ហេតុការណ៍នេះបានកើតឡើង កាលពីវេលាម៉ោង៣ នឹង៤០នាទីយប់ រំលងអាធ្រាត្រឈាន ចូលថ្ងៃ ទី២ ខែកុម្ភៈ ឆ្នាំ២០២៦ ស្ថិតនៅតាមបណ្ដោយផ្លូវលេខ៩៦ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

តាមការបញ្ជាក់ពីប្រជាពលរដ្ឋបានអោយដឹងថា មុនមានការភ្ញាក់ផ្អើលគេឃើញស្រ្តីពោះធំម្នាក់ បានដើរតាមផ្លូវ ប៉ុន្តែមិនដឹងគោលបំណងគាត់ដើរទៅណានោះដោយឆ្លងកាត់រង្វង់មូលវត្តភ្នំ លុះដើរបានប្រហែល ៤-៥នាទីក្រោយ ក៏ស្រាប់តែមានឮសម្លេងស្រែកថា «ឈឺពោះណាស់ៗ» យ៉ាងកងរំពងពេញសួនច្បាររង្វង់មូលវត្តភ្នំ។ ភ្លាមៗ ប្រជាពលរដ្ឋដែលបានឮសម្លេង ក៏ប្រញាប់ប្រញាល់ទៅជួយមើល ចំណែកពលរដ្ឋដ៏ទៃទៀត បានរាយការណ៍ទៅសមត្ថកិច្ចមូលដ្ឋាន ដើម្បីមកកាន់ទីតាំងខាងលើ និង ទាក់ទងហៅរថយន្តសង្គ្រោះដើម្បីដឹកយកទៅមន្ទីរពេទ្យ។ លុះមកពេល រថយន្តសង្គ្រោះមកដល់ ស្រ្តីខាងលើបានសម្រាលកូនស្រី ដោយសុវត្ថិភាព មិនមានអ្វីប៉ះពាល់ដល់សុខភាព នឹង កូនឡើយ។

ក្រោយសម្រាលរួច ស្រ្តីរួម និង ទារិកាខាងលើត្រូវបានមន្រ្តីពេទ្យដឹកតាមរថយន្តសង្គ្រោះ បញ្ជូនទៅកាន់មន្ទីរពេទ្យបង្អែកចតុមុខ ដើម្បីព្យាបាលបន្តផងដែរ៕ អត្ថបទ ៖ រដ្ឋា

The post ស្រ្តីម្នាក់ កំពុងដើរសុខៗស្រាប់តែឈឺពោះឆ្លងទន្លេ លើសួនច្បារ រង្វង់មូលវត្តភ្នំ appeared first on Kampuchea Thmey Daily.

ប្រជាពលរដ្ឋយ៉ាងច្រើនកុះករប្រមាណ៤៨ម៉ឺននាក់នេះ ក្នុងនោះ នៅវត្តភ្នំប្រមាណ៤៣ម៉ឺននាក់ ហើយនៅផ្លូវថ្មើរជើង(Walk Street)ចំនួន៥ម៉ឺននាក់។ រដ្ឋបាលរាជធានីភ្នំពេញ បានរៀបចំព្រឹត្តិការណ៍«សង្ក្រាន្ដវត្តភ្នំ ឆ្នាំ២០២៥» ដោយចាប់ផ្តើមប្រកាសបើកជាផ្លូវការនាថ្ងៃទី១៤ និងបញ្ចប់នៅថ្ងៃទី១៦ ខែមេសា ឆ្នាំ២០២៥ ក្រោមអធិបតីភាពលោកឃួង ស្រេង អភិបាលរាជធានីភ្នំពេញនិងលោកស្រីនៅរមណីយដ្ឋានប្រវត្តិសាស្ដ្រវត្តភ្នំ។

«សង្ក្រាន្ដវត្តភ្នំ ឆ្នាំ២០២៥» មានរៀបចំកម្មវិធីសាសនា និងកម្មវិធីជាច្រើនផ្សេងទៀត ដើម្បីបង្កលក្ខណៈឲ្យប្រជាពលរដ្ឋលេងកម្សាន្ដសប្បាយរីករាយអបអរសាទរទទួលអំណរសាទរឆ្នាំថ្មី។ នៅរសៀលថ្ងៃ១៤ ខែមេសា លោកឃួង ស្រេង អភិបាលរាជធានីភ្នំពេញនិងលោកស្រីបានចូលរួមលេងកម្សាន្ត«សង្ក្រាន្ដវត្តភ្នំ ឆ្នាំ២០២៥» ជាមួយប្រជាពលរដ្ឋ និងភ្ញៀវទេសចរយ៉ាងច្រើនកុះករ។ គួរបញ្ជាក់ថា ២ថ្ងៃមុនបើកដំណើរការ«សង្ក្រាន្ដវត្តភ្នំ ឆ្នាំ២០២៥» នៅថ្ងៃទី១២-១៣ ខែមេសា ឆ្នាំ២០២៥ ប្រជាពលរដ្ឋប្រមាណ៦០ម៉ឺននាក់ បាននាំគ្នាសម្រុកទៅលេងបាញ់ទឹក លាបម្សៅ នៅសង្ក្រាន្ដវត្តភ្នំ និងផ្លូវថ្មើរជើង (Walk Street)៕

ដោយ៖ ស្រីរ័ត្ន

The post ថ្ងៃដំបូង «សង្ក្រាន្ដវត្តភ្នំ»មានពលរដ្ឋជិត៥០ម៉ឺននាក់ទៅលេងបាញ់ទឹក លាបម្សៅ នៅវត្តភ្នំ appeared first on Kampuchea Thmey Daily.

ប្រជាពលរដ្ឋ​សែស្រឡាយ​ចិន លើក​ឡើង​ថា នេះ​ជា​ការ​សែនព្រេន​តាម​ទំនៀមទម្លាប់​ប្រពៃណី​របស់​ដូនតា តាម​បែប​សាសនា​ប្រពៃណី​ចិន ដែល​ជា​ការ​សែនព្រេន​កាត់ផ្ដាច់​នូវ​គ្រោះ​ចង្រៃ​ចោល និង​តប​សង​មក​វិញ​នូវ​រឿង​ល្អៗ ចូល​មក​ក្នុង​ជីវិត ទាំង​ការ​រស់នៅ ការ​ប្រកប​កិច្ច​ការងារ រួម​ទាំង​ការ​រកស៊ី​ទទួល​ទាន​ជាដើម។

ប្រជាពលរដ្ឋ​ដដែល បន្ត​លើក​ឡើង​ថា ការ​មក​អុច​ធូប សំពះ និង​កាត់​ឆុង នេះ ដើម្បី​សុំ​សេចក្ដី​សុខ ហេង​ហេង ឆ្នាំ​ថ្មី ព្រមទាំង​រកស៊ី​ទទួល​ទាន​មាន​បាន។

គួរ​ជម្រាប​ថា បុណ្យ​ចូល​ឆ្នាំ​ប្រពៃណី​ចិន-វៀតណាម នឹង​ប្រព្រឹត្តិ​ទៅ​រយៈពេល ០៤ ថ្ងៃ គិត​ពី​ថ្ងៃ​ទី ២៨ ដល់​ថ្ងៃ​ទី ៣១ ខែ​មករា ឆ្នាំ ២០២៥។ បុណ្យ​នេះ គឺជា​ពេលវេលា​ដែល​ប្រជាពលរដ្ឋ​កម្ពុជា មាន​ឈាមជ័រ​ជាប់​សែស្រឡាយ​កាត់​ចិន ក៏​នឹង​ចូលរួម​រៀបចំ​ពិធី​សែន​ជូន​ដូនតា ដើម្បី​សុំ​សេចក្តី​សុខ​សប្បាយ និង​សុំ​ពរជ័យ​ឲ្យ​រកស៊ី​ទទួលទាន​កាន់តែ​រីកចម្រើន តាម​បែប​លក្ខណៈ​គ្រួសារ​រៀងៗ ខ្លួន៕

អត្ថបទ ៖ សុភា

The post ពលរដ្ឋខ្មែរជាប់សែស្រឡាយចិន នាំគ្នាទៅកាត់ឆុងរំដោះគ្រោះចង្រៃ បួងសួងសុំសេចក្ដីសុខ នៅវត្តភ្នំ appeared first on Kampuchea Thmey Daily.

អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី បានឱ្យដឹងនៅនៅព្រឹកថ្ងៃទី ១៧ ខែមេសានេះថា៖ ក្នុងឱកាសចូលឆ្នាំថ្មីប្រពៃណីជាតិខ្មែរ រយៈពេល៤ថ្ងៃនេះមានភ្ញៀវទេសចរ និងប្រជាពលរដ្ឋ មកទស្សនា និងលេងកម្សាន្តនៅសង្ក្រាន្តវត្តភ្នំប្រមាណ ១ លាន ៣សែននាក់ ក្នុងនោះសម្រាប់ថ្ងៃទី១ ត្រូវនឹងថ្ងៃទី១៣ ខែមេសា ភ្ញៀវទេសចរជាតិ អន្តរជាតិ ចូលរួមចូលឆ្នាំខ្មែរប្រពៃណីជាតិជាង ២៣ម៉ឺននាក់ថ្ងៃទី២ ប្រមាណ ២៥ ម៉ឺននាក់ ថ្ងៃទី៣ ប្រមាណ៣០ម៉ឺននាក់ និងថ្ងៃទី ១៦ មេសា ដែលជាថ្ងៃចុងក្រោយគឺចំនួនភ្ញៀវទេសចរណ៍ជាតិ និងអន្តរជាតិបានកើនឡើងរហូតដល់ចំនួន៥២ម៉ឺននាក់។

ចំពោះការងារសន្តិសុខ និងសណ្ដាប់ធ្នាប់សាធារណៈ នៅក្នុងឱកាសថ្ងៃចូលឆ្នាំថ្មីនេះ គឺបានដំណើរការទៅដោយរលូន ពុំមានអ្វីកើតឡើង គួរឲ្យកត់សម្គាល់ឡើយ ដោយសារកម្លាំងមានសមត្ថកិច្ចបានល្បាត នៅគ្រប់ទីកន្លែង និងការពារបានយ៉ាងល្អ ដើម្បីបង្ករការសប្បាយរីករាយជូនដល់ប្រជាពលរដ្ឋ នៅគ្រប់ទីកន្លែង៕

អត្ថបទ៖ ស្រីរ័ត្ន

The post ទេសចរជាង ១ លាននាក់ ​ដើរលេងកម្សាន្តនៅវត្តភ្នំរយៈពេល ៤ ថ្ងៃនៃពិធីបុណ្យចូលឆ្នាំខ្មែរ appeared first on Kampuchea Thmey Daily.

ជាមួយគ្នានេះដែរ រដ្ឋបាលរាជធានីភ្នំពេញក៏បានបង្កើតសង្គ្រាន្តវត្តភ្នំ រួមទាំងការតុបតែងលំអរជុំវិញរមណីដ្ឋានវត្តភ្នំ តាមដងវិថី មហាវិថីនិងកន្លែងសប្បាយភាពនានា រួមទាំងការបង្កើតឲ្យមានការលេងល្បែងរបាំប្រជាប្រិយខ្មែរ ច្រើនទម្រង់ ការប្រគំតន្រ្តីរួមទាំងការពង្រឹងសន្តិសុខ សណ្តាប់ធ្នាប់របៀបរៀបរយសាធារណៈបានយ៉ាងល្អស្របតាមអនុសាសន៍ដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីរួមចំណែកលើកស្ទួយប្រពៃណីវប្បធ៏មជាតិដ៏ល្អផូរផង់ ការទាក់ទាញភ្ញៀវទេសចរ ឲ្យចូលមកទស្សនាកម្សាន្តនៅរាជធានីភ្នំពេញ និងនៅតាមបណ្តារាជធានី-ខេត្ត តាមរយៈការរៀបចំសង្គ្រាន្តប្រចាំតំបន់ ឬតាមអង្គភាព តាមក្រុមហ៊ុន សាលារៀន វត្តអារាមជាដើម។

ពិធីនេះ ក៏បានបង្ហាញឲ្យឃើញពីស្មារតីសាមគ្គីភាព មិត្តភាពរវាងមន្ត្រីរាជការនិងប្រជាពលរដ្ឋក៏ដូចរំលឹកឡើងវិញនូវសមិទ្ធិផល នានាដែលរដ្ឋបាលរាជធានីភ្នំពេញ រួមជាមួយប្រជាពលរដ្ឋបានកសាងឡើងក្នុងរយៈពេលពេញមួយឆ្នាំកន្លងទៅដើម្បីបម្រើសេចក្តីត្រូវការរបស់ប្រជាពលរដ្ឋក្នុងទីក្រុងទាំងសេវាសាធារណៈ ការកសាងហេដ្ឋារចនាសម្ពន្ធ ក៏ដូចការពង្រឹងសន្តិសុខសណ្តាប់ធ្នាប់ ការលើកកម្ពស់សោភណ្ឌភាពបរិស្ថានរាជធានីភ្នំពេញផងដែរ។ ទន្ទឹមនឹងការរៀបចំឲ្យមានការលេងល្បែងប្រជាប្រិយ និងរាំលេងកម្សាន្តនៅរមណីដ្ឋានប្រវត្តិសាស្ត្រវត្តភ្នំ ក៏មានការរៀបចំជាស្តង់លក់ទំនិញបែបអនុស្សាវរីយជាខ្មែរ ជាអាហារហូបចុកជាច្រើនមុខថែមទៀត។

លោក ឃួង ស្រេង បានលើកឡើងថា យើងបានសប្បាយរីករាយ គឺដោយសារយើងមានសន្តិភាពពេញលេញ មានស្ថេរភាពនយោបាយក្រោមការដឹកនាំរបស់របស់ស្ថាបនិកសន្តិភាពគឺ សម្តេចអគ្គមហាសេនាបតីតេជោ ហ៊ុន សែន និងដឹកនាំបន្តរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីអាណត្តិទី៧នៃរដ្ឋសភា ដែលបានធ្វើឲ្យកម្ពុជា
បោះជំហ៊ានទៅមុខលើគ្រប់វិស័យធ្វើឲ្យកម្ពុជាស្មើមុខស្មើមាត់លើឆាកអន្តរជាតិ។

អត្ថបទ៖ ស្រីរ័ត្ន

The post រាជធានីភ្នំពេញ យករមណីយដ្ឋានវត្តភ្នំ ជាទីកន្លែងទទួលទេវតាឆ្នាំថ្មី appeared first on Kampuchea Thmey Daily.

លោក មាឃ កក្កដា អ្នកលក់ទឹក និងភេសជ្ជៈ ប្រចាំតំបន់រមណីយដ្ឋានវត្តភ្នំ បានប្រាប់ឱ្យ កម្ពុជាថ្មី ដឹងថា នៅដើមឆ្នាំ ២០២៤នេះ លោកបានសង្កេតឃើញថា សម្បូរភ្ញៀវទេសចរ មកពីគ្រប់ជាតិសាសន៍ បាននាំគ្នាមកទស្សនាកម្សាន្ត នៅរមណីយដ្ឋានវត្តភ្នំនេះ យ៉ាងច្រើនកុះករ។ ចំណែក ភ្ញៀវទេសចរក្នុងស្រុកវិញ ក៏ហាក់សម្បូរច្រើនដែរ។

លោក មាឃ កក្កដា បន្ថែមថា សម្រាប់ប្រជាជនខ្មែរ ភាគច្រើន បាននាំគ្នាមកគោរពបូជាព្រះអង្គ និងខ្លះទៀត នាំគ្នាមកគោរព លោកយាយពេញ និងលោកតាព្រះចៅ រៀងរាល់ថ្ងៃសីល និងថ្ងៃចុងសប្ដាហ៍ ជាដើម។

ចំណែក អ្នកស្រី​ សុខ ចំរើន ភ្ញៀវទេសចរណ៍មកកម្សាន្ដ តំបន់ប្រវត្តិសាស្រ្ដវត្តភ្នំ បានប្រាប់ កម្ពុជាថ្មី ដឹងថា អ្នកស្រី និងក្រុមគ្រួសារ ឧស្សាហ៍នាំកូនៗ មកដើរលេងកម្សាន្ដនៅទីនេះ រៀងរាល់ថ្ងៃ សម្រាកពីការងារ និងពេលខ្លះក៏ឆ្លៀតមកបន់ស្រន់ ព្រះអង្គ និងលោកយាយដូនពេញ ដើម្បីសុំសេចក្ដីសុខចម្រើន ដល់ក្រុមគ្រួសារ ពិសេសគឺថ្ងៃសីលម្ដងៗ។

អ្នកស្រី បន្ថែមថា រមណីយដ្ឋានប្រវត្តិសាស្រ្ដវត្តភ្នំ មិនត្រឹមតែជាកន្លែងទេសចរ ប៉ុណ្ណោះទេ។ ប៉ុន្ដែកន្លែងនេះ ក៏ជាមជ្ឃមណ្ឌលប្រមូលផ្ដុំ សាសនា និងជំនឿ ផ្សេងៗ សម្រាប់មនុស្សជាតិទូទៅ បានគោរពបូជា បានដោយមិនប្រកាន់ជាតិសាសន៍ ឬពណ៌សម្បុរ នោះឡើយ។

យ៉ាងណាមិញ លោក វរសេនីយ៍ទោ មុត កុសលជាតិ នគលបាលទេសចរណ៍ ប្រចាំតំបន់រមណីយដ្ឋានប្រវត្តិសាស្រ្ដវត្តភ្នំ បានប្រាប់ឱ្យ កម្ពុជាថ្មី ដឹងថា នៅដើមឆ្នាំ ២០២៤នេះ លោក សង្កេតឃើញថា សម្បូរភ្ញៀវទេសចរជាតិ និងអន្ដរជាតិ មកទស្សនាកម្សាន្ដ នៅក្នុងបរិវេណរមណីយដ្ឋានវត្តភ្នំ យ៉ាងច្រើនកុះករ ដែលភាគច្រើនក្នុងចំណោមភ្ញៀវទេសចរទាំងនោះ មិនត្រឹមតែដើរលេងកម្សាន្ដ ប៉ុណ្ណោះទេ តែបាននាំគ្នាមកគោរពបូជា ដើម្បីសេចក្ដីសុខចម្រើនផងដែរ។

លោក វរសេនីយ៍ទោ មុត កុសលជាតិ បន្ថែមទៀតថា ភ្ញៀវទេសចរ ដែលមកពីក្រៅប្រទេស ភាគច្រើន គឺនាំគ្នាមកជាក្រុម តាមរយៈក្រុមហ៊ុន និងខ្លះទៀតមកជាលក្ខណៈគ្រួសារ។ លោក វរសេនីយ៍ទោ មុត កុសលជាតិ បានបញ្ជាក់ទៀតថា នៅពេលចុងសប្ដាហ៍ ភ្ញៀវទេសចរដែលមកកម្សាន្តនៅរមណីយដ្ឋានវត្តភ្នំ នេះ ចន្លោះពី ២០០នាក់ ទៅ ៣០០នាក់ ដែលភាគច្រើនមកពីតំបន់អឺរ៉ុប ចិន និង វៀតណាម ជាដើម៕

អត្ថបទ ៖ សួស​ សិត

The post ដើមឆ្នាំ ២០២៤នេះ រមណីយដ្ឋានវត្ដភ្នំ ទទួលបានភ្ញៀវទេសចរជាតិ-អន្ដរជាតិ ច្រើនគួរសម appeared first on Kampuchea Thmey Daily.

អ្នកស្រី ឡាំ សុដាណេ ហៅ លាភ ដាណេ ម្ចាស់ហាងម្ជូរវត្តភ្នំ ១៦៨ បានប្រាប់មកកាន់សារព័ត៌មានកម្ពុជាថ្មីថា ដំបូងឡើយ អ្នកស្រីត្រឹមជាកុមារីម្នាក់ ដែលទូលម្ជូរដើរលក់ធម្មតានោះទេ។ ក្រោយមកទៀតពេលដែល អ្នកស្រីពេញវ័យត្រូវរៀបការជាមួយស្វាមី ទើបអ្នកស្រី មានគំនិតមួយគឺជួលផ្ទះគេដើម្បីលក់ម្ជូរ កាលនោះកាលជួលតូប ក្នុងតម្លៃ ៨០ដុល្លារ ក្នុងមួយខែ។

អ្នកស្រី លាភ ដាណេ បានឲ្យដឹងទៀតថា ដោយសារតែមានអ្នកទិញបានស្គាល់ និងជួយទិញម្ជូរអ្នកស្រីច្រើនឡើងៗ អ្នកស្រី និងស្វាមី ក៏សម្រេចចិត្តបើកជាហាងម្ជូរដ៏ធំមួយនោះ គឺម្ជូរវត្តភ្នំ ១៦៨ ក្នុងឆ្នាំ ២០១១ រហូតមកដល់ពេលបច្ចុប្បន្ន។ សម្រាប់ពេលបច្ចុប្បនេះ ហាងលក់ម្ជូររបស់អ្នកស្រី កាន់តែមានអតិថិជនមកជួយគាំទ្រយ៉ាងច្រើនកុះករ ទោះបីសេដ្ឋកិច្ចមានការប្រែប្រួលយ៉ាងណាក៏ដោយ។

អ្នកស្រី លាភ ដាណេ បានបន្ថែមទៀតថា រាល់ថ្ងៃ អ្នកស្រី មិនត្រឹមតែលក់ម្ជូរនៅហាងផ្ទាល់នោះទេ ប៉ុន្តែអ្នកស្រី ក៏មានទទួលជាលក្ខណៈប៊ូហ្វេ នៅតាមកម្មវិធីតូច ឬធំ តាមការចង់បានរបស់ម្ចាស់កម្មវិធី។ ក្រៅពីនេះ អ្នកស្រី ក៏មានការបើកលក់តាម អេប ផ្សេងៗទៀត ដូចជា៖ អីហ្គេត ឬ ញាំ២៤ម៉ោង នោះដែរ។

អ្នកស្រី លាភ ដាណេ បានបន្តទៀតថា នៅហាងរបស់អ្នកស្រី ក្នុងមួយថ្ងៃៗ អ្នកស្រី អាចលក់ម្ជូរបានរហូតទៅដល់ ប្រមាណជាង ១ តោន កន្លះ ទោះបីបច្ចុប្បន្នមានហាងលក់ម្ជូរច្រើនយ៉ាងណាក៏ដោយ។ អ្នកស្រី លាភ ដាណេ មានប្រសាសន៍ទៀតថា មុខរបរអ្វីក៏ដោយ ក៏អាចជួយឲ្យយើងអាចមានជីវភាពធូរធារបានដែរ។ ប៉ុន្តែ សូមយើងធ្វើការងារនោះដោយយកចិត្តទុកដាក់ និងចេញពីបេះដូង ទើបទទួលបានលទ្ធផលល្អសម្រាប់ខ្លួនឯង។ ទាំងនេះជាសម្ដីរបស់សហគ្រិន វ័យក្មេង អ្នកស្រី លាភ ដាណេ ម្ចាស់ហាងម្ជូរវត្តភ្នំ ១៦៨ ចង់ចែករំលែកទៅកាន់មនុស្សទាំងអស់ដែលជាអ្នករកស៊ី និងអ្នកលក់ដូរផ្សេងៗទៀត។

ចំណែក កញ្ញា តក់ ចរិយា អាយុ ២៧ ម្ចាស់តូបម្ជូរ ៧៧៧៧ នៅសង្កាត់ស្រះចក ខណ្ឌដូនពេញ ក៏បានប្រាប់មកកាន់សារព័ត៌មានកម្ពុជាថ្មីដែរថា កញ្ញា គ្រាន់មានតូបតូចមួយនៅមុខផ្ទះបើកលក់ម្ជូរ និងភេសជ្ជៈបន្តិចបន្តួចដើម្បីចិញ្ចឹមខ្លួនឯង និងផ្គត់ផ្គង់គ្រួសាររបស់កញ្ញា។ កញ្ញា បន្ថែមថា ក្នុងមួយថ្ងៃកញ្ញា អាចរកប្រាក់ចំណូលលក់ម្ជូរ និងភេសជ្ជៈ ចន្លោះពី ១០ម៉ឺនរៀល ទៅ ១៥ម៉ឺនរៀល ជារៀងរាល់ថ្ងៃ។ កញ្ញា តក់ ចរិយា បន្តទៀតថា កញ្ញា ទោះបីជា ការបើកតូបលក់ម្ជូរតូចតាចក៏ពិតមែន ប៉ុន្តែមុខរបរនេះអាចជួយឲ្យកញ្ញា អាចរកប្រាក់ចំណូលសម្រាប់ផ្គត់ផ្គង់គ្រួសារ បានយ៉ាងច្រើនគួរសមដែរ៕

អត្ថបទ៖ សួស សិត

The post ទោះមានគេលក់ច្រើន តែហាងលក់ម្ជូរវត្តភ្នំ ១៦៨ នៅតែលក់ដាច់ខ្លាំង ១ថ្ងៃ លក់បាន ១តោនកន្លះ appeared first on Kampuchea Thmey Daily.

លោក ស៊ី ផល្លី ភ្ញៀវទេសចរជាតិ មកពីខេត្តកំពង់ចាម បានប្រាប់សារព័ត៌មានកម្ពុជាថ្មីថា បានជាលោកចាប់អារម្មណ៍មកទស្សនាកម្សាន្ត រមណីយដ្ឋានប្រវត្តិសាស្រ្តវត្តភ្នំនេះ ពីព្រោះតំបន់នេះមានដើមឈើជាម្លប់ត្រជាក់សម្រាប់អង្គុយលេង និងបានទស្សនាកម្សាន្តនូវរូបសំណាកផ្សេងៗទៀត ដែលជាប់ទាក់ទងនឹងប្រវត្តិសាស្រ្តខ្មែរ និងជំនឿសាសនា តាំងពីសម័យមុនមក។

លោក ស៊ី ផល្លី បានបន្ថែមទៀតថា លោកនិងគ្រួសាររបស់លោក ឆ្លៀតមកកម្សាន្តនៅទីនេះផង នឹងព្រមទាំងបានអុច ធូប បូជាផ្កាភ្ញី ដើម្បីសុំសេចក្តីសុខពីវត្ថុស័ក្តិសិទ្ធិទាំងអស់ ដែលមាននៅទីនេះ មកដល់ក្រុមគ្រួសាររបស់លោក ជៀស ផុតពីគ្រោះភ័យផ្សេងៗ ដែលកើតមានដោយយថាហេតុ។

ជាមួយគ្នានេះដែរ អ្នកស្រី ជឿន យ៉ាវ ភ្ញៀវទេសចរជនជាតិវៀតណាម ក៏បានប្រាប់មកកម្ពុជាថ្មីដែរថា អ្នកស្រីនិងស្វាមី បានទៅរស់នៅប្រទេសបារាំងជាយូរឆ្នាំមកហើយ ទើបតែពេលនេះមានពេលទំនេរ អ្នកស្រី និងស្វាមី បាននាំគ្នាមកលេងប្រទេសកម្ពុជាលើកទី ១។

អ្នកស្រី ចាប់អារម្មណ៍រមណីដ្ឋានប្រវត្តិសាស្រ្តវត្តភ្នំ ដោយអ្នកស្រីយល់ឃើញថា រមណីយដ្ឋានប្រវត្តិសាស្រ្តវត្តភ្នំនេះ សម្បូរទៅដោយទេសភាពស្រស់ស្អាត មានដើមឈើត្រជាក់ អាចអង្គុយលេងបានយ៉ាងសប្បាយរីករាយ ជាមួយក្រុមគ្រួសារ។ ក្រៅពីនេះទៀត អ្នកស្រី ក៏បានគោរពបូជាដល់វត្ថុស័ក្តិសិទ្ធិ ដូចជា៖ លោកយាយដូនពេញ លោកតាព្រះចៅ និង​ព្រះពុទ្ធរូបផ្សេងៗទៀត ដែលមាននៅទីនោះផងដែរ។

ចំណែកឯលោកវរៈសេនីយ៍ត្រី មុត កុសលជាតិ នគរបាលទេសចរណ៍ ប្រចាំការនៅតំបន់រមនីយដ្ឋានប្រវត្តិសាស្រ្តវត្តភ្នំ ក៏បានប្រាប់មកកម្ពុជាថ្មីដែរថា សម្រាប់ពេលបច្ចុប្បន្ននេះ លោកសង្កេតឃើញថា ភ្ញៀវទេសចរ ដែលមកទស្សនានៅទីនេះ ភាគច្រើនមានដូចជា៖ ជនជាតិចិន វៀតណាម និងភ្ញៀវទេសចរ ដែលមកពីបណ្តាប្រទេសអឺរ៉ុប មានបារាំង អង់គ្លេស អាឡឺម៉ង់ ជាដើម។

ចំណែកភ្ញៀវទេសចរក្នុងស្រុក គឺទល់តែថ្ងៃសីល និងថ្ងៃបុណ្យផ្សេងៗ ទើបសម្បូរមកទស្សនាកម្សាន្តតំបន់ប្រវត្តិសាស្រ្តវត្តភ្នំ ហើយខ្លះទៀតក៏បាននាំគ្នាមកអុចធូប បូជាផ្កាភ្ញីផ្សេងៗ មានដូចជា៖ ផ្កាឈូក ផ្កាម្លិះ ដើម្បីសុំសេចក្តីសុខសេចក្តីចម្រើន សម្រាប់ក្រុមគ្រួសាររបស់ពួកគេ។ លោកវរៈសេនីយ៍ត្រី មុត កុសលជាតិ បានបញ្ជាក់ទៀតថា សម្រាប់ការការពារ និងត្រួតពិនិត្យសុវត្ថិភាពជូនភ្ញៀវទេសចរ កម្លាំងរបស់លោកបានដាក់មន្រ្តីដើម្បីជួយមើល និងជួយសម្រួលដល់ភ្ញៀវទេសចរ មិនឲ្យមានគ្រោះថ្នាក់អ្វីនោះឡើយ៕

អត្ថបទ៖ សួស សិត

The post រមណីយដ្ឋានប្រវត្តិសាស្រ្តវត្តភ្នំ នៅតែពេញនិយមសម្រាប់ភ្ញៀវទេសចរជាតិ និងអន្តរជាតិ appeared first on Kampuchea Thmey Daily.