លោក ថាក់ស៊ីន ស៊ីណាវ៉ាត់ត្រា Archives - Kampuchea Thmey Daily

លោក ថាក់ស៊ីន ចូលសវនាការតុលាការព្រហ្មទណ្ឌ ចំថ្ងៃកូនស្រីរបស់លោក ត្រូវព្យួរអំណាច

Rann Reuy — Tue, 01 Jul 2025 07:45:51 +0000

លោកថាក់ស៊ីន ស៊ីណាវ៉ាត្រ ស្ថិតក្នុងវ័យ៧៥ឆ្នាំបានបង្ហាញខ្លួននៅក្នុងតុលាការព្រហ្មទណ្ឌទីក្រុងបាងកកនៅថ្ងៃទី១ខែកក្កដា ឆ្នាំ២០២៥ ដើម្បីឆ្លើយតបទៅនឹងការចោទប្រកាន់ពីបទប្រមាថព្រះមហាក្សត្រ ដែលផ្តើមចេញពីសុន្ទរកថា និងបទសម្ភាសន៍កាលពីឆ្នាំ ២០១៥ ដល់អ្នកកាសែតនៅកូរ៉េខាងត្បូង ក្នុងអំឡុងពេលនិរទេសខ្លួនរបស់គាត់។

លោក ថាក់ស៊ីន ស៊ីណាវ៉ាត្រ និងកូនស្រី ផែថងថាន ពេលស្ថិតនៅក្នុងឯកសណ្ឋានស្បថចូលកាន់តំណែងរបស់លោកស្រី ផែថងថាន កាលខែសីហាឆ្នាំ២០២៤។ FB

សវនាការលើបទចោទព្រហ្មទណ្ឌនេះជាសវនាការផ្លូវការលើកដំបូងរបស់អតីតនាយករដ្នមន្ត្រីដ៏មានឥទ្ធិពល ហើយលោកបានសារភាពថាមិនមានពិរុទ្ធភាពទាំងច្បាប់បរិហារកេរ្តិ៍ និងច្បាប់ឧក្រិដ្ឋកម្មកុំព្យូទ័រ ដូចការចោទប្រកាន់នោះទេ។ នេះបើយោងតាម ការចេញផ្សាយរបស់សារព័ត៌មាន The Thaiger។

សវនាការលើបទល្មើសព្រហ្មទណ្ឌនេះនាពេលនេះ គឺចំថ្ងៃដែលមហាក្សត្រថៃចេញរាជក្រឹត្យតែងតាំងសមាជិកគណៈរដ្ឋមន្ត្រីថ្មីមួយចំនួនដែលត្រូវដោះដូរ និងក៏ចំថ្ងៃដែលតុលាការធម្មនុញ្ញបានសម្រេចផ្អាកតួនាទីកូនស្រីរបស់លោក គឺនាយករដ្ឋមន្ត្រី ផែថងថានពីតួនាទីផងដែរ ដើម្បីបើកការស៊ើបអង្កេតលើការចោទប្រកាន់រំលោភលើក្រមសីលរដ្ឋធម្មនុញ្ញ ដោយសារតែការលេចធ្លាយការនិយាយទូរស័ព្ទជាមួយប្រធានព្រឹទ្ធសភាកម្ពុជា។

នៅក្នុងអង្គសវនាការរបស់តុលាការព្រហ្មទណ្ឌដដែលនេះ លោកថាក់ស៊ីន ត្រូវបានគេផ្តល់ប្រាក់ធានា ៥០ម៉ឺនបាត និងតម្រូវឱ្យប្រគល់លិខិតឆ្លងដែនរបស់គាត់ ជាមួយនឹងការហាមឃាត់មិនឱ្យចាកចេញពីប្រទេស លុះត្រាតែមានការអនុញ្ញាតច្បាស់លាស់។

លោក ថាក់ស៊ីន ប្រឈមមុខការជាប់ពន្ធនាគាររហូតដល់ ១៥ ឆ្នាំក្នុងមួយបទល្មើសនេះ ដែលធ្វើការចោទប្រកាន់ប្រឆាំងលោកថាក់ស៊ីនលើកនេះក្លាយជាដំណើរការផ្លូវច្បាប់ដ៏ធ្ងន់ធ្ងរបំផុតក្នុងនយោបាយថៃទំនើប។

ទោះបីជាគាត់មានសេរីភាពនៅក្រៅឃុំក៏ដោយ តុលាការនឹងបើកសវនាការប្រចាំខែ ហើយការបំពានលក្ខខណ្ឌនៃការនៅក្រៅឃុំអាចនាំឱ្យមានការចាប់ខ្លួនជាថ្មី។ តាមការផ្សាយកន្លងមករបស់សារព័ត៌មានថៃ តុលាការព្រហ្មទណ្ឌនឹងចោទសួរសាក្សី២៤រូប ក្នុងសំណុំរឿងនេះ ក្នុងនោះសាក្ស១០រូបដាក់បន្ទុក និងសាក្សី១៤រូបសម្រាប់ដោះបន្ទុក។

ក្បួនរថយន្តលោក ថាក់ស៊ីន ចាកចេញពីតុលាការព្រហ្មទណ្ឌ នៅម៉ោង១២ថ្ងៃត្រង់ បន្ទាប់ពីការសួរដេញដោលសាក្សីលើកដំបូង ក្នុងសំណុំរឿងមាត្រា ១១២ និងច្បាប់ស្តីពីបទល្មើសកុំព្យូទ័រ៕

រ៉ាន់ រើយ

ក្បួនរថយន្តរបស់សាក់ស៊ីនចេញពីសវនាការនៅថ្ងៃអង្គារនេះ។

The post លោក ថាក់ស៊ីន ចូលសវនាការតុលាការព្រហ្មទណ្ឌ ចំថ្ងៃកូនស្រីរបស់លោក ត្រូវព្យួរអំណាច appeared first on Kampuchea Thmey Daily.

គណបក្ស Bhumjaithai ដកខ្លួនចេញពីរដ្ឋាភិបាលចម្រុះដឹកនាំដោយបក្សភឿថៃ

Rann Reuy — Wed, 18 Jun 2025 14:36:10 +0000

ក្រោយជម្លោះរឿងដោះដូរក្រសួងមហាផ្ទៃ គណបក្ស Bhumjaithai របស់ លោក Anutin Charnvirakul ដែលកំពុងដឹកនាំកាន់កាប់ក្រសួងមហាផ្ទៃរបស់ថៃ នៅល្ងាចថ្ងៃពុធនេះ បានប្រកាសដកខ្លួនចេញពីរដ្ឋាភិបាលចម្រុះដឹកនាំដោយគណបក្សភឿថៃ ដែលមានលោកស្រីផែថងថាន ជានាយករដ្ឋមន្ត្រី។

លោក Anutin Charnvirakul ប្រធានគណបក្ស Bhumjaithai មើលមុខការថ្លែងសាររបស់នាយករដ្ឋមន្ត្រីថៃនៅថ្ងៃពុធនេះ ឆ្លើយតបចំពោះការបែកសារសំឡេង។ The Standard

ការប្រកាសដកខ្លួនចេញពីរដ្ឋាភិបាលចម្រុះរបស់ គណបក្ស Bhumjaithai កើតឡើងមួយថ្ងៃពីការដាក់ឱសានវាទរបស់គណបក្សភឿថៃ ឲ្យលោក Anutin Charnvirakul បោះបង់ក្រសួងមហាផ្ទៃប្រគល់ទៅឲ្យគណបក្សភឿថៃ គ្រប់គ្រង ហើយជាថ្នូរមកវិញ គណបក្សភឿថៃនឹងប្រគល់ក្រសួងពីរគឺក្រសួងសុខភាពសាធារណៈ និង ទីស្តីការគណៈរដ្ឋមន្ត្រីទៅឲ្យគណបក្សBhumjaithai។

ក្នុងការផ្លាស់ប្តូរគណៈរដ្ឋមន្ត្រីនេះរបស់រដ្ឋាភិបាលលោកស្រី ផែថងថា ស៊ីណាវ៉ាត្រ បន្ទាប់ពីការដឹកនាំរដ្ឋាភិបាលចម្រុះមិនដល់១ឆ្នាំ បន្តពីលោក សេដ្ឋា ថាវីស៊ីន កាលពីខែសីហាឆ្នាំមុន ប៉ុន្តែលោកស្រី ផែថងថាន ខកខានផ្លាស់ប្តូរគណៈរដ្ឋមន្ត្រីក្នុងពេលជាមួយគ្នា រហូតដល់ពេលនេះ ទើបចង់សើរើ ក្នុងពេលដែលវិបត្តិនយោបាយថៃកាន់តែធ្លាក់ចូលទៅក្នុងវិបត្តិផ្ទៃក្នុង ពិបាកស្រោចស្រង់។

ការចាកចេញរបស់គណបក្ស Bhumjaithai ដែលឈ្នះឆ្នោតលំដាប់លេខរៀងទី៣មានរហូតដល់៧១អាសនៈក្នុងការបោះឆ្នោតកាលឆ្នាំ២០២៣ នឹងធ្វើឲ្យរដ្ឋាភិបាលចម្រុះប្រឈមវិបត្តិបង្កើតរដ្ឋាភិបាលស្របច្បាប់ថ្មីទៀត ដោយសារតែសំឡេងតំណាងរាស្រ្តពីគណបក្សមានចំនួនច្រើន និងពិបាករកគណបក្សផ្សេងមកបង្គ្រប់។

ក្នុងសេចក្តីថ្លែងការណ៍ គណបក្ស Bhumjaithai ប្រកាសចាកចេញពីរដ្ឋាភិបាលចម្រុះនេះ គណបក្សនេះក៏ទាមទារ ឲ្យនាយករដ្ឋមន្ត្រី ផែថងថាន ស៊ីណាវ៉ាត្រ ទទួលខុសត្រូវចំពោះសារសំឡេងបែកធ្លាយដែលជាការសន្ទនាជាមួយសម្តេច ហ៊ុន សែន ប្រធានព្រឹទ្ធសភាកម្ពុជា ដោយក្នុងសារសំឡេងនោះ បានលើកឡើងពីការស្នើសុំបើកច្រកព្រំដែនដូចម៉ោងដដែលដែលធ្លាប់ធ្វើ ខណៈសម្តេចហ៊ុន សែន បានលើកឡើងថា ភាគីថៃជាអ្នកបិទ ភាគីថៃគឺជាអ្នកបើកមុន ហើយ កម្ពុជាត្រៀមតែអនុវត្តតាមយ៉ាងយូរ៥ម៉ោងក្រោយមក៕

រ៉ាន់ រើយ

The post គណបក្ស Bhumjaithai ដកខ្លួនចេញពីរដ្ឋាភិបាលចម្រុះដឹកនាំដោយបក្សភឿថៃ appeared first on Kampuchea Thmey Daily.

លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស

Rann Reuy — Wed, 28 May 2025 03:40:01 +0000

ការបង្ហាញខ្លួនដ៏គួរឲ្យចាប់អារម្មណ៍របស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ នៅរសៀលថ្ងៃទី២៧ ខែឧសភា ឆ្នាំ២០២៥ នេះ គឺក្នុងនាមជាវាគ្មិនថ្លែងសុន្ទរកថាពិសេសមួយនៅការិយាល័យគណៈកម្មាធិការប្រយុទ្ធប្រឆាំងគ្រឿងញៀនក្រោមប្រធានបទស្តីពីបញ្ហា «គ្រឿងញៀននិងឧក្រិដ្ឋកម្មឆ្លងដែន ទស្សនវិស័យ និងបញ្ហាប្រឈមសម្រាប់ដំណោះស្រាយប្រកបដោយនិរន្តរភាព»។

លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ ពេលបង្ហាញមុខជាសាធារណៈ ក្រោយកើតឡើងពាក្យចរាមអារ៉ាមថាលោករត់គេចទៅក្រៅប្រទេស។ Khaosod

នេះជាការបង្ហាញខ្លួនជាសាធារណៈលើកដំបូងរបស់លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ បន្ទាប់ពីតុលាការកំពូលផ្នែកព្រហ្មទណ្ឌសម្រាប់អ្នកកាន់មុខតំណែងនយោបាយបានកំណត់ថ្ងៃណាត់ជួបនិងបើកសវនាការសាកសួរនៅថ្ងៃទី១៣ខែមិថុនាខាងមុខ ជុំវិញសំណុំរឿងសម្រាកព្យាបាលជំងឺនៅជាន់ទី១៤របស់មន្ទីរពេទ្យប៉ូលិសក្រុងបាងកក និងបន្ទាប់ពីមានព័ត៌មានចចាមអារ៉ាមថា រូបលោកបានរត់គេចខ្លួនចេញទៅក្រៅប្រទេសដើម្បីគេចពីការណាត់ជួបសាកសួរនេះ។

លោក ថាក់ស៊ីន ស៊ីណាវ៉ាត្រ បានវិលចូលមាតុប្រទេសវិញកាលខែសីហាឆ្នាំ២០២៣ គឺនៅមុនថ្ងៃដែលសភាថៃបោះឆ្នោតជ្រើសរើសបេក្ខជននាយករដ្ឋមន្ត្រីចេញពីគណបក្សភឿថៃ ហើយត្រូវវបានតុលាការកំពូលកាត់ទោសឲ្យជាប់ពន្ធធនាគារ ១ឆ្នាំ ហើយលោកក៏ត្រូវចូលសម្រាកព្យាបាលនៅមន្ទីរពេទ្យប៉ូលិសនៅទីក្រុងបាងកក ដែលជាពេទ្យរបស់ពន្ធធាគារដោយសាររូបលោកជាពិរុទ្ធជន (អ្នកទោស) ដែលត្រូវអនុវត្តទោសរយៈពេល១២០ថ្ងៃក្នុងពន្ធធាគារ។

ក្នុងពេលបង្ហាញខ្លួនលើកដំបូងកាលថ្ងៃទី២៧ខែឧសភា យោងសារព័ត៌មានថៃ naewna លោក ថាក់ស៊ីន ស៊ីណាវ៉ាត្រ ក៏បាននិយាយទៅកាន់អ្នកសារព័ត៌មានផងដែរថា រូបលោកមានអាយុជាង៧០ឆ្នាំទៅហើយ ប៉ុន្តែការរស់នៅហូបចុកសុខសប្បាយជាធម្មតាទេ មិនបានគេចខ្លួនទៅណាដូចពាក្យចចាមអារ៉ាមនោះទេ និងបានផ្តាំផ្ញើទៅកាន់អ្នកដែលបញ្ចេញព័ត៌មានចចាមអារ៉ាមទាំងអស់ធ្វើចិត្តឱ្យត្រជាក់ៗ។

លោកថាក់ស៊ីន បន្តថា អ្នកដែលបញ្ចេញព័ត៌មានចចាមអារ៉ាមនេះមានមិនច្រើននាក់នោះទេ ពោលគឺតែម្នាក់ពីរនាក់ប៉ុណ្ណោះ៕

ដោយ ភ្នាក់ងារ

The post លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស appeared first on Kampuchea Thmey Daily.

លោក ថាក់ស៊ីន បង្ហាញបំណងចេញមុខជួយរដ្ឋាភិបាលកូន ចរចារឿងពន្ធគយជាមួយអាមេរិក

Rann Reuy — Sat, 26 Apr 2025 15:22:25 +0000

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ បង្ហាញបំណងចេញមុខទៅចរចាជាមួយរដ្ឋបាលរបស់លោក ដូណាល់ ត្រាំ ដែលដំឡើងពន្ធនាំចូលខុសប្រក្រតី ដែលបង្កទៅជាក្តីបារម្ភជុំវិញសកលលោក។

រូបភាពផ្គុំគ្នារបស់លោកថាក់ស៊ីន និង លោក ដូណាល់ ត្រាំ។ Khaosod

យោងសេចក្តីរាយការណ៍របស់សារព័ត៌មានថៃ Khaosod អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រ នៅថ្ងៃសៅរ៍ បានជំរុញរដ្ឋាភិបាលរបស់កូនស្រីរបស់គាត់កុំឱ្យប្រញាប់ប្រញាល់ខ្លាំងពេកក្នុងការចរចារពន្ធគយជាមួយរដ្ឋាភិបាលសហរដ្ឋអាមេរិក។

នៅក្នុងសេចក្តីរាយការណ៍នោះ អតីតនាយករដ្ឋមន្ត្រីថៃរូបនេះ បានបន្ថែមថា ក្រុមចរចាត្រូវតែចេះអត់ធ្មត់ ហើយប្រសិនបើចាំបាច់ លោកនឹងពិចារណាស្វែងរកការអនុញ្ញាតពីតុលាការ ដើម្បីធ្វើដំណើរទៅកាន់សហរដ្ឋអាមេរិក ដើម្បីជួយចរចា។

កាលពីពាក់កណ្តាលខែមីនា រដ្ឋបាលរបស់លោកដូណាល់ ត្រាំ បានដាក់ពន្ធគយបដិការ ដល់ប្រទេសនានាជុំវិញពិភពលោក ដែលមានជញ្ជីងពាណិជ្ជកម្មមិនស្មើភាពទៅតាមកម្រិតនៃឱនភាពពាណិជ្ជកម្ម ប៉ុន្តែក្រោយមក រដ្ឋបាលរបស់ កីបានប្រកាសព្យួរការអនុវត្តរហូតដល់ខែកក្កដាវិញ ដើម្បីបើកផ្លូវឲ្យមានការចរចាទ្វេភាគី។

លោក ថាក់ស៊ីន ស៊ីណាវ៉ាត្រ ជាមហាសេដ្ឋីវ័យ ៧៥ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល៨ឆ្នាំពីបទប្រព្រឹត្តអំពើពុករលួយ និងរំលោភអំណាច បន្ទាប់ពីគាត់បានត្រលប់ទៅប្រទេសថៃកាលពី២ឆ្នាំមុនបន្ទាប់ពីការនិរទេសខ្លួនរយៈពេល ១៥ឆ្នាំ។ ទោះបីជាបែបនេះក្តី លោកត្រូវបានព្រះមហាក្សត្រលើកលែងទោសរយៈពេល ៦ខែក្រោយមក ហើយការជាប់ឃុំរបស់លោកគឺស្ថិតនៅក្នុងលក្ខខណ្ឌព្យាបាលជំងឺដោយសម្រាកនៅក្នុងមន្ទីរពេទ្យ រហូតដល់ថ្ងៃដោះលែងផ្លូវការ។

កាលពីឆ្នាំមុន គាត់ត្រូវបានចោទប្រកាន់ពីបទប្រមាថព្រះមហាក្សត្រជុំវិញការបញ្ចេញមតិដែលគាត់បានធ្វើទៅកាន់ប្រព័ន្ធផ្សព្វផ្សាយកូរ៉េខាងត្បូងកាលពីប្រាំបួនឆ្នាំមុន ហើយនឹងត្រូវប្រឈមមុខនឹងការកាត់ទោសនៅខែកក្កដាខាងមុខនេះ។ កាលពីពេលថ្មីៗនេះ តុលាការថៃបានហាមលោកថាក់ស៊ីន ធ្វើដំណើរមកកាន់កម្ពុជា និងប្រទេសប្រ៊ុយណេ ក្នុងដំណើរធុរកិច្ច។

លោក ថាក់ស៊ីន ស៊ីណាវ៉ាត្រ ក្រោយពីការចេញមុខមាត់ខ្លាំងក្នុងឆាកនយោបាយថៃ ត្រូវតុលាការថៃចេញដីកាដាក់នៅក្រោមការតាមដានរបស់សមត្ថកិច្ច។ លោកថាក់ស៊ីន ក៏ត្រូវបានរដ្ឋាភិបាលម៉ាឡេស៊ីរបស់នាយករដ្ឋមន្ត្រី អាន់វ៉ា អ៊ីប្រាហ៊ីម តែងតាំងជាទីប្រឹក្សាសេដ្ឋកិច្ចសម្រាប់កិច្ចប្រជុំកំពូលអាស៊ានដែលម៉ាឡេស៊ីធ្វើជាម្ចាស់ផ្ទះនៅឆ្នាំនេះដែរ៕

ដោយ រ៉ាន់ រើយ

The post លោក ថាក់ស៊ីន បង្ហាញបំណងចេញមុខជួយរដ្ឋាភិបាលកូន ចរចារឿងពន្ធគយជាមួយអាមេរិក appeared first on Kampuchea Thmey Daily.

សកម្មជនប្រឆាំងថៃប្តេជ្ញាតតាំងប្រឆាំងនឹងច្បាប់កាស៊ីណូ និងអាជីវកម្មកម្សន្ត

Rann Reuy — Thu, 27 Mar 2025 10:59:15 +0000

មេចលនាប្រឆាំងថៃប្រកាសធ្វើបាតុកម្មអូសបន្លាយនៅមុខវិមានរដ្ឋាភិបាលជារៀងរាល់ថ្ងៃ បន្ទាប់ពីគណៈរដ្ឋមន្ត្រីអនុម័តលើសេចក្តីព្រាងច្បាប់ស្តីពីកាស៊ីណូនិងអាជីវកម្មកម្សាន្តគ្រប់ប្រភេទនៅថ្ងៃទី២៧ខែមីនាឆ្នាំ២០២៥នេះ។

លោក ចតុផន ព្រំផាន់ អតីតមេដឹកនាំក្រុមអាវក្រហម។ MONO NEWS

បណ្តាញសារព័ត៌មានក្នុងប្រទេសថៃ បានរាយការណ៍ថា ក្រុមបណ្តាញនិស្សិតប្រជាជនដើម្បីកំណែទម្រង់ប្រទេស បណ្តាញប្រជាជនការពារស្ថាប័នព្រះមហាក្សត្រ និងក្រុមកងទ័ពព្រះធម៌ ដែលដឹកនាំដោយលោក ចតុផន ព្រំផាន់ អតីតមេដឹកនាំក្រុមអាវក្រហម និងបច្ចុប្បន្នជាមេដឹកនាំចលនាប្រឆាំង បានប្រមូលផ្តុំតវ៉ានិងធ្វើសន្និសីទសារព័ត៌មាននៅមុខវិមានរដ្ឋាភិបាល ដើម្បីប្រឆាំងសេចក្តីព្រាងច្បាប់ស្តីពីកាស៊ីណូនិងអាជីវកម្មកម្សាន្តគ្រប់ប្រភេទ។

ការប្រមូលផ្តុំតវ៉ានេះត្រូវបានធ្វើឡើងតាមការណាត់របស់លោក ចតុផន ព្រំផាន់ កាលពីថ្ងៃមុនថា ពួកគេនឹងប្រមូលផ្តុំតវ៉ាប្រឆាំងនឹងច្បាប់នេះ បន្ទាប់ពីសភាបញ្ចប់កិច្ចប្រជុំចោទសួរដេញដោលដើម្បីដកទំនុកចិត្តពីនាយករដ្ឋមន្ត្រី។ ដំណាលគ្នាក្នុងថ្ងៃទី២៧ ខែមីនានេះ គណៈរដ្ឋមន្ត្រីបានបើកកិច្ចប្រជុំដើម្បីពិចារណាលើសេចក្តីព្រាងច្បាប់ស្តីពីកាស៊ីណូនិងអាជីវកម្មកម្សាន្តគ្រប់ប្រភេទនេះ ដែលរដ្ឋាភិបាលរំពឹងថា នឹងជួយទាក់ទាញការវិនិយោគនិងជំរុញសេដ្ឋកិច្ចទេសចរណ៍។

គួរបញ្ជាក់ថា ច្បាប់នេះផ្តើមចេញពីគំនិតផ្តួចផ្តើមរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រី និងត្រូវបានលោកលើកឡើងក្នុងអំឡុងពេលចុះជួបប្រជាពលរដ្ឋអ្នកគាំទ្រស្ទើរគ្រប់វេទិការ ហើយរដ្ឋាភិបាលគណបក្សភឿថៃដែលដឹកនាំដោយលោកស្រី ផែថងថាន ស៊ីណាវ៉ាត្រា ដែលជាកូនស្រីពៅបង្កើតលោក ថាក់ស៊ីន ក៏បានព្យាយាមធ្វើការបំភ្លឺអំពីគោលបំណងក្នុងការបង្កើតច្បាប់នេះផងដែរ។

សេចក្តីរាយការណ៍បានបន្តថា លោក ចតុផន ព្រំផាន់ មេដឹកនាំចលនាប្រឆាំងបានប្រកាសក្នុងសន្និសីទសារព័ត៌មានថា ពួកគេនឹងប្រមូលផ្តុំធ្វើបាតុកម្មអូសបន្លាយជារៀងរាល់ថ្ងៃនៅមុខវិមានរដ្ឋាភិបាលដើម្បីប្រឆាំងនឹងច្បាប់កាស៊ីណូនេះ ប្រសិនបើរដ្ឋាភិបាលមិនដកថយ៕

The post សកម្មជនប្រឆាំងថៃប្តេជ្ញាតតាំងប្រឆាំងនឹងច្បាប់កាស៊ីណូ និងអាជីវកម្មកម្សន្ត appeared first on Kampuchea Thmey Daily.

នាយករដ្ឋមន្ត្រី៣រូបក្នុងត្រកូល «ស៊ីណាវ៉ាត្រា» មានវាសនាខ្ពស់រួចផុតពីការទម្លាក់អំណាចដោយសភា ប៉ុន្តែ២រូបឆ្លងមិនផុតរដ្ឋប្រហារ

Rann Reuy — Thu, 27 Mar 2025 03:40:58 +0000

នាយករដ្ឋមន្ត្រី៣រូបចេញពីត្រកូល «ស៊ីណាវ៉ាត្រា» រួមមាន៖ លោក ថាក់ស៊ីន ស៊ីណាវ៉ាត្រា លោកស្រី យីងឡាក់ ស៊ីណាវ៉ាត្រា និង លោកស្រី ផែថងថាន ស៊ីណាវ៉ាត្រា ទាំង៣រូបសុទ្ធតែមានវាសនាខ្ពស់បានរួចផុតពីការជជែកដេញដោលដើម្បីទម្លាក់ពីតំណែងនាយករដ្ឋមន្ត្រី តាមរយៈការបោះឆ្នោតដកសេចក្តីទុកចិត្តលើរដ្ឋាភិបាលដែលខ្លួនដឹកនាំ។

លោក ថាក់ស៊ីន ស៊ីណាវ៉ាត្រា ឈរកាន់ដៃកូនស្រីពៅ ផែថងថាន ខណៈប្អូនស្រី យីងឡាក់ ឈរឱបពីក្រោយ។ Bangkok Post

លោក ថាក់ស៊ីន ស៊ីណាវ៉ាត្រា ដែលបានដឹកនាំរដ្ឋាភិបាលថៃពីឆ្នាំ២០០១ ដល់២០០៦ បានរួចផុតពីញត្តិស្នើដកសេចក្តីទុកចិត្តរបស់រដ្ឋាភិបាលក្នុងអំឡុងពេលដែលលោកដឹកនាំ ដោយសារតែនៅអំឡុងពេលដែលលោកកាន់តំណែងជានាយករដ្ឋមន្ត្រីពេលនោះស្ថិតក្រោមច្បាប់រដ្ឋធម្មនុញ្ញឆ្នាំ១៩៩៧។

ច្បាប់រដ្ឋធម្មនុញ្ញរបស់ព្រះរាជាណាចក្រថៃឆ្នាំ១៩៩៧ បានកំណត់ «ចំនួនសមាជិកសភាភាគច្រើន» ទើបអាចស្នើញត្តិដកសេចក្តីទុកចិត្តរបសនាយករដ្ឋមន្ត្រីបាន ទើបវាជាហេតុធ្វើឱ្យគណបក្សប្រឆាំងមិនអាចមានសំឡេងគ្រប់គ្រាន់ដើម្បីដាក់ញត្តិស្នើសុំធ្វើការចោទសួរដេញដោល ឈានទៅបោះឆ្នោតទម្លាក់រដ្ឋាភិបាលបាន។

ប៉ុន្តែជាអកុសល រដ្ឋាភិបាលរបស់លោក ថាក់ស៊ីន ស៊ីណាវ៉ាត្រា ត្រូវបានធ្វើរដ្ឋប្រហារទម្លាក់នៅខែកញ្ញាឆ្នាំ២០០៦ ពេលដែលលោកដឹកនាំគណៈប្រតិភូទៅចូលរួមប្រជុំនៅសន្និបាតអង្គការសហប្រជាជាតិ។ ចាប់ពីពេលនោះ រដ្ឋាភិបាលយោធារបស់ប្រទេសថៃបានរៀបចំតាក់តែងច្បាប់រដ្ឋធម្មនុញ្ញថ្មី។

ក្រោមច្បាប់រដ្ឋធនុញ្ញថ្មី រដ្ឋាភិបាលថៃដឹកនាំដោយនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រា ដែលត្រូវជាប្អូនបង្កើតរបស់លោក ថាក់ស៊ីន ស៊ីណាវ៉ាត្រា បានទទួលរងការចោទសួរដេញដោលរហូតដល់២ដង ពោលគឺក្នុងឆ្នាំ២០១២ទទួលបានសំឡេងគាំទ្រចំនួន៣០៨សំឡេង និងក្នុងឆ្នាំ២០១៣ម្តងទៀត ដោយទទួលបានសំឡេងគាំទ្រចំនួន២៩៧សំឡេង។ ការបោះឆ្នោតដកសេចក្តីទុកចិត្តទាំងពីរលើកនេះ មិនអាចធានាបានកូរ៉ុមគ្រប់គ្រាន់ដើម្បីទម្លាក់រដ្ឋាភិបាលបានឡើយ។

ទោះបីជាបែបណា រដ្ឋាភិបាលថៃដឹកនាំដោយលោកស្រី លោកស្រី យីងឡាក់ ស៊ីណាវ៉ាត្រា ក៏មានវាសនាមិនខុសពីរដ្ឋាភិបាលដឹកនាំដោយបងប្រុស ដោយត្រូវក្រុមយោធាដឹកនាំដោយ លោក ប្រាយុទ្ធ ចាន់អូចា ធ្វើរដ្ឋប្រហារនៅឆ្នាំ ២០១៤។

ចំណែករដ្ឋាភិបាលរបស់ លោកស្រី ផែថងថាន ស៊ីណាវ៉ាត្រា ដែលត្រូវជាកូនស្រីពៅរបស់លោក ថាក់ស៊ីន ស៊ីណាវ៉ាត្រា ទៀត ក៏ទទួលរងនូវការដាក់សម្ពាធដោយសារការដាក់ញត្តិសម្រាប់សួរដេញដោលដកសេចក្តីទុកចិត្តដែរ ក៏ប៉ុន្តែតាមរយៈការជជែកដេញដោលពីរថ្ងៃនៅថ្ងៃទី២៤ និងទី២៥ខែមីនា និងការបោះឆ្នោតសភានៅថ្ងៃទី២៦ខែមីនា ក៏នៅតែមិនអាចធ្វើអ្វីរដ្ឋាភិបាលដឹកនាំដោយកូនស្រីពៅរបស់លោកថាក់ស៊ីនបានឡើយ។ ផ្ទុយទៅវិញ រដ្ឋាភិបាលដឹកនាំដោយ លោកស្រី ផែថងថាន ស៊ីណាវ៉ាត្រា បានទទួលសំឡេងគាំទ្ររហូតដល់៣១៩សំឡេង ដែលត្រូវបានគេចាត់ទុកថា ជាចំនួនខ្ពស់បំផុតក្នុងប្រវត្តិសាស្ត្រនយោបាយថៃ៕

នាយករដ្ឋមន្ត្រី ផែថងថាន ឈរថតជាមួយសមាជិកសភានៃរដ្ឋាភិបាលចម្រុះក្រោយបោះឆ្នោតដកសេចក្តីទុកចិត្តបរាជ័យ។ The Nation

នាយករដ្ឋមន្ត្រីផែថងថានឆ្លើយសំណួរអ្នកកាសែត។

The post នាយករដ្ឋមន្ត្រី៣រូបក្នុងត្រកូល «ស៊ីណាវ៉ាត្រា» មានវាសនាខ្ពស់រួចផុតពីការទម្លាក់អំណាចដោយសភា ប៉ុន្តែ២រូបឆ្លងមិនផុតរដ្ឋប្រហារ appeared first on Kampuchea Thmey Daily.

មេដឹកនាំបក្សប្រឆាំងថៃងាកមកអបអរសាទរ ផែថងថានវិញ ក្រោយសំណើខ្លួនបរាជ័យ

Rann Reuy — Wed, 26 Mar 2025 09:58:40 +0000

ទីបំផុត មេដឹកនាំបក្សប្រឆាំងថៃដែលដាក់ញត្តិស្នើឲ្យសភាជជែកដេញដោលនិងបោះឆ្នោតដកសេចក្តីទុកចិត្តលើសមាសភាពនាយករដ្ឋមន្ត្រីថៃ ផែថងថាន ស៊ីណាវ៉ាត្រា ដោយចោទថា ធ្វើការតាមបញ្ជាឪពុកនោះ បានងាកមកអបអរសាទរវិញ ក្រោយលោកស្រី នាយករដ្ឋមន្ត្រី រួចផុតពីការបោះឆ្នោតទំលាក់ពីតំណែងនៅថ្ងៃពុធនេះ។

សមាជិកសភាឈរអមនាយករដ្ឋមន្ត្រីថៃ ផែថងថាន ក្រោយបោះឆ្នោតសភារួច។ Nation

ប្រភពព័ត៌មានបានរាយការណ៍ថា បរិយាកាសនៅក្នុងរដ្ឋសភាថៃ បន្ទាប់ពីសមាជិកសភាបានបោះឆ្នោតផ្តល់សេចក្តីទុកចិត្តដល់នាយករដ្ឋមន្ត្រី ផែថងថាន ស៊ីណាវ៉ាត្រា ដោយសំឡេងភាគច្រើន៣១៩ទល់នឹង១៦២សំឡេង និងបរិយាកាសពោរពេញដោយភាពរីករាយ បន្ទាប់ពីដឹងលទ្ធឆ្នោត ជំហររបស់មេដឹកនាំបក្សប្រឆាំងថៃបានផ្លាស់ប្តូរមកកាន់នាយករដ្ឋមន្ត្រីស្រ្តីវ័យក្មេងរបស់ថៃវិញ។

ទន្ទឹមនឹងនោះ តាមសេចក្តីរាយការណ៍ លោក Nattapong Ruangpanyawut ប្រធានគណបក្សប្រជាជនក្នុងនាមជាមេដឹកនាំបក្សប្រឆាំងដ៏ធំជាងគេនៅក្នុងសភា រួមទាំងសមាជិកគណបក្សប្រជាជនមួយចំនួនទៀត បានបង្ហាញការអបអរសាទរនិងថតរូបជាមួយនាយករដ្ឋមន្ត្រី ផែថងថាន នៅក្នុងសភា រួមជាមួយនឹងសមាជិកគណៈរដ្ឋមន្ត្រីមួយចំនួនផងដែរ

តាមសេចក្តីរាយការណ៍ គេឃើញសមាជិកសភាមកពីគណបក្សចម្រុះរដ្ឋាភិបាលបាននាំថតរូបជាក្រុមជាមួយនឹងទឹកមុខញញឹមរីករាយ ជាពិសេសនាយករដ្ឋមន្ត្រី ផែថងថាន បានបង្ហាញទឹកមុខស្រស់ស្រាយស្នាមញញឹទៅកាន់អ្នកពាក់ព័ន្ធក្នុងលក្ខណៈមិត្តភាព៕

The post មេដឹកនាំបក្សប្រឆាំងថៃងាកមកអបអរសាទរ ផែថងថានវិញ ក្រោយសំណើខ្លួនបរាជ័យ appeared first on Kampuchea Thmey Daily.

លោក សេដ្ឋា ថាវីស៊ីន បង្ហើបគម្រោងព្រែកជីក «Kra» ស្របពេលថាក់ស៊ីនទៅខាងត្បូង

Rann Reuy — Mon, 24 Feb 2025 10:42:03 +0000

អតីតនាយករដ្ឋមន្ត្រីដែលកាន់អំណាច១ឆ្នាំ លោក សេដ្ឋា ថាវីស៊ីន បានផ្តល់បទសម្ភាសន៍ដល់សារព័ត៌មានថៃនៅថ្ងៃចន្ទនេះ ដោយបង្ហើបប្រាប់ថា គម្រោងព្រែកជីកក្រា (Kra Canal) ដែលថៃហៅថា ជាស្ពានដីគោគស្ថិតនៅភាគខាងត្បូងប្រទេសនឹងផ្តល់ផលប្រយោជន៍ធំធេងដល់សេដ្ឋកិច្ចរបស់ប្រទេសថៃ។

អតីតនាយករដ្ឋមន្ត្រីដែលកាន់អំណាច១ឆ្នាំ លោក សេដ្ឋា ថាវីស៊ីន ធ្វើបទបង្ហាញដល់អ្នកវិនិយោគិនពេលលោកកាន់អំណាច។ X

សារព័ត៌មានថៃ Khaosod និងសារព័ត៌មាន Matichon បានជួបសម្ភាសន៍អតីតនាយករដ្ឋមន្ត្រីថៃ និងជាអ្នកជំនួញក្នុងវិស័យអចលនទ្រព្យដ៏ចំណាន ស្របពេលដែល លោក ថាក់ស៊ីន ស៊ីណាវ៉ាត្រា កំពុងបំពេញទស្សនកិច្ចក្នុងខេត្តភាគខាងត្បូងថៃ។ លោក ថាក់ស៊ីន អតីតនាយករដ្ឋមន្ត្រីដ៏មានឥទ្ធិពលក្នុងទសវត្សរ៍ឆ្នាំ២០០០ និងជាឪពុកនាយករដ្ឋមន្ត្រី ផែថងថាន ស៊ីណាវ៉ាត្រា នឹងត្រូវគេជឿថា មានឥទ្ធិពលយ៉ាងខ្លាំងក្នុងរដ្ឋាភិបាលថៃបច្ចុប្បន្ន។

លោក សេដ្ឋា ថាវីស៊ីន ត្រូវបានស្រង់សម្តី៖«គម្រោងសាងសង់ស្ពានដីគោកដែលស្នើឡើងនេះ ប្រសិនបើជោគជ័យនឹងផ្តល់ផលប្រយោជន៍យ៉ាងច្រើនដល់ប្រទេសថៃ ហើយប្រែក្លាយព្រះរាជាណាចក្រទៅជាប្រទេសស្វីសនៃបូព៌ា»។

អតីតនាយករដ្ឋមន្ត្រី សេដ្ឋា ថាវីស៊ីន បាននិយាយថា ផ្លូវសមុទ្រឆ្លងកាត់ច្រកសមុទ្រ Melacca មានការកកស្ទះខ្លាំង ហើយប្រទេសថៃនឹងទទួលបានអត្ថប្រយោជន៍ផ្នែកសេដ្ឋកិច្ច ប្រសិនបើវាអាចផ្តល់ជម្រើសជំនួស។

លោក សេដ្ឋា បានបន្ថែមថា ដោយសារថៃមិនចូលរួមក្នុងការប្រកួតប្រជែងរវាងអាមេរិក និងចិន មហាអំណាចទាំងពីរអាចជឿជាក់បានថា កប៉ាល់ដឹកទំនិញដែលធ្វើដំណើរឆ្លងកាត់ព្រែកជែកបស់ប្រទេសថៃនឹងមិនមានការរំខានឡើយ។

លោក ថាក់ស៊ីនបានធ្វើដំណើរទៅកាន់ប្រទេសថៃនៅថ្ងៃទី២៣ខែកុម្ភៈ ហើយនៅមុនដំណើរទស្សនកិច្ចទៅកាន់ភាគខាងត្បូងដែលតែងមានអំពើហិង្សា និងជាតំបន់ដែលទាមទារបំបែករដ្ឋក្នុងអាណត្តិរបស់លោកថាក់ស៊ីនគ្រប់គ្រងប្រទេសក្នុងទសវត្សរ៍ឆ្នាំ២០០០។

អំពើហិង្សានៅខេត្តយ៉ាឡា បណ្តាលឲ្យជនស៊ីវិលម្នាក់បានស្លាប់ និង១១នាក់ផ្សេងទៀតបានរងរបួស ក្នុងនោះមានប៉ូលិស៧នាក់ នៅពេលដែលគ្រាប់បែកបានផ្ទុះនៅខាងក្រៅផ្សារទំនើបមួយកន្លែងក្នុងស្រុក Bannang Sata កាលពីយប់ថ្ងៃទី២២ខែកុម្ភៈ។

នៅខេត្តណារ៉ាធីវ៉ាត់ គ្រាប់បែកមួយគ្រាប់ទៀតបានផ្ទុះឡើងលើរថយន្តភីកអាប់របស់ក្រុមពន្លត់អគ្គិភ័យដែលចតនៅក្បែរប៉មបញ្ជាការចរាចរណ៍ផ្លូវអាកាសនៅព្រលានយន្តហោះណារ៉ាធីវ៉ាត់ នៅព្រឹកថ្ងៃទី២៣ខែកុម្ភៈ៕

The post លោក សេដ្ឋា ថាវីស៊ីន បង្ហើបគម្រោងព្រែកជីក «Kra» ស្របពេលថាក់ស៊ីនទៅខាងត្បូង appeared first on Kampuchea Thmey Daily.

លោក ថាក់ស៊ីន ស៊ីណាវ៉ាត់ត្រា Archives - Kampuchea Thmey Daily

​លោក ថាក់ស៊ីន ​ចូល​សវនាការ​​តុលាការ​ព្រហ្មទណ្ឌ​ ចំថ្ងៃ​កូនស្រី​របស់លោក ត្រូវព្យួរអំណាច​​

គណបក្ស​ Bhumjaithai ដក​ខ្លួនចេញ​​​ពីរដ្ឋាភិបាល​ចម្រុះ​ដឹកនាំ​ដោយ​បក្ស​ភឿថៃ​​

លោក ថាក់ស៊ីន បង្ហាញ​វត្តមាន​ដំបូង​ បញ្ចប់​ពាក្យ​ចចាមអារ៉ាម ថា គាត់​រត់គេចខ្លួនទៅក្រៅប្រទេស

លោក ថាក់ស៊ី​ន​​​ បង្ហាញ​បំណង​ចេញមុខ​​​ជួយរដ្ឋាភិបាល​​កូន ចរចា​​រឿងពន្ធ​​គយ​ជាមួយអាមេរិក

សកម្មជន​ប្រឆាំងថៃ​ប្តេជ្ញា​តតាំងប្រឆាំង​​នឹង​ច្បាប់​​​​កាស៊ីណូ និង​អាជីវកម្ម​កម្សន្ត​

មេដឹកនាំ​បក្ស​ប្រឆាំងថៃងាក​មក​អបអរសាទរ​ ផែថងថានវិញ ក្រោយសំណើខ្លួនបរាជ័យ​