របបយោធាមីយ៉ាន់ម៉ា Archives - Kampuchea Thmey Daily

របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល

Minea Neu — Mon, 05 Jan 2026 08:04:42 +0000

របបយោធាមីយ៉ាន់ម៉ាដោះលែងអ្នកទោស ៦ ០០០នាក់ទូទាំងប្រទេសក្នុងនោះមានទាំងអ្នកទោសជាតិ អន្តរជាតិ និងអ្នកទោសនយោបាយផង ឱ្យមានសេរីភាព ខណៈដែលប្រទេសប្រទេសនេះប្រារព្ធទិវាបុណ្យឯករាជ្យលើកទី៧៨ និងការរៀបចំការបោះឆ្នោតលើកដំបូងក្រោយរដ្ឋប្រហារ៦ឆ្នាំ។ បើតាមប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃអាទិត្យ។

លោក Min Aung Hlaing. Reuters

អ្នកទោសនយោបាយជាង ៣ ០០០នាក់ ត្រូវបានដោះលែងមុនការបោះឆ្នោតខែធ្នូរួចហើយ។ ប្រព័ន្ធផ្សព្វផ្សាយក្នុងស្រុក Eleven បានរាយការណ៍ថា ក្រុមប្រឹក្សាការពារជាតិ និងសន្តិសុខបានចេញដីកាលើកលែងទោសដល់ទណ្ឌិត និងអ្នកជាប់ឃុំចំនួន ៦ ១៣៤នាក់ ដូចជានៅក្នុងពន្ធនាគារ មណ្ឌលឃុំឃាំង និងជំរុំនានាទូទាំងប្រទេស។

សេចក្តីសម្រេចបានបន្តថា ការសម្រេចនេះត្រូវបានធ្វើឡើងក្នុងការរំឭកដល់ទិវាបុណ្យឯករាជ្យជាតិ ក្នុងគោលបំណង ផ្តល់សន្តិភាពផ្លូវចិត្ត គំនិតរបស់ប្រជាជន និងគោរពមនុស្សជាតិ។

ប្រធានាធិបតីស្តីទីរបស់មីយ៉ាន់ម៉ាក៏បានលើកលែងទោស និងនិរទេសអ្នកទោសបរទេសចំនួន ៥២នាក់ រួមទាំងពលរដ្ឋចិនដែលកំពុងជាប់ទោសនៅក្នុងពន្ធនាគារ និងមណ្ឌលឃុំឃាំងផ្សេងៗ។

បទបញ្ជានេះបាននិយាយថា វិធានការនេះត្រូវបានធ្វើឡើងដើម្បីប្រារព្ធទិវាឯករាជ្យ និងដើម្បីរក្សាទំនាក់ទំនងមិត្តភាពរវាងប្រទេស និងបន្តឱ្យមានការគោរពមនុស្សធម៌។

យ៉ាងណាកាលពីខែវិច្ឆិកា របបយោធាមីយ៉ាន់ម៉ាក៏បានផ្តល់ការលើកលែងទោសដល់អ្នកទោសនយោបាយជាង ៣ ០០០នាក់ ដោះលែងពួកគេមុនការបោះឆ្នោតខែធ្នូ និងទម្លាក់ការចោទប្រកាន់លើមនុស្ស ៥ ៥៨០នាក់ ដោយរបបនេះបញ្ជាឱ្យដោះលែងពួកគេ។

គួរឱ្យដឹងផងដែរថា ការកាន់កាប់ដោយយោធានៅឆ្នាំ២០២១ របស់ប្រទេសនេះបានបណ្តេញរដ្ឋាភិបាលជាប់ឆ្នោតដែលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ (NLD) ប៉ុន្តែរដ្ឋប្រហារត្រូវបានកើតឡើងជាមួយនឹងភាពចលាចលរបស់ប្រជាពលរដ្ឋរីករាលដាលក្នុងប្រទេស។

ជាក់ស្តែងរបបយោធាបានគាបសង្កត់ការតវ៉ានានាដោយហិង្សា ហើយមនុស្សរាប់ពាន់នាក់ត្រូវបានចាប់ដាក់គុក រួមទាំងមេដឹកនាំគណបក្ស សម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសានស៊ូជី [Aung San Suu Kyi] ដែលត្រូវបានកាត់ទោសឱ្យជាប់ពន្ធនាគារសរុបចំនួន ៣៣ឆ្នាំ៕

ប្រែសម្រួល៖ ណឺ មិនា

The post របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល appeared first on Kampuchea Thmey Daily.

អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត

Minea Neu — Wed, 31 Dec 2025 10:21:56 +0000

នាយករដ្ឋមន្រីម៉ាឡេស៊ី លោក អាន់វ៉ា អ៊ីប្រាហ៊ីម [Anwar Ibrahim] បាននិយាយកាលពីថ្ងៃអង្គារ៍ ថាមេដឹកនាំនៅតំបន់អាស៊ីអាគ្នេយ៍ (អាស៊ាន) នឹងពិចារណាក្នុងការវិវត្តន៍នានានៅប្រទេសមីយ៉ាន់ម៉ា បន្ទាប់ពីដំណាក់កាលដំបូងនៃការបោះឆ្នោតរបស់ខ្លួនពេញមួយសប្តាហ៍។

លោក Anwar Ibrahim នាយករដ្ឋមន្រីម៉ាឡេស៊ី។ Reuters

សេចក្តីរាយការណ៍របសសារព័ត៌មានរ៉យទ័រ ឱ្យដឹងថា ការបោះឆ្នោតត្រូវបានធ្វើឡើងក្នុងដំណាក់កាលជាច្រើនចំពេលមានសង្រ្គាមស៊ីវិលដែលកំពុងបន្ត ហើយបានបំផ្លាញផ្នែកខ្លះនៃប្រទេសមីយ៉ាន់ម៉ា និងនាំឱ្យមានវិបត្តិមនុស្សធម៌ដ៏អាក្រក់បំផុតមួយនៅអាស៊ី។

ការបោះឆ្នោតនេះត្រូវបានអង្គការសហប្រជាជាតិមានការមិនពេញចិត្តយ៉ាងខ្លាំង ជាពិសេសរដ្ឋាភិបាលលោកខាងលិច និងក្រុមសិទ្ធិមនុស្សថាវាជាការបោកប្រាស់ និងការប៉ុនប៉ងរបស់របបយោធាដែលកំពុងកាន់អំណាចដើម្បីពង្រឹងការគ្រប់គ្រងដោយយោធាតាមរយៈតំណាងអ្នកនយោបាយ។

របបយោធាមីយ៉ានម៉ាបានបដិសេធការស្នើនានារបស់បណ្តាអ្នកដឹកនាំពិភពលោកនិងអង្គការសហប្រជាជាតិ ហើយនិយាយថាការបោះឆ្នោតមិនត្រូវបានធ្វើឡើងដោយការបង្ខិតបង្ខំ ឬដោយបង្ខំឡើយ វាជាការគាំទ្រពីសាធារណជនពិតប្រាកដ។

លោក Anwar ដែលជាប្រធាននៃសមាគមប្រជាជាតិអាស៊ីអាគ្នេយ៍ (Asean) បច្ចុប្បន្ន បាននិយាយថាមេដឹកនាំទាំងអស់ ដែលមានសមាជិកចំនួន ១១ប្រទេស នឹងតាមដានស្ថានភាពនៅក្នុងប្រទេសមីយ៉ាន់ម៉ាដោយយកចិត្តទុកដាក់ រួមទាំងជំហានផ្សេងទៀតដែលកំពុងដំណើរការដែលទាក់ទងនឹងនយោបាយក្នុងប្រទេសនេះ។

លោកបាននិយាយនៅសន្នីសីទសារព័ត៌មានមួយថា៖ «នឹងការវាយតម្លៃណាមួយដំណើរការតាមលំដាប់លំដោយ ចំណែកការដឹកនាំគឺតម្រូវឱ្យកាត់បន្ថយអំពើហិង្សា ជៀសវាងសកម្មភាពដែលអាចធ្វើឱ្យមានការបែកបាក់កាន់តែខ្លាំង ផ្តល់ភាពស្របច្បាប់ចំពោះការបញ្ចេញមតិ និងគួរលើកទឹកចិត្តឱ្យមនុស្សគ្រប់រូបអាចមានសិទ្ធិទាមទាអ្វីដែលពួកគេចង់បានផងដែរ»។

រដ្ឋមន្ត្រីការបរទេសម៉ាឡេស៊ី ធ្លាប់បាននិយាយកាលពីមុនថា អាស៊ានចង់ឱ្យការបោះឆ្នោតមានភាពយុត្តិធម៌ និងរាប់បញ្ចូល ហើយក៏បានជំរុញឱ្យរបបយោធាមីយ៉ាន់ម៉ា ប្រកាន់ខ្ជាប់នូវកិច្ចព្រមព្រៀងសន្តិភាពដែលខ្លួនបានព្រមព្រៀងជាមួយ ASEAN នៅឆ្នាំ ២០២១ ផងដែរ។

ផែនការសន្តិភាព ដែលជាការយល់ស្របប្រាំចំណុច ត្រូវបានគេមើលឃើញថាបរាជ័យ ដោយមេដឹកនាំយោធាមីយ៉ាន់ម៉ាបានបដិសេធមិនជួបនិយាយគ្នាជាមួយបក្សគូប្រជែងទេ ដែលខ្លួនចាត់ទុកថាជាភេរវករ។

គួរឱ្យដឹងផងដែរថាប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីរបបយោធាបានផ្តួលរំលំរដ្ឋាភិបាលប្រជាធិបតេយ្យស៊ីវិលនៅក្នុងរដ្ឋប្រហារឆ្នាំ២០២១ ដែលបង្កឱ្យមានការបះបោរដោយប្រដាប់អាវុធដែលបានដណ្តើមកាន់កាប់ទឹកដីទូទាំងប្រទេស៕

ប្រែសម្រួល៖ ណឺ មិនា

The post អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត appeared first on Kampuchea Thmey Daily.

មុនបោះឆ្នោតនៅមីយ៉ាន់ម៉ា UN អំពាវនាវឱ្យរបបយោធាបញ្ឈប់ការបង្ខិតបង្ខំ

Minea Neu — Wed, 24 Dec 2025 04:21:54 +0000

អង្គការសហប្រជាជាតិ បានថ្លែងនៅថ្ងៃពុធទី២៣ ថារបបយោធាមីយ៉ាន់ម៉ា បានប្រើប្រាស់អំពើហិង្សា ការគំរាមកំហែងប្រជាជន ដើម្បីទទួលបានសន្លឹកឆ្នោតនាពេលដ៏ខ្លីខាងមុខ។ ជាក់ស្តែងការបោះឆ្នោតនេះគឺគ្រប់គ្រងដោយយោធាក្រុមសុទ្ធសាធ ខណៈក្រុមប្រឆាំងប្រដាប់អាវុធកំពុងប្រើយុទ្ធសាស្ត្រស្រដៀងគ្នាដែរ ដើម្បីរក្សាប្រជាជនកុំឱ្យទៅណាឆ្ងាយពីរបរនេះ។ បើតាមសារព័ត៌មាន AFP។

លោក Volker Turk ប្រធានសិទ្ធិមនុស្សរបស់អង្គការសហប្រជាជាតិ។ AFP

ប្រធានផ្នែកសិទ្ធិមនុស្សរបស់អង្គការសហប្រជាជាតិ លោក Volker Turk បានទទូចក្នុងសេចក្តីថ្លែងការណ៍ថា៖ «អាជ្ញាធរយោធាមីយ៉ាន់ម៉ា ត្រូវបញ្ឈប់ជាបន្ទាន់នូវការប្រើអំពើហិង្សាដ៏ឃោរឃៅបង្ខំមនុស្សឱ្យទៅបោះឆ្នោត និងការចាប់ខ្លួនប្រជាពលរដ្ឋទាំងឡាយណាដែលបង្ហាញទស្សនៈផ្ទុយពីខ្លួន»។

របបយោធាមីយ៉ាន់ម៉ា គ្រោងនឹងដំណើរការបោះឆ្នោតដែលចាប់ផ្តើមនៅថ្ងៃអាទិត្យ វាជាការបោះឆ្នោតដែលដាក់សម្ពាធខ្លាំង ដើម្បីវិលត្រឡប់ទៅលទ្ធិប្រជាធិបតេយ្យកាលពីប្រាំឆ្នាំមុន បន្ទាប់ពីរបបនេះបានបណ្តេញរដ្ឋាភិបាលជាប់ឆ្នោតចុងក្រោយចេញពីតំណែង ដែលបង្កឱ្យមានសង្គ្រាមស៊ីវិលរហូតដល់ពេលបច្ចុប្បន្ន។

ទោះជាយ៉ាងណាអតីតមេដឹកនាំដ៏មានឥទ្ធិពលរបស់មីយ៉ាន់ម៉ា លោកស្រី អ៊ុងសាន ស៊ូជី នៅតែបន្តជាប់ពន្ធនាគារ ហើយគណបក្សដ៏មានប្រជាប្រិយរបស់លោកស្រីត្រូវបានរំលាយចោល បន្ទាប់ពីពួកទាហានបានបញ្ចប់ការកាន់កាប់អំណាចតាមបែបលទ្ធិប្រជាធិបតេយ្យរយៈពេលមួយទសវត្សរ៍របស់ប្រទេសនេះនៅខែកុម្ភៈឆ្នាំ២០២១។

លោក Volker Turk កាលពីខែមុនបានប្រាប់សារព័ត៌មាន AFP ថាការរៀបចំការបោះឆ្នោតនៅក្នុងប្រទេសមីយ៉ាន់ម៉ាក្រោមកាលៈទេសៈបច្ចុប្បន្នគឺ «ពិបាកយល់ណាស់» នឹងបានលើកឡើងកាលពីថ្ងៃអង្គារថាជនស៊ីវិលកំពុងត្រូវបានគំរាមកំហែងដោយអាជ្ញាធរយោធា និងក្រុមប្រដាប់អាវុធជុំវិញការចូលរួមបោះឆ្នោតរបស់ពួកគេ។

សេចក្តីថ្លែងការណ៍របស់ UN បានគូសបញ្ជាក់ថា ពលរដ្ឋស្លូតត្រង់រាប់សិបនាក់ត្រូវបានឃុំខ្លួន បន្ទាប់ពីរាយការណ៍ពីការបង្ខំឱ្យពួកគេបោះឆ្នោត ដែលជាលេសក្រោមហេតុផលថា៖«ជាច្បាប់ការពារការបោះឆ្នោត» សម្រាប់ការអនុវត្តសេរីភាពបញ្ចេញមតិរបស់ពួកគេ៕

ប្រែសម្រួល៖ ណឺ មិនា

The post មុនបោះឆ្នោតនៅមីយ៉ាន់ម៉ា UN អំពាវនាវឱ្យរបបយោធាបញ្ឈប់ការបង្ខិតបង្ខំ appeared first on Kampuchea Thmey Daily.

សមាជិកបក្ស USDP ជាង១ពាន់ត្រូវបានសម្លាប់ចាប់តាំងពីយោធាមីយ៉ាន់ម៉ាឡើងកាន់អំណាច

Bun sopheap — Wed, 19 Nov 2025 04:51:38 +0000

យោងតាមការចេញផ្សាយរបស់សារព័ត៌មាន Mizzima News នៅថ្ងៃទី១៩ខែវិច្ឆិកា ប្រធានគណបក្សសាមគ្គីភាព និងអភិវឌ្ឍន៍សហភាព (USDP) បាននិយាយថាសមាជិកគណបក្សជាង ១,០០០ នាក់ត្រូវបានសម្លាប់ចាប់តាំងពីយោធាមីយ៉ាន់ម៉ាដណ្តើមអំណាចក្នុងខែកុម្ភៈ ឆ្នាំ ២០២១។

ការតវ៉ាក្នុងរដ្ឋប្រហារឆ្នាំ២០២១ (រូបភាព៖ Getty)

បើតាមលោក Khin Yi ប្រធានគណបក្សសាមគ្គីភាព និងអភិវឌ្ឍន៍សហភាព (USDP) បានធ្វើសេចក្តីថ្លែងការណ៍នេះក្នុងអំឡុងពេលជួបជាមួយអតីតយុទ្ធជននៅទីក្រុងNaypyidawនៅថ្ងៃទី ១៣ ខែវិច្ឆិកា ដោយជំរុញឱ្យអ្នកគាំទ្រគោរពដល់អ្នកស្លាប់ និងបន្តគាំទ្រគណបក្សមុនការបោះឆ្នោតដែលរៀបចំដោយយោធានៅខែក្រោយ។

វីដេអូមួយដែលចេញផ្សាយដោយ USDP បង្ហាញលោក Khin Yi និយាយថាសមាជិកគណបក្សត្រូវបានកំណត់គោលដៅដោយសារតែការគាំទ្ររបស់ពួកគេចំពោះយោធា។ គណបក្សនេះធ្លាប់បានអះអាងពីតួលេខស្រដៀងគ្នានេះពីមុនមក។ កាលពីខែមីនា ឆ្នាំ ២០២២ គណបក្សនេះបានបង្ហាញផ្ទាំងថ្មរំលឹកដែលរាយបញ្ជីសមាជិក និងអ្នកគាំទ្រចំនួន ១,៣២៧ នាក់ដែលត្រូវបានសម្លាប់បន្ទាប់ពីរដ្ឋប្រហារ។

(រូបភាព៖ Getty)

USDP បានស្តីបន្ទោសគណបក្សសម្ព័ន្ធជាតិដើម្បីប្រជាធិបតេយ្យ (NLD) ដែលត្រូវបានបណ្តេញចេញពីការបោះឆ្នោតចំពោះការរួមចំណែកប្រព្រឹត្តអំពើហិង្សាក្រោយរដ្ឋប្រហារ។ NLD បានឈ្នះឆ្នោតយ៉ាងភ្លូកទឹកភ្លូកដីក្នុងការបោះឆ្នោតឆ្នាំ ២០២០ តែត្រូវបានយោធាចោទថាការបោះឆ្នោតនេះគឺជាការក្លែងបន្លំនិងដកចេញ។

ចាប់តាំងពីឡើងកាន់អំណាចមក របបយោធាបានចាប់ខ្លួនមេដឹកនាំកំពូលៗរបស់គណបក្ស NLD រួមទាំងលោកស្រី អ៊ុងសាន ស៊ូជី រំលាយគណបក្ស និងរៀបចំសម្រាប់ការបោះឆ្នោតខែធ្នូ ដែលពាក់ព័ន្ធនឹងគណបក្សដែលរបបនេះអនុម័តតែប៉ុណ្ណោះ។

ទន្ទឹមនឹងនេះ អំពើហិង្សានៅតែបន្តកើតមាននៅទូទាំងប្រទេស។ អង្គការសិទ្ធិមនុស្ស AAPP រាយការណ៍ថា ជនស៊ីវិល និងសកម្មជនគាំទ្រលទ្ធិប្រជាធិបតេយ្យជាង ៧៤០០ នាក់ត្រូវបានសម្លាប់ដោយយោធា និងសម្ព័ន្ធមិត្តរបស់ខ្លួន ចន្លោះឆ្នាំ ២០២១ ដល់ពាក់កណ្តាលខែវិច្ឆិកា ឆ្នាំ ២០២៥៕

លោក Khin Yi ប្រធានគណបក្សសាមគ្គីភាព និងអភិវឌ្ឍន៍សហភាព (USDP) (រូបភាព៖ Mizzima News)

អត្ថបទ៖ ប៊ុន សុភាព

The post សមាជិកបក្ស USDP ជាង១ពាន់ត្រូវបានសម្លាប់ចាប់តាំងពីយោធាមីយ៉ាន់ម៉ាឡើងកាន់អំណាច appeared first on Kampuchea Thmey Daily.

របបយោធាមីយ៉ាន់ម៉ា គំរាមដាក់ពន្ធនាគារអ្នករិះគន់ការបោះឆ្នោតរហូតដល់១០ឆ្នាំ

Bun sopheap — Sat, 01 Nov 2025 03:22:46 +0000

រដ្ឋាភិបាលយោធាមីយ៉ាន់ម៉ាដឹកនាំដោយ ឧត្ដមសេនីយ៍ មីន អ៊ុងឡាំង បានអនុម័តច្បាប់ថ្មីមួយដែលដាក់ទណ្ឌកម្មលើអ្នកណាដែលរិះគន់ ឬតវ៉ាប្រឆាំងនឹងការបោះឆ្នោតជាមួយនឹងការកាត់ទោសឱ្យជាប់ពន្ធនាគាររហូតដល់ ១០ ឆ្នាំ។ នេះបើយោងតាមការចេញផ្សាយរបស់ Mizzima នៅថ្ងៃទី១ខែវិច្ឆិកា។

មេដឹកនាំរបបយោធា ឧត្ដមសេនីយ៍ មីន អ៊ុងឡាំង (រូបភាព៖ Reuters)

យោងតាមប្រព័ន្ធផ្សព្វផ្សាយរដ្ឋ ច្បាប់ស្តីពីការការពារការបោះឆ្នោតប្រជាធិបតេយ្យពហុបក្សថ្មី បានហាមឃាត់គ្រប់ទម្រង់នៃការតវ៉ា ឬការនិយាយរិះគន់ដែលអាចរំខានដល់ ការបោះឆ្នោត។ អ្នកដែលត្រូវបានរកឃើញថាមានទោសអាចជាប់ពន្ធនាគារពី ៣ ទៅ ៧ ឆ្នាំ ឬរហូតដល់ ១០ ឆ្នាំប្រសិនបើធ្វើសកម្មភាពជាក្រុម។ អ្នកដែលបំផ្លាញសន្លឹកឆ្នោត វាយប្រហារអ្នកបោះឆ្នោត ឬធ្វើបាបបុគ្គលិកបោះឆ្នោតអាចប្រឈមមុខនឹងការជាប់ពន្ធនាគាររហូតដល់ ២០ ឆ្នាំ ហើយអ្នកណាដែលបង្កការស្លាប់ក្នុងអំឡុងពេលធ្វើសកម្មភាពតវ៉ាប្រឆាំងអាចត្រូវបានកាត់ទោសប្រហារជីវិត។

បោះឆ្នោតនេះ គ្រោងនឹងធ្វើឡើងចាប់ថ្ងៃទី ២៨ ខែធ្នូ ដោយរបបយោធា ថា ការបោះឆ្នោតនៅចុងឆ្នាំនេះនឹងនាំមកនូវសន្តិភាព ប៉ុន្តែត្រូវបានអ្នកសង្កេតការណ៍ក្នុងស្រុក និងអ្នកសង្កេតការណ៍អន្តរជាតិមើលឃើញយ៉ាងទូលំទូលាយថាជាការប៉ុនប៉ងរបស់របបយោធាដើម្បីធ្វើឱ្យការគ្រប់គ្រងរបស់ខ្លួនស្របច្បាប់ជាជាងស្តារលទ្ធិប្រជាធិបតេយ្យឡើងវិញ។ លើសពីនេះអាស៊ានក៏មិនបញ្ជូនអ្នកសង្កេតការណ៍ទៅពិនិត្យដែរ ដោយលើកឡើងប្រទេសនេះមិនបានបំពេញតាមលក្ខខណ្ឌមានសន្តិភាពពេញលេញមុនធ្វើការបោះឆ្នោត។

ការបោះឆ្នោតរបស់មីយ៉ាន់ម៉ាកាលពីឆ្នាំ២០២០ (រូបភាព៖ Reuters)

របបយោធានៅតែតស៊ូប្រយុទ្ធជាមួយក្រុមប្រឆាំងដើម្បីគ្រប់គ្រងផ្នែកធំៗនៃប្រទេស ឲ្យបានមុនការបោះឆ្នោត ប៉ុន្តែយ៉ាងណារបបនេះបានទទួលស្គាល់ថាមិនអាចដំណើរការបោះឆ្នោតបានទូទាំងប្រទេសនោះទេ ដោយសារតំបន់ខ្លះនៅស្ថិតក្នុងការគ្រប់គ្រងរបស់ក្រុមប្រឆាំង។

លោក Tom Andrews អ្នកជំនាញការអង្គការសហប្រជាជាតិម្នាក់ បានជំរុញឲ្យពិភពលោកកុំទទួលស្គាល់ការបោះឆ្នោតដែលបានគ្រោងទុក ដោយហៅវាថាជា «ការបោះឆ្នោតក្លែងក្លាយ» ដែលត្រូវបានរចនាឡើងដើម្បីលាក់បាំងការគៀបសង្កត់ និងអំពើហិង្សារបស់របបយោធាប៉ុណ្ណោះ៕

អត្ថបទ៖ ប៊ុន សុភាព

The post របបយោធាមីយ៉ាន់ម៉ា គំរាមដាក់ពន្ធនាគារអ្នករិះគន់ការបោះឆ្នោតរហូតដល់១០ឆ្នាំ appeared first on Kampuchea Thmey Daily.

បេសកជនមីយ៉ាន់ម៉ា ជំរុញឱ្យUN ច្រានចោលការបោះឆ្នោតរបស់របបយោធា

Bun sopheap — Fri, 17 Oct 2025 02:46:17 +0000

ឯកអគ្គរដ្ឋទូតអង្គការសហប្រជាជាតិរបស់មីយ៉ាន់ម៉ាបានអំពាវនាវឱ្យសហគមន៍អន្តរជាតិបដិសេធការបោះឆ្នោតដែលបានគ្រោងទុករបស់របបយោធាដោយនិយាយថាការបោះឆ្នោតដោយសេរី និងយុត្តិធម៌មិនអាចប្រព្រឹត្តទៅរួចក្រោមការគ្រប់គ្រងរបស់យោធានោះទេ។ នេះបើយោងតាមការចេញផ្សាយរបស់ Mizzima News កាលពីថ្ងៃទី១៧ខែតុលា។

ឯកអគ្គរដ្ឋទូតអង្គការសហប្រជាជាតិរបស់មីយ៉ាន់ម៉ាលោក Kyaw Moe Tun

ថ្លែងនៅចំពោះមុខគណៈកម្មាធិការពិសេសរបស់អង្គការសហប្រជាជាតិស្តីពីការកាត់អាណានិគម ឯកអគ្គរដ្ឋទូតអង្គការសហប្រជាជាតិរបស់មីយ៉ាន់ម៉ាលោក Kyaw Moe Tunបានអះអាងជាថ្មីនូវការប្តេជ្ញាចិត្តរបស់មីយ៉ាន់ម៉ាចំពោះលទ្ធិប្រជាធិបតេយ្យ និងការសម្រេចចិត្តដោយខ្លួនឯង ដោយសង្កត់ធ្ងន់ថារដ្ឋប្រហារយោធាដែលកំពុងបន្តបានបំផ្លាញនីតិរដ្ឋ និងស្ថាប័នប្រជាធិបតេយ្យ។

លោកបានលើកឡើងពីហេតុផលសំខាន់ៗចំនួនប្រាំថាហេតុអ្វីបានជាការបោះឆ្នោតដែលអាចទុកចិត្តបានមិនអាចប្រព្រឹត្តទៅបាន។ ហេតុផលទាំងនោះរួមមាន ការដួលរលំនៃស្ថាប័នប្រជាធិបតេយ្យ អំពើហិង្សាទូទាំងប្រទេសដែលកំពុងបន្ត ការគ្រប់គ្រងទឹកដីដ៏ទន់ខ្សោយរបស់យោធា អវត្ដមាននៃប្រព័ន្ធពហុបក្សមិនពិតប្រាកដ និងកង្វះភាពស្របច្បាប់របស់របបយោធាក្នុងទំនុកចិត្តប្រជាជន។

ឯកអគ្គរដ្ឋទូតរូបនេះបានថ្កោលទោសការបន្តវាយប្រហាររបស់របបយោធាលើជនស៊ីវិល រួមទាំងការទម្លាក់គ្រាប់បែកនាពេលថ្មីៗនេះនៅតំបន់ Sagaing ដែលបានសម្លាប់មនុស្សប្រហែល ២០ នាក់ក្នុងពិធីបុណ្យសាសនាមួយផងដែរ។

លើសពីនេះលោកបានបញ្ជាក់ថា «វិធានការបង្ខិតបង្ខំរបស់យោធានឹងមិនរារាំងសេចក្តីប្រាថ្នារបស់ប្រជាជនទេ» ដោយជំរុញឱ្យអង្គការសហប្រជាជាតិ និងរដ្ឋជាសមាជិកគាំទ្រការតស៊ូរបស់មីយ៉ាន់ម៉ា ដើម្បីបញ្ចប់របបផ្តាច់ការ និងសម្រេចបានសន្តិភាព និងលទ្ធិប្រជាធិបតេយ្យយូរអង្វែង៕

ការបោះឆ្នោតរបស់មីយ៉ាន់ម៉ាកាលពីឆ្នាំ២០២០

អត្ថបទ៖ ប៊ុន សុភាព

The post បេសកជនមីយ៉ាន់ម៉ា ជំរុញឱ្យUN ច្រានចោលការបោះឆ្នោតរបស់របបយោធា appeared first on Kampuchea Thmey Daily.

ប្រមុខរបបយោធាមីយ៉ាន់ម៉ាទទួលស្គាល់ថា ការបោះឆ្នោតនឹងមិនបានទូទាំងប្រទេសទេ ខណៈសង្គ្រាមនៅតែបន្ត

Bun sopheap — Thu, 16 Oct 2025 02:16:48 +0000

មេដឹកនាំរបបយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) បានទទួលស្គាល់ថា ការបោះឆ្នោតសកលនាពេលខាងមុខ មិនអាចធ្វើឡើងទូទាំងប្រទេសបានទេ ដោយសារសង្គ្រាមស៊ីវិលដែលកំពុងបន្តបន្ទាប់ពីរដ្ឋប្រហារឆ្នាំ ២០២១។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៦ខែតុលា។

(រូបភាព៖ Reuters)

ការបោះឆ្នោតដែលគ្រោងនឹងចាប់ផ្តើមនៅថ្ងៃទី ២៨ ខែធ្នូ នឹងក្លាយជាការបោះឆ្នោតលើកដំបូងចាប់តាំងពីរដ្ឋប្រហារទម្លាក់រដ្ឋាភិបាលស៊ីវិល និងបង្កឱ្យមានការតស៊ូប្រដាប់អាវុធយ៉ាងទូលំទូលាយ។ ក្រុមអ្នករិះគន់ និងបណ្តាប្រទេសលោកខាងលិចបានថ្កោលទោសការបោះឆ្នោតនេះថាជាការប៉ុនប៉ងរបស់យោធាដើម្បីធ្វើឱ្យការគ្រប់គ្រងរបស់ខ្លួនស្របច្បាប់។ ក្រុមប្រឆាំងជាច្រើនបានហាមឃាត់ ឬបដិសេធមិនចូលរួមការបោះឆ្នោតនេះទេ។

លោក មីន អ៊ុងឡាំង បាននិយាយថា ការបោះឆ្នោតបន្ទាប់នឹងត្រូវធ្វើឡើងនៅក្នុងតំបន់ជម្លោះ នៅពេលដែលស្ថិរភាពត្រូវបានស្ដារឡើងវិញ។ រហូតមកដល់ពេលនេះ ជំរឿនពេញលេញត្រូវបានធ្វើឡើងនៅក្នុងក្រុងចំនួន១៤៥ នៃសង្កាត់ចំនួន ៣៣០ របស់ប្រទេសមីយ៉ាន់ម៉ាប៉ុណ្ណោះ។ លើសពីនេះច្បាប់បោះឆ្នោតតឹងរឹង ទាមទារសមាជិក ៥ ម៉ឺននាក់ និងថវិកាចំនួនជិត៥ម៉ឺនដុល្លារ។ ដោយសារតែច្បាប់តឹងរឹងនេះមានតែគណបក្សចំនួនប្រាំមួយប៉ុណ្ណោះដែលមានសិទ្ធិប្រកួតប្រជែងក្នុងការបោះឆ្នោត។

លើសពីនេះរបបយោធាបានអញ្ជើញអាស៊ានឱ្យបញ្ជូនអ្នកសង្កេតការណ៍បោះឆ្នោត ដែលជាប្រធានបទមួយរំពឹងថានឹងត្រូវពិភាក្សានៅក្នុងកិច្ចប្រជុំកំពូលនាពេលខាងមុខរបស់ប្លុកដែលដឹកនាំដោយម៉ាឡេស៊ី៕

ការបោះឆ្នោតរបស់ប្រទេសមីយ៉ាន់ម៉ាកាលពីឆ្នាំ ២០២០ (រូបភាព៖ Anadolu)

អត្ថបទ៖ ប៊ុន សុភាព

The post ប្រមុខរបបយោធាមីយ៉ាន់ម៉ាទទួលស្គាល់ថា ការបោះឆ្នោតនឹងមិនបានទូទាំងប្រទេសទេ ខណៈសង្គ្រាមនៅតែបន្ត appeared first on Kampuchea Thmey Daily.

អាស៊ាន ស្នើឲ្យរដ្ឋាភិបាលមីយ៉ាន់ម៉ាបញ្ឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិល

Bun sopheap — Sat, 11 Oct 2025 03:20:09 +0000

សមាគមប្រជាជាតិអាស៊ីអាគ្នេយ៍ (អាស៊ាន) បានអំពាវនាវឱ្យរបបយោធាមីយ៉ាន់ម៉ា បញ្ឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិល បន្ទាប់ពីមានអំពើហិង្សាកើនឡើងនៅទូទាំងប្រទេស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Anadolu នៅថ្ងៃទី១១ខែតុលា។

រដ្ឋមន្ត្រីការបរទេសម៉ាឡេស៊ី លោក Mohamad Hasan ជួបជាមួយមេដឹកនាំរបបយោធាមីយ៉ាន់ម៉ាលោក Min Aung Hlaing

ក្នុងអំឡុងពេលទស្សនកិច្ចផ្លូវការនៅប្រទេសមីយ៉ាន់ម៉ាកាលពីថ្ងៃព្រហស្បតិ៍ រដ្ឋមន្ត្រីការបរទេសម៉ាឡេស៊ី លោក Mohamad Hasan ដែលតំណាងឱ្យអាស៊ានជាប្រធានបច្ចុប្បន្នបានជួបជាមួយមេដឹកនាំរបបយោធាមីយ៉ាន់ម៉ាលោក Min Aung Hlaing និងមន្ត្រីជាន់ខ្ពស់ជាច្រើនរូប។ លោក Hasan បានជំរុញឱ្យរបបនេះ ប្រកាសបទឈប់បាញ់ បញ្ចប់អំពើហិង្សាលើជនស៊ីវិល និងអនុញ្ញាតឱ្យជំនួយមនុស្សធម៌ទៅដល់អ្នកដែលត្រូវការជំនួយ។

ដំណើរទស្សនកិច្ចរបស់លោកបានកើតឡើងបន្ទាប់ពីមានសេចក្តីរាយការណ៍ថាមនុស្សយ៉ាងហោចណាស់ ៣២ នាក់បានស្លាប់ និងជាង៥០ នាក់បានរងរបួសនៅក្នុងការវាយប្រហារតាមអាកាសដោយរបបយោធាក្នុងពិធីបុណ្យព្រះពុទ្ធសាសនាមួយនៅភាគពាយព្យនៃប្រទេសមីយ៉ាន់ម៉ា។

កិច្ចប្រជុំក្នុងប្រទេសមីយ៉ាន់ម៉ា

លោក Hasan ក៏បានផ្តល់ជំនួយពីប្រទេសម៉ាឡេស៊ី ក្នុងការបង្កើតលំហអព្យាក្រឹតសម្រាប់កិច្ចសន្ទនារួមក្នុងចំណោមភាគីពាក់ព័ន្ធទាំងអស់របស់មីយ៉ាន់ម៉ា ដោយឆ្លុះបញ្ចាំងពីការជំរុញរបស់អាស៊ានសម្រាប់ដំណោះស្រាយនយោបាយដោយសន្តិវិធី។ ការពិភាក្សាក៏បានគ្របដណ្តប់លើកិច្ចសហប្រតិបត្តិការក្នុងតំបន់ប្រឆាំងនឹងការជួញដូរគ្រឿងញៀន និងការបោកប្រាស់តាមអ៊ីនធឺណិត និងការទទួលយកទីម័រខាងកើតជាសមាជិកទី ១១ របស់អាស៊ានផងដែរ។

លោកបានជំរុញរបបយោធាធ្វើសកម្មភាពបន្ថែមទៀតដើម្បីធានាថាការបោះឆ្នោតនាពេលខាងមុខនៅចុងឆ្នាំនេះមានភាពសេរី យុត្តិធម៌ និងអាចជឿទុកចិត្តបាន ហើយបានគូសបញ្ជាក់ពីតម្រូវការក្នុងការដោះស្រាយវិបត្តិរ៉ូហ៊ីងយ៉ាដោយការដោះស្រាយបញ្ហាឫសគល់របស់ខ្លួននៅក្នុងប្រទេសមីយ៉ាន់ម៉ាជាមុន៕

ការវាយប្រហាររបស់យោធាលើផ្ទះជនស៊ីវិល។

អត្ថបទ៖ ប៊ុន សុភាព

The post អាស៊ាន ស្នើឲ្យរដ្ឋាភិបាលមីយ៉ាន់ម៉ាបញ្ឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិល appeared first on Kampuchea Thmey Daily.

របបយោធាមីយ៉ាន់ម៉ា Archives - Kampuchea Thmey Daily

របបសឹក​មីយ៉ាន់ម៉ាដោះ​លែង​អ្នកទោស​​ជាង​៦០០០​នាក់​​​មុនបោះឆ្នោត​​​​​សកល

អាស៊ាននឹង​តាម​ដាន​ស្ថាន​ភាព​នៅ​​​មីយ៉ាន់​ម៉ា​ បន្ទាប់​ពី​ការ​បោះ​ឆ្នោត​

​មុន​បោះឆ្នោតនៅមីយ៉ាន់ម៉ា UN អំពាវ​នាវ​ឱ្យ​​របបយោធា​បញ្ឈប់​​ការ​​បង្ខិត​បង្ខំ​​

សមាជិកបក្ស USDP ជាង១ពាន់ត្រូវបានសម្លាប់ចាប់តាំងពីយោធាមីយ៉ាន់ម៉ាឡើងកាន់អំណាច

របបយោធាមីយ៉ាន់ម៉ា គំរាមដាក់ពន្ធនាគារអ្នករិះគន់ការបោះឆ្នោតរហូតដល់១០ឆ្នាំ

បេសកជនមីយ៉ាន់ម៉ា ជំរុញឱ្យUN ច្រានចោលការបោះឆ្នោតរបស់របបយោធា

អាស៊ាន ស្នើឲ្យរដ្ឋាភិបាលមីយ៉ាន់ម៉ាបញ្ឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិល

របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល

អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត

មុនបោះឆ្នោតនៅមីយ៉ាន់ម៉ា UN អំពាវនាវឱ្យរបបយោធាបញ្ឈប់ការបង្ខិតបង្ខំ