ព្រឹត្តិការណ៍នេះ ត្រូវបានចាត់ទុកថាជាភស្តុតាងមួយបង្ហាញពីភាពអស្ចារ្យនៃប្រាជ្ញាបុព្វបុរសខ្មែរ ក្នុងការគិតគូរប្លង់ស្ថាបត្យកម្ម ប្លង់សាងសង់ប្រាសាទ ការរៀបចំដីធ្លី ការគណនាតាមគណិតវិទ្យា និងការយល់ដឹងអំពីចលនាតារាសាស្ត្រ ដែលរួមផ្សំជាមួយជំនឿសាសនា បង្កើតបានជាបាតុភូតព្រះអាទិត្យរះចំកណ្ដាលកំពូលប្រាសាទអង្គរវត្តដ៏អស្ចារ្យនេះ។

ជាធម្មតា សមរាត្រី (Equinox) គឺជាព្រឹត្តិការណ៍ធម្មជាតិដែលរយៈពេលថ្ងៃ និងយប់មានប្រវែងស្មើគ្នា ហើយកើតឡើង ២ដងក្នុងមួយឆ្នាំ។ លើកទី១ គឺ សមរាត្រីរដូវប្រាំង កើតឡើងនៅចន្លោះថ្ងៃទី២១ ដល់ថ្ងៃទី២៣ ខែមីនា ខណៈលើកទី២ គឺ សមរាត្រីរដូវវស្សា ដែលកើតឡើងនៅចន្លោះថ្ងៃទី២១ ដល់ថ្ងៃទី២៣ ខែកញ្ញា។

តួយ៉ាង ព្រឹត្តិការណ៍សមរាត្រីអង្គរ តែងទាក់ទាញភ្ញៀវទេសចរជាតិ និងអន្តរជាតិជាច្រើន ឱ្យមកប្រមូលផ្តុំគ្នានៅផ្នែកខាងលិចនៃប្រាសាទអង្គរវត្ត ដើម្បីទស្សនាទិដ្ឋភាពព្រះអាទិត្យរះត្រង់កំពូលប្រាសាទ និងផ្ដិតយករូបភាពដ៏កម្រ និងស្រស់ស្អាតនេះ។

ក្នុងឱកាសនេះ ក្រសួងទេសចរណ៍ ក៏បានអំពាវនាវឱ្យសាធារណជន និងភ្ញៀវទេសចរជាតិ-អន្តរជាតិ ចូលរួមទស្សនាបាតុភូតធម្មជាតិដ៏អស្ចារ្យនេះ កុំបីខាន ព្រមទាំងចូលរួមផ្សព្វផ្សាយទេសចរណ៍កម្ពុជាទាំងអស់គ្នា ស្របតាមពាក្យស្លោក «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍» និង «ម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់»។

គួរជម្រាបដែរថា តាមការបញ្ជាក់របស់អាជ្ញាធរជាតិអប្សរា បានឱ្យដឹងថា ពាក្យ “សមរាត្រី” ត្រូវបានគេស្គាល់តាំងពីសម័យបុរាណ ដោយមានការប្រែសម្រួលពីភាសាសំស្ក្រឹត ដែលត្រូវបានកត់ត្រានៅលើសិលាចារឹកថា “វិសុវ” (ឬ “ពិសុព”)។

បុរាណវិទូបានពន្យល់ថា នៅសម័យអង្គរ ព្រឹត្តិការណ៍សមរាត្រីរដូវប្រាំង ប្រហែលជាត្រូវបានប្រារព្ធពិធីធំៗតាមទំនៀមព្រាហ្មណ៍ ដែលពាក់ព័ន្ធនឹងជំនឿសាសនា និងទស្សនវិជ្ជាបុរាណ ទាក់ទងនឹងជ័យជំនះរបស់សេចក្តីល្អលើអំពើអាក្រក់។ ប៉ុន្តែពិធីទាំងនោះ មិនបានបន្តរហូតមកដល់សព្វថ្ងៃនោះទេ។

ដោយឡែក អ្នកស្រាវជ្រាវក៏បានបញ្ជាក់ថា ប្រាសាទអង្គរវត្ត ត្រូវបានសាងសង់ជាទេវឋានសម្រាប់ព្រះវិស្ណុ ដែលមានឈ្មោះដើមថា “ព្រះបរមវិស្ណុលោក” ដូច្នេះហើយ បាតុភូតព្រះអាទិត្យរះចំកំពូលកណ្ដាលប្រាសាទក្នុងថ្ងៃសមរាត្រី អាចមានទំនាក់ទំនងជាមួយនឹងពិធីសាសនាបុរាណដែលពាក់ព័ន្ធនឹងព្រះនរាយណ៍ផងដែរ៕

The post កុំខកខាន! ព្រឹត្តិការណ៍សមរាត្រីរដូវប្រាំង “វសន្តរដូវ” នឹងកើតមានចន្លោះថ្ងៃទី២១-២៣ មីនានេះ appeared first on Kampuchea Thmey Daily.

តួយ៉ាង នេះព្រឹត្តិការណ៍ដែលមាន ២ដង/រៀងរាល់ឆ្នាំ ខណៈលើកទី១ នៃឆ្នាំ២០២៦ នឹងចាប់ផ្តើមនៅសប្តាហ៍ទី៣ នៃខែមីនាខាងមុខនេះ គឺជាព្រឹត្តិការណ៍សមរាត្រីរដូវប្រាំង។ តើសមរាត្រីនារដូវប្រាំងត្រូវនឹងខែមីនា មានកិច្ចពិធីអ្វីខ្លះតាមទំនៀមព្រាហ្មណ៍?

យោងតាមអាជ្ញាធរជាតិអប្សរា បានឱ្យដឹងថា ជាទូទៅសាធារណជនខ្មែរស្គាល់សមរាត្រី តាមការប្រែសម្រួលពីភាសាសំស្ត្រឹត ដែលមានសរសេរលើថ្មបុរាណតាំងពីសម័យមុនអង្គរ និងសម័យអង្គរ ថា « វិសុវ » (បើសរសេរតាមភាសាបច្ចុប្បន្ន ជា “ពិសុព”) ដែលប្រាជ្ញខាងសិលាចារឹកបានដឹងឮយូរមកហើយដែរ។

ប្រភពដដែលគូសបញ្ជាក់ទៀតថា «សមរាត្រី» (Equinox) ជាព្រឹត្តិការណ៍មួយដែលរយៈពេលថ្ងៃនិងយប់មានប្រវែងស្មើគ្នា កើតឡើងចំនួន២ដងជារៀងរាល់ឆ្នាំ គឺសមរាត្រីរដូវប្រាំង (វសន្តរដូវ) កើតឡើងពីថ្ងៃទី២១ ខែមីនា និងសមរាត្រីរដូវវស្សាកើតឡើងពីថ្ងៃទី២២ ខែកញ្ញា។

បើតាមអាជ្ញាធរជាតិអប្សរា ដកស្រង់ប្រសាសន៍ លោក អុឹម សុខរិទ្ធី បុរាណវិទូ និងជាប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ នៃអាជ្ញាធរជាតិអប្សរាកាលពីឆ្នាំ២០២៣ សរសេដោយ ឆាយ ផាន់នី បញ្ជាក់ថា ព្រឹត្តិការណ៍ពិសេសនេះ នារដូវប្រាំង ប្រហែលមានប្រារព្ធកិច្ចពិធីធំៗតាមទំនៀមព្រាហ្មណ៍នាសម័យអង្គរ។ ប៉ុន្តែពិធីទាំងនោះ មិនមានបន្តរៀបចំមកទល់សព្វថ្ងៃ ជាហេតុនាំឱ្យបាត់ដានឈឹង។ តែយ៉ាងណា ដើម្បីជាការពិចារណា បុរាណវិទូរូបនេះណែនាំឱ្យសាកល្បងមើលទៅប្រភពដើមនៃអារ្យធម៌ខ្មែរ។

ទី១ ព្រាហ្មណ៍នៅទូទាំងប្រទេសឥណ្ឌានៅអំឡុងខែមីនា គេឃើញមានប្រារព្វពិធីបុណ្យមួយយ៉ាងធំ (តាមគម្ពីបុរាណរបស់ឥណ្ឌា គេហៅថា Holi) ។ នៅក្នុងពិធីនេះ អ្នកចូលរួមទាំងអស់បានច្រៀង-រាំយ៉ាងរីករាយ ដោយយកម្សៅពណ៌មកបាច និងលាបដាក់គ្នាទៅវិញទៅមក ដើម្បីអបអរសារទជ័យជំនៈរបស់ព្រះនរាយណ៍ ដែលបានតំណែងខ្លួនជាអាវតារមានទម្រង់ជានរសឹង្ហ ដោយបានសម្លាប់យក្សកំណាចដ៏ធំមួយ ឈ្មោះថា ហិរណ្យកស៊ីពុ ( Hiranyakashipu)។

ទី២ ព្រឹត្តិការណ៍សមរាត្រីនេះអាចជាប់ពាក់ព័ន្ធនឹងរឿងជ័យជំនះរបស់ព្រះនរាយណ៍ដែរ គឺព្រះគ្រឹស្ណដែលជាអាវតារមួយយ៉ាងសំខាន់របស់ព្រះអង្គដែលបានកំចាត់ ឬបំផ្លាញសភាវៈអាក្រក់។ ព្រាហ្មណ៍ ប្រារព្ធកិច្ចដើម្បីបង្ហាញថា សភាវល្អឈ្នះលើសភាវអាក្រក់ យុត្តិធម៌ឈ្នះលើអយុត្តិធម៌។

ទី៣ ក្រៅពីជាប់ពាក់ព័ន្ធនឹងរឿងថ្ងៃមង្គលរបស់និកាយព្រះនរាយណ៍ ក៏ជាថ្ងៃមង្គលធំមួយរបស់និកាយព្រះឥសូរដែរ។ វេលាថ្ងៃ និងយប់ មានរយៈពេលស្មើគ្នានេះ, ព្រះឥសូរ និងមហេសីបានរួមបញ្ចូលគ្នាជាប្រាណតែមួយ ដែលមួយចំហៀងជាប្រាណបុរស និងមួយចំហៀងជាប្រាណស្រ្តី ដែលមានឈ្មោះថា “អឌ្ឍនារីស្វរ” (Ardhanarishvara)។ ខ្មែរបុរាណនិយមបដិមានេះខ្លាំង ដែលយើងមានបដិមានេះនៅមុនសម័យអង្គរនិងសម័យអង្គរ។

ទី៤ ចំពោះប្រពៃណីធ្វើយោគ (Yogic tradition) នៅថ្ងៃសមរាត្រីរដូវនេះ គឺជាថ្ងៃដ៏វិសេសសម្រាប់អ្នកប្រតិបត្តិយោគ (Yoga) ព្រោះជាពេលវេលាដ៏ល្អបំផុត ដើម្បីទទួលផលខ្ពង់ខ្ពស់ ពីការធ្វើយោគជាងវេលាណាៗទាំងអស់។

ប្រភពដដែលលើកឡើងដែរថា បើពិចារណាលើករណីពិធីខាងលើ នោះនឹងឃើញមានទាក់ទងនឹងព្រះនរាយណ៍ជាពិសេស។ ឯអង្គរវត្ត សាងទ្បើងជាទេវឋានរបស់ព្រះនរាយណ៍ មានឈ្មោះដើមថា “ព្រះបរមវិស្ណុលោក”។ ដូច្នេះ បុរាណវិទូជឿថា ថ្ងៃរះចំកំពូលកណ្តាលអង្គរវត្តនៅសមរាត្រីរដូវប្រាំងនេះ អាចទាក់ទងនឹងកិច្ចពិធីខាងលើ៕

The post តើសមរាត្រីនារដូវប្រាំង “វសន្តរដូវ” មានជាប់ទាក់ទងនឹងទំនៀមព្រាហ្មណ៍ដែរឬទេ? appeared first on Kampuchea Thmey Daily.

ព្រឹត្តិការណ៍សមរាត្រី​ ព្រះអាទិត្យរះចំកណ្ដាលកំពូល​ប្រាសាទអង្គរវត្ត ឆ្នាំ២០២៥ នឹង​កើតឡើង​នៅ​ថ្ងៃ​ទី​២៣ ខែ​កញ្ញា ខាង​មុខ ចំថ្ងៃចុងក្រោយ​នៃ​ពិធីបុណ្យ​ភ្ជុំបិណ្ឌ។

លោក សំ វុទ្ធា បាន​លើក​ឡើង​ថា៖ «សម្រាប់ “សមរាត្រី” កាលពីថ្ងៃទី២១ ខែមីនា ឆ្នាំ២០២៥ កន្លងទៅ បានទាក់ទាញអ្នកទេសចរចម្រុះជាតិសាសន៍ប្រមាណជាង ២ម៉ឺននាក់។ ដោយឡែកសម្រាប់ “សមរាត្រី” ខែកញ្ញានេះ ចំនួនអ្នកទេសចរនឹងមានច្រើនជាងខែមីនា ដោយមូលហេតុចំថ្ងៃសម្រាកនៃពិធីបុណ្យភ្ជុំបិណ្ឌ»។

ដោយឡែក​ចំពោះ​ចំនួនភ្ញៀវទេសចរណ៍​ដែល​ទៅ​លេង​ខេត្ត​សៀមរាបក្នុង​រយៈពេល​៨ខែ​នៃ​ឆ្នាំ​២០២៥​នេះ មាន​ចំនួនជាង​៣លាននាក់ កើន​ឡើង​៤៥​,៧៧ភាគរយ​បើធៀបនឹង​រយៈពេល​ដូច​គ្នា​កាលពី​ឆ្នាំ​២០២៤ ដែល​មាន​ចំនួន​ ២,១លាននាក់៕

អត្តបទដោយ គឿន វេត

The post មន្ត្រីរំពឹងថា​ សមរាត្រី ឆ្នាំ២០២៥នឹងមាន​ភ្ញៀវកាន់តែច្រើន appeared first on Kampuchea Thmey Daily.

ព្រះតេជគុណ សុង ពិសិដ្ឋ គង់នៅវត្តដំណាក់ ក្រុងសៀមរាប បានថេរដីកាថា នេះទើបតែជាលើកទីពីរប៉ុណ្ណោះដែលព្រះអង្គបាននិមន្តមកទស្សនាថ្ងៃរះចំកំពូលកណ្តាលប្រាសាទអង្គរវត្ត បើទោះបីប៉ុន្មានថ្ងៃនេះអាកាសធាតុមិនអំណោយផលល្អ តែនេះជាព្រឹត្តិការណ៍ដ៏អស្ចារ្យ អាចទាក់ទាញទេសចរជាតិ និងអន្តរជាតិ រាប់ម៉ឺននាក់ ឱ្យចូលមកទស្សនាប្រាសាទអង្គរវត្ត និងប្រាសាទដទៃក្នុងតំបន់រមណីយដ្ឋានអង្គរ។

ចំណែក លោកយាយ ម៉ម វាត់ អាយុ ៧៧ឆ្នាំ ភ្ញៀវទេសចរ រស់នៅក្នុងខេត្តពោធិសាត់ បានឱ្យដឹងថា នេះជាលើកទី៥ ហើយ ដែលលោកយាយបានមកទស្សនាព្រឹត្តិការណ៍ថ្ងៃរះចំកំពូលកណ្តាល នៃប្រាសាទអង្គរវត្ត ព្រមទាំងបាននាំបងប្អូនញាតិមិត្តមកទស្សនាថែមទៀត។ លោកយាយ បញ្ជាក់ថា បើទោះបីឃើញថា អាកាសធាតុមិនអំណោយផលល្អ តែលោកយាយនៅតែចង់មកទស្សនាប្រាសាទអង្គរវត្ត ព្រោះតែកោតសសើរស្នាដៃបុព្វបុរសខ្មែរ ដែលលោកបានកសាងអង្គរវត្ត និងប្រាសាទបុរាណជាច្រើនលើទឹកដីនៃខេត្តសៀមរាប។

សូមបញ្ជាក់ថា ជារៀងរាល់ឆ្នាំ ព្រឹត្តិការណ៍សមរាត្រី (Equinox) តែងតែកើតមាន ២ ដង គឺនៅរដូវប្រាំង (Vernal Equinox) កើតទ្បើងនៅខែមីនា និងសមរាត្រីរដូវវស្សា (Autumnal Equinox) កើតទ្បើងនៅខែកញ្ញា។ ព្រឹត្តិការណ៍មហស្ចារ្យនៅអង្គរវត្តនេះ តែងតែបានទាក់ទាញ ចំណាប់អារម្មណ៍របស់ភ្ញៀវទេសចរជាតិ និងអន្តរជាតិជាច្រើនដែលចង់ឃើញហេតុការណ៍ និងចង់ផ្តិតយករូបភាពនេះទុកជាអនុស្សាវរីយ៍។ អ្នកស្រាវជ្រាវបានហៅព្រឹត្តិការណ៍នេះថា សមរាត្រី (Equinox) ដែលមានសរសេរលើសិលាចារឹកបុរាណថា “វិសុវ” គឺជាពេលដែលយប់ និងថ្ងៃមានរយៈពេលស្មើគ្នា៕

The post ទេសចរ ជិត ៤ ម៉ឺននាក់ មកទស្សនា សមរាត្រី ថ្ងៃរះចំកំពូលកណ្តាលប្រាសាទអង្គរវត្ត appeared first on Kampuchea Thmey Daily.

បុគ្គលិកផ្នែកលក់ នៅសណ្ឋាគារ La Residence Blanc D’Angkor Hotel ខេត្តសៀមរាប បាន​ឱ្យដឹងថា ​មុន​ពេល​ព្រឹត្តិការណ៍ន្តរជាតិ GUMBALL 3000 និងព្រឹត្តិការណ៍​សម​រាត្រី ការកក់​បន្ទប់​ស្នាក់នៅរបស់អ្នកទេសចណ៍មានកំណើន ភាគច្រើនភ្ញៀវនៅក្នុងស្រុក។

អ្នកស្រី ម៉ាលីស បុគ្គលិកនៅសណ្ឋាគារ La Palmeraie d’Angkor Charming Hotel មានប្រ​សាសន៍ថា ការកក់បន្ទប់ស្នាក់នៅបច្ចុប្បន្នមានការធ្លាក់ចុះខ្លាំង ទោះមានព្រឹត្តិការធំៗក៏ដោយ ក៏​ស្ថាន​​ភាពភ្ញៀវទេសចរនៅមានកម្រិតតិចតួច។

លោក វុទ្ធី បុគ្គលិកនៅសណ្ឋាគារ Rambutan Hotel & Resort បានឱ្យដឹងដែរថា៖ «កន្លែងស្នាក់​នៅ​របស់ខ្ញុំសម្រាប់បរទេសគឺធម្មតា ដូចរាល់ឆ្នាំ អត់ឃើញមានអីឡើងទេ ខែ៩ហ្នឹង មិនមានភ្ញៀវ​ច្រើនទេ ហើយថ្ងៃ ២១-២៣ កើនតិចតូចទេ ឆ្នាំនេះវាធ្លាក់ខ្លាំង»។

កម្ពុជាបានរៀបចំបើកព្រឹត្តិការណ៍ Gumball 3000 Rally នៅរាជធានីភ្នំពេញ នារាត្រីថ្ងៃទី១៥ ខែកញ្ញា ឆ្នាំ២០២៤ ដែលមានតាំងបង្ហាញរថយន្ត ជ្រែរថយន្ត និងការប្រគុំតន្រ្តីខ្នាតធំលំដាប់​អន្តរជាតិផងនោះ បានទាក់ទាញការចូលរួមពីមហាជន ប្រជាជន យុវជនជិត ១០ ម៉ឺននាក់។

សម្រាប់ខេត្តសៀមរាប ចាប់ពីថ្ងៃទី១៦-១៧ ខែកញ្ញានេះនឹងមាន ព្រឹត្តិការណ៏ Gumbal 3000 គឺជាព្រឹត្តិការណ៍ដ៏ល្បីល្បាញមួយនៅលើពិភពលោក ដែលមានរថយន្តទំនើបៗ និងមានការចូលរួម​ដោយតារាល្បីៗ អ្នកផលិតមាតិកាល្បីៗលំដាប់អន្តរជាតិ YouTuberល្បីៗ អ្នកធុរកិច្ច និងអ្នកវិនិយោគនានាជុំវិញពិភពលោក។

ដោយឡែក នៅថ្ងៃទី ២១-២៣ ខែកញ្ញា គឺជាព្រឹត្តិការណ៍សមរាត្រី ដែលយើងអាចមើលឃើញ​ព្រះ​អាទិត្យ​រះចំកណ្តាលកំពូលប្រាសាទអង្គរវត្ត ដែលមួយឆ្នាំមានតែ២ដង៕

អត្ថបទ៖ ឡេង ដេត

The post ការកក់បន្ទប់ស្នាក់នៅក្នុងខេត្តសៀមរាប មានកំណើនតិចតួចមុនព្រឹត្តិការណ៍ GUMBALL និងសមរាត្រី appeared first on Kampuchea Thmey Daily.

ជាក់ស្តែង ព្រឹត្តិការណ៍សមរាត្រីអង្គរ មានន័យសាមញ្ញ ថាជារយៈពេលថ្ងៃនិងយប់ស្មើគ្នា ត្រូវនឹងព្រឹត្តិការណ៍ព្រះអាទិត្យរះ នៅចំកំពូលកណ្ដាលនៃប្រាង្គអង្គរ ដែលតែងកើតមាន២ដង ជារៀងរាល់ឆ្នាំ ពោលនៅរដូវប្រាំង ព្រឹត្តិការណ៍នេះ នឹងកើតឡើងនៅអំឡុងខែមីនា និងសមរាត្រីរដូវវស្សា កើតឡើនៅអំឡុងខែកញ្ញា ហើយតែងអូសទាញទេសចរជាតិ-អន្តរជាតិ បានច្រើនបំផុត។

ដោយឡែក ក្រៅពីប្រាសាទអង្គរវត្ត ព្រះរាជាណាចក្រកម្ពុជា នៅមានកន្លែងដែលអាចគយគន់ សូរិយារៀបអស្តង្គត ដ៏ស្រស់ស្អាតនៅតំបន់ប្រាសាទផ្សេងទៀត ដែលទេសចេជាតិ និងអន្តរជាតិ បានផ្តិតយករូបភាពទាំងនោះ មកចែករំលែកតាមរយៈបណ្តាញទំនាក់ទំនងសង្គមផងដែរ ដែលក្នុងនោះរួមមាន៖

ថ្ងៃលិចនៅ ប្រាសាទភ្នំបាក់ខែង (ខេត្តសៀមរាប) ជាកន្លែងគយគន់ថ្ងៃលិច ដ៏ពេញនិយមបន្ទាប់ពី ការទស្សនាថ្ងៃរះ នៅមុខបរិវេណប្រាសាទអង្គរវត្ត។

ថ្ងៃលិច នៅច្រកទ្វារខាងលិច ប្រាសាទអង្គរធំ ក្លោងទ្វារនេះ ត្រូវបានក្លាយជាទីចាប់អារម្មណ៍ សម្រាប់អ្នកធ្វើដំណើរកាត់ ដោយពុំអាចរំលងបាន នូវការសំចតដើម្បីផ្តិតយករូបភាពឡើយ។

ថ្ងៃលិច នៅក្លោងទ្វារទន្លេអ៊ំ មិនត្រឹមជាតំបន់ដ៏ពេញនិយម សម្រាប់ការជិះទូកក្បាច់បុរាណ ថតរូបអាពាហ៍ពិពាហ៍ សម្រាប់គូស្នេហ៍ភរិយាទេ តែទិដ្ឋភាពថ្ងៃលិចនៅទីនេះ បូករួមនឹងសម្រស់ដើមឈើទាបខ្ពស់ ដែលដុះប្របមាត់ទឹក ក៏ជាទីរម្យនាសម្រាប់ការទស្សនាថ្ងៃលិច របស់ទេសចរផងដែរ។

ថ្ងៃលិច នៅប្រាសាទនាគព័ន្ធ ដែលជាសំណង់ប្រាសាទរាងដូចសញ្ញាលេខបូក លើបរិវេណបឹងដ៏ធំនេះ មិនត្រឹមជាទីសក្ការៈ ដែលអ្នកស្រុកមានជំនឿនៃការបន់ស្រន់ សុំធូរស្បើយពីរោគប៉ុណ្ណោះទេ ក៏ជាកន្លែងទស្សនាថ្ងៃលិចដ៏ស្រស់ស្អាតផងដែរ។

The post គំនិតនៃស្ថាបត្យកម្មដ៏អស្ចារ្យ ដូនតាខ្មែរ ធ្វើឱ្យសៀមរាប ក្លាយជាកន្លែងមើលថ្ងៃរះ និងលិច ទាក់ទាញទេសចរបំផុត appeared first on Kampuchea Thmey Daily.

ដោយសារអាកាសធាតុនាព្រឹកព្រលឹមនេះ មានអំណោយផលល្អ ភ្ញៀវទេសចរអាចទស្សនា និងផ្តិតយកទិដ្ឋភាពថ្ងៃរះ គួរទីជាគយគនបានយ៉ាងរីករាយ។

គួរឱ្យដឹងថា ព្រឹត្តិការណ៍រាត្រី មានន័យសាមញ្ញ ថាជារយៈពេលថ្ងៃនិងយប់ស្មើគ្នា ត្រូវនឹងព្រឹត្តិការណ៍ព្រះអាទិត្យរះ នៅចំកំពូលកណ្ដាលនៃប្រាសាទអង្គរវត្ត ដែលគេអាចមើលឃើញច្បាស់ពីគុកតារាជ។ ព្រឹត្តិការណ៍សមរាត្រី (Equinox) តែងតែកើតមាន២ដង ជារៀងរាល់ឆ្នាំ គឺនៅរដូវប្រាំង (Vernal Equinox) កើតទ្បើងនៅចន្លោះថ្ងៃទី២១ ទី២២ ទី២៣ ខែមីនា និងសមរាត្រីរដូវវស្សា (Autumnal Equinox) កើតទ្បើងនៅចន្លោះថ្ងៃទី២១ ទី២២ ទី២៣ខែកញ្ញា។

បុរាណវិទូ និងជាប្រធាននាយកដ្ឋានអភិរក្សប្រាសាទ  ក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា លោក អ៊ឹម សុខរិទ្ធី​ ធ្លាប់បានលើកឡើងថា សម្រាប់ប្រាសាទអង្គរវត្ត ដែលមានព្រឹត្តិការណ៍សមរាត្រីកើតឡើងនេះ មិនមែនជារឿងចៃដន្យឡើយ។ មិនចៃដន្យ ព្រោះថាព្រឹត្តិការណ៍នេះមានលក្ខណៈពិសេសត្រង់ថាបុព្វបុរសខ្មែរ ដែលរៀបចំស្ថាបត្យកម្មប្លង់របស់ប្រាសាទទុកមុន​ជាស្រេច ដោយ​បំណងតម្រូវ​តាម​បាតុភូតធម្មជាតិ​ឱ្យប្រាសាទអង្គរវត្ត​ បង្កើតជាព្រឹត្តិការណ៍ថ្ងៃរះចំកំពូលកណ្ដាលនៃប្រាសាទអង្គរវត្ត​នេះឡើង៕

អត្ថបទ៖ ជុន កុសល

The post ភ្ញៀវទេសចរជាង១ម៉ឺននាក់ បានមកទស្សនាព្រឹត្តិការណ៍ថ្ងៃរះចំកំពូលកណ្តាលប្រាសាទអង្គរវត្ត appeared first on Kampuchea Thmey Daily.

ព្រឹត្តិការណ៍សមរាត្រីអង្គរឆ្នាំ២០២៤ នេះ ក្រសួងទេសចរណ៍ ក៏មានរៀបចំការប្រកួតប្រជែងរូបថត “សមរាត្រីអង្គរអច្ឆរិយៈ” ផងដែរ ដែលអនុញ្ញាតឱ្យភ្ញៀវទេសចរជាតិ-អន្ដរជាតិ ព្រមទាំងមហាជនទូទៅ អាចចូលរួមប្រកួតថតរូបស្អាតៗ ក្នុងព្រឹត្តិការណ៍នេះ។ ក្នុងនោះ ក្រសួងទេសចរណ៍ មានត្រៀមរង្វាន់ជូនដល់អ្នកដែលផ្តិតរូបភាពបានស្អាតជាងគេ ក្នុងព្រឹត្តិការណ៍នេះផងដែរ ចាប់ពី ១ លានរៀល ដល់ ៣លានរៀល ដោយរួមទាំងលិខិតសរសើរ។

គួរជម្រាបដែរថា ការប្រកួតប្រជែងរូបថត សមរាត្រីអង្គរអច្ឆរិយៈនេះ ក្រុមការងាររបស់ក្រសួង នឹងជ្រើសយករូបថតដែលស្អាតជាងកេចំនួន ១០សន្លឹក ដើម្បីផ្សព្វផ្សាយនៅលើគេហទំព័រ និងប្រព័ន្ធផ្សព្វផ្សាយនានា របស់ក្រសួងទេសចរណ៍ ហើយក្នុងចំណោមនោះ មានតែជយលាភី ៣ រូបប៉ុណ្ណោះ ដែលទទួលបានប្រាក់រង្វាន់។ ចំណែកឯការប្រកួតប្រជែងរូបថត គឺតម្រូវឱ្យរូបថតដែលចូលរួមប្រកួត ជារូបដែលថតដោយផ្ទាល់ ហើយអ្នកចូលរួម មានពេល ៥ថ្ងៃ ដើម្បីធ្វើការផ្ញើរូបថតរបស់ខ្លួនចូលរួមប្រកួត ពោលគឺចាប់ពីថ្ងៃទី២០ ដល់ថ្ងៃទី២៥ ខែមីនា ឆ្នាំ២០២៤ ៕

The post ស្អែកនេះ ព្រឹត្តិការណ៍សមរាត្រីអង្គរ មកដល់ហើយ កុំភ្លេចត្រៀមផ្តិតរូបស្អាតៗផ្សព្វផ្សាយទេសចរណ៍កម្ពុជា appeared first on Kampuchea Thmey Daily.