ភ្នំពេញ Archives - Kampuchea Thmey Daily

ឃាត់ខ្លួនជនជាតិបង់ក្លាដេស២នាក់ពាក់ព័ន្ធការចាប់ជម្រិតនៅខណ្ឌសែនសុខ

hun sirivadh — Sun, 01 Mar 2026 08:41:02 +0000

ជនជាតិបង់ក្លាដេស២នាក់ត្រូវបានឃាត់ខ្លួន និង២នាក់ទៀតបានរត់គេចខ្លួនបន្ទាប់ពីសមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam មួយកន្លែងក្នុងខណ្ឌសែនសុខ។

ការចុះបង្ក្រាបនេះបន្ទាប់ពីទទួលបណ្ដឹងពីករណីបង្ខាំង ធ្វើទារុណកម្មជំរិតយកលុយចំនួន៥ពាន់ដុល្លារនៅទីតាំងមួយកន្លែងក្នុងសង្កាត់គោកឃ្លាង ខណ្ឌសែនសុខ ថ្ងៃទី២៨ ខែកុម្ភៈ ឆ្នាំ២០២៦។ ក្រោយសមត្ថកិច្ចចុះបង្ក្រាបបានជួយសង្គ្រោះជនជាតិបង់ក្លាដេស១នាក់ និងឃាត់ខ្លួនបាន២នាក់ ខណៈ២នាក់ទៀតបានរត់គេចខ្លួន។

តាមការឱ្យដឹងពីជនរងគ្រោះថាគេត្រូវបានគេចាប់ពីទីតាំងឆបោកអនឡាញមួយកន្លែងនៅម្ដុំផ្សារខេស៊ី សង្កាត់កាកាបទី២ ខណ្ឌពោធិ៍សែនជ័យ ទោះជាយ៉ាងណាបន្ទាប់ពីសមត្ថកិច្ចបានចុះប្រតិបត្តិការលើផ្ទះដែលចង្អុលបង្ហាញនោះមិនឃើញករណីឆបោកអនឡាញទេ តែឃើញមានជនជាតិបង់ក្លាដេស១៤នាក់ផ្សេងទៀតកំពុងរស់នៅទីនោះ។ ចាប់យកកុំព្យូទ័រ៣គ្រឿង ទូរស័ព្ទ២៩គ្រឿង ម៉ូតូ១គ្រឿង និងគ្រឿងអលង្ការមួយចំនួន។

បច្ចុប្បន្នសមត្ថកិច្ចនគរបាលខណ្ឌសែនសុខ បាននាំជនសង្ស័យនិងជនរងគ្រោះមកសាកសួរនៅអធិការដ្ឋាននគរបាលខណ្ឌសែនសុខ និងចាត់ការតាមនីតិវិធីច្បាប់ ។

អត្ថបទដោយ ហ៊ុន សិរីវឌ្ឍន៍

The post ឃាត់ខ្លួនជនជាតិបង់ក្លាដេស២នាក់ពាក់ព័ន្ធការចាប់ជម្រិតនៅខណ្ឌសែនសុខ appeared first on Kampuchea Thmey Daily.

លោកស៊ុន ចាន់ថុល ជំរុញឱ្យរដ្ឋបាលរាជធានីគៀងគរអ្នកវិនិយោគឱ្យវិនិយោគនៅតាមមូលដ្ឋាន ក្នុងទំហំទុនវិនិយោគក្រោម៥លានដុល្លារ

កម្ពុជាថ្មី — Thu, 15 Jan 2026 11:34:16 +0000

លោកស៊ុន ចាន់ថុល ឧបនាយករដ្ឋមន្ត្រីទទួលបន្ទុកជាអនុ- ប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ បានជំរុញឱ្យរដ្ឋបាលរាជធានីភ្នំពេញគៀងគរអ្នកវិនិយោគ ឱ្យវិនិយោគនៅតាមមូលដ្ឋាន ពិសេសគឺការវិនិយោគក្នុងទំហំទុនវិនិយោគ៥លានដុល្លារចុះក្រោម ដើម្បីឱ្យប្រជាពលរដ្ឋរបស់យើងមានការងារធ្វើ។

ការជំរុញរបស់លោក ស៊ុន ចាន់ថុល ឧបនាយករដ្ឋមន្ត្រីទទួលបន្ទុកជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញបានធ្វើឡើងនារសៀលថ្ងៃទី១៥ ខែមករា ឆ្នាំ២០២៦នេះ អមដោយលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកឃួង ស្រេង អភិបាលនៃគណៈអភិបាលរាជធានីភ្នំពេញ អញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារ ប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលរាជធានីភ្នំពេញ នៅសណ្ឋាគាររ៉េស៊ីដងសុខាភ្នំពេញ។

លោកស៊ុន ចាន់ថុល បានមានប្រសាសន៍ថា រដ្ឋបាលរាជធានីភ្នំពេញ ជាទិសដៅខាងមុខនេះត្រូវបន្តការគៀងគរ អ្នកវិនិយោគ ឱ្យវិនិយោគនៅតាមមូលដ្ឋាន ពិសេសគឺការវិនិយោគក្នុងទំហំទុនវិនិយោគ ក្រោម៥លានដុល្លារចុះក្រោម ដើម្បីឱ្យបងប្អូនប្រជាពលរដ្ឋមានការងារធ្វើស្របទៅតាមការចង់បានរបស់រាជរដ្ឋាភិបាល។ ពាក់ព័ន្ធនិងការគៀងគរ អ្នកវិនិយោគនេះ ក្រុមប្រឹក្សាអភិវឌ្ឍន៍កម្ពុជាបានខិតខំដើរទាក់ម៉ូយខ្លាំង ដើម្បីស្វែងរកអ្នកវិនិយោគ នៅកម្ពុជា។

លោកស៊ុន ចាន់ថុល បញ្ជាក់ទៀតថា ក្នុងឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាដើរទាក់ម៉ូយអ្នកវិនិយោគបាន៦៣០គម្រោង ក្នុងទំហំទឹកប្រាក់ប្រមាណ១០ពាន់លានដុល្លារអាមេរិក ខណៈដែលនៅក្នុងឆ្នាំ២០២៤ មានត្រឹមតែ៤១៤គម្រោងប៉ុណ្ណោះ មានន័យថា ក្នុង១ឆ្នាំៗ គម្រោងវិនិយោគចេះតែកើនឡើងរហូត យើងនឹងបន្តខិតខំប្រឹងប្រែងបន្ថែមទៀត ដើម្បីឱ្យកម្ពុជាទទួលបានការវិនិយោគកាន់តែច្រើន។បន្តែមពីនេះលោក ស៊ុន ចាន់ថុល ក៏បានណែនាំឱ្យរដ្ឋបាលរាជធានីភ្នំពេញបន្តខិតខំ ពង្រឹងស្ថេរភាពនយោបាយ ។បន្តថែរក្សាសន្តិសុខ សុវត្ថិភាពជូនប្រជាពលដ្ឋ ខិតខំទប់ស្កាត់ព័ត៌មានក្លែងក្លាយបំភ្លើសការពិតនាំអាប់ឱនជាតិ។បន្តទប់ស្កាត់បទល្មើសគ្រប់ប្រភេទ លួច ឆក់ ប្លន់ ល្បែង ស៊ីសង ពិសេសការបង្ក្រាបការឆបោកតាមប្រព័ន្ធបច្ចេកវិទ្យា (ONLINE SCAMS)។

ជាងនេះទៀតលោក ស៊ុន ចាន់ថុល ក៏បានជំរុញឱ្យរដ្ឋបាលរាជធានីភ្នំពេញបន្តការ កសាងហេដ្ឋារចនាសម្ព័ន្ធនានា ដូចជាផ្លូវ លូ ប្រឡាយ សួនច្បារ។ ធ្វើអនាម័យ បរិស្ថាន កាងារមនុស្សធម៌ ការងារសង្គ្រោះ និងការដោះស្រាយគ្រោះមហន្តរាយជាដើម។

ក្នុងឱកាសនោះដែរលោក ឃួង ស្រេង អភិបាលរាជធានីភ្នំពេញបានលើកឡើងពីសមទ្ធិផល និងស្នាដៃការងារសំខាន់ៗ ដែលរដ្ឋបាលរាជធានីភ្នំពេញ សម្រេចបានកន្លងមក នៅក្នុងឆ្នាំ២០២៥នេះ ដែលសមិទ្ធផលទាំងនេះ ពិតជាបានកើតចេញពីធម្មនុញ្ញផល នៃសុខសន្តិភាព និងស្ថេរភាពនយោបាយ ។

បន្ថែមពីនេះលោក ឃួង ស្រេង បានគូសបញ្ជាក់ នូវសមទ្ធិផល និងស្នាដៃការងារសំខាន់ៗ ចំនួន៦ធំៗ របស់រដ្ឋបាលរាជធានីភ្នំពេញ សម្រេចបានក្នុងឆ្នាំ២០២៥ ក្នុងនោះរួមមាន ការបញ្ចប់ការសាងសង់ នូវស្ពានអាកាសមរតកសម្តេចតេជោ ស្ពានអាកាសសម្តេចបវរធិបតី ដែលជាស្ពានអាកាសទី១ ក្នុងអាណត្តិ រាជរដ្ឋាភិបាល នីតិកាលទី៧ នៃរដ្ឋសភា និងផ្លូវប៉េតុងឆ្អឹងដែក តាមបណ្តោយអតីតផ្លូវរថភ្លើង ស្ថិតនៅក្នុងមូលដ្ឋានខណ្ឌឬស្សីកែវ ។ សម្រេចបាន៩៨% នៃការអភិវឌ្ឍគម្រោងវិនិយោគ ហេដ្ឋារចនាសម្ព័ន្ធប្រព័ន្ធប្រឡាយលូ និងប្រពន្ធរំដោះទឹក សម្រាប់បញ្ជៀសការជនលិច ក្នុងភូមិសាស្ត្ររាជធានីភ្នំពេញ តាមរយៈការផ្តល់កញ្ចប់ហិរញ្ញប្បទានពិសេស របស់រាជរដ្ឋាភិបាល នីតិកាលទី៧ ក្រោមការដឹកនាំដ៏ខ្ពង់ខ្ពស់បំផុត របស់សម្តេចធិបតី នាយករដ្ឋមន្ត្រី។

ការផ្តល់សេវាសាធារណៈ ជូនប្រជាពលរដ្ឋ តាមយៈច្រកចេញចូលតែមួយ របស់រាជធានីភ្នំពេញ ១១៦៧២៧សេវា ដែលទទួលបានចំណូលបង់ចូលថវិការដ្ឋ សរុបប្រមាណជា ១៧លានដុល្លារសហរដ្ឋអាមេរិក ។ ការដាក់ឱ្យដំណើរការសាកល្បង នូវតំបន់ផ្លូវថ្មើរជើងដំបូងគេ នៅព្រះរាជាណាចក្រកម្ពុជា គឺផ្លូវថ្មើរជើងចតុមុខ«”Chaktomuk Walk Street”» ក្រោមការចង្អុលបង្ហាញដ៏ខ្ពង់ខ្ពស់ របស់សម្តេចធិបតី នាយករដ្ឋមន្ត្រី ដែលបានទាក់ទាញភ្ញៀវទេសចរជាតិ និងអន្តរជាតិ យ៉ាងច្រើនកុះករ ព្រមទាំងទទួលបាននូវការទទួលស្គាល់ ដោយគេហទំព័រទេសចរណ៍ និងព័ត៌មានអន្តរជាតិជាច្រើន៕

អត្ដបទៈ ស្រីរ័ត្ន

The post លោកស៊ុន ចាន់ថុល ជំរុញឱ្យរដ្ឋបាលរាជធានីគៀងគរអ្នកវិនិយោគឱ្យវិនិយោគនៅតាមមូលដ្ឋាន ក្នុងទំហំទុនវិនិយោគក្រោម៥លានដុល្លារ appeared first on Kampuchea Thmey Daily.

៣ ខែចុងក្រោយ មានមនុស្សស្លាប់រហូតដល់ ៧៧ នាក់ ដោយសារគ្រោះថ្នាក់ចរាចរណ៍ នៅរាជធានីភ្នំពេញ

អ៊ិន ពិសី — Mon, 13 Oct 2025 03:45:11 +0000

រយៈពេល ៣ ខែ ចុងក្រោយនេះ មានករណីគ្រោះថ្នាក់ចរាចរណ៍បានកើនឡើង បណ្ដាលឲ្យមនុស្សស្លាប់រហូតដល់ ៧៧ នាក់ នៅរាជធានីភ្នំពេញ។ នេះបើតាមការបញ្ជាក់ពីលោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នាពេលថ្មីៗ នេះ។

លោកឧត្ដមសេនីយ៍ឯក ជួន ណារិន្ទ លើកឡើងថា រយៈពេលជាង ៣ ខែ កម្លាំងសមត្ថកិច្ច បានធ្វើការដកស្រង់បទពិសោធ ដោយមិនផាកពិន័យចំពោះយានយន្តល្មើសច្បាប់ចរាចរណ៍ផ្លូវគោក បើកបរបញ្ច្រាសទិស មិនពាក់មួកសុវត្ថិភាព ល្មើសភ្លើងសញ្ញាចរាចរណ៍ និង បើកលើសល្បឿនកំណត់ ឡើយ។

លោកបញ្ជាក់ថា រយៈពេល ៣ ខែ ចុងក្រោយនេះ ករណីគ្រោះថ្នាក់ចរាចរណ៍បានកើនឡើង បណ្ដាលឲ្យមានមនុស្សស្លាប់រហូតដល់ ៧៧ នាក់ នៅរាជធានីភ្នំពេញ។ ហេតុដូចនេះ លោក នឹងធ្វើការស្នើសុំទៅលោកឧបនាយករដ្ឋមន្ត្រី ស សុខា ក្នុងការអនុវត្តច្បាប់ចរាចរណ៍ឡើងវិញ ដើម្បីកាត់បន្ថយករណីគ្រោះថ្នាក់ចរាចរណ៍។

លោកបន្តទៀតថា នេះជាការសាកល្បង ដោយគ្មានមន្ត្រីចរាចរណ៍អនុវត្តផាកពិន័យទេ គ្រាន់តែអប់រំណែនាំប៉ុណ្ណោះ។ មន្ត្រីចរាចរណ៍ទាំងអស់ គ្រាន់តែជួយសម្រួលចរាចរណ៍ជូនប្រជាពលរដ្ឋតែប៉ុណ្ណោះ ប៉ុន្តែការសាកល្បងមិនមានមន្ត្រីអនុវត្តច្បាប់នោះទេ នៅតែមានអ្នកល្មើសច្បាប់ច្រើនជាងមុនទៅទៀត ខ្លះទៀតរហូតដល់បាត់បង់អាយុជីវិតទៀតផង។

លោកឧត្ដមសេនីយ៍ឯក ជួន ណារិន្ទ ក៏បានសំណូមពរទៅដល់ប្រជាពលរដ្ឋដែលធ្វើដំណើរទាំងអស់ សូមមេត្តាចូលរួមគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ដល់បាត់បង់អាយុជីវិត៕

អត្ថបទ ៖ ម៉េង

The post ៣ ខែចុងក្រោយ មានមនុស្សស្លាប់រហូតដល់ ៧៧ នាក់ ដោយសារគ្រោះថ្នាក់ចរាចរណ៍ នៅរាជធានីភ្នំពេញ appeared first on Kampuchea Thmey Daily.

លោក ឃួង ស្រេង បញ្ជាឱ្យមានវិធានការបង្ក្រាបការឆបោកតាមអនឡាញឱ្យអស់

hun sirivadh — Sat, 05 Jul 2025 02:08:21 +0000

អភិបាលរាជធានីភ្នំពេញលោក ឃួង ស្រេង បានបញ្ជាទៅរដ្ឋបាលខណ្ឌទាំង១៤ បង្ក្រាបឱ្យអស់បញ្ហាគ្រឿងញៀន និងការឆបោកតាមអនឡាញ ដើម្បីធានាដល់សុវត្ថិភាព ការរស់នៅរបស់ពលរដ្ឋ។ លោកថាបើចង់ធ្វើអភិបាលខណ្ឌត្រូវតែនៅជាមួយពលរដ្ឋគ្មានថ្ងៃសៅរ៍ និងអាទិត្យនោះទេ។

ថ្លែងក្នុងកិចប្រជុំគណៈបញ្ជាការឯកភាពរាជធានីភ្នំពេញជាមួយកម្លាំងមានសមត្ថកិច្ចមកពីមន្ទីរពាក់ព័ន្ធ និងអាជ្ញាធរខណ្ឌទាំង១៤ នៅព្រឹកថ្ងៃទី៤ ខែកក្កដា ឆ្នាំ២០២៥ នៅសាលារាជធានីភ្នំពេញ លោក ឃួង ស្រេង បានបញ្ជាឱ្យអាជ្ញាធរខណ្ឌទាំង១៤ត្រូវមានម្ចាស់ការក្នុងការបង្ក្រាបគ្រឿងញៀន លុបបំបាត់ការជក់បារីអេឡិចត្រូនិក និងបទល្មើសឆបោកអនឡាញឱ្យបានល្អ។

លោកថា៖ «គ្រឿងញៀន និងការឆបោកតាមប្រព័ន្ធបច្ចេកវិទ្យាជារឿងដែលត្រូវបង្ក្រាបជាប្រចាំ ដូច្នេះអាជ្ញាធរខណ្ឌទាំង១៤ ត្រូវពិនិត្យតាមខុនដូ និងបុរីដែលមានការសង្ស័យថាបាននិងកំពុងធ្វើសកម្មភាពឆបោកតាមប្រព័ន្ធបច្ចេកវិទ្យានេះ»។

លោកអភិបាលក៏បញ្ជាក់ផងដែរថាការងារទាំងនេះបើខណ្ឌគ្មានកម្លាំងគ្រប់គ្រាន់ ត្រូវស្នើសុំកម្លាំងបន្ថែម ហើយគណៈបញ្ជាការឯកភាពរាជធានីនឹងរកថវិកាជួយទ្រទ្រង់ការងារនេះ ដើម្បីប្រតិបត្តិការឱ្យបានសកម្ម៕

អត្ថបដោយ ហ៊ុន សិរីវឌ្ឍន៍

The post លោក ឃួង ស្រេង បញ្ជាឱ្យមានវិធានការបង្ក្រាបការឆបោកតាមអនឡាញឱ្យអស់ appeared first on Kampuchea Thmey Daily.

«ឆ្នាំទេសចរណ៍ កម្ពុជា-ចិន ២០២៥» នឹងបើកជាផ្លូវការនៅរាជធានីភ្នំពេញរយៈពេល៣ថ្ងៃចាប់ពីថ្ងៃពុធនេះ

May Kunmakara — Tue, 20 May 2025 02:52:20 +0000

ក្រសួងទេសចរណ៍សហការជាមួយស្ថានទូតចិន ប្រចាំនៅកម្ពុជា និងក្រសួង-ស្ថាប័នពាក់ព័ន្ធ នឹងរៀបចំពិធីបើកជាផ្លូវការ «ឆ្នាំទេសចរណ៍ កម្ពុជា-ចិន ២០២៥» ចាប់ពីថ្ងៃទី២៣ ខែឧសភា ឆ្នាំ២០២៥ខាងមុខនេះដើម្បីជំរុញការផ្លាស់ប្តូរទេសចរណ៍ វប្បធម៌ ប្រពៃណី និងការរស់នៅរបស់ប្រជាពលរដ្ឋរវាងប្រទេសទាំងពីរ។

យោងតាមសេចក្តីជូនដំណឹងរបស់ ព្រឹត្តិការណ៍នេះគឺជាការសហការរៀបចំរវាងក្រសួងទេសចរណ៍ សហការជាមួយស្ថានទូតចិន ប្រចាំព្រះរាជាណាចក្រកម្ពុជា និងក្រសួង-ស្ថាប័នពាក់ព័ន្ធ នឹងរៀបចំពិធីបើកជាផ្លូវការ «ឆ្នាំទេសចរណ៍ កម្ពុជា-ចិន ២០២៥» នាថ្ងៃទី២៣ ខែឧសភា ឆ្នាំ២០២៥ ដែលការរៀបចំព្រឹត្តិការណ៍នេះ ជាលទ្ធផលនៃដំណើរទស្សនកិច្ចផ្លូវរដ្ឋរបស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន មកកាន់ព្រះរាជាណាចក្រកម្ពុជា កាលពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥ ដោយប្រមុខរដ្ឋាភិបាលទាំងពីរ បានឯកភាពកំណត់យកឆ្នាំ២០២៥ ជា “ឆ្នាំទេសចរណ៍ កម្ពុជា-ចិន»។

ក្រសួងថាព្រឹត្តិការណ៍នេះ នឹងមានការសម្តែងទស្សនីយភាពសិល្បៈរួមគ្នា កម្ពុជា-ចិន នាល្ងាចថ្ងៃទី២៣ ខែឧសភា ឆ្នាំ២០២៥ នៅសាលសន្និសីទចតុម្មុខ។ ដោយឡែក នៅថ្ងៃទី២៤ និងថ្ងៃទី២៥ ខែឧសភា ឆ្នាំ២០២៥ នឹងមានការសម្តែងទស្សនីយភាពសិល្បៈរួមគ្នា កម្ពុជា-ចិន សម្រាប់មហាជនទស្សនា នៅបរិវេណសួនច្បារ តេជោមាសតេជោយ៉ត តាមបណ្តោយផ្លូវថ្មើជើងមាត់ទន្លេចតុមុខ។

«ក្រសួងទេសចរណ៍ សូមអំពាវនាវដល់ សាធារណជន សមាគម ទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ-អន្តរជាតិ និងភាគីពាក់ព័ន្ធ នានា មេត្តាជ្រាប និងចូលរួមឱ្យបានច្រើនកុះករ ព្រមទាំងចូលរួមផ្សព្វផ្សាយព្រឹត្តិការណ៍ខាងលើ ឱ្យបានទូលំទូលាយ តាមគ្រប់មធ្យោបាយ និងគ្រប់រូបភាព សំដៅទាក់ទាញចំណាប់អារម្មណ៍ភ្ញៀវទេសចរ និងវិនិយោគិនចិនឱ្យមក ទស្សនា និងវិនិយោគនៅកម្ពុជាឱ្យកាន់តែច្រើនបន្ថែមទៀត»។ នេះបើយោងតាមក្រសួងទេសចរណ៍។

យោងតាមក្រសួងទេសចរណ៍ កម្ពុជាបានស្វាគមន៍ភ្ញៀវទេចរអន្តរជាតិជាង ១,៨៣ លាននាក់ក្នុងត្រីមាសទី១ កើនឡើង១៦,១%ធៀបនឹងរយៈពេលដូចគ្នាកាលពីឆ្នាំមុន បង្ហាញអំពីភាពល្អប្រសើរនៃលំហូរទេសចរណ៍ទាំងក្នុងតំបន់ និងសកលលោក ក្នុងនោះមានភ្ញៀវទេសចរឥណ្ឌូនេស៊ីជាង ៤ ម៉ឺននាក់ កើន៧%។

ក្នុងចំណោមភ្ញៀវទេសចរជាង ១,៨៣ លាននាក់ ទេសចរណ៍ថៃឈរនៅលំដាប់លេខរៀងទី ១ មានចំនួនជាង ៥០,១៦ ម៉ឺននាក់ កើន ១៩,៥% វៀតណាមជាង ៣០,៤៦ ម៉ឺននាក់ កើន ១,៨% និងចិនជាង ២៨,៦១% កើន ៥០,៦%។

នៅក្នុងឆ្នាំ២០២៤ កម្ពុជាទទួលបានភ្ញៀវទេសចរណ៍អន្តរជាតិជាង ៦,៧ លាននាក់ កើនឡើងជិត ២៣ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់៕

The post «ឆ្នាំទេសចរណ៍ កម្ពុជា-ចិន ២០២៥» នឹងបើកជាផ្លូវការនៅរាជធានីភ្នំពេញរយៈពេល៣ថ្ងៃចាប់ពីថ្ងៃពុធនេះ appeared first on Kampuchea Thmey Daily.

ចូលឆ្នាំថ្មីឆ្នាំម្សាញ់នេះ នៅភ្នំពេញ នឹងបើកឱ្យមានការលេងកម្សាន្តសប្បាយ រហូត ៥ ថ្ងៃ ចាប់ពីថ្ងៃទី ១២ មេសា តទៅ

អ៊ិន ពិសី — Tue, 01 Apr 2025 09:54:03 +0000

ដើម្បីចូលរួមអបអរឆ្នាំថ្មី ឆ្នាំម្សាញ់ ព.ស ២៥៦៨ រដ្ឋបាលរាជធានីភ្នំពេញ នឹងរៀបចំកម្មវិធីដ៏អធិកអធម សង្ក្រាន្តវត្តភ្នំ ឆ្នាំ ២០២៥ ដោយកម្មវិធីនេះ នឹងប្រារព្ធធ្វើឡើងនៅរមណីយដ្ឋានប្រវត្តិសាស្ត្រវត្តភ្នំ ចំនួន ៣ ថ្ងៃ ត្រូវនឹងថ្ងៃទី ១៤, ១៥ និង ថ្ងៃទី ១៦ ខែមេសា ឆ្នាំ ២០២៥ បន្ថែមនេះ សម្រាប់ផ្លូវថ្មើរជើង ឬ Walk Street វិញ ក៏បានរៀបចំមុនថ្ងៃចូលឆ្នាំ ២ ថ្ងៃ ហើយថែម ៣ ថ្ងៃ ក្នុងថ្ងៃចូលឆ្នាំ ឡើងដល់ ៥ ថ្ងៃ សម្រាប់បម្រើជូនប្រជាពលរដ្ឋ និងទេសចរជាតិ-អន្តរជាតិ កម្សាន្តសប្បាយ។ នេះបើតាមការបញ្ជាក់ពីលោកស្រី ដោ សម្ផស្ស អ្នកនាំពាក្យសាលារាជធានីភ្នំពេញ។

លោកស្រី ដោ សម្ផស្ស បានបន្តថា សង្ក្រាន្តវត្តភ្នំ ឆ្នាំ ២០២៥ នេះ រដ្ឋបាលរាជធានីភ្នំពេញ នឹងរៀបចំឱ្យមានពិធីសាសនា ដូចជា ការទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះជាដើម។ ដោយឡែកសម្រាប់កម្មវិធីកម្សាន្តសប្បាយៗ មានដូចជា ការសម្តែងសិល្បៈរបាំប្រពៃណី មានរបាំទ្រុត ចាប៉ីដងវែង ល្ខោនយីកេ ល្ខោនមហោរី ការលេងល្បែងប្រជាប្រិយជាតិដែលជាកេរដំណែលដូនតាខ្មែរ និងមានប្រគំតន្ត្រី បុរាណ-សម័យ ការរាំលេងកម្សាន្តគ្រប់ទម្រង់ និងគ្រប់ចង្វាក់ភ្លេង និងតាំងពិព័រណ៍ផលិតផលខ្មែរនៅរមណីយដ្ឋានប្រវត្តិសាស្ត្រវត្តភ្នំនេះតែម្ដង។ ជាមួយគ្នានេះ រដ្ឋបាលរាជធានី ក៏បានលើកទឹកចិត្តឱ្យពលរដ្ឋដែលចូលរួម ស្លៀកសម្លៀកបំពាក់ប្រពៃណី ក្នុងកម្មវិធីប្រពៃណីខ្មែរ ដើម្បីលើកស្ទួយដល់វប្បធម៌ជាតិផងដែរ។ បន្ថែមពីនេះ រដ្ឋបាលរាជធានីភ្នំពេញ នឹងភ្ជាប់ផ្លូវថ្មើរជើង Walk Street ជាមួយការរៀបចំសង្ក្រាន្តវត្តភ្នំផងដែរ ពោលគឺផ្លូវថ្មើរជើង នឹងបើកបន្តដល់ ៥ ថ្ងៃ ដោយបន្ថែម ៣ ថ្ងៃ នៃថ្ងៃបុណ្យចូលឆ្នាំខ្មែរ រហូតដល់បញ្ចប់បុណ្យចូលឆ្នាំថ្មី។

លោកស្រីបន្តទៀតថា ឆ្នាំនេះ ទីតាំងកម្សាន្ត គឺមានបរិវេណធំជាងឆ្នាំកន្លងទៅ ហើយអ្វីដែលចាប់អារម្មណ៍ នៅផ្លូវថ្មើរជើង Walk Street គឺធ្វើនៅថ្ងៃសៅរ៍ និងថ្ងៃអាទិត្យ ចំថ្ងៃទី ១២ និងទី ១៣ ខែមេសា សម្រាប់ថ្ងៃចូលឆ្នាំគឺចាប់ពីថ្ងៃទី ១៤-១៥-១៦ ដូច្នេះ រដ្ឋបាលរាជធានីភ្នំពេញ នឹងរៀបចំឱ្យមានកម្មវិធីនេះ ចាប់ពីថ្ងៃទី ១២ រហូតដល់ថ្ងៃទី ១៦ ភ្ជាប់គ្នាតែម្ដង។ រមណីយដ្ឋានវត្តភ្នំ នឹងធ្វើសង្ក្រាន្តរយៈពេល ៣ ថ្ងៃ ១៤ ដល់ ១៦ តាំងពីម៉ោង ៨ ព្រឹក ដល់ម៉ោង ២០ យប់ មានកម្មវិធីបែបប្រពៃណី កម្មវិធីសប្បាយកម្សាន្តជាច្រើន មានការទទួលទេវតា ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈរបាំប្រពៃណី លេងល្បែងប្រជាប្រិយជាតិ មានប្រគំតន្ត្រី បុរាណ-សម័យ ការរាំលេងកម្សាន្ត និងតាំងពិព័រណ៍ផលិតផលខ្មែរ នៅរមណីយដ្ឋានប្រវត្តិសាស្ត្រវត្តភ្នំ ដោយឡែកចំពោះ Walk Street វិញ នៅថ្ងៃចូលឆ្នាំនេះ នឹងបើករយៈពេល ៥ ថ្ងៃតែម្ដង ដោយចាប់តាំងពីថ្ងៃទី ១២ ដល់ ១៦ អញ្ចឹងខុសប្លែកពីរាល់សប្ដាហ៍ ដែលធ្វើតែ ២ ថ្ងៃ នៅសប្ដាហ៍ នៃថ្ងៃចូលឆ្នាំ ហ្នឹង គឺធ្វើរហូតដល់ ៥ ថ្ងៃ។

រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋគ្រប់មជ្ឈដ្ឋានទាំងអស់ អញ្ជើញមកចូលរួមទស្សនាកម្សាន្តសប្បាយ នៅសង្ក្រាន្តវត្តភ្នំ និងផ្លូវថ្មើរជើង របស់រដ្ឋបាលរាជធានីភ្នំពេញ ឱ្យបានច្រើនកុះករ ក្រោមម្លប់សន្តិភាពដ៏ត្រជាក់ត្រជំនេះ។

លោកស្រីអ្នកនាំពាក្យ បានបន្ថែមថា ក្រៅពីការរៀបចំសង្ក្រាន្តវត្តភ្នំ អាជ្ញាធរមូលដ្ឋានតាមបណ្តាខណ្ឌទាំង ១៤ ខណ្ឌ ក៏បានត្រៀមរៀបចំធ្វើសង្ក្រាន្តរបស់ខណ្ឌនីមួយៗ ដែរ។ សម្រាប់ការការពារសន្តិសុខសណ្ដាប់ធ្នាប់ និងរបៀបរៀបរយសាធារណៈវិញ រដ្ឋបាលរាជធានីភ្នំពេញ នឹងធានាជូនប្រជាពលរដ្ឋអាចមកលេងកម្សាន្តដោយភាពរីករាយ ដោយមិនមានក្តីបារម្ភ ដោយសាររដ្ឋបាលរាជធានីភ្នំពេញ មិនបានកាត់បន្ថយកម្លាំង ឬវិធានការណាមួយឡើយ ពោលគឺរដ្ឋបាលរាជធានីភ្នំពេញបានត្រៀមរួចរាល់ក្នុងការផ្តល់នូវការថែរក្សាសន្តិសុខសណ្តាប់ធ្នាប់ របៀបរៀបរយសាធារណៈជូនប្រជាពលរដ្ឋ។

សូមរំលឹកថា ទំនៀមទំលាប់ពិធីចូលឆ្នាំប្រព្រឹត្តទៅចំនួន ៣ ថ្ងៃ។ ថ្ងៃដំបូងជាថ្ងៃមហាសង្ក្រាន្ត , ថ្ងៃទី ២ ជាថ្ងៃ វនបត , ថ្ងៃទី៣ ជាថ្ងៃឡើងស័ក។ រីឯការកំណត់ខែ ថ្ងៃ ម៉ោង នាទីដែលឆ្នាំចាស់ត្រូវផុតកំណត់ ហើយទេព្ដាឆ្នាំថ្មីត្រូវចុះមកទទួលតំណែងពីទេព្តាឆ្នាំចាស់នោះ គេអាចដឹងបាន ដោយប្រើក្បួនហោរាសាស្ត្របុរាណ គឺក្បួនមហាសង្ក្រាន្ត៕

អត្ថបទ ៖ ស្រីរ័ត្ន

The post ចូលឆ្នាំថ្មីឆ្នាំម្សាញ់នេះ នៅភ្នំពេញ នឹងបើកឱ្យមានការលេងកម្សាន្តសប្បាយ រហូត ៥ ថ្ងៃ ចាប់ពីថ្ងៃទី ១២ មេសា តទៅ appeared first on Kampuchea Thmey Daily.

អភិបាលរាជធានីភ្នំពេញថាការដាក់អនុវត្តន៍ផ្លូវថ្មើរជើងធ្វើឱ្យអាជីវករលក់ដាច់ជាងមុន

hun sirivadh — Mon, 10 Feb 2025 04:11:13 +0000

អភិបាលរាជធានីភ្នំពេញលោក ឃួង ស្រេង ថាការអនុវត្តន៍ផ្លូវថ្មើរជើងមុខវាំងកំពុងទទួលបានលទ្ធផលវិជ្ជមានដោយមានភ្ញៀវមកលេងច្រើន ហើយការប្រកបអាជីវកម្មកាន់តែប្រសើរ។

ថ្លែងប្រាប់អ្នកយកព័ត៌មានក្នុងពេលចុះពិនិត្យការអនុវត្តន៍ផ្លូវថ្មើរជើងមុខវាំងសប្ដាហ៍ទី២ នៅថ្ងៃទី៩ ខែកុម្ភៈ ឆ្នាំ២០២៥ លោក ឃួង ស្រេង ថាសប្ដាហ៍នេះមានភ្ញៀវជាច្រើនចូលទទួលទានអាហារតាមភោជនីយដ្ឋាននៅតាមផ្លូវថ្មើរជើងនេះ ដែលធ្វើឱ្យអ្នកលក់ៗអស់លឿនជាងថ្ងៃធម្មតា។

អភិបាលរាជធានីភ្នំពេញបញ្ជាក់ថាក្នុងសប្ដាហ៍ទី២នេះការអនុវត្តន៍សាកល្បងផ្លូវថ្មើរជើងនេះតាមការសង្កេត មានភ្ញៀវជាតិ-អន្តរជាតិមកលែងកំសាន្តជាច្រើនកើនលើសសប្តាហ៍មុនទៅទៀត។

លោកថា៖ «ពីមួយថ្ងៃទៅមួយថ្ងៃពលរដ្ឋពេញចិត្ត មកកម្សាន្តផ្លូវថ្មើរជើង ដែលជាការសាកល្បងរបស់រដ្ឋបាលរាជធានីភ្នំពេញ ដែលទាំងអស់នេះជាការគាំទ្រ និងលើកទឹកចិត្តដល់រដ្ឋបាលរាជធានីភ្នំពេញ »។

លោក ឃួង ស្រេង សង្ឃឹមថាដំណើរការសាកល្បងនេះនឹងទទួលបានជោគជ័យហើយនឹងបន្តរៀបចំឱ្យមានរបៀបរៀបរយជាងនេះទៅទៀត ដើម្បីទាកទាញភ្ញៀវជាតិ និងអន្តរជាតិ ឱ្យចូលរួមកម្សាន្តសប្បាយ។

ចំពោះបញ្ហានេះទីតាំងចតឡាន ម៉ូតូវិញ រហូតមកដល់ពេលនេះសាលារាជធានីភ្នំពេញមិនទាន់អាចរកទីតាំងបាននៅឡើយទេ តែម្ចាស់ឡានអាចផ្ញើបាននៅតាមទីតាំងឯកជនមួយចំនួននៅអតីតពន្ធនាគារតេ៣ ដោយឡែកសម្រាប់ម៉ូតូ អាចផ្ញើបាននៅសាលសន្និសីទចតុមុខ ក្នុងតម្លៃត្រឹមតែ១ពាន់រៀល។

គួរឱ្យដឹងថាការសាកល្បងផ្លូវថ្មើរជើង (Walk Street) ត្រូវបានសាលារាជធានីភ្នំពេញធ្វើឡើងនៅរៀងរាល់ថ្ងៃសៅរ៍ និងថ្ងៃអាទិត្យ ដោយចាប់ពីម៉ោង ៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ស្ថិតនៅក្នុងខណ្ឌដូនពេញ រាជធានីភ្នំពេញ៕

អត្ថបទដោយ ស្រី រ័ត្ន

The post អភិបាលរាជធានីភ្នំពេញថាការដាក់អនុវត្តន៍ផ្លូវថ្មើរជើងធ្វើឱ្យអាជីវករលក់ដាច់ជាងមុន appeared first on Kampuchea Thmey Daily.

ឆ្លងចរន្តអគ្គិសនីឆេះបន្ទប់KTVមួយផ្អើលខណ្ឌ៧មករា

hun sirivadh — Sun, 09 Feb 2025 09:19:08 +0000

KTV មួយកន្លែងនៅក្នុងខណ្ឌ៧មករា ឆ្លងចរន្តអគ្គិសនីឆេះផ្អើលខណ្ឌទាំងព្រឹកថ្ងៃទី៩ ខែកុម្ភៈ ឆ្នាំ២០២៥នេះ ទោះជាយ៉ាងណាមិនមាននរណាម្នាក់រងគ្រោះពីហេតុការណ៍ភ្លើងឆេះនេះទេ។

ហេតុការណ៍នេះបង្កភ្ញាក់ផ្អើលកាលពីវេលាម៉ោង១០និង២០នាទីព្រឹកនេះ នៅចំណុច«ខេធីវីយេស» ជាន់ទី០៤ តាមបណ្តោយផ្លូវលេខ ១៣៩ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។ បើតាមការបញ្ជាក់ពីពលរដ្ឋបានអោយដឹងថា គេបានឮសម្លេងផ្ទុះ ស្រាប់តែមានផ្សែងហ៊ុយឃ្មួលឃ្មាញ់ លាយលំភ្លើងបានឆាបឆេះយ៉ាងសន្ធោសន្ធៅ ចេញពីជាន់ទី០៤ បង្កឲ្យមានការភ្ញាក់ផ្អើលដល់ប្រជាពលរដ្ឋប្រញាប់រាយការណ៍ ទៅកាន់សមត្ថកិច្ចមូលដ្ឋាន រករថយន្តពន្លត់អគ្គិភ័យមកជួយពន្លត់ ។

អគ្គិភ័យនេះបានឆាបឆេះបន្ទប់ខេធីវីចំនួន០១បន្ទប់រួមទាំងសម្ភារៈអស់ទាំងស្រុង ក្នុងនោះប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ក្រសួងមហាផ្ទៃ និងក្រុមហ៊ុនឯកជនអស់ជាច្រើនឡានទើបអាចបាញ់អោយរលត់ជាស្ថាពរ។ ចំណែកមូលហេតុសមត្ថកិច្ចបានស្រាវជ្រាវរកឃើញថា បណ្តាលមកពី ឆ្លងចរន្តអគ្គិសនីចេញពីពិដាន ៕

អត្ថបទ ៖ រដ្ឋា

The post ឆ្លងចរន្តអគ្គិសនីឆេះបន្ទប់KTVមួយផ្អើលខណ្ឌ៧មករា appeared first on Kampuchea Thmey Daily.