សហគ្រាសបារាំង Archives - Kampuchea Thmey Daily

តើដំណើរទស្សនកិច្ចរដ្ឋមន្រ្តីបារាំងមកកម្ពុជា សម្រេចបានលទ្ធផលអ្វីខ្លះ?

Dy Bunnara — Mon, 13 Jul 2026 03:43:12 +0000

ក្នុងដំណើរទស្សនកិច្ចរបស់រដ្ឋមន្រ្តីបារាំង ទទួលបន្ទុកពាណិជ្ជកម្ម និងទាក់ទាញវិនិយោគ មានការជួបពិភាក្សាទ្វេភាគីជាមួយថ្នាក់ដឹកនាំ និងមន្រ្តីជាន់ខ្ពស់កម្ពុជាជាច្រើនរូប ដើម្បីពង្រឹងកិច្ចសហការ និងជំរុញការវិនិយោគលើវិស័យអាទិភាពមួយចំនួន។

ក្នុងសន្និសីទសារព័ត៌មានកាលពីរសៀលថ្ងៃទី ១១ ខែកក្កដា ឆ្នាំ ២០២៦ នៅស្ថានទូតបារាំងប្រចាំនៅរាជធានីភ្នំពេញ លោក នីកូឡា ហ្វ័ររីស្យេ រដ្ឋមន្ត្រីប្រតិភូទទួលបន្ទុកពាណិជ្ជកម្មបរទេស និងការទាក់ទាញវិនិយោគរបស់ប្រទេសបារាំង បានបង្ហាញពីលទ្ធផលក្នុងដំណើរទស្សនកិច្ចរបស់លោកនៅកម្ពុជា រួមទាំងឆ្លើយតបសំនួររបស់អ្នកសារព័ត៌មានជុំវិញការពង្រឹងកិច្ចសហការ និងការជំរុញការវិនិយោគលើវិស័យយុទ្ធសាស្រ្តរបស់ក្រុមហ៊ុនបារាំងនៅកម្ពុជា។

នៅក្នុងសន្និសីទ លោករដ្ឋមន្រ្តីបានលើកពីការវិវត្តនៃទំនាក់ទំនងរវាងប្រទេសបារាំងនិងកម្ពុជា បន្ទាប់ពីមានជំនួបកំពូលជាច្រើនលើករវាងថ្នាក់ដឹកនាំនៃប្រទេសទាំងពីរ។ ជំនួបចុងក្រោយបង្អស់គឺរវាងប្រធានាធិបតីបារាំង លោក អេម៉ានូអែល ម៉ាក្រុង ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី ៨ ខែវិច្ឆិកា នៅទីក្រុងប៉ារីស និងកាលពីខែមករា ឆ្នាំ២០២៤ និងខែ មិថុនា ឆ្នាំ២០២៥ នៅក្នុងក្របខ័ណ្ឌក្រៅផ្លូវការនៃកិច្ចប្រជុំអង្គការសហប្រជាជាតិស្តីពីមហាសមុទ្រនៅទីក្រុងប៉ារីស។

ដោយឡែក ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ក៏បានជួបប្រធានាធិបតីបារាំងចំនួនពីរលើកផងដែរ គឺនៅក្នុងខែ វិច្ឆិកា ឆ្នាំ២០២៣ និងខែតុលា ឆ្នាំ២០២៤។

ជាមួយគ្នានេះ លោកបានលើកពីសារៈសំខាន់នៃដំណើរទស្សនកិច្ចរបស់ប្រធានាធិបតីបារាំងក្នុងកិច្ចប្រជុំហ្រ្វង់កូហ្វូនីនៅរាជធានីភ្នំពេញនៅខែវិច្ឆិកាខាងមុខនេះ គឺធ្វើឡើងបន្ទាប់ពីរយៈពេល ៦០ ឆ្នាំ នៃដំណើរទស្សនកិច្ចរបស់លោកសេនាប្រមុខ ហ្សាល ដឺហ្គោល មកកាន់ព្រះរាជាណាចក្រកម្ពុជា ដែលនឹងក្លាយជាព្រឹត្តិការណ៍ប្រវត្តិសាស្ត្រដ៏សំខាន់មួយ រួមចំណែកក្នុងការពង្រឹងកិច្ចសហប្រតិបត្តិការក្នុងភាពជាដៃគូរវាងប្រទេសទាំងពីរ។

ប្រទេសកម្ពុជាបានឆ្លងកាត់ការផ្លាស់ប្តូរជាច្រើនក្នុងរយៈពេល ៣០ ឆ្នាំចុងក្រោយនេះ ហើយទស្សនកិច្ចនេះនឹងជួយពង្រឹងទំនាក់ទំនងបន្ថែមទៀត។

លោកបានលើកឡើងពីគោលបំណងរបស់ថ្នាក់ដឹកនាំប្រទេសទាំងពីរ ដែលចង់ឃើញការវិនិយោគរបស់ក្រុមហ៊ុនបារាំងនៅកម្ពុជាឲ្យកាន់តែច្រើន និងជំរុញគម្រោងយុទ្ធសាស្ត្រមួយចំនួនឲ្យលេចជារូបរាង។

ក្នុងដំណើរទស្សនកិច្ចមកកម្ពុជា លោករដ្ឋមន្រ្តីបានបញ្ជាក់ថា លោកបានជួបពិភាក្សាការងារជាមួយមន្ត្រីជាន់ខ្ពស់កម្ពុជាមួយចំនួនរួមមាន លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម លោក កែវ រតនៈ រដ្ឋមន្ត្រីក្រសួងរ៉ែ និងថាមពល ព្រមទាំងថ្នាក់ដឹកនាំមួយចំនួនទៀត ដើម្បីជំរុញឲ្យគម្រោងយុទ្ធសាស្រ្តមួយចំនួនសម្រេចចេញជារូបរាងដូចជាផ្នែកថាមពល និងសុខាភិបាល ដែលប្រទេសបារាំងមានជំនាញ និងគុណតម្លៃខ្ពស់។

ជុំវីញដំណើរទស្សនកិច្ចរបស់លោកនៅកម្ពុជា រដ្ឋមន្រ្តីទទួលបន្ទុកពាណិជ្ជកម្ម និងទាក់ទាញវិនិយោគរបស់បារាំងរូបនេះ ក៏បានជួបក្រុមហ៊ុនបារាំងដែលកំពុងធ្វើអាជីវកម្មនៅកម្ពុជា។

លោកថា មានបណ្តាញក្រុមហ៊ុនបារាំងជាង ២០០ ក្រុមហ៊ុន កំពុងមានវត្តមាននៅកម្ពុជា ក្នុងនោះមានក្រុមហ៊ុនបុត្រសម្ព័ន្ធបារាំងជាង ៣៥ ក្រុមហ៊ុន ព្រមទាំងសហគ្រិន និងថ្នាក់ដឹកនាំជាច្រើនទៀត ដែលសកម្មវិនិយោគលើវិស័យដឹកជញ្ជូន ថាមពល ហិរញ្ញវត្ថុ សុខាភិបាល ទេសចរណ៍ សណ្ឋាគារ និងសំណង់។

ទំហំពាណិជ្ជកម្មទ្វេរភាគីរវាងបារាំងនិងកម្ពុជា នៅក្នុងឆ្នាំ ២០២៥ កើនដល់ដល់ ១.៧៥ ពាន់លានអឺរ៉ូ មានកំណើនឡើង ១៧.៥% ធៀបនឹងឆ្នាំ២០២៤។ ទំហំការវិនិយោគផ្ទាល់ពីប្រទេសបារាំងបានឈានដល់ ៦៩២ លានអឺរ៉ូ នៅចុងឆ្នាំ២០២៤ កើនឡើង ២៥% ធៀបនឹងឆ្នាំ២០២៣។

កម្ពុជានាំចូលមកបារាំងនូវផលិតផលវាយនភណ្ឌ ស្រូវ និងកង់ ខណៈកម្ពុជាជាប្រទេសផលិតកង់ដ៏ធំ រីឯបារាំងនាំចេញទៅកម្ពុជានូវយន្តហោះ ដូចជាយន្តហោះ ATR ផលិតផលកសិ-ឧស្សាហកម្ម និងផលិតផលឱសថ។

ក្នុងដំណើរទស្សនកិច្ចរយៈពេល ២ ថ្ងៃ នៅកម្ពុជា លោក នីកូឡា ហ្វ័ររីស្យេ បានចុះទៅពិនិត្យមើលវឌ្ឍនភាពនៃគម្រោងហេដ្ឋារចនាសម្ព័ន្ធសំខាន់ៗ និងបានទៅទស្សនាព្រលានយន្តហោះថ្មីដ៏អស្ចារ្យ និងប្រណីតរបស់កម្ពុជាដែលមានក្រុមហ៊ុនបារាំងធំៗបានដើរតួដ៏សំខាន់មានដូចជា ក្រុមហ៊ុន VINCI Airports, Lagardère Travel Retail, Newrest និងក្រុមហ៊ុនផ្សេងទៀត ខណៈដែលព្រលានយន្តហោះថ្មីនេះបង្ហាញពីមុខមាត់ថ្មីនៅក្នុងដំណើរពង្រឹងវិស័យសេដ្ឋកិច្ចរបស់ប្រទេសកម្ពុជា។

លោកលើកឡើងពីការជំរុញសហគ្រាសខ្នាតតូច និងមធ្យមរបស់កម្ពុជាពង្រីកសក្តានុពលចូលទីផ្សារបារាំង។ ជាក់ស្តែង នៅក្នុងពិព័រណ៍អាហារនៅទីក្រុងប៉ារីស លោកជំទាវ ចម និម្មល បានចូលរួមពិព័រណ៍អាហារនៅទីក្រុងប៉ារីសដោយជោគជ័យ ហើយចង់រៀបចំពិព័រណ៍ស្រដៀងគ្នានេះនៅកម្ពុជា។

ក្រុមហ៊ុនបារាំងក៏បានចុះហត្ថលេខាជាមួយក្រុមហ៊ុនកម្ពុជា បង្កើតទីផ្សារលក់ដុំផលិតផលស្រស់ ដែលជួយដល់វិស័យផលិតកម្ម កសិ-ឧស្សាហកម្ម និងការនាំចេញរបស់កម្ពុជាឱ្យស្របតាមស្តង់ដារអន្តរជាតិ។

បន្ថែមពីនេះ ក៏មានគម្រោងកិច្ចសហការលើការបង្កើតមជ្ឈមណ្ឌលមន្ទីរពេទ្យសាកលវិទ្យាល័យ ព្រមទាំងគម្រោងអភិវឌ្ឍថាមពល និងការគ្រប់គ្រងសំណល់នៅរាជធានីភ្នំពេញ។

លោក នីកូឡា ហ្វ័ររីស្យេ បានបញ្ជាក់ថា បន្ទាប់ពីដំណើរទស្សនកិច្ចរបស់ប្រធានាធិបតីបារាំងក្នុងកិច្ចប្រជុំហ្រ្វង់កូហ្វូនីនៅខែវិច្ឆិកាខាងមុខនេះ សភាពាណិជ្ជកម្ម និងឧស្សាហកម្មបារាំង-កម្ពុជា រួមនឹងក្រុមប្រឹក្សាពាណិជ្ជកម្មក្រៅប្រទេសរបស់បារាំង ក៏នឹងរៀបចំឲ្យមាន «វេទិកាធុរកិច្ចបារាំង-កម្ពុជា លើកទី ៣» ដោយមានការគាំទ្រពីក្រសួងពាណិជ្ជកម្មកម្ពុជា។ ព្រឹត្តិការណ៍នេះរំពឹងថា នឹងមានអ្នកចូលរួមប្រហែល ៤០០ នាក់ ដែលជាឱកាសដ៏ល្អសម្រាប់ស្វែងយល់ពីសក្តានុពលសេដ្ឋកិច្ចនៅកម្ពុជា។

ទស្សនវិស័យនាពេលអនាគត លោកមើលឃើញថា កម្ពុជានិងបារាំងអាចចែករំលែកគុណតម្លៃ និងវប្បធម៌រួមគ្នា ស្របស្ថានភាពពិភពលោកបច្ចុប្បន្នកំពុងជួបប្រទះនឹងជម្លោះនានាដូចជានៅអ៊ុយក្រែន និងការលំបាកក្នុងពាណិជ្ជកម្មអន្តរជាតិ ការពង្រឹងកិច្ចសហប្រតិបត្តិការទ្វេភាគីរយៈពេលវែងដោយគោរពច្បាប់ពាណិជ្ជកម្មរួមគ្នាគឺពិតជាមានសារៈសំខាន់ខ្លាំង។

លោកអះអាងថា ក្នុងដំណើរទស្សនកិច្ចរបស់ប្រធានាធិបតី អេម៉ានូអែល ម៉ាក្រុង នឹងជួយជំរុញនិងពន្លឿនកិច្ចសហប្រតិបត្តិការសេដ្ឋកិច្ចបែបឈ្នះ-ឈ្នះនេះឱ្យកាន់តែលឿន និងមានប្រសិទ្ធភាពទៅមុខ៕

The post តើដំណើរទស្សនកិច្ចរដ្ឋមន្រ្តីបារាំងមកកម្ពុជា សម្រេចបានលទ្ធផលអ្វីខ្លះ? appeared first on Kampuchea Thmey Daily.

បណ្តាញក្រុមហ៊ុនបារាំងទាំងតូចទាំងធំប្រមាណ ២០០ កំពុងមានវត្តមានធ្វើអាជីវកម្មនៅកម្ពុជា

Dy Bunnara — Sat, 11 Jul 2026 04:37:29 +0000

បណ្តាញក្រុមហ៊ុនបារាំងប្រមាណ ២០០ ក្រុមហ៊ុនកំពុងធ្វើអាជីវកម្មនៅកម្ពុជា រួមទាំងក្រុមហ៊ុនបុត្រសម្ព័ន្ធរបស់បារាំងធំៗចំនួន ៣៥ ទៀត ក៏កំពុងមានវត្តមានពង្រីកការវិនិយោគក្នុងប្រទេសកម្ពុជា។

ក្នុងសន្និសីទសារព័ត៌មានដែលធ្វើឡើងកាលពីរសៀលម្សិលមិញនេះ លោក នីកូឡា ហ្វ័ររីស្យេ រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេសបារាំង ទទួលបន្ទុកពាណិជ្ជកម្ម និងទាក់ទាញវិនិយោគបានលើកឡើងពីការពង្រឹងភាពជាដៃគូយុទ្ធសាស្ត្រ និងសេដ្ឋកិច្ចរវាងប្រទេសបារាំង និងកម្ពុជា។

លោក នីកូឡា ហ្វ័ររីស្យេ បានគូសបញ្ជាក់ថា ក្រុមហ៊ុនបារាំងបានដើរតួនាទីយ៉ាងសំខាន់ក្នុងវិស័យជាច្រើនដូចជា ដឹកជញ្ជូន ថាមពល ហិរញ្ញវត្ថុ សុខាភិបាល ទេសចរណ៍ សណ្ឋាគារ និងសំណង់។

ពាក់ព័ន្ធទំនាក់ទំនងពាណិជ្ជកម្ម និងសេដ្ឋកិច្ចទ្វេភាគីរវាងប្រទេសបារាំងនិងកម្ពុជា លោក នីកូឡា ហ្វ័ររីស្យេ បានលើកពីបណ្តាញក្រុមហ៊ុនបារាំងជាង ២០០ ដែលកំពុងវិនិយោគនៅកម្ពុជា ក្នុងនោះក៏មានក្រុមហ៊ុនបុត្រសម្ព័ន្ធបារាំង ៣៥ ក្រុមហ៊ុន និងសហគ្រិនបារាំងផ្សេងទៀត។

លោកក៏បានរំលេចវត្តមានរបស់ក្រុមហ៊ុនបារាំង Vinci ដែលបានដើរតួនាទីយ៉ាងសំខាន់ ក្នុងការសាងសង់ហេដ្ឋារចនាសម្ព័ន្ធនៃព្រលានយន្តហោះអន្តរជាតិតេជោថ្មីដ៏ប្រណីតផងដែរ។

ទំហំពាណិជ្ជកម្មរវាងប្រទេសបារាំង និងកម្ពុជាបានហក់ឡើងដល់ទៅ ១,៧៥ ពាន់លានអឺរ៉ូនៅឆ្នាំ ២០២៥ កើនឡើង ១៧,៥% ធៀបនឹងឆ្នាំ ២០២៤។

ការវិនិយោគផ្ទាល់ (FDI) ពីប្រទេសបារាំងបានឈានដល់ ៦៩២ លានអឺរ៉ូ នៅចុងឆ្នាំ ២០២៤ កើនឡើង ២៥% ធៀបនឹងឆ្នាំ ២០២៣។

បារាំងនាំចូលផលិតផលជាច្រើនពីកម្ពុជារួមមាន ស្រូវ និងកង់។ រីឯបារាំងនាំចេញទៅកម្ពុជាវិញនូវ យន្តហោះ ផលិតផលកសិឧស្សាហកម្ម និងផលិតផលឱសថ។

ខណៈកម្ពុជាត្រៀមទទួលរៀបចំកិច្ចប្រជុំកំពូលអង្គការហ្រ្វង់កូហ្វូនី ដែលនឹងមានដំណើរទស្សនកិច្ចកម្រិតខ្ពស់ជាប្រវត្តិសាស្ត្រនៃប្រធានាធិបតីបារាំងមកកម្ពុជា លោក នីកូឡា ហ្វ័ររីស្យេ គូសបញ្ជាក់ថា ដំណើរទស្សនកិច្ចនេះធ្វើឡើងបន្ទាប់ពីមានជំនួបជាច្រើនលើករវាងថ្នាក់ដឹកនាំប្រទេសទាំងពីរ ជាពិសេសរវាងប្រធានាធិបតីបារាំង លោក អេម៉ានូអែល ម៉ាក្រុង និងសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាជាបន្តបន្ទាប់នៅទីក្រុងប៉ារីស និងនៅក្នុងក្របខណ្ឌក្រៅផ្លូវការនៃការប្រជុំអង្គការសហប្រជាជាតិស្ដីពីមហាសមុទ្រ រួមទាំងជំនួបជាមួយព្រះមហាក្សត្រព្រះបាទសម្ដេចព្រះបរមនាថ នរោត្តម សីហមុនី ចំនួនពីរលើកកាលពីឆ្នាំ ២០២៣ និងឆ្នាំ ២០២៤។

បើតាមលោករដ្ឋមន្រ្តី ដំណើរទស្សនកិច្ចរបស់ប្រធានាធិបតីបារាំងនៅខែវិច្ឆិកាខាងមុខនេះ គឺជាព្រឹត្តិការណ៍ប្រវត្តិសាស្ត្រដ៏សំខាន់មួយ បន្ទាប់ពីដំណើរទស្សនកិច្ចរបស់សេនាប្រមុខ ហ្សាល ដឺហ្គោលកាលពី ៦០ ឆ្នាំមុន ដែលនឹងចូលរួមចំណែកពង្រឹងកិច្ចសហការជាដៃគូរវាងប្រទេសទាំងពីរ៕

The post បណ្តាញក្រុមហ៊ុនបារាំងទាំងតូចទាំងធំប្រមាណ ២០០ កំពុងមានវត្តមានធ្វើអាជីវកម្មនៅកម្ពុជា appeared first on Kampuchea Thmey Daily.

សហគ្រិនមកពីបារាំង ជ្រើសរើសព្រលានយន្តហោះតេជោ បើកអាជីវកម្មជំនួញដំបូងនៅកម្ពុជា

Dy Bunnara — Thu, 02 Oct 2025 02:53:06 +0000

សហគ្រិនបារាំង បាននាំផលិតផលយីហោល្បីៗរបស់ពិភពលោក ដោយជ្រើសរើសវិនិយោគបោះទីតាំងដំណើរការអាជីវកម្មនៅអាកាសយានដ្ឋានអន្តរជាតិតេជោ។

វត្តមានរបស់ក្រុមហ៊ុនបារាំងនេះ ក្រោយអាកាសយានដ្ឋានអន្តរជាតិតេជោតម្លៃប្រមាណ ២ ០០០ លានដុល្លារ បានបើកឲ្យដំណើរការបណ្ដោះអាសន្នកាលពីថ្ងៃទី ០៩ ខែកញ្ញា ឆ្នាំ ២០២៥។

បុគ្គលិកផ្នែកលក់នៅហាង Phnom Penh Eye Love Sunglasses នៅច្រកស្ថានីយអ្នកដំណើរនៅជាន់ទីពីរក្នុងអាកាសយានដ្ឋានអន្តរជាតិតេជោបានប្រាប់ថា ហាងនេះដំណើរការដោយមានអ្នកគ្រប់គ្រង (CEO) ជាជនជាតិបារាំង ដែលមានហាងលក់វ៉ែនតា រួមទាំងហាងលក់ខោអាវសុទ្ធតែជាយីហោល្បីៗពីអន្តរជាតិ។

ការបើកអាជីវកម្មដោយជ្រើសរើសអាកាសយានដ្ឋានអន្តរជាតិតេជោ បុគ្គលិករូបនេះអះអាងថា ដោយសារមើលឃើញពីសក្ដានុពលនៃព្រលានយន្តហោះថ្មីរបស់កម្ពុជាត្រូវបានអភិវឌ្ឍយ៉ាងទំនើប ដែលរំពឹងនឹងស្រូបទាញបានកំណើនភ្ញៀវទេសចរ និងអ្នកដំណើរនៅពេលខាងមុខ ស្របពេលដែលផលិតផលរបស់ហាងនាំចូលសុទ្ធតែជាយីហោអន្តរជាតិ មានការទទួលស្គាល់ជាទូទៅពីអ្នកដំណើរមកពីជុំវិញពិភពលោក៕

The post សហគ្រិនមកពីបារាំង ជ្រើសរើសព្រលានយន្តហោះតេជោ បើកអាជីវកម្មជំនួញដំបូងនៅកម្ពុជា appeared first on Kampuchea Thmey Daily.

ក្រុមហ៊ុនបារាំងជំនាញ ផលិតកែច្នៃគ្រឿងអលង្ការ បើកដំណើរការរោងចក្រនៅកម្ពុជា

Dy Bunnara — Mon, 11 Nov 2024 07:40:20 +0000

ក្រុមហ៊ុន Metal Jewelry Cambodia បានចាប់ផ្តើមខ្សែចង្វាក់រោងចក្រផលិតនិងបង្គុំគ្រឿងអលង្ការនៅតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ។

ក្រុមហ៊ុន Metal Jewelry Cambodia ទទួលបានការអនុញ្ញាតិវិនិយោគបង្កើតរោងចក្រផលិតនិងបង្គុំគ្រឿងអលង្ការ និងគ្រឿងលម្អរផ្សេងៗធ្វើពីលោហៈនិងប្លាស្ទិក កាលពីខែមិថុនា ឆ្នាំ២០២៣។ ម្ចាស់ភាគហ៊ុនរបស់ក្រុមហ៊ុន Metal Jewelry Cambodia គឺក្រុមហ៊ុន International Metal and Jewelry ដែលជាក្រុមហ៊ុនមួយក្នុងចំណោមក្រុមហ៊ុនផលិតគ្រឿងអលង្ការ និងគ្រឿងលម្អដែលជាម៉ាកល្បីនិងប្រណិតរបស់បារាំង (French Luxury Group)។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាបានគូសបញ្ជាក់ថា ការបណ្តាក់ទុនវិនិយោគរបស់ក្រុមហ៊ុន Metal Jewelry Cambodia នៅកម្ពុជាជាសក្ខីភាពមួយសបញ្ជាក់យ៉ាងច្បាស់ថា កម្ពុជាមានកម្លាំងពលកម្មដ៏មានសក្តានុពល និងមានបរិយាកាសធុរកិច្ចប្រកដោយភាពអំណោយផល។

«វត្តមានរបស់ក្រុមហ៊ុនមិនត្រឹមតែអាចជួយជំរុញសេដ្ឋកិច្ច និងចូលរួមបង្កើតការងារដែលមានបន្ថែមតម្លៃខ្ពស់ប៉ុណ្ណោះទេ ប៉ុន្តែថែមទាំងរួមចំណែកដល់ការអភិវឌ្ឍឧស្សាហកម្មគ្រឿងអលង្ការរបស់របស់កម្ពុជា តាមរយៈការនាំមកនូវបច្ចេកវិទ្យាខ្ពស់ និងសិល្បៈហត្ថកម្មកម្រិតស្តង់ដារពិភពលោក មកកាន់កម្ពុជាយើងផងដែរ»។ នេះបើតាមលោក ជា វុទ្ធី។

លោក ជា វុទ្ធី បានបន្តថា ការជ្រើសរើសបោះទីតាំងវិនិយោគក្នុងតំបន់សេដ្ឋកិច្ចពិសេសនៅកម្ពុជារបស់ក្រុមហ៊ុន Metal Jewelry Cambodia ជាការសម្រេចចិត្តប្រកបដោយភាពវៃឆ្លាត និងមានលក្ខណៈជាយុទ្ធសាស្ត្រ ព្រោះក្រុមហ៊ុនមិនត្រឹមតែអាចទទួលបាននូវអត្ថប្រយោជន៍ ពីកញ្ចប់លើកទឹកចិត្តដែលមានភាពទាក់ទាញប៉ុណ្ណោះទេ ប៉ុន្តែក៏នឹងទទួលបាននូវកិច្ចសម្រួលនីតិវិធីរដ្ឋបាលដែលមានភាពរហ័សងាយស្រួល, ប្រព័ន្ធបណ្តាញអគ្គិសនីដែលអាចជឿទុកចិត្តបាន, បណ្តាញដឹកជញ្ជូនដ៏មានប្រសិទ្ធភាព និងបរិក្ខារភស្តុភារកម្មទំនើបៗ ដែលអាចជួយឱ្យប្រតិបត្តិការអាជីវកម្មរបស់ក្រុមហ៊ុនសម្រេចបាននូវប្រសិទ្ធផល និងប្រាក់ចំណេញខ្ពស់ផងដែរ៕

The post ក្រុមហ៊ុនបារាំងជំនាញ ផលិតកែច្នៃគ្រឿងអលង្ការ បើកដំណើរការរោងចក្រនៅកម្ពុជា appeared first on Kampuchea Thmey Daily.

ឯកអគ្គរដ្ឋទូតបារាំង សន្យាជំរុញនាំវិនិយោគិនបារាំងមកកម្ពុជាឱ្យបានកាន់តែច្រើន

Din Thary — Wed, 10 Jul 2024 04:23:59 +0000

នៅកម្មវីធីលៀងសាយភោជ នៃវេទិកាធុរកិច្ចបារាំង-កម្ពុជា ដែលរៀបចំឡើងក្នុងវិមានរាជរដ្ឋាភិបាលនៅទីស្ដីការក្រុមប្រឹក្សាអភិវឌ្ឍន៍កម្ពុជា នាល្ងាចថ្ងៃទី០៩ ខែកក្កដា ម្សិលមិញនេះ ឯកអគ្គរដ្ឋទូតបារាំងប្រចាំកម្ពុជា ប្តេជ្ញាជំរុញនិងពង្រីកការវិនិយោគដោយផ្ទាល់ពីបារាំងនៅកម្ពុជា ឱ្យបានកាន់តែច្រើនបន្ថែមទៀត។

ចំពោះមុខ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍកម្ពុជា ក៏ដូចជារដ្ឋមន្រ្តីក្រសួងកសិកម្ម, រដ្ឋមន្ត្រីក្រសួងសុខាភិបាល ប្រធានសមាគមឧកញ៉ាកម្ពុជា និងធុរជនកម្ពុជា-បារាំងជាច្រើនរូប លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំកម្ពុជាបានលើកឡើងថា បើទោះបីជាស្ថានភាពវិនិយោគផ្ទាល់ពីបារាំងមកកម្ពុជាមានកម្រិតនៅឡើយ ប៉ុន្តែក្នុងនាមលោកផ្ទាល់ នឹងព្យាយាមបន្ថែមទៀតជំរុញការពង្រីកការវិនិយោគដោយផ្ទាល់ពីបារាំងនៅកម្ពុជាឱ្យបានច្រើន។

ក្នុងឱកាសនោះដែរ លោក ស៊ុន ចាន់ថុល បានបង្ហាញជំនឿចិត្តយ៉ាងមុតមាំថា តាមរយៈវេទិកាធុរកិច្ចនេះ នឹងរុញកំណើនវិនិយោគិនបារាំងនៅកម្ពុជាកើនឡើងមួយកម្រិតថែមទៀត។

នៅមុនបំណាច់ឆ្នាំ២០២៤ លោកឧបនាយករដ្ឋមន្ត្រី បានប្រកាសថាក៏នឹងធ្វើដំណើរទៅប្រទេសបារាំងដើម្បីគោះទ្វារទាក់ទាញវិនិយោគិនឱ្យមកវិនិយោគនៅកម្ពុជាបន្ថែមទៀតផងដែរ៕

The post ឯកអគ្គរដ្ឋទូតបារាំង សន្យាជំរុញនាំវិនិយោគិនបារាំងមកកម្ពុជាឱ្យបានកាន់តែច្រើន appeared first on Kampuchea Thmey Daily.

ឆ្នាំ ២០២៤ ត្រៀមស្វាគមន៍រោងចក្រដំឡើងរថយន្តជប៉ុន និងកែច្នៃគ្រឿងអលង្ការដំបូងរបស់បារាំងមកវិនិយោគ

Dy Bunnara — Tue, 02 Apr 2024 04:41:04 +0000

រោងចក្រដំឡើងរថយន្តរបស់ជប៉ុន ក៏ដូចជារោងចក្រកែច្នៃគ្រឿងអលង្ការរបស់បារាំងនឹងបង្ហាញវត្តមាននៅតំបន់សេដ្ឋកិច្ចពិសេសរ៉ូយ៉ាល់គ្រុប ភ្នំពេញនៅឆ្នាំ ២០២៤។

ឆ្នាំ២០២៤ ជាឆ្នាំពិសេសមួយ ដែលនឹងមានព្រឹត្តិការណ៍ដ៏គួរឲ្យទន្ទឹងរង់ចាំជាច្រើន។ នេះបើយោងតាមសេចក្តីប្រកាសព័ត៌មានពីតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ។

ព្រឹត្តិការណ៍មួយក្នុងចំណោមនោះគឺ ការបើកសម្ភោធជាផ្លូវការដំណើរការរោងចក្រដំឡើងរថយន្តម៉ាក តូយ៉ូតា (Toyota) ដ៏ល្បីល្បាញនៃក្រុមហ៊ុន Toyota Tsusho Manufacturing (Cambodia) និងការបើកសម្ភោធជាផ្លូវការដំណើរការនៃក្រុមហ៊ុន Metal Jewelry (Cambodia) ដែលជាវិនិយោគិនពីប្រទេសបារាំងដំបូងគេ និងជារោងចក្រផលិតគ្រឿងអលង្ការទាន់សម័យដំបូងគេ ក្នុងតំបន់សេដ្ឋកិច្ចពិសេសរ៉ូយ៉ាល់ គ្រុប ភ្នំពេញ។

តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) ចាប់បង្កើតឡើងក្នុងឆ្នាំ២០០៦ មក បានអភិវឌ្ឍផ្លាស់ប្ដូរមុខមាត់ពីតំបន់ដែលធ្លាប់តែជាវាលស្រែហើយមានសកម្មភាពការងារដ៏តិចតួច មកជាតំបន់ឧស្សាហកម្មឈានមុខគេមួយ។

បច្ចុប្បន្នមានក្រុមហ៊ុនកម្មន្តសាលចំនួន ៨៥ ក្រុមហ៊ុន និងក្រុមហ៊ុនមិនមែនកម្មន្តសាល ចំនួន ២៩ ក្រុមហ៊ុន ដែលកំពុងប្រតិបត្តិការរោងចក្រ ដែលផ្តល់ឱកាសការងារដល់ប្រជាជនខ្មែរដល់ទៅជាង ៤៣ ០០០ នាក់។

ដើម្បីបំពេញនូវតម្រូវការទីតាំងឧស្សាហកម្មដ៏មានគុណភាពខ្ពស់ជុំវិញរាជធានីភ្នំពេញ ក្រុមហ៊ុនរ៉ូយ៉ាល់គ្រុប ដែលគ្រប់គ្រងតំបន់សេដ្ឋកិច្ចពិសេសរ៉ូយ៉ាល់គ្រុប ភ្នំពេញ កំពុងដំណើរការស្នើសុំបង្កើតតំបន់សេដ្ឋកិច្ចពិសេសនៅខេត្តកណ្តាលគឺ រ៉ូយ៉ាល់ គ្រុប កណ្ដាល ឬ Royal Group Kandal Special Economic Zone (RGKSEZ) ដែលលាតសន្ធឹងលើផ្ទៃដីទំហំប្រមាណ ១២០ ហិកតា ខណៈបច្ចុប្បន្ននេះក្រុមហ៊ុនបានចាប់ផ្ដើមដំណើរការងារចាក់ដីបំពេញ ហើយការសាងសង់ហេដ្ឋារចនាសម្ព័ន្ធគោលអាចនឹងត្រូវបញ្ចប់ ដើម្បីទទួលស្វាគមន៍ភ្ញៀវវិនិយោគថ្មីក្នុងឆ្នាំ ២០២៤ នេះ៕

The post ឆ្នាំ ២០២៤ ត្រៀមស្វាគមន៍រោងចក្រដំឡើងរថយន្តជប៉ុន និងកែច្នៃគ្រឿងអលង្ការដំបូងរបស់បារាំងមកវិនិយោគ appeared first on Kampuchea Thmey Daily.

គ្រោងរៀបចំព្រឹត្តិការណ៍ធំៗចំនួនពីរ ទាក់ទាញវិនិយោគិនបារាំងមកវិនិយោគនៅកម្ពុជា

Dy Bunnara — Thu, 21 Mar 2024 02:17:34 +0000

កម្ពុជានិងបារាំងគ្រោងរៀបចំព្រឹត្តិការណ៍ធំៗចំនួនពីរដើម្បីបង្ហាញពីឱកាសនិងទាក់ទាញវិនិយោគិនបារាំងមកដាក់ទុនវិនិយោគនៅប្រទេសកម្ពុជា។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាកាលព្រឹកថ្ងៃពុធ ទី២០ ខែមីនា ឆ្នាំ២០២៤ បានទទួលជួបពិភាក្សាការងារជាមួយលោក ហ្សាក់ ប៉ឺឡេ ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋបារាំង ប្រចាំនៅព្រះរាជាណាចក្រកម្ពុជា។ ក្នុងជំនួបនោះ លោក ស៊ុន ចាន់ថុល និងឯកអគ្គរដ្ឋទូតបារាំង បានពិភាក្សាផ្លាស់ប្ដូរយោបល់លើការរៀបចំទស្សនកិច្ចទាក់ទាញវិនិយោគិន (Roadshow) នៅប្រទេសបារាំង និងវេទិកាធុរកិច្ចកម្ពុជា-បារាំង ក្នុងប្រទេសកម្ពុជា ដែលនឹងមានការចូលរួមពីក្រុមហ៊ុននានានៃប្រទេសទាំងពីរ ដើម្បីជំរុញការវិនិយោគ និងពង្រឹងទំនាក់ទំនងល្អរវាងគ្នានិងគ្នាផងដែរ។

កាលពីអំឡុងខែមករា ឆ្នាំ២០២៤ ថ្លែងនៅក្នុងសន្និសីទសារព័ត៌មានក្នុងដំណើរទស្សនកិច្ចមេដឹកនាំកម្ពុជាទៅប្រទេសបារាំង លោក ហ្សាក់ ប៉ឺឡេ ឯកអគ្គរដ្ឋទូតបារាំងបានគូសបញ្ជាក់ថា មានក្រុមហ៊ុននិងសហគ្រាសបារាំងជាង ២០០ កំពុងវិនិយោគនៅក្នុងប្រទេសកម្ពុជា។

ចំនួននេះតិចតួច គួរតែមានការវិនិយោគច្រើនជាងហ្នឹង។ នេះបើតាមលោក ហ្សាក់ ប៉ឺឡេ។

ឯកអគ្គរដ្ឋទូតបារាំងបានលើកពីកត្តារាំងស្ទះមួយចំនួន ដែលនាំឲ្យក្រុមហ៊ុនបារាំងហាក់មិនសូវមកវិនិយោគនៅប្រទេសកម្ពុជា ក្នុងនោះមានកង្វះព័ត៌មានពីស្ថានភាពវិនិយោគនៅប្រទេសកម្ពុជា កង្វះខាតផ្នែកឡូជីស្ទីក និងកម្លាំងពលកម្ម រួមទាំងបញ្ហាពាក់ព័ន្ធពន្ធដែលប៉ះពាល់ដល់ឱកាសទាក់ទាញវិនិយោគបារាំងនៅកម្ពុជា។

លោកហ្សាក់ ប៉ឺឡេ បានលើកបង្ហាញពីតួនាទីរបស់ស្ថានទូតបារាំង គឺធ្វើយ៉ាងណាជួយជំរុញឲ្យធុរកិច្ចបារាំងមកវិនិយោគឲ្យបានច្រើន។ បើតាមលោក ហ្សាក់ ប៉ឺឡេ ជារៀងរាល់ពីរឆ្នាំម្តង ស្ថានទូតបារាំងតែងតែសហការរៀបចំវេទិកាធុរកិច្ចបារាំងកម្ពុជា ដើម្បីឲ្យអ្នកចូលរួមបានយល់ពីស្ថានភាពនិងឱកាសវិនិយោគនៅប្រទេសកម្ពុជា៕

The post គ្រោងរៀបចំព្រឹត្តិការណ៍ធំៗចំនួនពីរ ទាក់ទាញវិនិយោគិនបារាំងមកវិនិយោគនៅកម្ពុជា appeared first on Kampuchea Thmey Daily.

នេះជាឈ្មោះក្រុមហ៊ុនបារាំងទាំង ១១ ចូលជួបប្រមុខដឹកនាំកម្ពុជាក្នុងដំណើរទស្សនកិច្ចទៅបារាំង

Dy Bunnara — Mon, 22 Jan 2024 03:24:01 +0000

ក្នុងដំណើរទស្សនកិច្ចនៅប្រទេសបារាំង ប្រមុខថ្នាក់ដឹកនាំកម្ពុជាសម្តេចធិបតី ហ៊ុន ម៉ាណែត មានកម្មវិធីយ៉ាងមមាញឹក។ ក្រៅពីមានការជួបសន្ទនាជាផ្លូវការជាមួយមេដឹកនាំប្រទេសបារាំងមានប្រធានាធិបតីបារាំង លោក អេម៉ានុយអែល ម៉ាក្រុង នាយករដ្ឋមន្រ្តីបារាំង ក៏ដូចជាប្រធានរដ្ឋសភា និងប្រធានព្រឹទ្ធសភា សម្តេចធិបតីក៏មានជំនួបដាច់ដោយឡែកជាមួយបណ្តាក្រុមហ៊ុនបារាំងធំៗដែលកំពុងស្វែងរកឱកាសពង្រីកការវិនិយោគនៅប្រទេសកម្ពុជា។

សម្តេចធិបតីបានទទួលជួបជាមួយថ្នាក់ដឹកនាំក្រុមហ៊ុនបារាំងលំដាប់អន្តរជាតិធំៗចំនួន ១១ ក្នុងនោះមានក្រុមហ៊ុន Accor Group, Total Energies, VINCI Group, Alstom, EDF, Orange Group, Puy Du Fou Asia, Blue Circle, ECOLE 42, CMA CGM, PL Vista។

ក្រុមហ៊ុនបារាំងទាំងនេះមានប្រតិបត្តិការលើវិស័យហេដ្ឋារចនាសម្ព័ន្ធ អាកាសចរណ៍ស៊ីវិល សណ្ឋាគារ និងបដិសណ្ឋារកិច្ច ការដឹកជញ្ជូនតាមផ្លូវដែក ថាមពលកកើតឡើងវិញ បច្ចេកវិទ្យាព័ត៌មាន ឌីជីថល និងវិស័យផ្សេងៗទៀត។

នៅក្នុងឱកាសបំពេញទស្សនកិច្ចនៅប្រទេសបារាំង សម្ដេចធិបតីក៏បានអញ្ជើញចូលរួមក្នុងវេទិកាធុរកិច្ចបារាំង-កម្ពុជា ដោយមានការចូលរួមពីក្រុមហ៊ុនចំនួន ១១០ ក្នុងនោះ ៨០ ក្រុមហ៊ុនមកពីប្រទេសបារាំង និង ៣០ ក្រុមហ៊ុនមកពីប្រទេសកម្ពុជា។

វេទិកានេះមានគោលដៅស្វែងយល់ពីសារៈសំខាន់នៃទំនាក់ទំនងទ្វេភាគីរវាងកម្ពុជា និងបារាំង ជាពិសេសការលើកកម្ពស់កាលានុវត្តភាពធុរកិច្ច វិនិយោគ និងពាណិជ្ជកម្ម។

ជាមួយគ្នានេះ សម្ដេចធិបតីក៏បានអញ្ជើញជាអធិបតីក្នុងពិធីចុះហត្ថលេខាលើឯកសារសហប្រតិបត្តិការក្នុងវិស័យឯកជនចំនួន ៦ ដើម្បីជំរុញការអភិវឌ្ឍសេដ្ឋកិច្ចរវាងកម្ពុជា និងប្រទេសនិយាយភាសាបារាំង ក៏ដូចជាគាំទ្រដល់ធុរកិច្ច ប្រទេសនិយាយភាសាបារាំង តាមរយៈការរៀបចំជំនួបពាណិជ្ជកម្ម សន្និសីទ សិក្ខាសាលា និងព្រឹត្តិការណ៍ធុរកិច្ច។

ដោយឡែកនៅក្នុងកិច្ចប្រជុំវេទិកាសេដ្ឋកិច្ចពិភពលោករៀបចំនៅទីក្រុងដាវ៉ូស ប្រទេសស្វីស ប្រមុខដឹកនាំកម្ពុជាក៏បានឆ្លៀតជួបតំណាងក្រុមហ៊ុនអន្តរជាតិធំៗចំនួន ៩ ក្នុងនោះមានដូចជា ក្រុមហ៊ុន Hawkeye 360 Inc (អភិវឌ្ឍបច្ចេកវិទ្យាព័ត៌មាន លំហភូមិសាស្ត្រ) ក្រុមហ៊ុន Shenzhen Power Solution (វិនិយោគផលិតផលអំពូលសូឡាមានតម្លៃសមរម្យលំដាប់ពិភពលោក) ក្រុមហ៊ុន Trip.com (ជាវេបសាយធ្វើដំណើរមួយឈានមុខលើពិភពលោក) ក្រុមហ៊ុន Wilmar International (ធុរកិច្ចលើវិស័យកសិកម្ម) ក្រុមហ៊ុន Grab (វិនិយោគបច្ចេកវិទ្យាទូរសព្ទចល័តផ្តល់សេវាកម្ម ដឹកជញ្ជូនអាហារនិងការទូទាត់តាមប្រព័ន្ធឌីជីថល) និងបណ្តាក្រុមហ៊ុនមួយចំនួនទៀត។

ក្នុងជំនួបនោះថ្នាក់ដឹកនាំក្រុមហ៊ុនបានជម្រាបសម្តេចធិបតីអំពីសក្តានុពលវិនិយោគ ដោយបង្ហាញបំណងពង្រីកការវិនិយោគដែលមានស្រាប់នៅកម្ពុជា និងសិក្សាអំពីលទ្ធភាពបោះទុនវិនិយោគថ្មីបន្ថែមទៀត៕

The post នេះជាឈ្មោះក្រុមហ៊ុនបារាំងទាំង ១១ ចូលជួបប្រមុខដឹកនាំកម្ពុជាក្នុងដំណើរទស្សនកិច្ចទៅបារាំង appeared first on Kampuchea Thmey Daily.

សហគ្រាសបារាំង Archives - Kampuchea Thmey Daily

តើ​ដំណើរ​ទស្សនកិច្ច​រដ្ឋមន្រ្តី​បារាំង​មក​កម្ពុជា​ សម្រេច​បាន​លទ្ធផល​អ្វី​ខ្លះ?

បណ្តាញ​ក្រុមហ៊ុន​បារាំង​ទាំង​តូច​ទាំង​ធំ​ប្រមាណ ២០០ កំពុង​មាន​វត្តមាន​ធ្វើ​អាជីវកម្ម​នៅ​កម្ពុជា

សហគ្រិន​មក​ពី​បារាំង ជ្រើសរើស​ព្រលាន​យន្តហោះ​តេជោ​ បើក​អាជីវកម្ម​ជំនួញ​ដំបូង​នៅ​កម្ពុជា

ក្រុមហ៊ុន​បារាំងជំនាញ​ ផលិត​​កែច្នៃ​គ្រឿងអលង្ការ​ បើក​​ដំណើរការ​​រោងចក្រ​នៅ​កម្ពុជា

ឯកអគ្គរដ្ឋទូតបារាំង សន្យា​ជំរុញ​នាំ​វិនិយោគិនបារាំងមក​កម្ពុជាឱ្យបានកាន់តែច្រើន

គ្រោង​រៀបចំ​ព្រឹត្តិការណ៍​ធំៗ​ចំនួន​ពីរ​ ទាក់ទាញ​វិនិយោគិន​​បារាំង​មក​វិនិយោគ​នៅ​កម្ពុជា