នាឱកាសនោះ លោក យិត ចាន់ដារដ្ឋ អគ្គនាយករង នៃអាជ្ញាធរជាតិអប្សរា បានឲ្យដឹងថា វគ្គបណ្ដុះបណ្ដាលស្ដីពីអ្នកសារព័ត៌មានបេតិកភណ្ឌ នាពេលនេះ ក្នុងគោលបំណងចង់ផ្សារភ្ជាប់តួនាទីរបស់អ្នកសារព័ត៌មានឲ្យយល់ដឹងពីសម្បត្តិបេតិកភណ្ឌរបស់ដូនតាខ្មែរដ៏មានតម្លៃ ដែលមិនអាចកាត់ថ្លៃបាន ហើយជួយផ្សព្វផ្សាយ និង លើកតម្លៃបេតិកភណ្ឌជាតិ ឲ្យកាន់តែមានតម្លៃលេចធ្លោជាសកលថែមទៀត។

លោកបន្តថា បេតិកភណ្ឌរបស់ព្រះរាជាណាចក្រកម្ពុជា គឺជាដួងព្រលឹងរបស់ប្រទេស និង ជាតិសាសន៍របស់ខ្មែរ។ «អ្នកសារព័ត៌មាន មានសារៈសំខាន់ ប្រៀបបានទៅនឹងអ្នកការទូត ដែលអាចផ្សព្វផ្សាយពីតម្លៃ នៃសម្បត្តិបេតិកភណ្ឌរបស់ខ្មែរ ទៅកាន់ប្រទេសនានា ក្នុងពិភពលោក ឲ្យស្គាល់កម្ពុជាកាន់តែច្បាស់»។ នៅប្រទេសកម្ពុជា មានប្រាសាទ និង បុរាណដ្ឋាន ជាច្រើន ដែលនៅរាយប៉ាយស្ទើរតែគ្រប់ទីកន្លែងនៅទូទាំងប្រទេស ក៏ប៉ុន្តែរមណីយដ្ឋានអង្គរ គឺជាសម្បត្តិបេតិកភណ្ឌដ៏អស្ចារ្យជាងគេ ធ្វើឲ្យពិភពលោកទទួលស្គាល់។

លោកបន្តទៀតថា នៅក្នុងតំបន់អង្គរ មានសម្បត្តិបេតិកភណ្ឌដ៏មានតម្លៃ គឺបេតិកភណ្ឌវប្បធម៌ ដែលក្នុងនោះមានទាំងវប្បធម៌រូបី និង អរូបី ព្រមទាំងមានសម្បត្តិបេតិកភណ្ឌធម្មជាតិផងដែរ។

លោកបញ្ជាក់ថា នៅក្នុងរមណីយដ្ឋានអង្គរ ដែលបច្ចុប្បន្នមានផ្ទៃដី ចំនួន ៤០១ គីឡូម៉ែត្រក្រឡា គឺមានសម្បត្តិបេតិកភណ្ឌជាច្រើន ដោយរាប់ទាំងប្រាសាទបុរាណ ប្រឡាយទឹកបុរាណ ត្រពាំងបុរាណ និង ទីបុរាណដ្ឋានផង មានប្រមាណជា ១០១៨៨ កន្លែង។ ចំណែកនៅក្រៅតំបន់អង្គរ ក្នុងស្រុក-ក្រុង ចំនួន ១៣ វិញ គឺមានស្ថានីយបុរាណប្រមាណជាង ១២០០០ ស្ថានីយ ផ្សេងទៀត។ ចំនួនបុរាណដ្ឋាននេះ នៅមិនទាន់បូកបញ្ចូលជាមួយនឹងតំបន់ឧទ្យានជាតិភ្នំគូលែន ដែលមានប្រហែល ១០៦៦ ផងទេ។

កាលពីឆ្នាំ ១៩៩២ រមណីយដ្ឋានអង្គរ ត្រូវបានចុះទៅក្នុងបញ្ជីបេតិកភណ្ឌពិភពលោករបស់អង្គការ UNESCO។ កាលណោះ អង្គរ ត្រូវបានចុះទៅក្នុងបញ្ជីបេតិកភណ្ឌប្រឈមនឹងគ្រោះថ្នាក់នៅឡើយ។ ប៉ុន្តែដោយសារតែការបង្កើតស្ថាប័នអាជ្ញាធរជាតិអប្សរា ដើម្បីធ្វើការងារជួសជុល អភិរក្ស និង ថែរក្សា បង្កើតនាយកដ្ឋាននគរបាលការពារបេតិកភណ្ឌ ព្រមទាំងបង្កើតគណៈកម្មាធិការអន្តរជាតិ សម្របសម្រួលកិច្ចគាំពារ និង អភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC Angkor) ដើម្បីតាមដានពិនិត្យមើល និង ជួយសង្គ្រោះ ទើបនៅឆ្នាំ ២០០៤ ធ្វើឲ្យតំបន់រមណីយដ្ឋានអង្គរ ត្រូវដកចេញពីបញ្ជីគ្រោះថ្នាក់រហូតមកដល់បច្ចុប្បន្ន។

ក្នុងរយៈពេលជាង ៣០ ឆ្នាំ មកនេះ អាជ្ញាធរជាតិអប្សរា បានប្រឹងប្រែងយ៉ាងខ្លាំងលើការងារលើកតម្លៃបេតិកភណ្ឌក្នុងរមណីយដ្ឋានអង្គរ។ ការងារទាំងនោះមានទាំងការថែរក្សាប្រពៃណីវប្បធម៌ ទំនៀមទម្លាប់ ប្រពៃណីរបស់អ្នកស្រុកអង្គរ ការជួសជុលប្រាសាទបុរាណ ការថែរក្សាវត្តអារាមដែលមានអាយុកាលយូរឆ្នាំ ការស្ដារប្រព័ន្ធធារាសាស្រ្តបុរាណ មានប្រឡាយបុរាណ ទ្វារទឹកបុរាណ ដើម្បីជួយការពារប្រាសាទ ជួយរំដោះទឹកជំនន់កុំឲ្យលិចទីក្រុង ជួយនាំទឹកសម្រាប់ប្រព័ន្ធស្រោចស្រព ព្រមទាំងការនាំកូនឈើ ដើម្បីលើកសម្រស់ធម្មជាតិបៃតង និង ការលែងសត្វព្រៃនៅក្នុងឧទ្យានអង្គរ ដើម្បីបង្កើនឲ្យមានប្រព័ន្ធជីវចម្រុះកាន់តែសំបូរបែប រួមទាំងការងារជាច្រើនទៀត៕
អត្ថបទ ៖ គឿនវេត

The post អាជ្ញាធរជាតិអប្សរា បើកវគ្គបណ្ដុះបណ្ដាលស្ដីពីអ្នកសារព័ត៌មានបេតិកភណ្ឌ រយៈពេល ៣ ថ្ងៃ នៅខេត្តសៀមរាប appeared first on Kampuchea Thmey Daily.

ក្នុង​វគ្គ​បណ្តុះបណ្តាល​នោះ លោកដុកទ័រ Hendri Bustaman សាស្ត្រាចារ្យបណ្ឌិត នៅមហាវិទ្យាល័យកសិកម្ម នៃសាកលវិទ្យាល័យ Bengkulu មកពីប្រទេសឥណ្ឌូនេស៊ី ត្រូវ​បាន​សាកលវិទ្យាល័យក្រចេះ ​អញ្ជើញជាវាក្មិន ក្នុង​ពិធី​បើកវគ្គបណ្តុះបណ្តាល ស្តីពី “ការកែច្នៃផលិតផលចំណីអាហារក្នុងស្រុក” ។

វគ្គបណ្តុះបណ្តាលខាងលើនេះ រៀបចំឡើងដោយសាកលវិទ្យាល័យក្រចេះ ដែលមានរយៈពេល ២ ថ្ងៃ គឺថ្ងៃទី១២-១៣ ខែមីនា ឆ្នាំ២០២៦។

វគ្គបណ្តុះបណ្តាលនេះ មានគោលបំណងសំខាន់ គឺដើម្បីចូលរួមអភិវឌ្ឍសមត្ថភាពបុគ្គលិកអប់រំ មន្ត្រី សិស្ស និស្សិត នៅក្នុងសាកលវិទ្យាល័យក្រចេះ សិស្សានុសិស្សមកពីវិទ្យាល័យទាំង ៣ នៅក្នុងក្រុងក្រចេះ ក៏ដូច​ជា​ប្រជាកសិករ និងអាជាធរពាក់ព័ន្ធ ទៅលើបច្ចេកទេសក្នុងការកែច្នៃ ការផលិត និងការវេចខ្ចប់​នូវ​កសិផល​ក្នុងស្រុក ដើម្បីកែច្នៃឱ្យចេញទៅជាផលិតផលសម្រេច។

ក្នុងនោះមាន -ការផលិតទឹកម្ទេស, ទឹកប៉េងប៉ោះ, ទឹកសណ្ដែក, ទឹកគ្រាប់ស្វាយចន្ទី, នំ Cookies, តៅហ៊ូ, នំផ្អែមពីល្ពៅ, តំណាប់ក្រូចថ្លុង, និងទឹកក្រូចថ្លុង ជាដើម។

វគ្គបណ្តុះបណ្តាលនាពេលនេះ គឺជាឱកាសមួយសម្រាប់ទាំងអស់គ្នា ក្នុងការកែច្នៃ និងអភិវឌ្ឍន៍​ផលិត​ផល​ក្នុង​ស្រុក កាត់​បន្ថយ​ការ​នាំចូល និង​ប្រើប្រាស់របស់ខាងក្រៅ ស្របទៅនឹងបរិបទពហិការរបស់ប្រទសជាតិ និងប្រជាជន៕

អត្ថបទ៖ ប្រុញ វិធិន

The post សាកលវិទ្យាល័យក្រចេះ បើកវគ្គបណ្តុះបណ្តាល ស្តីពី“ការកែច្នៃផលិតផលចំណីអាហារក្នុងស្រុក”កាត់បន្ថយការនាំចូល និងប្រើប្រាស់ពីខាងក្រៅ appeared first on Kampuchea Thmey Daily.

វគ្គបណ្តុះបណ្តាលភាពយន្តខ្លីកម្ពុជា បង្កើតឡើងក្រោមគំនិតផ្តួចផ្តើមដោយក្រសួងវប្បធម៌ និងវិចិត្រសិល្បៈដែលមានគោលបំណងចូលរួមចំណែកក្នុងការធ្វើឱ្យប្រសើរឡើងនូវវិស័យឧស្សាហកម្មភាពយន្តកម្ពុជា ដោយធ្វើការកសាងសមត្ថភាព ពង្រឹងជំនាញ និងបង្កើតឱកាសសម្រាប់យុវជនដែលស្រលាញ់វិស័យភាពយន្ត។ វគ្គបណ្តុះបណ្តាលនេះ ផ្តោតសំខាន់លើ ការសរសេរអត្ថបទភាពយន្ត (Scipt), ការដឹកនាំរឿង (Directing), ការរៀបចំប្លង់ថត (Cinematography) ព្រមទាំងជំនាញមួយចំនួនទៀតដូចជា ការតុបតែងលើឆាក (Arts and Pop), ការដំឡើង និងកែពណ៌រូបភាព (Editing/ Color grading) និងការផ្គុំសម្លេង (Sound mixing)។

បើកទទួលពាក្យចូលរៀន ចាប់ពី ថ្ងៃទី១-២០ ខែមិថុនា ឆ្នាំ ២០២៥ និងបិទទទួលពាក្យចូលរៀន ម៉ោង ៥ល្ងាច ថ្ងៃទី២០ ខែមិថុនា ឆ្នាំ ២០២៥។ ប្រកាសលទ្ធផលបេក្ខជនដែលជាប់ជាស្ថាប នៅថ្ងៃទី៣០ ខែមិថុនា ឆ្នាំ២០២៥ និងចាប់ផ្តើមចូលរៀនពីថ្ងៃទី៥ ខែកក្កដា ឆ្នាំ២០២៥។

ចំពោះលក្ខខណ្ឌនៃការចូលរួម សញ្ជាតិខ្មែរ មានអាយុចាប់ពី ២០ឆ្នាំ ដល់ ៣៥ឆ្នាំ, មានបទពិសោធន៍ខ្លះ ឬមានចំណេះដឹងមូលដ្ឋានក្នុងវិស័យភាពយន្ត ឬប្រពន្ឋ័ផ្សព្វផ្សាយ៕

The post ក្រសួងវប្បធម៌ ចាប់ផ្តើមទទួលពាក្យចូលរៀនវគ្គបណ្ដុះបណ្ដាលភាពយន្តខ្លីកម្ពុជា ២០២៥ appeared first on Kampuchea Thmey Daily.

ការ​សង្ឃឹម​នេះ ក្នុង​ឱកាស លោក​បណ្ឌិត ហ៊ឺ វីរៈ បាន​អញ្ជើញ​ជា​អធិបតីភាព​ក្នុង​ពិធី​បិទ​វគ្គ​បណ្ដុះ​បណ្ដាល​លើ​ជំនាញ​ពិធី​ករ​-​ពិធី​ការិនី ជូន​ដល់​យុវជន យុវនារី និង​មន្ត្រីរាជការ​ចំណុះ​អង្គភាព​រដ្ឋបាល​ស្រុក​កំពង់ត្រឡាច ខេត្ត​កំពង់ឆ្នាំង កាលពី​ថ្ងៃ​ទី ១៥ ខែ​កុម្ភៈ ឆ្នាំ ២០២៥ ម្សិលមិញ។

នា​ឱកាស​នោះ​ដែរ លោក​បណ្ឌិត ហ៊ឺ វីរៈ មាន​ប្រសាសន៍​ថា សក្ដានុពល នៃ​មន្ត្រី​វ័យក្មេង​ក្នុង​ពេល​បច្ចុប្បន្ន​នេះ ត្រូវ​តែ​ជា​មន្ត្រី​ដែល​រឹងមាំ​លើ​ចំណេះដឹង តាមរយៈ​ការ​ទទួល​បាន​វគ្គ​បណ្ដុះបណ្ដាល​ថ្មីៗ ឲ្យ​ស្រប​ទៅ​តាម​តម្រូវការ​ការងារ​នា​ពេល​បច្ចុប្បន្ន។

លោក​បណ្ឌិត ហ៊ឺ វីរៈ សង្ឃឹម​ថា «វគ្គ​បណ្ដុះបណ្ដាល​ជំនាញ​ពិធី​ករ​-​ពិធី​ការិនី​នេះ ក្រៅពី​ពង្រឹង​លើ​សមត្ថភាព​ជា​ពិធី​ករ​-​ពិធី​ការិនី ប៉ុន្តែ​វគ្គ​នេះ នឹង​ពង្រឹង​បន្ថែម​ទៀត​ដល់​ទេពកោសល្យ​របស់​មន្ត្រី​លើ​ការ​សរសេរ​ព័ត៌មាន ការ​សរសេរ​ដំណឹង​ក្ដៅ ការ​សរសេរ និង​ផលិត​បទ​យកការណ៍ បទ​អត្ថាធិប្បាយ និង​ការ​និយាយ​ជា​សាធារណៈ​លើ​វេទិកា ការ​ធ្វើ​បទ​បង្ហាញ ឬ អង្គប្រជុំ​ផ្សេងៗ ប្រកបដោយ​ទំនុក​ចិត្ត និង​ក្រមសីលធម៌​វិជ្ជាជីវៈ​ខ្ពស់ ដើម្បី​ឆ្លើយតប​នឹង​ភាព​ជឿនលឿន នៃ​បច្ចេកវិទ្យា​សម័យ​ទំនើប នៃ​យុគសម័យ​បច្ចេកវិទ្យា ដែល​កំពុង​ដំណើរការ​ជុំវិញ​ពិភពលោក»។

លោក​បណ្ឌិត បន្ត​ថា វគ្គ​បណ្ដុះបណ្ដាល​ជំនាញ​ពិធី​ករ​-​ពិធី​ការិនី​នេះ នឹង​ជា​ចំណេះដឹង​ដ៏​មាន​សារៈសំខាន់​សម្រាប់​ការ​អភិវឌ្ឍ​សមត្ថភាព​របស់​សិក្ខាកាម​ទាំងអស់​ដែល​បាន​ចូលរួម​ឲ្យ​មាន​ភាព​រលូន ប្រសិទ្ធភាព និង​ភាព​ទាក់ទាញ ព្រមទាំង​គោរព​តាម​បទដ្ឋាន​ពិធីការ និង​អាច​ប្រើប្រាស់​ជំនាញ​ដែល​ទទួល​បាន​ក្នុង​វគ្គ​បណ្ដុះបណ្ដាល​នេះ ដើម្បី​ទុក​ជា​ដើមទុន​យក​ទៅ​ប្រើប្រាស់​ក្នុង​ការ​អភិវឌ្ឍ​សមត្ថភាព​របស់​ខ្លួន​ជាមួយ​នឹង​ជំនាញ​មួយ​នេះ​សម្រាប់​កម្មវិធី​ផ្លូវការ​នានា​ឲ្យ​មាន​ប្រសិទ្ធភាព​ខ្ពស់។

គួរ​ជម្រាប​ថា គោលបំណង​រួម នៃ​ការ​បង្កើត​ឲ្យ​មាន​វគ្គ​បណ្ដុះបណ្ដាល​នេះ ដើម្បី​អភិវឌ្ឍន៍​លើ​ចំណេះដឹង និង​ជំនាញ​បន្ថែម​ដល់​សិក្ខាកាម​មាន​មូលដ្ឋាន​ជា​ពិធី​ករ​-​ពិធី​ការិនី និង​ជា​មូលដ្ឋាន​គ្រឹះ​ដល់​សិក្ខាកាម​ថ្មីៗ ដែល​មាន​បំណង​ចង់​ចេះ និង​ចង់​ចាប់​យក​ជំនាញ​ធ្វើ​ជា​ពិធី​ករ​-​ពិធី​ការិនី សម្រាប់​កម្មវិធី​ផ្លូវការ​នានា។ ជាពិសេស ដើម្បី​ឆ្លើយតប​ទៅ​នឹង​ភាព​កង្វះខាត​អ្នក​កាន់​កម្មវិធី​ផ្សេងៗ ដូចជា កម្មវិធី​ថ្នាក់ក្រោម​ជាតិ ថ្នាក់​ស្រុក ថ្នាក់​ឃុំ ថ្នាក់​ភូមិ វេទិកា​សាធារណៈ កម្មវិធី​នៅ​តាម​សាលារៀន និង​កម្មវិធី​ការ​ប្រគំ​តន្ត្រី​នានា ដែល​ពិបាក​រក​អ្នក​កាន់​កម្មវិធី។

សូម​បញ្ជាក់​ថា វគ្គ​បណ្ដុះបណ្ដាល​នេះ ក៏​មាន​ការ​អញ្ជើញ​បើក​ក្រោម​អធិបតីភាព លោក សុះ ស៊ុប​អ៊ី អនុរដ្ឋលេខាធិការ​ក្រសួង​វប្បធម៌ និង​វិចិត្រ​សិល្បៈ​ផង​ដែរ។ វគ្គ​បណ្ដុះបណ្ដាល​នេះ រៀបចំ​ឡើង​ក្រោម​ការ​ផ្ដួចផ្ដើម​ដោយ លោក​បណ្ឌិត ហ៊ឺ វីរៈ ដោយ​កិច្ច​សហការ​ជាមួយ​នឹង​មន្ទីរ​វប្បធម៌ និង​វិចិត្រ​សិល្បៈ​ខេត្ត​កំពង់ឆ្នាំង និង​រដ្ឋបាល​ស្រុក​កំពង់ត្រឡាច ព្រមទាំង​មាន​ការ​អញ្ជើញ​ចូលរួម​ពី​វាគ្មិន​ជំនាញៗ ដែល​មាន​បទ​ពិសោធ​ជា​ច្រើន​ឆ្នាំ​មកពី​ក្រសួង​វប្បធម៌ និង​វិចិត្រ​សិល្បៈ​ផង​ដែរ។ នៅ​ក្នុង​វគ្គ​បណ្ដុះបណ្ដាល​នេះ មាន​សិក្ខាកាម​ចូលរួម​ចំនួន ១៥០ នាក់ មាន​រយៈពេល​ចំនួន ១ ថ្ងៃ៕

អត្ថបទ ៖ ពិសី

The post លោកបណ្ឌិត ហ៊ឺ វីរៈ សង្ឃឹមថា វគ្គបណ្ដុះបណ្ដាលជំនាញពិធីករ-ពិធីការិនី នឹងពង្រឹងទេពកោសល្យមន្ត្រីលើការសរសេរព័ត៌មានប្រកបដោយវិជ្ជាជីវៈខ្ពស់ appeared first on Kampuchea Thmey Daily.

ការ​ស្នើសុំ​នេះ ក្នុង​ឱកាស លោក​បណ្ឌិត ហ៊ឺ វីរៈ អ្នក​តំណាងរាស្ត្រ​មណ្ឌល​ខេត្ត​កំពង់ឆ្នាំង បាន​អញ្ជើញ​ជា​អធិបតីភាព​ក្នុង​កម្មវិធី​សិក្ខា​សាលា​វង់ភ្លេង​ពិណពាទ្យ ក្រោម​ប្រធានបទ «​តួនាទី​របស់​វង់ភ្លេង​ពិណពាទ្យ​» ដែល​រៀបចំ​ឡើង​ដោយ​មន្ទីរ​វប្បធម៌ និង​វិចិត្រ​សិល្បៈ​ខេត្ត​កំពង់ឆ្នាំង រួម​សហការ​ជាមួយ​រដ្ឋបាល​ស្រុក​កំពង់ត្រឡាច និង​នាយកដ្ឋាន​សិល្បៈ​ទស្សនីយភាព នៃ​ក្រសួង​វប្បធម៌ និង​វិចិត្រ​សិល្បៈ ជា​លើក​ដំបូង នៅ​ស្រុក​កំពង់ត្រឡាច ខេត្ត​កំពង់ឆ្នាំង កាលពី​ថ្ងៃ​ទី ១៨ ខែ​មករា ឆ្នាំ ២០២៥ ម្សិលមិញ។

សិក្ខាសាលា​រយៈពេល ១ ថ្ងៃ ពេញ​នេះ សិក្ខាកាម​ភាគច្រើន នៅ​មិន​ទាន់​យល់​ពី​បទ​ភ្លេងពិណពាទ្យ ដូចជា បទ​ភ្លេង​ហោមរោង​ធំ ចំនួន ៣៣ បទ , បទ​ភ្លេង​ហោមរោង​តូច ១២ បទ និង​ទម្រង់​លេង​ដោយ​កាន់​ឧបករណ៍​ឌុប​(​អាច​មកពី​កាត់បន្ថយ​មនុស្ស​តម្រូវ​តាម​អ្នក​ជួល ឬក៏​អាច​ខ្វះ​មនុស្ស​) នាំ​ឲ្យ​ប្រឈម​ដល់​ការ​បាត់បង់​តួនាទី​របស់​ឧបករណ៍​ស្គរ​សំភោរ ព្រមទាំង​ការ​ពុំបាន​ស្វែងយល់​ពី​ទម្រង់​ភ្លេង​មួយ​នេះ ដែល​ជា​ទម្រង់​ភ្លេង​បែប​សក្ការ ធ្វើ​ឲ្យ តន្ត្រីករ នៃ​វង់ភ្លេង​ពិណពាទ្យ​ភាគច្រើន បែរ​ទៅ​ជា​ប្រគំ​បទ​សម័យ​ទំនើប បាត់បង់​តម្លៃ​ភាព​អស្ចារ្យ នៃ​ទម្រង់​ភ្លេង​មាន​ប្រភព​ចេញ​មកពី​ព្រះបរមរាជវាំង។

ជាមួយ​នេះ ក្រោយពី​ទទួល​បាន​វិញ្ញាបនបត្រ​បញ្ជក់​ពី​ការ​ចូលរួម សិក្ខាកាម ក៏​បាន​លើក​ជា​សំណូម​ពរ​ឲ្យ​ភាគី​ដែល​ពាក់ព័ន្ធ បន្ត​រៀបចំ​ជា​វគ្គ​បណ្ដុះបណ្ដាល​ឲ្យ​បាន​ញឹកញាប់ ដើម្បី​ឲ្យ​តន្ត្រីករ នៃ​វង់ភ្លេង​ពិណពាទ្យ​នៅ​ទូទាំង​ខេត្ត​កំពង់ឆ្នាំង បាន​សិក្សា​ឈ្វេងយល់​កាន់តែ​ច្បាស់ ដោយ​រួម​ចំណែក​រក្សា​បាន​នូវ​ទម្រង់​បទ​ភ្លេង​អត្តសញ្ញាណ​ជាតិ និង​ជួយ​លើកស្ទួយ​កម្រិតជីវភាព​តាមរយៈ​ជំនាញ​ដូនតា​មួយ​ប្រភេទ​នេះ​ផង។

គួរ​ជម្រាប​ថា សិក្ខាសាលា​ខាង​លើ​នេះ មាន​គោលបំណង​ថែរក្សា លើកស្ទួយ និង​ផ្សព្វផ្សាយ ក៏​ដូចជា​តម្រង់​ទិស​ដល់​សិល្បករ​ចាប់​យក​អាជីព​ជា​តន្ត្រីករ​វង់ភ្លេង​ពិណពាទ្យ ក្នុង​ស្រុក​កំពង់ត្រឡាច ខេត្ត​កំពង់ឆ្នាំង យល់​ដឹង​កាន់តែ​ច្បាស់​អំពី​ការ​សម្ដែង​ភ្លេងពិណពាទ្យ​ឲ្យ​បាន​ត្រឹមត្រូវ តាម​ទំនៀម​ទម្លាប់ និង​ក្បួនច្បាប់​ពី​បុរាណ​របស់​ខ្មែរ។

សិក្ខាសាលា​នេះ មាន​សិក្ខាកាម​ជា តន្ត្រីករ ចាស់ ក្មេង ចូលរួម​ចំនួន ៦ វង់ មកពី​ស្រុក​កំពង់ត្រឡាច ចំនួន ៥ វង់ និង​ស្រុក​សាមគ្គី​មានជ័យ ចំនួន ១ វង់ ដែល​មាន​គ្នា​សរុប​ប្រមាណ ៦០ នាក់៕

The post សិក្ខាកាម ស្នើភាគីពាក់ព័ន្ធ បន្តរៀបចំវគ្គបណ្ដុះបណ្ដាលដល់តន្ត្រីករវង់ភ្លេងពិណពាទ្យ នៅកំពង់ឆ្នាំង ដើម្បីរក្សាទម្រង់បទភ្លេងអត្តសញ្ញាណជាតិ appeared first on Kampuchea Thmey Daily.

ការ​គូស​បញ្ជាក់​នេះ ក្នុង​ឱកាស ឯកឧត្ដម ហ៊ុន ម៉ានី បាន​អញ្ជើញ​ជា​អធិបតី​ក្នុង​ពិធី​បើក​វគ្គ​បណ្ដុះបណ្ដាល​ស្ដីពី​ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង-ស្ថាប័ន និងការ​ធ្វើ​បច្ចុប្បន្នភាពរចនាសម្ព័ន្ធ​ ទិន្នន័យ​មន្ត្រីរាជការ​ស៊ីវិល​ក្រសួង-ស្ថាប័ន កាលពី​ព្រឹក​ថ្ងៃ​ទី ០៤ ខែ​មិថុនា ឆ្នាំ ២០២៤ នា​សណ្ឋាគារ​ភ្នំពេញ។

ឯកឧត្ដម ហ៊ុន ម៉ានី មាន​ប្រសាសន៍​បន្ត​ថា នៅ​ក្នុង​កិច្ចប្រជុំ​លើក​ទី ១ របស់​គណៈកម្មាធិការ​ជាតិ​ជំរុញ​ការ​អនុវត្ត​វិធានការ​គន្លឹះ​ក្នុង​ការ​កែទម្រង់​រដ្ឋបាល​សាធារណៈ (​គ​.​វ​.​រ) រាជរដ្ឋាភិបាល បាន​សម្រេច​បន្ត​ការងារ​កែទម្រង់​រដ្ឋបាល​សាធារណៈ ដោយ​បាន​ដាក់​ចេញ​នូវ​វិធានការ​គន្លឹះ​ក្នុង​ការ​កែទម្រង់​រដ្ឋបាល​សាធារណៈ​ចំនួន ៣ រួមមាន ៖ (១) ការ​ដាក់​ឲ្យ​អនុវត្ត​ប្រព័ន្ធ​ជ្រើសរើស​មន្ត្រី​ស៊ីវិល (២) ការ​ពង្រឹង​សមត្ថភាព និង​សមិទ្ធកម្ម​ស្ថាប័ន ដើម្បី​លើក​កម្ពស់​គុណភាព​ការងារ និង (៣) ការ​ដាក់​ឲ្យ​អនុវត្ត​ប្រព័ន្ធ​លើក​ទឹកចិត្ត​គាំទ្រ​សមិទ្ធកម្ម ក្នុង​រដ្ឋបាល​សាធារណៈ។

ឯកឧត្ដម ហ៊ុន ម៉ានី គូស​បញ្ជាក់​បន្ថែម​ថា បន្ថែម​លើ​នេះ ក្នុង​នាម​លេខាធិការដ្ឋាន គ​.​វ​.​រ ក្រសួង​មុខងារ​សាធារណៈ ត្រូវ​សម្របសម្រួល​ការ​អនុវត្ត​ឲ្យ​បាន​ចប់​សព្វគ្រប់​នូវ​ការ​ពិនិត្យ​ឡើង​វិញ​រចនាសម្ព័ន្ធ និង​ការ​វិភាគ​មុខងារ​របស់​ក្រសួង​-​ស្ថាប័ន និង​រដ្ឋបាល​ថ្នាក់ក្រោម​ជាតិ ត្រឹម​ត្រីមាស​ទី ៣ ឆ្នាំ ២០២៤។ ក្នុង​ករណី ក្រសួង​-​ស្ថាប័ន និង​រដ្ឋបាល​ថ្នាក់​ក្រោម​ជាតិ ដែល​មិន​បាន​អនុវត្ត​ការ​ពិនិត្យ​ឡើង​វិញ​រចនាសម្ព័ន្ធ និង​ការ​វិភាគ​មុខងារ មិន​ត្រូវ​បាន​អនុញ្ញាត​ឲ្យ​ជ្រើសរើស​មន្ត្រីរាជការ​ស៊ីវិល​ឡើយ។

ឯកឧត្ដម​ឧបនាយករដ្ឋមន្ត្រី បន្ត​ថា ជា​លទ្ធផល​សម្រាប់​ការ​កែលម្អ​ប្រព័ន្ធ​ជ្រើសរើស​មន្ត្រី​ចូល​បម្រើ​ការងារ​ក្នុង​រដ្ឋបាល​សាធារណៈ ក្រសួង​មុខងារ​សាធារណៈ បាន​រៀបចំ​និយាម​ស្ដីពី​នីតិវិធី​ប្រតិបត្តិ​សម្រាប់​ការ​ប្រឡងប្រជែង​ជ្រើសរើស​មន្ត្រីរាជការ​ស៊ីវិល ដែល​ត្រូវ​បាន​ដាក់​ឲ្យ​អនុវត្ត​តាមរយៈ​អនុក្រឹត្យ។ ក្រសួង បាន​ដឹកនាំ​រៀបចំ​ការ​ប្រឡងប្រជែង​ជ្រើសរើស​មន្ត្រីរាជការ​ស៊ីវិល ចំនួន ៦ លើក ដោយ​បាន​ជ្រើសរើស​បេក្ខជន​សរុប​ចំនួន ៩៧៥ នាក់ និង​កំពុង​ដំណើរការ​ជ្រើសរើស​ជា​បន្តបន្ទាប់។

ឯកឧត្ដម​ឧបនាយករដ្ឋមន្ត្រី បន្ថែម​ថា ថ្ងៃនេះ វគ្គ​បណ្ដុះបណ្ដាល​ស្ដីពី​ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង​-​ស្ថាប័ន និង​ការ​ធ្វើ​បច្ចុប្បន្នភាព​រចនាសម្ព័ន្ធ ទិន្នន័យ​មន្ត្រីរាជការ​ស៊ីវិល​ក្រសួង​-​ស្ថាប័ន ជា​ជំហាន​មួយទៀត​ក្នុង​ការ​សម្រេច​ឲ្យ​បាន​នូវ​ការងារ​កែទម្រង់​រដ្ឋបាល​សាធារណៈ។ ការ​រៀបចំ​វគ្គ​បណ្ដុះបណ្ដាល​នេះ ដើម្បី​គាំទ្រ​ដល់​ក្រសួង​-​ស្ថាប័ន នៅ​ក្នុង​ដំណើរការ នៃ​ការ​ពិនិត្យ​ឡើង​វិញ ការ​វិភាគ​មុខងារ និង​រចនាសម្ព័ន្ធ​ក្រសួង​-​ស្ថាប័ន ក៏ដូចជា​ការ​ធ្វើ​បច្ចុប្បន្នភាព​រចនាសម្ព័ន្ធ និង​ទិន្នន័យ​ក្រសួង​-​ស្ថាប័ន ឲ្យ​ប្រព្រឹត្ត​ទៅ​ដោយ​រលូន​ទាន់​ពេលវេលា ប្រសិទ្ធភាព និង​សម្រេច​លទ្ធផល​តាម​ការ​រំពឹង​ទុក នៅ​ត្រឹម​ឆមាស​ទី ១ ឆ្នាំ ២០២៤។

គួរ​ជម្រាប​ថា ពិធី​បើក​វគ្គ​បណ្ដុះបណ្ដាល​ស្ដីពី​ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង-ស្ថាប័ន និង​ការធ្វើ​បច្ចុប្បន្នភាពរចនាសម្ព័ន្ធ​ ​ទិន្នន័យ​មន្ត្រីរាជការ​ស៊ីវិល​ក្រសួង-ស្ថាប័ន នា​ព្រឹក​មិញ​នេះ ក៏​មាន​ការ​អញ្ជើញ​ចូលរួម​ពី​ថ្នាក់ដឹកនាំ​ដែល​ជា​ប្រធាន អនុប្រធាន និង​សមាជិក-សមាជិកា នៃ​ក្រុម​ការងារ​កំណែ​ទម្រង់​រដ្ឋបាល​សាធារណៈ តំណាង​ក្រសួង-ស្ថាប័ន​ទាំងអស់ ព្រមទាំង​ថ្នាក់​ដឹកនាំ និង​មន្ត្រី​ជំនាញ​ពាក់ព័ន្ធ​ក្នុង​ការងារ​កែទម្រង់​រដ្ឋបាល​សាធារណៈ​ជា​ច្រើន​រូប​ផង​ដែរ៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ ក្រសួង-ស្ថាប័ន និងរដ្ឋបាលថ្នាក់ក្រោមជាតិ អត់ពិនិត្យឡើងវិញរចនាសម្ព័ន្ធ និងវិភាគមុខងារ មិនអនុញ្ញាតឲ្យជ្រើសរើសមន្ត្រីរាជការស៊ីវិលឡើយ appeared first on Kampuchea Thmey Daily.

ការ​ផ្ដល់​អនុសាសន៍​ចំនួន ៦ ចំណុច នេះ ក្នុង​ឱកាស ឯកឧត្ដម ហ៊ុន ម៉ានី បាន​អញ្ជើញ​ជា​អធិបតី​ក្នុង​ពិធី​បើក​វគ្គ​បណ្ដុះបណ្ដាល​ស្ដីពី​ការ​ពិនិត្យ​ឡើងវិញ និង​ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ធ្វើ​បច្ចុប្បន្នភាព​ទិន្នន័យ​មន្ត្រីរាជការ​ស៊ីវិល​ក្រសួង ស្ថាប័ន នៅ​ព្រឹក​ថ្ងៃ​ទី ០៤ ខែ​មិថុនា ឆ្នាំ ២០២៤ នា​សណ្ឋាគារ​ភ្នំពេញ។

នា​ឱកាស​នោះ​ដែរ ឯកឧត្ដម ហ៊ុន ម៉ានី បាន​លើក​ឡើង​អំពី​សារៈសំខាន់ នៃ​ការ​វិភាគ​មុខងារ និង​ភាព​សំខាន់ នៃ​ក្រសួង​មុខងារ​សាធារណៈ ក្នុង​ការ​ដឹកនាំ​ការងារ​វិភាគ​មុខងារ ពិសេស​សម្រេច​ឲ្យ​បាន​នូវ​ចក្ខុវិស័យ សម្ដេច​ធិបតី ក្នុង​រាជរដ្ឋាភិបាល នីតិកាល​ទី ៧ នៃ​រដ្ឋសភា។

ជាមួយ​នេះ ឯកឧត្ដម ហ៊ុន ម៉ានី បាន​ផ្តល់​នូវ​អនុសាសន៍​ចំនួន ៦ ចំណុច ជូន​ទៅ​ដល់​អង្គ​សិក្ខាកាម​ដែល​បាន​ចូលរួម​ក្នុង​វគ្គ​បណ្ដុះបណ្ដាល​រួមមាន ៖ ទី១.ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន ត្រូវ​អនុវត្ត​ដោយ​ឈរ​លើ​អភិក្រម ផ្តោត​លើ​ការ​រៀបចំ​ផ្ទះ​របស់​ខ្លួន ដោយ​ត្រូវ​ពង្រឹង​រចនាសម្ព័ន្ធ ជាជាង​ការ​ពង្រីក​រចនាសម្ព័ន្ធ ស្រប​តាម​អនុសាសន៍​របស់ សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា។ ទី២.ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ការ​ធ្វើ​បច្ចុប្បន្នភាព​រចនាសម្ព័ន្ធ ទិន្នន័យ​មន្ត្រីរាជការ​ស៊ីវិល​ក្រសួង ស្ថាប័ន ត្រូវ​ឈរ​លើ​ភាព​ជា​ម្ចាស់ ការ​ទទួល​ខុសត្រូវ​តាម​បន្ទាត់ គណនេយ្យ​ភាព និង​ការ​រក្សា​ផលប្រយោជន៍​របស់​មន្ត្រី។ ទី៣.ការ​វិភាគ​មុខងារ និង​រចនាសម្ព័ន្ធ​ឲ្យ​បាន​ច្បាស់លាស់​របស់​ក្រសួង ស្ថាប័ន ត្រូវ​គិតគូរ​ដល់​ប្រសិទ្ធភាព និង​សមិទ្ធកម្ម​ការងារ តាមរយៈ​ការ​ប្រើប្រាស់​ធនធាន​ថវិកា ធនធាន​មនុស្ស​ឲ្យ​កាន់​តែ​មាន​ប្រសិទ្ធភាព ចំ​គោលដៅ ចំ​ទីកន្លែង ស្រប​តាម​តួនាទី​ភារកិច្ច​របស់​ក្រសួង ស្ថាប័ន​នីមួយៗ។ ទី៤.ក្រសួង ស្ថាប័ន ត្រូវ​រៀបចំ​ធ្វើការ​ពិនិត្យ​ឡើង​វិញ វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ការ​ធ្វើ​បច្ចុប្បន្នភាព​រចនាសម្ព័ន្ធ ទិន្នន័យ​មន្ត្រី រាជការ​ស៊ីវិល ដើម្បី​ឆ្លើយតប​ឲ្យ​ទាន់​ពេលវេលា​ដែល​បាន​កំណត់។ ទី៥.ក្រសួង​មុខងារ​សាធារណៈ បាន​រៀបចំ​ក្រុម​ការងារ​បច្ចេកទេស​គាំទ្រ​តាម​វិស័យ ដើម្បី​សម្របសម្រួល និង​ផ្តល់​ការ​គាំទ្រ​ផ្នែក​បច្ចេកទេស​ក្នុង​ការ​អនុវត្ត​ការ​ពិនិត្យ​ឡើងវិញ ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ការ​ធ្វើ​បច្ចុប្បន្នភាព​រចនាសម្ព័ន្ធ ទិន្នន័យ​មន្ត្រីរាជការ​ស៊ីវិល​ក្រសួង ស្ថាប័ន ដែល​ក្រុមការងារ​នេះ នឹង​ជួយ​គាំទ្រ​ផ្នែក​បច្ចេកទេស​ដល់​ក្រសួង ស្ថាប័ន ប៉ុន្តែ​ដើម្បី​សម្រេច​កិច្ចការ​នេះ​ក្រសួង ស្ថាប័ន ត្រូវ​ឈរ​លើ​ស្មារតី​ភាពជា​ម្ចាស់ និង​ការ​ទទួលខុសត្រូវ ផ្តល់​កិច្ចសហការ និង​ការ​ចូលរួម​ឲ្យ​មាន​ប្រសិទ្ធភាព​ខ្ពស់។ ទី៦.ក្រសួង ស្ថាប័ន ត្រូវ​រៀបចំ​ផ្តល់​នូវ​របាយការណ៍​វឌ្ឍនភាព​ជា​ប្រចាំ​មក​ក្រសួង​មុខងារ​សាធារណៈ លើ​ការងារ​ពិនិត្យ​ឡើង​វិញ ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ការ​ធ្វើ​បច្ចុប្បន្នភាព​រចនាសម្ព័ន្ធ ទិន្នន័យ​មន្ត្រីរាជការ​ស៊ីវិល ដើម្បី​ក្រសួង​មុខងារ​សាធារណៈ​អាច​មាន​លទ្ធភាព​ជួយ​ផ្តល់​ការ​សម្របសម្រួល និង​ផ្តល់​ការ​គាំទ្រ​ផ្នែក​បច្ចេកទេស​បន្ថែម​ឲ្យ​បាន​ទាន់​ពេល​វេលា ដើម្បី​ធ្វើការ​បូក​សរុប​របាយការណ៍​ជូន​ប្រមុខ​រាជរដ្ឋាភិបាល។

គួរ​ជម្រាប​ថា ពិធី​បើក​វគ្គ​បណ្ដុះបណ្ដាល​ស្ដីពី​ការ​ពិនិត្យ​ឡើងវិញ និង​ការ​វិភាគ​មុខងារ និង​រចនាសម្ព័ន្ធ​ក្រសួង ស្ថាប័ន និង​ធ្វើ​បច្ចុប្បន្នភាព​ទិន្នន័យ​មន្ត្រីរាជការ​ស៊ីវិល​ក្រសួង ស្ថាប័ន នា​ព្រឹក​មិញ​នេះ ក៏​មាន​ការ​អញ្ជើញ​ចូលរួម​ពី​ថ្នាក់ដឹកនាំ​ដែល​ជា​ប្រធាន អនុប្រធាន និង​សមាជិក សមាជិកា នៃ​ក្រុម​ការងារ​កំណែ​ទម្រង់​រដ្ឋបាល​សាធារណៈ តំណាង​ក្រសួង ស្ថាប័ន​ទាំងអស់ ព្រមទាំង​ថ្នាក់​ដឹកនាំ និង​មន្ត្រី​ជំនាញ​ពាក់ព័ន្ធ​ក្នុង​ការងារ​កែទម្រង់​រដ្ឋបាល​សាធារណៈ​ជា​ច្រើន​រូប​ផង​ដែរ៕

The post ឯកឧត្ដម ហ៊ុន ម៉ានី ផ្ដល់អនុសាសន៍ ៦ ចំណុច ដល់សិក្ខាកាមចូលរួមវគ្គបណ្ដុះបណ្ដាល នៅសណ្ឋាគារភ្នំពេញ appeared first on Kampuchea Thmey Daily.

ថ្លែង​បើក​វគ្គ​បណ្ដុះបណ្ដាល​នេះ លោក ម៉េង ហុង អគ្គនាយក ប​.​ស​.​ស ស្ដីទី នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​មាន​ប្រសាសន៍​ថា ការ​អភិវឌ្ឍ​ធនធាន មន្ត្រីរាជការ និង​បុគ្គលិក នៅ​ក្នុង​បេឡា​ជាតិ​សន្តិសុខ​សង្គម ជា​ទស្សនវិស័យ​អាទិភាព​ចាំបាច់ និង​មាន​សារៈសំខាន់​បំផុត។ ជាក់ស្ដែង​ក្នុង​វគ្គ​បណ្ដុះបណ្ដាល​នេះ គឺជា​វគ្គ​បណ្ដុះបណ្ដាល​លើក​ទី ៤៥ ហើយ ដែល ប​.​ស​.​ស រៀបចំ​ឡើង ហើយ​វគ្គ​បណ្ដុះបណ្ដាល​នា​ឱកាស​នេះ ក៏​បណ្ដុះបណ្ដាល​លើកដំបូង​ដែល​ផ្តោត​សំខាន់​អំពី​របៀប​របប នៃ​ការ​រៀបចំ​ព្រឹត្តិការណ៍​ផ្លូវការ​នានា ការ​រៀបចំ​ទស្សនកិច្ច​ផ្លូវការ ការ​រៀបចំ​កិច្ចប្រជុំ សន្និសីទ សិក្ខាសាលា ពិធី​ចុះហត្ថលេខា និង​កម្មវិធី​នានា ជាពិសេស​ការ​បង្ហាញ​គន្លឹះ​ពាក់ព័ន្ធ និង​របៀប​រៀបចំ​ខ្លួន និង​ឥរិយាបថ តាមរយៈ​ការ​ស្លៀកពាក់ កាយវិការ ក្នុង​កម្មវិធី​ផ្លូវការ​ផ្សេងៗ ទៀត។

លោក​អគ្គនាយក​ស្តីទី បាន​បន្ត​ថា វគ្គ​បណ្ដុះបណ្ដាល​នា​ឱកាស​នេះ ធ្វើឡើង​ក្នុង​គោលបំណង​ដើម្បី​ធានា​ការងារ​ពិធីការ និង​ការងារ​ផ្សេងៗ ទៀត ត្រូវ​បាន​អនុវត្ត​តាម​ស្តង់ដារ​រួម​មួយ និង​អនុលោម​ទៅ​តាម​ប្រពៃណី ឬ​ក្រឹត្យក្រម​ដែល​ត្រូវ​បាន​ទទួលស្គាល់​ជា​លក្ខណៈ​ជាតិ និង​អន្តរជាតិ។

លោក​អគ្គនាយក ប​.​ស​.​ស ស្ដីទី សង្ឃឹម​យ៉ាង​មុតមាំ​ថា សិក្ខាកាម​ទាំងអស់​ដែល​មកពី​នាយកដ្ឋាន​នីមួយៗ នឹង​ខិតខំ​សិក្សា​រៀន​សូត្រ នូវ​ចំណុច​ខ្វះខាត​របស់​ខ្លួន និង​ត្រូវ​បំពេញ​បន្ថែម​ប្រកប​ដោយ​ការ​យកចិត្តទុកដាក់​ឱ្យ​បាន​ខ្ពស់ ដើម្បី​ក្រេប​ចំណេះដឹង​សម្រាប់​យក​មក​អនុវត្ត​ក្នុង​អង្គភាព​របស់​ខ្លួន​ឱ្យ​កាន់​តែ​មាន​ប្រសិទ្ធភាព៕

អត្ថបទ ៖ សំអឿន

The post ប.ស.ស បើកវគ្គបណ្ដុះបណ្ដាលជំនាញពិធីការជាតិ និងអន្តរជាតិ ជាលើកដំបូង appeared first on Kampuchea Thmey Daily.