លោក ពុយ គា Archives - Kampuchea Thmey Daily

លោក ពុយ គា អំពាវនាវអាជ្ញាធរពិចារណាវិធានការចំពោះអ្នកសារព័ត៌មាន ដើម្បីរក្សាសេរីភាពសារព័ត៌មាន

អ៊ិន ពិសី — Sat, 14 Feb 2026 08:55:17 +0000

លោក ពុយ គា ប្រធានក្លិបអ្នកកាសែតកម្ពុជា បានលើកឡើងថា អ្នកសារព័ត៌មាន មានតួនាទីសំខាន់ក្នុងការតាមដាន និងឃ្លាំមើលបញ្ហាសង្គម ជាពិសេសចំណុចអសកម្ម ឬអវិជ្ជមាន ដើម្បីជំរុញឱ្យមានការកែប្រែ និងធ្វើឱ្យប្រសើរឡើង។

តាមរយៈសំណេរលើទំព័រហ្វេសប៊ុក លោក បានបញ្ជាក់ថា ទោះជាយ៉ាងណា នៅមានអ្នកសារព័ត៌មានមួយចំនួនតូច ដែលពេលខ្លះអាចសរសេរព័ត៌មានដោយផ្អែកលើពាក្យសំដី ឬដំណឹងដែលទទួលបាន ដោយខ្វះការផ្ទៀងផ្ទាត់ និងការថ្លឹងថ្លែងពាក្យពេចន៍តាមបែបវិជ្ជាជីវៈ។ លោកថា ការខ្វះការយកចិត្តទុកដាក់បែបនេះ អាចនាំឱ្យមានការប្តឹងផ្តល់តាមផ្លូវច្បាប់ ឬតម្រូវឱ្យធ្វើការកែតម្រូវភ្លាមៗ។

លោក ពុយ គា បានអះអាងថា ការតម្រូវឱ្យកែអត្ថបទដែលផ្សាយខុស ឬការប្តឹងទៅតុលាការ គឺជាវិធានការសកលដែលត្រូវបានអនុវត្តជាទូទៅ។ លោកបន្ថែមថា ប្រសិនបើអ្នកសារព័ត៌មានរូបណាមួយត្រូវបានរកឃើញថាមានកំហុសជាបន្តបន្ទាប់ វាអាចធ្វើឱ្យបាត់បង់ជំនឿទុកចិត្តពីមហាជន និងធ្វើឱ្យកេរ្តិ៍ឈ្មោះរងការខូចខាតក្នុងសង្គមអ្នកសារព័ត៌មានផងដែរ។ ក្នុងករណីខ្លះ អ្នកសារព័ត៌មានអាចត្រូវបានស្ថាប័នបណ្ដេញចេញពីការងារ។

ជាមួយគ្នានេះ លោកក៏បានលើកឡើងថា វិធានការផ្សេងៗ ដូចជាការចាប់ខ្លួន និងពេលខ្លះរហូតដល់វាយខ្នោះ ក្នុងករណីដែលមិនមែនជាបទល្មើសជាក់ស្តែង អាចបង្កផលប៉ះពាល់ដល់សេរីភាពសារព័ត៌មាន និងធ្វើឱ្យរូបភាពប្រទេសទាំងមូលរងការខូចខាតបន្ថែមទៀត ជាពិសេសក្នុងកាលៈទេសៈបច្ចុប្បន្ន។ លោក ពុយ គា បានអំពាវនាវឱ្យអាជ្ញាធរមេត្តាពិនិត្យ និងគិតគូរលើរូបភាពប្រទេសទាំងមូល ចាប់ពីពេលនេះរហូតទៅមុខ៕

The post លោក ពុយ គា អំពាវនាវអាជ្ញាធរពិចារណាវិធានការចំពោះអ្នកសារព័ត៌មាន ដើម្បីរក្សាសេរីភាពសារព័ត៌មាន appeared first on Kampuchea Thmey Daily.

លោក ពុយ គា៖ ជារឿងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីការសង្គ្រោះបឋម

អុន ស្រីមាន — Thu, 05 Feb 2026 08:58:36 +0000

ប្រធានក្លិបអ្នកកាសែតកម្ពុជា លោក ពុយ គា បានលើកឡើងថា ជារឿងដែលសំខាន់ និងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីវិធីជួយសង្គ្រោះបឋម នៅពេលបំពេញភារកិច្ចការងារ ការរស់នៅប្រចាំថ្ងៃ និងអាចចែករំលែកបន្តពីវិធីសាស្រ្តសង្គ្រោះបឋមទៅកាន់អ្នកដទៃបានទៀត។

ការលើកឡើងរបស់លោក ពុយ គា ធ្វើឡើងនៅព្រឹកថ្ងៃទី ៥ ខែកុម្ភៈ ឆ្នាំ២០២៦ ក្នុងឱកាសក្លិបអ្នកកាសែតកម្ពុជា បានសហការជាមួយក្រសួងសុខាភិបាល និងផ្ទះយុវជនដើម្បីមិត្តភាពកម្ពុជា-ចិន រៀបចំវគ្គបណ្តុះបណ្តាលពិសេសស្តីពី «ការសង្គ្រោះបឋមដល់ជនរងគ្រោះ ឬអ្នកជំងឺភ្លាមៗ» ដល់អ្នកសារព័ត៌មាន។ វគ្គបណ្តុះបណ្តាលពីការសង្គ្រោះបឋមនេះ គឺជាលើកទី១ ដែលក្លិបអ្នកកាសែតបានរៀបចំឡើង ក្នុងគោលបំណងផ្តល់ចំណេះដឹងដល់អ្នកសារព័ត៌មាន ជាពិសេស អ្នកដែលទៅយកព័ត៌មាននៅតំបន់គ្រោះថ្នាក់ ឬការរស់នៅប្រចាំថ្ងៃ ដើម្បីបង្កើនចំណេះដឹងបន្ថែមក្នុងការជួយសង្គ្រោះបឋម មុនពេលបញ្ជូនជនរងគ្រោះ ឬអ្នកជំងឺទៅមន្ទីរពេទ្យ។

លោក ពុយ គា បានបញ្ជាក់ថា វគ្គបណ្តុះបណ្តាលនេះ ពិតជាសំខាន់ និងចាំបាច់ណាស់សម្រាប់អ្នកសារព័ត៌មាន ក្នុងការបំពេញភារកិច្ចប្រចាំថ្ងៃ និងជួយដល់ការរស់នៅប្រចាំថ្ងៃ លើសពីនេះ ក្រៅពីយល់ដឹងពីមូលដ្ឋានសង្គ្រោះបឋម ក៏អាចចែករំលែកបន្តទៅកាន់អ្នកដទៃបានដូចគ្នា។ ក្នុងវគ្គបណ្តុះបណ្តាលនេះ លោក ពុយ គា បញ្ជាក់ថា មិនត្រឹមតែសម្រាប់អ្នកសារព័ត៌មានទេ ពោល ក៏សម្រាប់សារធារណជនទូទាំងប្រទេសយល់ដឹងពីមូលដ្ឋានគ្រឹះ និងវិធីសង្គ្រោះបឋមមួយចំនួន តាមរយៈការចែករំលែក ផ្សព្វផ្សាយបន្តរបស់អ្នកសារព័ត៌មានផងដែរ។ ជាមួយគ្នានេះ នៅពេលខាងមុខ ក៏អាចនឹងបង្កើតវគ្គបណ្តុះបណ្តាលពីការសង្គ្រោះបឋមបែបនេះឱ្យច្រើនបន្ថែមទៀត ដើម្បីជាចំណេះដឹងដល់អ្នកសារព័ត៌មាន។ នេះ បើតាមប្រធានក្លិបអ្នកកាសែតកម្ពុជា។

ជាមួយគ្នានេះ លោកវេជ្ជបណ្ឌិត និន ចន្ថា នាយកផ្នែកសាមុយនៃមន្ទីរពេទ្យមិត្តភាពខ្មែរ-សូវៀត ក៏បានលើកឡើងដែរថា ការសង្គ្រោះបឋមនេះ ពិតជាសំខាន់ណាស់សម្រាប់អ្នកសារព័ត៌មាន ព្រោះថារាល់ថ្ងៃ នៅពេលដែលប្រជាពលរដ្ឋកម្ពុជា មានគ្រោះថ្នាក់ គឺអ្នកសារព័ត៌មាននេះហើយទទួលដំណឹងមុនគេ ។ លោកថា រូបលោកពិតជាមានក្តីរីករាយណាស់ក្នុងការធ្វើបទបង្ហាញ និងផ្តល់ចំណេះដឹងពីការសង្គ្រោះបឋមដល់អ្នកសារព័ត៌មាន ដោយលោកជ្រើសយកចំណុចណាដែលសំខាន់ និងងាយយល់ មកធ្វើបទបង្ហាញដើម្បីផ្តល់ភាពងាយស្រួលក្នុងការអនុវត្តជាក់ស្តែង។

សូមជម្រាបថា វគ្គបណ្តុះបណ្តាលខាងលើ គឺមានការបណ្តុះបណ្តាលដោយផ្ទាល់ ពីក្រុមគ្រូពេទ្យជំនាញពីក្រសួងសុខាភិបាល តាមរយៈការបង្រៀនពីមូលដ្ឋានគ្រឹះ ព្រមទាំងមានការពន្យល់ល្អិតល្អន់ និងការធ្វើសកម្មភាពជាក់ស្តែងពីប្រភេទនៃការសង្គ្រោះបឋមផងដែរ៕

The post លោក ពុយ គា៖ ជារឿងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីការសង្គ្រោះបឋម appeared first on Kampuchea Thmey Daily.

សមាគមអ្នកសារព័ត៌មានកម្ពុជា-វៀតណាម ផ្លាស់ប្ដូរបទពិសោធវិជ្ជាជីវៈ និងការអភិវឌ្ឍព័ត៌មានក្នុងសតវត្សឌីជីថល

អ៊ិន ពិសី — Thu, 23 Oct 2025 09:40:37 +0000

នៅថ្ងៃទី ២៣ ខែតុលា ឆ្នាំ ២០២៥ នេះ ក្លិបអ្នកកាសែតកម្ពុជា និងសមាគមអ្នកកាសែតវៀតណាម បានបើកកិច្ចប្រជុំ ដើម្បីពិភាក្សាអំពីការផ្លាស់ប្ដូរ នៃវិស័យព័ត៌មាន និងការពង្រឹងសហប្រតិបត្តិការវិជ្ជាជីវៈរវាងប្រទេសទាំងពីរ។

លោក ពុយ គា ប្រធានក្លិបអ្នកកាសែតកម្ពុជា លើកឡើងថា វិស័យព័ត៌មាននៅកម្ពុជាកំពុងប្រឈមនឹងបញ្ហាផ្លាស់ប្ដូរយ៉ាងលឿន ដោយសារការរីកចម្រើន នៃបច្ចេកវិទ្យាឌីជីថល បញ្ញាសិប្បនិមិត្ត (AI) និងឥទ្ធិពល នៃអ្នកផលិតមាតិកាព័ត៌មានតាមបណ្ដាញសង្គម (Influencers)។ អ្នកសារព័ត៌មានអាជីព “ត្រូវការបណ្ដុះបណ្ដាលបន្ថែម ដើម្បីអាចប្រកួតប្រជែង និងរក្សាគុណភាពព័ត៌មានក្នុងស្ថានភាពហិរញ្ញវត្ថុដែលកាន់តែស្ដួច”។

ដោយឡែក ក្នុងស្ថានការណ៍ជម្លោះព្រំដែនកម្ពុជា–ថៃ លោក ពុយ គា បានបញ្ជាក់ថា “អ្នកសារព័ត៌មានកម្ពុជា បានប្រកាន់យកការផ្សាយព័ត៌មានដោយប្រយ័ត្នប្រយែង និងគោរពវិជ្ជាជីវៈ ដោយព្យាយាមមិនបំប៉ោងស្ថានភាពឲ្យកាន់តែតានតឹងឡើយ”។

ពីភាគីវៀតណាម លោក ង្វៀន ឌឹកឡឺយ អនុប្រធានអចិន្ត្រៃយ៍ នៃសមាគមអ្នកកាសែតវៀតណាម ដែលដឹកនាំប្រតិភូចំនួនប្រាំរូប មកទស្សនកិច្ចកម្ពុជារយៈពេល ៥ ថ្ងៃ ចាប់ពីថ្ងៃទី ២០ ដល់ថ្ងៃទី ២៤ ខែតុលា ឆ្នាំ ២០២៥ បានទៅទស្សនាប្រាសាទអង្គរវត្ត និងតំបន់ទេសចរណ៍ដទៃទៀតនៅក្នុងប្រទេសកម្ពុជា។

កិច្ចប្រជុំនៅភ្នំពេញរវាងក្លិបអ្នកកាសែតកម្ពុជា និងសមាគមអ្នកកាសែតវៀតណាម ត្រូវបានធ្វើឡើងក្នុងគោលបំណងលើកកម្ពស់ការផ្លាស់ប្ដូរបទពិសោធវិជ្ជាជីវៈ ស្ដីពីការផ្សាយព័ត៌មានដោយសុចរិតភាព និងការបង្កើនភាពជាដៃគូសហការរវាងសារព័ត៌មានកម្ពុជា និងវៀតណាម៕

The post សមាគមអ្នកសារព័ត៌មានកម្ពុជា-វៀតណាម ផ្លាស់ប្ដូរបទពិសោធវិជ្ជាជីវៈ និងការអភិវឌ្ឍព័ត៌មានក្នុងសតវត្សឌីជីថល appeared first on Kampuchea Thmey Daily.

ប្រធានក្លិបអ្នកកាសែតកម្ពុជា៖ ចង់ជួយជំរុញផ្សព្វផ្សាយទេសចរណ៍ តែស្ថាប័នពាក់ព័ន្ធហាក់យល់ថា “រឿងរបស់អ្នក”

Dy Bunnara — Tue, 12 Mar 2024 05:16:18 +0000

ខណៈដែលប៉ុន្មានថ្ងៃទៀតនៅខេត្តសៀមរាបនឹងមានរៀបចំព្រឹត្តិការណ៍បុណ្យទន្លេ ស្របពេលដែលខេត្តទេសចរណ៍វប្បធម៌មួយនេះ រដ្ឋាភិបាលក៏កំពុងជំរុញចលនាឆ្នាំទស្សនាសៀមរាបផងនោះ។

ថ្នាក់ដឹកនាំកំពូលរបស់ក្លិបអ្នកកាសែតកម្ពុជាបានលើកពីកម្សោយកិច្ចសហការពីអាជ្ញាធរមូលដ្ឋាន រួមទាំងក្រសួងពាក់ព័ន្ធជាមួយបណ្តាញអ្នកសារព័ត៌មាន ដើម្បីចូលរួមផ្សព្វផ្សាយជំរុញទាក់ទាញទេសចរមកកម្សាន្តឲ្យបានច្រើនខណៈព្រឹត្តិការណ៍ទេសចរណ៍ដ៏ធំនោះកាន់តែជិតខិតមកដល់។

លោក ពុយ គា ប្រធានក្លិបអ្នកកាសែតកម្ពុជាបានបង្ហោះសារនៅលើបណ្តាញសង្គមហ្វេសបុកថា ខណៈដែលលោកគ្រោងដឹកនាំអ្នកសារព័ត៌មានជាង ៣០ អង្គភាព ដើម្បីចូលរួមជួយផ្សព្វផ្សាយទ្រង់ទ្រាយធំអំពីសក្កានុពលទេសចរណ៍នៅខេត្តសៀមរាប លោកសង្កេតឃើញពីកង្វះកិច្ចសហការពីស្ថាប័នក្រសួងពាក់ព័ន្ធរួមទាំងអាជ្ញាធរខេត្ត រហូតដល់លោកប្រើប្រាស់ពាក្យក្នុងសំណេរថា «រឿងរបស់អ្នក»។

លោកបានសរសេរយ៉ាងដូច្នេះថា «ដោយមើលឃើញវិស័យទេសចរណ៍នៅខេត្តសៀមរាប មិនទាន់មានកំណើនភ្ញៀវល្អ ក្លិបអ្នកកាសែតកម្ពុជាក៏សាកល្បងដឹកនាំសារព័ត៌មានជិត 30 ស្ថាប័ន រួមទាំងសារព័ត៌មានជាភាសាចិនផងនៅប៉ុន្មានថ្ងៃខាងមុខនេះ ដើម្បីចូលរួមជួយផ្សព្វផ្សាយទ្រង់ទ្រាយធំពីសក្កានុពលទេសចរណ៍នៅខេត្តសៀមរាប។ ក្រុមហ៊ុនច្រើនណាស់សម្តែងក្តីរីករាយចូលរួមសហការ ប៉ុន្តែផ្នែករដ្ឋជាពិសេសក្រសួង និងខេត្តហាក់ដូចជាយល់ថា “រឿងរបស់អ្នក”។

យ៉ាងណាមិញ ផ្តល់សម្ភាសន៍ដល់កម្ពុជាថ្មីតាមទូរសព្ទបន្ថែមនៅព្រឹកនេះ លោក ពុយ គា បានបញ្ជាក់ថា លោកកំពុងធ្វើការជាមួយក្រសួង និងអាជ្ញាធរលើកិច្ចការនេះបន្តទៀត។

«ឥលូវនេះយើងមានព័ត៌មានច្រើន និងឆ្លើយឆ្លងគ្នាឡើងវល់។ ទាក់ទងរឿងហ្នឹង មែនទែនទៅក៏មានការស្នើសុំច្រើនណាស់ ក្រសួងនេះក្រសួងនោះ ដុតដៃដុតជើង មិនដឹងថាម៉េច»។

យ៉ាងណា មុននេះបន្តិចលោក ពុយ គា បានបង្ហោះសារក្រោយមានការឆ្លើយឆ្លងមួយពីអាជ្ញាធរខេត្តនិងក្រសួងទេសចរណ៍ខណៈអាជ្ញាធរអះអាងថា ដោយសារមានបញ្ហាទំនាក់ទំនងទើបធ្វើឱ្យមានការយឺតយ៉ាវក្នុងការឆ្លើយតប។

បើតាមលោក ពុយ គា ស្ថាប័នទាំងពីរឥឡូវនេះបានព្យាយាមជួយសម្រួលភ្លាមៗលើផ្នែកដឹកជញ្ជូន ការរៀបចំទីតាំងផ្តិតយករូបភាពក៏ដូចជាកិច្ចសម្ភាសន៍ជាមួយរដ្ឋមន្រ្តីក្រសួងទេសចរណ៍ និងអភិបាលខេត្តសៀមរាប។

ខេត្តសៀមរាបនឹងរៀបចំពិធីបុណ្យទន្លេនៅប៉ុន្មានថ្ងៃទៀតនេះ ដើម្បីជំរុញចលនាការមកទស្សនារបស់ភ្ញៀវទេសចរជាតិអន្តរជាតិ និងបង្កើនយុទ្ធនាការផ្សព្វផ្សាយសក្តានុពលទេសចរណ៍។

ការរៀបចំបុណ្យទន្លេនៅខេត្តសៀមរាប ក៏ស្របតាមយុទ្ធនាការ «ទស្សនាខេត្តសៀមរាបឆ្នាំ ២០២៤» ដែលរដ្ឋាភិបាលបានប្រកាសដាក់ចេញ ដើម្បីបង្កើនវិសាលភាពភ្ញៀវទេសចរមកកម្សាន្តច្រើនថែមទៀត។

តាមរយៈការរៀបចំបុណ្យទន្លេជារៀងរាល់ឆ្នាំបានជួយផ្សព្វផ្សាយ ក៏ដូចជាបង្ហាញមោទនភាពរបស់ខេត្តនីមួយៗ។ ដោយឡែកខេត្តសៀមរាបដែលទទួលធ្វើជាម្ចាស់ផ្ទះនៅឆ្នាំនេះ ក៏មានការអញ្ជើញទីភ្នាក់ងារបរទេសក៏ដូចជាបុគ្គលល្បីៗដើម្បីមកចូលរួមផ្សព្វផ្សាយព្រឹត្តិការណ៍ទេសចរណ៍ប្រចាំឆ្នាំនេះ។

បើតាមលោក សូ ម៉ារ៉ា រដ្ឋលេខាធិការក្រសួងទេសចរណ៍បានថ្លែងនៅក្នុងសន្និសីទថា កម្មវិធីបុណ្យទន្លេនៅខេត្តសៀមរាប នឹងមានការចូលរួមពីបណ្តាញភ្នាក់ងារផ្សព្វផ្សាយធំៗ ជាពិសេសមានការនាំបវរកញ្ញាពិភពលោកជាង ១០០ នាក់មកពី ៧០ ប្រទេសមកចូលរួមទស្សនានិងជួយផ្សព្វផ្សាយពីព្រឹត្តិការណ៍ដ៏ពិសេសនេះ។

ពិធីបុណ្យទន្លេលើកទី ៨ នៅខេត្តសៀមរាប រៀបចំឡើងក្រោមប្រធានបទ “ទន្លេដើម្បីសន្តិភាព និងការអភិវឌ្ឍ” ដែលនឹងប្រព្រឹត្តទៅរយៈពេល ២ ថ្ងៃពីថ្ងៃទី១៦-១៧ ខែមីនា ឆ្នាំ២០២៤។

លោក សូ ម៉ារ៉ា បានឲ្យដឹងថា ពិធីបុណ្យទន្លេនៅខេត្តសៀមរាបគ្រោងចំណាយថវិការៀបចំប្រមាណ ៤៥០ លានរៀល ហើយរំពឹងថានឹងទទួលទេសចររង្វង់ ១ លាននាក់មកកម្សាន្ត៕

The post ប្រធានក្លិបអ្នកកាសែតកម្ពុជា៖ ចង់ជួយជំរុញផ្សព្វផ្សាយទេសចរណ៍ តែស្ថាប័នពាក់ព័ន្ធហាក់យល់ថា “រឿងរបស់អ្នក” appeared first on Kampuchea Thmey Daily.

លោក ពុយ គា ៖ អាជីពសារព័ត៌មាន មិនអាចក្លាយជាអ្នកមានបានទេ រស់ដោយសារប្រាក់ខែសុទ្ធសាធ

អ៊ិន ពិសី — Mon, 29 Jan 2024 04:07:28 +0000

លោក ពុយ គា ប្រធានក្លិបអ្នកកាសែតកម្ពុជា ផ្ដាំផ្ញើទៅអ្នកសារព័ត៌មាន និងអ្នកចង់ធ្វើជាអ្នកសារព័ត៌មាន ថា នៅក្នុងអាជីពសារព័ត៌មាននេះ មិនអាចក្លាយទៅជាអ្នកមានបានទេ គឺរស់ដោយសារប្រាក់ខែសុទ្ធសាធ។

ជួបជាមួយ សារព័ត៌មានកម្ពុជាថ្មី ក្នុងវេទិកាអ្នកជំនាញ ក្រោមប្រធានបទ «តើគួរមានវិធានការបែបណា ចំពោះអ្នកសារព័ត៌មានអនឡាញមួយចំនួន ដែលមិនគោរពក្រមសីលធម៌វិជ្ជាជីវៈ? កាលពីថ្ងៃទី ២៦ ខែមករា ឆ្នាំ ២០២៤ ថ្មីៗ នេះ លោក ពុយ គា ប្រធានក្លិបអ្នកកាសែតកម្ពុជា បានផ្ដាំផ្ញើទៅអ្នកសារព័ត៌មាន និងអ្នកចង់ធ្វើជាអ្នកសារព័ត៌មាន យ៉ាងដូច្នេះថា «ចង់ផ្ដាំផ្ញើទៅបងប្អូនអ្នកសារព័ត៌មាន និងអ្នកដែលចង់ធ្វើជាអ្នកសារព័ត៌មាន គាត់ត្រូវដឹងថា នៅក្នុងវិជ្ជាជីវៈមួយនេះ មិនអាចក្លាយទៅជាអ្នកមានបានទេ។ កាលណាយើងចង់ធ្វើជាអ្នកសារព័ត៌មាន ត្រូវដឹងថា អ្វីដែលយើងរស់ គឺរស់ដោយសារប្រាក់ខែសុទ្ធសាធ ក្រុមហ៊ុនឲ្យប៉ុន្មាន ស្ថាប័នឲ្យប៉ុន្មាន គឺយើងរបស់ប៉ុណ្ណឹង អញ្ចឹងយើងត្រូវដឹង»។

ឆ្លើយតបទៅនឹងការលើកឡើងខាងលើ លោក ពុយ គា ផ្ដាំផ្ញើបន្ថែមទៀតថា ជាអ្នកសារព័ត៌មាន មិនអាចក្លាយជាអ្នកមានបានទេ ប៉ុន្តែហេតុអ្វីបានជានៅធ្វើ គឺ ៖ ទី(១)-ដោយសារស្រលាញ់អាជីពហ្នឹង។(២) ចង់ផ្សាយពីព្រឹត្តិការណ៍ និងរឿងរ៉ាវកើតឡើងជារៀងរាល់ថ្ងៃនៅជុំវិញពិភពលោក។ (៣)ចង់ចែករំលែកព័ត៌មានទាំងអស់ទៅដល់ប្រជាពលរដ្ឋឲ្យបានដឹង បានយល់ និងបានឮ។

លោក ពុយ គា ផ្ដល់គំនិត និងយោបល់ ថា ប្រសិនបើ អ្នកសារព័ត៌មាន ចង់ទទួលបានប្រាក់ខែខ្ពស់ជាងប្រាក់ខែបច្ចុប្បន្នទៀត គឺត្រូវប្រឹងថែមមួយជាពីរជាបីទៀត ដើម្បីឲ្យកម្រិត នៃការយល់ដឹង ការអត្ថាធិប្បាយ និងថ្វីមាត់កាន់តែពូកែ ដូច្នេះទើបធ្វើឲ្យថៅកែខ្វះយើងមិនបាន ហើយកម្រិតប្រាក់ខែក៏ខ្ពស់ទៅតាមសមត្ថភាពដែរ។

ប្រធានក្លិបអ្នកកាសែតកម្ពុជា រូបនេះ ក៏បានលើកឡើងដែរថា ផ្ទុយទៅវិញ បើ អ្នកសារព័ត៌មាន ចង់ក្លាយទៅជាអ្នកមាន គឺត្រូវដូរអាជីពជាបន្ទាន់។ បើកាលណាអ្នកសារព័ត៌មាន មានមហិច្ឆតាចង់ក្លាយជាអ្នកមាន គឺប្រាកដជាបាត់បង់ហើយវិជ្ជាជីវៈ និងក្រមសីលធម៌។ លោកថា «យើងត្រូវដឹងថា ប្រភពចំណូល នៃស្ថាប័នសារព័ត៌មានទៀតសោត គឺគាត់បានមកពីពាណិជ្ជកម្ម ហើយនឹងប្រភពមួយចំនួនទៀតដែលគេស្រលាញ់ គឺថា គេជួយ sponsor គេជួយ support ប្រចាំខែ ប្រចាំឆ្នាំតែម្ដង ដោយគេអត់ចង់បានអីមកវិញទេ គេចង់ឲ្យយើងផ្សាយព័ត៌មានឲ្យបានត្រឹមត្រូវ ដើម្បីប្រយោជន៍សង្គម ប្រយោជន៍ប្រទេសជាតិ ហ្នឹងគឺមាន មានមូលនិធិមានអីគឺជួយចឹងទៅ»៕

អត្ថបទ ៖ ពិសី

The post លោក ពុយ គា ៖ អាជីពសារព័ត៌មាន មិនអាចក្លាយជាអ្នកមានបានទេ រស់ដោយសារប្រាក់ខែសុទ្ធសាធ appeared first on Kampuchea Thmey Daily.

គ្រឹះស្ថានអប់រំកម្រិតអន្តរជាតិមួយ ផ្ដល់អាហារូបករណ៍ ៦៥ កន្លែងសម្រាប់ឆ្នាំ ២០២៣

Din Thary — Tue, 13 Dec 2022 02:46:36 +0000

បើតាមលោក ពុយ គា ប្រធានក្លិបអ្នកការសែតកម្ពុជា និងក៏ជាទីប្រឹក្សាសាកលវិទ្យាល័យ AUPP បានជូនព័ត៌មានពីការផ្តល់អាហារូបករណ៍ ១០០% ចំនួន ៦៥កន្លែង សម្រាប់ឆ្នាំសិក្សា២០២៣ ដល់សិស្សានុសិស្សឆ្នើម។

អាហារូបករណ៍ទាំង ៦៥កន្លែង ផ្តោតលើមុខជំនាញដូចជា៖

ផ្នែកធុរកិច្ច (Business)
ផ្នែកច្បាប់ (Law)
ផ្នែកកិច្ចការសកល (Global Affairs)
ផ្នែកបច្ចេកវិទ្យាទូរគមនាគមន៍ និងព័ត៌មាន (Information and Communications Technology)

ក្រៅពីអាហារូបករណ៍ ១០០% ខាងសាកលវិទ្យាល័យបញ្ជាក់ថា ក៏នឹងផ្តល់អាហារូបករណ៍ទៅតាមនិទ្ទេសប្រឡងសញ្ញាប័ត្រមធ្យមសិក្សាទុតិយភូមិ ដូចជានិទ្ទេស A និងនិទ្ទេស B ជាដើម។

សម្រាប់ព័ត៌មានលម្អិតផ្សេងៗទាក់ទងនឹងការដាក់ពាក្យនៃការស្នើសុំអាហារូបករណ៍ ឬកាលបរិច្ឆេទនៃការទទួលពាក្យសិស្សនិស្សិតអាចទាក់ទងទៅកាន់លេខទំនាក់ទំនង ០២៣-៩៩0-០២៣/ ០១២-២៦៦-៦៣១៕

ដោយ៖ ថារី

The post គ្រឹះស្ថានអប់រំកម្រិតអន្តរជាតិមួយ ផ្ដល់អាហារូបករណ៍ ៦៥ កន្លែងសម្រាប់ឆ្នាំ ២០២៣ appeared first on Kampuchea Thmey Daily.

លោក ពុយ គា ក្លាយជាប្រធានក្លិបអ្នកកាសែតកម្ពុជា ជំនួសលោក ប៉ែន បូណា ដែលក្លាយជារដ្ឋលេខាធិការក្រសួងព័ត៌មាន

sopheak khoun — Mon, 05 Dec 2022 02:09:25 +0000

ក្លិបអ្នកកាសែតកម្ពុជា (ក.អ.ក) បានសម្រេចជ្រើសតាំងលោក ពុយ គា ជាប្រធានក្លិបអ្នកកាសែតកម្ពុជា ជំនួសលោក ប៉ែន បូណា ដែលត្រូវបានតែងតាំងជារដ្ឋលេខាធិការក្រសួងព័ត៌មាន។

សេចក្ដីជូនដំណឹងរបស់ក្លិបអ្នកកាសែតកម្ពុជា នៅថ្ងៃទី ៥ ខែធ្នូ ឆ្នាំ ២០២២នេះ បានឲ្យដឹងថា លោក ប៉ែន បូណា ត្រូវបានរាជរដ្ឋាភិបាលតែងតាំង ជារដ្ឋលេខាធិការក្រសួងព័ត៌មាន និងយោងតាមលក្ខន្តិកៈនិងបទបញ្ជាផ្ទៃក្នុងរបស់ក.អ.ក លោក ប៉ែន បូណា បានសុំលាឈប់ពីប្រធានក្លិប។

សេចក្ដីជូនដំណឹងរបស់ក្លិបអ្នកកាសែតកម្ពុជា បានបញ្ជាក់ថា ដូច្នេះដើម្បីបន្តនិរន្តរភាពរបស់ក្លិប គណៈកម្មាធិការនាយក ក.អ.ក បានសម្រេចជ្រើសតាំង៖

១ – លោក ពុយ គា ជាប្រធានក្លិបអ្នកកាសែតកម្ពុជា

២ – លោក ខៀវ កូឡា ជាអគ្គលេខាធិការក្លិបអ្នកកាសែតកម្ពុជា

ក្លិបអ្នកកាសែតកម្ពុជា (ក.អ.ក) នឹងរៀបចំសមាជដើម្បីបោះឆ្នោតជ្រើសរើសប្រធាន និងអគ្គលេខាធិការឲ្យស្របតាមលក្ខន្តិកៈរបស់ខ្លួន នាពេលវេលាសមស្របក្នុងពេលឆាប់ៗខាងមុខ។

សូមជម្រាបថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់តែងតាំង លោក ប៉ែន បូណា ជារដ្ឋលេខាធិការក្រសួងព័ត៌មាន។

គួរឲ្យដឹងដែរថា លោក ប៉ែន បូណា គឺជាអ្នកសារព័ត៌មានវិជ្ជាជីវៈ ដែលបានប្រឡូកក្នុងវិស័យព័ត៌មានក្នុងទស្សវត្សឆ្នាំ ១៩៩០មកម្លេះ។ បច្ចុប្បន្នលោកជានិពន្ធនាយកទូរទស្សន៍ PNN ហើយលោកក៏ជាប្រធានក្លឹបអ្នកកាសែតកម្ពុជា ផងដែរ៕

អត្ថបទ៖ ឃួន សុភ័ក្រ

The post លោក ពុយ គា ក្លាយជាប្រធានក្លិបអ្នកកាសែតកម្ពុជា ជំនួសលោក ប៉ែន បូណា ដែលក្លាយជារដ្ឋលេខាធិការក្រសួងព័ត៌មាន appeared first on Kampuchea Thmey Daily.

លោក ពុយ គា បញ្ចេញសៀវភៅថ្មីមួយទម្លាយអស់“អាថ៌កំបាំងក្រៅឆាករបស់មេដឹកនាំ”ដល់មហាជនកម្ពុជា

vann sokunthea — Fri, 29 Jul 2022 09:20:20 +0000

សៀវភៅថ្មីមួយដែលមានចំណងជើងថា “អាថ៌កំបាំងក្រៅឆាក” ដែលបានលាតត្រដាងពីរឿងរ៉ាវក្រៅឆាករបស់មេដឹកនាំអាស៊ាន និងលើពិភពលោក បានទទួលការគាំទ្រយ៉ាងខ្លាំងពីអ្នកអាន បន្ទាប់ពីសៀវភៅនេះត្រូវបានបោះពុម្ពផ្សាយតែប៉ុន្មានថ្ងៃប៉ុណ្ណោះ។ នេះបើតាមការគូសបញ្ជាក់ឲ្យដឹងរបស់លោក ពុយ គា អ្នកនិពន្ធសៀវភៅនេះ និងជាអ្នកសារព័ត៌មានជើងចាស់មួយរូបនៅកម្ពុជានារសៀលថ្ងៃសុក្រនេះ។

លោក ពុយ គា បានចំណាយពេល១០ឆ្នាំ ដើម្បីតាក់តែងសៀវភៅមានកម្រាស់ជាង២០០ទំព័រនេះទ្បើង ដែលមានលក្ខណៈពិសេស និងខុសប្លែកពីសៀវភៅដែលបានបោះពុម្ពផ្សាយកន្លងមកនៅក្នុងប្រទេសកម្ពុជា។ ចំណុចដែលប្លែកនោះ គឺចំណងជើង និងក្របសៀវភៅដែលបង្កប់នូវអត្ថន័យអ្វីមួយរហូតដល់អ្នកអានបានបើកមើល ឬបានអានរួចទើបដឹងថា មានអ្វីនៅខាងក្នុង។

នៅក្នុងសន្និសីទសារព័ត៌មានស្តីពីស្នាដៃនិពន្ធរបស់ខ្លួននៅរសៀលថ្ងៃសុក្រនេះ លោក ពុយ គា បានលើកឡើងថា៖ «មានរឿងច្រើនណាស់ដែលត្រូវបានទម្លាយពីកិច្ចប្រជុំអន្តរជាតិធំៗ ទាំងក្នុងស្រុក តំបន់ និងបណ្តាប្រទេសដទៃទៀត ក្នុងនោះមានរឿងរ៉ាវទាក់ទងនឹងមេដឹកនាំល្បីៗរបស់អាស៊ាន និងពិភពលោក ជាពិសេសជីវិតស្នេហា ទម្លាប់ការងារ ឥរិយាបថរបស់មេដឹកនាំ និងភាពមិនចុះសម្រុងគ្នាលើបញ្ហាខ្លះនៅក្នុងតំបន់ ក៏ដូចជាជម្លោះទឹកដីជាដើម»។

បើតាមលោក ពុយ គា ក្រៅពីផ្តល់ពុទ្ធិបន្ថែមដល់អ្នកអាន ស្នាដៃនិពន្ធថ្មីនេះ ក៏អាចប្រើប្រាស់ជាឯកសារជំនួយស្មារតី ឬឯកសារយោងដ៏មានតម្លៃផងដែរ ពីព្រោះព័ត៌មានដែលលោកប្រមូល និងសម្រិតសម្រាំង គឺបានមកពីប្រភពពាក់ព័ន្ធ និងតាមរយៈការសង្កេតផ្ទាល់របស់លោកនៅនឹងកន្លែងផងដែរ។ ជាមួយគ្នានេះ លោកបានសម្តែងក្តីរីករាយ ដោយសារតែសៀវភៅចំនួនជាង៣ពាន់ក្បាល ត្រូវបានលក់អស់ក្នុងរយៈពេល១សប្តាហ៍។ លោក នឹងបោះពុម្ពឲ្យបានដល់២ ឬ៣ម៉ឺនក្បាល ដើម្បីឆ្លើយតបទៅនឹងការគាំទ្ររបស់អ្នកអាន។

សៀវភៅ “អាថ៌កំបាំងក្រៅឆាករបស់មេដឹកនាំអាស៊ាន និងពិភពលោក” ត្រូវបានបោះពុម្ពផ្សាយចំពេលដែលកម្ពុជាធ្វើម្ចាស់ផ្ទះប្តូរវេនកិច្ចប្រជុំអាស៊ាននៅឆ្នាំ២០២២នេះ ដោយក្នុងនោះ អ្នកនិពន្ធ ពុយ គា ក៏បានបរិយាយពីតួនាទីរបស់កម្ពុជាក្នុងនាមជាប្រធានអាស៊ានផងដែរ៕

ដោយ៖ វណ្ណ សុគន្ធា

The post លោក ពុយ គា បញ្ចេញសៀវភៅថ្មីមួយទម្លាយអស់“អាថ៌កំបាំងក្រៅឆាករបស់មេដឹកនាំ”ដល់មហាជនកម្ពុជា appeared first on Kampuchea Thmey Daily.