កីឡា

សហព័ន្ធប្រដាល់គុនខ្មែរ «មូលនិធិគុនខ្មែរ» បានជួយសាងសង់ក្លឹបចំនួន ១៥ក្លឹបហើយគិតមកដល់ពេលនេះ

បានផុស

៣ នាទី មុន

នៅ

ថ្ងៃចន្ទ ៦ កក្កដា ២០២៦

ដោយ

លោក ខូវ ឆាយ «មូលនិធិគុនខ្មែរ» របស់សហព័ន្ធប្រដាល់គុនខ្មែរបើគិតមកដល់ពេលនេះបានជួយសាងសង់ក្លឹបគុនខ្មែរតាមបណ្ដាខេត្ត-ក្រុង សរុប ១៥ក្លឹបមកហើយ និងបានឧបត្ថម្ភជាសម្ភារហ្វឹកហាត់ដល់ក្លឹបចំនួន ២០ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពសម្ពោធក្លឹប

ប្រធានសហព័ន្ធប្រដាល់គុនខ្មែរ លោក ខូវ ឆាយ បានលើកឡើងថា លោកមានកិត្តិយសក្រៃលែងដែលបានចូលរួមជាអធិបតីក្នុងពិធីសម្ពោធជាផ្លូវការ “ក្លឹបមហាគ្រុឌគុនខ្មែរ” ខេត្តក្រចេះ។

ក្លឹបមហាគ្រុឌគុនខ្មែរ គឺជាក្លឹបប្រដាល់ថ្មីមួយដែលត្រូវបានសាងសង់ឡើងដោយមានការគាំទ្រពី «មូលនិធិយើងជួយគ្នាលើកស្ទួយជួយគុនខ្មែរ» ជាគំនិតផ្តួចផ្តើមដ៏ថ្លៃថ្លារបស់សម្តេច តេជោ និងសម្តេចកិត្តិព្រឹទ្ធបណ្ឌិត ក្នុងគោលបំណងជួយសាងសង់ និងទ្រទ្រង់ក្លឹបដែលខ្វះខាតតាមមូលដ្ឋានដើម្បីពង្រឹងការអភិវឌ្ឍវិស័យគុនខ្មែរនៅទូទាំងប្រទេស។

លោក ខូវ ឆាយ (កណ្ដាល)

លោក ខូវ ឆាយ បន្ថែមទៀតថា គិតមកដល់ពេលនេះ «មូលនិធិគុនខ្មែរ» បានចូលរួមសាងសង់ក្លឹបគុនខ្មែរទាំងការជួយសាងសង់មួយផ្នែក និងការជួយសាងសង់ទាំងស្រុង បានសរុបចំនួន ១៥ក្លឹបរួចហើយ នៅតាមបណ្តាខេត្ត និងរាជធានី និងបានជួយជាសម្ភារៈហ្វឹកហាត់ដល់ក្លឹបចំនួន ២០ផងដែរ។

ទិដ្ឋភាពសម្ពោធក្លឹប

ថ្នាក់ដឹកនាំប្រដាល់រូបនេះលើកឡើងទៀតថា នេះគឺជាជំហានដ៏សំខាន់ក្នុងការបង្កើតមូលដ្ឋានរឹងមាំសម្រាប់ការអភិវឌ្ឍគុនខ្មែរ និងបណ្តុះបណ្តាលធនធានមនុស្សជំនាន់ក្រោយ។ លោកជឿជាក់ថាក្លឹបគុនខ្មែរ មិនមែនគ្រាន់តែជាកន្លែងហ្វឹកហាត់កីឡាប៉ុណ្ណោះទេ ប៉ុន្តែជាមជ្ឈមណ្ឌលអប់រំយុវជនឱ្យមានវិន័យ សីលធម៌ សុខភាពល្អ រាងកាយមាំមួន និងជួយឱ្យជៀសឆ្ងាយពីគ្រឿងញៀន និងអំពើអបាយមុខគ្រប់ប្រភេទ។ សម្រាប់អ្នកដែលមានទេពកោសល្យ និងឆន្ទៈខ្ពស់ គុនខ្មែរក៏អាចក្លាយជាអាជីពដ៏មានកិត្តិយស និងអាចផ្លាស់ប្តូរជីវិត និងនាំមកនូវភាពរុងរឿងសម្រាប់គ្រួសារផងដែរ។

បញ្ជាក់ដែរថា “ក្លឹបមហាគ្រុឌគុនខ្មែរ” ដែលទើបសម្ពោធជាផ្លូវការកាលពីថ្ងៃទី៤ ខែកក្កដា ឆ្នាំ២០២៦ នេះគឺមានទីតាំងនៅឯខេត្តក្រចេះ។ លោក ខូវ ឆាយ ប្រធានសហព័ន្ធប្រដាល់គុនខ្មែរក៏បានចូលរួមជាអធិបតីភាពក្នុងពិធីនោះផងដែរ៕ (ប្រភព៖ ហ្វេសបុក លោក ខូវ ឆាយ)