ព្រីនស៍ គ្រុប Archives - Kampuchea Thmey Daily

គម្រោងអភិវឌ្ឍអចនទ្រព្យធំៗចំនួន ៥ ស្ថិតក្រោមសម្ព័ន្ធក្រុមហ៊ុនព្រីនស៍គ្រុបរបស់លោកចេន ហ្សី

Dy Bunnara — Tue, 13 Jan 2026 02:50:21 +0000

លោក ចេន ហ្សី ដែលរងការចោទប្រកាន់ប្រព្រឹត្តិបទល្មើសឧក្រិដ្ឋកម្មអនឡាញ និងលាងលុយកខ្វក់ និងជាម្ចាស់សម្ព័ន្ធក្រុមហ៊ុនព្រីនស៍ គ្រុប បានក្តោបមុខជំនួយជាច្រើនជាពិសេសការវិនិយោគលើវិស័យអចលន្រព្យ ដែលមានម្រោងអភិវឌ្ឍលំនៅឋាន និងអគារសហកម្មសិទ្ធិទាំងនៅរាជធានីភ្នំពេញ និងខេត្តព្រះសីហនុស្ថិតនៅក្រោមសម្ព័ន្ធក្រុមហ៊ុនព្រីនស៍ គ្រុប។

លោក ចេន ហ្សី អតីតម្ចាស់សម្ព័ន្ធក្រុមហ៊ុនព្រីនស៍ គ្រុប

កាលពីពេលថ្មីៗនេះ និយ័តករអាជីវកម្មអចលនវត្ថុ និងបញ្ចាំបានបញ្ចេញឈ្មោះគម្រោងអភិវឌ្ឍលំនៅឋាន និងអគារសហកម្មសិទ្ធិ ពាក់ព័ន្ធនឹងក្រុមហ៊ុនព្រីនស៍ចំនួន ៥ កំពុងដំណើរការរួមមាន៖

(១)៖ គម្រោងអគារសហកម្មសិទ្ធិ (ខុនដូ) PRINCE HAPPINESS PLAZA ឬ The Pinnacle RESIDENCE
(២)៖ គម្រោងអគារសហកម្មសិទ្ធិ (ខុនដូ) PRINCE GOLDEN BAY
(៣)៖ គម្រោងអគារ-សហកម្មសិទ្ធិ (ខុនដូ) មជ្ឈមណ្ឌល Prince Huan Yu
(៤)៖ គម្រោងលំនៅឋាន (បុរី) Prince One Tropica
(៥)៖ គម្រោងលំនៅឋាន (បុរី) ភូមិសំរោង

គម្រោងអគារសហកម្មសិទ្ធិរបស់ក្រុមហ៊ុនព្រីនស៍ នៅក្បែរស្ពានអាកាសក្បាលថ្នល់

កាលពីពេលថ្មីៗនេះ និយ័តករអាជីវកម្មអចលនវត្ថុ និងបញ្ចាំ បានសម្រេចផ្អាកប្រតិបត្តិការទិញលក់គម្រោងអភិវឌ្ឍលំនៅឋាន និងអគារខុនដូរទាំងអស់របស់ក្រុមហ៊ុន ព្រីនស៍ ក្រោយលោក ចេន ហ្សី ម្ចាស់សម្ព័ន្ធក្រុមហ៊ុនព្រីនស៍គ្រុបរងការចោទប្រកាន់ពីបទឧក្រិដ្ឋកម្មអនឡាញ និងលាងលុយកខ្វក់ និងត្រូវសមត្ថកិច្ចកម្ពុជាចាប់បញ្ជូនទៅកាត់ទោសនៅប្រទេសចិន។

យ៉ាងណាមិញ អតិថិជនដែលបានចុះកិច្ចសន្យាលក់-ទិញផ្ទះ/យូនីតជាមួយគម្រោងរបស់ក្រុមហ៊ុនរួច ត្រូវបន្តអនុវត្តកាតព្វកិច្ច រហូតដល់បញ្ចប់កិច្ចសន្យាលក់-ទិញជាស្ថាពរ។ ដោយឡែកចំពោះអតិថិជនដែលបានបញ្ចប់កាតព្វកិច្ចស្រប តាមកិច្ចសន្យាលក់-ទិញជាមួយក្រុមហ៊ុន ត្រូវបន្តស្នើសុំការរៀបចំផ្ទេរកម្មសិទ្ធិផ្ទះ/យូនីត តាមគម្រោងនីមួយៗ ដោយមានកិច្ចសហការជួយសម្របសម្រួលរវាង និយ័តករអាជីវកម្មអចលនវត្ថុ និងបញ្ចាំ និងក្រសួង រៀបចំដែនដី នគរូបនីយកម្ម និងសំណង់។

លោក ចេន ហ្សី ជាម្ចាស់សម្ព័ន្ធក្រុមហ៊ុនព្រីនស៍គ្រុប ដែលរកស៊ីខាងវិស័យអចលនទ្រព្យ ធនាគារ និងវិស័យជាច្រើនទៀតនៅកម្ពុជាតាំងពីឆ្នាំ២០១៥។ លោកត្រូវបានសមត្ថកិច្ចកម្ពុជាស៊ើបអង្កេតពាក់ព័ន្ធឧក្រិដ្ឋកម្មអនឡាញ និងលាងលុយកខ្វក់ និងត្រូវចាប់បញ្ជូនទៅប្រទេសចិនដែលជាទឹកដីកំណើតដើម្បីកាត់ទោសតាមច្បាប់ពាក់ព័ន្ធបទឧក្រិដ្ឋផ្សេងៗ៕

The post គម្រោងអភិវឌ្ឍអចនទ្រព្យធំៗចំនួន ៥ ស្ថិតក្រោមសម្ព័ន្ធក្រុមហ៊ុនព្រីនស៍គ្រុបរបស់លោកចេន ហ្សី appeared first on Kampuchea Thmey Daily.

ក្រុមហ៊ុន Prince Group ប្រកាសបដិសេធការចោទប្រកាន់លើអ្នកឧកញ៉ា ចេន ហ្ស៊ី អំពីការចូលរួមសកម្មភាពខុសច្បាប់ណាមួយ ស្របពេលមជ្ឈមណ្ឌលជាតិប្រយុទ្ធប្រឆាំងមេរោគកុំព្យូទ័ររបស់ចិន រកឃើញអ្នកនៅពីក្រោយខ្នងការលួច Bitcoin ដែលហៅថា «ពាលស៊ីពាល»

Kang Tola — Tue, 11 Nov 2025 11:16:59 +0000

នៅថ្ងៃទី១១ ខែវិច្ឆិកា ឆ្នាំ២០២៥នេះក្រុមហ៊ុន ព្រីសន៍ គ្រុប បានចេញសេចក្តីថ្លែងការណ៍បន្ទាន់មួយដោយបញ្ជាក់ថា សូមបដិសេធយ៉ាងដាច់អហង្ការ ចំពោះការអះអាងដែលថា អ្នកឧកញ៉ា ចេន ហ្ស៊ី បានចូលរួមក្នុងសកម្មភាពខុសច្បាប់ណាមួយ។ ការចោទប្រកាន់នេះគឺគ្មានមូលដ្ឋានច្បាស់លាស់ និងមានគោលបំណងរកលេសដើម្បី រឹបអូសទ្រព្យសម្បត្តិ ដែលមានតម្លៃរាប់ពាន់លានដុល្លារ។

ការចោទប្រកាន់ដោយគ្មានមូលដ្ឋាននេះ បានបង្កហានិភ័យយ៉ាងខ្លាំងដល់បុគ្គលិកដែលគ្មានកំហុសរាប់ពាន់នាក់ ដៃគូសហការ និងសហគមន៍ពាក់ព័ន្ធដែលសហការជាមួយក្រុមហ៊ុនទាំងនៅកម្ពុជា និងនៅក្រៅប្រទេស។

ការចេញប្រកាសសេចក្តីថ្លែងការណ៍បដិសេធនេះស្របពេលសារព័ត៌មាន Global Times របស់ចិន នៅថ្ងៃទី០៩ ខែវិច្ឆិកា ឆ្នាំ២០២៥ បានចេញផ្សាយថា មជ្ឈមណ្ឌលជាតិប្រយុទ្ធប្រឆាំងមេរោគកុំព្យូទ័ររបស់ចិន (CVERC) បានចេញផ្សាយរបាយការណ៍វិភាគបច្ចេកទេសមួយដោយចោទប្រកាន់ថា រដ្ឋាភិបាលសហរដ្ឋអាមេរិកទំនងជាអ្នកនៅពីក្រោយការលួច Bitcoin ដ៏ធំសម្បើមមួយពីបណ្តុំអ្នកជីករ៉ែ (Mining Pool) ដែលជាកម្មសិទ្ធិរបស់មហាសេដ្ឋី ចេន ហ្ស៊ី ដែលហៅថា «ពាលស៊ីពាល»។

មជ្ឈមណ្ឌលជាតិប្រយុទ្ធប្រឆាំង មេរោគកុំព្យូទ័ររបស់ចិន បានប្រៀបធៀបករណីនេះថា ជា «ពាលស៊ីពាល» ដែលត្រូវបានរៀបចំដោយអង្គភាព Hacker កម្រិតរដ្ឋ។ នេះបើតាមការផ្សាយរបស់សារព័ត៌មាន Global Times របស់ចិន នៅថ្ងៃទី០៩ ខែវិច្ចិកា ឆ្នាំ២០២៥។

របាយការណ៍របស់មជ្ឈមណ្ឌលជាតិប្រយុទ្ធប្រឆាំង មេរោគកុំព្យូទ័ររបស់ចិន បានរៀបរាប់អំពីដំណើររឿងពេញលេញ ដែលចាប់ផ្តើមនៅថ្ងៃទី២៩ ខែធ្នូ ឆ្នាំ២០២០ នៅពេលដែល Bitcoin ប្រមាណ ១២៧,២៧២ BTC (កាលណោះមានតម្លៃប្រហែល ៣,៥ ពាន់លានដុល្លារ បច្ចុប្បន្នមានតម្លៃជិត ១៥ ពាន់លានដុល្លារ) ត្រូវបានលួចចេញពីបណ្តុំអ្នកជីករ៉ែ LuBian Mining Pool របស់អ្នកឧកញ៉ា ចេន ហ្ស៊ី។ បន្ទាប់ពីហេតុការណ៍នោះ អ្នកឧកញ៉ា ចេន ហ្ស៊ី និងក្រុមហ៊ុនរបស់លោក បានព្យាយាមផ្ញើសារតាមរយៈប្រព័ន្ធប្លុកឆេនជាច្រើនលើកច្រើនសារ ដើម្បីស្នើសុំឱ្យបញ្ជូនទ្រព្យសម្បត្តិត្រឡប់មកវិញ ហើយថែមទាំងបានផ្តល់រង្វាន់ទៀតផង ប៉ុន្តែគ្មានការឆ្លើយតបឡើយ។

ចំណុចដែលគួរឱ្យសង្ស័យបំផុតគឺ Bitcoin ទាំងនោះត្រូវបានរក្សាទុកនៅក្នុងកាបូបលុយឌីជីថលតែមួយ ដោយគ្មានការចលនាអស់រយៈពេលជិត ៤ ឆ្នាំ ដែលជារឿងខុសប្លែកពីឥរិយាបថរបស់ក្រុម Hacker ធម្មតា ដែលតែងតែប្រញាប់លក់ទ្រព្យសម្បត្តិលួចបានយ៉ាងលឿន។ មជ្ឈមណ្ឌលជាតិប្រយុទ្ធប្រឆាំង មេរោគកុំព្យូទ័ររបស់ចិនបានលើកឡើងថា ឥរិយាបថនេះប្រៀបដូចជាប្រតិបត្តិការ ដែលត្រូវបានរៀបចំ ដោយភាពជាក់លាក់ពី «អង្គភាព Hacker កម្រិតរដ្ឋ»។ នៅខែមិថុនា ឆ្នាំ២០២៤ ទ្រព្យសម្បត្តិទាំងនោះត្រូវបានផ្ទេរទៅកាបូបលុយឌីជីថលថ្មីមួយ ដែលក្រោយមកឧបករណ៍តាមដានប្លុកឆេន ARKHAM របស់អាមេរិក បានកំណត់ថា ជាកម្មសិទ្ធិរបស់រដ្ឋាភិបាលសហរដ្ឋអាមេរិក។

ដំណើររឿងនេះបានឈានដល់ចំណុចកំពូលនៅថ្ងៃទី១៤ ខែតុលា ឆ្នាំ២០២៥ នៅពេលក្រសួងយុត្តិធម៌សហរដ្ឋអាមេរិក បានប្រកាសចោទប្រកាន់ព្រហ្មទណ្ឌ លើលោក ចេន ហ្ស៊ី ពីបទពាក់ព័ន្ធនឹងការបោកប្រាស់រូបិយប័ណ្ណឌីជីថល និងបានប្រកាសរឹបអូស Bitcoin ចំនួន ១២៧,០០០ BTC។ មជ្ឈមណ្ឌលជាតិប្រយុទ្ធប្រឆាំង មេរោគកុំព្យូទ័ររបស់ចិន បានសន្និដ្ឋានថា «ភស្តុតាងបង្ហាញថា Bitcoin ដែលត្រូវបានរឹបអូស ដោយរដ្ឋាភិបាលអាមេរិក គឺត្រូវគ្នានឹង Bitcoin ដែលត្រូវបានលួចពីបណ្តុំអ្នកជីករ៉ែ LuBian។ នេះទំនងជាមានន័យថា រដ្ឋាភិបាលអាមេរិកបានលួច Bitcoin របស់លោក ចេន ហ្ស៊ី ដោយប្រើបច្ចេកទេស hacker តាំងពីឆ្នាំ២០២០មកម្ល៉េះ»។

គួរបញ្ជាក់ថា របាយការណ៍នេះក៏បានរកឃើញដែរថា ការអះអាងរបស់ក្រសួងយុត្តិធម៌អាមេរិកថា មូលនិធិទាំងអស់មានប្រភពពីអំពើខុសច្បាប់ គឺផ្ទុយពីការរកឃើញដំបូងរបស់ខ្លួន ដែលបានបង្ហាញថា Bitcoin ទាំងនោះមានប្រភពចម្រុះ រួមទាំងការជីករ៉ែដោយឯករាជ្យ និងការទូទាត់ពីបណ្តុំអ្នកជីករ៉ែផងដែរ។ ក្រុមហ៊ុន Price Group បានបញ្ជាក់នៅតែប្តេជ្ញាចិត្តចំពោះសុចរិតភាព ការវិនិយោគដែលមានទំនួលខុសត្រូវ និងកំណើនសេដ្ឋកិច្ចប្រកបដោយចីរភាពនៅទូទាំងតំបន់។ អស់រយៈពេលជាងមួយទស្សវត្សរ៍ ហើយដែលក្រុមហ៊ុនបានធ្វើប្រតិបត្តិការប្រកបដោយតម្លាភាព និងអនុលោមតាមរាល់ បទប្បញ្ញាតិច្បាប់ជាធរមាន ដែលនេះនឹងត្រូវបញ្ជាក់យ៉ាងច្បាស់នៅពេលដែលភស្តុតាងទាំងអស់ត្រូវបានបង្ហាញ៕

The post ក្រុមហ៊ុន Prince Group ប្រកាសបដិសេធការចោទប្រកាន់លើអ្នកឧកញ៉ា ចេន ហ្ស៊ី អំពីការចូលរួមសកម្មភាពខុសច្បាប់ណាមួយ ស្របពេលមជ្ឈមណ្ឌលជាតិប្រយុទ្ធប្រឆាំងមេរោគកុំព្យូទ័ររបស់ចិន រកឃើញអ្នកនៅពីក្រោយខ្នងការលួច Bitcoin ដែលហៅថា «ពាលស៊ីពាល» appeared first on Kampuchea Thmey Daily.

អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ ហូលឌីង គ្រុប ត្រូវបានទទួលស្គាល់ជាសហគ្រិនឆ្នើមប្រចាំឆ្នាំជាថ្មីម្តងទៀត

Sorn Phanith — Wed, 17 Aug 2022 09:21:38 +0000

នៅថ្ងៃទី ១៧ ខែសីហា ឆ្នាំ ២០២២ អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ ហូលឌីងគ្រុប បានទទួលពានរង្វាន់ Gold Stevie® Award ជាសហគ្រិនឆ្នើមប្រចាំឆ្នាំ ក្នុងប្រភេទសម្ព័ន្ធក្រុមហ៊ុនពហុផលិតផលដ៏ធំមួយជាលើកទី ២ នៅក្នុងកម្មវិធីពានរង្វាន់ធុរកិច្ចអន្តរជាតិប្រចាំឆ្នាំលើកទី ១៩ ដែលជាកម្មវិធីពានរង្វាន់ដ៏មានកិត្យានុភាព។ បន្ថែមពីនេះ ក្រុមហ៊ុនក៏បានឈ្នះពានរង្វាន់ Bronze Stevie® Awards ក្នុងប្រភេទ ក្រុមហ៊ុនប្រចាំឆ្នាំ និងក្នុងប្រភេទសាជីវកម្មដ៏មានការទទួលខុសត្រូវសង្គមបំផុតឆ្លើយតបទៅនឹងវិបត្តិនៃជំងឺកូវីដ-១៩ ផងដែរ។ ហើយគ្រុប ក៏បានទទួលកំណត់ត្រាឈ្នះពានរង្វាន់ចំនួន ១០ ជាប់ៗគ្នាក្នុងឆ្នាំនេះ។

អ្នកឧកញ៉ា ចេន ហ្ស៊ី ដែលជាសហគ្រិនកម្ពុជាមួយរូប គឺជាស្ថាបនិកនៃសម្ព័ន្ធក្រុមហ៊ុន ព្រីនស៍ ហូលឌីង គ្រុប ដែលជាសម្ព័ន្ធក្រុមហ៊ុនពហុផលិតផលដ៏ធំមួយនៅកម្ពុជា រួមជាមួយនឹងក្រុមហ៊ុនបុត្រសម្ព័ន្ធនានារបស់ខ្លួនក្នុងការផ្ដោតសំខាន់ទៅលើវិស័យស្នូលសំខាន់ៗចំនួន ៣ ដែលរួមមាន ការអភិវឌ្ឍន៍វិស័យអចលនទ្រព្យ ការផ្ដល់ជូនសេវាកម្មហរិញ្ញវត្ថុ និងការបម្រើសេវាអតិថិជន។ ជាមួយគ្នានេះ លោកក៏ជាស្ថាបនិកនៃ មូលនិធិព្រីនស៍ ដែលជាមូលនិធិសាជីវកម្មដីល្បីមួយដែលបានផ្តួចផ្ដើមនូវសកម្មភាពសង្គមនានាក្នុងការរួមចំណែកលើកកម្ពស់ការអប់រំ ការថែទាំសុខភាព និងការចូលរួមក្នុងសហគមន៍តាមរយៈភាពជាដៃគូជាមួយវិស័យសាធារណៈ និងឯកជន។

ក្នុងរយៈពេល ៥ ឆ្នាំ ចុងក្រោយនេះ ក្រុមហ៊ុនបានវិនិយោគទឹកប្រាក់រាប់ពាន់លានដុល្លារអាមេរិក ទៅលើគម្រោងផ្សេងៗនៅប្រទេសកម្ពុជា។ សម្ព័ន្ធក្រុមហ៊ុនបានចូលរួមចំណែកយ៉ាងសំខាន់ក្នុងវិធានការប្រយុទ្ធប្រឆាំងជំងឺរាតត្បាតនៅកម្ពុជា ក្នុងការកាត់បន្ថយឱ្យមានការរំខានដល់អាជីវកម្មតិចតួចបំផុតសម្រាប់ការបញ្ចប់គម្រោងផ្សារទំនើប លំនៅដ្ឋាន និងពាណិជ្ជកម្មឱ្យបានទាន់ពេលវេលានៅទូទាំងប្រទេសកម្ពុជា ទោះបីមានវិបត្តិនៃជំងឺរាតត្បាតក៏ដោយ។

គណៈកម្មការនៃកម្មវិធីបានមានប្រសាសន៍ថា “អ្នកឧកញ៉ា ចេន ហ្ស៊ី បានចូលរួមចំណែកក្នុងការអភិវឌ្ឍសង្គមនៅកម្ពុជា ដោយលោកបានប្រមូលផ្តុំថ្នាក់ដឹកនាំមកពីវិស័យផ្សេងៗជាច្រើន ក្នុងការជួយអភិវឌ្ឍន៍សហគមន៍ តាមរយៈការផ្តល់ជូននូវលំនៅឋានដែលមានតម្លៃសមរម្យ ការចាក់វ៉ាក់សាំងការពារជំងឺកូវីដ-១៩ សកម្មភាពសប្បុរសធម៌ ការសិក្សាអប់រំ និងការផ្តល់ឱកាសការងារដល់ក្មេងៗជំនាន់ក្រោយ”។

គណៈកម្មការនៃកម្មវិធីបានបន្តថា “ដោយមានចក្ខុវិស័យរយៈពេលជាង ៣០ ឆ្នាំ កន្លងមករបស់សម្ព័ន្ធក្រុមហ៊ុន ក្នុងការនាំមកជូននូវលំនៅឋានដែលមានតម្រូវការខ្ពស់ និងការរួមចំណែកដល់យុទ្ធសាស្ត្រដែលប្រកបដោយនិរន្តរភាពសម្រាប់ដំណើរឆ្ពោះទៅរក Net Zero (ការសម្រេចបាននូវតុល្យភាពរវាងបរិមាណនៃការបំភាយឧស្ម័នដែលបានផលិត និងការបញ្ចេញចេញពីបរិយាកាស ដើម្បីកាត់បន្ថយការឡើងកម្ដៅផែនដី) គឺជាគោលដៅដ៏គួរឱ្យកោតស្ញប់ស្ញែង និងជាមធ្យោបាយមួយដើម្បីនាំមកនូវការច្នៃប្រឌិត និងវិបុលភាពដល់ប្រទេសកម្ពុជាទាំងមូល”។

អ្នកឧកញ៉ា ចេន ហ្ស៊ី ទទួលបានការគាំទ្រពីសំណាក់ក្រុមអ្នកគ្រប់គ្រងជាន់ខ្ពស់លំដាប់អន្តរជាតិដែលដឹកនាំលើវិស័យធនាគារ (ធនាគារ Prince Bank) សេវាអាកាសចរណ៍ (ក្រុមហ៊ុន Cambodia Airways) សេវាអចលនទ្រព្យ (ក្រុមហ៊ុន Prince Real Estate, ក្រុមហ៊ុន Prince Huan Yu Real Estate, ក្រុមហ៊ុន Canopy Sands Development) និងសេវាគ្រប់គ្រងលើការវិនិយោគ (ក្រុមហ៊ុន Belt Road Capital, ក្រុមហ៊ុន Awesome Investment Group) លោក Gabriel Tan ប្រធានផ្នែកទំនាក់ទំនងនៃក្រុមហ៊ុន ព្រីនស៍ ហូលឌីង គ្រុប បានមានប្រសាសន៍ថា “ពានរង្វាន់ទាំងនេះបង្ហាញពីឆន្ទៈ និងការតស៊ូរបស់យើង ក្នុងគោលបំណងធ្វើឱ្យមានភាពខុសគ្នាជាវិជ្ជមានទៅកាន់សង្គមកម្ពុជា”។ លោកបានបន្តថា “រាល់កិច្ចខិតខំប្រឹងប្រែងរបស់យើងទាំងអស់នឹងមិនអាចកើតឡើងបានទេបើគ្មានការគាំទ្រពីសហគមន៍ និងការខិតខំប្រឹងប្រែងរបស់បុគ្គលិកទាំងអស់នៅក្នុងក្រុមហ៊ុនដែលជាសមាជិករបស់សម្ព័ន្ធក្រុមហ៊ុន”។

កាលពីឆ្នាំមុន អ្នកឧកញ៉ា ចេន ហ្ស៊ី បានចុះហត្ថលេខាលើការចាប់ផ្តើមនៃកម្មវិធីអាហារូបករណ៍ ចេន ហ្ស៊ី ដែលជាគំនិតផ្តួចផ្តើមមួយដែលមូលនិធិរបស់ក្រុមហ៊ុន បានធ្វើការជាមួយក្រសួងអប់រំ យុវជន និងកីឡា និងស្ថាប័នឧត្តមសិក្សាកំពូលៗក្នុងស្រុក ដើម្បីចាប់ផ្តើមកម្មវិធីអាហារូបករណ៍ដែលមានទឹកប្រាក់ប្រមាណ ២ លានដុល្លារអាមេរិក សម្រាប់សិស្ស ៤០០ នាក់ ដែលកម្មវិធីនេះមានរយៈពេល ៧ ឆ្នាំ។

ព្រីនស៍ ហូលឌីង គ្រុប (Prince Holding Group) គឺជាសម្ព័ន្ធក្រុមហ៊ុនពហុផលិតផលដ៏ធំមួយនៅកម្ពុជា ដែលមានក្រុមហ៊ុនជាច្រើនធ្វើការផ្តោតលើវិស័យស្នូលចំនួន ៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និងបម្រើសេវាអតិថិជន។

The post អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ ហូលឌីង គ្រុប ត្រូវបានទទួលស្គាល់ជាសហគ្រិនឆ្នើមប្រចាំឆ្នាំជាថ្មីម្តងទៀត appeared first on Kampuchea Thmey Daily.

យុវជន ឆ្នើម ១០០ នាក់ ទទួលបានអាហារូបករណ ចេន ហ្ស៊ី ដើម្បីបន្តការសិក្សាថ្នាក់ឧត្តមសិក្សា

Sorn Phanith — Tue, 05 Apr 2022 04:54:56 +0000

មូលនិធិព្រីនស៍ ដែលជាមូលនិធិសប្បុរសធម៌របស់សម្ព័ន្ធក្រុមហ៊ុនព្រីនស៍គ្រុបដែលជាពហុក្រុមហ៊ុនមួយក្នុងចំណោម ក្រុមហ៊ុនដែលធំជាងគេ និងរីកចម្រើនបំផុតនៅក្នុងប្រទេសកម្ពុជា បាន ប្រកាសឈ្មោះបេក្ខភាពឆ្នើម ១០០ នាក់ ដែលទទួលបានអាហារូបករណ៍ ចេន ហ្ស៊ី ជំនាន់ដំបូងគេបង្អស់។

កម្មវិធីអាហារូបករណ៍នេះ គឺជាកិច្ចផ្តួចផ្តើមមួយក្រោមការដឹកនាំរបស់ អ្នកឧកញ៉ា ចេន ហ្ស៊ី ដែលជាប្រធានក្រុមប្រឹក្សាភិបាល ព្រីនស៍ ហូលឌីង គ្រុប សហការជាមួយនឹងក្រសួង អប់រំ យុវជន និងកីឡា។ បេក្ខភាពដែលទទួលបានអាហារូបករណ៍នេះ នឹងបន្តការសិក្សាតាមគោលដៅរបស់ពួកគេ ដោយអាហារូបករណ៍បានជួយកាត់បន្ថយឧបសគ្គ និងការលំបាកដូចជាបញ្ហាហិរញ្ញវត្ថុនៅក្នុងការសិក្សាជាដើម។ អាហារូបករណ៍នេះ បានផ្តល់ឱកាសដល់យុវជនកម្ពុជា ក្នុងការពង្រីក សក្តានុពលរបស់ពួកគេ ដើម្បីធានានិរន្តរភាពនៃវិស័យសំខាន់ៗរបស់កម្ពុជា ដូចជាការរីកចម្រើនផ្នែកសំណង់ក្នុងវិស័យអចលនទ្រព្យ ការជំរុញបរិយាប័ន្នហិរញ្ញវត្ថុ និងសេដ្ឋកិច្ចឌីជីថលក្នុងវិស័យធនាគារ និងឧស្សាហកម្មហិរញ្ញវត្ថុ និងការជួយលើកកម្ពស់ស្តង់ដារបដិសណ្ឋារកិច្ចថ្នាក់ពិភពលោក ឆ្លើយតបតាមតម្រូវការធនធានមនុស្សនៃសេដ្ឋកិច្ចក្នុងស្រុកនាពេលអនាគត។ លើសពីនេះទៀត វានឹងបើកទ្វារសម្រាប់កម្ពុជាក្នុងការលើកកម្ពស់ស្ដង់ដាររបស់ខ្លួនសម្រាប់ការប្រកួតប្រជែងក្នុងឆាកអន្តរជាតិ។

លោក Gabriel Tan នាយកជាន់ខ្ពស់ផ្នែកទំនាក់ទំនងរបស់សម្ព័ន្ធក្រុមហ៊ុនព្រីនស៍ហូលឌីងគ្រុប បានមានប្រសាសន៍ថា៖ «ពួកយើងមានសេចក្តី រំភើប ដែលបានទទួលពាក្យពីបេក្ខជនជាង ១ ៥០០ នាក់ ក្នុងរយៈពេល ៣ ខែកន្លងមកនេះ សម្រាប់អាហារូបករណ៍ ចេន ហ្ស៊ី ជំនាន់ដំបូងគេនេះ។ នៅពេលនេះ ពួកយើងបានធ្វើការជ្រើសរើសបានបេក្ខជនឆ្នើមចំនួន ១០០ នាក់ ដោយសង្ឃឹមថាពួកគេទទួលបានគ្រឹះដ៏រឹងមាំ ក្នុងការចាប់យកក្តីស្រមៃ និងកសាងអនាគតដ៏ត្រចះត្រចង់សម្រាប់ប្រទេសកម្ពុជា»។

នេះគឺជាអាហារូបករណ៍ទ្រង់ទ្រាយធំដំបូងបង្អស់ដែល ផ្តល់ដោយមូលនិធិព្រីនស៍ ដើម្បីពង្រឹងការជឿជាក់ដល់យុវជនកម្ពុជា ចាប់តាំងពីការចាប់ផ្តើមនៃជំងឺរាតត្បាតកូវីដ១៩។ ដំណើរការនៃការជ្រើសរើសនេះ ត្រូវបានដឹកនាំដោយ ក្រសួងអប់រំ យុវជន និងកីឡា ដោយទទួលបានការគាំទ្រយ៉ាងពេញទំហឹងពីសមាជិកនៃមូលនិធិព្រីនស៍។ នៅដើមខែកុម្ភៈ បេក្ខជនប្រមាណ ២០០នាក់ ដែលទទួលបាននិទ្ទេសល្អក្នុងការប្រលងសញ្ញាបត្រមធ្យមសិក្សាទុតិយភូមិ ត្រូវបានជ្រើសរើសដើម្បីធ្វើការសម្ភាសន៍។ អាហារូបករណ៍នេះ នឹងផ្តល់ការបង់ថ្លៃសិក្សាពេញ ព្រមទាំងប្រាក់ឧបត្ថម្ភដល់ និស្សិតដែលនឹងបន្តការសិក្សារបស់ពួកគេនៅសកលវិទ្យាល័យល្បីៗក្នុងប្រទេសកម្ពុជា រួមមានសកលវិទ្យាល័យភូមិន្ទភ្នំពេញ សកលវិទ្យាល័យជាតិគ្រប់គ្រង និង វិទ្យាស្ថានបច្ចេកវិទ្យាកម្ពុជា។

ក្រុមហ៊ុន ព្រីនស៍ គ្រុប កំពុងធ្វើការដើម្បីធានាឲ្យបានថា អាហារូបករណ៍នេះដំណើរការទៅមុខ ឆ្ពោះទៅកាន់គោលដៅដែលមានចែងនៅក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ ដែលត្រូវបានរៀបចំឡើងដើម្បីធ្វើកំណែទម្រង់ការអប់រំ យុវជន និងកីឡាដែលត្រូវការជាចាំបាច់។

លោក Gabriel បានបន្ថែមថា៖ «ជាមួយនឹងកម្មវិធីអាហារូបករណ៍នេះ យើងសង្ឃឹមថានឹងចូលរួមចំណែក ដើម្បី លើកកម្ពស់ការអប់រំ រួមជាមួយកម្មវិធីដើម្បីសង្គម និងសកម្មភាពភាពជាអ្នកដឹកនាំផ្សេងៗនៅឆ្នាំនេះ។ លើសពីនេះទៀត យើងចង់លើកកម្ពស់ដល់និស្សិតឆ្នើមទាំង ១០០ នាក់ ជាមួយនឹងឱកាសការងារ និងរៀនសូត្រផ្សេងៗ ប្រសិនបើពួកគេជ្រើសរើសធ្វើការជាមួយយើង»៕

ព្រីនស៍ ហូលឌីង គ្រុប (Prince Holding Group) គឺជាសម្ព័ន្ធដែលធំជាងគេនៅក្នុងប្រទេសកម្ពុជាកម្ពុជា ដែលមាន ក្រុមហ៊ុនជាច្រើនធ្វើការផ្តោតលើវិស័យស្នូលចំនួន ៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និង សេវាកម្មបម្រើអតិថិជន។ អាជីវកម្មសំខាន់ៗរបស់សម្ព័ន្ធក្រុមហ៊ុនព្រីនស៍គ្រុបនៅកម្ពុជា រួមមានក្រុមហ៊ុនPrince Real Estate Group ក្រុមហ៊ុនPrince Huan Yu Real Estate Group ធនាគា រPrince Bank ក្រុមហ៊ុនអាកាសចរណ៍Cambodia Airways ក្រុមហ៊ុនBelt Road Capital Management ព្រមទាំងក្រុមហ៊ុនAwesome Global Investment Group។ តាមរយៈក្រុមហ៊ុនបុត្រសម្ព័ន្ធទាំងនេះ ក្រុមហ៊ុនសម្ព័ន្ធក្រុមហ៊ុនព្រីនស៍គ្រុបមានអាជីវកម្មប្រមាណជាង ៨០ នៅក្នុងប្រទេសកម្ពុជា ដែលកំពុងប្រតិបត្តិការលើការអភិវឌ្ឍវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ភស្តុភារ បច្ចេកវិទ្យាម្ហូបអាហារនិងភេសជ្ជៈ និងរបៀបរស់នៅ ។ល។៕

The post យុវជន ឆ្នើម ១០០ នាក់ ទទួលបានអាហារូបករណ ចេន ហ្ស៊ី ដើម្បីបន្តការសិក្សាថ្នាក់ឧត្តមសិក្សា appeared first on Kampuchea Thmey Daily.

មូលនិធិសប្បុរសធម៌របស់សម្ព័ន្ធក្រុមហ៊ុនព្រីនស៍គ្រុប ចេញផ្សាយរបាយការណ៍ ប្រចាំឆ្នាំលើវិស័យអប់រំ ការថែទាំសុខភាព និងកម្មវិធីគំនិតផ្តួចផ្តើមសហគមន៍

Sorn Phanith — Wed, 23 Mar 2022 06:36:36 +0000

មូលនិធិព្រីនស៍ (Prince Foundation) ដែលជាមូលនិធិសប្បុរសធម៌របស់សម្ព័ន្ធក្រុមហ៊ុនព្រីនស៍គ្រុប(ហៅកាត់ថា «ព្រីនស៍ គ្រុប») ជាពហុក្រុមហ៊ុនមួយក្នុងចំណោមពហុក្រុមហ៊ុនដែលធំជាងគេ និងរីកចម្រើនបំផុតនៅក្នុងប្រទេសកម្ពុជាបានចេញផ្សាយរបាយការណ៍ប្រចាំឆ្នាំ ២០២១ របស់ខ្លួននៅថ្ងៃនេះ។

របាយការណ៍នេះបានបង្ហាញពី គំនិតផ្តួចផ្តើមពេញមួយឆ្នាំរបស់មូលនិធិ ដែលមានលក្ខណៈរួមបញ្ចូល និងបានធ្វើសមាហរណកម្មខិតទៅជិតគោលដៅអភិវឌ្ឍន៍ជាតិរបស់កម្ពុជា។ ទឹកប្រាក់ជាង ៤,៥ លានដុល្លារត្រូវបានបែងចែកជាចម្បងលើការថែទាំសុខភាព រីឯមូលនិធិដែលនៅសល់ត្រូវបាន ដាក់បញ្ចូលទៅក្នុងគំនិតផ្តួចផ្តើមក្នុងវិស័យអប់រំនិងការចូលរួមរបស់សហគមន៍ ដោយប្រកាន់ខ្ជាប់ការយកចិត្តទុកដាក់លើវិស័យបី។ មិនតែប៉ុណ្ណោះ មូលនិធិព្រីនស៍ ក៏បានធ្វើការបរិច្ចាគទឹកប្រាក់ ៣ លានដុល្លារ ក្នុងចូលរួមចំណែកប្រយុទ្ធប្រឆាំងនឹងជំងឺរាតត្បាតក្នុងប្រទេសឡាវ ដើម្បីជួយឲ្យប្រទេសនេះទទួលបានវ៉ាក់សាំងចំនួនមួយលានដូស។

អ្នកឧកញ៉ា ចេន ហ្ស៊ី ប្រធានក្រុមប្រឹក្សាភិបាល ក្រុមហ៊ុន ព្រីនស៍ ហូលឌីង គ្រុប បានមានប្រសាសន៍ថា៖ «ដោយសារយើង ធ្លាប់បានទទួលនូវភាពជោគជ័យពីការអនុវត្តវិធីសាស្ត្រយុទ្ធសាស្ត្រនៃការវិនិយោគលើវិស័យអភិវឌ្ឍន៍អចលនទ្រព្យ សេវាកម្មហិរញ្ញវត្ថុ និងសេវាកម្មអតិថិជន ខ្ញុំជឿជាក់ថាវិធីសាស្ត្រស្រដៀងគ្នានេះរបស់មូលនិធិ នឹងផ្តល់ផលល្អជាច្រើនបន្ថែមទៀតសម្រាប់ប្រទេសកម្ពុជា»។

របាយការណ៍ប្រចាំឆ្នាំនេះ បានគូសបញ្ជាក់ពីកិច្ចខិតខំប្រឹងប្រែងរបស់មូលនិធិឆ្ពោះទៅរកការអនុវត្តយុទ្ធសាស្ត្រ និងការវិនិយោគតម្រង់ទិសថ្មីរបស់ខ្លួនឡើងវិញនៅឆ្នាំ ២០២១ ដោយបានបញ្ចូលនូវសេចក្តីថ្លែងការណ៍បេសកកម្មថ្មីមួយគឺ «រួមគ្នាកសាងអនាគតកាន់តែប្រសើរសម្រាប់កម្ពុជា»។

ក្នុងចំណោមអង្គការមិនមែនរដ្ឋាភិបាលសំខាន់ៗ ដែលមូលនិធិព្រីនស៍បានសហការ និងធ្វើការជាមួយ ដូចបានបង្ហាញក្នុងរបាយការណ៍ រួមមានកាកបាទក្រហមកម្ពុជា អង្គការ Caring for Cambodia ដែលជាអង្គការសប្បុរសធម៌ផ្តោតលើវិស័យអប់រំ និងអង្គការម្លប់តាប៉ាង (M’Lop Tapang) ដែលជាអង្គការក្រៅរដ្ឋាភិបា លដែលមានមូលដ្ឋាននៅខេត្តព្រះសីហនុ ដែលធ្វើការជាមួយកុមារប្រឈមនឹងហានិភ័យ។ ការប្តេជ្ញាមួយទៀតរបស់មូលនិធិព្រីនស៍ក្នុងការផ្លាស់ប្តូរការអប់រំវិជ្ជាជីវៈនៅកម្ពុជា ក៏មានភាពល្បីល្បាញនៅក្នុងប្រទេសកម្ពុជាផងដែរ តាមរយៈការគាំទ្រពីមជ្ឈមណ្ឌលបណ្តុះបណ្តាលវិជ្ជាជីវៈនាឡិកាព្រីនស៍ (Prince Horology) ដែលជាសាលាបង្រៀនធ្វើនាឡិកាស្តង់ដារប្រទេសស្វីស ដែលត្រូវបានបង្កើតឡើងក្នុងរយៈពេលខ្លីមុនពេលចាប់ផ្តើមនៃជំងឺរាតត្បាត។ មូលនិធិត្រូវបានផ្តោតជាសំខាន់លើការបង្កើតផលវិជ្ជមានរយៈពេលវែងតាមរយៈគម្រោងផ្សេងៗរបស់ខ្លួន។

លោក Gabriel Tan នាយកជាន់ខ្ពស់ផ្នែកទំនាក់ទំនងរបស់សម្ព័ន្ធក្រុមហ៊ុនព្រីនស៍ហូលឌីងគ្រុបបានឲ្យដឹងថា៖«ក្នុងភាពជាដៃគូនាពេលអនាគត យើងនឹងស្វែងរកអង្គការមិនមែនរដ្ឋាភិបាលដែលមានភាពជាក់លាក់ មាននិរន្តរភាព និងជាអង្គការដែលមានការអនុវត្តផ្ទាល់ ដែលយើងជឿជាក់ថាវានឹងបង្កើននូវតម្លៃសង្គមនៃការវិនិយោគរបស់យើងឲ្យកាន់តែប្រសើរថែមទៀត»។ ដូចបានគូសបញ្ជាក់ផងដែរនៅក្នុងរបាយការណ៍នេះ មូលនិធិព្រីនស៍នឹងបង្វែរការផ្តោតយកចិត្តទុកដាក់ពីកម្មវិធីគំនិតផ្តួចផ្តើមទាក់ទងនឹងជំងឺកូវីដ-១៩ ទៅជាការផ្តល់ជំនួយសប្បុរសធម៌ផ្នែកអប់រំវិញម្តង។ អ្វីដែលពិសេសជាងនេះទៀត គឺអាហារូបករណ៍ ចេន ហ្ស៊ី(Chen Zhi) ដែលជាកិច្ចខិតខំប្រឹងប្រែងរួមគ្នារយៈពេលប្រាំពីរឆ្នាំជាមួយក្រសួងអប់រំ យុវជន និងកីឡា (MoEYS) ក្នុងការផ្តល់អាហារូបករណ៍ដល់និស្សិតចំនួន ៤០០ នាក់ ដើម្បីសិក្សានៅតាមសកលវិទ្យាល័យដ៏ល្បីល្បាញក្នុងស្រុក។

របាយការណ៍ប្រចាំឆ្នាំក៏បានសបង្ហាញឲ្យឃើញពីការប្ដេជ្ញាចិត្តរបស់មូលនិធិព្រីនស៍ចំពោះប្រជាជនកម្ពុជា ដោយប្រកាន់យកវិធីសាស្ត្រភាពជាដៃគូពហុភាគីជាយុទ្ធសាស្ត្រ ដើម្បីឲ្យប្រទេសកម្ពុជាឆ្ពោះទៅរកអនាគតដ៏ត្រចះត្រចង់។ ក្នុងរយៈពេលប្រាំមួយឆ្នាំកន្លងមក មូលនិធិព្រីនស៍បានបរិច្ចាគទឹកប្រាក់ជាង ១៤ លានដុល្លារ ដែលបានជួយទៅដល់ប្រជាជនកម្ពុជាជាងកន្លះលាននាក់។

មូលនិធិព្រីនស៍ត្រូវបានបង្កើតឡើងក្នុងឆ្នាំ ២០១៥ គឺជាមូលនិធិសប្បុរសធម៌ឈានមុខគេមួយនៅកម្ពុជា។ ក្នុងនាមជាសមាជិករបស់ក្រុមហ៊ុនព្រីនស៍ហូលឌីងគ្រុប ដែលជាសម្ព័ន្ធក្រុមហ៊ុនដ៏ធំមួយនៅកម្ពុជា មូលនិធិនេះមានគោលបំណងធ្វើការជាមួយសហគមន៍មូលដ្ឋាន ដើម្បីកសាងការរស់នៅ និងបរិយាកាសការងារដែលលើកកម្ពស់សុខុមាលភាព និងការរស់នៅរបស់ប្រជាជនតាមចក្ខុវិស័យ«រួមគ្នាកសាងអនាគតកាន់តែប្រសើរសម្រាប់កម្ពុជា»៕

The post មូលនិធិសប្បុរសធម៌របស់សម្ព័ន្ធក្រុមហ៊ុនព្រីនស៍គ្រុប ចេញផ្សាយរបាយការណ៍ ប្រចាំឆ្នាំលើវិស័យអប់រំ ការថែទាំសុខភាព និងកម្មវិធីគំនិតផ្តួចផ្តើមសហគមន៍ appeared first on Kampuchea Thmey Daily.

មជ្ឈមណ្ឌល ព្រីនស៍ ហ័នយូ ប្រារព្ធពិធីអបអរបុណ្យគ្រីស្មាស និងពិធីបញ្ចប់គម្រោងសាងសង់អគារទី ២

Sorn Phanith — Mon, 27 Dec 2021 03:22:15 +0000

កាលពីព្រឹកថ្ងៃទី ២៥ ខែធ្នូ ឆ្នាំ ២០២១ ផ្នែកចុងក្រោយនៃគម្រោងសាងសង់អគារទី ២ របស់មជ្ឈមណ្ឌល ព្រីនស៍ ហ័នយូ ត្រូវបានសាងសងបញ្ចប់ជាស្ថាពរ។ ដើម្បីថ្លែងអំណរគុណដល់អតិថិជនទាំងអស់ មជ្ឈមណ្ឌល ព្រីនស៍ ហ័នយូ បានរៀបចំពិធីអបអរយ៉ាងអធិកអធម។

ការបញ្ចប់គម្រោងសាងសង់ មិនមែនជាចំណុចបញ្ចប់ទេ ប៉ុន្តែជាចំណុចចាប់ផ្តើមថ្មីមួយ។ ក្រុមហ៊ុន អចលនទ្រព្យ ព្រីនស៍ ហ័នយូ សន្យាថានឹងកាន់តែយកចិត្តទុកដាក់ ផ្តោតសំខាន់លើផលិតផល ធានាគុណភាពជាមួយនឹងភាពជាក់លាក់ ជូនអតិថិជន នាពេលអនាគត។

មជ្ឈមណ្ឌល ព្រីនស៍ ហ័នយូ មានទីតាំងសក្តានុពល ជិតនឹងគម្រោងណាហ្គាទី ៣

គម្រោងមជ្ឈមណ្ឌល ព្រីនស៍ ហ័នយូ មានទីតាំងនៅតំបន់ពាណិជ្ជកម្ម (CBD) ក្នុងខណ្ឌ ចំការមន រាជធានីភ្នំពេញ។ គម្រោងនេះនៅជិតនឹងកាស៊ីណូណាហ្គាទី ១ ទី ២ និងគម្រោងណាហ្គាទី ៣ ដែលកំពុងសាងសង ដោយធ្វើដំណើរថ្មើរជើងត្រឹមតែ ៣ នាទីប៉ុណ្ណោះ វាមានភាពងាយស្រួលក្នុងការរស់នៅ។

មិនត្រឹមតែប៉ុណ្ណោះ គម្រោងនេះមានទីតាំងនៅជិតតំបន់ស្នូលក្នុងខណ្ឌបឹងកេងកង ១ ជុំវិញមានស្ថានទូតនៃប្រទេសចំនួន ៣១ ដូចជា ស្ថានទូតរុស្ស៊ី ស្ថានទូតអូស្ត្រាលី ស្ថានទូតកូរ៉េខាងត្បូង និងស្ថានទូតជប៉ុនជាដើម។

គម្រោងនេះមានទីតាំងនៅជិតស្ថាប័នធំៗដូចជា ក្រសួងកសិកម្ម ព្រឹទ្ធសភា ក្រសួងមហាផ្ទៃ រដ្ឋសភា និងក្រសួងការបរទេសជាដើម។ ជុំវិញគម្រោងនេះមានផ្សារទំទើប និងកន្លែងកម្សាន្តជាច្រើនដូចជា ហាងលក់ផលិតផលរួច ផ្សារទំនើបអ៊ីអន ១ កោះពេជ្រ មាត់ទន្លេ វិមានឯករាជ្យនិងទីតាំងសំខាន់ជាច្រើនទៀត។

ការសាងសង់ខុនដូវរជន មានប្រាក់ចំណូលពីការជួលខ្ពស់ពី 8% ទៅ 10%

មជ្ឈមណ្ឌល ព្រឺនស៍ ហ័រយូ ត្រូវបានសាងសង់យ៉ាងប៉ិនប្រសប់ជាមួយនឹងគំនិតនៃ “ជីវិតដ៏ប្រណីត” ដែលជាពហុអគារទីក្រុងលំដាប់ពិភពលោកមានទំហំ 140,000 ម៉ែត្រការ៉េ មានទំហំសម្បូរចាប់ពី4 0-82 ម៉ែត្រការ៉េនៃប្រភេទផ្ទះLOFT ដែលមានកម្ពស់ 5,4 ម៉ែត្រមានតែមួយគត់នៅក្នុងទីក្រុងភ្នំពេញ ទិញមួយជាន់ទទួលបានពីរជាន់ មានទំហំ 31-105 ម៉ែត្រការ៉េនៃខុនដូផ្លាទីន ដែលតុបតែងសម្រេច ជ្រើសរើសម៉ាកសញ្ញាលំដាប់ពិភពលោកទីមួយ បំពាក់ដោយឧបករណ៍ប្រើប្រាស់ក្នុងផ្ទះយ៉ាងពេញលេញ អាចចូលស្នាក់នៅបាន ដែលអាចបំពេញតម្រូវការផ្សេងៗគ្នានៃពាណិជ្ជករឆ្នើម ទេសចរស្នាក់នៅ ការរស់នៅឯកជន និងការវិនិយោគជាដើម។បាននាំចូលគ្រឿងសង្ហារិមលំដាប់អន្តរជាតិក្នុងការតុបតែង។

ជាមួយនឹងទីតាំងល្អបំផុតមានតែមួយគត់ និងគុណភាពផ្ទះមានស្រាប់ដ៏កម្រ រួមជាមួយពហុឧបករណ៍បំពាក់ដ៏ទូលំទូលាយ បន្ទាប់ពីមជ្ឈមណ្ឌលព្រឺនស៍ហ័រអ៊ីប្រគល់ផ្ទះ ត្រូវបានគេរំពឹងថានឹងមានផលជួលប្រចាំឆ្នាំខ្ពស់រហូតដល់ 8%-10% ការកើនឡើងតម្លៃលំនៅឋានប្រចាំឆ្នាំជាមធ្យម គឺប្រហែល15% ទទួលបានផលត្រឡប់មកវិញដ៏ល្អលើការវិនិយោគ និងសក្តានុពលខ្លាំងនៃការឡើងថ្លៃ ដែលធ្វើឱ្យគម្រោងនេះក្លាយជាជម្រើសវិនិយោគដ៏ពេញនិយមបំផុតនៅក្នុងតំបន់ ។

មជ្ឈមណ្ឌលព្រឺនស៍ហ័រយូ នឹងកាន់កាប់ដោយខ្លួនឯងនូវកន្លែងពាណិជ្ជកម្មហាងទំនិញទំហំ 30,000ម៉ែត្រការ៉េ ដើម្បីសាងសង់ជាមជ្ឈមណ្ឌលពាណិជ្ជកម្មទាន់សម័យបែបសិល្បៈដំបូងគេនៅភ្នំពេញ – ព្រឺនស៍ ម៉ល (ភ្នំពេញ) ។ ជាមួយនឹងការរៀបចំស្ថាបត្យកម្មដែលអាចបត់បែនបាន និងការរួមបញ្ចូលអាជីវកម្មចម្រុះ នឹងបង្កើតបរិយាកាសធុរកិច្ចអន្តរជាតិ ដើម្បីបំពេញតម្រូវការប្រើប្រាស់របស់មនុស្សស៊ីវិល័យ បុគ្គលិកជាន់ខ្ពស់ ពាណិជ្ជករ និងមនុស្សមានចំណូលមធ្យមក្នុងរាជធានីភ្នំពេញ បង្កើតបរិយាកាសប្រើប្រាស់ពិសេសប្លែកតែមួយគត់ និងបទពិសោធន៍ប្រើប្រាស់ដ៏គួរឱ្យភ្ញាក់ផ្អើល ។

ក្រុមហ៊ុនសម្ព័ន្ធអចលនទ្រព្យ ព្រឺនស៍ ហ័រយូ សាងសង់ប្រទេសកម្ពុជាឲ្យស្រស់ស្អាត

ក្រុមហ៊ុនសម្ព័ន្ធអចលនទ្រព្យ ព្រឺនស៍ ហ័រយូ គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនព្រឺនស៍ ហូលឌីង គ្រុប ។ ក្រុមហ៊ុនព្រឺនស៍ ហូលឌីង គ្រុប គឺជាក្រុមហ៊ុនវិនិយោគអន្តរជាតិចម្រុះ ដែលយកប្រទេសកម្ពុជាជាមូលដ្ឋាន នឹងមានអាជីវកម្មវិនិយោគជុំវិញពិភពលោក ។ វិសាលភាពអាជីវកម្មគ្របដណ្តប់លើការអភិវឌ្ឍន៍អចលនទ្រព្យ ប្រតិបត្តិការអចលនទ្រព្យពាណិជ្ជកម្ម សណ្ឋាគារលំដាប់ខ្ពស់ ធនាគារ និងវិស័យជាច្រើនទៀត ដែលមានដើមទុនច្រើន និងទស្សនវិស័យអភិវឌ្ឍន៍ទូលំទូលាយ ។

ក្នុងនាមជាក្រុមហ៊ុនបុត្រសម្ព័ន្ធអចលនទ្រព្យ នៃក្រុមហ៊ុនព្រឺនស៍ ហូលឌីង គ្រុប ក្រុមហ៊ុនសម្ព័ន្ធអចលនទ្រព្យព្រឺនស៍ហ័រយូ បានប្រកាន់ខ្ជាប់នូវគោលគំនិតអភិវឌ្ឍន៍”សាងសង់ប្រទេសកម្ពុជាឲ្យស្រស់ស្អាត” ចាក់គ្រឹះនៅកម្ពុជា ដោយប្រើប្រាស់ទីក្រុងភ្នំពេញ និងខេត្តព្រះសីហនុជាមូលដ្ឋាន ជាយុទ្ធសាស្ត្របានរៀបចំឲ្យមានគម្រោងមជ្ឈមណ្ឌលព្រឺនស៍ហ័រអ៊ី ព្រឺនស៍ ម៉ល ភូមិសំរោង ព្រឺនស៍ហ្គោលឌិនប៉េ និងគម្រោងឈានមុខទីក្រុងជាច្រើនទៀតបានក្លាយជាសហគ្រាសឈានមុខគេក្នុងវិស័យអភិវឌ្ឍន៍អចលនទ្រព្យក្នុងប្រទេសកម្ពុជា ។ នៅពេលអនាគតក្រុមហ៊ុនសម្ព័ន្ធនេះនឹងបន្តខិតខំប្រឹងប្រែងបង្កើតផលិតផលលំនៅឋានលំដាប់ខ្ពស់កាន់តែច្រើន និងកាន់តែប្រសើរឡើងសម្រាប់អតិថិជនជាម្ចាស់ផ្ទះ និងជួយដល់ការអភិវឌ្ឍន៍ទីក្រុងរបស់ប្រទេសកម្ពុជា។

The post មជ្ឈមណ្ឌល ព្រីនស៍ ហ័នយូ ប្រារព្ធពិធីអបអរបុណ្យគ្រីស្មាស និងពិធីបញ្ចប់គម្រោងសាងសង់អគារទី ២ appeared first on Kampuchea Thmey Daily.

ក្រៅពីមានគោរមងារជាឧកញ៉ា លោកមហាសេដ្ឋី ចេន ហ្ស៊ី មានតួនាទីក្នុងជួររាជការស្មើរដ្ឋមន្ត្រី

Kang Tola — Mon, 20 Dec 2021 12:10:11 +0000

ភ្នំពេញ ៖ លោកឧកញ៉ា មហាសេដ្ឋី ចេន ហ្ស៊ី ប្រធានក្រុមប្រឹក្សាភិបាល ក្រុមហ៊ុន ព្រីនស៍ ហូលឌីង គ្រុប ក្រៅពីបានទទួលងារជា «អ្នកឧកញ៉ា» មហាសេដ្ឋីប្រាក់វាលលានរូបនេះក៏មានតួនាទីមួយក្នុងជួររាជការកម្ពុជាផងដែរ នេះបើតាមព្រះរាជក្រឹត្យ នស/រកត/០៥២/៥២១ ចុះថ្ងៃទី ១៥ ឧសភា ឆ្នាំ២០២០។

ក្នុងព្រះរាជក្រឹត្យបានបញ្ជាក់ថា លោកឧកញ៉ា មហាសេដ្ឋីជនជាតិ ខ្មែរកាត់ចិន ចេន ហ្ស៊ីដែលចូលចិត្តបរិច្ចាគជួយសង្គមកម្ពុជា គឺមានតួនាទីជាទីប្រឹក្សាសម្តេចពញាចក្រី ហេង សំរិន ប្រធានរដ្ឋសភា ដែលមានឋានៈស្មើ «រដ្ឋមន្ត្រី»ក្នុងជួររាជការ៕

ពិស្តារ ៖

កែសម្រួលដោយ ៖ នាគព័ន្ធ

The post ក្រៅពីមានគោរមងារជាឧកញ៉ា លោកមហាសេដ្ឋី ចេន ហ្ស៊ី មានតួនាទីក្នុងជួររាជការស្មើរដ្ឋមន្ត្រី appeared first on Kampuchea Thmey Daily.

អ្នកឧកញ៉ា ចេន ហ្ស៊ី បរិច្ចាគទឹកប្រាក់ ២ លានដុល្លារបន្ថែមទៀតដល់ឡាវ ដើម្បីប្រយុទ្ធប្រឆាំងនឹងជំងឺកូវីដ-១៩

Sorn Phanith — Tue, 30 Nov 2021 08:38:47 +0000

អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ គ្រុប ដែលជាពហុក្រុមហ៊ុនមួយក្នុងចំណោមពហុក្រុមហ៊ុនដែលធំជាងគេ និងរីកចម្រើនលឿនបំផុតរបស់កម្ពុជា បានបរិច្ចាគថវិកាចំនួន ២ លានដុល្លារអាមេរិកបន្ថែមទៀត ដើម្បីជួយដល់រដ្ឋាភិបាលឡាវ ក្នុងកិច្ចខិតខំប្រឹងប្រែងប្រយុទ្ធប្រឆាំងនឹងការរីករាលដាលនៃជំងឺកូវីដ-១៩។

កាលពីដើមខែកញ្ញាកន្លងមកនេះ អ្នកឧកញ៉ា ចេន ហ្ស៊ី ក៏បានបរិច្ចាគថវិកាចំនួន ១ លានដុល្លារអាមេរិក ម្តងរួចមកហើយ។ អំណោយទាំងពីរលើក ត្រូវបានធ្វើឡើងដោយឆ្លើយតបទៅតាមការអំពាវនាវរបស់សម្តេចនាយករដ្ឋមន្ត្រី ហ៊ុន សែន ក្នុងការពង្រឹងកិច្ចសហប្រតិបត្តិការទ្វេភាគីលើបញ្ហាកូវីដ-១៩ រវាងប្រទេសជិតខាងទាំងពីរ។ ការបរិច្ចាគនេះ ត្រូវបានធ្វើឡើងនៅវិមានសន្តិភាពក្នុងរាជធានីភ្នំពេញដោយលោក ហ្គុយ ឆាយ សមាជិកក្រុមប្រឹក្សាភិបាលនៃក្រុមហ៊ុន ព្រីនស៍ ហូលឌីង គ្រុប ដែលជាតំណាងជំនួសមុខអោយអ្នកឧកញ៉ា ចេន ហ្ស៊ី។ អំណោយទាំងពីរលើកមានទឹកប្រាក់សរុបចំនួន ៣ លានដុល្លារអាមេរិក មានគោលបំណងជួយប្រជាជនឡាវក្នុងការប្រយុទ្ធប្រឆាំងនឹងជំងឺរាតត្បាតនេះ។

សូមបញ្ចាក់ថា៖ ប្រទេសកម្ពុជាជាប្រទេស ដែលមានអត្រានៃការចាក់វ៉ាក់សាំងការពារជំងឺកូវីដ-១៩ច្រើនជាងគេនៅលើពិភពលោក អ្នកឧកញ៉ា ចេន ហ្ស៊ី ដែលជាសហគ្រិន និងជាអ្នកដឹកនាំអាជីវកម្មនៅក្នុងតំបន់មេគង្គ ដឹងយ៉ាងច្បាស់ពីសារៈសំខាន់នៃធុរកិច្ចកម្ពុជាក្នុងការជួយដល់ប្រទេសជិតខាងក្ នុងកិច្ចខិតខំប្រឹងប្រែងប្រឆាំងនឹងការរីករាលដាលនៃជំងឺកូវីដ-១៩ជាសកលនេះ។ ក្នុងនាមជាសហគ្រាសឈានមុខគេនៅកម្ពុជា ក្រុមហ៊ុន ព្រីនស៍ ហូលឌីង គ្រុប ក៏មានគោលបំណងចូលរួមចំណែកក្នុងតួនាទីនៃភាពជាអ្នកដឹកនាំរបស់ព្រះរាជាណាចក្រកម្ពុជាអំពីកិច្ចការក្នុងតំបន់ ខណៈដែលនេះជាពេលវេលាដ៏លំបាកមួយសម្រាប់ប្រជាជាតិអាស៊ីអាគ្នេយ៍ទាំងមូល។

ព្រីនស៍ ហូលឌីង គ្រុប ដែលជាក្រុមហ៊ុនពហុវិស័យឈានមុខគេ ដែលមានក្រុមហ៊ុនជាបុត្រសម្ព័ន្ធដូចជា ព្រីនស៍ រៀល អ៊ីស្ទេត គ្រុប; ធនាគារព្រីនស៍; ក្រុមហ៊ុនព្រីនស៍អចលនទ្រព្យហ័នយូ; ក្រុមហ៊ុន Belt Road Capital Management ; ក្រុមហ៊ុន Awesome Global និងក្រុមហ៊ុនអាកាសចរណ៍ Cambodia Airways បានឈានមុខគេសម្រាប់សកម្មភាពទំនួលខុសត្រូវសង្គម(CSR) នៅឆ្នាំនេះ។ ជាមួយកិច្ចការទំនួលខុសត្រូវសង្គមនេះហើយ ទើបក្រុមហ៊ុនចាប់ផ្តើមកម្មវិធីអាហារូបករណ៍ធំជាងគេបំផុតនៅប្រទេសកម្ពុជាគឺ «អាហារូបករណ៍ ចេន ហ្ស៊ី» ។ លើសពីនោះទៅទៀត ក្រុមហ៊ុនព្រីសន៍ ហូលឌីង គ្រុប បានទទួលពានរង្វាន់អន្តរជាតិចំនួនប្រាំបី និងនៅតែរក្សាបាននូវប្រតិបត្តិការអាជីវកម្ម បើទោះបីជាមានឧបសគ្គខ្លះៗក៏ដោយ។

គួរបញ្ជាក់ថាព្រីនស៍ ហូលឌីង គ្រុប (Prince Holding Group) គឺជាសម្ព័ន្ធក្រុមហ៊ុនពហុផលិតផលដ៏ធំមួយនៅកម្ពុជា ដែលមាន ក្រុមហ៊ុនជាច្រើនធ្វើការផ្តោតលើវិស័យស្នូលចំនួន ៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និងបម្រើសេវាអតិថិជន។

អាជីវកម្មសំខាន់ៗរបស់សម្ព័ន្ធក្រុមហ៊ុនព្រីនស៍គ្រុបនៅកម្ពុជា រួមមានក្រុមហ៊ុនPrince Real Estate Group ក្រុមហ៊ុនPrince Huan Yu Real Estate Group ធនាគារ Prince Bank ក្រុមហ៊ុនអាកាសចរណ៍Cambodia Airways ក្រុមហ៊ុនBelt Road Capital Management ព្រមទាំងក្រុមហ៊ុនAwesome Global Investment Group។ តាមរយៈក្រុមហ៊ុនបុត្រសម្ព័ន្ធទាំងនេះ សម្ព័ន្ធក្រុមហ៊ុនព្រីនស៍គ្រុប មានអាជីវកម្មប្រមាណជាង៨០នៅក្នុងប្រទេសកម្ពុជា ដែលកំពុងប្រតិបត្តិការលើការអភិវឌ្ឍវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ភស្តុភារ បច្ចេកវិទ្យាម្ហូបអាហារនិងភេសជ្ជៈ និងវិស័យប្រណិតភាពនៃជីវិត ។ល។

ការកើនឡើងនូវការវិនិយោគផ្ទាល់ពីបរទេស ដែលកើតចេញពីកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសឈានមុខ និងការចូលរួមនាពេលអនាគតនៅក្នុងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ត្រូវបានរំពឹងថានឹងដើរតួនាទីជាកត្តាលីករដ៏សំខាន់មួយ ក្នុងការជំរុញសេដ្ឋកិច្ចកម្ពុជា ក្រោមការគាំទ្រពីគំនិតផ្តួចផ្តើមគោលនយោបាយទ្រទ្រង់វិស័យឧស្សាហកម្មរបស់រាជរដ្ឋាភិបាល។ ដោយប្រើបណ្តាញអ្នកជំនាញផ្នែកឧស្សាហកម្ម ពាណិជ្ជកម្ម និងហិរញ្ញវត្ថុនៅទូទាំងទ្វីបអាស៊ី សម្ព័ន្ធក្រុមហ៊ុន ព្រីនស៍ គ្រុប បានកសាងមូលដ្ឋានគ្រឹះដ៏សំខាន់សម្រាប់លំហូរមូលធនក្នុងស្រុក និងអន្តរជាតិ។ សម្ព័ន្ធនេះប្តេជ្ញាយ៉ាងមុតមាំចំពោះការអភិវឌ្ឍរយៈពេលវែងរបស់ប្រទេសកម្ពុជា។

ជាក់ស្តែង សម្ព័ន្ធក្រុមហ៊ុន ព្រីនស៍ គ្រុប កំពុងតែអភិវឌ្ឍន៍គម្រោងទេសចរណ៍និងលំនៅឋានទីក្រុងរាម នាពេលខាងមុខដែលនឹងក្លាយជាគម្រោង អចលនទ្រព្យប្រកបដោយនិរន្តរភាពដំបូងគេបង្អស់នៅកម្ពុជា ក្នុងនោះដែរសម្ព័ន្ធក្រុមហ៊ុន ព្រីនស៍ គ្រុប មានគោលបំណងធានាបាននូវការវិនិយោគសរុបចំនួន១៦ពាន់លានដុល្លារអាមេរិកសម្រាប់តំបន់ទាំងមូល។ គម្រោងនេះស្ថិតនៅទីតាំងយ៉ាងងាយស្រួលដោយគ្រាន់តែធ្វើដំណើរ រយៈពេល១០នាទីពីអាកាសយានដ្ឋានអន្តរជាតិខេត្តព្រះសីហនុប៉ុណ្ណោះ ដែលក្នុងគោលបំណងរួមចំណែកដល់ការស្តារ សេដ្ឋកិច្ចរបស់ខេត្តព្រះសីហនុផងដែរ៕

The post អ្នកឧកញ៉ា ចេន ហ្ស៊ី បរិច្ចាគទឹកប្រាក់ ២ លានដុល្លារបន្ថែមទៀតដល់ឡាវ ដើម្បីប្រយុទ្ធប្រឆាំងនឹងជំងឺកូវីដ-១៩ appeared first on Kampuchea Thmey Daily.

ព្រីនស៍ គ្រុប Archives - Kampuchea Thmey Daily

យុវជន ឆ្នើម ១០០ នាក់ ទទួលបានអាហារូបករណ ចេន ហ្ស៊ី ដើម្បីបន្តការសិក្សាថ្នាក់ឧត្តមសិក្សា

មជ្ឈមណ្ឌល ព្រីនស៍ ហ័នយូ ប្រារព្ធពិធីអបអរបុណ្យគ្រីស្មាស និងពិធីបញ្ចប់គម្រោងសាងសង់អគារទី ២

ក្រៅ​ពី​មាន​គោរមងារ​ជា​ឧកញ៉ា​ លោក​មហា​សេដ្ឋី​ ចេន ហ្ស៊ី​ មាន​តួនាទី​ក្នុង​ជួរ​រាជការ​ស្មើ​រដ្ឋមន្ត្រី

អ្នកឧកញ៉ា ចេន ហ្ស៊ី បរិច្ចាគទឹកប្រាក់ ២ លានដុល្លារបន្ថែមទៀតដល់ឡាវ ដើម្បីប្រយុទ្ធប្រឆាំងនឹងជំងឺកូវីដ-១៩

ក្រៅពីមានគោរមងារជាឧកញ៉ា លោកមហាសេដ្ឋី ចេន ហ្ស៊ី មានតួនាទីក្នុងជួររាជការស្មើរដ្ឋមន្ត្រី