កសិករឃុំទន្លេបិទ ខេត្តត្បូងឃ្មុំ ចិញ្ចឹមគោលែងចំណេញ បាត់បង់ប្រាក់ចំណូល

កសិករ ភូមិតាអ៊ុយ ភូមិភ្នំ ភូមិអន្លង់ពោង និងភូមិអំពិលជ្រុំ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ បានចិញ្ចឹមគោ លក់មិនបានទទួលផលល្អនោះទេ ដោយសារទីផ្សារគោចុះថោក។ កសិករមួយចំនួនបានបោះបង់ការចិញ្ចឹមជាបណ្តើរៗ ដោយលក់ទាំងគោសាច់ លក់ទាំងបា លក់ទាំងមេពូជ ខណៈមុខរបរចិញ្ចឹមគោនូវមូលដ្ឋាននេះ មានតាំងពីដូនតាយូរមកហើយ។ ក្នុងគ្រាដ៏លំបាកនេះ គោមានទីផ្សារស្រួលលក់មែន តែតម្លៃថោក មិនអាចប្រគួតប្រជែងជាមួយសាច់គោនាំចូលពីក្រៅប្រទេសបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ធឿន ប៊ុនធីម អាយុ ៤៣ឆ្នាំ រស់នៅភូមិអំពិជ្រុំ ឃុំទន្លេបិទ ស្រុក/ខេត្តត្បូងឃ្មុំ បានរៀបរាប់ឱ្យដឹងថា គាត់ចិញ្ចឹមគោរយៈពេលជិត ២០ ឆ្នាំមកហើយ។ បច្ចុប្បន្នគោគាត់មានចំនួនជិត ៤០ ក្បាល ក្នុងនោះមាន មេពូជចំនួន ២ក្បាល និងឈ្មោលចំនួន ២ក្បាលដែរ។

ការចិញ្ចឹមបានផលល្អ គឺដោយមានការយកចិត្តទុកដាក់ពី មន្ទីរកសិកម្មខេត្ត នាយកដ្ឋានក្រសួងកសិកម្ម ចុះមកបណ្តុះបណ្តាលដល់ការចិញ្ចឹមផ្ទាល់ ដោយផ្តល់បច្ចេកទេស ការថែទាំ បាញ់ថ្នាំសម្លាប់មេរោគ ផ្តល់វ៉ាក់សាំងចាក់ មានវ៉ាក់សាំងទម្លាក់សត្វល្អិត វ៉ាក់សាំងសារទឹក វ៉ាក់សាំងអុតក្តាម ជាដើម។ បច្ចុប្បន្នទីផ្សារគោធ្លាក់តម្លៃខ្លាំងណាស់ កសិករយើងលក់គោ ១ក្បាល បានតែតម្លៃជាង ១លានរៀល ទៅ២លានរៀលទេ ទូរទាត់ការចិញ្ចឹម ខាត មិនដូចឆ្នាំកន្លងទៅនោះទេ។

លោក បានបញ្ជាក់បន្ថែមទៀតថា ក្នុង ៤ភូមិនេះ មានកសិករចិញ្ចឹមគោនៅសល់តែជាង ២០០គ្រួសារ ខណៈការចិញ្ចឹមឆ្នាំមុនៗ មានជិត ៤០០គ្រួសារឯណោះ។

កសិករសំណូមពរដល់ជំនាញ សមត្ថកិច្ចពាក់ព័ន្ធ ក្រសួងកសិកម្ម ជួយដោះស្រាយទីផ្សារសាច់គោនាំចូលផង បើគ្មានការទប់ស្កាត់ទេ កសិករប្រឈមនឹងការបាត់បង់មុខរបរចិញ្ចឹមគោក្នុងស្រុក ព្រោះចិញ្ចឹមមិនចំណេញ៕

អត្ថបទ៖ សាន វិឡែម