សមិទ្ធផលខេត្តកោះកុង Archives - Kampuchea Thmey Daily

ផ្លូវពីជីផាតទៅអារ៉ែងចម្ងាយជិត ៤០ គីឡូម៉ែត្រកែលម្អល្អប្រសើរ ការធ្វើដំណើរលែងពិបាកដូចមុន

Dy Bunnara — Wed, 10 Jun 2026 01:25:00 +0000

ផ្លូវពីអារ៉ែងមកជីផាតនៅក្នុងស្រុកថ្មបាំងខេត្តកោះកុង ត្រូវបានអាជ្ញាធរជួសជុលកែលម្អដែលសម្រួលការធ្វើដំណើរសម្រាប់ទេសចរមកកម្សាន្តនៅតំបន់អេកូទេសចរណ៍ដ៏មានសក្តានុពលក្នុងខេត្តកោះកុង។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានឲ្យកម្ពុជាថ្មីដឹងថា ផ្លូវពីអារ៉ែងមកជីផាតមានប្រវែងជាង ៤០ គីឡូម៉ែត្រ បច្ចុប្បន្នក្រោយអាជ្ញាធរបានជួសជុលកែលម្អ បានសម្រូលការធ្វើដំណើរបានប្រសើរជាងមុន។

«បច្ចុប្បន្ននៅជាផ្លូវដី ប៉ុន្តែភ្ញៀវទេសចរអាចធ្វើដំណើរទៅមកបានងាយស្រួល ទោះបីមិនទាន់អភិវឌ្ឍជាផ្លូវកៅស៊ូក៏ដោយ»។ លោកបញ្ជាក់។

ពាក់ព័ន្ធថ្ងៃខាងមុខអាចវិវឌ្ឍស្ថាបនាជាផ្លូវកៅស៊ូ លោក អៀង ដារ៉ាវុធថា វាជាគម្រោងហើយការសម្រេចយ៉ាងណាគឺស្ថិតនៅក្រោមការគ្រប់គ្រងរបស់អាជ្ញាធរមូលដ្ឋាន ដោយសារផ្លូវនេះមិនស្ថិតនៅក្រោមមន្ទីរគ្រប់គ្រងនោះទេ។

ផ្លូវទៅតំបន់អេកូទេសចរណ៍ជីផាត និងអារ៉ែង កំពុងស្ថាបនាជាផ្លូវក្រាលកៅស៊ូ ហើយបើតាមមន្រ្តីមន្ទីរអភិវឌ្ឍន៍ជនបទខេត្តកោះកុងបានបញ្ជាក់ថា ការសាងសង់ស្ទើរតែបញ្ចប់ ១០០% គឺនៅសល់តែការងារបន្តិចបន្តួចប៉ុណ្ណោះ។

ផ្លូវទៅអារ៉ែងចែកចេញជា ៣ កំណាត់ មានប្រវែងសរុបប្រមាណ ៥២ គីឡូម៉ែត្រ។ កំណាត់ពីផ្លូវជាតិលេខ ៤៨ ត្រង់ផ្លូវបំបែកគីឡូម៉ែត្រលេខ ១១៥ ដល់ទីរួមស្រុកថ្មបាំងដែលមានប្រវែង ២៦ គីឡូម៉ែត្របានបញ្ចប់ការក្រាលកៅស៊ូ ១០០%។ ខណៈកំណាត់ពីស្រុកថ្មបាំងដល់ស្ទឹងអារ៉ែងដែលប្រវែង ១៦ គីឡូម៉ែត្រ (ផ្លូវឬស្សីជ្រុំ-ប្រឡាយ) ក៏ស្ទើរតែរួចរាល់ ១០០% គឺនៅសេសសល់ការងារសំណង់សិល្បការតិចតួចប៉ុណ្ណោះ ដូចជាការធ្វើប្រព័ន្ធលូជាដើម។

កន្លងទៅរាជរដ្ឋាភិបាលតាមរយៈក្រសួងអភិវឌ្ឍន៍ជនបទ ក៏បានបញ្ចប់ការស្ថាបនាកំណាត់ផ្លូវប្រវែងជាង ១០ គីឡូម៉ែត្រក្នុងស្រុកថ្មបាំង។

ដោយឡែកផ្លូវទៅតំបន់អេកូទេសចរណ៍ជីផាតជាផ្លូវក្រាលកៅស៊ូ ក៏ស្ទើរតែរួចរាល់ ១០០%។

តាមរយៈសមិទ្ធផលផ្លូវនេះ ប្រជាពលរដ្ឋក្នុងមូលដ្ឋានមានការអបអរសាទរយ៉ាងខ្លាំង ខណៈផ្លូវទៅតំបន់អេកូទេសចរណ៍ជីផាតគឺជាខ្សែផ្លូវទេសចរណ៍ដ៏សំខាន់មួយ ដែលទេសចរកំណត់ជាគោលដៅសម្រាប់ដំណើរកម្សាន្តមកខេត្តកោះកុង៕

The post ផ្លូវពីជីផាតទៅអារ៉ែងចម្ងាយជិត ៤០ គីឡូម៉ែត្រកែលម្អល្អប្រសើរ ការធ្វើដំណើរលែងពិបាកដូចមុន appeared first on Kampuchea Thmey Daily.

ផ្លូវទៅតំបន់អេកូទេសចរណ៍អារ៉ែង ឈានទៅចាក់ក្រាលកៅស៊ូស្ទើរបញ្ចប់ ១០០%

Dy Bunnara — Wed, 03 Jun 2026 03:18:03 +0000

ផ្លូវទៅអារ៉ែងដែលជាតំបន់អេកូទេសចរណ៍ដ៏ល្បីល្បាញនៅស្រុកថ្មបាំងខេត្តកោះកុង កំពុងជំរុញនិងគ្រោងបញ្ចប់ក្នុងពេលដ៏ខ្លីខាងមុខនេះ។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានឲ្យកម្ពុជាថ្មីដឹងតាមទូរសព្ទថា ផ្លូវចាក់ក្រាលកៅស៊ូឆ្ពោះទៅតំបន់អារ៉ែង ដែលឆ្លងកាត់ស្រុកថ្មបាំងបច្ចុប្បន្ននេះសម្រេចស្ទើរតែ ១០០%។

លោកថា ផ្លូវទៅតំបន់ទេសចរណ៍ស្ទឹងអារ៉ែងចែកចេញជា ៣ កំណាត់ ចាប់ពីចំណុចផ្លូវជាតិលេខ ៤៨ មានប្រវែងសរុបប្រមាណ ៥២ គីឡូម៉ែត្រ។

សម្រាប់កំណាត់ចេញពីផ្លូវជាតិលេខ ៤៨ ត្រង់ផ្លូវបំបែកគីឡូម៉ែត្រលេខ ១១៥ ដល់ទីរួមស្រុកថ្មបាំងដែលមានប្រវែង ២៦ គីឡូម៉ែត្របានបញ្ចប់ការក្រាលកៅស៊ូ ១០០%។ ខណៈកំណាត់ពីស្រុកថ្មបាំងដល់ស្ទឹងអារ៉ែងដែលប្រវែង ១៦ គីឡូម៉ែត្រ (ផ្លូវឬស្សីជ្រុំ-ប្រឡាយ) ក៏ស្ទើរតែរួចរាល់ ១០០% គឺនៅសេសសល់ការងារសំណង់សិល្បការតិចតួចប៉ុណ្ណោះ ដូចជាការធ្វើប្រព័ន្ធលូជាដើម។

លោក អៀង ដារ៉ាវុធ បានបន្តថា កន្លងទៅរាជរដ្ឋាភិបាលតាមរយៈក្រសួងអភិវឌ្ឍន៍ជនបទ បានបញ្ចប់ការស្ថាបនាកំណាត់ផ្លូវប្រវែងជាង ១០ គីឡូម៉ែត្រក្នុងស្រុកថ្មបាំង។

ទន្ទឹមកំណាត់ផ្លូវទៅតំបន់អេកូទេសចរណ៍អារ៉ែងនៅស្រុកថ្មបាំង ចាក់ក្រាលកៅស៊ូស្ទើរបញ្ចប់ទាំងស្រុង ផ្លូវតភ្ជាប់ពីអារែងទៅជីផាតដែលមានប្រវែង ៤០ គីឡូម៉ែត្រ ក៏បានស្ថាបនាតភ្ជាប់គ្នាសម្រួលការធ្វើដំណើរពីតំបន់អេកូទេសចរណ៍ដ៏សក្ដានុពលទាំងពីរនេះបានប្រសើរជាងមុន តាមរយៈបណ្តាញផ្លូវទាំងកៅស៊ូនិងផ្លូវដី។

លោក អៀង ដារ៉ាវុធ បានបញ្ជាក់ថា ទោះបីបច្ចុប្បន្នផ្លូវតភ្ជាប់ពីអារែងទៅជីផាតនៅត្រឹមជាផ្លូវដីក៏ដោយ ប៉ុន្តែតំបន់គោលដៅទេសចរណ៍ទាំងពីរនេះបច្ចុប្បន្នគឺអាចធ្វើដំណើរតភ្ជាប់គ្នាទៅវិញទៅមកបានយ៉ាងងាយស្រួល៕

The post ផ្លូវទៅតំបន់អេកូទេសចរណ៍អារ៉ែង ឈានទៅចាក់ក្រាលកៅស៊ូស្ទើរបញ្ចប់ ១០០% appeared first on Kampuchea Thmey Daily.

អ្នកទេសចរ និង ពលរដ្ឋឃុំជីផាត លែងពិបាកធ្វើដំណើរ ក្រោយទទួលបានផ្លូវកៅស៊ូថ្មីប្រវែង ១៦ គីឡូម៉ែត្រ

អ៊ិន ពិសី — Tue, 02 Jun 2026 03:09:06 +0000

ទាំងអ្នកទេសចរ និង ប្រជាពលរដ្ឋឃុំជីផាត ស្រុកថ្មបាំង ខេត្តកោះកុង លែងពិបាកក្នុងការធ្វើដំណើរទៅមកដូចពេលមុនៗ ហើយ បន្ទាប់ពីទទួលបានផ្លូវកៅស៊ូថ្មីប្រវែង ១៦ គីឡូម៉ែត្រ ជំនួសឲ្យផ្លូវក្រួសក្រហមចាស់។

ទីបំផុតទៅ ផ្លូវក្រួសក្រហមដែលធ្លាប់ពិបាកធ្វើដំណើរទៅមករដូវប្រាំង រដូវវស្សា បានប្រែក្លាយជាផ្លូវកៅស៊ូយ៉ាងថ្មីសន្លាងមានទទឹង ៦ ម៉ែត្រ និង ប្រវែង ១៦ គីឡូម៉ែត្រ ក្រោមគម្រោងនិរន្តរភាពតំបន់ទេសភាព និង ទេសចរណ៍ធម្មជាតិកម្ពុជា ដែលមានក្រសួងអភិវឌ្ឍន៍ជនបទ និង ក្រសួងទេសចរណ៍ សហការគ្នា។

អ្នកស្រី អ៊ី គឹមជី និង លោក ប៉ន រិទ្ធី ជាពលរដ្ឋរស់នៅក្នុងភូមិជីផាត ឃុំជីផាត ស្រុកថ្មបាំង បានលើកឡើងកាលពីថ្ងៃទី ២៦ ខែឧសភា ឆ្នាំ ២០២៦ ថ្មីៗ នេះថា ពួកគាត់ពិតជាសប្បាយចិត្តរកអ្វីប្រៀបផ្ទឹមមិនបាននោះទេ ពេលទទួលបានផ្លូវកៅស៊ូថ្មីនេះឡើងដែលផ្តើមពីកែងផ្លូវជាតិលេខ ៤៨ ស្រុកបូទូមសាគរ រហូតដល់កំពង់ចម្លងជីផាត។

ពលរដ្ឋដដែល បន្ថែមថា កន្លងទៅ កំណាត់ផ្លូវខាងលើជាប្រភេទផ្លូវក្រួសក្រហមលំបាកធ្វើដំណើរពេលខែប្រាំង និង វស្សា ថែមទាំងពិបាកដឹកជញ្ចូនទិន្នផលកសិកម្មទៅកាន់ទីផ្សារទៀតផង រីឯ អ្នកទេសចរ ក៏ចំណាយពេលវេលាយូរមកកម្សាន្តតំបន់អេកូទេសចរណ៍ធម្មជាតិជីផាតដែរ ខណៈមានសក្តានុពលខ្ពស់ នៃវិស័យទេសចរណ៍គ្រប់ភ្ញៀវទេសចរទាំងអស់។

ទន្ទឹមនោះការទទួលបានផ្លូវកៅស៊ូថ្មីស្អាតល្អហើយ ពលរដ្ឋ នៅតែស្នើសុំឲ្យមានការជួយកសាងស្ពានប្រវែង ១៦២ ម៉ែត្រ ឆ្លងកាត់ព្រែកជីផាត បន្ថែមទៀត គ្រាជាបំណងប្រាថ្នាយូរឆ្នាំមកហើយរបស់ពួកគាត់ ព្រោះថា សព្វថ្ងៃ មិនថាពលរដ្ឋ ឬ អ្នកទេសចរ ត្រូវចំណាយពេលវេលាថវិកាច្រើនគួរសម ដើម្បីធ្វើដំណើរឆ្លងទៅមក។ អ្វីដែលសំខាន់គឺពេលមានជំងឺឈឺយប់ព្រលប់អ្វី ពិបាកឆ្លងទៅរកសេវាពិនិត្យព្យាបាលសុខភាព។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុង បានឲ្យដឹងថា ផ្លូវកៅស៊ូប្រវែងជាង ១៦ គីឡូម៉ែត្រ ប្រភេទ DBST ផ្តើមចេញពីកែផ្លូវជាតិលេខ ៤៨ ឆ្ពោះទៅកាន់តំបន់អេកូទេសចរណ៍ធម្មជាតិជីផាត ស្រុកថ្មបាំង ខេត្តកោះកុង សម្រេចការស្ថាបនាបានស្ទើរតែ ១០០ ភាគរយហើយ។ ១០ ភាគរយទៀត នៅសេសសល់តែការដំឡើងស្លាកសញ្ញា និង គំនូសសញ្ញាចរាចរណ៍ប៉ុណ្ណោះ។

លោក អៀង ដារ៉ាវុធ អះអាងដែរថា ផ្លូវកៅស៊ូ ១ ខ្សែនេះ នឹងសម្រួលការធ្វើដំណើរប្រកបដោយសុខសុវត្ថិភាពរបស់ប្រជាសហគមន៍រស់នៅក្នុងឃុំជីផាត និង លើកកម្ពស់វិស័យទេសចរណ៍កាន់តែល្អប្រសើរ ខណៈតំបន់នេះជាគោលដៅទេសចរណ៍ដ៏មានសក្តានុពលមួយនៅកម្ពុជា។

ក្រសួងអភិវឌ្ឍន៍ជនបទ សហការជាមួយ ក្រសួងទេសចរណ៍ បានបើកការដ្ឋានសាងសង់ផ្លូវទាំង ២ ខ្សែ ប្រវែងសរុប ៣២ ម៉ែត្រ ដែលមានតម្លៃប្រមាណជាង ៥ លានដុល្លាអាមេរិក នឹង ផ្តល់ផលប្រយោជន៍ដល់ប្រជាជនចំនួន ១.៣៩៣ គ្រួសារ ស្មើនឹង ៦.១៤៥ នាក់ រស់នៅក្នុងឃុំចំនួន ៤ គឺ ឃុំកណ្តោល ឃុំជីផាត ឃុំឬស្សីជ្រុំ និង ឃុំជំនាប់ នៃស្រុកថ្មបាំង ខេត្តកោះកុង។

លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ កាលពីខែវិច្ឆិកា ឆ្នាំ ២០២៦ ធ្លាប់និយាយថា ក្រសួង កំពុងសិក្សាលម្អិតផ្នែកបច្ចេកទេសជាមួយនឹងក្រសួង-ស្ថាប័នពាក់ព័ន្ធ កសាងស្ពានប្រវែង ១៦២ ម៉ែត្រ និង ទទឹង ១០ ម៉ែត្រ ឆ្លងកាត់តភ្ជាប់រវាងភូមិទឹកល្អក់ និង ភូមិជីផាត ថា ធ្វើជាស្ពានបាឡេ ឬ ស្ពានបេតុង ដើម្បីឆ្លើយតបនឹងការស្នើសុំរបស់សហគមន៍ ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់៕
អត្ថបទ ៖ សិរីវឌ្ឍនៈ

The post អ្នកទេសចរ និង ពលរដ្ឋឃុំជីផាត លែងពិបាកធ្វើដំណើរ ក្រោយទទួលបានផ្លូវកៅស៊ូថ្មីប្រវែង ១៦ គីឡូម៉ែត្រ appeared first on Kampuchea Thmey Daily.

លែងពិបាកដូចមុន ផ្លូវទៅជីផាតចាក់ក្រាលកៅស៊ូស្ទើររួចរាល់ ១០០% ទេសចរអាចទៅកម្សាន្តទាំងរដូវប្រាំងនិងរដូវវស្សា

Dy Bunnara — Wed, 27 May 2026 04:06:58 +0000

ផ្លូវទៅតំបន់អេកូទេសចរណ៍ជីផាតក្នុងស្រុកថ្មបាំង ខេត្តកោះកុង បានវិវឌ្ឍន៍ពីផ្លូវដីក្រួសក្រហមទៅជាផ្លូវក្រាលកៅស៊ូ ដែលសម្រួលបានការធ្វើដំណើររបស់ភ្ញៀវទេសចរទៅកម្សាន្ត លែងពិបាកដូចមុនបានគ្រប់រដូវមិនថារដូវប្រាំងឬរដូវវស្សា។

ផ្តល់បទសម្ភាសន៍តាមទូរសព្ទដល់កម្ពុជាថ្មីនៅព្រឹកនេះ លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានបង្ហាញពីវឌ្ឍនភាពនៃការស្ថាបនាផ្លូវទៅកាន់តំបន់អេកូទេសចរណ៍ជីផាត ដែលលោកបានបញ្ជាក់ថាគឺជិតរួចរាល់ជាស្ថាពរហើយ ពោលគឺសម្រេចបានជាង ៩០% ដោយនៅសល់ការងារបន្តិចបន្តួចប៉ុណ្ណោះ។

លោកថា តាមរយៈសមិទ្ធផលផ្លូវនេះ ប្រជាពលរដ្ឋក្នុងមូលដ្ឋានមានការអបអរសាទរ និងគាំទ្រយ៉ាងខ្លាំង ខណៈដែលផ្លូវទៅតំបន់អេកូទេសចរណ៍ជីផាតគឺជាខ្សែផ្លូវទេសចរណ៍ដ៏សំខាន់មួយ ដែលទាក់ទាញភ្ញៀវទេសចរចាប់អារម្មណ៍ទៅកម្សាន្តយ៉ាងច្រើន។

«ផលប្រយោជន៍ផ្លូវនេះ ជួយសម្រួលដល់ការធ្វើដំណើររបស់ប្រជាពលរដ្ឋ និងបម្រើដល់វិស័យទេសចរណ៍ ព្រោះតំបន់ជីផាតជាតំបន់ទេសចរណ៍ដ៏សំខាន់មួយ ដែលមានភ្ញៀវទេសចរចូលចិត្តទៅលេងកម្សាន្តច្រើន»។

ដើម្បីធានាឱ្យផ្លូវទើបស្ថាបនាថ្មីអាចប្រើប្រាស់បានយូរអង្វែង មន្រ្តីជំនាញស្នើឲ្យមានការសហការចូលរួមថែរក្សាពីសំណាក់ប្រជាពលរដ្ឋ និងអាជ្ញាធរពាក់ព័ន្ធ។ លោក អៀង ដារ៉ាវុធ បានបញ្ជាក់ថា ហានិភ័យចម្បងនិងធំបំផុតដែលធ្វើឱ្យផ្លូវឆាប់ខូច គឺការដឹកជញ្ជូនលើសទម្ងន់ ពីរថយន្តធុនធ្ងន់ប្រកបអាជីវកម្មនានាដូចជា រថយន្តដឹកដី ដឹកខ្សាច់ និងដឹកថ្ម ត្រូវដឹកឲ្យត្រូវតាមទម្ងន់កំណត់ កុំឲ្យលើសទម្ងន់ ព្រោះបើគ្មានការចូលរួមថែរក្សាទេ ផ្លូវកៅស៊ូនេះនឹងត្រូវខូចខាតទៅវិញក្នុងរយៈពេលតែ ១ ទៅ ២ ឆ្នាំប៉ុណ្ណោះ

ស្របពេលដែលផ្លូវទៅតំបន់ទេសចរណ៍ជីផាតសាងសង់ស្ទើររួចរាល់ ១០០% ពលរដ្ឋស្នើឱ្យមានការសាងសង់ស្ពានឆ្លងកាត់ដៃព្រែកជីផាតបន្ថែម ខណៈអាជ្ញាធរបញ្ជាក់ថាកំពុងធ្វើការដោះស្រាយតាមដំណាក់កាល។

លោក អៀង ដារ៉ាវុធ បានឆ្លើយតបថា «អាជ្ញាធរនឹងធ្វើទៅតាមដំណាក់កាល ដោយត្រូវស្វែងរកដៃគូសហការ ឬកញ្ចប់ថវិកាពីថ្នាក់លើមកជួយ តែមិនទាន់សន្យាថានឹងធ្វើជូន ១០០% ភ្លាមៗនោះទេ ដោយនឹងខិតខំស្វែងរកដៃគូអភិវឌ្ឍន៍ដើម្បីបន្តការសាងសង់»៕

The post លែងពិបាកដូចមុន ផ្លូវទៅជីផាតចាក់ក្រាលកៅស៊ូស្ទើររួចរាល់ ១០០% ទេសចរអាចទៅកម្សាន្តទាំងរដូវប្រាំងនិងរដូវវស្សា appeared first on Kampuchea Thmey Daily.

អំពូលសូឡា១៥០ដើម កំពុងដំឡើងសងខាងផ្លូវជាតិលេខ ៤៨ ក្នុងក្រុងខេមរភូមិន្ទ ដើម្បីសុវត្ថិភាពអ្នកធ្វើដំណើរ

Ung Meng — Mon, 13 Apr 2026 08:02:57 +0000

អំពូលសូឡាប្រមាណ១៥០ដើម កំពុងដំឡើងសងខាងផ្លូវជាតិលេខ៤៨ ស្ថិតនៅក្នុងសង្កាត់ស្មាច់មានជ័យ ក្រុងខេមរភូមិន្ទ ដើម្បីផ្តល់សុវត្ថិភាពជូនពលរដ្ឋ និងអ្នកទេសចរចរាចរណ៍ទៅមក។

លោក អ៊ូច ទូច នាយករដ្ឋបាលខេត្តកោះកុង បានឲ្យដឹងនៅថ្ងៃទី១៣ ខែមេសាឆ្នាំ២០២៦ថា អំពូសូឡា១៥០បង្គោល កំពុងដំឡើងសងខាងផ្លូវជាតិលេខ៤៨ ផ្តើមពីចំណុច អូរស្រីស្រណោះ ហួសដល់ ស្តូបនយោបាយឈ្នះឈ្នះ កែងនិងផ្លូវទល់មុខទីបញ្ជាការដ្ឋានថ្មីកងរាជអាវុធហត្ថខេត្ត។

លោក អ៊ូច ទូច បានបន្តថា ការដំឡើងអំពូសូឡាខាងលើ ស្មើនឹងប្រវែងជាង៦គីឡូម៉ែត្រនេះ ជាគម្រោងផ្តួចផ្ដើមរបស់លោកស្រី ឈី វ៉ា អភិបាលខេត្តកោះកុង ក្រោមការណែនាំរបស់សម្តេចពិជ័យសេនា ទៀ បាញ់ ប្រធានក្រុមការងារគណបក្សបជាជនកម្ពុជាចុះមូលដ្ឋានខេត្ត ក្នុងគោលបំណងដើម្បីកោះកុងកាន់តែមានសុវត្ថិភាពធ្វើដំណើររបស់ពលរដ្ឋ អ្នកទេសចរ និងលើកកម្ពស់សោភ័ណ្ឌភាពស្រស់បំព្រងពេលយប់បន្ថែម។

លោក ចក់ វន់ និងអ្នកស្រី ធីតា បានគាំទ្រចំពោះរដ្ឋបាលខេត្តដែលមានយកចិត្តទុកដាក់ដំឡើងអំពូលសូឡានេះឡើងតាមដងផ្លូវជាតិលេខ៤៨នេះ ព្រោះវាជួយលើកកម្ពស់សោភ័ណ្ឌភាពទីក្រុងបន្ថែមទៀត ពិសេសការផ្តល់សុវត្ថិភាពដល់អ្នកទេសចរ និងពលរដ្ឋងាយស្រួលចរាចរណ៍ពេលយប់។ ពលរដ្ឋដ៏ដែល មើលឃើញថា ពេលយប់ជ្រៅ មានស្ថានភាពផ្លូវងងឹត បត់បែន និងឡើងចុះចំណោត ដែលងាយបង្កគ្រោះថ្នាក់ចរាចរណ៍ជាយថាហេតុ ដូច្នេះការដាក់តម្លើងអំពូលមានសារៈសំខាន់ខ្លាំង៕(អត្តបទៈសិរីវឌ្ឍនៈ)

The post អំពូលសូឡា១៥០ដើម កំពុងដំឡើងសងខាងផ្លូវជាតិលេខ ៤៨ ក្នុងក្រុងខេមរភូមិន្ទ ដើម្បីសុវត្ថិភាពអ្នកធ្វើដំណើរ appeared first on Kampuchea Thmey Daily.

ខ្ទមនេសាទកោះប៉ោ ស្រុកមណ្ឌលសីមា កំពុងទាក់ទាញទេសចរស្រឡាញ់សម្រស់ធម្មជាតិព្រៃភ្នំ

Sokhom Khon — Mon, 30 Mar 2026 03:30:57 +0000

ស្រុកមណ្ឌលសីមា ចាត់ទុកថាជាមូលដ្ឋានមួយសំបូរដោយតំបន់ទេសចរណ៍បែបធម្មជាតិ។ យ៉ាងណាមិញ ថ្មីៗនេះអ្នកវិនិយោគបានបង្កើតរមណីយដ្ឋានមួយឈ្មោះថា ខ្ទមនេសាទបោះប៉ោ ស្ថិតនៅភូមិកោះប៉ោ ឃុំប៉ាក់ខ្លង ជាទីកម្សាន្តសម្រាប់ទេសចរចូលចិត្តសម្រស់ធម្មជាតិព្រៃភ្នំដងព្រែក។

ប្រសិនបើធ្វើដំណើរតាមទូកតូចៗចំណាយពេលវេលាកន្លះម៉ោង បើអូរប័រ កប៉ាល់ធំៗ ត្រឹមតែ ១៥ នាទីប៉ុណ្ណោះតាមដងព្រែកសម្រស់ខៀវស្រងាត់ នឹងធ្វើដំណើរទៅដល់រមណីយដ្ឋានខ្ទមនេសាទកោះប៉ោ លក្ខណៈសាមញ្ញាបែបធម្មជាតិមិនទំនើបពេកនោះទេ។

ប្រាប់ កម្ពុជាថ្មី នៅថ្ងៃទី២៩ ខែមីនា ឆ្នាំ២០២៦ តាមរយៈបណ្តាញតេឡេក្រាម លោក តែ ឃុនម៉ុង ជាម្ចាស់ខ្ទមនេសាទកោះប៉ោ ឱ្យដឹងថា ៤ឆ្នាំមុនលោកចាកចេញពីប្រទេសបារាំង ហើយមកលេងកម្សាន្តនៅខេត្តកោះកុង ដោយចាប់ចិត្តនឹងសម្រស់ធម្មជាតិសំបូរបែបយ៉ាងដូច្នេះ ក៏ផ្តើមវិនិយោគលើវិស័យទេសចរណ៍តែម្តង ព្រោះតែក្តីស្រឡាញ់ធម្មជាតិនៅខេត្តមួយនេះ។

លោក តែ ឃុនម៉ុង បន្ថែមទៀតថា ធម្មជាតិដងព្រែកខៀវស្រងាត់ ព្រៃភ្នំបៃតងខ្ចី ជិះទូក និងស្ទូចត្រី គឺសុទ្ធតែជាចំណង់ចំណូលចិត្តរបស់លោក ដោយផ្តល់សេវាកម្មបែបនេះជូនភ្ញៀវផងដែរ។ ភ្ញៀវទេសចរបរទេស និងជាតិអាចមកស្នាក់នៅប្រកបដោយផាសុកភាព តម្លៃក៏សមរម្យតាមកញ្ចប់សេវាកម្មនីមួយៗ។ ជាក់ស្តែង បោះតង់ អាំងសាច់ ដុតភ្នួកភ្លើង និងច្រៀងលេងកម្សាន្តសប្បាយ។

បើតាមម្ចាស់ខ្ទមនេសាទកោះប៉ោ កន្លែងកម្សាន្តបែបធម្មជាតិនេះ បានបង្កើតឡើងតាំងពីឆ្នាំ២០២១ មកទល់បច្ចុប្បន្នលើផ្ទៃដីជិតកន្លះហិកតា ទិញពីប្រជាពលរដ្ឋមូលដ្ឋាន ប៉ុន្តែមិនបានធ្វើសម្រុកពេកនោះទេតាមលទ្ធភាពធនធានដែលមានជាក់ស្តែង ខណៈសេដ្ឋកិច្ច និងបញ្ហាព្រំដែនមិនទាន់អំណោយផលល្អ បើធៀបនឹងខេត្តផ្សេងទៀតជាប់នឹងមាត់សមុទ្រ។

លោកស្រី ឈី វ៉ា អភិបាលខេត្តកោះកុង ធ្លាប់បើកចំហដល់អ្នកវិនិយោគដែលចាប់អារម្មណ៍មកបង្កើតតំបន់ទេសចរណ៍ថ្មីក្នុងខេត្ត ដើម្បីបង្ហាញពីសក្តានុពលទេសភាពធម្មជាតិ និងលើកកម្ពស់សេដ្ឋកិច្ចចំណូលជូនប្រជាសហគមន៍ ក៏ដូចជាឆ្លើយតបនឹងគោលនយោបាយរបស់រាជរដ្ឋាភិបាលលើវិស័យទេសចរណ៍នេះ។

ចំណែកលោក សេត រ៉ាស៊ូ អនុប្រធានមន្ទីរទេសចរណ៍ខេត្តកោះកុង អះអាងថា មន្ទីរតែងតែគាំទ្រពេញទំហឹងចំពោះសកម្មភាពវិនិយោគផ្នែកវិស័យទេសចរណ៍នៅក្នុងខេត្ត ហើយថែមទាំងផ្តល់បានជាគំនិត និងបច្ចេកតាមស្តង់ដារថ្មីៗល្អៗដល់ក្រុមអ្នកវិនិយោគសំដៅបម្រើការទាក់ទាញភ្ញៀវទេសចរមកលេងកម្សាន្តកាន់តែច្រើនឡើងៗ។

លោក សេត រ៉ាស៊ូ រំលេចទៀតថា សន្ទុះនៃការបង្កើតរមណីយដ្ឋានបែបធម្មជាតិដូចខ្ទមនេសាទនេះ កើតមានចំនួនច្រើនគួរសមនៅក្នុងភូមិសាស្រ្តខេត្តកោះកុង គ្រាក្រុមគោលដៅទេសចររបស់ពួកគាត់អាចមកលំហែមិនថាតែអ្នកមានធនធាន ឬអ្នកលទ្ធភាពបន្តិចបន្តួចមនោះទេ។

បច្ចុប្បន្ន មន្ទីរទេសចរណ៍ខេត្តកោះកុង កំពុងបង្កើនការផ្សព្វផ្សាយអំពីតំបន់គោលដៅទេសចរណ៍សំខាន់ៗដែលមានស្រាប់ និងទើបបង្កើតថ្មីៗ ទៅកាន់សាធារណជនបានដឹងស្គាល់ និងមកលេងកម្សាន្តកាន់តែច្រើន ដើម្បីលើកកម្ពស់វិស័យទេសចរណ៍ ក៏ដូចជាផ្តល់ប្រាក់ចំណូលជូនដល់ប្រជាពលរដ្ឋក្នុងមូលដ្ឋាន៕

អត្តបទ៖ សិរីវឌ្ឍនៈ

The post ខ្ទមនេសាទកោះប៉ោ ស្រុកមណ្ឌលសីមា កំពុងទាក់ទាញទេសចរស្រឡាញ់សម្រស់ធម្មជាតិព្រៃភ្នំ appeared first on Kampuchea Thmey Daily.

គម្រោងអភិវឌ្ឍន៍សួនច្បារមុខអគាររដ្ឋបាលខេត្តកោះកុង នឹងបញ្ចប់នៅខែមិថុនា

អ៊ិន ពិសី — Wed, 18 Mar 2026 07:46:16 +0000

គម្រោងអភិវឌ្ឍន៍សួនច្បារមុខអគាររដ្ឋបាលខេត្តកោះកុង នឹងបញ្ចប់សកម្មភាពសាងសង់របស់ខ្លួននៅខែមិថុនា ខាងមុខ ខណៈសម្រេចបាន ៨៥ ភាគរយ ហើយ។ ចំណែកពលរដ្ឋគាំទ្រលើគម្រោងនេះ រំពឹងថា នឹងមានភ្ញៀវទេសចរគ្រប់ទិសទីមកលេងកម្សាន្តកាន់តែច្រើន។

ផ្ដើមតាំងពីខែមេសា ឆ្នាំ ២០២៥ មកទល់ម៉ោងនេះ គម្រោងសាងសង់សួនច្បារថ្មីនៅមុខអគាររដ្ឋបាលខេត្តកោះកុង សម្រេចបាន ៨៥ ភាគរយហើយ ស្របពេលក្រុមការងារកំពុងពន្លឿនឲ្យចប់គម្រោងជាស្ថាពរតាមផែនការគ្រោងទុក។

លោក អ៊ូច ពន្លក នាយកទីចាត់ការផែនការ និងវិនិយោគរបស់រដ្ឋបាលខេត្តកោះកុង បានឲ្យដឹងនៅថ្ងៃទី ១៨ ខែមីនា ឆ្នាំ ២០២៦ ថា ការសាងសង់សួនច្បារថ្មីនៅមុខអគាររដ្ឋបាលខេត្តអបដៃព្រែកកោះប៉ោ ស្ថិតនៅក្នុងសង្កាត់ស្មាច់មានជ័យ ក្រុងខេមរភូមិន្ទ បានជួសជុលកែលម្អ និងពង្រីកសួន រៀបថ្មមាប ចាក់បេតុងផ្លូវដើរ កន្លែងហាត់ប្រាណ បន្ទប់ទឹក សួនច្បារដាំស្មៅ ដើមឈើ និងដំឡើងភ្លើងលម្អជាច្រើនកន្លែង។

បើតាមលោកនាយកទីចាត់ការផែនការ និងវិនិយោគរដ្ឋបាលខេត្ត ថ្លែងបន្ថែមថា ដើម្បីធានាសុវត្ថិភាពសន្តិសុខសណ្ដាប់ធ្នាប់ជូនពលរដ្ឋ និងអ្នកទេសចរ រដ្ឋបាលខេត្ត ក៏បំពាក់កាមេរ៉ាសុវត្ថិភាពតាមគោលដៅសំខាន់ៗ ក្នុងបរិវេណសួនច្បារ។ សមិទ្ធផលជាសួនច្បារថ្មី នឹងបញ្ចប់នៅខែមិថុនា ខាងមុខតាមផែនការមេរបស់រដ្ឋបាលខេត្ត។

គួរជម្រាបថា សកម្មភាព នៃការសាងសង់សួនច្បារដ៏គួរឲ្យទាក់ទាញនេះ ធ្វើយ៉ាងណាត្រូវបញ្ចប់ដើមខែធ្នូ ឆ្នាំ ២០២៥ ត្រៀមរៀបចំពិធីបុណ្យសមុទ្រមកម្ល៉េះ ក៏ប៉ុន្តែដោយសារតែស្ថានភាពបញ្ហាព្រំដែនទើបមានការពន្យារពេលជាបន្តបន្ទាប់។

លោក ចំរើន ចំរុង និងអ្នកស្រី ទឹម ចាន់ថុល ជាប្រជាពលរដ្ឋរស់នៅក្រុងខេមរភូមិន្ទ បានបង្ហាញក្តីរីករាយយ៉ាងខ្លាំងពេលឃើញខេត្តអភិវឌ្ឍន៍លើកកម្ពស់បរិស្ថានសោភ័ណភាព និងបង្កើនភាពទាក់ទាញអ្នកទេសចរមកលេងកម្សាន្ត ក៏ដូចជាបង្កបរិយាកាសផ្នែកវិនិយោគទុនពីមជ្ឈដ្ឋានខាងក្រៅ។ ទោះយ៉ាងណា ពួកគាត់សំណូមពរដល់អាជ្ញាធរខេត្ត បន្តបំពាក់ឧបករណ៍ហាត់ប្រាណ និងសួនកុមារ បន្ថែមទៀតផងដែរ។

ពលរដ្ឋរស់នៅក្រុងខេមរភូមិន្ទ ស្នើសុំអាជ្ញាធរខេត្ត កុំឲ្យមានកង់ ម៉ូតូ ឬរថយន្ត បើកបរលើការ៉ូឡាដែលទើបរៀបចំហើយ ចៀសវាងបង្កគ្រោះថ្នាក់អ្នកដើរលំហែ និងបែកបាក់ឥដ្ឋការ៉ូឡាទើបសាងសង់រួចរាល់។ ទន្ទឹមនោះ ពួកគាត់ ជំរុញដល់ក្រសួងពាក់ព័ន្ធ ពិសេសរដ្ឋបាលខេត្ត បន្តពិនិត្យមើលគម្រោងអភិវឌ្ឍន៍វិស័យផ្សេងៗ ទៀត សំដៅធ្វើយ៉ាងណាបង្កើនការទាក់ទាញកំណើនទេសចរ លើកកម្ពស់សេដ្ឋកិច្ចចំណូលជូនប្រជាពលរដ្ឋ ខណៈខេត្តកោះកុងជាខេត្តសក្ដានុពលផ្នែកអេកូទេសចរណ៍ធម្មជាតិ៕

អត្ថបទ ៖ សិរីវឌ្ឍនៈ

The post គម្រោងអភិវឌ្ឍន៍សួនច្បារមុខអគាររដ្ឋបាលខេត្តកោះកុង នឹងបញ្ចប់នៅខែមិថុនា appeared first on Kampuchea Thmey Daily.

រោងចក្រអគ្គិសនីដើរដោយឧស្ម័ន ជាប្រវត្តិសាស្រ្តដំបូងរបស់កម្ពុជា នឹងដាក់ឱ្យដំណើរការនៅចុងឆ្នាំ២០២៦

Dy Bunnara — Tue, 06 Jan 2026 02:24:08 +0000

រោងចក្រអគ្គិសនីដើរដោយឧស្ម័ន LNG ដែលមានអនុភាព ៩០០ មេហ្កាវ៉ាត់ នឹងដាក់ឱ្យដំណើរការដំណាក់ទី ១ នៅចុងឆ្នាំ២០២៦ និងដំណាក់កាលទី ២ គ្រោងដាក់ឲ្យដំណើរការនៅឆ្នាំ២០២៧ តាមផែនការរបស់រាជរដ្ឋាភិបាល។

ក្នុងឱកាសចុះពិនិត្យវឌ្ឍនភាពដំណើរការសាងសង់រោងចក្រដើរដោយឧស្ម័ននៅស្រុកបុទុមសាគរ ខេត្តកោះកុង លោក កែវ រតនៈ រដ្ឋមន្រ្តីក្រសួងរ៉ែ និងថាមពល បានគូសបញ្ជាក់ថា រោងចក្រនេះនឹងដើរតួនាទីសំខាន់ក្នុងការផ្តល់អគ្គិសនីបន្ថែម ពង្រឹងសន្តិសុខថាមពលជាតិ និងពង្រឹងស្ថិរភាពឱ្យបណ្តាញអគ្គិសនីកម្ពុជា។

ក្រោមទុនវិនិយោគប្រមាណ ១ ៣៥០ លានដុល្លារ នេះគឺជារោងចក្រផលិតអគ្គិសនីដើរដោយឧស្ម័នធម្មជាតិដំបូងគេបង្អស់ក្នុងប្រទេសកម្ពុជា ដែលវិនិយោគដោយក្រុមហ៊ុនក្នុងស្រុក រ៉ូយ៉ាល់ គ្រុប។

បើតាមលោក កែវ រតនៈ រដ្ឋមន្រ្តីក្រសួងរ៉ែនិងថាមពល គម្រោងថាមពលអគ្គិសនីនេះមិនត្រឹមតែជានិម្មិតរូបនៃការសហការគ្នាផ្នែកពាណិជ្ជកម្មបីប្រទេស គឺកម្ពុជា ជប៉ុន និងចិននោះទេ ប៉ុន្តែក៏បង្ហាញឱ្យឃើញពីការជឿទុកចិត្ត លើការរីកចម្រើនផ្នែកសង្គម និងសេដ្ឋកិច្ចរបស់កម្ពុជា ក្រោមការដឹកនាំរបស់សម្តេចបវរធិបតីនាយករដ្ឋមន្ត្រី ហ៊ុន ម៉ាណែតផងដែរ៕

The post រោងចក្រអគ្គិសនីដើរដោយឧស្ម័ន ជាប្រវត្តិសាស្រ្តដំបូងរបស់កម្ពុជា នឹងដាក់ឱ្យដំណើរការនៅចុងឆ្នាំ២០២៦ appeared first on Kampuchea Thmey Daily.