លោក វុី សំណាង Archives - Kampuchea Thmey Daily

អភិបាលខេត្តតាកែវ ស្នើក្រុមហ៊ុន Hangxaio Steel Structure នៅចិន សិក្សាគម្រោងបង្កើតកំពង់ផែ និងការចិញ្ចឹមសត្វនៅខេត្តតាកែវ

Sokhom Khon — Wed, 27 Nov 2024 04:14:03 +0000

លោក វ៉ី សំណាង អភិបាលនៃគណៈអភិបាលខេត្តតាកែវ នៅក្នុងឱកាសដឹកនាំគណៈប្រតិភូ រដ្ឋបាលខេត្ត ធ្វើដំណើរទស្សនកិច្ចនៅក្រុមហ៊ុន Danong Development Group ក្នុងទីក្រុងសៀងហៃ ប្រទេសចិន បានស្នើទៅដល់ក្រុមហ៊ុន Hangxaio Steel Structure របស់ចិន ឱ្យមកបណ្តាក់ទុកវិនិយោគបង្កើតកំពង់ផែនៅលើទឹកដីខេត្តតាកែវ នៅជាប់នឹងគម្រោងព្រែកជីកហ្វូណនតេជោ ដែលមានប្រវែង ៥៧ គីឡូម៉ែត្រ និងគម្រោងចិញ្ចឹមសត្វ រួមទាំងអំពីគម្រោងវិនិយោគលើវិស័យកសិកម្មទំនើបនៅខេត្តតាកែវ។

ក្នុងដំណើរបេសកកម្មរយៈពេល១សប្ដាហ៍នៅប្រទេសចិន លោកអភិបាលខេត្តបានបញ្ជាក់ថា គម្រោងបង្កើតកំពង់ផែ និងគម្រោងចិញ្ចឹមសត្វ គឺជារឿងសមស្របបំផុត ព្រោះនៅខេត្តតាកែវជាចំណុចកណ្តាលមួយ មានរោងចក្រសហគ្រិនយ៉ាងច្រើន ដែលផលិតស្បែកជើងកាបូបជាដើម ខណៈផ្នែកកសិកម្មខេត្តមានផ្ទៃដីសម្រាប់បង្កបង្កើនផលជាង ២២ ម៉ឺនហិកតា ជាផ្ទៃដីសម្រាប់ដាំដុះដំណាំស្រូវ ក្នុងនោះទិន្នផលប្រមូលផលចន្លោះពី ៤ តោន ទៅ ៨ តោន ក្នុងមួយហិកតា។

លោកបន្តថា ផលិតផលដែលផលិតកែច្នៃក្នុងខេត្ត ខ្វះខាតកំពង់ផែសម្រាប់ដឹកជញ្ជូន ដូច្នោះក្រុមហ៊ុនរបស់ចិន ដែលមានបំណងចង់វិនិយោគបណ្តាក់ទុនបង្កើតកំពង់ផែ និងវិស័យកសិកម្មចិញ្ចឹមសត្វនោះ អាចជ្រើសរើសខេត្តតាកែវជាខេត្តមួយដែលមានសក្តានុពល និងជាខេត្តដែលសាកសមបំផុតសម្រាប់វិនិយោគ៕

អត្ថបទ៖ វីរៈ

The post អភិបាលខេត្តតាកែវ ស្នើក្រុមហ៊ុន Hangxaio Steel Structure នៅចិន សិក្សាគម្រោងបង្កើតកំពង់ផែ និងការចិញ្ចឹមសត្វនៅខេត្តតាកែវ appeared first on Kampuchea Thmey Daily.

លែងបង្កងចំនួន ២៥០០ ក្បាល ចូលបឹងតាកែវ ដើម្បីបង្កើនធនធានបង្កងឱ្យកាន់តែសម្បូរឡើង

Dy Bunnara — Sun, 20 Oct 2024 08:19:07 +0000

ព្រឹកថ្ងៃទី២០ ខែតុលា ឆ្នាំ២០២៤ លោក អ៊ូច ភា រដ្ឋលេខាធិការក្រសួងមហាផ្ទៃ លោក វ៉ី សំណាង អភិបាលខេត្តតាកែវ លោក ប៉េង ពោធិ៍សា អភិបាលខេត្តស្វាយរៀង ព្រមទាំងថ្នាក់ដឹកនាំ រដ្ឋបាលខេត្តតាកែវ និងរដ្ឋបាលខេត្តស្វាយរៀង បានអញ្ជើញចូលរួមក្នុងពិធីលែងបង្កងចំនួន ២,៥០០ ក្បាល ស្មើនឹង ១៥០គីឡូក្រាម ចូលក្នុងបឹងតាកែវ ដើម្បីអភិរក្ស និង បង្កើនធនធានបង្កងឱ្យកាន់តែសម្បូរឡើងថែមទៀត នៅក្នុងបឹងតាកែវ ក្រុងដូនកែវ ខេត្តតាកែវ។

បង្កងធម្មជាតិខេត្តតាកែវ គឺមានភាពល្បីល្បាញខ្លាំងនៅទូទាំងប្រទេស ត្រូវបានទទួលស្គាល់ និងល្បីល្បាញថាជាខេត្តដែលសម្បូរបង្កងទឹកសាបធម្មជាតិច្រើនជាងគេ។ បង្កងធម្មជាតិ ជារៀងរាល់ឆ្នាំគឺសម្បូរនៅរដូវទឹកឡើង និងចាប់ផ្តើមស្រកចន្លោះពីខែកញ្ញាដល់ខែវិច្ឆិកា ដែលមាននៅតំបន់ទឹកលិច ក្នុងស្រុកអង្គរបូរី បូរីជលសារ និងកោះអណ្តែត។

បង្កងខេត្តតាកែវ ត្រូវបានចុះបញ្ជីសម្គាល់ភូមិសាស្ត្រដោយក្រសួងពាណិជ្ជកម្មកាលពីថ្ងៃទី២៦ ខែមេសា ឆ្នាំ២០២៣។

ក្រៅពីបង្កងធម្មជាតិមានតាមរដូវ បច្ចុប្បន្នទូទាំងខេត្តមានកសិដ្ឋានចិញ្ចឹមបង្កងតូច-ធំ សរុបជិត ១០ កសិដ្ឋាន។ នេះបើតាមការបញ្ចាក់របស់លោក ស៉ាប់ សារុន ប្រធានសមាគមអ្នកចិញ្ចឹមបង្កងខេត្តតាកែវ។

លោក ស៉ាប់ សារុន ប្រធានសមាគមអ្នកចិញ្ចឹមបង្កងខេត្តតាកែវបានឲ្យ «កម្ពុជាថ្មី» ដឹងថា នៅក្នុងខេត្តតាកែវផ្ទាល់បើរាប់បញ្ចូលទាំងកសិដ្ឋានតូច-ធំ បច្ចុប្បន្ននមានជិត ១០ កសិដ្ឋាន តាមស្រុកមួយចំនួនដូចជា ស្រុកអង្គរបុរី ស្រុកបុរីជលសារ ស្រុកកោះអណ្ដែត និងនៅក្នុងទីរួមខេត្តតាកែវ។

ក្នុងមួយឆ្នាំៗ បង្កងតាកែវផ្តល់ទិន្នផលបានប្រមាណ ៦៧តោន។ ប្រសិនបើទឹកជំនន់ឡើងរយៈពេលកាន់តែយូរនឹងធ្វើឱ្យបង្កងកាន់តែសំបូរ។ រយៈពេល ៥ ឆ្នាំ ចាប់ពីឆ្នាំ២០១៨ ដល់ឆ្នាំ២០២៣ ការប្រមូលផលបង្កងតាកែវមានចំនួន ៣៣៥តោន៕

អត្ថបទ៖ វីរៈ

The post លែងបង្កងចំនួន ២៥០០ ក្បាល ចូលបឹងតាកែវ ដើម្បីបង្កើនធនធានបង្កងឱ្យកាន់តែសម្បូរឡើង appeared first on Kampuchea Thmey Daily.

ថ្ងៃទី ១-២ ខែវិច្ឆិកា ខេត្តតាកែវរៀបចំប្រណាំងទូកនៅបឹងតាកែវ អបអរសាទរព្រះរាជពិធីបុណ្យអុំទូក

Dy Bunnara — Sat, 12 Oct 2024 05:49:29 +0000

ដើម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប អកអំបុកនិងសំពះព្រះខែនាពេលខាងមុខនេះ រដ្ឋបាលខេត្តតាកែវ បានសម្រេចយកថ្ងៃទី ១-២ ខែវិច្ឆិកា ឆ្នាំ២០២៤ ដើម្បីរៀបចំពិធីបុណ្យអុំទូក បណ្តែតប្រទីប អកអំបុកនិងសំពះព្រះខែ។ នេះបើតាមខ្លឹមសារនៃកិច្ចប្រជុំផ្សព្វផ្សាយរបស់គណៈកម្មការនិងអនុគណៈកម្មការរៀបចំពីធីប្រណាំងទូក បណ្តែតប្រទីប អកអំបុកនិងសំពះព្រះខែ នៃរដ្ឋបាលខេត្តតាកែវ នាព្រឹកថ្ងៃទី១១ ខែតុលា ឆ្នាំ២០២៤ម្សិលមិញនេះ។

ក្នុងកិច្ចប្រជុំនេះ លោក វ៉ី សំណាង អភិបាលនៃគណៈអភិបាលខេត្តតាកែវជាមួយគណៈកម្មការ និងអនុគណៈកម្មការ បានសម្រេចយកថ្ងៃទី ១-២ ខែវិច្ឆិកា ឆ្នាំ២០២៤ ដើម្បីរៀបចំពិធីបុណ្យអុំទូក បណ្តែតប្រទីប អកអំបុកនិងសំពះព្រះខែនៅបឹងតាកែវ ស្ថិតនៅភូមិ១ សង្កាត់រកាក្នុង ក្រុងដូនកែវ ខេត្តតាកែវ។

បើតាមគណៈកម្មការរៀបចំ ទូកដែលត្រៀមចូលរួមប្រណាំងមានចំនួន ៤៧ ទូក ដែលមកពីបណ្ដាស្រុកក្រុងទាំង១០ ចំនួន២០ទូក និងតាមបណ្ដាមន្ទីរ អង្គភាពជុំវិញខេត្តចូលរួមប្រឡងប្រណាំងផងដែរ ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប អកអំបុកនិងសំពះព្រះខែ៕

អត្ថបទ៖ វីរៈ

The post ថ្ងៃទី ១-២ ខែវិច្ឆិកា ខេត្តតាកែវរៀបចំប្រណាំងទូកនៅបឹងតាកែវ អបអរសាទរព្រះរាជពិធីបុណ្យអុំទូក appeared first on Kampuchea Thmey Daily.

ក្រុមបាល់ទាត់ Cambodia Super Star នឹងប៉ះ ក្រុមរដ្ឋបាលខេត្ដកំពង់ស្ពឺ ដើម្បីសកម្មភាពសប្បុរសធម៌

Sous Sith — Sat, 02 Mar 2024 06:45:49 +0000

តារាចម្រៀង លោក ខេម បានក្លាយជាប្រធាន នៃក្រុមបាល់ទាត់ Cambodia Football Super Star ដែលមានសមាជិកក្រុមសុទ្ធតែជាតារា ក្នុងការប្រកួតមិត្ដភាពសប្បុរសធម៌ក្រោមមូលបទ «មាតាអស្ចារ្យ ដើម្បីស្នាមញញឹមកុមារ» ជាមួយក្រុមបាល់ទាត់រដ្ឋបាលខេត្ដកំពង់ស្ពឺ ដែលដឹកនាំដោយ លោក វ៉ី សំណាង អភិបាល នៃគណៈអភិបាល ខេត្តកំពង់ស្ពឺ ផ្ទាល់។

តាមការគ្រោងទុក ក្រុមទាំងពីរនឹងប៉ះជើងគ្នានៅទីលានបាល់ទាត់ នៃពហុកីឡដ្ឋានខេត្ដកំពង់ស្ពឺ នៅថ្ងៃទី៦ ខែមីនា ឆ្នាំ២០២៤។ មិនថាក្រុមណាចាញ់ ឬឈ្នះនោះទេ គឺទឹកប្រាក់ដែលមានការបរិច្ចាគពីសប្បុរសជនយ៉ាងច្រើនសម្រាប់គាំទ្រដល់កម្មវិធីប្រកួតនេះ នឹងត្រូវជួយដល់មន្ទីរពេទ្យគន្ធបុប្ផា និងជួយដល់គម្រោងមនុស្សធម៌មួយចំនួនទៀត។

ដំណឹងបឋមជុំវិញការបរិច្ចាគថវិកាលើគម្រោងមនុស្សធម៌នេះ បានកើនឡើងដល់ជាង ៧០លានរៀលហើយ។ ក្នុងនោះមានការបរិច្ចាគរបស់សម្ដេចអគ្គមហាសេនាធិបតីតេជោ ហ៊ុន សែន និងសម្ដេចកិតិព្រឹទ្ធបណ្ឌិតប៊ុនរ៉ានី ហ៊ុន សែន ចំនួន ៥០លានរៀល។

ជាមួយគ្នានេះ តាមរយៈសន្និសីទសារព័ត៌មានមួយ កាលពីថ្ងៃទី១ ខែមីនា លោក ខេម បានរំលឹកថា ក្រុមបាល់ទាត់ដែលផ្ដួចផ្ដើមដោយរូបលោកបានដំណើរការមិនដល់កន្លះឆ្នាំផងនោះ គឺដំបូងឡើយគ្រាន់តែចង់បង្កើនចំណងមិត្ដភាពរវាងអ្នកសិល្បៈ នឹងអ្នកសិល្បៈ បង្កើតភាពសប្បាយរីករាយ និងលេងដើម្បីសុខភាពប៉ុណ្ណោះ។ ប៉ុន្ដែឥឡូវនេះ ក្រុមលោកបានធ្វើរឿងដ៏អស្ចារ្យមួយទៀត គឺលេងដើម្បីសប្បុរសធម៌។

តំណាងក្រុមទាំងពីរបានជួបទល់មុខគ្នាមុនការប្រកួតចូលមកដល់ ដោយភាគីរដ្ឋបាលខេត្ដកំពង់ស្ពឺដឹកនាំដោយអភិបាល នៃគណៈអភិបាលខេត្ដកំពង់ស្ពឺ លោក វ៉ី សំណាង និងតំណាងក្រុមបាល់ទាត់ Cambodia Football Super Star ដឹកនាំដោយ លោក ចា រិទ្ធី និងលោក ខេម។

ក្រោមក្រសែភ្នែកកីឡាករដែលភាគច្រើនជាតារាៗ និងអាជ្ញាធរខេត្ដកំពង់ស្ពឺ បានលើកឡើងស្រដៀងគ្នាថា ការប្រកួតលើកនេះ គឺធ្វើឡើងដើម្បីសាកជើងគ្នារវាងក្រុមទាំងពីរ ដើម្បីអបអរសាទរថ្ងៃសិទ្ធិនារី ៨ មីនា និងដើម្បីសកម្មភាពមនុស្សធម៌ ដោយទឹកប្រាក់ទាំងអស់នឹងក្លាយជាផ្នែកមួយជួយដល់កុមារកម្ពុជាទូទាំងប្រទេស តាមរយៈមន្ទីរពេទ្យ គន្ធបុប្ផា និងគាំទ្រដល់សកម្មភាពមនុស្សធម៌មួយចំនួនទៀត ផងដែរ៕

The post ក្រុមបាល់ទាត់ Cambodia Super Star នឹងប៉ះ ក្រុមរដ្ឋបាលខេត្ដកំពង់ស្ពឺ ដើម្បីសកម្មភាពសប្បុរសធម៌ appeared first on Kampuchea Thmey Daily.

ល្បីប៉ុន្មានឆ្មាំមុន ដំណាំទំពាំងបាយជូរខេត្តកំពង់ស្ពឺមិនសូវបានផល ការដាំដុះកាន់តែតិចទៅ

Din Thary — Mon, 13 Feb 2023 09:22:48 +0000

សហគមន៍មួយនៅខេត្តកំពង់ស្ពឺ បានសាកល្បងដាំដុះដំណាំទំពាំងបាយជូរលើផ្ទៃដីប្រមាណជា ១៤ហិកតា ស្ថិតនៅក្នុងភូមិទឹកល្អក់ ឃុំដំបូករូង ស្រុកភ្នំស្រួច ខេត្តកំពង់ស្ពឺ។ ក្រោយការសាកល្បងដាំដុះបានប៉ុន្មានឆ្នាំ ដំណាំបស្ចិមប្រទេសនេះ ការដាំដុះកាន់តែតិចទៅ ដោយសារមិនសូវបានជោគជ័យ។

លោក ឈៀង តុលា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ បានឱ្យ«កម្ពុជាថ្មី» ដឹងនារសៀលថ្ងៃទី១៣ ខែកុម្ភៈ ឆ្នាំ២០២៣ នេះថា មកដល់ពេលបច្ចុប្បន្ននេះ ប្រជាពលរដ្ឋដែលនៅបន្តដាំដុះទំពាំងបាយជូរ ក្នុងខេត្ត មានចំនួនតិចតួចបំផុត គឺមានប្រមាណតែ ៦ហិកតារប៉ុណ្ណោះនៃផ្ទៃដីដាំដុះ ស្ថិតនៅភូមិទឹកល្អក់ ឃុំដំបូករូង ស្រុកភ្នំស្រួច ខេត្តកំពង់ស្ពឺ។

លោកប្រធានមន្ទីរកសិកម្មបានបន្តថា ដោយសារតែការដាំទំពាំងបាយជូរ មិនទទួលបានទិន្នផលល្អ និងមិនមានភាពស៊ីសង្វាក់គ្នា ដូច្នេះជាហេតុធ្វើការដាំដុះនៅក្នុងខេត្តកាន់តែតិចទៅៗ។

«អាចនិយាយបានថា មានតែនៅក្នុងស្រុកភ្នំស្រួចប៉ុណ្ណោះ ដែលនៅមានការដាំដុះច្រើន ប៉ុន្តែសម្រាប់នៅតាមតំបន់ ភូមិមួយចំនួននៃខេត្ត អ្នកភូមិអាចត្រឹមការដាំសាកល្បងនៅតាមផ្ទះរៀងៗខ្លួន ប្រសិនមានភាពរីកចម្រើនអាចបន្តដាំ ប៉ុន្តែបើមិនទទួលបានផលពួកគេអាចឈប់»។ នេះជាការបន្ថែមរបស់លោក ឈៀង តុលា។

ឆ្លើយតបតាមសំនួរ «កម្ពុជាថ្មី» នៅក្នុងសន្និសីទសារព័ត៌មាននាព្រឹកថ្ងៃទី ០៩ ខែកុម្ភៈ ឆ្នាំ២០២៣ លោក វុី សំណាង អភិបាលនៃគណៈអភិបាលខេត្តកំពង់ស្ពឺបានអះអាងថា ភូមិសាស្រ្តខេត្តកំពង់ស្ពឺមិនអំណោយផលសម្រាប់ការដាំដុះដំណាំទំពាំងបាយជូរឡើយ ដោយហេតុថាខេត្តកំពង់ស្ពឺជាខេត្តមួយដែលមានស្ថានភាពអាកាសធាតុក្ដៅខ្លាំង ខណៈដំំណាំប្រភេទនេះត្រូវពឹងផ្អែកទៅលើស្ថានភាពអាកាសធាតុ ព្រមទាំងលក្ខណៈជីវសាស្ត្រសមស្រប។

លោកបានបកស្រាយថា «ដោយហេតុថាប្រទេសកម្ពុជាជាតំបន់ត្រូពិក មានលក្ខណៈអាកាសធាតុក្តៅហើយសើម។ មុនដាំដំណាំប្រភេទទំពាំងបាយជូរ ដើម្បីកុំឲ្យខាតពេល ខាតបង់ថវិកាគួរស្វែងយល់ពីលក្ខណៈជីវសាស្ត្រ ទីតាំងភូមិសាស្ត្រនៃការដាំដុះរបស់ប្រភេទរុក្ខជាតិនោះជាមុនសិន ព្រោះរាល់ដំណាំគ្រប់ប្រភេទទាំងអស់តែមានតែងមានលក្ខណៈខុសៗគ្នា»។

លោកអភិបាលខេត្តបានបន្តថា ប្រភេទដំណាំទំពាំងបាយជូរ គឺមិនមែនមានប្រភពកំណើតនៅក្នុងប្រទេសកម្ពុជានោះទេ។ វាត្រូវបានគេនាំចូលយកមកពីបណ្ដាប្រទេសនានាលើពិភពលោក ដូចជាអាមេរិក អង់គ្លេស ជាប្រទេសធ្លាក់ទឹកកក៕

ដោយ៖ ថារី

The post ល្បីប៉ុន្មានឆ្មាំមុន ដំណាំទំពាំងបាយជូរខេត្តកំពង់ស្ពឺមិនសូវបានផល ការដាំដុះកាន់តែតិចទៅ appeared first on Kampuchea Thmey Daily.

អភិបាលខេត្តកំពង់ស្ពឺ៖ ហាងអាហារខ្លះក្នុងខេត្តកំពង់ស្ពឺ រងគ្រោះដោយសារផ្លូវល្បឿន

Din Thary — Mon, 13 Feb 2023 04:03:01 +0000

ពាក់ព័ន្ធការដាក់ឲ្យដំណើរការផ្លូវល្បឿនលឿន «ភ្នំពេញ-ខេត្តព្រះសីហនុ» ទទួលបានទាំងផលប្រយោជន៍ ព្រមទាំងផលប៉ះពាល់មួយចំនួន។

លោក វុី សំណាង នៅក្នុងសន្និសីទសារព័ត៌មានស្ដីពី «ជោគជ័យរយៈពេល ៥ ឆ្នាំកន្លងមករបស់រដ្ឋបាលខេត្តកំពង់ស្ពឺ» បានគូសបញ្ជាក់ថា ការអភិវឌ្ឍន៍នៃផ្លូវល្បឿនលឿន «ភ្នំពេញ-ខេត្តព្រះសីហនុ» មានទាំងវិជ្ជមាន និងអវិជ្ជមាន។ ប៉ុន្តែបើនិយាយក្របខ័ណ្ឌទាំងមូល ដោយមិនសំដៅលើខេត្តតែមួយ សម្រាប់វិស័យដឹកជញ្ជូន ការទទួលបានផ្លូវល្បឿនលឿនមួយនេះ នាំផលចំណេញយ៉ាងច្រើន ដែលទី១ ចំណេញសាំង ទី២ ចំណេញពេលវេលា និងចុងក្រោយគឺសំណឹករិចរិលត្រូវបានកាត់បន្ថយ។

លោកអភិបាលបន្តថា ស្របជាមួយផលប្រយោជន៍យ៉ាងច្រើន ក៏បានបង្កផលប៉ះពាល់ដល់ប្រជាជនដែលរស់នៅខេត្តកំពង់ស្ពឺ ជាពិសេសផ្នែកសេវាម្ហូបអាហារ មានភោជនីយដ្ឋាន និងហាងអាហារមួយចំនួន។ មានន័យថា ចាប់តាំងពីផ្លូវល្បឿនលឿនបានស្ថាបនានិងដាក់ឲ្យដំណើរការរួចរាល់ អ្នកដំណើរជាច្រើនដែលធ្លាប់ប្រើប្រាស់ផ្លូវជាតិលេខ ៤ ឆ្លងកាត់ខេត្តកំពង់ស្ពឺ បានជ្រើសរើសធ្វើដំណើរលើផ្លូវថ្មីដែលនាំឲ្យហាងអាហារមួយចំនួនបានកាត់បន្ថយការលក់ ឬខ្លះក៏បានបិទទ្វារ។

«កាលពីមុនអ្នកដំណើរត្រូវជិះតាមផ្លូវជាតិលេខ ៤ ត្រូវឈប់ចុះសម្រាកបរិភោគអាហារ និងប្រើប្រាស់សេវាកម្មនានាលើផ្លូវជាតិនេះ តែឥឡូវអ្នកដំណើរមួយចំនួនបានប្រើប្រាស់ផ្លូវថ្មីជំនួសវិញ ចឹងតិចឬច្រើនពិតជាប៉ះពាល់»។

បើទោះបីជាមានការកាត់បន្ថយវិស័យម្ហូបអាហារនេះក៏ពិតមែន ដោយឡែកចំពោះវិស័យទេសចរណ៍នៅតែមានល្អប្រសើរដូចដើម ហើយឡាន ម៉ូតូ នៅតែមានសភាពច្រើនដដែលនៅក្នុងខេត្តកំពង់ស្ពឺ។ នេះបើតាមការអះអាងរបស់លោក វុី សំណាង៕

ដោយ៖ ឌិន ថារី

The post អភិបាលខេត្តកំពង់ស្ពឺ៖ ហាងអាហារខ្លះក្នុងខេត្តកំពង់ស្ពឺ រងគ្រោះដោយសារផ្លូវល្បឿន appeared first on Kampuchea Thmey Daily.

អភិបាលខេត្តកំពង់ស្ពឺឆ្លើយតបកំណាត់ផ្លូវជាតិលេខ ៤ ក្នុងក្រុងច្បារមន ហ៊ុយពិបាកធ្វើដំណើរ

Dy Bunnara — Sun, 12 Feb 2023 07:23:12 +0000

កំណាត់ផ្លូវជាតិលេខ ៤ ក្នុងក្រុងច្បារមន ស្ថានភាពកំណាត់ផ្លូវនេះមានការពង្រីកមួយចំនួន តែក៏សង្កេតឃើញថានៅតាមជាយផ្លូវនៅតែមានដីហ៊ុយ និងភក់ជ្រាំបង្កឲ្យប៉ះពាល់សោភណភាព ខណៈជាផ្លូវដ៏សំខាន់សម្រាប់អ្នកទេសចរឆ្លងកាត់រវាងរាជធានីភ្នំពេញនិងខេត្តព្រះសីហនុ។

ឆ្លើយតបសំនួររបស់សារព័ត៌មានកម្ពុជាថ្មីក្នុងសន្និសីទរបស់រដ្ឋបាលខេត្តនៅទីស្តីការគណៈរដ្ឋមន្ត្រី លោក វ៉ី សំណាង អភិបាលខេត្តកំពង់ស្ពឺបានទទួលស្គាល់ថា ផ្លូវនេះកន្លងទៅមានការពង្រីកមួយចំនួន ប៉ុន្តែដោយសារទំហំផ្លូវធំនៅសល់ចិញ្ចើមផ្លូវដីច្រើន បង្កឲ្យមានភក់ជ្រំនិងហ៊ុយប៉ះពាល់ដល់ការធ្វើដំណើរ។

លោកបន្តថា ខេត្តក៏ចង់ឲ្យបរិស្ថានស្អាតមានអនាម័យល្អដែរ តែដោយសារថវិកាមានកំណត់ដូច្នេះគម្រោងខ្លះត្រូវការពេលវេលាអភិវឌ្ឍតាមដំណាក់កាល។

«ការពិតទៅម្នាក់ៗរអ៊ូដូចគ្នា។ ខេត្តមានភាពស្មុគស្មាញជាងគេ ក្នុងនាមជាថ្នាក់ដឹកនាំ អត់ចង់ឲ្យមានផ្លូវគំហុក ដីហ៊ុយនោះទេ។ ប៉ុន្តែផែនការធ្វើផ្លូវនីមួយៗមានការពិបាក ក្នុងការស្វែងរកថវិកាមកអភិវឌ្ឍ»។

លោកបន្តថា ផ្លូវជាតិលេខ ៤ បានទទួលថវិកាពីធនាគារពិភពលោកកំពុងជួសជុលពង្រីកឲ្យធំទូលាយ។ ខេត្តរំពឹងថា នៅពេលផ្លូវជាតិលេខ ៤ ក្រោមគម្រោងរបស់ធនាគារពិភពលោកធ្វើរួចរាល់ អាជ្ញាធរខេត្តនឹងអាចកែលម្អកំណាត់ផ្លូវលេខ ៤ ក្នុងក្រុងច្បារមនឲ្យបានល្អស្អាតដោយរៀបចំឲ្យមានខឿន រៀបរីហ្គែរ និងផ្លូវថ្មើរជើងដោយមិនចង់ធ្វើម្តងហើយម្តងទៀតនោះទេ។

«យើងមិនចង់ឮដូចបងប្អូនថាផ្លូវធ្វើជាប់ គាស់អាមុខធ្វើអាក្រោយ។ អីចឹងសូមបងប្អូនមេត្តាអត់ធ្មត់ នៅពេលគម្រោងពង្រីកផ្លូវជាតិលេខ ៤ ធ្វើចប់សព្វគ្រប់ អាជ្ញាធរនឹងរៀបចំសោភណភាពផ្លូវជាតិលេខ ៤ ក្នុងក្រុងច្បារមនឲ្យបានល្អប្រសើរ ដើម្បីសម្រួលបងប្អូនធ្វើដំណើរក៏ដូចជាលើកមុខមាត់ខេត្តកំពង់ស្ពឺផងដែរ»។ នេះបើតាមការអះអាងរបស់លោក វ៉ី សំណាង៕

The post អភិបាលខេត្តកំពង់ស្ពឺឆ្លើយតបកំណាត់ផ្លូវជាតិលេខ ៤ ក្នុងក្រុងច្បារមន ហ៊ុយពិបាកធ្វើដំណើរ appeared first on Kampuchea Thmey Daily.

គម្រោងសាងសង់អគារខ្ពស់កប់ពពកនៅក្រុងច្បារមន នៅមិនទាន់ដំំណើរការ

Dy Bunnara — Thu, 09 Feb 2023 08:26:46 +0000

ជាង ៣ ឆ្នាំហើយ គម្រោងសាងសង់អគារខ្ពស់ភ្លោះកប់ពពកនៅក្នុងក្រុងច្បារមនខេត្តកំពង់ស្ពឺ នៅមិនទាន់ចាប់ផ្តើមដំណើរការ ក្រោយប្រកាសចេញគម្រោងជាច្រើនឆ្នាំមកនេះ។

ឆ្លើយតបសំនួរ «កម្ពុជាថ្មី» ក្នុងសន្និសីទកាសែតនៅព្រឹកនេះ លោក វ៉ី សំណាង អភិបាលខេត្តកំពង់ស្ពឺបានបញ្ជាក់ថា គម្រោងសាងសង់អគារខ្ពស់កប់ពពកនៅក្នុងក្រុងច្បារមនខេត្តកំពង់ស្ពឺដែលប្រកាសតាំងពីឆ្នាំ ២០១៩ មកដល់ពេលនេះមិនទាន់ដឹងថានឹងនៅតែបន្តដំណើរការតាមគម្រោងការឬយ៉ាងណានោះទេ។

គម្រោងសាងសង់អគារដ៏ខ្ពស់ដំបូងគេនេះជាមហិច្ឆតារបស់ខេត្ត ប៉ុន្តែដោយសារជំងឺកូវីដ ១៩ ក៏បានអាក់ខាន។ បើតាមលោកអភិបាលខេត្ត ម្ចាស់វិនិយោគក៏មិនបានឆ្លើយតបយ៉ាងណា ខណៈវិបត្តិកូវីដបានអូសបន្លាយដែលបានប៉ះពាល់ដល់គម្រោងវិនិយោគ។

កាលពីឆ្នាំ ២០១៩ មុនផ្ទុះវិបត្តិជំងឺកូវីដ ១៩ មានការប្រកាសពីគម្រោងសាងសង់អគារភ្លោះកប់ពពកនៅក្រុងច្បារមន ខេត្តកំពង់ស្ពឺ។ អគារភ្លោះនេះមានកម្ពស់ ៣២ជាន់ និង៦៤ជាន់ ដែលគេគ្រោងអភិវឌ្ឍជាផ្សារទំនើប អគារការិយាល័យ និងកន្លែងកម្សាន្តជាដើម។

បើតាមប្រភពពីអាជ្ញាធរខេត្តកំពង់ស្ពឺ គម្រោងនេះវិនិយោគដោយក្រុមហ៊ុនក្នុងស្រុក ប៉ុន្តែមិនបានបញ្ជាក់ឈ្មោះក្រុមហ៊ុននិងទំហំទឹកប្រាក់វិនិយោគនោះទេ។ អាជ្ញាធរខេត្តកំពង់ស្ពឺរំពឹងថា តាមរយៈគម្រោងអភិវឌ្ឍអគារខ្ពស់កប់ពពកនេះនឹងជួយលើកមុខមាត់និងទាក់ទាញវិយោគិនកាន់តែច្រើនឡើងមកបណ្តាក់ទុនក្នុងខេត្តកំពង់ស្ពឺ ខណៈខេត្តកំពង់ស្ពឺស្ថិតនៅចន្លោះកណ្តាលតភ្ជាប់រវាងប៉ូលសេដ្ឋកិច្ចសំខាន់ពីរគឺរាជធានីភ្នំពេញ និងខេត្តព្រះសីហនុ៕

The post គម្រោងសាងសង់អគារខ្ពស់កប់ពពកនៅក្រុងច្បារមន នៅមិនទាន់ដំំណើរការ appeared first on Kampuchea Thmey Daily.

លោក វុី សំណាង Archives - Kampuchea Thmey Daily

អភិបាលខេត្តតាកែវ ស្នើក្រុមហ៊ុន Hangxaio Steel Structure នៅចិន សិក្សាគម្រោងបង្កើតកំពង់ផែ និងការចិញ្ចឹមសត្វនៅខេត្តតាកែវ

លែង​បង្កងចំនួន ២៥០០ ក្បាល ចូលបឹងតាកែវ ដើម្បីបង្កើនធនធានបង្កងឱ្យកាន់​តែ​សម្បូរ​ឡើង

ថ្ងៃទី ១-២ ខែវិច្ឆិកា ខេត្តតាកែវរៀបចំប្រណាំងទូក​នៅ​បឹងតាកែវ អបអរសាទរព្រះរាជពិធីបុណ្យអុំទូក

ក្រុមបាល់ទាត់ Cambodia Super Star នឹង​ប៉ះ​ ក្រុមរដ្ឋបាលខេត្ដកំពង់ស្ពឺ ដើម្បីសកម្មភាពសប្បុរសធម៌

ល្បី​ប៉ុន្មានឆ្មាំមុន ដំណាំទំពាំងបាយជូរខេត្តកំពង់ស្ពឺ​​មិនសូវ​បានផល ការដាំដុះកាន់តែតិចទៅ

អភិបាល​ខេត្តកំពង់ស្ពឺ៖ ហាង​​អាហារ​ខ្លះ​​ក្នុង​ខេត្ត​កំពង់ស្ពឺ​ រងគ្រោះ​ដោយសារ​​ផ្លូវ​ល្បឿន

អភិបាល​ខេត្ត​កំពង់ស្ពឺ​ឆ្លើយតប​កំណាត់​ផ្លូវ​ជាតិ​លេខ ៤ ក្នុង​ក្រុង​ច្បារមន ​ហ៊ុយ​ពិបាក​ធ្វើ​ដំណើរ

គម្រោង​​​​សាងសង់​អគារ​ខ្ពស់​កប់ពពក​នៅ​ក្រុង​ច្បារមន នៅ​មិនទាន់ដំំណើរការ

លែងបង្កងចំនួន ២៥០០ ក្បាល ចូលបឹងតាកែវ ដើម្បីបង្កើនធនធានបង្កងឱ្យកាន់តែសម្បូរឡើង

ថ្ងៃទី ១-២ ខែវិច្ឆិកា ខេត្តតាកែវរៀបចំប្រណាំងទូកនៅបឹងតាកែវ អបអរសាទរព្រះរាជពិធីបុណ្យអុំទូក

ក្រុមបាល់ទាត់ Cambodia Super Star នឹងប៉ះ ក្រុមរដ្ឋបាលខេត្ដកំពង់ស្ពឺ ដើម្បីសកម្មភាពសប្បុរសធម៌

ល្បីប៉ុន្មានឆ្មាំមុន ដំណាំទំពាំងបាយជូរខេត្តកំពង់ស្ពឺមិនសូវបានផល ការដាំដុះកាន់តែតិចទៅ

អភិបាលខេត្តកំពង់ស្ពឺ៖ ហាងអាហារខ្លះក្នុងខេត្តកំពង់ស្ពឺ រងគ្រោះដោយសារផ្លូវល្បឿន

អភិបាលខេត្តកំពង់ស្ពឺឆ្លើយតបកំណាត់ផ្លូវជាតិលេខ ៤ ក្នុងក្រុងច្បារមន ហ៊ុយពិបាកធ្វើដំណើរ

គម្រោងសាងសង់អគារខ្ពស់កប់ពពកនៅក្រុងច្បារមន នៅមិនទាន់ដំំណើរការ