រមណីយដ្ឋានអង្គរ Archives - Kampuchea Thmey Daily

បុរសជនជាតិអង់គ្លេស ចោលការងារធនាគារស្រលាញ់ប្រាសាទបុរាណខ្មែរ និងបន្តរស់នៅកម្ពុជាជាង៣០ ឆ្នាំ

Dy Bunnara — Mon, 29 Jun 2026 02:57:05 +0000

បុរសជនជាតិអង់គ្លេសម្នាក់ បានបង្ហាញពីក្តីស្រឡាញ់យ៉ាងជ្រាលជ្រៅចំពោះប្រាសាទបុរាណខ្មែរ និងប្រជាជនកម្ពុជា។

លោក អេនឌី ប៉្រោវើ បានស្គាល់ពីប្រទេសកម្ពុជាជាលើកដំបូងនៅឆ្នាំ ១៩៧៩ តាមរយៈរឿងរ៉ាវនៃរបបប្រល័យពូជសាសន៍ខ្មែរក្រហម។

លោកបានចោលការងារនៅធនាគារក្នុងទីក្រុងឡុងដ៍ប្រទេសអង់គ្លេស ហើយក៏បានសម្រេចចិត្តធ្វើដំណើរមកកាន់ប្រទេសកម្ពុជានៅអំឡុងឆ្នាំ ១៩៩៤។ ការមករស់នៅប្រទេសកម្ពុជា លោកបានបង្ហាញពីក្តីស្រឡាញ់ចំពោះប្រាសាទបុរាណខ្មែរយ៉ាងជ្រាលជ្រៅ ក្រោយលោកបានទៅទស្សនាប្រាសាទបុរាណខ្មែរនៅខេត្តសៀមរាប។

លោក អេនឌី ប៉្រោវើ 

ការឈានជើងមកស្គាល់ទឹកដីប្រទេសកម្ពុជា ក៏ធ្វើឲ្យបុរសអង់គ្លេសរូបនេះមានការងឿងឆ្ងល់យ៉ាងខ្លាំងដែលប្រទេសកម្ពុជាមានអរិយធម៌ដ៏ខ្ពង់ខ្ពស់ តើអាចធ្លាក់ចូលទៅក្នុងសោកនាដកម្មដ៏អាក្រក់ក្នុងរបបខ្មែរក្រហមបានដោយរបៀបណាទៅ?

លោក អេនឌី ប៉្រោវើ បានរៀបរាប់បទពិសោធន៍ដំបូងដែលធ្វើឱ្យលោកមិនអាចបំភ្លេចបានគឺនៅអំឡុងឆ្នាំ ១៩៩៤ ពេលលោកទៅទស្សនាខេត្តសៀមរាប និងបានទៅមើលថ្ងៃរះនៅប្រាសាទអង្គរវត្តជាមួយនឹងមគ្គុទ្ទេសក៍ម្នាក់ ដែលកាលនោះគ្មានភ្ញៀវទេសចរផ្សេងទៀតនោះទេ ដែលធ្វើឱ្យលោកហាក់មានអារម្មណ៍ថា ប្រាសាទនោះដូចជាជារបស់គាត់ផ្ទាល់តែម្តង។

នៅពេលដែលតំបន់អង្គរវត្តចាប់ផ្តើមមានមនុស្សច្រើនកុះករ បុរសជនជាតិអង់គ្លេសរូបនេះបានប្តូរទម្លាប់ពីការមើលប្រាសាទជារួម ទៅជាការដើររកមើលចម្លាក់ល្អិតៗតាមកន្លែងចង្អៀតៗវិញ។

អេនឌី មានទស្សនៈមួយថា “ថ្មនៃប្រាសាទមួយៗ សុទ្ធតែមានរឿងរ៉ាវរបស់វា” ដែលមានន័យថា ទោះបីប្រាសាទអង្គរមានអាយុកាលរាប់ពាន់ឆ្នាំក៏ដោយ ក៏នៅតែមានរឿងរ៉ាវថ្មីៗជានិច្ចសម្រាប់ការរៀនសូត្រ ដូចជាការរកឃើញស្រះទឹកបុរាណនៅក្នុងវាំងអង្គរធំជាដើម។

បន្ថែមពីនេះ លោកក៏បានរំលឹកពីការធ្វើដំណើរដ៏លំបាក និងសេចក្តីស្រឡាញ់ចំពោះប្រាសាទព្រះវិហារ ដែលនៅតែធ្វើឲ្យលោកចងចាំមិនអាចបំភ្លេចបាន។

លោកបានរៀបរាប់ថា កាលពីអំឡុងឆ្នាំ ២០០២ លោកបានជិះម៉ូតូពីខេត្តកំពង់ធំទៅកាន់ប្រាសាទព្រះវិហារ ទាំងដែលផ្លូវមានការលំបាក និងមានគ្រាប់មីនសេសសល់រាយប៉ាយ។

កាលបានស្នាក់នៅក្នុងខ្ទមម្នាក់ឯងជាមួយនឹងបរិយាកាសពពកធ្លាក់ចុះ បានដិតជាប់ក្នុងអារម្មណ៍របស់លោកយ៉ាងខ្លាំង។ ហេតុនេះហើយ ទើបលោកមានការឈឺចាប់ និងសោកស្តាយយ៉ាងខ្លាំងបំផុត នៅពេលដែលឃើញប្រាសាទព្រះវិហាររងការខូចខាត ព្រោះចម្លាក់ទាំងនោះគឺមានតែមួយគត់ និងមិនអាចផលិតឡើងវិញបានឡើយ។

ក្រៅពីចាប់អារម្មណ៍ទៅប្រាសាទ បុរសជនជាតិអង់គ្លេសរូបនេះក៏ចែករំលែកពីការផ្សារភ្ជាប់មនោសញ្ចេតនាយ៉ាងជ្រាលជ្រៅជាមួយអ្នកភូមិតាមតំបន់ជនបទ។

លោកក៏បានរំលឹកពីការបានទស្សនាខ្សែភាពយន្តខ្មែរមួយ ដែលបានជំរុញឲ្យលោកតាមស្វែងរករកបុរសចំណាស់ខ្មែរម្នាក់ និងក្មេងតូចម្នាក់ រហូតទាល់តែបានជួបនិងរាប់អានគ្នាជាលក្ខណៈគ្រួសារ។ នៅពេលធ្វើដំណើរទៅតំបន់ឆ្ងាយៗ លោកក៏តែងតែសុំមេភូមិស្នាក់នៅជាមួយប្រជាជន ហើយក៏តែងតែទទួលបានការស្វាគមន៍ ជាមួយការរៀបចំអាហារ និងក្រាលរៀបចំកន្ទេលឱ្យលោកគេងសម្រាក។

ជាមួយគ្នានេះ លោកក៏ចែករំលែកតាមរយៈការសន្ទនាតូចៗជាមួយអ្នកភូមិ ដែលចង់ដឹងពីប្រទេសអង់គ្លេស ក៏ជាអនុស្សាវរីយ៍ដ៏អស្ចារ្យបំផុត ដែលលោកបានសរសេរកត់ត្រាទុកនៅលើអ៊ីនធឺណិត ដើម្បីទុកមើលពេលក្រោយ។ អ្វីដែលកាន់តែពិសេសនោះគឺ នៅពេលលោកជូនលុយ អ្នកភូមិមិនព្រមទទួលយកនោះទេ ដែលជំរុញឱ្យលោកបន្តត្រឡប់មកលេងពួកគេវិញជារៀងរាល់ឆ្នាំ ដើម្បីរក្សាទំនាក់ទំនងដ៏ល្អនេះ៕

The post បុរសជនជាតិអង់គ្លេស ចោលការងារធនាគារស្រលាញ់ប្រាសាទបុរាណខ្មែរ និងបន្តរស់នៅកម្ពុជាជាង៣០ ឆ្នាំ appeared first on Kampuchea Thmey Daily.

ណែនាំឲ្យស្គាល់វត្តបុរាណចំនួន ៣៥ ស្ថិតនៅជុំវិញបរិវេណតំបន់រមណីយដ្ឋានអង្គរ

Dy Bunnara — Mon, 22 Jun 2026 03:08:10 +0000

នៅតំបន់រមណីយដ្ឋានអង្គរ មានវត្តបុរាណចំនួន ៣៥ កន្លែង។ វត្តទាំង ៣៥ កន្លែង មានទីតាំងស្ថិតនៅក្នុងតំបន់ការពារតំបន់ ១ និងតំបន់ ២ ក្រោមការគ្រប់គ្រងរបស់អាជ្ញាធរជាតិអប្សរា។

ខណៈវត្តមួយចំនួនដោយសារអាយុកាលចំណាស់ និងភាពទ្រុឌទ្រោម ទទួលបានការអភិរក្សជួសជុលពីអាជ្ញាធរជាតិអប្សរា ដើម្បីលើកតម្លៃនិងថែរក្សាឲ្យរឹងមាំបន្តទៀត។

វត្តទាំង ៣៥ ទីតាំង នៅក្នុងតំបន់រមណីយដ្ឋានអង្គរមានឈ្មោះដូចជា៖

ក-១ វត្តក្នុងតំបន់ការពារទី១ (ក្នុងបរិវេណអង្គរធំ) ឧទ្យានកណ្តាល

១/ វត្តព្រះអង្គខ្មៅ ឬវត្តកងជុំ
២/ វត្តព្រះសិរអារ្យ
៣/ វត្តព្រះឥន្ទ្រទេព
៤/ វត្តគោកធ្លក
៥/ វត្តទេពប្រណម
៦/ វត្តតាំងតុ
៧/ វត្តព្រះវិហារ ៧ ល្វែង

ក-២ វត្តក្នុងតំបន់ការពារទី១ (ក្នុងបរិវេណអង្គរវត្ត) ឧទ្យានកណ្តាល

៨/ វត្តឥន្ទបត្តបុរីអង្គរខាងជើង ហៅវត្តអង្គរជើង
៩/ វត្តឥន្ទបត្តបុរីអង្គរតូចខាងត្បូង ហៅវត្តអង្គរត្បូង

ក-៣ វត្តក្នុងតំបន់ការពារទី១ ឧទ្យានកណ្តាល

១/ វត្តដំរីសែនជ័យ
២/ វត្តកេតកន្យារាម
៣/ វត្តតាព្រហ្មមានជ័យ
៤/ វត្តឋិតសត្ថារាមរង្សី ហៅវត្តព្រះដាក់
៥/ វត្តអង្គម៉ោលសិរីវង្ស ហៅវត្តអង្គម៉ោល
៦/ វត្តទោលខ្ពស់សុវណ្ណរង្សី ហៅវត្តទោលខ្ពស់
៧/ វត្តកោះកែវបារាយរតនារាម ហៅវត្តខ្នាត
៨/ វត្តបារាយមហានទីរតនារាម ហៅវត្តស្វាយរមៀត
៩/ វត្តមន្នីចេស្តា ឬវត្តពោធិ៍ ២ ដើម

ក-៤ វត្តក្នុងតំបន់ការពារទី២ ឧទ្យានកណ្តាល

១/ វត្តច័ន្ទរង្សី ហៅវត្តគោកចាន់
២/ វត្តរង្សីបន្ទាយជ័យ ហៅវត្តបន្ទាយក្បាលចិន
៣/ វត្តប្រាសាទគោកចក ហៅវត្តគោកចក
៤/ វត្តកោះតេជោសែនជ័យ ឬវត្តគោកតាលន់
៥/ វត្តជ័យគិរីមុន្នីរង្សីអនុណរៈ ហៅវត្តរុន
៦/ វត្តច័ន្ទគីរី ហៅវត្តភ្នំបូក
៧/ វត្តសុវណ្ណគុហារ ហៅវត្តនាមរូប
៨/ វត្តសិរីវង្ស ហៅវត្តសណ្តាន់
៩/ វត្តគោកខ្ពស់មុនីរង្សី ហៅវត្តគោកខ្ពស់
១០/ វត្តអារញ្ញវាសីមហាប្រាសាទ ហៅវត្តប្រាសាទ
១១/ វត្តទេពពោធិវង្ស ហៅវត្តក្បាលខ្មោច

ក-៥ វត្តក្នុងតំបន់ការពារទី១ ឧទ្យានរលួស

១/ វត្តបាគង
២/ វត្តប្រាសាទលលៃ
៣/ វត្តរកា
៤/ វត្តធម្មិស្សរារាម ហៅវត្តថ្មី

ក-៦ វត្តក្នុងតំបន់ការពារទី១ ឧទ្យានបន្ទាយស្រី

១/ វត្តសីលាចារ្យបន្ទាយស្រី ហៅវត្តបន្ទាយស្រី
២/ វត្តនាគវង្ស ហៅវត្តនាគខ្មៅ

ខ- វត្តដែលបានធ្វើការជួសជុលអភិរក្ស ដោយអាជ្ញាធរជាតិអប្សរា

១/ វត្តបាគង
២/ វត្តប្រាសាទលលៃ
៣/ វត្តព្រះឥន្ទកោសីយ៍
៤/ វត្តពោធិលង្កា
៥/ វត្តព្រះព្រហ្មរ័ត្ន
៦/ វត្តរាជបូណ៌
៧/ វត្តដំណាក់
៨/ វត្តអារញ្ញរង្សី ហៅវត្តល្អក់

វត្តព្រះឥន្ទកោសីយ៍

គ- វត្តដែលបានធ្វើការរៀបចំ កែលំអសណ្តាប់ធ្នាប់សំណង់តាមប្លង់មេ ដោយអាជ្ញាធរជាតិអប្សរា

១/ វត្តឥន្ទបត្តបុរីអង្គរខាងជើង ហៅវត្តអង្គរជើង

The post ណែនាំឲ្យស្គាល់វត្តបុរាណចំនួន ៣៥ ស្ថិតនៅជុំវិញបរិវេណតំបន់រមណីយដ្ឋានអង្គរ appeared first on Kampuchea Thmey Daily.

មកស្គាល់ទីតាំងបន្ទប់ទឹកអនាម័យស្តង់ដា ២៨ ទីតាំង រៀបចំនៅតំបន់អង្គរ សម្រួលទេសចរពេលដើរកម្សាន្ត

Dy Bunnara — Sat, 20 Jun 2026 04:00:03 +0000

អាជ្ញាធរជាតិអប្សរាបានរៀបចំទីតាំងបន្ទប់ទឹកស្តង់ដាចំនួន ២៨ ទីតាំង សម្រាប់សម្រួលដល់ភ្ញៀវទេសចរ ពេលដើរកម្សាន្តក្នុងតំបន់រមណីយដ្ឋានអង្គរ។

បន្ទប់ទឹកស្តង់ដា ត្រូវបានរៀបចំដោយយកចិត្តទុកដាក់ខ្ពស់ទាំងបរិស្ថាន និងអនាម័យដែលត្រូវបានដាក់ពង្រាយតាមគោលដៅទីតាំងប្រាសាទសំខាន់ៗក្នុងតំបន់រមណីយដ្ឋានអង្គរ។

01. ត្រពាំងសេស
02. បាខែងចាស់
03. បន្ទាយស្រីចាស់
04. តាំងតុ
05. តាកែវ
06. ស្រះស្រង់
07. ប្រែរូប
08. តាសោម
09. ព្រះខ័ន
10. ព្រះពិធូ
11. បារាយណ៍
12. ក្នុងអង្គរ
13. ភ្នំបូក
14. បន្ទាយសម្រែ
15. នាគព័ន្ធ
16. ក្បាលស្ពាន
17. បន្ទាយស្រីថ្មី
18. បាគង
19. តាព្រហ្មខាងកើត
20. តាព្រហ្មថ្មី
21. តាកុះ
22. បាខែងថ្មី
23. បេងមាលាក្រៅ
24. បេងមាលាក្នុង
25. អង្គរប៉ារីស
26. បាយ័នខាងលិច
27. ព្រះខ័នខាងលិច
28. ចៅសាយទេវតា

The post មកស្គាល់ទីតាំងបន្ទប់ទឹកអនាម័យស្តង់ដា ២៨ ទីតាំង រៀបចំនៅតំបន់អង្គរ សម្រួលទេសចរពេលដើរកម្សាន្ត appeared first on Kampuchea Thmey Daily.

បុរសជនជាតិអាមេរិកប្រាប់អព្ភូតហេតុ ប្រាសាទបុរាណខ្មែរហាក់មានថាមពលពិសេស អាចឆ្លងឆ្លើយទៅសាច់ញាតិនៅទីសែនឆ្ងាយ

Dy Bunnara — Tue, 09 Jun 2026 02:49:24 +0000

អ្នកទេសចរអាមេរិកដែលមករស់នៅប្រទេសកម្ពុជាអស់រយៈពេលជាច្រើនឆ្នាំ បានរៀបរាប់បទពិសោធន៍ ខណៈដែលលោកជឿជាក់ ហាក់ទទួលបានអារម្មណ៍ពិសេសនៃព្រលឹងប្រាសាទបុរាណខ្មែរនៅតំបន់អង្គរ។

លោក Craig Dodeg បានមកទស្សនាខេត្តសៀមរាបជាលើកដំបូងនៅក្នុងឆ្នាំ ២០០៩។ ជិត ២០ ឆ្នាំ នេះ លោកបានផ្សារភ្ជាប់ក្តីស្រលាញ់ជាមួយវប្បធម៌ខ្មែរយ៉ាងជ្រាលជ្រៅ។

ក្នុងបទសម្ភាសន៍ជាមួយអ្នកសារព័ត៌មានកាលពីពេលថ្មីៗកន្លងទៅនេះ លោកបានប្រាប់ពីជំនឿមួយ ដែលប្រាសាទខ្មែរហាក់អាចឲ្យលោកផ្ញើសារឬជជែកទៅសាច់ញាតិនៅទីសែនឆ្ងាយបាន។

លោក Craig Dodeg ផ្តល់សម្ភាសន៍ដល់អ្នកសារព័ត៌មាន

លោក Craig Dodeg ប្រាប់ថា ទោះបីជាលោកមិនសូវដឹងច្បាស់អំពីប្រវត្តិសាស្ត្រ ប៉ុន្តែអ្វីដែលធ្វើឲ្យលោកចាប់អារម្មណ៍ខ្លាំងបំផុតគឺព្រលឹងដែលស្ថិតនៅក្នុងប្រាសាទបុរាណខ្មែរ។

លោកបានលើកយកទីតាំងចំនួនពីរដែលធ្វើឲ្យលោករំជួលចិត្តបំផុត គឺនៅពេលលោកបានទៅទស្សនានៅក្លោងទ្វារខ្មោចនៃប្រាសាទអង្គរធំ ដែលលោកបានរៀបរាប់ពីទិដ្ឋភាពនៅទីនោះមានភាពស្ងាត់ជ្រងំ ដែលធ្វើឲ្យលោកមានអារម្មណ៍ថាអាចទាក់ទងឬនិយាយជាមួយសាច់ញាតិនៅទីដ៏សែនឆ្ងាយ។

បន្ថែមពីនេះ លោករំលឹកទៀតថា «កាលពីប៉ុន្មានឆ្នាំមុន ពេលដែលឪពុករបស់ខ្ញុំកំពុងឈឺធ្ងន់ រៀបនឹងលាចាកលោកទៅនៅឯសហរដ្ឋអាមេរិក ខ្ញុំបានឡើងទៅលើភ្នំក្រោម ហើយនិយាយបណ្តែតតាមខ្យល់ប្រាប់ឪពុកថា បើដល់ពេលពុកត្រូវទៅហើយ ពុកក៏ទៅចុះ។ ត្រឹមតែ ១៥ នាទីបន្ទាប់ពីខ្ញុំចុះមកដល់ផ្ទះវិញ ខ្ញុំទទួលបានទូរសព្ទប្រាប់ថាឪពុកខ្ញុំបានស្លាប់បាត់បង់ជីវិតមែន»។

លោកបានរំលឹកហេតុការណ៍នេះធ្វើឲ្យលោកជឿថា តំបន់អង្គរមានថាមពលពិសេសម្យ៉ាងដែលប៉ះពាល់ដល់ព្រលឹង និងអាចបញ្ជូនសាររបស់គាត់បាន។

លោកក៏បានលើកឡើងពីបទពិសោធន៍ពេលលោកមកទស្សនាតំបន់អង្គរជាលើកទីមួយជាមួយក្រុមទេសចរ លោកកត់សម្គាល់ឃើញថា ភ្ញៀវទេសចរភាគច្រើនចូលចិត្តដើរប្រញាប់ប្រញាល់ ដែលធ្វើឲ្យពួកគេរំលងតម្លៃពិតប្រាកដនៃការដើរមកទស្សនាប្រាសាទបុរាណក្នុងតំបន់អង្គរ។

លោកប្រាប់ថា «ដើម្បីស្គាល់អង្គរឲ្យច្បាស់ គេមិនត្រូវដើរប្រញាប់ពេកទេ គឺត្រូវចំណាយពេលដើរយឺតៗ ស្ដាប់ភាពស្ងាត់ស្ងៀម និងសំឡេងធម្មជាតិដូចជាសំឡេងសត្វចាប ដើម្បីទទួលយកបរិយាកាស និងថាមពលផ្លូវចិត្តនៅទីនោះ»។

ការដើរទស្សនានៅតំបន់អង្គរ លោក Craig Dodeg ចូលចិត្តទៅកន្លែងដែលមិនសូវមានភ្ញៀវទេសចរទៅដល់ ដូចជាជិះកង់ឬដើរតាមផ្លូវដីក្នុងព្រៃដែលកើតចេញពីការដើរចុះឡើងរបស់អ្នកភូមិ ជាជាងការដើរតាមផ្លូវចាក់សាប ដោយវាផ្តល់នូវអារម្មណ៍រុករកពិតៗ ដូចជាការផុសចេញពីព្រៃមកប្រទះនឹងប្រាសាទតែម្ដង។

ពាក់ព័ន្ធសម្បត្តិវប្បធម៌ខ្មែរដែលបន្សល់ទុកនេះ បុរសជនជាតិអាមេរិករូបនេះមានការស្ញប់ស្ញែងចំពោះសមត្ថភាពរបស់បុព្វបុរសខ្មែរកាលជំនាន់មុន។ លោកស្ញប់ស្ញែងយ៉ាងខ្លាំងចំពោះឆន្ទៈ ភាពព្យាយាម និងសមត្ថភាពរបស់មនុស្សសម័យមុន ដែលអាចដឹកថ្មឡើងភ្នំ និងសាងសង់សំណង់ដ៏អស្ចារ្យនេះបាន។

លោកក៏លើកឡើងពីបាតុភូតសមរាត្រី (Equinox) ដែលព្រះអាទិត្យរះចំកណ្ដាលកំពូលប្រាសាទអង្គរវត្ត។

លោកជឿជាក់ថា បុព្វបុរសខ្មែរសម័យមុនពូកែសង្កេតមើលផ្កាយ ព្រះអាទិត្យ និងគន្លងតារា ទើបអាចគណនាប្លង់សាងសង់បានយ៉ាងត្រឹមត្រូវបែបនេះ។ ក្រៅពីនេះ លោកក៏មានការកោតសរសើរយ៉ាងខ្លាំងចំពោះការរៀបចំប្រព័ន្ធទឹក និងធារាសាស្ត្ររបស់ដូនតាខ្មែរនាសម័យនោះផងដែរ។

បន្ថែមពីនេះ លើសពីការអភិរក្សប្រពៃណីវប្បធម៌បុរាណ លោកក៏ចង់ឲ្យពិភពលោកបានឃើញនិងផ្តល់តម្លៃដល់សិល្បៈបែបទំនើប ឬសហសម័យរបស់កម្ពុជាផងដែរ ដូចជា សិល្បៈសៀក តន្ត្រីករ អ្នកគូរគំនូរជីវចល និងអ្នកបង្កើតមាតិកាតាមប្រព័ន្ធអ៊ីនធឺណិត ដើម្បីបង្ហាញពីការវិវឌ្ឍចម្រុះនៃវប្បធម៌ខ្មែរនាពេលបច្ចុប្បន្ន៕

The post បុរសជនជាតិអាមេរិកប្រាប់អព្ភូតហេតុ ប្រាសាទបុរាណខ្មែរហាក់មានថាមពលពិសេស អាចឆ្លងឆ្លើយទៅសាច់ញាតិនៅទីសែនឆ្ងាយ appeared first on Kampuchea Thmey Daily.

ក្មេងលក់វត្ថុអនុស្សាវរីយ៍នៅប្រាសាទតាព្រហ្មទសវត្សរ៍ឆ្នាំ ៦០ រំលឹកបទពិសោធន៍ថតភាពយន្ត និងឱកាសបានជិះយន្តហោះមិនដឹកស្មានដល់

Dy Bunnara — Mon, 08 Jun 2026 02:49:22 +0000

លោក ឡិក សារួន ត្រូវបានគេជ្រើសរើសឲ្យចូលរួមថតសម្តែងនៅក្នុងខ្សែភាពយន្តនាអំឡុងឆ្នាំ ១៩៦៤ ដែលពេលនោះលោកទើបតែមានអាយុប្រហែល ១៤ ឆ្នាំ និងកំពុងរៀននៅថ្នាក់កុមារដ្ឋាន។

លោក ឡឹក សារួន បានរំលឹកថា កាលនោះលោកគ្រាន់តែជាក្មេងដើរលក់ត្រដោកគោ និងវត្ថុអនុស្សាវរីយ៍ឲ្យភ្ញៀវទេសចរនៅក្នុងប្រាសាទតាព្រហ្មក្នុងតំបន់អង្គរប៉ុណ្ណោះ។

លោកបានចែករំលែកបទពិសោធន៍ដែលនាំឲ្យមានការចាប់ផ្តើម និងការជ្រើសរើសឲ្យលោកចូលរួមសម្ដែងក្នុងភាពយន្តកាលពីសម័យយុគមាសនៃការរីកចម្រើននៃឧស្សាហកម្មភាពយន្តខ្មែរនាទសវត្សរ៍ឆ្នាំ ៦០។

លោកបានរំលឹកថា បុរសម្នាក់ឈ្មោះ សំ សំអែល បានកត់សម្គាល់ពីរូបរាងរបស់លោក និងបានជ្រើសរើសលោកនៅក្នុងចំណោមក្មេងៗជាច្រើនឲ្យចូលរួមថតសម្តែងក្នុងខ្សែភាពយន្ត ដោយសារតែឃើញទឹកមុខញញឹមស្រស់ និងទឹកមុខមិនចេះក្រញូវប្រកបដោយភាពទាក់ទាញរបស់លោក។

មុននឹងយកទៅថតក្នុងភាពយន្ត លោកថា អ្នកដឹកនាំបានទៅជួបសុំការអនុញ្ញាតពីឪពុកម្តាយ និងបងប្អូនសាច់ញាតិរបស់លោក ហើយលោកមានក្ដីរំភើបនិងសប្បាយចិត្តយ៉ាងខ្លាំងដោយមិនប្រកែកឡើយ ក្នុងឱកាសបានចូលរួមថតសម្តែងភាពយន្តជាលើកដំបូងនេះ។

បទពិសោធន៍នៃការថតកុន

នៅក្នុងសាច់រឿង លោក ឡិក សារួន ត្រូវបានគេឲ្យដើរតួជាក្មេងនាំផ្លូវ ដោយមានកាន់កាំភ្លើងដើរពីមុខគេដើម្បីមើលឆ្វេងស្ដាំ និងមានលាបរមៀតលើខ្លួនប្រាណឡើងរលោងថែមទៀត។

ការថតមានរយៈពេលប្រហែលជាង ៣ ខែ ដោយធ្វើឡើងនៅទីតាំងចំនួន ៣ សំខាន់ៗគឺ៖ ប្រាសាទព្រះខ័ន ប្រាសាទអង្គរវត្ត និងនៅខេត្តកំពត។

លោក ឡិក សារួន បានឲ្យដឹងថា ជារៀងរាល់ព្រឹក គេតែងតែយកឡានមកទទួលលោកនៅផ្ទះ ហើយពេលខ្លះលោកត្រូវគេងនៅសណ្ឋាគារជាមួយតួឯកល្បីៗ រួមទាំងតួឯកស្រីបរទេសសម្បុរខ្មៅដ៏ស្រស់ស្អាតម្នាក់តាមលោកចាំ។

ការផ្លាស់ប្តូរជីវភាពគ្រួសារ

ឱកាសបានថតកុនជាមួយតារាល្បីៗ បានជួយផ្លាស់ប្តូរជីវភាពគ្រួសាររបស់លោក ឡិក សារួន ដែលធ្លាប់តែក្រីក្រលំបាក ឲ្យមានជីវភាពធូរធារជាងមុនយ៉ាងខ្លាំង។

បើតាមលោក ឡិក សារួន ក្នុងការចូលរួមថតសម្តែង លោកទទួលបានប្រាក់កម្រៃប្រមាណ ៣០០ រៀលក្នុងមួយខែ ដែលចំនួននេះនៅសម័យនោះគឺមានតម្លៃថ្លៃណាស់ ពោលគឺស្មើនឹងមាសមួយជី។

តាមរយៈប្រាក់កម្រៃទទួលបាន គ្រួសារលោក ឡិក សារួន អាចមានលទ្ធភាពសាងសង់ផ្ទះធំជាងមុន ហើយរូបលោកផ្ទាល់ក៏ទទួលបានភាពល្បីល្បាញរហូតដល់បានឱកាសជិះយន្តហោះថែមទៀតផង។

ការរកឃើញខ្សែភាពយន្តឡើងវិញ និងមោទនភាពសម្រាប់លោក ឡិក សារួន

អស់រយៈពេលជាច្រើនទសវត្សរ៍ លោក ឡិក សារួន អះអាងថា មិនដែលបានទស្សនាខ្សែភាពយន្តដែលខ្លួនបានថតសម្តែងនោះទេ។

រហូតដល់ចន្លោះឆ្នាំ ២០១៥ ទៅ ២០១៦ ទើបមានអ្នកស្រាវជ្រាវបរទេសម្នាក់គឺលោក Andy បានស្រាវជ្រាវរកឃើញរឿងនេះឡើងវិញ ហើយកូនរបស់លោកនៅសហរដ្ឋអាមេរិកបានផ្ញើឯកសាររឿងមកឲ្យលោកមើល។

លោក ឡិក សារួន មានភាពភ្ញាក់ផ្អើល និងរំភើបយ៉ាងខ្លាំងដែលបានឃើញសកម្មភាពដ៏រស់រវើក ទឹកមុខញញឹម និងកាយវិការសម្តែងរបស់ខ្លួនកាលពីក្មេង។

លោកចាត់ទុកថា ការដែលរឿងរ៉ាវរបស់លោកត្រូវបានគេស្រាវជ្រាវ និងចងក្រងជាសៀវភៅ គឺជាសំណាងដ៏កម្រមួយ និងជាផ្នែកមួយក្នុងការអភិវឌ្ឍការចងចាំប្រវត្តិសាស្ត្រនៃតំបន់អង្គរ សម្រាប់ទុកឲ្យកូនចៅជំនាន់ក្រោយបានដឹង៕

The post ក្មេងលក់វត្ថុអនុស្សាវរីយ៍នៅប្រាសាទតាព្រហ្មទសវត្សរ៍ឆ្នាំ ៦០ រំលឹកបទពិសោធន៍ថតភាពយន្ត និងឱកាសបានជិះយន្តហោះមិនដឹកស្មានដល់ appeared first on Kampuchea Thmey Daily.

បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ

Dy Bunnara — Wed, 03 Jun 2026 01:59:08 +0000

ចំណុចលេចធ្លោមួយដែលទាក់ទាញទេសចរចូលចិត្តទៅទស្សនា និងថតរូបថ្ងៃលិចនៅប្រាសាទនាគព័ន្ធ ក្រៅពីមានទីធ្លាស្រឡះល្អដែលផ្តល់អារម្មណ៍ស្រស់ស្រាយគឺទីនោះបង្កប់តម្លៃប្រវត្តិសាស្រ្តដែលផ្សារភ្ជាប់អតីតរាជធានីក្នុងរាជ្យព្រះបាទជ័យវរ្ម័នទី៧។ នេះបើតាមលោក ជា សារិទ្ធ បុរាណវិទូ និងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរា។

ប្លែកពីប្រាសាទដទៃទៀតដូចជា អង្គរវត្ត ភ្នំបាខែង ភ្នំក្រោម ឬប្រែរូបជាដើម លោក ជា សារិទ្ធ មន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានបញ្ជាក់ថា ទីតាំងប្រាសាទនាគព័ន្ធទទួលបានការពេញនិយមខ្លាំងសម្រាប់អ្នកទេសចរមកទស្សនាថ្ងៃលិច ខណៈទីតាំងក៏ផ្សារភ្ជាប់ទៅកាន់ប្រវត្តិសាស្ត្រកាលពីជាង ១ ពាន់ឆ្នាំមុន។

«នៅទីនោះប្រៀបបាននឹងគោលនៃរាជធានីមួយ ដែលស្ថិតនៅលើកោះកណ្តាលបារាយណ៍ ដោយមានប្រាសាទតាសោមនៅទិសខាងកើត និងប្រាសាទព្រះខ័ននៅទិសខាងលិច។ នៅពេលដែលយើងទស្សនាថ្ងៃលិច ដោយបែរមុខទៅទិសខាងលិច យើងអាចស្រមៃទៅដល់ប្រាសាទព្រះខ័ន ដែលធ្លាប់ជានគរនិងជារាជវាំងបណ្តោះអាសន្នរបស់ព្រះបាទជ័យវរ្ម័នទី៧»។

លោកបានរំលឹកពីដំណើរប្រវត្តិសាស្ត្រនៅពីក្រោយប្រាសាទព្រះខ័ន ដែលក្រោយព្រះបាទជ័យវរ្ម័នទី ៧ ទទួលបានជ័យជម្នះក្នុងសង្គ្រាម ព្រះអង្គបានគង់នៅនគរជ័យស្រី (ប្រាសាទព្រះខ័ន) ដើម្បីរៀបចំស្តារនិងជួសជុលរាជវាំងនៅអង្គរធំ (យសោធរបុរៈ) ឡើងវិញ បន្ទាប់ពីត្រូវបានពួកចាមវាយបំផ្លាញខ្ទេចខ្ទី។

ក្រោយពីរៀបចំនគរនៅអង្គរធំរួចរាល់ ព្រះអង្គបានយាងចេញពីទីនោះទៅគង់នៅអង្គរធំវិញ ហើយបានកែប្រែប្រាសាទព្រះខ័នឲ្យក្លាយជាប្រាសាទសម្រាប់ឧទ្ទិសថ្វាយដល់ព្រះបិតារបស់ព្រះអង្គ។

បើតាមលោក ជា សារិទ្ធ រចនាសម្ព័ន្ធនៃប្រាសាទទាំងបី (ប្រាសាទនាគព័ន្ធ តាសោម និងព្រះខ័ន) សុទ្ធសឹងតែជាផ្នែកមួយដ៏មានសារៈសំខាន់បំផុតនៃនគរជ័យស្រីក្នុងរាជ្យព្រះបាទព្រះបាទជ័យវរ្ម័នទី ៧៕

The post បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ appeared first on Kampuchea Thmey Daily.

គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥%

Dy Bunnara — Mon, 01 Jun 2026 07:33:03 +0000

ប្រាសាទបុរាណនៅតំបន់អង្គរដែលមានអាយុកាលរាប់ពាន់ឆ្នាំ បានរងការសឹករិចរិលនិងទ្រុឌទ្រោមជារៀងរាល់ថ្ងៃ ដែលតម្រូវឲ្យមានការជួសជុលថែទាំជាប្រចាំ។

យ៉ាងណាមិញ មុនអនុវត្តកិច្ចការជួសជុលក៏ត្រូវឆ្លងកាត់ការពិនិត្យ និងការវាយតម្លៃពីផលប៉ះពាល់យ៉ាងហ្មត់ចត់ពីមន្រ្តីជំនាញរបស់អង្គការយូណេស្កូ។

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យា

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យានៃអាជ្ញាធរជាតិអប្សរាបានគូសបញ្ជាក់ថា រាល់ការជួសជុលប្រាសាទនៅតំបន់រមណីយដ្ឋានអង្គរ ត្រូវតែគោរពយ៉ាងតឹងរ៉ឹងតាមលក្ខខណ្ឌនៃធម្មនុញ្ញអង្គរ។

តាមរយៈគណៈកម្មាធិការសម្របសម្រួលអន្តរជាតិ ដើម្បីការការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ហៅកាត់ថា ICC-Angkor) គោលការណ៍គ្រឹះនៃធម្មនុញ្ញអង្គរ គឺរាល់ការជួសជុលប្រាសាទទាំងអស់ដាច់ខាតត្រូវតែគោរព និងអនុវត្តតាមលក្ខខណ្ឌបច្ចេកទេសដែលបានកំណត់ក្នុងធម្មនុញ្ញនេះ ដោយមិនអាចធ្វើតាមតែអំពើចិត្តបានឡើយ។

«ក្នុងធម្មនុញ្ញអង្គរបានកំណត់ភាគរយច្បាស់លាស់ណាស់ ដោយមិនអនុញ្ញាតិឱ្យប្រើប្រាស់ថ្មថ្មីលើសពី ២៥% នៃការជួសជុលនោះទេ»។ សោម សុផារ៉ាត់ បញ្ជាក់ មុនលោកបន្តថា «បើសិនថ្មចាស់ខូចគុណភាពបាក់បែកខ្លាំងមិនអាចទ្រទ្រង់ទម្ងន់បានតទៅទៀត នោះគេអាចប្រើថ្មថ្មីជំនួស ឬបើថ្មចាស់បាត់បង់រកមិនឃើញ ហើយទីតាំងត្រូវជួសជុលចាំបាច់ត្រូវមានថ្មថ្មីជំនួស ដើម្បីបង្គុំឱ្យទៅជារចនាសម្ព័ន្ធពេញលេញ»។

«បើថ្មចាស់នៅមានគុណភាពអាចប្រើប្រាស់បាន មានសភាពបាក់បែកបន្តិចបន្តួច គេនឹងមិនបោះបង់ចោលទេគឺយកមកតភ្ជាប់ប្រើប្រាស់ឡើងវិញ»។ លោក សោម សុផារ៉ាត់ បន្ថែម។

ពាក់ព័ន្ធការងារជួសជុលប្រាសាទបុរាណ លោក សោម សុផារ៉ាត់ មើលឃើញមានភាពខុសគ្នាស្រឡះពីការសាងសង់សំណង់សម័យទំនើប។

មន្រ្តីជំនាញអាជ្ញាធរជាតិអប្សរារូបនេះ លើកឡើងពីភាពស្មុគស្មាញក្នុងកិច្ចការងារជួសជុលសំណង់ប្រាសាទបុរាណក្នុងតំបន់អង្គរ ដោយសារតែដុំថ្មប្រាសាទនីមួយៗមានទម្ងន់ធ្ងន់ ដែលការជួសជុលតម្រូវឱ្យមានការប្រុងប្រយ័ត្នខ្ពស់ ដោយត្រូវប្រើប្រាស់ឡានស្ទូច ដើម្បីងាយស្រួលក្នុងការផ្លាស់ទី។ ក្នុងករណីទីតាំងចង្អៀតដែលឡានស្ទូចចូលមិនដល់ មន្រ្តីជំនាញត្រូវប្រើបច្ចេកទេសតម្លើងរន្ទា និងកៅលាក់ដើម្បីអូសឬយោងថ្ម។

លោកប្រៀបធៀបការជួសជុលប្រាសាទបុរាណ មិនងាយស្រួលដូចការសាងសង់សំណង់សម័យថ្មីនោះទេ។ ការជួសជុលថ្មបុរាណទាមទារការរើ រៀប និងពង្រឹងគ្រឹះយ៉ាងសម្រិតសម្រាំង។ បន្ថែមពីនេះ ការជួសជុលក៏ត្រូវចំណាយពេលយូរ ដោយសារថ្មប្រាសាទមានល្បាក់មិនស្មើគ្នាមានទាបមានខ្ពស់ ដូច្នេះដើម្បីដាក់ថ្មមួយដុំឲ្យចូលស៊ីគ្នា អ្នកបច្ចេកទេសត្រូវរើរៀបនិងកែតម្រូវជាច្រើនដង ទើបធ្វើឱ្យការជួសជុលប្រាសាទមួយៗត្រូវចំណាយពេលយូររាប់ឆ្នាំ។

បើតាមលោក សោម សុផារ៉ាត់ ថ្មប្រាសាទបុរាណជាទូទៅប្រើប្រាស់សម្ភារៈ ៣ ប្រភេទគឺ ឥដ្ឋ ថ្មភក់ និងថ្មបាយក្រៀម។ ចំពោះរចនាសម្ព័ន្ធប្រាសាទធំៗ គេច្រើនជួបប្រទះថ្ម ២ ប្រភេទ ដែលផ្នែកខាងក្រៅគឺជាថ្មភក់ ដែលមើលឃើញពីខាងក្រៅទៅមានសោភ័ណភាព និងមានក្បូរក្បាច់រចនាស្អាត ប៉ុន្តែផ្នែកខាងក្នុងគឺសុទ្ធតែជាថ្មបាយក្រៀម។

លោកលើកឡើងឧទាហរណ៍ជាក់ស្តែងប្រាសាទអង្គរវត្ត គឺមានការប្រើប្រាស់ថ្មពីរបញ្ចូលគ្នា ដោយសំបកខាងក្រៅជាថ្មភក់ រីឯរចនាសម្ព័ន្ធផ្នែកខាងក្នុង និងគ្រឹះប្រាសាទគឺជាថ្មបាយក្រៀម៕

The post គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥% appeared first on Kampuchea Thmey Daily.

ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ

Dy Bunnara — Mon, 01 Jun 2026 00:35:00 +0000

ខុសពីប្រាសាទមួយចំនួននៅតំបន់អង្គរដូចជាប្រាសាទលលៃ ដែលព្រះមហាក្សត្រកសាងឡើងដើម្បីឧទ្ទិសដល់បុព្វការីជន ប្រាសាទនាគព័ន្ធដែលកសាងនៅកណ្តាលបារាយដូចគ្នា សាងសង់ឡើងមានគោលដៅដើម្បីឧទ្ទិសដល់ព្រះពោធិសត្វនិងជានិមិត្តរូបនៃទន្លេអនោតត្តស្រះ។

លើសពីនេះទៅទៀត ពីបុរាណមកប្រាសាទនេះក៏អ្នកស្រុកអង្គរ មានជំនឿយ៉ាងជ្រាលជ្រៅទាក់ទងការលាងជម្រះបាប និងការព្យាបាលរោគ ដែលបន្តមានឥទ្ធិពលតាំងពីសម័យបុរាណរហូតមកដល់បច្ចុប្បន្ន។

លោក ជា សារិទ្ធ បុរាណវិទូនិងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានឲ្យដឹងថា អ្នកស្រុកនៅក្នុងសហគមន៍ក្នុងតំបន់អង្គរតាំងពីដើមមកតែងតែនាំគ្នាចូលមកបោចវល្លិ និងរើសសំបកឈើនៅប្រាសាទនាគព័ន្ធ ដើម្បីយកទៅផ្សំជាឱសថបុរាណ ខណៈដែលភ្ញៀវទេសចរក៏តែងតែយកដបឬធុងមកដួសទឹកពីស្រះយកទៅលុបមុខ ឬលាងជម្រះរាងកាយដើម្បីបណ្ដេញឧបទ្រពចង្រៃ និងព្យាបាលជំងឺ។

លោក ជា សារិទ្ធ បានអះអាងថា ជំនឿនៃការយកទឹកមកលាងជម្រះបាបនៅប្រាសាទនាគព័ន្ធ ក៏ជាប្រភពដើមនៃទំនៀមទម្លាប់ “ចាក់ទឹកលើករាសី” ឬពិធីស្រោចទឹកដោយព្រះសង្ឃក្នុងពិធីព្រះពុទ្ធសាសនាថេរវាទនាសម័យបច្ចុប្បន្ននេះដែរ នៅពេលដែលមនុស្សមានរាសីធ្លាក់ចុះ។

ពាក់ព័ន្ធប្រាសាទនាគព័ន្ធនេះដែរ លោកលើកឡើងពីជំនឿដ៏មុតមាំមួយទៀតគឺការសុំទឹកភ្លៀង នៅពេលស្រុកទេសជួបប្រទះគ្រោះរាំងស្ងួតខុសពីធម្មតា ដែលអ្នកស្រុកតែងតែប្រមូលផ្ដុំគ្នាធ្វើពិធីតាមបែបជំនឿបែបជីវចលដោយមានការលេងភ្លេង និងសូត្រមន្ត។

នៅក្នុងពិធីនោះ គេដងទឹកពីស្រះយកមកស្រោចឬបាចដាក់គ្នា និងចាក់ទឹកលើទរបង្ហូរទៅស្រះចេញតាមមាត់ដំរី មាត់មនុស្ស មាត់សិង្ហ និងសេះ ដើម្បីបួងសួងសុំទឹកភ្លៀង ហើយជាទូទៅភ្លៀងតែងតែធ្លាក់មកមែន ក្នុងរយៈពេលមិនយូរប៉ុន្មានក្រោយពីបញ្ចប់ពិធីរួច៕

The post ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ appeared first on Kampuchea Thmey Daily.

រមណីយដ្ឋានអង្គរ Archives - Kampuchea Thmey Daily

ណែនាំ​ឲ្យ​ស្គាល់​វត្ត​បុរាណ​ចំនួន ៣៥ ស្ថិត​នៅ​ជុំ​វិញបរិវេណតំបន់​រមណីយដ្ឋាន​អង្គរ​

គោលការណ៍​ធម្មនុញ្ញ​អង្គរ ការ​ជួសជុល​ប្រាសាទ​បុរាណមិន​ឲ្យ​ប្រើ​ថ្ម​ថ្មី​លើ​សពី ២៥%​

ប្រាសាទ​នាគព័ន្ធ​មាន​ប្រវត្តិ និង​ជំនឿ​​ទាក់ទង​ការ​លាង​បាប និង​កន្លែង​​ព្យាបាល​រោគ

ណែនាំឲ្យស្គាល់វត្តបុរាណចំនួន ៣៥ ស្ថិតនៅជុំវិញបរិវេណតំបន់រមណីយដ្ឋានអង្គរ

គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥%

ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ