លោកស្រី មិថុនា ភូថង Archives - Kampuchea Thmey Daily

ពលករខ្មែរមកពីថៃ ប្ដេជ្ញាចិត្តមិនទៅធ្វើការក្រៅប្រទេសទៀតទេ ដោយរកការងារក្នុងស្រុកក្បែរក្រុមគ្រួសារវិញ

អ៊ិន ពិសី — Mon, 04 Aug 2025 09:02:08 +0000

ក្រុមពលករខ្មែរដែលវិលត្រឡប់មកពីថៃ បានប្ដេជ្ញាចិត្តរួមគ្នាថា ពួកគេ នឹងមិនវិលត្រឡប់ទៅធ្វើការនៅថៃទៀតឡើយ ទោះតម្លៃណាក៏ដោយ ដោយសុខចិត្តរកការងារធ្វើក្នុងប្រទេស រួមរស់ក្បែរក្រុមគ្រួសារវិញ។

ព្រោះតែមើលឃើញពីភាពលំបាក និងអំពើឃោរឃៅរបស់រាជរដ្ឋាភិបាល និងយោធាថៃ ដែលធ្វើមកលើជាតិសាសន៍ខ្លួនគ្រប់រូបភាព កលល្បិច និងឈ្លានពានរំលោភដែនដីរបស់ខ្លួន ទាំងក្តីឈឺចាប់បំផុត នៅពេលនេះ ក្រុមពលករខ្មែរមកពីថៃចូលមកស្រុកកំណើតវិញតាមរយៈព្រំដែនចាំយាម និយាយថា ពួកគាត់លែងទៅធ្វើការនៅថៃទៀតហើយ។

ពលករខ្មែរដែលវិលត្រឡប់មកកម្ពុជានៅតំបន់ច្រកទ្វារព្រំដែនចាំយាម អ្នកស្រី ចាន់ធា រស់នៅខេត្តកំពត និង លោក យ៉ូត រស់នៅខេត្តកំពង់ចាម បានឱ្យដឹងនៅថ្ងៃទី ៤ ខែសីហា នេះថា កាលដែលពួកគាត់ទើបតែសម្រេចចិត្តមកកម្ពុជាវិញនាពេលនេះ ក៏ព្រោះតែថៅកែមិនទាន់បានបើកប្រាក់ខែឱ្យថ្នូរនឹងកម្លាំងពលកម្មកន្លងទៅ។

តំណាងក្រុមពលករដដែល បន្តទៀតថា ពួកគាត់បម្រើការងារចុះទូកនេសាទ បេះផ្លែឈើ ធ្វើសំណង់ និងសេវាកម្មស្នាក់នៅក្នុងខេត្តត្រាត មកទល់ពេលនេះថៅកែមិនធ្វើបាបអ្វីទេ ប៉ុន្តែបារម្ភពីសុវត្ថិភាពខ្លាចយោធាថៃធ្វើបាប ក៏នាំគ្នាវិលត្រឡប់មកស្រុកកំណើតវិញតែម្ដង។ ទោះបីជាស្ថានភាពបញ្ហាព្រំដែនធូរស្រាលយ៉ាងណា ក៏ពួកគាត់ប្តេជ្ញាចិត្តថា មិនវិលត្រឡប់ធ្វើការងារនៅថៃទៀតទេ សុខចិត្តរស់នៅជួបជុំគ្រួសារ និងរកការងារធ្វើនៅប្រទេសកម្ពុជា។

ក្រុមពលករ ក៏បានថ្លែងអំណរអរគុណយ៉ាងជ្រាលជ្រៅដល់រាជរដ្ឋាភិបាល និងរដ្ឋបាលខេត្តកោះកុង ដែលបានផ្តល់ជារថយន្តដឹកជញ្ជូនពួកគាត់ពីព្រំដែនដោយឥតគិតថ្លៃមកកាន់មណ្ឌលសុំចតជាបណ្តោះអាសន្ននៅសាខាកាកបាទក្រហមកម្ពុជាខេត្ត ក្នុងន័យសម្រួល កាត់បន្ថយចំណាយថវិកា និងចំណេញពេលវេលា។

កន្លងទៅ លោកស្រី មិថុនា ភូថង អភិបាលខេត្តកោះកុង លើកឡើងថា ខេត្តមានតំបន់សេដ្ឋកិច្ចពិសេសចំនួន ២ កន្លែង ដោយមានឱកាសការងារជាង ៧ ពាន់កន្លែង សម្រាប់ទទួលពលករ ពលរដ្ឋ និងយុវជនកម្ពុជា ចូលបម្រើការងារតាមផ្នែកជំនាញនីមួយៗ ដើម្បីកាត់បន្ថយការចំណាកស្រុកទៅក្រៅប្រទេសទាំងប្រថុយប្រថានបន្តទៀត។

លោកស្រីអភិបាលខេត្ត បានបន្តថា គិតមកទល់ម៉ោងនេះ ស្ថានភាពក្នុងភូមិសាស្ត្រខេត្តមានសភាពប្រក្រតីភាពល្អធម្មតានោះទេ ពុំមានការផ្ទុះអាវុធដូចការបង្ហោះតាមបណ្ដាញសង្គមនោះទេ។ លោកស្រី នៅតែអំពាវនាវដល់ពលរដ្ឋរក្សាភាពស្ងៀមស្ងាត់ និងតាមដានព័ត៌មានផ្លូវការតាមផេកហ្វេសប៊ុករបស់លោកស្រី និងផេករដ្ឋបាលខេត្តកោះកុង៕

អត្ថបទ ៖ សិរីវឌ្ឍនៈ

The post ពលករខ្មែរមកពីថៃ ប្ដេជ្ញាចិត្តមិនទៅធ្វើការក្រៅប្រទេសទៀតទេ ដោយរកការងារក្នុងស្រុកក្បែរក្រុមគ្រួសារវិញ appeared first on Kampuchea Thmey Daily.

លោកស្រី មិថុនា ភូថង ស្នើភាគីពាក់ព័ន្ធចូលរួមបង្កើនការយល់ដឹង និងទប់ស្កាត់ប្រឆាំងព័ត៌មានក្លែងក្លាយ

អ៊ិន ពិសី — Tue, 01 Jul 2025 08:47:29 +0000

លោកស្រី មិថុនា ភូថង អភិបាលខេត្តកោះកុង នៅថ្ងៃទី ១ ខែកក្កដា ឆ្នាំ ២០២៥ នេះ បានស្នើដល់គ្រប់ភាគីពាក់ព័ន្ធទាំងអស់ នៅមូលដ្ឋានខេត្ត គប្បីចូលរួមបង្កើនការយល់ដឹងឱ្យកាន់តែច្រើន និងទប់ស្កាត់ប្រឆាំងគ្រប់ព័ត៌មានក្លែងក្លាយដែលកើតមាន។

ការស្នើឡើងយ៉ាងដូច្នេះរបស់ លោកស្រីអភិបាលខេត្តកោះកុង ធ្វើឡើងក្នុងយុទ្ធនាការនិយាយថាទេចំពោះព័ត៌មានក្លែងក្លាយ ដែលមានកងកម្លាំងប្រដាប់អាវុធ រដ្ឋបាលក្រុងស្រុក ពលរដ្ឋ និងយុវជនជិត ៤០០ នាក់ ចូលរួម។

លោកស្រីអភិបាលខេត្ត សង្កត់ធ្ងន់ថា ការផ្សព្វផ្សាយព័ត៌មានមិនពិត ដោយប្រើប្រាស់ប្រព័ន្ធឌីជីថលថ្មីបានបង្កើតឱ្យមានការផ្ទុះឡើងនូវអំពើហិង្សា ការស្អប់ខ្ពើម ការរើសអើង ការមាក់ងាយ ដែលធ្វើឱ្យមានផលប៉ះពាល់ទៅដល់ ផ្នែកសន្តិសុខ សណ្ដាប់ធ្នាប់ សង្គម សេដ្ឋកិច្ច នយោបាយ និងប៉ះពាល់ដល់ទំនាក់ទំនងសង្គម។

លោកស្រី មិថុនា ភូថង មើលឃើញថា នៅរយៈពេលចុងក្រោយនេះ នៅលើពិភពលោកបាននិងកំពុងប្រឈមនឹងបញ្ហាភូមិសាស្ត្រនយោបាយ បញ្ហាភូមិសាស្ត្រសេដ្ឋកិច្ច ទន្ទឹមនេះក៏ត្រូវប្រឈមមុខចំពោះការបញ្ចេញនូវព័ត៌មានក្លែងក្លាយដែលប៉ះពាល់ដល់កិច្ចប្រឹងប្រែងការពារសន្តិភាព និងស្ថិរភាពពិភពលោកផងដែរ។ លើសពីនេះទៅទៀត បញ្ញាសិប្បនិមិត្ត (AI) ត្រូវបានគេយកទៅប្រើប្រាស់បង្កើតនូវព័ត៌មានដែលមានចរិតបំភាន់ និង បំពុលសង្គម ព្រមទាំងងាយស្រួលបោកប្រាស់ប្រជាពលរដ្ឋដែលមិនសូវចេះប្រើប្រាស់បច្ចេកវិទ្យាបែបទំនើប ឬយើងហៅថា«អ្នកអក្ខរកម្មព័ត៌មាន»។

ក្នុងនាមថ្នាក់ដឹកនាំរដ្ឋបាលខេត្ត លោកស្រី មិថុនា ភូថង ក៏សូមអំពាវនាវដល់អ្នកបង្កើតមាតិកា អ្នកសារព័ត៌មាន ពិសេសក្រុម MMO (Make Money Online) កុំព្រោះតែប្រយោជន៍ខ្លួន កុំព្រោះតែលុយ បង្កើតនូវព័ត៌មានក្លែងក្លាយដើម្បីបានប្រយោជន៍ពីការផ្សាយនោះ ធ្វើឱ្យប្រាសចាកពីក្រមសីលធម៌ និងវិជ្ជាជីវៈរបស់ខ្លួន និងសូមស្នើឱ្យអ្នកសារព័ត៌មាន អ្នកបង្កើតមាតិកាសង្គម ប្រកាន់ខ្ជាប់នូវសីលធម៌វិជ្ជាជីវៈឱ្យបានល្អ គោរពនូវតម្លៃសង្គម កិត្តិយសជាតិ និងសីលធម៌។

ទន្ទឹមនោះ លោកស្រីអភិបាលខេត្ត បានថ្លែងអំណរគុណចំពោះក្រុមការងារអ្នកនាំពាក្យរបស់រដ្ឋបាលខេត្តកោះកុង ក្រុមការងារព័ត៌មានវិទ្យារដ្ឋបាលខេត្ត ក្រុង ស្រុក និងតាមបណ្តាមន្ទីរអង្គភាពជុំវិញខេត្ត និងអ្នកសារព័ត៌មានក្នុងខេត្តទាំងអស់ ដែលបានបំពេញតួនាទីភារកិច្ចរបស់ខ្លួនបានយ៉ាងល្អប្រសើរ ឆ្លើយតបបានទាន់ពេលវេលានៅពេលទទួលបាននូវសំនួរ ចម្ងល់ សំណូមនានារបស់ប្រជាពលរដ្ឋដែលបានលើកឡើងក្នុងផេកហ្វេសប៊ុក របស់រដ្ឋបាលខេត្តកោះកុង ឬផេកហ្វេសប៊ុករបស់លោកស្រីផ្ទាល់។

បន្ថែមលើនេះទៀត លោកស្រីអភិបាលខេត្តកោះកុង បានកោតសរសើរចំពោះអ្នកសារព័ត៌មាន និងអ្នកមានឥទ្ធិពលក្នុងបណ្ដាញសង្គម ដែលបានផលិតមាតិកាផ្សព្វផ្សាយអំពីសមិទ្ធផលនានាដែលរដ្ឋបាលខេត្តសម្រេចបាននាពេលកន្លងមក និងសក្ដានុពល នៃតំបន់ទេសចរណ៍នានាក្នុងខេត្ត និងសូមលើកទឹកចិត្តដល់អ្នកសារព័ត៌មាន និងអ្នកផលិតមាតិកាផ្សព្វផ្សាយក្នុងបណ្តាញសង្គមទាំងអស់ បន្តផលិតមាតិកាផ្សព្វផ្សាយអំពីសក្ដានុពលសំខាន់ៗ នៃតំបន់ទេសចរណ៍ក្នុងខេត្តកោះកុង ឱ្យបានកាន់តែច្រើនបន្ថែមទៀត សម្រាប់ទាក់ទាញអ្នកទេសចរឱ្យមកលេងកម្សាន្តនៅតាមតំបន់ទេសចរណ៍នានាទូទាំងខេត្តកោះកុង និង ចូលរួមជាមួយរាជរដ្ឋាភិបាលក្នុងការគាំទ្រដល់គោលនយោបាយលើកកម្ពស់វិស័យទេសចរណ៍ និង ចូលរួមលើកកម្ពស់ជីវភាពប្រជាពលរដ្ឋក្នុងមូលដ្ឋានផងដែរ។

ដោយឡែក លោក មុំ ម៉ាលិកា ប្រធានមន្ទីរព័ត៌មានខេត្តកោះកុង លើកឡើងថា យុទ្ធនាការនេះ នឹងត្រូវបានអនុវត្តទូទាំងប្រទេសកម្ពុជាក្នុងរយៈពេល ១២ ខែ គឺផ្តើមពីថ្ងៃទី ១ ខែមេសា ឆ្នាំ ២០២៥ ដល់ថ្ងៃទី ៣១ ខែមីនា ឆ្នាំ ២០២៦ ហើយចាំបាច់មានការចូលរួមពីគ្រប់ភាគីពាក់ព័ន្ធទាំងអស់ ក្នុងគោលបំណងដើម្បីលើកកម្ពស់ការយល់ដឹងជាសាធារណៈអំពីគ្រោះថ្នាក់ និងផលវិបាក នៃព័ត៌មានក្លែងក្លាយ។

លោកប្រធានមន្ទីរព័ត៌មានខេត្ត បានបន្ថែមទៀតថា ការបញ្ជ្រាបការយល់ដឹងដល់ប្រជាពលរដ្ឋក្នុងសហគមន៍ និងពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ជាកត្តាដ៏សំខាន់មួយ ដើម្បីផ្លាស់ប្ដូរឥរិយាបថរបស់ពលរដ្ឋដែលជាអ្នកប្រើប្រាស់បណ្ដាញទំនាក់ទំនងសង្គម និងប្រព័ន្ធផ្សព្វផ្សាយទំនើបឱ្យមកចូលរួមទប់ស្កាត់ការរីកសាយភាយនូវព័ត៌មានក្លែងក្លាយ។ ក្នុងបរិបទនេះ លោកប្រធានមន្ទីរព័ត៌មានខេត្ត ជឿជាក់ថា តាមរយៈយុទ្ធនាការនេះ នឹងផ្តល់ប្រយោជន៍យ៉ាងសំខាន់ដល់អ្នកពាក់ព័ន្ធទាំងឡាយ ហើយចូលរួមតាមដានទប់ស្កាត់ព័ត៌មានក្លែងក្លាយប្រកបដោយការទទួលខុសត្រូវខ្ពស់ ផ្សព្វផ្សាយព័ត៌មានដែលពិតប្រាកដ ចៀសវាងបំភ្លៃការនាំឱ្យមានទោសទណ្ឌប្រការណាមួយ៕

អត្ថបទ ៖ សិរីវឌ្ឍនៈ

The post លោកស្រី មិថុនា ភូថង ស្នើភាគីពាក់ព័ន្ធចូលរួមបង្កើនការយល់ដឹង និងទប់ស្កាត់ប្រឆាំងព័ត៌មានក្លែងក្លាយ appeared first on Kampuchea Thmey Daily.

លោកស្រី មិថុនា ភូថង ៖ ការងារត្រួតពិនិត្យបក្សបានញាំងឱ្យមានការ ពង្រឹងមន្ត្រីបក្ស សំដៅដល់ការដឹកនាំមាតុភូមិជារៀងរហូត

អ៊ិន ពិសី — Sat, 21 Jun 2025 10:01:43 +0000

លោកស្រី មិថុនា ភូថង ប្រធានគណៈកម្មាធិការគណបក្សប្រជាជនកម្ពុជាខេត្តកោះកុង ចាត់ទុកថា ការងារជំនាញត្រួតពិនិត្យគណបក្ស គឺញាំងឱ្យមានការកសាងពង្រឹងមន្ត្រីជួរបក្ស សាមគ្គីភាព ឯកភាពក្នុងផ្ទៃកាន់តែល្អប្រសើរ សំដៅដឹកនាំជាតិមាតុភូមិជារៀងរហូត។

ការអះអាងយ៉ាងដូច្នេះរបស់ លោកស្រី មិថុនា ភូថង ធ្វើឡើងក្នុងពិធីបើកវគ្គបណ្តុះបណ្តាលការងារជំនាញត្រួតពិនិត្យគណបក្ស នៅថ្ងៃទី ២១ ខែមិថុនា ឆ្នាំ ២០២៥ នាទីស្នាក់ការគណបក្សប្រជាជនកម្ពុជាខេត្តកោះកុង។

លោកស្រី មិថុនា ភូថង បានបន្តថា ការងារត្រួតពិនិត្យគណបក្សមានប្រសិទ្ធភាព អាស្រ័យមានមន្ត្រីត្រួតពិនិត្យ មានចំណេះដឹង និងបទពិសោធច្បាស់លាស់អំពីការងារត្រួតពិនិត្យគណបក្ស។

លោកស្រីប្រធានគណៈកម្មាធិការគណបក្សប្រជាជនកម្ពុជាខេត្តកោះកុង យល់ថា វគ្គបណ្តុះបណ្តាលរយៈពេល ២ ថ្ងៃ ប៉ុណ្ណោះ ប៉ុន្តែវាជាឱកាសមួយដ៏កម្រ និងមានសារៈសំខាន់បំផុតដែលអនុញ្ញាតឱ្យសិក្ខាកាមបានរៀនសូត្រកាន់តែស៊ីជម្រៅ ដើម្បីលើកកម្ពស់ការយល់ដឹងអំពីបញ្ហាសំខាន់ៗ ជាច្រើន សម្រាប់ធ្វើជាមូលដ្ឋានឆ្ពោះទៅបន្តការចែករំលែកចំណេះដឹង ការងារត្រួតពិនិត្យគណបក្សមិនមែនជាការងារផ្ទាល់របស់គណៈកម្មាធិការត្រួតពិនិត្យគណបក្សតែឯកឯងនោះទេ។ តែវាការងាររបស់គណបក្សទាំងមូល និងជារបស់សមាជិក សមាជិកា ដែលគប្បីត្រូវតែយល់ដឹង។

លោកស្រី មិថុនា ភូថង ក៏បានស្នើដល់គ្រូបង្គោលយកចិត្តទុកដាក់បង្ហាត់បង្ហាញពីខ្លឹមសាររបស់វគ្គទៅកាន់សិក្ខាកាម ដើម្បីកត់ត្រាស្វែងយល់មេរៀននីមួយ!រក្សាបានសាមគ្គីភាពជិតស្និទ្ធរវាងគ្នា និងគ្នា ទំនាក់ទំនងល្អជាមួយមន្ត្រីដែលសម្របសម្រួលការងារក្នុងវគ្គសិក្សា។ ត្រូវលើកកម្ពស់ការយល់ដឹងអំពីគោលការណ៍ នៃការងារត្រួតពិនិត្យគណបក្ស និងទំនាក់ទំនងការងាររបស់គណៈកម្មាធិការត្រួតពិនិត្យគណបក្សគ្រប់ថ្នាក់ ដើម្បីពង្រឹងការងារត្រួតពិនិត្យគណបក្សឱ្យមានប្រសិទ្ធភាពក្នុងឋានៈតួនាទី ជាជំនួយការជូនគណៈកម្មាធិការគណបក្សគ្រប់ថ្នាក់ ឬអង្គការចាត់តាំងរបស់ខ្លួន។

គួរជម្រាបថា ការងារត្រួតពិនិត្យគណបក្ស ជាសកម្មភាពមួយក្នុងសមាសភាព នៃការដឹកនាំ ការគ្រប់គ្រង ទោះក្នុងប្រទេសសង្គមនិយម ក៏ដូចជាប្រទេសសេរីក៏ដោយ។ អាស្រ័យដូច្នេះ បានជាសេចក្តីសម្រេច និងផែនការនានារបស់គណៈអចិន្ត្រៃយ៍គណៈកម្មាធិការកណ្តាលដែលបានដាក់ចុះថ្មីៗ តែងតែរំលេចពាក្យមួយក្នុងការងារត្រួតពិនិត្យគណបក្សថា «មានការដឹកនាំ ត្រូវមានការត្រួតពិនិត្យ» សំដៅដល់ការពង្រឹងត្រួតពិនិត្យ និងធ្វើឱ្យគណបក្សឈ្នះឆ្នោតជាយូរអង្វែងដឹកនាំជាតិមាតុភូមិជារៀងរហូត៕

អត្ថបទ ៖ សិរីវឌ្ឍនៈ

The post លោកស្រី មិថុនា ភូថង ៖ ការងារត្រួតពិនិត្យបក្សបានញាំងឱ្យមានការ ពង្រឹងមន្ត្រីបក្ស សំដៅដល់ការដឹកនាំមាតុភូមិជារៀងរហូត appeared first on Kampuchea Thmey Daily.

រដ្ឋបាលខេត្តកោះកុងជំរុញការដាំស្តារព្រៃឈើឡើងវិញ ដើម្បីបង្កើនភាពបៃតង

Ngoeul Narath — Thu, 19 Jun 2025 04:52:04 +0000

រដ្ឋបាលខេត្តកោះកុង បាននិងកំពុងជំរុញការដាំស្តារព្រៃឈើឡើងវិញ ដើម្បីបង្ហាញពីឆន្ទៈក្នុងការចូលរួមអភិរក្ស និងការដាំស្តារឡើងវិញនូវធនធានធម្មជាតិ ឱ្យស្របទៅតាមគោល នយោបាយរបស់រាជរដ្ឋាភិបាល និងក្រសួងបរិស្ថាន។

អភិបាលខេត្តកោះកុង លោកស្រី មិថុនា ភូថង បានឱ្យដឹងថា ក្នុងឆ្នាំ២០២៤កន្លងទៅនេះ នៅទូទាំងខេត្តកោះកុងបានដាំស្ដារព្រៃកោងការឡើងវិញបានជាងចំនួន៥ម៉ឺនដើមរួចហើយ។ លោកជំទាវ បានបន្តថា បច្ចុប្បន្ននេះ មន្ទីរបរិស្ថានខេត្ត ក៏បានបន្តបណ្តុះដើមកោងកាងបានចំនួន ជិត៣ម៉ឺនដើម សម្រាប់ត្រៀមទុកយកទៅដាំនៅកន្លែងផ្សេងៗទៀត ខណៈកូនដើមកោងកាងប្រមាណជា៥ពាន់ដើម ត្រូវបានដាំលើផ្ទៃដីចំនួន៣ហិកតា ស្ថិតនៅក្នុងភូមិសាស្ត្រនៃឃុំកោះកាពិ ស្រុកកោះកុង ខេត្តកោះកុង ដើម្បីជាផ្នែកមួយការពារឆ្នេរ ការពារពីគ្រោះធម្មជាតិ ផ្តល់ជម្រកដល់ជីវៈចម្រុះក្នុងតំបន់ទឹកប្រៃ។

អនុរដ្ឋលេខាធិការក្រសួងបរិស្ថាន លោក ខ្វៃ អាទិត្យា អះអាងថា ក្រសួងបរិស្ថាន បានរៀបចំថ្នាលបណ្តុះកូនឈើខ្នាតតូចនៅតាមមន្ទីរបរិស្ថានរាជធានី-ខេត្ត និងនៅតាមតំបន់ការពារធម្មជាតិ ដើម្បីបង្កើនសមត្ថភាពផលិតកូនឈើ ក្នុងការឆ្លើយតបនឹងតម្រូវការ និងយុទ្ធនាការ ដាំស្តារព្រៃឈើឡើងវិញ និងចែកជូនប្រជាពលរដ្ឋ ដែលមានបំណងដាំដើមឈើដោយឥតគិតថ្លៃ ក្នុងគោលបំណងចូលរួមចលនាបង្កើនគម្របបៃតងនៅកម្ពុជា។ ជាមួយគ្នានេះ ក៏បាននិងកំពុងបំផុសការចូលរួមពីសាធារណជនទូទៅ ក្នុងការចូលរួមដាំកូនឈើ ក៏ដូចជាជំរុញឱ្យពួកគាត់ស្រលាញ់ ថែរក្សា ការពារ ព្រៃឈើដែលបានចូលរួមដាំ និងព្រៃឈើធម្មជាតិ ផងដែរ។ ការថែរក្សាព្រៃឈើក៏នាំមកនូវចំណូលនៃវិស័យទេសចរណ៍ផងដែរ។

សូមបញ្ជាក់ថា អនុលោមតាមយុទ្ធសាស្រ្តបញ្ចកោណ, ក្រសួងបរិស្ថាន បានរៀបចំ«យុទ្ធសាស្រ្តចក្រាវិស័យបរិស្ថាន២០២៣-២០២៨» ក្នុងគោលបំណងតម្រង់ទិស និងចង្អុលបង្ហាញអាទិភាពការងារ ក្នុងការលើកកម្ពស់ កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកបដោយចីរភាព ក្នុងមុំចំនួន៣ គឺ «ភាពស្អាត ភាពបៃតង និងចីរភាព» សំដៅឆ្ពោះទៅសម្រេចការអភិវឌ្ឍប្រកបដោយអព្យាក្រឹតកាបូននៅឆ្នាំ២០៥០៕

អត្ថបទ៖ ង៉ិល ណារ៉ាត់

The post រដ្ឋបាលខេត្តកោះកុងជំរុញការដាំស្តារព្រៃឈើឡើងវិញ ដើម្បីបង្កើនភាពបៃតង appeared first on Kampuchea Thmey Daily.

អភិបាលខេត្ត÷ ព្រំដែនកោះកុងជាមួយថៃគ្មានភាពតានតឹងគួរឱ្យបារម្ភឡើយ, រដ្ឋបាលខេត្តបានរៀបចំទីតាំងជម្លៀសពលរដ្ឋរួចរាល់

Ngoeul Narath — Thu, 19 Jun 2025 03:41:20 +0000

អភិបាលខេត្តកោះកុង លោកស្រី មិថុនា ភូថង អះអាងថា ស្ថានការណ៍តាមបណ្ដោយបន្ទាត់ព្រំដែនខេត្តកោះកុងជាមួយប្រទេសថៃគ្មានភាពតានតឹងឬប្រឈមមុខគ្នាដោយកម្លាំងប្រដាប់អាវុធឡើយ។

លោកស្រី អភិបាលខេត្តកោះកុង ឆ្លើយនឹងសំណួរដែល”កម្ពុជាថ្មី” សួរថា តើព្រំដែនខេត្តកោះកុង ជាមួយថៃមានភាពតានតឹងដែរឬទេ? ដូច្នេះ÷”ចំពោះខេត្តកោះកុងពុំមានអ្វីគួរឲ្យកត់សម្គាល់ទេគ្រាន់តែបន្ថយម៉ោងក្នុងការបើកព្រំដែនតែប៉ុណ្ណោះ។”។

លោកស្រីអភិបាលខេត្តក៏បានឲ្យដឹងដែរថាខេត្តកោះកុងបានត្រៀមទីតាំងចំនួន៧កន្លែង សម្រាប់ជម្លៀសពលរដ្ឋដែលរស់នៅក្បែរបន្ទាត់ព្រំដែន ដែលប្រឈមនឹងគ្រោះថ្នាក់ក្នុងករណីកងកម្លាំងប្រដាប់អាវុធនៃប្រទេសទាំងពីរឈានដល់ការផ្ទុះអាវុធ។

លោកស្រីអភិបាលខេត្ត អះអាងថានៅតាមទីតាំងជម្រករដ្ឋបាលបានរៀបចំកន្លែងស្នាក់នៅបណ្ដោះអាសន្ន មធ្យោបាយដឹកជញ្ជូន ជំនួយសង្គ្រោះ ស្បៀងអាហារ ថ្នាំសង្កូវ អគ្គិសនី និងទឹកស្អាត។

លោកស្រី មិថុនា ភូថង ក៏បានឲ្យដឹងទៀតថា ខេត្តកោះកុងក៏បានអនុវត្តវិធានការបិទការនាំចូលបន្លែ ផ្លែឈើពីប្រទេសថៃដូចទៅនឹងខេត្តជាប់ព្រំដែនដទៃទៀតដូចគ្នា។

សូមរម្លឹកជាថ្មីថា ស្ថានការណ៍ព្រំដែនកម្ពុជា បានឡើងកម្ដៅជាលំដាប់ បន្ទាប់ពីកងទ័ពថៃ បានបើកការឈ្លានពាន និងលបលួចវាយប្រហារមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជា តាំងពីយូរលង់ណាស់មកហើយ នៅក្នុងភូមិសាស្ត្រភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ បណ្ដាលឱ្យវីរៈយុទ្ធជន សួន រ៉ោន បាត់បង់ជីវិតទាំងព្រឹកព្រលឹម។

ឆ្លើយតបទៅនឹងហេតុការណ៍ផ្ទុះអាវុធបង្កឡើងដោយភាគីថៃ,សម្ដេចធិបតី នាយឧត្ដមសេនីយ៍ ហ៊ុន ម៉ាណែត ប្រមុខរដ្ឋាភិបាលកម្ពុជា ដែលកំពុងបំពេញទស្សនកិច្ចនៅជប៉ុន បានបញ្ជាឱ្យចល័តទ័ព និងអាវុធធុនធ្ងន់ទៅកាន់ព្រំដែន គឺដើម្បីការពារបូរណភាពទឹកដី។

ជាមួយគ្នារដ្ឋាភិបាលកម្ពុជា តាមរយៈក្រសួងមហាផ្ទៃក៏បានណែនាំទៅកាន់អភិបាលខេត្តដែលជាប់បណ្ដោយព្រំដែនកម្ពុជាថៃត្រូវត្រៀមជម្លៀសពលរដ្ឋមកកាន់ទីតាំងដែលមានសុវត្ថិភាព។

សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត បានព្យាយាមអំពាវនាវ និងហាមឃាត់ពលរដ្ឋកម្ពុជា កុំឱ្យបញ្ឆេះស្ថានការណ៍ព្រំដែនឱ្យរាលដាលដល់កិច្ចសហប្រតិបត្តិការផ្សេងៗទៀតរាប់ទាំងពាណិជ្ជកម្មជាដើម។

ប៉ុន្តៃកងទ័ពថៃ បានបិទទ្វារព្រំដែនដោយចិត្តឯង មិនជូនដំណឹងមកកម្ពុជាជាមុនឡើយ ចំំណែកមន្ត្រីជាន់ខ្ពស់ថៃ បានគំរាមកាត់ផ្ដាច់អគ្គិសនី និងអ៊ិនធឺណិត ឈប់ផ្គត់ផ្គង់ឱ្យកម្ពុជាប្រើប្រាស់។

ជាការឆ្លើយតប កម្ពុជា បានពន្យាម៉ោងបើកទ្វារព្រំដែន និងកាត់ផ្ដាច់ឈប់ប្រើប្រាស់អ៊ិនធឺណិត និងអគ្គិសនីពីប្រទេសថៃ។

វិធានការឆ្លើយតបរបស់កម្ពុជា ត្រូវបាននាយករដ្ឋមន្ត្រីថៃ ថាកម្ពុជា យល់ច្រឡំចំពោះព័ត៌មាននេះ ប៉ុន្តែសម្ដេចតេជោ ហ៊ុន សែន បញ្ជាក់ពីវិមានព្រឹទ្ធសភាថា កម្ពុជាមិនបានយល់ច្រឡំលើរឿងនេះឡើយ។

កម្ពុជា បានឈានដល់ដំណាក់កាលបិទការចូលបន្លែ ផ្លែឈើ ពីប្រទេសថៃតាមព្រំដែន។ក្រោយស្ថានការណ៍ដើរដល់ចំណុចនេះ ភាគីថៃ បានហៅចរចាបើកព្រំដែនឡើងវិញ ប៉ុន្តែជំហររបស់កម្ពុជា គឺកងទ័ពថៃជាអ្នកបិទទ្វារព្រំដែនមុន ដូច្នេះថៃត្រូវតែបើកមុនដូចគ្នា កម្ពុជាមិនចូលទៅចរចាជាមួយថៃឡើយ៕

The post អភិបាលខេត្ត÷ ព្រំដែនកោះកុងជាមួយថៃគ្មានភាពតានតឹងគួរឱ្យបារម្ភឡើយ, រដ្ឋបាលខេត្តបានរៀបចំទីតាំងជម្លៀសពលរដ្ឋរួចរាល់ appeared first on Kampuchea Thmey Daily.

លោកស្រី មិថុនា ភូថង លើកទឹកចិត្តដល់ពលរដ្ឋបន្តចាក់វ៉ាក់សាំងការពារជំងឺកូវីដ ឡើងវិញ

អ៊ិន ពិសី — Mon, 19 May 2025 07:47:17 +0000

លោកស្រី មិថុនា ភូថង អភិបាលខេត្តកោះកុង បានជំរុញលើកទឹកចិត្តដល់ប្រជាពលរដ្ឋគ្រប់រូបបន្តចាក់វ៉ាក់សាំងបង្ការការពារជំងឺកូវីដ-១៩ ឡើងវិញ ដើម្បីការពារជាមុននូវការឈឺធ្ងន់ដែលបណ្តាលមកពីវីរុសកូវីដ-១៩ បំប្លែងថ្មី ពិសេសប្រភេទ ជិអិន ១(JN.1)។

ថ្លែងក្នុងពិធីអបអរសាទរខួបលើកទី ០៨ ទិវាជាតិ នៃការចងចាំ (ថ្ងៃទី ១៧ ខែមេសា ឆ្នាំ ១៩៧៥ ដល់ថ្ងៃទី ០៦ ខែមករា ឆ្នាំ ១៩៧៩) នៅវត្តជោត្តញ្ញាណ ក្នុងក្រុងខេមរភូមិន្ទ លោកស្រី មិថុនា ភូថង បានបង្ហាញក្តីបារម្ភជាថ្មី នៃជំងឺកូវីដ-១៩ បំប្លែងថ្មី ប្រភេទជិអិន។

ដើម្បីការពារប្រសើរជាការព្យាបាល លោកស្រីអភិបាលខេត្តកោះកុង បានអំពាវនាវលើកទឹកចិត្តដល់ប្រជាពលរដ្ឋគ្រប់រូប ត្រូវទៅចូលរួមចាក់វ៉ាក់សាំងបង្ការការពារឡើងវិញនៅតាមទីតាំងដែលមន្ទីរសុខាភិបាលរៀបចំទុកក្នុងមូលដ្ឋាន។

បញ្ហានេះដែរ លោកស្រី មិថុនា ភូថង ស្នើពលរដ្ឋទាំងអស់ការពារខ្លួនពីការឆ្លងជំងឺកូវីដ-១៩ ដោយពាក់ម៉ាស់ជាប្រចាំដែលមានមនុស្សច្រើន លាងសម្អាតដៃឱ្យបានញឹកញាប់ ករណីមានអាការក្តៅខ្លួន ផ្តាសាយ ត្រូវពាក់ម៉ាស់ ដើម្បីទប់ស្កាត់ឆ្លងទៅអ្នកដទៃ។

កាលពីថ្ងៃទី ១៧ ខែឧសភា ថ្មីៗនេះ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានដាស់តឿនឱ្យពលរដ្ឋទាំងអស់ ពិសេសក្រុមងាយរងគ្រោះ ដូចជា មនុស្សចាស់ អ្នកដែលមានជំងឺរ៉ាំរ៉ៃ និងអ្នកមានប្រព័ន្ធការពារខ្សោយ ត្រូវទៅចាក់វ៉ាក់សាំងកូវីដ-១៩ ប្រភេទភីហ្វាយហ្សឺ( Pfizer) នៅតាមមណ្ឌលសុខភាព និងមន្ទីរពេទ្យរដ្ឋនៅទូទាំងប្រទេស ចាប់ពីពេលនេះតទៅ។

មន្ត្រីជាន់ខ្ពស់ក្រសួងសុខាភិបាល ដដែល បានចាត់ទុកថា នេះជាវិធានការបង្ការនៅចំពោះមុខ ស្របពេលដែលវីរុសកូវីដ-១៩ បំប្លែងថ្មី ប្រភេទ JN.1 កំពុងធ្វើចរាចរនៅតាមបណ្តាប្រទេសជិតខាងកម្ពុជា និងតាមតំបន់ជាច្រើននៅលើពិភពលោក៕

អត្ថបទ ៖ សិរីវឌ្ឍនៈ

The post លោកស្រី មិថុនា ភូថង លើកទឹកចិត្តដល់ពលរដ្ឋបន្តចាក់វ៉ាក់សាំងការពារជំងឺកូវីដ ឡើងវិញ appeared first on Kampuchea Thmey Daily.

លោកស្រី មិថុនា ភូថង ប្រាប់រដ្ឋបាលឃុំ-សង្កាត់ បង្កើនការយកចិត្តទុកដាក់ពី សុខភាពប្រជាពលរដ្ឋ

អ៊ិន ពិសី — Wed, 23 Apr 2025 08:12:15 +0000

នៅថ្ងៃទី ២៣ ខែមេសា ឆ្នាំ ២០២៥ លោកស្រី មិថុនា ភូថង អភិបាលខេត្តកោះកុង បានប្រាប់ដល់អាជ្ញាធរឃុំ-សង្កាត់ ត្រូវបង្កើនការយកចិត្តទុកដាក់ខ្ពស់ពីសុខភាពរបស់ប្រជាពលរដ្ឋក្នុងមូលដ្ឋាន ដោយមិនទុកឱ្យពួកគាត់បញ្ហាសុខភាព ហើយគ្មានការទទួលការព្យាបាលត្រឹមត្រូវ ព្រោះតែរបាំងហិរញ្ញវត្ថុឡើយ។

ការស្នើឡើងបែបនេះរបស់លោកស្រី មិថុនា ភូថង បានធ្វើឡើងក្នុងពិធីសន្និបាតបូកសរុបសមិទ្ធផលការងារសុខាភិបាលសម្រាប់ឆ្នាំ ២០២៤ និងលើកទិសដៅការងារបន្តឆ្នាំ ២០២៥ មន្ទីរសុខាភិបាលខេត្តកោះកុង ស្ថិតនៅក្នុងក្រុងខេមរភូមិន្ទ។

លោកស្រីអភិបាលខេត្ត ពន្យល់ដល់អាជ្ញាធរមូលដ្ឋានទៀតថា អាជ្ញាធរឃុំ-សង្កាត់ នៅក្បែរប្រជាពលរដ្ឋជាងគេ ដូច្នេះសុខទុក្ខរបស់ពួកគាត់គប្បីត្រូវតែដឹង និងចុះជួយសង្គ្រោះបានទាន់ពេលវេលា ដោយមិនឱ្យអ្នកណាម្នាក់ស្លាប់ដោយគ្មានការព្យាបាលត្រឹមត្រូវ ព្រោះតែរបាំងហិរញ្ញវត្ថុឡើយ។

ដោយឡែកមន្ត្រីសុខាភិបាលវិញ លោកស្រី មិថុនា ភូថង ក៏ស្នើឱ្យបន្តពង្រឹង និងពង្រីក ការផ្តល់សេវាថែទាំសុខភាពជាបឋមកាន់តែទូលំទូលាយដល់សហគមន៍។ លើកកម្ពស់ការងារសុខុមាលភាពទារក និងកុមារ អាហារូបត្ថម្ភ ជាពិសេសការផ្តល់ថ្នាំបង្ការ។ ទប់ស្កាត់ជំងឺឆ្លង ពិសេសជំងឺឆ្លងដែលបង្កហានិភ័យខ្លាំងដល់សុខភាពសាធារណៈ។ ហើយ អាជ្ញាធរ និងមន្ត្រីជំនាញ ត្រូវសហការគ្នាកាន់តែជិតស្និទ្ធបំផុតការអប់រំណែនាំផ្នែកសុខភាព និងសង្គ្រោះព្យាបាលទាន់ពេលវេលា។

អាជ្ញាធរខេត្តកោះកុង បានចាត់ទុកថា សុខភាព គឺជាកត្តាសំខាន់បំផុតសម្រាប់ពលរដ្ឋគ្រប់គ្នា ហើយមន្ទីរពេទ្យប្រៀបបាននឹងរូបរាងកាយរបស់មនុស្ស រីឯលោកគ្រូ អ្នកគ្រូពេទ្យ គ្រប់ជាន់ថ្នាក់ និងបុគ្គលិកទាំងអស់ នៃវិស័យសុខាភិបាល គឺប្រៀបបានជាឆ្អឹងខ្នងដែលទ្រទ្រង់រាងកាយមនុស្ស។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង អះអាងថា ១ ឆ្នាំ កន្លងទៅ មន្ទីរសុខាភិបាល ទទួលបានលទ្ធផលការងារយ៉ាងល្អប្រសើរ ពិសេសវិស័យផ្តល់សេវាសុខាភិបាលឆ្នាំ ២០២៤ គ្រាដែលមន្ទីរពេទ្យបង្អែកខេត្តកោះកុងទទួលបានពានរង្វាន់ជ័យលាភីលេខ ១ បន្ថែមទៀត ជាអង្គភាពផ្តល់សេវាសុខាភិបាលល្អ។

លោកវេជ្ជបណ្ឌិត ទៅ ម៉ឹង សង្កត់ធ្ងន់ដែរថា ក្នុងនាមលោកជាប្រធានមន្ទីរសុខាភិបាល មន្ទីរពេទ្យបង្អែក និងមណ្ឌលសុខភាព នឹងប្ដេជ្ញាខិតខំធានាដោះស្រាយរាល់កង្វល់របស់ប្រជាពលរដ្ឋពាក់ព័ន្ធនឹងបញ្ហាសុខភាពឱ្យបានល្អប្រសើរបន្ថែមទៀត ហើយសម្រាប់ពលរដ្ឋគ្រប់រូបទាំងអស់ដែលបានមកទទួលសេវាសុខភាពតាមស្ថាប័នរបស់រដ្ឋ គឺគ្មានរបាំងហិរញ្ញវត្ថុឡើយ៕

អត្ថបទ ៖ សិរីវឌ្ឍនៈ

The post លោកស្រី មិថុនា ភូថង ប្រាប់រដ្ឋបាលឃុំ-សង្កាត់ បង្កើនការយកចិត្តទុកដាក់ពី សុខភាពប្រជាពលរដ្ឋ appeared first on Kampuchea Thmey Daily.

អភិបាលខេត្តកោះកុង ប្រាប់មន្ទីរអប់រំ ប្រឹងប្រែងបង្កើតសាលារៀនគំរូ ឱ្យបានកាន់តែច្រើនបន្តទៀត

អ៊ិន ពិសី — Fri, 01 Nov 2024 07:14:28 +0000

លោកស្រីអភិបាលខេត្តកោះកុង បានប្រាប់ដល់មន្ទីរអប់រំ យុវជន និងកីឡាខេត្ត ក៏ដូចជាតាមបណ្ដាសាលារៀន ប្រឹងប្រែងរៀបចំបង្កើតសាលារៀនគំរូឱ្យបានកាន់តែច្រើនបន្តទៀត ចាប់ពីមត្តេយ្យសិក្សាដល់មធ្យមសិក្សា។

ក្នុងឱកាសអញ្ជើញបើកបវេសនកាលឆ្នាំសិក្សាថ្មី ២០២៤-២០២៥ លោកស្រី មិថុនា ភូថង អភិបាលខេត្តកោះកុង ស្នើដល់ថ្នាក់ដឹកនាំមន្ទីរអប់រំ ការិយាល័យជំនាញ និងគណៈគ្រប់គ្រងសាលារៀន គប្បីពង្រឹងគុណភាពសិក្សាឱ្យបានល្អស្របតាមស្តង់ដារដែលក្រសួងអប់រំកំណត់ណែនាំអនុវត្តដំណើរប្រតិបត្តិការ ប្រសិទ្ធភាពការងាររដ្ឋបាល សុខសុវត្ថិភាព និងគណនេយ្យភាពរបស់គ្រឹះស្ថានអប់រំនីមួយៗ។

លោកស្រីអភិបាលខេត្ត បន្តទៀតថា សាលារៀនទាំងអស់ ត្រូវរៀបចំបរិស្ថានអនាម័យឱ្យបានស្អាតល្អ គ្មានកាកសំណល់សំរាម សាលារៀនត្រូវពណ៌បៃតងស្រស់បំព្រងឱ្យសក្ដិសមជាកន្លែងអប់រំ និងបណ្ដុះគំនិតស្អាតស្អំ ឥរិយាបថល្អ និងគ្មានញាំញីផ្លូវចិត្តកាយ។

លោកស្រី មិថុនា ភូថង ក៏សំណូមពរដល់លោកគ្រូអ្នកគ្រូស្វែងរកបទពិសោធវិធីសាស្ត្របង្រៀនថ្មីៗ ដើម្បីអភិវឌ្ឍន៍ចំណេះដឹងបន្ថែមផ្តល់ជូនសិស្សានុសិស្សក្នុងថ្នាក់រៀន សំដៅដល់ការលើកកម្ពស់គុណភាពអប់រំសិក្សាកាន់តែជឿនលឿនទៅមុខ។

ទន្ទឹមនេះដែរ លោកស្រីអភិបាលខេត្តកោះកុង សម្ដែងមោទនភាពជាខ្លាំងបំផុតសម្រាប់ឆ្នាំ ២០២៤ នេះ មានសិស្សានុសិស្សប្រឡងសញ្ញាបត្រមធ្យមសិក្សាទុតិយភូមិជាប់និទ្ទេស A រហូតដល់ ១៣ រូប បើធៀបនឹងឆ្នាំទៅ ២០២៣ មានតែ ៣ រូបប៉ុណ្ណោះ។ លើសពីនេះ លោកស្រី ជឿជាក់ថា ខេត្តកោះកុង នឹងកាន់តែទទួលបានធនធានមនុស្សដ៏មានសក្ដានុពលបន្ថែម សម្រាប់ដឹកនាំអភិវឌ្ឍន៍ឱ្យរីកចម្រើនទៅអនាគតយ៉ាងមានប្រសិទ្ធភាព។

លោក ង៉ែត ឡឹង ប្រធានមន្ទីរអប់រំ យុវជន និងកីឡាខេត្តកោះកុង បង្ហាញថា អគារសិក្សាមានសរុបចំនួន ២៩៧ ខ្នង ស្មើនឹង ១ ៣២៣ បន្ទប់ ក្នុងនោះ មត្តេយ្យមានចំនួន ២៤ ខ្នង ស្មើនឹង ៩៩ បន្ទប់ បឋមសិក្សាមានចំនួន ២០៦ ខ្នង ស្មើនឹង ៧៧៨ បន្ទប់ មធ្យមសិក្សាបឋមភូមិ និងទុតិយភូមិ មានចំនួន ៦៧ ខ្នង ស្មើ ៤៤៦ បន្ទប់។

លោក ង៉ែត ឡឹង បន្តថា កម្រិតមត្តេយ្យសិក្សា ៖ ចំនួនសិស្សបានឆ្លងកាត់មត្តេយ្យទៅរៀនថ្នាក់ទី ១ សរុបចំនួន ២ ០២៩ នាក់ ស្រី ៩៨៥ នាក់។ កម្រិតបឋមសិក្សា ៖ ចំនួនសិស្សបានឆ្លងភូមិសិក្សាពីថ្នាក់ទី ៦ ទៅថ្នាក់ទី ៧ សរុបចំនួន ២ ១១៧ នាក់ ស្មើ ៨៩.៧០% ស្រី ១ ០៥៧ នាក់ ស្មើ ៩២.១០%។ កម្រិតមធ្យមសិក្សាបឋមភូមិ ៖ សិស្សប្រឡងជាប់សរុបចំនួន ១ ៤០៥ នាក់ ស្រី ៧៦៤ នាក់។

ជាទិសដៅរបស់មន្ទីរអប់រំ យុវជន និងកីឡាខេត្ត កំពុងប្ដេជ្ញាពង្រឹង និងគាំទ្របច្ចេកទេសដល់សាលារៀនអនុវត្តស្តង់ដារគំរូបន្ថែមនៅក្នុងសហគមន៍មូលដ្ឋាន។ លើកគម្រោងស្នើសុំសាងសង់ និងជួសជុលអគារដែលខូចខាត ទៅក្រសួងអប់រំ យុវជន និងកីឡា។ បន្តពង្រឹងសមត្ថភាពមន្ត្រីអប់រំគ្រប់លំដាប់ថ្នាក់ ពាក់ព័ន្ធនឹងវិស័យអប់រំ ពិសេសការរៀន និងបង្រៀន ចាប់ពីមត្តេយ្យសិក្សារហូតដល់មធ្យមសិក្សាទុតិយភូមិ ពិសេសឱ្យស្របទៅតាមសម័យកាលបច្ចេកវិទ្យាទំនើបជាដើម៕

អត្ថបទ ៖ សិរីវឌ្ឍនៈ

The post អភិបាលខេត្តកោះកុង ប្រាប់មន្ទីរអប់រំ ប្រឹងប្រែងបង្កើតសាលារៀនគំរូ ឱ្យបានកាន់តែច្រើនបន្តទៀត appeared first on Kampuchea Thmey Daily.