ព័ត៌មានជាតិ

ក្រៅពីក្រុមហ៊ុនដំឡើងរថយន្ត កម្ពុជាមានក្រុមហ៊ុនផលិតគ្រឿងបន្លាស់រថយន្ត កំពុងពង្រីកខ្សែសង្វាក់ផលិតកម្មនៅកម្ពុជា

បានផុស

៦ ខែ មុន

នៅ

ថ្ងៃសុក្រ ៩ មករា ២០២៦

ដោយ

ក្រៅពីវត្តមានក្រុមហ៊ុនដំឡើងរថយន្តម៉ាកល្បីៗរបស់ពិភពលោក កម្ពុជាបានទាក់ទាញក្រុមហ៊ុនផលិតគ្រឿងបន្លាស់រថយន្ត ដើម្បីផលិតគ្រឿងបន្លាស់រថយន្តផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។

ថ្លែងនៅក្នុងពិធីបើកសន្និបាតបូកសរុបលទ្ធផលការងារពាណិជ្ជកម្មឆ្នាំ ២០២៥ និងលើកទិសដៅការងារពាណិជ្ជកម្មឆ្នាំ២០២៦ របស់ក្រសួងពាណិជ្ជកម្មកាលពីម្សិលមិញនេះ លោកស្រី ចម និម្មល រដ្ឋមន្រ្តីក្រសួងពាណិជ្ជកម្មបានឲ្យដឹងថា តាមរយៈយន្តការជំរុញការប្រើប្រាស់ផលិតផលខ្មែរក្រោមស្លាកយីហោ Made in Cambodia ក្រុមហ៊ុនផលិតគ្រឿងបន្លាស់រថយន្តធំៗរបស់ពិភពលោក កំពុងពង្រីកខ្សែសង្វាក់ផលិតកម្មនៅក្នុងប្រទេសកម្ពុជា ក្នុងនោះមានដូចជាក្រុមហ៊ុន Denzo ក្រុមហ៊ុន Sumitomo និង Honda។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ចម និម្មល បានបន្ថែមថា កម្ពុជាកំពុងធ្វើពិពិធកម្មទំនិញឲ្យសំបូរបែប ដោយអនុវត្តយន្តការការជំរុញប្រើប្រាស់ផលិតផលខ្មែរ និងលើកស្ទួយទំនិញដែលផលិតនិងដំឡើងនៅកម្ពុជា។

បើតាមលោកស្រីរដ្ឋមន្ត្រី ក្រៅពីរោងចក្រផលិតគ្រឿងបន្លាស់រថយន្ត កម្ពុជាមានក្រុមហ៊ុនដំឡើងរថយន្តក្នុងស្រុកមានដូចជាក្រុមហ៊ុន Ford, Hyundai, Toyota, KIA, BYD, Isuzu, SsangYong និង GTV Motor រួមទាំងក្រុមហ៊ុនផលិតសំបកកង់រថយន្តដែលផលិតនៅកម្ពុជា។

ក្រុមហ៊ុន Denso Cambodia ជាក្រុមហ៊ុនផលិតគ្រឿងបន្លាស់រថយន្តរបស់ជប៉ុន ដែលកំពុងវិនិយោគរោងចក្រនៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ។ Denso Cambodia ជាក្រុមហ៊ុនបុត្រសម្ព័ន្ធរបស់ក្រុមហ៊ុន Denso Corporation មានមូលដ្ឋាននៅជប៉ុន ដែលជាក្រុមហ៊ុនផ្គត់ផ្គង់ប្រព័ន្ធបច្ចេកវិទ្យាទំនើប និងគ្រឿងរថយន្តសកល មានក្រុមហ៊ុនបុត្រសម្ព័ន្ធជាង ២០០ នៅលើពិភពលោក និងក្រុមហ៊ុនដៃគូ ៣៥ ប្រទេស។

ក្រុមហ៊ុន Denso បានវិយោគបង្កើតរោងចក្រផលិតគ្រឿងបន្លាស់រថយន្ដនៅក្នុងប្រទេសកម្ពុជាតាំងពីឆ្នាំ២០១៣ ដែលមានមុខសញ្ញាផលិតដូចជា៖

១)- ម៉ាញ៉េតូ (Magneto)
២)- ឧបករណ៍សម្រាប់បន្ថយកំដៅក្នុងម៉ាស៊ីនឡាន (Tube/Inner Fin for Inter Cooler)
៣)-ឧបករណ៍វាស់កម្រិតទឹកនៅក្នុងម៉ាស៊ីនឡានម៉ាស៊ូត (Level Switch for Diesel filter)
៤)- ឧបករណ៍បញ្ចុះកំដៅប្រេងនៅក្នុងម៉ាស៊ីន (SUS Oil Cooler)
៥)- កញ្ច្រែងទឹកក្តៅ (ចាប់ពីឆ្នាំ២០២២) (Radiator)

ដោយឡែក ក្រុមហ៊ុន Sumitomo Corporation គឺជាក្រុមហ៊ុនជប៉ុនដែលវិនិយោគនៅជាង ៦៥ ប្រទេស ជាមួយបុគ្គលិកសរុបប្រមាណ ៧៩ ពាន់នាក់ ដែលវិនិយោគលើវិស័យផលិតផលដែក ប្រព័ន្ធដឹកជញ្ជូននិងសំណង់ ហេដ្ឋារចនាសម្ព័ន្ធ ប្រព័ន្ធផ្សព្វផ្សាយ និងឌីជីថល អចលនទ្រព្យ និងធនធានរ៉ែ ថាមពល គីមី និងអេឡិចត្រូនិចជាដើម។

គ្រៀងបន្លាស់រថយន្តជាមុខទំនិញនាំចេញដ៏សំខាន់មួយរបស់ប្រទេសកម្ពុជា។ របាយការណ៍កត់ត្រាដោយក្រសួងពាណិជ្ជកម្មបានបង្ហាញថា ក្នុងឆ្នាំ ២០២៥ កម្ពុជាបាននាំចេញមុខទំនិញសំខាន់ៗទៅក្រៅប្រទេសមានទំហំសាច់ប្រាក់ ៣១ ពាន់លានដុល្លារ។

ថ្លែងនៅក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ ២០២៥ និងលើកទិសដៅអនុវត្តន៍ការងារពាណិជ្ជកម្មឆ្នាំ២០២៦ នៅក្រសួងពាណិជ្ជកម្ម លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានគូសបញ្ជាក់ថា ឆ្នាំ២០២៥ កម្ពុជាបាននាំចេញទំនិញសំខាន់ៗសម្រេចបានទំហំទឹកប្រាក់ចំនួន ៣១.២៨ ពាន់លានដុល្លារអាម៉េរិកកើនឡើង ១៦.៩៥% និងការនាំចូលសម្រេចបានទឹកប្រាក់ ៣៣.៩៦ ពាន់លានដុល្លារអាម៉េរិក កើនឡើង ១៨.៣២% ។

បើតាមមន្រ្តីអ្នកនាំពាក្យក្រសួងពាណិជ្ជកម្ម ទំនិញនាំចេញសំខាន់ៗរបស់កម្ពុជារួមមាន៖ ១) សម្លៀកបំពាក់ ២) វាយនភ័ណ្ឌ ៣)ស្បែកជើង ៤) សម្ភារៈធ្វើដំណើរនិង កាបូប ៥) សំបកកង់រថយន្ត ៦) ស្វាយចន្ទី ៧) អង្ករ ៨) ដំឡូងមី និង៩)គ្រឿងបង្គុំអេឡិចត្រូនិក និងគ្រឿងបន្លាស់រថយន្ត៕