អំណោយមនុស្សធម៌នេះបានផ្ដល់ជូនតាមរយៈលោក គង់ គន្នារិទ្ធ អភិបាលរងខេត្តឧត្តរមានជ័យ និងលោកស្រី ស រ៉ាន់ដា សមាជិកក្រុមប្រឹក្សាខេត្តឧត្តរមានជ័យ ដោយបានចុះផ្ទាល់ដល់ខ្នងផ្ទះរបស់ប្រជាពលរដ្ឋនៅតាមភូមិ រួមមាននៅភូមិចំការចេក ភូមិគិរីមង្គល ភូមិដើមជ្រៃ ភូមិស្រះទឹក ភូមិអភិវឌ្ឍន៍ ភូមិរួតចំប៉ី និងភូមិអូរស្មាច់។

អូរស្មាច់ គឺជាតំបន់ដែលយោធាថៃបានចូលឈ្លានពាន និងកំពុងកាន់កាប់ដោយខុសច្បាប់។ តំបន់អូរស្មាច់ ដែលធ្លាប់អ៊ូអរ បានប្រែក្លាយទៅជាទីតាំងរងការខូចខាតយ៉ាងធ្ងន់ធ្ងរ ក្រោយរងការវាយប្រហារដោយគ្រាប់ផ្លោងរបស់យោធាថៃ អំឡុងសង្រ្គាមឈ្លានពានកម្ពុជា កាលពីខែធ្នូ ឆ្នាំ២០២៥។ គិតមកដល់បច្ចុប្បន្ននេះ តំបន់ច្រកព្រំដែនមួយនេះនៅតែស្ថិតក្នុងការគំរាមកំហែង និងហ៊ុមព័ទ្ធកាន់កាប់ដោយខុសច្បាប់ពីយោធាថៃ បើទោះបីជាមានបទឈប់បាញ់ តាំងពីខែធ្នូ ឆ្នាំ២០២៥ក៏ដោយ។

លើកឡើងក្នុងពេលចុះសំណេះសំណាល និងផ្ដល់អំណោយកាលពីថ្ងៃទី១២ ខែកក្កដា ឆ្នាំ២០២៦ លោក គង់ គន្នារិទ្ធ អភិបាលរងខេត្តឧត្តរមានជ័យ បានគូសបញ្ជាក់ថា នេះគឺជាការគិតគូរពីសុខទុក្ខ ជីវភាព និងការផ្តល់ភាពកក់ក្តៅពីរាជរដ្ឋាភិបាល ក៏ដូចជាអាជ្ញាធរទៅដល់ប្រជាពលរដ្ឋ ជាពិសេសពលរដ្ឋភៀសសឹក ដែលបានវិលត្រឡប់ចូលមករស់នៅក្នុងសហគមន៍វិញ ដែលជាកិច្ចការងារអាទិភាពខ្ពស់ផ្នែកគាំពារសង្គមរបស់រាជរដ្ឋាភិបាលកម្ពុជា។

លោកអភិបាលរងខេត្ត បានបន្តថា ការឧបត្ថម្ភនេះនឹងជួយសម្រាលបន្ទុកជីវភាពខ្វះខាតចំពោះមុខ និងជាទុនដំបូងក្នុងការរៀបចំរចនាសម្ព័ន្ធជីវភាពថ្មីឡើងវិញ ហើយអាជ្ញាធរនឹងផ្ដល់ការគាំទ្រជាបន្តបន្ទាប់ទៀត ដើម្បីឆ្លើយតបទៅនឹងតម្រូវការ និងការលំបាករបស់ប្រជាពលរដ្ឋ។

គួរកត់សម្គាល់ថា នៅក្នុងជម្លោះព្រំដែនកម្ពុជា និងថៃ កន្លងទៅ បានបង្កើតឱ្យមានពលរដ្ឋភៀសសឹកជាង៦សែន៤ម៉ឺននាក់ ត្រូវបង្ខំឱ្យចាកចេញពីផ្ទះសម្បែង។ ប៉ុន្តែក្រោយមានបទឈប់បាញ់ ប្រជាពលរដ្ឋជិត៦សែន២ម៉ឺននាក់បានវិលត្រឡប់ទៅលំនៅឋានវិញ។

តាមរបាយការណ៍របស់ក្រសួងមហាផ្ទៃ គិតត្រឹមថ្ងៃទី១២ ខែកក្កដា ឆ្នាំ២០២៦ គឺមានពលរដ្ឋភៀសសឹកចំនួន៤១៧នាក់ទៀតបានវិលត្រឡប់ទៅលំនៅឋានវិញ ខណៈពលរដ្ឋចំនួន២០ ៤២៣នាក់ទៀត ដែលពុំទាន់អាចវិលទៅលំនៅឋានវិញនៅឡើយទេ ដោយសារភូមិករ និងផ្ទះសម្បែងត្រូវបានកងកម្លាំងថៃរាយបន្លាលួស ដាក់ទូកុងតឺន័រ កាន់កាន់ និងបំផ្លិចបំផ្លាញដោយខុសច្បាប់។

នៅខេត្តឧត្តរមានជ័យ ព្រោះតែអំពើឈ្លានពាន និងការបន្តរំលោភបំពានរបស់ថៃលើអធិបតេយ្យ និងបូរណភាពទឹកដីរបស់កម្ពុជា ក៏មានសាលារៀន៨កន្លែង និងមន្ទីរពេទ្យ មណ្ឌលសុខភាពចំនួន៥កន្លែងត្រូវបន្តបិទទ្វារ ព្រមទាំងការខូចខាតទ្រព្យសម្បត្តិសាធារណៈ និងឯកជនពុំអាចគណនាបាន៕

ដោយ៖ ធឿន វ៉ាន់សុង

The post អាជ្ញាធរខេត្តឧត្តរមានជ័យផ្ដល់ការឧបត្ថម្ភដល់ពលរដ្ឋភៀសសឹកដែលបានវិលទៅលំនៅឋានវិញ ក្រោយជំរំត្រូវរំសាយ appeared first on Kampuchea Thmey Daily.

បើតាមលិខិតរបស់រដ្ឋបាលខេត្ត ការត្រៀមនេះ គឺយោងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រ កម្ពុជា និងព្រះរាជាណាចក្រថៃ នៅច្រកទ្វារព្រំដែនអន្តរជាតិព្រំ (ខេត្តប៉ៃលិន ប្រទេសកម្ពុជា)-បានប៉ាក់កាដ (ខេត្ត ច័ន្ទបុរី ប្រទេសថៃ) នៅថ្ងៃទី២៧ ខែធ្នូ ឆ្នាំ២០២៥ ត្រង់ចំណុចទី ៤ ” ភាគីទាំងពីរបានឯកភាពគ្នាអនុញ្ញាតឱ្យជនស៊ីវិល រស់នៅក្នុងតំបន់ព្រំដែនដែលរងផលប៉ះពាល់អាចវិលត្រឡប់ទៅផ្ទះសម្បែង និងប្រកបជីវភាពរស់នៅធម្មតាក្នុងពេល ឆាប់ៗបំផុត ដោយគ្មានការរារាំង និងដោយសុវត្ថិភាព និងសេចក្ដីថ្លៃថ្នូរ នៅក្នុងតំបន់រៀងៗខ្លួន និងស្មារតីនៃកិច្ច ប្រជុំតាមប្រព័ន្ធបញ្ជូនរូបភាព និងសម្លេង (ZOOM) ស្ដីពីកិច្ចការព្រំដែន នាថ្ងៃទី២៧ ខែធ្នូ ឆ្នាំ២០២៥ ជាមួយក្រសួងមហាផ្ទៃ។

ក្នុងន័យនេះ ដើម្បីចូលរួមអនុវត្តវិធានការខាងលើឱ្យមានប្រសិទ្ធភាព ក៏ដូចជាគាំទ្រដល់លទ្ធផលនៃសេចក្តីប្រកាសរួមឱ្យបានពេញលេញ សំដៅធានាបាននូវសុវត្ថិភាពជូនប្រជាពលរដ្ឋភៀសសឹក ដែលនឹងត្រូវវិលត្រឡប់ទៅលំនៅឋានរៀងៗខ្លួនវិញប្រកបដោយសុវត្ថិភាព និងបើកដំណើរការផ្តល់សេវាសាធារណៈនៅមូលដ្ឋានភូមិ ឃុំ សង្កាត់ ក្រុង ស្រុក រដ្ឋបាលខេត្តឧត្តរមានជ័យបានធ្វើការណែនាំនូវកិច្ចការចាំបាច់ចំពោះមុខមួយចំនួនដូចខាងក្រោម៖

១. រដ្ឋបាលខេត្តបានរៀបចំសេចក្តីសម្រេចបង្កើតគណៈកម្មការចំពោះកិច្ចពិនិត្យ វាយតម្លៃតំបន់សុវត្ថិភាពជូន ប្រជាពលរដ្ឋក្នុងភូមិសាស្ត្រខេត្តឧត្តរមានជ័យ។ ២. រដ្ឋបាលក្រុង ស្រុកត្រូវកំណត់ និងបែងចែកតំបន់ដែលរងផលប៉ះពាល់ជា ៣ (បី) តំបន់រួមមាន៖

• តំបន់ក្រហម៖ សំដៅលើតំបន់ជាប់ខ្សែបន្ទាត់ព្រំដែនដែលកងកម្លាំងបានកំពុងឈរជើងប្រចាំការ (មិនទាន់អនុញ្ញាតឱ្យប្រជាពលរដ្ឋវិលត្រឡប់វិញឡើយ)

•តំបន់លឿង៖ សំដៅលើតំបន់ដែលផ្ទះសម្បែងរបស់បងប្អូនប្រជាពលរដ្ឋរស់នៅជិតអង្គភាពយោធា (អនុញ្ញាតឱ្យបងប្អូនប្រជាពលរដ្ឋអាចចេញចូលពេលថ្ងៃ ប៉ុន្តែមិនអនុញ្ញាតនៅពេលយប់)

• តំបន់សុវត្ថិភាព៖ សំដៅលើតំបន់ដែលរងផលប៉ះពាល់ ប៉ុន្តែនៅឆ្ងាយពីខ្សែបន្ទាត់ព្រំដែន (បងប្អូនប្រជាពលរដ្ឋភៀសសឹកអាចវិញត្រឡប់ទៅលំនៅឋានបានធម្មតា)

៣. រដ្ឋបាលក្រុង ស្រុក ឃុំ សង្កាត់ ត្រូវកសាងបញ្ជីស្ថិតិប្រជាពលរដ្ឋដែលរស់នៅតំបន់ទាំងបីខាងលើឱ្យបានឆាប់ រហ័សដើម្បីអាចអនុញ្ញាតឱ្យបងប្អូនប្រជាពលរដ្ឋវិលត្រឡប់ទៅលំនៅឋានវិញបាន។ ៤. រដ្ឋបាលក្រុង ស្រុក ឃុំ សង្កាត់ និងភូមិ ត្រូវចុះពិនិត្យទីតាំងគ្រាប់ធ្លាក់ និងសំណល់ជាតិផ្ទុះពីសង្គ្រាម ដើម្បីយ ទុកបណ្ដោះអាសន្ន និងផ្តល់ព័ត៌មានដល់កងឯកភាពកំចាត់មីន (ស៊ីម៉ាក់) ធ្វើការពិនិត្យ,និងបោសសម្អាត។ ៥. មន្ទីរសុខាភិបាលត្រូវពិនិត្យ និងរៀបចំដំណើរការឡើងវិញនូវទីតាំងសុខាភិបាលដែលបានផ្អាក លើកលែង តែទីតាំងណាដែលរងការខូចខាត និងជាប់ខ្សែបន្ទាត់ព្រំដែន

៦. មន្ទីរអប់រំយុវជន យុវជន និងកីឡាត្រូវពិនិត្យ និងរៀបចំដំណើរការឡើងវិញនូវសាលារៀនដែលបានផ្អាក លើក លែងតែទីតាំងសាលារៀននៅតាមខ្សែបន្ទាត់ព្រំដែន និងសាលាដែលរងការខូចខាតពីគ្រាប់ផ្លោងដោយត្រូវការ ជួសជុល និងបោសសម្អាតសំណល់ជាតិផ្ទុះពីសង្គ្រាម។ ៧. ស្នងការរដ្ឋាននគរបាលខេត្តត្រូវរៀបចំប្រព័ន្ធ Hotline (២៤/២៤ម៉ោង) ពរនានាពីបងប្អូនប្រជាពលរដ្ឋដើម្បីឆ្លើយតបឱ្យបានទាន់ពេលវេលាដើម្បីទទួលពាក្យបណ្ដឹង និងសំណូម

៨. ស្នងការនគរបាលខេត្តត្រូវសហការជាមួយគណៈបញ្ជាការឯកភាពរដ្ឋបាលក្រុង ស្រុករៀបចំទីតាំងប៉ុស្តិ៍ត្រួត ពិនិត្យឱ្យបានហ្មត់ចត់នៅតាមគោលដៅច្រកចូលក្រុង ស្រុក ដើម្បីបង្ការ និងទប់ស្កាត់សមាសភាពមិនល្អចូលមូលដ្ឋាន។ ៩. កងរាជអាវុធហត្ថខេត្តត្រូវចាត់កម្លាំងការពារសន្តិសុខ និងថែរក្សាការពារទ្រព្យសម្បត្តិប្រជាពលរដ្ឋដែលបាន ចាកចេញពីលំនៅឋាននៅតាមមូលដ្ឋានភូមិ ឃុំ សង្កាត់ ដែលមិនទាន់បានវិលត្រឡប់មកវិញ។ ១០. រដ្ឋបាលក្រុង ស្រុក ឃុំ សង្កាត់ ត្រូវកំណត់មុខសញ្ញាគ្រួសារដែលមានជីវភាពខ្វះខាតពិតប្រាកដ ដើម្បីបន្តឧបត្ថម្ភស្បៀងអាហារក្នុងរយៈពេលខ្លី និងមធ្យម។ ១១. ប្រជាពលរដ្ឋទាំងអស់ត្រូវចូលរួមសហការ និងអនុវត្តតាមការណែនាំរបស់អាជ្ញាធរមូលដ្ឋាន និងមន្ត្រីមាន សមត្ថកិច្ច៕

The post រដ្ឋបាលខេត្តឧត្តរមានជ័យ ចេញវិធានការបម្រុងដើម្បីធានាសុវត្ថិភាពពលរដ្ឋភៀសសឹកដែលវិលទៅលំនៅឋានវិញ appeared first on Kampuchea Thmey Daily.

ការសម្រេចរបស់កម្ពុជានេះ បន្ទាប់ពីទទួលបានដំណឹងរបស់មេបញ្ជាការយោធភូមិភាគទី២ នៃប្រទេសថៃ ស្តីពីការបិទច្រក ដោះដូរទំនិញសាយតាគូ-ជប់គគីរ ស្ថិតនៅភូមិជប់គគីរលិច ឃុំអំពិល ស្រុកបន្ទាយអំពិល ខេត្តឧត្តរមានជ័យ។ ជាការឆ្លើយតប ភាគីកម្ពុជាសម្រេចបិទច្រកជប់គគីរ រហូតដល់ភាគីថៃធ្វើការបើកច្រកព្រំដែនឡើងវិញជាឯកតោភាគី ឱ្យមានលក្ខណៈជាប្រក្រតីដូចមុនថ្ងៃទី៧ ខែមិថុនា ឆ្នាំ២០២៥។ នេះបើតាមសេចក្តីប្រកាសព័ត៌មានរបស់រដ្ឋបាលខេត្តឧត្តរមានជ័យ ចុះថ្ងៃទី ២១ ខែមិថុនា ឆ្នាំ ២០២៥។

ទន្ទឹមនេះ ភាគីកម្ពុជា ប្រកាសបិទច្រកទ្វារព្រំដែនជាំ ស្ថិតនៅឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ ចាប់ពីថ្ងៃទី២១ ខែមិថុនា ឆ្នាំ២០២៥ នេះតទៅ។ ច្រកព្រំដែននេះនៅជាប់ខេត្តភាគីថៃ គឺខេត្តបុរីរ៉ាំ និងខេត្តស៊ីសាកេត។

សម្តេចធិបតី ហ៊ុន ម៉ាណែត បានបង្ហោះសារនៅលើបណ្តាញសង្គមថា ៖«ខ្ញុំបានឯកភាពឱ្យ ឯកឧត្តមអភិបាលនៃគណៈអភិបាលខេត្ត សម្រេចបិទច្រកខាងកម្ពុជាជាអចិន្ត្រៃយ៍វិញដែរ។ បន្ថែមពីលើច្រកជប់គគីរនេះ ខ្ញុំបានបញ្ជាឱ្យឯកឧត្តមអភិបាលខេត្ត បិទច្រកមួយបន្ថែមទៀតតែម្ដង គឺច្រកទ្វារព្រំដែនជាំ ស្ថិតក្នុងស្រុកអន្លង់វែង ខេត្តឧត្តរមានជ័យ ចាប់ពីថ្ងៃនេះតទៅហើយឱ្យជូនដំណឹងទៅភាគីថៃវិញផងដែរ»។

ចាប់ពីថ្ងៃទី ៧ មិថុនា ឆ្នាំ ២០២៥ កងទ័ពថៃបានប្រើប្រាស់វិធានការបិទច្រកព្រំដែន និងកែប្រែពេលវេលានៃការបិទ-បើកច្រកព្រំដែនរវាងប្រទេសទាំងពីរជាឯកតោភាគី ដោយមិនបានគិតអំពីផលប៉ះពាល់ដល់ការធ្វើដំណើរឆ្លងកាត់របស់ប្រជាជននៃប្រទេសទាំងពីរឡើយ។ សម្តេចធិបតីបញ្ជាក់ថា៖«កម្ពុជាមិនដែលមានបំណងចង់បង្កការលំបាកដល់ប្រជា​ពលរដ្ឋនៃប្រទេសទាំងពីរដែលរស់នៅ ឬធ្វើដំណើរឆ្លងកាត់ច្រកព្រំដែននោះទេ។ ប៉ុន្តែបើកងទ័ពថៃនៅបន្តប្រើវិធីបែបនេះដើម្បីដាក់គំនាបមកលើកម្ពុជានោះ គឺកម្ពុជាកំដរបានគ្រប់ពេលវេលា»។

វាជារឿងចម្លែកមួយដែរដែលថ្នាក់ដឹកនាំនយោបាយថៃ រួមទាំងនាយករដ្ឋមន្ត្រីថៃ តែងតែស្នើសុំឱ្យមានការចរចាបើកច្រកព្រំដែនឱ្យមានភាពប្រក្រតីភាពឡើងវិញ។ ប៉ុន្តែពេលជាមួយគ្នា កងទ័ពរបស់ថៃនៅតែបន្តធ្វើការបិទបើកច្រក ឬកែសម្រួលម៉ោងបិទបើកច្រកតាមចិត្តនឹកឃើញជាឯកតោភាគីទៅវិញ។

សម្តេចធិបតិ លើកឡើងថា៖«មិនដឹងថាជាវិធីសាស្ត្រ ឬជាយុទ្ធសាស្ត្រនៃការធ្វើការងាររវាងរាជរដ្ឋាភិបាលថៃនិងកងទ័ពថៃ ព្រោះហាក់ដូចជាគ្មានការឯកភាពផ្ទៃក្នុងនិងគោលការណ៍ណាមួយច្បាស់លាស់សោះ។ ម្នាក់សុំចរចាទ្វេភាគីដើម្បីបើកច្រកឱ្យប្រក្រតីឡើងវិញ រីឯម្នាក់ទៀតបន្តបិទបើកជាឯកតោភាគី»។

ចំពោះកម្ពុជា គឺយើងមានការឯកភាពពីថ្នាក់ដឹកនាំប្រទេសរហូតដល់កងទ័ពជួរមុខ។ បើនាយករដ្ឋមន្ត្រីចេញបញ្ជាអ្វីមួយ គ្រប់ស្ថាប័នថ្នាក់ជាតិ និងក្រោមជាតិ រួមទាំងកងទ័ពគឺអនុវត្តបទបញ្ជានោះដោយម៉ឺងម៉ាត់។ ចំពោះការបើកច្រកព្រំដែនរវាងកម្ពុជានិងថៃ សម្តេចធិបតី សូមបញ្ជាក់ជាថ្មីម្ដងទៀតថា កម្ពុជានៅតែប្រកាន់ជំហរដដែលគឺ÷ មិនមានការចាំបាច់ក្នុងការចរចាទ្វេភាគីរឿងបើកច្រកព្រំដែនរវាងប្រទេសទាំងពីរនោះទេ។

បើភាគីថៃពិតជាចង់បើកច្រកឱ្យដូចប្រក្រតីឡើងវិញនោះ គឺអាចធ្វើបានយ៉ាងងាយស្រួលនិងលឿនបំផុត។ កងទ័ពថៃដែលជាអ្នកចាប់ផ្ដើមបិទច្រកជាឯកតោភាគី ត្រូវធ្វើការបើកច្រកឡើងវិញជាឯកតោភាគីឱ្យដូចស្ថានភាពមុនថ្ងៃទី៧ មិថុនាឆ្នាំ២០២៥ គឺជាការស្រេច។ កម្ពុជានឹងបើកឡើងវិញដែរយ៉ាងយូរប្រាំម៉ោងក្រោយ។ នេះគឺជាដំណោះស្រាយយ៉ាង​សាមញ្ញបំផុត ដោយមិនចាំបាច់ចំណាយពេលចរចានាំតែខាតពេលវេលា។ ត្រូវការតែជំហរនៃការចង់បាន ដោយពិតប្រាកដមួយរបស់ភាគីថៃតែប៉ុណ្ណោះ។ នេះបើតាមការបញ្ជាក់បន្ថែមរបស់សម្តេចធិបតី ហ៊ុន ម៉ាណែត៕

The post សម្តេចធិបតី បញ្ជាឱ្យបិទច្រកព្រំដែនចំនួន២ ជាការឆ្លើយតបភាគីថៃបិទច្រកដោះដូរទំនិញសាយតាគូ-ជប់គគីរ appeared first on Kampuchea Thmey Daily.

ជាក់ស្ដែងនាព្រឹកថ្ងៃទី១១ ខែមីនា ឆ្នាំ២០២៥នេះ លោក មាន ចាន់យ៉ាដា អភិបាលខេត្តឧត្តរមានជ័យ បានដឹកនាំប្រតិភូ ចូលរួមកិច្ចប្រជុំគណៈកម្មាធិការបញ្ជាការព្រំដែនថៃ រវាងខេត្តឧត្តរមានជ័យ​ និងខេត្តបុរីរ៉ាំ ដើម្បីជជែកពិភាក្សាលើការដាក់ឱ្យដំណើរការជាបណ្ដោះអាសន្នទីស្នាក់ការផ្តល់សេវាប័ណ្ណព្រំដែនអេឡិចត្រូនិក នៅស្រុកបានគ្រួត ខេត្តបុរីរ៉ាំ ប្រទេសថៃ ។​

ក្នុងកិច្ចប្រជុំនេះ លោក មាន ចាន់យ៉ាដា បានអរគុណចំពោះអាជ្ញាធរខេត្តបុរីរ៉ាំ ជាពិសេសក្រសួងមហាផ្ទៃរបស់ថៃ ដែលបានអនុញ្ញាតឱ្យបង្កើតទីស្នាក់ការផ្តល់សេវាចេញប័ណ្ណព្រំដែនអេឡិចត្រូ ជូនប្រជាពលរដ្ឋក្នុងការចេញចូល នៅច្រកអន្តរជាតិជប់គគីរ-សៃតាគូ ក្នុងស្រុកបន្ទាយអំពិល ខេត្តឧត្ដរមានជ័យ។  

លោកអភិបាលខេត្ត គូសបញ្ជាក់ថា នេះជាកិច្ចសហប្រតិបត្តិការល្អរវាងខេត្តឧត្តរមានជ័យ និងខេត្តបូរីរ៉ាំ សំដៅធ្វើឱ្យបាននូវព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍនៅលើគ្រប់វិស័យ ជាពិសេសវិស័យសេដ្ឋកិច្ច ពាណិជ្ជកម្ម ទេសចរណ៍ សុខាភិបាល វប្បធម៌ រួមទាំងវិស័យផ្សេងផ្សេងទៀត ក៏ដូចជាជួយសម្រួលការធ្វើដំណើររបស់ប្រជាពលរដ្ឋនៃប្រទេសទាំងពីរ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋតាមតំបន់ព្រំដែន។

ក្នុងនាមរដ្ឋបាលខេត្ដឧត្តរមានជ័យ លោក មាន ចាន់យ៉ាដា សង្ឃឹមថា ជំនួបដ៏មានសារៈសំខាន់នាពេលនេះ នឹងក្លាយជាប្រវត្តិសាស្ត្រសម្រាប់ច្រកទ្វារព្រំដែនអន្តរជាតិជប់គគីរ-សៃតាគូ ក្នុងការផ្ដើមដំណើរការចេញចូល ដោយប្រើប័ណ្ណព្រំដែនរបស់ប្រជាពលរដ្ឋស្រុកបានគ្រួត ហើយនឹងឈានដល់ការប្រើប្រាស់ទូទាំងខេត្តបុរីរ៉ាំ នាពេលខាងមុខឆាប់ៗនេះ៕

The post កម្ពុជា-ថៃ នឹងបើកឱ្យពលរដ្ឋប្រើប័ណ្ណព្រំដែនសម្រាប់ចេញចូលតាមច្រកទ្វារអន្តរជាតិជប់គគីរ appeared first on Kampuchea Thmey Daily.

ពិធីបើកដំណើរការបង្កើនម៉ោងឆ្លងកាត់ច្រកព្រំដែនអន្តរជាតិជាំ បានធ្វើឡើងនាព្រឹកថ្ងៃទី៦ ខែមករា ឆ្នាំ២០២៥នេះ ក្រោមអធិបតីភាពលោក មាន ចាន់យ៉ាដា អភិបាលខេត្តឧត្តរមានជ័យ និងលោក អនុផុង ស៊ុកសំនិត អភិបាលខេត្តស៊ីសាកេត​ ព្រមទាំងវត្តមានចូលរួមពីតំណាងអង្គភាពពាក់ព័ន្ធនៃរដ្ឋបាលខេត្តឧត្តរមានជ័យ និងរដ្ឋបាលខេត្តស៊ីសាកេត។

លោកអភិបាលខេត្ត មាន ចាន់យ៉ាដា បញ្ជាក់ឱ្យដឹងថា ចាប់ពីថ្ងៃនេះតទៅ ច្រកទ្វារព្រំដែនអន្តរជាតិជាំ ក្នុងស្រុកអន្លង់វែង នឹងបើកដំណើរការឱ្យប្រជាពលរដ្ឋចេញចូលឆ្លងកាត់ជារៀងរាល់ថ្ងៃ ចាប់ពីម៉ោង៧ព្រឹកដល់ម៉ោង ១០យប់ ខណៈកាលពីមុន ច្រកនេះ គឺបិទមិនឱ្យប្រជាពលរដ្ឋនៃប្រទេសទាំង២ ឆ្លងកាត់ត្រឹមម៉ោង ៨យប់ប៉ុណ្ណោះ។

លោកអភិបាលខេត្ត ថា ការបង្កើនម៉ោងចេញចូលនៅច្រកព្រំដែន នឹងបង្កើនសេដ្ឋកិច្ចប្រជាពលរដ្ឋនៅខេត្តជាប់ព្រំដែននៃប្រទេសទាំងពីរ ហើយលោកបញ្ជាក់ថា រដ្ឋបាលខេត្តឧត្តរមានជ័យ និងរដ្ឋបាលខេត្តស៊ីសាកេត បានប្តេជ្ញាពង្រឹងចំណងទំនាក់ទំនងឱ្យកាន់តែប្រសើរឡើង និងជំរុញជីវភាពប្រជាពលរដ្ឋទាំងសងខាងកាន់តែល្អប្រសើរ។

បច្ចុប្បន្ន ខេត្តឧត្តរមានជ័យ មានច្រកព្រំដែនអន្តរជាតិសំខាន់ៗចំនួន៣ រួមមាន៖ ច្រកព្រំដែនអន្តរជាតិជប់គគីរ ស្ថិតក្នុងស្រុកបន្ទាយអំពិល ជាប់នឹងខេត្តបុរីរាំ ប្រទេសថៃ ច្រកព្រំដែនអន្តរជាតិជាំ ស្ថិតក្នុងស្រុកអន្លង់វែង ជាប់ខេត្តស៊ីសាកេត​ប្រទេសថៃ និងច្រកព្រំដែនអន្តរជាតិអូរស្មាច់ ស្ថិតក្នុងស្រុកសំរោង មានព្រំប្រទល់ជាប់នឹងខេត្តសុរិន្ទ។

ច្រកទ្វារ​ព្រំដែនអន្តរជាតិ​ជាំ (កម្ពុជា-ថៃ) ​ត្រូវបាន​បើក​ដំណើរការ​ឱ្យ​ប្រជាពលរដ្ឋ​បានធ្វើ​ដំណើរ​ឆ្លងកាត់​ឡើងវិញ ​កាលពី​ថ្ងៃ​ទី៩ ​ខែឧសភា ​ឆ្នាំ២០២២ ​បន្ទាប់ពី​ច្រក​មួយ​នេះ ​បាន​បិទ​ជា​បណ្តោះអាសន្ន​ដោយ​ភាគី​ថៃ​ អស់​រយៈពេល​ជាង​ ២ឆ្នាំ ​ដោយសារ​ការរីក​រាល​ដាល​ជាសកល​នៃ​ជំងឺ​កូវីដ១៩​៕  

ដោយ៖ ធឿន វ៉ាន់សុង

The post អភិបាលខេត្តឧត្តរមានជ័យ៖ ការបង្កើនម៉ោងចេញចូលនៅច្រកជាំ គឺបង្កើនសេដ្ឋកិច្ចពលរដ្ឋជាប់ព្រំដែន appeared first on Kampuchea Thmey Daily.

ពិធីប្រកាសចូលកាន់តំណែងផ្លូវការ បានធ្វើឡើងនាព្រឹកថ្ងៃទី០៥ ខែធ្នូ ឆ្នាំ២០២៤ ក្រោមវត្តមានលោក ស៊ី ប្រាសិទ្ធ ប្រធានក្រុមប្រឹក្សាខេត្ត និងលោក មាន ចាន់យ៉ាដា អភិបាលខេត្តឧត្តរមានជ័យ។

ពិធីប្រកាសនាពេលនេះ ក្រៅពីលោក ម៉េត មាសភក្តី ត្រូវបានតែងតាំងជានាយករងរដ្ឋបាលសាលាខេត្ត លោក រិទ្ធី ប៉ាក់ អតីតអភិបាលស្រុកចុងកាល់ ក៏ត្រូវបានផ្ទេរភារកិច្ច និងតែងតាំងមុខតំណែងជានាយករដ្ឋបាលសាលាខេត្តឧត្តរមានជ័យ ខណៈមន្ត្រីចំនួន៥ នាក់ទៀត ចំណុះរចនាសម្ព័ន្ធរដ្ឋបាលខេត្តឧត្តរមានជ័យ ត្រូវបានផ្ទេរភារកិច្ច និងតែងតាំងជាប្រធានអនុការិយាល័យ។

លោក មាន ចាន់យ៉ាដា អភិបាលខេត្តឧត្តរមានជ័យ បានបញ្ជាក់ថា ការប្រកាសចូលកាន់មុខតំណែងនាយករដ្ឋបាល និងកែសម្រួលបំពេញបន្ថែមមន្ត្រីរាជការក្នុងរចនាសម្ព័ន្ធសាលាខេត្ត គឺសំដៅធានាឱ្យបាននូវនិរន្តភាព និងប្រសិទ្ធភាពការងាររបស់រដ្ឋបាលខេត្តឧត្តរមានជ័យ។ លោក ជឿជាក់ថា មន្ត្រីរាជការក្នុងរចនាសម្ព័ន្ធសាលាខេត្តឧត្តរមានជ័យ នឹងបំពេញតួនាទីភារកិច្ចរបស់ខ្លួន ដោយឈរលើស្មារតីសាមគ្គីភាព យោគយល់អធ្យាស្រ័យគ្នា ចេះបំពេញឱ្យគ្នាទៅវិញទៅមក មានគំនិតច្នៃប្រឌិតខ្ពស់ ឆន្ទៈស្មោះត្រង់ និងការចេះគិតគូរអំពីផលប្រយោជន៍របស់អង្គភាព។

លោកអភិបាលខេត្ត សង្កត់ធ្ងន់ថា មន្ត្រីរាជការរដ្ឋបាលខេត្តឧត្តរមានជ័យបានប្តេជ្ញាចិត្ត “រួមគិត រួមធ្វើ និងរួមទទួលខុសត្រូវ” ដើម្បីជំរុញការអភិវឌ្ឍក្នុងខេត្តឱ្យកាន់តែរីកចម្រើ៕

The post អតីតអ្នកនាំពាក្យនៅភ្នំពេញ លោក ម៉េត មាសភក្តី ត្រូវតែងតាំងជានាយករងរដ្ឋបាលសាលាខេត្តឧត្តរមានជ័យ​ appeared first on Kampuchea Thmey Daily.

បើតាមលោកអភិបាលខេត្ត គ្រាន់តែនៅក្នុងក្របខណ្ឌស្រុកបន្ទាយអំពិលមួយ គឺមានប្រជាពលរដ្ឋដែលបានប្រើប្រាស់កម្ចី ពីគ្រឹះស្ថានហិរញ្ញវត្ថុក្នុងរង្វង់ ២១%ឯណោះ។ លោកអភិបាលខេត្ត រៀបរាប់ឱ្យដឹងថា ក្នុងចំណោមប្រជាពលរដ្ឋសរុបនៅក្នុងស្រុកបន្ទាយអំពិលចំនួន៥១ ៦០៥នាក់ បើគិតជាគ្រួសារ មានចំនួន១៤ ៥៥៦គ្រួសារ គឺមានអ្នកដែលខ្ចីលុយពីគ្រឹះស្ថានហិរញ្ញវត្ថុ រហូតដល់១៨ ៥២៩នាក់។

ជារួម ក្របខណ្ឌទូទាំងខេត្តឧត្តរមានជ័យ មានអ្នកខ្ចីលុយគ្រឹះស្ថានហិរញ្ញវត្ថុតែមួយស្ថាប័ន មាន៦៦% អ្នកខ្ចីលុយគ្រឹះស្ថានហិរញ្ញវត្ថុពីរស្ថាប័ន មាន២៧% និងពលរដ្ឋដែលមានកម្ចីចាប់ពីបីស្ថាប័ន មាន៨%។ តាមរយៈទិន្នន័យនេះ លោក មាន ចាន់យ៉ាដា អភិបាលខេត្តឧត្តរមានជ័យ បានវាយតម្លៃថា ការខ្ចីឥណទានទាំងនេះ គឺជាតម្រូវការរបស់ប្រជាពលរដ្ឋដើម្បីយកមកពង្រីកមុខរបរ ដូចជាលើវិស័យកសិកម្ម ជាដើម។ ប៉ុន្តែការប្រើប្រាស់កម្ចីនេះ មិនទាន់ចេះធ្វើផែនការនៃអាជីវកម្មរបស់ខ្លួន​ឱ្យត្រឹមត្រូវ ដែលអាចឈានក្លាយជាវិបត្តិបំណុល ពោល គឺបញ្ហាប្រឈមរបស់ប្រជាពលរដ្ឋ គឺការប្រើប្រាស់ប្រាក់កម្ចីមិនទាន់ត្រឹមត្រូវ។

ចំពោះមុខប្រជាពលរដ្ឋស្រុកបន្ទាយអំពិល ក្នុងវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ កាលពីថ្ងៃទី២២ ខែកក្កដា ឆ្នាំ២០២៤ លោក មាន ចាន់យ៉ាដា ក្នុងនាមជាអភិបាលខេត្តឧត្ដរមានជ័យ បានប្រកាសដាក់ចេញនូវវិធានការក្នុងក្របខណ្ឌខេត្តមួយចំនួន សំដៅឆ្លើយតបទៅនឹងបញ្ហានៃការប្រើប្រាស់ឥណទានរបស់ប្រជាពលរដ្ឋនេះ ក្នុងនោះ លោក បានស្នើដល់គ្រប់ស្ថាប័នផ្តល់ឥណទានទាំងអស់ត្រូវសហការជាមួយអាជ្ញាធរមូលដ្ឋានគ្រប់លំដាប់ថ្នាក់ឱ្យបានល្អប្រសើរ សម្រាប់ប្រតិបត្តិការនៅក្នុងភូមិសាស្ត្រខេត្តឧត្តរមានជ័យ ស្របតាមវិជ្ជាជីវៈរបស់ខ្លួន។

ចំណែកអាជ្ញាធរមូលដ្ឋានគ្រប់លំដាប់ថ្នាក់ គឺត្រូវពង្រឹង និងសិក្សាស្វែងយល់ឱ្យបានច្បាស់លាស់អំពីនីតិវិធីនៃការស្នើសុំឥណទាននេះ ជាពិសេសអាជ្ញាធរមូលដ្ឋានគ្រប់លំដាប់ថ្នាក់ ត្រូវចុះផ្សព្វផ្សាយអប់រំដល់ប្រជាពលរដ្ឋឱ្យយល់ដឹងអំពីអត្ថប្រយោជន៍ និងហានិភ័យដែលអាចកើតឡើងក្នុងករណីគ្មានផែនការច្បាស់លាស់នៃការប្រើប្រាស់ឥណទាន។

លោកអភិបាលខេត្ត ក៏បានប្រកាសជួបប្រជុំជាមួយស្ថាប័នធនាគារ មីក្រូហិរញ្ញវត្ថុទាំងអស់ក្នុងខេត្ត ដើម្បីពិនិត្យឡើងវិញអំពីនីតិវិធីនៃការផ្ដល់ប្រាក់កម្ចី ក៏ដូចជាការងារមួយចំនួនដែលត្រូវជជែកគ្នាកម្រិតបច្ចេកទេស។ អភិបាលខេត្តរូបនេះ ក៏សង្ឃឹមថា ប្រជាពលរដ្ឋនៅក្នុងខេត្តឧត្តរមានជ័យ នឹងយល់ដឹងកាន់តែច្បាស់អំពីការប្រើប្រាស់កម្ចីពីគ្រឹះស្ថានហិរញ្ញវត្ថុនានា។

គួរជម្រាបថា គ្រឹះស្ថានហិរញ្ញវត្ថុដែលកំពុងប្រតិបត្តិការនៅក្នុងខេត្តឧត្តរមានជ័យបច្ចុប្បន្ន មាន១៩គ្រឹះស្ថានឯកជន។ នេះបើតាមការលោក មាន ចាន់យ៉ាដា អភិបាលខេត្តឧត្តរមានជ័យ៕

The post ពលរដ្ឋខេត្តឧត្តរមានជ័យ៩ម៉ឺននាក់បានខ្ចីលុយធនាគារ ខណៈអភិបាលខេត្តប្រាប់ពលរដ្ឋប្រើកម្ចីឱ្យបានត្រឹមត្រូវ appeared first on Kampuchea Thmey Daily.

តាមការប្រកាសរបស់លោក មាន ចាន់យ៉ាដា អភិបាលខេត្តឧត្តរមានជ័យ ដែលទើបតែងតាំងថ្មី រូបនេះ បានប្រកាសជាសាធារណៈបើកទទួលរាល់បញ្ហាប្រឈមរបស់ពលរដ្ឋក្នុងខេត្តឧត្តរមានជ័យ គឺអាចបញ្ជូនមកប្រព័ន្ធហ្វេសប៊ុករបស់លោកបាន ចាប់ពីពេលនេះតទៅ។ លោក មាន ចាន់យ៉ាដា បានប្រកាសដូច្នេះថា៖ «បងប្អូនដែលមានបញ្ហានៅក្នុងខេត្តឧត្តរមានជ័យ សូមបើកទទួលនូវគ្រប់សំណូមពរតាមរយៈបណ្ដាញសង្គមហ្វេសប៊ុកផ្ទាល់ខ្លួនរបស់ខ្ញុំនេះ បន្ថែមលើយន្តការរដ្ឋបាលដែលមានស្រាប់»។

ការប្រកាសនេះ ក្នុងគ្រាដែលោកអភិបាលខេត្តបានដឹកនាំកិច្ចប្រជុំលើកដំបូងនៃគណៈបញ្ជាការឯកភាពរដ្ឋបាលខេត្តឧត្តរមានជ័យ ដែលក្នុងកិច្ចប្រជុំនេះ មានគោលបំណងប្រមូលផ្តុំនូវគ្រប់បញ្ហាប្រឈមដែលបានកើតមាននៅតាមបណ្ដាក្រុង ស្រុក ឃុំ សង្កាត់ និងព្រំដែន ដើម្បីធ្វើការដោះស្រាយជារួម ធានាឱ្យបាននូវភាពកក់ក្តៅជូនប្រជាពលរដ្ឋទូទាំងខេត្តឧត្តរមានជ័យ។ លោក មាន ចាន់យ៉ាដា បញ្ជាក់ច្បាស់ៗថា ទោះបីជាមាន ឬ ក្រ ការធានានូវសន្តិសុខ សុវត្ថិភាពជូនប្រជាពលរដ្ឋ គឺជាចំណុចអាទិភាពទីមួយរបស់គណៈបញ្ជាការឯកភាពរដ្ឋបាលខេត្តឧត្តរមានជ័យ នៅក្នុងអាណត្តិលោក ជាអភិបាលខេត្ត។

ក្នុងពិធីប្រកាសចូលកាន់តំណែងជាអភិបាលខេត្តឧត្តរមានជ័យ កាលពីថ្ងៃទី៨ ខែកក្កដា ឆ្នាំ២០២៤ លោក មាន ចាន់យ៉ាដា បានប្រកាសប្ដេជ្ញាចិត្ត និងព្យាយាមឱ្យអស់លទ្ធភាពដើម្បីដោះស្រាយរាល់បញ្ហាប្រឈម និងតម្រូវការរបស់ប្រជាពលរដ្ឋ ជាពិសេសការពង្រឹងជីវភាពប្រជាពលរដ្ឋក្នុងខេត្តឱ្យកាន់តែមានភាពរីកចម្រើន។ អភិបាលខេត្តឧត្តរមានជ័យថ្មីរូបនេះ បានប្តេជ្ញាចិត្តយ៉ាងមុតមាំអនុវត្តតាមរដ្ឋធម្មនុញ្ញ គោលការណ៍ណែនាំរបស់រាជរដ្ឋាភិបាល ជាពិសេសយុទ្ធសាស្ត្របញ្ចកោណ និងគោលនយោបាយអាទិភាពទាំង៦ របស់រាជរដ្ឋាភិបាល និងប្តេជ្ញាគាំទ្រ និងព្យាយាមពង្រឹងជីវភាពប្រជាពលរដ្ឋក្នុងខេត្តទាំងមូលឱ្យកាន់តែមានភាពរីកចម្រើនតទៅមុខបន្ថែមទៀត៕

The post ពលរដ្ឋខេត្តឧត្តរមានជ័យ អាចលើកបញ្ហាមកអាជ្ញាធរបាន តាមរយៈហ្វេសប៊ុកផ្ទាល់របស់អភិបាលខេត្តនេះ appeared first on Kampuchea Thmey Daily.