លោក ស៊ុន សុវណ្ណារិទ្ធិ Archives - Kampuchea Thmey Daily

អាជ្ញាធរខេត្តកំពង់ឆ្នាំង ដាក់ផែនការស្ថាបនាផ្លូវតភ្ជាប់តំបន់ទេសចរណ៍សក្តានុពល

Din Thary — Mon, 30 Jan 2023 08:25:26 +0000

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងមានប្រសាសន៍ថា នៅក្នុងខេត្តកំពង់ឆ្នាំងមានតំបន់ទេសចរណ៍ប្រមាណ ២៤ កន្លែង ក្នុងនោះតំបន់ទេសចរណ៍ប្រវត្តិសាស្ត្រមាន ១០ កន្លែង និងតំបន់ទេសចរណ៍ធម្មជាតិមាន ១៤ កន្លែង។

លោកស៊ុន សុវណ្ណារិទ្ធិ លើកនៅក្នុងសន្នសីទជោគជ័យរយៈពេល ៥ ឆ្នាំរបស់រដ្ឋបាលខេត្តកាលពីសប្តាហ៍មុនថា អាជ្ញាធរខេត្តមានគម្រោងស្ថាបនាផ្លូវភ្ជាប់ពីទីតាំងទេសចរណ៍មួយកន្លែងទៅមួយកន្លែងទៀត ដើម្បីបង្កលក្ខណៈងាយស្រួលនិងកាត់បន្ថយពេលវេលាធ្វើដំណើររបស់ភ្ញៀវទេសចរ។ គម្រោងផ្លូវដែលរដ្ឋាភិបាលគ្រោងសាងសង់មានផ្លូវចេញពីរមណីយដ្ឋានច្រកល្អៀង ភ្ជាប់មកកាន់រមណីយដ្ឋានទឹកធ្លាក់ស្រែអំពិល ហើយភ្ជាប់មករមណីយដ្ឋានទឹកធ្លាក់ថ្មក្រាល។

ខេត្តកំពង់ឆ្នាំងមានតំបន់ទេសចរណ៍ប្រកបដោយសក្តានុពលសម្រាប់ទាក់ទាញភ្ញៀវទេសចរដូចជា នៅស្រុកទឹកផុសមានរមណីយដ្ឋានទេសចរណ៍ ៣ កន្លែង ហើយនៅកំពង់លែងក៏មានទឹកជ្រោះសម្រាប់ភ្ញៀវទេសចរអាចទៅលេងកម្សាន្តបានផងដែរ។ បន្ថែមពីនេះ ខេត្តកំពង់ឆ្នាំងក៏នៅមានកោះប្រមាណជាង ៥០ កោះ គួបផ្សំទាំងវត្តអារាម ទីតាំងប្រវត្តិសាស្ត្រមួយចំនួនទៀត។

លោកអភិបាលខេត្តបានបន្តថា ដោយមានការអនុញ្ញាតពីរាជរដ្ឋាភិបាលបានឱ្យក្រុមហ៊ុនវិនិយោគតំបន់ទេសចរណ៍មួយកន្លែងនៅក្នុងផ្ទៃដីប្រមាណ ៦០០ហិកតា ដើម្បីអភិវឌ្ឍរៀបចំទៅកន្លែងទេសចរណ៍បែបធម្មជាតិ ដូចជាការជិះខ្សែរ៉តលើកំពូលភ្នំ និងមានគ្រប់សេវាផ្សេងទៀត។

ជាមួយគ្នានេះរដ្ឋបាលខេត្ត ក៏កំពុងជំរុញនៅក្នុងការអនុវត្តតំបន់ទេសចរណ៍ធម្មជាតិឱ្យកាន់តែមានភាពទាក់ទាញមួយកម្រិតទៀត និងសហការជាមួយដៃគូក្រុមហ៊ុនវិនិយោគផ្សេងៗ ដើម្បីកែឆ្នៃតំបន់កោះ តំបន់ភ្នំ តំបន់ផ្សេងៗ ក៏ដូចជាផ្នែកវារីវប្បកម្មផងដែរ ព្រោះតំបន់ទាំងអស់នេះសុទ្ធតែជាផ្នែកមួយនិងជាគោលដៅអាចទាក់ទាញទេសចរបាន។

លោក ស៊ុន សុវណ្ណារិទ្ធិ បានមានប្រសាសន៍ថា គម្រោងសាងសង់កំពង់ផែពហុបំណងរបស់រដ្ឋាភិបាល ក៏នឹងជួយរុញច្រានវិស័យផ្លូវទឹកឱ្យមានការរីកចម្រើនទៅមុខមួយកម្រិតទៀត៕

ដោយ៖ ថារី

The post អាជ្ញាធរខេត្តកំពង់ឆ្នាំង ដាក់ផែនការស្ថាបនាផ្លូវតភ្ជាប់តំបន់ទេសចរណ៍សក្តានុពល appeared first on Kampuchea Thmey Daily.

អាជ្ញាធរខេត្តកំពង់ឆ្នាំង ជំរុញបញ្ចប់ការកាត់ឆ្វៀលដីជូនពលរដ្ឋឲ្យរួចមុនខែមេសា

Dy Bunnara — Fri, 27 Jan 2023 04:46:15 +0000

អាជ្ញាធរខេត្តកំពង់ឆ្នាំង គ្រោងបញ្ចប់ការចុះឆ្វៀលដីជូនប្រជាពលរដ្ឋតាមអនុសាសន៍របស់ប្រមុខរដ្ឋាភិបាលធ្វើយ៉ាងណាឲ្យរួចត្រឹមខែមេសាឆ្នាំ ២០២៣។

លើកឡើងក្នុងសន្និសីទ «ភាពជោគជ័យរយៈពេល ៥ ឆ្នាំ របស់រដ្ឋបាលខេត្តកំពង់ឆ្នាំង» នៅរសៀលម្សិលមិញនេះ លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបញ្ជាក់ថា គិតដល់ពេលនេះការកាត់ឆ្វៀលដីជូនប្រជាពលរដ្ឋសម្រេចបានជាង ៣១ ម៉ឺនក្បាលដីស្មើជាង ៤៤% ហើយអាជ្ញាធរកំពុងធ្វើបន្ត ១១ ម៉ឺនក្បាលដីទៀតដែលស្មើជាង ១៦%។

លោកអភិបាលខេត្តបញ្ជាក់ថា អាចមានចម្ងល់ចុះដីនៅសល់បាត់ទៅណា? លោកអភិបាលខេត្តពន្យល់ថា គម្រោងដីទាំង ៧០ ម៉ឺនក្បាលដីនេះ មានទាំងដីដែលស្ថិតនៅក្នុងតំបន់ ២ ដែលកន្លងទៅមិនអាចចេញប័ណ្ណជូនប្រជាពលរដ្ឋបានទេ។ ទើបតែថ្មីៗនេះរដ្ឋាភិបាលបានចេញសារាចរកាត់ឆ្វៀលចេញពីតំបន់ ២ មកតំបន់ ១ ដែលមានចំនួន ២៧ ម៉ឺនប័ណ្ណ ស្មើជាង ៣៨ ភាគរយ ដើម្បីចែកជូនដល់ប្រជាពលរដ្ឋ។

បើតាមលោកអភិបាលខេត្ត ប្រមុខរដ្ឋាភិបាលបានជំរុញធ្វើយ៉ាងណាត្រូវកាត់ឆ្វៀលដីជូនប្រជាពលរដ្ឋឲ្យរួចមុនខែមេសាឆ្នាំ ២០២៣។

ដើម្បីពន្លឿនការងារដែលនៅសេសសល់ លោកអភិបាលខេត្តបានណែនាំអភិបាលខេត្តរងមួយរូបរួមទាំងបង្កើតក្រុមការងារទាំង ៨ ក្រុងស្រុក ដើម្បីចុះធ្វើបច្ចុប្បន្នភាពធ្វើយ៉ាងណាឲ្យការងារសម្រេចតាមអនុសាសន៍ណែនាំរបស់ប្រមុខរដ្ឋាភិបាល។

កាលពីខែវិច្ឆិកា ឆ្នាំ២០២១ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានដាក់ចេញបទបញ្ជាឱ្យឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះដកហូតដីព្រៃលិចទឹកបឹងទន្លេសាបស្ថិតក្នុងតំបន់អភិរក្សត្រឡប់មកវិញ បន្ទាប់ពីរកឃើញមានការកាប់ទន្ទ្រានយ៉ាងខ្លាំងក្លា។

ប្រតិបត្តិការរយៈពេលជាង ៣ ខែ ផ្ទៃដីព្រៃលិចទឹកស្ថិតក្នុងតំបន់អភិរក្សចំនួនជិត ៩ ម៉ឺន ហិកតា ស្ថិតក្នុងខេត្តទាំង ៦ ជុំវិញបឹងទន្លេសាបមានខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ ត្រូវបានដកហូតត្រឡប់មកវិញ។ បន្ថែមពីលើនោះ ក៏មានការវាស់វែងកំណត់ព្រំដីនិងបានដាំឈើសម្រាប់ជាជម្រកត្រីឡើងវិញផងដែរ។

យ៉ាងណាមិញ ក្នុងសារពិសេសស្តីពីការគ្រប់គ្រងដីបឹងទន្លេសាបកាលពីថ្ងៃទី២៧ ខែឧសភា ឆ្នាំ២០២២ ប្រមុខរដ្ឋាភិបាលបានចេញសេចក្តីណែនាំឲ្យកាត់ឆ្វៀលដីពីតំបន់ ២ និងតំបន់ ៣ ជុំវិញបឹងទន្លេសាបជូនទៅប្រជាពលរដ្ឋដែលរស់នៅជាក់ស្តែងនិងឱ្យកែសម្រួលព្រំប្រទល់តំបន់ ២ និងតំបន់ ៣ ឡើងវិញ ទៅតាមស្ថានភាពជាក់ស្តែងនៃការអាស្រ័យផលរបស់ប្រជាពលរដ្ឋ។

សម្តេចបានគូសរំលេចថា ការងារគ្រប់គ្រងបឹងទន្លេសាបត្រូវគិតទៅលើការងារពីរសំខាន់គឺការអភិរក្ស និងការគិតគូរដល់ការរស់នៅ និងអាស្រ័យផលរបស់ប្រជាពលរដ្ឋ។ សម្រាប់ដីដែលប្រជាពលរដ្ឋបានអាស្រ័យផល និងបានរស់នៅយូរលង់ណាស់មកហើយ ទោះបីស្ថិតនៅក្នុងតំបន់អភិរក្សជាតំបន់ ២ និងតំបន់ ៣ ក៏ត្រូវកាត់ឆ្វៀលជូនប្រជាពលរដ្ឋ៕

The post អាជ្ញាធរខេត្តកំពង់ឆ្នាំង ជំរុញបញ្ចប់ការកាត់ឆ្វៀលដីជូនពលរដ្ឋឲ្យរួចមុនខែមេសា appeared first on Kampuchea Thmey Daily.

ព្រលានយន្តហោះខេត្តកំពង់ឆ្នាំង គ្រោងអភិវឌ្ឍបម្រើដល់វិស័យយោធា

Dy Bunnara — Fri, 27 Jan 2023 02:54:11 +0000

ព្រលានយន្តហោះខេត្តកំពង់ឆ្នាំង ត្រូវបានរាជរដ្ឋាភិបាលសម្រេចកែសម្រួលឡើងវិញក្នុងគោលដៅបម្រើដល់វិស័យយោធា។

លើកឡើងក្នុងសន្និសីទស្ដីពី “ភាពជោគជ័យក្នុងរយៈពេល ៥ ឆ្នាំ” របស់រដ្ឋបាលខេត្តកំពង់ឆ្នាំង លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា កាលពីពេលថ្មីៗនេះរដ្ឋាភិបាលបានសម្រេចប្រគល់ព្រលានយន្តហោះខេត្តកំពង់ឆ្នាំង ទៅឲ្យក្រសួងការពារជាតិ ដើម្បីអភិវឌ្ឍជាមូលដ្ឋានទ័ពអាកាសបម្រើដល់វិស័យយោធា។

ព្រលានយន្តហោះខេត្តកំពង់ឆ្នាំងគ្របដណ្តប់លើផ្ទៃដីទំហំ ១៤១៥ ហិកតា ដែលបានកសាងឡើងដោយអាថ៌កំបាំងនាសម័យខ្មែរក្រហម ហើយមិនទាន់មានការអភិវឌ្ឍន៍អ្វីនោះទេក្នុងរយៈពេលជាង ៣០ ឆ្នាំចុងក្រោយនេះ។

លោកអភិបាលខេត្តបានបញ្ជាក់ថា ខេត្តកំពង់ឆ្នាំងមានសក្តានុពលលើផ្នែកដឹកជញ្ជូន ខណៈភូមិសាស្រ្តខេត្តមានបណ្តាញផ្លូវគមនាគមតភ្ជាប់ទាំងផ្លូវទឹក ផ្លូវគោក និងផ្លូវដែក រួមទាំងព្រលានយន្តហោះ។

លោកអភិបាលខេត្តរំពឹងទុកថា បើសិនព្រលានយន្តហោះខេត្តកំពង់ឆ្នាំងត្រូវបានស្តារនិងជួសជុលឡើងវិញ នឹងនាំការអភិវឌ្ឍបន្ថែមទៀត និងក៏ជួយលើកមុខមាត់កិត្តិយសខេត្តជាប់បឹងទន្លេសាបនេះផងដែរ៕

The post ព្រលានយន្តហោះខេត្តកំពង់ឆ្នាំង គ្រោងអភិវឌ្ឍបម្រើដល់វិស័យយោធា appeared first on Kampuchea Thmey Daily.

កាត់ឃុំចំនួន ៤ ក្នុងស្រុករលាប្អៀរ ចូលក្នុងដែនដីរដ្ឋបាលក្រុងកំពង់ឆ្នាំង

Dy Bunnara — Thu, 26 Jan 2023 08:04:59 +0000

អាជ្ញាធរខេត្តកំពង់ឆ្នាំង គ្រោងកាត់ឃុំចំនួន ៤ ក្នុងស្រុករលាប្អៀរមករួមបញ្ចូលក្នុងដែនដីរដ្ឋបាលក្នុងក្រុងកំពង់ឆ្នាំង។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបញ្ជាក់ក្នុងសន្និសីទជោគជ័យរយៈពេល ៥ ឆ្នាំរបស់រដ្ឋបាលខេត្តកំពង់ឆ្នាំងដែលរៀបចំដោយអង្គភាពអ្នកនាំពាក្យរដ្ឋាភិបាលនៅរសៀលនេះថា តាមផែនការក្រោយការបោះឆ្នោតរួច អាជ្ញាធរខេត្តនឹងស្នើទៅក្រសួងមហាផ្ទៃដើម្បីកាត់យកឃុំចំនួន ៤ ក្នុងស្រុករលាប្អៀរមកស្ថិតនៅក្នុងដែនដីរដ្ឋបាលរបស់ក្រុងកំពង់ឆ្នាំង។

បើតាមលោកអភិបាលខេត្ត ការកាត់យកឃុំចំនួន ៤ ក្នុងស្រុករលាប្អៀរចូលក្នុងដែនដីរដ្ឋបាលក្រុងកំពង់ឆ្នាំង នឹងធ្វើឲ្យចំនួនសង្កាត់ក្នុងក្រុងកំពង់ឆ្នាំងឡើងដល់ ៨ សង្កាត់៕

The post កាត់ឃុំចំនួន ៤ ក្នុងស្រុករលាប្អៀរ ចូលក្នុងដែនដីរដ្ឋបាលក្រុងកំពង់ឆ្នាំង appeared first on Kampuchea Thmey Daily.

ក្រុមការងារចុះពិនិត្យអាងទឹកអន្លង់ជ្រៃដើម្បីត្រៀមដោះស្រាយជំនន់ទឹកភ្លៀងជន់លិចផ្លូវជាតិលេខ៥

deth leng — Tue, 16 Aug 2022 02:45:13 +0000

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងនៅថ្ងៃទី ១៥ ខែសីហា ឆ្នាំ២០២២បានដឹកនាំក្រុមការងារពាក់ព័ន្ធចុះពិនិត្យមើលស្ថានភាពទឹកនៅក្នុងអាងទឹកអន្លង់ជ្រៃក្នុងឃុំឈានឡើង ស្រុកសាមគ្គីមានជ័យ ដើម្បីត្រៀមដោះស្រាយទឹកជំនន់ទឹកភ្លៀងដែលអាចនឹងជន់លិចផ្លូវជាតិលេខ៥ ចំណុចគីឡូម៉ែត្រលេខ៤០ និង៤១ជាថ្មីទៀត។

យោងសេចក្ដីជូនដំណឹងរបស់ក្រសួងធនធានទឹក និងឧតុនិយមនៅថ្ងៃទី ១៤ ខែសីហា ឆ្នាំ២០២២ ស្ថានភាពអាកាសធាតុនៅប្រទេសកម្ពុជាចាប់ពីថ្ងៃទី ១៥ ដល់ថ្ងៃទី ១៩ ខែសីហា ឆ្នាំ២០២២ នឹងមានភ្លៀងបន្តធ្លាក់ស្ទើរគ្រប់ទីកន្លែង ដែលអាចធ្វើឲ្យតំបន់ផ្ទៃរងទឹកភ្លៀង និងបណ្ដាខេត្តមួយចំនួនទទួលបរិមាណទឹកភ្លៀងកើនឡើងបន្ថែមទៀត ដែលនឹងអាចបង្កជាជំនន់ទឹកភ្លៀងសារជាថ្មីទៀត។

នៅក្នុងស្ថានភាពនេះពិនិត្យជារួមកម្រិតទឹកនៅក្នុងអាងទឹកអន្លង់ជ្រៃមានការកើនឡើង ប៉ុន្តែមិនទាន់មានបញ្ហាប្រឈមអ្វីទេ លោកអភិបាលខេត្តបានណែនាំដល់អាជ្ញាធរមូលដ្ឋាន និងមន្ត្រីប្រចាំការធ្វើការរាយការណ៍ពីស្ថានភាពទឹកជាប្រចាំ និងបើកទ្វារបង្ហូរទឹកសន្សឹមៗកុំឲ្យមានការជន់លិចនៅផ្នែកខាងក្រោមពិសេសផ្លូវជាតិលេខ៥។

មន្ត្រីនៅក្នុងក្រុមការងារបានឱ្យដឹងថា អាងទឹកអន្លង់ជ្រៃ គឺជាអាងរក្សាទុកទឹកភ្លៀងដ៏ធំមួយសម្រាប់ប្រជាពលរដ្ឋនៅតំបន់នោះ និងតំបន់នៅផ្នែកខាងក្រោមប្រើប្រាស់។

នៅពេលមានភ្លៀងធ្លាក់ច្រើនទឹកក្នុងអាងនឹងហក់ឡើងហើយអាជ្ញាធរមូលដ្ឋាន និងមន្ត្រីប្រចាំការនឹងបើកទ្វារទឹកទៅតាមកម្រិតនៃសន្ទុះទឹកដែលទឹកនឹងហូរធ្លាក់ចុះមកផ្នែកខាងក្រោមតាមដងស្ទឹងក្រាំងពន្លៃ ដែលនឹងអាចហូរច្រោះខ្លាំងនៅត្រង់កំណាត់ផ្លូវជាតិលេខ៥ ចន្លោះ គ.ម ៤០និង៤១ ចំណុចព្រំប្រទល់ខេត្តកំពង់ឆ្នាំង និងស្រុកឧត្ដុង្គ ខេត្តកំពង់ស្ពឺ។

កន្លងមកលោកអភិបាលខេត្តតែងបានចាត់ក្រុមការងារខេត្ត ស្រុក មន្ទីរជំនាញពាក់ព័ន្ធ និងកម្លាំងមានសមត្ថកិច្ច សហការជាមួយក្រុមហ៊ុនជប៉ុនសាងសង់ផ្លូវជាតិលេខ៥ ចុះអន្តរាគមន៍ដោះស្រាយបញ្ហាទឹកហូរច្រាល់ខ្លាំងត្រង់កំណាត់ផ្លូវជាតិលេ ខ៥ ចន្លោះ គ.ម ៤០-៤១ និងជួយសម្រួលចរាចរកុំឲ្យមានការកកស្ទះ ក៏ដូចជាបង្ការកុំឲ្យគ្រោះថ្នាក់ជាយ ថាហេតុដល់ប្រជាពលរដ្ឋជាអ្នកធ្វើដំណើរ។

ចំពោះស្ថានភាពខាងលើនេះអា ជ្ញាធរខេត្តសូមអំពាវនាវដល់ប្រជាពល រដ្ឋនិងអាជ្ញាធរគ្រប់មូលដ្ឋាន សូមមានការប្រុងប្រយ័ត្នខ្ពស់ចំពោះស្ថានភាពទឹកភ្លៀងតាមការជូនដំណឹងរបស់ក្រសួងធនធានទឹកនិងឧតុនិយម ដើម្បីរួមគ្នាបង្ការនិងទប់ស្កាត់ជំនន់ទឹកភ្លៀងឱ្យបានទាន់ពេលវេលាកុំឲ្យប៉ះពាល់ដល់ទ្រព្យសម្បតិ្តនិងអាយុជីវិតរបស់ប្រជាពលរដ្ឋយើង៕

អត្ថបទ៖ ឈៀងថារិទ្ធ

The post ក្រុមការងារចុះពិនិត្យអាងទឹកអន្លង់ជ្រៃដើម្បីត្រៀមដោះស្រាយជំនន់ទឹកភ្លៀងជន់លិចផ្លូវជាតិលេខ៥ appeared first on Kampuchea Thmey Daily.

អាជ្ញាធរខេត្តកំពង់ឆ្នាំងបន្តជំរុញការងារកាត់ឆ្វៀលដីតំបន់ ៣ ជូនពលរដ្ឋ

deth leng — Wed, 27 Jul 2022 08:47:18 +0000

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងនៅថ្ងៃទី ២៧ ខែកក្កដា ២០២២ នេះ បានដឹកនាំកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារដែលត្រូវអនុវត្តបន្តរបស់រដ្ឋបាលខេត្ត។

លោក ស៊ុន សុវណ្ណារិទ្ធិ ថ្លែងថា មួយរយៈចុងក្រោយនេះ អាជ្ញាធរខេត្តបានរួមកម្លាំងគ្នាចុះអនុវត្តការងារកាត់ឆ្វៀលដីតំបន់៣ ជូនប្រជាពលរដ្ឋស្របតាមអនុក្រឹត្យរបស់រាជរដ្ឋាភិបាល និងអនុសាសន៍របស់សម្ដេចតេជោ ហ៊ុន សែន នាយករដ្ឋមកម្ពុជា។

លោកអភិបាលខេត្តកំពង់ឆ្នាំងរូបនេះ បានដាក់ចេញទិសដៅការងារសំខាន់ៗមួយចំនួនរួមមាន បន្តចុះអនុវត្តការងារកាត់ឆ្វៀលដីតំបន់៣ ជូនប្រជាពលរដ្ឋ និងបន្តចុះកំណត់អត្តសញ្ញាណដីលំនៅឋាន ស្ថិតនៅផ្នែកខាងកើតផ្លូវជាតិលេខ៥ និងទីតាំងមួយចំនួនទៀត ដើម្បីលើកសំណើសុំគោលការណ៍ពីរាជរដ្ឋាភិបាល បន្តពង្រឹង ថែរក្សាសន្តិសុខ សណ្ដាប់ធ្នាប់សាធារណៈ បន្តចុះបង្ក្រាបបទល្មើសនេសាទ បន្តយកចិត្តទុកដាក់គ្រប់គ្រងដីព្រៃលិចទឹកនៅតំបន់៣ បន្តប្រយុទ្ធនឹងជំងឺកូវីដ-១៩ និងប្រុងប្រយ័ត្នចំពោះជំងឺអុតស្វា។

ទន្ទឹមនឹងនេះអាជ្ញាធរខេត្តនៅតែបន្តជំរុញការចាក់វ៉ាក់សាំងកូវីដ-១៩ យកចិត្តទុកដាក់តាមដានសភាពការណ៍គ្រោះមហន្តរាយ និងឆ្លើយតបឲ្យបានទាន់ពេលវេលា ព្រមទាំងបន្តយកចិត្តទុកដាក់កែលម្អ លើកកម្ពស់សោភ័ណភាពទីក្រុង ទីប្រជុំជន និងត្រួតពិនិត្យចាត់វិធានការចំពោះសំណង់គ្មានច្បាប់អនុញ្ញាត។

ក្រៅពីនេះក៏ជំរុញការងាររៀបចំផែនការអភិវឌ្ឍន៍វិស័យទេសចរណ៍រយៈពេល៥ឆ្នាំ និងការងារសំខាន់ៗមួយចំនួនទៀត៕

The post អាជ្ញាធរខេត្តកំពង់ឆ្នាំងបន្តជំរុញការងារកាត់ឆ្វៀលដីតំបន់ ៣ ជូនពលរដ្ឋ appeared first on Kampuchea Thmey Daily.

ថ្ងៃដំបូងនៃប្រតិបត្តិការទ្រង់ទ្រាយធំសមត្ថកិច្ចចម្រុះខេត្តកំពង់ឆ្នាំងចុះរុះរើរបាំងសាច់អួនបានជាង ២ពាន់ម៉ែត្រ

deth leng — Thu, 24 Mar 2022 09:07:02 +0000

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅថ្ងៃទី ២៤ ខែមីនានេះ បានចាត់តាំងក្រុមការងារចម្រុះថ្នាក់ខេត្ត សហការគ្នាគណៈបញ្ជាការឯកភាពស្រុកចំនួន៣ ដែលមានកម្លាំងសរុបចំនួន ១០០ នាក់ បានចុះប្រតិបត្តិការបង្ក្រាបបទល្មើសនេសាទទ្រង់ទ្រាយធំនៅក្នុងស្រុក ៣ ក្នុងទឹកដីខេត្តកំពង់ឆ្នាំង។

លោក ងិន ហ៊ុន ប្រធានមន្ទីរកសិកម្ម និងរុក្ខាប្រមាញ់ខេត្តកំពង់ឆ្នាំងបានឲ្យបានថា អនុវត្តតាមផែនការរបស់ឯកឧត្តម ស៊ុន សុវណ្ណារិទ្ធិ គណៈបញ្ជាការឯកភាពរដ្ឋខេត្ត បានចុះបង្ក្រាបបទល្មើសនេសាទចំនួន ៣ គោលដៅគឺ ស្រុកជលគីរី ស្រុកកំពង់លែង និងស្រុកបរិបូណ៌។

ក្នុងយុទ្ធនាការនេះបានប្រើប្រាស់កម្លាំងសរុប ចំនួន ១០០ នាក់ក្នុងនោះមាន មន្ត្រីជលផល នៃមន្ទីរកសិកម្មខេត្តកំពង់ឆ្នាំងចំនួន២០ នាក់ ស្នងការនគបាលខេត្តចំនួន ២៧នាក់ គណៈបញ្ជាការឯកភាពស្រុកទាំង៣ ចំនួនសរុប ៥៣នាក់ កម្លាំងសរុប១០០នាក់។

ដោយ ប្រើប្រាស់មធ្យោបាយកាណូតចំនួនសរុប១៨គ្រឿង ជាលទ្ធផលសម្រេចបាន រុះរើរបាំងសាច់អួនចំនួន ២៧ កន្លែង ស្មើ ២ ២០០ ម៉ែត្រ បង្គោលចំនួន ៨៥០ដើម លូសាច់អួនចំនួន៣៤ លូ។ រុះសម្រាស់ចំនួន ៧ កន្លែងស្មើនិង ៥៦០ ម៉ែត្រការ៉េ បង្គោលចំនួន ១៣០ដើម មែកសម្រាស់ចំនួន ៣៤០០មែក។

ដោយឡែកឯកឧត្តម ស៊ុន សុវណ្ណរិទ្ធិ អភិបាលខេត្តកំពង់ឆ្នាំងក៏បានបញ្ជាក់នៅព្រឹកថ្ងៃទី២៤ នេះថា យុទ្ធនាការបង្ក្រាបបទល្មើសនេសាទនេះ សមត្ថកិច្ចចំរុះនិងបន្តធ្វើរហូត លុះអស់បទល្មើសនេសាទនៅក្នុងទឹកដីខេត្តកំពង់ឆ្នាំង ជាពិសេសគឺកបង្ក្រាបជនល្មើសជាឈ្មួញធំៗ ដែលជាមេខ្លោងប្រព្រឹត្តបទល្មើសនេសាទ៕

អត្ថបទ៖ ឈៀងថារិទ្ធ

The post ថ្ងៃដំបូងនៃប្រតិបត្តិការទ្រង់ទ្រាយធំសមត្ថកិច្ចចម្រុះខេត្តកំពង់ឆ្នាំងចុះរុះរើរបាំងសាច់អួនបានជាង ២ពាន់ម៉ែត្រ appeared first on Kampuchea Thmey Daily.

អភិបាលខេត្តកំពង់ឆ្នាំងគ្រោងពង្រីកការចិញ្ចឹមសត្វចៀមយកសាច់ផ្គត់ផ្គង់ទីផ្សារ និងទាក់ទាញទេសចរណ៍

Sophal Tuon — Wed, 26 Jan 2022 01:07:45 +0000

លោកអភិបាលខេត្តកំពង់ឆ្នាំងមានគម្រោងឲ្យកសិករពង្រីកការចិញ្ចឹមសត្វចៀម ដើម្បីសម្រាប់ផ្គត់ផ្គង់ទីផ្សារ និងជាពិសេសទាក់ទាញភ្ញៀវទេសចរណ៍បរទេស ដែលចូលចិត្តទទួលទានសត្វចៀម អាចមកកម្សាន្ត និងទទួលទានសាច់ចៀមនៅខេ្តកំពង់ឆ្នាំង។

លោក ស៊ុន សុវណ្ណរិទ្ធិ អភិបាលខេត្តកំពង់ឆ្នាំង លើកឡើងបែបនេះ កាលពីថ្ងៃទី២៥ ខែមករាឆ្នាំ២០២២ នៅក្នុងសន្និសីទសារព័ត៌មានស្តីពី “វឌ្ឍនភាព មូលដ្ឋានឃុំ សង្កាត់និងទិសដៅការងារបន្ត” របស់រដ្ឋបាលខេត្តកំពង់ឆ្នាំង ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រី។

លោកអភិបាលខេត្តកំពង់ឆ្នាំងបានថ្លែងថា បច្ចុប្បន្នការចិញ្ចឹមចៀមនៅខេត្តកំពង់ឆ្នាំង បាននិងកំពុងអនុវត្តហើយ នៅស្រុកទឹកផុសដោយចិញ្ចឹមបានជាង៦០០ក្បាល និងកំពុងតែពង្រីកបន្ថែមទៀត។

លោក ស៊ុន សុវណ្ណរិទ្ធិ បានបន្ថែមទៀតថា «គោលដៅរបស់ខ្ញុំគឺទៅដល់កំពង់ឆ្នាំងមានសាច់ចៀមមហូប ដោយកាលពីមុនយើងថាមានតែនៅអូស្ត្រាលីប៉ុណ្ណោះទេ »។

មុខរបរចិញ្ចឹមសត្វចៀម មិនសូវមានអ្នកចិញ្ចឹមច្រើនឡើយ ដោយសារតែប្រជាកសិករភាគច្រើនយល់ថា សត្វមួយប្រភេទនេះពិបាកក្នុងការរកពូជ និងថែទាំ ហើយបារម្ភពីកង្វះទីផ្សារ។ ប៉ុន្តែកាលពីពេលថ្មីៗនេះកសិដ្ឋានចិញ្ចឹមចៀមមួយនៅខេត្តកំពង់ឆ្នាំងកំពុងពង្រីកការចិញ្ចឹមបន្ថែមទៀត ឆ្លើយតបទៅនឹងទីផ្សារក្នុងស្រុក បច្ចុប្បន្នដែលពេញនិយមត្រូវការសាច់ចៀមយ៉ាងខ្លាំង។

លោក ប៊ុន ចាន់វីរៈ ម្ចាស់កសិដ្ឋានចិញ្ចឹមចៀមមួយកន្លែងស្ថិតនៅក្នុងភូមិខ្វិតទួលឃ្លាំង ឃុំក្បាលទឹកស្រុកទឹកផុសខេត្តកំពង់ឆ្នាំង តាមជួរភ្នំឱរ៉ាល់ជាប់នឹងព្រំប្រទល់របស់ ខេត្តកំពង់ស្ពឺធ្លាប់បានឲ្យដឹងថា បើប្រៀបធៀបរវាងការចិញ្ចឹមគោ មាន់ ទា ជ្រូក ក្របី សេះ និងការចិញ្ចឹមចៀមគឺមានលក្ខណៈងាយស្រួលជាងព្រោះសត្វចៀមជាប្រភេទ សត្វម្យ៉ាងដែលងាយស្រួលក្នុងការចិញ្ចឹម មិនរើសទីកន្លែងទេ ដែលយើងអាចចិញ្ចឹមបានគ្រប់ទីកន្លែងនៅក្នុងប្រទេសកម្ពុជាជាពិសេសនោះ គឺសត្វដែលធន់នឹងអាកាសធាតុនៅប្រទេសយើង។ ប៉ុន្ដែយើងចាំបាច់ត្រូវតែយល់ដឹងពីបច្ចេកទេសមួយចំនួនពីការចិញ្ចឹមចៀម ដើម្បីទទួលបានទិន្នផលខ្ពស់។

ម្ចាស់កសិដ្ឋានរូបនេះ បានប្រាប់ផងដែរថា គាត់រៀនបច្ចេកទេសចិញ្ចឹមចៀមនេះ ដោយខ្លួនឯងនៅផ្ទះលក្ខណៈជា home school ដែលយើងអាចទិញមេរៀនគេមករៀន។

លោក ចាន់វីរៈ បានចាប់ផ្ដើមដំណើរការចិញ្ចឹមដំបូងកាលពី ៣ឆ្នាំមុន ដោយចាប់ផ្ដើមពីសត្វចៀមញី១០ក្បាលនិងឈ្មោល១ក្បាល ដោយចំណាយដើមទុនប្រមាណជាង បីពាន់ដុល្លា ព្រោះសត្វចៀមមួយក្បាលមានតម្លៃប្រមាណ៣០០ដុល្លារ ។ លោកបានប្រលែងចៀមឱ្យទៅស៊ីស្មៅនៅចំការដូងរបស់លោក ពោលគឺការចិញ្ចឹមចំណាយអស់ ភាគច្រើនតែទៅលើការទិញពូជប៉ុណ្ណោះ ហើយចំណីគឺងាយស្រួលណាស់វាអាចស៊ីបានទាំងស្មៅធម្មជាតិ ស្មៅដាំ ស្មៅក្រៀម ឬស្លឹកឈើក៏បាន។

សត្វចៀមអាចកើតកូន១ឆ្នាំ ២ ដង លុះដល់កូនដែលកើតមកនោះមានអាយុត្រឹម ៦ ទៅ ៨ខែ វាក៏ចាប់ផ្ដើមរកបង្កាត់ពូជបន្តទៀត។ ឯចៀមឈ្មោលត្រឹម ៦ទៅ៨ ខែក៏អាចបង្កាត់ពូជបាន។ បើតាមលោកចាន់វីរៈចៀមញី ២០-៣០ ក្បាល ត្រូវការតែឈ្មោល១ក្បាលប៉ុណ្ណោះ ដូចនេះនៅពេលដែលមានចៀមឈ្មោលច្រើ គឺគេអាចលក់ចេញបាន។ ក្នុងអាយុពី៦ ទៅ ៨ ខែ ចៀមមានទម្ងន់ជាមធ្យម ៣០គីឡូក្រាម ឯការលក់ក្នុងទីផ្សារគឺ១គីឡូក្រាម មានតម្លៃ ៧ ទៅ ៨ដុល្លារ ដូចនេះចៀមមួយក្បាលទម្ងន់ ៣០ គីឡូក្រាមលក់បានតម្លៃពី ២១០ ទៅ ២៤០ដុល្លារ។

មកដល់ពេលបច្ចុប្បន្នកសិដ្ឋានចិញ្ចឹមចៀមនៅស្រុកទឹកផុសនេះមានចៀមប្រមាណ៦00ក្បាល ក្នុងនោះមានជាង៣០០ ក្បាលសម្រាប់ចិញ្ចឹម និង ៣០០ ក្បាលទៀត សម្រាប់លក់។

បើតាមលោក ប៊ុន ចាន់វីរៈ លោកមានគម្រោងពង្រីកកសិដ្ឋានដោយបន្ថែមេចៀមដល់៦០០ក្បាល និងកូន៦០០ក្បាល ខណៈដែលសព្វថ្ងៃកំពុងពង្រីកការដាំស្មៅប្រមាណជាង២០ហិចតាបន្ថែមទៀត ។ សម្រាប់វាលស្មៅធម្មជាតិក្នុង១ហិចតាអាចប្រលែងចៀមឱ្យស៊ីបាន ២០ ក្បាលឯស្មៅដាំវិញគេអាចដាក់ចៀមបានពី ៦០ ទៅ១០០ ក្បាល។

យោងតាមរបាយការណ៍អង្គការស្បៀងអាហារនិងកសិកម្មបានឲ្យដឹងថាកាលពីឆ្នាំ២០២០ប្រទេសអូស្រ្តាលី បានជាប់លំដាប់ថ្នាក់ទី១ នៅទូទាំងពិភពលោកជាប្រទេសដែលបានចិញ្ចឹម និងនាំចេញចៀមច្រើនជាងគេ ទៅកាន់ទីផ្សារអន្តរជាតិ។ បច្ចុប្បន្នប្រទេសចិនគឺជាអ្នកនាំចូលសាច់ចៀមធំបំផុតរបស់ពិភពលោក ២,៧ លានតោនជាង ៧០%នៃការប្រើប្រាស់សរុបរបស់ពិភពលោក៕ អត្ថបទ៖ ណារី

The post អភិបាលខេត្តកំពង់ឆ្នាំងគ្រោងពង្រីកការចិញ្ចឹមសត្វចៀមយកសាច់ផ្គត់ផ្គង់ទីផ្សារ និងទាក់ទាញទេសចរណ៍ appeared first on Kampuchea Thmey Daily.

លោក ស៊ុន សុវណ្ណារិទ្ធិ Archives - Kampuchea Thmey Daily

អាជ្ញាធរ​ខេត្តកំពង់ឆ្នាំង ដាក់ផែនការ​ស្ថាបនាផ្លូវតភ្ជាប់តំបន់​ទេសចរណ៍​សក្តានុពល

អាជ្ញាធរ​ខេត្ត​កំពង់ឆ្នាំង ជំរុញ​បញ្ចប់​ការ​កាត់​ឆ្វៀល​ដី​ជូន​ពលរដ្ឋ​ឲ្យ​រួច​មុន​ខែ​មេសា

ព្រលាន​យន្តហោះ​ខេត្ត​កំពង់ឆ្នាំង គ្រោង​អភិវឌ្ឍ​បម្រើ​ដល់​វិស័យ​យោធា

កាត់​ឃុំចំនួន ៤ ក្នុង​ស្រុក​រលាប្អៀរ​ ចូល​ក្នុង​ដែនដី​​រដ្ឋបាលក្រុង​កំពង់ឆ្នាំង

ក្រុមការងារ​ចុះពិនិត្យ​អាងទឹកអន្លង់ជ្រៃដើម្បីត្រៀម​ដោះស្រាយ​ជំនន់ទឹកភ្លៀង​ជន់លិចផ្លូវជាតិលេខ៥