រថយន្តដឹកកម្មករ Archives - Kampuchea Thmey Daily

មន្ត្រីជាន់ខ្ពស់ ប.ស.ស ៖ ការផ្លាស់ប្ដូរ ឬ កែលម្អរថយន្តដឹកកម្មករ ឱ្យមានផាសុកភាព និងសុវត្ថិភាព ត្រូវធ្វើជា ៣ ដំណាក់កាល

អ៊ិន ពិសី — Wed, 27 Aug 2025 03:35:11 +0000

មន្ត្រីជាន់ខ្ពស់ ប.ស.ស បានអះអាងថា ការផ្លាស់ប្តូរ ឬកែលម្អរថយន្តដឹកកម្មករ-និយោជិត ឱ្យមានផាសុកភាព និងសុវត្ថិភាព ត្រូវធ្វើឡើងជា ៣ ដំណាក់កាល ពោលគឺចាប់ពីឆ្នាំ ២០២៥ រហូតដល់បំណាច់ឆ្នាំ ២០២៧ ខាងមុខ ដើម្បីធ្វើយ៉ាងណាចូលរួមកាត់បន្ថយអត្រាគ្រោះថ្នាក់ចរាចរណ៍ក្នុងចំណោមកម្មករ-និយោជិត ឱ្យនៅកម្រិតទាបបំផុត។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ២៧ សីហា នេះថា ក្នុងនោះ ដំណាក់កាលទី ១ ជំរុញការផ្លាស់ប្តូររថយន្តប្រភេទដឹកទំនិញដែលដឹកកម្មករឈរមកអង្គុយ ដោយរៀបចំឱ្យមានបន្ទះក្តារ ឬរនូតដែក ឬឈើ មានការថយចុះចំនួនផ្ទុក ១៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៥។ ដំណាក់កាលទី ២ ជំរុញការផ្លាស់ប្តូររថយន្តប្រភេទដឹកទំនិញ ដែលដឹកកម្មករឈរដោយកែលម្អឱ្យមានកៅអីអង្គុយ និងមានដំបូល ថយចុះចំនួនផ្ទុក ២៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៦ និងដំណាក់កាលទី ៣ ជំរុញការផ្លាស់ប្តូររថយន្តប្រភេទដឹកទំនិញ ដែលដឹកកម្មករមករថយន្តប្រភេទដឹកអ្នកដំណើរ ឬដោយកែលម្អឱ្យមានកៅអីអង្គុយសមរម្យ និងមានដំបូលថយចុះចំនួនផ្ទុក ៣៦% ដោយធៀបនឹងចំនួនផ្ទុកមុនពេលកែលម្អនៅឆ្នាំ ២០២៧។

លោកបណ្ឌិត បានបន្តទៀតថា រថយន្តប្រភេទដឹកទំនិញដឹកកម្មករឈរចំនួន ១ ៨២៤ គ្រឿង ត្រូវកែលម្អឱ្យទៅជារថយន្តមានផាសុកភាព និងសុវត្ថិភាពសម្រាប់ដឹកកម្មករ-និយោជិត យ៉ាងយូរត្រឹមបំណាច់ឆ្នាំ ២០២៧ ខាងមុខនេះ ដើម្បីឆ្លើយតបទៅតាមអនុសាសន៍របស់ សម្តេចមហាបវរធិបតី ហ៊ុន ម៉ាណែត ដែលបានដាក់ឱ្យក្រសួងការងារ និងបណ្តុះបណ្តាលវិជ្ជាជីវៈ ឬក្រសួងស្ថាប័ន អង្គភាពពាក់ព័ន្ធ អនុវត្តឱ្យបានជោគជ័យ។

លោកអគ្គនាយករង ប.ស.ស បានបញ្ជាក់ថា ការកំណត់ជា ៣ ដំណាក់ ដើម្បីជំរុញការផ្លាស់ប្តូរ ឬកែលម្អរថយន្តដឹកកម្មករឱ្យមានផាសុកភាព និងសុវត្ថិភាពនេះ ដោយសារតែម្ចាស់រថយន្តដឹកកម្មករ-និយោជិតនៅមិនទាន់មានលទ្ធភាពធ្វើការផ្លាស់ប្ដូរពីរថយន្តដឹកទំនិញមករថយន្តដឹកអ្នកដំណើរបាន ក៏ព្រោះតែរថយន្តប្រភេទដឹកអ្នកដំណើរមានតម្លៃថ្លៃ ស៊ីប្រេងច្រើន និងត្រូវជួសជុលថែទាំញឹកញាប់ជាងរថយន្តប្រភេទដឹកទំនិញ និងមិនអាចចូលដល់ក្នុងភូមិបាន ព្រោះស្ថានភាពផ្លូវតូចចង្អៀត។ អ្នកបើកបរមួយចំនួនធំ កំពុងជាប់បំណុលជាមួយធនាគារ។ ការផ្ទុកកម្មករលើរថយន្តបានចំនួនតិចជាងមុន ហើយបើដំឡើងថ្លៃធ្វើដំណើរវានឹងប៉ះពាល់ដល់កម្មករ និងរោងចក្រ សហគ្រាស គ្មានលទ្ធភាពបន្ថែមប្រាក់ធ្វើដំណើរជូនកម្មករ។

គួរបញ្ជាក់ថា ឆ្នាំ ២០២៤ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត(ស.ផ.ក) នៃបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានស្រង់ស្ថិតិរថយន្តដឹកកម្មករ បានសរុបចំនួន ៣ ៣៣២ គ្រឿង ក្នុងនោះ រថយន្តប្រភេទដឹកទំនិញ មានចំនួន ១ ៩៦៣ គ្រឿង (រថយន្តបានកែលម្អឱ្យមានកៅអីអង្គុយមានចំនួន ២៦៧ គ្រឿង) និងរថយន្តប្រភេទដឹកអ្នកដំណើរស្របតាមលក្ខណៈបច្ចេកទេសមានចំនួន ១ ៣៦៩ គ្រឿង៕

អត្ថបទ ៖ សំអឿន

The post មន្ត្រីជាន់ខ្ពស់ ប.ស.ស ៖ ការផ្លាស់ប្ដូរ ឬ កែលម្អរថយន្តដឹកកម្មករ ឱ្យមានផាសុកភាព និងសុវត្ថិភាព ត្រូវធ្វើជា ៣ ដំណាក់កាល appeared first on Kampuchea Thmey Daily.

រថយន្តដឹកកម្មករជិត ២ពាន់គ្រឿង នឹងត្រូវកែលម្អឱ្យក្លាយជារថយន្តមានផាសុកភាព និងសុវត្ថិភាព ត្រឹមដំណាច់ឆ្នាំ២០២៧

Chan Sotheavy — Sat, 23 Aug 2025 02:39:28 +0000

រថយន្តប្រភេទដឹកទំនិញដឹកកម្មករឈរប្រមាណជិត ២ពាន់គ្រឿង នឹងត្រូវកែលម្អឱ្យទៅជារថយន្តមានផាសុកភាព និងសុវត្ថិភាព នៅត្រឹមដំណាច់ឆ្នាំ២០២៧ ខាងមុខនេះ។ នេះបើតាមការបញ្ជាក់លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត (ស.ផ.ក)។

ក្នុងពិធីផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពក្នុងការដឹកជញ្ជូន ជូនអ្នកបើកបរយានយន្តដឹកកម្មករ និងកម្មករនិយោជិត” នៅរោងចក្រ SUNFAIR GARMENT ក្នុងភូមិសាស្ត្រខេត្តកណ្តាល កាលពីថ្ងៃទី២២ សីហា លោកបណ្ឌិត ហេង សុផាន់ណារិទ្ធ បានលើកឡើងថា ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានបន្តជំរុញការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាពជាងមុន យ៉ាងយូរត្រឹមឆ្នាំ២០២៧ ដើម្បីកាត់បន្ថយអត្រាគ្រោះថ្នាក់ចរាចរណ៍ផ្លូវគោក របស់កម្មករនិយោជិត ឱ្យនៅកម្រិតទាបបំផុត។

លោកបណ្ឌិត បន្តថា ដើម្បីអនុវត្តឱ្យស្របតាមអនុសាសន៍ណែនាំដ៏ខ្ពង់ខ្ពស់ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត បានរៀបចំពង្រីកវិសាលភាពការអនុវត្តផែនការសកម្មភាពនៅក្នុងក្របខណ្ឌទូទាំងប្រទេសកម្ពុជា ស្តីពី ការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាព។

ក្នុងនោះក្រុមការងារ ស.ផ.ក នៃ ប.ស.ស. បានពង្រីកការអនុវត្តផែនការនេះចំពោះរាជធានី-ខេត្ត ចំនួន១៦ ដែលមានអត្រាប្រមូលផ្តុំទៅដោយរោងចក្រ និងសហគ្រាស ព្រមទាំងមានបរិមាណកម្មករនិយោជិតកំពុងធ្វើដំណើរតាមរថយន្តច្រើនជាងគេ សំដៅកែលម្អរថយន្តប្រភេទដឹកទំនិញដឹកកម្មករឈរសរុប ១៨២៤គ្រឿង ឱ្យទៅជារថយន្តមានផាសុកភាព និងសុវត្ថិភាព សម្រាប់ដឹកកម្មករនិយោជិត នៅត្រឹមដំណាច់ឆ្នាំ២០២៧ ខាងមុខ។

គួរបញ្ជាក់ថា តាមការចុះធ្វើបច្ចុប្បន្នភាពក្នុងឆ្នាំ២០២៤ កន្លងទៅ មានរថយន្តដឹកកម្មករនៅទូទាំងប្រទេសសរុបចំនួន ៣ ៣៣២ គ្រឿង ក្នុងនោះមានរថយន្តដឹកកម្មករប្រភេទដឹកអ្នកដំណើរចំនួន ១១២៩ គ្រឿង ដែលមានការផ្លាស់ប្តូរស្របតាមបទដ្ឋានបច្ចេកទេស និងមានផាសុកភាព៕ អត្ថបទ៖ សំអឿន

The post រថយន្តដឹកកម្មករជិត ២ពាន់គ្រឿង នឹងត្រូវកែលម្អឱ្យក្លាយជារថយន្តមានផាសុកភាព និងសុវត្ថិភាព ត្រឹមដំណាច់ឆ្នាំ២០២៧ appeared first on Kampuchea Thmey Daily.

មន្ត្រីជាន់ខ្ពស់ ជំរុញម្ចាស់រថយន្តដឹកកម្មករផ្លាស់ប្ដូរ ឬកែលម្អពីរថយន្តដឹកទំនិញ ទៅរថយន្តធ្វើដំណើរ ដើម្បីធានាសុវត្ថិភាពដល់កម្មករ

អ៊ិន ពិសី — Tue, 17 Jun 2025 09:12:21 +0000

មន្ត្រីជាន់ខ្ពស់ ប.ស.ស បានជំរុញដល់ម្ចាស់រថយន្តដឹកកម្មករធ្វើការផ្លាស់ប្តូរ ឬកែលម្អ ពីរថយន្តដឹកទំនិញទៅរថយន្តធ្វើដំណើរ ដើម្បីធានាឱ្យកម្មករ-និយោជិត ទទួលបានផាសុកភាព និងសុវត្ថិភាពពេលធ្វើដំណើរទៅ និងមកកន្លែងធ្វើការ។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ១៧ មិថុនា នេះថា ការជំរុញនេះដោយសារតែបច្ចុប្បន្នមានម្ចាស់រថយន្តដឹកកម្មករ-និយោជិតមួយចំនួន បានបន្តយករថយន្តដឹកទំនិញទៅកែច្នៃដឹកកម្មករដែលតម្រូវឱ្យកម្មករត្រូវឈរប្រជ្រៀតគ្នា ធ្វើឱ្យកម្មករប្រឈមនឹងគ្រោះថ្នាក់ធ្ងន់ធ្ងរពេលជួបគ្រោះថ្នាក់ចរាចរណ៍។ ម្យ៉ាងទៀត តាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ធ្វើយ៉ាងណាជំរុញការផ្លាស់ប្តូររថយន្តដឹកទំនិញដែលកែច្នៃដឹកកម្មករ-និយោជិតនាពេលបច្ចុប្បន្នទៅជារថយន្តដឹកអ្នកដំណើរសម្រាប់ដឹកកម្មករ-និយោជិត យ៉ាងយូរត្រឹមឆ្នាំ ២០២៧ ក្នុងគោលបំណងដើម្បីកាត់បន្ថយអត្រាគ្រោះថ្នាក់ការងារឱ្យបានជាអតិបរមា។

លោកបណ្ឌិត ហេង សុផាន់ណារិទ្ធ ដែលជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) នៃបេឡាជាតិសន្តិសុខសង្គម បានបន្តទៀតថា កន្លងមក ស.ផ.ក បានសហការជាមួយអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) និងអគ្គស្នងការនគរបាលជាតិ នៃក្រសួងមហាផ្ទៃ បានកំណត់ជា ៣ ដំណាក់កាល ដើម្បីជំរុញការផ្លាស់ប្តូរ ឬកែលម្អរថយន្តដឹកកម្មករឱ្យមានផាសុកភាព និងសុវត្ថិភាព។ ក្នុងនោះ ដំណាក់កាលទី ១ ជំរុញការផ្លាស់ប្តូររថយន្តប្រភេទដឹកទំនិញដែលដឹកកម្មករឈរមកអង្គុយ ដោយរៀបចំឱ្យមានបន្ទះក្ដារ ឬរនូតដែក ឬឈើ មានការថយចុះចំនួនផ្ទុក ១៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៥។ ដំណាក់កាលទី ២ ជំរុញការផ្លាស់ប្តូររថយន្តប្រភេទដឹកទំនិញដែលដឹកកម្មករឈរដោយកែលម្អឱ្យមានកៅអីអង្គុយ និងមានដំបូល ថយចុះចំនួនផ្ទុក ២៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៦ និងដំណាក់កាលទី ៣ ជំរុញការផ្លាស់ប្ដូររថយន្តប្រភេទដឹកទំនិញដែលដឹកកម្មករមករថយន្តប្រភេទដឹកអ្នកដំណើរ ឬដោយកែលម្អឱ្យមានកៅអីអង្គុយសមរម្យ និងមានដំបូល ថយចុះចំនួនផ្ទុក ៣៦% ដោយធៀបនឹងចំនួនផ្ទុកមុនពេលកែលម្អ។

គួរបញ្ជាក់ថា ឆ្នាំ ២០២៤ កន្លងទៅ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) នៃបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានស្រង់ស្ថិតិរថយន្តដឹកកម្មករ បានសរុបចំនួន ៣ ៣៣២ គ្រឿង ក្នុងនោះ រថយន្តប្រភេទដឹកទំនិញ មានចំនួន ១ ៩៦៣ គ្រឿង (រថយន្តបានកែលម្អឱ្យមានកៅអីអង្គុយមានចំនួន ២៦៧ គ្រឿង) និងរថយន្តប្រភេទដឹកអ្នកដំណើរស្របតាមលក្ខណៈបច្ចេកទេសមានចំនួន ១ ៣៦៩ គ្រឿង៕

អត្ថបទ ៖ សំអឿន

The post មន្ត្រីជាន់ខ្ពស់ ជំរុញម្ចាស់រថយន្តដឹកកម្មករផ្លាស់ប្ដូរ ឬកែលម្អពីរថយន្តដឹកទំនិញ ទៅរថយន្តធ្វើដំណើរ ដើម្បីធានាសុវត្ថិភាពដល់កម្មករ appeared first on Kampuchea Thmey Daily.

អ្នកនាំពាក្យ ៖ មានកត្តា ៤ យ៉ាង ជាឧបសគ្គមិនអាចផ្លាស់ប្ដូររថយន្តដឹកកម្មករ ពីប្រភេទដឹកទំនិញទៅប្រភេទដឹកអ្នកដំណើរ

អ៊ិន ពិសី — Fri, 14 Mar 2025 09:04:16 +0000

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានអះអាងថា មានកត្តាចំនួន ៤ ជាឧបសគ្គមិនអាចឱ្យម្ចាស់រថយន្តដឹកកម្មករ-និយោជិតអាចផ្លាស់ប្តូរប្រភេទរថយន្តដឹកទំនិញទៅរថយន្តដឹកអ្នកដំណើរបាន ដែលបញ្ហានេះជាផ្នែកមួយធ្វើឱ្យកម្មករ-និយោជិតត្រូវប្រឈមខ្ពស់ពេលធ្វើដំណើរទៅមកកន្លែងធ្វើការ។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ១៤ មីនា នេះថា កត្តា ៤ យ៉ាង ជាឧបសគ្គមិនអាចផ្លាស់ប្ដូររថយន្តដឹកកម្មករពីប្រភេទដឹកទំនិញទៅប្រភេទដឹកអ្នកដំណើរ ក្នុងនោះ ទី១.រថយន្តប្រភេទដឹកអ្នកដំណើរមានតម្លៃថ្លៃ ស៊ីប្រេងច្រើន និងត្រូវជួសជុលថែទាំញឹកញាប់ជាងរថយន្តប្រភេទដឹកទំនិញ និងមិនអាចចូលដល់ក្នុងភូមិបាន ព្រោះស្ថានភាពផ្លូវតូចចង្អៀត។ ទី២.អ្នកបើកបរមួយចំនួនធំកំពុងជាប់បំណុលជាមួយធនាគារ។ ទី៣.ការផ្ទុកកម្មករលើរថយន្តបានចំនួនតិចជាងមុន ហើយបើដំឡើងថ្លៃធ្វើដំណើរវានឹងប៉ះពាល់ដល់កម្មករ និង ទី៤.រោងចក្រ សហគ្រាស គ្មានលទ្ធភាពបន្ថែមប្រាក់ធ្វើដំណើរជូនកម្មករ-និយោជិត។

យ៉ាងណាក៏ដោយយោងតាមអនុសាសន៍របស់ សម្តេចមហាបវរធិបតី ដែលមានក្រសួងការងារ និងបណ្តុះបណ្តាលវិជ្ជាជីវៈ ឬក្រសួងស្ថាប័ន អង្គភាពពាក់ព័ន្ធ ត្រូវអនុវត្តការងារផ្លាស់ប្តូររថយន្តដឹកកម្មករពីប្រភេទដឹកទំនិញទៅប្រភេទដឹកអ្នកដំណើរនេះយ៉ាងយូរត្រឹមបំណាច់ឆ្នាំ ២០២៧។

លោកបានបញ្ជាក់ថា ត្រង់ចំណុចនេះ ក្រសួងការងារ និងបណ្តុះបណ្តាលវិជ្ជាជីវៈ ដែលមានបេឡាជាតិសន្តិសុខសង្គម ជាសេនាធិការ តាមរយៈក្រុមការងារ ស.ផ.ក បានសហការជាមួយអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) និងអគ្គស្នងការនគរបាលជាតិ នៃក្រសួងមហាផ្ទៃ បានកំណត់ជា ៣ ដំណាក់ ដើម្បីជំរុញការផ្លាស់ប្តូរ ឬកែលម្អរថយន្តដឹកកម្មករឱ្យមានផាសុកភាព និងសុវត្ថិភាព ក្នុងនោះ ដំណាក់កាលទី ១ ជំរុញការផ្លាស់ប្តូររថយន្តប្រភេទដឹកទំនិញ ដែលដឹកកម្មករឈរមកអង្គុយ ដោយរៀបចំឱ្យមានបន្ទះក្ដារ ឬរនូតដែក ឬឈើ មានការថយចុះចំនួនផ្ទុក ១៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៥។ ដំណាក់កាលទី២ ជំរុញការផ្លាស់ប្តូររថយន្តប្រភេទដឹកទំនិញ ដែលដឹកកម្មករឈរដោយកែលម្អឱ្យមានកៅអីអង្គុយ និងមានដំបូល ថយចុះចំនួនផ្ទុក ២៣% ដោយធៀបនឹងចំនួនផ្ទុកមុនពេលកែលម្អ នៅត្រឹមដំណាច់ឆ្នាំ ២០២៦ និងដំណាក់កាលទី ៣ ជំរុញការផ្លាស់ប្តូររថយន្តប្រភេទដឹកទំនិញ ដែលដឹកកម្មករមករថយន្តប្រភេទដឹកអ្នកដំណើរ ឬដោយកែលម្អឱ្យមានកៅអីអង្គុយសមរម្យ និងមានដំបូល ថយចុះចំនួនផ្ទុក ៣៦% ដោយធៀបនឹងចំនួនផ្ទុកមុនពេលកែលម្អ។

លោកបណ្ឌិត ហេង សុផាន់ណារិទ្ធ បានលើកឡើងរបាយការណ៍មកបញ្ជាក់ថា នៅឆ្នាំ ២០២៤ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) នៃបេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានស្រង់ស្ថិតិរថយន្តដឹកកម្មករ បានសរុបចំនួន ៣ ៣៣២ គ្រឿង ក្នុងនោះ រថយន្តប្រភេទដឹកទំនិញ មានចំនួន ១ ៩៦៣ គ្រឿង (រថយន្តបានកែលម្អឱ្យមានកៅអីអង្គុយមានចំនួន ២៦៧ គ្រឿង) និងរថយន្តប្រភេទដឹកអ្នកដំណើរស្របតាមលក្ខណៈបច្ចេកទេសមានចំនួន ១ ៣៦៩ គ្រឿង។

លោកបានបន្តទៀតថា ជាមួយគ្នានេះ ក្រុមការងារ ស.ផ.ក នៃ ប.ស.ស. បាននិងកំពុងសហការជាមួយអគ្គស្នងការនគរបាលជាតិ នៃក្រសួងមហាផ្ទៃ ដើម្បីចុះស្រង់ស្ថិតិអ្នកបើកបររថយន្តដឹកកម្មករសម្រាប់ឆ្នាំ ២០២៥ នេះផងដែរ៕

អត្ថបទ ៖ សំអឿន

The post អ្នកនាំពាក្យ ៖ មានកត្តា ៤ យ៉ាង ជាឧបសគ្គមិនអាចផ្លាស់ប្ដូររថយន្តដឹកកម្មករ ពីប្រភេទដឹកទំនិញទៅប្រភេទដឹកអ្នកដំណើរ appeared first on Kampuchea Thmey Daily.

កម្ពុជា កំពុងរៀបចំផែនការផ្លាស់ប្តូររថយន្តដឹកកម្មករនិយោជិតឱ្យកាន់តែមានសុវត្ថិភាព

Samean Lay — Mon, 10 Feb 2025 09:21:49 +0000

ក្រសួង និងស្ថាប័នពាក់ព័ន្ធ កំពុងរៀបចំផែនការ សម្រាប់ផ្លាស់ប្តូររថយន្តដឹកកម្មករឱ្យកាន់តែមានសុវត្ថិភាព និងមានផាសុកភាពជាងមុន ខណៈរថយន្ដដឹកកម្មករនិយោជិតមួយចំនួននាពេលបច្ចុប្បន្ន ងាយបង្កហានិភ័យដល់អ្នកជិះ ដោយសារដឹកលើសចំណុះ ឈរប្រជ្រៀតគ្នា និងការកែច្នៃខុសបច្ចេកទេសជាដើម។

កិច្ចពិភាក្សាស្ដីពី ការរៀបចំផែនការផ្លាស់ប្ដូររថយន្ដប្រភេទដឹកទំនិញដែលដឹកកម្មករឈរ មករថយន្ដប្រភេទដឹកអ្នកដំណើរ ឬកែច្នៃឱ្យមានកៅអីអង្គុយ ត្រូវបានរៀបចំឡើងនៅព្រឹកថ្ងៃទី ១០ ខែកុម្ភៈ ឆ្នាំ ២០២៥ នៅទីស្តីការក្រសួងមហាផ្ទៃ។ កិច្ចប្រជុំនេះ ដឹកនាំដោយ លោកឧត្តមសេនីយ៍ ហ៊ឹម យ៉ាន រដ្ឋលេខាធិការក្រសួងមហាផ្ទៃ និងជាអគ្គលេខាធិការរង នៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងលោក សេន ស៊ីហ៊ត់ រដ្ឋលេខាធិការក្រសួងសាធារណការ និងដឹកជញ្ជូន។

បន្ថែមពីនេះក៏មានការចូលរួមកិច្ចពិភាក្សាពីលោក ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) ដើម្បីស្តាប់គោលការណ៌ណែនាំ។
លោក ហេង សុផាន់ណារិទ្ធ ធ្លាប់បានលើកឡើងថា ប.ស.ស បាននិងកំពុងជំរុញឱ្យមានការផ្លាស់ប្ដូររថយន្តដឹកទំនិញដែលកែច្នៃដឹកកម្មករ-និយោជិត នាពេលបច្ចុប្បន្នទៅជារថយន្តដឹកអ្នកដំណើរសម្រាប់ដឹកកម្មករ-និយោជិត យ៉ាងយូរត្រឹមឆ្នាំ ២០២៧ ដើម្បីកាត់បន្ថយអត្រាគ្រោះថ្នាក់ចរាចរណ៍ផ្លូវគោករបស់កម្មករ-និយោជិតឱ្យនៅកម្រិតទាប។

កិច្ចប្រជុំខាងលើ បានពិភាក្សាទៅលើរបៀបវារៈចំនួន ២រួមមាន ១. កិច្ចពិភាក្សាស្តីពី ការរៀបចំសេចក្ដីណែនាំ អំពីការផ្លាស់ប្តូររថយន្តប្រភេទដឹកទំនិញដែលដឹកកម្មករឈរមករថយន្តប្រភេទដឹកអ្នកដំណើរ ឬកែច្នៃឱ្យមានកៅអីអង្គុយ និង ២. រៀបចំផែនការសកម្មភាព និងនីតិវិធីក្នុងការអនុវត្តអំពីការផ្លាស់ប្តូររថយន្ត ប្រភេទដឹកទំនិញដែលដឹកកម្មករឈរមករថយន្តប្រភេទដឹកអ្នកដំណើរ ឬកែច្នៃឱ្យមានកៅអីអង្គុយសមរម្យ មានសុវត្ថិភាព និងផាសុកភាព។

បើយោងតាមការសិក្សារបស់ ទីភ្នាក់ងារបេឡាជាតិសន្តិសុខសង្គម ហៅកាត់ថា ប.ស.ស នៅក្នុងចំណោមរថយន្ត ៤ ០០០ គ្រឿងដែលកំពុងផ្តល់សេវាដឹកជញ្ជូនកម្មករនិយោជិតទៅមកបំពេញការងារ គឺមានប្រមាណ៦០ភាគរយ ជារថយន្តប្រភេទដឹកទំនិញ។ ការចុះសិក្សារបស់ ប.ស.ស. បានធ្វើឡើងកាលពីឆ្នាំ ២០២០ ដើម្បីឈានទៅរកដំណោះស្រាយជំរុញការផ្លាស់ប្តូររថយន្តដឹកកម្មករពីប្រភេទរថយន្តទំនិញ មិនសូវមានសុវត្ថិភាព មកជារថយន្តដែលមានសុវត្ថិភាពជាងមុន។

តាមរបាយការណ៍ក្រសួងការងារ ចាប់ពីខែមករា រហូតមកដល់ខែកញ្ញា ឆ្នាំ ២០២៤ នេះ មានកម្មករ-និយោជិត ជួបគ្រោះថ្នាក់នៅកន្លែងធ្វើការ និងគ្រោះថ្នាក់ពេលធ្វើដំណើរចំនួន ១២ ៦៤៥ នាក់ ស្រី ៦ ៥៦០ នាក់ ក្នុងនោះគ្រោះថ្នាក់នៅកន្លែងធ្វើការចំនួន ៥ ៥២៨ នាក់ ស្រី ២ ៥៥៥ នាក់ និងគ្រោះថ្នាក់ពេលធ្វើដំណើរចំនួន ៧ ១១៧ នាក់ ស្រី ៤ ០០៥ នាក់៕

The post កម្ពុជា កំពុងរៀបចំផែនការផ្លាស់ប្តូររថយន្តដឹកកម្មករនិយោជិតឱ្យកាន់តែមានសុវត្ថិភាព appeared first on Kampuchea Thmey Daily.

មន្ត្រីជាន់ខ្ពស់៖ ខេត្តកោះកុង ជាខេត្តគំរូដែលមានរថយន្តដឹកកម្មករមានលក្ខណៈបច្ចេកទេសល្អ ផាសុកភាព និងសុវត្ថិភាព

Sokhom Khon — Sun, 26 Jan 2025 03:31:10 +0000

លោកបណ្ឌិត ហេង សុផាន់ណារិទ្ធ អគ្គនាយករង ប ស ស និងជាប្រធានក្រុមការងារ ស.ផ.ក តំណាងលោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវ: បានអះអាងថា ខេត្តកោះកុងជាខេត្តមួយដែលមានរថយន្តដឹកកម្មករដែលមានលក្ខណៈបច្ចេកទេសល្អ ផាសុកភាព
និងសុវត្ថិភាព ហើយក្នុងរយៈពេល ៥ឆ្នាំកន្លងមកនេះ (២០២០-២០២៥) ខេត្តមួយនេះពុំដែលមានករណីគ្រោះថ្នាក់ចរាចរណ៍លើរថយន្តដឹកកម្មករឡើយ។

ក្នុងពីធីបើកកម្មវិធីអប់រំផ្សព្វផ្សាយ “ច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការធ្វើដំណើររបស់កម្មករនិយោជិតជូនអ្នកបើកបររថយន្តដឹកកម្មករនិយោជិត និងកម្មករនិយោជិត” នៅរោងចក្រ YAZAKI (CAMBODIA) PRODUCTS CO., LTD. ដែលមានអ្នកចូលរួមប្រមាណជាង៣០០នាក់ាកាលពីថ្ងៃទី២៥មករា លោក អគ្គនាយករង ប.ស.ស.បានបន្តថា ដូចនេះខេត្តកោះកុងអាចទុកជាខេត្តគំរូ និងបណ្តាអ្នកបើកបររថយន្តដឹកកម្មករនិយោជិត គួរអនុវត្តតាមដើម្បីកាត់បន្ថយគ្រោះថ្នាក់ចរាចរណ៍ រក្សាបាននូវប្រាក់ចំណូល លើកកម្ពស់សុខុមាលភាព សុវត្ថិភាពការងារ និងសុវត្ថិភាពការធ្វើដំណើររបស់ខ្លួនក៏ដូចជាបងប្អូនកម្មករនិយោជិត។

អគ្គនាយករង ប.ស.ស. បានបន្ថែមថា បើទោះបីជាក្នុងខេត្តនេះករណីគ្រោះថ្នាក់ចរាចរណ៍លើរថយន្ដដឹកកម្មករនិយោជិតពុំកើតមានក៏ពិតមែន ប៉ុន្ដែការចុះអប់រំផ្សព្វផ្សាយនៅតែជាយន្ដការអនុវត្តជាប្រចាំ របស់ក្រុមការងារ ស.ផ.ក ដើម្បីរួមចំណែកក្នុងការបញ្ចៀបការយល់ដឹងអំពីច្បាប់ចរាចរណ៍ផ្លូវគោក និងសុវត្ថិភាពក្នុងការធ្វើដំណើរ និងទាមទារឱ្យមានការចូលរួមផ្ទាល់ពីសាមីខ្លួន និងគ្រប់ភាគីពាក់ព័ន្ធ ក្នុងការអនុវត្តច្បាប់ និងគោរពសិទ្ធិគ្នាទៅវិញទៅមកនៅពេលបើកបរ
ដើម្បីអាចចៀសវាងពីគ្រោះថ្នាក់នៅលើដងផ្លូវ។

លោក ស្រេង ហុង អភិបាលរង នៃគណៈអភិបាលខេត្តកោះកុង បានសម្តែងនូវការអរគុណ និងកោតសរសើរចំពោះស្ថាប័នពាក់ព័ន្ធនានា ពិសេស ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ ដែលកន្លងមកតែងតែយកចិត្តទុកដាក់ខ្ពស់ក្នុងការចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកជូនដល់អ្នកបើកបររថយន្តដឹកកម្មករនិយោជិត តាមគ្រប់រូបភាព ហើយជាពិសេសម្ចាស់រោងចក្រ សហគ្រាស ទាំងអស់ ក្នុងទឹកដីនៃខេត្តកោះកុង ត្រូវចូលរួមជំរុញ លើកទឹកចិត្ត និងផ្តល់ពេលវេលាគ្រប់គ្រាន់ដល់កម្មករនិយោជិតនៅតាមរោងចក្រ សហគ្រាស របស់ខ្លួនឱ្យចូលរួមកម្មវិធីអប់រំផ្សព្វផ្សាយនានាពាក់ព័ន្ធទៅនឹងច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងពេលធ្វើដំណើរ ឱ្យបានកាន់តែច្រើនបន្ថែមទៀត ដើម្បីឱ្យពួកគាត់បានយល់ដឹង និងចូលរួមកាត់បន្ថយគ្រោះថ្នាក់ចរាចរណ៍។

ក្នុងឱកាសនេះដែរ ឧត្តមសេនីយ៍ឯក ទូច សុភា អនុប្រធាននាយកដ្ឋានកណ្ដាលសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិក៏បានធ្វើការអំពាវនាវដល់កម្មករនិយោជិតទាំងអស់មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរចំពោះអ្នកធ្វើដំណើរដោយមធ្យោបាយផ្ទាល់ខ្លួនហើយអ្នកបើកបររថយន្តដឹកកម្មករនិយោជិតទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរដោយត្រូវចូលរួមអនុវត្ត និងគោរពច្បាប់ស្តីពីចរាចរណ៍ផ្លូវគោក ឱ្យបានខ្ជាប់ខ្ជួន ចៀសវាងបង្កជាហានិភ័យគ្រោះថ្នាក់ណាមួយកើតឡើងព្រោះកម្មករនិយោជិតរាប់សិបនាក់ បានផ្ញើជីវិតនៅលើរថយន្តរបស់អ្នក៕

អត្ថបទ៖ សំអឿន

The post មន្ត្រីជាន់ខ្ពស់៖ ខេត្តកោះកុង ជាខេត្តគំរូដែលមានរថយន្តដឹកកម្មករមានលក្ខណៈបច្ចេកទេសល្អ ផាសុកភាព និងសុវត្ថិភាព appeared first on Kampuchea Thmey Daily.

ស.ផ.ក ពិនិត្យលទ្ធផលការចុះស្ទង់មតិអ្នកបើកបររថយន្តដឹកកម្មករ ពីការប្ដូររថយន្តដឹកទំនិញ មកប្រភេទដឹកអ្នកដំណើរ

អ៊ិន ពិសី — Thu, 24 Oct 2024 08:43:04 +0000

កាលពីព្រឹកថ្ងៃទី ២៤ តុលា នេះ ក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករ-និយោជិត (ស.ផ.ក) បានបើកកិច្ចប្រជុំពិភាក្សាលើរបៀបវារៈសំខាន់ៗ ចំនួន ២ និងបញ្ហាផ្សេងៗ ដើម្បីធ្វើយ៉ាងណាផ្តល់សេវាជូនប្រជាពលរដ្ឋ ក៏ដូចជាកម្មករ-និយោជិតទទួលបាននូវសុខសុវត្ថិភាពទាំងទៅ និងត្រឡប់មកពីធ្វើការតាមបណ្តារោងចក្រសហគ្រាសនានា។

កិច្ចប្រជុំនេះបានធ្វើឡើងនៅសាលប្រជុំនាយកដ្ឋាន ស.អ ស្នាក់ការកណ្ដាល ប.ស.ស រាជធានីភ្នំពេញ ក្រោមអធិបតីភាព លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ ដោយមានការអញ្ជើញចូលរួមពីសមាជិក សមាជិកា មកពីតំណាងក្រសួង ស្ថាប័នពាក់ព័ន្ធសរុបប្រមាណជាង ២០ រូប។

បើតាមលោកបណ្ឌិត ហេង សុផាន់ណារិទ្ធ បានឱ្យដឹងថា កិច្ចប្រជុំពិភាក្សាលើរបៀបវារៈសំខាន់ៗ ចំនួន ២ គឺ (១) ការពិនិត្យ និងកែសម្រួលសេចក្ដីព្រាងរបាយការណ៍លទ្ធផលការងារសម្រេចបានប្រចាំនព្វមាស (៩ ខែ) ឆ្នាំ ២០២៤, និង (២) ពិនិត្យលទ្ធផល នៃការចុះស្ទង់មតិអ្នកបើកបររថយន្តដឹកកម្មករ-និយោជិត និងតំណាងរោងចក្រ សហគ្រាស ពីការផ្លាស់ប្ដូររថយន្តប្រភេទដឹកទំនិញមករថយន្តប្រភេទដឹកអ្នកដំណើរ និងបញ្ហាផ្សេងៗ។

លោកបណ្ឌិត ហេង សុផាន់ណារិទ្ធ ធ្លាប់បានលើកឡើងថា ប.ស.ស បាននិងកំពុងជំរុញឱ្យមានការផ្លាស់ប្ដូររថយន្តដឹកទំនិញដែលកែច្នៃដឹកកម្មករ-និយោជិត នាពេលបច្ចុប្បន្នទៅជារថយន្តដឹកអ្នកដំណើរសម្រាប់ដឹកកម្មករ-និយោជិត យ៉ាងយូរត្រឹមឆ្នាំ ២០២៧ ដើម្បីកាត់បន្ថយអត្រាគ្រោះថ្នាក់ចរាចរណ៍ផ្លូវគោករបស់កម្មករ-និយោជិតឱ្យនៅកម្រិតទាប។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា តាមការចុះធ្វើបច្ចុប្បន្នភាពក្នុងឆ្នាំ ២០២៤ នេះ មានរថយន្តដឹកកម្មករនៅទូទាំងប្រទេសសរុបចំនួន ៣ ៣៣២ គ្រឿង ក្នុងនោះ មានរថយន្តដឹកកម្មករប្រភេទដឹកអ្នកដំណើរចំនួន ១ ១២៩ គ្រឿង ដែលមានការផ្លាស់ប្ដូរស្របតាមបទដ្ឋានបច្ចេកទេស និងមានផាសុកភាព។

លោកបានបន្តថា ចាប់ពីខែមករា រហូតមកដល់ខែកញ្ញា ឆ្នាំ ២០២៤ នេះ មានកម្មករ-និយោជិត ជួបគ្រោះថ្នាក់នៅកន្លែងធ្វើការ និងគ្រោះថ្នាក់ពេលធ្វើដំណើរចំនួន ១២ ៦៤៥ នាក់ ស្រី ៦ ៥៦០ នាក់ ក្នុងនោះគ្រោះថ្នាក់នៅកន្លែងធ្វើការចំនួន ៥ ៥២៨ នាក់ ស្រី ២ ៥៥៥ នាក់ និងគ្រោះថ្នាក់ពេលធ្វើដំណើរចំនួន ៧ ១១៧ នាក់ ស្រី ៤ ០០៥ នាក់៕

អត្ថបទ ៖ សំអឿន

The post ស.ផ.ក ពិនិត្យលទ្ធផលការចុះស្ទង់មតិអ្នកបើកបររថយន្តដឹកកម្មករ ពីការប្ដូររថយន្តដឹកទំនិញ មកប្រភេទដឹកអ្នកដំណើរ appeared first on Kampuchea Thmey Daily.

កម្ពុជា មានរថយន្តដឹកកម្មករជាង ៣ ពាន់គ្រឿង នៅទូទាំងប្រទេស ភាគច្រើនជារថយន្តប្រភេទកែច្នៃ

អ៊ិន ពិសី — Sat, 31 Aug 2024 03:38:48 +0000

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី ៣១ សីហា នេះថា តាមការចុះធ្វើបច្ចុប្បន្នភាពក្នុងឆ្នាំ ២០២៤ នេះ មានរថយន្តដឹកកម្មករនៅទូទាំងប្រទេសសរុបចំនួន ៣ ៣៣២ គ្រឿង ក្នុងនោះមានរថយន្តដឹកកម្មករប្រភេទដឹកអ្នកដំណើរចំនួន ១ ១២៩ គ្រឿង ដែលមានការផ្លាស់ប្តូរស្របតាមបទដ្ឋានបច្ចេកទេស និងមានផាសុកភាព។

លោក កត្តា អ៊ន បានជំរុញឱ្យមានការផ្លាស់ប្តូររថយន្តដឹកទំនិញដែលកែច្នៃដឹកកម្មករ-និយោជិតនាពេលបច្ចុប្បន្ន ទៅជារថយន្តដឹកអ្នកដំណើរសម្រាប់ដឹកកម្មករ-និយោជិត ដើម្បីធ្វើឱ្យប្រសើរឡើងនូវសុខុមាលភាព និងអាចកាត់បន្ថយអត្រាគ្រោះថ្នាក់ចរាចរណ៍ផ្លូវគោក ឱ្យនៅកម្រិតទាបបំផុតដែលអាចរក្សាបាននូវសុខសុវត្ថិភាពក្នុងពេលធ្វើដំណើររបស់កម្មករ-និយោជិត។

លោក កត្តា អ៊ន បានបន្តទៀតថា ដើម្បីកាត់បន្ថយអត្រាគ្រោះថ្នាក់ការងារឱ្យបានជាអតិបរមា ស្របទៅតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញផែនការយុទ្ធសាស្ត្រអភិវឌ្ឍន៍វិស័យការងារសន្តិសុខសង្គម និងបណ្តុះបណ្តាលវិជ្ជាជីវៈ ឆ្នាំ ២០២៤-២០២៨ ក្នុងយុទ្ធសាស្ត្រទី ៥ កម្មវិធីទី ៣ ស្តីពីការលើកកម្ពស់ការយល់ដឹង និងពង្រឹងការអនុវត្តច្បាប់ស្តីពីរបបសន្តិសុខសង្គម ដែលក្នុងនោះ ការពង្រឹងការអប់រំ និងការផ្សព្វផ្សាយលើកកម្ពស់សុខុមាលភាពក៏ដូចជាការបង្ការហានិភ័យការងារគឺជារឿងចាំបាច់បំផុតដែលត្រូវយកចិត្តទុកដាក់ខ្ពស់ក្នុងការធ្វើឱ្យប្រសើរឡើងនូវសុខុមាលភាព និងសុខសុវត្ថិភាពរបស់បងប្អូនកម្មករ-និយោជិតក្នុងពេលបំពេញការងារ។

លោកបានបន្ថែមថា ដើម្បីធ្វើឱ្យប្រសើរឡើងនូវសុខុមាលភាព និងសុខសុវត្ថិភាពរបស់កម្មករ-និយោជិតក្នុងពេលបំពេញការងារ ប.ស.ស នៃក្រសួងការងារ និងបណ្តុះបណ្តាលវិជ្ជាជីវៈ បានកំណត់សកម្មភាពផ្សព្វផ្សាយស្តីពីសុវត្ថិភាពចរាចរណ៍ពេលធ្វើដំណើរ និងលក្ខខណ្ឌអនាម័យ សុវត្ថិភាពការងារ លក្ខខណ្ឌការងារ អត្ថប្រយោជន៍របបសន្តិសុខសង្គម ពិសេសការរៀបចំមធ្យោបាយធ្វើដំណើរសមរម្យសម្រាប់កម្មករ-និយោជិតសំដៅលើកកម្ពស់កម្មវិធី បង្ការហានិភ័យការងារដោយត្រូវធ្វើបញ្ជីបច្ចុប្បន្នភាពអ្នកបើកបរយានយន្តដឹកកម្មករ-និយោជិតជាប្រចាំ និងត្រូវធ្វើការសិក្សាសមិទ្ធិលទ្ធភាពអំពីជម្រើសក្នុងការជំរុញការផ្លាស់ប្តូររថយន្តដឹកទំនិញដែលកែច្នៃដឹកកម្មករ-និយោជិតពេលបច្ចុប្បន្នទៅជារថយន្តដឹកអ្នកដំណើរសម្រាប់ដឹកកម្មករ-និយោជិតដែលអាចស្ថិតនៅក្រោមការគ្រប់គ្រងរបស់ក្រុមហ៊ុន ឬអង្គភាពណាមួយច្បាស់លាស់យ៉ាងយូរត្រឹមឆ្នាំ ២០២៧។

លោកឧត្ដមសេនីយ៍ឯក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃ ធ្លាប់បានអំពាវនាវ និងក្រើនរំលឹកផងដែរទៅកាន់អ្នកបើកបររថយន្តដឹកកម្មករ-និយោជិតទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរដោយត្រូវចូលរួមអនុវត្ត និងគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនចៀសវាងបង្កជាហានិភ័យគ្រោះថ្នាក់ណាមួយកើតឡើងព្រោះកម្មករ-និយោជិតរាប់សិបនាក់បានផ្ញើជីវិតនៅលើរថយន្តរបស់អ្នកបើកបរតែម្នាក់គត់។

ជាមួយគ្នានេះដែរ លោកឧត្ដមសេនីយ៍ឯក បានធ្វើការអំពាវនាវដល់កម្មករ-និយោជិតទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូនិងទាំងអ្នកដែលធ្វើដំណើរដោយរថយន្តដឹកកម្មករ-និយោជិត ត្រូវគោរពច្បាប់ចរាចរណ៍ឱ្យបានត្រឹមត្រូវ ដើម្បីចៀសវាងករណីគ្រោះថ្នាក់ និងអាចបង្ការបាននូវសុខសុវត្ថិភាពក្នុងពេលធ្វើដំណើរ៕

អត្ថបទ ៖ សំអឿន

The post កម្ពុជា មានរថយន្តដឹកកម្មករជាង ៣ ពាន់គ្រឿង នៅទូទាំងប្រទេស ភាគច្រើនជារថយន្តប្រភេទកែច្នៃ appeared first on Kampuchea Thmey Daily.