ធ្លាយព័ត៌មានថា ត្រាំ ចង់ប្រើមធ្យោបាយយោធា​ ដើម្បីយក ព្រែកជីកប៉ាណាម៉ា មកគ្រប់គ្រង

យោងតាមប្រភពបែកធ្លាយពីមន្ត្រីក្នុងជួររដ្ឋាភិបាលទីក្រុងវ៉ាស៊ីនតោន និងយកមកចុះផ្សាយព្រោងព្រាតដោយបណ្តាញសារព័ត៌មានធំៗលើពិភពលោកនៅថ្ងៃសុក្រទី១៤ខែមីនាឆ្នាំ២០២៥, ប្រធានាធិបតីអាមេរិក ដូណាល់ ត្រាំ មានគំនិតប្រើមធ្យោបាយយោធាដើម្បីយកព្រែកជីកប៉ាណាម៉ា មកគ្រប់គ្រង ព្រោះនៅទីនោះ ចិននិងរុស្ស៊ី កំពុងដាក់ឥទ្ធិពលខ្លាំង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាំងពីចូលកាន់តំណែងអាណត្តិថ្មីមក លោកត្រាំ តែងតែចិញ្ចឹមចិត្តដណ្តើមយក​ព្រែកជីក​ប៉ាណាម៉ា ដែល​ជា​ច្រករបៀងពាណិជ្ជកម្មដ៏សំខាន់​មក​កាន់​កាប់​ឡើង​វិញ ហើយ​ទាមទារឲ្យប៉ាណាម៉ា​ត្រូវ​ធ្វើការផ្លាស់ប្តូរភ្លាមៗចំពោះអ្វីដែល​លោក​ហៅថា​ជា «ឥទ្ធិពលនិងការគ្រប់គ្រង» របស់ប្រទេសចិន​នៅ​លើព្រែកជីកនេះ បើមិនដូច្នេះទេអាមេរិកនឹងចាត់វិធានការចាំបាច់ ដើម្បីការពារសិទ្ធិរបស់ខ្លួនក្រោមសន្ធិសញ្ញារវាងប្រទេសទាំងពីរ។

មិនត្រឹមប៉ុណ្ណឹង លោក ត្រាំ ថែមចោទប្រកាន់​ប្រទេស​ប៉ាណាម៉ា​ពី​រឿង​​គិតប្រាក់លើសកម្រិត ដើម្បីប្រើប្រាស់ផ្លូវ​ទឹក​ពាណិជ្ជកម្មរបស់ខ្លួន ថែមទៀតផង។

ឥឡូវនេះ មន្ត្រីក្នុងរដ្ឋបាលក្រុងវ៉ាស៊ីនតោន និយាយថា លោក ត្រាំ បានបញ្ជាឲ្យមន្ទីរបញ្ចកោណ ដាក់ចេញនូវផែនការដើម្បីធ្វើយ៉ាងណា គ្រប់គ្រងព្រែកជីកនេះឲ្យបាន ទោះត្រូវប្រើកម្លាំងទ័ពក៏ដោយ។

ក្នុងអនុស្សរណៈស្តីពីការណែនាំយុទ្ធសាស្ត្រការពារជាតិបណ្តោះអាសន្ន ដែលទទួលបានដោយ CNN, សេតវិមានបានស្នើសុំជាផ្លូវការឲ្យមន្ទីរបញ្ចកោណ ផ្តល់ជម្រើសច្រើនយ៉ាងដើម្បីធានាឲ្យអាមេរិក ចូលកាន់កាប់ព្រែកជីកដោយគ្មានដែនកំណត់ ហើយក្នុងចំណោមនោះ ក៏រួមមានទាំងជម្រើសយោធាផងដែរ។

សូមជម្រាបជាថ្មី ព្រែកជីកប៉ាណាម៉ាត្រូវបានសហរដ្ឋ​អាមេរិក​​សាងសង់​ភាគច្រើននិងគ្រប់គ្រង​ទឹកដី​ជុំវិញ​នោះ ​អស់រយៈពេល​ជាច្រើន​ទសវត្សរ៍មកហើយ។ វាមានប្រវែង៨២គីឡូម៉ែត្រ គឺជាផ្លូវទឹកដ៏សំខាន់ដែលតភ្ជាប់មហាសមុទ្រប៉ាស៊ីហ្វិកជាមួយមហាសមុទ្រអាត្លង់ទិក។

វាមានលក្ខណៈសម្បត្តិ កាត់បន្ថយពេលវេលាធ្វើដំណើររវាងតំបន់ទាំងពីរ និងជួយសម្រួលឲ្យកប៉ាល់ មិនបាច់ធ្វើដំណើរវាងទៅចុងភាគខាងត្បូងនៃតំបន់អាមេរិកខាងត្បូងឡើយ។ ប្រហែល ៥% នៃចរាចរណ៍ផ្លូវសមុទ្រពិភពលោក គឺឆ្លងកាត់ព្រែកជីកនេះជារៀងរាល់ឆ្នាំ៕

អត្ថបទ៖ សុខ សុវណ្ណ