លោក គង់ វិបុល Archives - Kampuchea Thmey Daily

ពន្ធដារបានដាក់ចេញនូវនីតិវិធីប្រកាសពន្ធលើចំណេញមូលធនតាមអនឡាញ

May Kunmakara — Tue, 31 Mar 2026 02:16:23 +0000

អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រកាសអំពីនីតិវិធីថ្មីសម្រាប់ការដាក់លិខិតប្រកាសពន្ធលើចំណេញមូលធនតាមប្រព័ន្ធអនឡាញ ដើម្បីបង្កើនប្រសិទ្ធភាព និងតម្លាភាពក្នុងការផ្តល់សេវាដល់អ្នកជាប់ពន្ធ។

ការណែនាំនេះអនុវត្តតាមច្បាប់សារពើពន្ធ និងប្រកាសពាក់ព័ន្ធចុងឆ្នាំ ២០២៥។ អ្នកជាប់ពន្ធនិវាសនជន និងអនិវាសនជន ត្រូវប្រកាស និងបង់ពន្ធលើចំណេញមូលធនក្នុងរយៈពេលបីខែ បន្ទាប់ពីការលក់ ឬផ្ទេរទ្រព្យ។

ប្រព័ន្ធគ្រប់គ្រងពន្ធលើចំណេញមូលធន (Capital Gains Tax System) អនុញ្ញាតឱ្យអ្នកជាប់ពន្ធបញ្ចូលព័ត៌មានប្រកាសពន្ធ និងឯកសារយោងតាមអនឡាញ តាមរយៈគេហទំព័រ GDT HomeTax និង tax.gov.kh។ ការបង់ប្រាក់អាចធ្វើតាមធនាគារដៃគូ ឬប្រព័ន្ធ e-Payment។

អគ្គនាយកដ្ឋានពន្ធដារ ក៏បានបញ្ជាក់ថា ភ្នាក់ងារកាត់ទុកតាមរបបស្វ័យប្រកាស ត្រូវមានកាតព្វកិច្ចប្រកាស និងបង់ពន្ធតាមប្រព័ន្ធ e-Filing។

ការប្រើប្រាស់ប្រព័ន្ធថ្មី នឹងធានាឱ្យការប្រកាសពន្ធកាន់តែឆាប់រហ័ស មានគណនេយ្យភាព និងប្រសិទ្ធភាពខ្ពស់។

អគ្គនាយកដ្ឋានពន្ធដារក៏បានអំពាវនាវឱ្យអភិបាល បណ្ណាធិការ កម្មសិទ្ធិករ និងភ្នាក់ងារពន្ធដារ អនុវត្តតាមសេចក្តីណែនាំនេះ ដើម្បីធានាឱ្យប្រព័ន្ធពន្ធថ្មីមានប្រសិទ្ធភាព និងជួយលើកកម្ពស់គុណភាពសេវាដល់សាធារណជន៕

The post ពន្ធដារបានដាក់ចេញនូវនីតិវិធីប្រកាសពន្ធលើចំណេញមូលធនតាមអនឡាញ appeared first on Kampuchea Thmey Daily.

ប្រកាសតែងតាំងប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា

អ៊ិន ពិសី — Thu, 09 Oct 2025 02:37:18 +0000

កាលពីរសៀលថ្ងៃទី ០៨ ខែតុលា ឆ្នាំ ២០២៥ មានពិធីប្រកាសតែងតាំងប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា ក្រោមអធិបតីភាពលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ នៅអគ្គនាយកដ្ឋានពន្ធដារថ្មី ក្នុងខណ្ឌជ្រោយចង្វា រាជធានីភ្នំពេញ។

ពិធីនេះត្រូវបានតែងតាំងលោក សិញ សេងហោ ជាប្រធានទីចាត់ការពន្ធដាររាជធានីភ្នំពេញ និង ប្រកាសតែងតាំងលោក ស៊ុន វុទ្ធី ជាប្រធានសាខាពន្ធដារខណ្ឌ ៧ មករា។

លោក ឃួង ស្រេង បានមានប្រសាសន៍ថា ការប្រកាសតែងតាំងប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា នាពេលនេះ ធ្វើឡើងជាធម្មតា សម្រាប់អាជីពមន្ត្រីរាជការ ទៅតាមនីតិវិធីកំណត់ដោយច្បាប់។ ជាក់ស្តែងចំពោះការប្រកាសតែងតាំងអ្នកទាំង ២ នាពេលនេះ គឺដើម្បីបន្តអនុវត្តការងារកាន់តែល្អថែមទៀតក្នុងការរកចំណូលថវិកាពីអ្នកជាប់ពន្ធចូលជាថវិការដ្ឋ។

លោក ឃួង ស្រេង សូមឱ្យប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា បញ្ចេញឱ្យអស់ចំណេះដឹង ក្នុងការប្រមូលពន្ធ កែទម្រង់ខាងក្នុង ធានាអភិបាលកិច្ចល្អ និងគ្មានកំហុសឆ្គង។

លោក ឃួង ស្រេង ក៏បានផ្ដាំផ្ញើផងដែរថា ក្នុងនាមជាមន្ត្រីរាជការ បម្រើសេវា អ្នកជាប់ពន្ធ ត្រូវបំពេញការងារនេះឱ្យបានល្អ ឱ្យបានលឿន និងមានតម្លាភាព។ ត្រូវដឹងខ្លួនថា យើងជាមន្ត្រីបម្រើពលរដ្ឋ មិនមែនជាចៅហ្វាយរបស់ប្រជាពលរដ្ឋនោះទេ។ បន្ថែមពីនេះ លោក ឃួង ស្រេង ក៏បានស្នើឱ្យខណ្ឌទាំង ១៤ ខណ្ឌ គាំទ្រជាមួយនឹងការសហការជាមួយសាខាពន្ធដាររាជធានីភ្នំពេញ ដើម្បីជំរុញឱ្យការប្រមូលពន្ធពីអ្នកជាប់ពន្ធបានរលូនស្របទៅតាមផែនការដែលបានកំណត់។

លោក គង់ វិបុល ក្នុងឱកាសនោះ ក៏បានថ្លែងនូវការអរគុណចំពោះប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា ចាស់ ដែលបានខិតខំប្រឹងប្រែងយកអស់កម្លាំងកាយចិត្តក្នុងការបំពេញការងារបានយ៉ាងល្អជូនអគ្គនាយកដ្ឋានពន្ធដារ , ក្រសួងសេដ្ឋកិច្ច និងហិរញ្ញវត្ថុ និងរាជរដ្ឋាភិបាល។

បន្ថែមពីនេះ លោក គង់ វិបុល បានណែនាំឱ្យប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា ដែលតែងតាំងថ្មីនេះ បន្តកិច្ចការងារនេះឱ្យបានកាន់តែល្អ ស្របតាមវិជ្ជាជីវៈ ធ្វើជាមន្ត្រីស្អាតស្អំរបស់រាជរដ្ឋាភិបាល មានសាមគ្គីភាពផ្ទៃក្នុងល្អ ដោយមិនត្រូវមើលរំលងពីកំហុសឆ្គងរបស់ខ្លួនឯង។ ក្នុងនាមជាមន្ត្រីបម្រើរាស្ត្រ ត្រូវបម្រើសេវាជូនអ្នកជាប់ពន្ធឱ្យបានល្អ ទាំងពាក្យសំដី ទាំងការផ្តល់សេវាជាដើម ឱ្យសមជាមន្ត្រីរបស់រាជរដ្ឋាភិបាលដែលមានក្រមសីលធម៌ខ្ពស់ ក្មេង ឆ្លាតវៃ និងប៉ិនប្រសព្វ៕

អត្ថបទ ៖ ស្រីរ័ត្ន

The post ប្រកាសតែងតាំងប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា appeared first on Kampuchea Thmey Daily.

ពន្ធដារ ប្តេជ្ញាពង្រីកការផ្សព្វផ្សាយ និងអនុវត្តយន្តការលើកទឹកចិត្តផ្នែកពន្ធដារដល់សេដ្ឋកិច្ចក្រៅប្រព័ន្ធរីកចម្រើន

Din Thary — Fri, 23 May 2025 02:45:35 +0000

លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ បានបញ្ជាក់ថា ពន្ធដារ ប្ដេជ្ញាពង្រីកការផ្សព្វផ្សាយ និងអនុវត្តយន្តការលើកទឹកចិត្តផ្នែកពន្ធដារ ដើម្បីឱ្យអ្នកសេដ្ឋកិច្ចក្រៅប្រព័ន្ធបានរីកចម្រើន។

ក្នុងឱកាសជំនួបពិភាក្សាការងារ ជាមួយរដ្ឋមន្ត្រីក្រសួងឧស្សាហកម្ម ដើម្បីពិនិត្យវឌ្ឍនភាព និងពង្រឹងកិច្ចសហការក្នុងការអនុវត្តយុទ្ធ សាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ នៅថ្ងៃទី២២ ខែឧសភា នេះ លោក គង់ វិបុល បានលើកឡើងពីសមិទ្ធផលថ្មីៗរបស់អគ្គនាយកដ្ឋានពន្ធដារ រួមទាំងការសាងសង់អគារទីស្នាក់ការថ្មី និងបរិវត្តកម្មឌីជីថលនៃរដ្ឋបាលសារពើពន្ធ។

លោកបានបញ្ជាក់ថា «អគ្គនាយកដ្ឋានពន្ធដារគាំទ្រពេញទំហឹងចំពោះកិច្ចខិតខំប្រឹងប្រែងចុះឈ្មោះអ្នកសេដ្ឋកិច្ចក្រៅប្រព័ន្ធ។ ក្នុងនោះយើងក៏ប្តេជ្ញាសហការមួយគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ និងក្រសួងឧស្សាហកម្ម ក្នុងការពង្រីកការផ្សព្វផ្សាយ និងអនុវត្តយន្តការលើកទឹកចិត្តផ្នែកពន្ធដារ ដើម្បីឱ្យអ្នកសេដ្ឋកិច្ចក្រៅប្រព័ន្ធបានរីកចម្រើន និងមានលទ្ធភាពឈានចូលក្នុងប្រព័ន្ធ»។

ក្នុងឱកាសដដែលលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ បានមានប្រសាសន៍ថា អគ្គនាយកដ្ឋានពន្ធដារបានសម្រេចការងារជាច្រើន ក្នុងការអនុវត្តយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ពិសេសការផ្តល់ការលើកទឹកចិត្តផ្នែកពន្ធដារ។

លោករដ្ឋមន្រ្តីក៏បានស្នើអគ្គនាយកដ្ឋានគួរពង្រីកការផ្សព្វផ្សាយអំពីការលើកទឹកចិត្តទាំងនេះឱ្យបានទូលំទូលាយ ដើម្បីអ្នកសេដ្ឋកិច្ចក្រៅប្រព័ន្ធ រួមទាំងសហគ្រាសធុនតូច និងមធ្យម បានជ្រួតជ្រាប និងអាចទាញយកអត្ថប្រយោជន៍ដើម្បីរីកចម្រើន។

បន្ថែមលើការងារអភិវឌ្ឍន៍សេដ្ឋកិច្ចក្រៅប្រព័ន្ធ ភាគីទាំងពីរក៏បានឯកភាពសហការលើការធ្វើសមាហរណកម្មទិន្នន័យសហគ្រាសធុនតូច និងមធ្យមផងដែរ៕

The post ពន្ធដារ ប្តេជ្ញាពង្រីកការផ្សព្វផ្សាយ និងអនុវត្តយន្តការលើកទឹកចិត្តផ្នែកពន្ធដារដល់សេដ្ឋកិច្ចក្រៅប្រព័ន្ធរីកចម្រើន appeared first on Kampuchea Thmey Daily.

គង់ វិបុល៖ ការបង់ពន្ធឱ្យបានត្រឹមត្រូវរបស់វិស័យឯកជន ជាការចូលរួមចំណែកដល់ការអភិវឌ្ឍសេដ្ឋកិច្ចជាតិ

May Kunmakara — Tue, 18 Mar 2025 02:02:00 +0000

លោក គង់ វិបុល អគ្គនាយកនៃអគ្គនាយកដ្ឋានពន្ធដារ (GDT0 បានថ្លែងថា អគ្គនាយកដ្ឋានពន្ធដារ បានធ្វើការកែទម្រង់ដាក់ឱ្យប្រមូលពន្ធតាមរយៈប្រព័ន្ធអនឡាញទាំងអស់ក្នុងការចុះបញ្ជី ដើម្បីងាយស្រួលដល់អ្នកជាប់ពន្ធ មិនបាច់មកកាន់សាខាពន្ធដារទេ គ្រាន់តែរៀបចំឯកសារគ្រប់គ្រាន់ស្របតាមច្បាប់ រួចបើក APP GDT ដើម្បីបំពេញបែបបទឱ្យបានត្រឹមត្រូវ ច្បាស់លាស់ ក្នុងការរួមចំណែកបំពេញកាតព្វកិច្ចរបស់ខ្លួនបង់ពន្ធជូនរដ្ឋ និងសេដ្ឋកិច្ចជាតិ។

ការលើកឡើងរបស់លោក គង់ វិបុលធ្វើឡើងនៅក្នុង សិក្ខាសាលាផ្សព្វផ្សាយស្តីពី “កាតព្វកិច្ចពន្ធលើប្រាក់ចំណូលប្រចាំឆ្នាំ និងបច្ចុប្បន្នភាពច្បាប់និងលិខិតបទដ្ឋានគតិយុត្តស្តីពីពន្ធដារ” ដែលជាការសហការរៀបចំរវាងអគ្គនាយកដ្ឋានពន្ធដារ និងសភាពាណិជ្ជកម្មកម្ពុជាកាលពីថ្ងៃទី១៧ ខែមីនា។

លោកគង់ វិបុល បានស្នើឱ្យម្ចាស់ក្រុមហ៊ុន-សហគ្រាស អ្នកជាប់ពន្ធទាំងអស់ត្រូវបំពេញកាតព្វកិច្ចរបស់ខ្លួន និងសហការចូលរួមបង់ពន្ធឱ្យបានគ្រប់ៗគ្នា។ លោកថា៖«ដូច្នេះការបង់ពន្ធគឺជាការចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍមូលដ្ឋានសម្រាប់កសាងហេដ្ឋារចនាសម្ព័ន្ធនានាផ្សេងៗ»។

លោកថា ការដាក់លិខិតប្រកាសពន្ធតាមអនឡាញ (e-flling) និងពន្ធលើប្រាក់ចំណេញ គឺជាកិច្ចការថ្មីមួយនៅក្នុងការកែទម្រង់ហិរញ្ញវត្ថុសាធារណៈពាក់ព័ន្ធការងារពន្ធដារ ដើម្បីពង្រឹងវប្បធម៌បង់ពន្ធឱ្យមានប្រសិទ្ធភាព ប្រកបដោយតម្លាភាព គុណភាព ឆ្ពោះរកទៅការអភិវឌ្ឍលើគ្រប់វិស័យ។

លោកបានគូសបញ្ជាក់ទៀតថា,៖« កាលពីមុន អគ្គនាយកពន្ធដារ បានទទួលបានប្រាក់បង់ពន្ធតែនៅតាមសាខាពន្ធដារ និងរដ្ឋបាលសារពើពន្ធតែប៉ុណ្ណោះ ប៉ុន្តែឥឡូវនេះយើងទទួលបង់ប្រាក់ពន្ធតាមប្រព័ន្ធធនាគារ ដែលនៅក្នុងចំណោមធនាគារទាំងអស់នោះ គឺមានធនាគារវីងរបស់អ្នកឧកញ៉ា គិត ម៉េង មួយផងដែរ ដែលបានចុះកិច្ចសហប្រតិបត្តិការជួយប្រមូលចំណូលឲ្យរដ្ឋ គឺមានតម្លាភាព សក្តិសិទ្ធភាព និងភាពច្បាស់លាស់»។

បើតាមលោកគង់ វិបុល អគ្គនាយកដ្ឋានពន្ធដារ បានផ្តល់សិទ្ធិអនុញ្ញាតដល់ធនាគារវីង ដើម្បីទទួលការទូទាត់បង់ពន្ធពីសាធារណជន ដើម្បីផ្តល់នូវភាពងាយស្រួលទៅដល់អ្នកជាប់ពន្ធជារូបវន្តបុគ្គល និងស្ថាប័ននានា ក្នុងការបំពេញកាត្វកិច្ចបង់ពន្ធនៅទូទាំងប្រទេសកម្ពុជា តាមរយៈធនាគារវីង ដោយមិនមានការយកកម្រៃសេវាបន្ថែមនោះឡើយ។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានមានប្រសាសន៍ថា សភាពាណិជ្ជកម្មកម្ពុជា បានដើរតួនាទីយ៉ាងសំខាន់ក្នុងការតំណាងឱ្យវិស័យឯកជនក្នុងការពិភាក្សាគោលនយោបាយជាមួយរាជរដ្ឋាភិបាលចាប់តាំងពីថ្ងៃទី ២១ ខែធ្នូ ឆ្នាំ ១៩៩៩ នៅពេលដែលវាត្រូវបានរាជរដ្ឋាភិបាលកម្ពុជា ប្រគល់ភារកិច្ចឱ្យគ្រប់គ្រងក្រុមការងារវិស័យឯកជនទាំងអស់ ក្រោមយន្តការនៃវេទិការរដ្ឋាភិបាល-វិស័យឯកជន (G-PSF)។

អ្នកឧកញ៉ា បានកោតសរសើរចំពោះការផ្លាស់ប្តូរឌីជីថលរបស់ GDT ក្នុងការប្រមូលពន្ធដោយកត់សម្គាល់ថា អគ្គនាយកដ្ឋានពន្ធដារដើរតួនាទីជាគំរូសម្រាប់កិច្ចសហការរវាងរាជរដ្ឋាភិបាល និងឯកជន។

អ្នកឧកញ៉ាបានជំរុញឱ្យអង្គភាពអាជីវកម្មចូលរួមយ៉ាងសកម្មជាមួយនឹងគោលនយោ បាយ និងបទប្បញ្ញត្តិពន្ធ ដើម្បីធានាបាននូវប្រព័ន្ធពន្ធដារប្រកបដោយប្រសិទ្ធភាព និងតម្លាភាព ដែលគាំទ្រដល់ការអភិវឌ្ឍជាតិ។

អ្នកឧកញ៉ាថ្លែងថា៖ «ទំនាក់ទំនងរវាងរាជរដ្ឋាភិបាល និងវិស័យឯកជនមានសារៈសំខាន់ជាងពេលណាៗទាំងអស់។ យើងសូមស្នើរាជរដ្ឋាភិបាលឱ្យបន្តប្រើប្រាស់ GDT ជាគំរូដ៏ល្អមួយអំពីរបៀបគាំទ្រ និងសហការជាមួយក្រុមការងារក្រោមយន្តការ G-PSF»៕

The post គង់ វិបុល៖ ការបង់ពន្ធឱ្យបានត្រឹមត្រូវរបស់វិស័យឯកជន ជាការចូលរួមចំណែកដល់ការអភិវឌ្ឍសេដ្ឋកិច្ចជាតិ appeared first on Kampuchea Thmey Daily.

អ្នកជាប់ពន្ធប្រចាំឆ្នាំធំៗបីត្រូវបង់ពន្ធឱ្យបានរួចរាល់ត្រឹមថ្ងៃទី៣១ ខែមីនា

May Kunmakara — Thu, 06 Mar 2025 06:38:57 +0000

អគ្គនាយកដ្ឋានពន្ធដារ (GDT) បានក្រើនរំលឹកដល់បណ្តាម្ចាស់សហគ្រាស ឬអ្នកជាប់ពន្ធប្រចាំឆ្នាំធំៗ៣ គឺ ពន្ធលើប្រាក់ចំណូល; ពន្ធប៉ាតង់; និងពន្ធលើផ្ទាំងផ្សព្វផ្សាយ ដែលនឹងត្រូវមកបំពេញកាត្វកិច្ចបានត្រឹមថ្ងៃទី៣១ ខែមីនានេះ។

យោងតាម GDT សម្រាប់ ពន្ធប្រចាំឆ្នាំទាំងបីនេះ នឹងត្រូវផុតកំណត់នៅថ្ងៃទី៣១ ខែមីនា ឆ្នាំ២០២៥ ខាងមុខនេះ ពោល គឺនៅសល់ពេលប្រមាណជា ១ខែទៀតប៉ុណ្ណោះ ដែលពន្ធប្រចាំឆ្នាំ ទាំងនោះ រួមមាន៖ ពន្ធលើប្រាក់ចំណូល គឺជាកាតព្វកិច្ចរបស់បុគ្គលនិវាសនជនចំពោះប្រាក់ចំណូលប្រភពកម្ពុជា និងប្រាក់ចំណូលប្រភពបរទេស និងជាកាតព្វកិច្ច របស់បុគ្គលអនិវាសនជនចំពោះប្រាក់ចំណូលប្រភពកម្ពុជា។

«មូលដ្ឋានគិតពន្ធលើប្រាក់ចំណូល គឺជាប្រាក់ចំណេញប្រចាំឆ្នាំ ដែលកើតចេញ ពីប្រាក់ចំណូលកាត់កងនូវចំណាយនានាស្របតាមច្បាប់និងលិខិតបទដ្ឋានគតិយុត្តស្តីពីពន្ធដារជាធរមាន ចំពោះបុគ្គលដែលខាតពីការធ្វើ សកម្មភាពអាជីវកម្ម មិនត្រូវបង់ពន្ធលើប្រាក់ចំណូលនោះទេ ប៉ុន្តែមានកាតព្វកិច្ចដាក់លិខិតប្រកាសជាធម្មតា»។ នេះបើតាម GDT។

សម្រាប់ ពន្ធប៉ាតង់ គឺជាពន្ធប្រចាំឆ្នាំដែលត្រូវបានកំណត់លើសកម្មភាពអាជីវកម្មនីមួយៗរបស់អ្នកជាប់ពន្ធដោយផ្អែកលើប្រភេទអ្នកជាប់ពន្ធនិង កម្រិតផលរបរ ដោយអ្នកជាប់ពន្ធតូច ត្រូវបង់ពន្ធប៉ាតង់ប្រចាំឆ្នាំចំនួន ៤០០ ០០០ រៀល អ្នកជាប់ពន្ធមធ្យម ត្រូវបង់ពន្ធប៉ាតង់ប្រចាំឆ្នាំចំនួន ១ ២០០ ០០០ រៀល និងអ្នកជាប់ពន្ធធំត្រូវបង់ពន្ធប៉ាតង់ប្រចាំឆ្នាំចំនួន ៣ ០០០ ០០០ រៀល ឬ ៥ ០០០ ០០០ រៀល ចំពោះអ្នកជាប់ពន្ធធំ ដែលមានផលរបរប្រចាំឆ្នាំលើសពី ១០ ០០០ លានរៀលឡើងទៅ។

លោក គង់ វិបុល អគ្គនាយនៃអគ្គនាយកដ្ឋានពន្ធដារ (GDT)។

ចំនែកឯ ពន្ធលើផ្ទាំងផ្សព្វផ្សាយ ត្រូវប្រមូលលើបណ្ណ ស្លាក ឬផ្ទាំង ដែលមានគោលបំណងផ្សព្វផ្សាយពាណិជ្ជកម្ម ដើម្បីឱ្យអតិថិជនឬសាធារណជន បានស្គាល់ពីផលិតផលឬសេវាកម្ម រួមមាន បណ្ណប្រកាសផ្សាយពាណិជ្ជកម្មធ្វើឡើងពីកៅស៊ូ ក្រដាសធម្មតា កំណាត់សំពត់ ឬវត្ថុផ្សេងៗ ស្លាកអាជីវកម្មដ្ឋានសម្រាប់សម្គាល់ឈ្មោះ ទីតាំង ទីស្នាក់ការ ការិយាល័យ ឬទីកន្លែងប្រកបអាជីវកម្មនានា និងផ្ទាំងអក្សរឬផ្ទាំងរូបភាពសម្រាប់ គោលបំណងពាណិជ្ជកម្ម។

GDT ថា៖ «ចំណុចដែលគួរឱ្យកត់សម្គាល់ ចំពោះពន្ធប្រចាំឆ្នាំទាំង ៣ ប្រភេទខាងលើ គឺសុទ្ធតែអាចធ្វើការប្រកាសនិងបង់ប្រាក់ពន្ធបានតាមប្រព័ន្ធអនឡាញ ដោយមិនតម្រូវឱ្យអ្នកជាប់ពន្ធចំណាយពេលវេលាមកផ្ទាល់នៅរដ្ឋបាលសារពើពន្ធនោះទេ ក្នុងនោះ ពន្ធលើប្រាក់ចំណូល អ្នកជាប់ពន្ធអាច ប្រកាសពន្ធតាមរយៈប្រព័ន្ធគ្រប់គ្រងការដាក់លិខិតប្រកាសពន្ធលើប្រាក់ចំណូលប្រចាំឆ្នាំ (Tole-Filing) និងបង់ប្រាក់ពន្ធតាមប្រព័ន្ធគ្រប់គ្រង បង់ប្រាក់ពន្ធតាមអនឡាញ (e-Payment) សម្រាប់អ្នកជាប់ពន្ធមធ្យមនិងធំ និងសម្រាប់អ្នកជាប់ពន្ធតូចអាចធ្វើការប្រកាសនិងបង់ប្រាក់ពន្ធ តាមរយៈកម្មវិធីប្រកាសពន្ធអាជីវកម្មសម្រាប់អ្នកជាប់ពន្ធតូច (GDT Tax Prefiling App)»។

ចំពោះពន្ធប៉ាតង់ អ្នកជាប់ពន្ធអាចប្រើប្រាស់ប្រព័ន្ធ គ្រប់គ្រងបង់ប្រាក់ពន្ធតាមអនឡាញ (e-Payment) សម្រាប់បង់ប្រាក់ពន្ធ ព្រមទាំងអាចបោះពុម្ពបណ្ណពន្ធប៉ាតង់បានដោយខ្លួនឯង។ ដោយឡែក ពន្ធលើផ្ទាំងផ្សព្វផ្សាយ អ្នកជាប់ពន្ធអាចប្រកាសនិងបង់ប្រាក់ពន្ធបានតាមរយៈកម្មវិធីទូរស័ព្ទដៃអ្នកជាប់ពន្ធ (GDT Taxpayer App)៕

The post អ្នកជាប់ពន្ធប្រចាំឆ្នាំធំៗបីត្រូវបង់ពន្ធឱ្យបានរួចរាល់ត្រឹមថ្ងៃទី៣១ ខែមីនា appeared first on Kampuchea Thmey Daily.

ចំណូលពន្ធដារក្នុងខែមករា មានចំនួនជិត ៣០០លានដុល្លារ ធ្លាក់ចុះ ២លានដុល្លារបើធៀបឆ្នាំមុន

Sophal Tuon — Tue, 20 Feb 2024 09:42:51 +0000

ក្នុងខែមករា ឆ្នាំ២០២៤ ចំណូល ដែលអគ្គនាយកដ្ឋានពន្ធដារប្រមូលបានតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួន ១ ២០៩,១៤ ប៊ីលានរៀល (ប្រមាណជា ២៩៨,៥៥ លានដុល្លារ) ស្មើនឹង ៧,១៧% នៃផែនការ ច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ ប្រៀបធៀបនឹងចំណូលពន្ធអាករប្រចាំខែមករា ឆ្នាំ២០២៣ មានការថយចុះ ចំនួន ៨,២៤ ប៊ីលានរៀល (ប្រមាណជា ២,០៣ លានដុល្លារ) ស្មើនឹង ០,៦៨%។ នេះបើតាមការបញ្ជាក់របស់លោក គង់ វិបុល អគ្គនាយកនៃអគ្គនាយកដ្ឋានពន្ធដារ។

ថ្លែងនៅក្នុងកិច្ចប្រជុំបួកសរុបលទ្ធផលការងារគ្រប់គ្រងប្រមូលចំណូលពន្ធប្រចាំខែមករា ឆ្នាំ ២០២៤ លោក គង់ វិបុល បានលើកឡើងថា ក្នុងខែមករា ឆ្នាំ២០២៤ ចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (e-Commerce) ប្រមូលបានចំនួន ៣៥,១១ ប៊ីលានរៀល (ប្រមាណ ៨,៦៧លានដុល្លារ)។

ជាមួយគ្នានេះ កម្មវិធីវិក្កយបត្រនាំសំណាង (GDTLucky Draw ) ទទួលបានការគាំទ្រយ៉ាងខ្លាំងពីសាធារណជនដោយចាប់ពីខែឧសភា ឆ្នាំ២០២២ រហូតមកដល់ខែមករា ឆ្នាំ២០២៤ មានវិក្កយបត្របានបញ្ជូនមកសរុបជាង ៩១ម៉ឺន វិក្កយបត្រ។

បើតាមលោក គង់ វិបុល លទ្ធផលការងារសំខាន់ៗក្នុងខែមករា ឆ្នាំ២០២៤ ត្រៀមដាក់ឱ្យអនុវត្តនូវកម្មវិធីរដ្ឋបាលអេឡិចត្រូនិក (GDT e-Administration) ដែលផ្ដល់ភាពងាយស្រួល ឆាប់រហ័ស ចំណេញពេលវេលា ប្រកបដោយភាពជឿទុកចិត្តលើការផ្តល់សេវាអ្នកជាប់ពន្ធ ក្នុងការដាក់លិខិតរដ្ឋបាលផ្សេងៗមក អគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌ ដែលយន្តការនេះគឺបានបង្កើតនូវជម្រើសតាមអនឡាញបន្ថែមពីលើជម្រើសនៃការអញ្ជើញមកផ្ទាល់នៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌ។

អគ្គនាយកដ្ឋានពន្ធដារ បានសហការជាមួយក្រសួងរៀបចំដែនដី នគរូបនីយកម្ម និងសំណង់ ដើម្បីរៀបចំនិយាម នីតិវិធីប្រតិបត្តិការងារ (SOP) ស្តីពីការជូនវិញ្ញាបនបត្រសម្គាល់ម្ចាស់អចលនវត្ថុ ដែលទទួលបានការលើកលែងពន្ធ និងការស្នើសុំទិន្នន័យអចលនទ្រព្យផងដែរ។

អគ្គនាយកដ្ឋានពន្ធដាររំពឹងថា ការប្រកាសនិងបង់បក់ពន្ធលើប្រាក់ចំណូលសម្រាប់ឆ្នាំ២០២៣ នឹងទទួលបាននូវលទ្ធផលល្អប្រសើរ ដោយមិនមានការថមថយឡើយ តាមរយៈបព័ន្ធពន្ធដារ e-Filing និង ToIe-Filing ដែលរឹងមាំនិងមានតម្លាភាព ដែលជាយន្តការយ៉ាងសំខាន់ក្នុងការពង្រឹងការផ្ទៀងផ្ទាត់ការដាក់លិខិតប្រកាសនិងបង់ប្រាក់ពន្ធ (Cross check)៕

The post ចំណូលពន្ធដារក្នុងខែមករា មានចំនួនជិត ៣០០លានដុល្លារ ធ្លាក់ចុះ ២លានដុល្លារបើធៀបឆ្នាំមុន appeared first on Kampuchea Thmey Daily.

ពន្ធដារ ប្រមូលចំណូលបានជាង ៣,៦ពាន់លានដុល្លារ នៅឆ្នាំ ២០២៣

Sophal Tuon — Wed, 24 Jan 2024 08:48:08 +0000

អគ្គនាយកដ្ឋានពន្ធដារ ប្រមូលចំណូលសម្រាប់ថវិកាជាតិ បានប្រមាណជា ៣ ៦១២.១២លានដុល្លារ ស្មើនឹង ១០១.១៣% នៃផែនការច្បាប់ ស្តីពីហិរញ្ញវត្ថុសម្រាប់ការគ្រប់គ្រង ប្រចាំឆ្នាំ២០២៣ កើន ៤.៤៩%។

អគ្គនាយកដ្ឋានពន្ធដារ បានបង្ហាញនៅក្នុងកិច្ចប្រជុំបូកសរុបលទ្ធផល ការងារគ្រប់គ្រងប្រមូលចំណូលពន្ធប្រចាំខែ និងប្រចាំឆ្នាំ២០២៣ ព្រមទាំងទិសដៅសម្រាប់អនុវត្តបន្ត កាលពីថ្ងៃទី ២៣ មករា ឱ្យដឹងថា រយៈពេល ១២ខែ ឆ្នាំ២០២៣ ចំណូលពន្ធអាករ ដែលប្រមូលបាន ជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញមានចំនួនប្រមាណជា ៣ ៦១២.១២ លានដុល្លារ) ស្មើនឹង ១០១.១៣% នៃផែនការច្បាប់ ស្តីពីហិរញ្ញវត្ថុសម្រាប់ការគ្រប់គ្រងប្រចាំ ឆ្នាំ២០២៣ ធៀបនឹងចំណូលពន្ធអាករ ក្នុងរយៈពេលដូចគ្នានៃឆ្នាំ២០២២ គឺកើនឡើងប្រមាណជា ១៥៥.១៣ លានដុល្លារ) ស្មើនឹង៤.៤៩%។

លោក គង់ វិបុល រដ្ឋមន្រ្តីប្រតិភូអមនាយករដ្ឋមន្រ្តី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ថា អគ្គនាយកដ្ឋានពន្ធដារ បានអនុវត្តប្រកបដោយជោគជ័យ នូវយុទ្ធសាស្ត្រកៀរគរចំណូល ២០១៩-២០២៣ របស់រាជរដ្ឋាភិបាល ដែលផ្តោតសំខាន់ទៅលើការធ្វើបច្ចុប្បន្នភាព និងទំនើបកម្មគោលនយោបាយ និងរដ្ឋបាលសារពើពន្ធជាបន្តបន្ទាប់ ដើម្បីជំរុញ បង្កើនសមត្ថភាព ប្រសិទ្ធភាព និងស័ក្តិសិទ្ធិភាព នៃការគ្រប់គ្រងប្រមូលចំណូលពន្ធ។ បើតាមលោក គង់ វិបុល លទ្ធផលដ៏ជោគជ័យ និងជាទីមោទនៈនេះ គឺជាការចូលរួមចំណែកដ៏សំខាន់ ក្នុងការបន្តអភិវឌ្ឍប្រទេសជាតិ។

ក្នុងរយៈពេល៥ឆ្នាំ នៃយុទ្ធសាស្ត្រកៀរគរចំណូល ២០១៩-២០២៣ គឺឆ្នាំ២០១៩ ទទួលបាន ១១ ២៧៧.៣២ ប៊ីលានរៀល ស្មើនឹង ១២៣.២០%, ឆ្នាំ២០២០ ទទួលបាន ១១ ៧០០.៥២ ប៊ីលានរៀល ស្មើនឹង ១០១.៣៦%, ឆ្នាំ២០២១ ទទួលបាន ១១ ២៦៦.៧៩ ប៊ីលានរៀល ស្មើនឹង ១២៤.០២%, ឆ្នាំ២០២២ ទទួលបាន ១៣ ៩៩៣.២០ ប៊ីលានរៀល ស្មើនឹង ១២២.៥៤% និងឆ្នាំ២០២៣ ទទួលបាន ១៤ ៦២៩.១០ ប៊ីលានរៀល ស្មើនឹង ១០១.១៣%។

ថ្លែងនៅក្នុងកិច្ចប្រជុំបូកសរុបលទ្ធផលនេះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានលើកឡើងថា អគ្គនាយកដ្ឋានពន្ធដារ ជាស្ថាប័នប្រមូលចំណូលដ៏សំខាន់បំផុតសម្រាប់ជាតិ និងវាយតម្លៃខ្ពស់ក្នុងកិច្ចខិតខំប្រឹងប្រែងរបស់មន្រ្តីពន្ធដារទាំងអស់ ក្នុងការចូលរួមចំណែកបំពេញកិច្ចការងារចំពោះលទ្ធផលនៃការធ្វើទំនើបភាវូបនីយកម្មស្ថាប័ន។ ជាមួយគ្នានេះ លោកបានគាំទ្រលើវិធានការដែលបានដាក់ចេញរបស់អគ្គនាយកដ្ឋានពន្ធដារ សម្រាប់ទិសដៅអនុវត្តបន្តនៅឆ្នាំ ២០២៤នេះ៕

The post ពន្ធដារ ប្រមូលចំណូលបានជាង ៣,៦ពាន់លានដុល្លារ នៅឆ្នាំ ២០២៣ appeared first on Kampuchea Thmey Daily.

១០ខែ ឆ្នាំនេះ ពន្ធដារ រកចំណូលបានជាង ៣ពាន់លានដុល្លារ ស្មើជាង ៨៥% នៃផែនការ

Sophal Tuon — Thu, 16 Nov 2023 01:58:43 +0000

គិតត្រឹមរយៈពេល ១០ខែ ឆ្នាំ២០២៣ អគ្គនាយកដ្ឋានពន្ធដារ ប្រមូលចំណូលបានប្រមាណជា ៣ ០៦៦,៩៣ លានដុល្លារ ស្មើនឹង ៨៥,៨៧% នៃផែនការច្បាប់ស្តីពីហិរញ្ញវត្ថុសម្រាប់ ការគ្រប់គ្រងឆ្នាំ២០២៣។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ។

លោក គង់ វិបុល អគ្គនាយកនៃអគ្គនាយកដ្ឋានពន្ធដារ បានបង្ហាញថា ចំណូលពន្ធអាករគ្រប់ប្រភេទដែលពន្ធដារប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញ នៅក្នុងខែតុលា មានចំនួនជាង ២៦០ លានដុល្លារ ស្មើនឹង ៧,២៩% នៃផែនការ ច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។

បើតាមប្រធានពន្ធដារ ការគ្រប់គ្រងប្រមូលចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (e-Cormmerce) សម្រេចបានប្រមាណជាង ៦២ លានដុល្លារ ពីសហគ្រាសជាអ្នកជាប់ពន្ធអនិវាសនជនចំនួន ៨២ សហគ្រាស (សហគ្រាសផ្គត់ផ្គង់ទំនិញ និងសេវាអេឡិចត្រូនិកពីបរទេសចូលមកកម្ពុជា)។

ជាផែនការសម្រាប់ការអនុវត្តបន្តលោក គង់ វិបុល បានណែនាំឱ្យពង្រឹងការផ្សព្វផ្សាយ និងការអនុវត្តប្រកបដោយការយកចិត្តទុកដាក់នូវវិធានការលើកទឹកចិត្ត និងសម្រួលផ្នែកពន្ធដារជូនវិស័យឯកជន។

បន្ថែមពីលើនេះ អគ្គនាយកដ្ឋានពន្ធដារ នឹងបន្តយកចិត្តទុកដាក់ និងពង្រឹងការអនុវត្តការងារស្របតាមអនុសាសន៍របស់ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជាទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ នាកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែកញ្ញា និងប្រចាំត្រីមាសទី៣ ឆ្នាំ២០២៣ កាលពីថ្ងៃទី៣០ ខែតុលា ឆ្នាំ២០២៣ ជាពិសេស ការងារអាទិភាពសំខាន់ៗក្នុងការពង្រឹង និងធ្វើឱ្យប្រសើរឡើងនូវការផ្តល់សេវាអ្នកជាប់ពន្ធ ការដាក់ចេញនូវអាទិភាពការងារ និងដោះស្រាយនូវបញ្ហាប្រឈមនានារបស់វិស័យឯកជនក៏ដូចជា សាធារណជនទូទៅ ការលើកកម្ពស់ការយល់ដឹង និងការអប់រំអំពីពន្ធដារ ការពង្រឹងក្នុងការបំពេញការងារដោយផ្អែកលើ និយាមនីតិវិធីប្រតិបត្តិការងារ (SOP) លើគ្រប់ប្រភេទការងារ និងប្រភេទពន្ធ ព្រមទាំងអនុសាសន៍គន្លឹះមួយចំនួនទៀត សម្រាប់ការងារកែទម្រង់ជាលក្ខណៈប្រព័ន្ធផងដែរ៕

The post ១០ខែ ឆ្នាំនេះ ពន្ធដារ រកចំណូលបានជាង ៣ពាន់លានដុល្លារ ស្មើជាង ៨៥% នៃផែនការ appeared first on Kampuchea Thmey Daily.