លោកប្រធានាធិបតី Ferdinand Marcos Jr Archives - Kampuchea Thmey Daily

ប្រធានអាស៊ាន ហ្វីលីពីន បង្ហាញប្រសិទ្ធភាពក្នុងការសម្របសម្រួលឆ្ពោះទៅបញ្ចប់ជម្លោះថៃនិងកម្ពុជា

Rann Reuy — Fri, 08 May 2026 12:30:00 +0000

ការសម្របសម្រួលលើកដំបូងរបស់ប្រធានាធិបតីហ្វីលីពីន Ferdinand Marcos Jr ក្នងនាមប្រធានអាស៊ានដើម្បីរកដំណោះស្រាយក្នុងជម្លោះព្រំដែនរវាងថៃនិងកម្ពុជា បានបង្ហាញឲ្យឃើញនូវប្រសិទ្ធភាព ឆ្ពោះទៅកសាងសន្តិភាពតាមព្រំដែន ការស្តារទំនុកចិត្តគ្នាឡើងវិញ ស្របពេលដែលប្រមុខរដ្ឋាភិបាលកម្ពុជានិងថៃ បានបង្ហាញនូវសុទិដ្ឋិនិយមដូចគ្នាថា «សង្គ្រាមមិនធ្វើឲ្យភាគីណាមួយឈ្នះនោះទេ»។

ជំនួបត្រីភាគីរវាង កម្ពុជា ហ្វីលីពីន និងថៃ នៅទីក្រុងឆ្នេរសមុទ្រ សេប៊ូ ភាគខាងត្បូងប្រទេសហ្វីលីពីន ជាផ្នែកនៃកិច្ចប្រជុំកំពូលអាស៊ាន ដែលហ្វីលីពីនក្នុងនាមជាប្រធានអាស៊ានប្តូរវេនខ្នះខ្នែង ដើម្បីធ្វើឲ្យយ៉ាងរកច្រកចេញពីជម្លោះក្នុងតំបន់អាស៊ាន ដែលហ៊ុំព័ន្ធដោយវិបត្តិនៃជម្លោះរបស់មហាអំណាចស្រាប់ទៅហើយ។

ប្រធានាធិបតីហ្វីលីពីន Ferdinand Marcos Jr បានថ្លែងនៅក្រោយជំនួបត្រីភាគីនោះថា ប្រទេសហ្វីលីពីន ដាក់ចេញរបៀបសន្ទនានេះ ដោយការគោរពយ៉ាងខ្ពង់ខ្ពស់បំផុតចំពោះប្រទេសទាំងពីរ (កម្ពុជានិងថៃ) ដោយដឹកនាំដោយគោលការណ៍ជាមូលដ្ឋានរបស់អាស៊ាននៃការគោរពអធិបតេយ្យភាព ការមិនជ្រៀតជ្រែក និងការដោះស្រាយជម្លោះដោយសន្តិវិធី ដូចដែលបានចែងនៅក្នុងសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍។

លោក Marcos Jr បានលើកឡើងដែរថា៖«មានការពិភាក្សាដោយស្មោះត្រង់ជាច្រើនអំពីស្ថានភាពព្រំដែនរវាងកម្ពុជា និងថៃ។ ពួកគេទាំងពីរបានបញ្ជាក់ជាថ្មីអំពីសារៈសំខាន់នៃការរក្សាការទំនាក់ទំនងដោយបើកចំហ ការអនុវត្តការអត់ធ្មត់ ការជៀសវាងសកម្មភាពដែលអាចបង្កើនភាពតានតឹង និងការបន្តកិច្ចខិតខំប្រឹងប្រែងឆ្ពោះទៅរកការសន្ទនាដោយសន្តិវិធី និងការចូលរួមប្រកបដោយស្ថាបនា»។

ចាប់តាំងពីជម្លោះបានផ្ទុះឡើងចំនួនពីរលើកកាលខែកក្កដា និង ខែធ្នូ ឆ្នាំ២០២៥ នេះជាលើកទី១ ដែលថ្នាក់ដឹកនាំនៃប្រទេសថៃនិងកម្ពុជា បានបង្ហាញគោលជំហរស្របគ្នាច្រើនឆ្អោះទៅរកការផ្សះផ្សាស្តារសន្តិភាព និងទំនុកចិត្តគ្នាឡើងវិញ បន្ទាប់ពីប្រទេសថៃមានរដ្ឋាភិបាលកើតចេញពីការបោះឆ្នោត និង មិនមានការប្រជែងពីក្រុមយោធា ដូចរដ្ឋាភិបាលអាណត្តិមុន។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងក្នុងសន្និសីទសារព័ត៌មាន ក្រោយជំនួបត្រីភាគីថា កម្ពុជាប្តេជ្ញាចិត្តយ៉ាងមុតមាំចំពោះការដោះស្រាយជម្លោះដោយសន្តិវិធីដោយផ្អែកលើច្បាប់អន្តរជាតិ និងកិច្ចព្រមព្រៀងដែលមានស្រាប់ រួមទាំងការប្តេជ្ញាចិត្តដែលបានបញ្ជាក់នៅក្នុងសេចក្តីប្រកាសរួមទីក្រុងគូឡាឡាំពួរ ថ្ងៃទី២៦ ខែតុលា ឆ្នាំ២០២៥ និងសេចក្តីថ្លែងការណ៍រួម ថ្ងៃទី២៧ ខែធ្នូ ឆ្នាំ ២០២៥។ កម្ពុជាត្រៀមខ្លួនរួចជាស្រេចដើម្បីឈានទៅមុខដោយស្ថាបនា រហ័ស និងដោយសុច្ឆន្ទៈ។

នាយករដ្ឋមន្ត្រីថៃ លោក អានុទីន ឆានវីរៈគុល បានថ្លែងទទួលស្គាល់នាពេលនោះដែរថា ជម្លោះនាំមកនូវការខាតបង់ និងទុក្ខលំបាកវេទនាដល់ភាគីទាំងសងខាង និង គូសបញ្ជាក់ពីតម្លៃនៃសន្តិភាព។

លោក អានុទីន បានលើកឡើងថា ការពីភាក្សាបញ្ចាក់នូវជំហានដ៏សំខាន់ឆ្ពោះទៅបង្កើតបរិយាកាសស្ថាបនាដល់សន្តិភាព និងកិច្ចសហប្រតិបត្តិការក្នុងតំបន់៕

រ៉ាន់ រើយ

The post ប្រធានអាស៊ាន ហ្វីលីពីន បង្ហាញប្រសិទ្ធភាពក្នុងការសម្របសម្រួលឆ្ពោះទៅបញ្ចប់ជម្លោះថៃនិងកម្ពុជា appeared first on Kampuchea Thmey Daily.

ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន

Rann Reuy — Sun, 28 Dec 2025 05:41:04 +0000

ការឈានទៅដល់ចំណុចត្រូវរ៉ូវគ្នារវាងកម្ពុជានិងថៃនៅមុនដំណាច់ឆ្នាំ២០២៥ អាចជាពរជ័យមួយសម្រាប់ប្រទេសហ្វីលីពីនដែលនឹងក្លាយជាប្រធានអាស៊ាននៅឆ្នាំ២០២៦។

លោក អាន់វ៉ា អ៊ីប្រាហ៊ីមប្រគល់ញញូរក្នុងឋានៈប្រធានអាស៊ានទៅឲ្យប្រធានាធិបតីហ្វីលីពីន។ FB/anwar

លោក អាន់វ៉ា អ៊ីប្រាហ៊ីម ក្នុងឋានៈជាប្រធានអាស៊ាននៅក្នុងឆ្នាំ២០២៥ ត្រូវបានគេមើលឃើញថា បានប្រឹងប្រែងយ៉ាងខ្លាំងក្នុងមធ្យោបាយការទូតដើម្បីសម្របសម្រួលក្នុងជម្លោះថៃនិងកម្ពុជាដែលបានផ្ទុះអាវុធផ្អើលពិភពលោកនៅថ្ងៃទី២៤ខែតុលាឆ្នាំ២០២៥ ហើយ តាមរយៈការផ្សះផ្សារបស់លោក អាន់វ៉ា ដោយមានការជួយគាំទ្រពីសំណាក់សហរដ្ឋអាមេរិកនិងចិន។

តាមរយៈការខិតខំប្រឹងប្រែងនោះ បទឈប់បាញ់លើកទី១ ត្រូវបានរកឃើញនៅថ្ងៃទី២៨ខែកក្កដា និង ការខិតខំចរចាបន្តបន្ទាប់ទៀតរបស់ប្រធានអាស៊ាន ភាគីជម្លោះបានសម្រេចបានកិច្ចព្រមព្រៀងសន្តិភាពផ្លូវការចុះថ្ងៃទី២៦ខែតុលាឆ្នាំ២០២៥ ដែលចុះហត្ថលេខាក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ។

ប៉ុន្តែកិច្ចព្រមព្រៀងដ៏ផុយស្រួយនោះ បានធ្លុះធ្លាយទៅវិញដោយសារតែថៃប្រកាសលុបចោលជាឯកតោភាគី និង បង្កការផ្ទុះអាវុធជាថ្មីនៅថ្ងៃទី៧ខែធ្នូឆ្នាំ២០២៥ ដែលធ្វើឲ្យអន្តរជាតិប្រឹងប្រែងជាថ្មីដើម្បីផ្សះផ្សាជម្លោះនេះអស់រយៈពេល២១ថ្ងៃ ទើបកិច្ចព្រមព្រៀងថ្មីមួយទៀតរកឃើញ ដោយចាប់ផ្តើមអនុវត្តពីថ្ងៃទី២៧ខែធ្នូ និងមានតែរយៈពេលប៉ុន្មានថ្ងៃប៉ុណ្ណោះ ដែលប្រធានអាស៊ានត្រូវប្តូរ។

លោក អាន់វ៉ា អ៊ីប្រាហ៊ីម ដែលប្រឹងប្រែងក្នុងដំណាក់កាលចុងក្រោយក្នុងឋានៈជាប្រធានអាស៊ាននេះ បានបង្ហាញការស្វាគមន៍ចំពោះបទឈប់បាញ់ថ្មីដែលកម្ពុជានិងថៃសម្រេចបាន ដែលបទឈប់បាញ់នេះនឹងបញ្ឈប់រាល់ការប្រយុទ្ធគ្នា។

ទោះបីជាផុតតួនាទីជាប្រធានអាស៊ាននៅពាក់កណ្តាលរាត្រីថ្ងៃទី៣១ខែធ្នូឈានចូលថ្ងៃទី១ខែមករាឆ្នាំ២០២៦ លោក អាន់វ៉ា បានបង្ហាញការគាំទ្រគ្រប់បែបយ៉ាងដល់ប្រធានអាស៊ានថ្មី គឺប្រទេសហ្វីលីពីន។

លោក អាន់វ៉ា សរសេររៀបរាប់ថា៖«យើងនឹងគាំទ្ររាល់កិច្ចខិតខំប្រឹងប្រែងដើម្បីធានាថាកិច្ចការទាំងនេះត្រូវបានផ្តល់កិត្តិយស ហើយកិត្យានុភាព និងភាពជឿជាក់របស់អាស៊ានក្នុងនាមជាតំបន់សន្តិភាពត្រូវបានរក្សាទុក»។

រដ្ឋាភិបាលហ្វីលីពីនមិនទាន់បង្ហាញជំហរអ្វីមួយពាក់ព័ន្ធនឹងបទឈប់បាញ់ចុងក្រោយរវាងកម្ពុជានិងប្រទេសថៃចុងក្រោយនេះទេ ប៉ុន្តែប្រធានាធិបតីហ្វីលីពីន លោក Ferdinand R. Marcos Jr. បាននិយាយកាលពីខែកញ្ញាឆ្នាំ២០២៥ ក្នុងពេលដែលប្រទេសកម្ពុជានិងថៃអនុវត្តបទឈប់បាញ់លើកដំបូង ថា ប្រទេសហ្វីលីពីននឹងដាក់ពង្រាយតំណាងក្រុមអ្នកសង្កេតការណ៍បណ្តោះអាសន្នដែលត្រូវបានបង្កើតឡើងដើម្បីត្រួតពិនិត្យការអនុវត្តបទឈប់បាញ់នៅក្នុងតំបន់ព្រំដែនកម្ពុជា-ថៃ។

ក្នុងការជ្រុមជ្រែងប្រទេសម៉ាឡេស៊ីក្នុងការអនុវត្តការតាមដានការអនុវត្តបទឈប់បាញ់ ហ្វីលីពីនបានបញ្ជូនបុគ្គលិកយោធាដើម្បីចូលរួមជាមួយក្រុមអង្កេតការណ៍អាស៊ាន ដឹកនាំដោយម៉ាឡេស៊ី និងបង្ហាញការប្តេជ្ញាចិត្តចំពោះការអនុវត្តបទឈប់បាញ់នោះឲ្យមានប្រសិទ្ធភាព។

សារព័ត៌មានហ្វីលីពីន Philippine Daily Inquirer បានស្រង់សម្តី លោក Marcos ដូចបាននិយាយកាលពីខែកញ្ញាថា៖«យើងបន្តនិយាយថា ដរាបណាវាទាក់ទងនឹងហ្វីលីពីន និងអាស៊ាន [សមាគមប្រជាជាតិអាស៊ីអាគ្នេយ៍] យើងនៅទីនេះដើម្បីជួយ។ ហើយចាប់តាំងពីប្រទេសទាំងពីរជាមិត្តរបស់យើង យើងជាមិត្តនឹងកម្ពុជា និងថៃ យើងទាំងអស់គ្នាជាសមាជិកអាស៊ាន យើងមិនចង់ឃើញរដ្ឋសមាជិកអាស៊ានជួបប្រទះបញ្ហានោះទេ»។

លោក Marcos បានបន្ថែមថា៖«នោះហើយជាមូលហេតុដែលខ្ញុំតែងតែពន្យល់ថាហ្វីលីពីនត្រៀមខ្លួនជាស្រេចដើម្បីដើរតួនាទីណាមួយដែលនឹងជួយពង្រឹងបទឈប់បាញ់»។

រហូតមកដល់ពេលនេះ ប្រទេសមហាអំណាចនានានិងស្ថាប័នអន្តរជាតិ កំពុងតាមដានយ៉ាងដិតដល់ចំពោះការអនុវត្តបទឈប់បាញ់រវាងកម្ពុជានិងថៃ ដែលបានចូលជាធរមានអស់រយៈពេលជាង២៤ម៉ោង ក្នុងកាលកំណត់៧២ម៉ោង មុនឈានទៅអនុវត្តបទកិច្ចព្រមព្រៀងសន្តិភាពដែលបានចុះហត្ថលេខានៅទីក្រុងកូឡាឡាំពួកាលពីចុងខែតុលា២០២៥៕

រ៉ាន់ រើយ

រូបភាពទទួលញញួរប្រធានអាស៊ានរបស់ប្រធានាធិបតីហ្វីលីពីន។

The post ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន appeared first on Kampuchea Thmey Daily.

ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា

Ngoeul Narath — Tue, 02 Sep 2025 04:19:11 +0000

ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា។ នេះបើតាមការចេញផ្សាយរបស់សារព័ត៌មានរបស់ហ្វីលីពីន ប៉ុន្តែមិនបានលម្អិតអំពីខ្លឹមសារនៃគម្រោងដំណើរទស្សនកិច្ចនេះឡើយ។

ចំណែកភាគីក្រសួងការបរទេស និងសហប្រតិបត្តិការអន្តរជាតិរបស់ភាគីកម្ពុជា គិតមកទល់ពេលនេះ ក៏មិនទាន់ចេញសេចក្ដីប្រកាសព័ត៌មានលម្អិតណាមួយ អំពីដំណើរទស្សនកិច្ចផ្លូវរដ្ឋនេះដូចគ្នា។

គូរគូសបញ្ជាក់ដែរ កន្លងមក នៅក្នុងដំណើរទស្សនកិច្ចផ្លូវរដ្ឋរបស់បណ្ដាមេដឹកនាំបរទេសដែលបំពេញទស្សនកិច្ចនៅកម្ពុជា គឺមេដឹកនាំទាំងនោះ បានអញ្ជើញបំពាក់កម្រងផ្កានៅវិមានឯករាជ្យ និងគោរពព្រះវិញ្ញាណក្ខន្ធព្រះបរមរតនកោដ្ឋ ចូលក្រាបបង្គំគាល់ព្រះកុរណា ព្រះមហាក្សត្រ នៃព្រះរាជាណាចក្រកម្ពុជា ឬប្រមុខរដ្ឋស្ដីទី ប្រជុំចង្អៀត ជជែកពិភាក្សាការងារទ្វេភាគី ជាមួយនាយករដ្ឋមន្ត្រីកម្ពុជា ចូលជួបសម្ដែងការគួរសម និងពិភាក្សាការងារជាមួយប្រធានរដ្ឋសភា និងជាមួយប្រធានព្រឹទ្ធសភាកម្ពុជា។

សូមរំលឹកថាកាលពីថ្ងៃទី១០ និង១១ ខែកុម្ភៈ ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ធ្លាប់បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញបំពេញទស្សនកិច្ចផ្លូវការនៅប្រទេសហ្វីលីពីនម្ដងរួចមកហើយ ដោយសម្រេចបានលទ្ធផលផ្លែផ្កាត្រចះត្រចង់ផ្ដល់ជាប្រយោជន៍រួមដល់ប្រជាជនកម្ពុជា-ហ្វីលីពីន។ កាលណោះ កម្ពុជា និងហ្វីលីពីន បានចុះហត្ថលេខាលើអនុស្សារណៈយោគយល់គ្នាលើវិស័យចំនួន៨ ដូចជាពន្ធដា ពាណិជ្ជកម្ម វិនិយោគ វប្បធម៌ កសិកម្ម ការបណ្ដុះបណ្ដាលវិជ្ជាជីវៈ និងបច្ចេកទេស ទេសចរណ៍ និងព័ត៌មានបច្ចេកវិទ្យា។

ដោយឡែកនៅក្នុងដំណើរទស្សនកិច្ចរបស់ប្រធានាធិបតីហ្វីលីពីននៅកម្ពុជាឆាប់ៗនេះ គេរំពឹងថាឯកសារសំខាន់ៗមួយចំនួននឹងត្រូវបានចុះហត្ថលេខា ក្នុងនោះមានដូចជា គម្រោងទូទាត់ឆ្លងដែនទ្វេភាគី តាមឃ្យូអរកូត(QR Code) ដើម្បីជួយសម្រួលដល់ការដោះដូរពាណិជ្ជកម្ម និងទេសចរណ៍ រវាងប្រជាជននៃកម្ពុជា-ហ្វីលីពីន និងការចេញអង្ករពីកម្ពុជាទៅកាន់ទីផ្សារហ្វីលីពីនជាដើម៕

ដោយ៖ ង៉ិល ណារ៉ាត់

The post ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា appeared first on Kampuchea Thmey Daily.

តើ Rodrigo Duterte ជាឧក្រិដ្ឋជន ឬជាវីរបុរសរបស់ប្រជាជនហ្វីលីពីន?

Rann Reuy — Fri, 21 Mar 2025 01:13:55 +0000

ការចាប់ខ្លួន ការបញ្ជូនខ្លួនរបស់អតីតប្រធានាធិបតីហ្វីលីពីន លោក Rodrigo Duterte ដែលបានឡើងកាន់អង្គជំនំជម្រះមុនសវនាការផ្លូវការនៅតុលាការឧក្រិដ្ឋកម្មអន្តរជាតិ (ICC) កំពុងត្រូវបានចោទសួរយ៉ាងទូលំទូលាយក្នុងចំណោមប្រជាជនហ្វីលីពីនទូទៅ ក៏ដូចជាអ្នកនយោបាយហ្វីលីពីនដែលតាមដានរឿងនេះយ៉ាងយកចិត្តទុកដាក់។

ខណៈការចាប់ខ្លួនលោក Duterte មានរយៈពេល១០ថ្ងៃមកដល់ថ្ងៃទី២១ខែមីនានេះ ដំណើរការផ្លូវច្បាប់ប្រឆាំងលោក បានធ្វើឡើងនៅក្របខណ្ឌស្ថាប័នកំពូលរបស់ពិភពលោកមួយនេះ ហើយចលនានៃកាតវ៉ាទាមទាររបស់អ្នកគាំទ្រលោកក៏បានកក្រើកឡើងនៅក្នុងប្រទេស ស្របពេលដែលអ្នកនយោបាយនិងអ្នកច្បាប់បានជជែកគ្នាយ៉ាងទូលំទូលាយក្នុងរឿងនេះ។

ដើម្បីដឹងច្បាស់និងលម្អិតអំពីដំណើរការនីតិវិធីដែលលោក Duterte ដែលជាមេដឹកនាំអាស៊ីដំបូងបំផុតប្រឈមការចោទប្រកាន់ឧក្រិដ្ឋកម្មប្រឆាំងមនុស្សជាតិ កម្ពុជាថ្មីសូមលើកយកនូវដំណើរការចាប់ខ្លួនដ៏ចម្រូងចម្រាស ដោយមតិខ្លះយល់ថា លោក គឺជាវីរជនបង្រ្កាបគ្រឿងញៀន ខណៈទិដ្ឋភាពច្បាប់លោក គឺជាឧក្រិដ្ឋជនទៅវិញ។

លោក Duterte បានបង្ហាញខ្លួនចុងក្រោយ នៅពេលចូលរួមដំណើរការសាកសួរលើកដំបូងមុនសវនាការរបស់តុលាការឧក្រិដ្ឋកម្មអន្តរជាតិ(ICC) តាមរយៈតំណភ្ជាប់វីដេអូ នៅរសៀលថ្ងៃសុក្រទី១៤ ខែមីនានេះ (ម៉ោងនៅទីក្រុងឡាអេ ប្រទេសហូឡង់)។ ចាប់តាំងពីលោក Duterte ត្រូវបានចាប់ខ្លួននៅថ្ងៃទី១១ខែមីនាដល់ដំណើរការជំនុំជម្រះក្តីនៅ ថ្ងៃ ទី១៤ខែមីនា ដំណើរការនីតិវិធីតុលាការទាំងមូល មានរយៈពេលត្រឹមតែ៤ថ្ងៃដ៏ចម្រូវងចម្រាសនិងតក់ក្រហល់។

តើកត្តាដែលគ្មានអ្នកដឹងអ្វីខ្លះ ត្រូវបានលាក់នៅពីក្រោយនីតិវិធីអនុវត្តច្បាប់ «ប្រកបដោយប្រសិទ្ធភាព» បែបនេះ ខណៈការចោទប្រកាន់រូបលោកបានកើតមានជាយូរមកហើយនោះ?

មានការកត់សម្គាល់ឃើញថា ការចាប់ខ្លួននិងដំណើរការជំនុំជម្រះក្តីលោក Rodrigo Duterte លើកនេះ មានការកំណត់ពេលវេលាបន្តកន្ទុយគ្នាជាប់រដឹកដែលខុសពីប្រក្រតី។ នៅថ្ងៃទី១១ខែមីនា នៅពេលដែលលោក Duterte បានវិលត្រឡប់ពីទីក្រុងហុងកុងទៅដល់ទីក្រុងម៉ានីលវិល លោក Duterte ត្រូវបានប៉ូលីសហ្វីលីពីនឃាត់ខ្លួន ហើយបញ្ជូនទៅប្រទេសហូឡង់នៅយប់ថ្ងៃដដែរ។ ជើងយន្តហោះដឹកលោក Duterte បានទៅដល់ទីក្រុងឡាអេ ដែលមានចម្ងាយជាង១ម៉ឺនគីឡូម៉ែត្រ នៅថ្ងៃទី១២ខែមីនាប។ បន្ទាប់ពីពិនិត្យសុខភាពរួចរាល់នៅថ្ងៃទី១៣ខែមីនា ចៅក្រមតុលាការ ICC ក៏សម្រេចឃុំខ្លួនលោកនៅមន្ទីរឃុំឃាំងរបស់តុលាការឧក្រិដ្ឋកម្ម ICC។ តុលាការនេះក៏ចាប់ផ្តើមដំណើរការជំនុំជម្រះក្តី នៅថ្ងៃទី១៤ខែមីនា។

មានការកត់សម្គាល់ដែរថា ប្រសិទ្ធភាពរបស់តុលាការឧក្រិដ្ឋកម្មអន្តរជាតិជាធម្មតាគឺមិនខ្ពស់ទេ ប៉ុន្តែលើកនេះវាលឿនរហ័សពេក ដែលធ្វើឲ្យមានការសង្ស័យថា មានកម្លាំងជំរុញជាពិសេសនៅពីក្រោយ។

តុលាការឧក្រិដ្ឋកម្មអន្តរជាតិបានចោទប្រកាន់លោក Duterte ពីបទឧក្រិដ្ឋកម្មប្រឆាំងមនុស្សជាតិ មើលទៅបទចោទប្រកាន់នេះហាក់ដូចជាមានស្ថានទម្ងន់ទោស ប៉ុន្តែ តាមពិតទៅគឺពាក់ព័ន្ធយ៉ាងជិតស្និទ្ធទៅនឹងយុទ្ធនាការប្រឆាំងគ្រឿងញៀនរបស់លោក Duterte ពេលកំពុងកាន់តំណែង។ តាមដីកាចោទប្រកាន់របស់តុលាការ បទល្មើសនានាត្រូវបានគេចាប់ផ្តើមរាប់តាំងពីថ្ងៃទី១វិច្ឆិកា២០១១ ដល់ឆ្នាំ២០១៩ មុនពេលប្រទេសហ្វីលីពីនដកខ្លួនផុតពីសមាជិកហត្ថលេខីរបស់តុលាការ ICC។

មុនពេលលោក Duterte ចូលកាន់តំណែង ចំនួនអ្នកប្រើប្រាស់គ្រឿងញៀននៅក្នុងប្រទេសហ្វីលីពីនបានកើនឡើងដល់៤លាននាក់ ដែលបញ្ហាគ្រឿងញៀនប្រៀបដូចជាទឹកជំនន់បាក់ទំនប់ បង្កការគំរាមកំហែងយ៉ាងធ្ងន់ធ្ងរដល់សុវត្ថិភាពសាធារណៈ និងស្ថិរភាពសង្គម។

បន្ទាប់ពីលោក Duterte ចាប់ផ្តើមយុទ្ធនាការប្រឆាំងគ្រឿងញៀនដោយកណ្តាប់ដៃដែក ចំនួនអ្នកប្រើប្រាស់គ្រឿងញៀនបានធ្លាក់ចុះយ៉ាងខ្លាំងមកនៅត្រឹម ១,៦លាននាក់ ហើយសន្តិសុខសង្គមមានភាពប្រសើរឡើងគួរឱ្យកត់សម្គាល់ ហើយលោក Duterte ក៏បានក្លាយជាវីរបុរសប្រយុទ្ធប្រឆាំងគ្រឿងញៀនក្នុងបេះដូងប្រជាជនហ្វីលីពីន។

ប៉ុន្តែ ឥឡូវនេះ តុលាការឧក្រិដ្ឋកម្មអន្តរជាតិ បានចាត់ទុកលោក Duterte ជាឧក្រិដ្ឋជន ដោយសារការបាញ់សម្លាប់អ្នកជួញដូរគ្រឿងញៀនមួយចំនួនក្នុងប្រតិបត្តិការប្រឆាំងគ្រឿងញៀន ចំពោះស្តង់ដារវិនិច្ឆ័យនេះ គឺពិតជាពិបាកនឹងឱ្យមហាជនយល់ស្របតាម។

យោងតាមមាត្រា១២(១) នៃ《លក្ខន្តិកៈទីក្រុងរ៉ូម ស្តីពីតុលាការព្រហ្មទណ្ឌអន្តរជាតិ》 «ប្រទេសមួយដែលក្លាយជាភាគី នៃលក្ខន្តិកៈនេះ» គឺជាលក្ខខណ្ឌចាំបាច់ដែលត្រូវការជាមុន សម្រាប់ការអនុវត្តយុត្តាធិការរបស់ស្ថាប័ននេះ។ ប៉ុន្តែ ប្រទេសហ្វីលីពីន បានដកខ្លួនចេញពីតុលាការឧក្រិដ្ឋកម្មអន្តរជាតិតាំងពីឆ្នាំ២០១៩មកម្ល៉េះ បើនិយាយតាមហេតុផលផ្លូវច្បាប់ តុលាការឧក្រិដ្ឋកម្មអន្តរជាតិ គឺលែងមានយុត្តាធិការលើប្រទេសហ្វីលីពីនទៀតហើយ កាន់តែមិនមានសិទ្ធិអំណាចក្នុងការចាប់ខ្លួន និងកាត់ទោសលោក Duterte។

អ្នកវិភាគខ្លះយល់ឃើញថា ប្រទេសហ្វីលីពីន នឹងរៀបចំការបោះឆ្នោតពាក់កណ្តាលអាណត្តិនៅខែឧសភា ឆ្នាំ២០២៥ខាងមុខនេះ ហើយក្រុមគ្រួសាររបស់អតីតប្រធានាធិបតី លោក Duterte និងប្រធានាធិបតីបច្ចុប្បន្ន លោក ម៉ាកូស(Marcos) គឺជាកម្លាំងនយោបាយដ៏ធំបំផុតពីរនៅក្នុងប្រទេសហ្វីលីពីន។ នេះគឺ ជាមូលហេតុ ដែល រដ្ឋាភិបាល លោក Marcos ប្រើប្រាស់ តុលាការឧក្រិដ្ឋកម្មអន្តរជាតិធ្វើទុក្ខបុកម្នេញ លោក Duterte ដែលជាគូប្រជែងនយោបាយ ក្នុង គោលបំណងនយោបាយ។

ទោះបីជាលោកប្រធានាធិបតី Marcos បានសង្កត់ធ្ងន់ថា ការចាប់ខ្លួននេះគឺធ្វើឡើងតាមនីតិវិធីច្បាប់ ប៉ុន្តែមានប្រតិកម្មយ៉ាងខ្លាំងក្លានៅក្នុងប្រទេសហ្វីលីពីនទាក់ទងនឹងបញ្ហានេះ។ គេហទំព័រ ABS-CBN របស់ហ្វីលីពីនបានរាយការណ៍នៅថ្ងៃទី១៧ខែមីនាថា លោកស្រី Imee Marcos ប្រធានគណៈកម្មាធិការទំនាក់ទំនងការបរទេស នៃព្រឹទ្ធសភាហ្វីលីពីន បានចេញសេចក្តីថ្លែងការណ៍នៅថ្ងៃដដែលថា «ខ្ញុំកំពុងអំពាវនាវឱ្យមានការស៊ើបអង្កេតជាបន្ទាន់ ចំពោះការចាប់ខ្លួនអតីតប្រធានាធិបតី លោក Duterte ដែលជាបញ្ហានាំឱ្យមានការបែកបាក់ប្រទេសយ៉ាងធ្ងន់ធ្ងរ»។

ក្រុមអ្នកតវ៉ាគាំទ្រអតីតប្រធានាធិបតីហ្វីលីពីន Rodrigo Duterte ទាមទារឲ្យដោះលែង។ REUTERS/Lisa Marie David

នៅល្ងាចថ្ងៃទី១១ខែមីនា អនុប្រធានាធិបតីហ្វីលីពីន លោកស្រី សារ៉ា ឌូតាតេ (Sara Duterte) ដែលជាកូនស្រី លោក Duterte បានចេញសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គមថា រដ្ឋាភិបាលហ្វីលីពីនបច្ចុប្បន្ន បានចាប់ខ្លួន ឳពុកលោកស្រី គឺអតីតប្រធានាធិបតីហ្វីលីពីន លោក Duterte ដោយផ្អែកលើដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ ទង្វើនេះគឺជាការប្រមាថជាសាធារណៈចំពោះអធិបតេយ្យភាពប្រទេសហ្វីលីពីន។

យោងតាមសេចក្តីរបាយការណ៍របស់ប្រព័ន្ធផ្សព្វផ្សាយហ្វីលីពីន អ្នកគាំទ្រលោក Duterte បានធ្វើបាតុកម្មនៅក្នុងប្រទេសហ្វីលីពីននៅថ្ងៃទី១៥និងថ្ងៃទី១៦ ដើម្បីទាមទារឱ្យធ្វើមាតុភូមិនិវត្តន៍លោក Duterte មកហ្វីលីពីនវីញ។ ប្រព័ន្ធផ្សព្វផ្សាយក្នុងស្រុកបានប៉ាន់ប្រមាណថា ត្រឹមតែនៅទីក្រុង Davaoមួយ ជាទីក្រុងដែលលោក Duterte ធ្លាប់ធ្វើជាអភិបាលក្រុង គឺមានមនុស្សប្រហែល៣ម៉ឺននាក់បានចូលរួមក្នុងការហែក្បួនគាំទ្រលោក Duterte កាលពីថ្ងៃទី១៦ខែមីនានេះ។

វាពិតជាពិបាកនឹងនិយាយឱ្យបានច្បាស់លាស់អីពីល្បែងនយោបាយដ៏ស្មុគស្មាញ ដែលបានឆ្លុះបញ្ចាំងនៅពីក្រោយ នៃការចាប់ខ្លួន និងដំណើរការជំនុំជម្រះក្តីលោក Duterte ក្នុងរយៈពេលត្រឹមតែ៤ថ្ងៃ។ ប៉ុន្តែដំណើរការនីតិវិធីច្បាប់អន្តរជាតិក៏ហាក់បង្ហាញច្បាស់ថា អតីតប្រធានាធិបតី Dutere បានរំលោភអំណាចដោយការបញ្ជាឲ្យសម្លាប់ជនរងគ្រោះដោយគ្មានការជម្រះក្តីត្រឹមត្រូវ ដែលជាហេតុជាប់បន្ទុក។

យ៉ាងណាក៏ដោយ មានការបួងសួងសូមឲ្យុ លោក Duterte ដែលជាមេដឹកនាំអាស៊ីនិងពីអាស៊ីអាគ្នេយ៍ដំបូងគេ អាចទទួលបានការជំនុំជម្រះដោយយុត្តិធម៌ ក្នុងការកសាងសណ្តាប់ធ្នាប់ នៃតុលាការអន្តរជាតិកាន់តែស្មើភាព និងយុត្តិធម៌៕

The post តើ Rodrigo Duterte ជាឧក្រិដ្ឋជន ឬជាវីរបុរសរបស់ប្រជាជនហ្វីលីពីន? appeared first on Kampuchea Thmey Daily.

ប្រធានាធិបតីហ្វីលីពីន ចេញមកដាក់បន្ទុកលើក លោក Duterte

Rann Reuy — Sun, 16 Mar 2025 02:00:32 +0000

ស្របពេលដែលអតីតប្រធានាធិបតី Rodrigo Duterte កំពុងជាប់ឃុំក្នុងមន្ទីរឃុំឃាំងរបស់តុលាការឧក្រិដ្ឋកម្មអន្តរជាតិ (ICC) ក្នុងបទចោទប្រឆាំងមនុស្សជាតិដែលរងការចោទដោយសារការបញ្ជាសម្លាប់មនុស្សរាប់ពាន់នាក់ក្នុងសង្គ្រាមគ្រឿងញៀនកាលពីដើមអាណត្តិរបស់លោក ប្រធានាធិបតីហ្វីលីពីនបច្ចុប្បន្ន បានអះអាងថា ការសម្លាប់មនុស្សរាប់ពាន់នាក់មិនមែនជារឿងត្រឹមត្រូវទេ។

រូបភាពផ្គុំរវាងអតីតប្រធានាធិបតី លោក Duterte និងប្រធានាធិបតីបច្ចុប្បន្ន Marcos Jr.។ Nikkei

យោងសេចក្តីការណ៍របស់ Manila Times លោកប្រធានាធិបតី Ferdinand Marcos Jr. បាននិយាយ វាមិនត្រឹមត្រូវទេក្នុងការសម្លាប់ប្រជាជនហ្វីលីពីនរាប់ពាន់នាក់ដើម្បីលុបបំបាត់គ្រឿងញៀនខុសច្បាប់នៅក្នុងប្រទេសនេះ.

ការលើកឡើងរបស់ប្រធានាធិបតីហ្វីលីពីនរូបនេះដែលកំពុងមានជម្លោះបែកបាក់សម្ព័ន្ធភាពជាមួយអនុប្រធានាធិបតី Sara Duterter ដែលជាកូនស្រីរបស់អតីតប្រធានាធិបតី Rodrigo Duterte កើតឡើងចំពេលដែលអតីតប្រធានាធិបតី Rodrigo Duterte ប្រឈមមុខនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិនៅចំពោះមុខតុលាការឧក្រិដ្ឋកម្មអន្តរជាតិ (ICC)។

កាលថ្ងៃសុក្រ លោក Duterte ប្រឈមការសាកសួរលើកដំបូងពីសំណាក់ចៅក្រមរបស់តុលាការ ICC ដែលពេលនេះការសាកសួរមានរយៈពេលខ្លីប៉ុណ្ណោះដោយសារតែមេធាវីរបស់ លោក Duterte បានអះអាងថា កូនក្តីរបស់លោកឈឺខ្លាំងពេក ដោយសារតែការចាប់ខ្លួនលោក ប្រៀបដូច «ការចាប់ជម្រិត»។

Manila Times បានរាយការណ៍ថា នៅក្នុងសុន្ទរកថាក្នុងអំឡុងពេលយុទ្ធនាការឃោសនាបោះឆ្នោតរបស់សមាជិកព្រឹទ្ធសភា Alyansa Para sa Bagong Pilipinas ប្រធានាធិបតី Marcos បានសង្កត់ធ្ងន់ថា ស្ថានភាពសន្តិភាព និងសណ្តាប់ធ្នាប់នៅក្នុងប្រទេសហ្វីលីពីនអាចសម្រេចបានតាមរយៈការបង្កើតច្បាប់ប្រកបដោយប្រសិទ្ធភាព និងមិនមែនដោយការសម្លាប់ប្រជាជនហ្វីលីពីនរាប់ពាន់នាក់នោះទេ។

លោក Marcos បាននិយាយថា៖«នៅក្នុងការប្រយុទ្ធប្រឆាំងនឹងគ្រឿងញៀន និងឧក្រិដ្ឋកម្មខុសច្បាប់ យើងមិនចាំបាច់ឆ្លងកាត់មធ្យោបាយបង្ហូរឈាមនោះទេ។ គ្មានពួកយើងណាម្នាក់ជឿថាដំណោះស្រាយចំពោះឧក្រិដ្ឋកម្ម និងគ្រឿងញៀនគឺសម្លាប់ប្រជាជនហ្វីលីពីនរបស់យើងរាប់ពាន់នាក់នោះទេ។ នោះមិនត្រឹមត្រូវទេ»។

លោក Duterte បានផ្ញើសារជូនជនរួមជាតិរបស់លោកនៅមុនយន្តហោះចុះចតនៅប្រទេសហូឡង់ថា លោក ទទួលខុសត្រូវចំពោះអ្វីដែលបានកើតឡើងក្នុងអំណាចរបស់លោក និងបានអះអាងពីការការពារ ប៉ូលិសនិងយោធាដែលអនុវត្តតាមការបញ្ជារបស់លោក៕

ដោយ រ៉ាន់ រើយ

The post ប្រធានាធិបតីហ្វីលីពីន ចេញមកដាក់បន្ទុកលើក លោក Duterte appeared first on Kampuchea Thmey Daily.

Duterte នឹងត្រូវបញ្ជូនទៅមន្ទីរឃុំឃាំងរបស់តុលាការ ICC នៅថ្ងៃពុធនេះ ត្រៀមឡើងសវនាការ

Rann Reuy — Wed, 12 Mar 2025 03:44:43 +0000

អតីតប្រធានាធិបតីហ្វីលីពីនលោក Rodrigo Duterte ត្រូវគេរំពឹងថា នឹងបញ្ជូនទៅដល់ទីក្រុងឡាអេប្រទេសហូឡង់នៅថ្ងៃពុធនេះ ដើម្បីប្រឈមការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិរបស់តុលាការឧក្រិដ្ឋកម្មមអនត្រជាតិ (ICC) ដែលមានអង្គហេតុចេញពីសង្គ្រាមប្រឆាំងគ្រឿងញៀនក្នុងដើមអាណត្តិនៃការកាន់អំណាចរបស់លោកកាលពី៩ឆ្នាំមុន។

អតីតប្រធានាធិបតីហ្វីលីពីនលោក Rodrigo Duterte នៅមុនពេលចាប់ខ្លួន។ Reuters

លោក Duterte ត្រូវបានចាប់បញ្ជូនតាមជើងយន្តហោះដឹកជញ្ជូនពិសេស (Charter Flight) នៅយប់ថ្ងៃអង្គារនៅវេលាម៉ោងជាង១១យប់ម៉ោងនៅទីក្រុងម៉ានីឡា ត្រូវម៉ោងប្រហែល១០យប់ម៉ោងនៅកម្ពុជា ដោយមានការចេញតវ៉ារបស់ប្រជាជនដែលគាំទ្រលោកកាន់តែច្រើន។

សេចក្តីរាយការណ៍របស់សារព័ត៌មានហ្វីលីពីន Manila Times នៅព្រឹកថ្ងៃពុធនេះ បានឲ្យដឹងថា នៅពេលយន្តហោះដឹកអតីតប្រធានាធិបតី Duterte ចុះចតនៅអាកាសយានដ្ឋាន Amsterdam Airport Schiphol នៃទីក្រុង Amsterdam ប្រទេសហូឡង់ លោក Duterte នឹងត្រូវបញ្ជូនទៅកាន់កន្លងឃុំខ្លួនរបស់តុលាការឧក្រិដ្ឋកម្មមអនត្រជាតិ (ICC) ជាទីដែល លោកនឹងត្រៀមខ្លួនចំពោះការបង្ហាញខ្លួនដំបូងមុខចៅក្រមជំនុំជម្រះរបស់តុលាការ ICC។

ប្រជាជនគាំទ្រ Duterte ចេញតវ៉ាប្រឆាំងការចាប់ខ្លួន។ Reuters

ក្រោយការដឹកជញ្ជូនអតីតប្រធានាធិបតីហ្វីលីនចេញពីប្រទេសភ្លាមៗ Ferdinand Marcos Jr. ដែលជាប្រធានាធិបតីហ្វីលីពីន បានចេញធ្វើសន្និសីទសារព័ត៌មានភ្លាមៗ ព្រមទាំងបានបង្ហាញថា ការអនុវត្តការចាប់ខ្លួនអតីតប្រធានាធិបតីតាមប៉ូលិស Interpol គឺជារឿងត្រឹមត្រូវ។

ប្រធានាធិបតី Ferdinand Marcos Jr. កំពុងកាន់អំណាច និងមានទំនាស់ជាមួយអនុប្រធានាធិបតី Sara Duterte ដែលជាកូនស្រីរបស់ លោក Rodrigo Duterte ដោយភាគីទាំងពីរបង្ហាញពីជម្លោះដ៏ជ្រាលជ្រៅ និងបង្ហាញពីការប៉ុនប៉ងយកជីវិតគ្នាទៀតផង។

ប្រធានាធិបតី Ferdinand Marcos Jr. បាននិយាយថា ការចាប់ខ្លួនអតីតប្រធានាធិបតី Rodrigo Duterte គឺ «សមរម្យនិងត្រឹមត្រូវ» ដូចដែលវាត្រូវបានអនុវត្តស្របតាមការប្តេជ្ញាចិត្តរបស់ប្រទេសហ្វីលីពីនចំពោះអង្គការប៉ូលីសឧក្រិដ្ឋកម្មអន្តរជាតិ (Interpol) ។

នៅក្នុងសន្និសីទសារព័ត៌មានយប់មិញ លោក Marcos បានបញ្ជាក់ថា យន្តហោះដែលដឹកលោក Duterte បានចាកចេញពីមូលដ្ឋានទ័ពអាកាស Villamor ក្នុងទីក្រុង Pasay នៅម៉ោង 11:03 យប់។ ថ្ងៃអង្គារ ធ្វើដំណើរទៅកាន់ទីក្រុងឡាអេ ប្រទេសហូឡង់ «ដើម្បីប្រឈមមុខនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ទាក់ទងនឹងសង្រ្គាមបង្ហូរឈាមរបស់គាត់លើគ្រឿងញៀន»។ យោង Manila Times។

កងកម្លាំងប៉ូលិសត្រូវបានដាក់ពង្រាយនៅខាងក្រៅកន្លែងឃុំខ្លួននៅទីក្រុងម៉ានីឡា។ REUTERS/Eloisa Lopez

តាមរបាយការណ៍ដែលបានផ្សព្វផ្សាយក្នុងពេលកន្លងមក ក្នុងសង្គ្រាមប្រឆាំងគ្រឿងញៀន អតីតប្រធានាធិបតី Rodrigo Duterte បានសម្លាប់មនុស្សជាង៦០០០នាក់ដែលជាប់ពាក់ព័ន្ធគ្រឿងញៀន ដោយមិនឆ្លងកាត់ការជំំនុំជម្រះក្តីរបស់តុលាការ ដែលទាំងនេះបានក្លាយជាបន្ទុកនៃការដឹកនាំរបស់លោក។

យោងតាមតម្រាយផ្លូវដល់ប្រព័ន្ធបច្ចេកវិទ្យា Google Map ចម្ងាយផ្លូវដឹកជញ្ជូនពីទីក្រុងម៉ានីឡាប្រទេសហ្វីលីពីន ដល់ទីក្រុង Amsterdam ប្រទេសហូឡង់មានជា១ម៉ឺនគីឡូម៉ែត្រ នឹងប្រើពេលជាង១៧ម៉ោង។

លោក Rodrigo Duterte បានក្លាយជាមេដឹកនាំដំបូងគេនៅតំបន់អាស៊ីនិងអាស៊ីអាគ្នេយ៍ដែលត្រូវបានចាប់ខ្លួនដោយតុលាការឧក្រិដ្ឋកម្មអន្តរជាតិ (ICC) ប៉ុន្តែតុលាការនេះក៏នៅមានស៊ើបបណ្តឹងប្រឆាំងមេដឹកនាំរបបយោធាមីយ៉ាន់ម៉ា មីន អូលាំងផងដែរ៕

ដោយ រ៉ាន់ រើយ

The post Duterte នឹងត្រូវបញ្ជូនទៅមន្ទីរឃុំឃាំងរបស់តុលាការ ICC នៅថ្ងៃពុធនេះ ត្រៀមឡើងសវនាការ appeared first on Kampuchea Thmey Daily.

Duterte ត្រូវរាយការណ៍ថា បានចាប់បញ្ជូនទៅតុលាការឡាអេ ខណៈប្រជាជនក្នុងប្រទេសផ្តើមតវ៉ាទ្រង់ទ្រាយធំ

Rann Reuy — Tue, 11 Mar 2025 14:46:10 +0000

អតីតប្រធានាធិបតីហ្វីលីពីន លោក Rodrigo Duterte ត្រូវបានគេរាយការណ៍ថា ត្រូវបានបញ្ជូនតាមជើងហោះហើរពិសេសមួយទៅកាន់ទីក្រុងឡាអេប្រទេសហូឡង់ ដើម្បីប្រឈមតុលាការឧក្រិដ្ឋកម្មអន្តរជាតិ (ICC) ដែលបានចេញដីកាចាប់ខ្លួនជាច្រើនឆ្នាំ និងទើបសម្រេចចាប់ខ្លួននៅថ្ងៃអង្គារនេះដោយប៉ូលិស Interpol។

យន្តហោះដែលគេជឿថា ដឹក លោក Rodrigo Duterte ទៅទីក្រុងឡាអេ។ Reuters

ជាមួយការចាប់ខ្លួននេះ ក្រុមអ្នកគាំទ្រអតីតប្រធានាធិបតីហ្វីលីពីន លោក Rodrigo Duterte បានប្រមូលផ្តុំគ្នាចេញតវ៉ានៅមុខមូលដ្ឋានទ័ពអាកាស Villamor នៅព្រលប់ថ្ងៃអង្គារនេះ បន្ទាប់ពីការចាប់ខ្លួនលោក Duterte កាលពីវេលាថ្ងៃជិតត្រង់ថ្ងៃអង្គារនេះក្រោមបទចោទ«ឧកិ្រដ្ឋកម្មប្រឆាំងមនុស្សជាតិ» ដោយចោទដោយតុលាការឧក្រិដ្ឋកម្មអន្តរជាតិ (ICC)។

អតីតប្រធានាធិបតីហ្វីលីពីន លោក Rodrigo Duterte បានឡើងកាន់អំណាចមួយអាណត្តិរយៈពេល៦ឆ្នាំ ពីឆ្នាំ២០១៦ ដល់២០២២។ ក្នុងអំឡុងឆ្នាំដំបូងនៃការកាន់អំណាច លោក បានបង្ក្រាបយ៉ាងចាស់ដល់ឬហៅថា សង្គ្រាមគ្រឿងញៀន ដោយសម្លាប់មនុស្សជាង៦០០០នាក់ក្រៅប្រព័ន្ធច្បាប់។

ក្រោយការធ្វើទុកបុកម្នេញលើផ្លូវច្បាប់របស់តុលាការឧក្រិដ្ឋកម្មអន្តរជាតិជាបន្តបន្ទាប់ចាប់តាំងពីឆ្នាំ២០១៧មក អតីតប្រធានាធិបតីហ្វីលីពីន លោក Rodrigo Duterte បានប្រកាសដកប្រទេសហ្វីលីពីនពីសមាជិកហត្ថលេខីនៃតុលាការ ICC នៅឆ្នាំ២០១៨ ហើយ ការចាកចេញជាផ្លូវការបានកើតឡើងនៅឆ្នាំ២០១៩។ ប៉ុន្តែតុលាការនេះនៅតែអាចចាត់ការបាននិងបន្តនីតិវិធីច្បាប់ដោយសារការចោទប្រកាន់បានសំដៅលើសំណុំរឿងកើតឡើងមុនការដកខ្លួនរបស់ហ្វីលីពីនពីតុលាការ ICC។

ចាប់ពីរសៀល ដល់ល្ងាច និងរហូតដល់យប់ថ្ងៃអង្គារ ក្រុមអ្នកតវ៉ាកាន់តែច្រើនឡើងៗបានចេញតវ៉ា ខណៈសមត្ថកិច្ចប៉ូលីសក៏ត្រូវបានដាក់ពង្រាយដើម្បីរក្សាសន្តិសុខផងដែរ៕

ក្រុមអ្នកតវ៉ាគាំទ្រអតីតប្រធានាធិបតី Rodrigo Duterte នៅខាងក្រៅមូលដ្ឋានទ័ពអាកាស Villamor ជាទីដែលឃុំខ្លួន។ REUTERS

កងកម្លាំងប៉ូលិសត្រូវបានដាក់ពង្រាយ។ REUTERS

REUTERS

The post Duterte ត្រូវរាយការណ៍ថា បានចាប់បញ្ជូនទៅតុលាការឡាអេ ខណៈប្រជាជនក្នុងប្រទេសផ្តើមតវ៉ាទ្រង់ទ្រាយធំ appeared first on Kampuchea Thmey Daily.

លោកប្រធានាធិបតី Ferdinand Marcos Jr Archives - Kampuchea Thmey Daily

ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា

​តើ Rodrigo Duterte ​​ជាឧក្រិដ្ឋជន​ ឬ​ជាវីរបុរស​​​របស់​​​ប្រជាជន​ហ្វីលីពីន​​?​

​ប្រធានាធិបតីហ្វីលីពីន​ ចេញ​មក​ដាក់​បន្ទុក​លើក​ លោក Duterte

​Duterte ​នឹងត្រូវ​បញ្ជូន​​ទៅមន្ទីរឃុំឃាំង​​របស់​តុលាការ​ ICC ​នៅ​ថ្ងៃពុធនេះ ត្រៀម​ឡើង​​សវនាការ​

Duterte ត្រូវរាយការណ៍ថា បាន​ចាប់​បញ្ជូន​ទៅ​តុលាការ​ឡាអេ ខណៈប្រជាជន​ក្នុង​ប្រទេស​ផ្តើម​តវ៉ា​ទ្រង់ទ្រាយធំ​

តើ Rodrigo Duterte ជាឧក្រិដ្ឋជន ឬជាវីរបុរសរបស់ប្រជាជនហ្វីលីពីន?

ប្រធានាធិបតីហ្វីលីពីន ចេញមកដាក់បន្ទុកលើក លោក Duterte

Duterte នឹងត្រូវបញ្ជូនទៅមន្ទីរឃុំឃាំងរបស់តុលាការ ICC នៅថ្ងៃពុធនេះ ត្រៀមឡើងសវនាការ

Duterte ត្រូវរាយការណ៍ថា បានចាប់បញ្ជូនទៅតុលាការឡាអេ ខណៈប្រជាជនក្នុងប្រទេសផ្តើមតវ៉ាទ្រង់ទ្រាយធំ