ថ្នាក់ដឹកនាំខេត្តកោះកុង មន្រ្តីរាជការ ប្រជាពលរដ្ឋ និងយុវជនសរុបប្រមាណ ២ ០០០នាក់ ជួបជុំគ្នានៅស្តូបអនុស្សាវរីយ៍នយោបាយឈ្នះឈ្នះកោះកុង ដើម្បីចូលរួមរត់ និងដើរកម្សាន្តរយៈចម្ងាយ ៤,៧គីឡូម៉ែត្រ និង ៧គីឡូម៉ែត្រ ដើម្បីអបអរសាទរ ពិធីសម្ពោធស្តូបអនុស្សាវរីយ៍នយោបាយឈ្នះ ឈ្នះ កោះកុង។

លោកស្រី ឈី វ៉ា អភិបាលខេត្តកោះកុង ថ្លែងនៅថ្ងៃទី២៤ ខែឧសភា ឆ្នាំ២០២៦ថា ការរត់ ឬដើរ មាន ប្រយោជន៍ចំពោះសុខភាពច្រើនណាស់ បើសិនជាអ្នក អាចធ្វើវាជាប្រចាំបាន។ វាជួយរំលាយជាតិខ្លាញ់សម្រក ទម្ងន់ ការពង្រឹងដល់សុខភាពបេះដូងសរសៃឈាម បញ្ចុះ សម្ពាធឈាម ការពង្រឹងដល់មុខងារប្រព័ន្ធ ភាពស៊ាំ និងសន្លាក់ ព្រមទាំងធ្វើឱ្យឆ្អឹងកាន់តែរឹងមាំល្អ។

លោកស្រី ក៏ជំរុញដល់មន្រ្តីរាជការ អាជ្ញាធរ ប្រជាពលរដ្ឋ និងយុវជន បន្តចូលរួមធ្វើលំហាត់ប្រាណអោយច្រើនប្រចាំថ្ងៃ ដើម្បីសុខភាពមាំមួន ចៀសឆ្ងាយពីជំងឺផ្សេងៗ និងចូលរួមអភិវឌ្ឍន៍សេដ្ឋកិច្ចសង្គមអោយកាន់តែរីកចម្រើនបន្ថែមទៀត៕

អត្ថបទ៖សិរីវឌ្ឍនៈ

The post មនុស្ស ២ពាន់នាក់ រត់ប្រណំាងកម្សាន្តត្រៀមអបអរសាទរពិធីសម្ពោធស្តូបនយោបាយឈ្នះឈ្នះ នៅកោះកុង appeared first on Kampuchea Thmey Daily.

កញ្ញា ហ៊ន សុខលាង សមាជិកស្នូលនៃក្រុមយុវជនពណ៌ស្វាយ បានប្រាប់ កម្ពុជាថ្មី ថា កម្មវិធីរត់នៅថ្ងៃទី២៦ ចាប់ផ្តើមពីម៉ោង៦ព្រឹក ដល់ម៉ោង១០ព្រឹក ពីចំណុចត្រង់សួនច្បារហាត់ប្រាណនៅទល់មុខព្រះអង្គចេកព្រះអង្គចម រហូតដល់លានជល់ដំរី ដែលមានចម្ងាយសរុបចំនួន១១ គីឡូម៉ែត្រ។ កម្មវិធីនេះ មានគោលបំណង អបអរសាទរទិវាបរិស្ថានពិភពលោកឆ្នាំ២០២៥ រៃអង្គាសថវិកាដើម្បីចូលរួមចំណែកការពារដែនជម្រកសត្វព្រៃភ្នំត្នោត-ភ្នំពក (ព្រៃបេន) និងរួមចំណែកក្នុងយុទ្ធនាការដាំកូនឈើមួយលានដើមក្នុងមួយឆ្នាំរបស់ក្រសួងបរិស្ថាន ការបង់វិភាគទាន។

យុវតី ហ៊ន សុខលាង បន្តថា កម្មវិធីនេះ គឺជ្រើសរើសអ្នកចូលរួមចំនួន១០០នាក់ ដែលរស់នៅក្នុងខេត្តសៀមរាប ហើយចូលរួមត្រូវបង់វិភាគទាន ៣ដុល្លារ ឬលើសពីនេះ។ សម្រាប់ថវិការដែលប្រមូលបាន សុខលាង ថានឹងបរិច្ចាគទៅ លោក បេន ដេវីស ដើម្បីចូលរួមចំណែកការពារដែនជម្រកសត្វព្រៃភ្នំត្នោត-ភ្នំពក ខេត្តព្រះវិហារ។ ចំណែកឯអ្នកនៅរស់ភ្នំពេញ និងបណ្តាលខេត្តផ្សេងៗ ដែលមានបំណងចង់ចូលរួម ក៏នៅតែអាចចូលរួម ដោយត្រូវរ៉ាប់រងការចំណាយខ្លួនឯងដូចជាការធ្វើដំណើរ ស្នាក់នៅ និងអាហារ ជាដើម។

សុខលាង បញ្ជាក់ថា៖ “ក្នុងនាមខ្ញុំជាយុវជនម្នាក់ ពិតជាមានក្តីរីករាយ ដែលបានចូលរួមចំណែកក្នុងរៀបចំកម្មវិធីនេះឱ្យមានរូបរាងឡើង និងបង្កើតឱកាសដល់សាធារណជន ក៏ជាយុវជន ចូលរួមនៅក្នុងសកម្មភាពដែលជាគុណប្រយោជន៍ដល់សង្គម ពិសេសគិតគូរពីបញ្ហាបរិស្ថាន ធនធានធម្មជាតិ”។ យុវតីខាងលើ សង្ឃឹមថា សាធារណជនចូលរួមកម្មវិធីនេះបានច្រើន ដើម្បីចូលរួមថែរក្សបរិស្ថាន និងអភិរក្សសត្វព្រៃឱ្យកាន់តែប្រសើរឡើង។

សូមជម្រាបថា យុវជនពណ៌ពណ៌ស្វាយ គឺជាក្រុមយុវជនមកពីមជ្ឈដ្ឋាន និងសាកលវិទ្យាល័យផ្សេងៗក្នុងប្រទេសកម្ពុជា ដែលមានគោលបំណងក្នុងការធ្វើសកម្មភាពផ្សេងៗ ដើម្បីបរិយាបន្នយេនឌ័រ ហើយក្រុមយុវជនពណ៌ស្វាយបានបង្កើតឡើងនៅឆ្នាំ ២០២២។ កន្លងមក ក្រុមនេះបានចូលរួមកិច្ចការសង្គមជាច្រើនតាមរយៈការរៀបចំយុទ្ធនាការផ្សេងៗ និងការរត់ ជិះកង់ ដើម្បីស្ត្រី និងកុមារ ព្រមទាំងមានការចូលរួមគាំទ្រច្រើនពីសាធារណជនថែមទៀតផង៕

The post យុវជនពណ៌ស្វាយ រៀបចំព្រឹត្តិការណ៍រត់ដើម្បីបរិស្ថាន និងដាំដើមឈើ៤០០ដើម នៅខេត្តសៀមរាប appeared first on Kampuchea Thmey Daily.

កញ្ញា ឡាយ ស្រីរ័ត្ន ដែល​ជា​អ្នក​រត់​ និង​ជា​អ្នក​រៀបចំ​កម្មវិធី​​ម្នាក់​​បាន​ឲ្យ​ដឹង​​ថា ព្រឹត្តិការណ៍​រត់​ប្រណាំងលក្ខណៈ​ Eco Run នេះ​ត្រូវ​បាន​ធ្វើ​ពីរ​លើក​​ហើយ។ លើក​ទី​៣​នឹង​ធ្វើ​នៅ​ថ្ងៃ​ទី​៥ ខែ​មករា ឆ្នាំ​២០២៥ នៅសួនកាលីស្ទីនីក ជ្រោយ​ចង្វារ ក្នុង​រាជ​ធានី​ភ្នំពេញ។ គោល​បំណង​នៃ​ការ​រៀបចំ​នេះ​គឺ​ដើម្បី​ជួយ​ដល់​កីឡាការិនី កីឡាការិនី​ជម្រើស​ជាតិ​ឲ្យ​ទទួល​បាន​ឱកាស​ប្រកួត​ប្រជែង​កាន់​តែ​ច្រើន​ និង​​ទទួល​បាន​​ប្រាក់​​រង្វាន់​លើក​ទឹក​ចិត្ត​ផង​ដែរ។ កម្មវិធី​ក៏​ផ្តល់​ឲ្យ​អ្នក​មាន​ចំណង់​ចំណូល​ចិត្ត​ខាង​រត់​អាច​ចូល​រួម​បាន​ដើម្បី​សុខភាព ហើយ​កម្មវិធី​​នេះ​ដើម្បី​កិច្ច​ការ​សប្បុរស​ធម៌​ និង​បរិស្ថាន។

ជា​ពិសេស​ទៀត​នោះ ដៃគូឧបត្ថម្ភ​កម្មវិធី​រត់​ ​នឹងបរិច្ចាគ​ចំនួន ​៤០០០​រៀល​ដល់​មន្ទីរ​ពេទ្យ​កុមារ​អង្គរ​ ​រាល់​អ្នក​ចុះ​ឈ្មោះ​ចូល​រួម​រត់ម្នាក់ និង​បរិច្ចាគ​១០០០​រៀល​​ថែម​ទៀត​ រាល់ Like & Share មួយ លើ​លិខិត​ប័ណ្ណ​ផ្សព្វ​ផ្សាយ​កម្មវិធី​រត់​ប្រណាំង​នេះ។

ព្រឹត្តិការណ៍​រត់​ប្រណាំង Eco Run ដែល​មាន​២​វិញ្ញាសា​គឺ​វិញ្ញាសា​ចម្ងាយ​១០​គីឡូម៉ែត្រ និង​វិញ្ញាសា​ចម្ងាយ​៥​គីឡូម៉ែត្រនេះ​បើក​ចុះ​ឈ្មោះ​ចូល​រួម​ប្រកួត​​ដល់​មហាជន​ទូទៅ​គឺ​ទាំង​អ្នក​រត់​​អាជីព និង​អ្នក​រត់​ដើម្បី​សុខភាព។

​អ្នក​​​​ចូល​រួម​រៀបចំ​មាន​ដូច​ជាកីឡាករ អ៊ុក រ៉ូហ៊ីត ម្ចាស់​មេដាយ​មាស​ លើ​វិញ្ញាសា​ចម្ងាយ​២១​គីឡូម៉ែត្រ​ក្នុង​ព្រឹត្តិការណ៍​រត់​ពាក់​កណ្តាល​ម៉ារ៉ាតុង​អន្តរជាតិ​អង្គរ​វត្ត កីឡាករ វ៉ាន់ ភារ៉ា ម្ចាស់​មេដាយ​មាស​ចម្ងាយ​២១​គីឡូម៉ែត្រ និង​៤២​គីឡូម៉ែត្រ ព្រម​ទាំង​កីឡាករ និង​កីឡាការិនីជា​ច្រើន​ទៀត។

កាល​បរិច្ឆេទ​ប្រកួត ថ្ងៃ​ទី​៥ ខែ​មករា ឆ្នាំ​២០២៥

• ម៉ោង​៥ព្រឹក អ្នក​ចូល​រួម​ទាំង​អស់​ទៅ​ដល់​ទី​កន្លែង
• ម៉ោង​៥:៣០​នាទី​ព្រឹក ចាប់​ផ្តើម​កម្តៅ​សាច់​ដុំ
• ម៉ោង​៥:៥០​នាទី ចាប់​ផ្តើម​​រត់​លើ​វិញ្ញាសា​ចម្ងាយ​១០​គីឡូម៉ែត្រ
• ម៉ោង​៦​ព្រឹក ចាប់​ផ្តើម​រត់​លើ​​វិញ្ញាសា​ចម្ងាយ​​៥​គីឡូម៉ែត្រ
• ម៉ោង​៧:៣០​នាទី​ព្រឹក ពិធី​ប្រគល់​រង្វាន់

អត្ថបទ៖ វីរបុត្រ

The post អ្នក​ចុះឈ្មោះ​​​​ចូល​រួម​រត់ Eco Run ម្នាក់​ មន្ទីរ​ពេទ្យ​កុមារ​អង្គរ​នឹង​ទទួល​បាន៤​ពាន់​រៀល appeared first on Kampuchea Thmey Daily.

យ៉ាងហោចណាស់ ថ្នាក់ដឹកនាំខេត្ត មន្រ្តីរាជការ និងអ្នកពាក់ព័ន្ធជិត៧០០នាក់ ស្មើ៦សញ្ជាតិ បានប្រកួតរត់ប្រណាំងដោយរត់រយៈចម្ងាយចំនួន៤វិញ្ញាសារទៅតំបន់នីមួយៗក្នុងភូមិសាស្រ្តក្រុងខេមរភូមិន្ទ និងស្រុកមណ្ឌលសីមា។

លោកស្រី មិថុនា ភូថង អភិបាលខេត្តកោះកុង បានឱ្យដឹងនៅថ្ងៃទី១០ ខែវិច្ឆិកា ឆ្នាំ២០២៤ថា រដ្ឋបាលខេត្តតែងរៀបចំកម្មវិធីសប្បាយ និងផ្តល់អត្ថប្រយោជន៍ជាច្រើនដល់សហគមន៍ ក៏ដូចជាសុខភាព ដើម្បីអបអរសាទរពិធីបុណ្យសំខាន់ៗទាំងនោះនៅក្នុងប្រទេសកម្ពុជា។

លោកស្រីអភិបាលខេត្ត បន្ថែមទៀតថា ជាក់ស្តែងថ្ងៃនេះ មានការរត់ប្រណាំងអបអរសាទរទិវាបុណ្យឯករាជ្យជាតិ ខួបលើកទី៧១ឆ្នាំ ដោយមាន៤វិញ្ញាសារផ្តើមចេញពីវិមានស្តូប។ ក្នុងនោះទី១ វិញ្ញាសាររយៈចម្ងាយ៣គីឡូម៉ែត្រមានមនុស្សចូលរួម៩០នាក់។ វិញ្ញាសារទី២ រយៈចម្ងាយ៧.១គីឡូម៉ែត្រ មានអ្នកចូលរួមរត់៤៧៦គីឡូម៉ែត្រ។ វិញ្ញាសារទី៣ រយៈចម្ងាយ២១គីឡូម៉ែត្រមានមនុស្សចូលរួម១២នាក់ និងវិញ្ញាសារទី៤ រយៈចម្ងាយ៤២គីឡូម៉ែត្រមានមនុស្សចូលរួម៤២នាក់។

បើតាមការផ្តល់របាយការណ៍គណៈកម្មការរៀបចំការរត់ប្រណាំងនេះ ក៏មានជនបរទេសចំនួន៦សញ្ជាតិចូលរួមប្រកួតផងដែរ ក្នុងមានមាន-អាហ្រិកខាងត្បូង ចិន វៀតណាម ថៃ ហ្វីលីពីន និងជប៉ុន។ លោកស្រី មិថុនា ភូថង គូសបញ្ជាក់ ការរត់ប្រណាំងនេះ មិនត្រឹមតែចូលរួមអបអរសាទរទិវាបុណ្យឯករាជ្យជាតិប៉ុណ្ណោះទេ ពោលគឺវាជួយឱ្យសុខភាពល្អតាមរយៈការបញ្ចេញជាតិពុលពីក្នុងខ្លួន។ ម៉្យាងទៀត ក៏ផ្សាយអំពីកិច្ចអភិវឌ្ឍន៍ហេដ្ឋរចនាសម្ព័ន្ធក្នុងខេត្តទៅកាន់អ្នកទេសចរជាតិ និងអន្តរជាតិផងដែរ។

ដោយឡែកតំណាងអ្នកចូលរួមរត់ប្រណាំង បានសម្តែងក្តីរីករាយពេលបានចូលរួមរត់ប្រណាំងនៅពេលនេះ ក្រោមការផ្តួចផ្តើមរបស់លោកជំទាវអភិបាលខេត្ត គ្រានេះជាលើកទី២ហើយដែលពួកគាត់ចូលរួមរត់ប្រណាំង។

លោក អ៊ុក រ៉ូហីត ជាអ្នកទទួលជ័យលាភីរត់ប្រណាំងបានលេខ១ រយៈចម្ងាយ២១គីឡូម៉ែត្រ និងកញ្ញា កាន់ ស្រីរ័ត្ន ជាអ្នកទទួលបានជ័យលាភីរត់ប្រណាំងលេខ១រយៈចម្ងាយ៧.១គីឡូម៉ែត្រ បានឱ្យដឹងស្រដៀងគ្នាថា ពួកគេពិតជាសប្បាយរីករាយដែលបានចូលរួមការប្រកួតនេះ ។ ហើយនេះជាលើកទី២សម្រាប់ពួកគេដែលបានរត់នៅខេត្តកោះកុង។

តំណាងកីឡាករទាំង២ដដែល បន្តថា ការដែលពួកគេចូលរួមរត់នៅថ្ងៃនេះ ដើម្បីអបអរសាទរថ្ងៃបុណ្យឯករាជ្យជាតិ និងដើម្បីសុខភាពរឹងមាំតាមរយៈការបញ្ចេញជាតិពុលពីក្នុងខ្លួន។ ម៉្យាងទៀត ក៏ជួយផ្សព្វផ្សាយពីវិស័យទេសចរណ៍ក្នុងខេត្តកោះកុងទៅកាន់ពិភពលោកផងដែរតាមរយៈព្រឹត្តការណ៍រត់នេះ៕

អត្តបទ៖ សិរីវឌ្ឍនៈ

The post មនុស្សជិត៧០០នាក់នៅខេត្តកោះកុង រត់ប្រណាំង ដើម្បីអបអរសាទរទិវាបុណ្យឯករាជ្យជាតិ appeared first on Kampuchea Thmey Daily.

កម្មវិធីនេះ ធ្វើឡើងនៅព្រឹកថ្ងៃទី២៧ ខែតុលា ឆ្នាំ២០២៤ ដោយមានអ្នកចូលរួមទាំងអស់ប្រមាណ ៣០០នាក់។ លោកអភិបាលរងខេត្ត បានបញ្ជាក់ថា បើទោះបីជាថិវិកាដែលទទួលបានមានចំនួនតិចតួចយ៉ាងណាក្តី តែនេះគឺជាសន្តានចិត្តប្រកបដោយសេចក្តីមេត្តាករុណា ចេះជួយយកអសារគ្នានៅពេលមានអាសន្ន និងទឹកចិត្តដ៏ល្អប្រពៃរបស់អ្នកចូលរួមទាំងអស់។ លោកសង្ឃឹមថាកម្មវិធីនេះ នឹងត្រូវបានប្រារព្វឡើងជារៀងរាល់ឆ្នាំ សម្រាប់ជាឧត្តមប្រយោជន៍ នៃកុមារកម្ពុជា។

ចំណែកលោក សែម ហាក់ អនុរដ្ឋលេខាធិការក្រសួងបរិស្ថាន បានថ្លែងថា ក្រសួងបរិស្ថានពិតជាមានមោទនភាពចំពោះវិស័យឯកជន ដែលបានគិតគូរពីបញ្ហារត់ប្រណាំងនៅតាមតំបន់ការពារធម្មជាតិនានា ដោយចាប់ផ្តើមដំបូងនូវទីតាំងតំបន់ឧទ្យានុរក្សកេសគោល។ លោកបានសង្កត់ធ្ងន់ថា «នៅពេលដែលយើងបានចូលរួមរត់ប្រណាំងទាំងអស់គ្នា យើងនឹងបានស្គាល់ពីតំបន់ការពារជាច្រើន ព្រមទាំងបានឃើញពីការងារថែរក្សាបរិស្ថានដ៏ស្រស់ស្អាតរបស់មន្រ្តីឧទ្យានុរក្សរបស់យើង»។

រីឯលោក ព្រាប កុល រដ្ឋមន្រ្តីប្រតិភូអមនាយករដ្ឋមន្រ្តី បានមានប្រសាសន៍ថា ការចេះស្រលាញ់ និងចូលរួមការពារថែរក្សាបរិស្ថាន នេះ គឺជាការចាំបាច់ណាស់ ព្រោះការប្រែប្រួលអាកាសធាតុវាបានផ្តល់ផលអវិជ្ជាមានសម្រាប់ភពផែនដី។ ដូចនេះ រាជរដ្ឋាភិបាលកម្ពុជា បានខិតខំប្រឹងប្រែងតាក់តែងគោលនយោបាយសម្រាប់ការពារថែរក្សាបរិស្ថាននេះ។ លោកបន្តថា ការលើកកម្ពស់ផ្សព្វផ្សាយវិស័យទេសចរណ៍នៅខេត្តសៀមរាប ក៏ត្រូវបានរាជរដ្ឋាភិបាលផ្តោតសំខាន់ផងដែរ ពីព្រោះ វិស័យទេសចរណ៍ ជាកត្តាលិកសំខាន់ក្នុងការជំរុញ និងស្តារឡើងវិញនូវសេដ្ឋកិច្ចជាតិ។

លោកបន្ថែមថា ការបង្កើតឱ្យមានកម្មវិធីបែបនេះ គឺពិតជាមានសារប្រយោជន៍ជាច្រើន ទី១.ការចូលរួមផ្សព្វផ្សាយអំពីការពារថែរក្សាបរិស្ថាន ទី២.ការកៀងគរមូលនិធិជួយដល់មន្ទីរពេទ្យកុមារអង្គរ និង៣.ការផ្សព្វផ្សាយពីសកក្តានុពលទេសចរណ៍ ដើម្បីទាក់ទាញភ្ញៀវទេសចរឱ្យមកកម្សាន្តនៅខេត្តសៀមរាប៕

ដោយ៖ ជុន កុសល

The post មនុស្សជាង ៣០០នាក់ ចូលរួមរត់ប្រណាំងឡើងភ្នំគូលែន ដើម្បីស្វែងរកមូលនិធិជួយមន្ទីរពេទ្យកុមារអង្គរ appeared first on Kampuchea Thmey Daily.

ក្នុង​សន្និសីទ​សារព័ត៌មាន​នៅ​រសៀល ថ្ងៃ​ទី​៥ ខែ​កញ្ញា ឆ្នាំ​២០២៤ លោក វ៉ាត់ ចំរើន រដ្ឋលេខាធិការ​ក្រសួង​អប់រំ យុវជន និង​កីឡា និង​ជា​អគ្គលេខាធិការ​នៃ​គណៈកម្មាធិការ​ជាតិ​អូឡាំពិក​កម្ពុជា បាន​លើក​ឡើង​ថា គោល​បំណង​សំខាន់​នៃព្រឹត្តិការណ៍​រត់​ប្រណាំង​ប្រចាំ​ឆ្នាំ​នេះ​គឺ​ដើម្បី​អបអរសាទរ​ដល់​គម្រោង​អភិវឌ្ឍ​ព្រែក​ជីក​ហ្វូណន​តេជោ​ដែល​ត្រូវ​បាន​បើក​ការដ្ឋាន​សាង​សង់​កាល​ពី​ពេល​ថ្មី​ៗ​កន្លង​ទៅ។

លោក​បាន​បន្ត​ថា គោល​បំណង​ទី​ពីរ​គឺ​ដើម្បី​លើក​កម្ពស់​ការ​យល់​ដឹង និង​ទប់​ស្កាត់​ អំពី​ជំងឺ​មហារីក​សុដន់​របស់​ស្ត្រី ដូច្នេះ​នេះ​ជា​ឱកាស​ដ៏​ល្អ​សម្រាប់​ស្ត្រី និង​ក្រុម​គ្រួសារ​ចូល​រួម​រត់​ប្រណាំង​​ដើម្បី​សុខភាព​។ ​ក្រុម​ហ៊ុន​ជា​ម្ចាស់​ឧបត្ថម្ភ​បាន​ផ្តល់​ការ​ពិនិត្យ​សុដន់​ដើម្បី​ស្វែង​រក​មេរោគ​​ដោយ​ឥត​គិត​ថ្លៃ​ដល់​ស្ត្រី និង​ការ​ផ្សព្វផ្សាយ​អំពី​ជំងឺដ៏​កាច​សាហាវ​នេះ។ ​សូម​អញ្ជើញ​បង​ប្អូន​ស្ត្រី​ចូល​រួម​ឲ្យ​បាន​ច្រើនកុះករ។ ក្រៅ​ពី​គោល​បំណង​សំខាន់​២​ខាង​លើ ក៏​មាន​គោល​ដៅ​ដើម្បី​កិច្ច​ការ​សប្បុរស​ធម៌​ផង​ដែរ។​

លោក​ស្រី ខៀវ វរៈច័ន្ទ ប្រធាន​ផ្នែក​ទីផ្សារ AIA បាន​​ឲ្យ​ដឹង​ថា មាន​រៀបចំ​ក្រុម​ការងារ​ដើម្បី​ពិភាក្សា និង​ជជែក​ពី​ជំងឺ​មហា​សុដន់ ព្រម​ទាំង​ធ្វើ​តេស្ត​បឋម​ដោយ​ឥត​គិត​ថ្លៃ​​ចាប់​ពី​ថ្ងៃ​ទី​១១ ដល់​ទី​១៣ ខែ​តុលា ឆ្នាំ​២០២៤ នៅ​ឧទ្យាន​វត្ត​បទុម​វត្តី។ លោក​ស្រី​បាន​លើកទឹក​ចិត្ត​ឲ្យ​ស្ត្រី​ចូល​រួម និង​ពិភាក្សា​ជុំ​វិញ​សុខភាព​ដែល​ផ្តោត​លើ​ជំងឺ​ដ៏​កាច​សាហាវ​នេះ​​ដើម្បី​ទប់​ស្កាត់​ឲ្យ​ទាន់​ពេល​វេលា។

តាម​ការ​ឲ្យ​ដឹង​ពី​លោក វ៉ាត់ ចំរើន រហូត​ដល់​ពេល​នេះ​​មាន​អ្នក​ចុះ​ឈ្មោះ​ចូល​រួម​រត់​ប្រមាណ​២០០០​នាក់​ហើយ ដូច្នេះ​ទម្រាំ​ដល់​ថ្ងៃ​បិទ​ការ​ចុះ​ឈ្មោះ​នៅ​ថ្ងៃទី​១១ ខែ​កញ្ញា ឆ្នាំ​២០២៤ ​​រំពឹង​ទទួល​បាន​ការ​ចុះ​ឈ្មោះ​ចូល​រួម​ប្រមាណ​ពី​៣​០០០ទៅ​៤០០០​​នាក់។ ព្រឹត្តិការណ៍​រត់​ប្រណាំង​នេះ​​មាន​៣ វិញ្ញាសាគឺ​​រត់ចម្ងាយ១០គីឡូម៉ែត្រ រត់ចម្ងាយ៥គីឡូម៉ែត្រ និងរត់ចម្ងាយ៣​គីឡូម៉ែត្រ៕

អត្ថបទ៖ វីរបុត្រ

The post ឱកាស​សម្រាប់​ស្ត្រី​​ចូល​រួម​រត់ Pink Run ដើម្បី​យល់​ពី​ជំងឺ​មហារីកសុដន់ appeared first on Kampuchea Thmey Daily.

“រត់ដើម្បីសុខភាពសហគមន៍” គឺត្រូវបានបង្កើតឡើងក្នុងគោលបំណងលើកទឹកចិត្ត និងកៀរគរសិស្សានុសិស្សចូលរួមលេងកីឡាតាមរយៈការប្រកួតរត់រយៈចម្ងាយ។

លោកស្រី មាស គន្ធា នាយិការងនៃក្រុមហ៊ុនប្រេងឥន្ធនៈ ប៊ីវីអឹម បានមានប្រសាសន៍ថា “តាមរយៈកីឡា ពួកយើងជឿជាក់យ៉ាងមុតមាំថា ពួកយើងបានចូលរួមចំណែកក្នុងការដឹកនាំសិស្សានុសិស្ស បណ្តុះស្មារតី    និងរាងកាយពួកគេឱ្យមានសុខភាពល្អ ដែលនេះក៏ជាផ្នែកមួយនៃការត្រួសត្រាយផ្លូវសម្រាប់អនាគតដ៏ត្រចះត្រចង់ របស់ពួកគេផងដែរ។ ជាងនេះទៅទៀត នៅពេលដែលសិស្សានុសិស្សមានសុខភាពល្អ សាលារៀនក៏មានសុខភាពល្អ  នៅពេលដែលសាលារៀនមានសុខភាពល្អ សហគមន៍ទាំងមូលក៏មានសុខភាពល្អដូចគ្នា!”

តាមរយៈកម្មវិធីប្រកួតរត់ចម្ងាយនេះ សិស្សានុសិស្សដែលទទួលជ័យលាភី​ នឹងទទួលបានរង្វាន់លើកទឹកចិត្ត រួមទាំងឱកាសទទួលបានទស្សនកិច្ចសិក្សា ពីខ្សែសង្វាក់ការងាររបស់ក្រុមការងារ នៅការិយាល័យកណ្តាល មណ្ឌលសន្និធិប្រេងឥន្ធនៈ និងស្ថានីយលក់រាយ របស់ ប៊ីវីអឹម ។​​

បន្ថែមពីនេះ  ពួកគេនឹងចូលរួមក្នុងព្រឹត្តិការណ៍រត់ម៉ារ៉ាតុងអន្តរជាតិដ៏មានកិត្យានុភាពដែលធ្វើឡើងនៅខេត្តសៀមរាប ឈ្មោះថា “ទិវារត់ប្រណាំងម៉ារ៉ាតុងអន្តរជាតិចក្រភពអង្គរ” នៅថ្ងៃទី៣-៤ សីហា នេះ។ ពួកគេ ក៏អាចនឹងទទួលបានរង្វាន់ជាថវិការរហូតដល់ ១លានរៀលក្នុងម្នាក់ ដើម្បីជាកញ្ចប់ឧបត្ថម្ភដល់ការសិក្សាររបស់ពួកគេ ប្រសិនបើពួកគេអាចរត់តាមរយៈចំងាយ​ និងរយៈពេលកំណត់។  

ដើម្បីជាការចូលរួមចំណែកក្នុងវិស័យអប់រំ ក៏ដូចជាដើម្បីការអភិវឌ្ឍវិទ្យាល័យ និងតបស្នងដល់ការខិតខំប្រឹងប្រែងចូលរួមរបស់សិស្សានុសិស្ស និងការជ្រោមជ្រែងរបស់វិទ្យាល័យ ក្រុមហ៊ុនប្រេងឥន្ធនៈ ប៊ីវីអឹម ក៏នឹងចូលរួមជាវិភាគទានជំនួយ ចំនួន ៤​ លានរៀល ទៅកាន់សាលាដូចគ្នា។

បន្ថែមពីលើនេះផងដែរ ដើម្បីជាផ្នែកមួយក្នុងការជួយសម្រាលបន្ទុកខ្លះៗដល់លោកគ្រូអ្នកគ្រូ​ និងបុគ្គលិករបស់វិទ្យាល័យ ជា ស៊ីម ព្រែកអញ្ចាញ  ក្រុមហ៊ុនប្រេងឥន្ធនៈ ប៊ីវីអឹម បានរៀបចំផ្តល់ជា​កម្មវិធីដែលយើងឱ្យឈ្មោះថា “អានុភាព ដើម្បីការអប់រំ” (ANUPHEAP-Fueling Education) ។ តាមរយៈកម្មវិធី “អានុភាព ដើម្បីការអប់រំ” បុគ្គលិករបស់វិទ្យាល័យ ជា ស៊ីមព្រែកអញ្ចាញ នឹងអាចទទួលប្រេងឥន្ធនៈ ឬទឹកប្រាក់ត្រឡប់មកវិញចំនួន ៥%​ ជារៀងរាល់ចុងខែនៅពេលដែលពួកគាត់ចាក់ប្រេងតាមកម្មវិធីទូរស័ព្ទ អានុភាព (ANUPHEAP) នៅស្ថានីយប្រេងឥន្ធនៈ ប៊ីវីអឹម ផងដែរ។​

តាមរយៈ សកម្មភាពទំនួលខុសត្រូវសង្គម ក្រុមហ៊ុនប្រេងឥន្ធនៈ ប៊ីវីអឹម  សង្ឃឹមក្នុងការចូលរួមចំណែកជំរុញការផ្លាស់ប្តូរ និងការកែលម្អប្រកបដោយអត្ថន័យ និងភាពវិជ្ជមានសម្រាប់សហគមន៍ និងសង្គមរបស់យើង។ នេះ មិនគ្រាន់តែជាការផ្តល់ត្រឡប់ទៅកាន់សហគមន៍ទេ  ប៉ុន្តែវាជាការចូលរួមយ៉ាងសកម្មនៅក្នុងកិច្ចខិតខំប្រឹងប្រែងរួមគ្នា ដើម្បីកសាងអនាគតដ៏ត្រចះត្រចង់ និងនិរន្តរភាពសម្រាប់ទាំងអស់គ្នា។

លោកស្រី មាស គន្ធា បានមានប្រសាសន៍ថា “ទំនួលខុសត្រូវសង្គម តែងតែជាផ្នែកមួយនៃសកម្មភាព និងការធ្វើការងាររបស់ ប៊ីវីអឹម ព្រោះវាបានផ្សារភ្ជាប់យ៉ាងស៊ីជម្រៅជាមួយនឹងចក្ខុវិស័យរបស់ក្រុមហ៊ុនយើង ដែលបង្ហាញពីការប្តេជ្ញាចិត្តក្នុងការបង្កើតផលវិជ្ជមាន និងនិរន្តរភាពដល់សង្គម និងភាគីពាក់ព័ន្ធទាំងអស់។”

លោកស្រី បានបន្តថា “ចាប់តាំងពីដំណើរការនៃក្រុមហ៊ុនមក យើងបានចូលរួមក្នុងសកម្មភាពពាក់ព័ន្ធនឹងសុខុមាលភាពរបស់សហគមន៍ ក្រោមទម្រង់ផ្សេងៗជាច្រើនតាមរយៈការផ្តល់ និងចែករំលែក ទៅតាមវិធីសាស្រ្តរបស់ពួកយើង ដោយសង្ឃឹមថាសកម្មភាពទាំងនោះ នឹងរួមចំណែកដល់ផលវិជ្ជមានដល់សហគមន៍ទាំងមូល។”

ក្រុមហ៊ុនប្រេងឥន្ធនៈ ប៊ីវីអឹម ដែលបានដំណើរការតាំងពីឆ្នាំ ២០០៨ មក បានក្លាយជាក្រុមហ៊ុនប្រេងឥន្ធនៈ នាំចូល លក់ និងចែកចាយ ប្រេងឥន្ធនៈ ក្នុងស្រុកឈានមុខមួយនៅក្នុងវិស័យប្រេងឥន្ធនៈនៅព្រះរាជាណាចក្រកម្ពុជា។​

លោកស្រី មាស​ គន្ធា បានបន្តថា  “ពួកយើង មានមោទនភាពដែលបានក្លាយជាក្រុមហ៊ុនក្នុងស្រុក ផ្គត់ផ្គង់ប្រេងឥន្ធនៈដែលមានការគាំទ្រយ៉ាងច្រើនពីសំណាក់ប្រជាពលរដ្ឋកម្ពុជា ដែលពួកគាត់ជាអ្នកប្រើប្រាស់ចុងក្រោយ ម្ចាស់អាជីវកម្មដែលប្រើប្រាស់ប្រេងឥន្ធនៈ និងម្ចាស់ស្ថានីយតាមបណ្តាខេត្តក្រុងក្នុងព្រះរាជាណាចក្រកម្ពុជា។​”

The post ប៊ីវីអឹម​ សហការជាមួយ វិទ្យាល័យជាស៊ីមព្រែកអញ្ចាញ រៀបចំកម្មវិធី “រត់ដើម្បីសុខភាពសហគមន៍” appeared first on Kampuchea Thmey Daily.

លោក វ៉ាត់ ចំរើន រដ្ឋ​លេខាធិការ​ក្រសួង​ អប់រំ យុវជន និង​កីឡា និងជា​អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា (NOCC) ​បាន​ឲ្យ​ដឹង​ថា ព្រឹត្តិការណ៍​រត់​ប្រណាំង​​អន្តរជាតិ​ពាក់​កណ្តាល​ម៉ារ៉ាតុង​ខេត្ត​ព្រះ​សីហនុ លើក​ទី​៩​ ឆ្នាំ​​២០២៤​ គឺ​មាន​លក្ខណៈ​ពិសេស​ជាង​ឆ្នាំ​មុនៗ បន្ទាប់​ពី​ផ្លូវ​នានា​​​ក្នុង​ទី​ក្រុង​កំពង់សោម​ត្រូវ​បាន​កសាង​ស្អាត និង​រត់​​តាម​​ឆ្នេរ​មាត់​សមុទ្រ​​សុទ្ធ​តែ​ជា​ផ្លូវ​​ទេសចរណ៍គួរឲ្យ​ចាប់​អារម្មណ៍។

រដ្ឋលេខាធិការ​​​ក្រសួង​អប់រំ យុវជន និង​កីឡារូប​នេះ​បាន​សង្កត់​ធ្ងន់​ថា គោល​ដៅ​​នៃ​ការ​រៀបចំ​ព្រឹត្តិការណ៍​រត់​ប្រណាំង​អន្តរជាតិ​ពាក់​កណ្តាល​ម៉ារ៉ាតុង​នេះ​​​មាន​២​សំខាន់​គឺ​ទី១​ ​ធ្វើ​ដើម្បី​បុព្វហេតុ​​សប្បុរស​ធម៌ និង​ទី​២​ដើម្បី​ជំរុញ​វិស័យ​ទេសចរណ៍។

លោក វ៉ាត់ ចំរើន មាន​ប្រសាសសន៍ ៖«​ការ​រៀបចំ​ទិវា​រត់​ប្រណាំង​​​​គឺ​ជា​ផ្នែក​ដ៏​សំខាន់​ក្នុង​ការ​ជំរុញ​វិស័យ​ទេសចរណ៍។ យើង​ប្រមូល​ទស្សនទាន​ទាំង​អស់​ដើម្បី​បំផុស​​សកម្មភាព​ផ្សព្វផ្សាយ​ពី​ការ​អភិវឌ្ឍ​នៅ​ក្នុង​ខេត្ត​ព្រះ​សីហនុ ហេដ្ឋារចនា​សម្ព័ន្ធ​ផ្លូវ​ថ្នល អគារ ឆ្នេរ​សមុទ្រ​ស្អាត»។

ជា​មួយ​គ្នា​នេះ លោក សែម ផល្លា នាយក​​គណៈកម្មាធិការ​​រៀបចំ​រត់​ប្រណាំង​កម្ពុជា បាន​ឲ្យ​ដឹង​ថា រហូត​ដល់​ពេល​នេះ​មាន​អ្នក​ចុះ​ឈ្មោះ​ចូល​រួម​រត់​ប្រណាំង​ជាង​១០០០​នាក់​ហើយ។ ទម្រាំ​​ដល់​​ថ្ងៃ​បិទ​ អ្នក​ចុះ​ឈ្មោះ​នឹង​កើន​ដល់​​ជាង​២​​០០០​នាក់។ ក្នុង​ចំណោម​អ្នក​​ដែល​បាន​ចុះឈ្មោះ​ទាំង​នោះ​ ក៏​មាន​ជន​បរទេស​ជាង​២០០​នាក់ ​ភាគ​ច្រើន​ជា​ជន​បរទេស​កំពុង​ស្នាក់​នៅ​ប្រទេស​កម្ពុជា។

​អ្នក​គ្រប់​គ្រង​រត់​ប្រណាំង​រូប​នេះ​បានរៀប​រាប់​ថា ទី​តាំង​ចាប់​ផ្តើម និង​ទី​ផ្តាច់​ព្រ័ត្រ​​គឺ​នៅ​ឆ្នេរសមុទ្រ​អូរឈើទាល។ ឆ្នាំ​នេះ​មាន​៤​វិញ្ញាសា​គឺ​២១​គីឡូម៉ែត្រ ១០​គីឡូម៉ែត្រ ៥គីឡូម៉ែត្រ និង​៣​គីឡូម៉ែត្រ។ ជា​ពិសេស ការ​រត់​​ឆ្លង​កាត់​រូប​សំណាក់​តោ​ពីរ ហើយ​សម្រាប់​ចម្ងាយ​២១​គីឡូម៉ែត្រ​រត់​តាម​បណ្តោយ​ឆ្នេរ​សមុទ្រ​ឆ្ពោះ​​រហូត​ទៅ​ដល់​ដើម​ឈើ​ចាំ​ស្នេហ៍​ទើប​ត្រឡប់​វិញ»។

ថ្វី​បើ​ស្ថានភាព​​ផ្លូវ​ស្អាតតាម​មាត់​ឆ្នេរ​សមុទ្រគួរ​ឲ្យ​ចាប់​អារម្មណ៍ និង​ទាក់​ទាញ​សម្រាប់​អ្នក​រត់​ ​ប៉ុន្តែ​​ចំនួន​អ្នក​​ចុះ​ឈ្មោះ​មិន​ទាន់​ច្រើន​​រាប់​ម៉ឺន​នាក់​ដូច​បណ្តា​ប្រទេស​មួយ​ចំនួន​ឡើយ។ ដូច្នេះ​ហើយ​បាន​ជា​​កម្ពុជា​​ទើប​តែ​បាន​សហការ​គ្នា​ជា​មួយ​គណៈកម្មការ​រៀបចំ​ព្រឹត្តិការណ៍​ម៉ារ៉ាតុង​ចិន​ដើម្បី​ជំរុញ​ការ​ផ្សព្វផ្សាយ និង​ទាក់ទាញ​​​ប្រជា​ជន​ចិន​ចូល​រួម​កាន់​តែ​ច្រើន។

លោក​ វ៉ាត់ ចំរើន បញ្ជាក់​ថា ៖«ទោះ​បី​ជា​យ៉ាង​ណា សម្រាប់​ទិវា​រត់​ប្រណាំង​នៅ​កំពង់សោម​​ខែ​មេសា​ខាង​មុខ​នេះ ភាគី​​រៀប​ចំ​ម៉ារ៉ាតុង​ចិន​មិន​ទាន់​​អាច​ចូល​រួម​ជា​មួយ​បាន​ទេ។ ប្រហែល​ជា​ខែ​មិថុនា​ទើប​ចិន​អាច​នឹង​ចូល​រួម​​បាន​គឺ​ព្រឹត្តិការណ៍​រត់​ពាក់​កណ្តាល​ម៉ារ៉ាតុង​​អន្តរជាតិ​ភ្នំពេញ»។​​

ព្រឹត្តិការណ៍​​រត់​ប្រណាំង​អន្តរជាតិ​ពាក់​កណ្តាល​ម៉ារ៉ាតុង លើក​ទី​៩​ នៅ​ខេត្ត​ព្រះ​សីហនុ នឹង​ធ្វើ​នៅ​ថ្ងៃ​អាទិត្យ ទី​៧ ខែ​មេសា ឆ្នាំ​២០២៤៕

អត្ថបទ៖ វីរបុត្រ

The post គួរចូលរួម រត់ម៉ារ៉ាតុងព្រះសីហនុខែក្រោយនេះឆ្លងកាត់ដើមឈើចាំស្នេហ៍ appeared first on Kampuchea Thmey Daily.