សហគ្រាសជប៉ុន Archives - Kampuchea Thmey Daily

មកស្គាល់សហគ្រាសកែច្នៃគ្រាប់ស្វាយចន្ទីធំៗក្នុងប្រទេស ប្រមូលទិញស្វាយចន្ទីរាប់ម៉ឺនតោន កែច្នៃនាំចេញទៅក្រៅប្រទេស

Dy Bunnara — Tue, 28 Apr 2026 03:36:09 +0000

កម្ពុជាស្ថិតនៅក្នុងចំណោមប្រទេសនាំចេញស្វាយចន្ទីដ៏ធំមួយនៅលើពិភពលោក។ រាជរដ្ឋាភិបាលកម្ពុជាបានដាក់ចេញទស្សនវិស័យប្រែក្លាយកម្ពុជា ទៅជាប្រទេសនាំចេញគ្រាប់ស្វាយចន្ទីច្រើនជាងគេនៅលើពិភពលោក និងជាអធិរាជស្វាយចន្ទីនាពេលអនាគត។

យ៉ាងណាមិញ គ្រាប់ស្វាយចន្ទីមួយភាគធំ ដែលប្រមូលផលបានត្រូវបាននាំចេញទៅក្រៅប្រទេសជាពិសេសប្រទេសវៀតណាម ដោយមិនបានកែច្នៃ។

ស្របជាមួយសក្តានុពលនិងការជំរុញលើកទឹកចិត្តពីរដ្ឋាភិបាល បច្ចុប្បន្នឃើញថាមានក្រុមហ៊ុនមួយចំនួនបានបោះទុនវិនិយោគបង្កើតរោងចក្រកែច្នៃគ្រាប់ស្វាយចន្ទី សម្រាប់ផ្គង់ផ្គត់ទីផ្សារក្នុងស្រុក និងបានចូលរួមទប់ស្កាត់ការហូរចេញគ្រាប់ស្វាយចន្ទីឆៅមិនបានកែច្នៃជាចំណែកលើកកម្ពស់ផលិតផលស្វាយចន្ទីកម្ពុជាឱ្យឈានទៅកាន់ពិភពលោក។

ក្រុមហ៊ុន CSNC Agriculture

កាលពីឆ្នាំ ២០២៣ ក្រុមហ៊ុន CSNC Agriculture ដែលមានមូលដ្ឋានមកពីប្រទេសសឹង្ហបុរីបានបោះទុនវិនិយោគប្រមាណ ១២ លានដុល្លារ សាងសង់រោងចក្រកែច្នៃគ្រាប់ស្វាយចន្ទីនៅលើផ្ទៃដីទំហំ ១៤ ហិកតា នៅភូមិស្នោ ឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ។

រោងចក្ររបស់ក្រុមហ៊ុន CSNC ប្រមូលទិញគ្រាប់ស្វាយចន្ទីដោយផ្ទាល់ពីសហគមន៍កសិករ និងអ្នកប្រមូលទិញមួយចំនួន ខណៈរោងចក្រធ្វើការកែច្នៃផងនិងនាំចេញផង។

រោងចក្រ CSNC មានសមត្ថភាពកែច្នៃគ្រាប់ស្វាយចន្ទីបានប្រមាណ ៤០ តោនក្នុងមួយថ្ងៃឬស្មើនឹង ១ ម៉ឺន ២ ពាន់តោន ក្នុងមួយឆ្នាំ ខណៈក្រុមហ៊ុនមានផែនការទិញគ្រាប់ស្វាយចន្ទីពាក់កណ្ដាលសម្រេចពីសហគ្រាសក្នុងស្រុក ដើម្បីយកទៅកែច្នៃបន្តលក់ទៅក្រៅប្រទេស ដែលក្រុមហ៊ុនមានទីផ្សារលក់រាយនៅប្រទេសចិន និងអឺរ៉ុប។

ក្រុមហ៊ុនជប៉ុន MIRATH GREEN TECH

ក្រុមហ៊ុនជប៉ុន MIRATH GREEN TECH បានសម្ពោធដាក់ឱ្យដំណើរការរោងចក្រកាលពីឆ្នាំ ២០២៤ នៅខេត្តកំពង់ធំ។ ក្រុមហ៊ុនបានបោះទុនវិនិយោគជាង ១ លានដុល្លារ ដើម្បីបង្កើតរោងចក្រកែច្នៃគ្រាប់ស្វាយចន្ទីជាមួយសមត្ថភាពកែច្នៃបានចំនួន ១,៥០០ តោន នៅឆ្នាំដំបូង និងពង្រីកដល់ ៣ ០០០ តោននៅឆ្នាំបន្តបន្ទាប់ ដើម្បីនាំចេញទៅទីផ្សារប្រទេសជប៉ុននិងសហភាពអឺរ៉ុប។

ដើម្បីបំពេញក្នុងខ្សែសង្វាក់ផលិតកម្ម ក្រុមហ៊ុនបានចុះប្រមូលទិញគ្រាប់ស្វាយចន្ទីស្រស់ពីសហគមន៍មួយចំនួន ដូចជាសហគមន៍សាលាវិស័យ សហគមន៍ឃុំក្រយា និងសហគមន៍សន្ទុក ព្រមទាំងសហគមន៍ទំនើបទាំង ៣ ស្ថិតក្នុងខេត្តកំពង់ធំ។

ក្រៅពីកែច្នៃគ្រាប់ស្វាយចន្ទីលក់លើទីផ្សារ ក្រុមហ៊ុនក៏មានគម្រោងផលិតប្រេងជីវឥន្ធនៈចេញពីសំបកគ្រាប់ស្វាយចន្ទី រួមទាំងផែនការនាំយកគ្រឿងបរិក្ខារ និងបច្ចេកវិទ្យាទំនើបៗពីប្រទេសជប៉ុនសម្រាប់បម្រើឱ្យការកែច្នៃក្នុងរោងចក្រ។

ក្រុមហ៊ុន Khmer Agro Cashew

សហគ្រាស Khmer Agro Cashew បង្កើតឡើងនៅក្នុងឆ្នាំ ២០២៥ មានទិសដៅប្រមូលទិញគ្រាប់ស្វាយចន្ទីដែលមានស្ដង់ដាគុណភាព ដើម្បីយកទៅកែច្នៃហើយនាំចេញ ដើម្បីចូលរួមចំណែកជួយលើកកម្ពស់ជីវភាពកសិករនៅក្នុងសហគមន៍។

សហគ្រាស Khmer Agro Cashew គ្រោងចាប់ផ្តើមខ្សែសង្វាក់ផលិតកម្មនៅពាក់កណ្ដាលឆ្នាំ ២០២៦ ជាមួយសមត្ថភាពកែច្នៃគ្រាប់ស្វាយចន្ទីបានប្រមាណ ៥០ តោនក្នុងមួយថ្ងៃ ដែលទីផ្សារនាំចេញគឺទៅប្រទេសជប៉ុន កោះតៃវ៉ាន់ និងទីផ្សារអឺរ៉ុប។

កាលពីថ្ងៃទី ០៦ ខែកុម្ភៈ ឆ្នាំ ២០២៦ ក្រុមហ៊ុនក៏បានចុះកិច្ចសន្យាទិញគ្រាប់ស្វាយចន្ទីសើមចំនួន ៦ ០០០ តោន ពីសហគមន៍កសិកម្មចំនួន ៦ ស្ថិតនៅក្នុងស្រុកព្រែកប្រសព្វ ខេត្តក្រចេះ។ កិច្ចសន្យាទិញ-លក់គ្រាប់ស្វាយចន្ទីជាមួយសហគមន៍កសិកម្ម ក្នុងតម្លៃប្រហាក់ប្រហែលជាមួយឈ្មួញកណ្ដាល។

ក្រុមហ៊ុន Giant Cashew Enterprise

សហគ្រាស Giant Cashew Enterprise ក៏ជាសហគ្រាសកសិកម្មឈានមុខគេមួយ ដែលមានឯកទេសក្នុងការដាំដុះ ដំណើរការ និងចែកចាយគ្រាប់ស្វាយចន្ទីដែលមានគុណភាពខ្ពស់នៅទូទាំងពិភពលោក។ សហគ្រាសមានប្រមូលទិញ ហាលសម្ងួត កែច្នៃគ្រាប់ស្វាយចន្ទី សម្រាប់ផ្គត់ផ្គង់រោងចក្រ សិប្បកម្មក្នុងស្រុក និងបរទេស។

ក្រុមហ៊ុន Pinex Agro

វត្តមានរបស់រោងចក្រ Pinex Agro ជាជំហានដ៏សំខាន់បំផុតមួយ ក្នុងការចូលរួមចំណែកជំរុញវិស័យដាំដុះស្វាយចន្ទីនៅក្នុងខេត្តកំពង់ធំ។

ខណៈស្វាយចន្ទីគឺជាដំណាំដែលមានសក្តានុពលធំជាងគេក្នុងខេត្ត រោងចក្រនេះបានបង្កើតឱកាសការងារយ៉ាងច្រើននៅក្នុងសហគមន៍ផ្ទាល់ ដែលជួយឱ្យប្រជាពលរដ្ឋមានការងារធ្វើនៅជិតផ្ទះ ជួយសម្រួលដល់ជីវភាពគ្រួសារ និងកាត់បន្ថយការធ្វើចំណាកស្រុក។

ក្រុមហ៊ុន Harvest Center Cambodia

ក្រុមហ៊ុន Harvest Center (Cambodia) ក៏ជាក្រុមហ៊ុនក្នុងស្រុកដែលប្រមូលទិញស្វាយចន្ទីក្នុងការកែច្នៃនាំចេញទៅក្រៅប្រទេស។ ក្នុងជំនួបជាមួយតំណាងសហគមន៍កសិកម្មនៅខេត្តកំពង់ធំកាលពីថ្ងៃទី ២២ ខែកុម្ភៈ ក្រុមហ៊ុន Harvest Center (Cambodia) នៅក្នុងចំណោមក្រុមហ៊ុនធំៗក្នុងស្រុកចំនួន ៦ ដែលបានសន្យាក្នុងការប្រមូលទិញគ្រាប់ស្វាយចន្ទីឆៅពីកសិករក្នុងតម្លៃប្រកួតប្រជែងនារដូវប្រមូលផលឆ្នាំ ២០២៦ នេះ។

ក្រុមហ៊ុន TL Agri Foods Import Export Co.,Ltd

រោងចក្រកែច្នៃគ្រាប់ស្វាយចន្ទីខ្មែរ TL Agri Foods Import Export Co.,Ltd ជាក្រុមហ៊ុនក្នុងស្រុក ១០០% ដែលមានឧកញ៉ា ឡាង ទីលាង ជាអគ្គនាយក ដែលបានវិនិយោគរោងចក្រកែច្នៃគ្រាប់ស្វាយចន្ទីក្នុងទុនវិនិយោគប្រមាណ ១.៥ លានដុល្លារអាមេរិក ដែលមានទីតាំងស្ថិតនៅស្រុកចម្ការលើ ខេត្តកំពង់ចាម។

ជាមួយការដំឡើងគ្រឿងចក្របច្ចេកវិទ្យាទំនើបចុងក្រោយ រោងចក្រដែលបានចាប់ផ្តើមដំណើរការនៅឆ្នាំ ២០២៥ មានសមត្ថភាពបកគ្រាប់ស្វាយចន្ទីបានប្រមាណ ៥០ តោនក្នុងមួយថ្ងៃ។

ខណៈដែលការវិនិយោគសាងសង់រោងចក្រនេះ ក្រុមហ៊ុនមានចម្ការដាំដុះស្វាយចន្ទីដោយខ្លួនឯងនៅលើផ្ទៃដីប្រមាណ ១០ ហិតា និងប្រមូលទិញគ្រាប់ស្វាយចន្ទីបន្ថែមពីប្រជាពលរដ្ឋ ដោយក្នុង ១ ឆ្នាំៗ ក្រុមហ៊ុនគ្រោងទិញចូលគ្រាប់ស្វាយចន្ទីប្រមាណ ១០ ម៉ឺន ដើម្បីបំពេញតម្រូវការខ្សែសង្វាក់ផលិតកម្ម និងសម្រាប់កែច្នៃនាំចេញទៅកាន់ទីផ្សារអន្តរជាតិ។

សមាគមស្វាយចន្ទីកម្ពុជាបានឲ្យដឹងថា គិតត្រឹមដើមឆ្នាំ២០២៥ កម្ពុជាមានសហគ្រាសកែច្នៃស្វាយចន្ទីចំនួន ៥២ ក្នុងនោះរោងចក្រធុនមធ្យមមានចំនួន ៦ (សមត្ថភាពផលិត ៧ ០០០ តោន ទៅ ១៤០ ០០០ តោនក្នុងមួយឆ្នាំ)។ ចំណែក ៤៨ សហគ្រាសផ្សេងទៀតជាសិប្បកម្មលក្ខណៈគ្រួសារតូចៗ។

នៅក្នុងរដូវប្រមូលផលគ្រាប់ស្វាយចន្ទីឆ្នាំ ២០២៦ រំពឹងសម្រេចបាន ៨០ ម៉ឺនតោន ដល់ ១ លានតោន ដោយសារការកើនឡើងនៃផ្ទៃដីដាំដុះ រួមផ្សំនឹងការអំណោយផលពីអាកាសធាតុ។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកចំណូលបានប្រមាណ ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅ ១ លានតោន កើនឡើង ២៧% ធៀបនឹងឆ្នាំ ២០២៤។ គិតមកដល់ពេលនេះ កម្ពុជាមានផ្ទៃដីដាំដុះស្វាយចន្ទីប្រមាណ ៧៤ ម៉ឺនហិកតា៕

The post មកស្គាល់សហគ្រាសកែច្នៃគ្រាប់ស្វាយចន្ទីធំៗក្នុងប្រទេស ប្រមូលទិញស្វាយចន្ទីរាប់ម៉ឺនតោន កែច្នៃនាំចេញទៅក្រៅប្រទេស appeared first on Kampuchea Thmey Daily.

ក្រៅពីក្រុមហ៊ុនដំឡើងរថយន្ត កម្ពុជាមានក្រុមហ៊ុនផលិតគ្រឿងបន្លាស់រថយន្ត កំពុងពង្រីកខ្សែសង្វាក់ផលិតកម្មនៅកម្ពុជា

Dy Bunnara — Fri, 09 Jan 2026 02:59:00 +0000

ក្រៅពីវត្តមានក្រុមហ៊ុនដំឡើងរថយន្តម៉ាកល្បីៗរបស់ពិភពលោក កម្ពុជាបានទាក់ទាញក្រុមហ៊ុនផលិតគ្រឿងបន្លាស់រថយន្ត ដើម្បីផលិតគ្រឿងបន្លាស់រថយន្តផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។

ថ្លែងនៅក្នុងពិធីបើកសន្និបាតបូកសរុបលទ្ធផលការងារពាណិជ្ជកម្មឆ្នាំ ២០២៥ និងលើកទិសដៅការងារពាណិជ្ជកម្មឆ្នាំ២០២៦ របស់ក្រសួងពាណិជ្ជកម្មកាលពីម្សិលមិញនេះ លោកស្រី ចម និម្មល រដ្ឋមន្រ្តីក្រសួងពាណិជ្ជកម្មបានឲ្យដឹងថា តាមរយៈយន្តការជំរុញការប្រើប្រាស់ផលិតផលខ្មែរក្រោមស្លាកយីហោ Made in Cambodia ក្រុមហ៊ុនផលិតគ្រឿងបន្លាស់រថយន្តធំៗរបស់ពិភពលោក កំពុងពង្រីកខ្សែសង្វាក់ផលិតកម្មនៅក្នុងប្រទេសកម្ពុជា ក្នុងនោះមានដូចជាក្រុមហ៊ុន Denzo ក្រុមហ៊ុន Sumitomo និង Honda។

លោកស្រី ចម និម្មល បានបន្ថែមថា កម្ពុជាកំពុងធ្វើពិពិធកម្មទំនិញឲ្យសំបូរបែប ដោយអនុវត្តយន្តការការជំរុញប្រើប្រាស់ផលិតផលខ្មែរ និងលើកស្ទួយទំនិញដែលផលិតនិងដំឡើងនៅកម្ពុជា។

បើតាមលោកស្រីរដ្ឋមន្ត្រី ក្រៅពីរោងចក្រផលិតគ្រឿងបន្លាស់រថយន្ត កម្ពុជាមានក្រុមហ៊ុនដំឡើងរថយន្តក្នុងស្រុកមានដូចជាក្រុមហ៊ុន Ford, Hyundai, Toyota, KIA, BYD, Isuzu, SsangYong និង GTV Motor រួមទាំងក្រុមហ៊ុនផលិតសំបកកង់រថយន្តដែលផលិតនៅកម្ពុជា។

ក្រុមហ៊ុន Denso Cambodia ជាក្រុមហ៊ុនផលិតគ្រឿងបន្លាស់រថយន្តរបស់ជប៉ុន ដែលកំពុងវិនិយោគរោងចក្រនៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ។ Denso Cambodia ជាក្រុមហ៊ុនបុត្រសម្ព័ន្ធរបស់ក្រុមហ៊ុន Denso Corporation មានមូលដ្ឋាននៅជប៉ុន ដែលជាក្រុមហ៊ុនផ្គត់ផ្គង់ប្រព័ន្ធបច្ចេកវិទ្យាទំនើប និងគ្រឿងរថយន្តសកល មានក្រុមហ៊ុនបុត្រសម្ព័ន្ធជាង ២០០ នៅលើពិភពលោក និងក្រុមហ៊ុនដៃគូ ៣៥ ប្រទេស។

ក្រុមហ៊ុន Denso បានវិយោគបង្កើតរោងចក្រផលិតគ្រឿងបន្លាស់រថយន្ដនៅក្នុងប្រទេសកម្ពុជាតាំងពីឆ្នាំ២០១៣ ដែលមានមុខសញ្ញាផលិតដូចជា៖

១)- ម៉ាញ៉េតូ (Magneto)
២)- ឧបករណ៍សម្រាប់បន្ថយកំដៅក្នុងម៉ាស៊ីនឡាន (Tube/Inner Fin for Inter Cooler)
៣)-ឧបករណ៍វាស់កម្រិតទឹកនៅក្នុងម៉ាស៊ីនឡានម៉ាស៊ូត (Level Switch for Diesel filter)
៤)- ឧបករណ៍បញ្ចុះកំដៅប្រេងនៅក្នុងម៉ាស៊ីន (SUS Oil Cooler)
៥)- កញ្ច្រែងទឹកក្តៅ (ចាប់ពីឆ្នាំ២០២២) (Radiator)

ដោយឡែក ក្រុមហ៊ុន Sumitomo Corporation គឺជាក្រុមហ៊ុនជប៉ុនដែលវិនិយោគនៅជាង ៦៥ ប្រទេស ជាមួយបុគ្គលិកសរុបប្រមាណ ៧៩ ពាន់នាក់ ដែលវិនិយោគលើវិស័យផលិតផលដែក ប្រព័ន្ធដឹកជញ្ជូននិងសំណង់ ហេដ្ឋារចនាសម្ព័ន្ធ ប្រព័ន្ធផ្សព្វផ្សាយ និងឌីជីថល អចលនទ្រព្យ និងធនធានរ៉ែ ថាមពល គីមី និងអេឡិចត្រូនិចជាដើម។

គ្រៀងបន្លាស់រថយន្តជាមុខទំនិញនាំចេញដ៏សំខាន់មួយរបស់ប្រទេសកម្ពុជា។ របាយការណ៍កត់ត្រាដោយក្រសួងពាណិជ្ជកម្មបានបង្ហាញថា ក្នុងឆ្នាំ ២០២៥ កម្ពុជាបាននាំចេញមុខទំនិញសំខាន់ៗទៅក្រៅប្រទេសមានទំហំសាច់ប្រាក់ ៣១ ពាន់លានដុល្លារ។

ថ្លែងនៅក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ ២០២៥ និងលើកទិសដៅអនុវត្តន៍ការងារពាណិជ្ជកម្មឆ្នាំ២០២៦ នៅក្រសួងពាណិជ្ជកម្ម លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានគូសបញ្ជាក់ថា ឆ្នាំ២០២៥ កម្ពុជាបាននាំចេញទំនិញសំខាន់ៗសម្រេចបានទំហំទឹកប្រាក់ចំនួន ៣១.២៨ ពាន់លានដុល្លារអាម៉េរិកកើនឡើង ១៦.៩៥% និងការនាំចូលសម្រេចបានទឹកប្រាក់ ៣៣.៩៦ ពាន់លានដុល្លារអាម៉េរិក កើនឡើង ១៨.៣២% ។

បើតាមមន្រ្តីអ្នកនាំពាក្យក្រសួងពាណិជ្ជកម្ម ទំនិញនាំចេញសំខាន់ៗរបស់កម្ពុជារួមមាន៖ ១) សម្លៀកបំពាក់ ២) វាយនភ័ណ្ឌ ៣)ស្បែកជើង ៤) សម្ភារៈធ្វើដំណើរនិង កាបូប ៥) សំបកកង់រថយន្ត ៦) ស្វាយចន្ទី ៧) អង្ករ ៨) ដំឡូងមី និង៩)គ្រឿងបង្គុំអេឡិចត្រូនិក និងគ្រឿងបន្លាស់រថយន្ត៕

The post ក្រៅពីក្រុមហ៊ុនដំឡើងរថយន្ត កម្ពុជាមានក្រុមហ៊ុនផលិតគ្រឿងបន្លាស់រថយន្ត កំពុងពង្រីកខ្សែសង្វាក់ផលិតកម្មនៅកម្ពុជា appeared first on Kampuchea Thmey Daily.

ឯកសារស្រាវជ្រាវគោលនយោបាយតំបន់សេដ្ឋកិច្ចពិសេស និងសួនឧស្សាហកម្មបៃតង នឹងបង្ហាញក្នុងវេទិកាពិភាក្សា កម្ពុជា-ជប៉ុន

Dy Bunnara — Thu, 20 Feb 2025 03:22:16 +0000

ឯកសារស្រាវជ្រាវអំពី “គោលនយោបាយតំបន់សេដ្ឋកិច្ចពិសេស និងសួនឧស្សាហកម្មបៃតងសម្រាប់កំណើនផលិតភាព និងការធ្វើពិពិធកម្មសេដ្ឋកិច្ចនៅកម្ពុជា” ដែលសិក្សាដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ារបស់ជប៉ុន (ERIA) នឹងយកទៅបង្ហាញនៅក្នុងវេទិកាពិភាក្សាររវាងរដ្ឋ និងវិស័យឯកជន កម្ពុជា-ជប៉ុន នាពេលខាងមុខ។

កាលពីម្សិលមិញនេះ មន្រ្តីក្រុមប្រឹក្សាអភិវឌ្ឍន៍កម្ពុជា បានស្តាប់បទបង្ហាញពីគម្រោងសិក្សាស្រាវជ្រាវ “ការបង្កើតកិច្ចសហការសេដ្ឋកិច្ចរួមគ្នា កម្ពុជា-ជប៉ុន តាមរយៈការពង្រីកធុរកិច្ចជប៉ុននៅកម្ពុជាប្រកបដោយនិរន្តរភាព” និង “គោលនយោបាយតំបន់សេដ្ឋកិច្ចពិសេស និងសួនឧស្សាហកម្មបៃតងសម្រាប់កំណើនផលិតភាព និងការធ្វើពិពិធកម្មសេដ្ឋកិច្ចនៅកម្ពុជា” ដែលមានការចូលរួមពី លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) គណៈប្រតិភូជប៉ុនរួមមាន លោកសាស្រ្តាចារ្យ WATANABE Tetsuya ប្រធានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (Economic Research Institute for ASEAN and East Asia – ERIA) លោក FUJIOKA Ryosuke ទីប្រឹក្សារដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម នៃប្រទេសជប៉ុន (METI) និងជាអគ្គលេខាធិការនៃគណៈកម្មាធិការសម្រាប់កិច្ចសហប្រតិបត្តិការសេដ្ឋកិច្ច និងឧស្សាហកម្ម រវាងរដ្ឋមន្ត្រីសេដ្ឋកិច្ចអាស៊ាន ជាមួយក្រសួងសេដ្ឋកិច្ច ពាណិជ្ជកម្ម និងឧស្សាហកម្ម នៃប្រទេសជប៉ុន (AMEICC)។

បើតាមមន្រ្តីចូលរួមក្នុងកិច្ចប្រជុំបានឲ្យដឹងថា របាយការណ៍ចុងក្រោយនៃការសិក្សាគម្រោងស្រាវជ្រាវរបស់ METI នឹងត្រូវយកទៅបង្ហាញនៅក្នុងវេទិកាពិភាក្សាររវាងរដ្ឋ និងវិស័យឯកជន កម្ពុជា-ជប៉ុន នាពេលខាងមុខ៕

The post ឯកសារស្រាវជ្រាវគោលនយោបាយតំបន់សេដ្ឋកិច្ចពិសេស និងសួនឧស្សាហកម្មបៃតង នឹងបង្ហាញក្នុងវេទិកាពិភាក្សា កម្ពុជា-ជប៉ុន appeared first on Kampuchea Thmey Daily.

ត្រីទីឡាបព្យាខ្មែរ ជប៉ុនច្នៃជាម្ហូបញាំឆៅជំនួសត្រីសាល់ម៉ុន

Dy Bunnara — Fri, 07 Feb 2025 04:20:14 +0000

ត្រីទីឡាបព្យាដែលជាត្រីទឹកសាប ត្រូវបានកែច្នៃជាអាហារញាំឆៅដោយប្រើប្រាស់បច្ចេកទេសពីអ្នកជំនាញជប៉ុន។

លោក សាំ បូរ៉ា ជំនួយការនាយកប្រតិបត្តក្រុមហ៊ុន Cambodia Fresh Farm បានឲ្យដឹងថា ត្រីទីឡាបព្យាដែលជប៉ុនហៅថា ណាន់ហ្គុឃឹដៃ ត្រូវបានកសិដ្ឋានរបស់លោកចិញ្ចឹមតាមបច្ចេកទេសជប៉ុន ដើម្បីកែច្នៃធ្វើជាអាហារសាសីមី (ត្រីហូបឆៅ)។

លោក សាំ បូរ៉ា បញ្ជាក់ថា «ពូជត្រីនេះយកប្រភពពីក្នុងស្រុក។ កសិដ្ឋានបានប្រើប្រាស់វិធីចិញ្ចឹមបំប៉នតាំងពីនៅកូនតូចៗ ហើយដំណើរការកែច្នៃនិងវេចខ្ចប់ជាអាហារពីមួយដំណាក់កាលទៅមួយដំណាក់កាល ត្រូវឆ្លងកាត់ការត្រួតពិនិត្យនិងការតេស្តពិសោធន៍ដើម្បីរក្សាបានគុណភាព និងធានាសុវត្ថិភាពដល់អ្នកទទួលទាន»។

ខណៈដែលត្រីកែច្នៃក្នុងស្រុកនេះ អាចទទួលទានជំនួសត្រីសាល់ម៉ុននាំចូល ទីផ្សារបច្ចុប្បន្នមានតែលក់តាមផ្សារទំនើបធំៗ ហើយអតិថិជនគោលដៅភាគច្រើនជាជនបរទេស ខណៈមួយខែៗអាចលក់បានប្រហែល ៣០០ គីឡូក្រាម។ នេះបើតាមលោក សាំ បូរ៉ា

លោក សាំ បូរ៉ា ក៏សំណូមពរដល់ពលរដ្ឋជួយគាំទ្រផលិតផលត្រីកែច្នៃក្នុងស្រុកនេះ ដែលលោកមើលឃើញថាក៏ជាចំណែកមួយជួយដល់សេដ្ឋកិច្ច កាត់បន្ថយការនាំចូល ជួយពលរដ្ឋមានការងារធ្វើនិងមានប្រាក់ចំណូល៕

The post ត្រីទីឡាបព្យាខ្មែរ ជប៉ុនច្នៃជាម្ហូបញាំឆៅជំនួសត្រីសាល់ម៉ុន appeared first on Kampuchea Thmey Daily.

ក្រុមហ៊ុនជប៉ុន ចង់វិនិយោគកែច្នៃសំបកគ្រាប់ស្វាយចន្ទីទៅជាទឹកខ្មេះ កាកសំណល់ចំណីសត្វ

Dy Bunnara — Thu, 30 Jan 2025 09:04:29 +0000

អគ្គនាយករងក្រុមហ៊ុនជប៉ុន Nippon Koei Business Partners បានចុះមកទស្សនកិច្ច និងបានជួបមន្រ្តីកម្ពុជាដើម្បីពិភាក្សាពីគម្រោងវិនិយោគវិស័យស្វាយចន្ទីនៅកម្ពុជា។

ក្នុងជំនួបពិភាក្សាជាមួយ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លោក Tsutomu TAMURA អគ្គនាយករងក្រុមហ៊ុន Nippon Koei Business Partners បានប្រាប់មន្រ្តីកម្ពុជាពីបំណងមកសិក្សាស្វែងយល់ពីវិស័យស្វាយចន្ទីនៅកម្ពុជា។

ក្នុងឱកាសជំនួបពិភាក្សានោះ លោក Tsutomu បានបង្ហាញចំណាប់អារម្មណ៍ក្នុងការវិនិយោគលើវិស័យស្វាយចន្ទី ដើម្បីនាំចេញ ជាពិសេសផ្តោតលើការកែច្នៃផ្លែនិងសំបកគ្រាប់ស្វាយចន្ទីទៅជាទឹកខ្មេះ ប្រេង កាកសំណល់ដែលសេសសល់នឹងយកទៅធ្វើជាចំណីសត្វ (គោ)។

ឆ្លើយតបការចាប់អារម្មណ៍របស់ក្រុមហ៊ុនជប៉ុន ដែលមានបំណងមកវិនិយោគកែច្នៃស្វាយចន្ទីនៅកម្ពុជា លោក ជា វុទ្ធី បានជម្រាបជូនគណៈប្រតិភូពីសក្តានុពលរបស់វិស័យស្វាយចន្ទីនៅកម្ពុជា ខេត្តសក្តានុពលសម្រាប់ដាំដុះស្វាយចន្ទី និងការទាញយកផលប្រយោជន៍ជាអតិបរិមាពីស្វាយចន្ទី។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកទឹកចិត្តឱ្យក្រុមហ៊ុនឆាប់ធ្វើការសម្រេចចិត្តមកបណ្តាក់ទុននៅកម្ពុជាក្នុងវិស័យស្វាយចន្ទី ពីព្រោះនាពេលបច្ចុប្បន្នរាជរដ្ឋាភិបាលកម្ពុជាកំពុងយកចិត្តទុកដាក់លើវិស័យនេះ ជាពិសេសការកែច្នៃស្វាយចន្ទី៕

The post ក្រុមហ៊ុនជប៉ុន ចង់វិនិយោគកែច្នៃសំបកគ្រាប់ស្វាយចន្ទីទៅជាទឹកខ្មេះ កាកសំណល់ចំណីសត្វ appeared first on Kampuchea Thmey Daily.

ឃ្លាំងស្តុកអីវ៉ាន់ស្តង់ដាជប៉ុន មានវត្តមានក្នុងខេត្តព្រះសីហនុ បោះទុនវិនិយោគជាង ១០ លានដុល្លារ

Din Thary — Thu, 19 Dec 2024 08:46:41 +0000

លោក ពុំ វ៉ាអូន ជំនួយការផ្នែកលក់នៃក្រុមហ៊ុន AEON MALL LOGI PLUS បានគូសបញ្ជាក់ឱ្យដឹងថា ក្រុមហ៊ុន AEON MALL LOGI PLUS បានបោះទុនវិនិយោគបង្កើតឃ្លាំងស្តុកអីវ៉ាន់មួយនៅក្នុងខេត្តព្រះសីហនុ ដោយចាយទឹកប្រាក់អស់ប្រមាណ ១០ លានដុល្លារសម្រាប់ដំណើរការនៃគម្រោងនេះ។

គម្រោងសាងសង់ឃ្លាំងស្តុកអីវ៉ាន់នៅក្នុងខេត្តព្រះសីហនុ បានចាប់ផ្តើមនៅឆ្នាំ ២០២២ ក្នុងទុនវិនិយោគជាង ១០ លានដុល្លារ ហើយឆ្នាំ ២០២៣ ទើបរួចរាល់ដាក់ឲ្យដំណើរការ។ ជាក់ស្តែង គម្រោងនេះដំណើរការគិតមកដល់ពេលបច្ចុប្បន្នមានរយៈពេលប្រមាណជាង ១ ឆ្នាំហើយ។

លោក ពុំ វ៉ាអូន បានបន្តថា សេវាកម្មឃ្លាំងស្តុកឥ៉វ៉ាន់របស់ក្រុមហ៊ុន សម្រួលបានយ៉ាងពេញលេញជាមួយដៃគូ ឬម្ចាស់អាជីវកម្មនាំទំនិញចេញចូលទៅក្រៅប្រទេស ជាពិសេសកាត់បន្ថយពេលវេលា ការដឹកជញ្ជូនចុះឡើង រក្សាតម្លៃប្រកួតប្រជែង។

ប្រៀបធៀបទៅពីមុនដែលមិនទាន់មានឃ្លាំងស្តុកនៅក្នុងស្រុក និងបច្ចុប្បន្ន លោក វ៉ាអូន បានពន្យល់ថា ប្រសិនបើអតិថិជន ឬម្ចាស់អាជីវកម្ម មានគម្រោងពង្រីកនូវទីផ្សារ ត្រូវតែទាមទារឱ្យមានការិយាល័យមួយច្បាស់លាស់នៅក្នុងប្រទេសកម្ពុជាដើម្បីលក់ផលិតផល និងពង្រីកទីផ្សាររបស់ពួកគេ។ ប៉ុន្តែក្រោយពេលមានសេវាកម្មពីខាងក្រុមហ៊ុន ម្ចាស់អាជីវកម្មមិនចំបាច់មានការិយាល័យ ឬជួលបុគ្គលិកនៅស្រុកខ្មែរ ឬត្រូវការបើកក្រុមហ៊ុនដែលត្រូវការចំណាយធំនោះទេ គឺគ្រាន់តែដាក់ឯកសារនានាទាក់ទងទៅហ្នឹងអីវ៉ាន់ នោះខាងក្រុមហ៊ុននឹងធ្វើការជំនួសអ្នកផ្គត់ផ្គង់នៅក្រៅប្រទេស ដូច្នេះពួកគេអាចចំណេញច្រើន ល្អជាងការបើកការិយាល័យដោយខ្លួនឯងនៅស្រុកខ្មែរ។

បន្ថែមពីនេះ ការរៀបចំប្រព័ន្ធឃ្លាំងស្តុកអីវ៉ាន់នៅក្នុងស្រុកសម្រួលដល់ការដឹកជញ្ជូន មិនបាច់ចំណាយពេលដឹកជញ្ជូនចុះឡើងដែលពីមុន ត្រូវដឹកបន្តពីប្រទេសជិតខាងហើយដែលត្រូវចំណាយពេលយូរ រួមទាំងថ្លៃដឹកជញ្ជូនខ្ពស់។

ដោយក្រុមហ៊ុនអនុលោមទៅតាមច្បាប់ លោក វ៉ាអូន ក៏បានបន្ថែមដែរថា សម្រាប់ម្ចាស់អាជីវកម្មដែលចង់សហការជាមួយក្រុមហ៊ុន AEON MALL LOGI PLUS ក្នុងការស្តុកអីវ៉ាន់នេះ គឺត្រូវតែទៅចុះឈ្មោះ និងមានការបញ្ជាក់ពីក្រសួងពាណិជ្ជកម្មឱ្យបានត្រឹមត្រូវ ដែលសមស្របនិងគោរពទៅតាមច្បាប់ដែលមានចែងក្នុងប្រទេសកម្ពុជា៕

The post ឃ្លាំងស្តុកអីវ៉ាន់ស្តង់ដាជប៉ុន មានវត្តមានក្នុងខេត្តព្រះសីហនុ បោះទុនវិនិយោគជាង ១០ លានដុល្លារ appeared first on Kampuchea Thmey Daily.

មន្រ្តីក្រុមហ៊ុនជប៉ុន Sumitomo ចុះមកទស្សនកិច្ច ជំរុញការវិនិយោគក្រុមហ៊ុនជប៉ុននៅកម្ពុជា

Dy Bunnara — Thu, 12 Dec 2024 01:41:49 +0000

មន្រ្តីសាជីវកម្មក្រុមហ៊ុនជប៉ុន Sumitomo Mitsui Banking Corporation បានចូលជួបពិភាក្សាការងារជាមួយមន្រ្តីកម្ពុជាក្នុងគោលបំណងពិនិត្យកាលានុវត្តភាពក្នុងការពង្រីកកិច្ចសហប្រតិបត្តិការសំដៅជំរុញ និងទាក់ទាញវិនិយោគិនជប៉ុនឱ្យមកបណ្តាក់ទុនវិនិយោគនៅក្នុងប្រទេសកម្ពុជា។

ក្រុមហ៊ុនសាជីវកម្មរបស់ជប៉ុនដឹកនាំដោយលោក Hironori Shimojima អនុប្រធានទទួលបន្ទុកកិច្ចការអាស៊ីប៉ាស៊ីហ្វិក បានចុះមកទស្សនកិច្ចមកកាន់ប្រទេសកម្ពុជា ដើម្បីអង្កេតដោយផ្ទាល់នូវវឌ្ឍនភាពថ្មីនៃការអភិវឌ្ឍសង្គម-សេដ្ឋកិច្ចកម្ពុជា។

ក្នុងជំនួបពិភាក្សាជាមួយមន្រ្តីតំណាងសាជីវកម្មរបស់ក្រុមហ៊ុនជប៉ុន លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានរំលឹកឡើងវិញអំពីបេសកកម្មទាក់ទាញ និងជំរុញវិនិយោគដែលដឹកនាំដោយ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាទៅកាន់ទីក្រុងតូក្យូ កាលពីថ្ងៃទី៧-៩ ខែឧសភា ឆ្នាំ២០២៤ ដោយបានរៀបចំសិក្ខាសាលា, ទទួលជួបពិភាក្សាការងារ និងរៀបចំជំនួបផ្គូផ្គងធុរកិច្ចជាមួយសហគមន៍ធុរកិច្ចជប៉ុន។

ក្នុងឱកាសនោះ លោក សួន សុផល ក៏បានលើកឡើងអំពីវិស័យគន្លឹះមួយចំនួនដែលកម្ពុជាបានកំពុងស្រូបទាញវិនិយោគិនឱ្យមកឆក់ឱកាសបណ្តាក់ទុនវិនិយោគដែលវិស័យទាំងនោះរួមមានកសិ-ឧស្សាហកម្ម, ភស្តុភារកម្ម, កម្មន្តសាលធន់ស្រាល, សុខាភិបាល និងថាមពលកកើតឡើងវិញជាដើម។ លោកបានបង្ហាញសុទិដ្ឋិនិយមថាក្រុមការងារតុជប៉ុន (Japan Desk) នៃក្រុមប្រឹក្សាអភិវឌ្ឍន៍កម្ពុជា នឹងអាចសហការជាមួយ Sumitomo Mitsui Banking Corporation ដើម្បីរួមគ្នាបំពេញបេសកកម្មជំរុញ និងទាក់ទាញវិនិយោគិនជប៉ុនឱ្យមកបណ្តាក់ទុនវិនិយោគនៅកម្ពុជាក្នុងឆ្នាំ២០២៥ខាងមុខ។

ជាការឆ្លើយតប លោក Hironori Shimojima បានកត់សម្គាល់នូវសកម្មភាពដ៏សកម្មរបស់ក្រុមប្រឹក្សាអភិវឌ្ឍន៍កម្ពុជា ក្នុងការដើរគោះទ្វារវិនិយោគិនឱ្យមកសិក្សាសមិទ្ធិលទ្ធភាព និងដាក់ទុនវិនិយោគនៅកម្ពុជា ហើយលោកមានជំនឿចិត្តថាក្រុមប្រឹក្សាអភិវឌ្ឍន៍កម្ពុជានឹងវិលត្រលប់ទៅកាន់ប្រទេសជប៉ុននាពេលវេលាសមស្របខាងមុខ ដើម្បីបន្តបេសកកម្មទាក់ទាញ និងជំរុញវិនិយោគរបស់ខ្លួន៕

The post មន្រ្តីក្រុមហ៊ុនជប៉ុន Sumitomo ចុះមកទស្សនកិច្ច ជំរុញការវិនិយោគក្រុមហ៊ុនជប៉ុននៅកម្ពុជា appeared first on Kampuchea Thmey Daily.

១០ខែ ដើមឆ្នាំ២០២៤ កម្ពុជាអនុម័តគម្រោងវិនិយោគ កើនទុនដល់ប្រមាណ ៥,៥ ប៊ីលានដុល្លារ

Dy Bunnara — Wed, 20 Nov 2024 02:54:22 +0000

ក្នុងរយៈពេល ១០ខែ ដើមឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន ៣៤៦ គម្រោង ក្នុងទុនវិនិយោគសរុបប្រមាណ ៥,៥ ប៊ីលានដុល្លារអាម៉េរិក ដែលមានការកើនឡើង ៣៨% បើធៀបនឹងរយៈពេលដូចគ្នាក្នុងឆ្នាំ២០២៣។

ខណៈដែលវិនិយោគិនជប៉ុនកាន់តែមានការចាប់អារម្មណ៍ទៅលើបរិយាកាសវិនិយោគនៅកម្ពុជា បើតាមក្រុមប្រឹក្សាអភិវឌ្ឋន៍កម្ពុជាក្នុងរយៈពេល ១០ខែ ដើមឆ្នាំ២០២៤ ការវិនិយោគពីប្រទេសជប៉ុនឈរនៅលំដាប់ទី៧ ដែលមានទុនវិនិយោគសរុបប្រមាណ ៤០លានដុល្លារអាម៉េរិក នៃរំហូរទុនវិនិយោគសរុបនៅកម្ពុជា។

កាលពីថ្ងៃទី ១៩ ខែវិច្ឆិកា ឆ្នាំ២០២៤ មានរៀបចំជំនួបផ្គូផ្គងធុរកិច្ចរវាងសមាគមឧកញ៉ាកម្ពុជា និងសមាគមជប៉ុន-កម្ពុជា ប្រចាំឆ្នាំ២០២៤។ ជំនួបផ្គូផ្គងធុរកិច្ចនាឱកាសនេះ រៀបចំឡើងក្នុងគោលបំណងដើម្បីផ្សារភ្ជាប់ទំនាក់ទំនងរវាងសមាគម និងវិនិយោគិនរវាងប្រទេសទាំងពីរ ស្របតាមចក្ខុវិស័យរបស់លោក ស៊ុន ចាន់ថុល ក្នុងបេសកកម្មគោះទ្វារវិនិយោគនៅឯប្រទេសជប៉ុន កាលពីខែឧសភា ឆ្នាំ២០២៤ កន្លងទៅ។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ការរៀបចំជំនួបផ្គូផ្គងធុរកិច្ចនេះ បង្ហាញឱ្យឃើញពីចំណាប់អារម្មណ៍របស់វិនិយោគិនជប៉ុនទៅលើបរិយាកាសវិនិយោគនៅកម្ពុជា។ ជាក់ស្ដែងកាលពីថ្ងៃទី១ ខែវិច្ឆិកា ឆ្នាំ២០២៤ កន្លងទៅ អង្គការពាណិជ្ជកម្មក្រៅប្រទេសជប៉ុន (JETRO) ប្រចាំកម្ពុជា និងប្រចាំប្រទេសថៃ ធ្លាប់បានសហការរៀបចំសិក្ខាសាលាដើម្បីជំរុញទាក់ទាញការវិនិយោគពីក្រុមហ៊ុនជប៉ុនតាមរយៈយន្តការប្រទេសបូក (Thailand +1)។

ថ្លែងនៅក្នុងឱកាសនេះ លោកឧបនាយករដ្ឋមន្រ្តី ក៏បានលើកឡើងពីការបើកការិយាល័យរបស់សមាគមជប៉ុន-កម្ពុជា នៅរាជធានីភ្នំពេញ កាលពីខែមេសា ឆ្នាំ២០២៤ ដែលជាសក្ខីភាពនៃទំនាក់ទំនងកាន់តែស៊ីជម្រៅរវាងកម្ពុជា និងជប៉ុនក្នុងស្មារតីជឿជាក់មកលើរាជរដ្ឋាភិបាលកម្ពុជា។

លោក ស៊ុន ចាន់ថុល បានបញ្ជាក់បន្ថែមថា នាពេលឆាប់ៗខាងមុខនេះ ក្រុមប្រឹក្សាអភិវឌ្ឍន៍កម្ពុជានឹងដាក់ឱ្យប្រើប្រាស់ជាផ្លូវការនូវប្រព័ន្ធគ្រប់គ្រងគម្រោងវិនិយោគកម្ពុជា (CDC Investment Project Management) ឬ (ប្រព័ន្ធ cdcIPM) ដំណាក់កាលទី១ ដែលជាថ្នាលបច្ចេកវិទ្យាសម្រាប់អនុញ្ញាតឱ្យវិនិយោគិនអាចដាក់ពាក្យស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) តាមប្រព័ន្ធអនឡាញបានពីគ្រប់ទីកន្លែង គ្រប់ពេលវេលា។ ការដាក់ពាក្យ និងការទទួលបានវិញ្ញាបនបត្រចុះបញ្ជីគម្រោងគឺសុទ្ធសឹងតែធ្វើឡើងជាទម្រង់ឌីជីថល។ ពិសេសជាងនេះនៅពេលឆាប់ៗ ប្រព័ន្ធនេះក៏នឹងឈានទៅដល់ការតភ្ជាប់ជាមួយក្រសួង-ស្ថាប័នពាក់ព័ន្ធផងដែរ៕

The post ១០ខែ ដើមឆ្នាំ២០២៤ កម្ពុជាអនុម័តគម្រោងវិនិយោគ កើនទុនដល់ប្រមាណ ៥,៥ ប៊ីលានដុល្លារ appeared first on Kampuchea Thmey Daily.

សហគ្រាសជប៉ុន Archives - Kampuchea Thmey Daily

ត្រី​ទីឡាបព្យា​ខ្មែរ ជប៉ុន​ច្នៃ​ជា​ម្ហូប​ញាំ​ឆៅ​ជំនួស​ត្រី​សាល់ម៉ុន​

ក្រុមហ៊ុន​ជប៉ុន ​ចង់​វិនិយោគ​​កែច្នៃ​សំបកគ្រាប់ស្វាយ​ចន្ទី​ទៅជាទឹកខ្មេះ កាកសំណល់ចំណីសត្វ

ឃ្លាំងស្តុកអីវ៉ាន់ស្តង់ដាជប៉ុន មាន​វត្តមាន​​ក្នុងខេត្តព្រះសីហនុ បោះទុន​វិនិយោគ​ជាង ១០ លានដុល្លារ

មន្រ្តី​ក្រុមហ៊ុន​ជប៉ុន Sumitomo ចុះ​មក​ទស្សនកិច្ច​ ​ជំរុញ​ការ​វិនិយោគ​​​​ក្រុមហ៊ុន​ជប៉ុននៅ​​កម្ពុជា

១០ខែ ដើមឆ្នាំ២០២៤ កម្ពុជា​អនុម័ត​គម្រោង​​វិនិយោគ​ កើន​ទុន​ដល់​​​ប្រមាណ ៥,៥ ប៊ីលានដុល្លារ

ត្រីទីឡាបព្យាខ្មែរ ជប៉ុនច្នៃជាម្ហូបញាំឆៅជំនួសត្រីសាល់ម៉ុន

ក្រុមហ៊ុនជប៉ុន ចង់វិនិយោគកែច្នៃសំបកគ្រាប់ស្វាយចន្ទីទៅជាទឹកខ្មេះ កាកសំណល់ចំណីសត្វ

ឃ្លាំងស្តុកអីវ៉ាន់ស្តង់ដាជប៉ុន មានវត្តមានក្នុងខេត្តព្រះសីហនុ បោះទុនវិនិយោគជាង ១០ លានដុល្លារ

មន្រ្តីក្រុមហ៊ុនជប៉ុន Sumitomo ចុះមកទស្សនកិច្ច ជំរុញការវិនិយោគក្រុមហ៊ុនជប៉ុននៅកម្ពុជា

១០ខែ ដើមឆ្នាំ២០២៤ កម្ពុជាអនុម័តគម្រោងវិនិយោគ កើនទុនដល់ប្រមាណ ៥,៥ ប៊ីលានដុល្លារ