នេះជាការប្តេជ្ញាចិត្តរបស់សហរដ្ឋអាមេរិក ដើម្បីទប់ស្កាត់ការជ្រៀតជ្រែកពីបរទេស ជាពិសេសពីប្រទេសចិនតែម្តង មិនឲ្យធ្វើប្រតិបត្តិការនៅព្រែកជីកប៉ាណាម៉ា។ ជំហរ​នេះ ក៏​គូសបញ្ជាក់​ពី​សារៈសំខាន់​ជា​យុទ្ធសាស្ត្រ​របស់​ព្រែកជីក និង​ឆ្លុះ​បញ្ចាំង​ពីក្តី​ព្រួយបារម្ភអំពី​ការ​ពង្រីក​ឥទ្ធិពល​របស់​ចិននៅ​ក្នុង​តំបន់ផងដែរ។​

ដោយសារមានក្រុមហ៊ុនហុងកុងឈ្មោះ Panama Ports កំពុងដំណើរការកំពង់ផែចំនួនពីរនៅចុងព្រែកដែលតភ្ជាប់មហាសមុទ្រអាត្លង់ទិកនិងប៉ាស៊ីហ្វិកនោះ លោក Hegseth បញ្ជាក់យ៉ាងច្បាស់ថា ចិនមិនមែនសាងសង់ព្រែកជីកនេះទេ អ៊ីចឹងចិនមិនអាចធ្វើប្រតិបត្តិការនៅទីនេះបានឡើយ ហើយក៏មិនអាចយកព្រែកជីកនេះ ធ្វើជាអាវុធបានដែរ។

សូមជម្រាបថា តាំងពីចូលកាន់តំណែងប្រធានាធិបតីអាមេរិកអាណត្តិថ្មីមក លោក ដូណាល់ ត្រាំ តែងតែចិញ្ចឹមចិត្តដណ្តើមយក​ព្រែកជីក​ប៉ាណាម៉ា ដែល​ជា​ច្រករបៀងពាណិជ្ជកម្មដ៏សំខាន់​មក​កាន់​កាប់​ឡើង​វិញ ហើយ​ទាមទារឲ្យប៉ាណាម៉ា​ត្រូវ​ធ្វើការផ្លាស់ប្តូរភ្លាមៗចំពោះអ្វីដែល​លោក​ហៅថា​ជា «ឥទ្ធិពលនិងការគ្រប់គ្រង» របស់ប្រទេសចិន​នៅ​លើព្រែកជីកនេះ បើមិនដូច្នេះទេអាមេរិកនឹងចាត់វិធានការចាំបាច់ ដើម្បីការពារសិទ្ធិរបស់ខ្លួនក្រោមសន្ធិសញ្ញារវាងប្រទេសទាំងពីរ ឈានដល់ការគំរាមប្រើយោធាទៀតផង។

មិនត្រឹមប៉ុណ្ណឹង លោក ត្រាំ ថែមចោទប្រកាន់​ប្រទេស​ប៉ាណាម៉ា​ពី​រឿង​​គិតប្រាក់លើសកម្រិត ដើម្បីប្រើប្រាស់ផ្លូវ​ទឹក​ពាណិជ្ជកម្មរបស់ខ្លួន ផងដែរ។

ព្រែកជីកប៉ាណាម៉ាត្រូវបានសហរដ្ឋ​អាមេរិក​​សាងសង់​ភាគច្រើននិងគ្រប់គ្រង​ទឹកដី​ជុំវិញ​នោះ ​អស់រយៈពេល​ជាច្រើន​ទសវត្សរ៍មកហើយ។ វាមានប្រវែង៨២គីឡូម៉ែត្រ គឺជាផ្លូវទឹកដ៏សំខាន់ដែលតភ្ជាប់មហាសមុទ្រប៉ាស៊ីហ្វិកជាមួយមហាសមុទ្រអាត្លង់ទិក។

វាមានលក្ខណៈសម្បត្តិ កាត់បន្ថយពេលវេលាធ្វើដំណើររវាងតំបន់ទាំងពីរ និងជួយសម្រួលឲ្យកប៉ាល់ មិនបាច់ធ្វើដំណើរវាងទៅចុងភាគខាងត្បូងនៃតំបន់អាមេរិកខាងត្បូងឡើយ។ ប្រហែល ៥% នៃចរាចរណ៍ផ្លូវសមុទ្រពិភពលោក គឺឆ្លងកាត់ព្រែកជីកនេះជារៀងរាល់ឆ្នាំ៕

អត្ថបទ៖ សុខ សុវណ្ណ

ចុចអាន៖ ធ្លាយព័ត៌មានថា ត្រាំ ចង់ប្រើមធ្យោបាយយោធា​ ដើម្បីយក ព្រែកជីកប៉ាណាម៉ា មកគ្រប់គ្រង

The post អាមេរិក ព្រមានចិន កុំមករញ៉េរញ៉ៃនៅព្រែកជីកប៉ាណាម៉ា appeared first on Kampuchea Thmey Daily.

លោក Hegseth និយាយបែបនេះបន្ទាប់ពី​សហរដ្ឋអាមេរិក បើកការវាយប្រហារអាកាសសម្លាប់មនុស្ស៥៣នាក់នៅយេម៉ែន ខណៈក្រុមសកម្មប្រយុទ្ធមួយនេះក៏ប្តេជ្ញាសងសឹកអាមេរិកវិញផងដែរ ដោយមេធំរបស់ខ្លួនគឺលោក Abdul Malik al-Houthi ប្រកាសកំណត់គោលដៅលើនាវាចម្បាំងអាមេរិកក្នុងសមុទ្រក្រហមតែម្តង។

ថ្លែងប្រាប់កម្មវិធី Sunday Morning Futures របស់ទូរទស្សន៍ Fox News, លោក Hegseth និយាយថា «ពេលណាហ៊ូធីនិយាយថា យើងឈប់បាញ់កប៉ាល់របស់អ្នក ពេលនោះយើងក៏នឹងឈប់បាញ់ទម្លាក់ដ្រូនរបស់អ្នកដូចគ្នា។ យុទ្ធនាការនេះនឹងបញ្ចប់ ប៉ុន្តែដរាបណាពួកគេនៅតែបន្តការវាយប្រហារ អាមេរិកនឹងបន្តការវាយលុកឥតឈប់ដែរ។ គោលបំណងគឺបញ្ឈប់ការវាយប្រហារទៅលើទ្រព្យសម្បត្តិ នៅក្នុងផ្លូវទឹកដ៏សំខាន់នោះ និងដើម្បីស្តារសេរីភាពនៃការធ្វើនាវាចរណ៍ ដែលជាផលប្រយោជន៍ជាតិចម្បងរបស់សហរដ្ឋអាមេរិកឡើងវិញ ហើយអ៊ីរ៉ង់គាំទ្រក្រុមហ៊ូធីយូរហើយ ដូច្នេះយល់ល្អឈប់បានឈប់ទៅ!»។

ក្នុងរយៈពេលមួយទសវត្សរ៍កន្លងមកនេះ ក្រុមហ៊ូធី បានកាន់កាប់ប្រទេសយេម៉ែនមួយភាគធំ ហើយកាលពីសប្តាហ៍មុនពួកគេបោះពាក្យថា ពួកគេនឹងនៅតែវាយប្រហារលើកប៉ាល់អ៊ីស្រាអែល ដែលឆ្លងកាត់សមុទ្រក្រហម បើអ៊ីស្រាអែលមិនព្រមបើកឲ្យមានការផ្តល់ជំនួយចូលទៅក្នុងតំបន់ហ្គាហ្សាទេនោះ។

ក្រុមហ៊ូធី បានបើកការវាយប្រហារជាច្រើនលើកច្រើនសាលើការដឹកជញ្ជូនផ្លូវសមុទ្រ បន្ទាប់ពីសង្គ្រាមរវាងអ៊ីស្រាអែលជាមួយក្រុមហាម៉ាស ផ្ទុះកញ្ជ្រោលខ្លាំងនៅចុងឆ្នាំ២០២៣ ដោយអះអាងថា ពួកគេឈរប្រកៀកស្មាជាមួយពលរដ្ឋប៉ាឡេស្ទីន នៅតំបន់ហ្គាហ្សា៕

អត្ថបទ៖ សុខ សុវណ្ណ

ចុចអាន៖ អាមេរិក​ ដាក់​ទណ្ឌកម្ម​បន្ថែម​​លើ​ក្រុម ហ៊ូធី

The post អាមេរិក ផ្តាំទៅក្រុមហ៊ូធីថា បើមិនឈប់បាញ់កប៉ាល់ដឹកទំនិញ កុំសង្ឃឹមបានសុខ appeared first on Kampuchea Thmey Daily.

លោក Pete Hegseth ជា​ជើង​ចាស់​នៅ​ក្នុង​​​វិស័យ​យោធា​អាមេរិក​ជា​​​​យូរ​​ណាស់​មកហើយ ​ចាប់​តាំង​ពី​ឆ្នាំ​២០០៣​រហូត​ដល់​​ឆ្នាំ​២០២១ ដោយ​ធ្លាប់​​​​បម្រើ​ការ​​នៅ​​ប្រទេស​អាហ្វហ្គានីស្ថាន គុយបា និង​​អ៊ីរ៉ាក់។ ពិធីករទូរទស្សន៍ Fox News រូបនេះ ក៏​មាន​តួនាទី​​ជាអ្នកប្រឹក្សាក្រៅផ្លូវការរបស់លោក ត្រាំ អស់រយៈពេលជាច្រើនឆ្នាំ​ផង​ដែរ​ ចាប់តាំង​ពី​អាណត្តិ​ជាប់​ឆ្នោត​លើក​ដំបូង និង​ក្រោយ​​ពេល​ផុត​អាណត្តិ។

នៅក្នុងសវនាការរដ្ឋសភាកាលពីថ្ងៃពុធទី១៥ខែមករាឆ្នាំ២០២៥ លោកធ្វើឲ្យគ្រប់គ្នាស្រឡាំងកាំង នៅពេលឆ្លើយតបទៅសំណួររបស់តំណាងរាស្រ្តអ្នកស្រី Tammy Duckworth ដែលសួរថា​ «តើអ្នកអាចចង្អុលបង្ហាញពីសារៈសំខាន់នៃរដ្ឋសមាជិកអាស៊ានយ៉ាងតិចមួយបានទេ? សូមប្រាប់ពីកិច្ចព្រមព្រៀងដែលអាមេរិក មានជាមួយប្រទេសអាស៊ានឲ្យបានយ៉ាងតិចមួយ ហើយតើអាស៊ានមានសមាជិកប៉ុន្មានប្រទេសដែរ?»។

សម្រាប់ចម្លើយរបស់លោក Hegseth គឺថា «ខ្ញុំមិនដឹងច្បាស់ទេថាអាស៊ានមានប៉ុន្មានប្រទេស ប៉ុន្តែខ្ញុំដឹងថា អាមេរិក ជាសម្ព័ន្ធមិត្តរបស់កូរ៉េខាងត្បូង ជប៉ុន និងមានកិច្ចព្រមព្រៀង AUKUS ជាមួយអូស្រ្តាលី ដែលយើងត្រូវសហការគ្នាពាក់ព័ន្ធនឹងនាវាមុជទឹក»។

ភ្លាមៗនោះ អ្នកស្រី Duckworth ដែលមានដើមកំណើតនៅប្រទេសថៃ បាននិយាយកាត់ថា «ប្រទេសទាំង៣ដែលអ្នកលើកឡើងនោះ គឺមិនមែនជាសមាជិកអាស៊ានទេ។ សូមអ្នកមើលកិច្ចការបន្តិចទៅមុនពេលត្រៀមខ្លួនចូលរួមក្នុងជំនួបបែបនេះនៅថ្ងៃមុខ»។

ក្រោយការលើកឡើងបែបនេះហើយនោះ ស្រាប់តែលោក Hegseth ត្រូវគេរិះគន់យ៉ាងចាស់ដៃ ដោយក្រុមអ្នកប្រជាធិបតេយ្យនៅក្នុងគណៈកម្មការកិច្ចការបរទេសសភាអាមេរិក បានបង្ហោះលើបណ្តាញសង្គម X ថា «អាស៊ាន មកពីពាក្យពេញ សមាគមន៍ប្រជាជាតិអាស៊ីអាគ្នេយ៍ មានសមាជិក១០ប្រទេស តែគ្មានជប៉ុន កូរ៉េខាងត្បូង និងអូស្រ្តាលីទេ។ ថៃនិងហ្វីលីពីនស្ថិតនៅក្នុងតំបន់អាស៊ាន ហើយជាសម្ព័ន្ធមិត្តដ៏សំខាន់របស់សហរដ្ឋអាមេរិក។ រដ្ឋមន្ត្រីការពារជាតិថ្មី គួរតែស្គាល់ដៃគូឥណ្ឌូប៉ាស៊ីហ្វិករបស់យើង»។

ទន្ទឹមនោះ អតីតតំណាងរាស្រ្តគណបក្សប្រជាធិបតេយ្យ Debbie Mucarsel-Powell ក៏រិះគន់ដែរថា «លោក Hegseth មិនស្គាល់សមាជិកអាស៊ាន និងមិនដឹងពីកិច្ចព្រមព្រៀងសន្តិសុខអន្តរជាតិរបស់អាមេរិកផង តើអ្នកចង់បានសន្តិភាពនិងសន្តិសុខ តាមរបៀបណាទៅ?»។

សូមបញ្ជាក់ថា ​​សមាជិកអាស៊ានទាំង១០គឺមានប្រទេសព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និង​វៀតណាម។ តំបន់នេះមានប្រជាជនជាង ៧០០លាននាក់ និងគ្របដណ្តប់លើផ្ទៃដី ៤.៥លានគីឡូម៉ែត្រការ៉េ៕

អត្ថបទ៖ សុខ សុវណ្ណ

ចុចអាន៖ ហេតុអ្វីនាយករដ្ឋមន្ត្រីម៉ាឡេស៊ីតែងតាំងសម្ដេចតេជោជាទីប្រឹក្សាផ្ទាល់ស្ដីពីអាស៊ាន?

The post រដ្ឋមន្ត្រីការពារជាតិក្នុងរដ្ឋបាលលោក ត្រាំ មិនដឹងអាស៊ានមានប៉ុន្មានប្រទេស ត្រូវគេរិះគន់យ៉ាងចាស់ដៃ appeared first on Kampuchea Thmey Daily.