លោក កាំង ម៉ូនីកា អគ្គលេខាធិការរងសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានមានប្រសាសន៍នៅថ្ងៃទី១១ ខែធ្នូថា ក្រសួងការងារ និងបណ្ដុះបណ្ដាលវិជ្ជាជីវៈ ដែលមានឯកឧត្ដម ហេង សួរ ជារដ្ឋមន្ត្រី និងមន្ត្រីក្រោមឱវាទពាក់ព័ន្ធពិតជាបានជួយអស់ពីសមត្ថភាព និងប្រកបដោយប្រសិទ្ធភាព ក្នុងការជួយរកការងារជូនបងប្អូនអតីតពលករត្រឡប់មកពីថៃ ក៏ដូចជាតម្រូវការកម្លាំងពលកម្មរបស់រោងចក្រ។

លោកថា «ពីមុនយើងធ្លាប់ខ្វះកម្មករខ្លាំង តែពេលនេះបញ្ហានេះ ត្រូវបានដោះស្រាយជាអតិបរមា»។ លោក កាំង ម៉ូនីកា បានឱ្យដឹងដែរថា កន្លងមក សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានចូលរួមក្នុងសកម្មភាពជាច្រើនជាមួយក្រសួងការងារ និងបណ្ដុះបណ្ដាលវិជ្ជាជីវៈ ដើម្បីជួយស្វែងរកការងារឱ្យបងប្អូនអតីតពលករត្រឡប់មកពីថៃ ជាពិសេសការចូលរួមក្នុងពិព័រណ៍ការងារតាមបណ្តាខេត្តនានា ដោយសមាគមបានផ្សព្វផ្សាយ និងកៀរគរឱ្យរោងចក្រជាច្រើនចូលរួម ផងដែរ។

បើតាមអគ្គលេខាធិការរង TAFTAC ដដែល រោងចក្រក្នុងវិស័យកាត់ដេរនៅមានតម្រូវការកម្លាំងពលកម្មបន្ថែមទៀត ខណៈដែលរោងចក្រថ្មី ក៏បាននិងកំពុងបើកដំណើការ និងត្រូវការកម្លាំងពលកម្មជាបន្តបន្ទាប់។

ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវវិធានការជាច្រើន ដើម្បីជួយស្វែងរកការងារឱ្យបងប្អូនអតីតពលករត្រឡប់មកពីថៃបានធ្វើ ដោយក្នុងនោះក្រសួង បានរៀបចំពិព័រណ៍ការងារ និងវេទិកាការងារជិត ៦០០លើករួចមកហើយ។

គួរឱ្យដឹងថា មកដល់ពេលនេះ បងប្អូនអតីតពលករត្រឡប់មកពីប្រទេសថៃ បានទទួលការងារធ្វើតាមរយៈយន្ដការរបស់ក្រសួងមានចំនួនជាង ៣០ម៉ឺននាក់ហើយ។ ចំណែកឯបងប្អូនអតីតពលកររាប់ម៉ឺននាក់ផ្សេងទៀត បានទទួលការងារធ្វើនៅតាមការដ្ឋានសំណង់ សិប្បកម្ម និងភោជនីយដ្ឋាន ជាដើម។

ក្រសួងការងារ បានឱ្យដឹងថា នាពេលបច្ចុប្បន្ន នៅសល់ឱកាសការងារនៅសល់ជាង ៨ម៉ឺនកន្លែងថែមទៀត កំពុងរង់ចាំបងប្អូនអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ ដែលឱកាសការងារទាំងនោះ ស្ថិតក្នុងវិស័យកសិកម្ម ឧស្សាហកម្ម និងវិស័យសេវាកម្ម៕

The post សមាគម TAFTAC៖ ក្រសួងការងារ ពិតជាបានប្រឹងប្រែងក្នុងការជួយស្វែងរកការងារឱ្យបងប្អូនអតីតពលករ appeared first on Kampuchea Thmey Daily.

សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានចេញសេចក្តីថ្លែងការណ៍គាំទ្រចំពោះការសម្រេចបាននូវបទឈប់បាញ់ដោយឥតលក្ខខណ្ឌដែលជាការត្រួសត្រាយផ្លូវដលដល់កម្ពុជា-ថៃឈានដល់ការសន្ទនា និងការចរចាដោយសន្តិវិធីផ្អែកលើការទូត និងច្បាប់អន្តរជាតិ។

យោងតាមសេចក្តីថ្លែងការណ៍របស់ TAFTAC នៅល្ងាចថ្ងៃទី២៩ ខែកក្កដា សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) សូមអបអរសាទរយ៉ាងកក់ក្តៅចំពោះរាជរដ្ឋាភិបាលកម្ពុជា និងព្រះរាជាណាចក្រថៃ ក្នុងការឈានដល់បទឈប់បាញ់ឥត លក្ខខណ្ឌ ដោយត្រួសត្រាយផ្លូវសម្រាប់ការសន្ទនានិងការចរចាដោយសន្តិវិធីផ្អែកលើការទូត និងច្បាប់អន្តរជាតិ ដើម្បីនាំមកនូវសន្តិភាពយូរអង្វែងនៅតាមព្រំដែននៃប្រជាជាតិទាំងពីរ។

«សមាគមសូមសរសើរចំពោះការដឹកនាំដ៏ខ្លាំងរបស់ សម្តេចមហាបវរធិបតី ហ៊ុន ម៉ាណែត ដែលការ ខិតខំប្រឹងប្រែងមិនចេះនឿយហត់និងការប្តេជ្ញាចិត្តឥតងាករេដើម្បីសន្តិភាពរបស់លោក បានជួយនាំមកនូវ ផ្លែផ្កាសម្រាប់ស្ថានការណ៍ដ៏សំខាន់នេះ។ សមាគមក៏សូមថ្លែងអំណរគុណផងដែរ ចំពោះការគាំទ្ររបស់ ប្រធានាធិបតី ដូណាល់ ត្រាំ និងការសម្របសម្រួលដោយ នាយករដ្ឋមន្ត្រីម៉ាឡេស៊ី និងការចូលរួម ប្រកបដោយការស្ថាបនាពីសាធារណរដ្ឋប្រជាមានិតចិន ក្នុងការធ្វើឱ្យបទឈប់បាញ់ឥតលក្ខខណ្ឌនេះ អាចធ្វើទៅបាន»។ នេះបើយោងតាមសេចក្តីថ្លែងការណ៍នេះ។

TAFTAC ក៏​ចូលរួមរំលែកទុក្ខដ៏ក្រៀមក្រំបំផុតដល់គ្រួសារយោធិន និងជនស៊ីវិលកម្ពុជា ដែលបានពលីជីវិតក្នុងជម្លោះនេះ។ យើងនឹងមិនភ្លេចឡើយចំពោះការលះបង់របស់ពួកគាត់។

«យើងសង្ឃឹមយ៉ាងមុតមាំថា បទឈប់បាញ់នេះគឺជាការចាប់ផ្តើមនៃសន្តិភាពប្រកបដោយនិរន្តរភាព និងយូរ អង្វែងរវាងកម្ពុជានិងថៃ។ ក្នុងនាមសហគមន៍ធុរកិច្ច យើងមើលឃើញថា នេះជាឱកាសដ៏សំខាន់មួយ ដើម្បី ឆ្ពោះទៅមុខដោយការគោរពគ្នាទៅវិញទៅមក សន្តិភាព និងការអភិវឌ្ឍដើម្បីផលប្រយោជន៍របស់ប្រទេសទាំង ពីរនិងតំបន់អាស៊ានទាំងមូល»។ នេះបើយោងតាម TAFTAC។

 កាលពីរសៀលថ្ងៃទី២៩ ខែកក្កដា លោកនាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារជាតិកម្ពុជា បានជួបជាមួយលោកនាយឧត្តមសេនីយ៍ តាន់ស្រ៊ី អេចជេ ម៉ូដ នីហ្សាមប៊ីន អេចជេ ចាហ្វា អគ្គមេញ្ជាការកងទ័ពម៉ាឡេស៊ី ​ពិភាក្សាគ្នាពាក់ព័ន្ធនឹងទំនាស់ព្រំដែនកម្ពុជា-ថៃ ព្រមទាំងការអនុវត្តកិច្ចព្រមព្រៀងបទឈប់បាញ់ ដែល​បាន​ឯកភាព​គ្នានៅទីក្រុង​កូឡាឡាំពួរ ក្រោមការជួយសម្របសម្រួលពីនាយករដ្ឋមន្ត្រីម៉ាឡេស៊ី និងមានការគាំទ្រពីអាមេរិក និងចិន កាលពីថ្ងៃទី២៨ ខែកក្កដា។

នៅម៉ោងប្រមាណ១១ ថ្ងៃទី៣០ ខែកក្កដានេះ អង្គទូត និងអនុព័ន្ធយោធានៃប្រទេសចំនួន១៣ អ្នកសារព័ត៌មានជាតិ និងអន្តរជាតិ បានចុះទៅដល់ខេត្តព្រះវិហារ និងកំពុងពិនិត្យមើលអំពីការខូចខាតព្រោះតែការបាញ់ប្រហារពីសំណាក់ថៃ និងឃ្លាំមើលអំពីការអនុវត្តបទឈប់បាញ់រវាងកងទ័ពកម្ពុជា-ថៃ៕

The post សមាគមកាត់ដេរនៅកម្ពុជាគាំទ្រចំពោះបទឈប់បាញ់ដោយឥតលក្ខខណ្ឌរវាងកម្ពុជា-ថៃ appeared first on Kampuchea Thmey Daily.

សមាគមរោងចក្រកាត់ដេរ វាយនភ័ណ្ឌ ស្បែកជើង និងផលិតផលអ្នកដំណើរនៅកម្ពុជា (TAFTAC) បានសម្តែងសាទរជាមួយការសម្រេចរបស់តុលាការពាណិជ្ជកម្មអន្តរជាតិរបស់សហរដ្ឋអាម៉េរិកប្រឆាំងនឹងការដាក់ពន្ធមូលដ្ឋាន និងគម្រោងដាក់ពន្ធគយបដិការរបស់លោកប្រធានាធិបតី ដូណាល់ ត្រាំដែលបានប្រកាសកាលពីដើមខែមេសាកន្លងទៅនេះ។

យោងតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ តុលាការពាណិជ្ជកម្មមួយរបស់សហរដ្ឋអាមេរិក​ បាន​សម្រេចហាមឃាត់ការអនុវត្តពន្ធរបស់លោក​ ដូណាល់ ត្រាំ កាលពីថ្ងៃពុធ ដោយ​រកឃើញថា ប្រធានាធិបតីអាមេរិករូបនេះបានធ្វើលើសពីអំណាចរបស់ខ្លួន​ចំពោះការដំឡើងពន្ធលើទំនិញនាំចូលពីដៃគូពាណិជ្ជកម្មរបស់អាមេរិក។

តុលាការសហរដ្ឋអាមេរិកសម្រាប់ពាណិជ្ជកម្មអន្តរជាតិ បាន​ប្រកាសថា រដ្ឋធម្មនុញ្ញរបស់សហរដ្ឋអាមេរិកផ្តល់ឱ្យសភានូវសិទ្ធិអំណាចផ្តាច់មុខក្នុងការគ្រប់គ្រងពាណិជ្ជកម្មជាមួយប្រទេសផ្សេងទៀត ហើយអំណាចរបស់ប្រធានាធិបតីមិនអាចបំពានវាបាននោះទេ។​

​តុលាការ​ក៏ចាត់ទុកជាមោឃៈភ្លាមៗផងដែរ នូវរាល់ការបញ្ជាទិញពន្ធរបស់ ត្រាំ ដែលបានចេញឡើងតាំងពីខែមករា ក្រោមច្បាប់ស្តីពីអំណាចសេដ្ឋកិច្ចក្នុងគ្រាអាសន្នអន្តរជាតិ (IEEPA) ដែលជាច្បាប់មួយប្រើសម្រាប់ពេលមាន​ការគំរាមកំហែង «​មិនធម្មតា និងវិសាមញ្ញ»អំឡុងពេលមានអាសន្នជាតិ។

​​​លោក ត្រាំ ​បានដំឡើងពន្ធស្ទើរតែគ្រប់ប្រទេស និងតំបន់ ដោយ​មិនលើកលែងឡើយ​ សូម្បីតែសម្ព័ន្ធមិត្ត និងដៃគូពាណិជ្ជកម្ម​សំខាន់ៗ ដូចជាកាណាដា ម៉ិកស៊ិក និងសហភាពអឺរ៉ុប ខណៈកម្ពុជាទទួលរងនូវពន្ធបដិការនេះក្នុងអត្រាមួយដ៏ខ្ពស់ជាងគេគឺ៤៩%។

TAFTAC បានចេញនូវសេចក្តីជូនដំណឹងបច្ចុប្បន្នភាពសម្រាប់សមាជិករបស់ខ្លួននៅព្រឹកថ្ងៃទី២៩ ខែឧសភានេះអំពី តុលាការពាណិជ្ជកម្មអាម៉េរិកសម្រេចបញ្ឈប់ការអនុវត្តពន្ធគយបដិការរបស់លោក ប្រធានាធិបតី ដូណាល់ ត្រាំ។

សមាគមសូមជម្រាបសមាជិកទាំងអស់អំពីការវិត្តន៍ដ៏សំខាន់មួយចំពោះគោលនយោបាយពាណិជ្ជកម្មរបស់ សហរដ្ឋអាម៉េរិក។ នៅថ្ងៃទី២៨ ខែឧសភា ឆ្នាំ២០២៥ តុលាការពាណិជ្ជកម្មអន្តរជាតិរបស់សហរដ្ឋអាម៉េរិកបាន សម្រេចថាពន្ធគយ ទិវារំដោះ»របស់លោកប្រធានាធិបតី ដូណាល់ ត្រាំ ដែលដាក់អត្រាពន្ធមូលដ្ឋាន១០%លើ ការនាំចូជាច្រើន គឺខុសច្បាប់។ តុលាការបានសម្រេចថាពន្ធនេះលើសពីសិទ្ធិអំណាចដែលបានផ្តល់ឱ្យក្រោម ច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ដោយសង្កត់ធ្ងន់ថាអំណាចក្នុងការដាក់បញ្ញត្តិពាណិជ្ជកម្មគឺ ស្ថិតនៅសភា។

«យោងតាមការពន្យល់ណែនាំពីក្រុមហ៊ុនឡប់ប៊ីដែលមានមូលដ្ឋាននៅទីក្រុងវ៉ាស៊ីនតោនរបស់សមាគមយើង នេះគឺជាសេចក្តីសម្រេចដ៏ធំមួយរបស់តុលាការ ដែលនឹងរារាំងការអនុវត្តបន្ថែមទៀតក្នុងការដាក់ពន្ធរបស់លោក ប្រធានាធិបតីត្រាំ។ វាជាសេចក្តីសម្រេចដ៏ធំមួយរបស់តុលាការ ដែលសម្រេចជាឯកច្ឆន្ទដោយចៅក្រមទាំងបី រូប»។
បើយោងតាម TAFTAC ដើម្បីជំទាស់នឹងសេចក្តីសម្រេចនេះ លោកប្រធានាធិបតីអាចប្តឹងឧទ្ធរណ៍ប្រឆាំងនឹងសេចក្តីសម្រេចនេះ។ បណ្ដឹងឧទ្ធរណ៍ដំបូងនឹងទៅសាលាឧទ្ធរណ៍ ហើយបន្ទាប់មកអាចទៅតុលាការកំពូល។ សម្រាប់ពេលបច្ចុប្បន្ន នេះ សេចក្តីសម្រេចរបស់តុលាការនេះបានបញ្ឈប់ការយកពន្ធបដិការ។

លោក កាំង ម៉ូនីកា អគ្គលេខាធិការរង សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជាបានថ្លែងនៅក្នុងវេទិកាសេដ្ឋកិច្ចកម្ពុជាកាលពីថ្ងៃទី២៦ថា ទីផ្សារអាមេរិកគឺជាទីផ្សារធំមួយសម្រាប់ការនាំចេញផលិតផលសម្លៀកបំពាក់ ស្បែកជើង ជាពិសេសផលិផលអ្នកដំណើរ។

លោកថាគិតមកដល់បច្ចុប្បន្នកម្ពុជាមានរោងចក្រកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ ប្រមាណជាង១ ៥០០រោងចក្រ ដែលមានកម្មករធ្វើការក្នុងវិស័យនេះជិត១លាននាក់ និង៣លាននាក់ទៀតបានកំពុងអាស្រ័យផលពីវិស័យនេះ៕

The post TAFTAC សាទរចំពោះការសម្រេចរបស់តុលាការអាមេរិកចំពោះការលុបចោលពន្ធបដិការ និងពន្ធមូលដ្ឋាន១០%របស់ត្រាំ appeared first on Kampuchea Thmey Daily.

លោក ខេន លូ បានថ្លែងប្រាប់កម្ពុជាថ្មីថា ពន្ធគយត្រូវបានដាក់លើប្រទេសស្ទើរតែទាំងអស់ រួមទាំងដៃគូប្រកួតប្រជែងរបស់កម្ពុជាផងដែរ ដែលក្នុងនោះកម្ពុជានឹងទទួលរងពន្ធគយបដិការប្រមាណ៤៩% វៀតណាម ៤៦% និងស្រីលង្កាចំនួន ៤៤%។​ ​

លោកថា៖«ដូច្នេះ វាពិតណាស់នឹងមានផលប៉ះពាល់នៃការកាត់បន្ថយតម្រូវការសកល។ ក៏​នឹង​មាន​ការ​កំណត់​តម្លៃ​ផង​ដែរ។ អ្នកទិញអាចស្នើសុំលក្ខខណ្ឌឥណទានយូរជាងនេះ ដែលបណ្តាលឱ្យសាច់ប្រាក់ងាយស្រួលក៏នឹងមានតិចផងដែរ»។

«យើងមិនដឹងទេ ប៉ុន្តែយើងសង្ឃឹមថា សហរដ្ឋអាមេរិកនឹងពិចារណាលើចំណាត់ការដែលបានដាក់ចេញដោយរដ្ឋាភិបាលកម្ពុជា ហើយប្រសិនបើរដ្ឋាភិបាលអាមេរិកទទួលយន្តការឆ្លើយតបរបស់កម្ពុជាមែន ការណ៍នេះគឺជាសញ្ញានៃសុច្ឆន្ទៈ និងចេតនាក្នុងការចរចាគ្នា»។ នេះបើយោងតាមការថ្លែងបញ្ជាក់របស់លោក ខេន លូ។

កាលពីថ្ងៃទី៣ ខែមេ សា ឆ្នាំ២០២៥ ថ្មីៗនេះ ប្រធានាធិបតីសហរដ្ឋអាមេរិក “បានប្រកាសដំឡើងពន្ធ ៤៩% សម្រាប់ទំនិញ ផលិតផលនាំចូលពីកម្ពុជា​ ក៏ដូចគ្នានឹងបណ្តាប្រទេសក្នុងតំបន់អាស៊ាន និងប្រទេសជាច្រើនលើសកល លោក បានកំពុងរងការដំឡើងពន្ធលើផលិតផលនាំចូលទៅសហរដ្ឋអាមេរិក ហើយការអនុវត្តនឹងចូលជា ធរមាននៅថ្ងៃទី០៩ ខែមេសា ឆ្នាំ២០២៥។

កាលពីថ្ងៃទី៤ ខែមេសា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងតាមរយៈលិខិតស្នើសុំការចរចារជាមួយលោកដូណាល់ត្រាំ ជុំវិញការដាក់ពន្ធមកលើទំនិញកម្ពុជាថា កម្ពុជានឹងកាត់​បន្ថយ​ការ​យក​ពន្ធលើទំនិញនាំចូលរបស់អាមេរិកចំនួន ១៩ ប្រភេទពី ៣៥% មក ៥%។ ជាការឆ្លើយតបនឹងការប្រកាសរបស់លោក ដូណាល់ ត្រាំ នៅថ្ងៃទី ០២ ខែមេសា ឆ្នាំ ២០២៥ អនុវត្តពន្ធ ៤៩% លើទំនិញកម្ពុជាចាប់ពីថ្ងៃទី ០៩ ខែមេសា ឆ្នាំ ២០២៥ កម្ពុជាស្នើសុំចរចារជាមួយរដ្ឋបាលរបស់លោក ត្រាំ ភ្លាមៗ និងស្នើឱ្យរដ្ឋបាលរដ្ឋរបស់លោកត្រាំ ពន្យាការអនុវត្តពន្ធនាំចូលថ្មីនេះ។

សម្ដេច ហ៊ុន ម៉ាណែត មានប្រសាសន៍ថា៖«ខ្ញុំសូមជម្រាបជូនឯកឧត្តមផងដែរថា អត្រាពន្ធនាំចូលខ្ពស់បំផុតដែលកម្ពុជាកំពុងអនុវត្តជាទូទៅ​មានត្រឹមតែ ៣៥% ប៉ុណ្ណោះ។ ក្នុងគោលបំណងបង្ហាញនូវសុឆន្ទៈ និងក្នុងស្មារតីនៃការពង្រឹងទំនាក់ទំនងពាណិជ្ជកម្មទ្វេភាគីរបស់យើង, កម្ពុជាប្តេជ្ញាចិត្តខ្ពស់ ក្នុងការជំរុញការ-នាំចូលទំនិញពីសហរដ្ឋអាមេរិក ជាមួយនឹងការបន្ថយភ្លាមៗនូវអត្រាពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%»។

​ជាមួយគ្នានេះដែរកាលពីថ្ងៃទី​៧ ខែមេសា ឆ្នាំ២០២៥ លោក សុក ស៊ីផាន់ណា ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានគណៈកម្មាធិការផ្តល់យោបល់លើគោលនយោបាយពាណិជ្ជកម្ម (គ.ផ.គ.ព.) បានដឹកនាំកិច្ចប្រជុំវិសាមញ្ញមួយរបស់ គ.ផ.គ.ព. លើការឆ្លើយតបរបស់កម្ពុជាចំពោះការដាក់ពន្ធគយបដិការ របស់សហរដ្ឋអាមេរិកមកលើកម្ពុជា។

កិច្ចប្រជុំនេះ មានការចូលរួមពីក្រុមការងារអន្តរក្រសួង-ស្ថាប័ន សមាជិក សមាជិក នៃគណៈកម្មាធិការ តំណាងសមាគម​វាយ​ន​ភណ្ឌ​ សម្លៀក​បំពាក់​ ស្បែកជើង​ និង​ទំនិញ​ធ្វើ​ដំណើរ​ (TAFTAC) ក្រុមការងារយុទ្ធសាស្ត្រ លេខាធិការដ្ឋាន គ.ផ.គ.ព. និងតំណាងវិស័យឯកជន ព្រមទាំងគណៈប្រតិភូជាន់ខ្ពស់មកពីសភាពាណិជ្ជកម្មអាមេរិក (AmCham) ដើម្បីផ្លាស់ប្តូរទស្សនៈទៅលើផលប៉ះពាល់ពាណិជ្ជកម្ម និងស្វែងរកដំណោះស្រាយសមស្របមួយ ក្នុងកម្រិតពេលខ្លី និងមធ្យម ដើម្បីការពារផលប្រយោជន៍សេដ្ឋកិច្ចកម្ពុជា ក៏ដូចជារក្សាទំនាក់ទំនងពាណិជ្ជកម្មរវាងសហរដ្ឋអាមេរិក និងកម្ពុជា៕

The post TAFTAC សង្ឃឹមថារដ្ឋបាលត្រាំនឹងពិចារណាលើសំណើរចរចារបស់កម្ពុជា appeared first on Kampuchea Thmey Daily.

សម្រាប់​ឆ្នាំ ២០២៣ ខាងមុខ រាជរដ្ឋាភិបាល បាន​សម្រេច​តម្លើង​ប្រាក់​ឈ្នួល​កម្មករ​និយោជិត​ផ្នែក​វាយនភណ្ឌ កាត់ដេរ ផលិត​ស្បែកជើង និង​ផលិតផល​ធ្វើដំណើរ និង​កាបូប ចំនួន ២០០ ដុល្លារ​អាមេរិក កើន ៦ ដុល្លារ បើ​ធៀប​ទៅ​នឹង​ប្រាក់​ឈ្នួល​ឆ្នាំ ២០២២ ដែល​មាន​ត្រឹម ១៩៤ ដុល្លារ​ប៉ុណ្ណោះ។

លោក កាំង ម៉ូនីកា អគ្គលេខាធិការ​រង​សមាគម​រោងចក្រ​កាត់ដេរ​នៅ​កម្ពុជា​បាន​មាន​ប្រសាសន៍​នៅ​ព្រឹក​ថ្ងៃ​ទី ៣១ ធ្នូ​នេះ​ថា «យើងខ្ញុំ​ស្នើ​ឲ្យ​បងប្អូន​កម្មករ​បន្ត​យកចិត្តទុកដាក់​លើ​ការងារ និង​ផ្ដល់​នូវ​កិច្ច​សហការ​ល្អ​ជាមួយ​ថ្នាក់​គ្រប់គ្រង​»។

លោក​បាន​បន្ត​ថា ប្រាក់​ឈ្នួល​ថ្មី​ចំនួន ២០០ ដុល្លារ​អាមេរិក​នេះ ជា​ប្រាក់​ឈ្នួល​មួយ​ខ្ពស់ បើ​ប្រៀប​ធៀប​ទៅ​នឹង​បណ្ដា​ប្រទេស​មួយ​ចំនួន​នៅ​តំបន់​អាស៊ាន​ដូចជា ភូមា ឡាវ និង​វៀតណាម​ជាដើម។ ប៉ុន្តែ​នៅ​កម្ពុជា ផលិតភាព​នៅ​មាន​កម្រិត​ទាប​នៅឡើយ។

លោក កាំង ម៉ូនីកា ធ្លាប់​បាន​លើក​ឡើង​ថា បច្ចុប្បន្ន​នេះ​អ្វី​ដែល​យើង​អាច​ប្រកួតប្រជែង​ជាមួយ​ប្រទេស​ផ្សេង​បាន គឺ​ការ​អនុគ្រោះ​ផ្នែក​ពាណិជ្ជកម្ម​ជា​ចំណុច​ដ៏​ធំ​ដែល​អាច​ជួយ​យើង។ ប៉ុន្តែ​យើង​ត្រូវ​ត្រៀមខ្លួន​ជិត​ចាកចេញ​ពី​ប្រទេស​មាន​ប្រាក់ចំណូល​មធ្យម​កម្រិត​ទាប ទៅជា​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់​នា​ពេល​ខាងមុខនេះ យើង​បាត់បង់​ការ​អនុគ្រោះ​ផ្នែក​ពាណិជ្ជកម្ម ពេលនោះ​ហើយ​ធ្វើ​ឲ្យ​យើង​បាត់បង់​ការ​ប្រកួតប្រជែង។

ចំណែក លោក​ឧកញ៉ា ណាង សុធី ភាគី​តំណាង​ឲ្យ​ភាគី​និយោជក ក៏​ធ្លាប់​បាន​ជំរុញ​រដ្ឋាភិបាល ជួយ​បង្កើន​គុណភាព​បណ្ដុះបណ្ដាល​លើ​វិស័យ​កាត់ដេរ​ឲ្យ​កាន់​តែ​មាន​កម្រិត​ខ្ពស់ ដើម្បី​កម្មករ​យើង​អាច​មាន​សមត្ថភាព​ផលិតភាព​បាន​ខ្ពស់​ដែរ ដើម្បី​ទាក់ទាញ​ផលិតផល​ដែល​មាន​តម្លៃ​ខ្ពស់​មក​កម្ពុជា​ផង​ដែរ។

គួរ​បញ្ជាក់​ថា កិច្ច​ប្រជុំ​ក្រុម​ប្រឹក្សា​ប្រាក់​ឈ្នួល​អប្បបរមា​កាលពី​ថ្ងៃ​ទី ២១ ខែ​កញ្ញា ឆ្នាំ ២០២២ កន្លង​ទៅ​នេះ បាន​សម្រេច​តម្លើង​ប្រាក់​ឈ្នួល​កម្មករ​និយោជិត​ចំនួន ១៩៨ ដុល្លារ ប៉ុន្តែ សម្ដេច​នាយករដ្ឋមន្ត្រី​តេ​ជោ ហ៊ុន សែន បាន​ជួយ​ឧបត្ថម្ភ​បន្ថែម​ចំនួន ២ ដុល្លារ​បន្ថែម​ទៀត ធ្វើ​ឲ្យ​ប្រាក់​ឈ្នួល​របស់​កម្មករ​និយោជិត​កើន​ឡើង​ដល់ ២០០ ដុល្លារ។

ប៉ុន្តែ​បើ​បូក​នឹង​ប្រាក់​អត្ថប្រយោជន៍​ផ្សេងៗ​ទៀត​ដូចជា ប្រាក់​សោហ៊ុយ​ធ្វើដំណើរ និង​ស្នាក់នៅ​ចំនួន ៧ ដុល្លារ​អាមេរិក ក្នុង​មួយ​ខែ ប្រាក់​រង្វាន់​ធ្វើការ​ទៀងទាត់​ចំនួន ១០ ដុល្លារ​អាមេរិក ក្នុង​មួយ​ខែ ប្រាក់​ថ្លៃ​បាយ​សម្រាប់​ការ​ធ្វើ​ការងារ​បន្ថែម​ម៉ោង​ដោយ​ស្ម័គ្រចិត្ត​ចំនួន ២,០០០ រៀល ក្នុង​មួយ​ម៉ោង ឬ​ការ​ទទួល​បាន​បាយ​មួយ​ពេល​ដោយ​ឥតគិតថ្លៃ និង​ប្រាក់​រង្វាន់​អតីតភាព​ការងារ​ចាប់ពី ២ ទៅ ១១ ដុល្លារ​អាមេរិក ក្នុង​មួយ​ខែ សម្រាប់​កម្មករ​និយោជិត​ដែល​បាន​ធ្វើការ​ចាប់ពី​ឆ្នាំ​ទី ២ ដល់​ឆ្នាំ​ទី ១១។ ដូចនេះ ជា​មធ្យម កម្មករ​និយោជិត​ម្នាក់ៗ នឹង​ទទួល​បាន​ប្រាក់​ឈ្នួល​យ៉ាងតិច​ចំនួន​ពី ២១៧ ទៅ ២៣២ ដុល្លារ​អាមេរិក ក្នុង​មួយ​ខែ៕

អត្ថបទ ៖ សំអឿន

The post មន្ត្រីសមាគមកាត់ដេរ ស្នើកម្មករ បន្តយកចិត្តទុកដាក់លើការងារបន្ថែមទៀត ឆ្លើយតបនឹងប្រាក់ឈ្នួលថ្មី appeared first on Kampuchea Thmey Daily.