លោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា មានប្រសាសន៍ថា ​បេស​កកម្មចម្បងរបស់យើងគឺការលើកកម្ពស់និរន្តរភាព និងការរីកចម្រើន​ប្រកបដោយការទទួលខុសត្រូវនៃវិស័យមីក្រូហិរញ្ញវត្ថុ។

លោកជឿជាក់ថា និរន្តរភាពមិនអាចសម្រេចបានតែតាមរយៈការទទួលបានសេវាហិរញ្ញវត្ថុនោះទេ ប៉ុន្តែវាត្រូវតែដើរទន្ទឹមគ្នា ជាមួយនឹងចំណេះដឹងផ្នែកហិរញ្ញវត្ថុ។

កម្មវិធីនេះនឹងចូលរួមយ៉ាងសំខាន់ក្នុងការលើកកម្ពស់ចំណេះដឹងហិរញ្ញវត្ថុ និងបរិយាបន្នហិរញ្ញវត្ថុនៅកម្ពុជា តាមរយៈការបំពាក់បំប៉នប្រជាពលរដ្ឋនូវចំណេះដឹង និងជំនាញក្នុងការគ្រប់គ្រងហិរញ្ញវត្ថុ ធ្វើការសម្រេចចិត្តប្រកបដោយការយល់ដឹង និងប្រើប្រាស់ សេវាហិរញ្ញវត្ថុ ប្រកបដោយទំនួលខុសត្រូវ។

ទន្ទឹមនឹងនេះ វាក៏នឹងជួយពង្រឹងសមត្ថភាពវិជ្ជាជីវៈរបស់គ្រឹះស្ថានហិរញ្ញវត្ថុ លើកកម្ពស់ការផ្តល់សេវាប្រកបដោយការទទួលខុសត្រូវ និងរួមចំណែកដល់ការ អភិវឌ្ឍប្រកប ដោយចីរភាព នៃវិស័យហិរញ្ញវត្ថុនៅកម្ពុជា។

កម្មវិធីបណ្តុះបណ្តាលនេះ គឺជាផ្នែកមួយនៃកម្មវិធីសកលស្តីពីការ អប់រំចំណេះដឹងផ្នែកហិរញ្ញវត្ថុរបស់ ILO (ILO Global Programme on Financial Education) ដែលមានគោលបំណងលើកកម្ពស់ចំណេះដឹងហិរញ្ញវត្ថុ និងបរិយាបន្នហិរញ្ញវត្ថុ តាមរយៈការកសាងសមត្ថភាព និងការបណ្តុះបណ្តាលវិជ្ជាជីវៈ។

ក្រោយបញ្ចប់ការបណ្តុះបណ្តាល គ្រូបង្គោលទាំង ២០ នាក់មកពីគ្រឹះស្ថាន ធនា គារនិងហិរញ្ញវត្ថុនឹងបន្តផ្សព្វផ្សាយ និងបណ្តុះបណ្តាលបន្តនៅតាមស្ថាប័ន និង សហគមន៍របស់ខ្លួន ដើម្បីជួយឱ្យប្រជាពលរដ្ឋកម្ពុជាកាន់តែមានចំណេះដឹង និង ជំនាញ ក្នុងការគ្រប់គ្រងហិរញ្ញវត្ថុផ្ទាល់ខ្លួន ជាពិសេសធ្វើការសម្រេចចិត្តផ្នែកហិរញ្ញវត្ថុ ប្រកបដោយការយល់ដឹង និងប្រើប្រាស់សេវាហិរញ្ញវត្ថុប្រកបដោយប្រសិទ្ធភាពក្នុងបរិបទ សេដ្ឋកិច្ចឌីជីថលដែលកំពុងរីកចម្រើន។

គំនិតផ្តួចផ្តើមដ៏មានសារៈសំខាន់នេះបានបង្ហាញពីការប្តេជ្ញាចិត្តរួមគ្នារបស់វិស័យហិរញ្ញវត្ថុ និងភាគីពាក់ព័ន្ធ ក្នុងការពង្រឹងសមត្ថភាពវិជ្ជាជីវៈនៅទូទាំងវិស័យធនាគារ និងហិរញ្ញវត្ថុកម្ពុជា ព្រមទាំងគាំទ្រដល់កិច្ចខិតខំប្រឹងប្រែងរបស់កម្ពុជា ក្នុងការ​លើកកម្ពស់បរិយាបន្នហិរញ្ញវត្ថុ ការការពារអតិថិជន និងការផ្តល់សេវាហិរញ្ញវត្ថុប្រកបដោយការទទួលខុសត្រូវ៕

The post ILO និងសមាគមធនាគារ ដាក់ឱ្យដំណើរការកម្មវិធីបណ្តុះបណ្តាល លើកកម្ពស់ចំណេះដឹងហិរញ្ញវត្ថុ appeared first on Kampuchea Thmey Daily.

​ការដាក់ទិសដៅរបស់សមាគមធនាគារធ្វើឡើង​នៅ​ក្នុង​មហាសន្និបាតសមាជិកប្រចាំឆ្នាំ ​២០២៦ ​របស់សមាគមធនាគារនៅកម្ពុជា និងការបោះឆ្នោតជ្រើសរើសក្រុមប្រឹក្សាភិបាល និងប្រធាន​ក្រុម​ប្រឹក្សា​ភិបាលអាណត្តិ ២០២៦-២០២៨។ ​

​ក្នុងអំឡុងពេលនៃមហាសន្និបាតសមាជិកប្រចាំឆ្នាំ (AGM) សមាជិកទាំងអស់បានពិនិត្យ និងអនុម័ត​នូវរបាយការណ៍ប្រចាំឆ្នាំ របាយការហិរញ្ញវត្ថុឆ្នាំ ២០២៥ និងអនុម័តផែនការថវិកាឆ្នាំ ២០២៦។

មហាសន្និបាត ក៏បានគូសបញ្ជាក់ពីការប្តេជ្ញាចិត្តរបស់សមាគមធនាគារ​ក្នុងការគាំទ្រដល់វិស័យធនាគារ​នៅកម្ពុជាឱ្យមានភាពរឹងមាំ ការទទួលត្រូវ និងបរិយាបន្ន ព្រមទាំងការពារផលប្រយោជន៍​ស្របច្បាប់​របស់សមាជិករបស់ខ្លួនផងដែរ។ ​

​លោក រ័ត្ន សោភ័ណ​ ប្រធាននាយកប្រតិបត្តិ ​និង​នាយកប្រចាំប្រទេស នៃធនាគារ មេយប៊ែង ខេមបូឌា ​ត្រូវបានសមាជិកបោះឆ្នោតជ្រើសរើសសារជាថ្មី​ ធ្វើជាប្រធានសមាគមធនាគារ​នៅ​កម្ពុជា។​ ខណៈលោក តូច ចៅចេក ប្រធាននាយកប្រតិបត្តិ នៃធនាគារប្រៃសណីយ៍កម្ពុជា ​ត្រូវ​បាន​ជាប់ឆ្នោតជាអនុប្រធានសមាគម។

​លោក រ័ត្ន សោភ័ណ​ បានគូសបញ្ជាក់ពីការប្តេជ្ញាចិត្តរបស់​លោកក្នុងការបន្តអនុវត្តនូវអនុសាសន៍​ស្តីពីការវាយតម្លៃដោយឯករាជ្យលើការគ្រប់គ្រងសមាគមធនា​គារ​​នៅកម្ពុជា ក្នុងនោះរួមមាន​ កំណែ​ទម្រង់ពាក់ព័ន្ធនឹងអភិបាលកិច្ច ភាពជាអ្នកដឹកនាំ គណៈកម្មាធិការ និងការតស៊ូមតិ ក្នុងគោល​បំណង​បន្តពង្រឹងប្រសិទ្ធភាព និងសំឡេង​របស់សមាគមបន្ថែមទៀត។

​លោកប្រធានសមាគម ​ក៏បានគូសបញ្ជាក់ជាថ្មីនូវការប្តេជ្ញាចិត្ត​របស់សមាគមធនាគារ​ក្នុងការធ្វើការ​យ៉ាង​ជិតស្និទ្ធជាមួយធនាគារជាតិនៃកម្ពុជា ភាគីពាក់ព័ន្ធ និងដៃគូទាំងអស់ក្នុង​ស្ថាប័ន​រាជរដ្ឋាភិបាល​កម្ពុជា ដើម្បីគាំទ្រដល់គោលនយោបាយអាទិភាពក្នុងការចូលរួមពង្រឹងស្ថិរភាពវិស័យហិរញ្ញវត្ថុ បរិយាបន្ន ​ភាពធន់ ​និង​កំណើនសេដ្ឋកិច្ចប្រកបដោយចីរភាព។

​យោងតាមក្រុម​ហ៊ុន ក្រេឌីត ​ប្យួរ៉ូ ​ខេមបូឌា (CBC) ​គិតត្រឹមដំណាច់ឆ្នាំ ​២០២៥​ ប្រជាពលរដ្ឋកម្ពុជា​ចំនួន ៥,១៣ ​លាននាក់ ​កំពុងប្រើប្រាស់កម្ចីពី​ប្រព័ន្ធ​ធនាគារ និងហិរញ្ញវត្ថុ ​​ដែលមានទំហំ​ទឹក​ប្រាក់ ​២៤៨ ​៩២៦ ​៥៧៥ ​លានរៀល ស្មើនឹងប្រមាណ ៦២ ពាន់លានដុល្លារ។​

​លោកស្រី ​ជា ​សិរី ​ទេសាភិបាលធនាគារជាតិ​នៃកម្ពុជា​ មានប្រសាសន៍ថា ​ប្រព័ន្ធធនាគារ​នៅកម្ពុជា​នៅតែមានភាពធន់និងរឹងមាំព្រមទាំងបន្តទទួលបានជំនឿទុកចិត្តពីសាធារណជនទោះបីជាស្ថានភាពសេដ្ឋកិច្ចពិភពលោកនៅតែមិនប្រាកដប្រជាក៏ដោយ។​

លោកស្រី ​ជា សិរី ​បញ្ជាក់​ថាភាពធន់ ​និង​រឹងមាំរបស់ធនាគារដោយសារស្ថានភាពរឹងមាំនៃដើមទុន និងលទ្ធភាពខ្ពស់ក្នុងការបញ្ចេញសាច់ប្រាក់ដោយឆ្នាំ ​២០២៥ ឥណទានដែលផ្តល់​ដោយ​ប្រព័ន្ធធនា​គារ​បន្តកើនឡើងសន្សឹមៗ​ក្នុងអត្រា ៤.១% ខ្ពស់ជាងឆ្នាំ ២០២៤​ ដែលរួមចំណែកគាំទ្រដោយ​កំណើន​តម្រូវការទុនរបស់ ​SMEs ក្នុងការពង្រីកអាជីវកម្ម។ ចំណែកប្រាក់បញ្ញើក្នុងប្រព័ន្ធធនា​គារ​បាន​បន្តកើនឡើងល្អប្រសើរ ជាមួយនឹងអត្រាកំណើន ១៤.៧ភាគរយ៕​

អត្ថបទ៖ ឡេង ដេត

The post ​សមាគមធនាគារ​ ដាក់​ទិសដៅ​លើកកម្ពស់វិស័យធនាគារ ​និង​ហិរញ្ញវត្ថុ​ appeared first on Kampuchea Thmey Daily.

​ស្ថានភាពតានតឹងកើតឡើងជាថ្មីតាមបន្ទាត់ព្រំដែនកម្ពុជា-ថៃ ដែលបានបង្កផលប៉ះ​ពាល់ដល់​ការរស់​នៅ និងការប្រកប របររបស់ប្រជាជន សមាគមធនាគារនៅកម្ពុជា (ABC) និង​សមាគម​មីក្រូហិរញ្ញវត្ថុកម្ពុជា (CMA) ប្រកាសថានៅតែ ​បន្តអនុវត្ត «វិធានការជួយ​សម្រាល​បន្ទុកដល់​ប្រជាជនដែលរងផលប៉ះពាល់ពីជម្លោះព្រំដែនកម្ពុជា-ថៃ» ដែលបានដាក់ចេញ​ដោយធនាគារ​ជាតិនៃកម្ពុជាកាលពីថ្ងៃទី៣០ ខែកក្កដា ឆ្នាំ២០២៥។

សមាគមទាំងពីរ ត្រៀម​លក្ខណៈរួច​ជាស្រេចក្នុងការអនុវត្ត​តាមសេចក្តីណែនាំ​នានារបស់ធនា​គាជាតិនៃកម្ពុជា ក៏ដូច​ជារាជ​រដ្ឋា​ភិបាលកម្ពុជា។​

​ក្នុងស្មារតីសាមគ្គីភាព មនុស្សធម៌ ព្រមទាំងដើម្បីជួយសម្រាលបន្ទុកដល់​យោធិនដែលធ្វើ​ប្រតិបត្តិការ​ដោយផ្ទាល់ក្នុងសមរភូមិប្រយុទ្ធ និងប្រជាពលរដ្ឋដែលរងផល​ប៉ះពាល់ពីជម្លោះ​ព្រំដែនកម្ពុជា-ថៃ គ្រឹះស្ថានធនាគារ គ្រឹះស្ថានមីក្រូហិរញ្ញវត្ថុ និងគ្រឹះស្ថានហិរញ្ញវត្ថុផ្សេងៗ​ទៀត​ជាស​មាជិករបស់សមាគមទាំងពីរ ប្តេជ្ញាចូលរួមសម្រួលដល់អតិថិជនដែលរង​ផល​ប៉ះពាល់​តាម​វិធានការខាងលើ។

​ធនាគារជាតិនៃកម្ពុជា កាលពីថ្ងៃទី ៣០ ខែកក្កដា ឆ្នាំ ២០២៥ បានចេញវិធានការណែ​នាំឱ្យ​គ្រឹះ​ស្ថាន​ធនាគារ និងហិរញ្ញវត្ថុលុបចោលឥណទានរហូតដល់ចំនួន ១០ លានរៀល របស់​អតិ​ថិជន​ជាកង​ទ័ពពិការនៅសមរភូមិបច្ចុប្បន្ន និង​លុប​ចោលឥណទានរហូតដល់ចំនួន ៨០ លាន​រៀល របស់​អតិ​ថិជន ឬអ្នករួមខ្ចី ជាយោធិនពលី។ ​

គ្រឹះស្ថានធនាគារ និងហិរញ្ញវត្ថុលើកលែងរាល់កម្រៃ និងការផាកពិន័យ ពាក់ព័ន្ធនឹងឥណទាន​រយៈ​ពេល ៦ ខែ គិត ដល់អតិថិជនជាយោធិន ដែល​ធ្វើប្រតិបត្តិការផ្ទាល់ក្នុងសមរភូមិប្រយុទ្ធ។​

លើកលែងការទូទាត់សងប្រាក់ និងពន្យាពេលទូទាត់សងប្រាក់ដើម រយៈពេល ៦ ខែ ដល់អតិថិជនជា​យោធិន​ដែលធ្វើប្រតិបត្តិ​ការ​ដោយផ្ទាល់ក្នុងសមរភូមិប្រយុទ្ធ។ ចំពោះការអនុគ្រោះនេះ គ្រឹះស្ថានធនាគារ និងហិរញ្ញវត្ថុមិន​ត្រូវធ្វើមូលធនកម្មការ​ប្រាក់លើប្រាក់ដើមនោះទេ៕

អត្ថបទ៖ ឡេង ដេត

The post សមាគម​ធនាគារ​ប្រកាស​បន្ត​ជួយ​សម្រាល​បន្ទុក​ប្រជាពលរដ្ឋ​ដែល​រងផលប៉ះ​ពាល់​ពីជម្លោះ​ព្រំដែនកម្ពុជា-ថៃ​ appeared first on Kampuchea Thmey Daily.

ជាមួយការ​​ទទួល​បានការ​តែងតាំង​​ថ្មី​ លោក រ័ត្ន សោភ័ណ បានប្តេជ្ញា​​នឹងដឹកនាំសមាគមទៅកាន់កម្រិតខ្ពស់មួយបន្ថែមទៀត។

ប្រធានសមាគមធនាគារនៅ​កម្ពុជាថ្មី​រូបនេះ​ ក៏​បានរំលេច​ពី​ចក្ខុវិស័យសរសរស្តម្ភចំនួន ០៤ ក្នុង​ការ​ពង្រឹង​ការងារ​របស់​សមាគម​ដែលលោកត្រូវ​ដឹកនាំ​បន្ត​​រួមមាន​ ទី១/-កំណត់នូវរចនាសម្ព័ន្ធអភិបាលកិច្ចល្អ និងមុខងារ និងការប្រព្រឹត្តទៅនៃសមាគមធនាគារនៅកម្ពុជា។ ទី២/-ផ្តល់ប្រឹក្សាលើការគ្រប់គ្រង និងប្រតិបត្តិធនាគារប្រកបដោយការទទួលខុសត្រូវ និងផ្អែកលើគុណតម្លៃ ដើម្បីបង្កើនជំនឿទុកចិត្តពីសាធារណជន ជំរុញបរិយាបន្នហិរញ្ញវត្ថុ ព្រមទាំងលើកកម្ពស់ភាពរឹងមាំ និងភាពលូតលាស់នៃវិស័យធនាគារ ដើម្បីគាំទ្រដល់កំណើនសេដ្ឋកិច្ច។ ទី៣/-លើកកម្ពស់វប្បធម៌នៃការរៀនសូត្របន្តសម្រាប់ធនាគារិក និងលើកកម្ពស់សមត្ថភាពរបស់ធនាគារិកក្នុងជំនាញបច្ចេកទេស ឧត្តមភាពវិជ្ជាជីវៈ និងភាពជាអ្នកដឹកនាំប្រកបដោយក្រមសីលធម៌។ ទី៤/-បង្កើតកិច្ចសហប្រតិបត្តិការនៃប្រព័ន្ធអេកូឡូស៊ីធនាគារបន្ថែមទៀត ដើម្បីបង្កើនសក្តានុពលនៃវិស័យធនាគារ ដើម្បីបង្កើនសក្តានុពលវិស័យធនាគារបន្ថែមទៀត ក្នុងការចូលរួមចំណែកដល់កំណើនសេដ្ឋកិច្ចជាតិ និងវិបុលភាពជាតិ។

នៅក្នុងមហាសន្និបាតប្រចាំឆ្នាំ២០២៣ របស់​សមាគមធនាគារនៅកម្ពុជា ដែល​រៀបចំ​ឡើង​កាលពីថ្ងៃទី ២៨ ខែមីនា ឆ្នាំ ២០២៤ ក៏​​បាន​បង្ហាញ​អំពីសមាសភាពក្រុមប្រឹក្សាទាំង ១២ រូប ដែលបានជាប់ឆ្នោតសម្រាប់អាណត្តិទី១០ ឆ្នាំ​២០២៤-​២០២៥ រួមមាន៖

១. លោក រ័ត្ន សោភ័ណ ជាប្រធានសមាគមធនាគារនៅកម្ពុជា ដែលមានសមាសភាពជាប្រធាននាយកប្រតិបត្តិ នៃធនាគារ មេយប៊ែង (ខេមបូឌា) ភីអិលស៊ី
២. លោក Raymond Sia Say Guan ជាអនុប្រធានសមាគមធនាគារនៅកម្ពុជា ដែលមានសមាសភាពជា ប្រធាននាយកប្រតិបត្តិ នៃធនាគារកាណាឌីយ៉ា ក.អ
៣. លោក ហាន ប៉េងក្វាង ជាហេរញ្ញិកសមាគមធនាគារនៅកម្ពុជា ដែលមានសមាសភាពជាអគ្គនាយកនៃធនាគារ វីង (ខេមបូឌា) ម.ក
៤. លោកស្រី ម៉ារ អមរា ជាសមាជិកក្រុមប្រឹក្សា ដែលមានសមាសភាពជាប្រធាននាយកប្រតិបត្តិចាត់តាំង​នៃធនាគារ អេស៊ីលីដា ភិអិលស៊ី
៥. លោក Mr. Zhiger Atchabarov ជាសមាជិកក្រុមប្រឹក្សា ដែលមានសមាសភាពជា នាយកប្រតិបត្តិការ នៃ ធនាគារ វឌ្ឍនៈអាស៊ី ចំកាត់
៦. លោក ឌិត សុចល ជាសមាជិកក្រុមប្រឹក្សា ដែលមានសមាសភាពជា ប្រធាននាយកប្រតិបត្តិ នៃធនាគារពាណិជ្ជកម្មក្រៅប្រទេស នៃកម្ពុជា
៧. លោក តូច ចៅចេក ជាសមាជិកក្រុមប្រឹក្សា ដែលមានសមាសភាពជា ប្រធាននាយកប្រតិបត្តិ នៃធនាគារ ប្រៃសណីយ៍កម្ពុជា ក.អ
៨. លោក Ong Ming Teck ជាសមាជិកក្រុមប្រឹក្សា ដែលមានសមាសភាពជា ប្រធាននាយកប្រតិបត្តិ នៃធនាគារ កម្ពុជាសាធារណៈ ភិអិលស៊ី
៩. លោក ប៉ែន មករា ជាសមាជិកក្រុមប្រឹក្សា ដែលមានសមាសភាពជា អគ្គនាយក នៃធនាគារឯកទេស អង្គរកាពីតាល
១០. លោកស្រី ឌិត នីតា ជាសមាជិកក្រុមប្រឹក្សា ដែលមានសមាសភាពជា ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា
១១. លោក ប៉ិល រ៉េមីស៊ីសុផុន ជាសមាជិកក្រុមប្រឹក្សា ដែលមានសមាសភាពជា ប្រធានសមាគមសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា
១២. លោក គា បូរាណ ជាសមាជិកក្រុមប្រឹក្សា ដែលមានសមាសភាពជា ប្រធាននាយកប្រតិបត្តិនៃ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ អេ អឹម ខេ

The post CEO ធនាគារមេយប៊ែង ឡើង​ដឹកនាំ​ជា​ប្រធានសមាគមធនាគារនៅកម្ពុជា appeared first on Kampuchea Thmey Daily.

តាមរយៈនាយកដ្ឋានបទល្មើសបច្ចេកវិទ្យា ក៏ធ្លាប់បានចែករំលែកវិធីសាស្ត្រប្លែកៗមួយចំនួន ដែលជនទុច្ចរិត​បានប្រើ ដើម្បីបោកបញ្ឆោតជនរងគ្រោះ ជារឿយៗផងដែរ ដែលរួមមាន៖

១. ប្រើឈ្មោះនិងនិមិត្តសញ្ញា ស្រដៀងនឹងទំព័រផ្សព្វផ្សាយក្រុមហ៊ុនហ្វេសប៊ុក ផ្ញើលីង ដើម្បីបញ្ឆោតឱ្យទាញយកមេរោគ
នាយកដ្ឋានប្រឆាំងបទល្មើសបច្ចេកវិទ្យា បានរកឃើញព័ត៌មានស្តីពីការបោកបញ្ឆោតថ្មី ចំពោះអ្នកដែលគ្រប់គ្រងផេក អាជីវកម្ម កំពុងព្យាយាមប្រើប្រាស់ឈ្មោះ និងនិមិត្តសញ្ញាស្រដៀងទៅនឹងក្រុម ឬទំព័រផ្សព្វផ្សាយរបស់ក្រុមហ៊ុន Facebook ក្នុងការផ្ញើដំណរលីង (Fake Link) បញ្ឆោតឱ្យជនរងគ្រោះទាញយកមេរោគរបស់ពួកគេ។ ពាក់ព័ន្ធនឹងករណីតំណលីងនេះដែរ នាយកដ្ឋានណែនាំថា បើមិនស្គាល់តំណភ្ជាប់ (Link) ច្បាស់ទេ មិនត្រូវចុចលើវាដាច់ខាត និងត្រូវលុបចោលដើម្បីសុវត្ថិភាពលើឧបករណ៍គណនី (ដូចភ្ជាប់ក្នុងរូបភាពខាងក្រោម)។

២. បន្លំជាអ្នកចង់ទិញទំនិញពីផេក ហើយផ្ញើ file ឲ្យម្ចាស់ផេកបើកតាមកុំព្យូរទ័រ ដោយប្រាប់ថារូបភាពដែលត្រូវកុម្ម៉ង់
ជារឿងដែលកើតឡើងនាពេលថ្មីៗនេះដែរ អ្នកលក់អនឡាញម្នាក់ ទទួលបានការបញ្ជាទិញពីគណនីហ្វេសប៊ុកឈ្មោះ Sy Kosal ដែលបានឆាតទៅកុម្ម៉ង់ឥវ៉ាន់ ១៥ឈុតពីម្ចាស់ផេក និងបានផ្ញើ file link មួយ (តាមការគូសបញ្ជាក់ file នោះ មិនអាចបើកតាមទូរសព្ទដៃបានទេ គឺតម្រូវឲ្យបើកតាមកុំព្យូទ័រ)។ ជនសង្ស័យបានប្រាប់ថា ខ្លួនបានរើសម៉ូដ និងទំហំ​ដាក់ក្នុងហ្វាល់នោះ។

លុះក្រោយពេល​ដែលម្ចាស់ផេកបើកមើល file នោះរួច ស្រាប់តែគណនីជនខាងលើ លែងឆ្លើយឆ្លងជាមួយគាត់ ហើយមួយសន្ទុះក្រោយមក គណនីធនាគាររបស់គាត់ ក៏លោតបញ្ជាក់ពីការបង់លុយមិនជោគជ័យ ទៅឲ្យកូដហ្វេសប៊ុកមួយ ចំនួន២ដង ដោយលើកទីមួយ​ ៥០០ដុល្លារ និងលើកទីពីរ ៣០០ដុល្លារ។ ជាសំណាង ម្ចាស់ផេកលក់ទំនិញអនឡាញខាងលើ មិនមានសាច់ប្រាក់គ្រប់គ្រាន់តាមទំហំដែល Hacker បានដាក់ និងធ្វើឲ្យគាត់បានដឹង​ទាន់ពេលវេលា និងប្តូរលេខសម្ងាត់ភ្លាមៗ។

៣. ផ្ញើតំណលីងឲ្យតាម​ SMS ដើម្បីឲ្យអ្នកចូលទៅបំពេញព័ត៌មានក្នុងតេឡេក្រាម ដើម្បីយកគណនីនោះមកគ្រប់គ្រង
បើតាមនាយកដ្ឋានប្រឆាំងបទល្មើសបច្ចេកវិទ្យា ករណីនេះ គឺជនអនាមិកបានផ្ញើតំណលីង Link ក្លែងក្លាយ ដូចភ្ជាប់ ក្នុងរូបភាពខាងក្រោម) ទៅ​កាន់​សារ​ទូរសព្ទ​ SMS ឲ្យយើងបំពេញព័ត៌មានតាមកម្មវិធី Telegram។ ក្នុងនោះ នាយកដ្ឋានអះអាងថា បើសិនជាយើងធ្វើតាមការណែនាំនោះ គេនឹងយកគណនីតេឡេក្រាមរបស់យើងមកគ្រប់គ្រងបាន។

៤. ស្នើសុំឱ្យផ្ញើ Screenshot របស់កម្មវិធី Telegram
ជនខិលខូច បានធ្វើការលួងលោមបោកបញ្ឆោត ដើម្បីលួចយកលេខកូដសម្ងាត់ពីជនរងគ្រោះ ដោយការស្នើឲ្យជនរងគ្រោះ ធ្វើការថតស្រ្គីនទូរសព្ទ (Screenshot) ខណៈពេលជនខិលខូច កំពុងព្យាយាមចូលទៅក្នុងគណនីរបស់ជនរងគ្រោះ ស្របពេលលេខកូដសម្ងាត់ (OTP) លោតលើស្រ្គីនទូរសព្ទ និងបានផ្ញើទៅជនខិលខូចដោយមិនដឹងខ្លួន។ បន្ទាប់មកជននោះនឹងចូលទៅប្រើប្រាស់តេឡេក្រាមរបស់ជនរងគ្រោះ និងធ្វើការប្ដូរលេខទូរសព្ទដើម្បីកាន់កាប់តេឡេក្រាម នោះទាំងស្រុងតែម្តង។

៥. បន្លំជាសមាជិកណាម្នាក់របស់ជនរងគ្រោះ ប្រាប់ឲ្យផ្ទេរប្រាក់
ជនខិលខូច បានឆបោកប្រាក់ជនរងគ្រោះ ដោយប្រើគណនីបណ្តាញសង្គមនៃសមាជិកណាមួយរបស់គ្រួសារ សាច់ញាតិ មិត្តភក្តិ ឬថ្នាក់ដឹកនាំស្ថាប័ននៃជនរងគ្រោះ ដែលជនទុច្ចរិតនោះលួចបាន រួចផ្ញើសារជាអក្សរ ឬជាសំឡេង បន្លំជាសមាជិក​ណាមួយ​របស់ជនរងគ្រោះ ដើម្បីសុំខ្ចីប្រាក់ ឬផ្ទេរប្រាក់ឲ្យបន្ទាន់ក្នុងរយៈពេលខ្លី តាមកម្មវិធីទូរស័ព្ទចល័ត តាមភ្នាក់ងារគ្រឹះស្ថានធនាគារ និងហិរញ្ញវត្ថុ ឬគ្រឹះស្ថានផ្តល់សេវាទូទាត់សងប្រាក់ ដែលអាចផ្ទេរប្រាក់បានងាយស្រួល និងឆាប់រហ័ស។

៦. បន្លំជាបុគ្គលិកស្ថាប័ន្ថណាមួយ ឬធនាគារ
ករណីនេះ កើតមានច្រើនមកហើយ មួយរយៈពេលមុន មិនត្រឹមតែបន្លំជាបុគ្គលិកក្រុមហ៊ុន ថែមទាំងមានជនខិលខូច បន្លំខ្លួនជាបុគ្គលិកអគ្គិសនីកម្ពុជាថែមទៀត ដោយទាក់ទងទៅជនរងគ្រោះ ឲ្យផ្ទេរប្រាក់តាមមធ្យាបាយផ្សេងៗឲ្យខ្លួន ក្រោមហេតុផលបង់ថ្លៃប្រើប្រាស់អគ្គិសនីប្រចាំខែ ថ្លៃប្តូរនាឡិកាស្ទង់ ប្តូរឌីស្យុងទ័រ ប្តូរបរិក្ខារអគ្គិសនីមួយចំនួន ដើម្បីចៀសវាងការផ្អាកកាផ្គត់ផ្គង់ ឬការកាត់ផ្តាច់ចរន្តអគ្គសនីជាដើម។ មួយទៀត គឺបន្លំខ្លួនជាបុគ្គលិកធនាគារ ទាក់ទងទៅជនរងគ្រោះឲ្យប្រាប់ពីលេខសម្ងាត់គណនី ឬព័ត៌មានជាក់លាក់ណាមួយពីគណនីធនាគាររបស់ជនរងគ្រោះ។

ក្រៅពីនេះ នៅមានមធ្យោបាយជាច្រើនទៀត ដែលជនខិតខូចបានប្រើ ដើម្បីបោកបញ្ឋោតជនរងគ្រោះ ហើយកន្លងមក សមាគមធនាគារកម្ពុជា រួមនឹងនាយកដ្ឋានប្រឆាំងបទល្មើសបច្ចេកវិទ្យា ក៏បានចែករំលែក និងចេញសេចក្តីណែនាំ ជាច្រើនលើក នូវរបៀបនៃការការពារសុវត្តិភាពលើប្រព័ន្ធបច្ចេកវិទ្យាផងដែរ៕

The post វិធីប្លែកៗ ជនអានាមិកប្រើដើម្បីបោកបញ្ឆោត តាមប្រព័ន្ធបច្ចេកវិទ្យា appeared first on Kampuchea Thmey Daily.

បើ​យោង​តាម​សេចក្តី​ប្រកាស​ព័ត៌មាន ការ​រៀបចំ​កម្មវិធី​បណ្តុះបណ្តាល​នេះដើម្បី​ចូលរួម​ចំណែក​លើកកម្ពស់​ចំណេះដឹង​ហិរញ្ញវត្ថុជាមូលដ្ឋានដល់អ្នកសារព័ត៌មាន ក្នុង​ការ​សរសេរ​អត្ថបទ​ព័ត៌មាន​ទាក់ទងនឹងវិស័យធនាគារ ហិរញ្ញវត្ថុ និងធានារ៉ាប់រង ឱ្យបានស៊ីជម្រៅនិងគ្រប់ជ្រុងជ្រោយ។

កម្មវិធីនេះ​ធ្វើឡើង ក៏​ដើម្បីរួម​ចំណែក​ក្នុងការ​កសាង​ភាពធន់ភាពរឹងមាំ​នៃវិស័យ​ធនាគារ មីក្រូ​ហិរញ្ញវត្ថុ​និង​វិស័យ​ធានារ៉ាប់រង​តាមរយៈ​ការផ្តល់នូវ​ចំណេះដឹង​ជា​មូលដ្ឋាន​គ្រឹះបន្ថែម​ទាក់ទង​នឹង​វិស័យ​ធនាគារ និង​ហិរញ្ញវត្ថុ ក៏ដូចជា​វិស័យ​ធានារ៉ាប់រង​ជូន​ដល់​អ្នកសារព័ត៌មាន​នៅ​កម្ពុជា និង​ការកសាង​បណ្តាញនិង​រក្សា​ទំនាក់ទំនង​ជាមួយ​អ្នកសារព័ត៌មាន និងធនាគារិក ព្រម​ទាំង​រួម​ចំណែក​ដល់​ការ​អភិវឌ្ឍប្រព័ន្ធ​ផ្សព្វផ្សាយ​នៅ​កម្ពុជា​ផងដែរ។

វគ្គបណ្តុះបណ្តាលចាប់ផ្តើមពីចុងខែមីនា រហូតដល់ខែឧសភា ឆ្នាំ២០២៣។ មាតិកាសំខាន់ៗ គ្រប​ដណ្តប់​លើតួនាទីរបស់និយ័តករហិរញ្ញវត្ថុ និងសមាគម បទប្បបញ្ញត្តិ​នៃ​វិស័យ​ធនាគារ​និង​ហិរញ្ញវត្ថុ និងវិស័យធានារ៉ាប់រង វិន័យទីផ្សារ ប្រតិបត្តិការទីផ្សារនៃវិស័យធនាគារ ហិរញ្ញវត្ថុ និង​ធានារ៉ាប់រង ក្រមប្រតិបត្តិសម្រាប់គ្រឹះស្ថានធនាគារ និង​ហិរញ្ញវត្ថុ កិច្ចការពារអតិថិជន ការ​ផ្តល់​ឥណទាន​ប្រកបដោយការទទួលខុសត្រូវ តួនាទី​របស់ប្រព័ន្ធ​ចែករំលែកឥណទាន ក្នុងការ​គាំទ្រ​វិស័យ​ហិរញ្ញវត្ថុ និងអ្នកប្រើប្រាស់កម្ចី បច្ចេកវិទ្យា​ហិរញ្ញវត្ថុ ប្រព័ន្ធ​ទូទាត់ និង​ការណែនាំ​ស្តីពី​បរិស្ថាន សង្គម និង​អភិបាលកិច្ច។

នេះជាលើក​ទីពីរ ដែល​សមាគមធនាគារនៅកម្ពុជា(ABC) សមាគមមីក្រូហិរញ្ញវត្ថុកម្ពុជា (CMA) និង​សមាគម​ធានារ៉ាប់រងកម្ពុជា (IAC) និង​ក្លឹប​អ្នកកាសែតកម្ពុជា បានរៀបចំ​វគ្គបណ្តុះបណ្តាលនេះ ក្រោយ​ពីទទួលបានលទ្ធផលល្អក្នុងឆ្នាំ២០២២។ វគ្គបណ្តុះបណ្តាលក្នុងឆ្នាំ២០២៣ នឹង​ត្រូវបែង​ចែក​ជា​ពីរវគ្គ​ផ្សេងគ្នា ដោយមួយ​វគ្គសម្រាប់​អ្នកសារព័ត៌មានទូទៅ និងមួយវគ្គទៀតសម្រាប់​ការីនិពន្ធ។

វាគ្មិន​ជំនាញៗ មកពីនិយតករ សមាគមវិជ្ជាជីវៈ គ្រឹះស្ថានធនាគារ និងហិរញ្ញវត្ថុ វិនិយោគិន និង​អ្នក​ពាក់ព័ន្ធ នឹង​ចូលរួមធ្វើបទ​បង្ហាញ ចែករំលែក​ទិន្នន័យ និងឆ្លើយសំណួរ​ពាក់ព័ន្ធ ដែល​នឹង​ក្លាយ​ជាប្រភព​ព័ត៌មានល្អៗ សម្រាប់​ការ​ផលិត​មាតិការ​ព័ត៌មាន។ ក្រោយ​បញ្ចប់វគ្គសិក្សា​នៅក្នុង​ថ្នាក់ សិក្ខាកាម​ទាំងពីរក្រុម នឹងត្រូវចុះទស្សនកិច្ចសិក្សាទៅតាម​បណ្តាលខេត្ត ដើម្បី​ស្វែងយល់​ជាក់​ស្តែង​នូវការ​ប្រើប្រាស់​សេវាហិរញ្ញវត្ថុ​នៅ​តាម​សហគមន៍​ផង​ដែរ។

ក្រៅពីការបណ្តុះបណ្តាល​ពង្រឹងចំណេះដឹងមូលដ្ឋានគ្រឹះ​សម្រាប់អ្នកសារព័ត៌មាន សមាគមទាំងបី នឹង​បង្កើត​នូវ​កម្មវិធី​មួយចំនួន ដើម្បីផ្សារ​ភ្ជាប់​ទំនាក់ទំនង​រវាងអ្នកសារព័ត៌មាន និង​ធានាគារិក និង​ធានារ៉ាប់រង​ផង​ដែរ៕

The post អ្នក​សារព័ត៌មាន​មកពី ៤០ ស្ថាប័ន​ចូលរួម​វគ្គ​បណ្ដុះបណ្ដាល​ពី​វិស័យ​ធនាគារ និង​ហិរញ្ញវត្ថុ appeared first on Kampuchea Thmey Daily.

ថ្លែង​នៅក្នុង​សន្និសីទ​នៅព្រឹកមិញ​នេះ លោក រ័ត្ន សោភ័ណ អនុប្រធាន​សមាគម​ធនាគារ​នៅ​កម្ពុជា​បាន​បញ្ជាក់ថា កន្លងទៅ​នេះមាន​​ស្ថាប័ន​​សេវាហិរញ្ញវត្ថុ​ក្រៅផ្លូវការ​ បាន​ប្រើប្រាស់​រូបភាពបោកបញ្ឆោត​​​អូសទាញ​អតិថិជន​ដើម្បី​ទទួល​ប្រាក់កម្ចី។

សេវា​ឥណទាន​​គ្មាន​ច្បាប់​អនុញ្ញាត​នេះ ​មិន​ត្រឹម​តែ​ធ្វើ​ឱ្យ​សាធារណជន​មានការ​ភាន់ច្រឡំ ថែម​ទាំង​បង្ក​ផលវិបាក​​មក​លើ​សេដ្ឋកិច្ច​និង​សង្គម​ ហើយ​ប៉ះពាល់​ដល់​ជីវភាព​រស់នៅរបស់​ប្រជាពលរដ្ឋ​​ធ្វើឱ្យធ្លាក់​ក្នុង​បំណុល​ច្រើន​លើសលប់។

​

លោក​បន្ត​ថា សេវា​ឥណទាន​ក្រៅ​ច្បាប់​នេះ បាន​​បង្កប់​ការ​កេង​ចំណេញ​តាម​រយៈការ​យក​អត្រាការ​ប្រាក់​ខ្ពស់​ហួស​ហេតុ ការ​គំរាមកំហែង​បំភិតបំភ័យ និង​ការ​អនុវត្ត​កិច្ច​សន្យា​មិន​សុចរិត​ជាដើម។

លោក សុខ វឿន ប្រធាន​ក្រុម​ប្រឹក្សា​សមាគម​មីក្រូហិរញ្ញវត្ថុ​កម្ពុជា​បាន​ថ្លែង​បញ្ជាក់​ក្នុង​សន្និសីទ​ថា ក្រុម​ផ្តល់​កម្ចី​ក្រៅ​ច្បាប់​ច្រើន​តែ​ប្រើប្រាស់​រូបភាព​បោក​បញ្ឆោត​ជា​ឆ្នាក់​ដើម្បី​អូស​ទាញ​ដល់​អតិថិជន។ ជាក់ស្ដែង ក្រុម​នេះ​តែងតែ​ប្រើប្រាស់​បណ្តាញអនឡាញ​ ការ​ខល​ទៅ​​អតិថិជនដើម្បី​ណែនាំពី​សេវាកម្ចី​ភ្ជាប់​លក្ខខណ្ឌ​ងាយៗ​មិន​បាច់​មាន​ទ្រព្យ​បញ្ចាំ។

«ក្រុម​​នេះ​បានផ្សព្វផ្សាយយ៉ាងបើកចំហតាមរូបភាពផ្សេងៗដូចជា ប្រព័ន្ធអនឡាញ បណ្តាញសង្គម តាមខិត្តប័ណ្ណ និងការបិតផ្សាយតាមទីកន្លែងសាធារណៈនានាជាដើម»។

បើ​តាម​លោក សុខ វឿន រូបភាព​កម្ចី​ពី​បែបនេះ​​គ្រោះថ្នាក់​ណាស់​ ធម្មតា​ស្ថាប័ន​មាន​ច្បាប់​ទម្លាប់​ត្រឹមត្រូ​វ​គេ​មិ​នប្រើប្រាស់​រូបភាព​អូស​ទាញ​អតិថិជន​ តាមរ​យៈ​ការ​ផ្តល់​លក្ខខណ្ឌ​ស្រួលៗ​​ គឺ​គេ​​ត្រូវ​សិក្សា​ពីលំហូរ​សាច់ប្រាក់និង​លទ្ធភាព​សងត្រឡប់​របស់​អតិថិជន។

លោក​បន្ត​ថា ស្ថាប័ន​ហិរញ្ញវត្ថុដែល​ប្រើប្រាស់​សេវាកម្ចី​តាមអនឡាញក្រៅ​ច្បាប់​ទាំងនេះ ភាគច្រើន​​មិន​មាន​អាជ្ញាប័ណ្ណ​ពី​ធនាគារ​ជាតិ​ទេ។ លោក​បន្ត​ក្រើន​រំលឹក​ឲ្យ​ពលរដ្ឋ​ត្រូវ​ប្រុង​ប្រយ័ត្ន មុន​ទៅ​រក​សេវា​កម្ចី​ពី​ស្ថាប័ន​ក្រៅ​ផ្លូវការ​ណាមួយដើម្បី​ចៀសវាងមាន​ហានិភ័យ​ខ្ពស់ ហើយ​ពុំ​ទទួល​បាន​ការ​ការពារ​ដោយ​ច្បាប់។

ថ្មីៗ​នេះ ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ បាន​ចេញ​សេចក្តីថ្លែងការរួម ស្នើឱ្យប្រជាពលរដ្ឋប្រើប្រាស់សេវាហិរញ្ញវត្ថុផ្លូវការ ដែលផ្តល់ដោយគ្រឹះស្ថានធនាគារនិងហិរញ្ញវត្ថុដែលទទួលអាជ្ញាបណ្ណប្រកប អាជីវកម្មពីធនាគារជាតិនៃកម្ពុជា រួមមាន ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ គ្រឹះស្ថាន​មីក្រូហិរញ្ញវត្ថុ គ្រឹះស្ថានភតិសន្យាហិរញ្ញវត្ថុ គ្រឹះស្ថានផ្តល់សេវាទូទាត់ សងប្រាក់ និងគ្រឹះស្ថានឥណទានជនបទ ដែលគ្រឹះស្ថានទាំងនេះស្ថិតក្រោមច្បាប់និងបទប្បញ្ញត្តិ និង ការត្រួតពិនិត្យរបស់ធនាគារជាតិនៃកម្ពុជា ហើយអតិថិជនគ្រឹះស្ថាន​ទាំងនេះត្រូវបានការពារដោយច្បាប់។

ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ នឹងចាត់វិធានការតឹងរ៉ឹងតាមផ្លូវច្បាប់ ដល់ការផ្តល់ឥណទានខុសច្បាប់ និងការផ្សព្វផ្សាយនានាតាមគ្រប់រូបភាពពាក់ព័ន្ធនឹងការផ្តល់សេវាហិរញ្ញវត្ថុដោយគ្មានច្បាប់អនុញ្ញាត។
ទន្ទឹមនេះ ធនាគារជាតិនៃកម្ពុជានិងអគ្គស្នងការដ្ឋាននគរបាលជាតិ សូមសំណូមពរដល់ ប្រជាពលរដ្ឋត្រូវចៀសវាងដាច់ខាតចំពោះការខ្ចីប្រាក់ពីអ្នកផ្តល់សេវាហិរញ្ញវត្ថុក្រៅផ្លូវការដែលពុំមានការអនុញ្ញាតពីធនាគារជាតិនៃកម្ពុជា៕

The post សមាគម​ធនាគារ​ប្រាប់​ល្បិច​ឲ្យ​ប្រុងប្រយ័ត្ន​ក្រុម​ផ្តល់​កម្ចី​ក្រៅ​ច្បាប់ appeared first on Kampuchea Thmey Daily.

សេចក្ដីថ្លែងការរបស់សមាគមធនាគារ និងហិរញ្ញវត្ថុចេញផ្សាយនៅថ្ងៃទី ១២ ខែវិច្ឆិកានេះបញ្ជាក់ថា ក្រុមហ៊ុនក៏បាន ផ្សព្វផ្សាយពីកិច្ចសហការជាមួយគ្រឹះស្ថានធនាគារ និងហិរញ្ញវត្ថុនៅកម្ពុជាមួយចំនួនក្នុងការទូទាត់ការដាក់ប្រាក់ និងដកប្រាក់លើការវិនិយោគ និងការជួញដូរលើរូបិយវត្ថុគ្រីបតរួមមាន Bitcoin, Ethereum និង កាបូប Crypto ជាដើម។

សមាគមទាំងបីព្រមទាំងសមាជិករបស់ខ្លួនទាំងអស់សុំធ្វើការបដិសេធចំពោះការផ្សព្វផ្សាយនេះ និងប្រកាសមិនជាប់ពាក់ព័ន្ធទៅនឹងក្រុមហ៊ុន PAYEER ឬមានកិច្ចសហប្រតិបត្តិការលើការទូទាត់ ឬការជួញ ដូរលើប្រភេទរូបិយវត្ថុគ្រីបតួឡើយ។

សមាគមទាំងបី ក៏បានធ្វើការក្រើនរំលឹកដល់សាធារណជនកុំឲ្យធ្វើប្រតិបត្តិការលើរូបិយវត្ថុគ្រីបតូ (Crypto) រួមមានមាន Bitcoin, Ethereum និងកាបូប Crypto ជាដើម មិនបានទទួលស្គាល់ជាផ្លូវការទេសូមមេត្តាប្រុងប្រយ័ត្នរាល់ប្រតិបត្តិការ និងសកម្មភាពទាំងអស់នេះ ចៀសវាងធ្លាក់ក្នុងការបោកបញ្ឆោតអូសទាញវិនិយោគ ឬ ជួញដូរឧបករណ៍ហិរញ្ញវត្ថុនេះ ដែលមិនមានសុវត្ថិភាព និងអាចនឹងនាំឱ្យមានការខាតបង់៕

The post សមាគធនាគារ និងហិរញ្ញវត្ថុប្រកាសមិនជាប់ពាក់ព័ន្ធទៅនឹងក្រុមហ៊ុន PAYEER appeared first on Kampuchea Thmey Daily.