ក្រសួងការពារជាតិអង់គ្លេស បាននិយាយនៅក្នុងសេចក្តីថ្លែងការណ៍មួយ ថា នាវា SMYRTOS ត្រូវបានបញ្ជាដោយកងកុម្ម៉ង់ដូកងម៉ារីន​ជើងទឹក និងមន្ត្រីអនុវត្តច្បាប់ដែលបានទទួលការបណ្តុះបណ្តាលពិសេសពីទីភ្នាក់ងារឧក្រិដ្ឋកម្មជាតិ (National Crime Agency)។

សេចក្តីថ្លែងការណ៍ បាន​លើក​ឡើង​ថា នាវានេះនឹងត្រូវបានឃុំខ្លួន និងត្រួតពិនិត្យនៅឯឆ្នេរសមុទ្រភាគខាងត្បូង ខណៈដែលការស៊ើបអង្កេតកំពុងបន្ត ដោយបន្ថែមថា សកម្មភាពអនុវត្តច្បាប់នៅក្នុងដែនទឹករបស់អង់គ្លេសត្រូវបានអនុវត្តស្របតាមច្បាប់ក្នុងស្រុក និងអន្តរជាតិ។

នាយករដ្ឋមន្ត្រីអង់គ្លេស Keir Starmer បាននិយាយថា លោកបានដឹកនាំការស្ទាក់ចាប់នេះ។

នាយករដ្ឋមន្ត្រី​អង់គ្លេស បាននិយាយនៅក្នុងការបង្ហោះមួយនៅលើ X ថា «ប្រតិបត្តិការដ៏ជោគជ័យនេះ បានផ្តល់ការវាយប្រហារមួយទៀតដល់ប្រទេសរុស្ស៊ី និងរំលឹកដល់អ្នក​ទាំងឡាយ​ណា​ដែលជំរុញសង្គ្រាមរបស់លោកពូទីននៅអ៊ុយក្រែនថា យើងនឹងមិនអនុញ្ញាតឱ្យពួកគេលាក់ខ្លួនឡើយ»​៕​

ប្រែសម្រួល រើយ​

The post ​​​អង់គ្លេស​ស្ទាក់ចាប់នាវាដឹកប្រេងរុស្ស៊ី ហើយ លោក​​ Keir Starmer ឌឺដង​ ឲ្យលោក ​ពូទីន​ appeared first on Kampuchea Thmey Daily.

Interfax បានដកស្រង់ខ្លឹមសារច្បាប់នេះ ផ្សាយ​​ថា ច្បាប់នេះ ត្រូវបានអនុម័តដោយសភាជាតិរុស្ស៊ី (State Duma) កាលពីថ្ងៃទី១៣ ខែឧសភា ដែលវាផ្តល់សិទ្ធិឲ្យប្រធានាធិបតីរុស្ស៊ី អាចបញ្ជាឲ្យពង្រាយកងទ័ពទៅក្រៅប្រទេស ដើម្បី «ការពារ» ពលរដ្ឋរុស្ស៊ីណាដែលកំពុងប្រឈមមុខនឹងការចាប់ខ្លួន ការឃាត់ខ្លួន ការកាត់ទោស ឬអ្វីដែលរុស្ស៊ីចាត់ទុកថា ជាការធ្វើទុក្ខបុកម្នេញពីសំណាក់ប្រទេសដទៃ និងតុលាការអន្តរជាតិ។

មិនតែប៉ុណ្ណោះ កងកម្លាំងយោធារុស្ស៊ី ក៏អាចត្រូវបានប្រើប្រាស់ផងដែរ នៅក្នុងករណីដែលពលរដ្ឋរុស្ស៊ីត្រូវបានឃាត់ខ្លួន ក្រោមបញ្ជារបស់ស្ថាប័នតុលាការអន្តរជាតិណាដែលប្រទេសរុស្ស៊ីមិនទទួលស្គាល់អំណាច ឬសមត្ថកិច្ចរបស់ស្ថាប័ននោះឡើយ។

លោក Andrey Kartapolov ប្រធានគណៈកម្មាធិការការពារជាតិខាងសភាជាតិរុស្ស៊ី បានភ្ជាប់សេចក្តីព្រាងច្បាប់នេះ ទៅនឹងករណីរបស់លោក Alexander Butyagin ដែលជាអ្នកបុរាណវិទ្យាជនជាតិរុស្ស៊ីម្នាក់ ដែលត្រូវបានឃាត់ខ្លួននៅក្នុងប្រទេសប៉ូឡូញអស់រយៈពេលជាច្រើនខែ ពាក់ព័ន្ធនឹងការលួចធ្វើកំណាយខុសច្បាប់នៅក្នុងតំបន់គ្រីមៀ ដែលគ្រប់គ្រងដោយរុស្ស៊ី។

ទោះជាយ៉ាងណាក៏ដោយ គេនៅមិនទាន់ដឹងច្បាស់នៅឡើយទេថា តើវិមានក្រឹមឡាំង នឹងលើកយកច្បាប់នេះមកប្រើប្រាស់ក្នុងករណីជាក់ស្តែងបែបណាខ្លះ​ទេ​។ ជាពិសេស ការបញ្ជូនកងទ័ពទៅកាន់ប្រទេសដទៃ ដើម្បីរំដោះ​បុគ្គល​ណាម្នាក់ចេញពីពន្ធនាគារ អាចនឹងប្រឈមមុខនឹងហានិភ័យខ្ពស់ក្នុងការបង្កឲ្យមានជម្លោះយោធាជាមួយប្រទេសនោះ។

ជាក់ស្ដែង សភាជាតិរុស្ស៊ី បានអនុម័តច្បាប់នេះឡើង ចំពេលដែលរដ្ឋាភិបាលនៃបណ្តាប្រទេសលោកខាងលិច កំពុងបង្កើនកិច្ចខិតខំប្រឹងប្រែងក្នុងការទប់ស្កាត់ «ក្រុមនាវាសម្ងាត់» ដែលលួចដឹកជញ្ជូនប្រេងរបស់រុស្ស៊ី។ អាជ្ញាធរនៃប្រទេសអ៊ឺរ៉ុបមួយចំនួន បានរឹតបន្តឹងការត្រួតពិនិត្យលើកប៉ាល់ទាំងឡាយណា ដែលរងការសង្ស័យថា ជាសមាជិកនៃ «ក្រុមនាវាសម្ងាត់» នេះ ក្នុងគោលបំណងដាក់ទណ្ឌកម្មលើប្រទេសរុស្ស៊ី បន្ទាប់ពីជម្លោះបានផ្ទុះឡើងនៅក្នុងប្រទេសអ៊ុយក្រែន៕

អត្ថបទ ៖ សាង ស្រីល័ក្ខ

The post ​ខណៈអឺរ៉ុប​​ដាក់​ការប្រមាញ់ រុស្ស៊ី​ចេញ​ច្បាប់ថ្មី​ដែល​​បើក​ផ្លូវ​ឲ្យ​​អន្តរាគម​យោធា​ចូល​ប្រទេសដទៃ​ ដើម្បី​រំដោះ​​ជនជារុស្ស៊ី​ដែលត្រូវ​ចាប់ខ្លួន​ appeared first on Kampuchea Thmey Daily.

​​​​រយៈពេលចុង​ក្រោយ​នេះ ​​ដើម្បី​ពន្លឿន​ការ​ចរចា​ជាមួយ​រុស្ស៊ី ​រដ្ឋបាល​​របស់​​ប្រធានាធិ​បតី​ ដូណាល់ ត្រាំ របស់​សហរដ្ឋ​អាមេរិក បាន​បញ្ចេញ​​ផែនការ​​​​​​សន្តិភាព​​រវាង​​រុស្ស៊ី​និង​អ៊ុយក្រែន​​ដែល​មាន​​​២៨​ចំណុច​​ក្នុងដំណើរដែលគេជឿថា នឹង​បង្កើន​ការ​​​​ដាក់សម្ពាធ​​ឲ្យ​អ៊ុយក្រែន​​ទទួល​យក​​​​សម្រាប់​​​​​​ការកសាង​សន្តិភាព​ជាមួយរុស្ស៊ី។ ក្នុង​ផែនការ​​​​​សន្តិភាព​នោះ ​ចំណុច​ដែល​ចម្រូង​ចម្រាស​បំផុត​ គឹ​ការ​កាត់ដី​​​ឲ្យ​ភាគី​រុស្ស៊ី​​នៅតំបន់​ដុនបាស​ ដែលរុស្ស៊ី​​​គាំទ្រ​​ក្រុម​បំបែកខ្លួន​ប្រយុទ្ធ​តាំងពីឆ្នាំ​២០១៤​មកម្ល៉េះ​។

ជាការ​ឆ្លើយ​​តប​ចំពោះ​​​​ការលើក​ឡើង​ទាំងឡាយ ​ភាគី​​អ៊ុយក្រែន​បានធ្វើសេចក្តីថ្លែងការណ៍ខ្លាំងបំផុតរបស់ខ្លួន​ស្តីពីការចរចាសន្តិភាពដែលកំពុងបន្ត ដោយប្រកាសយ៉ាងម៉ឺងម៉ាត់ថា ខ្លួននឹងមិនប្រគល់ទឹកដីអធិបតេយ្យណាមួយឱ្យរុស្ស៊ីឡើយ ដោយមិនគិតពីសម្ពាធ ឬសំណើដែលបានបង្ហាញក្នុងអំឡុងពេលកិច្ចខិតខំប្រឹងប្រែងការទូតដែលកំពុងបន្ត​នោះ​ទេ​​។

នៅក្នុងបទសម្ភាសន៍ផ្តាច់មុខជាមួយ សារ​ព័ត៌មាន​ The Atlantic លោក Andriy Yermak ប្រធានក្រុម​អ្នកចរចារបស់អ៊ុយក្រែន និងជាប្រធានការិយាល័យរបស់ប្រធានាធិបតី Volodymyr Zelensky បាននិយាយថា សម្បទានទឹកដីគឺគ្មានដែនកំណត់ទាំងស្រុង។

លោកបានសង្កត់ធ្ងន់ថា ដរាបណាលោកហ្សេលេនស្គី​ នៅ​​តែ​ជាប្រធានាធិបតី អ៊ុយក្រែននឹងមិនយល់ព្រមចំពោះផែនការណាមួយដែលបង្ខំឱ្យអ៊ុយក្រែន​បោះបង់ចោលទឹកដីដែលត្រូវបានទទួលស្គាល់ជាអន្តរជាតិជាថ្នូរនឹងបទឈប់បាញ់ ឬកិច្ចព្រមព្រៀងសន្តិភាពនោះទេ។

លោក Yermak បានព្រមានថា ការទទួលយកកិច្ចព្រមព្រៀងបែបនេះនឹងមិននាំមកនូវសន្តិភាពពិតប្រាកដទេ ប៉ុន្តែជំនួស​មកវិញនូវការឈ្លានពានស្របច្បាប់។ លោកបានសង្កត់ធ្ងន់ថា អ៊ុយក្រែនបើកចំហចំពោះការចរចាពិតប្រាកដ ប៉ុន្តែនឹងមិនសម្របសម្រួលលើអធិបតេយ្យភាព ព្រំដែន ឬសិទ្ធិរបស់ពលរដ្ឋខ្លួនដែលរស់នៅក្រោមការកាន់កាប់របស់រុស្ស៊ីឡើយ។

ជំហរដ៏ម៉ឺងម៉ាត់នេះកើតឡើងនៅពេលដែលរុស្ស៊ីបន្តជំរុញឱ្យមានការទទួលស្គាល់ទឹកដីដែលជាផ្នែកមួយនៃការទាមទាររបស់ខ្លួនក្នុងការពិភាក្សាជុំវិញដំណោះស្រាយដ៏មានសក្តានុពលមួយ។ ទោះជាយ៉ាងនេះក្តី ថ្នាក់ដឹកនាំអ៊ុយក្រែន បាន​ទទូចថា សន្តិភាពមិនអាចបង្កើតបាននៅលើដីដែលត្រូវបានរឹបអូសដោយប្រើ​ប្រាស់​កងកម្លាំងនោះទេ​។

កិច្ចសម្ភាសន៍ក៏បានលើកឡើងពីជំហររបស់អ៊ុយក្រែនថា សន្តិភាពយូរអង្វែងណាមួយត្រូវតែរួមបញ្ចូលការដកកងកម្លាំងរុស្ស៊ី ការធានាសន្តិសុខរយៈពេលវែង និងការស្ដារឡើងវិញនូវបូរណភាពទឹកដីពេញលេញរបស់អ៊ុយក្រែន។

​​សង្គ្រាម​​រុស្ស៊ី​-អ៊ុយក្រែន បានអូសបន្លាយ​​ជិត​​៤ឆ្នាំ​ទៅហើយ ​ខណៈពេលដែលរដ្ឋបាល​​របស់​ប្រធានាធិបតី​ដូណាល់ ត្រាំ ខ្នះខ្នែង​​​ស្វែង​រកសន្តិភាព​​នៅ​អ៊ុយក្រែន ប៉ុន្តែ​​​​ការចរចា​ជាមួយភាគី​រុស្ស៊ី​បាន​​ស្ថិត​នៅ​ចំណុច​ជាប់គាំង បើទោះបីជា​​​​ ប្រធានាធិបតី​អាមេរិក​ លោក ដូណាល់ ត្រាំ បានជួបផ្ទាល់​ជាមួយ​លោក​ពូទីន​ កាល​ពីថ្ងៃទី​១៥ខែ​សីហា​ ដែល​គេជឿថា ភាគីទាំងពីរ​អាច​រកចំណុច​​​រួម​ដើម្បី​បន្ថយ​ភាព​តានតឹង​។​​ ចំណុច​សំខាន់​បំផុត​មួយ គឺ​ លោក​ពូទីន មិនព្រម​ឲ្យ​មានបទ​ឈប់​​សម្រាប់ការ​ចរចាឡើយ៕

The post ​មន្ត្រីជាន់​ខ្ពស់អ៊ុយក្រែន៖ គ្មាន​ការ​កាត់ដី​ជាថ្នូរ​​​កិច្ច​ព្រម​ព្រៀង​សន្តិភាព​ជាមួយរុស្ស៊ី​ទេ​​ appeared first on Kampuchea Thmey Daily.

​​ក្នុង​ពេល​ផ្តល់​​បទ​សម្ពាសន៍​ដល់​ទូរទស្សន៍ LCI របស់​ប្រទេសបារាំង ប្រធានាធិបតី​ប៉ូឡូញ លោក Karol Nawrocki បាននិយាយជាសាធារណៈថា ប្រទេសប៉ូឡូញគួរតែអភិវឌ្ឍសមត្ថភាពនុយក្លេអ៊ែររបស់ខ្លួន​ ខណៈ​ពេលដែល​ប្រទេស​ប៉ូឡូញ​​​កំពុង​ទទួលបាន​ការ​គាំទ្រ​​យ៉ាង​ខ្លាំង​ពីប្រទេស​​​​មហាអំណាច​​​អឺរ៉ុប និង​សម្ព័ន្ធ​មិត្ត​ណាតូ ក្នុងពេល​ដែល​មានជម្លោះ​កើន​​​ឡើង​​ជាមួយ​​មហាអំណាច​នុយក្លេអ៊ែរ​រុស្ស៊ី។​

​​​រុស្ស៊ី​​​បាន​រ​ង​ការ​ចោទ​ប្រកាន់​ពីសំណាក់​ប្រទេសប៉ូឡូញ និង​​សម្ព័ន្ធ​​​មិត្ត​​អឺរ៉ុប​ថា ​បាន​បង្ហោះ​​​យន្តហោះគ្មានមនុស្ស​បើក​ (ដ្រូន)​ ចំនួន​១៩​គ្រឿង​កាល​ថ្ងៃទី​៩​និង​ថ្ងៃទី​១០ខែ​កញ្ញា​នេះ ចូល​ដែន​អាកាស​​​ប្រទេស​ប៉ូឡូញ ដោយ​បង្ក​ឲ្យ​មាន​ប្រតិកម្ម​យ៉ាងខ្លាំងពីសំណាក់​ប្រទេសប៉ូឡូញ និង​​​​សម្ព័ន្ធមិត្តណាតូ​។​

​ទោះបី​ជាយ៉ាងណា មាន​ការ​​​លើក​ឡើង​ថា ប្រធានាធិបតី​ប៉ូឡូញ កំពុងនិយាយអំពីថាមពលនុយក្លេអ៊ែរស៊ីវិល រួមទាំង រ៉េអាក់ទ័រ​ខ្នាតតូច​ (SMRs) និងការបើកទ្វារសម្រាប់ការធ្វើជាម្ចាស់ផ្ទះអាវុធនុយក្លេអ៊ែរបរទេសក្រោមការរៀបចំ «ចែក​រំលែក»​ របស់ណាតូ មិនមែនជាកម្មវិធីអាវុធនុយក្លេអ៊ែរជាតិឯករាជ្យនោះទេ។

​​លោក Karol Nawrocki ត្រូវ​បាន​ស្រង់សម្តី​ដូច​និយាយថា៖ «​ជា​​​ប្រធានាធិបតីប៉ូឡូញ ខ្ញុំ​ជឿ​ជាក់​ថា ​ខ្លួនគួរតែ​​ចូលរួម​​ក្នុង​កម្មវិធី​ចែក​​​រំលែក​​នុយក្លេអ៊ែរ» ដោយ​​និយាយ​បន្ថែមថា ប្រទេស​របស់​គាត់​គួរតែ​​​មាន​​​បច្ចេកវិទ្យា​នុយក្លេអ៊ែរ​​ផ្ទាល់ខ្លួន​ ​រួ​មទាំង​​ថាមពល​អាតូមិក​​ផងដែរ​។ ​នេះ​យោង​តាមការចេញផ្សាយ​របស់​​សារ​ព័ត៌មាន​ TASS ​របស់​រុស្ស៊ី។​

យោងគេ​ហទំព័រ montel.energy ប្រធានាធិបតី​ប៉ូឡូញ បានសន្យាថា នឹងគាំទ្រការសាងសង់រោងចក្រនុយក្លេអ៊ែរចំនួនបីរហូត​ដល់​ឆ្នាំ២០៤៥ ដែលរោងចក្រទីមួយ​ត្រូវ​សាងសង់​នៅឆ្នាំ២០៣៥​​។ ប្រសិនបើចក្ខុវិស័យរបស់ Nawrocki ត្រូវបានក្លាយ​ជា​ការ​ពិត​ នោះវានឹងនាំទៅដល់ការនាំយករោងចក្រដំបូងក្នុងរយៈពេល២ ឆ្នាំ និងឈានដល់ថាមពល​ 4.8 GW នៅក្នុង SMRs៕​

The post ​ប៉ូឡូញ​​​​បង្ហាញបំណង​​​​​​​​​ជំរុញ​ថាមពល​នុយក្លេអ៊ែរ​ និង​​​មាន​បច្ចេកវិទ្យា​នុយក្លេអ៊ែរ​​​ appeared first on Kampuchea Thmey Daily.

​សមាជិកសភា លោក Joe Wilson (R-SC) ​តំណាង​​​រាស្រ្ត​​នៃ​បក្ស​​សាធារណៈរដ្ឋ​​​ មក​ពី​រដ្ឋ South Carolina ​បានសរសេរ​​បង្ហោះ​​នៅ​លើ​បណ្តាញសង្គម X ​របស់​លោក ដោយ​​ព្រមានថា ការប្រើប្រាស់យន្តហោះគ្មានមនុស្សបើក ប្រភេទ​ Shahed ផលិតដោយ​ប្រទេស​អ៊ីរ៉ង់ របស់រុស្ស៊ី នៅខាងក្នុងដែនអាកាសប៉ូឡូញ គឺជា «ទង្វើនៃសង្រ្គាម (act of war)»។

​លោក Joe Wilson បានសរសេរ​ថា៖«រុស្សីកំពុងវាយប្រហារប្រទេសប៉ូឡូញដែលជាសម្ព័ន្ធមិត្តណាតូជាមួយនឹងយន្តហោះគ្មានមនុស្សបើករបស់អ៊ីរ៉ង់តិចជាងមួយសប្តាហ៍បន្ទាប់ពីប្រធានាធិបតី ត្រាំ ធ្វើជាម្ចាស់ផ្ទះទទួលប្រធានាធិបតី​ប៉ូឡូញ​ លោក​​ Nawrocki នៅសេតវិមាន»​។

​នៅ​ក្នុងសារ​នោះ លោក Joe Wilson​ សរសេរ​បន្ត​ថា​៖«​​ខ្ញុំជំរុញឱ្យប្រធានាធិបតី ត្រាំ​ ឆ្លើយតបជាមួយនឹងទណ្ឌកម្មជាកាតព្វកិច្ចដែលនឹងធ្វើឱ្យម៉ាស៊ីនសង្រ្គាមរបស់រុស្ស៊ីក្ស័យធន និងផ្តល់អាវុធដល់អ៊ុយក្រែនជាមួយនឹងអាវុធដែលមានសមត្ថភាពវាយប្រហាររុស្ស៊ី»​។

ការអំពាវនាវរបស់តំណាងរាស្រ្ត​​រូប​នេះ​​ ហាក់​បាន​បង្ហាញ​យ៉ាងច្បាស់ណាស់ថា សហរដ្ឋអាមេរិកត្រូវតែបង្កើន​​​ការ​គាំទ្រ​ដល់​អ៊ុយក្រែន ដោយផ្តល់ឱ្យអ៊ុយក្រែននូវសព្វាវុធដែល​ពួក​គេ​ត្រូវការ ដោយ​​មិនត្រឹមតែដើម្បីការពារទីក្រុងរបស់អ៊ុយក្រែន​​ប៉ុណ្ណោះទេ ថែមទាំងវាយប្រហារគោលដៅយោធាដែលជ្រៅនៅក្នុងប្រទេសរុស្ស៊ី។

ប្រធានាធិបតី​​សហរដ្ឋអាមេរិក លោក ដូណាល់​ ត្រាំ បាន​បរាជ័យ​ក្នុងការ​​បញ្ចុះ​បញ្ចូល​​ប្រធានាធិបតីរុស្ស៊ី​​និង​អ៊ុយក្រែន​​ងាក​ទៅរក​ការ​បញ្ចប់សង្គ្រាម បើទោះបី​ជា​ លោក បាន​ជួប​សន្ទនា​តាមទូរស័ព្ទ​ជាមួយ​​​ប្រធានាធិបតី​រុស្ស៊ី​ លោក វ៉្លាឌីមៀរ ពូទីន និង ការ​ជួប​ផ្ទាល់​​នៅ​​រដ្ឋអាឡាស្កា​​កាលពីថ្ងៃទី​១៥​ខែសីហា​​។

​ក្រោយ​ជំនួបនោះ ភាគី​សហរដ្ឋអាមេរិក និង​ រុស្ស៊ី​ហាក់​បាន​​បង្ហាញ​សញ្ញា​វិជ្ជមានខ្លះ​ក្នុងការ​បន្តការចរចា ដែល​ភាគី​សហរដ្ឋអាមេរិក​អះអាងថា អាច​ធ្វើ​ឡើង​ក្នុងរង្វង់​២សប្តាហ៍​ក្នុងការ​ចរចា​ត្រីភាគី ដែល​មាន​ សហរដ្ឋអាមេរិក រុស្ស៊ី និង អ៊ុយក្រែន ប៉ុន្តែ​រហូតដល់​ពេលនេះ​​ គ្មាន​​ឡើយ​​ព័ត៌មាន​អំពី​​លទ្ធភាព​នៃ​«ការ​ចរចា​​ត្រីភាគី​។

ក្នុងរយៈពេលមួយឆ្នាំកន្លងមក កាំជ្រួច​ផ្លោង​ និងយន្តហោះគ្មានមនុស្សបើករបស់រុស្ស៊ី បានរំលោភលើដែនអាកាស​​របស់​​ប្រទេស​ជាសមាជិក​​អង្គការ​ណាតូម្តងហើយម្តងទៀត។ ប៉ុន្តែ​​រាល់ពេលដែលលោកខាងលិចបានឆ្លើយតប គឺ​បាន​ត្រឹមតែ​​​សម្តែងក្តី​ព្រួយបារម្ភ ការព្រមាន និងការជូនដំណឹងបណ្តោះអាសន្ន។

​បស្ចឹមលោក បានចាត់ទុក​​ទង្វើ​​​បង្ហោះ​ដ្រូន​ចូល​ដែន​អាកាស​នេះ​​ ជា​សញ្ញា​នៃ​ការ​បង្កហេតុ​របស់​ក្រុង​មូស្គូ​​ដោយ​ចេតនា​ពេញ​ទី​​ ហើយ​​វាគឺជាការសាកល្បង ដែលត្រូវបានរៀប​​ចំ​ឡើងដើម្បីរុញច្រានព្រំដែននៃអ្វីដែលណាតូនឹងអត់ធ្មត់​លែង​បាន​។

នៅពេលដែលយន្តហោះគ្មានមនុស្សបើកចូលទៅក្នុងដែន​អាកាស​​របស់ប៉ូឡូញ វាមិនមែនគ្រាន់តែជាអ៊ុយក្រែនដែលកំពុងរងការវាយប្រហារនោះទេ ប៉ុន្តែ​​វា​គឺជាអឺរ៉ុប​ និង​ជាអង្គការណាតូ ហើយ​វា​​ជាបញ្ជាសន្តិសុខ​អន្តរ​​​អាត្លង់ទិក៕​

​រ៉ាន់ រើយ​​

The post សមាជិក​សភា​អាមេរិក​​​ឲ្យ​​បញ្ចេញ​អាវុធ​​​ដល់​អ៊ុយក្រែន ក្រោយ​រុស្ស៊ី​បញ្ជាដ្រូន​​​ច្រើន​ចូលជ្រៅ​ក្នុង​ទឹកដី​ប៉ូឡូញ appeared first on Kampuchea Thmey Daily.

ក្រោយ​ជំនួប​​ចរចា​​លើក​ដំបូង​ដែល​ចំណាយ​ពេល​ជាង​៣ម៉ោង យោង​តាមការ​ចុះ​ផ្សាយ​របស់​​ទីភ្នាក់ងារ​ព័ត៌មាន​ TASS ​របស់​រុស្ស៊ី ​​​លោក ដូណាល់ ត្រាំ និង លោក​ ពូទីន បាន​ធ្វើ​សន្និសីទ​សារព័ត៌មានរួម​គ្នា ដើម្បី​ឆ្លើយ​តប​ទៅ​នឹង​ការ​សាកសួរ​របស់​អ្នកសារព័ត៌មាន។

នៅ​ចុង​បញ្ចប់​នៃ​សន្និសីទ​សារព័ត៌មាន​នោះ យោ​ងតាមការស្រង់សម្តី​របស់​បណ្តាញ​​សង្គមហ្វេសប៊ុក «​​Donald Trump For President​» លោក ដូណាល់ ត្រាំ ​បាន​លើក​ឡើង​​​ថា៖«​​លោក ប្រធានាធិបតី [​វ៉្លាឌីមៀរ ពូទីន] ខ្ញុំសូម​អរគុណ​​​អ្នកខ្លាំងណាស់ ហើយ យើង​នឹង​​និយាយទៅ​កាន់​​អ្នក​​ឆាប់ៗនេះ​ ហើយ​ប្រហែល​​​ជួបអ្នក​​ម្តងទៀត​ឆាប់ៗ»។

​ពេលនោះ ប្រធានាធិបតី​រុស្ស៊ី លោក វ៉្លាឌីមៀរ ពូទីន បាន​ឆ្លើយ​​តប​ភ្លាមៗថា៖«ពេល​ក្រោយ នៅទីក្រុងមូស្គូ»។

​លោក ត្រាំ​ ក៏បាន​តប​ទៅវិញ​ថា៖«​អូហ៍​​ នោះ​​​គួរ​ឲ្យចាប់អារម្មណ៍ណាស់។ ខ្ញុំ​​នឹង​​​ក្តៅ​បន្តិច​​​​នៅ​ទីនោះ ប៉ុន្តែ​ខ្ញុំ​​​​​​មើល​​ឃើញថា ​​វាអាច​កើត​ឡើង​។ សូម​អរគុ​ណ​​អ្នកខ្លាំងណាស់ លោក វ៉្លាឌីមៀរ ហើយ ​សូមអរគុណ​អ្នក​ទាំងអស់​គ្នា»។

​ជំនួប​​​​លើក​ដំបូង​​រវាង​​ប្រមុខ​ដឹកនាំ​​​ប្រទេស​មហាអំណាច​​នុយក្លេអ៊ែរ​ទាំងពីរ បាន​​បញ្ចប់ទៅ​ដោយ​គ្មាន​​​លទ្ធផល​នៃ​កិច្ច​ព្រមព្រៀង​ណាមួយ​ត្រូវ​បាន​ធ្វើ​ឡើង​ក្នុងពេលនេះ ​ដែល​ត្រូវ​បាន​គេ​​​រំពឹង​យ៉ាងទូលំទូលាយ​ឆ្ពោះ​ទៅរក​ការ​​បញ្ចប់​សង្គ្រាមនៅអ៊ុយក្រែន​​ដែល​អូសបន្លាយ​រយៈពេល​ជាង​​៣ឆ្នាំកន្លះ​នោះទេ៕​

រ៉ាន់ រើយ​

The post ជំនួប​ត្រាំ​និង​ពូទីនលើក​ក្រោយនឹង​ធ្វើនៅទីក្រុងមូស្គូ ប៉ុន្តែ​ត្រាំ​ត្អូញ​ថា​ «វា​ក្តៅបន្តិចសម្រាប់​លោក» appeared first on Kampuchea Thmey Daily.

​ជំនួប​កំពូល​​រវាង​​ប្រធានាធិបតី​​មហាអំណាច​នុយក្លេអ៊ែរ​ទាំងពីរ នឹង​ ត្រូវ​រៀប​ចំ​ឡើង​នៅ​ទីក្រុង​​ Anchorage រដ្ឋ Alaska​​ ស្ថិតនៅ​ក្រោម​​ដែន​អធិបតេយ្យ​​ភាព​របស់​សហរដ្ឋអាមេរិក ក្រោយ​ពី​ទិញ​ពីរុស្ស៊ី​​ក្នុងឆ្នាំ​​១៨៦៧​។

​សេចក្តី​រាយការណ៍​នេះ​ បាន​បញ្ជាក់​​ថា​ លោក​ ពូទីន បាន​​ចុះ​​​សំចត​​ នៅ​​​ទីក្រុង​​ Magadan​ ស្ថិត​នៅ​ភាគ​ខាង​កើត​ប្រទេស​រុស្ស៊ី ជា​ទី​​ជាកន្លែងដែលលោកនឹងទៅទស្សនារោងចក្រ Omega-Sea កន្លែងកីឡាប្រធានាធិបតី មជ្ឈមណ្ឌលសង្គម និងវប្បធម៌ Mayak Park ដាក់ផ្កានៅវិមានដល់អ្នកបើកយន្តហោះវីរភាព និងជួបជាមួយប្រធានតំបន់ លោក Sergey Nosov។

​យោ​ង​តាម​គេ​ហទំព័រ trip.com ចម្ងាយ​ផ្លូវ​​​ហោះហើរ​ពី​​ទីក្រុង ​​Magadan​ ទៅ​កាន់​ទីក្រុង​​ Anchorage មានរយៈចម្ងា​យ​​ ៣១៣៤​ គីឡូម៉ែត្រ។

​ជំនួប​​រវាង​ប្រធានាធិបតី​​​នៃ​ប្រទេស​ប្រទេសមហាអំណាច​នុយក្លេអ៊ែរ​ទាំងពីរ បាន​ធ្វើ​ឲ្យ​កក្រើក​​ក្នុងចំណោម​មេដឹកនាំ​ពិភពលោក ជាពិសេស​មេដឹកនាំ​អឺរ៉ុប អ៊ុយក្រែន និង​អ្នក​​មជ្ឈដ្ឋានអ្នក​តាម​ដាន​ព្រឹត្តិការណ៍អន្តរជាតិ អ្នក​ការទូត​​នៅ​ទូទាំងសកលលោក​។

យោង​សេចក្តីរាយការណ៍​របស់ TASS មុននេះ ជំនួយការប្រធានាធិបតីរុស្ស៊ី លោក Yury Ushakov បាននិយាយថា ប្រធានបទសំខាន់នៃកិច្ចចរចារវាងមេដឹកនាំរុស្ស៊ី និងសហរដ្ឋអាមេរិកនឹងជាដំណោះស្រាយនៅអ៊ុយក្រែន រួមទាំងការពិចារណាលើកិច្ចពិភាក្សាដែលបានធ្វើឡើងនៅវិមានក្រឹមឡាំងកាលពីថ្ងៃទី ​៦ខែសីហា ដោយមានការចូលរួមពីបេសកជនពិសេសអាមេរិក Steve Witkoff ។

កិច្ចការទូលំទូលាយសម្រាប់ការធានាសន្តិភាព និងសន្តិសុខ ក៏ដូចជាបញ្ហាអន្តរជាតិ និងតំបន់ដែលកំពុងពេញនិយមនាពេល​បច្ចុប្បន្ន និងជាបន្ទាន់ក៏នឹងត្រូវប៉ះផងដែរ។ តាមសេចក្តីរាយការណ៍ លោក​ ពូទីន​ និងប្រធានាធិបតីអាមេរិកត្រាំ​ ក៏នឹង​ពិភាក្សាអំពីកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរផងដែរ៕​

រ៉ាន់ រើយ​

The post ​ពូទីន​ ​ធ្វើដំណើរ​ដល់​ទីក្រុង​ Magadan នៅ​ជាង​៣០០០​គីឡូម៉ែត្រ​​ទៀត​ដល់​អាឡាស្កា​​ appeared first on Kampuchea Thmey Daily.

​ក្នុងអំឡុងពេលដំណើរទស្សនកិច្ចផ្លូវការរបស់ប្រធានាធិបតីឡាវ លោក ថងលូន ស៊ីស៊ូលីត​ ទៅកាន់​ទីក្រុង​មូស្គូ ​​​ភាគី​ឡាវ​​និងសមភាគី​រុស្ស៊ី បាន​ចុះ​កិច្ច​ព្រមព្រៀង​​ចំនួន​៧ ប៉ុន្តែ​​​កិច្ច​ព្រមព្រៀង​​សំខាន់​១​​ក្នុងចំណោមនោះ គឺជាផែនទីបង្ហាញផ្លូវសម្រាប់កិច្ចសហប្រតិបត្តិការក្នុងវិស័យនុយក្លេអ៊ែរ។

​​​​កិច្ច​ព្រម​ព្រៀង​នេះ​​ត្រូវ​បាន​ធ្វើ​ឡើង​​រវាង​ក្រុម​ហ៊ុន​សាជីវកម្មនុយក្លេអ៊ែររុស្ស៊ី Rosatom និងក្រសួងឧស្សាហកម្ម និងពាណិជ្ជកម្មឡាវ។ នេះ​​បើ​យោង​តាម​​​​ទីភ្នាក់់ងារ​ព័ត៌មានរុស្ស៊ី​ TASS​។

ប្រធានទីភ្នាក់ងាររដ្ឋសហព័ន្ធរុស្ស៊ីសម្រាប់សុខភាព និងសិទ្ធិអ្នកប្រើប្រាស់ ​លោកស្រី អាន់ណា ប៉ូប៉ូវ៉ា (Anna Popova) និងរដ្ឋមន្ត្រីការបរទេសឡាវ លោក ថងសាវ៉ាញ ភុមវិហាន (Thongsavanh Phomvihane) បានចុះហត្ថលេខាលើអនុស្សរណៈនៃកិច្ចសហប្រតិបត្តិការដើម្បីធានាសុខុមាលភាពអនាម័យ និងជំងឺរាតត្បាតរបស់ប្រជាជន។

​ប្រទេសឡាវ​និង​រុស្ស៊ី ​តាមរយៈ​ឯកសារ​ដែល​ទើប​ចុះ​ហត្ថលេខា​នេះ ក៏​នឹង​ផ្តល់សម្រាប់ការស្រាវជ្រាវរួមគ្នានៃជំងឺឆ្លង ការផ្តល់សម្ភារៈ និងជំនួយបច្ចេកទេសដល់ប្រទេសឡាវក្នុងការប្រយុទ្ធប្រឆាំងនឹងការឆ្លង ក៏ដូចជាការបណ្តុះបណ្តាលអ្នកឯកទេស និងការចូលរួមក្នុងព្រឹត្តិការណ៍អន្តរជាតិ។

​ប្រទេសឡាវ​​​ និង​ប្រទេស​មីយ៉ាន់​ម៉ា ​ពីតំបន់​នៅ​អាស៊ី​​អាគ្នេយ៍ដែលរដ្ឋបាល​របស់លោក ដូណាល់ ត្រាំ​ បាន​សម្រេចដាក់​ពន្ធ​ចំនួន​៤០​ភាគរយ​សម្រាប់​ការ​នាំចូលទៅ​ទីផ្សារ​សហរដ្ឋអាមេរិក។ ​ប្រទេសឡាវ​​ទើប​បង្កើន​ភាព​ជិតស្និទ្ធ​យ៉ាងខ្លាំង​ទៅកាន់​ទីក្រុង​មូស្គូ ខណៈប្រទេសមីយ៉ាន់ម៉ា​ដែល​ដឹកនាំ​ដោយ​របបយោធា​ បាន​ចង​សម្ព័ន្ធ​មិត្ត​យ៉ាង​ណែន​ជាមួយរដ្ឋាភិបាល​ទីក្រុងមូស្គូ​៕

រ៉ាន់ រើយ​

The post ឡាវ​​និង​រុស្ស៊ី​ ចុះ​កិច្ច​ព្រម​ព្រៀង​​​ថាមពល​នុយ​​ក្លេអ៊ែរ​ ខណៈអាមេរិក​ដាក់​ពន្ធ​ខ្ពស់​ appeared first on Kampuchea Thmey Daily.