0000

គណៈបញ្ជាការឯកភាពរាជធានីភ្នំពេញ សម្រេចចាត់វិធានការទីតាំងផ្ញើម៉ូតូណាដែលហ៊ានយកតម្លៃថ្លៃល្មើសបម្រាម នឹងត្រូវចាត់ការឲ្យខានតែបាន បន្ទាប់ពីមានការលើកឡើងតាមបណ្តាញសង្គម ពីសំណាក់ប្រជាពលរដ្ឋដែលមកចូលរួមកម្សាន្តក្នុងព្រះរាជពិធីបុណ្យអុំទូកថា កន្លែងផ្ញើម៉ូតូមួយចំនួនធំបានយកថ្លៃផ្ញើម៉ូតូ ថ្លៃហួសហេតុ ដែលកន្លែងខ្លះយកដល់ មួយម៉ឺនរៀល និងខ្លះទៀត ពីរមុឺនរៀល។

ជាក់ស្តែង នៅព្រឹកថ្ងៃទី១៦ ខែវិច្ឆិកា ឆ្នាំ២០២៤នេះ គណៈបញ្ជាការឯកភាពរាជធានីភ្នំពេញ បានបើកកិច្ចប្រជុំដើម្បីដោះស្រាយ និងឆ្លើយតបចំពោះតម្រូវការរបស់ប្រជាពលរដ្ឋ ដែលប្រើប្រាស់មធ្យោបាយ មកកម្សាន្ត ក្នុងព្រះរាជពិធីបុណ្យអុំទូក។

លោក កើត ឆែ អភិបាលរង និងជាអ្នកនាំពាក្យរដ្ឋបាលរាជធានីភ្នំពេញ បានសម្រេចអនុវត្តយ៉ាងម៉ឺងម៉ាត់ចំពោះទីតាំងផ្ញើម៉ូតូដែលយកតម្លៃផ្ញើលើសពីកិច្ចសន្យា ឬការព្រមព្រៀងជាមួយអាជ្ញាធរ ដើម្បីពង្រឹងសុវត្ថិភាព សន្តិសុខ សណ្តាប់ធ្នាប់ ក្នុងថ្ងៃចុងក្រោយនៃព្រះរាជពិធីបុណ្យអុំទូក បណ្តែតប្រទីប និងអកអំបុកសំពះព្រះខែ។ ក្នុងករណីប្រសិនប្រជាពលរដ្ឋជួបប្រទះនូវបញ្ហាអំពីការផ្ញើតម្លៃលើសនោះ សូមប្រជាពលរដ្ឋរាយការណ៍ ឬផ្ញើសារមកកាន់រដ្ឋបាលរាជធានីភ្នំពេញ ដើម្បីអនុវត្ត និងដោះស្រាយភ្លាមៗជូនប្រជាពលរដ្ឋ ។

ពាក់ព័ន្ធនឹងបញ្ហានេះដែរ យោងតាមកិច្ចសម្ភាសន៍ប្រជាពលរដ្ឋចំនួន២នាក់ សុំមិនបញ្ចេញឈ្មោះ ដែលមកដើរលេងកម្សាន្តនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ បានប្រាប់កម្ពុជាថ្មីឲ្យដឹងថា នៅទីតាំងដែលគាត់បានយកម៉ូតូមកផ្ញើក្នុងមួយគ្រឿងមានតម្លៃ៥០០០ពាន់រៀល ដែលតម្លៃនេះពួកគាត់គិតថាសមរម្យ នៅពេលមានបុណ្យទាន ប៉ុន្តែសូមកុំបន្តឡើងថ្លៃហួសកម្រិត រហូតដល់មួយមុឺនរៀល ជួនកាលទីតាំងខ្លះពីរមុឺនរៀលថែមទៀតផង៕

អត្ថបទ៖ ម៉េង

The post អាជ្ញាធរភ្នំពេញនឹងចាត់វិធានការក្ដៅ ចំពោះទីតាំងផ្ញើម៉ូតូដែលយកតម្លៃថ្លៃល្មើសបម្រាម appeared first on Kampuchea Thmey Daily.

ថ្ងៃទី២នៃពិធីបុណ្យអុំទូកនៅភ្នំពេញ មានមហាជនចូលរួមកេីនលេីស២ដង បេីប្រៀបធៀបទៅនឹងថ្ងៃទី១

Sorn Phanith — Sat, 16 Nov 2024 06:39:12 +0000

ភ្ញៀវទេសចរជាតិ និងអន្តរជាតិ ក្នុងថ្ងៃទី២ក្នុងពិធីបុណ្យអុំទូក សំពះព្រះខែ និងអកអំបុក នៅរាជធានីភ្នំពេញ បានកើនឡើងលើសពី២ នៃចំនួនភ្ញៀវទេសចរថ្ងៃទី១។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនៅយប់ថ្ងៃទី១៥ វិច្ឆិកាថា សម្រាប់ថ្ងៃទី២នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកឆ្នាំ២០២៤នេះ មានបងប្អូនប្រជាពលរដ្ឋខ្មែរ និងជនបរទេសប្រមាណ២លាន២សែននាក់បានចូលរួមទស្សនាកម្សាន្តប្រកបដោយទឹកមុខសប្បាយរីករាយក្រោមម្លប់នៃសន្តិភាព។ មានន័យថា បានកេីនឡើងលេីស២ដង បេីប្រៀបធៀបទៅនឹងព្រះរាជពិធីបុណ្យ អុំទូក ថ្ងៃទី១។

លោកស្រីបានបន្តថា ចំពោះការងារ រក្សាសន្តិសុខ សណ្តាប់ធ្នាប់និងរៀបរយក្រោមការយកចិត្តទុកដាក់ខ្ពស់បំផុតពីលោក ឃួង ស្រេង អភិបាលនៃគណអភិបាលរាជធានីភ្នំពេញរួមជាមួយថ្នាក់ជាតិ និងកងកម្លំាងនិងគ្រប់ផ្នែកដែលពាក់ព័ន្ធ គឺមានសន្តិសុខសណ្តាប់ល្អ ពុំមានបញ្ហាអ្វីកេីតឡេីងគួរអោយកត់សម្គាល់នោះទេ។

គួររំលឹកថា កាលពីថ្ងៃទី១នៃព្រះរាជពិធីបុណ្យអុំទូក បណ្តែតប្រទីប សំពះព្រះខែនិងអកអំបុកឆ្នាំ២០២៤នេះ មានបងប្អូនប្រជាពលរដ្ឋខ្មែរនិងជនបរទេស ប្រមាណ១លាន១សែននាក់បានចូលរួមទស្សនាកម្សាន្តប្រកបដោយទឹកមុខសប្បាយរីករាយក្រោមម្លប់នៃសន្តិភាព៕

អត្ថបទ៖ ស្រីរ័ត្ន

The post ថ្ងៃទី២នៃពិធីបុណ្យអុំទូកនៅភ្នំពេញ មានមហាជនចូលរួមកេីនលេីស២ដង បេីប្រៀបធៀបទៅនឹងថ្ងៃទី១ appeared first on Kampuchea Thmey Daily.

អភិបាលរាជធានីធ្វើពិធីអកអំបុកនៅរមណីយ៍ដ្ឋានប្រវត្តិសាស្ត្រវត្តភ្នំ មានការចូលរួមពីពលរដ្ឋយ៉ាងសប្បាយរីករាយ

Sorn Phanith — Sat, 16 Nov 2024 02:33:12 +0000

រដ្ឋបាលរាជធានីភ្នំពេញកាលរាត្រីថ្ងៃ១៥កើតពេញបរមី ខែកត្តិក ឆ្នាំរោងព.ស២៥៦៨ត្រូវនឹងថ្ងៃទី១៥វិច្ឆិកា ឆ្នាំ ២០២៤ នេះបានរៀបចំឲ្យមានពិធីអកអំបុកនៅរមណីយ៏ដ្ឋានប្រវត្តិសាស្ត្រវត្តភ្នំដែលជាបេះដូង និងជានិមិត្តរូបនៃរាជធានីភ្នំពេញ។ ពិធីនេះធ្វើឡើងដោយមានការអញ្ជើញជាអធិតីភាពលោកឃួង ស្រេង អភិបាលនៃគណះអភិបាលរាជធានីភ្នំពេញ និងលោកស្រីនិងលោកម៉ប់ សារិន ប្រធានក្រុមប្រឹក្សារាជធានីភ្នំពេញ។

ឆ្នាំនេះ រដ្ឋបាលរាជធានីភ្នំពេញបានប្រារព្វពិធីនេះឡើងវិញចំថ្ងៃទី២នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុកហើយពិធីនេះក៏ត្រូវបានរៀបចំធ្វើឡើងវិញជាលើកទី២ ក្នុងអាណត្តិទី៧នៃរាជរដ្ឋាភិបាលដែលមាន សម្តេចមហាបវរធិបតី ហ៊ុនម៉ាណែតជានាយករដ្ឋមន្ត្រី។ នេះក៏ជាព្រះរាជពិធីមួយ ដែលប្រារព្វនៅក្នុងព្រះរាជវង្សានុវង្ស រហូតដល់ប្រជាពលរដ្ឋសាមញ្ញ ក៏និយមប្រារព្វពិធីនេះតាមផ្ទះសម្បែងរៀងៗខ្លួន តាមស្ថាប័ន អង្គភាព និងតាមវត្តអារាមផងដែរ។ ចំពោះគ្រឿងរណ្តាប់សំខាន់ដែលគេយកមកប្រើក្នុងពិធីអកអំបុក ដែលមាន អំបុក,ចេកទុំ,ដូងខ្ចី ផ្កាភ្ញីរួមទាំងគ្រឿងសក្ការៈបូជាមួយចំនូនទៀត។

ពិធីនេះភាគច្រើនគេប្រារព្វឡើងនៅចំពេលរដូវទឹកសម្រកក្នុងខែកត្តិក ដែលជាថ្ងៃព្រះចន្ទ័រះពេញបរមី និងពេញរង្វង់មូល ហើយពិធីនេះក៏បានផ្សាភ្ជាប់ជាមួយព្រះរាជពិធីបុណ្យអុំទូក បណ្តែតប្រទីបផងដែរ។ សព្វថ្ងៃពិធីបុណ្យសំពះព្រះខែ និងអកអំបុក ត្រូវបានពលរដ្ឋទូទាំងប្រទេសប្រតិបត្តិបន្តរាល់ឆ្នាំនិងចាត់ទុកថា ជាបុណ្យប្រពៃណីវប្បធម៏ជាតិដ៏ធំមួយក្នុងចំណោមពិធីបុណ្យសំខាន់ៗជាច្រើនទៀត។

ទាក់ទងទៅនឹងពិធីនេះដែរ ប្រជាកសិករបានយកស្រូវទុំថ្មីៗទៅលីង ហើយបុករួចអុំយកអង្កាមចេញស្អាតដាក់សែនថ្វាយទេវតាចំពេលព្រះចន្ទ័រះពេញវង់ ដើម្បីសំដែងការដឹងគុណទេវតាដែលបានប្រទានទឹកភ្លៀងធ្លាក់មកលើព្រះធរណីធ្វើឲ្យដំណាំសព្វសារពើដុះដាល ហើយទទួលបានភោគផលកសិកម្មបានច្រើន។ តាមទំនៀមទំលាប់ប្រពៃណី ពេលអកអំបុកគេរងចាំដល់ព្រះខែរះពេញវង់ចំពីលើក្បាលទើបចាប់យកអំបុកទៅជូនអ្នកមានគុណចាស់ទុំមិត្តភក្ដិអកក្នុងភាពសប្បាយរីករាយមុនអកអំបុកគេត្រូវដាក់អំបុកថ្វាយព្រះខែជាមុនសិន ដោយមានអមដោយផ្លែឈើចម្រុះ ពិសេសផ្លែដូង ចេកណាំវ៉ាទុំជាដើម ដាក់ថ្វាយជាការដឹងគុណដល់ព្រះពោធិសត្វដែលចាប់កំណើតជាសត្វទន្សាយដោយមានរូបដិតជាប់ក្នុងរង្វង់ព្រះខែតាមដំណើររឿងព្រេងរវាងព្រាហ្ម និងសត្វទន្សាយជាព្រះពោធិសាត់។ ក្រុមព្រាហ្មណ៏ ក៏ចាប់ផ្តើមសន្យាថា នឹងថ្វាយស្រូវ ផ្លែឈើ ភោគផលកសិកម្មដែលដាំដុះបានក្នុងមួយឆ្នាំៗដាក់ថ្វាយសត្វទន្សាយពោធិសត្វនៅពេលព្រះចន្ទ័ ពេញបរមី នាថ្ងៃ១៥កើតខែកត្តិក ដែលគេអាចមើលឃើញរូបទន្សាយច្បាស់នៅថ្ងៃនោះក្នុងរង្វង់ព្រះខែ។

យោងតាមឯកសារដែលផ្សាយលើគេហទំព័ររបស់វិទ្យាស្ថានពុទ្ធសាសនបណ្ឌិតបានបញ្ជាក់ពីប្រវត្តិនៃពិធីសំពះព្រះខែ និងអកអំបុក គឺធ្វើឡើងសំដៅគោរពទៅដល់ការសាងបារមីរបស់ព្រះពុទ្ធកាលដែលព្រះអង្គនៅជាព្រះពោធិសត្វនៅឡើយ ដែលកាលនៅក្នុងជាតិមួយនោះទ្រង់កើតជាសត្វ ទន្សាយឈ្មោះថា សសបណ្ឌិត។ ឯកសារដដែលបញ្ជាក់ថា នៅថ្ងៃដែលព្រះចន្ទពេញបរមី ឬពេញវង់ ទន្សាយសសបណ្ឌិតបានធ្វើការអធិដ្ឋានឧបោសថសីលរបស់ខ្លួនដោយបំណងធ្វើជីវិតសំរាប់បរិច្ចាកដើម្បីបំពេញនូវពោធិសម្ភារឲ្យបានត្រាស់ដឹងជាព្រះពុទ្ធ៕

អត្ថបទ៖ ស្រីរ័ត្ន

The post អភិបាលរាជធានីធ្វើពិធីអកអំបុកនៅរមណីយ៍ដ្ឋានប្រវត្តិសាស្ត្រវត្តភ្នំ មានការចូលរួមពីពលរដ្ឋយ៉ាងសប្បាយរីករាយ appeared first on Kampuchea Thmey Daily.

មនុស្សប្រហែល ៥មុឺននាក់ចូលរួមក្នុងពិធីអកអំបុក និងសំពះព្រះខែ នៅសួនតេជោឈ្នះឈ្នះ ខេត្តបន្ទាយមានជ័យ

Sorn Phanith — Sat, 16 Nov 2024 01:55:14 +0000

នៅយប់ថ្ងៃទី១៥ ខែវិច្ឆិកា ឆ្នាំ២០២៤ មានប្រជាពលរដ្ឋមកពីទីជិត ធ្ងាយ ប្រហែល ៥ មុឺននាក់ ចូលរួមក្នុងពិធីអកអំបុកនិងសំពះព្រះខែ នៅសួនតេជោឈ្នះឈ្នះ និងបណ្តែតប្រទីបនៅដងស្ទឹងសិរីសោភ័ណ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ យ៉ាងសប្បាយពេញ១រាត្រី ក្នុងពិធីនោះដែរ ដោយមានការចូលរួម លោក ប្លែក វ៉ារី ប្រធានក្រុមប្រឹក្សាខេត្ត លោកអ៊ំរាត្រីអភិបាលខេត្តបន្ទាយមានជ័យ លោកជំទាវ ជ័យណារី អភិបាលរងខេត្ត ប្រធានសាលាដំបូងខេត្ត។

ក្នុងពិធីអកអំបុកនិងសំពះព្រះខែ និងបណ្តែតប្រទីបនោះលោក អ៊ុំ រាត្រី បានបានមានប្រសាសន៍ថា យប់នេះលោកសប្បាយចិត្តណាស់ដែលបានឃើញ ប្រជាពលរដ្ឋរាប់មុឺននាក់មកពីទីជិតឆ្ងាយ ចូលរួមក្នុងពិធីអកអំបុកនិងសំពះព្រះខែ នៅសួនតេជោឈ្នះឈ្នះ និងបណ្តែតប្រទីបដងស្ទឹងសិរីសោភ័ណ ក្នុងពិធីដែរលោកសង្កេតឃើញថា មានប្រទីប ជាច្រើន របស់រដ្ឋបាលខេត្ត គ្រប់មន្ទីរអង្គភាព តាំងលំអរ រំលេចទៅភ្លើងពណ៌ភ្លឺចិញ្ចាចពេញផ្ទៃគង្គា មានបង្ហោះគម បាញ់កាំជ្រួច និង ប្រជាពលរដ្ឋ ទិញប្រទីប និងធ្វើខ្លួនឯង យកមកបណ្តែតក្នុងទឹកផ្សងដើម្បីសុំសេចក្តីសុខទៅជាតិមុខ ចំណែកនៅក្នុងសួនតេជោ ឈ្នះ ឈ្នះ នោះវិញ មានធ្វើពិធីដាល់អំបុក អកអំបុក បន្តក់ភ្លើងទានជ័យ ស្វែងរកស្រុក ក្រុងណាដែលមាន ទឹកភ្លើងច្រើន ក្នុងការប្រកបរបរកសិកម្ម ក្នុងនោះមានតែ ក្រុងសិរីសោភ័ណ ទេដែលមានទឹកភ្លៀងច្រើនជាគេ ប្រជាពលរដ្ឋក្នុងការប្រកបរបរកសិកម្មបានច្រើនជាងគេ គួរបញ្ជាក់ផងដែរថាពេញ១រាត្រីនោះពុំមានបាតុភាពអ្វីកើតនោះឡើងទេ ពុំកម្លាំងសមត្ថកិច្ចការពារថែរក្សាសន្តិសុខដោយយកចិត្តទុកដាក់ជូនប្រជាពលរដ្ឋមកទស្សានាក្នុងពិធីអកអំបុកនិងសំពះព្រះខែនេះ។

លើសពីនោះលោកបានបន្ថែមថា ព្រះពិធីអំទូក បណ្តែតប្រទីប អកអំបុក សំពះព្រះខែនេះ គឺជាបុណ្យសាសនានិងបុណ្យប្រពៃណីជាតិ ដែលមានកំណើតតាំងពីយូរលង់ណាស់មកហើយក្នុងកំឡុងព្រះមហាវីរៈក្សត្រខ្មែរព្រះបាទជ័យវរ្ម័នទី៧ ដើម្បីឧទ្ទិសដល់វរៈកងទ័ពជើងទឹកនៃកលបុត្រដែលបានតស៊ូការពារទឹកដីមហានគរពីសត្រូវឈ្លានពាន។

លោកបានលើកឡើងទៀតថា លោកសូមអរគុណណាស់ដល់ព្រះគង្គាឆ្នាំនេះបានបង្អុលទឹកភ្លៀងមកយ៉ាងច្រើនសម្រាប់ស្រោចស្រពមកលើផលដំណាំស្រូវនិងល្បាប់ដីមានជីជាតិ សម្រាប់ការងារបង្កបង្កើនផលរបស់ប្រជាកសិករទទួលបាននូវផលានុផល សម្រាប់ការចិញ្ចឹមជីវិតរបស់មនុស្សសត្វ និងរុក្ខជាតិ តាំងពីអតីតកាលរហូតមកដល់សព្វថ្ងៃនេះនិងទៅអនាគត។

ម៉្យាងទៀតលោក អុំ រាត្រី បានបន្តថា ពិធីអំទូក បណ្តែតប្រទីប អកអំបុក សំពះព្រះខែមានអត្ថន័យ តាមប្រពៃណីព្រះពុទ្ធសាសនាគឺជាគ្រឿងសក្ការៈចង្វាយបូជាថ្វាយដល់ព្រះពោធិ៍សត្វហើយបុណ្យអំទូក បណ្តែតប្រទីប អកអំបុក សំពះព្រះខែនេះ គេចាប់ធ្វើថ្ងៃពេញបរមីខែកត្តិកជារៀងរាល់ឆ្នាំមិនដែលខាននោះទេ។

លោកបានបញ្ជាក់ទៀតថា ឆ្នាំនេះការប្រណាំងទូក.ង នៅសាលកវិទ្យាល័យមានជ័យមានចំនួនទូក.ង ចំនួន ៣៥ បានប្រណាំង២ថ្ងៃ ទូកនីមួយៗដណ្តើមបានជយលាភី ពីលេខ១ដល់ លេខ៣ ហើយក្នុងការប្រណាំងទូកនោះនៅជុំវិញសាកលវិទ្យាល័យមានស្តង់ជាច្រើនសម្រាប់ដាក់តាំងលក់របស់របរនិងនៅពេលយប់ក៏នៅមានល្បែងប្រជាប្រិយនិងសិល្បៈសំដែងឲ្យប្រជាពលរដ្ឋមកមើលកម្សាន្តទៀតផង។

ទន្ទឹមនឹងនេះដែរលោក អ៊ុំ រាត្រី បានធ្វើការអំពាវនាវដល់បងប្អូនទាំងអស់ដែលបានមកទស្សនាពិធីបុណ្យ អុំទូក អកអំបុក បណ្តែតប្រទីប និង សំពះ ព្រះ ខែ នេះពេលយប់នោះ បើកបរត្រូវចេះគោរព ច្បាប់ ចរាចរណ៍ឲ្យបានគ្រប់គ្នាជាសវាងឲ្យផុតពីគ្រោះថ្នាក់ចរាចរណ៍ដើម្បីសេចក្តីសុខគ្រប់ៗគ្នា។ លោក អ៊ុំ រាត្រី ក៏បានសូមជូនពរបងប្អូនប្រជាពលរដ្ឋ ទូទាំងខេត្តបន្ទាយមានជ័យ ឲ្យជួបនិងតែសេចក្តីសុខ សំណាងល្អ និងបានសប្បាយរីករាយ នៅក្នុងពិធីបុណ្យអុំទូក អកអំបុក បណ្តែតប្រទីប និងសំពះព្រះខែឲ្យបានគ្រប់គ្នាផងដែរ៕

អត្ថបទ៖ វ៉ាន់ ណាង

The post មនុស្សប្រហែល ៥មុឺននាក់ចូលរួមក្នុងពិធីអកអំបុក និងសំពះព្រះខែ នៅសួនតេជោឈ្នះឈ្នះ ខេត្តបន្ទាយមានជ័យ appeared first on Kampuchea Thmey Daily.