ព័ត៌មានអន្ដរជាតិ

លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស

បានផុស

១ year មុន

នៅ

ថ្ងៃពុធ ២៨ ឧសភា ២០២៥

ដោយ

ការបង្ហាញខ្លួនដ៏គួរឲ្យចាប់អារម្មណ៍របស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ នៅរសៀលថ្ងៃទី២៧ ខែឧសភា ឆ្នាំ២០២៥ នេះ គឺក្នុងនាមជាវាគ្មិនថ្លែងសុន្ទរកថាពិសេសមួយនៅការិយាល័យគណៈកម្មាធិការប្រយុទ្ធប្រឆាំងគ្រឿងញៀនក្រោមប្រធានបទស្តីពីបញ្ហា «គ្រឿងញៀននិងឧក្រិដ្ឋកម្មឆ្លងដែន ទស្សនវិស័យ និងបញ្ហាប្រឈមសម្រាប់ដំណោះស្រាយប្រកបដោយនិរន្តរភាព»។

លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ ពេលបង្ហាញមុខជាសាធារណៈ ក្រោយកើតឡើងពាក្យចរាមអារ៉ាមថាលោករត់គេចទៅក្រៅប្រទេស។ Khaosod

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការបង្ហាញខ្លួនជាសាធារណៈលើកដំបូងរបស់លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ បន្ទាប់ពីតុលាការកំពូលផ្នែកព្រហ្មទណ្ឌសម្រាប់អ្នកកាន់មុខតំណែងនយោបាយបានកំណត់ថ្ងៃណាត់ជួបនិងបើកសវនាការសាកសួរនៅថ្ងៃទី១៣ខែមិថុនាខាងមុខ ជុំវិញសំណុំរឿងសម្រាកព្យាបាលជំងឺនៅជាន់ទី១៤របស់មន្ទីរពេទ្យប៉ូលិសក្រុងបាងកក និងបន្ទាប់ពីមានព័ត៌មានចចាមអារ៉ាមថា រូបលោកបានរត់គេចខ្លួនចេញទៅក្រៅប្រទេសដើម្បីគេចពីការណាត់ជួបសាកសួរនេះ។

លោក ថាក់ស៊ីន ស៊ីណាវ៉ាត្រ បានវិលចូលមាតុប្រទេសវិញកាលខែសីហាឆ្នាំ២០២៣ គឺនៅមុនថ្ងៃដែលសភាថៃបោះឆ្នោតជ្រើសរើសបេក្ខជននាយករដ្ឋមន្ត្រីចេញពីគណបក្សភឿថៃ ហើយត្រូវវបានតុលាការកំពូលកាត់ទោសឲ្យជាប់ពន្ធធនាគារ ១ឆ្នាំ ហើយលោកក៏ត្រូវចូលសម្រាកព្យាបាលនៅមន្ទីរពេទ្យប៉ូលិសនៅទីក្រុងបាងកក ដែលជាពេទ្យរបស់ពន្ធធាគារដោយសាររូបលោកជាពិរុទ្ធជន (អ្នកទោស) ដែលត្រូវអនុវត្តទោសរយៈពេល១២០ថ្ងៃក្នុងពន្ធធាគារ។

ក្នុងពេលបង្ហាញខ្លួនលើកដំបូងកាលថ្ងៃទី២៧ខែឧសភា យោងសារព័ត៌មានថៃ naewna លោក ថាក់ស៊ីន ស៊ីណាវ៉ាត្រ ក៏បាននិយាយទៅកាន់អ្នកសារព័ត៌មានផងដែរថា រូបលោកមានអាយុជាង៧០ឆ្នាំទៅហើយ ប៉ុន្តែការរស់នៅហូបចុកសុខសប្បាយជាធម្មតាទេ មិនបានគេចខ្លួនទៅណាដូចពាក្យចចាមអារ៉ាមនោះទេ និងបានផ្តាំផ្ញើទៅកាន់អ្នកដែលបញ្ចេញព័ត៌មានចចាមអារ៉ាមទាំងអស់ធ្វើចិត្តឱ្យត្រជាក់ៗ។

លោកថាក់ស៊ីន បន្តថា អ្នកដែលបញ្ចេញព័ត៌មានចចាមអារ៉ាមនេះមានមិនច្រើននាក់នោះទេ ពោលគឺតែម្នាក់ពីរនាក់ប៉ុណ្ណោះ៕

ដោយ ភ្នាក់ងារ