ថ្លែងបិទកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភាលើកទី នាថ្ងៃទី ៣ ខែមិថុនា សម្តេចតេជោ ហ៊ុន សែន មានប្រសាសន៍ថា នៅក្នុងសមាជលើកនេះ យើងបានសម្រេចជោគជ័យដ៏ត្រចះត្រចង់ ដែលបានបង្ហាញឱ្យឃើញពីការរួមគ្នា ក្នុងការដោះស្រាយបញ្ហាធំៗរបស់ជាតិ ។ សម្តេចតេជោ ថ្លែងថា៖«សមាជរបស់យើងរំលេចអំពីរូបភាព និងខ្លឹមសារផង ហើយអ្នកទាំងអស់គ្នានៅទីនេះ សុទ្ធតែជាសាក្សី នៃការលើកឡើងផ្តល់មតិ ស្តាប់មតិ និងការបំភ្លឺ»។

សម្តេចតេជោ សង្ឃឹមថា មន្រ្តីរាជការ និងកងកម្លាំងប្រដាប់អាវុធ ក៏ដូចជាប្រជាពលរដ្ឋ នឹងបានឃើញអំពីទស្សនៈ មតិយោបល់ទាំងឡាយ ទាំងផ្នែកនីតិបញ្ញត្តិ នីតិប្រតិបត្តិ ដែលមានការឆ្លើងឆ្លើយគ្នា ទាក់ទងនឹងបញ្ហាធំរបស់ប្រទេសជាតិ រួមមាន ប្រព័ន្ធការគាំពារសង្គម សេដ្ឋកិច្ចក្រៅប្រព័ន្ធ និងបញ្ហាកសិកម្ម។

ក្នុងនាមជាប្រធានសមាជ សម្តេចតេជោ សូមអរគុណដល់សមាជិក សមាជិការដ្ឋសភា ព្រឹទ្ធសភា សមាជិកនៃរាជ​រដ្ឋាភិបាល ក៏ដូចជាតំណាងគណបក្សនយោបាយនានា ដែលបានអញ្ជើញចូលរួមក្នុងឱកាសសមាជលើកដំបូងនេះ។ សម្តេចតេជោ ក៏ថ្លែងអំណរគុណចំពោះប្រព័ន្ធផ្សព្វផ្សាយទាំងអស់ដែលបានផ្សព្វផ្សាយជូនប្រជាពលរដ្ឋបានជ្រាបក្នុងរយៈពេល២ថ្ងៃ ព្រោះតាមរយៈប្រព័ន្ធផ្សព្វផ្សាយនេះ ប្រជាពលរដ្ឋនឹងអាចយល់ដឹងកាន់តែច្បាស់។ សម្តេចថ្លែងថា៖« ព្រោះយើងចង់ឱ្យប្រជាពលរដ្ឋបានដឹង នូវអ្វីដែលជាការគិតគូររបស់រាជរដ្ឋាភិបាល និងអ្វីដែលជាគិតគូររបស់អង្គនីតិបញ្ញត្តិ ដែលជាការគាំទ្រយ៉ាងពេញទំហឹងជាមួយនឹងសកម្មភាពរបស់រាជរដ្ឋាភិបាល »។

សមាជពីរថ្ងៃបានកន្លងផុត ជាមួយនឹងការសប្បាយរីករាយ ហើយក៏មានការលើកឡើងថា គួរធ្វើសមាជ ប្រចាំឆ្នាំដើម្បីជួបជុំ។ ឆ្លើយតបទៅនឹងការលើកឡើងនេះ សម្តេចតេជោ បញ្ជាក់ថា យើងនឹងពិភាក្សាគ្នានៅពេលក្រោយទៀត ព្រោះបញ្ហាទាំងឡាយដែលសុទ្ធតែជាបញ្ហាធំៗ ត្រូវបានដោះស្រាយហើយ។

គួរជម្រាប សមាជរដ្ឋសភា និងព្រឹទ្ធសភាលើកទី១ ត្រូវបានរៀបចំឡើងពីរថ្ងៃ ចាប់ពីថ្ងៃទី ០២-០៣ ខែមិថុនា ឆ្នាំ ២០២៥ ដើម្បីពិភាក្សារបៀបវារៈចំនួនបី គឺ ប្រព័ន្ធការគាំពារសង្គម សេដ្ឋកិច្ចក្រៅប្រព័ន្ធ និងបញ្ហាកសិកម្ម។ លើសពីរបៀបវារៈដែលបានគ្រោងទុក ក្នុងសមាជនោះ ក៏បានពិភាក្សាពីជម្លោះបញ្ហាព្រំដែនកម្ពុជា-ថៃ ដោយសម្រេចថា នឹងលើកយកបញ្ហា ប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ប្តឹងទៅតុលាការយុត្តិធម៌អន្តរជាតិ ​(ICJ)។ 
តាមរយៈសមាជរដ្ឋសភា និងព្រឹទ្ធសភា នៅព្រឹកថ្ងៃទី២ ខែមិថុនាឆ្នាំ២០២៥ បានគាំទ្រទាំងស្រុងលើយន្តការដោះស្រាយបញ្ហាព្រំដែន របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានបញ្ជាក់ពីការលើកយកបញ្ហាខាងលើទៅតុលាការយុត្តិធម៌អន្តរជាតិ។ អង្គសមាជរដ្ឋសភានិងព្រឹទ្ធសភា បានឯកភាពគំាទ្រទំាងស្រុង ចំពោះយន្តការរបស់រាជរដ្ឋាភិបាល ក្នុងសំឡេង១៨២ លើ១៨២ សំឡេង នៃសមាជិកសមាជរដ្ឋសភា និងព្រឹទ្ធសភា ដែលមានវត្តមានក្នុងកិច្ចប្រជុំ៕

The post សម្តេចតេជោ ចាត់ទុកសមាជរដ្ឋសភា-ព្រឹទ្ធសភា ជាជោគជ័យដ៏ត្រចះត្រចង់ដោះស្រាយបញ្ហាធំៗរបស់ជាតិ appeared first on Kampuchea Thmey Daily.

អគ្គលេខាធិការ​ព្រឹទ្ធសភាលោក ឡាយ សំកុល បាន​បញ្ជាក់​ក្នុង​សន្និសីទសារព័ត៌មាន​បន្ទាប់​ពី​បញ្ចប់​សមាជ​រដ្ឋសភា ព្រឹទ្ធសភា កាលពី​យប់​ថ្ងៃទី​៣ ខែ​មិថុនា នៅវិមាន​រដ្ឋសភា​ថា ​តាមរយៈក្ដីសម្រេច​ទាំងបី​នោះមាន​ន័យ​រួម​ថា អង្គសមាជគាំទ្រ​ទាំង​ស្រុង​ដល់​គោល​នយោបាយ​របស់​រដ្ឋាភិបាល ដោយ​ចាត់​ទុកជា​យុទ្ធសាស្ត្រ​ដ៏​ត្រឹម​ត្រូវដោយ​​លើក​ទឹកចិត្ត​ដល់​រដ្ឋាភិបាល​បន្ត​អនុវត្តន៍ផែនការ សកម្មភាព​ ស្វែង​រក​ដំណោះស្រាយ​បំពេញ​តម្រូវ​ការបន្ថែមទៀត និង​អំពាវនាវ​ដល់​ប្រជាពលរដ្ឋ​ទាំងអស់គាំទ្រ​ដល់​រដ្ឋាភិបាល​ក្នុងការអនុវត្តន៍​ការងារ​លើ​វិស័យ​ទាំង​៣នេះដែរ។

ក្នុង​សមាជរយៈពេល​២ថ្ងៃនេះ​មាន​សមាជិក​រដ្ឋសភា និង​ព្រឹទ្ធសភា ចំនួន​៦០រូប​បាន​ឡើង​ថ្លែង​មតិយោបល់ កង្វល់ និង​អនុសាសន៍ និង​ត្រូវ​បាន​នាយករដ្ឋមន្រ្តី ព្រមទាំងតំណាង​រដ្ឋាភិបាល​បកស្រាយ​ផងដែរ។

បន្ថែម​លើ​នេះ​អគ្គលេខាធិការ​រង​រដ្ឋសភា​លោក កែវ ពិសិដ្ឋ បញ្ជាក់ថា កង្វល់និង​អនុសាសន៍ទាំង​នេះ​គ្រាន់តែ​ជា​ចំណុច​ដែល​រដ្ឋាភិបាល​បាន​ដាក់​ចូល​ក្នុង​គោល​នយោបាយសកម្មភាព​ និង​បាន​ប្ដេជ្ញារួចហើយទើបសមាជចេញ​សេចក្ដី​សម្រេច​ដែលមានលក្ខណៈជាការ​គាំទ្រ​ មិនមែន​ជា​ការ​ការ​សម្រេច​បង្គាប់បញ្ជានោះទេ។  

លោក​ថា៖ «ត្រូវ​ការ​ការសហការ​ជំរុញ​គ្នា! មិន​មែន​ជា​ការ​ចាប់​បង្ខំគ្រប់តែ​រឿង​ត្រូវ​ចាប់​បង្ខំ ហើយ​បើ​១០០រឿង​យើង​ទៅដាក់​ចេញ​នូវសេចក្ដីសម្រេច​ឱ្យ​រដ្ឋាភិបាលដោះស្រាយ​បញ្ហា​តូច​ៗ​ហ្នឹង​ទាំង​១០០​ក៏​អត់បាន​ដែរ។ អ៊ីចឹ​ងក្ដីសម្រេច​គឺ​មាន​លក្ខណៈ​ទូ​លំទូលាយ​ដែល​មាន​ភាព​បត់​បែន​ក្នុង​ការ​អនុវត្ត​ឱ្យ​បាន​ជោគ​ជ័យ​»។

គួរឱ្យ​ដឹងផងដែរថាសមាជរដ្ឋសភា ព្រឹទ្ធសភា លើក​ដំបូង​នៅ​កម្ពុជា​បាន​រៀបចំ​រយៈពេល​២ថ្ងៃ​ នៅវិមាន​រដ្ឋសភា ភ្នំពេញ ដោយ​តំណាង​រាស្ត្របាន​សួរ​ដេញដាល លើក​កង្វល់ និង​ផ្ដល់​អនុសាសន៍​ដល់​រដ្ឋាភិបាល​ឱ្យ​បកស្រាយ និង​ទទួល​យក​ទៅ​ដោះស្រាយ​ផងដែរ។ សេចក្ដីសម្រេចរបស់​អង្គសមាជ​ទាំង​៣​ប្រធាន​បទបាន​ក្លាយ​ជា​ឯកសារ​គតិយុត្តិ​មាន​តម្លៃ​ខ្ពស់​បំផុត ដែល​នឹង​ក្លាយ​ជា​ត្រីវិស័យគាំទ្រ និង​លើក​ទឹកចិត្តដល់​រដ្ឋាភិបាល អនុវត្តកម្មវិធី​នយោបាយ​កាន់​តែ​មានប្រសិទ្ធភាពក្នុង​ការ​បម្រើ​ឧត្តម​ផល​ប្រយោជន៍ប្រទេស​ជាតិនិង​ប្រជាជន៕

អត្ថបទដោយ ហ៊ុន សិរីវឌ្ឍន៍

The post លទ្ធផល​​សមាជរដ្ឋសភា ព្រឹទ្ធសភា បានទទួលយកការបកស្រាយ​ និងគាំទ្រលើ​រដ្ឋាភិបាល appeared first on Kampuchea Thmey Daily.

ក្នុងសេចក្ដី​ថ្លែង​ការណ៍​២ទំព័រ នៅ​ថ្ងៃទី​២ ខែ​មិថុនានេះ​ អង្គសមាជបានចាត់ទុក​សកម្មភាព​វាយ​ឆ្មក់​របស់​ទ័ព​ថៃ​លើ​ទ័ព​ខ្មែរ​ក្នុង​តំបន់​មុំ​បី កាលពី​ថ្ងៃទី​២៨ ខែ​ឧសភា គឺ​ជា​ការ​រំលោភបំពាន​យ៉ាង​ធ្ងន់ធ្ងរ​លើ​អធិបតេយ្យ និង​បូរណភាព​ទឹកដី របស់​ព្រះរាជាណាចក្រកម្ពុជា។ ផ្អែក​លើ​ហេតុផល​នេះអង្គសមាជ​បាន​គាំទ្រ​ជំហរ​របស់​រដ្ឋាភិបាល​កម្ពុជា​ក្នុង​ការ​យក​បញ្ហា​ ប្រាសាទតាមាន់​ធំ ប្រាសាទតាមាន់តូច ប្រាសាទ​តាក្របី និង​តំបន់​មុំ​បី ដែល​កន្លង​មក​មាន​ភាព​រកាំរកូស​ដែល​បង្កឡើង​ដោង​កង​ទ័ព​ថៃទៅ​ដោះស្រាយ​នៅ​តុលាការ​យុត្តិធម៌​អន្តរជាតិ ICJ ដើម្បី​ពន្លត់​និង​បញ្ចប់​បញ្ហានេះ។

ក្នុងសេចក្ដីថ្លែងការណ៍​នេះបាន​លើក​ឡើងថា៖ «អង្គសមាជគាំទ្ឬ​យ៉ាង​ពេញ​ទំហឹង​ ចំពោះ​ប្រសាសន៍​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា ដែលបាន​លើកឡើង​ថា ត្រូវ​ពន្លត់ភ្លើង​ជាង​អង្គុយ​បក់​ផ្សែង»។

គួរឱ្យ​ដឹង​ផងដែរ​ថាកាលពីព្រឹកថ្ងៃទី​២ ខែ​មិថុនា ក្នុង​កិច្ចប្រជុំសមាជដែល​រៀបចំ​នៅវិមាន​រដ្ឋសភា អង្គ​ប្រជុំសមាជទាំង​អស់គ្រប់គណបក្សនយោបាយ​ដែល​មាន​សំឡេង​នៅក្នុង​សភាចំនួន​ ១៨២រូប​បាន​បោះឆ្នោតគាំទ្រ​ឱ្យរដ្ឋាភិបាល​មាន​ចំណាត់​ការច្បាប់​លើ​ករណី​ព្រំដែន​ជាមួយ​ថៃ​នេះ។

ថ្លែង​ក្នុង​សមាជព្រឹក​នេះ​សម្ដេចធិបតី ហ៊ុន ម៉ាណែត​ ក៏បាន​បញ្ជាក់​ពី​ជំហររបស់​រដ្ឋាភិបាលដែរ​រដ្ឋាភិបាល​និង​យក​រឿងនេះ​ទៅ​តុលាការ​អន្តរជាតិ ដើម្បីបញ្ចប់​ការ​ប្រឈម​មុខគ្នា និង​ការ​ផ្ទុះអាវុធជាថ្មី៕

អត្ថបទដោយ ហ៊ុន សិរីវឌ្ឍន៍  

The post សមាជរដ្ឋសភា និងព្រឹទ្ធសភា ថ្កោលទោសសកម្មភាព​របស់ទ័ពថៃ និងគាំទ្រ​ឱ្យរដ្ឋាភិបាលប្ដឹង​ទៅ​ ICJ appeared first on Kampuchea Thmey Daily.

ថ្លែងនៅក្នុង​អង្គសមាជដែលរៀបចំ​នៅវិមាន​រដ្ឋសភានៅ​យប់ថ្ងៃទី​២ ខែ​មិថុនានេះ សម្ដេច​តេជោ ហ៊ុន សែន បាន​ថ្លែងថា៖ «ដូចដែលខ្ញុំបាន​ជម្រាបថា​យើ់ង​មិន​ដក​ថយ​ទេ! ដោយ​គម្រោង​ថ្ងៃនេះ​គឺ​ត្រូវ​អនុម័ត​នូវសេចក្ដីសម្រេច​ដល់ទៅ២ អ៊ីចឹង​បើ​ដល់​ម៉ោង​៥ភ្លឺក៏យើង​ត្រូវ​ធ្វើ​ដែរ។ វាស៊ីសង​នឹង​អ្នក​ឡើង​និយាយ​ ដើម្បីយើង​សាកល្បងកម្លាំង​យើង​មើល​តើ​វា​ដល់​ណា។ ប៉ុន្ដែ​កិច្ច​ការ​វា​ចាំ​បាច់​ព្រោះ​យើង​មាន​ពេល​តែ​២ថ្ងៃ ស្អែក​ប្រធាន​បទ​ក្នុង​វិស័យ​កសិកម្ម​ដែល​ត្រូវ​ធ្វើ​បន្តប្រសិនជា​លើក​ពេល​ដូចជា​ចាល​នឹង​កម្មវិធីដទៃទៀត»។

បន្ទាប់ពី​នាយករដ្ឋមន្ត្រីឡើង​ថ្លែងការណ៍​ពីប្រព័ន្ធសេដ្ឋកិច្ច​ក្រៅប្រព័ន្ធប្រមាណ​៣០នាទី​រួច​មក​ ប្រធាន​សមាជ​សម្ដេច​តេជោ ហ៊ុន សែន ប្រកាស​ថានឹង​មាន​តំណាង​រាស្ត្រ២១នាក់​ដែល​នឹង​ត្រូវ​ថ្លែងដេញដោយលើ​ប្រធានបទសេដ្ឋកិច្ច​ក្រៅប្រព័ន្ធ​នេះ ដែល​តាម​ប៉ាន់ស្មាន​គឺ​មាន​ចំនួន​២១០នាទី ស្មើនឹង​ជាង ៣ម៉ោង​កន្លះទៀត ឬនៅម៉ោងប្រមាណ១១យប់ថ្ងៃទី២ ខែមិថុនា នេះ​នៅ​មិន​ទាន់​គិតពេលវេលា​ដែល​រដ្ឋាភិបាល​ឡើង​ថ្លែង​ការពារ​នៅឡើយទេ៕

អត្ថបទដោយ ហ៊ុន សិរីវឌ្ឍន៍

The post សមាជរដ្ឋសភា ព្រឹទ្ធសភា អាចនឹងបន្តដល់រំលងអាធ្រាតថ្ងៃទី២ ខែមិថុនានេះ appeared first on Kampuchea Thmey Daily.

កម្មវិធីសមាជជាលើក​ទី១​នេះ​នឹង​ពិភាក្សា​លើ​កិច្ចការ​ចំនួន​៣​រួម​មាន​ប្រព័ន្ធ​ការពារ​សង្គម សេដ្ឋកិច្ចក្រៅប្រព័ន្ធ និង​កសិកម្ម។

ច្បាប់ស្ដីពីការរៀបចំ និងប្រព្រឹត្តទៅនៃសមាជរដ្ឋសភា និងព្រឹទ្ធសភា បានកំណត់ថា សមាជរដ្ឋសភា ព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធសភាដើម្បីដោះស្រាយបញ្ហាសំខាន់ៗរបស់ប្រទេស​ជាតិក្នុងករណីចាំបាច់។

បន្ទាប់ពីសមាជរដ្ឋសភា-ព្រឹទ្ធសភានឹងមាន​ចេញសេចក្ដីសម្រេចមួយដែលមានតម្លៃជាសេចក្ដីសម្រេចខ្ពស់បំផុតរបស់ប្រជាជាតិ ត្រូវផ្សព្វផ្សាយជាសាធារណៈ និងចុះក្នុងរាជកិច្ចផងដែរ៕

អត្ថបទដោយ ហ៊ុន សិរីវឌ្ឍន៍

The post សមាជរដ្ឋសភា-ព្រឹទ្ធសភាជាលើក​ទី១នៅ​កម្ពុជា​ត្រូវបានរៀបចំប្រជុំនៅព្រឹកនេះ appeared first on Kampuchea Thmey Daily.

កិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា បានដំណើរតាមរបៀបវារៈ ដោយបានអនុម័តកោះប្រជុំសមាជរដ្ឋសភា និងព្រឹទ្ធសភា នៅថ្ងៃទី២ និងទី៣ ខែមិថុនា ឆ្នាំ២០២៥ ខាងមុខនេះ តមតាមសំណើរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដោយមានរបៀបវារៈចំនួន៣។

របៀបវារៈទាំង៣ ដែលសមាជរដ្ឋសភា និងព្រឹទ្ធសភា នឹងលើកយកមកពិភាក្សា និងអនុម័ត រួមមាន៖១. ការពិភាក្សា និងអនុម័តប្រធានបទប្រព័ន្ធគាំពារសង្គម។ ២. ការពិភាក្សា និងអនុម័តប្រធានបទសេដ្ឋកិច្ចក្រៅប្រព័ន្ធ។ ៣. ការពិភាក្សា និងអនុម័តប្រធានបទវិស័យកសិកម្ម។

នៅក្នុងកិច្ចប្រជុំគណៈកម្មាធិការសមាជ នាព្រឹកថ្ងៃនេះ ក៏បានអនុម័តសមាសភាពលេខាធិការអង្គប្រជុំសមាជរដ្ឋសភា និងព្រឹទ្ធសភា ចំនួន៤រូប មានលោក ឃុត ចាន់ដារ៉ា លោក សេង ញ៉ក់ លោក ម៉ាន់ ឈឿន និងលោក ឈើយ ចាន់ណា។

យោងច្បាប់ស្តីពីការរៀបចំ និងការប្រព្រឹត្តទៅនៃសមាជរដ្ឋសភា និងព្រឹទ្ធសភា សមាជរដ្ឋសភា និងព្រឹទ្ធសភា ជាការប្រជុំរួមគ្នារបស់សមាជិករដ្ឋសភា និងព្រឹទ្ធសភា ដើម្បីដោះស្រាយបញ្ហាសំខាន់ៗរបស់ប្រទេសជាតិ ករណីចំបាច់ ដូចជា៖ ការគំរាមកំហែងយ៉ាងធ្ងន់ធ្ងរដល់ឯករាជ្យ អធិបតេយ្យ និងបូរណភាពទឹកដី ឬ ករណីប្រធានសក្តិ បណ្តាលឱ្យមានវិនាសកម្មយ៉ាងធ្ងន់ធ្ងរដល់ជាតិ និងប្រជាជន ឬករណីផ្សេងៗទៀតដែលគណៈកម្មការធិការសមាជ យល់ឃើញថា ជាបញ្ហាសំខាន់របស់ប្រទេសជាតិ។

និយាយចំពោះសមាជព្រឹទ្ធសភា និងរដ្ឋសភា នាពេលខាងមុខនេះ ជាដំណើរការលទ្ធិប្រជាធិបតេយ្យ និងការទទួលខុសត្រូវរបស់រាជរដ្ឋាភិបាលចំពោះប្រជាពលរដ្ឋ ដែលបានផ្តល់ការគាំទ្រយ៉ាងច្រើនលើសលប់លើរាជរដ្ឋាភិបាល នៅក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ កាលពីថ្ងៃខែកក្កដាឆ្នាំ២០២៣កន្លងនេះ។

ជាការឆ្លើយតបចំពោះទំនុកចិត្តរបស់ប្រជាពលរដ្ឋបែបនេះហើយ បានជារាជរដ្ឋាភិបាលស្នើសុំសភាដែលតំណាងឱ្យប្រជាពលរដ្ឋ រៀបចំសមាជរដ្ឋសភា និងព្រឹទ្ធសភា ឡើង ក្នុងគោលបំណងបង្ហាញពីលទ្ធផលដែលរាជរដ្ឋាភិបាលសម្រេចបានក្នុងការបម្រើប្រជាពលរដ្ឋ និងប្រទេសជាតិនៅក្នុងរយៈពេលជិត ២ឆ្នាំមកនេះ។ តាមរយៈប្រធានបទទាំង៣ ដែលនឹងត្រូវលើកមកពិភាក្សាក្នុងសមាជនេះ ត្រូវបានសង្ឃឹមថា នឹងជំរុញបន្ថែមទៀតនូវឧត្តមប្រយោជន៍ជូនប្រជាពលរដ្ឋ៕

ដោយ៖ ធឿន វ៉ាន់សុង

The post សភាសម្រេចយកថ្ងៃទី២ និងទី៣ មិថុនា រៀបចំសមាជ ដោយពិភាក្សាលើបញ្ហាជាតិចំនួន៣ appeared first on Kampuchea Thmey Daily.

បញ្ហារបស់ជាតិទាំង៣នេះ រួមមានទាក់ទងនឹងប្រព័ន្ធគាំពារសង្គម បញ្ហាសេដ្ឋកិច្ចក្រៅប្រព័ន្ធ និងសំខាន់បំផុតនោះ គឺពាក់ព័ន្ធទៅនឹងវិស័យកសិកម្ម ដែលគណៈកម្មាធិការសមាជរដ្ឋសភា និងព្រឹទ្ធសភា បានពិនិត្យ និងអនុម័តទៅលើប្រធានបទទាំង៣នេះ សម្រាប់សមាជលើកទី១ របស់ខ្លួន។

តាមការគ្រោងទុក ព្រឹទ្ធសភា និងរដ្ឋសភាកម្ពុជា នឹងរៀបចំធ្វើសមាជ នៅក្នុងខែមិថុនាខាងមុខ គឺតបតាមសំណើរបស់ប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត ដើម្បីជំរុញឧត្តមប្រយោជន៍ជូនប្រជាពលរដ្ឋ។ សមាជព្រឹទ្ធសភា និងរដ្ឋសភា ជាដំណើរការលទ្ធិប្រជាធិបតេយ្យ និងការទទួលខុសត្រូវដ៏ខ្ពង់ខ្ពស់បំផុតរបស់រាជរដ្ឋាភិបាលចំពោះប្រជាពលរដ្ឋ ដែលបានផ្តល់ការគំាទ្រ យ៉ាងច្រើនលើសលប់មកលើរាជរដ្ឋាភិបាល នៅក្នុងការបោះឆ្នោតជ្រើសតំាងតំណាងរាស្រ្ត នីតិកាលទី៧ កាលពីថ្ងៃខែកក្កដាឆ្នាំ២០២៣ កន្លងនេះ។

ជាការឆ្លើយតបចំពោះទំនុកចិត្តរបស់ប្រជាពលរដ្ឋបែបនេះហើយ បានជារាជរដ្ឋាភិបាលស្នើសុំសភាដែលតំណាងឱ្យប្រជាពលរដ្ឋ រៀបចំសមាជរដ្ឋសភា និងព្រឹទ្ធសភា ឡើង ក្នុងគោលបំណងបង្ហាញពីលទ្ធផលដែលរាជរដ្ឋាភិបាលសម្រេចបានក្នុងការបម្រើប្រជាពលរដ្ឋ និងប្រទេសជាតិនៅក្នុងរយៈពេលជិត២ឆ្នាំមកនេះ។

យោងច្បាប់ស្តីពីការរៀបចំ និងការប្រព្រឹត្តទៅនៃសមាជរដ្ឋសភា និងព្រឹទ្ធសភា សមាជរដ្ឋសភា និងព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធសភា ដើម្បីដោះស្រាយបញ្ហាសំខាន់ៗរបស់ប្រទេសជាតិ ករណីចំបាច់ ដូចជា៖ ការគំរាមកំហែងយ៉ាងធ្ងន់ធ្ងរដល់ឯករាជ្យ អធិបតេយ្យ និងបូរណភាពទឹកដី ឬករណីប្រធានសក្តិ បណ្តាលឱ្យមានវិនាសកម្មយ៉ាងធ្ងន់ធ្ងរដល់ជាតិ និងប្រជាជន ឬករណីផ្សេងៗទៀត ដែលគណៈកម្មការធិការសមាជ យល់ឃើញថា ជាបញ្ហាសំខាន់របស់ប្រទេសជាតិ។

ព្រះមហាក្សត្រ ប្រធានព្រឹទ្ធសភា ប្រធានរដ្ឋសភា នាយករដ្ឋមន្រ្តី អាចផ្តួចផ្តើមឱ្យមានការប្រជុំសមាជបាន ដោយប្រធានសមាជ អញ្ជើញសមាជិករដ្ឋសភា និងព្រឹទ្ធសភាឱ្យចូលរួមប្រជុំសមាជ។ ច្បាប់សមាជរដ្ឋសភាព្រឹទ្ធសភា បានកំណត់ថា ប្រធានព្រឹទ្ធសភាជាប្រធានសមាជ៕

The post បញ្ហាជាតិចំនួន៣ ត្រូវបានរដ្ឋសភា-ព្រឹទ្ធសភា លើកមកពិនិត្យ ដើម្បីត្រៀមសម្រាប់សមាជរួមគ្នា appeared first on Kampuchea Thmey Daily.

អ្នកនាំពាក្យព្រឹទ្ធសភា លោក ជា ធីរិទ្ធ បានប្រាប់កម្ពុជាថ្មីថាសមាជនេះនឹងរៀបចំនៅសប្ដាហ៍ទី១ ក្នុងខែមិថុនា ខាងមុខ។ លោកបន្ថែមថាសមាជនេះនឹងមានការពិភាក្សាលើប្រធានបទ៣សំខាន់ៗគឺទាក់ទងនឹងវិស័យកសិកម្ម វិស័យសេដ្ឋកិច្ចក្រៅប្រព័ន្ធ និងប្រព័ន្ធគាំពារសង្គម។

លោកថា៖ «ក្នុងច្បាប់ស្ដីពីការរៀបចំនឹងប្រព្រឹត្តិទៅនៃសមាជរដ្ឋសភានិងព្រឹទ្ធសភានោះគឹបានកំណត់យ៉ាងច្បាស់ថាប្រធានព្រឹទ្ធសភាគឺជាអ្នកដឹកនាំសមាជនោះ»។

តាមគម្រោងសមាជនេះនឹងរៀបចំនៅវិមានរដ្ឋសភាជាតិ រាជធានីភ្នំពេញ ជាកន្លែងដែលអគ្គលេខាធិការរដ្ឋសភាបានរៀបចំពិធីបួសសួង សុំសេចក្ដីសុខសេចក្ដីចម្រើនក្នុងការសាងសង់អាសនៈសមាជកាលពីថ្ងៃទី២៤ ខែមីនាកន្លងទៅ។

អ្នកនាំពាក្យរដ្ឋសភាលោក កែវ ពិសិដ្ឋ ធ្លាប់ប្រាប់អ្នកយកព័ត៌មានថាក្រុមការងារបច្ចេកទេសនៃសភាទាំងពីរកំពុងរៀបចំនីតិវិធីទាក់ទងនឹងការរៀបចំហេដ្ឋារចនាសម្ព័ន្ធ និងការងារផ្សេងៗពាក់ព័ន្ធនឹងសមាជនេះស្របពេលដែលការរៀបចំសមាជកាន់តែខិតជិតដល់។

ច្បាប់ស្ដីពីការរៀបចំ និងប្រព្រឹត្តទៅនៃសមាជរដ្ឋសភា និងព្រឹទ្ធសភា បានកំណត់ថា សមាជរដ្ឋសភា ព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធសភាដើម្បីដោះស្រាយបញ្ហាសំខាន់ៗរបស់ប្រទេស​ជាតិក្នុងករណីចាំបាច់។ បញ្ហាសំខាន់ៗទាំងនោះរួមមាន ការ​គំរាមកំហែង​យ៉ាងធ្ងន់ធ្ងរ​ដល់​ឯករាជ្យ អធិបតេយ្យ និង​បូរណភាព​ទឹកដី​។​ ករណី​មាន​ប្រធាន​សក្តិ បណ្តាល​ឱ្យ​មាន​វិនាសកម្ម​យ៉ាងធ្ងន់ធ្ងរ​ដល់​ជាតិ និង​ប្រជាជន ឬករណី​ផ្សេង​ៗ​ទៀត ដែល​គណៈកម្មាធិការ​សមាជ​យល់​ឃើញ​ថា ​ជា​បញ្ហា​សំខាន់​របស់​ប្រទេស​ជាតិ​។

អ្នកស្រាវជ្រាវការអភិវឌ្ឍន៍សង្គមលោកបណ្ឌិត មាស នី មានប្រសាសន៍ថាលោកកំពុងរង់ចាំមើលពីភាពផុសផុល និងគុណភាពនៃការដេញដោលគ្នារបស់អ្នកតំណាងរាស្ត្រ ជាជាងបង្កើតឱ្យមានជារូបរាងហើយតែការដេញដោលបែរជាមិនសូវគួរឱ្យចាប់អារម្មណ៍។  

លោកថា៖ «បើយើងអនុឡោមតាមពាក្យថាសមាជ ខ្ញុំរំពឹងថានឹងមានការជជែកដេញដោលគ្នាលើការបំពេញតួនាទីរបស់ស្ថាប័នទាំងពីរហ្នឹង​កន្លងមកហើយហ្នឹង ហើយជាពិសេសទៅលើឯករាជ្យភាពរបស់ស្ថាប័នហ្នឹងដែលខ្ញុំគិតថាប្រហែលជាអាចយកមកជជែកដែរ ឬក៏អាចជជែកពាក់ព័ន្ធនឹងបញ្ហានយោបាយដែរ»។

ការធ្វើសមាជរដ្ឋសភា ព្រឹទ្ធសភា ត្រូវបានចែងក្នុងមាត្រា១១៦ថ្មី និង១១៧ថ្មីនៃរដ្ឋធម្មនុញ្ញកម្ពុជាដែលកំណត់ថាក្នុងករណីចាំបាច់សភាទាំងពីរអាចប្រជុំគ្នាជាសមាជដើម្បីដោះស្រាយបញ្ហាសំខាន់ៗរបស់ជាតិបាន។

គួរឱ្យដឹងដែរថាបន្ទាប់ពីសមាជរដ្ឋសភា-ព្រឹទ្ធសភានឹងមាន​ចេញសេចក្ដីសម្រេចមួយដែលមានតម្លៃជាសេចក្ដីសម្រេចខ្ពស់បំផុតរបស់ប្រជាជាតិ ត្រូវផ្សព្វផ្សាយជាសាធារណៈ និងចុះក្នុងរាជកិច្ចផងដែរ៕

អត្ថបទដោយ ហ៊ុន សិរីវឌ្ឍន៍

The post សមាជរដ្ឋសភា-ព្រឹទ្ធសភានឹងរៀបចំនៅខែមិថុនាខណៈអ្នកតាមដានរំពឹងខ្ពស់ពីលទ្ធផល appeared first on Kampuchea Thmey Daily.