លោក ធឿន ប៊ុនធីម អាយុ៤៤ឆ្នាំ រស់នៅភូមិអំពិលជ្រុំ ឃុំទន្លេបិទ ស្រុក/ខេត្តត្បូងឃ្មុំ បានរៀបរាប់ឲ្យដឹងថា គាត់ចិញ្ចឹមគោរយៈពេល២៧ឆ្នាំមកហើយ បច្ចុប្បន្នគោគាត់មានចំនួន៤០ក្បាល ក្នុងនោះមានមេបាចំនួន៤ក្បាល ឈ្មោលបាចំនួន៤ក្បាល ក្រៅពីនោះសុទ្ធតែគោឈ្មោលញីស្ទាវចំនួន៣២ក្បាលសម្រាប់លក់។

លោក ធឿន ប៊ុនធីម បន្ថែមថា ក្នុងមួយថ្ងៃគាត់ឲ្យគោស៉ីចំណីចាប់ពីម៉ោង១១ព្រឹក រហូតល្ងាច ស្មៅលាយចំណី មានស្មៅផ្អប់ កាកប៊ីយ៉ែ ចំណីបេ លាយបញ្ចូលគ្នា។ មុនឲ្យវាស៉ីត្រូវបាញ់ទឹកលើខ្លួនវាឲ្យត្រជាក់ ឲ្យស្អាតសិន ទើបវាស៉ីចំណីបានច្រើន។ យើងចិញ្ចឹមតែរយៈពេល៣ខែទេ អាចលក់បានហើយ គឺលក់ឲ្យទីផ្សារកុងស៉ីក្នុងស្រុកតែម្តង។

លោក ប៊ុនធីម បានបញ្ជាក់ទៀតថា ការចិញ្ចឹមបានជោគជ័យទៀតសោត គឺដោយមានការយកចិត្តទុកដាក់ពីមន្ទីរកសិកម្មខេត្ត នាយកដ្ឋានក្រសួងកសិកម្ម ចុះមកបណ្តុះបណ្តាលដល់ក្រោលចិញ្ចឹមផ្ទាល់ ដោយផ្តល់បច្ចេកទេស ការថែទាំ បាញ់ថ្មាំសម្លាប់មេរោគ ផ្តល់វ៉ាក់សាំងចាក់ មានវ៉ាក់សាំងចាក់ទម្លាក់សត្វល្អិត វ៉ាក់សាំងសារទឹក វ៉ាក់សាំងអុតក្តាម ជាដើម ថែមទាំងបានផ្តល់ពូជស្មៅ២ប្រភេទ គឺស្មៅនេតទារ និងឃីងការ៉ាស់។ ស្មៅនេះ ងាយដាំ ងាយស្រួលច្រូតកាត់ មានគុណភាពល្អ គោស៉ីឆាប់ធំលឿន មិនរាគរុស គោមានសុខភាពល្អ។ លោកថា ជំនាញមានការយកចិត្តទុកដាក់ដល់កសិករចិញ្ចឹម​គោណាស់ដើម្បីបំផុសឲ្យវិស័យចិញ្ចឹមគោមានការរីកចំរើនក្នុងទូទាំងប្រទេស។

លោក ប៊ុនធីម ក៏បានបញ្ជាក់ឲ្យដឹងទៀតថា ក្នុងភូមិអំពិលជ្រុំនេះ មានកសិករចិញ្ចឹមគោតែ២០គ្រួសារទេ។ បច្ចុប្បន្នគោមួយក្បាលអាចលក់បានតម្លៃពី១លានរៀល រហូតដល់៣លានរៀល យើងទូទាត់តម្លៃពលកម្មទៅមិនខាតទេ ហើយក៏មិនចំណេញច្រើនដែរ អាចផ្គត់ផ្គង់គ្រួសារបាន៕

អថ្ថបទ៖ សាន វិឡែម

The post កសិករឃុំទន្លេបិទ ចិញ្ចឹមគោលក់តាមបច្ចេក​ទេសទទួលបានផលល្អ និងមានប្រាក់ចំណូលខ្ពស់ appeared first on Kampuchea Thmey Daily.

លោក ធឿន ប៊ុនធីម អាយុ ៤៣ឆ្នាំ រស់នៅភូមិអំពិជ្រុំ ឃុំទន្លេបិទ ស្រុក/ខេត្តត្បូងឃ្មុំ បានរៀបរាប់ឱ្យដឹងថា គាត់ចិញ្ចឹមគោរយៈពេលជិត ២០ ឆ្នាំមកហើយ។ បច្ចុប្បន្នគោគាត់មានចំនួនជិត ៤០ ក្បាល ក្នុងនោះមាន មេពូជចំនួន ២ក្បាល និងឈ្មោលចំនួន ២ក្បាលដែរ។

ការចិញ្ចឹមបានផលល្អ គឺដោយមានការយកចិត្តទុកដាក់ពី មន្ទីរកសិកម្មខេត្ត នាយកដ្ឋានក្រសួងកសិកម្ម ចុះមកបណ្តុះបណ្តាលដល់ការចិញ្ចឹមផ្ទាល់ ដោយផ្តល់បច្ចេកទេស ការថែទាំ បាញ់ថ្នាំសម្លាប់មេរោគ ផ្តល់វ៉ាក់សាំងចាក់ មានវ៉ាក់សាំងទម្លាក់សត្វល្អិត វ៉ាក់សាំងសារទឹក វ៉ាក់សាំងអុតក្តាម ជាដើម។ បច្ចុប្បន្នទីផ្សារគោធ្លាក់តម្លៃខ្លាំងណាស់ កសិករយើងលក់គោ ១ក្បាល បានតែតម្លៃជាង ១លានរៀល ទៅ២លានរៀលទេ ទូរទាត់ការចិញ្ចឹម ខាត មិនដូចឆ្នាំកន្លងទៅនោះទេ។

លោក បានបញ្ជាក់បន្ថែមទៀតថា ក្នុង ៤ភូមិនេះ មានកសិករចិញ្ចឹមគោនៅសល់តែជាង ២០០គ្រួសារ ខណៈការចិញ្ចឹមឆ្នាំមុនៗ មានជិត ៤០០គ្រួសារឯណោះ។

កសិករសំណូមពរដល់ជំនាញ សមត្ថកិច្ចពាក់ព័ន្ធ ក្រសួងកសិកម្ម ជួយដោះស្រាយទីផ្សារសាច់គោនាំចូលផង បើគ្មានការទប់ស្កាត់ទេ កសិករប្រឈមនឹងការបាត់បង់មុខរបរចិញ្ចឹមគោក្នុងស្រុក ព្រោះចិញ្ចឹមមិនចំណេញ៕

អត្ថបទ៖ សាន វិឡែម

The post កសិករឃុំទន្លេបិទ ខេត្តត្បូងឃ្មុំ ចិញ្ចឹមគោលែងចំណេញ បាត់បង់ប្រាក់ចំណូល appeared first on Kampuchea Thmey Daily.

ថ្លែងក្នុងវគ្គបណ្តុះបណ្តាលស្តីពីបច្ចេកទេសបង្ហាត់សិប្បនិម្មិតគោលជំនាន់ទី២០ នៅមហាវិទ្យាល័យ​វេជ្ជសាស្ត្រសត្វនៃសាកលវិទ្យាល័យភូមិកសិកម្ម ចាប់ពីថ្ងៃទី១ ដល់ថ្ងៃទី៣ធ្នូ លោក រស់ មុនិន្ទ ម្ចាស់កសិដ្ឋានភ្នំព្រះមានជ័យ បានមាន​ប្រសាសន៍ថា ការនាំចូលពូជគោថ្មីមកពីប្រទេសប្រេស៊ីលនេះ ដោយសារតែបច្ចុនប្បន្នបញ្ហាទីផ្សារគោនៅកម្ពុជា មិនមាន​អំណោយផលល្អ ហើយពូជគោថ្មីនេះ ជាប្រភេទគោដែលមិនមានស្នែងអត់មានបូក ប៉ុន្តែមានសាច់ល្អ ពិសេសវាមាន​សក្តានុពលទីផ្សារខ្ពស់។

លោកបានបន្តទៀតថា ពូជគោថ្មីនេះទើបនាំចូលបាន៣ខែប៉ុណ្ណោះ ដោយនាំចូលមេជីវិតមកបង្កាត់​ជាមួយគោ​ក្នុង​ស្រុក​ព្រោះថា ពូជគោនេះវាសមស្របទៅនឹងអាកាសធាតុនៅក្នុងប្រទេសកម្ពុជា ធន់កំដៅ ការលូតលាស់លឿន មិនរើស​មេ​ដោយ​សារកូនតូចល្មមមានទ្រវែងជើងខ្លីមិនមានស្នែង និងមិនរើសចំណីទេ។

លោកបានបន្តដូច្នេះថា«យើងបានផ្សព្វផ្សាយពូជគោថ្មី ដល់សិក្ខាកាមដើម្បីយកពូជនេះ ទៅបង្កាត់ហើយពេលបង្កាត់​បានយើងទិញយក​វិញទាំងអស់ដោយមិនមានការព្រួយបារម្ភពីទីផ្សារឡើយ ខណៈយើងត្រូវការទិញប្រមាណ១ម៉ឺនក្បាល សម្រាបផ្គត់ផ្គង់ក្នុងស្រុក និងនាំចេញទៅក្រៅប្រទេស ហើយកសិដ្ឋានចិញ្ចឹមគោភ្នំព្រះមានជ័យ ត្រៀមចិញ្ចឹម​ពូជគោ​នេះប្រមាណ៣០០ក្បាល»។

លោកបានណែនាំឱ្យកសិករមានការកែប្រែពូជគោ ព្រោះថា ការចិញ្ចឹមគោត្រូវតម្រូវទៅតាមទីផ្សារមិនមែនចិញ្ចឹម ដើម្បីតម្រូវខ្លួនឯងនោះទេ។ ដូចនេះការជ្រើសរើសពូជគោណាដែលងាយស្រួលចិញ្ចឹមនិងងាយស្រួលរកទីផ្សារ។

លោក ហ៊ុំ សុផុន តំណាងក្រុមហ៊ុនប៊ីភី បានឱ្យដឹងថា រយៈពេល៣ថ្ងៃនេះ មានការបង្ហាត់បង្រៀនដល់សិក្ខាកាម​ចំនួន៤ចំណុច៖ ទី១ បង្រៀនពីរបៀបបង្កាត់សិប្បនិម្មិតគោ ដើម្បីឱ្យសិក្ខាកាមទៅបង្កាត់បន្ត និងរបៀបដាក់ស៊ីដា ដើម្បីឱ្យគោរកឈ្មោលនៅក្នុងថ្ងៃតែមួយ, ទី២ បង្រៀនពីរបៀបប្រើប្រាស់ថ្នាំ ទី៣ បង្រៀនពីរបៀបធ្វើចំណីគោ និងទី៤ការអនុវត្តជាក់ស្តែង។

លោកបានបន្តថា មកដល់ពេលនេះ បានបណ្តុះបណ្តាលដល់សិក្ខាកាមចំនួន២០លើកមកហើយ ដោយមានសិក្ខាកាម​ចូលរួមសរុប៤២៥នាក់ ហើយលោកសង្ឃឹមថា សិក្ខាកាមអាចយកចំណេះដឹងទាំងនេះទៅបង្កាត់គោឱ្យបានល្អ​ទទួល​បានគោច្រើន ដើម្បីលើកស្ទួយជីវភាពគ្រួសារ និងសេដ្ឋកិច្ចជាតិឱ្យកាន់តែរីកចំរើន។

លោក ជា ប៊ុនថុន ព្រឹទ្ធបុរសរង មហាវិទ្យាល័យវេជ្ជសាស្ត្រសត្វនៃសាកលវិទ្យាល័យភូមិកសិកម្មបាន ក៏បានណែនាំ​ដល់កសិករគួរចូលរួមវគ្គបណ្តុះបណ្តាលឱ្យបានច្រើន និងជាប់ជាប្រចាំ ដើម្បីទទួលបាននូចំណេះដឹងថ្មីៗបន្ថែម ក្នុងការអភិវឌ្ឍន៍ការចិញ្ចឹមសត្វគោកាន់តែប្រសើរសំដៅជំរុញវិស័យចិញ្ចឹមគោឱ្យមានការរីកចំរើនទាំងបច្ចេកទេស និងការថែទាំឱ្យមាននិរន្តរភាពសម្រាប់ផ្គត់ផ្គង់នៅលើទីផ្សារ ក៏ដូចជាបង្កើនការងារជូនដល់ប្រជាកសិករផងដែរ៕

អត្ថបទ ៖ សំអឿន

The post កម្ពុជា នាំពូជគោថ្មីពីប្រេស៊ីលបង្កាត់ផ្គត់ផ្គង់​ទីផ្សារនៅកម្ពុជា និងសម្រាប់នាំចេញ appeared first on Kampuchea Thmey Daily.

លោក សុខ ពៅ ជាកសិករចិញ្ចឹមគោលក្ខណៈគ្រួសារ ស្ថិតនៅស្រុកខ្សាច់កណ្ដាល ខេត្តកណ្ដាល បានប្រាប់សារព័ត៌ មានកម្ពុជាថ្មីថា ទោះបីទីផ្សារគោធ្លាក់ចុះយ៉ាងណាក៏ដោយ ក៏លោកនៅតែមិនបោះបង់ការចិញ្ចឹមគោនេះដែរ។ រាល់ថ្ងៃលោកចិញ្ចឹមគោគួបផ្សំការធ្វើស្រែចំការបន្ថែម ដើម្បីផ្គត់ផ្គង់គ្រួសារបានមួយចំណែក។

លោកបានបន្តទៀតថា ការចិញ្ចឹមគោទោះបីមិនធ្វើឲ្យមានបាន តែវាអាចចំណេញសម្រាប់លោកជាកសិករស្រាប់។ ជាក់ស្ដែង ការចិញ្ចឹមគោរបស់គាត់ពីមួយឆ្នាំទៅមួយឆ្នាំ អាចលក់បានប្រាក់ខ្លះ ដើម្បីទិញម៉ូតូ និងផ្គត់ផ្គង់ការសិក្សារៀនសូត្ររបស់កូនចៅ បានមួយកម្រិតអំពីរបរចិញ្ចឹមគោលក្ខណៈគ្រួសាររបស់គាត់។ លោក សុខ ពៅ បញ្ជាក់ទៀតថា ការចិញ្ចឹមគោលក្ខណៈគ្រួសារ អាចមានផលចំណេញជាច្រើនទៀតដូចជា៖ លាមកគោ អាចកែឆ្នែទៅជាជីសម្រាប់ដាំដុះ ដំណាំស្រែ ស្វាយ ក្រូច និងចេក ជាដើម។

បន្ថែមពីលើនេះលោក សុខ ពៅ ក៏បានអំពាវនាវដល់ប្រជាកសិករផ្សេងទៀត ជាពិសេសតំបន់ជនបទ បន្តចិញ្ចឹមគោលក្ខណៈគ្រួសារឲ្យបានច្រើនៗឡើង ដើម្បីផ្គត់ផ្គង់គ្រួសារ សហគមន៍ និងសង្គមជាតិទាំងមូល។

ចំណែកឯលោក ចន្ទ ផាន កសិករចិញ្ចឹមគោលក្ខណៈគ្រួសារ ស្ថិតនៅស្រុកស្រីសន្ធរ ខេត្តកំពង់ចាម បានប្រាប់មកសារព័ត៌មានកម្ពុជាថ្មីដែរថា ការចិញ្ចឹមគោលក្ខណៈគ្រួសារកាលពីដើមឡើយ មានទីផ្សារគួរសម ព្រោះគោដែលលោកចិញ្ចឹម ភាគច្រើនជាប្រភេទគោកូនកាត់ សុទ្ធសឹងតែជាពូជល្អ សម្រាប់យកទៅបង្កាត់ជាមួយពូជផ្សេងៗទៀត។ លោកបន្ថែមថា កាលពីមុន គោពូជ ឬគោកូនកាត់ ដែលលោកចិញ្ចឹម គឺមានតម្លៃថ្លៃគួរសមដោយ ១នឹម លក់បានតម្លៃចន្លោះពី ១៥លានរៀល ទៅ ២០លានរៀល មិនខ្វះឈ្មួញទិញនោះឡើយ។

លោក ចន្ទ ផាន បញ្ជាក់ថា មកដល់ពេលនេះបច្ចុប្បន្ននេះ ការចិញ្ចឹមគោលក្ខណៈគ្រួសារ ត្រូវបានថយចុះយ៉ាងខ្លាំង ស្របពេលគ្មានឈ្មួញទិញ និងតម្លៃគោក៏ធ្លាក់ចុះទៅតាមហ្នឹងដែរ។ ដោយសារ លោក សង្កេតឃើញថា បច្ចុប្បន្ននេះអ្វីៗត្រូវបានជំនួសដោយគ្រឿងយន្តដូចជា៖ ត្រាក់ទ័រ ឬគោយន្ត និងបច្ចេកវិទ្យាទំនើបៗផ្សេងទៀត មកជំនួសកម្លាំងមនុស្ស និងសត្វបានឆាប់រហ័សជាងមុនឆ្ងាយណាស់៕

អត្ថបទ៖ សួស សិត

The post កសិករមួយចំនួន នៅតែបន្តចិញ្ចឹមគោលក្ខណៈគ្រួសារ ទោះបីតម្លៃទីផ្សារមានការធ្លាក់ចុះក៏ដោយ appeared first on Kampuchea Thmey Daily.

លោក ហួត លាង ម្ចាស់កសិដ្ឋានចិញ្ចឹមគោស្រុកតំបែ ខេត្តត្បូងឃ្មុំ បានឱ្យដឹងថា បច្ចុប្បន្ននេះអ្នកចិញ្ចឹមគោខ្នាតតូច ឬលក្ខណៈគ្រួសារ បានកាត់បន្ថយការចិញ្ចឹមជាបន្តបន្ទាប់ ដោយនៅឈរជើងបានតែអ្នកចិញ្ចឹមលក្ខណៈ​កសិដ្ឋាន​ធំៗប៉ុណ្ណោះ។  លោកបានបន្តថា តម្លៃគោរស់នៅលើទីផ្សារបានធ្លាក់ចុះពី ​ ១,៥០០០ រៀល​ ​​មកត្រឹម​ត្រឹម​ ១០,០០០ រៀល ​ ក្នុងមួយគីឡូក្រាម។

ម្ចាស់​កសិដ្ឋាន​ចិញ្ចឹម​គោរូបនេះ បានឱ្យដឹងដូច្នេះថា «មួយរយៈពេលចុងនេះ កសិករចិញ្ចឹមគោ មានកសិដ្ឋានតូចៗ​មួយចំនួន ត្រូវឈប់ចិញ្ចឹម ដោយតម្លៃ​ទីផ្សារ​គោ​រស់​មាន​ការ​ធ្លាក់​ចុះ​យ៉ាង​ខ្លាំង, បញ្ហាចម្បងនោះ គឺថ្លៃចំណាយ​ទៅលើការចិញ្ចឹម លើសចំណូលដែលទទួលបាន»។

សព្វថ្ងៃកសិដ្ឋានលោក ហួត លាង ចិញ្ចឹមគោប្រមាណជិត ៨០០ក្បាល ស្ថិតនៅក្នុងភូមិតារាម ឃុំចុង​ជាច ស្រុកតំបែ ខេត្តត្បូងឃ្មុំ។ លោកបានចាប់របរចិញ្ចឹមគោ​នេះ តាំងឆ្នាំ ២០១៣ មកម្លេះ​ដោយចាប់ផ្ដើមត្រឹមតែគោចំនួន ៧ ក្បាលប៉ុណ្ណោះ។

ពាក់ព័ន្ធនឹងបញ្ហាទីផ្សារគោនេះ លោក ស្រ៊ុន ពៅ ប្រធានសមាគមចិញ្ចឹមសត្វនៅកម្ពជា បានប្រាប់កម្ពុជាថ្មីថា វិស័យចិញ្ចឹមសត្វនៅកម្ពុជា នាពេលបច្ចុប្បន្នជួបប្រទះបញ្ហាប្រឈមទីផ្សារស្ទើរទាំងអស់ មិនថាតែទីផ្សារគោនោះទេ។

លោកបានបន្តថា ការផ្គត់ផ្គង់សាច់គោមិនមានបញ្ហានោះឡើយ ប៉ុន្តែអ្វីដែលជាបញ្ហានោះ គឺពុំសូវមានតម្រូវការ។ ពុំសូវមានតម្រូវការ ដោយសារពលរដ្ឋមិនសូវចាយលុយ។ ប្រធានសមាគមរូបនេះ សង្កេតឃើញថា បច្ចុប្បន្ន​ពលរដ្ឋហាក់ដូចជាមិនសូវចំណាយលុយទៅលើការទិញរបស់របរក៏ដូចជា ត្រីសាច់ប៉ុន្មានទេ ដែលកត្តានេះ នាំឱ្យអ្នកចិញ្ចឹមជាប់គាំងពិបាកនៅក្នុងការបញ្ចេញទៅលើទីផ្សារ។

លោក ស្រ៊ុន ពៅ បានអំពាវនាវដល់ប្រជាកសិករទាំងអស់​​ ដែលមាន​មុខរបរចិញ្ចឹមសត្វ ឬចិញ្ចឹមគោ កុំបោះបង់​ចោលអាជីពនេះ ត្រូវជម្នះបន្តការខិតខំប្រឹងប្រែងចិញ្ចឹម តាមស្តង់ដារបច្ចេកទេស វិជ្ជាជីវៈ​ឱ្យបានត្រឹមត្រូវ ដើម្បីផ្គត់​ផ្គង់ទីផ្សារក្នុងស្រុក និងត្រៀមនាំចេញនៅពេលខាងមុខ៕

អត្ថបទ៖ ផល ធារិត

The post ទីផ្សារគោធ្លាក់ចុះធ្វើឱ្យអ្នកចិញ្ចឹមខ្នាតតូចមួយចំនួនចង់បោះបង់អាជីពនេះ appeared first on Kampuchea Thmey Daily.

តាមការអះអាងពីបងប្រុស គង់ សុចាន់បាននិយាយថា ជាយូរមកហើយដែលបងប្អូនប្រជាពលរដ្ឋរស់នៅក្នុងឃុំក្រាំងអំពិល ស្រុកសំរោងទងនាំគ្នាចិញ្ចឹមសត្វគោទុកលក់ព្រោះបានថ្លៃហើយក៏លើកស្ទួយជីវភាពគ្រួសារនិមួយៗរហូតបានលុយទិញឡានជិះធ្វើផ្ទះថ្មរ ហើយចំណាយថវិកាឲ្យកូនចៅបានរៀនសូត្រខ្ពង់ខ្ពស់ដោយសារអាជីពនេះ។

បុរសរូបនេះបានបញ្ជាក់ចំពោះចំណីសម្រាប់ឲ្យសត្វគោរបស់ពួកគាត់គឺពេលព្រឹកព្រលឹមដេញឲ្យទៅសុីស្មៅលើភ្នំក្បែភូមិរបស់ពួកគាត់ស្នាក់នៅចាប់ពីព្រឹកដល់រសៀលទើបដេញចូលក្រោលវិញ។

តាមប្រភពពីបងប្រុស សុន ឆេន វិញបានបញ្ជាក់ថាស្រុកភូមិរបស់ពួកគាត់គ្មានអំពើចោរកម្មដូចស្រុកគេដ៏ទៃឡើយហើយបើសិនជាមានក៏រត់មិនរួចពីកណ្តាប់ដៃប្រជាពលរដ្ឋឡើយ។ ចំណែកសត្វគោដែលបងប្អូនប្រជាពលរដ្ឋក្នុងឃុំក្រាំងអំបិលចិញ្ចឹមទុកលក់ក្នុងមួយគ្រួសារមិនក្រោម៣០ក្បាល។

មួយក្បាលៗមានតម្លៃចាប់ពី៧លានរៀលរហូតដល់១០លានរៀលឯណោះ។ ក្នុងនោះបងប្អូនប្រជាពលរដ្ឋលោកសូមគាំទ្រនូវទីផ្សារលក់និងទិញសត្វគោនាពេលបច្ចុប្បន្នមានតម្លៃខ្ពស់ដែលធ្វើឲ្យប្រជាពលរដ្ឋត្រូវការលក់ចេញយកលុយមកធ្វើផ្ទះថ្មរទ្រនុំខ្ពស់និងសល់លុយទិញឡានជិះដោយពុំចាំបាច់ខ្ចីបុលពីធនាគារឡើយ៕

អត្ថបទ៖ នរា

The post ប្រជាពលរដ្ឋឃុំក្រាំងអំពិល​ចាប់យករបរចិញ្ចឹមគោ​ដើម្បីលើកស្ទួយជីវភាព appeared first on Kampuchea Thmey Daily.