ផ្តល់​បទ​សម្ភាសន៍​តាម​ទូរសព្ទ​ដល់​កម្ពុជា​ថ្មី​នៅ​ព្រឹកនេះ លោក អៀង ដារ៉ាវុធ ប្រធាន​មន្ទីរ​អភិវឌ្ឍន៍​ជនបទ​ខេត្ត​កោះកុង​បានបង្ហាញ​ពី​វឌ្ឍនភាព​នៃ​ការ​ស្ថាបនា​ផ្លូវទៅ​កាន់​តំបន់​អេកូ​ទេសចរណ៍​ជីផាត ដែល​លោក​បាន​បញ្ជាក់​ថា​គឺ​ជិត​រួចរាល់​ជាស្ថាពរ​ហើយ ពោល​គឺ​សម្រេច​បាន​ជាង ៩០% ដោយ​នៅសល់​ការងារ​បន្តិចបន្តួច​ប៉ុណ្ណោះ។

លោក​ថា តាម​រយៈ​សមិទ្ធផល​ផ្លូវ​នេះ ប្រជាពលរដ្ឋក្នុងមូលដ្ឋានមានការអបអរសាទរ និង​គាំទ្រយ៉ាងខ្លាំង​ ខណៈ​ដែល​ផ្លូវ​​ទៅ​តំបន់អេកូទេសចរណ៍​ជីផាត​គឺជា​ខ្សែផ្លូវទេសចរណ៍​ដ៏​សំខាន់​មួយ ដែល​ទាក់ទាញ​ភ្ញៀវទេសចរ​ចាប់​អារម្មណ៍​ទៅ​កម្សាន្ត​​យ៉ាង​ច្រើន។

«ផលប្រយោជន៍ផ្លូវនេះ ជួយសម្រួលដល់ការធ្វើដំណើររបស់ប្រជាពលរដ្ឋ និងបម្រើដល់វិស័យទេសចរណ៍ ព្រោះតំបន់ជីផាតជាតំបន់ទេសចរណ៍ដ៏សំខាន់មួយ ដែលមានភ្ញៀវទេសចរចូលចិត្ត​ទៅលេងកម្សាន្តច្រើន»។

ដើម្បី​ធានា​ឱ្យ​ផ្លូវទើបស្ថាបនា​​ថ្មី​អាច​ប្រើប្រាស់​បានយូរអង្វែង មន្រ្តីជំនាញ​ស្នើ​ឲ្យ​មានការ​​សហការចូលរួម​​ថែរក្សា​ពីសំណាក់ប្រជាពលរដ្ឋ និងអាជ្ញាធរ​​ពាក់ព័ន្ធ។ លោក អៀង ដារ៉ាវុធ បាន​បញ្ជាក់​ថា ហានិភ័យ​ចម្បង​និង​ធំបំផុត​ដែល​ធ្វើឱ្យផ្លូវ​ឆាប់ខូច គឺ​ការ​ដឹក​ជញ្ជូន​លើស​ទម្ងន់ ពី​រថយន្ត​ធុនធ្ងន់​ប្រកប​អាជីវកម្ម​នានា​ដូចជា រថយន្ត​ដឹក​ដី ដឹក​ខ្សាច់ និង​ដឹក​ថ្ម ត្រូវដឹកឲ្យត្រូវតាមទម្ងន់កំណត់ កុំឲ្យលើសទម្ងន់ ព្រោះបើគ្មានការចូលរួមថែរក្សាទេ ផ្លូវកៅស៊ូនេះនឹងត្រូវខូចខាតទៅវិញក្នុងរយៈពេលតែ ១ ទៅ ២ ឆ្នាំប៉ុណ្ណោះ

ស្របពេលដែល​​ផ្លូវ​ទៅ​តំបន់ទេសចរណ៍​​ជីផាត​សាងសង់​ស្ទើរ​រួចរាល់ ១០០% ពលរដ្ឋ​​ស្នើ​ឱ្យ​មាន​ការ​សាងសង់​ស្ពាន​ឆ្លងកាត់ដៃព្រែក​​ជីផាត​បន្ថែម ខណៈ​អាជ្ញាធរ​បញ្ជាក់​ថា​កំពុង​ធ្វើការ​ដោះស្រាយ​តាម​ដំណាក់កាល។

លោក អៀង ដារ៉ាវុធ បាន​ឆ្លើយតប​ថា «អាជ្ញាធរនឹងធ្វើទៅតាមដំណាក់កាល ដោយត្រូវស្វែងរកដៃគូសហការ ឬកញ្ចប់ថវិកាពីថ្នាក់លើមកជួយ តែ​មិនទាន់សន្យាថានឹងធ្វើជូន ១០០% ភ្លាមៗនោះទេ ដោយ​នឹងខិតខំស្វែងរកដៃគូអភិវឌ្ឍន៍ដើម្បីបន្តការសាងសង់»៕

The post លែង​ពិបាក​ដូច​មុន ផ្លូវ​ទៅ​​ជីផាត​ចាក់​ក្រាល​កៅស៊ូ​ស្ទើរ​រួចរាល់ ១០០% ទេសចរ​អាច​ទៅ​កម្សាន្ត​ទាំង​រដូវ​ប្រាំង​និង​រដូវ​វស្សា​ appeared first on Kampuchea Thmey Daily.

លោក អៀង ដារ៉ាវុធ ប្រធាន​មន្ទីរ​អភិវឌ្ឍន៍​​ជនបទ​ខេត្ត​កោះកុង​បាន​ប្រាប់​កម្ពុជា​ថ្មី​ថា ផ្លូវ​​​ដែល​អាជ្ញាធរ​បាន​ឈូសសម្រួល​នេះ​​មាន​ប្រវែង​ជាង ៣០ គីឡូម៉ែត្រ ដែល​តភ្ជាប់ពី​តំបន់ទេសចរណ៍​ជីផាតទៅ​ដល់តំបន់អេកូ​ទេសចរណ៍អារ៉ែងក្នុងស្រុកថ្មបាំង​​។

យ៉ាងណាមិញ ផ្លូវដែលឈូសសម្រួល​នេះ​អាចធ្វើដំណើរ​បានតែ​​នៅ​​រដូវ​ប្រាំង នៅ​​រដូវវស្សា​អាច​ប្រឈម​ការ​ដាច់ខ្លះៗ​ដែល​បង្ក​ការ​លំបាក​សម្រាប់​យានយន្តធ្វើដំណើរ​ឆ្លង​កាត់​។

ក្រៅពីផ្លូវថ្មី​ដែលអាជ្ញាធរ​បាន​ឈូសសម្រួលធ្វើដំណើរ​បណ្តោះអាសន្ន ផ្លូវ​ទៅ​អារ៉ែងក្នុងស្រុកថ្មបាំង​ក៏​កំពុង​ត្រូវ​បាន​ស្ថាបនា​ជាផ្លូវកៅស៊ូនិង​បេតុង​​ចេញពីផ្លូវជាតិលេខ ៤៨ ដោយ​ប្រើប្រាស់​មូលនិធិ​ពី​ដៃគូអភិវឌ្ឍ។

លោក​ អៀង ដារ៉ាវុធ បាន​បញ្ជាក់​ថា ផ្លូវ​ដែល​កំពុង​ស្ថាបនា​ទៅ​តំបន់អារ៉ែង​គឺ​បំបែក​ចេញពី​ផ្លូវជាតិលេខ ៤៨ ត្រង់​គីឡូម៉ែត្រ​លេខ ១១៥។ ផ្លូវនេះ​សាងសង់​ចែកចេញ​ជា ៣ កំណាត់​ ដោយ​កំណាត់​ទី ១ ប្រវែង ២៦ គីឡូម៉ែត្រ ​ជា​គម្រោង​របស់ AIB​​ សម្រេច​ការស្ថាបនាបាន​​​ប្រហែល ៩០% និង​កំណាត់​ទីពីរ​ពី​​ស្រុក​ថ្ម​បាំងដល់​ស្ទឹងអារ៉ែង​ប្រវែង​ ១៦ គីឡូម៉ែត្រ​​ជា​គម្រោង​របស់ CSLEP ដែល​ទើប​បើកការដ្ឋាន​ដែល​​គ្រោង​ចំណាយ​ពេលសាងសង់​ប្រហែល ១ ឆ្នាំ ខណៈ​កំណាត់​​ផ្លូវ​ប្រវែង​ជាង ១០ គីឡូម៉ែត្រ​ក្នុង​ទីរួមស្រុក​ថ្មបាំង ​ដែល​ជា​គម្រោង​របស់​រដ្ឋាភិបាល​តាម​រយៈក្រសួង​អភិវឌ្ឍ​ន៍ជនបទ​ បាន​​ស្ថាបនា​បញ្ចប់​ដាក់​ឲ្យ​ប្រើប្រាស់។

ផ្លូវ​ដែលកំពុង​សាងសង់​ទៅស្ទឹង​អារ៉ែង​​ជា​ផ្លូវយុទ្ធសាស្ត្រដ៏សំខាន់ ដែល​​រាប់សិបឆ្នាំមកហើយ​មិន​មានផ្លូវ​ធ្វើ​ដំណើរ​ទៅ​​មក​ងាយស្រួល​នោះ​ទេ។ បើតាម​មន្រ្តីមន្ទីរអភិវឌ្ឍន៍ជនបទ​ខេត្តកោះកុង ​​​ថ្ងៃ​ខាងមុខ​ផ្លូវមួយ​ខ្សែ​នេះ​ក៏​នឹង​​​អាច​តភ្ជាប់​ជាមួយខ្សែ​ផ្លូវ​ដែល​គ្រោង​សាងសង់​ចេញ​ពី​តំបន់​ទេសចរណ៍​ភ្នំ​ខ្នង​ផ្សារ​ក្នុង​ខេត្ត​កំពង់ស្ពឺ ដើម្បី​​តភ្ជាប់​ទៅ​បណ្ដា​ខេត្ត​ផ្សេងៗ​​ទៀត​នៅ​តំបន់​​ភូមិ​ភាគ​កណ្តាល៕

The post ផ្លូវថ្មីមួយ​ខ្សែ​បាន​ឈូសទម្លុះ​ តភ្ជាប់​​ពី​តំបន់ទេសចរណ៍​ជីផាតទៅដល់តំបន់​​អារ៉ែង ​​មានចម្ងាយជាង ៣០ គីឡូម៉ែត្រ appeared first on Kampuchea Thmey Daily.

ក្នុងដំណើរទស្សនកិច្ចគម្រោងនិរន្តរភាពបរិស្ថាន និងអេកូទេសចរណ៍ លោក ខ្វៃ អាទិត្យា អ្នកនាំពាក្យក្រសួងបរិស្ថាន បានមានប្រសាសន៍ថា តំបន់ការពារធម្មជាតិមានសត្វព្រៃ និងទេសភាពល្អស្អាត ជាសក្តានុពលដែលផ្តល់ប្រាក់ចំណូលសម្រាប់ប្រជាសហគមន៍ តាមរយៈការទាញយកប្រយោជន៍ពី គោលដៅលម្ហែបៃតង ។

លោក បានបន្តថា តំបន់ការពារធម្មជាតិរបស់កម្ពុជាមានសក្តានុពលច្រើនសម្រាប់ការពង្រីក នូវគោលដៅលម្ហែបៃតង ជាក់ស្តែងដូចជាតំបន់ឧទ្យានជាតិព្រះបាទជ័យវរ្ម័ន-នរោត្តមភ្នំគូលែន គឺបានរៀបចំឱ្យមានកន្លែងតង់ស្នាក់លម្ហែបៃតងចំនួន១០កន្លែងសម្រាប់ជូនដល់សហគមន៍ រីឯ ឧទ្យានជាតិព្រះសុរាម្រិតកុសុមៈគីរីរម្យ ក៏មានរៀបចំជាកន្លែងវិបស្សនាសម្រាកលម្ហែបែបសាសនា ក្នុងទីលម្ហែបៃតងផងដែរ។

លោក បានបន្តទៀតថា នៅតាមសហគមន៍ផ្សេងៗទៀត ក្រសួងបរិស្ថាន តាមរយៈដៃគូរអភិវឌ្ឍន៍ ក៏ដូចជាគម្រោងអភិវឌ្ឍន៍បានជួយរៀបចំហេដ្ឋារចនាសម្ព័ន្ធ មានទាំងទឹកស្អាត បន្ទប់អនាម័យ ក៏ដូចជា រៀបចំទីតាំងបោះតង់ឬកន្លែងសម្រាកកម្សាន្តនៅតាមសហគមន៍តំបន់ការពារធម្មជាតិទាំងអស់ដែលមាន សក្តានុពលសម្រាប់ការបង្កើតនូវគោលដៅលម្ហែបៃតងឬហៅថាទីលម្ហែបៃតង។

លោក ក៏បានជំរុញលើកទឹកចិត្តបន្តទៀតដល់អ្នកទេសចរដែលស្រឡាញ់ធម្មជាតិ អញ្ជើញមក តំបន់ការពារធម្មជាតិផ្សេងៗទៀត ដើម្បីស្វែងយល់អំពីមាតុភូមិកម្ពុជាដ៏ស្រស់ស្អាតដែរ។ 

អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន ខ្វៃ អាទិត្យា អំពាវនាវដូច្នេះ៖« សរុបមកវិញគឺសហគមន៍តំបន់ការពារធម្មជាតិ មិនត្រឹមតែមានតួនាទីនូវក្នុងការការពារ  ធនធានធម្មជាតិ ការជំរុញដាំដុះបង្កើត គម្របបៃតងនោះទេ សហគមន៍បានចូលរួមចំណែកយ៉ាង សំខាន់នៅក្នុងការបង្កើនជីវភាពរបស់ប្រជាពលរដ្ឋ តាមរយៈការបង្កើននូវសកម្មភាពនិងកម្មវិធីផ្សេងៗ   ជាពិសេសគោលដៅលម្ហែបៃតងដែលឆ្លើយតបទៅនឹងយុទ្ធសាស្ត្រចក្រាវិស័យបរិស្ថាន។ កាលណាប្រជាពលរដ្ឋមានចំណូលខ្ពស់គឺគាត់មិនទៅប៉ះពាល់ព្រៃឈើទេ ហើយគាត់មានចំណូល ក្នុងគ្រួសារ គ្រួសារគាត់រីកចម្រើនកូនចៅបានរៀនសូត្រខ្ពង់ខ្ពស់ផងដែរ ហើយមួយទៀតស្របតាម ការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា    ដែល កំពុងជំរុញលើកទឹកចិត្ត ធ្វើម៉េចដើម្បីបង្កើនជីវភាពប្រជាសហគមន៍ឱ្យកាន់តែមានការរីកចម្រើន ដើម្បី ចូលរួមចំណែកការអភិវឌ្ឍប្រទេសជាតិប្រកបដោយចីរភាព»។

គួរបញ្ជាក់ឱ្យដឹងថា ក្រសួងបរិស្ថាន បាននិងកំពុងអភិវឌ្ឍគោលដៅលម្ហែបៃតង នៅតាមសហគមន៍តំបន់ ការពារធម្មជាតិ ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា ហើយយុទ្ធសាស្រ្ត ចក្រាវិស័យបរិស្ថាន បានកំពុងធ្វើឱ្យសហគមន៍មានចំណូលបន្ថែម និងបង្កើតជម្រើសថ្មី សម្រាប់ការប្រកប មុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី ដូចជាការចិញ្ចឹមសត្វ ការដាំដំណាំរួមផ្សំ ផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំ បង្កើតជាអេកូទេសចរណ៍ នៅក្នុងតំបន់សហគមន៍៕

The post មន្ត្រីជាន់ខ្ពស់ក្រសួងបរិស្ថាន អំពាវនាវអ្នកស្រឡាញ់ធម្មជាតិ ទីកម្សាន្តតំបន់ការពារធម្មជាតិឱ្យបានច្រើន ដើម្បីយល់ដឹងពីមាតុភូមិកម្ពុជា appeared first on Kampuchea Thmey Daily.

រយៈពេល៤ឆ្នាំ រាប់ចាប់ពីឆ្នាំ២០២០ ដល់ឆ្នាំ២០២៣ គម្រោងរេដបូក បានធ្វើការជ្រើសរើសនិស្សិតអាហាររូបករណ៍ទាំងអស់១៦រូប ក្នុងនេះនៅឃុំជីផាត បានទទួលអាហាររូបករណ៍ចំនួន៦រូប មាននិស្សិតជំនាន់ទី១ ដល់ជំនាន់ទី៣។

កម្មវិធីអាហារូបករណ៍រេដបូកជួរភ្នំក្រវាញនេះ បង្កើតឡើងក្នុងឆ្នាំ២០១៩ និងដាក់ឱ្យអនុវត្តនៅឆ្នាំ២០២០ ក្នុងគោលបំណងជួយអភិវឌ្ឍន៍ធនធានមនុស្ស និងសេដ្ឋកិច្ចសហគមន៍។ ទាំងនេះជាផ្នែកមួយជួយកាត់បន្ថយការដាក់សម្ពាធលើព្រៃឈើ។ ក្នុងចំណោមនេះមានសិស្សអាហាររូបករណ៍៦រូប ដែលសុទ្ធសឹងក្រីក្រពុំមានលទ្ធភាពអាចបន្តសិក្សានៅថ្នាក់សាកលវិទ្យាល័យបន្តទៀតបានទេ។ ទោះបីយ៉ាងណាតាមរយៈគម្រោងរេដបូក ពួកគេអាចបន្តសិក្សានៅរាជធានីភ្នំពេញ ដោយបញ្ចប់ថ្នាក់បរិញ្ញាបត្រ ហើយពេលនេះក្នុងចំណោមនិស្សិតទាំងនេះសុទ្ធតែមានការងារធ្វើដោយក្នុងនោះនិស្សិតអ្នកខ្លះអាចទទួលប្រាក់បៀវត្សរហូតដល់ជាង ៥០០ដុល្លារទៀតផង។

ជាមួយគ្នានេះដែរភាពសប្បាយរីករាយនេះ អ្នកស្រី ស៊ីសុវត្តិតេវ រស់នៅភូមិជីផាត ឃុំជីផាត ស្រុកថ្មបាំង ខេត្តកោះកុង បានឱ្យដឹងថា គាត់មានកូនប្រុសម្នាក់ ឈ្មោះ ប្រាក់ធីន បានរៀនបញ្ចប់ថ្នាក់បរិញ្ញាបត្រ ផ្នែកអាយធី នៅសាកលវិទ្យាល័យភូមិន្ទភ្នំពេញ ពេលនេះបានចូលធ្វើការនៅស្ថានទូតសហរដ្ឋអាមេរិកទៀតផង។

ស្រ្តីវ័យជាង៤០ ឆ្នាំរូបនេះបានប្រាប់ថា៖ «ក្នុងជីវិតនេះមិនបាននឹកស្មានថាបានកូនរៀនដល់ថ្នាក់សាកលវិទ្យាល័យទេ ពីព្រោះថាគ្រួសាររបស់ខ្ញុំពុំមានថវិកាសម្រាប់ឱ្យកូនបន្តថ្នាក់សាកលវិទ្យាល័យទេ តែដោយសារគម្រោងរេដបូក ធ្វើឱ្យកូនខ្ញុំបានទៅរៀននៅភ្នំពេញ។ គម្រោងរេដបូកបានជួយកូនខ្ញុំទាំងកន្លែងស្នាក់នៅ ថ្លៃបង់សាកលវិទ្យាល័យ ថ្លៃម្ហូបអាហារ និងថ្លៃប្រេងសាំង។ បើគ្មានគម្រោងនេះទេកូនខ្ញុំពុំអាចបន្តរៀននៅសាកលវិទ្យាល័យនៅភ្នំពេញសោះឡើយ»។

ដោយឡែក មាស សារ៉ាត់ ដែលមានកូនរៀនបញ្ចប់ថ្នាក់បរិញ្ញាបត្រ តាមរយៈគម្រោងរេដបូកតំបន់ជួរភ្នំក្រវាញនេះដែរ បានប្រាប់ថាដោយសារជីវភាពខ្វះខាតច្រើន ម្ល៉ោះហើយកាលពីមុននេះនៅពេលកូនរៀនបញ្ចប់ថ្នាក់បាក់ឌុបហើយមិនសង្ឃឹមថាអាចបន្តសិក្សាថ្នាក់បរិញ្ញាបត្រទេ តែទីបំផុតអ្វីៗមិនដូចក្តីអស់សង្ឃឹមទេ គឺពេលនេះមិនត្រឹមតែកូនរបស់លោកអាចរៀនថ្នាក់សាកលវិទ្យាល័យមិនបង់ប្រាក់ហើយ នៅបានចូលធ្វើការងារនៅរាជធានីភ្នំពេញ ដោយជោគជ័យថែមទៀត។

ដោយឡែកអ្នកស្រី ម៉ៅ ដាលីន ដែលមានកូនប្រុសបានជាប់អាហាររូបករណ៍ក្នុងគម្រោងរេដបូកនេះដែរ បានប្រាប់ថាមុននេះបើគិតពីលទ្ធភាពឱ្យកូនទៅរៀនថ្នាក់សាកលវិទ្យាល័យនោះពិតជាមិនមាននោះទេ ហើយវាពិតជាមានភព្វសំណាងណាស់មានគម្រោងរេដបូកបានមកជួយទីបំផុតកូនអ្នកស្រីមិនត្រឹមតែបញ្ចប់ថ្នាក់សាកលវិទ្យាល័យទេ តែនៅអាចរកថវិកាមកជួយគ្រួសារថែមទៀត។ អ្នកស្រីពិតជាសប្បាយចិត្តពីព្រោះថាចាប់ពីពេលនេះទៅមិនពិបាករឿងកូនពុំមានការងារល្អធ្វើទេពីព្រោះថាកូនអាចរកការងារល្អធ្វើជាថ្នាក់ដឹកនាំក្រុមហ៊ុនផង។

ទាក់ទិនក្នុងរឿងនេះ លោក អន សុវណ្ណ ប្រធានសហគមន៍អេកូទេសចរណ៍ជីផាត បានឱ្យដឹងថា ក្នុងចំណោមសិស្សអាហាររូបករណ៍នេះជ្រើសរើសពីកូនអ្នកក្រីក្រក្នុងសហគមន៍។ពួកគេម្នាក់ៗឆ្លងកាត់ការប្រឡង មុននឹងអាចឈានទៅទទួលអាហាររូបករណ៍នេះ។

លោកបានបញ្ជាក់ថា «រយៈពេល៤ឆ្នាំក្នុងការសិក្សានេះ ផ្ដល់ឱ្យសិស្សសិក្សាលើជំនាញផ្សេងៗ ដើម្បីយកទៅអនុវត្ត និងពួកគេអាចជួយសហគមន៍របស់ពួកគេ ក្រោយពេលបញ្ចប់ការសិក្សា»។

គួរបញ្ជាក់ថា ជួរភ្នំក្រវាញ គឺជាតំបន់មួយសម្បូរដោយព្រៃឈើ និងជីវៈចម្រុះ ដែលជារបាំងធម្មជាតិដ៏សំខាន់នៅកម្ពុជា។ ដោយសារបញ្ហាជីវភាព និងខ្វះការយល់ដឹង ព្រៃឈើត្រូវបានបំផ្លាញជារៀងរាល់ឆ្នាំដើម្បីបានចំណូល។ ដើម្បីរក្សាព្រៃនៅតំបន់ជួរភ្នំក្រវាញបាន គឺចាំបាច់ធ្វើឱ្យជីវភាព និងការយល់ដឹងរបស់ពលរដ្ឋមូលដ្ឋានប្រសើរឡើង ជាមុនសិនពិសេសការអភិវឌ្ឍន៍សហគមន៍ ផ្តល់ចំណេះដឹងកូនចៅប្រជាសហគមន៍ និងការកសាងហេដ្ឋារចនាសម្ព័ន្ធភូមិ ឃុំ ជាដើម៕

The post គម្រោងរេដបូកនាំយុវជន១៦នាក់ពីតំបន់ព្រៃភ្នំមកសិក្សានៅរាជធានី ក្រោយមកបានបម្រើការងារនៅស្ថានទូតអាមេរិក និងសាលារៀនអន្តរជាតិ appeared first on Kampuchea Thmey Daily.

តាមរយៈគម្រោងរេដបូកតំបន់ជួរភ្នំក្រវាញខាងត្បូង បានជួយដល់អាហាររូបករណ៍កូនសិស្សក្រីក្រ ផ្លូវថ្នល់ចំនួន៣ខ្សែ ជួយដល់សាលារៀន មណ្ឌលសុខភាព អណ្តូងទឹកស្អាត និងសមិទ្ធផលមួយចំនួនទៀតដែលសុទ្ធសឹងជួយដល់ប្រជាសហគមន៍រហូតមកដល់ពេលនេះ ធ្វើឱ្យហេដ្ឋារចនាសម្ព័ន្ធក្នុងឃុំល្អប្រសើរ និងជីវភាពប្រជាជនលើកកម្ពស់ជាបន្តបន្ទាប់។

បើតាមមគ្គទេសក៏នាំភ្ញៀវទេសចរ ​និងជាអ្នកម្ចាស់ស្រុកនៅតំបន់ជីផាត បានរៀបរាប់ថា កាលពីអតីតកាលតំបន់នេះជាតំបន់អាណាធិបតេយ្យ តំបន់កាប់ឈើ អារឈើ ប៉ុន្តែ ក្រោយពីបង្កើតឱ្យមានជាសហគមន៍ ប្រជាជនបានកាត់បន្ថយការចូលព្រៃកាប់ឈើ និងបរបាញ់សត្វ ដោយងាកមកចូលរួមអភិរក្សសត្វព្រៃ ការពារព្រៃឈើ និងនាំភ្ញៀវទេសចរដើមកម្សាន្តតាមគោលដៅទេសចរណ៍ធម្មជាតិ និងប្រវត្តិសាស្ត្រជាដើម។

លោកបានបន្ថែមថា៖ «សហគមន៍ បានជួយដល់ប្រជាជនមានប្រាក់ចំណូលសម្រាប់ទ្រទ្រង់ជីវភាព ដែលផ្ទុយពីមុនយើងចូលព្រៃ កាប់ឈើអាចបង្កឱ្យមានគ្រោះថ្នាក់ដល់ជីវិត និងប្រឈមនឹងផ្លូវច្បាប់ តែដល់ពេលយើងងាកមកនាំភ្ញៀវទេសចរ ធ្វើឱ្យយើងទទួលបានចំណូលច្រើន។ និយាយរួមទៅបានគម្រោងរេដបូក ចូលមកគឺបានជួយប្រជាជនបានច្រើន ជាក់ស្តែងការស្ថាបនាផ្លូវ ស្ពាន អណ្តូងទឹកស្អាត ផ្តល់អាហាររូបករណ៍ដល់កូនចៅសហគមន៍ បន្តសិក្សានៅរាជធានីភ្នំពេញ»។

អនុរដ្ឋលេខាធិការ និងអ្នកនាំពាក្យក្រសួងបរិស្ថាន លោក ខ្វៃ អាទិត្យា បានថ្លែងថា តាមរយៈការអភិវឌ្ឍជីវភាពប្រជាសហគមន៍ជាមួយដៃគូ និងតាមរយៈគម្រោងរេដបូកពិតជាមានសារៈសំខាន់សម្រាប់ឆ្លើយតបទៅនឹងជីវភាពប្រជាពលរដ្ឋពិសេសបានជួយទប់ស្កាត់ និងការពារធនធានធម្មជាតិ។កិច្ចការពារអភិរក្សធនធានធម្មជាតិនេះដែរ គឺទាល់តែបងប្អូនប្រជាសហគមន៍មានជីវភាពល្អប្រសើរផងដែរ។

លោកបានថ្លែងថា ក្រសួងបរិស្ថានបានយកចិត្តទុកដាក់ការអភិវឌ្ឍន៍ជីវភាពសហគមន៍នេះតាមរយៈក្នុងនេះទី១ ជំរុញជីវភាពសហគមន៍ដោយបង្កើតមុខរបរ ពួកគាត់អាចដាំបន្លែ ចិញ្ចឹមសត្វ ឬបង្កើតទេសចរណ៍ធម្មជាតិដែលអាចចំណូលបានល្អប្រសើរជាងការចូលព្រៃដែលប្រឈមនឹងផ្លូវច្បាប់។

គួរបញ្ជាក់ថា បើតាមអង្គការសម្ព័ន្ធមិត្តសត្វព្រៃ បានឱ្យដឹងនាកន្លងមកថា គម្រោងរេដបូកជួរភ្នំក្រវាញខាងត្បូង ដែលបានជួយអណ្តូងទឹកស្អាតនេះ គឺក្រោយការធ្វើតេស្តបង្ហាញថាជាទឹកអណ្តូង គ្មានសារធាតុអាសេនិច, ទឹកពុំមានកំហាប់កំបោរ ហើយទឹកគ្មាន ច្រេះដែលជាទឹកស្ថិតនៅក្នុងកម្រិតល្អប្រើប្រាស់គ្មានគ្រោះថ្នាក់។ តាមរយៈអណ្តូងទឹកនេះដែរបានជួយសម្រួលច្រើនដល់ការរស់នៅរបស់ប្រជាពលរដ្ឋក្នុងការប្រើប្រាស់ទឹក និងវាជាទឹកស្អាតធានាបាននូវសុខភាពផង៕

The post គម្រោងរេដបូក ប្រែក្លាយ ជីផាត ពីតំបន់ព្រៃភ្នំ គ្មានផ្លូវ អគ្គិសនី អ៉ីនធឺណិត ទៅរកការរីកចម្រើន និងជាទីតាំងអេកូទេសចរណ៍ធម្មជាតិដ៏សម្បូរបែប appeared first on Kampuchea Thmey Daily.

ក្រុមប្រជាសហគមន៍អេកូរទេសចរណ៍ជីផាត ដែលធ្លាប់តែជួបបញ្ហាខ្វះទឹកស្អាតប្រើប្រាស់ នារដូវប្រាំងនោះអាចប្រើប្រាស់ទឹកអណ្តូងដ៏ធំនេះដោយពុំមានខ្វះខាតទាំងរដូវប្រាំង ឬរដូវវស្សាសោះឡើយ។អណ្ដូងខ្នាតធំ ដើរដោយប្រព័ន្ធសូឡា និងបូមទឹកដោយស្វ័យប្រវត្តិមួយនេះ ត្រូវបានអង្គការសម្ព័ន្ធមិត្តសត្វព្រៃ និងក្រសួងបរិស្ថាន ដាក់សម្ពោធឱ្យប្រើប្រាស់ កាលពីពាក់កណ្តាល ខែមករា ឆ្នាំ២០២៣។

 ប្រធានសហគមន៍អេកូទេសចរណ៍ជីផាត លោក អន សុវណ្ណ ៖«ការកសាងអណ្តូងទឹកនេះសម្រាប់ជួយដោះស្រាយដល់ប្រជាពលរដ្ឋដែលជួបកង្វះខាតទឹកស្អាតប្រើប្រាស់ពិសេសនារដូវប្រាំងដែលមានភូមិមួយក្នុងចំណោមភូមិចំនួន៤ក្នុងឃុំ ជីផាត តែងជួបបញ្ហាទឹកប្រើប្រាស់ ដែលកាលនោះបើកាលណាគេជីកអណ្តូងទឹកទៅតែង មានសារជាតិកំបោរ និង ជាតិច្រេះមិនអាចប្រើប្រាស់កើត។តែអណ្តូងទឹករបស់គម្រោងរេដបូកនេះ ក្រៅពីជួយដល់សុខភាពពួកគាត់ហើយ នៅជួយដល់ការមិនត្រូវចំណាយថ្លៃទឹកប្រើប្រាស់ប្រចាំថ្ងៃថែមទៀត»។

តាមរយៈគម្រោងរេដបូកតំបន់ជួរភ្នំក្រវាញខាងត្បូងនេះដែរកន្លងមកក្រៅពីបានជួយអណ្តូងទឹកនេះ នៅបានជួយដល់អាហាររូបករណ៍កូនសិស្សក្រីក្រ ផ្លូវថ្នល់ចំនួន៣ខ្សែ ជួយដល់សាលារៀន មណ្ឌលសុខភាព និង សមិទ្ធផលមួយចំនួនទៀតដែលសុទ្ធសឹងជួយដល់ប្រជាសហគមន៍រហូតមកដល់ពេលនេះ ធ្វើឱ្យហេដ្ឋារចនាសម្ព័ន្ធក្នុងឃុំល្អប្រសើរ និងជីវភាពប្រជាជនលើកកម្ពស់ជា បន្តបន្ទាប់។

ប្រធានសហគមដដែល បានប្រាប់ថា៖«ទឹកនេះយើងបានធ្វើតេសហើយជាទឹកសុវត្តិភាពសម្រាប់ពលរដ្ឋប្រើប្រាស់ និងវាមានជម្រៅជីកជាង៦០ម៉ែត្រ។អណ្ដូងទឹកខ្នាតធំនេះ មានចំណុះមួយម៉ឺនលីត្រ សម្រាប់ផ្គត់ផ្គង់ទឹកស្អាតដល់ពលរដ្ឋយ៉ាងពេញទីជាង១៨០គ្រួសារ»។

អ្នកនាំពាក្យក្រសួងបរិស្ថាន លោក ខ្វៃ អាទិត្យា ថ្លែងថា តាមរយៈការអភិវឌ្ឍន៍ជីវភាពប្រជាសហគមន៍ជាមួយដៃគូ និងតាមរយៈគម្រោងរេដបូកពិតជាមានសារៈសំខាន់សម្រាប់ឆ្លើយតបទៅនឹងជីវភាពប្រជាពលរដ្ឋពិសេសបានជួយទប់ស្កាត់ និងការពារធនធានធម្មជាតិ។កិច្ចការពារអភិរក្សធនធានធម្មជាតិនេះដែរគឺទាល់តែបងប្អូនប្រជាសហគមន៍មានជីវភាពល្អប្រសើរផងដែរ។

 អ្នកនាំពាក្យក្រសួងបរិស្ថាន ប្រាប់បន្តថា សម្រាប់អណ្តូងទឹកដែលជាអំណោយគម្រោងរេដបូកនេះដើរដោយថាមពលពន្លឺព្រះអាទិត្យ និងម៉ូទ័រទឹកប្រើដោយសូឡា ដោយក្នុងនេះគឺទី១វាបានជួយដល់ការប្រែប្រួលអាកាសធាតុផង និងទី២ជួយដល់ជីវភាពពលរដ្ឋក្នុងសហគមឱ្យភាពងាយស្រួលរស់នៅ ជួយសម្រួលដល់ជីវភាពឱ្យមានភាពល្អប្រសើរ ងាកចេញផុតពីចូលព្រៃកាប់ឈើ បរបាញ់សត្វព្រៃខុសច្បាប់ទៀតឡើយ។

តាមអ្នកនាំពាក្យខ្វៃ​ អាទិត្យា បច្ចុប្បន្នក្រសួងបរិស្ថានបានយកចិត្តទុកដាក់ការអភិវឌ្ឍន៍ជីវភាពសហគមន៍នេះតាមរយៈក្នុងនេះទី១ជំរុញជីវភាពសហគមន៍ដោយបង្កើតមុខរបរ ពួកគាត់អាចដាំបន្លែ ចិញ្ចឹមសត្វ ឬបង្កើតទេសចរណ៍ធម្មជាតិដែលអាចចំណូលបានល្អប្រសើរជាងការចូលព្រៃដែលប្រឈមនឹងផ្លូវច្បាប់។

អ្នកស្រី កងណាំ ប្រជាសហគមន៍មួយរូបបានលើកឡើងថាបន្ទាប់ពីបានអំណោយអណ្តូងទឹកនេះបានជួយច្រើនណាស់ដល់ក្រុមគ្រួសារគាត់ ពោលគឺមិនចាំបាច់ទៅរកដងទឹកតាមប្រភពទឹកទីកន្លែងឆ្ងាយៗឡើយដោយអ្នកស្រីគ្រាន់តែតប្រព័ន្ធទឹកនេះហើយ អាចប្រើប្រាស់បានគ្រប់ពេលវេលា។ក្រៅពីនេះមិនចាំបាច់ចំណាយថ្លៃទឹកដូចមុនទៀតពោលគឺគេប្រើមិនបានយកថវិការអ្វីដែរ។

គួរបញ្ជាក់ថាបើតាមអង្គការសម្ព័ន្ធមិត្តសត្វព្រៃ បានឱ្យដឹងនាកន្លងមកថាគម្រោងរេដបូកជួរភ្នំក្រវាញខាងត្បូងដែលបានជួយអណ្តូង ទឹកស្អាតនេះគឺក្រោយការធ្វើតេស្តបង្ហាញថាជាទឹកអណ្តូង គ្មានសារធាតុអាសេនិច,ទឹកពុំមានកំហាប់កំបោរ ហើយទឹកគ្មាន ច្រេះដែលជាទឹកស្ថិតនៅក្នុង កម្រិតល្អប្រើប្រាស់គ្មានគ្រោះថ្នាក់ ។តាមរយៈអណ្តូងទឹកនេះដែរបានជួយសម្រួលច្រើនដល់ការរស់នៅរបស់ប្រជាពលរដ្ឋក្នុងការប្រើប្រាស់ទឹក និងវាជាទឹកស្អាតធានាបាននូវសុខភាពផង៕

The post អណ្តូងទឹកស្អាតរបស់គម្រោងរេដបូក បានជួយដល់ជីវភាពប្រជាសហគមន៍អេកូរទេសចរណ៍ជីផាត និងទ្រទ្រង់សុខមាលភាព appeared first on Kampuchea Thmey Daily.

តាមរយៈ​សន្និសីទ​កាសែត​កាលពី​ម្សិលមិញ​នេះ កញ្ញា ស៊ូវណ្ណា ហ្គោនឡែត ស្ថាបនិក​ និង​ជា​នាយិកា​ប្រតិបត្តិ​នៃ​អង្គការ​សម្ព័ន្ធ​មិត្ត​សត្វព្រៃបាន​គូស​បញ្ជាក់​ថា ជីផាត​ជា​ឃុំ​មួយនៅ​​ដាច់​ស្រយាល​នៅ​ក្នុង​ស្រុក​ថ្ម​បាំង​ខេត្ត​កោះកុង ដែល​អង្គការ​សម្ព័ន្ធមិត្ត​សត្វព្រៃ​បាន​ផ្តល់​ការ​គាំទ្រ​យ៉ាង​ច្រើនសម្រាប់​ការ​ចូលរួម​អភិវឌ្ឍ​សហគមន៍ ខណៈ​តំបន់​នេះ​ក៏​ជា​គោលដៅ​អេកូ​ទេសចរណ៍​ដ៏​ទាក់ទាញ​នៅ​តំបន់​ឧទ្យាន​ជួរ​ភ្នំក្រវាញ។

កញ្ញា​ថា ការ​ជ្រើសរើស​ឃុំ​ជីផាត ជា​គោលដៅ​ដើម្បី​ធ្វើ​យុទ្ធនាការ​ក្រោម​ឈ្មោះ​ថា «ជីផាត​គ្មាន​​ប្លាស្ទិក» ដោយសារ​មើល​ឃើញ​កន្លង​ទៅ​នេះ​មាន​ការ​បំពុល​តាម​រយៈ​ការ​ចោល​សំណល់​ប្លាស្ទិក​រាយប៉ាយដែល​នាំ​ឲ្យ​ប៉ះពាល់​ដល់​បរិស្ថាន រួម​ទាំង​រំខាន​អារម្មណ៍​ដល់​ភ្ញៀវ​ទេសចរ​មក​កម្សាន្ត។

យុទ្ធនាការ​ជីផាត​គ្មាន​ប្លាស្ទិក​ នឹង​បើក​យុទ្ធនា​ការ​សម្អាត​សំណង់​ប្លាស្ទិក​ចាប់​ពី​ថ្ងៃ ២៨ មេសា​​នេះ ដែល​យុទ្ធនា​នេះ​នឹង​មាន​ការ​ចូលរួម​ពី​អាជ្ញាធរ​ពាក់ព័ន្ធ រួមទាំង​សិស្សានុសិស្ស​ក៏​ដូចជា​សហគមន៍​ក្នុង​មូលដ្ឋាន​។ យុទ្ធនាការ​ជីផាត​គ្មាន​​ប្លាស្ទិក​ នឹង​បើក​យុទ្ធនាការ​កើប​សម្អាត​សំណល់​ប្លាស្ទិក​ដែល​ចោល​រាយប៉ាយ​ឲ្យ​អស់​ពី​សហគមន៍ ដើម្បី​លើកកម្ពស់សោភ័ណភាព បរិស្ថាន និង​ភាពស្អាត​ឡើង​វិញ។

បើតាមកញ្ញា ស៊ូវណ្ណា ហ្គោនឡែត សំណល់​ប្លាស្ទិក​ជា​បញ្ហា​រួម​ទាំង​អស់​គ្នា​មិន​ថា​សម្រាប់​តែ​សហគមន៍​ជីផាត​ ក៏​ដូចជា​ពិភពលោក​ទាំង​មូល។ តាម​រយៈ​យុទ្ធនាការ «ជីផាត​គ្មាន​​ប្លាស្ទិក​» ជា​ផ្នែក​មួយ​នៃ​សារ​អប់រំពី​ផល​ប៉ះពាល់​នៃ​សំណល់​ប្លាស្ទិក​ចំពោះ​បរិស្ថាន និង​​ជំរុញ​ដល់​ពលរដ្ឋ​ភ្ញាក់​រលឹក និង​កែប្រែ​ទម្លាប់​នៃ​ការ​ចោល​សំណល់ប្លាស្ទិក ដោយ​ត្រូវ​ទុក​ដាក់​ឲ្យបានត្រឹមត្រូវ​​ដើម្បី​លើក​កម្ពស់​គុណភាព​បរិស្ថាន​ក្នុង​សហគមន៍​ឲ្យបានល្អប្រសើរ​៕

បន្ត​ចុចអាន៖ ត្រួសៗ​ស្វែងយល់​ពី​ភូមិសាស្រ្ត​ឃុំ​ជីផាត ​តំបន់អេកូទេសចរណ៍​ល្បី​បំផុត​ បន្ទាប់ពីអារ៉ែង

The post យុទ្ធនាការ «ជីផាត ​គ្មាន​​​ប្លាស្ទិក​» ជំរុញ​ទាក់ទាញ​​ភ្ញៀវ​ទេសចរ តាមរយៈ​ភាព​ស្អាត​គ្មានសំណល់​ប្លាស្ទិក appeared first on Kampuchea Thmey Daily.

អាហារូបករណ៍រេដបូកផ្តល់ដល់​សិស្ស​ក្រីក្រ​ក្នុង​សហគមន៍​រ៉ាប់រង​លើថ្លៃសិក្សា សម្លៀកបំពាក់, សម្ភារៈសិក្សា, ម្ហូបអាហារ, ប្រាក់ឧបត្ថម្ភ, កន្លែងស្នាក់នៅ, ធានារ៉ាប់រងសុខភាព និង​ផ្ដល់ថ្នាក់រៀនភាសាអង់គ្លេសក្រៅម៉ោងថែមទៀត។

លោក ទូច សុផានី ប្រធានគម្រោងអភិវឌ្ឍន៍សហគមន៍នៃអង្គការសម្ព័ន្ធមិត្តសត្វព្រៃលើកឡើងថា គម្រោង​រ៉េដបូក​បាន​ជួយសម្រួលបន្ទុកគ្រួសារក្រីក្រ ហើយប្រសិនបើគ្មានគម្រោងអាហារូបករណ៍រនេះ​ទេយុវជនជាច្រើនក្នុង​សហគមន៍​នឹងគ្មានឱកាសអាច​បន្ត​ការ​សិក្សា​នៅ​ហាវិទ្យាល័យនោះទេដោយសារកត្តាជីវភាព។ 

លោកបន្ត​ទៀត​ថា គម្រោងរេដបូក (REDD+) ដែល​ដឹកនាំដោយក្រសួងបរិស្ថាន និង​អនុវត្ត​ដោយអង្គការសម្ព័ន្ធមិត្តសត្វព្រៃ បាន​ចូលរួមអភិវឌ្ឍ​ដល់​សហគមន៍​តាម​រយៈ​ការ​អនុវត្ត​គម្រោង​លក់​ឥណទាន​កាបូន។ ថវិកា​ដែល​ទទួល​បាន​ពី​ការ​លក់​ឥណទាន​កាបូន​ បានយកទៅប្រើប្រាស់អភិវឌ្ឍ​ហេដ្ឋារចនាសម្ព័ន្ធក្នុង​សហគមន៍​​ដូចជា​កសាង​ផ្លូវ សាលា​រៀន​ មន្ទីរពេទ្យ អណ្តូងទឹក និង​ការអភិវឌ្ឍ​ធនធានមនុស្ស។

តាមរយៈ​អាហរូបករណ៍រ៉េដបូក សិស្ស​​ក្រោយការ​បញ្ចប់ការសិក្សាត្រូវយកចំណេះនិងជំនាញរបស់ខ្លួនមកចូលរួមអភិវឌ្ឍ​ដល់​សហគមន៍វិញ។

បើតាមលោក ទូច សុផានី គិត​មក​ដល់​ពេលនេះ​អាហារូបករណ៍​រ៉េដបូក​បាន​ផ្តល់​ដល់​សិស្ស​ក្រីក្រ​ចំនួន​ ១៦ នាក់ ដើម្បី​មាន​​ឱកាស​បន្ត​សិក្សា​នៅ​មហាវិទ្យាល័យ៕

The post (វីដេអូ) ឆ្លើយតប​ចម្ងល់​អាហារូបករណ៍​រ៉េដបូក ផ្តល់​ទាំង​ការ​ស្នាក់នៅ ម្ហូប​អាហារ ថ្លៃ​សិក្សា​មួយ​ចប់ appeared first on Kampuchea Thmey Daily.