មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល Archives - Kampuchea Thmey Daily

គិតត្រឹមខែមេសា ការសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបាន ៥៧,៤៤%

Ken Malis — Thu, 30 Apr 2026 02:15:54 +0000

គិតត្រឹមខែមេសា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផល ៥៧,៤៤% បន្ទាប់ពីបានចាប់ផ្ដើមសាងសង់ជាផ្លូវការ កាលពីថ្ងៃទី៩ ខែធ្នូ ឆ្នាំ២០២៤ កន្លងទៅ។

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល បានដឹកនាំកិច្ចប្រជុំត្រួតពិនិត្យវឌ្ឍនភាពរួមគ្នា លើកទី៣ នៃគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលក្រោមឥណទានកម្ចី (EDCFLoan) របស់សាធារណរដ្ឋកូរ៉េ។

កិច្ចប្រជុំ នៅថ្ងៃទី២៩ ខែមេសា ឆ្នាំ២០២៦ បានផ្តោតលើការពិនិត្យវឌ្ឍនភាពរួមគ្នា លើការងារសាងសង់ ការងារបណ្តុះបណ្តាល ការងារផ្គត់ផ្គង់បរិក្ខារពេទ្យ និងប្រព័ន្ធគ្រប់គ្រងមន្ទីរពេទ្យអេឡិចត្រូនិច និងជាពិសេសការងារសម្របសម្រួលនិងការដោះស្រាយនូវបញ្ហាប្រឈមផ្សេងៗ ដើម្បីជំរុញឱ្យគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាលបានប្រព្រឹត្តទៅដោយជោគជ័យ។

លោកស្រីនាយកគម្រោង បានថ្លែងអំណរគុណចំពោះគ្រប់ភាគីពាក់ព័ន្ធ ដែលបានខិតខំបំពេញការងាររបស់ខ្លួនប្រកបដោយភាពទទួលខុសត្រូវខ្ពស់ និងបានផ្តល់អនុសាសន៍ណែនាំឱ្យក្រុមហ៊ុនទាំងបី ត្រូវយកចិត្តទុកដាក់អនុវត្តការងារតាមកិច្ចសន្យា ឱ្យទទួលបានជោគជ័យ និងជាពិសេស ត្រូវយកចិត្តទុកដាក់ ក្នុងពេលរដូវវស្សាដែលអាចមានការជន់លិច ហើយប៉ះពាល់ដល់ដំណើរការសាងសង់ និងបំពាក់បរិក្ខារពេទ្យជាដើម។

សូមរម្លឹកឡើងវិញថា គម្រោងមន្ទីរពេទ្យសាកលវិទ្យាល័យនេះ បានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ខែ ដែលគ្រោងនឹងបញ្ចប់នៅខែមីនា ឆ្នាំ២០២៧ ខាងមុខ។

មន្ទីរពេទ្យនេះ សាងសង់ឡើងនៅលើទីតាំងទី៣ នៃសាកលវិទ្យាល័យវិទ្យាសាស្ត្រសុខាភិបាល ដែលមានផ្ទៃដីសរុប ២២ ២៤៣ ម៉ែត្រការ៉េ បណ្តោយ ៨៣,៨០ ម៉ែត្រ និងទទឹង ៥៩,៨០ ម៉ែត្រ និងកម្ពស់ ៨ជាន់ មានសមត្ថភាពទទួលជំងឺសម្រាកសរុបបាន ២០០គ្រែ៕

The post គិតត្រឹមខែមេសា ការសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបាន ៥៧,៤៤% appeared first on Kampuchea Thmey Daily.

គិតត្រឹមខែមីនា មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចការសាងសង់បានជាង៥០%

Ken Malis — Fri, 13 Mar 2026 02:22:25 +0000

គិតត្រឹមខែមីនា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផល ៥២,៥៤% លឿនជាងផែនការកំណត់៤% នៃផែនការគម្រោងសាងសង់។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សាខាទី៣ កាលពីថ្ងៃទី១១ ខែមីនា ឆ្នាំ២០២៦ បានដឹកនាំក្រុមការងារចុះពិនិត្យការដ្ឋានសាងសង់ និងប្រជុំពិភាក្សាវាយតម្លៃ នៃការអនុវត្តគម្រោង ត្រឹមខែមីនា ឆ្នាំ២០២៦ ស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

លោកស្រីរដ្ឋលេខាធិការ បានកោតសរសើរចំពោះវឌ្ឍនភាព នៃការងារសាងសង់អគារមន្ទីរពេទ្យសាកលវិទ្យាល័យនេះ បានលឿនជាងកាលវិភាគកំណត់ និងបានផ្តល់អនុសាសន៍ណែនាំដល់ក្រុមហ៊ុនសាងសង់ ឱ្យពង្រឹងបន្ថែមលើគុណភាព ក៏ដូចជាគោលការណ៍សុវត្ថិភាពនានា ឱ្យកាន់តែប្រសើរឡើង។

កិច្ចប្រជុំបានពិភាក្សាលើចំនុចសំខាន់ៗ ដែលបានស្នើឡើង ក្នុងនោះលោកស្រីរដ្ឋលេខាធិការ បានជំរុញឱ្យគ្រប់ភាគីពាក់ព័ន្ធធ្វើយ៉ាងណាបំពេញតាមគោលការណ៍កំណត់ និងដោះស្រាយឱ្យទាន់ពេលវេលា ដើម្បីគម្រោងអាចប្រព្រឹត្តទៅប្រកបដោយគុណភាព និងបានសម្រេចរួចរាល់តាមពេលវេលាកំណត់។

គួរជម្រាបដែរថា គម្រោងមន្ទីរពេទ្យសាកលវិទ្យាល័យនេះ បានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ខែ ដែលគ្រោងនឹងបញ្ចប់នៅខែមីនា ឆ្នាំ២០២៧ ខាងមុខ។

The post គិតត្រឹមខែមីនា មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចការសាងសង់បានជាង៥០% appeared first on Kampuchea Thmey Daily.

សាកលវិទ្យាល័យពេទ្យដ៏ធំមួយនៅកម្ពុជា នឹងដាក់បញ្ចូលមុខវិជ្ជា ក្រមសីលធម៌វិជ្ជាជីវៈ ជាលើកដំបូងក្នុងឆ្នាំសិក្សាថ្មីនេះ

អ៊ិន ពិសី — Fri, 21 Nov 2025 02:55:43 +0000

សាកលវិទ្យាល័យវិទ្យាសាស្ត្រសុខាភិបាលដែលជាសាកលវិទ្យាល័យធំជាងគេនៅក្នុងប្រទេសកម្ពុជា នឹងដាក់បញ្ចូលមុខវិជ្ជាក្រមសីលធម៌វិជ្ជាជីវៈជាលើកដំបូងនៅក្នុងឆ្នាំសិក្សាថ្មីនេះ ដើម្បីបណ្តុះបណ្តាលធនធានមនុស្សក្នុងវិស័យសុខាភិបាលប្រកបដោយគុណភាព និងការឈានទៅរកឧត្តមភាព និងមានការទទួលស្គាល់គុណភាពទាំងកម្រិត ជាតិ តំបន់ និងអន្តរជាតិ។

នៅក្នុងឱកាសពិធីបើកបវេសនកាល ឆ្នាំសិក្សា ២០២៥-២០២៦ កាលពីថ្ងៃទី ១៩ វិច្ឆិកា លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល បានឱ្យដឹងថា មុខវិជ្ជា ក្រមសីលធម៌វិជ្ជាជីវៈ (MedPro) នេះ ត្រូវបានធ្វើការបណ្តុះបណ្តាលគ្រូបង្គោលដោយលោកសាស្ត្រាចារ្យទេសរដ្ឋមន្ត្រី គាត ឆែមរិទ្ធី ហើយបានបង្រៀនមុខវិជ្ជានេះដល់និស្សិតវេជ្ជបណ្ឌិតទូទៅ និងវេជ្ជបណ្ឌិតឯកទេសបានចំនួន ០៤ លើក រួចហើយ។

លោកសាស្ត្រាចារ្យ សាផុន វឌ្ឍនៈ បានបន្តថា ដើម្បីបន្តនិរន្តភាព នៃការបង្រៀនមុខវិជ្ជា MedPro នេះ ក្នុងឆ្នាំសិក្សាថ្មីនេះ សាកលវិទ្យាល័យបានធ្វើសមាហរណកម្មមុខវិជ្ជា MedPro នេះ ចូលទៅក្នុងកម្មវិធីសិក្សាចំនួន ០៣ ក្នុងនោះរួមមាន ១.ថ្នាក់បរិញ្ញាបត្រវិទ្យាសាស្ត្រវេជ្ជសាស្ត្រដោយបញ្ចូលនៅឆ្នាំទី ៣ និងទី ៦ សម្រាប់កម្មវិធីសិក្សាចាស់ដែលត្រូវបន្តរហូតដល់ចប់ និងបញ្ចូលនៅឆ្នាំទី ១ ទី ៣ និងទី ៦ សម្រាប់កម្មវិធីសិក្សាថ្មី។ ២.ថ្នាក់វេជ្ជបណ្ឌិតទូទៅដោយបញ្ចូលនៅឆ្នាំទី ៨ សម្រាប់កម្មវិធីសិក្សាចាស់ ដែលត្រូវបន្តរហូតដល់ចប់ និង សម្រាប់កម្មវិធីសិក្សាថ្មី និង៣.ថ្នាក់វេជ្ជបណ្ឌិតឯកទេស សម្រាប់កម្មវិធីសិក្សាចាស់ដែលត្រូវបន្តរហូតដល់ចប់ បញ្ចូលនៅឆ្នាំទី ២ ចំពោះថ្នាក់ឯកទេសដែលមាន ៣ ឆ្នាំ និងបញ្ចូលនៅឆ្នាំទី ៣ ចំពោះថ្នាក់ឯកទេសដែលមាន ៤ ឆ្នាំ។

លោកសាស្ត្រាចារ្យ សាផុន វឌ្ឍនៈ បានបន្តទៀតថា ដោយឡែក សម្រាប់កម្មវិធីសិក្សាថ្មី សាកលវិទ្យាល័យ នឹងបញ្ចូលនៅឆ្នាំទី ១ និងឆ្នាំទី ២ ចំពោះថ្នាក់ឯកទេសដែលមាន ៣ ឆ្នាំ ឬនៅឆ្នាំទី ៣ សម្រាប់ថ្នាក់ឯកទេសដែលមាន ៤ ឆ្នាំ។ បន្ថែមនេះពីលើនេះទៀត សាកលវិទ្យាល័យ ក៏បានបន្ថែមការវាយតម្លៃក្រមសីលធម៌ វិជ្ជាជីវៈ ក្នុងពេលអនុវត្តត្រាប់ និងក្នុងអំឡុងពេលធ្វើកម្មសិក្សានៅតាមទីតាំងកម្មសិក្សានានាផងដែរ។ ក្រៅពីនេះ សាកលវិទ្យាល័យ បានចូលរួមយ៉ាងសកម្មជាមួយក្រសួងសុខាភិបាលក្នុងការអនុវត្តគម្រោងពង្រឹងគុណភាពបណ្ដុះបណ្ដាលមុនពេលបម្រើការងារ សម្រាប់មន្ត្រីសុខាភិបាល ដើម្បីចែករំលែកបទពិសោធរបស់សាកលវិទ្យាល័យវិទ្យាសាស្ត្រសុខាភិបាល ដែលបានអនុវត្តកន្លងមកជូនដល់សាលាមធ្យមសិក្សាសុខាភិបាល ភូមិភាគទាំង ៤ និងគ្រឹះស្ថានបណ្តុះបណ្តាលឯកជនផ្សេងៗ ដែលផ្តល់ការបណ្តុះបណ្តាលក្នុងវិស័យសុខាភិបាលផងដែរ។

លោកសាស្ត្រាចារ្យ សាផុន វឌ្ឍនៈ បានបញ្ជាក់ថា គិតត្រឹមខែតុលា ឆ្នាំ ២០២៥ នេះសាកលវិទ្យាល័យបានដំណើរការកម្មវិធីបណ្ដុះបណ្ដាលចំនួន ៥១ កម្មវិធី ដោយមាននិស្សិតកំពុងសិក្សាសរុបចំនួន ៨,៦០១ នាក់ ក្នុងនោះជានិស្សិតស្រីចំនួន ៥,២៩៣ នាក់។ ក្នុងចំណោមនិស្សិតកំពុងសិក្សាទាំងនោះ មាននិស្សិតចំនួន ៦១១ នាក់ (ស្រីចំនួន ៤២០ នាក់) បានទទួលអាហារូបករណ៍បង់ថ្លៃជំនួសដោយរាជរដ្ឋាភិបាលកម្ពុជា និងនិស្សិតថ្នាក់វេជ្ជបណ្ឌិតឯកទេសចំនួន ៧៨ នាក់ (ស្រីចំនួន ៣៤ នាក់) បានទទួលអាហារូបករណ៍ពី សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងនិស្សិតថ្នាក់បរិញ្ញាបត្រជាន់ខ្ពស់ចំនួន ០២ នាក់ ( ជាបុរស) បានទទួលអាហារូបករណ៍ពី សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី។ បន្ថែមនេះ និស្សិតដែលបានបញ្ចប់ការសិក្សាពី ស.វ.ស ក្នុងឆ្នាំសិក្សា ២០២៤ -២០២៥ មានចំនួនសរុប ១,២៩៧ នាក់៕

អត្ថបទ ៖ សំអឿន

The post សាកលវិទ្យាល័យពេទ្យដ៏ធំមួយនៅកម្ពុជា នឹងដាក់បញ្ចូលមុខវិជ្ជា ក្រមសីលធម៌វិជ្ជាជីវៈ ជាលើកដំបូងក្នុងឆ្នាំសិក្សាថ្មីនេះ appeared first on Kampuchea Thmey Daily.

គិតត្រឹមខែតុលា ការសាងសង់ពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផលជាង ៣៨%

អ៊ិន ពិសី — Thu, 30 Oct 2025 03:27:55 +0000

គិតត្រឹមខែតុលា ឆ្នាំ ២០២៥ នេះ គម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល (ស.វ.ស) នៅទីតាំងទី ៣ សម្រេចបានលទ្ធផលជាង ៣៨% បន្ទាប់ពីបានចាប់ផ្ដើមការសាងសង់ជាផ្លូវការ កាលពីថ្ងៃទី ០៩ ខែធ្នូ ឆ្នាំ ២០២៤ កន្លងទៅ។

គម្រោងមន្ទីរពេទ្យសាកលវិទ្យាល័យនេះបានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ ខែ ដែលគ្រោងនឹងបញ្ចប់នៅខែមីនា ឆ្នាំ ២០២៧ ខាងមុខ។

មន្ទីរពេទ្យនេះ សាងសង់ឡើងនៅលើទីតាំងទី ៣ នៃសាកលវិទ្យាល័យវិទ្យាសាស្ត្រសុខាភិបាលដែលមានផ្ទៃដីសរុប ២២ ២៤៣ ម៉ែត្រការ៉េ បណ្តោយ ៨៣,៨០ ម៉ែត្រ និងទទឹង ៥៩,៨០ ម៉ែត្រ និងកម្ពស់ ៨ ជាន់ មានសមត្ថភាពទទួលជំងឺសម្រាកសរុបបាន ២០០ គ្រែ។

នៅក្នុងកិច្ចប្រជុំត្រួតពិនិត្យវឌ្ឍនភាពរួមគ្នា លើកទី ២ នៃគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល នៅទីតាំងទី ៣ នៃ ស.វ.ស កាលពីពេលថ្មីៗ នេះ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល បានមានប្រសាសន៍ថា គិតត្រឹមខែតុលា ឆ្នាំ ២០២៥ នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផល ៣៨.២០% នៃផែនការគម្រោង។

យ៉ាងណាក៏ដោយ លោកស្រីរដ្ឋលេខាធិការ បានកោតសរសើរចំពោះវឌ្ឍនភាពការងារសាងសង់មន្ទីរពេទ្យសាកលវិទ្យាល័យ ដែលសម្រេចបានលទ្ធផលជាវិជ្ជមាន និងទាន់ពេលវេលា នៃកាលវិភាគការងារ ជាពិសេសតំណាងក្រសួងសេដ្ឋកិច្ច និងហិរញ្ញវត្ថុ ដែលបានផ្តល់ការគាំទ្រក្នុងការងារសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលនេះ ឱ្យកាន់តែរលូនទៅមុខបន្តទៀតទៅតាមគោលដៅគ្រោងទុក។

លោក Koo Bonhyun នាយកប្រចាំប្រទេសរបស់ Korean Exim Bank បានសាទរចំពោះវឌ្ឍនភាព និងបានចាត់ទុកគម្រោងសាងសង់មន្ទីរពេទ្យសាកលវិទ្យាល័យនេះ ជាសមិទ្ធផលដ៏សំខាន់មួយក្នុងការអភិវឌ្ឍរបស់ប្រទេសកម្ពុជា។

ថ្លែងក្នុងពិធីបញ្ចុះបឋមសិលាសាងសង់ជាផ្លូវការកាលពីថ្ងៃទី ០៩ ខែធ្នូ ឆ្នាំ ២០២៤ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា អគារមន្ទីរពេទ្យនេះបំពាក់ដោយគ្រឿងបរិក្ខារពេទ្យទំនើបទាន់សម័យ និងប្រកបដោយបច្ចេកវិទ្យាខ្ពស់នាពេលបច្ចុប្បន្នសម្រាប់ផ្តល់សេវាជូនប្រជាពលរដ្ឋ ហើយអគារមន្ទីរពេទ្យនេះសម្រាប់បណ្ដុះបណ្ដាល និងទាក់ទាញអ្នកជំនាញវេជ្ជសាស្ត្រទាំងកម្រិតជាតិ និងអន្តរជាតិសហការគ្នា ដើម្បីរកនវានុវត្តន៍ថ្មីៗ ទៅលើការសិក្សា និងស្រាវជ្រាវការអប់រំសុខភាព និងការពារ និងធ្វើគោលនយោបាយទៅលើការបណ្តុះបណ្តាលផ្នែកវេជ្ជសាស្ត្រនៅប្រទេសកម្ពុជាកាន់តែប្រសើរបន្ថែមទៀតស្របទៅនឹងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល គឺ ការពង្រឹង និងការលើកកម្ពស់សុខភាពឈានទៅរកការគ្របដណ្ដប់សុខភាពជាសកល។

លោករដ្ឋមន្ត្រី បានបន្តទៀតថា សមិទ្ធផលនេះពេលសាងសង់រួចមិនត្រឹមតែជាអគារមន្ទីរពេទ្យមួយដ៏ទំនើបប៉ុណ្ណោះទេ ក៏ជាកន្លែងមួយធ្វើរោគវិនិច្ឆ័យ និងការព្យាបាលកាន់តែមានប្រសិទ្ធភាព និងជាកន្លែងមួយដែលអ្នកប្រកបវិជ្ជាជីវៈសុខាភិបាលទាំងអស់ នឹងប្រើប្រាស់ទីតាំងនេះដើម្បីអភិវឌ្ឍន៍វិស័យសុខាភិបាលឱ្យកាន់តែប្រសើរឡើងថែមទៀត៕

អត្ថបទ ៖ សំអឿន

The post គិតត្រឹមខែតុលា ការសាងសង់ពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផលជាង ៣៨% appeared first on Kampuchea Thmey Daily.

មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រចការសាងសង់បាន ២១.៥១%

Ken Malis — Fri, 20 Jun 2025 02:16:41 +0000

គិតត្រឹមថ្ងៃទី១៨ ខែមិថុនា ឆ្នាំ២០២៥ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល (ស.វ.ស) បាន ២១.៥១% ដោយជិតបញ្ចប់ការងារជាន់ក្រោមដី និងកំពុងដំណើរការសាងសង់ជាន់ទី១។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល (ស.វ.ស) នៅថ្ងៃទី១៩ ខែមិថុនា បានចុះពិនិត្យវឌ្ឍនភាពការងារសាងសង់មន្ទីរពេទ្យស.វ.ស នៅទីតាំងទី៣ ស.វ.ស។

ក្នុងឱកាសចុះពិនិត្យនេះ លោកស្រីរដ្ឋលេខាធិការ បានកោតសរសើរចំពោះការខិតខំរបស់ក្រុមហ៊ុនទទួលការងារសាងសង់មន្ទីរពេទ្យស.វ.ស ដែលបានសាងសង់សំណង់មន្ទីរពេទ្យ លឿនជាងផែនការគ្រោងទុក។ បន្ថែមនេះ លោកស្រីនាយកគម្រោង បានផ្តល់អនុសាសន៍ណែនាំដល់ក្រុមហ៊ុនសាងសង់មន្ទីរពេទ្យស.វ.ស ឱ្យយកចិត្តទុកដាក់ លើគុណភាពនៃមេកានិក អគ្គិសនី និងប្រព័ន្ធទឹក ជៀសវាងការខូចខាត និងជួសជុលនៅពេលក្រោយ។ ករណីនេះ ក្រុមហ៊ុនសាងសង់ ត្រូវយកចិត្តទុកដាក់ លើគុណវុឌ្ឍ និងគុណភាពការងារ របស់ក្រុមហ៊ុនទទួលការងារបន្ត។

បន្ថែមពីនេះ ត្រូវយកចិត្តទុកដាក់លើការផ្គត់ផ្គង់សម្ភារៈសាងសង់ និងសម្ភារៈបំពាក់នានា ដោយគិតលើគុណភាព និងពេលវេលាផ្គត់ផ្គង់ ដើម្បីជៀសវាងបញ្ហាពន្យាពេល ដោយករណីជាយថាហេតុណាមួយ។ យកចិត្តទុកដាក់លើការគណនាថវិកា និងការរៀបចំរបាយការណ៍ ស្នើសុំការទូទាត់ថវិកា ឱ្យបានត្រឹមត្រូវ ដើម្បីជៀសវាងមានភាពយឺតយ៉ាវលើការងារទូទាត់។ ត្រូវមានការគ្រប់គ្រងបុគ្គលិក កម្មករ ឱ្យបានត្រឹមត្រូវ និងត្រូវពង្រឹងការងារគ្រប់គ្រងនេះ ធានាថារាល់បុគ្គលិក និងកម្មករទាំងអស់មានឯកសារត្រឹមត្រូវ និងស្របច្បាប់។ ត្រូវសម្អាត និងរៀបចំសម្ភារៈ និងកាកសំណល់ ឱ្យបានស្អាត និងប្រកបដោយសណ្តាប់ធ្នាប់។ កែលម្អឡើងវិញអនាម័យ នៅតាមទីតាំងចំណីអាហារ ទឹកបរិភោគ បង្គន់អនាម័យ និងទីតាំងសម្រាករបស់កម្មករ និងការបាញ់ថ្នាំសម្លាប់សត្វរុយជាប្រចាំ ជៀសវាងការបង្ករហានិភ័យផ្នែកសុខភាពដល់កម្មករ ដែលកំពុងបម្រើការងារ។

លោកស្រីនាយកគម្រោង ក៏បានផ្តល់អនុសាសន៍ណែនាំផ្សេងៗទៀត ជំរុញបង្កើនការប្រុងប្រយ័ត្ន លើបញ្ហាអាកាសធាតុ និងបរិស្ថាន ព្រមទាំងវិធានការសង្គ្រោះកម្មករ ក្នុងករណីចៃដន្យ ឬជំងឺធ្ងន់ណាមួយ ដើម្បីជៀសវាងដំណើរការសាងសង់ មានភាពអាក់ខាន ឬយឺតយ៉ាវ។

សូមបញ្ជាក់ថា មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល នៅទីតាំងទី៣ ស.វ.ស ស្ថិតនៅតាមបណ្តោយមហាវិថីមិត្តភាពភ្នំពេញ-ហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។ គម្រោងសាងសង់នេះ មានផ្ទៃដី ២២ ២៤៣ម៉ែត្រការ៉េ និងទំហំអគារមន្ទីរពេទ្យ គឺ ៤ ៨៩១ ម៉ែត្រការ៉េ ដែលមានបណ្តោយ ៨៣,៨០ម៉ែត ទទឹង ៥៩,៨០ម៉ែតការ៉េ និងកំពស់ ៤០,៨០ម៉ែត មាន ៨ជាន់ (រាប់ទាំងជាន់ក្រោមដី) សរុបទាំងអស់ ៨ជាន់ ស្មើនឹង ២៧ ០៧៩ ម៉ែត ដែលមានសមត្ថភាពទទួលអ្នកជំងឺសម្រាក សរុបចំនួន ២០០គ្រែ៕

The post មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រចការសាងសង់បាន ២១.៥១% appeared first on Kampuchea Thmey Daily.

មន្ទីរពេទ្យតម្លៃជាង៦៦លានដុល្លារមានសមត្ថភាពទទួលអ្នកជំងឺសម្រាក២០០គ្រែ ត្រូវបានបើកការដ្ឋានសាងសង់ជាផ្លូវការ

Ngoeul Narath — Tue, 10 Dec 2024 03:48:41 +0000

មន្ទីរពេទ្យសកលវិទ្យាល័យវិទ្យាសាស្រ្តសុខាភិបាល តម្លៃជាង៦៦លានដុល្លារ កម្ពស់៨ជាន់ ដែលមានសមត្ថភាពទទួលអ្នកជំងឺសម្រាក សរុបចំនួន ២០០គ្រែ ត្រូវបានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចុចប៊ូតុងបើកការដ្ឋានសាងសង់សាងសង់ជាផ្លូវការ។

គម្រោងមន្ទីរពេទ្យសាកលវិទ្យាល័យ នឹងសាងសង់នៅទីតាំងទី៣ នៃសាកលវិទ្យាល័យវិទ្យាសាស្រ្តសុខាភិបាល ស្ថិតនៅតាមបណ្តោយមហាវិថីមិត្តភាពភ្នំពេញ-ហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។ គម្រោងសាងសង់នេះ មានផ្ទៃដី ២២ ២៤៣ម៉ែត្រការ៉េ និងទំហំអគារមន្ទីរពេទ្យ គឺ ៤ ៨៩១ ម៉ែត្រការ៉េ ដែលមានបណ្តោយ ៨៣,៨០ម៉ែត ទទឹង ៥៩,៨០ម៉ែត្រការ៉េ និងកំពស់ ៤០,៨០ម៉ែត មាន ៨ជាន់ (រាប់ទាំងជាន់ក្រោមដី) ស្មើនឹង ២៧ ០៧៩ ម៉ែត្រ។

តាមក្រសួងសុខាភិបាល មន្ទីរពេទ្យនេះនឹងរចនាឡើងតាមស្ដង់ដារអន្ដរជាតិ ជាមួយនិងឧបករណ៍ បច្ចេកវិទ្យាទំនើបបំផុត សម្រាប់ធ្វើរោគវិនិច្ឆ័យ និងព្យាបាលជំងឺ ជាពិសេសនឹងក្លាយជាកន្លែងសិក្សា ស្រាវជ្រាវ ដើម្បីទាក់ទាញអ្នកជំនាញ ដែលមានទេពកោសល្យកម្រិតជាតិ និងអន្ដរជាតិមកធ្វើការសហការគ្នា ប្រឹងប្រែង រុករកនវានុវត្ដន៍ថ្មីៗបន្ថែមទៀតនៅក្នុងវិស័យសុខាភិបាល។

ក្រសួងសុខាភិបាល អះអាងថា គម្រោងសាងសង់អគារមន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល នឹងជំរុញការធ្វើទំនើបកម្ម និងនវានុវត្តន៍ ផ្នែកបណ្ដុះបណ្ដាលធនធានមនុស្សជំនាញសុខាភិបាលឱ្យកាន់តែល្អប្រសើរ។

គម្រោងមន្ទីរពេទ្យសាកលវិទ្យាល័យនេះបានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណៈរដ្ឋកូរ៉េ នូវទឹកប្រាក់ឥណទានចំនួន ៦៦,៥៧ លានដុល្លា។ កិច្ចសន្យាសាងសង់មានរយៈពេល២៨ ខែ ដែលគ្រោងនឹងបញ្ចប់នៅខែមិនា ឆ្នាំ២០២៧ ខាងមុខ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជឿជាក់ថាមន្ទីរពេទ្យនេះមិនត្រឹមជួយព្យាបាលសុខភាពពលរដ្ឋកម្ពុជាមួយមុខប៉ុណ្ណោះទេ ប៉ុន្តែនឹងក្លាយជាទីតាំងក្នុងការជួយបណ្ដុះបណ្ដាលធនធានមនុស្សក្នុងវិស័យសុខាភិបាល។

សម្ដេចធិបតី សង្កត់ធ្ងន់ដូច្នេះ៖«មុខងារទាំងនេះ មិនត្រឹមតែឆ្លើយតបទៅនឹងការកើនឡើងជាបន្តបន្ទាប់នូវតម្រូវការរបស់ប្រជាពលរដ្ឋនោះទេ ប៉ុន្តែថែមទាំងជួយបណ្ដុះបណ្ដាលធនធានមនុស្សនៅក្នុងវិស័យសុខាភិបាល តាមវិធីសាស្ត្ររៀន និងការស្រាវជ្រាវវិទ្យាសាស្ត្រសុខាភិបាលដែលនឹងនាំមកនូវរបកគំហើញ និងនវានុវត្តន៍ថ្មីៗសម្រាប់ជាធាតុចូលសំខាន់ក្នុងការធ្វើបច្ចុប្បន្នភាពគោលនយោបាយសុខាភិបាល ឈានទៅដល់ការសម្រេចបានការគ្របដណ្ដប់សុខភាពជាសកលនៅឆ្នាំ២០៣៥»។

សម្ដេចធិបតី ហ៊ុន ម៉ាណែត បានថ្លែងអំណរគុណដល់ប្រជាជន និងរដ្ឋាភិបាលកូរ៉េខាងត្បូង ដែលបានជួយសាងសង់មន្ទីរពេទ្យមួយនេះ និងបានជួយកម្ពុជាលើការសាងសង់ហេដ្ឋារចនាសម្ព័ន្ធផ្សេងៗទៀត ក៏ដូចជាការជួយស្ដារ និងកសាងសង្គមសេដ្ឋកិច្ចកម្ពុជា ក្រោយពេលកម្ពុជាទើបងើបចេញពីភ្នក់ភ្លើងសង្គ្រាម។

ឯកអគ្គរដ្ឋទូតកូរ៉េខាងត្បូងប្រចាំកម្ពុជា លោក ផាក ជុងវុក បានដាក់ក្ដីសង្ឃឹមថា ក្រោយពេលសាងសង់រួចមន្ទីរពេទ្យសាកលវិទ្យាល័យវិទ្យាសាស្រ្តសុខាភិបាលនេះ នឹងក្លាយជាមន្ទីរពេទ្យដំបូងគេនៅកម្ពុជា ដែលបណ្ដុះបណ្ដាលគ្រូពេទ្យឱ្យមានសមត្ថភាព គុណភាព និងផ្ដល់សេវាព្យាបាលស្របតាមស្ដង់ដារខ្ពស់។

តាមរយៈអ្នកបកប្រែ លោកទូតកូរ៉េខាងត្បូងប្រចាំកម្ពុជា ថ្លែងដូច្នេះ៖« ខ្ញុំសង្ឃឹមថាមន្ទីរពេទ្យនេះ នឹងក្លាយជាមន្ទីរពេទ្យអប់រំវិទ្យាសាស្ត្រសុខាភិបាលដំបូងគេបង្អស់របស់កម្ពុជា ដែលធ្វើការបណ្ដុះបណ្ដាលបុគ្គលិកពេទ្យប្រកបដោយគុណភាព នឹងផ្ដល់ការព្យាបាលដល់អ្នកជំងឺតាមប្រព័ន្ធគ្លីនិកស្តង់ដារ »។

ជាមួយគ្នានេះ លោក ផាក ជុង វុក ក៏បានដាក់ក្ដីសង្ឃឹមថា តាមរយៈគម្រោងសាង់សង់មន្ទីរពេទ្យសាកលវិទ្យាល័យនេះ នឹងក្លាយជាឱកាសមួយក្នុងការអភិវឌ្ឍបន្ថែមទៀតនូវទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា នឹងកូរ៉េ៕

The post មន្ទីរពេទ្យតម្លៃជាង៦៦លានដុល្លារមានសមត្ថភាពទទួលអ្នកជំងឺសម្រាក២០០គ្រែ ត្រូវបានបើកការដ្ឋានសាងសង់ជាផ្លូវការ appeared first on Kampuchea Thmey Daily.

ព្រឹកនេះ សម្ដេចធិបតីអញ្ជើញបើកការដ្ឋានសង់មន្ទីរពេទ្យសាកលវិទ្យាល័យតម្លៃជាង៦៦លានដុល្លារមានសមត្ថភាពទទួលអ្នកជំងឺសម្រាក២០០គ្រែ

Ngoeul Narath — Mon, 09 Dec 2024 23:55:00 +0000

តាមការគ្រោងទុក នៅព្រឹកថ្ងៃទី១០ ខែធ្នូ ឆ្នាំ ២០២៤ នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ជើញបើកការដ្ឋានសាងសង់មន្ទីរពេទ្យសកលវិទ្យាល័យវិទ្យាសាស្រ្តសុខាភិបាលដែលមានសមត្ថភាពទទួលអ្នកជំងឺសម្រាក សរុបចំនួន ២០០គ្រែ។

តាមរយៈទំព័រហ្វេសប៊ុកផ្លូវការក្រសួងសុខាភិបាល ឱ្យដឹងថា គម្រោងមន្ទីរពេទ្យសាកលវិទ្យាល័យ នឹងសាងសង់នៅទីតាំងទី៣ នៃសាកលវិទ្យាល័យវិទ្យាសាស្រ្តសុខាភិបាល ស្ថិតនៅតាមបណ្តោយមហាវិថីមិត្តភាពភ្នំពេញ-ហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។ គម្រោងសាងសង់នេះ មានផ្ទៃដី ២២ ២៤៣ម៉ែត្រការ៉េ និងទំហំអគារមន្ទីរពេទ្យ គឺ ៤ ៨៩១ ម៉ែត្រការ៉េ ដែលមានបណ្តោយ ៨៣,៨០ម៉ែត ទទឹង ៥៩,៨០ម៉ែត្រការ៉េ និងកំពស់ ៤០,៨០ម៉ែត មាន ៨ជាន់ (រាប់ទាំងជាន់ក្រោមដី) ស្មើនឹង ២៧ ០៧៩ ម៉ែត្រ។

ដើម្បីឱ្យពិធីបើកការដ្ឋានសាងសង់ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ប្រព្រឹត្តដោយរលូន នៅព្រឹកថ្ងៃទី០៩ ខែធ្នូ នេះ លោក សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើពិធីប្រុងពាលី បញ្ចុះបឋមសិលាបើកការដ្ឋានបុកគ្រឹះ សាងសង់អគារមន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល ដើម្បីសុំម្ចាស់ទឹកម្ចាស់ដី សេចក្តីសុខចម្រុងម្រើន។

នៅពីធីក្រុងពលី រដ្ឋមន្រ្តីក្រសួងសុខភិបាល បានលើកឡើងថា តាមរយៈយុទ្ធសាស្ដ្របញ្ចកោណដំណាក់កាលទី១ ផ្ដោតសំខាន់ទៅលើសុខភាព ការបណ្ដុះបណ្ដាលធនធានមនុស្ស ការអភិវឌ្ឍបច្ចេកវិទ្យាទំនើប ក្នុងការកសាងប្រព័ន្ធសុខាភិបាលមួយដ៏រឹងមាំ ដែលក្នុងនោះ គម្រោងមន្ទីរពេទ្យនេះ នឹងដើរតួនាទីយ៉ាងសំខាន់ក្នុងការលើកកម្ពស់ការបណ្ដុះបណ្ដាលធនធានមនុស្ស ក្នុងជំនាញសុខាភិបាល រួមទាំងការបញ្ជូលបច្ចេកវិទ្យាសុខាភិបាលឈានមុខ សម្រាប់ការធ្វើនវានុវត្ដន៍វិស័យសុខាភិបាល ឱ្យកាន់តែរឹងមាំ និងរីកចម្រើនតទៅអនាគត។

តាមលោក ឈាង រ៉ា គម្រោងមន្ទីពេទ្យសាកលវិទ្យាល័យវិទ្យាសាស្ដ្រសុខាភិបាល នឹងឆ្លុះបញ្ចាំងកាន់តែច្បាស់ពីការយកចិត្ដទុកដាក់របស់ក្រសួងសុខាភិបាល ជាពិសេសរាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត សំដៅធ្វើឱ្យកាន់បានប្រសើរឡើងនូវសុខភាពសាធារណៈ សុខុមាលភាពរបស់ប្រជាពលរដ្ឋ ដើម្បីឈានទៅសម្រេចបានការគ្រប់ដណ្តប់សុខភាពជាសកល៕

The post ព្រឹកនេះ សម្ដេចធិបតីអញ្ជើញបើកការដ្ឋានសង់មន្ទីរពេទ្យសាកលវិទ្យាល័យតម្លៃជាង៦៦លានដុល្លារមានសមត្ថភាពទទួលអ្នកជំងឺសម្រាក២០០គ្រែ appeared first on Kampuchea Thmey Daily.

កម្ពុជា កូរ៉េ ពិភាក្សា វឌ្ឍនភាពសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល

KC Virak — Fri, 26 Apr 2024 08:18:10 +0000

វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល បានដឹកនាំក្រុមការងារគ្រប់គ្រងគម្រោង ទទួលជួបពិភាក្សាការងារជាមួយ Mr. Kim Youn-suk ប្រធាននាយកដ្ឋានប្រតិបត្តិការទី១ នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) និងក្រុមការងារ។ កិច្ចពិភាក្សានេះ ធ្វើឡើងក្នុងគោលបំណងតាមដានវឌ្ឍនភាពការងារអនុវត្តគម្រោងសាងសង់ មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល ក្រោមឥណទានកម្ចី (EDCF Loan) របស់សាធារណរដ្ឋកូរ៉េ។ នេះបើតាមការផ្ដល់ព័ត៌មាន ពីក្រសួងសុខាភិបាល នៅរសៀលនេះ។

ជាលទ្ធផល ស្ថិតក្នុងដំណាក់កាលទី១ ក្រសួងសុខាភិបាល បានឈានមកដល់ដំណើរការនៃការដាក់ស្នើអនុម័តពីភាគីកូរ៉េទៅលើឯកសារវាយតម្លៃជ្រើសរើសក្រុមហ៊ុនសាងសង់ និងឯកសារដេញថ្លៃស្តីពីការផ្គត់ផ្គង់ និងបំពាក់សម្ភារបរិក្ខាពេទ្យ និងការតំឡើងប្រព័ន្ធព័ត៌មានសុខាភិបាល (HIS) សម្រាប់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល។ ជាមួយគ្នានេះផងដែរ លោកជំទាវនាយកគម្រោង បានស្នើឱ្យភាគីកូរ៉េ ជួយពន្លឿនការពិនិត្យ និងអនុម័តទៅលើការងារខាងលើនេះ ដើម្បីឱ្យក្រសួងសុខាភិបាល មានលទ្ធភាពបន្តនីតិវិធី និងឆាប់បានដំណើរការចាប់ផ្តើមការងារសាងសង់។

ទន្ទឹមនឹងនេះ លោកជំទាវនាយកគម្រោង ក៏បានពិភាក្សាទៅលើដំណាក់កាលទី២ ដែលក្រសួងសុខាភិបាល បានត្រៀមខ្លួន និងរៀបចំលើកសំណើរួចជាស្រេច ក្នុងការពង្រីកវិសាលភាពហេដ្ឋារចនាសម្ព័ន្ធ និងបច្ចេកទេស របស់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល និងការសាងសង់អាគារថ្មីជំនួសអាគារចាស់ របស់សាកលវិទ្យាល័យវិទ្យាសាស្ត្រសុខាភិបាល។

Mr. Kim Youn-suk បានថ្លែងអំណរគុណ និងកោតសរសើរដល់ក្រសួងសុខាភិបាល ដែលបានខិតខំប្រឹងប្រែង សម្រេចសមិទ្ធផល ប្រកបដោយផ្លែផ្កា និងទទួលយកអនុសាសន៍ក្នុងការពន្លឿនការពិនិត្យ និងអនុម័ត ទៅលើឯកសារការងារខាងលើ និងពិនិត្យទៅលើសំណើពង្រីកវិសាលភាពគម្រោង នៅក្នុងដំណាក់កាលទី២។

គួរបញ្ជាក់ថា ក្នុងដំណាក់កាលទី១នេះ សំណង់អាគារមន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល មានទំហំ ២៦ ១៥២ ម៉ែត្រការ៉េ កំពស់ ៨ ជាន់ រួមទាំងជាន់ក្រោមដី ដោយសាងសង់លើផ្ទៃដីទំហំ ២៣ ២៤៤ ម៉ែត្រការ៉េ ជាមួយនឹងគ្រែសរុបមានចំនួន ២០០ គ្រែ ព្រមទាំងគ្រោងបង្កើនចំនួនគ្រែរហូតដល់ ៤០០ គ្រែ នៅក្នុងដំណាក់កាលទី២ ។ ក្នុងកិច្ចពិភាក្សានេះ ក៏មានការអញ្ជើញចូលរួមពី អគ្គនាយករដ្ឋបាល និងហិរញ្ញវត្ថុ សាស្រ្តាចារ្យសាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល សាស្ត្រាចារ្យជំនួយសាកលវិទ្យាធិការរង និងប្រធានអង្គភាពលទ្ធកម្មក្រសួងសុខាភិបាល៕

The post កម្ពុជា កូរ៉េ ពិភាក្សា វឌ្ឍនភាពសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល appeared first on Kampuchea Thmey Daily.