ការចុះត្រួតពិនិត្យនេះ ដឹកនាំដោយ លោកបណ្ឌិត តូច ប៉ូលីវា អភិបាលរងខេត្ត និងជាប្រធានក្រុមការងារប្រតិបត្តិការ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា តំណាង លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ដោយមានការចូលរួមពីអាជ្ញាធរ មន្ត្រីជំនាញពាក់ព័ន្ធ និងសម្របសម្រួលនីតិវិធីដោយ លោក សុខ វុទ្ធី ព្រះរាជអាជ្ញារង នៃអយ្យការអមសាលាដំបូងខេត្តកំពង់ស្ពឺ។

លោកឧត្ដមសេនីយ៍ត្រី ញ៉ែម សៅ ស្នងការរង (តំណាង លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ) បានឱ្យដឹងថា ទីតាំង «សណ្ឋាគារ ឡុងវ៉ាន រីសត» ស្ថិតនៅចំណុចប្រឡាយទឹក ភូមិវល្លិ៍ប្រេង ឃុំកាហែង ស្រុកសំរោងទង ខេត្តកំពង់ស្ពឺ ត្រូវបានកំណត់យកជាកន្លែងរក្សាទុកសម្ភារ និងវត្ថុតាងផ្សេងៗ ដែលបានដកហូតពីប្រតិបត្តិការបង្ក្រាបបទល្មើស Online Scams កន្លងមក។ ដោយទទួលបានការឯកភាពជាគោលការណ៍ពីថ្នាក់ដឹកនាំ ទីតាំងនេះត្រូវបានប្រគល់ជូនកម្លាំងស្នងការដ្ឋាននគរបាលខេត្តកំពង់ស្ពឺ ជាអ្នកគ្រប់គ្រង និងថែរក្សាសន្តិសុខផ្ទាល់។

បច្ចុប្បន្ន មានកម្លាំងនគរបាលប្រចាំការជាប្រចាំ ២៤ម៉ោង លើ ២៤ម៉ោង ព្រមទាំងបានរៀបចំកម្លាំង និងមធ្យោបាយបម្រុងគ្រប់គ្រាន់ ដើម្បីធានាសុវត្ថិភាព និងទប់ស្កាត់ការជ្រៀតជ្រែកផ្សេងៗ៕

The post អាជ្ញាធរខេត្តកំពង់ស្ពឺ ចុះពិនិត្យទីតាំងឆបោកអនឡាញដែលត្រូវបានបិទសៀល និងដាក់កម្លាំងប្រចាំការ ២៤ម៉ោង appeared first on Kampuchea Thmey Daily.

លោក ជាម ច័ន្ទសោភ័ណ បានលើកឡើងថា ក្រោមការដឹកនាំរបស់រាជរដ្ឋាភិបាលបច្ចុប្បន្នបានធ្វើឱ្យខេត្តកំពង់ស្ពឺ មានការរីកចម្រើនយ៉ាងខ្លាំង ពិសេសកំណើនរោងចក្រ សហគ្រាស ដែលគិតមកទល់ថ្ងៃនេះ គឺមានប្រមាណ ១ ៤៥៨ រោងចក្រ សហគ្រាស និងមានកម្មករ កម្មការិនីកំពុងបម្រើការប្រមាណជិត ៣០ម៉ឺននាក់។ ទន្ទឹមនឹងការកើនឡើង រោងចក្រសហគ្រាសនេះ រដ្ឋបាលខេត្តកំពង់ស្ពឺ បាននិងកំពុងមានតម្រូវការនូវកម្លាំងពលកម្មប្រមាណជាង ៦ម៉ឺននាក់ បន្ថែមទៀត ដើម្បីបំពេញទៅតាមរោងចក្រ សហគ្រាស ហើយរោងចក្រ សហគ្រាសទាំងអស់នោះសុទ្ធតែជាសមាជិកប.ស.ស។

ជាមួយនេះដែរ លោកអភិបាលខេត្ត បានបង្ហាញនូវការត្រេកអរគ្រាដែលឃើញពលករបានវិលត្រឡប់មកកាន់មាតុប្រទេសវិញ ពិសេសស្រុកកំណើតដែលជាឱកាសក្នុងការជួបជុំកូនចៅ និងក្រុមគ្រួសារ គ្រាដែលប្រទេសជាតិកំពុងរងការឈ្លានពានពីប្រទេសថៃ។ លោកបានសង្កត់ធ្ងន់ថា «ការវិលត្រឡប់មកកាន់ស្រុកកំណើតនេះ ពលរដ្ឋអាចធ្វើការនៅក្នុងស្រុកខ្លួនឯង ដោយមិនមានការព្រួយបារម្ភ កូនៗអាចបានរៀនសូត្រមានខ្ពង់ខ្ពស់ដោយមិនបាច់តាមឪពុកម្តាយធ្វើចំណាក់ស្រុកទៀតទេ»។

ទន្ទឹមនេះ លោកក៏បានណែនាំដល់អាជ្ញាធរក្រុង-ស្រុកត្រូវសហការជាមួយមន្ទីរការងារ និងបណ្ដុះបណ្ដាលវិជ្ជាជីវៈខេត្តក្នុងការរៀបជាតារាងបង្ហាញពីបណ្តារោងចក្រ សហគ្រាសណា ដែលកំពុងជ្រើសរើសកម្មករ និយោជិក ហើយបញ្ជូនព័ត៌មានទាំងនោះឱ្យមកដល់តាមបណ្តាភូមិ ឃុំ ស្រុក ដើម្បីបង្កលក្ខណ:ងាយស្រួលដល់ពលរដ្ឋបានដឹង និងអាចងាយស្រួលរើសការងារដែលគាត់ចង់ធ្វើ និងអាចធ្វើបានដោយមានការជួយសម្របសម្រួលលើនីតិវិធីផ្សេងៗពីមន្ត្រីពាក់ពន្ធ័។

ក្នុងនោះដែរ លោកអភិបាលខេត្តកំពង់ស្ពឺ ក៏បានណែនាំដល់មន្ទីរអប់រំយុវជន និងកីឡាខេត្ត ឱ្យសហការជាមួយអាជ្ញាធរមូលដ្ឋាន ត្រូវជួយសម្រួលធ្វើយ៉ាងណាផ្តល់លក្ខណ:ងាយស្រួលលើនីតិវិធីផ្សេងៗក្នុងការផ្ទេរការសិក្សារបស់កូនៗពលករខ្មែរដែលវិលមកពីប្រទេសថៃវិញ ក្នុងករណីពួកគាត់ចង់ឱ្យកូនៗបានចូលរៀនវិញនៅស្រុកកំណើត ហើយចំពោះយុវជន យុវនារីដែលបានបញ្ចប់ការសិក្សា ឬបោះបង់ការសិក្សា ចង់រៀន និងចាប់យកជំនាញបច្ចេកទេសផ្ទាល់ខ្លួន ក្រសួងការងារតាមរយ:រដ្ឋបាលខេត្តក៏មានសាលាឱ្យរៀន និងស្នាក់នៅដោយឥតគិតថ្លៃផងដែរ។

ជាងនេះទៅទៀត សម្រាប់សិស្សនិស្សិតមកគ្រួសារក្រីក្រ រាជរដ្ឋាភិបាលក៏មានប្រាក់ឧបត្ថម្ភ ២៨ម៉ឺនរៀលបន្ថែម ហើយក្រោយរៀនចប់ក្រសួង ក៏ដូចរដ្ឋបាលខេត្ត និងរកការងារឱ្យធ្វើផងដែរ៕

The post ខេត្តកំពង់ស្ពឺ កំពុងមានតម្រូវការកម្លាំងពលកម្មជាង ៦ម៉ឺននាក់ ឱ្យចូលធ្វើការនៅតាមបណ្តារោងចក្រ សហគ្រាស appeared first on Kampuchea Thmey Daily.

លោក តូច ប៉ូលីវ៉ា អភិបាលរងខេត្ដកំពង់ស្ពឺ និងជាប្រធានក្រុមការងារចំពោះកិច្ចសម្របសម្រួល ទទួលពលករចំណាកស្រុក ដែលវិលត្រឡប់ពីថៃ មកម្ពុជា បានដឹកនាំកិច្ចប្រជុំរៀបចំផែនការ និងបែងចែកតួនាទីភារកិច្ច ដល់ក្រុមការងារ។ កិច្ចប្រជុំនេះ ធ្វើឡើងនៅសាលប្រជុំ កង ហ៊ាង (ជាន់ទី១) នៃអាគាររដ្ឋបាលខេត្ត កាលពីរសៀលថ្ងៃទី៣០ ខែមិថុនា ឆ្នាំ២០២៥។

មានប្រសាសន៍ក្នុងឱកាសនោះ អភិបាលរងខេត្ដ បានលើកឡើងថា អនុវត្តតាមការណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា និងតាមការណែនាំរបស់ក្រសួងមហាផ្ទៃ ស្តីពីការរៀបចំផែនការទទួល ពលករចំណាកស្រុក ដែលវិលត្រឡប់មកពីព្រះរាជាណាចក្រថៃ មកព្រះរាជាណាចក្រកម្ពុជាវិញ រដ្ឋបាលខេត្តកំពង់ស្ពឺ បានបង្កើតក្រុមការងារទទួលខុសត្រូវ និងបែងចែកតួនាទីភារកិច្ចដល់មន្ទីរ-អង្គភាពពាក់ព័ន្ធទាំងអស់ ដើម្បីចូលរួមជួយលើការងារទទួលពលករ ទោះបីប្រជាពលរដ្ឋដែលវិលត្រឡប់មកវិញ មានចំនួនតិចក្តីច្រើនក្តី ដោយក្រុមការងារបានរៀបចំជារថយន្តសម្រាប់ដឹកជញ្ជូនពលករ រៀបចំទីតាំងចំណតចុះចតតាមបណ្តាក្រុងស្រុក ទាំង៩។

ជាពិសេស បានរៀបចំក្រុមគ្រូពេទ្យ និងមន្រ្តីប្រចាំការដើម្បីការពារសុខភាព និងសុវត្ថិភាព របស់ពួកគាត់ ២៤ម៉ោង រៀបចំកន្លែងស្នាក់នៅបណ្តោះអាសន្ន ជួយសម្របសម្រួលឯកសារផ្សេងៗ ពាក់ព័ន្ធនឹងឯកសារសុំចូលបម្រើការងារ(ពន្លឿនការបញ្ជាក់ឯកសារផ្សេងៗ…)។ រៀបចំឱ្យមានការចូលរួមបណ្តុះបណ្តាលវិជ្ជាជីវៈ ព្រមទាំងជួយស្វែងរកការងារជូនពួកគាត់ធ្វើតាមសមត្ថភាពនិងជំនាញ ផងដែរ ។ល៕

The post រដ្ឋបាលខេត្តកំពង់ស្ពឺ ត្រៀមក្រុមគ្រូពេទ្យ និងមន្រ្តីប្រចាំការ ដើម្បីជួយពលករខ្មែរដែលវិលត្រឡប់ពីប្រទេសថៃ appeared first on Kampuchea Thmey Daily.

មិនត្រឹមតែក្របខណ្ឌនៃរដ្ឋបាលខេត្តកំពង់ស្ពឺ លោកឧបនាយករដ្ឋមន្ត្រី ស សុខា ក៏បានផ្ដល់ជាគោលការណ៍ណែនាំដល់ខេត្តផ្សេងៗទៀត កុំអនុញ្ញាត និងទប់ស្កាត់ឱ្យបាននូវការផ្សព្វផ្សាយល្បែងស៊ីសងគ្រប់ប្រភេទនៅតាមទីសាធារណៈ លើកលែងតែការផ្សព្វផ្សាយនៅតាមទីតាំងឯកជន ដែលទទួលបានការអនុញ្ញាតតាមផ្លូវច្បាប់។

ស្របពេលដែលថ្មីៗនេះ រដ្ឋបាលខេត្តកំពង់ស្ពឺ ទើបតែទទួលបានទាំងអភិបាលខេត្តថ្មី និងស្នងការនគរបាលខេត្តថ្មី លោក ស សុខា ក៏បានសង្កត់ធ្ងន់អំពីសារៈសំខាន់នៃការយកចិត្តទុកដាក់លើការងារសន្តិសុខ និងសណ្ដាប់ធ្នាប់សាធារណៈ ជាពិសេសករណីគ្រឿងញៀន ការជួញដូរមនុស្ស អាជីវកម្មផ្លូវភេទ ក្មេងទំនើង និងល្បែងស៊ីសង ដោយការងារនេះ គណៈអភិបាលខេត្ត ត្រូវរៀបចំពេលវេលា ដើម្បីជួប និងស្ដាប់សេចក្ដីរាយការណ៍ពីសភាពការណ៍ទូទៅឱ្យបានទៀងទាត់ជាមួយថ្នាក់ដឹកនាំកម្លាំងអនុវត្តច្បាប់ រួមទាំងស្នងការខេត្ត។

ជាមួយគ្នានេះ លោកប្រមុខក្រសួងមហាផ្ទៃ ថែមទាំងបានស្នើឱ្យរដ្ឋបាលខេត្ត យកចិត្តទុកដាក់ឱ្យបានម៉ឺងម៉ាត់លើការធានាសុវត្ថិភាពឱសថ និងម្ហូបអាហារ ដើម្បីការពារសុខភាពប្រជាពលរដ្ឋ។

បន្ថែមពីលើនេះ លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឱ្យបន្តថែរក្សា និងពង្រឹងសន្តិភាព ស្ថិរភាពនយោបាយ យកចិត្តទុកដាក់ពង្រឹងសភាពការណ៍មូលដ្ឋាន គ្រប់គ្រងឱ្យបាននូវចំនួន និងសកម្មភាពអង្គការ សមាគម និងសហជីពផ្សេងៗ ឱ្យស្របតាមច្បាប់ស្ដីពីគណបក្សនយោបាយ ព្រមទាំងពង្រីកសក្ដានុពលសេដ្ឋកិច្ចមូលដ្ឋាន។ ទន្ទឹមនេះ លោក ស សុខា ក៏បានប្រាប់ឱ្យលោក ជាម ច័ន្ទសោភ័ណ អភិបាលខេត្តកំពង់ស្ពឺថ្មី បន្តរៀបចំប្រជុំជាមួយមន្រ្តីពាក់ព័ន្ធ ចុះទៅកាន់រដ្ឋបាលក្រុង ស្រុក និងជួបពលរដ្ឋ ព្រមទាំងជំរុញមន្រ្តី និងកងកម្លាំងយកចិត្តទុកដាក់ពង្រឹងការផ្ដល់សេវាប្រកបដោយគុណភាព និងឥរិយាបទសមរម្យ។

ពីវេទិកានាព្រឹកថ្ងៃទី៣ ខែកក្កដានេះ លោក ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ក៏បានរម្លឹក និងកោតសរសើរពីភាពលេចធ្លោរបស់រដ្ឋបាលខេត្តកំពង់ស្ពឺ ក្រោមការដឹកនាំរបស់លោក វ៉ី សំណាង កន្លងមក ដែលបានអនុវត្តគោលការណ៍តឹងរឹងមិនឱ្យផ្សព្វផ្សាយផ្សាយផលិតផលគ្រឿងស្រវឹងនៅតាមទីសាធារណៈ និងស្នាដៃទាក់ទាញគម្រោង វិនិយោគតម្លៃក្រោម៥លានដុល្លារ ដែលរាជរដ្ឋាភិបាល ទើបតែបានវិមជ្ឈការ កាលចុងនីតិកាលទី៦ កន្លងមកផងដែរ។

សូមបញ្ជាក់ថា លោក ជាម ច័ន្ទសោភ័ណ អតីតអភិបាលខេត្តត្បូងឃ្មុំ ត្រូវបានព្រះករុណា ព្រះមហាក្សត្រនៃកម្ពុជា ត្រាស់បង្គាប់ផ្ទេរ និងតែងតាំងជាអភិបាលខេត្តកំពង់ស្អឺ ជំនួសលោក វ៉ី សំណាង ដែលផ្ទេរទៅកាន់មុខតំណែងជាអភិបាលខេត្តតាកែវ៕

The post ដោយខេត្តកំពង់ស្ពឺ ដូរអភិបាលខេត្ត និងស្នងការថ្មី លោក ស សុខា ប្រាប់ឱ្យទប់ស្កាត់ការផ្សាយល្បែងស៊ីសងតាមទីសាធារណៈ appeared first on Kampuchea Thmey Daily.

អញ្ជើញចូលរួមនាឱកាសនោះមាន លោកសេង ញ៉ក់  លោក សត្យា វុធ និងលោក សុខ ប៊ន អ្នកតំណាងរាស្ត្រមណ្ឌលខេត្តកំពង់ស្ពឺ លោកប្រធានក្រុមប្រឹក្សាខេត្ត អភិបាលរង នៃគណៈអភិបាលខេត្តកំពង់ស្ពឺ មេបញ្ជាការរងកងទ័ពជើងទឹក និងជាមេបញ្ជាការដ្ឋានការពារកោះឆ្នេរ មេបញ្ជាការតំបន់ប្រតិបត្តិការសិករងខេត្ត ស្នងការនគរបាលខេត្ត មេបញ្ជាការកងរាជអាវុត្ថហត្ថ និងកងកម្លាំងគ្រប់ប្រភេទ សរុបប្រមាណ ៤០០នាក់ ។

លោក សេង ញ៉ក់  បាននាំយកការផ្តាំផ្ញើរសាកសួរសុខទុក្ខពីសំណាក់ ឯកឧត្តម ហ៊ុន ម៉ានី ជូនដល់កងកម្លាំងទាំងអស់ដែលមានវត្តមាននាឱកាសនោះ។ លោក សេង ញ៉ក់ បានរំឮកថា ជានិច្ចកាល ឯកឧត្តមឧបនាយករដ្ឋមន្រ្តី មិនដែលភ្លេចកងកម្លាំងដែលឈរជើងនៅខេត្តកំពង់ស្ពឺដែលបាន និងកំពុងបំពេញការងារដ៏ឧត្តុង្គឧត្តមក្នុងការការពារជាតិមាតុភូមិឡើយ។ ជាពិសេសនាឱកាសនៃពិធីចូលឆ្នាំខ្មែរនាពេលខាងមុខនេះ ស្របពេលដែលប្រជាពលរដ្ឋគ្រប់ទិសទីកំពុងសប្បាយរីករាយជួបជុំក្រុមគ្រួសារ កងកម្លាំងទាំងអស់ត្រូវនៅប្រចាំការ រក្សាសន្តិសុខ សណ្តាប់ធ្នាប់ ជូនបងប្អូនប្រជាពលរដ្ឋ ដោយមិនបានសម្រាកនោះឡើយ។ 

ជំនួសមុខថ្នាក់ដឹកនាំ និងប្រជាពលរដ្ឋ លោក សេង ញ៉ក់ អ្នកតំណាងរាស្ត្រ បានថ្លែងអំណរគុណកងកម្លាំងទាំងអស់ចំពោះការខិតខំប្រឹងប្រែងបំពេញភារកិច្ចជូនរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ក្នុងការធានាការពារថែរក្សាសុខសន្តិភាព និងសុវត្ថិភាព ជូនប្រទេសជាតិ ក៏ដូចជាប្រជាពលរដ្ឋជារួម ។ លោក ក៏បានគូសបញ្ជាក់ថា  សេចក្តីសុខរបស់ប្រទេសជាតិ ពិតជាមិនអាចកាត់ផ្តាច់ចេញពីកងកម្លាំងប្រដាប់អាវុធយើងបានឡើយ ដោយសារបងប្អូនកងកម្លាំង បានចូលរួមបំពេញកាតព្វកិច្ចយ៉ាងសំខាន់ក្នុងការការពារ ថែរក្សា សុខសន្តិភាព និងសុវត្ថិភាពជូនប្រជាជន និងប្រទេសជាតិ។

គួរឱ្យដឹងថា អំណោយដែលត្រូវប្រគល់ជូនកងកម្លាំង ទាំង៤ អង្គភាព ដោយក្នុងមួយអង្គភាពទទួលបាន អង្ករ ៥ តោន មី ២០០កេស ទឹកសុទ្ធ ១០០ កេស ភេសជ្ជៈ ១៥០ កេស និងថវិកា ៨លានរៀល ដែលជាអំណោយដ៏ថ្លៃថ្លារបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី និងមានការចូលរួមចំណែកសម្ភារៈ ថវិកាបន្ថែមមួយចំនួនពីអ្នកឧកញ៉ា លី យ៉ុងផាត់ សមាជិកព្រឹទ្ធសភាផងដែរ៕

The post ឯកឧត្តមឧបនាយករដ្ឋមន្រ្តី ហ៊ុន ម៉ានី ចាត់តំណាងក្រុមការងារ នាំយកអំណោយជូនកងកម្លាំងគ្រប់ប្រភេទក្នុងខេត្តកំពង់ស្ពឺ appeared first on Kampuchea Thmey Daily.

មន្ទីរធនធានទឹកខេត្តកំពង់ស្ពឺ បានបញ្ជាក់ថា “ស្ថានភាពទឹកទំនប់តាសាល ក្នុងឃុំតាសាល ស្រុក​ឱរ៉ាល់ ដោយស្ថានភាពទឹកភ្លៀងក្នុងកម្រិត ១២៥មីលីម៉ែត្រ ដូច្នេះទឹកក្នុងផ្ទៃអាងកម្ពស់រហូត ២១​ម៉ែត្រ ហូរលើទំនប់បង្ហៀរកម្ពស់ ២ម៉ែត្រ ហើយបើកទ្វារទឹក ចំនួន ០៣ទ្វារ ក្នុងនោះ ទា្វទឹក ១ បើក​កម្ពស់ ២ម៉ែត្រ និង ២ទ្វារ បើកកម្ពស់ ១ម៉ែត្រ។ អាស្រ័យដូចនេះ សូមបងប្អូនប្រជាពលរដ្ឋ នៅតាម​បណ្ដោយស្ទឹងព្រែកត្នោត មេត្តាជ្រាប និងចូលរួមបង្កើនការប្រុងប្រយ័ត្ន”។

ដោយឡែក រដ្ឋបាលស្រុកឱរ៉ាល់ បានជម្រាបជូនបងប្អូនប្រជាពលរដ្ឋ និងសាធារណជនទាំងអស់ ជាពិសេស បងប្អូនប្រជាពលរដ្ឋ ដែលរស់នៅប៉ែកខាងក្រោម ទំនប់តាសាល ស្រុកឱរ៉ាល់ ក៏ដូចជា “ភ្ញៀវទេសចរដែលមានបំណងមកលេងតំបន់ទេសចរណ៍ភ្នំខ្នងផ្សារ មេត្តាជ្រាបថា បច្ចុប្បន្ន​កំណាត់​ផ្លូវជាតិ៤៤ចាប់ពីរង្វង់មូលផ្សារកន្ទួត ឃុំសង្កែសាទប ទៅដល់ភូមិតាំងបំពង់ ឃុំតាសាល មាន​ការ​ជន់​លិច​ដោយជំនន់ទឹកភ្លៀងដោយកន្លែង ដូចជា នៅចំណុចស្ពានអូរអញ្ចា, អូរស្រីចាំ និងស្ពាន​តាំង​បំពង់​ជាដើម”។

ដូចនេះដើម្បីធានាបាននូវ សុខសុវត្ថិភាព និងបង្ការគ្រោះថ្នាក់ផ្សេងៗដែលកើតមានជាយថាហេតុ ចំពោះភ្ញៀវទេសចរ ក៏ដូចជាអ្នកធ្វើដំណើរឆ្លងកាត់កំណាត់ផ្លូវខាងលើនេះ រដ្ឋបាលស្រុកឱរ៉ាល់ សូម​អំពាវ​នាវ​ឱ្យផ្អាកការចរាចរឆ្លងកាត់កំណាត់ ផ្លូវខាងលើជាបណ្ដោះអាសន្នសិន ចំពោះយានយន្ត​គ្រប់​ប្រភេទ។ ដោយឡែក ចំពោះបងប្អូនប្រជាពលរដ្ឋ ដែលរស់នៅប៉ែកខាងក្រោមទំនប់តាសាល និង​តាម​បណ្តោយស្ទឹងព្រែកត្នោត សូមបង្កើនការប្រុងប្រយ័ត្នខ្ពស់ដោយសារទឹកទំនប់តាសាល បាន​ហក់​ឡើង​ដល់​កម្រិត​ប្រកាសអាសន្ន ២០,១០ម៉ែត្រ និងត្រូវបើកទ្វារទឹក ចំនួន ០៣ទ្វារ ក្នុងកម្រិត ៤ម៉ែត្រ ដើម្បីបង្ការការបាក់ទំនប់ និងបង្ការការជន់លិច៕

The post ​ដំណឹង​បន្ទាន់! បងប្អូនប្រជាពលរដ្ឋ​រស់ នៅអមដឹងស្ទឹងព្រែកត្នោត សូមបង្កើន​ការប្រុងប្រយ័ត្នខ្ពស់ ​​​​​ appeared first on Kampuchea Thmey Daily.

លោក​ វុី សំណាង​ នៅ​ក្នុង​សន្និសីទសារព័ត៌មាន​ស្ដីពី «​ជោគជ័យ​​រយៈ​ពេល​ ៥ ឆ្នាំ​កន្លង​មក​របស់​រដ្ឋបាល​ខេត្ត​កំពង់ស្ពឺ» ​បាន​គូស​បញ្ជាក់​​ថា​ ការ​អភិវឌ្ឍន៍​នៃ​ផ្លូវ​ល្បឿនលឿន «ភ្នំពេញ-ខេត្តព្រះសីហនុ» មានទាំង​វិជ្ជមាន​ និង​អវិជ្ជមាន។ ប៉ុន្តែបើ​និយាយ​​ក្របខ័ណ្ឌ​ទាំង​មូល​ ដោយ​មិន​សំដៅ​លើ​ខេត្ត​តែ​មួយ សម្រាប់​វិស័យ​ដឹក​ជញ្ជូន ការ​ទទួល​បាន​ផ្លូវ​ល្បឿនលឿន​មួយ​នេះ នាំ​ផល​ចំណេញ​យ៉ាង​ច្រើន​ ​ដែល​ទី​១ ចំណេញ​​សាំង ទី​២ ចំណេញ​ពេល​វេលា​ និង​ចុង​ក្រោយ​គឺ​សំណឹក​រិចរិលត្រូវ​បាន​កាត់​បន្ថយ។

លោក​អភិបាល​​បន្ត​ថា ស្រប​ជា​មួយ​ផល​ប្រយោជន៍យ៉ាង​ច្រើន​ ​ក៏​បាន​បង្ក​ផល​ប៉ះពាល់​ដល់​​ប្រជាជន​ដែល​រស់​នៅ​ខេត្ត​កំពង់ស្ពឺ ជាពិសេសផ្នែក​សេវា​ម្ហូបអាហារ មាន​​​ភោជនីយដ្ឋាន​ និង​ហាង​​អាហារ​មួយ​ចំនួន​។ មាន​ន័យ​ថា ចាប់​តាំង​ពី​ផ្លូវល្បឿនលឿនបាន​ស្ថាបនា​និង​ដាក់​ឲ្យដំណើរការ​​រួច​រាល់​ អ្នក​ដំណើរជាច្រើន​ដែល​ធ្លាប់ប្រើប្រាស់​ផ្លូវជាតិលេខ ៤ ​ឆ្លងកាត់​ខេត្ត​កំពង់ស្ពឺ​ បាន​ជ្រើសរើស​ធ្វើដំណើរ​លើ​​ផ្លូវ​ថ្មី​ដែល​នាំ​ឲ្យហាង​អាហារ​មួយ​ចំនួន​បាន​​កាត់​បន្ថយ​ការ​លក់​ ឬ​ខ្លះ​ក៏​បាន​បិទ​ទ្វារ​​។

​«កាល​ពី​មុន​អ្នក​ដំណើរ​ត្រូវ​ជិះតាមផ្លូវជាតិលេខ ៤ ត្រូវឈប់​​ចុះ​សម្រាក​​បរិភោគ​អាហារ​ និងប្រើប្រាស់​សេវាកម្មនានា​លើផ្លូវ​ជាតិ​នេះ តែ​ឥឡូវ​អ្នក​ដំណើរ​មួយ​ចំនួន​បានប្រើប្រាស់​ផ្លូវថ្មីជំនួស​វិញ ចឹង​តិច​ឬច្រើនពិត​ជា​ប៉ះពាល់​»។

បើ​ទោះ​បី​ជា​មាន​​ការ​កាត់​បន្ថយ​វិស័យ​ម្ហូប​អាហារ​នេះ​ក៏​ពិត​មែន ដោយ​ឡែក​ចំពោះ​វិស័យ​ទេសចរណ៍​នៅ​តែ​មាន​ល្អ​​ប្រសើរ​ដូច​ដើម ហើយ​ឡាន ម៉ូតូ​ នៅ​​តែ​មាន​សភាព​ច្រើន​ដដែល​នៅ​ក្នុង​ខេត្ត​កំពង់ស្ពឺ។ នេះ​បើតាមការ​អះអាង​របស់​លោក វុី សំណាង​៕

​

ដោយ៖ ឌិន​ ថារី

The post អភិបាល​ខេត្តកំពង់ស្ពឺ៖ ហាង​​អាហារ​ខ្លះ​​ក្នុង​ខេត្ត​កំពង់ស្ពឺ​ រងគ្រោះ​ដោយសារ​​ផ្លូវ​ល្បឿន appeared first on Kampuchea Thmey Daily.

ថ្លែងនៅក្នុងពិធីជួបសំណេះសំណាលជាមួយកម្មករ កម្មការិនី និងនិយោជិត កំពុងធ្វើការក្នុងរោងចក្រ មីងហ្វៃ នៅថ្ងៃទី២៩ ខែមេសា ឆ្នាំ២០២២ ក្នុងឱកាស ទិវាពលកម្មអន្តរជាតិ ខួបទី១៣៦ នៅខេត្តកំពង់ស្ពឺ លោកអភិបាលខេត្ត លើកឡើងថា រហូតមកទល់ពេលនេះ រោងចក្រនៅក្នុងខេត្តកំពង់ស្ពឺនៅខ្វះកម្លាំងពលកម្មប្រមាណជាង ១០ ០០០ នាក់ឯណោះ។ ចំនួននេះនឹងមានកែប្រែច្រើនទៀត ខណៈរោងចក្រ និងសហគ្រាសផ្សេងៗទៀតបើកទ្វារជាបន្តបន្ទាប់។

លោក វ៉ី សំណាង មានប្រសាសន៍ប​ន្តថា ដោយសារលក្ខខណ្ឌនេះ ទើបរដ្ឋបាលខេត្តមានការព្រួយបារម្ភថា រកកម្មករមកធ្វើការឱ្យគេមិនបាន។ លោកបានអំពាវទៅកម្មករ និយោជិត មានប្រជាពលរដ្ឋដែលបានបញ្ចប់ការសិក្សា ឬឈប់រៀន ហើយចង់រកការងារធ្វើ អាចទៅធ្វើការនៅខេត្តកំពង់ស្ពឺដោយទាក់ទងទៅមន្ទីរការងារបណ្តុះបណ្តាលវិជ្ជាជីវៈ ដើម្បីទទួលបានឱកាសការងារនៅក្នុងខេត្តកំពង់ស្ពឺ។

លោកអភិបាលខេត្តបានលើកឡើងថា​ ខេត្តកំពង់ស្ពឺនៅតែខ្វះកម្លាំងពលកម្មសម្រាប់ធ្វើការងារ ខណៈរោងចក្រក្នុងខេត្តបន្តកើនឡើង។ លោកបន្តថា ការណ៍នេះដោយសារមានការរីកដុះដាលលើវិស័យរោងចក្រ សហគ្រាសតូចធំ បានដាក់ទុនវិនិយោគនៅក្នុងខេត្ត ដោយផ្អែកលើភាពអំណោយផល និងសក្តានុពលរបស់ខេត្ត។

លោក វ៉ី សំណាង បានបញ្ជាក់ថា បច្ចុប្បន្នខេត្តកំពង់ស្ពឺមានរោងចក្រសហគ្រាសសរុបចំនួន ៣៣៤ កន្លែងដែលមានកម្មករនិយោជិត សរុបចំនួន ១៤៤ ៧៩៧ នាក់ ស្រី ១០៦ ៩៨២ នាក់ ក្នុងនោះផ្នែកវាយនភ័ណ្ឌកាត់ដេរ និងផលិតស្បែកជើងមានចំនួន ១៥១ កន្លែង មានកម្មករសរុប ១៣៩ ៦៧៨ នាក់ ស្រី១០៥ ០០១ នាក់។ ទន្ទឹមនឹងនេះមានរោងចក្រសហគ្រាសជាច្រើនកន្លែងទៀតដែលបាន និងកំពុងសាងសង់ និងមានរោងចក្រខ្លះបានបើកទ្វាររើសកម្មករឱ្យចូលបម្រើការងារដែលមានតម្រូវការកម្មករច្រើន៕

អត្ថបទ៖ ណារី

The post អភិបាលខេត្តកំពង់ស្ពឺ ប្រកាសអាសន្នពីការខ្វះពលករជាង ១ ម៉ឺននាក់ នៅតាមរោងចក្រ appeared first on Kampuchea Thmey Daily.