រដ្ឋបាលខេត្តកំពង់ស្ពឺ ត្រៀមក្រុមគ្រូពេទ្យ និងមន្រ្តីប្រចាំការ ដើម្បីជួយពលករខ្មែរដែលវិលត្រឡប់ពីប្រទេសថៃ

រដ្ឋបាលខេត្តកំពង់ស្ពឺ បានរៀបចំក្រុមគ្រូពេទ្យ និងមន្រ្តីប្រចាំការ ដើម្បីការពារសុខភាព និងសុវត្ថិភាព ពលករខ្មែរដែលវិលត្រឡប់មកពីប្រទេសថៃវិញ។

លោក តូច ប៉ូលីវ៉ា អភិបាលរងខេត្ដកំពង់ស្ពឺ និងជាប្រធានក្រុមការងារចំពោះកិច្ចសម្របសម្រួល ទទួលពលករចំណាកស្រុក ដែលវិលត្រឡប់ពីថៃ មកម្ពុជា បានដឹកនាំកិច្ចប្រជុំរៀបចំផែនការ និងបែងចែកតួនាទីភារកិច្ច ដល់ក្រុមការងារ។ កិច្ចប្រជុំនេះ ធ្វើឡើងនៅសាលប្រជុំ កង ហ៊ាង (ជាន់ទី១) នៃអាគាររដ្ឋបាលខេត្ត កាលពីរសៀលថ្ងៃទី៣០ ខែមិថុនា ឆ្នាំ២០២៥។

មានប្រសាសន៍ក្នុងឱកាសនោះ អភិបាលរងខេត្ដ បានលើកឡើងថា អនុវត្តតាមការណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា និងតាមការណែនាំរបស់ក្រសួងមហាផ្ទៃ ស្តីពីការរៀបចំផែនការទទួល ពលករចំណាកស្រុក ដែលវិលត្រឡប់មកពីព្រះរាជាណាចក្រថៃ មកព្រះរាជាណាចក្រកម្ពុជាវិញ រដ្ឋបាលខេត្តកំពង់ស្ពឺ បានបង្កើតក្រុមការងារទទួលខុសត្រូវ និងបែងចែកតួនាទីភារកិច្ចដល់មន្ទីរ-អង្គភាពពាក់ព័ន្ធទាំងអស់ ដើម្បីចូលរួមជួយលើការងារទទួលពលករ ទោះបីប្រជាពលរដ្ឋដែលវិលត្រឡប់មកវិញ មានចំនួនតិចក្តីច្រើនក្តី ដោយក្រុមការងារបានរៀបចំជារថយន្តសម្រាប់ដឹកជញ្ជូនពលករ រៀបចំទីតាំងចំណតចុះចតតាមបណ្តាក្រុងស្រុក ទាំង៩។

ជាពិសេស បានរៀបចំក្រុមគ្រូពេទ្យ និងមន្រ្តីប្រចាំការដើម្បីការពារសុខភាព និងសុវត្ថិភាព របស់ពួកគាត់ ២៤ម៉ោង រៀបចំកន្លែងស្នាក់នៅបណ្តោះអាសន្ន ជួយសម្របសម្រួលឯកសារផ្សេងៗ ពាក់ព័ន្ធនឹងឯកសារសុំចូលបម្រើការងារ(ពន្លឿនការបញ្ជាក់ឯកសារផ្សេងៗ…)។ រៀបចំឱ្យមានការចូលរួមបណ្តុះបណ្តាលវិជ្ជាជីវៈ ព្រមទាំងជួយស្វែងរកការងារជូនពួកគាត់ធ្វើតាមសមត្ថភាពនិងជំនាញ ផងដែរ ។ល៕