លោក ខូវ ឆាយ Archives - Kampuchea Thmey Daily

សហព័ន្ធប្រដាល់គុនខ្មែរ ទទួលបានអង្ករ ១០តោនពីក្រុមហ៊ុន Khmer Beverages ជួយដល់វីរកងទ័ព

Sina Noun — Fri, 02 Jan 2026 07:51:03 +0000

សហព័ន្ធប្រដាល់គុនខ្មែរ ដែលដឹកនាំដោយប្រធានសហព័ន្ធ លោក ខូវ ឆាយ បានទទួលអំណោយសប្បុរសធម៌ពីក្រុមហ៊ុន Khmer Beverages នូវអង្ករចំនួន ១០តោន រួមទាំងភេសជ្ជៈមួយចំនួនធំទៀតដើម្បីយកទៅជួយដល់វីរកងទ័ពជួរមុខ និងជនភៀសសឹកដែលរងគ្រោះពីការឈ្លានពានកន្លងទៅនេះ។

រូបភាពលើផេកសហព័ន្ធ

នេះបើតាមការផ្សព្វផ្សាយនៅលើហ្វេសបុកផេកសហព័ន្ធ នៅមុននេះបានបញ្ជាក់ថា លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ សូមថ្លែងអំណរគុណយ៉ាងជ្រាលជ្រៅចំពោះ ក្រុមហ៊ុនខ្មែរប៊ីវើរីកជីស (Khmer Beverages) បានផ្តល់នូវអំណោយមានអង្ករ ១០តោន ទឹកសុទ្ធ ២០០កេះ ភេសជ្ជៈអេចស្ព្រេស ២០០កេះ ដល់សហព័ន្ធដើម្បីចុះជួយវីរកងទ័ពជួរមុខ និងជនភៀសសឹក ដែលរងគ្រោះដោយសារសង្គ្រាមឈ្លានពានពីទាហានសៀម។

រូបភាពលើផេកសហព័ន្ធ

បន្ទាប់ពីមានការឈ្លានពានពីសំណាក់ប្រទេសសៀមមកលើកម្ពុជាកន្លងទៅនេះ បានធ្វើឲ្យកងទ័ពកម្ពុជាចំនួនត្រូវពលីលើសមរភូមិន និងមានក្រុមគ្រួសារកងទ័ព ប្រជាពលរដ្ឋជាច្រើនម៉ឺននាក់រងគ្រោះត្រូវភៀសខ្លួនពីផ្ទះសម្បែងដើម្បីរកកន្លែងសុខសុវត្ថិភាព។ ការចាក់ចេញដោយទុកផ្ទះសម្បែងចោល ទុកសម្ភារប្រើប្រាស់ និងទាំងសត្វពាហនៈផ្សេងៗគឺមានផលប៉ះពាលជាខ្លាំង។ ដូច្នេះហើយអំឡុងពេលឈ្លានពាននេះចលនាសប្បុរសធម៌ និងការរៃអង្គាសពីមហាជនមានជាច្រើនដើម្បីជួយដល់វីរកងទ័ពនៅសមរភូមិ និងជនភៀសសឹកកន្លងមកក្នុង ស្មារតីខ្មែរតែមួយ ខ្មែរស្រឡាញ់ខ្មែរ ដើម្បីសម្រាលដល់ការលំបាក់ផ្សេងៗ។ យ៉ាងណាជាក់ស្ដែងដូចជាក្រុមហ៊ុន Khmer Beverages ផងដែរដែលបានផ្ដល់អំណោយតាមរយៈសហព័ន្ធប្រដាល់គុនខ្មែរនេះនឹងជួយដោះស្រាយការលំបាកបានមួយកម្រិតនៅក្នុងស្ថានភាពជាក់ស្ដែងនេះ៕

អត្ថបទដោយ៖ នួន ស៊ីណា

The post សហព័ន្ធប្រដាល់គុនខ្មែរ ទទួលបានអង្ករ ១០តោនពីក្រុមហ៊ុន Khmer Beverages ជួយដល់វីរកងទ័ព appeared first on Kampuchea Thmey Daily.

សហព័ន្ធប្រដាល់គុនខ្មែរ ប្រកាន់ជំហរមិនទាន់បើកការប្រកួតឡើងវិញកាលៈទេសៈកងទ័ពខ្មែរនៅបាញ់គ្នា និងជនភៀសសឹកកំពុងវេទនាតាមព្រំដែន

Sina Noun — Wed, 17 Dec 2025 03:54:01 +0000

បន្ទាប់ពីមានការបង្ហោះសារផ្សេងៗលើហ្វេសបុកអំពីការផ្អាកសកម្មភាពប្រកួត និងចង់ឲ្យបើកការប្រកួតប្រដាល់គុនខ្មែរឡើងវិញអំឡុងពេលនេះ លោក ខូវ ឆាយ បានឆ្លើយតបកាលពីម្សិលមិញដោយការសុំយោគយល់ពីគ្រប់ភាគីពាក់ព័ន្ធអំឡុងកាលៈទេសៈកងទ័ពខ្មែរកំពុងនៅបាញ់គ្នាឯព្រំដែននៅឡើយ ខណៈមានជនភៀសសឹកឡើងដល់ជាង ៤០ម៉ឺននាក់។

លោក ខូវ ឆាយ

លោក ខូវ ឆាយ ប្រធានសហព័ន្ធប្រដាល់គុនខ្មែរ បានបង្ហោះសារនៅលើហ្វេសបុកផេករបស់ខ្លួនថា ដោយមានការស្នើសុំពីម្ចាស់ឧបត្ថម្ភកម្មវិធី ម្ចាស់ស្ថានីយទូរទស្សន៍ ដៃគូអភិវឌ្ឍ ក៏បានឯកភាពគ្នាក្នុងការផ្អាកការប្រកួតប្រដាល់គុនខ្មែរគ្រប់កម្មវិធីទាំងអស់នៅទូទាំងប្រទេស ចាប់ពីថ្ងៃទី៧ ខែធ្នូ ២០២៥ ក្នុងកំឡុងពេលដែលកម្ពុជាទទួលរងនូវការឈ្លានពានពីយោធាសៀម។

កន្លែងជនភៀសសឹក

ប្រធានសហព័ន្ធខាងលើបញ្ជាក់ទៀតថា ក្នុងកាលៈទេសៈនេះក្នុងនាមជាពលរដ្ឋខ្មែរត្រូវរួបរួមគ្នាគ្រប់និន្នាការ គ្រប់រូបភាព គ្រប់មធ្យោបាយ ដើម្បីគាំទ្រដល់ វីរកងទ័ពជួរមុខខ្មែរប្រយុទ្ធតតាំង ដេញចោរឈ្លានពានអោយខ្ចាត់ខ្ចាយចេញអស់ពីទឹកដី។

ទិដ្ឋភាពរងគ្រោះរបស់កម្ពុជា

ក្នុងស្ថានភាពកងទ័ពកំពុងប្រយុទ្ធគ្នាជាខ្លាំងនៅតាមបណ្ដោយព្រំដែននៅឡើយ លោកស្នើសុំការយោគយល់ពីគ្រប់ភាគីពាក់ព័ន្ធក្នុងវិស័យគុនខ្មែរទាំងមូលដែលកំពុងទទួលរងផលប៉ះពាល់ ដោយសារការផ្អាកសកម្មភាពប្រកួតនេះ។ ប្រធានសហព័ន្ធរូបនេះអំពាវនាវ ដល់កីឡាករ កីឡាការិនីយើងទាំងអស់ សូមអត់ធ្មត់បន្តការប្រឹងប្រែងហ្វឹកហាត់ជាប់ជាប្រចាំដើម្បីរក្សាគុណផលកីឡាអោយបានល្អ និងបន្តជឿជាក់លើរដ្ឋាភិបាលដែលដឹកនាំដោយសម្តេចតេជោ-ធិបតី នឹងយកឈ្នះលើសត្រូវឈ្លានពានទាំងលើសមរភូមិសឹក និងសមរភូមិការទូត ដើម្បីបញ្ចប់សង្គ្រាមឈ្លានពាននេះព្រមទាំងវិលរកជីវភាពប្រក្រតីវិញក្នុងពេលដ៏ខ្លីខាងមុខ។

ដូចបានបញ្ជាក់ខាងលើចាប់តាំងពីមានការឈ្លានពានជាលើកទី២ ពីសំណាក់ប្រទេសសៀមមកលើកម្ពុជាតាំងពីថ្ងៃទី៧ ខែធ្នូ ២០២៥ រហូតមកដល់ពេលនេះនៅមិនទាន់បានបញ្ឈប់នៅឡើយទេ។ ការប្រយុទ្ធគ្នានៅតាមបណ្ដោយព្រំដែនកាន់តែរីកធំទៅៗស្របពេលទុក្ខលំបាកក៏មានកាន់តែច្រើនមិនថាក្រុមគ្រួសារវីរកងទ័ព រួមទាំងជនភៀសសឹកឡើងរហូតខ្ទង់ ៤០ម៉ឺននាក់ហើយ៕

អត្ថបទដោយ៖ នួន ស៊ីណា

The post សហព័ន្ធប្រដាល់គុនខ្មែរ ប្រកាន់ជំហរមិនទាន់បើកការប្រកួតឡើងវិញកាលៈទេសៈកងទ័ពខ្មែរនៅបាញ់គ្នា និងជនភៀសសឹកកំពុងវេទនាតាមព្រំដែន appeared first on Kampuchea Thmey Daily.

លោក ខូវ ឆាយ ធ្វើវីដេអូអរគុណចំពោះវីរកងទ័ពដែលបានតស៊ូការពារទឹកដីពីសត្រូវឈ្លានពាន

Sina Noun — Sun, 14 Dec 2025 03:05:42 +0000

លោក ខូវ ឆាយ បានធ្វើវីដេអូថ្លែងអំណរគុណ និងដឹងគុណដល់វីរកងទ័ពដែលកំពុងឈរជើង និងច្បាំងតាមបណ្ដោយព្រំដែនជាមួយសត្រូវឲ្យទទួលបានជ័យជម្នះ និងមានសុខសុវត្ថិភាពទាំងអស់គ្នានាពេលនេះ។

លោក ខូវ ឆាយ

លោក ខូវ ឆាយ ដែលគេដឹងថាជាប្រធានសហព័ន្ធប្រដាល់គុនខ្មែរ បានបង្ហោះវីដេអូមួយដែលថ្លែងអំណរគុណ និងដឹងគុណចំពោះការលះបង់តស៊ូប្រយុទ្ធយ៉ាងអង់អាចក្លាហានរបស់វីរកងទ័ពនៅតាមបណ្ដោយព្រំដែន។ លោកជូនពរឲ្យវីរកងទ័ពមានសុវត្ថិភាព និងច្បាំងឈ្នះសត្រូវឈ្លានពាននៅពេលនេះ។

លោក ខូវ ឆាយ

ប្រធានសហព័ន្ធរូបនេះបន្តទៀតថា រូបលោកផ្ទាល់ រួមទាំងប្រជាជនកម្ពុជាទាំងអស់គ្នានៅខាងក្រោយគឺនៅគាំទ្រជានិច្ច និងរួមគ្នាជាមួយវីរកងទ័ពដើម្បីការពារបូរណភាពទឹកដីខ្មែរឲ្យនៅគង់វង្ស។

បញ្ជាក់ដែរថា ការឈ្លានពានពីសំណាក់ប្រទេសសៀមមកលើកម្ពុជាគឺតាំងពីថ្ងៃទី៧ ខែធ្នូ ឆ្នាំ២០២៥ មកដល់ពេលនេះនៅមិនទាន់បានបញ្ឈប់នៅឡើយនទេ។ ប្រជាពលរដ្ឋខ្មែររាប់ម៉ឺននាក់ត្រូវជម្លៀសចេញពីផ្ទះសម្បែង និងកំពុងជួបការលំបាកជាខ្លាំង៕

អត្ថបទដោយ៖ នួន ស៊ីណា

The post លោក ខូវ ឆាយ ធ្វើវីដេអូអរគុណចំពោះវីរកងទ័ពដែលបានតស៊ូការពារទឹកដីពីសត្រូវឈ្លានពាន appeared first on Kampuchea Thmey Daily.

លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ

Sina Noun — Tue, 02 Dec 2025 02:27:36 +0000

លោក ខូវ ឆាយ សារភាពថាអំឡុងការប្រកួតរបស់កីឡាករ អេ អាំម៉ារីនភូថង ការពារខ្សែក្រវាត់ជាមួយ Mo Abdurahman សូម្បីតែលោកក៏មើលធុញចំពោះការប្រកួតនោះដែរ ដូច្នេះអ្នកប្រកួតក្រោយៗត្រូវមានស្មារតីប្រយុទ្ធមោះមុតជាងនេះ។

លោក ខូវ ឆាយ ប្រធានសហព័ន្ធ

លោក ខូវ ឆាយ ប្រធានសហព័ន្ធប្រដាល់គុនខ្មែរបានឲ្យដឹងថា ការប្រកួតការពារខ្សែក្រវាត់របស់ អេ អាំម៉ារីនភូថង កាលពីថ្ងៃទី២៨ ខែវិច្ឆិកា ឆ្នាំ២០២៥ នេះមានការវែកញែកច្រើនពីមហាជន និងលើកឡើងជាការប្រកួតអត់ល្អមើល។ សូម្បីតែលោកផ្ទាល់ក៏មើលឃើញថាអត់ល្អមើល ធុញ ចំពោះការប្រកួតមួយនេះដែរ។

ប្រធានសហព័ន្ធប្រដាល់ខាងលើបន្តទៀតថា ដោយសារតែ អេ អាំម៉ារីនភថង ថយខ្លាំងពេក ខណៈកីឡាករអង់គ្លេស Mo Abdurahman ដើរបុក មានស្មារតីប្រយុទ្ធមោះមុតជាងទើបធ្វើឲ្យមហាជនយល់ឃើញថារូបគេសមឈ្នះការប្រកួតមួយនេះ។

ទិដ្ឋភាពពិនិត្យការដាក់ពិន្ទុឡើងវិញ

យ៉ាងណាក្រោយពិនិត្យលើការពិន្ទុឡើងវិញហើយនោះគឺលទ្ធផលនៅតែ អេ អាំម៉ារីនភូថង ឈ្នះដដែល ដូច្នេះលទ្ធផលមិនមានអ្វីផ្លាស់ប្ដូរនោះឡើយ។ មួយវិញទៀតកីឡាករបរទេសថ្វីត្បិតដើរចូលមែន ប៉ុន្តែវាយក៏មិនសូវបានដូចគ្នា។ ការសរុបពិន្ទុប្រកួតឡើងវិញគឺប្រហាក់ប្រហែលគ្នាមែន ប៉ុន្តែអតិភាពឈ្នះគឺផ្ដល់ទៅឲ្យម្ចាស់ការពារខ្សែក្រវាត់ហើយលុះត្រាអ្នកមកដណ្ដើមវាយបានច្រើនដាច់ពិន្ទុទើបអាចទទួលបានជ័យជម្នះ។

ទិដ្ឋភាពពិនិត្យការដាក់ពិន្ទុឡើងវិញ

ប្រធានសហព័ន្ធរូបនេះបន្តទៀតថា ការប្រកួតដណ្ដើមខ្សែក្រវាត់លើកក្រោយៗកីឡាករត្រូវមានទឹកចិត្តប្រយុទ្ធឲ្យខ្លាំងមោះមុតជាងនេះដើម្បីឲ្យសមជាគូឯក គូដណ្ដើមខ្សែក្រវាត់ ព្រោះមានអ្នកគាំទ្រ មានម្ចាស់ឧបត្ថម្ភសុទ្ធសឹងតែជាអ្នកចាំទស្សនា។

ទិដ្ឋភាពពិនិត្យការដាក់ពិន្ទុឡើងវិញ

បញ្ជាក់ដែរថា កាលរសៀលថ្ងៃទី១ ខែធ្នូ ឆ្នាំ២០២៥ ម្សិលមិញនេះសហព័ន្ធប្រដាល់គុនខ្មែរដឹកនាំដោយលោក ខូវ ឆាយ បានបើកកិច្ចប្រជុំពិនិត្យការដាក់ពិន្ទុឡើងវិញរវាងការប្រកួតរបស់ អេ អាំម៉ារីនភូថង និងកីឡាករបរទេស Mo Abdurahman ក្នុងនោះលទ្ធផលគឺនៅតែកូនប្រុសលោក អេ ភូថង ឈ្នះដដែល។ ការសើរើលទ្ធផលប្រកួតរបស់ អេ អាំម៉ារីនភូថង នេះបន្ទាប់ពីរូបគេប្រកួតការពារខ្សែក្រវាត់នៅថ្ងៃទី២៨ វិច្ឆិកា ២០២៥ ថយពេក និងមិនសូវវាយរហូតអ្នកគាំទ្ររិះគន់ថាមិនសមឈ្នះការប្រកួតនោះឡើយ៕

រូបភាពហ្វេសបុកផេកថោន

អត្ថបទដោយ៖ នួន ស៊ីណា

The post លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ appeared first on Kampuchea Thmey Daily.

លោក ខូវ ឆាយ ថា ការបង់ប្រាក់ ១លានរៀល សម្រាប់ខ្សែក្រវាត់គឺដើម្បីពង្រឹងគុណភាព និងការអភិវឌ្ឍ

chean virakbot — Tue, 02 Dec 2025 02:03:19 +0000

រាល់ការប្រកួតដណ្តើមខ្សែក្រវាត់តែ ១ ប្រកួត ការប្រកួតវិលជុំច្រើនសប្តាហ៍ ការប្រកួតដណ្តើមខ្សែក្រវាត់ម៉ារ៉ាតុង និងការប្រកួតខ្សែក្រវាត់ថ្នាលយុវជន ទាំងកម្រិតជាតិ និងអន្តរជាតិ សុទ្ធតែតម្រូវឲ្យបង់ប្រាក់ចំនួន ១ លានរៀលដល់សហព័ន្ធកីឡាប្រដាល់គុនខ្មែរ ដោយអនុវត្តចាប់ពីឆ្នាំ ២០២៦។

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានប្រាប់សារព័ត៌មាន«កម្ពុជាថ្មី»នៅព្រឹកថ្ងៃទី១ ខែធ្នូ ឆ្នាំ ២០២៥ ថា គោលការណ៍នេះគឺជាផ្នែកមួយជួយពង្រឹងដល់មន្ត្រីរៀបចំការប្រកួត ធ្វើឲ្យខ្សែក្រវាត់មានតម្លៃ និងអភិវឌ្ឍគុនខ្មែរ។

ការជួយពង្រឹកមន្ត្រីរៀបចំការប្រកួត

លោក ខូវ ឆាយ បានលើកឡើងថា ការប្រកួតខ្សែក្រវាត់កន្លងមក ធ្លាប់មានបញ្ហាច្រើនពាក់ព័ន្ធនឹងលទ្ធផល។ ក្រោយការប្រកួត កីឡាករតែងតែតវ៉ាអំពីលទ្ធផល។ កីឡាករដែលមានការប្រកួតប្រជែងប្រហាក់ប្រហែលគ្នា កីឡាករម្នាក់ៗកម្រទទួលស្គាល់ថា ខ្លួនឯងចាញ់ ដូច្នេះឲ្យតែកាត់សេចក្តីចេញមកខាងណាឈ្នះ ខាងណាចាញ់ក៏តវ៉ា។ ដើម្បីពង្រឹងការដឹកនាំការប្រកួតដណ្តើមខ្សែក្រវាត់ឲ្យបានល្អប្រសើរ ក៏ត្រូវមានមន្ត្រីមានកម្រិតខ្ពស់ដឹកនាំ។

លោកបានបន្តថា ការឧបត្ថម្ភដល់មន្ត្រីដឹកនាំការប្រកួតដណ្តើមខ្សែក្រវាត់ឲ្យសមស្របទៅតាមការប្រកួតដណ្តើមខ្សែក្រវាត់។ ការប្រកួតដណ្តើមខ្សែក្រវាត់កន្លងមកប្រាក់រង្វាន់ច្រើនដូចជា ១០លានរៀល ២០លានរៀល ៣០លានរៀល ៤០លានរៀល ហើយមានច្រើនជាងនេះទៀត ប៉ុន្តែមន្ត្រីដឹកនាំការប្រកួតទាំងអាជ្ញាកណ្តាល ចៅក្រម និងគណៈកម្មការ ទទួលបានកម្រៃត្រឹមតែ ១០ម៉ឺនរៀល ដដែល។ សហព័ន្ធចង់ពង្រឹងឲ្យមានសមាមាត្រគ្នា ការប្រកួតខ្សែក្រវាត់ដែលមានប្រាក់រង្វាន់ ប្រាក់ឧបត្ថម្ភដល់មន្ត្រីរៀបចំការប្រកួតក៏ត្រូវបង្កើនដែរ ដូច្នេះហើយបានជាទាមទារឲ្យម្ចាស់កម្មវិធីត្រូវបង់ប្រាក់។

ការធ្វើឲ្យខ្សែក្រវាត់មានតម្លៃ

ប្រធានសហព័ន្ធប្រដាល់គុនខ្មែរបានរៀបរាប់ទៀតថា ការបង់ប្រាក់ក៏រាប់បញ្ចូលតម្លៃអាជ្ញាប័ណ្ណខ្សែក្រវាត់ (License) ផងដែរ។ នៅក្រៅប្រទេស ការប្រកួតដណ្តើមខ្សែក្រវាត់ អ្នករៀបចំត្រូវតែបង់ប្រាក់សម្រាប់ការប្រើឈ្មោះខ្សែក្រវាត់ឲ្យទៅស្ថាប័នគ្រប់គ្រងខ្សែក្រវាត់នោះដល់រាប់ពាន់ដុល្លារក៏មានដូចជា WBC ជាដើម។

លោកបានបន្តថា សម្រាប់គុនខ្មែរ កន្លងមកអត់ធ្លាប់យកតម្លៃក្នុងការប្រើប្រាស់គុនខ្មែរ ភ្ជាប់ទៅនឹងឈ្មោះខ្សែក្រវាត់ផ្សេងៗទេដូចជា ISKA Kun Khmer, WBC Kun Khmer, IPCC Kun Khmer ជាដើម។ ដូច្នេះហើយបានជាសហព័ន្ធទាមទារឲ្យបង់ថវិកាខ្លះដើម្បីឲ្យខ្សែក្រវាត់មានតម្លៃក្នុងការប្រើប្រាស់។ មិនមែនចេះតែរៀបចំការប្រកួតណ្តើមខ្សែក្រវាត់តាមចិត្ត ហើយក៏មិនចង់ឲ្យមានខ្សែក្រវាត់ច្រើន ប៉ុន្តែគ្មានតម្លៃនោះទេ។

ការឧបត្ថម្ភគាំទ្រ និងការអភិវឌ្ឍ

លោក ខូវ ឆាយ បានបន្តទៀតថា សហព័ន្ធក៏ត្រូវយកថវិកាទៅប្រើប្រាស់ក្នុងការអភិវឌ្ឍគុនខ្មែរក្នុងការប្រើប្រាស់លើកិច្ចការរដ្ឋបាល យកទៅអភិវឌ្ឍថ្នាលគុនខ្មែរ និងជួយដល់ក្លិបគុនខ្មែរដែលខ្វះខាតទាំងនៅក្នុងទីក្រុង និងខេត្តឆ្ងាយៗ។ ការជួយឧបត្ថម្ភគាំទ្រទាំងសម្ភារៈ និងម្ហូបអាហារជាដើម។ ជាមួយគ្នានេះ ការប្រកួតគុនខ្មែរជើងឯកថ្នាក់ជាតិរាល់ឆ្នាំគឺ សហព័ន្ធចំណាយច្រើនណាស់ បើទោះជាមានម្ចាស់ឧបត្ថម្ភក៏ដោយ ដូច្នេះហើយបានជាការប្រកួតជើងឯកថ្នាក់ជាតិម្តងគឺប្រាក់រង្វាន់កាន់តែច្រើនសម្រាប់ម្ចាស់មេដាយមាស ប្រាក់ និងសំរិទ្ធ៕

អត្ថបទ៖ វីរបុត្រ

The post លោក ខូវ ឆាយ ថា ការបង់ប្រាក់ ១លានរៀល សម្រាប់ខ្សែក្រវាត់គឺដើម្បីពង្រឹងគុណភាព និងការអភិវឌ្ឍ appeared first on Kampuchea Thmey Daily.

សហព័ន្ធគុនខ្មែរ កំពុងខ្វះគ្រូបញ្ជូនទៅបង្ហាត់នៅប្រទេសចិន

chean virakbot — Fri, 05 Sep 2025 01:26:33 +0000

សហព័ន្ធកីឡាប្រដាល់គុនខ្មែរ កំពុងខ្វះគ្រូបង្ហាត់ដើម្បីបញ្ជូនទៅបណ្តុះបណ្តាលនៅប្រទេសចិនដែលមានក្លិបប្រដាល់គុនខ្មែរបើកដំណើរការជាបន្តបន្ទាប់នាមួយរយៈពេលចុងក្រោយ។

លោក ខូវ ឆាយ

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានប្រាប់«កម្ពុជាថ្មី»ថា ៖«រហូតដល់ពេលនេះ ពាក់ព័ន្ធនឹងការបើកក្លិបថ្មីៗនៅប្រទេសចិនមានច្រើន ដែលគេត្រៀមបើកក្លិបប្រដាល់គុនខ្មែរ ប៉ុន្តែអ្វីដែលសំខាន់គឺពេលនេះ យើងអត់មានធនធានគ្រូបង្ហាត់ដើម្បីបញ្ជូនទៅទេ។ ទោះបីជាយើងបើកក្លិបប្រដាល់គុនខ្មែរច្រើនយ៉ាងណានៅប្រទេសចិនក៏ដោយ តែកង្វះខាតគ្រូបង្ហាត់នៅតែជាបញ្ហាចម្បងសម្រាប់យើង»។

ដើម្បីឆ្លើយតបនឹងកង្វះខាតគ្រូបង្ហាត់ លោក ខូវ ឆាយ បានឲ្យដឹងថា ៖«បច្ចុប្បន្ននេះ យើងកំពុងផ្តោតលើការបណ្តុះបណ្តាលធនធានគ្រូបង្ហាត់ជាមុនសិន។ យើងមានវគ្គបណ្តុះបណ្តាលគ្រូបង្វឹកជាបន្តបន្ទាប់ ដើម្បីឲ្យអតីតកីឡាករប្រដាល់គុនខ្មែរ ឬក៏គ្រូដែលធ្លាប់បង្ហាត់នៅក្នុងស្រុកយើងបានរៀនសូត្រត្រឹមត្រូវ។ យើងត្រូវបណ្តុះបណ្តាលពួកគាត់ឲ្យចេះច្បាប់ទម្លាប់ គោលការ របៀបវារៈ និងបច្ចេកទេសបង្វឹកបង្ហាត់ជាមុនសិន»។

លោកបានសង្កត់ធ្ងន់ថា ៖«ជាពិសេសឲ្យពួកគាត់មានគរុកោសល្យត្រឹមត្រូវ ដើម្បីឲ្យពួកគាត់បង្ហាត់បង្រៀនស្របតាមគោលការច្បាស់លាស់ ហើយក៏បំពេញបន្ថែមនូវភាសាបរទេសផងដែរ ដើម្បីឲ្យពួកគាត់ទៅបង្ហាត់បង្រៀននៅប្រទេសចិនបាន»។

ក្នុងឆ្នាំ ២០២៥ ក្លិបប្រដាល់គុនខ្មែរមួយចំនួនត្រូវបានបើកនៅប្រទេសចិនតាមរយៈកិច្ចសហប្រតិបត្តិការរវាង សហព័ន្ធកីឡាប្រដាល់គុនខ្មែរ និងដៃគូវិនិយោគនៅប្រទេសចិន។ កិច្ចសហប្រតបត្តិការទាំងនេះបានផ្តល់ឲ្យមានការបណ្តុះបណ្តាល និងព្រឹត្តិការណ៍ប្រកួតអន្តរជាតិនៅប្រទេសចិន។ ជាមួយគ្នានេះ អ្នកវិនិយោគចិនក៏បានមកបើកក្លិបប្រដាល់ និងវិទ្យាស្ថានគុនខ្មែរនៅប្រទេសកម្ពុជា។

សហព័ន្ធនឹងរៀបចំការប្រកួតគុនខ្មែរមិត្តភាពអន្តរជាតិពីរកម្មវិធីនៅប្រទេសកម្ពុជា។ ទី១ ការប្រកួតមិត្តភាពអន្តរជាតិ នៅខេត្តសៀមរាប ដែលមានរយៈពេល ២ ថ្ងៃ គឺថ្ងៃទី១៣-១៥ ខែកញ្ញា ឆ្នាំ ២០២៥ ជាការប្រកួតមិត្តភាពអន្តរជាតិ រវាងកម្ពុជា សហរដ្ឋអាមេរិក ចិន និង ម៉ាឡេស៊ី។ ទី២ នៅថ្ងៃទី៧ ខែតុលា ឆ្នាំ ២០២៥ ព្រឹត្តិការណ៍ប្រកួតគុនខ្មែរដ៏ធំធ្វើនៅក្នុងទិវាបុណ្យជាតិរបស់ប្រទេសចិន៕

អត្ថបទ៖ វីរបុត្រ

The post សហព័ន្ធគុនខ្មែរ កំពុងខ្វះគ្រូបញ្ជូនទៅបង្ហាត់នៅប្រទេសចិន appeared first on Kampuchea Thmey Daily.

សប្តាហ៍ក្រោយ ការប្រកួតគុនខ្មែរអន្តរជាតិ ២ថ្ងៃនៅសៀមរាប មុនព្រឹត្តិការណ៍ដ៏ធំនៅចិនខែក្រោយ

chean virakbot — Wed, 03 Sep 2025 07:07:57 +0000

សហព័ន្ធកីឡាប្រដាល់គុនខ្មែរនឹងរៀបចំព្រឹត្តិការណ៍ការប្រកួតគុនខ្មែរអន្តរជាតិ រយៈពេល ២ ថ្ងៃនៅខេត្តសៀមរាប និងព្រឹត្តិការណ៍គុនខ្មែរដ៏ធំមួយទៀតនៅប្រទេសចិននាពេលដ៏ខ្លីខាងមុខ។

លោក ខូវ ឆាយ

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រាប់«កម្ពុជាថ្មី»ថា សហព័ន្ធនឹងរៀបចំការប្រកួតគុនខ្មែរមិត្តភាពអន្តរជាតិ២ថ្ងៃនៅខេត្តសៀមរាប។ ការប្រកួតមិត្តភាពអន្តរជាតិ នៅខេត្តសៀមរាប គឺថ្ងៃទី១៣ ខែកញ្ញា ឆ្នាំ ២០២៥ ជាការប្រកួតមិត្តភាពអន្តរជាតិ រវាងកម្ពុជា និង សហរដ្ឋអាមេរិក ព្រមទាំង កម្ពុជា ជាមួយ ម៉ាឡេស៊ី។ នៅថ្ងៃទី១៤ ខែកញ្ញា ឆ្នាំ ២០២៥ ជាការប្រកួតថ្ងៃទី២ រវាង កម្ពុជា និងចិន ដែលដៃគូចិនមករៀបចំផ្ទាល់នៅកម្ពុជា។

លោក ខូវ ឆាយ បានបន្ថែមទៀតថា មិនត្រឹមតែប៉ុណ្ណោះ សហព័ន្ធកីឡាប្រដាល់គុនខ្មែរ និងភាគីចិនរួមដៃគ្នា នឹងរៀបចំព្រឹត្តិការណ៍ប្រកួតគុនខ្មែរអន្តរជាតិដ៏ធំ នៅប្រទេសចិន នាថ្ងៃទី៧ ខែតុលា ឆ្នាំ ២០២៥។ ព្រឹត្តិការណ៍ប្រកួតគុនខ្មែរអន្តរជាតិដ៏ធំនេះ ធ្វើឡើងនៅក្នុងទិវាបុណ្យជាតិរបស់ប្រទេសចិន។

ក្លិបប្រដាល់គុនខ្មែរនៅប្រទេសចិន

«តាមផែនការគ្រោងទុកនឹងមានអ្នកទស្សនាផ្ទាល់ច្រើនបំផុតរហូតរាប់ម៉ឺននាក់នៅប្រទេសចិន។ ជាពិសេស ខាងកម្ពុជាយើងបានត្រៀមបញ្ជូនកីឡាករ កីឡាការិនីកម្រិតខ្ពស់ៗ ឆ្នើមៗ ទៅចូលរួមប្រកួតក្នុងព្រឹត្តិការណ៍ដ៏ធំនេះ»។ ប្រធានសហព័ន្ធកីឡាគុនខ្មែរបានបញ្ជាក់។

កីឡាករគុនខ្មែរប្រកួតនៅចិនកន្លងមក

មួយរយៈពេលចុងក្រោយនេះ អ្នកវិនិយោគចិនកាន់តែច្រើនបានចាប់អារម្មណ៍លើកីឡាប្រដាល់គុនខ្មែរតាមរយៈកិច្ចសហការជាមួយសហព័ន្ធកីឡាប្រដាល់គុនខ្មែរលើការបណ្តុះបណ្តាលធនធានមនុស្ស និងអត្តពលិក។ ក្នុងនោះចិនបានមកបើកក្លិបប្រដាល់គុនខ្មែរ និងវិទ្យាស្ថានគុនខ្មែរនៅប្រទេសកម្ពុជា ហើយក៏មានបើកក្លិបប្រដាល់គុនខ្មែរជាបន្តបន្ទាប់ទៀតនៅប្រទេសចិន៕

ក្លិបប្រដាល់គុនខ្មែរនៅចិន

អត្ថបទ៖ វីរបុត្រ

The post សប្តាហ៍ក្រោយ ការប្រកួតគុនខ្មែរអន្តរជាតិ ២ថ្ងៃនៅសៀមរាប មុនព្រឹត្តិការណ៍ដ៏ធំនៅចិនខែក្រោយ appeared first on Kampuchea Thmey Daily.

លោក ខូវ ឆាយ បញ្ជាក់ពីការព្រមានអប់រំអាជ្ញាកណ្តាល ឃឹម សុជាតិ បានបញ្ចប់

chean virakbot — Tue, 02 Sep 2025 05:02:55 +0000

លោក ឃឹន សុជាតិ អាជ្ញាកណ្តាលប្រដាល់គុនខ្មែរបានយកដៃទៅទះកីឡាករចិន ឃ្វីន ជីន បន្ទាប់ពីកីឡាករចិនរូបនេះបានទះលើផ្នែកខាងក្រោយរបស់លោក សម្រាប់ការប្រកួតជាមួយកីឡាករកម្ពុជា ឈុត សេរីវ៉ាន់ថង កាលពីថ្ងៃទី២៩ ខែសីហា ឆ្នាំ ២០២៥ នៅសង្វៀនប្រដាល់ថោន។

លោក ខូវ ឆាយ

សកម្មភាពនេះបានធ្វើឲ្យផ្ទះការចាប់អារម្មណ៍ខ្លាំងពីមហាជន ដោយមានអ្នកខ្លះគាំទ្រសកម្មភាពរបស់លោក ឃឹម សុជាតិ ប៉ុន្តែក៏មានអ្នកខ្លះមិនគាំទ្រ។ ករណីនេះ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានប្រាប់សារព័ត៌មាន«កម្ពុជាថ្មី»ថា លោក ឃឹម សុជាតិ បានប្រព្រឹត្តខុសនឹងគោលការអាជ្ញាកណ្តាលពិតមែន ដូច្នេះសហព័ន្ធបានអញ្ជើញលោកទៅណែនាំ អប់រំ និងព្រមានផ្ទាល់មាត់កាលពីថ្ងៃទី១ ខែសីហា ឆ្នាំ ២០២៥។

លោក ខូវ ឆាយ បានលើកឡើងថា ៖«ទាក់ទងករណីលោកគ្រូ ឃឹម សុជាតិ ខាងគណៈកម្មការបច្ចេកទេស និងគណៈកម្មការវិន័យ បានអញ្ជើញលោកកាលពីម្សិលមិញ (ទី១ ខែកញ្ញា) ដើម្បីធ្វើការអប់រំ ណែនាំ និងពិន័យផ្ទាល់មាត់ ចំពោះគាត់ ដោយសារគាត់បានប្រព្រឹត្តកំហុស ផ្ទុយពីបទបញ្ជា បច្ចេកទេសនៃការប្រកួត ក្នុងនាមជាអាជ្ញាកណ្តាលដែលមានតួនាទីដឹកនាំការប្រកួត។ តួនាទីនេះមានសិទ្ធិដឹកនាំ គ្រប់គ្រង និងបញ្ជាការប្រកួត ប៉ុន្តែគ្មានសិទ្ធិបង្កហឹង្សាទៅលើកីឡាករទេ»។

លោកបានបន្តថា ៖«ទោះបីជាកីឡាករបានល្មើសនឹងបទបញ្ជានៃការប្រកួត ប្រើហិង្សា ឬរំលោភបំពានលើមន្ត្រីរៀបចំការប្រកួត គឺគាត់មានសិទ្ធិក្នុងការអនុវត្តនូវបទបញ្ជា ការណែនាំ ព្រមាន ដាក់ពិន័យ កាត់ពិន្ទុ ឬក៏បញ្ឈប់ការប្រកួត ដេញចេញពីសង្វៀន និងមានការដាក់ពិន័យជាបន្តបន្ទាប់ទៀតក្នុងករណីធ្ងន់ធ្ងរ ប៉ុន្តែមិនមានសិទ្ធិក្នុងការតបតទេ។ ដោយមើលឃើញនេះជាកំហុសលើកទី១ ហើយក៏ជាកំហុសក្នុងការការពារខ្លួន ហើយមិនបានបង្កគ្រោះថ្នាក់ ឬរបួសស្នាម ដែលកីឡាករគ្មានរងគ្រោះទេ ដូច្នេះយើងត្រឹមតែព្រមានផ្ទាល់មាត់ ការអប់រំណែនាំ កុំឲ្យកើតមានទង្វើបែបនេះទៀតដែលជាគំរូមិនល្អនៅក្នុងវិស័យគុនខ្មែរយើង»៕

លោក ខឹម សុជាតិ

អត្ថបទ៖ វីរបុត្រ

The post លោក ខូវ ឆាយ បញ្ជាក់ពីការព្រមានអប់រំអាជ្ញាកណ្តាល ឃឹម សុជាតិ បានបញ្ចប់ appeared first on Kampuchea Thmey Daily.

លោក ខូវ ឆាយ Archives - Kampuchea Thmey Daily

សហព័ន្ធ​ប្រដាល់​គុន​ខ្មែរ​ ទទួល​បាន​អង្ករ​ ១០​តោន​ពី​ក្រុមហ៊ុន​ Khmer Beverages ជួយដល់​​វីរកងទ័ព​

លោក​ ខូវ ឆាយ​ ធ្វើ​វីដេអូ​អរគុណ​ចំពោះ​វីរកងទ័ព​ដែល​បាន​​តស៊ូ​ការពារ​ទឹក​ដី​ពីសត្រូវ​ឈ្លានពាន

លោក​ ខូវ​ ឆាយ​ សារភាព​ថា​សូម្បី​តែ​លោក​មើល​ការ​ប្រកួត​របស់​ អេ អាំម៉ារីនភូថង​ ក៏​ធុញ​ដែរ​

សហព័ន្ធ​គុន​ខ្មែរ ​កំពុង​ខ្វះ​គ្រូ​បញ្ជូន​ទៅ​បង្ហាត់​នៅ​ប្រទេស​ចិន

លោក ខូវ ឆាយ បញ្ជាក់​ពី​ការ​ព្រមាន​អប់រំ​អាជ្ញា​កណ្តាល ឃឹម សុជាតិ បាន​បញ្ចប់

សហព័ន្ធប្រដាល់គុនខ្មែរ ទទួលបានអង្ករ ១០តោនពីក្រុមហ៊ុន Khmer Beverages ជួយដល់វីរកងទ័ព

លោក ខូវ ឆាយ ធ្វើវីដេអូអរគុណចំពោះវីរកងទ័ពដែលបានតស៊ូការពារទឹកដីពីសត្រូវឈ្លានពាន

លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ

សហព័ន្ធគុនខ្មែរ កំពុងខ្វះគ្រូបញ្ជូនទៅបង្ហាត់នៅប្រទេសចិន

លោក ខូវ ឆាយ បញ្ជាក់ពីការព្រមានអប់រំអាជ្ញាកណ្តាល ឃឹម សុជាតិ បានបញ្ចប់