លោកវេជ្ជបណ្ឌិត លី សូវ៉ាន់ Archives - Kampuchea Thmey Daily

អ្នកនាំពាក្យក្រសួងសុខាភិបាលអំពាវនាវឱ្យមានការប្រុងប្រយ័ត្នជាមួយប្រភេទសត្វប្រចៀវ ជ្រឹង និងត្រចៀកកាំ ចៀសវាងការឆ្លងវីរុសនីប៉ាហ៍ជាយថាហេតុ

hun sirivadh — Thu, 29 Jan 2026 03:38:59 +0000

ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ បានអំពាវនាវឱ្យប្រជាពលរដ្ឋ ពិសេសអ្នករស់នៅជិតតំបន់សត្វជ្រឹង ប្រចៀវ មានការប្រុងប្រយ័ត្ន កុំទៅជិតដិត និងប៉ះពាល់ផ្ទាល់ជាមួយសត្វទាំងនោះ ខណៈអ្នកដែលយកទឹកមាត់ត្រចៀកកាំ ក៏ត្រូវពាក់ស្រោមដៃ ម៉ាស់ និងអាវការពារឱ្យមានប្រសិទ្ធភាពខ្ពស់ផងដែរ ដើម្បីចៀសវាងការឆ្លងវីរុសនីប៉ាហ៍ជាយថាហេតុ។

ក្នុងអត្ថបទដែលចុះផ្សាយដោយក្រសួងព័ត៌មានកាលពីថ្ងៃទី២៨ ខែមករា ឆ្នាំ២០២៦ លោក លី សូវ៉ាន់ បានលើកឡើងថាអង្គការសុខភាពពិភពលោកបានបង្ហាញការព្រួយបារម្ភពីសត្វជ្រឹងដែលមានផ្ទុកវីរុសនីប៉ាហ៍ ដែលអាចចម្លងពីសត្វមកមនុស្សបាន ហើយបើទោះបីជាកម្ពុជាមិនទាន់មានករណីកើតមានវីរុសនីប៉ាហ៍ក្ដី តែវត្តមានរបស់សត្វជ្រឹង ប្រចៀវ និងត្រចៀកកាំនៅតាមតំបន់ទេសចរណ៍ និងទីប្រជុំជនកម្ពុជានៅតែបង្កឱ្យមានការបារម្ភ។

លោកបានអំពាវនាវឱ្យពលរដ្ឋដែលបានប៉ះពាល់ផ្ទាល់ជាមួយសត្វជ្រឹង សត្វប្រចៀវ និងសត្វត្រចៀកកាំ ជាពិសេសពលរដ្ឋប្រកបមុខរបរយកទឹកមាត់ត្រចៀកកាំ ក្រោយលេចចេញនូវសញ្ញា គ្រុនក្តៅ ឈឺក្បាលខ្លាំង និងក្អួតចង្អោរ សូមទៅពិគ្រោះជំងឺនៅមណ្ឌលសុខភាពបង្អែកជាបន្ទាន់ ដើម្បីធ្វើតេស្តស្វែងរកវីរុស និងព្យាបាលឱ្យបានទាន់ពេល ជាការបង្ការការឆ្លងមេរោគតៗគ្នា។

កន្លងទៅកម្ពុជាក៏ធ្លាប់រកឃើញវីរុសនីប៉ាហ៍លើសត្វជ្រឹងផងដែរ ដោយការស្រាវជ្រាវរបស់វិទ្យាស្ថានប៉ាស្ទ័រកម្ពុជាតាមរយៈការយកសំណាកសត្វជ្រឹងប្រមាណ៤០០០ក្បាលក្នុងខេត្តចំនួន២ធ្វើតេស្តឃើញមានជ្រឹងមានផ្ទុកវីរុសនេះចំនួន៣០ក្បាល ខណៈការស្រាវជ្រាវលើសំណាកពីមនុស្ស៤០០០នាក់ពីតំបន់ដែលមានសត្វជ្រឹងបង្ហាញលទ្ធផល អវិជ្ជមាន។

ស្ថិតក្នុងក្រុមសមាជិកគ្រួសារ Paramyxoviridae វីរុសនីប៉ាហ៍ ជាអំបូរមេរោគ zoonotic ជាមេរោគឆ្លងពីសត្វទៅមនុស្ស ហើយសត្វដែលមានផ្ទុកមេរោគនេះជាសត្វជ្រឹង។ មេរោគនេះអាចចម្លងជំងឺពីសត្វជ្រឹង សត្វជ្រូកទៅកាន់មនុស្ស និងឆ្លងពីមនុស្សម្នាក់ទៅមនុស្សម្នាក់ទៀត តាមរយៈការប៉ះពាល់ដោយផ្ទាល់នឹងទឹកមាត់ ឬទឹកនោមអ្នកដែលមានផ្ទុកមេរោគនេះ។ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) ឆ្នាំ២០២០។

បើឆ្លងចូលមនុស្ស វីរុសនីប៉ាហ៍នាំឱ្យអ្នកជំងឺមានអាការៈដូចជាគ្រុនផ្តាសាយ មានបញ្ហាផ្លូវដង្ហើមធ្ងន់ធ្ងរ និងអាចកើតជំងឺរលាកខួរក្បាល។ អ្នកវិទ្យាសាស្រ្តបានព្យាករអំពីលទ្ធភាពនៃជំងឺរាតត្បាតជាច្រើន ដែលអាចនឹងកើតមាន ក្រោយសម័យកូវីដ១៩ ក្នុងនោះមានវីរុសនីប៉ាហ៍នេះផងដែរ៕

អត្ថបទដោយ ហ៊ុន សិរីវឌ្ឍន៍

The post អ្នកនាំពាក្យក្រសួងសុខាភិបាលអំពាវនាវឱ្យមានការប្រុងប្រយ័ត្នជាមួយប្រភេទសត្វប្រចៀវ ជ្រឹង និងត្រចៀកកាំ ចៀសវាងការឆ្លងវីរុសនីប៉ាហ៍ជាយថាហេតុ appeared first on Kampuchea Thmey Daily.

មន្ត្រីជំនាញសុខាភិបាល ណែនាំពលរដ្ឋប្រុងប្រយ័ត្នជំងឺឆ្លង ៧ មុខ តែងតែកើតញឹកញាប់ក្នុងរដូវភ្លៀង

អ៊ិន ពិសី — Fri, 23 May 2025 09:06:41 +0000

មន្ត្រីជំនាញក្រសួងសុខាភិបាល បានធ្វើការណែនាំដល់ប្រជាពលរដ្ឋឱ្យមានការប្រុងប្រយ័ត្នខ្ពស់ចំពោះជំងឺឆ្លង ៧ មុខ ដែលតែងតែកើតញឹកញាប់នៅក្នុងរដូវភ្លៀងធ្លាក់នេះ ពិសេសជំងឺផ្តាសាយធំ។

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានឱ្យដឹងថា ជំងឺ ៧ មុខ ដែលតែងតែកើតឡើងនៅក្នុងរដូវភ្លៀងរួមមាន ជំងឺគ្រុនឈាម គ្រុនចាញ់ ជំងឺគ្រុនផ្តាសាយ ជំងឺគ្រុនក្តៅ ជំងឺចម្លងពីចំណីអាហារ ជំងឺចម្លងពីទឹក ជំងឺអាសន្នរោគ និងជំងឺលិបតូឆ្លងពីទឹកនោមសត្វកណ្តុរ។

លោកវេជ្ជបណ្ឌិត ក៏បានណែនាំឱ្យប្រជាពលរដ្ឋពេលធ្វើដំណើរត្រូវមានអាវភ្លៀង ឆត្រ និងស្បែកជើងលុយទឹក បរិភោគទឹកក្តៅអ៊ុនៗ ទឹកស៊ុបក្តៅៗ អនាម័យខ្លួនប្រាណ បរិភោគចំណីអាហារណាមានអនាម័យ និងមានជីវជាតិ និងបន្លែពណ៌បៃតងចាស់ដូចជា ផ្ទី ស្លឹកងប់ ស្លឹកបាស ខាត់ណា សណ្ដែកកួរ និងប៉េងប៉ោះជាដើម។

លោកវេជ្ជបណ្ឌិត បានបន្ថែមទៀតថា ជាងនេះទៅទៀត ត្រូវចូលរួមលុបបំបាត់ដង្កូវទឹក និងជម្រកសត្វមូសខ្លាដូចជា សំបកកង់ សំបកកង់ឡាន ត្រឡោកដូង និងវត្ថុដែលអាចដក់ទឹកបាន ដើម្បីការពារកុមារពីជំងឺគ្រុនឈាម។

លោកវេជ្ជបណ្ឌិត បានឱ្យដឹងទៀតថា នៅក្នុងរដូវភ្លៀងធ្លាក់នេះ ក៏មានឃើញការកើនឡើងករណីជំងឺកូវីដ-១៩ និងជំងឺផ្តាសាយធំផងដែរ។ ដូចនេះ សូមប្រជាពលរដ្ឋត្រូវបន្តពាក់ម៉ាស រក្សាគម្លាត ត្រូវឧស្សាហ៍លាងដៃជាមួយនឹងសាប៊ូ និងទឹក ដើម្បីចៀសវាងការចម្លងជំងឺទៅសមាជិកគ្រួសារ និងអ្នកដទៃ និងហាមក្អកដាក់បាតដៃ ព្រោះវាអាចឆ្លងទៅអ្នកដទៃទៀតបានតាមរយៈការចាប់ដៃ ឬចាប់របស់ផ្សេងៗ។

យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម បានឱ្យដឹងថា ដោយមានសម្ពាធទាបគ្របដណ្ដប់មកលើឈូងសមុទ្រថៃ អាងទន្លេមេគង្គ និងសមុទ្រចិនខាងត្បូង ស្ថានភាពបែបនេះ នឹងធ្វើឱ្យរាជធានី-ខេត្តភាគច្រើន នៃប្រទេសកម្ពុជា អាចមានភ្លៀងផ្គររន្ទះ និងខ្យល់កន្ត្រាក់ គ្រប់ដណ្ដប់លើផ្ទៃដី ២៥ ដល់ ៣៥ ភាគរយ ចាប់ពីថ្ងៃទី ២៣ ដល់ ថ្ងៃទី ២៥ ខែឧសភា ឆ្នាំ ២០២៥៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋប្រុងប្រយ័ត្នជំងឺឆ្លង ៧ មុខ តែងតែកើតញឹកញាប់ក្នុងរដូវភ្លៀង appeared first on Kampuchea Thmey Daily.

មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារ និងពុលស្រា ក្នុងពិធីបុណ្យចូលឆ្នាំថ្មី

អ៊ិន ពិសី — Fri, 11 Apr 2025 03:41:45 +0000

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល បានណែនាំដល់ប្រជាពលរដ្ឋ ត្រូវបង្កើនការប្រុងប្រយ័ត្នខ្ពស់ចំពោះការពុលចំណីអាហារ និងពុលស្រា ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ដែលនឹងឈានចូលមកដល់នៅដើមសប្ដាហ៍ក្រោយនេះ។

លោកវេជ្ជបណ្ឌិត លី សូវ៉ាន់ បានមានប្រសាសន៍នៅព្រឹកថ្ងៃទី ១១ មេសា នេះថា ពិធីបុណ្យចូលឆ្នាំថ្មី តែងតែមានការជួបជុំសាច់ញាតិបងប្អូន និងរៀបចំចំណីអាហារពោរពាសដែលអាចបណ្ដាលឱ្យមានការពុលចំណីអាហារ ប្រសិនបើអាហារទាំងនោះរៀបចំមិនមានអនាម័យត្រឹមត្រូវទេនោះ។ ដូចនេះ សូមអំពាវនាវដល់ប្រជាពលរដ្ឋបន្តថែរក្សាសុខភាពឱ្យបានល្អ ចៀសវាងការកើតមានជំងឺផ្សេងៗ ពិសេសការពុលចំណីអាហារ និងការពុលស្រា។

លោកវេជ្ជបណ្ឌិត បានណែនាំថា ដើម្បីចៀសវាងការពុលចំណីអាហារនៅក្នុងពិធីបុណ្យចូលឆ្នាំខាងមុខនេះ ប្រជាពលរដ្ឋត្រូវអនុវត្តវិធានការមួយចំនួនដូចជា ត្រូវលាងដៃមុននឹងចាប់កាន់ចំណីអាហារ មុនពេលរៀបចំចំណីអាហារ និងក្រោយពេលចេញពីបន្ទោបង់ ព្រមទាំងសម្ភារៈឧបករណ៍ប្រើប្រាស់សម្រាប់រៀបចំចំណីអាហារ។ ត្រូវទុកដាក់អាហារឆៅ និងឆ្អិន ដាច់ដោយឡែកពីគ្នា ព្រោះថាអាហារឆៅ ជាពិសេសសាច់សត្វស្លាប ស៊ុត និងគ្រឿងសមុទ្រ អាចមានមេរោគបង្កគ្រោះថ្នាក់ ដែលអាចឆ្លងចូលទៅក្នុងចំណីអាហារផ្សេងទៀតនៅពេលរៀបចំ និងទុកដាក់អាហារទាំងនេះ។ ត្រូវចម្អិនអាហារឱ្យបានឆ្អិនល្អ ជាពិសេស សាច់ សត្វស្លាប ស៊ុត និងគ្រឿងសមុទ្រ។ លើសពីនេះ ត្រូវការទុកដាក់អាហារក្នុងសីតុណ្ហភាពសុវត្ថិភាព ព្រោះថាមេរោគអាចបំបែកខ្លួនយ៉ាងឆាប់រហ័ស ប្រសិនបើអាហារត្រូវបានរក្សាទុកក្នុងសីតុណ្ហភាពធម្មតា។ ពេលចម្អិនអាហារ ត្រូវតិចស្ករ តិចអំបិល និងតិចខ្លាញ់ ដើម្បីកាត់បន្ថយជំងឺមិនឆ្លងដូចជា ជំងឺលើសឈាម និងជំងឺទឹកនោមផ្អែមជាដើម។

លោកវេជ្ជបណ្ឌិត ក៏បានណែនាំដល់ប្រជាពលរដ្ឋ ត្រូវប្រុងប្រយ័ត្នចំពោះការពុលស្រា ស ស្រាថ្នាំ ផងដែរ ព្រោះថាកន្លងមកមានការពុលស្រានេះរួចមកហើយ។ ដូចនេះប្រជាពលរដ្ឋគួរកាត់បន្ថយការបរិភោគស្រា សូមបរិភោគក្នុងកម្រិតតិចតួច និងទិញស្រាដែលមានប្រភពច្បាស់លាស់ និងការត្រួតពិនិត្យត្រឹមត្រូវ ដើម្បីចៀសវាងការពុលស្រា។

លោកវេជ្ជបណ្ឌិត បញ្ជាក់ថា ក្នុងករណីប្រជាពលរដ្ឋមានបញ្ហាសុខភាពប្រញាប់ទាក់ទងទៅកាន់លេខ ១១៥ ដើម្បីឱ្យមន្ត្រីជំនាញចុះទៅស្រាវជ្រាវ និងទប់ស្កាត់បានទាន់ពេលវេលា៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារ និងពុលស្រា ក្នុងពិធីបុណ្យចូលឆ្នាំថ្មី appeared first on Kampuchea Thmey Daily.

មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារក្នុងពិធីសែនក្បាលទឹក

អ៊ិន ពិសី — Wed, 30 Aug 2023 02:22:20 +0000

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល បានណែនាំដល់ប្រជាពលរដ្ឋ ពិសេសអ្នកជាប់ខ្សែស្រឡាយកាត់ចិន ត្រូវបង្កើនការប្រុងប្រយ័ត្នខ្ពស់ចំពោះការពុលចំណីអាហារ និងគ្រោះអគ្គិភ័យនៅក្នុងពិធីសែនក្បាលទឹកនេះ។

ថ្លែងប្រាប់កម្ពុជាថ្មី នៅព្រឹកថ្ងៃទី ៣០ សីហានេះ លោកវេជ្ជបណ្ឌិត លី សូវ៉ាន់ បានមានប្រសាសន៍ថា ពិធីសែនក្បាលទឹកតែងតែមានរៀបចំសែនព្រេនគ្រឿងដង្វាយ និងម្ហូបអាហារពោរពាស ដែលអាចបណ្ដាលឲ្យមានការពុលចំណីអាហារ ប្រសិនបើអាហារទាំងនោះរៀបចំមិនមានអនាម័យត្រឹមត្រូវទេនោះ។

លោកវេជ្ជបណ្ឌិត បានណែនាំថា ដើម្បីចៀសវាងការពុលចំណីអាហារនៅក្នុងពិធីសែនក្បាលទឹកនេះ ប្រជាពលរដ្ឋត្រូវអនុវត្តវិធានការមួយចំនួនដូចជា ត្រូវលាងដៃមុននឹងចាប់កាន់ចំណីអាហារ មុនពេលរៀបចំចំណីអាហារ និងក្រោយពេលចេញពីបន្ទោបង់ ព្រមទាំងសម្ភារៈឧបការប្រើប្រាស់សម្រាប់រៀបចំចំណីអាហារ។ ត្រូវទុកដាក់អាហារឆៅ និងឆ្អិន ដាច់ដោយឡែកពីគ្នា ព្រោះថាអាហារឆៅ ជាពិសេសសាច់សត្វស្លាប ស៊ុត និងគ្រឿងសមុទ្រ អាចមានមេរោគបង្កគ្រោះថ្នាក់ ដែលអាចឆ្លងចូលទៅក្នុងចំណីអាហារផ្សេងទៀតនៅពេលរៀបចំ និងទុកដាក់អាហារទាំងនេះ។ ត្រូវចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងគ្រឿងសមុទ្រ។ លើសពីនេះ ត្រូវការទុកដាក់អាហារនៅក្នុងសីតុណ្ហភាពសុវត្ថិភាព ព្រោះថាមេរោគអាចបំបែកខ្លួនយ៉ាងឆាប់រហ័ស ប្រសិនបើអាហារត្រូវបានរក្សាទុកក្នុងសីតុណ្ហភាពធម្មតា។

លោកវេជ្ជបណ្ឌិត លី សូវ៉ាន់ បន្ថែមថា ជាមួយគ្នានេះ ប្រជាពលរដ្ឋគួរតែប្រុងប្រយ័ត្នចំពោះភ្លើងទៀនធូប និងការដុតក្រដាសសែនពេលសែនព្រេន។ ហើយពេលធ្វើដំណើរទៅណាមកណា ត្រូវប្រាកដថា ភ្លើងទៀនធូបរលត់អស់ហើយ ដើម្បីការពារកុំឲ្យមានកើតគ្រោះអគ្គិភ័យកើតឡើងជាយថាហេតុ។

លោកវេជ្ជបណ្ឌិត បញ្ជាក់ថា ក្នុងករណីប្រជាពលរដ្ឋមានអាការរាករូស សូមប្រញាប់ទាក់ទងទៅកាន់លេខ ១១៥ ដើម្បីឲ្យមន្ត្រីជំនាញចុះទៅស្រាវជ្រាវ និងទប់ស្កាត់បានទាន់ពេលវេលា៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារក្នុងពិធីសែនក្បាលទឹក appeared first on Kampuchea Thmey Daily.